DKR-KABUM-02-KHA-018

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i rnal 'byor byin rlabs bdud rtsi'i snang ba
Location	dil mgo mkhyen brtse bka' 'bum Volume 2, Text 18, Pages 119-122 (Folios 1a1 to 4a5)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Bla ma'i rnal 'byor byin rlabs bdud rtsi'i snang ba. In Skyabs rje dil mgo mkhyen brtse rin po che'i bka' 'bum, Vol. 2: 119-122. Delhi: Shechen Publications, 1994.
Genre	Guru Yoga Texts - bla ma'i rnal 'byor
Colophon	།ཞེས་པའང་སྐྱབས་རྗེ་མདོ་ཁམས་པའི་ཞལ་སློབ་དམ་པའི་ཡོན་ཏན་ཟླ་བ་ཚེས་པས་ལེགས་པར་བརྒྱན་པ་ཆོས་རྒྱལ་སྤྲུལ་པའི་སྐུ་ངག་དབང་མི་ཕམ་ཡོན་ཏན་རྒྱ་མཚོས་ནན་ཏན་ཆེན་པོའི་གསུང་གིས་རྟེན་དང་བཅས་ཏེ་བསྐུལ་བ་བཞིན་རིས་མེད་མཁས་གྲུབ་རྒྱ་མཚོས་རྗེས་སུ་གཟུང་བའི་སྐལ་བཟང་ཙམ་ཐོབ་པ་འཇིགས་མེད་མཁྱེན་བརྩེའི་འོད་ཟེར་དུ་འབོད་པས་འཕགས་ཡུལ་རྡོ་རྗེ་གདན་གྱི་གཙུག་ལག་ཁང་གི་འདབས་རོལ་དུ་བྲིས་པ་སྐུ་གསུམ་བླ་མའི་ཡེ་ཤེས་ཐུགས་རྒྱུད་ལ་སད་པའི་རྒྱུར་གྱུར་ཅིག །སརྦ་མངྒ་ལཾ། དགེའོ།།
	/zhes pa'ang skyabs rje mdo khams pa'i zhal slob dam pa'i yon tan zla ba tshes pas legs par brgyan pa chos rgyal sprul pa'i sku ngag dbang mi pham yon tan rgya mtshos nan tan chen po'i gsung gis rten dang bcas te bskul ba bzhin ris med mkhas grub rgya mtshos rjes su gzung ba'i skal bzang tsam thob pa 'jigs med mkhyen brtse'i 'od zer du 'bod pas 'phags yul rdo rje gdan gyi gtsug lag khang gi 'dabs rol du bris pa sku gsum bla ma'i ye shes thugs rgyud la sad pa'i rgyur gyur cig__/sarba mang+ga laM/__dge'o//

Tibetan Text

Wylie

[edit]

༄༅། བླ་མའི་རྣལ་འབྱོར་བྱིན་རླབས་བདུད་རྩིའི་སྣང་བ་བཞུགས། །ཨེ་མ་ཧོ། སྣོད་བཅུད་རྣམ་དག་རང་སྣང་པདྨ་འོད། །ལྷུན་རྫོགས་ཟངས་མདོག་དཔལ་རིའི་ཞིང་གི་དབུས། །པད་ཉི་རོ་སྟེང་གཞི་ལུས་རྣལ་འབྱོར་མ། །དམར་གསལ་གཅེར་བུ་གྲི་ཐོད་རུས་རྒྱན་ཅན། །སྤྱི་བོར་སངས་རྒྱས་ཀུན་འདུས་པདྨ་འབྱུང༌། །དབྱེར་མེད་པདྨ་འོད་གསལ་མདོ་སྔགས་གླིང༌། །དཀར་དམར་མཛེས་འཛུམ་མཚན་དཔེ་གཟི་བྱིན་འབར། །ཕྱག་གཡས་སྡིགས་མཛུབ་དང་བཅས་རྡོ་རྗེ་འཕྱར། །གཡོན་པས་མཉམ་བཞག་ཐོད་བུམ་བདུད་རྩིས་བཀང༌། །མཆན་གཡོན་ཁ་ཊྭཱཾ་ཞབས་ཟུང་རོལ་སྟབས་བཅས། །པདྨ་འདབ་སྟོང་ཟླ་བའི་སྟེང་ན་རོལ། །འཇའ་ཟེར་འོད་ཀྱི་ཐིག་ལེ་འཁྲུགས་པའི་ཀློང༌། །ཐུབ་པའི་རྒྱལ་ཚབ་མཁན་ཆེན་ཞི་བ་འཚོ། །གསང་ཆེན་རྒྱུད་སྡེའི་ཤིང་རྟ་རྒྱལ་པོ་ཛཿ །ཟབ་གསང་ལུང་གི་སྒོ་འབྱེད་སངས་རྒྱས་གསང༌། །མན་ངག་ཐེག་རྩེའི་ཤིང་རྟ་དགའ་རབ་རྗེ། །མཐའ་བསྐོར་བྱང་སེམས་མངའ་བདག་མར་མེ་མཛད། །བླ་མ་ས་ཆེན་དགྱེས་མཛད་ལོ་ཙཱ་ཆེ། །ཁྱུང་པོ་རྣལ་འབྱོར་དམ་པ་སངས་རྒྱས་དང༌། །མ་གཅིག་ལབ་སྒྲོན་ཇོ་ཞལ་དོལ་པོ་པ། །མཁས་གྲུབ་ཨོ་རྒྱན་མི་ཏྲ་ཛོ་ཀི་སོགས། །གསར་རྙིང་འཕགས་ཚོགས་རྒྱ་མཚོའི་སྤྲིན་འཕྲོ་བ། །དྲན་པ་ཙམ་གྱིས་ཡེ་ཤེས་སྣང་བ་སྟེར། །མངོན་སུམ་བྱིན་རླབས་རྡོ་རྗེའི་སྐུ་རུ་གསལ། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་རློབ་ཕྱིར་གཤེགས་སུ་གསོལ། །གུ་རུ་པདྨ་སིདྡྷི་ཧཱུྃ༔ ཞེས་ཚིག་བདུན་གསོལ་འདེབས་ཀྱིས་དམ་ཡེ་དབྱེར་མེད་སྤྱན་དྲངས་ལ་བསྟིམ། ཧོ། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང༌། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་ཅན་ལ། །དགོས་པ་གསུམ་ཕྱིར་ལུས་འབུལ་ལོ། །ཚེ་རབས་བགྲང་བའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །སོགས་ཀྱིས་བསགས་སྦྱངས་བྱས་ནས། ཀུན་ཁྱབ་ཆོས་སྐུའི་སྟོན་པ་འོད་མི་འགྱུར། །རང་བྱུང་དཀྱིལ་འཁོར་ཁྱབ་བདག་མཉྫུ་ཤྲཱི། །པདྨ་འཇམ་པའི་རྡོ་རྗེ་ཐོད་ཕྲེང་རྩལ། །དབྱེར་མེད་གར་གྱི་དབང་ཕྱུག་མདོ་སྔགས་གླིང༌། །ཡེ་ཤེས་སྒྱུ་འཕྲུལ་དྲྭ་བའི་རོལ་རྩེད་ལས། །འཇམ་དཔལ་བཤེས་གཉེན་པཎ་ཆེན་བི་མ་ལ། །མངའ་བདག་ཁུ་དབོན་ཟབ་གཏེར་རྒྱལ་པོ་ལྔ། །ཀློང་ཆེན་རབ་འབྱམས་ཀུན་མཁྱེན་འཇིགས་མེད་གླིང༌། །ཇོ་བོའི་སྲས་གཅིག་འབྲོམ་སྟོན་རྒྱལ་བའི་འབྱུང༌། །གངས་ཅན་རྡོ་རྗེ་འཛིན་རྒྱལ་གྲགས་རྒྱལ་དང༌། །མི་ལའི་ཐུགས་སྲས་དྭགས་པོ་རས་ཆུང་པ། །གྲུབ་ཆེན་ཐང་རྒྱལ་སྙེ་མདོ་ཐམས་ཅད་མཁྱེན། །ཐུགས་སྲས་ཟླ་བ་ལ་སོགས་རྒྱ་བོད་ཀྱི། །མཁས་གྲུབ་ཀུན་འདུས་འཇམ་དབྱངས་མཁྱེན་བརྩེའི་དབང༌། །མཆོག་གི་རྣམ་འཕྲུལ་ཆོས་ཀྱི་བློ་གྲོས་རྗེའི། །གསང་གསུམ་བྱིན་ཐོབ་གར་དབང་མདོ་སྔགས་གླིང༌། །ཁྱབ་བདག་བླ་མའི་ཞབས་ལ་གསོལ་བ་འདེབས། །སངས་རྒྱས་ཀུན་གྱི་སྤྱི་གཟུགས་བླ་མ་རྗེར། །ཡིད་ཆེས་དད་པས་རྟག་ཏུ་གསོལ་འདེབས་ན། །འདི་ཕྱི་བར་དོའི་གནས་སྐབས་ཐམས་ཅད་དུ། །འབྲལ་མེད་ཡེ་ཤེས་སྤྱན་གྱིས་གཟིགས་སུ་གསོལ། །བདེ་སྐྱིད་མི་རྟག་ཞེན་མེད་བླ་མའི་གར། །སྡུག་བསྔལ་སྡིག་སྒྲིབ་ཕྱགས་ཤིང་བླ་མས་བསྩལ། །སྣང་སྲིད་བླ་མའི་ཡེ་ཤེས་རོལ་གར་དུ། །སྙིང་ནས་ངེས་པ་རྙེད་པས་གསོལ་བ་འདེབས། །རང་རིག་འོད་གསལ་ཆོས་སྐུའི་བླ་མ་ཉིད། །རྟག་ཏུ་འཕོ་མེད་སྙིང་གི་ཐིག་ལེར་བཞུགས། །ཡིད་ཆེས་རང་ངོ་ཤེས་པས་གསོལ་འདེབས་ན། །དགོངས་བརྒྱུད་ཆོས་སྐུའི་བྱིན་རླབས་སྩོལ་ཅིག་ཀྱཻ། །གདོད་ནས་འདུ་འབྲལ་མེད་པའི་བླ་མ་ནི། །མངོན་སུམ་རང་ཞལ་མཇལ་བའི་གསོལ་འདེབས་ཀྱིས། །འཁྲུལ་པ་རང་གྲོལ་ཟང་ཐལ་ཆོས་སྐུའི་ཀློང༌། །གཉིས་མེད་བྱིན་གྱིས་རློབ་པར་མཛད་དུ་གསོལ། །ཞེས་དང༌། །སྐབས་སུ། རྗེ་བཙུན་གུ་རུ་རིན་པོ་ཆེ༔ ཁྱེད་ནི་སངས་རྒྱས་ཐམས་ཅད་ཀྱི༔ ཐུགས་རྗེ་བྱིན་རླབས་འདུས་པའི་དཔལ༔ སེམས་ཅན་ཡོངས་ཀྱི་མགོན་གཅིག་པུ༔ ལུས་དང་ལོངས་སྤྱོད་བློ་སྙིང་བྲང༔ ལྟོས་པ་མེད་པར་ཁྱེད་ལ་འབུལ༔ འདི་ནས་བྱང་ཆུབ་མ་ཐོབ་བར༔ སྐྱིད་སྡུག་ལེགས་ཉེས་མཐོ་དམན་ཀུན༔ རྗེ་བཙུན་ཆེན་པོ་པད་འབྱུང་མཁྱེན༔ ཞེས་ཅི་ནུས་དང༌། བདག་ལ་རེ་ས་གཞན་ན་མེད༔ ད་ལྟ་དུས་ངན་སྙིགས་མའི་འགྲོ༔ མི་བཟད་སྡུག་བསྔལ་འདམ་དུ་བྱིང༔ འདི་ལས་སྐྱོབས་ཤིག་མ་ཧཱ་གུ་རུ༔ དབང་བཞི་བསྐུར་ཅིག་བྱིན་རླབས་ཅན༔ རྟོགས་པ་སྤོར་ཅིག་ཐུགས་རྗེ་ཅན༔ སྒྲིབ་གཉིས་སྦྱོངས་ཤིག་ནུས་མཐུ་ཅན༔ ནམ་ཞིག་ཚེ་ཡི་དུས་བྱས་ཚེ༔ རང་སྣང་རྔ་ཡབ་དཔལ་རིའི་ཞིང༔ ཟུང་འཇུག་སྤྲུལ་པའི་ཞིང་ཁམས་སུ༔ གཞི་ལུས་རྡོ་རྗེ་རྣལ་འབྱོར་མ༔ གསལ་འཚེར་འོད་ཀྱི་གོང་བུ་རུ༔ གྱུར་ནས་རྗེ་བཙུན་པད་འབྱུང་དང༔ དབྱེར་མེད་ཆེན་པོར་སངས་རྒྱས་ཏེ༔ བདེ་དང་སྟོང་པའི་ཆོ་འཕྲུལ་གྱི༔ ཡེ་ཤེས་ཆེན་པོའི་རོལ་པ་ལས༔ ཁམས་གསུམ་སེམས་ཅན་མ་ལུས་པ༔ འདྲེན་པའི་དེད་དཔོན་དམ་པ་རུ༔ རྗེ་བཙུན་པདྨས་དབུགས་དབྱུང་གསོལ༔ གསོལ་བ་སྙིང་གི་དཀྱིལ་ནས་འདེབས༔ ཁ་ཙམ་ཚིག་ཙམ་མ་ཡིན་ནོ༔ བྱིན་རླབས་ཐུགས་ཀྱི་ཀློང་ནས་སྩོལ༔ བསམ་དོན་འགྲུབ་པར་མཛད་དུ་གསོལ༔ སྙིང་ཐིག་གི་བླ་མའི་གསོལ་འདེབས་རིགས་ཀྱང་སྦྱར། ཐུན་མཐར། ཨོཾ་ཨཱཿཧཱུྃ་བཛྲ་གུ་རུ་པདྨ་པ་ར་ཙིཏྟ་བཛྲ་སརྦ་སིདྡྷི་ཧཱུྃ༔ ཞེས་མཚན་སྔགས་ཅི་ནུས་བཟླ། དབང་བཞི་རྒྱས་པར་ལེན་ན་སྙིང་ཐིག་ཕྱི་སྒྲུབ་བླ་མའི་རྣལ་འབྱོར་ལྟར་བྱ། བསྡུ་ན། འཁོར་རྣམས་འོད་ཞུ་གཙོ་བོའི་སྐུ་ལ་འདུས། །སངས་རྒྱས་ཀུན་གྱི་སྤྱི་གཟུགས་བླ་མ་རྗེའི། །གནས་གསུམ་རྡོ་རྗེའི་ཡིག་འབྲུ་སྤྲོ་བསྡུ་ཡིས། །དབང་བཞི་མངོན་བསྩལ་སྒྲིབ་བཞིའི་དྲི་མ་བཀྲུས། །ལམ་བཞིའི་སྣོད་གྱུར་སྐུ་བཞིའི་འབྲས་ཐོབ་པའི། །སྐལ་པ་མཆོག་གི་གནས་སུ་དབུགས་དབྱུང་གྱུར། །རང་ཉིད་རྣལ་འབྱོར་མ་དཔལ་བླ་མར་ཐིམ། །བླ་མ་འོད་གསལ་དབྱིངས་སུ་འཇའ་ལྟར་ཡལ། །ཨ་ཨ་ཨ། སྣང་བ་མ་འགགས་བླ་མའི་ཡེ་ཤེས་སྐུ། །གྲགས་སྟོང་མི་དམིགས་ནཱ་དའི་གསུང་རྡོ་རྗེ། །འོད་གསལ་མཁའ་ཁྱབ་དགོངས་པ་མི་གཡོ་བའི། །རྡོ་རྗེ་གསུམ་གྱི་རོལ་པར་འབྱམས་ཀླས་ཤར། །སྣང་སྤྱོད་དག་པ་བླ་མའི་སྐུ་དང་ཞིང་གི་ངོ་བོར་བལྟས་ནས་བསྔོ་སྨོན་ཇི་ལྟར་རིགས་པས་མཚམས་སྦྱར། རྗེས་ཐོབ་བསགས་སྦྱོང་གི་རྣལ་འབྱོར་ལ་འབད་པས་དོན་ཡོད་པར་བྱའོ། །མདོར་ན་བླ་མ་རང་རིག་དབྱེར་མེད་ཤེས་པས་མོས་གུས་དང་སེམས་ཀྱི་གཤིས་ལུགས་ལྟ་བའི་ཉམས་ལེན་ཁོ་ན་ལ་འབད། བོགས་འབྱིན་གྱི་ཚུལ་དུ་འདི་ཉིད་ཉམས་སུ་ལེན་པ་གཅེས་སོ། །ཞེས་པའང་སྐྱབས་རྗེ་མདོ་ཁམས་པའི་ཞལ་སློབ་དམ་པའི་ཡོན་ཏན་ཟླ་བ་ཚེས་པས་ལེགས་པར་བརྒྱན་པ་ཆོས་རྒྱལ་སྤྲུལ་པའི་སྐུ་ངག་དབང་མི་ཕམ་ཡོན་ཏན་རྒྱ་མཚོས་ནན་ཏན་ཆེན་པོའི་གསུང་གིས་རྟེན་དང་བཅས་ཏེ་བསྐུལ་བ་བཞིན་རིས་མེད་མཁས་གྲུབ་རྒྱ་མཚོས་རྗེས་སུ་གཟུང་བའི་སྐལ་བཟང་ཙམ་ཐོབ་པ་འཇིགས་མེད་མཁྱེན་བརྩེའི་འོད་ཟེར་དུ་འབོད་པས་འཕགས་ཡུལ་རྡོ་རྗེ་གདན་གྱི་གཙུག་ལག་ཁང་གི་འདབས་རོལ་དུ་བྲིས་པ་སྐུ་གསུམ་བླ་མའི་ཡེ་ཤེས་ཐུགས་རྒྱུད་ལ་སད་པའི་རྒྱུར་གྱུར་ཅིག །སརྦ་མངྒ་ལཾ། དགེའོ།། །།

[edit]

@#/______bla ma'i rnal 'byor byin rlabs bdud rtsi'i snang ba bzhugs/__/e ma ho/__snod bcud rnam dag rang snang pad+ma 'od/__/lhun rdzogs zangs mdog dpal ri'i zhing gi dbus/__/pad nyi ro steng gzhi lus rnal 'byor ma/__/dmar gsal gcer bu gri thod rus rgyan can/__/spyi bor sangs rgyas kun 'dus pad+ma 'byung*/__/dbyer med pad+ma 'od gsal mdo sngags gling*/__/dkar dmar mdzes 'dzum mtshan dpe gzi byin 'bar/__/phyag g.yas sdigs mdzub dang bcas rdo rje 'phyar/__/g.yon pas mnyam bzhag thod bum bdud rtsis bkang*/__/mchan g.yon kha T+wAM zhabs zung rol stabs bcas/__/pad+ma 'dab stong zla ba'i steng na rol/__/'ja' zer 'od kyi thig le 'khrugs pa'i klong*/__/thub pa'i rgyal tshab mkhan chen zhi ba 'tsho/__/gsang chen rgyud sde'i shing rta rgyal po dzaH__/zab gsang lung gi sgo 'byed sangs rgyas gsang*/__/man ngag theg rtse'i shing rta dga' rab rje/__/mtha' bskor byang sems mnga' bdag mar me mdzad/__/bla ma sa chen dgyes mdzad lo tsA che/__/khyung po rnal 'byor dam pa sangs rgyas dang*/__/ma gcig lab sgron jo zhal dol po pa/__/mkhas grub o rgyan mi tra dzo ki sogs/__/gsar rnying 'phags tshogs rgya mtsho'i sprin 'phro ba/__/dran pa tsam gyis ye shes snang ba ster/__/mngon sum byin rlabs rdo rje'i sku ru gsal/__hU~M/__o rgyan yul gyi nub byang mtshams/__/pad+ma ge sar sdong po la/__/ya mtshan mchog gi dngos grub brnyes/__/pad+ma 'byung gnas zhes su grags/__/'khor du mkha' 'gro mang pos bskor/__/khyed kyi rjes su bdag sgrub kyis/__/byin gyis rlob phyir gshegs su gsol/__/gu ru pad+ma sid+d+hi hU~M:__zhes tshig bdun gsol 'debs kyis dam ye dbyer med spyan drangs la bstim/__ho/__rdo rje slob dpon sangs rgyas dpal/__/dus gsum bzhugs la phyag 'tshal lo/__/mchog gsum bsten pa'i zhing gyur la/__/gnyis med yid kyis skyabs su mchi/__/dngos 'byor yid kyis rnam sprul pa'i/__/dag pa'i mchod pa bzhes su gsol/__/dngos grub chu bo gcod pa'i gegs/__/nyes byas ma lus bshags par bgyi/__/phyogs bcu 'khor gsum dag pa'i chos/__/ma chags spyod la rjes yi rang*/__/dag pa'i mtha' bzhi dri ma med/__/rdzogs pa'i byang chub sems bskyed do/__/bde gshegs dbang phyug sems can la/__/dgos pa gsum phyir lus 'bul lo/__/tshe rabs bgrang ba'i las rnams kun/__/bsdus te byang chub chen por bsngo/__/sogs kyis bsags sbyangs byas nas/__kun khyab chos sku'i ston pa 'od mi 'gyur/__/rang byung dkyil 'khor khyab bdag many+dzu shrI/__/pad+ma 'jam pa'i rdo rje thod phreng rtsal/__/dbyer med gar gyi dbang phyug mdo sngags gling*/__/ye shes sgyu 'phrul drwa ba'i rol rtsed las/__/'jam dpal bshes gnyen paN chen bi ma la/__/mnga' bdag khu dbon zab gter rgyal po lnga/__/klong chen rab 'byams kun mkhyen 'jigs med gling*/__/jo bo'i sras gcig 'brom ston rgyal ba'i 'byung*/__/gangs can rdo rje 'dzin rgyal grags rgyal dang*/__/mi la'i thugs sras dwags po ras chung pa/__/grub chen thang rgyal snye mdo thams cad mkhyen/__/thugs sras zla ba la sogs rgya bod kyi/__/mkhas grub kun 'dus 'jam dbyangs mkhyen brtse'i dbang*/__/mchog gi rnam 'phrul chos kyi blo gros rje'i/__/gsang gsum byin thob gar dbang mdo sngags gling*/__/khyab bdag bla ma'i zhabs la gsol ba 'debs/__/sangs rgyas kun gyi spyi gzugs bla ma rjer/__/yid ches dad pas rtag tu gsol 'debs na/__/'di phyi bar do'i gnas skabs thams cad du/__/'bral med ye shes spyan gyis gzigs su gsol/__/bde skyid mi rtag zhen med bla ma'i gar/__/sdug bsngal sdig sgrib phyags shing bla mas bstsal/__/snang srid bla ma'i ye shes rol gar du/__/snying nas nges pa rnyed pas gsol ba 'debs/__/rang rig 'od gsal chos sku'i bla ma nyid/__/rtag tu 'pho med snying gi thig ler bzhugs/__/yid ches rang ngo shes pas gsol 'debs na/__/dgongs brgyud chos sku'i byin rlabs stsol cig kyai/__/gdod nas 'du 'bral med pa'i bla ma ni/__/mngon sum rang zhal mjal ba'i gsol 'debs kyis/__/'khrul pa rang grol zang thal chos sku'i klong*/__/gnyis med byin gyis rlob par mdzad du gsol/__/zhes dang*/__/skabs su/__rje btsun gu ru rin po che:__khyed ni sangs rgyas thams cad kyi:__thugs rje byin rlabs 'dus pa'i dpal:__sems can yongs kyi mgon gcig pu:__lus dang longs spyod blo snying brang:__ltos pa med par khyed la 'bul:__'di nas byang chub ma thob bar:__skyid sdug legs nyes mtho dman kun:__rje btsun chen po pad 'byung mkhyen:__zhes ci nus dang*/__bdag la re sa gzhan na med:__da lta dus ngan snyigs ma'i 'gro:__mi bzad sdug bsngal 'dam du bying:__'di las skyobs shig ma hA gu ru:__dbang bzhi bskur cig byin rlabs can:__rtogs pa spor cig thugs rje can:__sgrib gnyis sbyongs shig nus mthu can:__nam zhig tshe yi dus byas tshe:__rang snang rnga yab dpal ri'i zhing:__zung 'jug sprul pa'i zhing khams su:__gzhi lus rdo rje rnal 'byor ma:__gsal 'tsher 'od kyi gong bu ru:__gyur nas rje btsun pad 'byung dang:__dbyer med chen por sangs rgyas te:__bde dang stong pa'i cho 'phrul gyi:__ye shes chen po'i rol pa las:__khams gsum sems can ma lus pa:__'dren pa'i ded dpon dam pa ru:__rje btsun pad+mas dbugs dbyung gsol:__gsol ba snying gi dkyil nas 'debs:__kha tsam tshig tsam ma yin no:__byin rlabs thugs kyi klong nas stsol:__bsam don 'grub par mdzad du gsol:__snying thig gi bla ma'i gsol 'debs rigs kyang sbyar/__thun mthar/__oM AHhU~M badz+ra gu ru pad+ma pa ra tsit+ta badz+ra sarba sid+d+hi hU~M:__zhes mtshan sngags ci nus bzla/__dbang bzhi rgyas par len na snying thig phyi sgrub bla ma'i rnal 'byor ltar bya/__bsdu na/__'khor rnams 'od zhu gtso bo'i sku la 'dus/__/sangs rgyas kun gyi spyi gzugs bla ma rje'i/__/gnas gsum rdo rje'i yig 'bru spro bsdu yis/__/dbang bzhi mngon bstsal sgrib bzhi'i dri ma bkrus/__/lam bzhi'i snod gyur sku bzhi'i 'bras thob pa'i/__/skal pa mchog gi gnas su dbugs dbyung gyur/__/rang nyid rnal 'byor ma dpal bla mar thim/__/bla ma 'od gsal dbyings su 'ja' ltar yal/__/a a a/__snang ba ma 'gags bla ma'i ye shes sku/__/grags stong mi dmigs nA da'i gsung rdo rje/__/'od gsal mkha' khyab dgongs pa mi g.yo ba'i/__/rdo rje gsum gyi rol par 'byams klas shar/__/snang spyod dag pa bla ma'i sku dang zhing gi ngo bor bltas nas bsngo smon ji ltar rigs pas mtshams sbyar/__rjes thob bsags sbyong gi rnal 'byor la 'bad pas don yod par bya'o/___/mdor na bla ma rang rig dbyer med shes pas mos gus dang sems kyi gshis lugs lta ba'i nyams len kho na la 'bad/__bogs 'byin gyi tshul du 'di nyid nyams su len pa gces so/___/zhes pa'ang skyabs rje mdo khams pa'i zhal slob dam pa'i yon tan zla ba tshes pas legs par brgyan pa chos rgyal sprul pa'i sku ngag dbang mi pham yon tan rgya mtshos nan tan chen po'i gsung gis rten dang bcas te bskul ba bzhin ris med mkhas grub rgya mtshos rjes su gzung ba'i skal bzang tsam thob pa 'jigs med mkhyen brtse'i 'od zer du 'bod pas 'phags yul rdo rje gdan gyi gtsug lag khang gi 'dabs rol du bris pa sku gsum bla ma'i ye shes thugs rgyud la sad pa'i rgyur gyur cig__/sarba mang+ga laM/__dge'o//___//