JKW-KABUM-22-ZA-012-068

🚧 This website is under continued development. We appreciate your patience!

Previous Text Back to Volume PageNext Text

Wylie title	rnal 'byor gsum ldan gyi rdo rje'i thol glu gsang ba sngags kyi rol mo
Location	mkhyen brtse'i bka' 'bum Volume 22, sde tshan 12, Text 68, Pages 537-539 (Folios 97a2 to 98a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rnal 'byor gsum ldan gyi rdo rje'i thol glu gsang ba sngags kyi rol mo. In 'jam dbyangs mkhyen brtse'i dbang po'i bka' 'bum, Vol. 22: 537-539. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

68 537-539	རྣལ་འབྱོར་གསུམ་ལྡན་གྱི་རྡོ་རྗེའི་ཐོལ་གླུ་གསང་བ་སྔགས་ཀྱི་རོལ་མོ། rnal 'byor gsum ldan gyi rdo rje'i thol glu gsang ba sngags kyi rol mo Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

རྣལ་འབྱོར་གསུམ་ལྡན་གྱི་རྡོ་རྗེའི་ཐོལ་གླུ་གསང་བ་སྔགས་ཀྱི་རོལ་མོ་ཞེས་བྱ་བ། ཀ་དག་རིག་སྟོང་ཟུང་འཇུག་བདེ་ཆེན་གྱི་ཀློང་ནས། །ཁ་དོག་སྣ་ཚོགས་ཤར་བའི་རྩ་རླུང་དང་ཐིག་ལེ། །ག་རུ་འདུག་ཀྱང་གདན་གསུམ་ཞི་ཁྲོ་ཡི་མངོན་རྟོགས། །ང་བདག་འཛིན་བྲལ་སྣང་སྟོང་དབྱེར་མེད་ཀྱི་དཀྱིལ་འཁོར། །རྣལ་འབྱོར་ཆེན་པོ་བསྒོམ་ན་དེ་ལྟར་དུ་མཛོད་ཅིག །ཅ་ཅོའི་བྱུང་གནས་འགྲོ་གསུམ་རླུང་སེམས་ཀྱི་རྒྱུ་བ། །ཆ་མཐུན་མཚན་ཉིད་བཞི་ལྡན་དབུ་མ་ཡི་ཀློང་དུ། །ཇ་ཆང་སྐྱེམས་ལ་རོལ་བཞིན་ཁ་སྦྱོར་དུ་འཁྱུད་པས། །ཉ་རྒྱས་ཟླ་ལྟར་བཅུ་དྲུག་བདེ་ཆེན་དེ་འཕེལ་བའི། །རྗེས་སུ་རྣལ་འབྱོར་བསྒོམ་ན་དེ་ལྟར་དུ་མཛོད་ཅིག །ཏ་ཐཱ་ག་ཏའི་སྙིང་པོ་རྫོགས་ཆེན་གྱི་གསེང་ལམ། །ཐ་དད་མ་དམིགས་རང་སེམས་གཉུག་མ་རུ་གཅིག་པས། །ད་བཟོད་བསྐྱར་གྲོལ་ལས་འདས་འབྲས་བུ་ཡི་མཐར་ཐུག །ན་མར་ངང་བཞག་ཤར་གྲོལ་དུས་མཉམ་གྱི་རང་བཞིན། །ཤིན་ཏུ་རྣལ་འབྱོར་བསྒོམ་ན་དེ་ལྟར་དུ་མཛོད་ཅིག །པ་ར་མི་ཏའི་སྙིང་པོ་བྱང་ཆུབ་ཀྱི་སེམས་མཆོག །ཕ་རོལ་རྒྱུད་ལ་ལྷག་པར་མཛའ་བ་ཡི་ངང་ནས། །བ་ལང་ལྟ་བུའི་འདུ་ཤེས་འོད་གསལ་དུ་གྲོལ་ཏེ། །མ་རིག་མཐའ་ལས་འདས་པའི་སྐུ་གསུམ་གྱི་རོལ་པ། །བདེན་གཉིས་ཟུང་འཇུག་བསྒོམ་ན་དེ་ལྟར་དུ་མཛོད་ཅིག །ཙཱ་རུའི་ཞལ་ཟས་ཀྱིས་མཚོན་འདོད་ཡོན་གྱི་རོལ་པ། །ཚ་གྲང་ག་ཎ་ཙ་ཀྲའི་འདུ་བ་ལ་སྤྱོད་ཅིང་། །ཛ་ཧུའི་རྒྱུན་ལྟར་ཡེངས་མེད་སྒོམ་མེད་ཀྱི་ངང་ནས། །ཝ་མོ་རི་སུལ་འགྲིམ་ལྟར་དབེན་པ་རུ་རྒྱུ་བའི། །ཚོགས་གཉིས་ཟུང་འཇུག་བསྒོམ་ན་དེ་ལྟར་དུ་མཛོད་ཅིག །ཞྭ་ཐོད་སྤངས་པའི་ཐོར་ཚུགས་གསང་སྔགས་ཀྱི་བརྡ་རྟགས། །ཟ་འདྲེ་གནོད་བྱེད་རྒྱུད་ཀྱང་སྙིང་རྗེ་ཡིས་བསྒྱུར་ནས། །འ་འུར་སྤངས་ཏེ་རང་རྒྱུད་དུལ་བ་ལ་བསྙེན་པས། །ཡ་མཱནྟ་ཀས་འབོད་ཚེ་འཇིགས་པ་དེ་མི་ཡོང་། །བསླབ་གསུམ་ཡར་ལྡན་བསྒོམ་ན་དེ་ལྟར་དུ་མཛོད་ཅིག །རཱ་ཙ་ལ་སོགས་མི་མིན་གདུག་པ་ཡི་ཚོགས་ཀུན། །ལ་ཀླུང་འགྲོ་ལ་འཚེ་བ་གཞན་ཕན་གྱིས་བཏུལ་ཏེ། །ཤ་ཁྲག་གཡོས་སུ་སྦྱར་བའི་དགའ་སྟོན་གྱི་བཟའ་བཏུང་། །ས་བཅུ་རང་ངོར་རྫོགས་ཚེ་བདེ་སྟོང་དུ་རོལ་པའི། །དོན་གཉིས་ལྷུན་གྲུབ་བསྒོམ་ན་དེ་ལྟར་དུ་མཛོད་ཅིག །ཧ་ཅང་རང་གིས་མ་རྟོགས་གཞན་རྒྱུད་ལ་གདམས་འདི། །ཨ་ལ་ལ་ཞེས་གུས་པས་འཛིན་པ་དེ་བྲལ་ཡང་། །ཧ་ལ་ལྟ་བུའི་རྟོག་ཚོགས་ཤར་གྲོལ་དང་ཟུང་འཇུག །ཨ་ཏི་ཁྲེགས་ཆོད་ངང་ནས་གང་ཤར་དུ་བླངས་སོ། །དེ་སྐད་བརྗོད་པ་དུས་གསུམ་མཁས་གྲུབ་ཀྱི་ཚོགས་ལ། །མི་ཕྱེད་དད་དང་གུས་པའི་རང་བཞིན་ལས་སྐྱེས་ཏེ། །འོད་གསལ་སྤྲུལ་པར་ཤར་བའི་རིག་འཛིན་གྱི་གླུ་དབྱངས། །རང་དེར་སྐལ་མཉམ་དོན་དུ་སྤྲིང་པ་ཡི་གཏམ་མོ།། །། ༈

[edit]

rnal 'byor gsum ldan gyi rdo rje'i thol glu gsang ba sngags kyi rol mo/__ rnal 'byor gsum ldan gyi rdo rje'i thol glu gsang ba sngags kyi rol mo zhes bya ba/__ka dag rig stong zung 'jug bde chen gyi klong nas/__/kha dog sna tshogs shar ba'i rtsa rlung dang thig le/__/ga ru 'dug kyang gdan gsum zhi khro yi mngon rtogs/__/nga bdag 'dzin bral snang stong dbyer med kyi dkyil 'khor/__/rnal 'byor chen po bsgom na de ltar du mdzod cig__/ca co'i byung gnas 'gro gsum rlung sems kyi rgyu ba/__/cha mthun mtshan nyid bzhi ldan dbu ma yi klong du/__/ja chang skyems la rol bzhin kha sbyor du 'khyud pas/__/nya rgyas zla ltar bcu drug bde chen de 'phel ba'i/__/rjes su rnal 'byor bsgom na de ltar du mdzod cig__/ta thA ga ta'i snying po rdzogs chen gyi gseng lam/__/tha dad ma dmigs rang sems gnyug ma ru gcig pas/__/da bzod bskyar grol las 'das 'bras bu yi mthar thug__/na mar ngang bzhag shar grol dus mnyam gyi rang bzhin/__/shin tu rnal 'byor bsgom na de ltar du mdzod cig__/pa ra mi ta'i snying po byang chub kyi sems mchog__/pha rol rgyud la lhag par mdza' ba yi ngang nas/__/ba lang lta bu'i 'du shes 'od gsal du grol te/__/ma rig mtha' las 'das pa'i sku gsum gyi rol pa/__/bden gnyis zung 'jug bsgom na de ltar du mdzod cig__/tsA ru'i zhal zas kyis mtshon 'dod yon gyi rol pa/__/tsha grang ga Na tsa kra'i 'du ba la spyod cing /__/dza hu'i rgyun ltar yengs med sgom med kyi ngang nas/__/wa mo ri sul 'grim ltar dben pa ru rgyu ba'i/__/tshogs gnyis zung 'jug bsgom na de ltar du mdzod cig__/zhwa thod spangs pa'i thor tshugs gsang sngags kyi brda rtags/__/za 'dre gnod byed rgyud kyang snying rje yis bsgyur nas/__/'a 'ur spangs te rang rgyud dul ba la bsnyen pas/__/ya mAn+ta kas 'bod tshe 'jigs pa de mi yong /__/bslab gsum yar ldan bsgom na de ltar du mdzod cig__/rA tsa la sogs mi min gdug pa yi tshogs kun/__/la klung 'gro la 'tshe ba gzhan phan gyis btul te/__/sha khrag g.yos su sbyar ba'i dga' ston gyi bza' btung /__/sa bcu rang ngor rdzogs tshe bde stong du rol pa'i/__/don gnyis lhun grub bsgom na de ltar du mdzod cig__/ha cang rang gis ma rtogs gzhan rgyud la gdams 'di/__/a la la zhes gus pas 'dzin pa de bral yang /__/ha la lta bu'i rtog tshogs shar grol dang zung 'jug__/a ti khregs chod ngang nas gang shar du blangs so/__/de skad brjod pa dus gsum mkhas grub kyi tshogs la/__/mi phyed dad dang gus pa'i rang bzhin las skyes te/__/'od gsal sprul par shar ba'i rig 'dzin gyi glu dbyangs/__/rang der skal mnyam don du spring pa yi gtam mo//__//___!_