JKW-KABAB-18-TSHA-001

🚧 This website is under continued development. We appreciate your patience!

First text in volume. Back to Volume PageNext Text

Wylie title	tshe sgrub bai ro'i thugs tig gsang ba'i rgya can
Location	mkhyen brtse'i bka' babs Volume 18, Text 1, Pages 1-7 (Folios 1a to 4a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Associated People	བཻ་རོ་ཙཱ་ན་ (Bai ro tsa na)
Citation	'jam dbyangs mkhyen brtse'i dbang po. tshe sgrub bai ro'i thugs tig gsang ba'i rgya can. In Rdzong sar 'jam dbyangs mkhyen brtse'i dbang po'i bka' babs, Vol. 18: 1-7. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Bön Texts - bon po  ·  Longevity Rituals - tshe sgrub
Cycle	ཚེ་སྒྲུབ་བཻ་རོའི་ཐུགས་ཏིག་ (tshe sgrub bai ro'i thugs tig)
Karchag page	JKW-KABAB-Volume-18-TSHA-Karchag
RTZ	In the Rinchen Terdzö: https://rtz.tsadra.org/index.php/Terdzo-THI-003
Colophon	མི་ཤིགས་གཡུང་དྲུང་འབྱུང་གནས་རྩལ་གྱི་གསང་གཏེར་ཟབ་མོ་ཤིན་ཏུ་གསང་ངོ་༔
	mi shigs g.yung drung 'byung gnas rtsal gyi gsang gter zab mo shin tu gsang ngo

Tibetan Text

Wylie

[edit]

༄༅། དྷཱི ཚེ་སྒྲུབ་བཻ་རོའི་ཐུགས་ཏིག་གསང་བའི་རྒྱ་ཅན་བཞུགས་སོ༔ ༄༅༔ བླ་མ་ཡི་དམ་མཁའ་འགྲོ་གསུམ་ལ་ཕྱག་འཚལ་ལོ༔ སློབ་དཔོན་རིན་པོ་ཆེ་པདྨ་འབྱུང་གནས་དཔལ་བསམ་ཡས་མཆིམས་ཕུ་བྲེ་གུའི་ཀེའི་ཚང་ན་བཞུགས་པའི་སྐབས༔ ལོ་ཙཱ་བ་བཻ་རོ་ཙ་ན་འཁོར་ཡུག་འོད་གསལ་གྱི་ངང་དུ་མཉམ་པར་བཞག་པའི་སྤྱན་སྔར་ལང་གྲོ་དཀོན་མཆོག་འབྱུང་གནས་ཀྱིས་མཆིས་ཏེ་གསེར་གྱི་མཎྜལ་ཕུལ་ནས་ཚེ་སྒྲུབ་ཀྱི་གདམས་པ་ཟབ་ལ་འདྲིལ་བ་ཞིག་ཞུས་པས་འདི་གནང་ངོ་༔ ཨེ་མ་སྐལ་ལྡན་རིགས་ཀྱི་བུ༔ གཡུང་དྲུང་ཚེ་ཉིད་བསྒྲུབ་འདོད་ན༔ མ་རྡལ་མདའ་གང་གྲུ་བཞི་པ༔ སྨན་དང་སྤོས་ཀྱི་ཆག་ཆག་གདབ༔ ཚེ་ཡི་ཕོ་བྲང་ཟླ་གམ་དབུས༔ གཏའ་ཆེན་བདུད་རྩི་ཚེ་འབྲང་དང་༔ དངོས་གྲུབ་ཚོགས་རྫས་མཆོད་པ་བཤམ༔ ཡུལ་ས་གཞི་བདག་དབང་དུ་བསྡུ༔ གཏོར་མ་བྱིན་ལ་བཀའ་བསྒོ་བཅོལ༔ བགེགས་བསྐྲད་མཚམས་བཅད་ཏིང་འཛིན་གསལ༔ དེ་ནས་རིག་འཛིན་ཚེ་ཡི་ལྷར༔ གུས་པས་ཕྱག་འཚལ་སྐྱབས་འགྲོ་བྱ༔ བསྭོ་ཨཱོཾ༔ དཀོན་མཆོག་གསུམ་གྱི་ངོ་བོ་ཉིད༔ གཡུང་དྲུང་ཚེ་ཡི་ལྷ་ཚོགས་ལ༔ ཕྱག་འཚལ་སྐྱབས་མཆི་གསོལ་བ་འདེབས༔ འགྲོ་བའི་དོན་ཕྱིར་འཆི་མེད་བསྒྲུབ༔ ཨ་ཨ་ཨ༔ ཨ་ནི་བོན་ཉིད་སྐྱེ་བ་མེད༔ ཨ་ལས་ཨཱོཾ་འཕྲོས་ཧཱུྃ་ལ་ཐིམ༔ སངས་རྒྱས་སེམས་དཔའ་རིག་འཛིན་དང་༔ སྣོད་བཅུད་དྭངས་མ་ཐམས་ཅད་བསྡུས༔ བདག་མདུན་སྐད་ཅིག་དྲན་རྫོགས་སུ༔ འཆི་མེད་དྲན་པ་ཚེ་དབང་རྩལ༔ ཕྱག་གཡས་གཡུང་དྲུང་ཐུགས་ཀར་གཏོད༔ གཡོན་པས་མཉམ་བཞག་ཚེ་བུམ་འཛིན༔ འོད་ལྡན་ཡེ་ཤེས་ཙན་དྷ་ལཱི༔ པདྨ་ཚེ་བུམ་བསྣམས་པས་འཁྲིལ༔ གཉིས་ཀ་དར་དང་རཏ་ནས་བརྒྱན༔ མེ་ཏོག་དམར་པོའི་དོ་ཤལ་འཕྱང་༔ པད་ཟླ་ཉི་མའི་དབུས་ན་བཞུགས༔ སྲོག་རྩ་ལྕགས་ཀྱི་སྦུ་གུའི་དབུས༔ གཡུང་དྲུང་དམར་གསལ་ནྲྀ་ཡིས་མཚན༔ ཁོག་པར་ཨ་དཀར་འོད་ལྔ་འཕྲོས༔ དེ་ལས་འོད་ཟེར་ཡར་འཕྲོས་པས༔ དབྱིངས་ནས་ཡེ་ཤེས་སྤྱན་དྲངས་ཐིམ༔ བསྭོ་ཨཱོཾ་ཁོད་སྤུངས་རཏྣ་ཚེ་ནྲྀ་ཛཿབྷྲཱུྃ༔ སྔགས་ཀྱི་ཟེར་དང་གཟི་བརྗིད་ཀྱིས༔ བླ་མ་ཡི་དམ་མཁའ་འགྲོ་དང་༔ རིག་འཛིན་དྲང་སྲོང་ཚེ་ཡི་བདག༔ འཇིག་རྟེན་འབྱུང་བའི་དྭངས་མ་ཀུན༔ བདུད་རྩིར་བསྡུས་ནས་ཚངས་བུག་བརྒྱུད༔ དབུ་མའི་ནང་ཞུགས་ལུས་ཀུན་གཡོ༔ ལུས་ནི་འཆི་མེད་གཞའ་ཚོན་སྐུ༔ ངག་ནི་གཞོམ་མེད་སྔགས་ཀྱི་གསུང་༔ ཡིད་ནི་འཕོ་མེད་ཨ་ཡི་ཐུགས༔ མ་བཅོས་མ་བསླད་སྐྱེ་འཆི་བྲལ༔ གཡུང་དྲུང་སྐུ་གསུང་ཐུགས་སུ་གྱུར༔ བཟླས་བརྗོད་བསྙེན་པ་ཐུན་བཞིར་འབུལ༔ མཆོད་ཅིང་བསྟོད་ལ་གསོལ་བ་གདབ༔ མདུན་གྱི་བླ་མ་རང་ལ་བསྟིམ༔ རང་སེམས་སྐྱེ་མེད་ངང་དུ་བཞག༔ དེ་ཚེ་བོན་རྣམས་ཐམས་ཅད་ཀུན༔ སེམས་སྣང་ཡིན་ཏེ་རྨི་ལམ་འདྲ༔ སེམས་ཉིད་ཅི་ཡང་མ་ཡིན་པར༔ ཅིར་ཡང་འཆར་ཏེ་གཞའ་ཚོན་འདྲ༔ ངོ་བོ་སྟོང་པ་བོན་གྱི་སྐུ༔ རང་བཞིན་གསལ་བ་རྫོགས་པའི་སྐུ༔ ཐུགས་རྗེའི་རྩལ་སྣང་སྤྲུལ་པའི་སྐུ༔ སྐུ་གསུམ་ཡེ་ནས་རང་ལ་གནས༔ མི་འགྱུར་འཕོ་མེད་བརྡལ་བ་ཆེ༔ འདི་ནི་རྒྱུ་རྐྱེན་ལས་འདས་ཕྱིར༔ ས་ཡིས་མི་རྣོན་ཆུས་མི་ཞིག༔ མེས་བསྲེག་རླུང་གིས་གཏོར་དུ་མེད༔ སྐྱེ་མེད་གནས་མེད་འགགས་པ་མེད༔ འཆི་འཕོ་ཐམས་ཅད་རྣམ་རྟོག་སྟེ༔ རྟོག་མེད་གཉུག་མའི་དོན་མཐོང་ནས༔ གོམས་པ་ཀློང་དུ་གྱུར་པ་ན༔ འཆི་མེད་དྲན་པ་ཚེ་འདིར་འགྲུབ༔ གཞན་ལ་ཚེ་དབང་སྦྱིན་པ་ནི༔ སྣོད་ལྡན་ངེས་པར་ཁྲུས་ནས་དབྱུང་༔ མཚམས་བཅད་སྐྱབས་འགྲོ་གསོལ་འདེབས་བྱ༔ ཚེ་འབྲང་ལྷར་གསལ་སྤྱི་བོར་བཞག༔ གདུང་བའི་དབྱངས་ཀྱིས་གསོལ་བ་གདབ༔ བསྭོ་ཨཱོཾ༔ རང་བྱུང་ཁྱུང་ལུང་དངུལ་མཁར་ནས༔ འཆི་མེད་དྲན་པ་ཚེ་དབང་སྩལ༔ སྔོན་གྱི་ཐུགས་དམ་རྗེས་དགོངས་ལ༔ རིག་འཛིན་ཚེ་ཡི་དངོས་གྲུབ་སྩོལ༔ སྔགས་དང་བཅས་པས་རྒྱུད་བསྐུལ་བས༔ ཚེ་བཅུད་ཕྱག་གི་བུམ་པར་བསྡུས༔ དེ་ལས་རྒྱུན་བབས་དབང་བསྐུར་བསམ༔ ཚེ་རྫས་དངོས་གྲུབ་ཞལ་ཟས་སྦྱྀན༔ བསྭོ་ཨཱོཾ༔ གཏའ་ཆེན་བདུད་རྩི་སྨན་གྱི་མཚོ༔ ར་ས་ཡ་ན་ཚེ་ཡི་རྫས༔ སྐལ་ལྡན་བུ་ལ་སྦྱིན་པ་ཡིས༔ རྩ་རླུང་བྱང་སེམས་འཕེལ་བར་ཤོག༔ བསྭོ་ཨཱོཾ༔ དངོས་གྲུབ་ཚོགས་ཀྱི་ལོངས་སྤྱོད་འདི༔ ཚེ་ཡི་བདུད་རྩིར་བྱིན་བརླབས་ནས༔ སྐལ་ལྡན་ཁྱོད་ལ་སྦྱིན་པ་ཡིས༔ འཆི་མེད་རིག་འཛིན་འགྲུབ་པར་ཤོག༔ དེ་ནས་ཚེ་བསྟིམ་རྒྱས་གདབ་ནི༔ ཨ༔ སྤྲོས་པས་སྣང་སྲིད་ཁྱབ་པའི་ཚེ༔ བསྡུས་པས་ཐིག་ལེ་ཉག་གཅིག་དབྱིངས༔ འཆི་མེད་གཡུང་དྲུང་ཕྱག་རྒྱས་གདབ༔ མི་འགྱུར་མི་ཤིགས་སྐྱེ་འཆི་བྲལ༔ ཨ་ཨ་ཨ༔ བཀྲ་ཤིས་བརྗོད་ཅིང་མེ་ཏོག་འཐོར༔ བསྭོ་ཨཱོཾ་ན་མོ༔ འཆི་མེད་དྲན་པ་ཡབ་སྲས་སོགས་རྩ་བ་དང་བརྒྱུད་པར་བཅས་པའི་དཔོན་སྲས་བླ་མ་རྣམས་ཀྱི་ཐུགས་རྗེའི་བྱིན་རླབས་ཀྱིས༔ རིགས་ཀྱི་བུ་འདི་རྣམས་ཚེ་ཉི་ཟླ་དང་མཉམ་པར་གྱུར་ཅིག༔ སྲོག་གཡུང་དྲུང་ལྟར་བརྟན་པར་གྱུར་ཅིག༔ ནད་མེད་ལང་ཚོའི་མཆོག་དང་ལྡན་པར་གྱུར་ཅིག༔ ལོངས་སྤྱོད་ཆུ་བོའི་རྒྱུན་ལྟར་རིང་བར་གྱུར་ཅིག༔ མཐར་ཐུག་རིག་རྩལ་འཆི་མེད་ཐིག་ལེ་ཆེན་པོའི་ཀློང་དུ་གྲོལ་བར་གྱུར་ཅིག༔ ཅེས་བརྗོད་དགའ་སྟོན་ཚོགས་འཁོར་བྱ༔ བདུད་རྩི་སྨན་གྱི་བཅུད་ལེན་ནི༔ དབང་པོའི་ལག་པར་མ་མཉེ་བ༔ ཆ་མཉམ་བཅུད་ལྡན་འོ་མར་བསྡུ༔ བུར་སྦྲང་སྦྱང་ལ་རིལ་བུ་ནི༔ ལུག་རིལ་ཙམ་དྲིལ་ཐོད་པར་བླུགས༔ ལྷར་གསལ་ཚེ་བཅུད་བསྡུ་ཞིང་བསྟིམ༔ སྔགས་ཀྱི་ཤམ་བུར་འདི་བཏགས་བསྙེན༔ ཨཱོཾ་བྲུྃ་ཨཱཿབྲུྃ་ཧཱུྃ་བྲུྃ་ཧྲཱིཿབྲུྃ་ཧྲཱྃ་བྲུྃ་ར་ས་ཡ་ན་ཚེ་བྲུྃ༔ འབུམ་ཕྲག་བཟླས་པས་བྱིན་གྱིས་བརླབ༔ ལྷ་ཉིད་འོད་ཞུ་རིལ་བུར་བསམ༔ རགས་པའི་བཟའ་བཏུང་སྤངས་བྱས་ཏེ༔ ཞག་བདུན་བསྟེན་པས་བདེ་དྲོད་འཕེལ༔ གཉིས་ཀྱིས་ངག་ནུས་ཕྱོགས་མེད་འབར༔ བདུན་གསུམ་བསྟེན་པས་ཡེ་ཤེས་འཆར༔ ཟླ་བ་གཅིག་ཏུ་བསྟེན་པ་ཡིས༔ ཚེ་རིང་ནད་མེད་རྒས་པ་བྲལ༔ དེ་ནས་ཡུན་ཏུ་བསྟེན་པ་ཡིས༔ སྨན་གྱི་ནུས་པ་འཆང་བའི་ལྷ༔ རིག་འཛིན་ཚེ་ཉིད་ངེས་པར་འགྲུབ༔ དེ་ཚེ་གེགས་སེལ་བོགས་འདོན་ཏུ༔ བླ་མ་བསྒོམ་ཞིང་གསོལ་བ་གདབ༔ ལུས་གནད་རླུང་སྦྱོར་རྒྱུན་མི་བཅད༔ སྐབས་སུ་འབེབས་དང་འཁྲུལ་འཁོར་བྱ༔ ཆགས་མེད་ཞེན་མེད་རི་ཁྲོད་འགྲིམ༔ བློ་བདེའི་མལ་དུ་དངོས་གྲུབ་རྙེད༔ ཅེས་གསུངས་སོ༔ ཡང་ཞུས་པ༔ འདི་ལྟ་བུའི་ཟབ་དོན་འདི་ད་ལྟ་སྤེལ་ལམ་གཏེར་དུ་སྦ༔ ཞེས་གསོལ་པས༔ བཻ་རོ་བདག་གི་ཐུགས་ཐིག་འདི༔ ད་ལྟ་སྤེལ་བའི་དུས་མིན་གྱི༔ རང་ཉམས་མཐར་དབྱུང་སྨོན་ལམ་བཅས༔ བོན་ཉིད་དབྱིངས་སུ་ཕྱག་རྒྱས་ཐོབ༔ ནམ་ཞིག་ཁྱོད་ཀྱི་སྐྱེ་བའི་མཐའ༔ གཡུང་དྲུང་འབྱུང་གནས་རྩལ་དང་འཕྲད༔ རང་གཞན་འགའ་ཡི་དོན་ཏུ་འགྱུར༔ ཤིན་ཏུ་གསང་བས་དངོས་གྲུབ་ཐོབ༔ ཅེས་གསུངས་སོ༔ ཨུ་ཡ་ཨཀྠཾ་རྒྱ༔ བརྡ་རྒྱ་བརྡ་ཐིམ༔ གཏད་རྒྱ་ཨུ་ཡ༔ མི་ཤིགས་གཡུང་དྲུང་འབྱུང་གནས་རྩལ་གྱི་གསང་གཏེར་ཟབ་མོ་ཤིན་ཏུ་གསང་ངོ་༔

[edit]

@#/_d+hI__tshe sgrub bai ro'i thugs tig gsang ba'i rgya can bzhugs so:__@#:__bla ma yi dam mkha' 'gro gsum la phyag 'tshal lo:__slob dpon rin po che pad+ma 'byung gnas dpal bsam yas mchims phu bre gu'i ke'i tshang na bzhugs pa'i skabs:__lo tsA ba bai ro tsa na 'khor yug 'od gsal gyi ngang du mnyam par bzhag pa'i spyan sngar lang gro dkon mchog 'byung gnas kyis mchis te gser gyi maN+Dal phul nas tshe sgrub kyi gdams pa zab la 'dril ba zhig zhus pas 'di gnang ngo :__e ma skal ldan rigs kyi bu:__g.yung drung tshe nyid bsgrub 'dod na:__ma rdal mda' gang gru bzhi pa:__sman dang spos kyi chag chag gdab:__tshe yi pho brang zla gam dbus:__gta' chen bdud rtsi tshe 'brang dang :__dngos grub tshogs rdzas mchod pa bsham:__yul sa gzhi bdag dbang du bsdu:__gtor ma byin la bka' bsgo bcol:__bgegs bskrad mtshams bcad ting 'dzin gsal:__de nas rig 'dzin tshe yi lhar:__gus pas phyag 'tshal skyabs 'gro bya:__bswo A+oM:__dkon mchog gsum gyi ngo bo nyid:__g.yung drung tshe yi lha tshogs la:__phyag 'tshal skyabs mchi gsol ba 'debs:__'gro ba'i don phyir 'chi med bsgrub:__a a a:__a ni bon nyid skye ba med:__a las A+oM 'phros hU~M la thim:__sangs rgyas sems dpa' rig 'dzin dang :__snod bcud dwangs ma thams cad bsdus:__bdag mdun skad cig dran rdzogs su:__'chi med dran pa tshe dbang rtsal:__phyag g.yas g.yung drung thugs kar gtod:__g.yon pas mnyam bzhag tshe bum 'dzin:__'od ldan ye shes tsan d+ha lI:__pad+ma tshe bum bsnams pas 'khril:__gnyis ka dar dang rata nas brgyan:__me tog dmar po'i do shal 'phyang :__pad zla nyi ma'i dbus na bzhugs:__srog rtsa lcags kyi sbu gu'i dbus:__g.yung drung dmar gsal nr-i yis mtshan:__khog par a dkar 'od lnga 'phros:__de las 'od zer yar 'phros pas:__dbyings nas ye shes spyan drangs thim:__bswo A+oM khod spungs rat+na tshe nr-i dzaHb+h+rU~M:__sngags kyi zer dang gzi brjid kyis:__bla ma yi dam mkha' 'gro dang :__rig 'dzin drang srong tshe yi bdag:__'jig rten 'byung ba'i dwangs ma kun:__bdud rtsir bsdus nas tshangs bug brgyud:__dbu ma'i nang zhugs lus kun g.yo:__lus ni 'chi med gzha' tshon sku:__ngag ni gzhom med sngags kyi gsung :__yid ni 'pho med a yi thugs:__ma bcos ma bslad skye 'chi bral:__g.yung drung sku gsung thugs su gyur:__bzlas brjod bsnyen pa thun bzhir 'bul:__mchod cing bstod la gsol ba gdab:__mdun gyi bla ma rang la bstim:__rang sems skye med ngang du bzhag:__de tshe bon rnams thams cad kun:__sems snang yin te rmi lam 'dra:__sems nyid ci yang ma yin par:__cir yang 'char te gzha' tshon 'dra:__ngo bo stong pa bon gyi sku:__rang bzhin gsal ba rdzogs pa'i sku:__thugs rje'i rtsal snang sprul pa'i sku:__sku gsum ye nas rang la gnas:__mi 'gyur 'pho med brdal ba che:__'di ni rgyu rkyen las 'das phyir:__sa yis mi rnon chus mi zhig:__mes bsreg rlung gis gtor du med:__skye med gnas med 'gags pa med:__'chi 'pho thams cad rnam rtog ste:__rtog med gnyug ma'i don mthong nas:__goms pa klong du gyur pa na:__'chi med dran pa tshe 'dir 'grub:__gzhan la tshe dbang sbyin pa ni:__snod ldan nges par khrus nas dbyung :__mtshams bcad skyabs 'gro gsol 'debs bya:__tshe 'brang lhar gsal spyi bor bzhag:__gdung ba'i dbyangs kyis gsol ba gdab:__bswo A+oM:__rang byung khyung lung dngul mkhar nas:__'chi med dran pa tshe dbang stsal:__sngon gyi thugs dam rjes dgongs la:__rig 'dzin tshe yi dngos grub stsol:__sngags dang bcas pas rgyud bskul bas:__tshe bcud phyag gi bum par bsdus:__de las rgyun babs dbang bskur bsam:__tshe rdzas dngos grub zhal zas sby-in:__bswo A+oM:__gta' chen bdud rtsi sman gyi mtsho:__ra sa ya na tshe yi rdzas:__skal ldan bu la sbyin pa yis:__rtsa rlung byang sems 'phel bar shog:__bswo A+oM:__dngos grub tshogs kyi longs spyod 'di:__tshe yi bdud rtsir byin brlabs nas:__skal ldan khyod la sbyin pa yis:__'chi med rig 'dzin 'grub par shog:__de nas tshe bstim rgyas gdab ni:__a:__spros pas snang srid khyab pa'i tshe:__bsdus pas thig le nyag gcig dbyings:__'chi med g.yung drung phyag rgyas gdab:__mi 'gyur mi shigs skye 'chi bral:__a a a:__bkra shis brjod cing me tog 'thor:__bswo A+oM na mo:__'chi med dran pa yab sras sogs rtsa ba dang brgyud par bcas pa'i dpon sras bla ma rnams kyi thugs rje'i byin rlabs kyis:__rigs kyi bu 'di rnams tshe nyi zla dang mnyam par gyur cig:__srog g.yung drung ltar brtan par gyur cig:__nad med lang tsho'i mchog dang ldan par gyur cig:__longs spyod chu bo'i rgyun ltar ring bar gyur cig:__mthar thug rig rtsal 'chi med thig le chen po'i klong du grol bar gyur cig:__ces brjod dga' ston tshogs 'khor bya:__bdud rtsi sman gyi bcud len ni:__dbang po'i lag par ma mnye ba:__cha mnyam bcud ldan 'o mar bsdu:__bur sbrang sbyang la ril bu ni:__lug ril tsam dril thod par blugs:__lhar gsal tshe bcud bsdu zhing bstim:__sngags kyi sham bur 'di btags bsnyen:__A+oM bru~M AHbru~M hU~M bru~M hrIHbru~M hrA~M bru~M ra sa ya na tshe bru~M:__'bum phrag bzlas pas byin gyis brlab:__lha nyid 'od zhu ril bur bsam:__rags pa'i bza' btung spangs byas te:__zhag bdun bsten pas bde drod 'phel:__gnyis kyis ngag nus phyogs med 'bar:__bdun gsum bsten pas ye shes 'char:__zla ba gcig tu bsten pa yis:__tshe ring nad med rgas pa bral:__de nas yun tu bsten pa yis:__sman gyi nus pa 'chang ba'i lha:__rig 'dzin tshe nyid nges par 'grub:__de tshe gegs sel bogs 'don tu:__bla ma bsgom zhing gsol ba gdab:__lus gnad rlung sbyor rgyun mi bcad:__skabs su 'bebs dang 'khrul 'khor bya:__chags med zhen med ri khrod 'grim:__blo bde'i mal du dngos grub rnyed:__ces gsungs so:__yang zhus pa:__'di lta bu'i zab don 'di da lta spel lam gter du sba:__zhes gsol pas:__bai ro bdag gi thugs thig 'di:__da lta spel ba'i dus min gyi:__rang nyams mthar dbyung smon lam bcas:__bon nyid dbyings su phyag rgyas thob:__nam zhig khyod kyi skye ba'i mtha':__g.yung drung 'byung gnas rtsal dang 'phrad:__rang gzhan 'ga' yi don tu 'gyur:__shin tu gsang bas dngos grub thob:__ces gsungs so:__u ya ak+thaM rgya:__brda rgya brda thim:__gtad rgya u ya:__mi shigs g.yung drung 'byung gnas rtsal gyi gsang gter zab mo shin tu gsang ngo :