JKW-KABUM-13-PA-023-014

🚧 This website is under continued development. We appreciate your patience!

Previous Text Back to Volume PageNext Text

Wylie title	dpal rta mchog rol pa gsang sgrub kyi gdams pa'i zin bris nyung gsal grub gnyis sa bon
Location	mkhyen brtse'i bka' 'bum Volume 13, sde tshan 23, Text 14, Pages 530-538 (Folios 34b6 to 38b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	སྙེ་མོ་རྒྱ་གོང་རི་བ་སངས་རྒྱས་དབང་ཆེན་ (snye mo rgya gong ri ba sangs rgyas dbang chen)
Citation	'jam dbyangs mkhyen brtse'i dbang po. dpal rta mchog rol pa gsang sgrub kyi gdams pa'i zin bris nyung gsal grub gnyis sa bon. In 'jam dbyangs mkhyen brtse'i dbang po'i bka' 'bum, Vol. 13: 530-538. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Spiritual Instructions - gdams ngag
Cycle	རྟ་མགྲིན་གསང་སྒྲུབ་ (rta mgrin gsang sgrub)
Deity	rta mchog rol pa
Colophon	།མཛད་འཕྲོས་ལུས།།
	mdzad 'phros lus

1 Texts in this Section (sde tshan or chos tshan)

14 530-538	དཔལ་རྟ་མཆོག་རོལ་པ་གསང་སྒྲུབ་ཀྱི་གདམས་པའི་ཟིན་བྲིས་ཉུང་གསལ་གྲུབ་གཉིས་ས་བོན། dpal rta mchog rol pa gsang sgrub kyi gdams pa'i zin bris nyung gsal grub gnyis sa bon Notes - zin bris   ·   Spiritual Instructions - gdams ngag	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

དཔལ་རྟ་མཆོག་རོལ་པ་གསང་སྒྲུབ་ཀྱི་གདམས་པའི་ཟིན་བྲིས་ཉུང་གསལ་གྲུབ་གཉིས་ས་བོན་ཅེས་བྱ་བ་བཞུགས་སོ། །ཨོཾ་སྭ་སྟི། །གང་གི་ཡེ་ཤེས་འབར་བའི་མེས། །བདུད་སྡེའི་བུད་ཤིང་ཀུན་བསྲེགས་ནས། །གྲུབ་གཉིས་སྣང་བ་རྒྱས་མཛད་པ། །བླ་མ་རྟ་མཆོག་རོལ་པས་སྐྱོངས། །དེ་ལ་འདིར་སྙེ་མོ་གངས་རི་བ་སངས་རྒྱས་དབང་ཆེན་གྱི་ཟབ་གཏེར་དང་། སྤྱན་རས་གཟིགས་དངོས་དབོན་སྟོན་སྐྱེར་སྒང་པ་ཆོས་ཀྱི་སེང་གེའི་དག་སྣང་ཟུང་དུ་འབྲེལ་བའི་དཔལ་རྟ་མཆོག་རོལ་པ་གསང་སྒྲུབ་ཀྱི་གདམས་པའི་ཟིན་བྲིས་ས་བཅད་ཙམ་སྤེལ་བ་ལ་གཉིས། ལོ་རྒྱུས་དང་། གདམས་པ་དངོས་སོ། །དང་པོ་ནི། སྤྱིར་ཡིག་རྙིང་དང་བྱིན་རླབས་ཀྱི་ལོ་རྒྱུས་ལས་ཤེས་ཤིང་། ཕྱིས་སུའང་རང་གཞན་གྱི་ཕྱོགས་ལྷག་པའི་ལྷ་འདི་ཉིད་ལས་དངོས་གྲུབ་ཀྱི་མཚན་མ་བརྙེས་པའང་ཅི་རིགས་པར་བྱོན་པས་མཚོན་བྱིན་རླབས་ཀྱི་ཚན་ཀ་མ་ཉམས་པའི་ཚུལ་རྒྱས་པར་འཆད་དུ་ཡོད་དོ། །གཉིས་པ་ལ་གཉིས། སྨིན་བྱེད་བྱིན་རླབས་དང་། གྲོལ་བྱེད་ལམ་གྱི་རིམ་པའོ། །དང་པོ་ནི། ཚར་ཆེན་རིན་པོ་ཆེའི་སྒྲུབ་ཐབས་བྱིན་རླབས་དང་བཅས་པ་དང་། མཁན་ཆེན་ངག་དབང་ཆོས་གྲགས་ཀྱི་ཡིག་ཆ་སྟེ། འདི་གཉིས་སོ་སོའི་སྟེང་ནས་རྒྱུན་མ་ཉམས་པར་མཆིས་མོད། ཡིག་ཆ་སྔ་མའི་སྟེང་ནས་ཐོབ་ན་ཕྱི་མའི་གོ་ཆོད་ཅིང་། ཕྱི་མར་བཟླས་ལུང་མ་གསུངས་པས་སྔ་མའི་གོ་མི་ཆོད་པས་ན་དབང་ལུང་སྤྱིར་བཏང་དང་། བསྙེན་སྒྲུབ་དོན་ཏུ་གཉེར་བ་རྣམས་ཀྱིས་ཚར་ཆེན་རིན་པོ་ཆེའི་གསུང་རབ་སྟེང་ནས་འཆད་ཉན་བྱ་བ་ཅིས་ཀྱང་གལ་ཆེ། གཞན་ཏུ་རྐྱེན་སེལ་ཙམ་ལ་ནི་གང་ལྟར་ཡང་རུང་བར་མ་ཟད། གཏོར་དབང་རྐྱང་པ་བསྐུར་ཡང་རུང་བས། དེའི་ཚེ་མཚམས་སྦྱོར་གྱི་སྐབས། ཡི་དམ་ཁྱད་པར་ཅན་འདི་ཉིད་ཀྱི་སྒོ་ནས་བྱིན་རླབས་གཏོར་མའི་དབང་བསྐུར་སྒྲུབ་པར་བྱེད་པ་ལ་སོགས་འབྲེལ་བཀོད་ལ། གསོལ་འདེབས་དང་། རྒྱུན་བཤགས་བྱ། དངོས་གཞི་བྱིན་རླབས་གཏོར་མའི་དབང་བསྐུར་བའི་སླད་དུ་མདུན་གྱི་མཎྜལ་གཏོར་མ་དང་བཅས་པ་སོགས་ནས། མངོན་སུམ་དུ་བཞུགས་པ་ལ་གུས་འདུད་དྲག་པོ་དུང་བ་ཞིག་མཛད་པ་ལ་བརྟེན་ནས། གཏོར་མའི་ལྷ་ཚོགས་རྣམས་ཁྱེད་རང་རྣམས་ཀྱི་སྤྱི་བོར་བྱོན་ནས་སྐུ་དགེས་པའི་གར་མཛད་སོགས་ནས། ཁྱེད་རང་རྣམས་དཔལ་རྟ་མགྲིན་དངོས་སུ་གྱུར་པའི་མོས་པ་མཛོད། ཅེས་དང་སྔགས་ཀྱི་མཐར། ཛཿཧཱུྃ་བྃ་ཧོཿཞེས་བརྗོད། མཇུག་དམ་ཚིག་ཁས་བླང་སོགས་དཀྱུས་ལྟར་བྱ། བརྒྱ་རྩ་སོགས་བྱེད་ན། ཚར་དང་པོ་ལ། བཀའ་བསྒོ་ཡན་དཀྱུས་ལྟར་ལ། གཏོར་མའི་ལྷ་ཚོགས་རྣམས་ལས་རང་འདྲ་གཉིས་པ་རེ་བྱུང་། ཁྱེད་རང་རྣམས་ཀྱི་སྤྱི་བོ་ནས་ཐིམ་པས་སོགས་ནས། ཛཿཧཱུྃ་བྃ་ཧོཿཞེས་བརྗོད། སླར་ཡང་གཏོར་མ་དཔལ་རྟ་མཆོག་རོལ་པའི་ལྷ་ཚོགས་སུ་གསལ་བ་ལ་གུས་འདུད་དྲག་པོ་སོགས་ནས། བྃ་ཧོཿཞེས་པའི་བར་གོང་ལྟར་ལ། བརྒྱུད་པའི་གསོལ་འདེབས་བསྡུ་ན། སློབ་དཔོན་པདྨ་འབྱུང་གནས་དང་། དབོན་སྟོན་སྐྱེར་སྒང་པ་ཆོས་ཀྱི་སེངྒེ་ནས། བདག་ཅག་གི་དྲིན་ཆེན་རྩ་བའི་བླ་མའི་བར་དུ་བྱོན་པའི་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཡི་དམ་དཀྱིལ་འཁོར་སོགས་འདྲ། གྲངས་རྫོགས་པ་ན། སྤྱི་བོའི་སྟེང་གི་མཐའ་སྐོར་གྱི་ལྷ་ཚོགས་རྣམས་སོགས་སྦྱར། རྗེས་གནང་རྒྱས་པ་དང་འབྲེལ་བར་བརྒྱ་རྩ་བྱེད་ནའང་འདིས་རིགས་འགྲེ་ཞིང་། རྗེས་སུ་བཟླས་ལུང་སོགས་དཀྱུས་ལྟར་བྱའོ། །གཞན་དག་དབང་བཞིའི་དམིགས་པ་མདོར་བསྡུས་བསྐྱར་བར་སྣང་སྟེ། སློབ་མ་ཐུན་མོང་མ་ཡིན་པ་ལ་དེ་ལྟར་བྱས་ཀྱང་ལེགས་པ་ཉིད་དོ། །གཉིས་པ་གྲོལ་བྱེད་ཀྱི་རིམ་པ་ལ། སྤྱིར་སྨིན་བྱེད་ཀྱི་སྐབས་སུ་དབང་བཞིའི་རིམ་པ་གསུངས་པས། བསྐྱེད་རྫོགས་ཀྱི་ལམ་རིམ་ཚང་བར་བསྒོམ་དུ་རུང་མོད། རེ་ཞིག་ཡིག་རྙིང་གི་དངོས་བསྟན་ལྟར་ན་བསྐྱེད་རིམ་ལས་ཚོགས་དང་བཅས་པ་ཙམ་ཞིག་གསལ་བས། དེ་དང་རྗེས་སུ་མཐུན་པར་བརྗོད་ན་གསུམ། དང་པོ་ལྷ་ཉེ་བར་བསྙེན་པ། བར་དུ་དངོས་གྲུབ་སྒྲུབ་པ། མཐར་ལས་ཀྱི་སྦྱོར་བས་རང་གཞན་ལ་ཕན་གདགས་པའི་ཚུལ་ལོ། །དང་པོ་གཉིས་ལ་བསྙེན་སྒྲུབ་སོ་སོར་བྱ་བ་དང་། བསྙེན་སྒྲུབ་སྒྲགས་མའི་ཚུལ་གཉིས་ལས། ཕྱོགས་སྔ་མ་ལྟར་ན་དང་པོ་བསྙེན་པའི་རིམ་པ་ནི། གནས་དབེན་ཞིང་རང་དབང་འདུས་པའི་བསམ་གཏན་གྱི་ཁང་བུར་ཕྱག་དར་ལེགས་པར་བྱ། རང་གི་མདུན་ཏུ་མཐོ་དམའ་འཚམས་པར་འདི་ཉིད་ཀྱི་སྐུ་བྲིས་འབུར་གང་རིགས་ཡོད་ན་བཀྲམ་པའི་སྤྱན་སྔར་སྟེགས་ཀྱི་ཁར་དཔལ་གཏོར་དམར་པོ་པད་འདབ་དང་མཐེབ་ཀྱུས་བསྐོར་བའི་གཡས་སུ་སྨན། །གཡོན་ཏུ་རཀྟ། མདུན་ཏུ་ཆུ་གཉིས་སྔོན་འགྲོའི་ཉེར་སྤྱོད་བཅས་དང་། ཉེ་ལོགས་ཅི་བདེར་གཞི་བདག་དང་བགེགས་གཏོར། གཞན་ཡང་རྡོར་དྲིལ་སོགས་ཉེར་མཁོའི་ཡོ་བྱད་ཐམས་ཅད་འདུ་བྱ། དེ་ནས་དགོངས་མོའི་ཆར་དཀར་གཏོར་གཞི་བདག་གཏོར་མ་སྤྱི་ལྟར་གྱིས་བསྔོ། བགེགས་གཏོར་བསྔོ་བ་བྱིན་རླབས་ཀྱི་དབུ་ནས་འབྱུང་བལྟར་ལ། འདིར་དཔལ་རྟ་མགྲིན་གྱི་རྣལ་འབྱོར་ཟབ་མོ་ཉམས་སུ་ལེན་པ་ལ་བར་དུ་གཅོད་པའི་སོགས་འདྲ། དྲག་སྔགས་དང་བཅས་གཏོར་མ་ཕྱིར་བསྐྱལ། སྔགས་གུལ་གྱིས་བདུག །ཡུངས་ཀར་གྱིས་བྲབ། རྡོ་རྗེའི་སྲུང་འཁོར་བསྒོམས་ལ། ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱས་བརྟན་པར་བྱ། སྤྲོ་ན་རྒྱལ་ཆེན་ཐོ་འཛུགས་སྤྱི་ལྟར་དང་། གང་ལྟར་ཡང་མི་དམངས་སྲུང་ཐུབ་ངེས་ཀྱི་ཐོ་བརྟན་པར་བརྩིགས་ལ་མཚམས་དམ་པར་བཅད། བདག་བསྐྱེད་བརྒྱུད་འདེབས་དང་སྐྱབས་འགྲོ་ནས་བརྩམས་ཏེ་བཟླས་པའི་བར་ཚར་ཆེན་རིན་པོ་ཆེའི་གསུང་རབ་སོགས་ཡིག་ཆ་ཚད་ཐུབ་གང་ལྟར་བགྱིས་ཀྱང་རུང་། མཐར་ལྷ་སྐུ་འོད་གསལ་ཏུ་བསྡུ། ཟུང་འཇུག་གི་སྐུར་ལྡངས་ལ། མཇུག་ཏུ་གཏོར་བསྔོ་རྒྱས་བསྡུས་གང་རིགས་བསྔོ་སྨོན་ཤིས་བརྗོད་བཅས་བྱ། སླར་ཡང་སྲོད་ཐུན་ལ་བརྒྱུད་འདེབས་ནས་བཟླས་པའི་བར་དང་། །བཟླས་པའི་མཇུག་ཏུ་སྣང་ཆའི་ལྷ་སྐུ་འོད་གསལ་གྱི་དབྱིངས་སུ་བསྡུས་ཏེ། དེའི་ངང་དུ་ཉལ་བའི་རྣལ་འབྱོར་ལ་འཇུག་པའམ། ཐུན་མཚམས་ཀྱི་ལྷ་སྐུའི་ང་རྒྱལ་དང་བཅས་ཏེ་ཉལ། སང་ནངས་པར་ལྷར་གསལ་བས་ལྡངས་ལ་ཐོར་ཐུན་སོགས་ཐུན་བཞིའི་རིམ་པས་རབ་རྩ་སྔགས་འབྲུ་འབུམ། འབྲིང་བཞི་འབུམ། ཐ་མ་སུམ་འབུམ་ཁ་སྐོང་བཅས་བཟླ། ཕྱི་ཐུན་གྱི་མཇུག་ཐམས་ཅད་དུ་གཏོར་མ་འབུལ། གཞན་མཚམས་ཀྱི་སྤང་བླང་སོགས་གསང་བ་སྤྱིའི་ལུགས་བཞིན་དང་། གྲངས་རྫོགས་པ་ན་དབང་སྡུད་དང་ལས་སྔགས་ཀྱི་ཤམ་འདོགས་ཅན་ཞག་གསུམ་སོགས་ཇི་ལྟར་རིགས་པར་བཟླ། ཁ་སྐོང་གི་སྦྱིན་སྲེག་རིག་འཛིན་པདྨ་ཕྲིན་ལས་ཀྱི་གསུང་རབ་ལྟར་བྱ། ཐོར་ཐུན་ནམ་སྔ་ཐུན་གྱི་མཇུག་ཏུ་གཏོར་མ་རྒྱས་པར་ཕུལ་ལ་བསྔོ་སྨོན་ཤིས་བརྗོད་རྒྱ་ཆེར་བྱ་ཞིང་མཚམས་གྲོལ་བ་སོགས་སྤྱི་ལྟར་བྱའོ། །གཉིས་པ་སྒྲུབ་པ་ནི། བསྙེན་པ་དེ་ཀའི་མཇུག་ཏུ་བྱེད་ན་སྔོན་འགྲོ་གཏོར་མ་བཏང་བ་སོགས་མི་དགོས་ཤིང་། དེ་མིན་སྦྱོར་བའི་རིམ་པ་རྣམས་གོང་ལྟར་བྱ། དམིགས་བསལ་མདུན་བསྐྱེད་ཀྱི་རྟེན་ཚོན་དཀྱིལ་དང་། སྒྲུབ་གཏོར་བཅས་བྱིན་རླབས་ཀྱི་ཆོ་ག་ལས་འབྱུང་བ་ལྟར་བཀོད་པའི་སྤྱན་སྔར་སྨན་རག་གཏོར་ཚོགས་མཆོད་པ་དང་བཅས་པ་བཤམ། བརྒྱུད་འདེབས་དང་སྐྱབས་སེམས་སྔོན་དུ་འགྲོ་བས། བློ་ལ་འཆར་བདེ་ན་ཆོ་ག་གཅིག་ཁོ་ནས་བདག་མདུན་གཉིས་ཀ་ལྷར་གསལ་བཏབ་ཀྱང་རུང་། ལས་དང་པོ་པས་དམིགས་རྣམ་འཆར་བདེ་བའི་ཕྱིར་ཐོག་མར་བདག་བསྐྱེད་བཟླས་པ་ཅུང་ཟད་དང་བཅས་གྲུབ་རྗེས། མདུན་རྟེན་བསང་སྦྱང་། སྟོང་པའི་ངང་ལས་དཔལ་རྟ་མགྲིན་དམ་ཚིག་པར་བསྐྱེད། རང་གི་སྙིང་ག་ནས་འོད་ཟེར་འཕྲོས་པས་བཅོམ་ལྡན་འདས་དཔལ་རྟ་མཆོག་རོལ་པ་ལ་རྩ་གསུམ་ཆོས་སྲུང་རྒྱ་མཚོས་བསྐོར་བ་མདུན་གྱི་ནམ་མཁར་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། མཆོད་པ་བསང་སྦྱང་བྱིན་རླབས་ལ། ཨོཾ་པདྨཱནྟ་ཀྲྀ་ཏ་ཧ་ཡ་གྲཱི་བ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། རྒྱལ་བ་ཀུན་གྱི་སོགས་ཀྱིས་བསྟོད། འདིའི་སྤྱན་འདྲེན་ནས་བསྟོད་པའི་བར་སྤྲོ་ན་རྒྱལ་དབང་རིན་པོ་ཆེའི་སྒྲུབ་ཐབས་ལྟར་བཏང་། རང་གི་སྙིང་ག་ནས་སྔགས་ཀྱི་ཕྲེང་བ་ལས་འོད་ཟེར་འཕྲོས། མདུན་བསྐྱེད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ། རང་དང་མདུན་བསྐྱེད་ཀྱི་སྐུའི་ཆ་ཐམས་ཅད་ཀྱི་ཁྲོ་ཆུང་རྣམས་ཀྱི་ཞལ་ནས་སྔགས་ཀྱི་སྒྲ་འབྲུག་སྟོང་ལྟར་སྒྲོགས་ཤིང་། མེ་ཕུང་འབར་ཞིང་འཁྲུགས་པས་བར་ཆད་གདོན་བགེགས་ཐམས་ཅད་གཞོབ་ཐུལ་ཐུལ་ཏུ་བསྲེག་པར་བསམ་པ་སོགས་དམིགས་པ་རྣམས་གསལ་བཏབ་ལ་ཐུན་གྱི་དངོས་གཞིར་རྩ་སྔགས་དང་། ཐུན་མཐར་ཤམ་འདོགས་ཅན་ཅི་རིགས་པའང་བཟླ། ཐུན་མཚམས་སུ་ཚོགས་མཆོད་དང་། གཏོར་བསྔོ་རྒྱས་བསྡུས་གང་འགྲུབ་བྱ། དེ་ལྟ་བུ་ཐུན་བཞིའི་རིམ་པས་སྔགས་འབུམ་ཕྲག །ཞག་བདུན་སོགས་ཇི་ལྟར་རིགས་པར་ཉམས་སུ་བླངས། གྲོལ་རྒྱུའི་ཐུན་ཐ་མའི་བཟླས་པའི་མཇུག་ཏུ་ཚོགས་གཏོར་རྒྱས་པར་འབུལ། སྤྲོ་ན་བྱིན་རླབས་ཀྱི་ཆོས་རྣམས་བདག་འཇུག་གི་ཚུལ་ཏུ་ལེན་པ་ཤངས་པའི་ཕྱག་ལེན་ཡིན། དེ་ཙམ་མ་གྲུབ་ཀྱང་གཏོར་མ་ལྷར་གསལ་བའི་གནས་བཞི་ནས་རྟ་མགྲིན་དཀར་དམར་མཐིང་གའི་མདོག་ཅན་དཔག་ཏུ་མེད་པ་བྱུང་། རང་གི་གནས་བཞིར་ཐིམ་པས་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པར་བསམས་ལ་སྔགས་བཟླ་བཞིན་ཏུ་གཏོར་མ་གནས་གསུམ་དུ་རེག །སླར་ཡང་སྤྱི་བོར་བཟུང་ལ། རྩ་སྔགས་ཀྱི་མཐར་ཛཿཧཱུྃ་བྃ་ཧོཿབརྗོད་པས་ལྷ་འོད་དུ་ཞུ་ནས་རང་ལ་ཐིམ། གཏོར་ཟན་དངོས་གྲུབ་ཀྱི་རྫས་སུ་བསམས་ལ་ཅུང་ཟད་རོལ། དེ་ནས་ལྷ་སྐུ་བསྡུ་ལྡང་བསྔོ་སྨོན་ཤིས་བརྗོད་སོགས་རྒྱ་ཆེར་བྱས་ལ་མཚམས་གྲོལ་བ་སོགས་བྱའོ། །མཛད་འཕྲོས་ལུས།། །། ༈

[edit]

de'i gdams pa'i zin bris mdzad 'phro lus pa/__ dpal rta mchog rol pa gsang sgrub kyi gdams pa'i zin bris nyung gsal grub gnyis sa bon ces bya ba bzhugs so/__/oM swa sti/__/gang gi ye shes 'bar ba'i mes/__/bdud sde'i bud shing kun bsregs nas/__/grub gnyis snang ba rgyas mdzad pa/__/bla ma rta mchog rol pas skyongs/__/de la 'dir snye mo gangs ri ba sangs rgyas dbang chen gyi zab gter dang /__spyan ras gzigs dngos dbon ston skyer sgang pa chos kyi seng ge'i dag snang zung du 'brel ba'i dpal rta mchog rol pa gsang sgrub kyi gdams pa'i zin bris sa bcad tsam spel ba la gnyis/__lo rgyus dang /__gdams pa dngos so/__/dang po ni/__spyir yig rnying dang byin rlabs kyi lo rgyus las shes shing /__phyis su'ang rang gzhan gyi phyogs lhag pa'i lha 'di nyid las dngos grub kyi mtshan ma brnyes pa'ang ci rigs par byon pas mtshon byin rlabs kyi tshan ka ma nyams pa'i tshul rgyas par 'chad du yod do/__/gnyis pa la gnyis/__smin byed byin rlabs dang /__grol byed lam gyi rim pa'o/__/dang po ni/__tshar chen rin po che'i sgrub thabs byin rlabs dang bcas pa dang /__mkhan chen ngag dbang chos grags kyi yig cha ste/__'di gnyis so so'i steng nas rgyun ma nyams par mchis mod/__yig cha snga ma'i steng nas thob na phyi ma'i go chod cing /__phyi mar bzlas lung ma gsungs pas snga ma'i go mi chod pas na dbang lung spyir btang dang /__bsnyen sgrub don tu gnyer ba rnams kyis tshar chen rin po che'i gsung rab steng nas 'chad nyan bya ba cis kyang gal che/__gzhan tu rkyen sel tsam la ni gang ltar yang rung bar ma zad/__gtor dbang rkyang pa bskur yang rung bas/__de'i tshe mtshams sbyor gyi skabs/__yi dam khyad par can 'di nyid kyi sgo nas byin rlabs gtor ma'i dbang bskur sgrub par byed pa la sogs 'brel bkod la/__gsol 'debs dang /__rgyun bshags bya/__dngos gzhi byin rlabs gtor ma'i dbang bskur ba'i slad du mdun gyi maN+Dal gtor ma dang bcas pa sogs nas/__mngon sum du bzhugs pa la gus 'dud drag po dung ba zhig mdzad pa la brten nas/__gtor ma'i lha tshogs rnams khyed rang rnams kyi spyi bor byon nas sku dges pa'i gar mdzad sogs nas/__khyed rang rnams dpal rta mgrin dngos su gyur pa'i mos pa mdzod/__ces dang sngags kyi mthar/__dzaHhU~M ba~M hoHzhes brjod/__mjug dam tshig khas blang sogs dkyus ltar bya/__brgya rtsa sogs byed na/__tshar dang po la/__bka' bsgo yan dkyus ltar la/__gtor ma'i lha tshogs rnams las rang 'dra gnyis pa re byung /__khyed rang rnams kyi spyi bo nas thim pas sogs nas/__dzaHhU~M ba~M hoHzhes brjod/__slar yang gtor ma dpal rta mchog rol pa'i lha tshogs su gsal ba la gus 'dud drag po sogs nas/__ba~M hoHzhes pa'i bar gong ltar la/__brgyud pa'i gsol 'debs bsdu na/__slob dpon pad+ma 'byung gnas dang /__dbon ston skyer sgang pa chos kyi seng+ge nas/__bdag cag gi drin chen rtsa ba'i bla ma'i bar du byon pa'i rtsa ba dang brgyud par bcas pa'i dpal ldan bla ma dam pa rnams dang /__yi dam dkyil 'khor sogs 'dra/__grangs rdzogs pa na/__spyi bo'i steng gi mtha' skor gyi lha tshogs rnams sogs sbyar/__rjes gnang rgyas pa dang 'brel bar brgya rtsa byed na'ang 'dis rigs 'gre zhing /__rjes su bzlas lung sogs dkyus ltar bya'o/__/gzhan dag dbang bzhi'i dmigs pa mdor bsdus bskyar bar snang ste/__slob ma thun mong ma yin pa la de ltar byas kyang legs pa nyid do/__/gnyis pa grol byed kyi rim pa la/__spyir smin byed kyi skabs su dbang bzhi'i rim pa gsungs pas/__bskyed rdzogs kyi lam rim tshang bar bsgom du rung mod/__re zhig yig rnying gi dngos bstan ltar na bskyed rim las tshogs dang bcas pa tsam zhig gsal bas/__de dang rjes su mthun par brjod na gsum/__dang po lha nye bar bsnyen pa/__bar du dngos grub sgrub pa/__mthar las kyi sbyor bas rang gzhan la phan gdags pa'i tshul lo/__/dang po gnyis la bsnyen sgrub so sor bya ba dang /__bsnyen sgrub sgrags ma'i tshul gnyis las/__phyogs snga ma ltar na dang po bsnyen pa'i rim pa ni/__gnas dben zhing rang dbang 'dus pa'i bsam gtan gyi khang bur phyag dar legs par bya/__rang gi mdun tu mtho dma' 'tshams par 'di nyid kyi sku bris 'bur gang rigs yod na bkram pa'i spyan sngar stegs kyi khar dpal gtor dmar po pad 'dab dang mtheb kyus bskor ba'i g.yas su sman/__/g.yon tu rak+ta/__mdun tu chu gnyis sngon 'gro'i nyer spyod bcas dang /__nye logs ci bder gzhi bdag dang bgegs gtor/__gzhan yang rdor dril sogs nyer mkho'i yo byad thams cad 'du bya/__de nas dgongs mo'i char dkar gtor gzhi bdag gtor ma spyi ltar gyis bsngo/__bgegs gtor bsngo ba byin rlabs kyi dbu nas 'byung bltar la/__'dir dpal rta mgrin gyi rnal 'byor zab mo nyams su len pa la bar du gcod pa'i sogs 'dra/__drag sngags dang bcas gtor ma phyir bskyal/__sngags gul gyis bdug__/yungs kar gyis brab/__rdo rje'i srung 'khor bsgoms la/__oM badz+ra rak+Sha rak+Sha hU~M hU~M hU~M phaT swA hAs brtan par bya/__spro na rgyal chen tho 'dzugs spyi ltar dang /__gang ltar yang mi dmangs srung thub nges kyi tho brtan par brtsigs la mtshams dam par bcad/__bdag bskyed brgyud 'debs dang skyabs 'gro nas brtsams te bzlas pa'i bar tshar chen rin po che'i gsung rab sogs yig cha tshad thub gang ltar bgyis kyang rung /__mthar lha sku 'od gsal tu bsdu/__zung 'jug gi skur ldangs la/__mjug tu gtor bsngo rgyas bsdus gang rigs bsngo smon shis brjod bcas bya/__slar yang srod thun la brgyud 'debs nas bzlas pa'i bar dang /__/bzlas pa'i mjug tu snang cha'i lha sku 'od gsal gyi dbyings su bsdus te/__de'i ngang du nyal ba'i rnal 'byor la 'jug pa'am/__thun mtshams kyi lha sku'i nga rgyal dang bcas te nyal/__sang nangs par lhar gsal bas ldangs la thor thun sogs thun bzhi'i rim pas rab rtsa sngags 'bru 'bum/__'bring bzhi 'bum/__tha ma sum 'bum kha skong bcas bzla/__phyi thun gyi mjug thams cad du gtor ma 'bul/__gzhan mtshams kyi spang blang sogs gsang ba spyi'i lugs bzhin dang /__grangs rdzogs pa na dbang sdud dang las sngags kyi sham 'dogs can zhag gsum sogs ji ltar rigs par bzla/__kha skong gi sbyin sreg rig 'dzin pad+ma phrin las kyi gsung rab ltar bya/__thor thun nam snga thun gyi mjug tu gtor ma rgyas par phul la bsngo smon shis brjod rgya cher bya zhing mtshams grol ba sogs spyi ltar bya'o/__/gnyis pa sgrub pa ni/__bsnyen pa de ka'i mjug tu byed na sngon 'gro gtor ma btang ba sogs mi dgos shing /__de min sbyor ba'i rim pa rnams gong ltar bya/__dmigs bsal mdun bskyed kyi rten tshon dkyil dang /__sgrub gtor bcas byin rlabs kyi cho ga las 'byung ba ltar bkod pa'i spyan sngar sman rag gtor tshogs mchod pa dang bcas pa bsham/__brgyud 'debs dang skyabs sems sngon du 'gro bas/__blo la 'char bde na cho ga gcig kho nas bdag mdun gnyis ka lhar gsal btab kyang rung /__las dang po pas dmigs rnam 'char bde ba'i phyir thog mar bdag bskyed bzlas pa cung zad dang bcas grub rjes/__mdun rten bsang sbyang /__stong pa'i ngang las dpal rta mgrin dam tshig par bskyed/__rang gi snying ga nas 'od zer 'phros pas bcom ldan 'das dpal rta mchog rol pa la rtsa gsum chos srung rgya mtshos bskor ba mdun gyi nam mkhar badz+ra sa mA dzaHsa spyan drang /__dzaHhU~M ba~M hoH__gnyis su med par thim/__mchod pa bsang sbyang byin rlabs la/__oM pad+mAn+ta kr-i ta ha ya grI ba sa pa ri wA ra ar+g+haM sogs kyis mchod/__rgyal ba kun gyi sogs kyis bstod/__'di'i spyan 'dren nas bstod pa'i bar spro na rgyal dbang rin po che'i sgrub thabs ltar btang /__rang gi snying ga nas sngags kyi phreng ba las 'od zer 'phros/__mdun bskyed kyi thugs kar phog pas thugs rgyud bskul/__rang dang mdun bskyed kyi sku'i cha thams cad kyi khro chung rnams kyi zhal nas sngags kyi sgra 'brug stong ltar sgrogs shing /__me phung 'bar zhing 'khrugs pas bar chad gdon bgegs thams cad gzhob thul thul tu bsreg par bsam pa sogs dmigs pa rnams gsal btab la thun gyi dngos gzhir rtsa sngags dang /__thun mthar sham 'dogs can ci rigs pa'ang bzla/__thun mtshams su tshogs mchod dang /__gtor bsngo rgyas bsdus gang 'grub bya/__de lta bu thun bzhi'i rim pas sngags 'bum phrag__/zhag bdun sogs ji ltar rigs par nyams su blangs/__grol rgyu'i thun tha ma'i bzlas pa'i mjug tu tshogs gtor rgyas par 'bul/__spro na byin rlabs kyi chos rnams bdag 'jug gi tshul tu len pa shangs pa'i phyag len yin/__de tsam ma grub kyang gtor ma lhar gsal ba'i gnas bzhi nas rta mgrin dkar dmar mthing ga'i mdog can dpag tu med pa byung /__rang gi gnas bzhir thim pas dbang dang byin rlabs dngos grub ma lus pa thob par bsams la sngags bzla bzhin tu gtor ma gnas gsum du reg__/slar yang spyi bor bzung la/__rtsa sngags kyi mthar dzaHhU~M ba~M hoHbrjod pas lha 'od du zhu nas rang la thim/__gtor zan dngos grub kyi rdzas su bsams la cung zad rol/__de nas lha sku bsdu ldang bsngo smon shis brjod sogs rgya cher byas la mtshams grol ba sogs bya'o/__/mdzad 'phros lus//___//_!_