JKCL-KABUM-09-TA-003

🚧 This website is under continued development. We appreciate your patience!

Previous Text Back to Volume PageNext Text

Wylie title	snang ba sems su sgrub pa'i skabs las dri ba'i lan byis pa'i mtshar rtsed
Location	chos kyi blo gros bka' 'bum Volume 9, Text 3, Pages 35-42 (Folios 1a to 4b5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. snang ba sems su sgrub pa'i skabs las dri ba'i lan byis pa'i mtshar rtsed. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 9: 35-42. Bir, H.P.: Khyentse Labrang, 2012.
Genre	Replies to Questions - dris lan
Colophon	།དེ་སྐད་སྨྲ་བ་ཤར་ཕྱོགས་གནས་པ་ཡི། །མ་སྦྱང་མུ་ཅོལ་སྨྲ་བ་ཞིག་གིས་ཕུལ། །ནོང་པ་གང་མཆིས་བཟོད་པར་མཛད་ནས་ཀྱང་། །ས་རྙིང་དགོངས་པ་འགལ་མེད་གྲུབ་གྱུར་ཅིག །སརྦ་དཱ་ཤུདྡྷ་ནཱི་ཛ་ཡནྟུ།།
	/de skad smra ba shar phyogs gnas pa yi/__/ma sbyang mu col smra ba zhig gis phul/__/nong pa gang mchis bzod par mdzad nas kyang /__/sa rnying dgongs pa 'gal med grub gyur cig__/sarba dA shud+d+ha nI dza yan+tu//

1 Texts in this Section (sde tshan or chos tshan)

35-42	སྣང་བ་སེམས་སུ་སྒྲུབ་པའི་སྐབས་ལས་དྲི་བའི་ལན་བྱིས་པའི་མཚར་རྩེད། snang ba sems su sgrub pa'i skabs las dri ba'i lan byis pa'i mtshar rtsed Replies to Questions - dris lan	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །སྣང་བ་སེམས་སུ་སྒྲུབ་པའི་སྐབས་ལས་དྲི་བའི་ལན་བྱིས་པའི་མཚར་རྩེད་བཞུགས། ། ཨོཾ་སྭསྟི། རྨོངས་པའི་དྲྭ་བ་མ་ལུས་གཅོད་མཛད་ཅིང་། །ཡེ་ཤེས་སྣང་བ་རྒྱས་བའི་གཟི་བྱིན་གྱིས། །བདག་བློའི་པདྨོ་རྣམ་པར་རྒྱས་མཛད་པ། །ལྷ་མཆོག་འཇམ་པའི་དབྱངས་ལ་གུས་བཏུད་ནས། །བློ་ལྡན་རྣམ་པར་གསར་པའི་དྲི་ཚིགས་ལན། །ཉུང་ངུའི་ངག་གིས་ཅུང་ཟད་འབུལ་བར་སྤྲོ། །ངག་གི་དབང་པོས་སྣང་དང་སྣང་ཡུལ་ཕྱེ། །ས་སྐྱ་པ་དག་སོ་སོར་མི་དབྱེ་བར། །སྣང་བ་སེམས་སུ་འདོད་པ་གཉིས་པོ་ལ། །ལེགས་པར་བརྟགས་ན་དགོངས་པ་འགལ་མེད་གོ །གནས་དོན་ལུས་ཀྱི་བག་ཆགས་གསུམ་པོ་ལས། །ཁམས་གསུམ་སྣང་བ་འཆར་ལས་གཞན་མིན་དང་། །ཕྱི་དོན་ཡོད་པར་ཀློང་ཆེན་རབ་འབྱམས་ཀྱང་། །མི་བཞེད་ཆོས་ཀྱི་རྒྱལ་པོ་ས་སྐྱ་པས། །སྣ་ཚོགས་སྣང་བ་བག་ཆགས་ཀྱིས་བསླད་པའི། །སེམས་ཀྱི་ཆོ་འཕྲུལ་རྨི་ལམ་སྣང་བ་བཞིན། །སྣང་ཡང་སྣ་ཚོགས་དེ་དག་སེམས་དང་ནི། །ངོ་བོ་གཅིག་དང་རྫས་གཅིག་ཡིན་ནོ་ཞེས། །བཞེད་པ་གོང་མའི་གསུང་རབ་གང་ནའང་མེད། །དེ་སྐད་དུ་ཡང་རྗེ་བཙུན་རིན་པོ་ཆེས། །དང་པོ་དངོས་ཀུན་སེམས་སུ་སྒྲུབ་བྱ་སྟེ། །སེམས་དེ་ངོ་བོ་ཉིད་མིན་སྒྱུ་མ་སྟེ། །རྨི་ལམ་ཆུ་ཟླ་རྩུབ་པའི་མེ་བཞིན་དུ། །སྣ་ཚོགས་རྐྱེན་རྣམས་ཚོགས་ནས་སྣང་བ་ཙམ། །འདི་ཡི་སེམས་ཀྱི་རང་བཞིན་གང་ཡིན་སྨོས། །སྒྱུ་མ་ཞེས་བྱ་ངོ་བོ་ཉིད་ཀྱང་ནི། །འདི་ན་མེད་ཅིང་རྟེན་ཅིང་འབྲེལ་འབྱུང་ཉིད། །ཅེས་དང་། ངོར་ཆེན་དཀོན་མཆོག་ལྷུན་གྲུབ་ཀྱིས། །ཆོས་ཀྱི་ཕྱི་ནང་དངོས་ཀུན་རང་གི་སེམས། །རྐྱེན་གྱི་བག་ཆགས་བརྟས་པས་སྣང་བར་ལྟ། །སེམས་ནི་གང་དུའང་མ་གྲུབ་ཅིར་ཡང་སྣང་། །དེ་དེར་སྣང་ཡང་མི་བདེན་སྒྱུ་མ་འདྲ། །ཞེས་སོགས་མཁས་གྲུབ་རྣམས་ཀྱིས་མགྲིན་གཅིག་གསུང་། །དངོས་ཀུན་སེམས་སྣང་གཏན་འབེབ་སེམས་ཙམ་དང་། །མཐུན་ཞིང་དེ་ཉིད་སྒྱུ་དང་སྟོང་བརྗོད་བྲལ། །གཏན་ལ་དབབ་པས་ཆེས་ཆེར་ཁྱད་པར་འཕགས། །སྣང་བ་སེམས་སུ་སྒྲུབ་པའི་འཐད་པ་ཡང་། །དཔེ་ཡི་རྣམ་གྲངས་དང་བཅས་གཏན་ལ་དབབ། །ཇི་ལྟར་རྨི་ལམ་ནང་གི་སྣང་བ་དང་། །སྣང་ཡུལ་ཇི་བཞིན་ད་ལྟའི་འདིར་ཡང་ངེས། །སེམས་སྣང་དེ་དག་སྒྱུ་མར་གྲུབ་པས་ན། །མཐར་ཐུག་བརྗོད་བྲལ་ཉིད་དུ་གཏན་ལ་དབབ། །གནས་ལུགས་ཟུང་འཇུག་དབུ་མའི་ངང་དུ་བཞགས། །སེམས་དེ་དོན་དམ་ཁས་ལེན་གང་ལ་བཏུབ། །ཐ་སྙད་ཙམ་དུ་འཇོག་ཅིང་དེ་བཞག་པས། །སེམས་སྣང་ཐ་སྙད་སྒྱུ་མ་ལྟ་བུ་ནི། །དབང་སྐྱོན་ཅན་ལ་སྐྲ་ཤད་སྣང་བ་བཞིན། །རྨི་ལམ་དཔེ་ཡི་གདོན་མི་ཟ་བར་གྲུབ། །གཉིད་རྨི་སད་པར་མ་གྱུར་དེ་སྲིད་དུ། །བག་ཆགས་སྣ་ཚོགས་སྣང་ཞིང་སད་པ་ན། །མེད་ཕྱིར་སྐབས་དེའི་སེམས་སུ་སྣང་བ་ཡིན། །མིན་ན་དེ་ཡི་རྒྱུ་མཚན་སྨྲ་བར་རིགས། །བག་ཆགས་བསགས་པའི་སེམས་དང་རྟེན་གྱུར་འདི། །བརྟེན་པར་གྱུར་པ་རྣམ་ཤེས་མདོ་སྡེས་སྨྲ། །སེམས་ཙམ་སེམས་ནི་ཀུན་གཞིའི་རྣམ་ཤེས་དང་། །ངར་འཛིན་ཡིད་དང་ཡུལ་ལ་རྣམ་རིག་གང་། །འཇུག་པའི་རྣམ་པར་ཤེས་པ་ཞེས་སུ་གྲགས། །དེ་ཡང་སེམས་བྱུང་རྟེན་དམིགས་རྣམ་པར་བཅས། །མཚུངས་པར་ལྡན་པ་ལྔ་ཡི་བདག་ཉིད་བཞེད། །ཐ་སྙད་གསལ་དང་ལྷན་ཅིག་དམིགས་ངེས་ཀྱིས། །རྟགས་ཀྱིས་སྒྲུབས་ཀྱང་ཉེས་པ་མི་འགྱུར་ཏེ། །སྐད་ཅིག་ཕྱི་མའི་ཡུལ་ཤེས་སྐྱེ་ལུགས་ལ། །ལེགས་པར་སོམས་དང་འགལ་བ་མ་ཡིན་ནོ། །རྟེན་ཅིང་འབྲེལ་འབྱུང་དབང་གིས་སྣང་བ་ལགས། །ཐ་སྙད་བེམ་རིག་ངོ་བོ་གཅིག་དམིགས་འགལ། །བེམ་རིག་རྣམ་བཅས་སོ་སོར་མ་ངེས་ན། །གཟུགས་དང་ཤེས་པ་གང་ཡིན་མ་འབྱེད་པར། །རིལ་བོ་གཅིག་འཛིན་དེ་འདྲ་མི་སྲིད་དོ། །ཐ་སྙད་སེམས་རིག་དབྱེར་མེད་འདོད་གྱུར་ན། །སྣང་ཡུལ་སེམས་འགྱུར་སྐྱོན་དག་ངེས་འབྱུང་སྟེ། །སྣང་ཡུལ་སེམས་སོ་སོགས་དང་རིག་ཤེས་གཉིས། །ཐ་དད་དབྱེ་བ་མེད་པར་འདོད་པའི་ཕྱིར། །ངེས་པར་གཅིག་པ་ཉིད་དུ་ཐལ་བར་འགྱུར། །འདོད་ན་སེམས་ལ་གཟུགས་དབྱིབས་སྐྱོན་ཡང་འབབས། །རང་རྒྱུད་ཐལ་འགྱུར་གཏན་ཚིགས་ཡང་ཡིན་ལ། །རང་རྒྱུད་དུ་བཀོད་ལྷན་ཅིག་པ་ལ་ནི། །གཉིས་སུ་ངེས་པས་སྐྱོན་ཅན་མི་འགྱུར་ཏེ། །སེམས་དང་སེམས་སྣང་ཡུལ་དང་ཡུལ་ཅན་དུ། །ངེས་པར་འཛིན་པ་ཉིད་ཀྱིས་གྲུབ་པ་དང་། །རྨི་ལམ་སྐབས་ནའང་བདེ་སྡུག་སོགས་ཀྱི་ཡུལ། །དེ་མྱོང་པོ་དང་གཉིས་སུ་གྲུབ་པའི་ཕྱིར། །གྲུབ་ཀྱང་སྣང་དུས་ཉིད་ནས་གཏན་མེད་པའོ། །མདོ་དང་བསྟན་བཅོས་ཀུན་ལ་སྣང་སེམས་སུ། །གསུང་པ་ཀུན་འབྱུང་རྒྱུ་གཙོའི་ཕྱིར་མིན་ཏེ། །ཕྱི་དོན་རྫས་དང་བདེན་སྨྲ་འགོག་པའི་ཕྱིར། །སྣང་གྲགས་ཆོས་ཀུན་སེམས་ཀྱི་ཆོ་རོལ་དུ། །བསྒྲུབས་ནས་སེམས་དེ་ཉིད་ཀྱང་གཞི་རྩ་མེད། །སྐྱེ་འགགས་བྲལ་བ་ཉིད་དུ་གཏན་ལ་དབབ། །བདེ་གཤེགས་སྙིང་པོ་འཁོར་འདས་འཕྲོ་གཞི་རུ། །འཇོག་ན་དབང་ཕྱུག་ལྟ་བུར་མི་འགྱུར་ཏོ། །སེམས་ཉིད་རྟོགས་དང་མ་རྟོགས་བྱེ་བྲག་གིས། །འཁོར་འདས་གཉིས་སུ་འབྱུང་བས་ངེས་པར་འཐད། །དོན་དམ་རང་སེམས་གཅིག་དང་ཐ་དད་མེད། །ཀུན་རྫོབ་འགྲོ་རྒྱུད་སེམས་གཉིས་མི་ལྡན་ཤིང་། །གཅིག་པུ་ཞེས་པ་མིང་གི་བརྗོད་ཚུལ་ཙམ། །སེམས་དང་ཀུན་གཞི་ཇི་ལྟར་བཤད་ཀྱང་རུང་། །བག་ཆགས་སྣ་ཚོགས་བསྟར་མི་མངོན་པར་ལྡན། །དེ་ལ་བག་ཆགས་གཅིག་ཉིད་མ་ཡིན་པར། །སྣ་ཚོགས་བག་ཆགས་མཐུ་ལས་སྣ་ཚོགས་སྣང་། །ཀུན་གཞིའི་ཁམས་ལ་སྣ་ཚོགས་བག་ཆགས་ནི། །འཇོག་པའི་གནད་ནི་རང་བཞིན་སྟོང་ཉིད་ཕྱིར། །སྟོང་པ་ཉིད་ལས་ཅི་ཡང་འབྱུང་རུང་བ། །སྟོང་པ་རྟེན་འབྱུང་དབྱེར་མེད་ཡིན་ཕྱིར་རོ། །རང་བཞིན་རྟོགས་ན་སྣ་ཚོགས་དབྱིངས་གཅིག་གྲོལ། །དེ་ལས་གཞན་དཔྱད་སྙིང་པོ་འགའ་ཡང་མེད། །སྣང་ཡུལ་ཞེས་པའང་རང་སྣང་ལས་གཞན་པའི། །ཕྱི་དོན་ཡོད་པར་འདོད་ན་སྐྱོན་མང་འབབས། །ཕྱི་དོན་མེད་པར་སེམས་སྣང་ཙམ་ཞིག་ལས། །ཕུང་གསུམ་པ་ཞིག་ཤེས་བྱར་མི་སྲིད་དོ། །ཐ་སྙད་དུ་ནི་སེམས་སྣང་གཅིག་པུ་ལས། །གཞན་པའི་ཆོས་འགའ་སྣང་དུ་མི་རུང་བའི། །སྐྱོན་རྣམས་ཀྱང་ནི་འབབ་པར་མི་འགྱུར་རོ། །གཞན་དུ་སྣ་ཚོགས་སྣང་བ་དེ་རྣམས་ཀྱང་། །རང་སྣང་ཆོ་རོལ་ལས་གཞན་འགའ་ཡང་མེད། །རང་གི་སྣང་བ་ཡིན་པར་མ་གྱུར་ན། །དག་དང་མ་དག་སྣང་བ་སྣ་ཚོགས་རྣམས། །འབྱུང་བའི་འཐད་པ་ལེགས་པར་སྨྲོས་ཤིག་ཀྱེ། །གཅིག་ལས་རྣམ་པ་སྣ་ཚོགས་འབྱུང་བ་ལས། །གཞན་འགའ་སྣང་མི་རུང་བའི་སྐྱེན་འབབ་ན། །འཁོར་འདས་ཆོས་རྣམས་ཆོས་ཀྱི་དབྱིངས་ཆེན་པོར། །རོ་གཅིག་མཉམ་པ་ཆེན་པོའི་གནས་སྐབས་ན། །གཅིག་དང་ཐ་དད་དབྱེ་བ་ལས་གྲོལ་ཕྱིར། །དེར་ཡང་གཞན་འགའ་སྣང་མི་རུང་བར་ཐལ། །འདོད་ན་སངས་རྒྱས་ཀུན་མཁྱེན་མིན་པར་འགྱུར། །ཕྱི་རོལ་མ་བརྟགས་ཆོས་རྣམས་སྣང་འགྱུར་བས། །སྐྱོན་མེད་སྙམ་ན་འདི་ཡང་དེ་དང་མཚུངས། །དེས་ན་རྟོག་གེའི་རྩོད་པ་བྱར་མི་རིགས། །ཕུང་པོ་ཁམས་དང་སྐྱེ་མཆེད་ལ་སོགས་པ། །རང་སེམས་འཁྲུལ་པའི་རྒྱུ་ཡིས་བསྐྱེད་པའི་ཕྱིར། །སྤངས་གཉེན་ལམ་དག་ཚུལ་བཞིན་བརྟེན་པ་ན། །ཟག་པ་ཆ་དང་བཅས་པ་ལྡོག་པར་འགྱུར། །དེ་ཡང་རང་གི་སེམས་སྣང་ཡིན་པས་ན། །དག་ཅིང་གྲོལ་བར་འགྱུར་དུ་རུང་བ་ཡིན། །དེ་ལས་གཞན་དུ་ཕྱི་དོན་ཁས་བླང་ན། །འཁོར་བ་ཉིད་དུ་ཅི་སྟེ་འཁྱམས་པ་དང་། །མྱ་ངན་འདས་པ་ཇི་ལྟར་ཐོབ་པར་འགྱུར། །ཆུ་ཕོར་གང་ལ་འགྲོ་བ་རིགས་དྲུག་གིས། །མཐོང་སྣང་མི་འདྲར་འབྱུང་བ་ཅི་ཞིག་ཡིན། །དེས་ན་རྩོད་པ་ཆོས་ཀྱི་དབྱིངས་ཉིད་དུ། །ཤེས་བརྗོད་འཇུག་པའི་ཡུལ་དུ་འགྱུར་རོ་ཅོག །རང་སེམས་སྒྱུ་མའི་སྣང་བ་རྟོགས་བྱས་ནས། །རང་བཞིན་བརྗོད་བྲལ་གནས་ལུགས་རྟོགས་པར་ཤོག །དེ་སྐད་སྨྲ་བ་ཤར་ཕྱོགས་གནས་པ་ཡི། །མ་སྦྱང་མུ་ཅོལ་སྨྲ་བ་ཞིག་གིས་ཕུལ། །ནོང་པ་གང་མཆིས་བཟོད་པར་མཛད་ནས་ཀྱང་། །ས་རྙིང་དགོངས་པ་འགལ་མེད་གྲུབ་གྱུར་ཅིག །སརྦ་དཱ་ཤུདྡྷ་ནཱི་ཛ་ཡནྟུ།། །།

[edit]

@#/__/snang ba sems su sgrub pa'i skabs las dri ba'i lan byis pa'i mtshar rtsed bzhugs/__/ oM swasti/__rmongs pa'i drwa ba ma lus gcod mdzad cing /__/ye shes snang ba rgyas ba'i gzi byin gyis/__/bdag blo'i pad+mo rnam par rgyas mdzad pa/__/lha mchog 'jam pa'i dbyangs la gus btud nas/__/blo ldan rnam par gsar pa'i dri tshigs lan/__/nyung ngu'i ngag gis cung zad 'bul bar spro/__/ngag gi dbang pos snang dang snang yul phye/__/sa skya pa dag so sor mi dbye bar/__/snang ba sems su 'dod pa gnyis po la/__/legs par brtags na dgongs pa 'gal med go__/gnas don lus kyi bag chags gsum po las/__/khams gsum snang ba 'char las gzhan min dang /__/phyi don yod par klong chen rab 'byams kyang /__/mi bzhed chos kyi rgyal po sa skya pas/__/sna tshogs snang ba bag chags kyis bslad pa'i/__/sems kyi cho 'phrul rmi lam snang ba bzhin/__/snang yang sna tshogs de dag sems dang ni/__/ngo bo gcig dang rdzas gcig yin no zhes/__/bzhed pa gong ma'i gsung rab gang na'ang med/__/de skad du yang rje btsun rin po ches/__/dang po dngos kun sems su sgrub bya ste/__/sems de ngo bo nyid min sgyu ma ste/__/rmi lam chu zla rtsub pa'i me bzhin du/__/sna tshogs rkyen rnams tshogs nas snang ba tsam/__/'di yi sems kyi rang bzhin gang yin smos/__/sgyu ma zhes bya ngo bo nyid kyang ni/__/'di na med cing rten cing 'brel 'byung nyid/__/ces dang /__ngor chen dkon mchog lhun grub kyis/__/chos kyi phyi nang dngos kun rang gi sems/__/rkyen gyi bag chags brtas pas snang bar lta/__/sems ni gang du'ang ma grub cir yang snang /__/de der snang yang mi bden sgyu ma 'dra/__/zhes sogs mkhas grub rnams kyis mgrin gcig gsung /__/dngos kun sems snang gtan 'beb sems tsam dang /__/mthun zhing de nyid sgyu dang stong brjod bral/__/gtan la dbab pas ches cher khyad par 'phags/__/snang ba sems su sgrub pa'i 'thad pa yang /__/dpe yi rnam grangs dang bcas gtan la dbab/__/ji ltar rmi lam nang gi snang ba dang /__/snang yul ji bzhin da lta'i 'dir yang nges/__/sems snang de dag sgyu mar grub pas na/__/mthar thug brjod bral nyid du gtan la dbab/__/gnas lugs zung 'jug dbu ma'i ngang du bzhags/__/sems de don dam khas len gang la btub/__/tha snyad tsam du 'jog cing de bzhag pas/__/sems snang tha snyad sgyu ma lta bu ni/__/dbang skyon can la skra shad snang ba bzhin/__/rmi lam dpe yi gdon mi za bar grub/__/gnyid rmi sad par ma gyur de srid du/__/bag chags sna tshogs snang zhing sad pa na/__/med phyir skabs de'i sems su snang ba yin/__/min na de yi rgyu mtshan smra bar rigs/__/bag chags bsags pa'i sems dang rten gyur 'di/__/brten par gyur pa rnam shes mdo sdes smra/__/sems tsam sems ni kun gzhi'i rnam shes dang /__/ngar 'dzin yid dang yul la rnam rig gang /__/'jug pa'i rnam par shes pa zhes su grags/__/de yang sems byung rten dmigs rnam par bcas/__/mtshungs par ldan pa lnga yi bdag nyid bzhed/__/tha snyad gsal dang lhan cig dmigs nges kyis/__/rtags kyis sgrubs kyang nyes pa mi 'gyur te/__/skad cig phyi ma'i yul shes skye lugs la/__/legs par soms dang 'gal ba ma yin no/__/rten cing 'brel 'byung dbang gis snang ba lags/__/tha snyad bem rig ngo bo gcig dmigs 'gal/__/bem rig rnam bcas so sor ma nges na/__/gzugs dang shes pa gang yin ma 'byed par/__/ril bo gcig 'dzin de 'dra mi srid do/__/tha snyad sems rig dbyer med 'dod gyur na/__/snang yul sems 'gyur skyon dag nges 'byung ste/__/snang yul sems so sogs dang rig shes gnyis/__/tha dad dbye ba med par 'dod pa'i phyir/__/nges par gcig pa nyid du thal bar 'gyur/__/'dod na sems la gzugs dbyibs skyon yang 'babs/__/rang rgyud thal 'gyur gtan tshigs yang yin la/__/rang rgyud du bkod lhan cig pa la ni/__/gnyis su nges pas skyon can mi 'gyur te/__/sems dang sems snang yul dang yul can du/__/nges par 'dzin pa nyid kyis grub pa dang /__/rmi lam skabs na'ang bde sdug sogs kyi yul/__/de myong po dang gnyis su grub pa'i phyir/__/grub kyang snang dus nyid nas gtan med pa'o/__/mdo dang bstan bcos kun la snang sems su/__/gsung pa kun 'byung rgyu gtso'i phyir min te/__/phyi don rdzas dang bden smra 'gog pa'i phyir/__/snang grags chos kun sems kyi cho rol du/__/bsgrubs nas sems de nyid kyang gzhi rtsa med/__/skye 'gags bral ba nyid du gtan la dbab/__/bde gshegs snying po 'khor 'das 'phro gzhi ru/__/'jog na dbang phyug lta bur mi 'gyur to/__/sems nyid rtogs dang ma rtogs bye brag gis/__/'khor 'das gnyis su 'byung bas nges par 'thad/__/don dam rang sems gcig dang tha dad med/__/kun rdzob 'gro rgyud sems gnyis mi ldan shing /__/gcig pu zhes pa ming gi brjod tshul tsam/__/sems dang kun gzhi ji ltar bshad kyang rung /__/bag chags sna tshogs bstar mi mngon par ldan/__/de la bag chags gcig nyid ma yin par/__/sna tshogs bag chags mthu las sna tshogs snang /__/kun gzhi'i khams la sna tshogs bag chags ni/__/'jog pa'i gnad ni rang bzhin stong nyid phyir/__/stong pa nyid las ci yang 'byung rung ba/__/stong pa rten 'byung dbyer med yin phyir ro/__/rang bzhin rtogs na sna tshogs dbyings gcig grol/__/de las gzhan dpyad snying po 'ga' yang med/__/snang yul zhes pa'ang rang snang las gzhan pa'i/__/phyi don yod par 'dod na skyon mang 'babs/__/phyi don med par sems snang tsam zhig las/__/phung gsum pa zhig shes byar mi srid do/__/tha snyad du ni sems snang gcig pu las/__/gzhan pa'i chos 'ga' snang du mi rung ba'i/__/skyon rnams kyang ni 'bab par mi 'gyur ro/__/gzhan du sna tshogs snang ba de rnams kyang /__/rang snang cho rol las gzhan 'ga' yang med/__/rang gi snang ba yin par ma gyur na/__/dag dang ma dag snang ba sna tshogs rnams/__/'byung ba'i 'thad pa legs par smros shig kye/__/gcig las rnam pa sna tshogs 'byung ba las/__/gzhan 'ga' snang mi rung ba'i skyen 'bab na/__/'khor 'das chos rnams chos kyi dbyings chen por/__/ro gcig mnyam pa chen po'i gnas skabs na/__/gcig dang tha dad dbye ba las grol phyir/__/der yang gzhan 'ga' snang mi rung bar thal/__/'dod na sangs rgyas kun mkhyen min par 'gyur/__/phyi rol ma brtags chos rnams snang 'gyur bas/__/skyon med snyam na 'di yang de dang mtshungs/__/des na rtog ge'i rtsod pa byar mi rigs/__/phung po khams dang skye mched la sogs pa/__/rang sems 'khrul pa'i rgyu yis bskyed pa'i phyir/__/spangs gnyen lam dag tshul bzhin brten pa na/__/zag pa cha dang bcas pa ldog par 'gyur/__/de yang rang gi sems snang yin pas na/__/dag cing grol bar 'gyur du rung ba yin/__/de las gzhan du phyi don khas blang na/__/'khor ba nyid du ci ste 'khyams pa dang /__/mya ngan 'das pa ji ltar thob par 'gyur/__/chu phor gang la 'gro ba rigs drug gis/__/mthong snang mi 'drar 'byung ba ci zhig yin/__/des na rtsod pa chos kyi dbyings nyid du/__/shes brjod 'jug pa'i yul du 'gyur ro cog__/rang sems sgyu ma'i snang ba rtogs byas nas/__/rang bzhin brjod bral gnas lugs rtogs par shog__/de skad smra ba shar phyogs gnas pa yi/__/ma sbyang mu col smra ba zhig gis phul/__/nong pa gang mchis bzod par mdzad nas kyang /__/sa rnying dgongs pa 'gal med grub gyur cig__/sarba dA shud+d+ha nI dza yan+tu//__//