JKCL-KABUM-02-KHA-036

🚧 This website is under continued development. We appreciate your patience!

Previous Text Back to Volume PageNext Text

Wylie title	'chi med tshe lha rnam gsum la bstod pa 'chi med grub pa'i dpal ster
Location	chos kyi blo gros bka' 'bum Volume 2, Text 36, Pages 461-464 (Folios 1a1 to 2b3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. 'chi med tshe lha rnam gsum la bstod pa 'chi med grub pa'i dpal ster. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: 461-464. Bir, H.P.: Khyentse Labrang, 2012.
Genre	Verses of Praise - bstod pa
Deity	tshe dpag med, gtsug tor rnam rgyal ma, sgrol ma yid bzhin 'khor lo, tshe lha rnam gsum
Colophon	།ཅེས་པའང་གཙུག་ལག་ལུང་རིགས་ཉི་མ་སྨྲ་བའི་སེང་གེས་རང་ལོ་བཅུ་ཕྲག་དྲུག་ལ་ལྔ་ཡི་ལྷག་པར་སོན་པའི་ཚེ་གནམ་ལོ་གསར་ཚེས་ཀྱི་དགའ་བ་དང་པོར་བཀྲ་ཤིས་འབྲས་མོ་ལྗོངས་སྒང་ཏོག་རྒྱལ་པོའི་ཕོ་བྲང་དང་འདབ་འབྲེལ་བའི་གནྡྷོ་ལར་བྲིས་པ་དགེ་ཞིང་བཀྲ་ཤིས་པར་གྱུར་ཅིག །
	ces pa'ang gtsug lag lung rigs nyi ma smra ba'i seng ges rang lo bcu phrag drug la lnga yi lhag par son pa'i tshe gnam lo gsar tshes kyi dga' ba dang por bkra shis 'bras mo ljongs sgang tog rgyal po'i pho brang dang 'dab 'brel ba'i gan+d+ho lar bris pa dge zhing bkra shis par gyur cig

1 Texts in this Section (sde tshan or chos tshan)

461-464	འཆི་མེད་ཚེ་ལྷ་རྣམ་གསུམ་ལ་བསྟོད་པ་འཆི་མེད་གྲུབ་པའི་དཔལ་སྟེར། 'chi med tshe lha rnam gsum la bstod pa 'chi med grub pa'i dpal ster Verses of Praise - bstod pa	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

འཆི་མེད་ཚེ་ལྷ་རྣམ་གསུམ་ལ་བསྟོད་པ་འཆི་མེད་གྲུབ་པའི་དཔལ་སྟེར་ཞེས་བྱ་བ་བཞུགས་སོ། །ན་མོ་གུ་རུ་ཨ་པཱ་རི་མི་ཏ་ཨུཥྞི་ཥ་བི་ཛ་ཡ་ཙིནྟ་ཙཀྲ་ཏཱ་ར་ཡེ། སྟེང་ཕྱོགས་ཡོན་ཏན་དཔག་མེད་ཞིང་ཁམས་རྒྱ་མཚོའི་སྤྲིན་གྱི་བླ་བྲེ་མཛེས་པར་བྲེས། །ཚེ་དང་ཡེ་ཤེས་དཔག་མེད་འཛིན་ཅིང་སྐྱེ་དང་འགག་པ་རབ་དབེན་རྒྱུན་གྱིས་རྟག །ལོངས་སྤྱོད་རྫོགས་སྐུ་ངེས་པ་ལྔ་ལྡན་གསུང་དབྱངས་ཡན་ལག་དྲུག་ཅུ་མཁའ་མཐར་སྒྲོགས། །ནམ་མཁའ་ལྟར་ཡངས་རྒྱ་མཚོ་ལྟར་ཟབ་ཟབ་ཞི་སྤྲོས་བྲལ་འོད་གསལ་ཆེན་པོའི་ཐུགས། །འཆི་མེད་ལྷ་མཆོག་བཅོམ་ལྡན་གངས་རིའི་མདངས་ལ་ཟླ་གཞོན་བརྒྱ་ཕྲག་གིས་འཁྱུད་ཅིང་། །མཚན་དང་དཔེ་བྱད་འོད་ཟེར་སྟོང་འབར་རྒྱལ་བའི་དབུས་ན་ཉི་ལྟར་ལྷམ་མེར་གསལ། །འོད་སྣང་མཐའ་ཡས་བདེ་ལྡན་ཞིང་གཙོ་ཞིང་གི་བཀོད་པ་ངོ་མཚར་མཐའ་ཀླས་ཤིང་། །ཕྱོགས་བཅུའི་བདེ་གཤེགས་སྤྲིན་ལྟར་རབ་གཏིབ་རབ་བསྔགས་བསྟོད་པའི་མེ་ཏོག་ཉིན་བཞིན་འཐོར། །དུས་མིན་འཆི་བ་ཁྲོ་གཉེར་རབ་གཙིག་མདོག་ཅན་མི་བཟད་མཆེ་བ་རྣོན་པོ་དག །གང་མཚན་དྲན་དང་སྐུ་ཡི་སྣང་བ་ཡིད་མཁར་བཀོད་པའི་དེ་མ་ཐག་ཉིད་དུ། །རབ་ཏུ་འཇིགས་སྦྱིན་གདོང་ནི་ཕྱིར་ཕྱོགས་ཁ་ཟུམ་ངོ་ཚ་དང་བཅས་བྲོས་པར་གྱུར། །རྡོ་རྗེའི་ལུས་སྒྲུབ་རྡོ་རྗེའི་སྲོག་ཀ་ཚུགས་ཤིང་འཆི་མེད་མཆོག་སྩོལ་ལ་ཕྱག་འཚལ། །ཤཱཀྱ་སེངྒེ་ཤཱཀྱའི་རྒྱལ་པོས་བྱིན་བརླབས་མཁྱེན་བརྩེ་ནུས་པའི་ཡེ་ཤེས་རང་གཟུགས་ནི། །རྣམ་པ་ཐམས་ཅད་མཆོག་ལྡན་བདེ་ཆེན་བདུད་རྩིས་རབ་མྱོས་དྲི་མ་མེད་པའི་སྐུ། །གསུང་དབྱངས་རྒྱ་མཚོས་ཞིང་ཀུན་རབ་ཁྱབ་བདག་མེད་སེང་གེའི་སྒྲ་ལྡན་ཤེས་བྱའི་ཁྱོན་ཀུན་འཇུག །གཟུང་འཛིན་རླུང་དམར་འཁྲུགས་པ་རིང་དུ་སྤངས་ཤིང་ཞི་བ་འོད་གསལ་ཆེན་པོའི་ཐུགས། །བྲལ་དང་སྨིན་པའི་ཡོན་ཏན་རྒྱ་མཚོ་བསམ་ཡས་ནོར་བུའི་མཛོད་ཀྱི་དབང་ཕྱུག་ཆེ། །རྟག་དང་ཁྱབ་ཅིང་འཛད་པ་མེད་པའི་ཕྲིན་ལས་རོལ་མོ་ས་གསུམ་ཀུན་ན་སྙན། །དཔལ་མོ་དབང་བཅུ་མངའ་བ་ཆེན་མོ་གཅིག་ཉིད་བདེ་མཆོག་སྒྱུ་མའི་གར་བརྒྱས་རྩེན། །དེ་བཞིན་གཤེགས་པའི་གཙུག་ཏོར་ལས་སྐྱེས་བཅོམ་ལྡན་འདས་མ་རྣམ་པར་རྒྱལ་བ་ཆེ། །མཛེས་ཁྲོ་ཆགས་པའི་ཞལ་གསུམ་ཕྱག་བརྒྱད་ཡེ་ཤེས་དཔག་ཡས་ཚེ་འཛིན་མ། །རྒྱལ་བ་ཐུབ་ཆེན་མཆོག་གིས་སྐུ་ཚེ་བྱིན་གྱིས་བརླབས་ཕྱིར་ཁྱོད་བསྙེན་ཅིང་། །གཟུངས་ཀྱི་སྔགས་ཆེན་བརྒྱ་ཕྲག་བཀླགས་པས་འགྱུར་མེད་སྲོག་གི་ཀ་བ་ཚུགས། །རིགས་སྔགས་རྒྱལ་མོ་འཆི་བདག་བདུད་བཅོམ་ལྷག་པའི་ལྷ་མཆོག་ལ་ཕྱག་འཚལ། །འཕགས་མཆོག་ཕྱག་ན་པདྨའི་ཨུཏྤལ་ལྟར་གནག་སྤྱན་གྱི་ཆུ་ཐིགས་ལས་འཁྲུངས་པ། །ལྷ་མོ་སྒྲོལ་མ་འཁོར་བ་ལས་སྒྲོལ་མྱུར་མ་དཔལ་མོ་ཞེས་སུ་རབ་བསྔགས་མ། །སངས་རྒྱས་སྲས་དང་བཅས་པས་ཉིན་བཞིན་ཁྱོད་ཀྱི་དབུ་ལ་བསྔགས་པའི་མེ་ཏོག་བཅིང་། །སེམས་ཅན་དབུལ་ཕོངས་འཇིགས་པས་གཙེས་རྣམས་སྦྲུལ་གདུག་ཁ་ནས་རབ་འབྱིན་དབུགས་དབྱུང་སྟེར། །གཅིག་ཏུ་མ་ངེས་མཚན་མཆོག་བརྒྱ་རྩ་དུ་མའི་རོལ་གར་སྐད་ཅིག་ཉིད་ལ་སྟོན། །བསྐལ་མང་ཚོགས་ཆེན་ཡུད་ཙམ་ལ་བཟླུམས་ཞིང་ཁམས་རྒྱ་མཚོར་སྦྱངས་དང་སྨིན་པར་མཛད། །སྟོབས་བཅུ་མངའ་བའི་བཅོམ་ལྡན་ཁྱེད་ནི་བྱང་ཆུབ་སེམས་མ་ཆེན་མོའི་ཚུལ་འཆང་ཞིང་། །རབ་འབྱམས་ཞིང་ན་ཀུན་ཏུ་རྒྱུ་ཞིང་བྱེ་བ་ཁྲག་ཁྲིག་འགྲོ་མང་དོན་རབ་སྒྲུབ། །དུས་གསུམ་རྒྱལ་བ་ཀུན་གྱི་ཡུམ་གཅིག་ལྷ་མོ་ཆུ་ཤེལ་རི་བོ་འབུམ་བརྩེགས་ཞལ། །ཀུན་ནས་ལྟ་བས་ཆོག་མི་ཤེས་པའི་མཛེས་སྡུག་མཚུངས་མེད་མཚན་དཔེའི་མེ་ཏོག་བཀྲ། །ཡེ་ཤེས་སྤྱན་བདུན་རྣམ་བཀྲ་ཇི་ལྟ་ཇི་སྙེད་མཁྱེན་ཅིང་ཐུགས་རྗེ་བརྩེ་ལྡན་མ། །ཚེ་དང་ཡེ་ཤེས་དངོས་གྲུབ་སྟེར་མཁས་འཇིགས་སྐྱོབ་ཡིད་བཞིན་འཁོར་ལོ་ཁྱེད་ཕྱག་འཚལ། །དེ་ལྟར་ལྷ་མཆོག་དགུང་ཟླ་ལྟར་དཀར་གསུམ་ལ་ཕྱག་འཚལ་མཆོད་བསྟོད་བསྙེན་པའི་མཐུས། །བསྟན་འཛིན་སྐྱེས་བུའི་སྲོག་ལ་མི་ཤིགས་རྡོ་རྗེའི་རྒྱས་བཏབ་བདག་སོགས་ཚེ་འཕྲང་སྒྲོལ། །རིང་འཚོའི་དཔག་བསམ་རྩ་བ་རབ་བརྟན་ཕན་བདེའི་ཡལ་འདབ་ཕྱོགས་བཅུར་གྲོལ་བ་དང་། །གྲུབ་གཉིས་འབྲས་བཟང་རྒས་མེད་ལང་ཚོ་རབ་རྒྱས་ཚེ་ཡི་རིག་འཛིན་ཐོབ་གྱུར་ཅིག །དེ་ལྟར་བསྟོད་པའི་ལེགས་བྱས་ཀྱིས། །བསོད་ནམས་དཔག་མེད་རབ་རྒྱས་ཤིང་། །བསམ་དོན་ཡིད་བཞིན་འགྲུབ་པ་དང་། །བཀྲ་ཤིས་པད་དཀར་བཞད་གྱུར་ཅིག །ཅེས་པའང་གཙུག་ལག་ལུང་རིགས་ཉི་མ་སྨྲ་བའི་སེང་གེས་རང་ལོ་བཅུ་ཕྲག་དྲུག་ལ་ལྔ་ཡི་ལྷག་པར་སོན་པའི་ཚེ་གནམ་ལོ་གསར་ཚེས་ཀྱི་དགའ་བ་དང་པོར་བཀྲ་ཤིས་འབྲས་མོ་ལྗོངས་སྒང་ཏོག་རྒྱལ་པོའི་ཕོ་བྲང་དང་འདབ་འབྲེལ་བའི་གནྡྷོ་ལར་བྲིས་པ་དགེ་ཞིང་བཀྲ་ཤིས་པར་གྱུར་ཅིག ། །།

[edit]

'chi med tshe lha rnam gsum la bstod pa 'chi med grub pa'i dpal ster zhes bya ba bzhugs so/____/na mo gu ru a pA ri mi ta uSh+Ni Sha bi dza ya tsin+ta tsakra tA ra ye/__steng phyogs yon tan dpag med zhing khams rgya mtsho'i sprin gyi bla bre mdzes par bres/____/tshe dang ye shes dpag med 'dzin cing skye dang 'gag pa rab dben rgyun gyis rtag__/longs spyod rdzogs sku nges pa lnga ldan gsung dbyangs yan lag drug cu mkha' mthar sgrogs/____/nam mkha' ltar yangs rgya mtsho ltar zab zab zhi spros bral 'od gsal chen po'i thugs/____/'chi med lha mchog bcom ldan gangs ri'i mdangs la zla gzhon brgya phrag gis 'khyud cing /____/mtshan dang dpe byad 'od zer stong 'bar rgyal ba'i dbus na nyi ltar lham mer gsal/____/'od snang mtha' yas bde ldan zhing gtso zhing gi bkod pa ngo mtshar mtha' klas shing /____/phyogs bcu'i bde gshegs sprin ltar rab gtib rab bsngags bstod pa'i me tog nyin bzhin 'thor/____/dus min 'chi ba khro gnyer rab gtsig mdog can mi bzad mche ba rnon po dag__/gang mtshan dran dang sku yi snang ba yid mkhar bkod pa'i de ma thag nyid du/____/rab tu 'jigs sbyin gdong ni phyir phyogs kha zum ngo tsha dang bcas bros par gyur/____/rdo rje'i lus sgrub rdo rje'i srog ka tshugs shing 'chi med mchog stsol la phyag 'tshal/____/shAkya seng+ge shAkya'i rgyal pos byin brlabs mkhyen brtse nus pa'i ye shes rang gzugs ni/____/rnam pa thams cad mchog ldan bde chen bdud rtsis rab myos dri ma med pa'i sku/____/gsung dbyangs rgya mtshos zhing kun rab khyab bdag med seng ge'i sgra ldan shes bya'i khyon kun 'jug__/gzung 'dzin rlung dmar 'khrugs pa ring du spangs shing zhi ba 'od gsal chen po'i thugs/____/bral dang smin pa'i yon tan rgya mtsho bsam yas nor bu'i mdzod kyi dbang phyug che/____/rtag dang khyab cing 'dzad pa med pa'i phrin las rol mo sa gsum kun na snyan/____/dpal mo dbang bcu mnga' ba chen mo gcig nyid bde mchog sgyu ma'i gar brgyas rtsen/____/de bzhin gshegs pa'i gtsug tor las skyes bcom ldan 'das ma rnam par rgyal ba che/____/mdzes khro chags pa'i zhal gsum phyag brgyad ye shes dpag yas tshe 'dzin ma/____/rgyal ba thub chen mchog gis sku tshe byin gyis brlabs phyir khyod bsnyen cing /____/gzungs kyi sngags chen brgya phrag bklags pas 'gyur med srog gi ka ba tshugs/____/rigs sngags rgyal mo 'chi bdag bdud bcom lhag pa'i lha mchog la phyag 'tshal/____/'phags mchog phyag na pad+ma'i ut+pal ltar gnag spyan gyi chu thigs las 'khrungs pa/____/lha mo sgrol ma 'khor ba las sgrol myur ma dpal mo zhes su rab bsngags ma/____/sangs rgyas sras dang bcas pas nyin bzhin khyod kyi dbu la bsngags pa'i me tog bcing /____/sems can dbul phongs 'jigs pas gtses rnams sbrul gdug kha nas rab 'byin dbugs dbyung ster/____/gcig tu ma nges mtshan mchog brgya rtsa du ma'i rol gar skad cig nyid la ston/____/bskal mang tshogs chen yud tsam la bzlums zhing khams rgya mtshor sbyangs dang smin par mdzad/____/stobs bcu mnga' ba'i bcom ldan khyed ni byang chub sems ma chen mo'i tshul 'chang zhing /____/rab 'byams zhing na kun tu rgyu zhing bye ba khrag khrig 'gro mang don rab sgrub/____/dus gsum rgyal ba kun gyi yum gcig lha mo chu shel ri bo 'bum brtsegs zhal/____/kun nas lta bas chog mi shes pa'i mdzes sdug mtshungs med mtshan dpe'i me tog bkra/____/ye shes spyan bdun rnam bkra ji lta ji snyed mkhyen cing thugs rje brtse ldan ma/____/tshe dang ye shes dngos grub ster mkhas 'jigs skyob yid bzhin 'khor lo khyed phyag 'tshal/____/de ltar lha mchog dgung zla ltar dkar gsum la phyag 'tshal mchod bstod bsnyen pa'i mthus/____/bstan 'dzin skyes bu'i srog la mi shigs rdo rje'i rgyas btab bdag sogs tshe 'phrang sgrol/____/ring 'tsho'i dpag bsam rtsa ba rab brtan phan bde'i yal 'dab phyogs bcur grol ba dang /____/grub gnyis 'bras bzang rgas med lang tsho rab rgyas tshe yi rig 'dzin thob gyur cig__/de ltar bstod pa'i legs byas kyis/____/bsod nams dpag med rab rgyas shing /____/bsam don yid bzhin 'grub pa dang /____/bkra shis pad dkar bzhad gyur cig__/ces pa'ang gtsug lag lung rigs nyi ma smra ba'i seng ges rang lo bcu phrag drug la lnga yi lhag par son pa'i tshe gnam lo gsar tshes kyi dga' ba dang por bkra shis 'bras mo ljongs sgang tog rgyal po'i pho brang dang 'dab 'brel ba'i gan+d+ho lar bris pa dge zhing bkra shis par gyur cig__/__//_