JKW-KABUM-10-THA-004-013

🚧 This website is under continued development. We appreciate your patience!

Previous Text Back to Volume PageLast text in section.

Wylie title	'jam dbyangs dmar ser dpa' bo gcig pa'i rjes gnang gi brgyud 'debs smon lam dang bcas pa 'jam mgon dgyes pa'i rol mo
Location	mkhyen brtse'i bka' 'bum Volume 10, sde tshan 4, Text 13, Pages 271-274 (Folios 45a6 to 46b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	བྱམས་པ་ཀུན་དགའ་བསྟན་འཛིན་ (byams pa kun dga' bstan 'dzin)
Citation	'jam dbyangs mkhyen brtse'i dbang po. 'jam dbyangs dmar ser dpa' bo gcig pa'i rjes gnang gi brgyud 'debs smon lam dang bcas pa 'jam mgon dgyes pa'i rol mo. In 'jam dbyangs mkhyen brtse'i dbang po'i bka' 'bum, Vol. 10: 271-274. Khams sde dge rdzong sar dgon: Rdzong sar blo gros phun tshogs, 2020.
Genre	Prayers - smon lam  ·  Lineage Supplications - brgyud 'debs
Deity	'jam dbyangs dmar ser
Colophon	།ཞེས་པའང་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་སོགས་ཡོངས་འཛིན་དམ་པ་རྣམས་ལས་ཆོས་ཚུལ་འདིའི་བཀའ་དྲིན་མང་དུ་ཐོབ་པའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་མི་ཕྱེད་གུས་པས་གསོལ་བ་བཏབ་པ་སིདྡྷི་རསྟུ།།
	zhes pa'ang rdo rje 'chang byams pa kun dga' bstan 'dzin sogs yongs 'dzin dam pa rnams las chos tshul 'di'i bka' drin mang du thob pa'i bya bral ba 'jam dbyangs mkhyen brtse'i dbang pos mi phyed gus pas gsol ba btab pa sid+d+hi rastu/

1 Texts in this Section (sde tshan or chos tshan)

13 271-274	འཇམ་དབྱངས་དམར་སེར་དཔའ་བོ་གཅིག་པའི་རྗེས་གནང་གི་བརྒྱུད་འདེབས་སྨོན་ལམ་དང་བཅས་པ་འཇམ་མགོན་དགྱེས་པའི་རོལ་མོ། 'jam dbyangs dmar ser dpa' bo gcig pa'i rjes gnang gi brgyud 'debs smon lam dang bcas pa 'jam mgon dgyes pa'i rol mo Prayers - smon lam   ·   Lineage Supplications - brgyud 'debs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །འཇམ་དབྱངས་དམར་སེར་དཔའ་བོ་གཅིག་པའི་རྗེས་གནང་གི་བརྒྱུད་འདེབས་སྨོན་ལམ་དང་བཅས་པ་འཇམ་མགོན་དགྱེས་པའི་རོལ་མོ་ཞེས་བྱ་བ་བཞུགས་སོ། །བརྟན་པའི་འཁོར་ལོ་གྲུབ་ཆེན་ཛེ་ཏཱ་རི། །རོལ་པའི་རྡོ་རྗེ་དོན་ཡོད་རྡོ་རྗེ་དང་། །བ་རི་ལོ་ཙཱ་འཇམ་མགོན་གྲུབ་པའི་དཔལ། །ཀུན་དགའ་སྙིང་པོ་རྣམས་ལ་གསོལ་བ་འདེབས། །བསོད་ནམས་རྩེ་མོ་གྲགས་པ་རྒྱལ་མཚན་ཞབས། །འཇམ་པའི་དབྱངས་དངོས་ས་སྐྱ་པཎྜི་ཏ། །སྨྲ་བའི་དབང་ཕྱུག་རྒྭ་ལོ་ཡབ་སྲས་དང་། །གྲགས་པ་སེང་གེ་རྣམས་ལ་གསོལ་བ་འདེབས། །བསོད་ནམས་རྒྱལ་མཚན་དཔལ་ལྡན་ཚུལ་ཁྲིམས་དང་། །ཡེ་ཤེས་རྒྱལ་མཚན་ངོར་ཆེན་རྡོ་རྗེ་འཆང་། །རྒྱལ་ཚབ་ཀུན་དབང་ཡོངས་འཛིན་དཀོན་མཆོག་འཕེལ། །དཀོན་མཆོག་ལྷུན་གྲུབ་རྣམས་ལ་གསོལ་བ་འདེབས། །ནམ་མཁའ་དཔལ་བཟང་བསོད་ནམས་ལྷུན་གྲུབ་དང་། །ངག་དབང་བསྟན་རྡོར་བསོད་ནམས་བསྟན་འཛིན་དབང་། །བཀྲ་ཤིས་དཔལ་ལྡན་ཀུན་དགའ་རིན་ཆེན་ཞབས། །སངས་རྒྱས་ཕུན་ཚོགས་རྣམས་ལ་གསོལ་བ་འདེབས། །བསོད་ནམས་དཔལ་ལྡན་དཔལ་ལྡན་ཆོས་སྐྱོང་དང་། །རིན་ཆེན་མཆོག་གྲུབ་ནམ་མཁའ་འཆི་མེད་དཔལ། །ཐམས་ཅད་མཁྱེན་པ་ཀུན་དགའ་བསྟན་འཛིན་སོགས། །རྩ་བརྒྱུད་བླ་མ་རྣམས་ལ་གསོལ་བ་འདེབས། །དེ་ལྟར་མི་ཕྱེད་གུས་པས་གསོལ་བཏབ་མཐུས། །བདག་གཞན་འགྲོ་ཀུན་བྱང་ཆུབ་སྙིང་པོའི་བར། །དལ་འབྱོར་རྟེན་ཐོབ་དགེ་བའི་བཤེས་ཀྱིས་བཟུང་། །རྣམ་དག་བསྟན་ལ་འཇུག་པར་བྱིན་གྱིས་རློབས། །ཁྱད་པར་སྨིན་བྱེད་དབང་དང་རྗེས་གནང་གིས། །རྒྱུད་སྨིན་ཟབ་མོའི་སྔགས་རིག་གྲུབ་པ་ལས། །འཇམ་མགོན་དགྱེས་པའི་ཞལ་བཟང་མཐོང་བ་དང་། །གསུང་གི་བདུད་རྩི་ཐོབ་པར་བྱིན་གྱིས་རློབས། །དེ་མཐུས་ཁས་བླངས་ཚུལ་ཁྲིམས་རྣམ་པར་དག །དད་དང་ངེས་འབྱུང་བྱང་ཆུབ་སེམས་གཉིས་འབྱོང་། །ཕུལ་བྱུང་ཟབ་གསལ་མྱུར་བའི་བློ་གྲོས་དང་། །སྤོབས་པའི་གཏེར་ཆེན་གྲོལ་བར་བྱིན་གྱིས་རློབས། །མང་དུ་ཐོས་པའི་དཔག་བསམ་རབ་རྒྱས་པར། །བསམ་བྱུང་དག་པའི་པདྨོ་མཛེས་འབར་ཞིང་། །དོན་སྒོམ་ནོར་བུའི་སྙེ་མ་གཡུར་ཟ་བས། །ཕན་བདེའི་འདོད་པ་འཇོ་བར་བྱིན༴ ཚིག་སྙན་སྡེབ་ལེགས་སྦྱོར་བས་རབ་བཅིངས་ཤིང་། །དོན་བཟང་རིན་ཆེན་བྱེ་བའི་དཔལ་འཛིན་པ། །རྩོམ་ཕྲེང་ཐུབ་བསྟན་མཛེས་པའི་རྒྱན་གཅིག་པུ། །སྲིད་མཐའི་བར་དུ་འཕེལ་བར་བྱིན༴ ཕྱི་ནང་རིག་གཞུང་མཐའ་དག་འཁྲུལ་མེད་པར། །དགོས་བསྡུས་ཚིག་དོན་མཚམས་སྦྱོར་བརྒལ་ལན་གྱིས། །འཆད་པས་བློ་གསལ་རྒྱ་མཚོའི་ཡིད་འཕྲོག་པའི། །སྨྲ་བའི་དབང་ཕྱུག་ཐོབ་པར་བྱིན༴ གཞལ་བྱའི་གནས་ཀུན་མངོན་སུམ་རྗེས་དཔག་གིས། །བསྒྲུབ་དང་སུན་འབྱིན་ཚེར་མ་དབྱུང་མཁས་པའི། །རྩོད་པས་ཕས་རྒོལ་ཕྱོགས་ལས་རྣམ་རྒྱལ་བའི། །གྲགས་དཀར་ས་གསུམ་ཁྱབ་པར་བྱིན༴ མཐར་ཐུག་ཤེས་བྱའི་ཆོས་ཀུན་ཇི་བཞིན་མཐོང་། །ཤེས་པ་སྤྲོས་བྲལ་ཞི་བའི་དབྱིངས་སུ་སིམ། །ཤེས་དང་ཤེས་བྱ་རོ་གཅིག་འཇམ་པའི་དཔལ། །ཚེ་འདིར་མངོན་སུམ་འགྲུབ་པར་བྱིན་གྱིས་རློབས། །ཞེས་པའང་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་སོགས་ཡོངས་འཛིན་དམ་པ་རྣམས་ལས་ཆོས་ཚུལ་འདིའི་བཀའ་དྲིན་མང་དུ་ཐོབ་པའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་མི་ཕྱེད་གུས་པས་གསོལ་བ་བཏབ་པ་སིདྡྷི་རསྟུ།། །། ༈

[edit]

'jam dbyangs dmar ser dpa' bo gcig pa'i rjes gnang gi brgyud 'debs smon lam dang bcas pa 'jam mgon dgyes pa'i rol mo/ @#/_/'jam dbyangs dmar ser dpa' bo gcig pa'i rjes gnang gi brgyud 'debs smon lam dang bcas pa 'jam mgon dgyes pa'i rol mo zhes bya ba bzhugs so/__/brtan pa'i 'khor lo grub chen dze tA ri/__/rol pa'i rdo rje don yod rdo rje dang /__/ba ri lo tsA 'jam mgon grub pa'i dpal/__/kun dga' snying po rnams la gsol ba 'debs/__/bsod nams rtse mo grags pa rgyal mtshan zhabs/__/'jam pa'i dbyangs dngos sa skya paN+Di ta/__/smra ba'i dbang phyug rgwa lo yab sras dang /__/grags pa seng ge rnams la gsol ba 'debs/__/bsod nams rgyal mtshan dpal ldan tshul khrims dang /__/ye shes rgyal mtshan ngor chen rdo rje 'chang /__/rgyal tshab kun dbang yongs 'dzin dkon mchog 'phel/__/dkon mchog lhun grub rnams la gsol ba 'debs/__/nam mkha' dpal bzang bsod nams lhun grub dang /__/ngag dbang bstan rdor bsod nams bstan 'dzin dbang /__/bkra shis dpal ldan kun dga' rin chen zhabs/__/sangs rgyas phun tshogs rnams la gsol ba 'debs/__/bsod nams dpal ldan dpal ldan chos skyong dang /__/rin chen mchog grub nam mkha' 'chi med dpal/__/thams cad mkhyen pa kun dga' bstan 'dzin sogs/__/rtsa brgyud bla ma rnams la gsol ba 'debs/__/de ltar mi phyed gus pas gsol btab mthus/__/bdag gzhan 'gro kun byang chub snying po'i bar/__/dal 'byor rten thob dge ba'i bshes kyis bzung /__/rnam dag bstan la 'jug par byin gyis rlobs/__/khyad par smin byed dbang dang rjes gnang gis/__/rgyud smin zab mo'i sngags rig grub pa las/__/'jam mgon dgyes pa'i zhal bzang mthong ba dang /__/gsung gi bdud rtsi thob par byin gyis rlobs/__/de mthus khas blangs tshul khrims rnam par dag__/dad dang nges 'byung byang chub sems gnyis 'byong /__/phul byung zab gsal myur ba'i blo gros dang /__/spobs pa'i gter chen grol bar byin gyis rlobs/__/mang du thos pa'i dpag bsam rab rgyas par/__/bsam byung dag pa'i pad+mo mdzes 'bar zhing /__/don sgom nor bu'i snye ma g.yur za bas/__/phan bde'i 'dod pa 'jo bar byin=__tshig snyan sdeb legs sbyor bas rab bcings shing /__/don bzang rin chen bye ba'i dpal 'dzin pa/__/rtsom phreng thub bstan mdzes pa'i rgyan gcig pu/__/srid mtha'i bar du 'phel bar byin=__phyi nang rig gzhung mtha' dag 'khrul med par/__/dgos bsdus tshig don mtshams sbyor brgal lan gyis/__/'chad pas blo gsal rgya mtsho'i yid 'phrog pa'i/__/smra ba'i dbang phyug thob par byin=__gzhal bya'i gnas kun mngon sum rjes dpag gis/__/bsgrub dang sun 'byin tsher ma dbyung mkhas pa'i/__/rtsod pas phas rgol phyogs las rnam rgyal ba'i/__/grags dkar sa gsum khyab par byin=__mthar thug shes bya'i chos kun ji bzhin mthong /__/shes pa spros bral zhi ba'i dbyings su sim/__/shes dang shes bya ro gcig 'jam pa'i dpal/__/tshe 'dir mngon sum 'grub par byin gyis rlobs/__/zhes pa'ang rdo rje 'chang byams pa kun dga' bstan 'dzin sogs yongs 'dzin dam pa rnams las chos tshul 'di'i bka' drin mang du thob pa'i bya bral ba 'jam dbyangs mkhyen brtse'i dbang pos mi phyed gus pas gsol ba btab pa sid+d+hi rastu//____//__!