JKCL-KABUM-03-GA-043

🚧 This website is under continued development. We appreciate your patience!

Previous Text Back to Volume PageNext Text

Wylie title	rdo rje 'chang kun dga' bzang po la bstod smon tshul khrims dag byed
Location	chos kyi blo gros bka' 'bum Volume 3, Text 43, Pages 161-164 (Folios 1a1 to 2b1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	ངོར་ཆེན་ཀུན་དགའ་བཟང་པོ་ (Ngor mkhan chen, 1st)
Citation	'jam dbyangs mkhyen brtse chos kyi blo gros. rdo rje 'chang kun dga' bzang po la bstod smon tshul khrims dag byed. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 3: 161-164. Bir, H.P.: Khyentse Labrang, 2012.
Genre	Supplications - gsol 'debs
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/praise-of-ngorchen-kunga-zangpo
Colophon	།ཅེས་པའང་ས་ཟླའི་ཚེས་༢༥རྗེའི་དུས་དྲན་མཆོད་པར་ཉེ་བའི་སྔ་ཆར་ཆོས་ཀྱི་བློ་གྲོས་པས་རྡོ་རྗེ་གླིང་དུ་གསོལ་བ་བཏབ་པའོ།།
	/ces pa'ang sa zla'i tshes 25rje'i dus dran mchod par nye ba'i snga char chos kyi blo gros pas rdo rje gling du gsol ba btab pa'o//

1 Texts in this Section (sde tshan or chos tshan)

161-164	རྡོ་རྗེ་འཆང་ཀུན་དགའ་བཟང་པོ་ལ་བསྟོད་སྨོན་ཚུལ་ཁྲིམས་དག་བྱེད། rdo rje 'chang kun dga' bzang po la bstod smon tshul khrims dag byed Supplications - gsol 'debs	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

རྡོ་རྗེ་འཆང་ཀུན་དགའ་བཟང་པོ་ལ་བསྟོད་སྨོན་ཚུལ་ཁྲིམས་དག་བྱེད་ཅེས་བྱ་བ་བཞུགས་སོ། །ཨོཾ་སྭསྟི། སྟོན་པ་མཉམ་མེད་ཤཱཀྱའི་རྒྱལ་པོ་ཡི། །བདེན་གསུང་ལུང་གིས་བསྔགས་པའི་མེ་ཏོག་འཐོར། །སྙིགས་དུས་ཐུབ་དབང་གཉིས་པ་ཀུན་དགའ་བཟང་། །གང་གི་རྣམ་ཐར་དྲན་བཞིན་གུས་པས་བསྟོད། །བྱང་ཕྱོགས་གངས་རིའི་ལྗོངས་འདིར་མདོ་དང་སྔགས། །མ་ནོར་ཇི་བཞིན་འཆད་ལ་འགྲན་ཟླ་བྲལ། །སྡོམ་གསུམ་རྣམ་དག་སློབ་ཚོགས་གསེར་རིའི་ཕྲེང་། །ནོར་འཛིན་ཁྱོན་ཀུན་ཡོངས་སུ་ཁྱབ་ལ་འདུད། །བསྐྱེད་དང་རྫོགས་པའི་རྣལ་འབྱོར་ཟབ་མོ་ཡིས། །རང་དོན་ཆོས་སྐུའི་རྒྱལ་ས་མངོན་དུ་བརྙེས། །གཞན་དོན་ཕྲིན་ལས་ནམ་མཁའི་མཐར་ཁྱབ་པ། །རྗེ་བཙུན་ཨེ་ཝྃ་པ་ལ་གུས་པས་བསྟོད། །མཁྱེན་པའི་ཡེ་ཤེས་འཇམ་དཔལ་དཔའ་བོ་དང་། །བརྩེ་བ་ལག་ན་པད་དཀར་འཆང་བ་དངོས། །ནུས་པ་རྒྱུད་ཀུན་སྡུད་མཛད་རྡོ་རྗེ་འཛིན། །དབྱེར་མེད་དཔལ་ལྡན་བླ་མར་གུས་པས་བསྟོད། །ཚུལ་ཁྲིམས་གཙང་ཞིང་ལྟ་སྤྱོད་རྣམ་པར་དག །གཟུངས་དང་ཏིང་འཛིན་ཡོན་ཏན་རྒྱ་མཚོ་བརྙེས། །དབང་བཞིའི་ཆུ་བོ་གདུལ་བྱའི་ཞིང་སར་འབེབས། །སྨིན་ཅིང་གྲོལ་བར་མཛད་ལ་བསྟོད་པར་བགྱི། །དེ་ལྟར་རྨད་བྱུང་གུས་འདུད་དྲག་པོ་ཡིས། །བསྟོད་ཅིང་གསོལ་བ་འདེབས་པའི་བྱིན་རླབས་ཀྱིས། །ནམ་མཁའི་མཐའ་གཏུགས་མཐའ་ཡས་འགྲོ་བ་རྣམས། །སྡུག་བསྔལ་ལས་གྲོལ་བྱང་ཆུབ་ཐོབ་པར་ཤོག །ཁྱད་པར་བདག་སོགས་ཁྱོད་ཀྱི་རྗེས་འཇུག་རྣམས། །སྒོ་གསུམ་བག་མེད་ཉེས་སྤྱོད་ལས་སྡོམ་ཞིང་། །ངེས་འབྱུང་ཚུལ་ཁྲིམས་ཁང་བཟང་ཉམས་དགའ་བར། །ཞུགས་ནས་བྱང་ཆུབ་སེམས་མཆོག་སྐྱེ་བར་ཤོག །རྡོ་རྗེ་ཐེག་པའི་ཚུལ་ལ་རབ་གནས་ཏེ། །སྡོམ་དང་དམ་ཚིག་རྣམ་པར་དག་པ་དང་། །རིམ་གཉིས་ལམ་གྱི་བགྲོད་པ་མཐར་ཕྱིན་ཏེ། །རྡོ་རྗེ་འཛིན་རྒྱལ་མངོན་དུ་འགྱུར་བར་ཤོག །དེང་ནས་བཟུང་སྟེ་ཚེ་རབས་ཐམས་ཅད་དུ། །རྒྱལ་བ་གཉིས་པ་རིགས་ཀྱི་བདག་པོར་ཐོབ། །གསུང་གསང་བདུད་རྩིའི་བཅུད་ཀྱིས་འཚོ་བ་དང་། །སྤངས་རྟོགས་མཐར་ཕྱིན་དོན་གཉིས་ལྷུན་གྲུབ་ཤོག །ཅེས་པའང་མི་ཕྱེད་དད་ཅིང་གུས་པའི་བློ་ལྡན་ཆོས་ཀྱི་བློ་གྲོས་པས་ཁྲུམས་སྟོད་ཟླ་བའི་ཚེས་༨ལ་བྲིས་པ་འདིས་ཀྱང་རྗེ་བཙུན་བླ་མའི་བྱིན་རླབས་སྙིང་ལ་འཇུག་པའི་རྒྱུར་གྱུར་ཅིག། །། ༈ ན་མོ་གུ་རུ་ཨཱ་ནནྡ་བྷ་དྲཱ་ཡ། ཀུན་མཁྱེན་ཀུན་ཏུ་དགེ་བའི་ཕྲིན་ལས་ཅན། །ཀུན་གཟིགས་རྫོགས་སངས་རྒྱས་ཀྱི་ལུང་བསྟན་བརྙེས། །ཀུན་དགའ་སྙིང་པོའི་རིང་ལུགས་ཉིན་མོར་བྱེད། །ཀུན་བཟང་རྡོ་རྗེ་འཆང་ལ་གསོལ་བ་འདེབས། །མདོ་རྒྱུད་རྒྱ་མཚོའི་གཏེར་མཛོད་ཆགས་ཐོགས་བྲལ། །རབ་འབྱམས་ཤེས་བྱ་ཀུན་གཟིགས་སྨྲ་བའི་སེང་། །སྙིང་རྗེའི་དབང་ཕྱུག་ཕྱག་ན་པད་དཀར་འཆང་། །གསང་འཛིན་ལག་ན་རྡོ་རྗེར་གསོལ་བ་འདེབས། །འཁྲུལ་པའི་དྲི་བྲལ་བློ་གྲོས་མི་བཟད་པས། །ཐེག་ཆེན་ཆོས་ཀྱི་སྒྲ་དབྱངས་རྟག་ཏུ་སྒྲོགས། །རྒྱུད་སྡེ་རྣམ་བཞིའི་ཆུ་ཀླུང་ཆེན་པོ་འདྲེན། །སྐལ་ལྡན་སྨིན་གྲོལ་མཛད་ལ་གསོལ་བ་འདེབས། །ཁྱད་པར་བིཪྺའི་ཐུགས་བཅུད་གསུང་ངག་གི། རྟེན་གྱི་དཀྱིལ་འཁོར་དབང་བཞིས་སྨིན་མཛད་ནས། །སྐུ་བཞིའི་གོ་འཕང་མཆོག་ལ་འགོད་མཛད་པ། །བླ་མ་དགྱེས་མཛད་རྡོ་རྗེར་གསོལ་བ་འདེབས། །ངེས་འབྱུང་འཕགས་པའི་ཚུལ་ཁྲིམས་ཁང་བཟང་དུ། །ལྟ་སྤྱོད་རྣམ་པར་དག་པའི་སྐྱེས་བུ་ནི། །བྱང་ཕྱོགས་ཐུབ་པའི་རྒྱལ་ཚབ་ངོར་ཆེན་རྗེར། །མི་ཕྱེད་གུས་པ་ཆེན་པོས་གསོལ་བ་འདེབས། །དཔལ་ལྡན་བླ་མའི་ཐུགས་རྗེའི་བྱིན་རླབས་ཀྱི། །ཟླ་ཤེལ་བདུད་རྩི་གསར་པས་རེག་པའི་མོད། །སྐལ་བཟང་ཚེ་དང་བློ་ཡི་ཀུནྡ་བཞད། །མི་མཐུན་རྒུད་པ་ཀུན་ལས་བསྐྱབ་ཏུ་གསོལ། །འདི་ནས་བཟུང་སྟེ་ཚེ་རབས་ཐམས་ཅད་དུ། །དལ་འབྱོར་རྟེན་རྙེད་སྡོམ་གསུམ་རྣམ་པར་དག །རང་གཞན་དོན་གཉིས་རྒྱ་མཚོ་ལྷུན་གྱིས་གྲུབ། །བསྟན་པ་ཕྱོགས་བཅུར་སྤེལ་བའི་བཀྲ་ཤིས་ཤོག །ཅེས་པའང་ས་ཟླའི་ཚེས་༢༥རྗེའི་དུས་དྲན་མཆོད་པར་ཉེ་བའི་སྔ་ཆར་ཆོས་ཀྱི་བློ་གྲོས་པས་རྡོ་རྗེ་གླིང་དུ་གསོལ་བ་བཏབ་པའོ།། །།

[edit]

rdo rje 'chang kun dga' bzang po la bstod smon tshul khrims dag byed ces bya ba bzhugs so/____/oM swasti/__ston pa mnyam med shAkya'i rgyal po yi/____/bden gsung lung gis bsngags pa'i me tog 'thor/____/snyigs dus thub dbang gnyis pa kun dga' bzang /____/gang gi rnam thar dran bzhin gus pas bstod/____/byang phyogs gangs ri'i ljongs 'dir mdo dang sngags/____/ma nor ji bzhin 'chad la 'gran zla bral/____/sdom gsum rnam dag slob tshogs gser ri'i phreng /____/nor 'dzin khyon kun yongs su khyab la 'dud/____/bskyed dang rdzogs pa'i rnal 'byor zab mo yis/____/rang don chos sku'i rgyal sa mngon du brnyes/____/gzhan don phrin las nam mkha'i mthar khyab pa/____/rje btsun e wa~M pa la gus pas bstod/____/mkhyen pa'i ye shes 'jam dpal dpa' bo dang /____/brtse ba lag na pad dkar 'chang ba dngos/____/nus pa rgyud kun sdud mdzad rdo rje 'dzin/____/dbyer med dpal ldan bla mar gus pas bstod/____/tshul khrims gtsang zhing lta spyod rnam par dag__/gzungs dang ting 'dzin yon tan rgya mtsho brnyes/____/dbang bzhi'i chu bo gdul bya'i zhing sar 'bebs/____/smin cing grol bar mdzad la bstod par bgyi/____/de ltar rmad byung gus 'dud drag po yis/____/bstod cing gsol ba 'debs pa'i byin rlabs kyis/____/nam mkha'i mtha' gtugs mtha' yas 'gro ba rnams/____/sdug bsngal las grol byang chub thob par shog__/khyad par bdag sogs khyod kyi rjes 'jug rnams/____/sgo gsum bag med nyes spyod las sdom zhing /____/nges 'byung tshul khrims khang bzang nyams dga' bar/____/zhugs nas byang chub sems mchog skye bar shog__/rdo rje theg pa'i tshul la rab gnas te/____/sdom dang dam tshig rnam par dag pa dang /____/rim gnyis lam gyi bgrod pa mthar phyin te/____/rdo rje 'dzin rgyal mngon du 'gyur bar shog__/deng nas bzung ste tshe rabs thams cad du/____/rgyal ba gnyis pa rigs kyi bdag por thob/____/gsung gsang bdud rtsi'i bcud kyis 'tsho ba dang /____/spangs rtogs mthar phyin don gnyis lhun grub shog__/ces pa'ang mi phyed dad cing gus pa'i blo ldan chos kyi blo gros pas khrums stod zla ba'i tshes 8la bris pa 'dis kyang rje btsun bla ma'i byin rlabs snying la 'jug pa'i rgyur gyur cig/__//__!___na mo gu ru A nan+da b+ha drA ya/__kun mkhyen kun tu dge ba'i phrin las can/____/kun gzigs rdzogs sangs rgyas kyi lung bstan brnyes/____/kun dga' snying po'i ring lugs nyin mor byed/____/kun bzang rdo rje 'chang la gsol ba 'debs/____/mdo rgyud rgya mtsho'i gter mdzod chags thogs bral/____/rab 'byams shes bya kun gzigs smra ba'i seng /____/snying rje'i dbang phyug phyag na pad dkar 'chang /____/gsang 'dzin lag na rdo rjer gsol ba 'debs/____/'khrul pa'i dri bral blo gros mi bzad pas/____/theg chen chos kyi sgra dbyangs rtag tu sgrogs/____/rgyud sde rnam bzhi'i chu klung chen po 'dren/____/skal ldan smin grol mdzad la gsol ba 'debs/____/khyad par biR+Wa'i thugs bcud gsung ngag gi/__rten gyi dkyil 'khor dbang bzhis smin mdzad nas/____/sku bzhi'i go 'phang mchog la 'god mdzad pa/____/bla ma dgyes mdzad rdo rjer gsol ba 'debs/____/nges 'byung 'phags pa'i tshul khrims khang bzang du/____/lta spyod rnam par dag pa'i skyes bu ni/____/byang phyogs thub pa'i rgyal tshab ngor chen rjer/____/mi phyed gus pa chen pos gsol ba 'debs/____/dpal ldan bla ma'i thugs rje'i byin rlabs kyi/____/zla shel bdud rtsi gsar pas reg pa'i mod/____/skal bzang tshe dang blo yi kun+da bzhad/____/mi mthun rgud pa kun las bskyab tu gsol/____/'di nas bzung ste tshe rabs thams cad du/____/dal 'byor rten rnyed sdom gsum rnam par dag__/rang gzhan don gnyis rgya mtsho lhun gyis grub/____/bstan pa phyogs bcur spel ba'i bkra shis shog__/ces pa'ang sa zla'i tshes 25rje'i dus dran mchod par nye ba'i snga char chos kyi blo gros pas rdo rje gling du gsol ba btab pa'o//____//_