JKCL-KABUM-10-THA-064

🚧 This website is under continued development. We appreciate your patience!

Previous Text Back to Volume PageNext Text

Wylie title	bro brdung dgon pa'i bca' yig
Location	chos kyi blo gros bka' 'bum Volume 10, Text 64, Pages 537-539 (Folios 1a1 to 2a3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. bro brdung dgon pa'i bca' yig. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: 537-539. Bir, H.P.: Khyentse Labrang, 2012.
Genre	Monastics Regulations - bca' yig
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/drodung-monastery-guidelines
Colophon	མེ་བྱི་ཆོ་འཕྲུལ་ཟླ་བའི་ཚེས་ལ་ཀཿཐོག་ཁྲི་འཛིན་ཞིང་སྐྱོངས་དང་། འཇམ་དབྱངས་མཁྱེན་སྤྲུལ་ཐུན་མོངས་ནས་སྤེལ།།
	me byi cho 'phrul zla ba'i tshes la kaHthog khri 'dzin zhing skyongs dang /__'jam dbyangs mkhyen sprul thun mongs nas spel//

Tibetan Text

Wylie

[edit]

བྲོ་བརྡུང་དགོན་པའི་བཅའ་ཡིག །ན་མོ་གུ་རུ། གང་ཞིག་གང་ལ་བརྟེན་ནས་སྲིད་པ་ཡི། །འཇིགས་འཕྲོག་ཟླ་མེད་དཀོན་མཆོག་རིན་ཆེན་གསུམ། །མཚན་གྱིས་ཟེག་མ་རྣ་བར་ལྷུང་བས་ཀྱང་། །འཁོར་བའི་གནས་ལས་ལྡོག་པར་མཛད་དེ་འདུད། །ཅེས་པའི་ཚིག་གིས་དྲངས་ནས། སྔ་འགྱུར་བཀའ་གཏེར་གྱི་བསྟན་པའི་བདག་པོ་ཤར་ཀཿཐོག་པ་ཆེན་པོའི་ཆོས་བརྒྱུད་རྔུ་པ་གྲུབ་ཐོབ་ཆོས་ཀྱི་རྡོ་རྗེས་ཐང་ཤིང་ཐམས་ཅད་དཔའ་བོ་མཁའ་འགྲོའི་རང་བཞིན་གྱིས་འཁྲབ་པར་གཟིགས་པའི་ས་དེར་དགོན་ས་བཏབ་པར་མཛད་པའི་བྲོ་བརྡུང་གསང་སྔགས་ཆོས་གླིང་གི་གྲྭ་སར་ཞུགས་པ་རྣམས་ཀྱིས་ལས་སུ་བྱ་བ་ནི། བདག་པོ་མཆོད་ཡོན་གྱིས་བཀས་བཅད་གྲྭ་རྩ་བན་ཁོངས་ཉམས་མེད་ཚགས་སུ་ཚུད་པ་དང་། གྲྭ་རྩ་མ་གཏོགས་ཀྱང་གྲྭ་ཞུགས་མཁན་ལ་སུས་ཀྱང་བཀག་འགོགས་མེད་ཅིང་། གྲྭ་གསར་དེ་རྣམས་དགེ་རྒན་རྣམས་ཀྱིས་བྱམས་སྐྱོང་མཁས་པས་ཡིག་དཀར་ནག་བྱང་བར་སྦྱངས་རྒྱུ་དང་ཆོས་སྤྱོད་རྒྱུན་མཁོ་རིགས་བློ་ལ་བླངས་རྒྱུ་དང་། ལོ་བཅུ་ཡན་ཆད་དགེ་ཚུལ་བསྒྲུབ་དགོས་ཤིང་། ལོ་བཅུ་དགུ་སྐོར་ནས་དགེ་སློང་ཞུ་རྒྱུ་ཀཿཐོག་འོང་དགོས་པ་དང་། ཆོ་ག་ཆོས་སྤྱོད་རྣམས་རྒྱལ་བ་ཀཿཐོག་པ་དང་ཨོ་རྒྱན་སྨིན་གྲོལ་གླིང་པའི་ཕྱག་བཞེས་ལྟར་མཛད་དགོས་ཤིང་། དབྱར་རྒུན་བཅའ་བ་ཟླ་བ་གཉིས་རེ་རྒྱུན་སྡོད་དང་། བཅའ་བ་གཉིས་གང་རུང་གཅིག་རྐང་ཆགས་གྱུར་ན་གོར་ཉི་ཤུ་རེའི་ཆད་པ་གཅོད་ངེས་བྱེད་རྒྱུ་དང་། འདུལ་བསྟོད་ལས། ཇི་ལྟར་འདི་ན་ཤིང་རྩ་གཙོ་བོ་སྟེ། །རྣམ་པར་འཕེལ་དང་ཀུན་འཛིན་གཉིས་ཀྱི་གཞི། །དེ་བཞིན་དམ་ཆོས་ཚོགས་རྣམས་ཀུན་གྱི་ཡང་། །གཞི་དང་རྩ་བ་འདུལ་བ་ཡིན་པར་བཤད། །ཅེས་པ་ལྟར། བསྟན་པའི་གཞི་མ་འདུལ་བ་ཡིན་པས་དགེ་ཚུལ་སློང་ཐམས་ཅད་ཀྱིས། སྲོག་བཅད། མ་བྱིན་ལེན། མི་ཚངས་སྤྱོད། མི་ཆོས་བླ་མའི་བརྫུན་སྨྲ་བ། ཆང་རག་བཏུང་བ་ལྔ་པོ་འདི་ལེགས་པར་སྲུང་སྡོམ་དང་། རྒྱུན་པར་མོ་བཅའ་ཆང་ཁྲིམས་དམ་པར་བྱ་དགོས། དེ་ལས་འགལ་ན་འབའ་ཡིག་ལྟར་ཉེས་ཆད་སྒྲུབ། དབྱར་གནས་གསོ་སྦྱོང་མེད་ཀ་མེད་རེད་པས་ཚུགས་ཐབས་དང་། ལག་རྒྱུད་བཟང་པོ་ལ་བྲིས་དང་། བློ་གསལ་རྣམས་ལ་ཕྱི་ནང་རིག་གནས། དབུ་མཆོད་སོགས་ཀྱིས་ཐིག་རྡུལ་ཚོན་གཏོར་བཟོ་དཀར་རྒྱན། ཆོ་ག་ཕྱག་ལེན། འབུད་བརྡུང་དཀྲོལ་གསུམ། དབྱངས་རོལ་སོགས་མཁས་པར་སྦྱངས། སྐྲ་རིང་པོར་འཇོག་པ་དང་། ཧབ་གྲི་འདོག་པ་སོགས་མི་བྱ། ཁོང་ཁྲོ་འཐབ་འཛིང་ལ་ཉེས་ཆད་འཕྲལ་བཏང་དགོས། ཤིན་ཏུ་རྒྱུ་མེད་ཡིན་ན་མ་ཏོག་གྲྭ་ཁང་འཛོམ་དགོས། དགོན་དུ་སྡོད་ཅི་ཚུགས་ལས་གྲོང་ནག་ཏུ་རྒྱུན་རིང་འཁྱམས་པ་མི་དགེའི་རྩ་བ་ཡིན་པས། བྱ་མིག་གྱེན་ལྟོས་ཀྱི་དལ་འབྱོར་དོན་ཡོད་བྱ། མདོར་ན་ལས་འབྲས་སྤངས་བླངས། ཐུགས་མཐུན་བློ་མཉམ། ཕྱི་ནང་ཐུབ་པ་བསྲུངས་སྡོམ་གཙང་བ་གལ་ཆེ་ཞིང་། ཞིབ་བཅའ་སྤྲུལ་སྐུ་བློ་གསལ་ལགས་ཀྱིས་ཞལ་བསྒོས་དྭངས་ལེན་ཞུ་རྒྱུ་དང་། སྐྱིད་སྡུག་ལ་ངོས་ཅག་གིས་ཀྱང་རྒྱབ་གཉེར་ཡོད་པས་བླངས་དོར་གྱི་གནས་མ་འཛོལ་བ་གལ་ཆེ་བས་ངེས་པར་གྱིས། མེ་བྱི་ཆོ་འཕྲུལ་ཟླ་བའི་ཚེས་ལ་ཀཿཐོག་ཁྲི་འཛིན་ཞིང་སྐྱོངས་དང་། འཇམ་དབྱངས་མཁྱེན་སྤྲུལ་ཐུན་མོངས་ནས་སྤེལ།། །།

[edit]

bro brdung dgon pa'i bca' yig__/na mo gu ru/__gang zhig gang la brten nas srid pa yi/__/'jigs 'phrog zla med dkon mchog rin chen gsum/__/mtshan gyis zeg ma rna bar lhung bas kyang /__/'khor ba'i gnas las ldog par mdzad de 'dud/__/ces pa'i tshig gis drangs nas/__snga 'gyur bka' gter gyi bstan pa'i bdag po shar kaHthog pa chen po'i chos brgyud rngu pa grub thob chos kyi rdo rjes thang shing thams cad dpa' bo mkha' 'gro'i rang bzhin gyis 'khrab par gzigs pa'i sa der dgon sa btab par mdzad pa'i bro brdung gsang sngags chos gling gi grwa sar zhugs pa rnams kyis las su bya ba ni/__bdag po mchod yon gyis bkas bcad grwa rtsa ban khongs nyams med tshags su tshud pa dang /__grwa rtsa ma gtogs kyang grwa zhugs mkhan la sus kyang bkag 'gogs med cing /__grwa gsar de rnams dge rgan rnams kyis byams skyong mkhas pas yig dkar nag byang bar sbyangs rgyu dang chos spyod rgyun mkho rigs blo la blangs rgyu dang /__lo bcu yan chad dge tshul bsgrub dgos shing /__lo bcu dgu skor nas dge slong zhu rgyu kaHthog 'ong dgos pa dang /__cho ga chos spyod rnams rgyal ba kaHthog pa dang o rgyan smin grol gling pa'i phyag bzhes ltar mdzad dgos shing /__dbyar rgun bca' ba zla ba gnyis re rgyun sdod dang /__bca' ba gnyis gang rung gcig rkang chags gyur na gor nyi shu re'i chad pa gcod nges byed rgyu dang /__'dul bstod las/__ji ltar 'di na shing rtsa gtso bo ste/__/rnam par 'phel dang kun 'dzin gnyis kyi gzhi/__/de bzhin dam chos tshogs rnams kun gyi yang /__/gzhi dang rtsa ba 'dul ba yin par bshad/__/ces pa ltar/__bstan pa'i gzhi ma 'dul ba yin pas dge tshul slong thams cad kyis/__srog bcad/__ma byin len/__mi tshangs spyod/__mi chos bla ma'i brdzun smra ba/__chang rag btung ba lnga po 'di legs par srung sdom dang /__rgyun par mo bca' chang khrims dam par bya dgos/__de las 'gal na 'ba' yig ltar nyes chad sgrub/__dbyar gnas gso sbyong med ka med red pas tshugs thabs dang /__lag rgyud bzang po la bris dang /__blo gsal rnams la phyi nang rig gnas/__dbu mchod sogs kyis thig rdul tshon gtor bzo dkar rgyan/__cho ga phyag len/__'bud brdung dkrol gsum/__dbyangs rol sogs mkhas par sbyangs/__skra ring por 'jog pa dang /__hab gri 'dog pa sogs mi bya/__khong khro 'thab 'dzing la nyes chad 'phral btang dgos/__shin tu rgyu med yin na ma tog grwa khang 'dzom dgos/__dgon du sdod ci tshugs las grong nag tu rgyun ring 'khyams pa mi dge'i rtsa ba yin pas/__bya mig gyen ltos kyi dal 'byor don yod bya/__mdor na las 'bras spangs blangs/__thugs mthun blo mnyam/__phyi nang thub pa bsrungs sdom gtsang ba gal che zhing /__zhib bca' sprul sku blo gsal lags kyis zhal bsgos dwangs len zhu rgyu dang /__skyid sdug la ngos cag gis kyang rgyab gnyer yod pas blangs dor gyi gnas ma 'dzol ba gal che bas nges par gyis/__me byi cho 'phrul zla ba'i tshes la kaHthog khri 'dzin zhing skyongs dang /__'jam dbyangs mkhyen sprul thun mongs nas spel//___//