JKW-KABUM-22-ZA-007-017

🚧 This website is under continued development. We appreciate your patience!

Previous Text Back to Volume PageNext Text

Wylie title	dkar po lha gsum la brten pa'i bla ma'i rnal 'byor tshe dang ye shes grub ster
Location	mkhyen brtse'i bka' 'bum Volume 22, sde tshan 7, Text 17, Pages 238-242 (Folios 27b5 to 29b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dkar po lha gsum la brten pa'i bla ma'i rnal 'byor tshe dang ye shes grub ster. In 'jam dbyangs mkhyen brtse'i dbang po'i bka' 'bum, Vol. 22: 238-242. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Deity	dkar po lha gsum
Colophon	།ཞེས་པའང་ཐུབ་བསྟན་རྡོ་རྗེ་བྲག་གི་དགེ་སློང་རྣམ་པར་དཔྱོད་པའི་བློ་ཅན་སུ་ཀ ལྤ་ཤཱི་ལས་འདི་ལྟ་བུ་དགོས་ཞེས་གསུང་ངོར། བླ་མའི་རྣལ་འབྱོར་དང་འབྲེལ་བར་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་མཆོག་ཏུ་གྱུར་ཅིག།
	zhes pa'ang thub bstan rdo rje brag gi dge slong rnam par dpyod pa'i blo can su ka_lpa shI las 'di lta bu dgos zhes gsung ngor/__bla ma'i rnal 'byor dang 'brel bar 'jam dbyangs mkhyen brtse'i dbang pos bris pa dge legs mchog tu gyur cig

1 Texts in this Section (sde tshan or chos tshan)

17 238-242	དཀར་པོ་ལྷ་གསུམ་ལ་བརྟེན་པའི་བླ་མའི་རྣལ་འབྱོར་ཚེ་དང་ཡེ་ཤེས་གྲུབ་སྟེར། dkar po lha gsum la brten pa'i bla ma'i rnal 'byor tshe dang ye shes grub ster Guru Yoga Texts - bla ma'i rnal 'byor	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །དཀར་པོ་ལྷ་གསུམ་ལ་བརྟེན་པའི་བླ་མའི་རྣལ་འབྱོར་ཚེ་དང་ཡེ་ཤེས་གྲུབ་སྟེར་ཞེས་བྱ་བ། ན་མོ་གུ་རུ་བྷྱཿ འདིར་དཀར་པོ་ལྷ་གསུམ་ལ་བརྟེན་པའི་བླ་མའི་རྣལ་འབྱོར་མདོར་བསྡུས་ཉམས་སུ་བླང་བའི་ཚུལ་ལ། ངེས་འབྱུང་དང་། བྱང་ཆུབ་ཀྱི་སེམས་སྒོ་དུ་མ་ནས་ཡིད་ལ་བྱས་ཏེ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །ཞེས་སོགས་སྐྱབས་སེམས་བློ་རྒྱུད་དང་འདྲེས་པར་བྱ། དངོས་གཞི་ནི། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཆོས་ཀུན་རང་བཞིན་གཟོད་ནས་སྟོང་པའི་ངང་། །རྟེན་ཅིང་འབྲེལ་འབྱུང་སྒྱུ་མའི་རྣམ་རོལ་ལས། །སྣོད་བཅུད་ཐམས་ཅད་བདེ་བ་ཅན་གྱི་ཞིང་། །ཕུན་ཚོགས་ངོ་མཚར་བཀོད་པ་འབྱམས་ཀླས་དབུས། །པད་ཟླའི་སྟེང་དུ་རང་སེམས་ཏཱྃ་དཀར་པོ། །ཡོངས་གྱུར་འཆི་མེད་ཡིད་བཞིན་འཁོར་ལོ་ནི། །ཆུ་ཤེལ་མདོག་ཅན་དར་དང་རིན་ཆེན་རྒྱན། །ཕྱག་གཡས་མཆོག་སྦྱིན་གཡོན་པས་ཨུཏྤལ་བསྣམས། །ཞི་འཛུམ་རབ་དགྱེས་ཡེ་ཤེས་སྤྱན་བདུན་འཛུམ། །རྡོ་རྗེའི་སྐྱིལ་ཀྲུང་འོད་ལྔའི་ཀློང་ན་བཞུགས། །སྤྱི་བོར་དྲིན་ཅན་རྩ་བའི་བླ་མ་དང་། །དབྱེར་མེད་ཚེ་དཔག་མེད་མགོན་སྐུ་མདོག་དཀར། །མཉམ་གཞག་ཚེ་བུམ་འཛིན་ཅིང་ལོངས་སྤྱོད་རྫོགས། །པད་ཟླའི་གདན་ལ་སྐྱིལ་ཀྲུང་སྟབས་ཀྱིས་རོལ། །ཐུགས་ཀར་ཆུ་སྐྱེས་ཟླ་བའི་དཀྱིལ་འཁོར་དབུས། །པདྨའི་རིགས་ཀྱི་ཕོ་ཉ་དབྱངས་ཅན་མ། །ཡིད་འཕྲོག་ཟླ་ཤེལ་ནོར་བུའི་མཚན་དཔེ་ཅན། །ཞི་འཛུམ་སྒེག་ཉམས་རིན་ཆེན་པི་ཝཾ་བསྒྲེང་། །ལྷ་རྫས་ན་བཟའ་རཏྣ་ཨུཏྤལ་རྒྱན། །ཞབས་ཟུང་ཙོག་བུའི་ཚུལ་གྱིས་དགྱེས་བཞིན་བཞུགས། །ཀུན་ཀྱང་གནས་གསུམ་རྡོ་རྗེའི་ཡི་གེས་མཚན། །འོད་འཕྲོས་ཡེ་ཤེས་སྤྱན་དྲངས་དབྱེར་མེད་གྱུར། །ཅེས་བརྗོད་ཅིང་གསལ་གདབ་ལ་ཡན་ལག་བདུན་པ་འབུལ་བ་ནི། བདག་དང་མཁའ་མཉམ་འགྲོ་ཀུན་ལྷན་ཅིག་ཏུ། །གུས་པས་ཕྱག་འཚལ་མཆོད་སྤྲིན་རྒྱ་མཚོས་མཆོད། །སྡིག་ལྟུང་ཀུན་བཤགས་དགེ་ལ་རྗེས་ཡི་རངས། །མྱ་ངན་མི་འདའ་བཞུགས་གསོལ་ཆོས་འཁོར་བསྐུལ། །བསོད་ནམས་དངོས་ཀུན་བྱང་ཆུབ་སྙིང་པོར་བསྔོ། །བདག་གཞན་ཡིད་ཅན་ཚོགས་རྣམས་མ་ལུས་ཀུན། །སྐུ་དང་ཡེ་ཤེས་རྨད་བྱུང་བཅོམ་ལྡན་འདས། །འཆི་མེད་མགོན་པོའི་གོ་འཕང་མྱུར་ཐོབ་ཤོག །མཎྜལ་རྒྱས་བསྡུས་ཇི་ལྟར་རིགས་པ་ཕུལ། །གསོལ་བ་གདབ་པ་ནི། སྐྱབས་གནས་དཀོན་མཆོག་རྒྱ་མཚོའི་ངོ་བོ་ཉིད། །བླ་མ་ཚེ་དཔག་མེད་དང་དབྱངས་ཅན་མ། །འཆི་མེད་ཡིད་བཞིན་འཁོར་ལོར་གསོལ་བ་འདེབས། །ཚེ་དང་ཡེ་ཤེས་རྒྱས་པར་བྱིན་གྱིས་རློབས། །ཞེས་ཅི་ནུས་བརྗོད་ཅིང་ཕུར་ཚུགས་སུ་གསོལ་བ་གདབ། བཟླས་པ་བྱ་བ་ནི། རྩེ་གཅིག་གུས་པས་གསོལ་བ་བཏབ་པའི་མཐུས། །བླ་མ་ཚེ་དཔག་མེད་དང་སྒྲ་དབྱངས་ལྷའི། །ཐུགས་ལས་འོད་ཟེར་མཁའ་ཁྱབ་ཀུན་ཏུ་འཕྲོས། །འཕགས་པ་མཆོད་ཅིང་འགྲོ་ཀུན་སྒྲིབ་གཉིས་སྦྱངས། །སྲིད་ཞིའི་དྭངས་བཅུད་བདུད་རྩིའི་རྣམ་པར་བསྡུས། །ཚེ་དཔག་མེད་མགོན་ཕྱག་གི་བུམ་པར་ཐིམ། །བདུད་རྩིའི་རྒྱུན་བབས་རང་ལུས་ནང་ཀུན་ཁྱབ། །དུས་མིན་འཆི་དང་སྡིག་སྒྲིབ་ཐམས་ཅད་སྦྱངས། །ཚེ་དང་གཟི་བརྗིད་སྟོབས་དཔལ་ཡོན་ཏན་འཕེལ། །ཤེས་བྱ་ཀུན་ལ་ཐོགས་པ་མེད་པ་ཡིས། །བློ་གྲོས་པདྨོ་མཆོག་ཏུ་རྒྱས་པར་གྱུར། །ཅེས་བརྗོད་ཅིང་བསམ་ལ་ཚེ་དཔག་མེད་ཀྱི་གཟུངས་དང་། ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ། ཞེས་ཅི་ནུས་གཙོ་བོར་བཟླ། མཐར། ཧྲཱིཿ ཞེས་དབྱངས་ཅན་མའི་རིག་པ་འབྲུ་གཅིག་པ་དང་། ཨ་ཨཱ་སོགས་དབྱངས་བཅུ་དྲུག །ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཨཱ་ཡུར་པུཎྱཻཛྙཱ་ན་པུཥྟིཾ་ཀུ་རུ་སྭཱ་ཧཱ། ཞེས་སྒྲོལ་དཀར་ཚེ་ཤམ་ཅན་གྱི་སྔགས་རྣམས་ཀྱང་ཅི་རིགས་པ་བཟླའོ། །མཐར་གོང་ལྟར་གསོལ་འདེབས་དང་། མཐར་ནི་སྤྱི་བོའི་བླ་མ་ཚེ་དཔག་མེད། །སྒྲ་དབྱངས་རྒྱ་མཚོའི་བདག་ཉིད་དང་བཅས་པ། །འཆི་མེད་ཚེ་དང་ཡེ་ཤེས་བདུད་རྩིར་ཞུ། །སྤྱི་བོ་ནས་ཞུགས་རང་གི་ལུས་ཀུན་གང་། །དབང་དང་བྱིན་རླབས་དངོས་གྲུབ་ཀུན་ཐོབ་གྱུར། །ཅེས་བརྗོད་ཅིང་བསམས་ལ་སྤྲོས་བྲལ་གྱི་ངང་དུ་བཞག །དེ་ལས་ལྡང་བ་ན། དགེ་བའི་རྩ་བ་ཡོངས་སུ་བསྔོ་བ་ནི། དགེ་བ་འདི་ཡིས་བདག་སོགས་སེམས་ཅན་ཀུན། །བླ་མ་འཆི་མེད་མགོན་པོས་རྗེས་བཟུང་ནས། །ཚེ་བསོད་དཔལ་འབྱོར་ལུང་རྟོགས་ཤེས་རབ་རྒྱས། །ཐམས་ཅད་གཟིགས་པའི་གོ་འཕང་མྱུར་ཐོབ་ཤོག །ཅེས་པས་མཚམས་སྦྱར་ཏེ་སྤྱོད་ལམ་ཐམས་ཅད་ཆོས་དང་མཐུན་པའི་བྱ་བས་གནས་པར་བྱའོ། །ཞེས་པའང་ཐུབ་བསྟན་རྡོ་རྗེ་བྲག་གི་དགེ་སློང་རྣམ་པར་དཔྱོད་པའི་བློ་ཅན་སུ་ཀ ལྤ་ཤཱི་ལས་འདི་ལྟ་བུ་དགོས་ཞེས་གསུང་ངོར། བླ་མའི་རྣལ་འབྱོར་དང་འབྲེལ་བར་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་མཆོག་ཏུ་གྱུར་ཅིག། །།

[edit]

dkar po lha gsum la brten pa'i bla ma'i rnal 'byor tshe dang ye shes grub ster/__ @#/_/dkar po lha gsum la brten pa'i bla ma'i rnal 'byor tshe dang ye shes grub ster zhes bya ba/__na mo gu ru b+h+yaH__'dir dkar po lha gsum la brten pa'i bla ma'i rnal 'byor mdor bsdus nyams su blang ba'i tshul la/__nges 'byung dang /__byang chub kyi sems sgo du ma nas yid la byas te/__sangs rgyas chos dang tshogs kyi mchog rnams la/__/zhes sogs skyabs sems blo rgyud dang 'dres par bya/__dngos gzhi ni/__oM swa b+hA ba shud+d+haHsarba d+harmAHswa b+hA wa shud+d+ho\u0f85haM/__chos kun rang bzhin gzod nas stong pa'i ngang /__/rten cing 'brel 'byung sgyu ma'i rnam rol las/__/snod bcud thams cad bde ba can gyi zhing /__/phun tshogs ngo mtshar bkod pa 'byams klas dbus/__/pad zla'i steng du rang sems tA~M dkar po/__/yongs gyur 'chi med yid bzhin 'khor lo ni/__/chu shel mdog can dar dang rin chen rgyan/__/phyag g.yas mchog sbyin g.yon pas ut+pal bsnams/__/zhi 'dzum rab dgyes ye shes spyan bdun 'dzum/__/rdo rje'i skyil krung 'od lnga'i klong na bzhugs/__/spyi bor drin can rtsa ba'i bla ma dang /__/dbyer med tshe dpag med mgon sku mdog dkar/__/mnyam gzhag tshe bum 'dzin cing longs spyod rdzogs/__/pad zla'i gdan la skyil krung stabs kyis rol/__/thugs kar chu skyes zla ba'i dkyil 'khor dbus/__/pad+ma'i rigs kyi pho nya dbyangs can ma/__/yid 'phrog zla shel nor bu'i mtshan dpe can/__/zhi 'dzum sgeg nyams rin chen pi waM bsgreng /__/lha rdzas na bza' rat+na ut+pal rgyan/__/zhabs zung tsog bu'i tshul gyis dgyes bzhin bzhugs/__/kun kyang gnas gsum rdo rje'i yi ges mtshan/__/'od 'phros ye shes spyan drangs dbyer med gyur/__/ces brjod cing gsal gdab la yan lag bdun pa 'bul ba ni/__bdag dang mkha' mnyam 'gro kun lhan cig tu/__/gus pas phyag 'tshal mchod sprin rgya mtshos mchod/__/sdig ltung kun bshags dge la rjes yi rangs/__/mya ngan mi 'da' bzhugs gsol chos 'khor bskul/__/bsod nams dngos kun byang chub snying por bsngo/__/bdag gzhan yid can tshogs rnams ma lus kun/__/sku dang ye shes rmad byung bcom ldan 'das/__/'chi med mgon po'i go 'phang myur thob shog__/maN+Dal rgyas bsdus ji ltar rigs pa phul/__/gsol ba gdab pa ni/__skyabs gnas dkon mchog rgya mtsho'i ngo bo nyid/__/bla ma tshe dpag med dang dbyangs can ma/__/'chi med yid bzhin 'khor lor gsol ba 'debs/__/tshe dang ye shes rgyas par byin gyis rlobs/__/zhes ci nus brjod cing phur tshugs su gsol ba gdab/__bzlas pa bya ba ni/__rtse gcig gus pas gsol ba btab pa'i mthus/__/bla ma tshe dpag med dang sgra dbyangs lha'i/__/thugs las 'od zer mkha' khyab kun tu 'phros/__/'phags pa mchod cing 'gro kun sgrib gnyis sbyangs/__/srid zhi'i dwangs bcud bdud rtsi'i rnam par bsdus/__/tshe dpag med mgon phyag gi bum par thim/__/bdud rtsi'i rgyun babs rang lus nang kun khyab/__/dus min 'chi dang sdig sgrib thams cad sbyangs/__/tshe dang gzi brjid stobs dpal yon tan 'phel/__/shes bya kun la thogs pa med pa yis/__/blo gros pad+mo mchog tu rgyas par gyur/__/ces brjod cing bsam la tshe dpag med kyi gzungs dang /__oM a mA ra Ni dzI ban+ti ye swA hA/__zhes ci nus gtso bor bzla/__mthar/__hrIH__zhes dbyangs can ma'i rig pa 'bru gcig pa dang /__a A sogs dbyangs bcu drug__/oM tA re tut+tA re tu re ma ma A yur puN+yaidz+nyA na puSh+tiM ku ru swA hA/__zhes sgrol dkar tshe sham can gyi sngags rnams kyang ci rigs pa bzla'o/__/mthar gong ltar gsol 'debs dang /__mthar ni spyi bo'i bla ma tshe dpag med/__/sgra dbyangs rgya mtsho'i bdag nyid dang bcas pa/__/'chi med tshe dang ye shes bdud rtsir zhu/__/spyi bo nas zhugs rang gi lus kun gang /__/dbang dang byin rlabs dngos grub kun thob gyur/__/ces brjod cing bsams la spros bral gyi ngang du bzhag__/de las ldang ba na/__dge ba'i rtsa ba yongs su bsngo ba ni/__dge ba 'di yis bdag sogs sems can kun/__/bla ma 'chi med mgon pos rjes bzung nas/__/tshe bsod dpal 'byor lung rtogs shes rab rgyas/__/thams cad gzigs pa'i go 'phang myur thob shog__/ces pas mtshams sbyar te spyod lam thams cad chos dang mthun pa'i bya bas gnas par bya'o/__/zhes pa'ang thub bstan rdo rje brag gi dge slong rnam par dpyod pa'i blo can su ka_lpa shI las 'di lta bu dgos zhes gsung ngor/__bla ma'i rnal 'byor dang 'brel bar 'jam dbyangs mkhyen brtse'i dbang pos bris pa dge legs mchog tu gyur cig/__//