JKW-KABUM-22-ZA-012-018

🚧 This website is under continued development. We appreciate your patience!

Previous Text Back to Volume PageNext Text

Wylie title	'dun cing smon par bya ba'i rdo rje'i thol glu yongs rdzogs bstan pa'i lam rim
Location	mkhyen brtse'i bka' 'bum Volume 22, sde tshan 12, Text 18, Pages 395-397 (Folios 26a3 to 27a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'dun cing smon par bya ba'i rdo rje'i thol glu yongs rdzogs bstan pa'i lam rim. In 'jam dbyangs mkhyen brtse'i dbang po'i bka' 'bum, Vol. 22: 395-397. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་པའང་སྤྲུལ་པའི་རྒྱལ་པོ་ཕྱག་ན་པདྨ་སྲོང་བཙན་སྒམ་པོའི་སྒྲུབ་གནས་ཕ་ཝང་ཁ་བྱང་ཆུབ་ཤིང་གི་ནགས་ཁྲོད་དུ་གནས་འབྲེལ་ལྷགས་པའི་ཚེ་ཚོགས་ཀྱི་འདུ་བའི་རྗེས་ཐོག་ཏུ་བྲིས་པ་སྟེ་ས་ཟླའི་ཚེས་བཅུ་ལའོ།།
	zhes pa'ang sprul pa'i rgyal po phyag na pad+ma srong btsan sgam po'i sgrub gnas pha wang kha byang chub shing gi nags khrod du gnas 'brel lhags pa'i tshe tshogs kyi 'du ba'i rjes thog tu bris pa ste sa zla'i tshes bcu la'o

1 Texts in this Section (sde tshan or chos tshan)

18 395-397	འདུན་ཅིང་སྨོན་པར་བྱ་བའི་རྡོ་རྗེའི་ཐོལ་གླུ་ཡོངས་རྫོགས་བསྟན་པའི་ལམ་རིམ། 'dun cing smon par bya ba'i rdo rje'i thol glu yongs rdzogs bstan pa'i lam rim Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

འདུན་ཅིང་སྨོན་པར་བྱ་བའི་རྡོ་རྗེའི་ཐོལ་གླུ་ཡོངས་རྫོགས་བསྟན་པའི་ལམ་རིམ་ཞེས་བྱ་བ། ཨ་ཧོ། གང་མཚན་གྱི་བདུད་རྩི་ཐོབ་པ་ལས། །སྲིད་ཞི་ཡི་ཚ་གདུང་རིང་བཅིལ་ནས། །རྣམ་གྲོལ་གྱི་ཨུཏྤལ་དར་བབས་པའི། །མགོན་ཕྱག་ན་པདྨོས་དགེ་ལེགས་མཛོད། །རྗེ་དེ་དང་ངོ་བོ་དབྱེར་མེད་ཀྱང་། །ཚུ་རོལ་གྱི་མཐོང་ངོར་ས་སྤྱོད་གཟུགས། །མཚན་སྲོང་བཙན་སྒམ་པོར་རབ་འབར་བ། །གངས་ཅན་གྱི་ལྷ་གཅིག་དེ་ལ་འདུད། །སྐྱབས་ཁྱོད་ལ་སྙིང་ནས་གསོལ་བཏབ་པས། །བདག་གཞན་ཀུན་སྐྱེ་དང་ཚེ་རབས་སུ། །མི་ཁོམ་པའི་གནས་ལས་རབ་ལྡོག་ཅིང་། །རྟེན་དལ་འབྱོར་ཚང་བའི་ལུས་ཐོབ་ཤོག །དེར་ནམ་ཡང་མི་རྟག་འཆི་བ་དང་། །དུས་དེ་ཚེ་བཟློག་ཐབས་བྲལ་བ་ཡི། །ངང་ཚུལ་ལ་བསམ་ནས་ཡིད་བྱུང་སྟེ། །འཕྲལ་དམ་པའི་ཆོས་ལ་འཇུག་པར་ཤོག །གནས་འཁོར་བ་མཐོ་དམན་གར་སྐྱེས་ཀྱང་། །སྡུག་བསྔལ་གྱི་དམ་འོག་ཆུད་པའི་ཕྱིར། །དཔེ་མེ་འོབས་ལྟ་བུར་མཐོང་བ་ཡིས། །བཅོས་མིན་གྱི་ངེས་འབྱུང་སྐྱེ་བར་ཤོག །ལས་དཀར་ནག་ས་བོན་བཏབ་པ་ལས། །བདེ་སྡུག་གི་འབྲས་བུ་སྨིན་ཤེས་ནས། །བླང་དོར་གྱི་ལག་ལེན་འཛོལ་མེད་པས། །མངོན་མཐོ་ཡི་གྲོང་དུ་བཀྲི་བར་ཤོག །མཚན་ཉིད་དང་ལྡན་པའི་བཤེས་གཉེན་ནི། །སྲིད་ཞི་ཡི་དགེ་ལེགས་ཐམས་ཅད་ཀྱི། །རྩ་བ་རུ་ངེས་པ་རྙེད་པའི་བློས། །ཚུལ་བཞིན་དུ་གུས་པས་བསྙེན་པར་ཤོག །དུས་འདི་ནས་བྱང་ཆུབ་སྙིང་པོའི་བར། །མཐའ་ཀླས་པའི་སེམས་ཅན་ཀུན་དོན་དུ། །སྐྱབས་དཀོན་མཆོག་རིན་ཆེན་རྣམ་གསུམ་ལ། །སྙིང་ཐག་པ་ནས་སྐྱབས་སུ་འགྲོ་བར་ཤོག །ཡུལ་ཚད་མེད་མ་གྱུར་འགྲོ་ཀུན་ལ། །དུས་ཚད་མེད་སངས་རྒྱས་ཐོབ་ཀྱི་བར། །བློ་ཚད་མེད་རྣམ་བཞི་ལེགས་བསྒོམས་པས། །རྒྱུད་ཐེག་ཆེན་སྣོད་དུ་འགྱུར་བར་ཤོག །གཞན་དོན་གྱི་ཕྱིར་དུ་ཐར་འདོད་པའི། །ཆོས་ཀུན་གྱི་རྩ་བ་བྱང་ཆུབ་སེམས། །སྨོན་འཇུག་གི་གོ་ཆ་ལེགས་བགོས་ཏེ། །ཚོགས་གཉིས་ཀྱི་ལམ་ལ་བརྩོན་པར་ཤོག །ཁྱད་པར་དུ་མྱུར་ལམ་རྡོ་རྗེའི་ཐེག །ཚུལ་བཞིན་དུ་སྟོན་ནུས་བླ་མ་ལས། །སྨིན་བྱེད་ཀྱི་དབང་བསྐུར་རིམ་ནོས་ནས། །རིམ་གཉིས་ཀྱི་ལམ་ལ་འཇུག་པར་ཤོག །སྣང་སྲིད་དང་འཁོར་འདས་ཆོས་སོ་ཅོག །ཡེ་གདོད་མ་ནས་སྤྲོས་པ་བྲལ་བ་ལས། །རྟེན་འབྱུང་གི་སྣང་ཚུལ་མ་འགགས་པའི། །གཞི་ལྟ་བའི་གནས་ལུགས་རྟོགས་པར་ཤོག །ཞི་གནས་ཀྱིས་ཉོན་མོངས་ཟིལ་མནན་ནས། །ལྷག་མཐོང་གིས་དྲུང་ནས་འབྱིན་པའི་ཕྱིར། །དེ་གཉིས་པོ་དབྱེར་མེད་ཉམས་ལེན་གྱིས། །ལམ་སྒོམ་པའི་ཕ་རོལ་སོན་པར་ཤོག །མཉམ་གཞག་ནི་མཁའ་ལྟར་མི་རྟོག་ཀྱང་། །རྗེས་ཐོབ་ཀྱི་སྣང་ཆ་སྒྱུ་མ་ལྟས། །ལེགས་སྤྱད་ཀྱི་དགེ་ཆོས་སྡུད་བཟོད་པའི། །ཐབས་མཁས་ཀྱི་སྤྱད་པ་སྤྱོད་པར་ཤོག །དེ་ལྟར་གྱི་ཐབས་ཤེས་ཟུང་འབྲེལ་གྱིས། །སྒྲིབ་གཉིས་ཀྱི་དྲི་མ་བསལ་བ་ལས། །སྐུ་ཡེ་ཤེས་ཕྲིན་ལས་དབང་འབྱོར་བའི། །བླ་མེད་ཀྱི་འབྲས་བུ་ཐོབ་བར་ཤོག །ཚིག་དེ་སྐད་གསོལ་འདེབས་སྨོན་བའི་གླུ། །དོན་བསྟན་པ་ཡོངས་རྫོགས་ཉམས་ལེན་གནད། །དཔལ་དེ་བཱི་ཀོ་ཊིའི་དགའ་ཚལ་དུ། །དུས་དཀར་ཕྱོགས་རྫོགས་པ་གཉིས་པར་བྲིས། །ཞེས་པའང་སྤྲུལ་པའི་རྒྱལ་པོ་ཕྱག་ན་པདྨ་སྲོང་བཙན་སྒམ་པོའི་སྒྲུབ་གནས་ཕ་ཝང་ཁ་བྱང་ཆུབ་ཤིང་གི་ནགས་ཁྲོད་དུ་གནས་འབྲེལ་ལྷགས་པའི་ཚེ་ཚོགས་ཀྱི་འདུ་བའི་རྗེས་ཐོག་ཏུ་བྲིས་པ་སྟེ་ས་ཟླའི་ཚེས་བཅུ་ལའོ།། །། ༈

[edit]

'dun cing smon par bya ba'i rdo rje'i thol glu yongs rdzogs bstan pa'i lam rim/_ 'dun cing smon par bya ba'i rdo rje'i thol glu yongs rdzogs bstan pa'i lam rim zhes bya ba/__a ho/__gang mtshan gyi bdud rtsi thob pa las/__/srid zhi yi tsha gdung ring bcil nas/__/rnam grol gyi ut+pal dar babs pa'i/__/mgon phyag na pad+mos dge legs mdzod/__/rje de dang ngo bo dbyer med kyang /__/tshu rol gyi mthong ngor sa spyod gzugs/__/mtshan srong btsan sgam por rab 'bar ba/__/gangs can gyi lha gcig de la 'dud/__/skyabs khyod la snying nas gsol btab pas/__/bdag gzhan kun skye dang tshe rabs su/__/mi khom pa'i gnas las rab ldog cing /__/rten dal 'byor tshang ba'i lus thob shog__/der nam yang mi rtag 'chi ba dang /__/dus de tshe bzlog thabs bral ba yi/__/ngang tshul la bsam nas yid byung ste/__/'phral dam pa'i chos la 'jug par shog__/gnas 'khor ba mtho dman gar skyes kyang /__/sdug bsngal gyi dam 'og chud pa'i phyir/__/dpe me 'obs lta bur mthong ba yis/__/bcos min gyi nges 'byung skye bar shog__/las dkar nag sa bon btab pa las/__/bde sdug gi 'bras bu smin shes nas/____/blang dor gyi lag len 'dzol med pas/__/mngon mtho yi grong du bkri bar shog__/mtshan nyid dang ldan pa'i bshes gnyen ni/__/srid zhi yi dge legs thams cad kyi/__/rtsa ba ru nges pa rnyed pa'i blos/__/tshul bzhin du gus pas bsnyen par shog__/dus 'di nas byang chub snying po'i bar/__/mtha' klas pa'i sems can kun don du/__/skyabs dkon mchog rin chen rnam gsum la/__/snying thag pa nas skyabs su 'gro bar shog__/yul tshad med ma gyur 'gro kun la/__/dus tshad med sangs rgyas thob kyi bar/__/blo tshad med rnam bzhi legs bsgoms pas/__/rgyud theg chen snod du 'gyur bar shog__/gzhan don gyi phyir du thar 'dod pa'i/__/chos kun gyi rtsa ba byang chub sems/__/smon 'jug gi go cha legs bgos te/__/tshogs gnyis kyi lam la brtson par shog__/khyad par du myur lam rdo rje'i theg__/tshul bzhin du ston nus bla ma las/__/smin byed kyi dbang bskur rim nos nas/__/rim gnyis kyi lam la 'jug par shog__/snang srid dang 'khor 'das chos so cog__/ye gdod ma nas spros pa bral ba las/__/rten 'byung gi snang tshul ma 'gags pa'i/__/gzhi lta ba'i gnas lugs rtogs par shog__/zhi gnas kyis nyon mongs zil mnan nas/__/lhag mthong gis drung nas 'byin pa'i phyir/__/de gnyis po dbyer med nyams len gyis/__/lam sgom pa'i pha rol son par shog__/mnyam gzhag ni mkha' ltar mi rtog kyang /__/rjes thob kyi snang cha sgyu ma ltas/__/legs spyad kyi dge chos sdud bzod pa'i/__/thabs mkhas kyi spyad pa spyod par shog__/de ltar gyi thabs shes zung 'brel gyis/_/sgrib gnyis kyi dri ma bsal ba las/__/sku ye shes phrin las dbang 'byor ba'i/__/bla med kyi 'bras bu thob bar shog__/tshig de skad gsol 'debs smon ba'i glu/__/don bstan pa yongs rdzogs nyams len gnad/__/dpal de bI ko Ti'i dga' tshal du/__/dus dkar phyogs rdzogs pa gnyis par bris/__/zhes pa'ang sprul pa'i rgyal po phyag na pad+ma srong btsan sgam po'i sgrub gnas pha wang kha byang chub shing gi nags khrod du gnas 'brel lhags pa'i tshe tshogs kyi 'du ba'i rjes thog tu bris pa ste sa zla'i tshes bcu la'o//____//__!