JKCL-KABUM-11-DA-036

🚧 This website is under continued development. We appreciate your patience!

Previous Text Back to Volume PageNext Text

Wylie title	'bri gung a phyi rdo rje chos sgron gyi gsol mchod phrin las char 'bebs
Location	chos kyi blo gros bka' 'bum Volume 11, Text 36, Pages 171-187 (Folios 1a to 9a3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. 'bri gung a phyi rdo rje chos sgron gyi gsol mchod phrin las char 'bebs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 11: 171-187. Bir, H.P.: Khyentse Labrang, 2012.
Genre	Protector Rituals - gsol mchod
Colophon	།ཅེས་པའང་ལྕགས་ར་བསམ་འགྲུབ་རྩེ་དང་སྡེ་དགེའི་དངུལ་གདུང་ཁང་ལ་སོགས་ལ་ལྷ་མོ་འདི་ཉིད་ཀྱི་གསོལ་མཆོད་དགོས་པ་ལ་བརྟེན། ལྕགས་ར་དབུ་མཛད་འཇམ་དབྱངས་ཉི་མ་དང་། འཚོ་བྱེད་ཆེན་པོ་བླ་མ་ཨ་ཚང་ནས་ཀྱང་གསུང་བསྐུལ་གྱིས་རྐྱེན་བྱས་རང་ཉིད་ཀྱང་སྤྲོ་བས་མཚམས་སྦྱར་ཏེ་འཇམ་དབྱངས་ཆོས་ཀྱི་བློ་གྲོས་པས། ཆུ་བྱ་མགོ་ཟླ་བའི་ཚེས་ལྔ་བཟང་པོར་བཀྲ་ཤིས་འཆི་མེད་གྲུབ་པའི་དགའ་ཚལ་དུ་སྨྲས་རིམ་བཞིན་ཡི་གེའི་བྱེད་པོ་རིག་གནས་ཀུན་ལ་སྤོབས་པ་དགེ་བ་ཅན་དགེ་སློང་འཇམ་དབྱངས་བློ་གྲོས་འཕེལ་རྒྱས་ནས་བགྱིས་པ་འདིས་ཀྱང་སྲུང་མ་ཆེན་མོ་དགྱེས་པའི་མཆོད་སྤྲིན་ཆེན་པོར་གྱུར་ཏེ་ཕྲིན་ལས་རྣམ་པ་བཞི་འབད་མེད་དུ་འགྲུབ་པའི་རྒྱུར་གྱུར་ཅིག །སརྦ་མངྒ་ལཾ།།
	/ces pa'ang lcags ra bsam 'grub rtse dang sde dge'i dngul gdung khang la sogs la lha mo 'di nyid kyi gsol mchod dgos pa la brten/__lcags ra dbu mdzad 'jam dbyangs nyi ma dang /__'tsho byed chen po bla ma a tshang nas kyang gsung bskul gyis rkyen byas rang nyid kyang spro bas mtshams sbyar te 'jam dbyangs chos kyi blo gros pas/__chu bya mgo zla ba'i tshes lnga bzang por bkra shis 'chi med grub pa'i dga' tshal du smras rim bzhin yi ge'i byed po rig gnas kun la spobs pa dge ba can dge slong 'jam dbyangs blo gros 'phel rgyas nas bgyis pa 'dis kyang srung ma chen mo dgyes pa'i mchod sprin chen por gyur te phrin las rnam pa bzhi 'bad med du 'grub pa'i rgyur gyur cig__/sarba mang+ga laM/

1 Texts in this Section (sde tshan or chos tshan)

171-187	འབྲི་གུང་ཨ་ཕྱི་རྡོ་རྗེ་ཆོས་སྒྲོན་གྱི་གསོལ་མཆོད་ཕྲིན་ལས་ཆར་འབེབས། 'bri gung a phyi rdo rje chos sgron gyi gsol mchod phrin las char 'bebs Protector Rituals - gsol mchod	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །འབྲི་གུང་ཨ་ཕྱི་རྡོ་རྗེ་ཆོས་སྒྲོན་གྱི་གསོལ་མཆོད་ཕྲིན་ལས་ཆར་འབེབས་བཞུགས་སོ། ། ཨོཾ་སྭ་སྟི། །བདེ་སྟོང་ཉམས་བརྒྱས་སྒེག་པའི་སྐུ། །དམར་སེར་ལི་ཁྲིའི་མདངས་འོད་ཅན། །བླ་མ་རྡོ་རྗེ་རྣལ་འབྱོར་མར། མི་ཕྱེད་གུས་པའི་ཕྱག་གིས་འདུད། གསང་སྔགས་བཀའ་ཡི་སྲུང་མ་ཆེ། །དབྱིངས་ཕྱུག་ཌཱ་ཀིའི་གཙོ་མོ་ཡི། །རྣམ་རོལ་བདེ་ཆེན་ཆོས་སྒྲོན་གྱི། །ཐུགས་དམ་དགྱེས་བསྐང་འདིར་དབྱེ་བྱ། །དེ་ལ་འདིར་གསང་སྔགས་རྒྱུད་ཀྱི་སྲུང་མ་ཆེན་མོ་དཔལ་ལྡན་རྣལ་འབྱོར་གྱི་ཐུགས་དམ་ཆེན་པོ་རྣམས་ཀྱི་གྲོགས་མོ་ཆོས་ཀྱི་སྒྲོན་མར་གསོལ་མཆོད་བྱ་བར་འདོད་པས། གནས་གཙང་མར། སྐུ་རྟེན་སོགས་བཀྲམ་པའི་མདུན། ཡི་དམ་རྡོ་རྗེ་རྣལ་འབྱོར་མའི་གཏོར་མ་དང་། འདི་ཉིད་ལ་རིན་པོ་ཆེའི་སྣོད་དུ་གཏོར་མ་སྨད་ཟླུམ་པོ་སྟོད་ཟུར་ཅུང་ཡོད་པར་ཕྱོགས་བཞིར་པད་འདབ་དང་མཚམས་བཞིར་མཐེབ་སྐྱུ་བརྩེགས། རྩེ་ལ་ཉི་ཟླ་ནོར་བུའི་རྒྱན་ཅན། གཡས་གཡོན་དུ་སྨན་ཕུད་དང་། རཀྟ་ཐུན་གཏོར་ནི་དམར་གཏོར་བཞི་བསྒྲིགས་ཅན་དང་། དཀར་མངར་དང་ཤ་ཁྲག་གི་བཟའ་བཅའ། ཆང་ཕུད་གསེར་སྐྱེམས་དང་མཆོད་པ་རྣམ་ལྔ་སོགས་གཙང་ཤིང་མཛེས་པར་བཤམས་ལ། སྟན་བདེ་བ་ལ་འཁོད་དེ། ཡི་དམ་རྣལ་འབྱོར་མ་ལྟ་བུ་མཆོག་ཏུ་ཤིས་པས་དེའི་བསྐྱེད་བཟླས་དང་། མཆོད་གཏོར་འབུལ་བ་སྔོན་དུ་འགྲོ་བས། འདི་ཉིད་ཀྱི་ཕྲིན་ལས་དངོས་ལ་དོན་བཞི་སྟེ། དང་པོ་མཆོད་གཏོར་བྱིན་གྱིས་བརླབ་པ་ནི། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་རབ་དཀར་ཐོད་པའི་སྣོད། །ཡངས་ཤིང་རྒྱ་ཆེར་མཆོད་པའི་ཡོ་བྱད་རྣམས། །དྭངས་ཤིང་ཐོགས་མེད་ས་དང་བར་སྣང་ཁྱབ། །འདོད་ཡོན་འབྱུང་བའི་སྤྲིན་ཕུང་ཆེན་པོར་གྱུར། །ཨོཾ་ཨཱཿཧཱུྃ། ལན་གསུམ་དང་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་བྱིན་གྱིས་བརླབས། ཁྱད་པར་དུ་གཏོར་མ་བྱིན་གྱིས་བརླབ་པ་ནི། རྃ་ཡྃ་ཁྃ། སྟོང་པའི་ངང་ལས་ཡྃ་རྃ་རླུང་མེ་ཡི། །དཀྱིལ་འཁོར་སྟེང་དུ་ཀཾ་ལས་ཐོད་སྒྱེད་གསུམ། །དེ་སྟེང་ཨ་ལས་ཐོད་སྣོད་རྒྱ་ཆེའི་ནང་། །ཤ་ལྔ་བདུད་རྩི་ལྔ་ཡི་རང་བཞིན་གྱི། །གཏོར་མ་ཟག་མེད་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿཕྱག་རྒྱ་དང་བཅས་ལན་གསུམ་བརྗོད། གཉིས་པ་དམ་ཚིག་པ་བསྐྱེད་ཅིང་སྤྱན་དྲངས། མཆོད་བསྟོད་འབུལ་བ་ནི། སྭ་བྷཱ་ཝས་སྦྱངས། ཕྱི་ནང་ཆོས་ཀུན་སྟོང་པའི་ངང་ཉིད་ལས། །ས་ཕྱོགས་དག་ཅིང་གཙང་མའི་ཞིང་ཁམས་སུ། །ཡངས་ཤིང་རྒྱ་ཆེའི་བཀོད་པ་ཕུན་ཚོགས་ནང་། །རྟ་མཆོག་སྔོན་པོ་སྤྲིན་གྱི་ཤུགས་འཆང་སྟེང་། །ཟབ་ཆེན་སྟན་དང་གསེར་སྒ་གཡུ་མཐུར་སོགས། །རིན་ཆེན་རྣམ་མང་རྒྱན་ཆས་སྤྲས་པའི་སྟེང་། །འདོད་དགུའི་མཆོག་སྩོལ་སྒྲུབ་པོའི་རེ་སྐོང་མ། །དབྱིངས་ཕྱུག་དཔལ་ལྡན་ཆོས་ཀྱི་སྒྲོན་མ་ནི། །སྐུ་མདོག་ཟླ་བ་གསར་པའི་ལང་ཚོ་ལ། །རྒྱ་སྐྱེགས་ཐིག་ལེས་མཛེས་པའི་མདངས་ལྡན་མ། །ཞི་འཛུམ་ཅུང་ཟད་ཁྲོ་བའི་ཉམས་དང་ལྡན། །གནག་སྣུམ་རལ་པའི་ཐོར་ཚུགས་སྤྱི་བོར་བཅིངས། །ལྷག་མ་སྐུ་རྒྱབ་ཁེབ་པར་གྲོལ་བ་ཡི། །སྐུ་ལ་ལྷ་རྫས་བཟང་པོའི་གོས་ཀྱིས་ཀླུབས། །དབུ་ལ་དུང་ཐོད་རིན་ཆེན་འོད་འཕྲོ་བའི། །མཛེས་པའི་རྒྱན་ཆ་མ་མོའི་རྣམ་པར་སྤྲས། །དར་སྣ་ལྔ་ཡི་ཅོད་པན་རབ་ཏུ་འཕུར། །ཕྱག་གཡས་གསེར་གྱི་ཅང་ཏེའུ་ཁྲོ་ལོ་ལོ། །འཁྲོལ་བས་མ་མོ་མཁའ་འགྲོ་དབང་དུ་སྡུད། །གཡོན་པས་ཐོད་པ་ཁྲག་བཀང་ཞལ་དུ་གསོལ། །གདུག་པའི་དགྲ་བགེགས་མ་ལུས་ཚར་གཅོད་ཅིང་། །དྲག་ཤུལ་རོལ་པའི་སྟབས་ཀྱིས་འགྱིང་བར་བྱེད། །དབང་སྡུད་རྩལ་དང་དྲག་པོའི་མཐུ་ལྡན་མ། །བཀའ་ཉན་བྲན་གཡོག་འབུམ་ཕྲག་འཁོར་གྱིས་བསྐོར། །གནས་གསུམ་འབྲུ་གསུམ་ཐུགས་སྲོག་ཧྲཱིཿཡིས་མཚན། །འོད་འཕྲོས་གར་བཞུགས་གནས་ནས་སྤྱན་དྲངས་གྱུར། །མི་རྐང་གི་གླིང་བུ་ཐོད་རྔ་སོགས་རོལ་མོའི་སྒྲ་སྣ་ཚོགས་དང་། སྤོས་ཀྱི་དུད་སྤྲིན་འཐུལ་བ་དང་བཅས། བྷྱོ། ཡེ་ཤེས་ཌཱ་ཀིའི་གཙོ་མོ་དཔལ་ལྡན་མ། །བདེ་ཆེན་ཆོས་ཀྱི་སྒྲོན་མ་དབྱིངས་ནས་བཞེངས། །དཔའ་བོ་ཌཱ་ཀིའི་འཁོར་ཚོགས་དང་བཅས་པ། །ཀུན་ཀྱང་རུས་རྒྱན་གཡེལ་ཁ་སི་ལི་ལི། །ཅང་ཏེའུ་དྲིལ་བུ་གསེར་གྱི་རྔ་ཆུང་གི །སྒྲ་སྙན་དིར་དིར་སྒྲོགས་བཞིན་གནས་འདིར་བྱོན། །མ་ཐོགས་མྱུར་དུ་དགྱེས་བཞིན་རབ་དགོངས་ལ། །གནས་ཡུལ་ཞིང་སྐྱོང་དགྱེས་པས་རོལ་པ་ཡི། །དགའ་བའི་ཚལ་དང་དབུར་སྟོད་གསེར་ཁང་དང་། །ལ་ཕྱི་པུ་རོང་ལ་སོགས་གནས་མཆོག་ནས། །རྡོ་རྗེ་འཆང་གི་བཀའ་བསྒོས་དམ་ཚིག་ལྟར། །དྲན་པར་གྱིས་ལ་མྱུར་དུ་གཤེགས་སུ་གསོལ། །ཨོཾ་ཧྲཱིཿབཛྲ་ཌཱ་ཀི་ནཱི་དྷརྨ་དཱི་པ་སརྦ་ས་མ་ཡ་ཛ་ཛཿཨེ་ཨཱ་རལླི་ཧྲཱིཾ་ཧྲཱིཾ་ཕཻཾ་ཕཻཾ། ཞེས་པས་སྤྱན་དྲངས། ཛཿཧཱུྃ་བྃ་ཧོཿས་དབྱེར་མེད་བསྟིམ། ཧཱུྃ། མཛེས་པའི་སྤུ་སྡུག་བཻཌཱུར་སྔོན་པོའི་མདོག །གོམ་སྟབས་བསྐྱོད་པའི་རླུང་གིས་སྟོང་གསུམ་བསྐོར། །ཡིད་འོང་རྟ་མཆོག་རིན་ཆེན་རྒྱན་ལྡན་སྟེང་། །དགྱེས་པར་བཞུགས་ལ་ཕྲིན་ལས་མཛད་དུ་གསོལ། །ས་མ་ཡ་ཏིཥྛ་ལྷན། དེ་ནས་མཆོད་གཏོར་འབུལ་བ་ནི། ཧཱུྃ་བྷྱོཿདངོས་སུ་འབྱོར་དང་ཡིད་ལས་བྱུང་བ་ཡི། །མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་རོལ་མོའི་སྒྲ། །བཀྲ་ཤིས་རྫས་རྟགས་རིན་ཆེན་རྣམ་པ་བདུན། །ཡིད་འོང་གཟུགས་དང་པི་ཝཾ་སྙན་པའི་སྒྲ། །སྦྱར་དང་ལྷན་སྐྱེས་དྲི་དང་རོ་ལྡན་ཟས། །འཇམ་མཉེན་རིག་བྱའི་ཚོགས་ནི་སྤྲིན་ལྟར་གཏིབས། །ཉོན་མོངས་གདུང་བ་སེལ་བའི་བདུད་རྩི་དང་། །འདོད་ཆགས་རྣམ་དག་མ་ཧཱ་རུ་དྷི་ར། །གསང་བའི་དམ་རྫས་བ་ལིང་ཆེན་པོ་ཡིས། །གསོལ་ལོ་མཆོད་དོ་དགྱེས་པར་བཞུགས་སུ་གསོལ། །ཨོཾ་ཧྲཱིཿཤྲཱི་བཛྲ་དྷརྨ་དཱི་པ་ས་པ་རི་ཝཱ་ར་ཨོཾ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། ནས་ཤབྡའི་བར་དང་། དེ་བཞིན་དུ་སྦྱར་ཏེ། རཱུ་པ་ནས་སྤཪྴེའི་བར་དང་། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་བ་ལིང་ཏ་ཁཱ་ཧི། ཞེས་པ་རྣམས་ཀྱིས་མཆོད། གཙོ་མོའི་ལྗགས་རྡོ་རྗེའི་སྦུ་གུ་ལས་བྱུང་བའི་འོད་ཀྱིས་གཏོར་མའི་བཅུད་དྲངས་ཏེ་གསོལ་བར་གྱུར། ཐོད་རྒྱ་དང་བཅས། ཨོཾ་ཧྲཱིཿཤྲཱི་བཛྲ་ཌཱ་ཀཱ་ཌཱ་ཀི་ནཱི་མ་ཧཱ་སུ་ཁ་དྷརྨ་དཱི་པ་ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ལན་བདུན་གྱིས་འབུལ། འཁོར་རྣམས་ལ། ཨ་ཀཱ་རོ་ལན་ལྔའམ་གསུམ་གྱིས་བསྔོ། དཔལ་ལྡན་ཌཱ་ཀིའི་གཙོ་མོ། །དམ་ཚིག་ཅན་གྱི་སྲུང་མ། དམ་ཉམས་རྣམས་ཀྱི་གཤེད་མ། མ་མོ་མཁའ་འགྲོ་བྱེ་བའི་སྡེ་དཔོན། སྣང་སྲིད་ཀུན་གྱི་བདག་མོ་ཆེན་མོ། བདེ་ཆེན་ཆོས་ཀྱི་སྒྲོན་མ་འཁོར་དང་བཅས་པ་རྣམས་ལ་གསོལ་ལོ། །འབུལ་ལོ། །མཆོད་དོ། །སྡང་བར་བྱེད་པའི་དགྲ་སོད། །གནོད་པ་བྱེད་པའི་བགེགས་ཐུལ། །བར་དུ་གཅོད་པའི་རྐྱེན་ཟློགདགྱེས་པའི་ཞལ་སྟོན། སྒྲུབ་པའི་རྟགས་ཕྱུངས། ཕྲིན་ལས་མངོན་དུ་གྱིས། བཀའ་དང་བསྟན་པ་སྲུངས། འཁོར་དང་གང་ཟག་སྐྱོངས། དཔལ་དང་གྲགས་པ་སྒྲུབས། ཅི་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པའི་ཕྲིན་ལས་མ་ལུས་པ་མཛད་དུ་གསོལ། བཟླས་པ་བྱ་བ་ནི། གོང་ནོན་ཡི་དམ་གྱི་བསྙེན་པ་ཅུང་ཟད་བཟླས་ནས། སྲུང་མའི་ཐུགས་ཀའི་ཧྲཱིཿཡིག་ལས་སྲོག་སྔགས་ནར་གྱིས་བྱུང་ནས་རང་ཡི་དམ་དུ་གསལ་བའི་ཐུགས་སྲོག་ལ་ཐིམ་པས་དབང་དུ་འདུས་པར་བསམ་ལ། ཨོཾ་ཧྲཱིཿབཛྲ་ཌཱ་ཀ་ཌཱ་ཀི་ནཱི་མ་ཧཱ་སུ་ཁ་དྷརྨ་དཱི་པ་ཤཱནྟིཾ་པུཥྚིཾ་ཝཱ་ཤཾ་མཱ་ར་ཡ་སརྦ་སིདྡྷི་ཧཱུྃ་ཧོཿཕཊ་སྭཱ་ཧཱ། ཞེས་ཅི་ནུས་བཟླས་མཐར། སྔགས་ཙམ་གྱིས་མཆོད། བསྟོད་པ་བྱ་བ་ནི། བྷྱོ། དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ། མ་གཅིག་ཌཱ་ཀིའི་གཙོ་མོ་དཔལ་ལྡན་མ། །དབྱིངས་ཕྱུག་བདེ་ཆེན་ཆོས་ཀྱི་སྒྲོན་མ་ནི། །སྣང་སྲིད་མ་མོ་ཡོངས་ཀྱི་འཁོར་ལོས་སྒྱུར། །འཇིག་རྟེན་ལེགས་ཉེས་ཀུན་གྱི་སྟོང་འཛིན་མ། །དཔལ་ལྡན་ཧེ་རུ་ཀ་ཡི་ཡུམ་ཆེན་མོ། །རིག་འཛིན་གྲུབ་ཐོབ་ཡོངས་ཀྱི་གསང་བའི་གྲོགས། །བདེ་ཆེན་རྡོ་རྗེ་མཁའ་འགྲོ་ཁྱོད་ལ་བསྟོད། ཁྱེད་ཀྱི་རྣམ་འཕྲུལ་མི་ཟད་མཐའ་ཡས་ཤིང་། །སྲིད་ཞི་ཀུན་ལ་ཁྱབ་པའི་ཕྱག་ཆེན་མོ། །དུས་བཞི་འབྱུང་བ་ལྔ་ཡི་བདག་མོ་ཁྱོད། །རེས་འགའ་གངས་རིའི་ཕུང་པོ་ལྟར་དཀར་ལ། །བཅུ་དྲུག་ལང་ཚོ་མཛེས་པའི་གཟི་འོད་འབར། །མདའ་དར་དང་ནི་ཚེ་ཡི་བུམ་བཟང་འཛིན། །སྒྲུབ་པ་པོ་ལ་འཆི་མེད་དངོས་གྲུབ་སྩོལ། །རེས་འགའ་གསེར་གྱི་འོད་ལྟར་འཚེར་བ་ཡི། །ཕྱག་ན་ནོར་བུ་དང་ནི་ཐོད་པ་འཛིན། །འབྲོང་ཆེན་རྔམས་པ་བརྗིད་པའི་སྟེང་ན་འགྱིང་། །བསོད་ནམས་འདོད་དགུའི་སྤྲིན་ཆེན་རྒྱས་པར་བྱེད། །དབང་གི་ལས་མཛད་པདྨ་རཱ་གའི་མདངས། །ལྕགས་ཀྱུ་ཐོད་པ་འཛིན་ཅིང་རྟ་དམར་ཆིབས། །སྣང་སྲིད་འོད་དམར་དབང་གི་ལྕགས་ཀྱུས་སྡུད། །ཟངས་གྲི་དང་ནི་འགུགས་བྱེད་རྣོན་པོ་བསྣམས། །མཁའ་ལྡིང་ལ་ཆིབས་མྱུར་བའི་ཤུགས་འཆང་བས། །བརྟན་གཡོ་ཐམས་ཅད་འདར་ཞིང་འགུགས་པར་བྱེད། །རེས་འགའ་མི་བཟད་ཁྲོ་གཏུམ་རྔམས་པའི་གཟུགས། །མཐིང་ནག་རལ་གྲི་དང་ནི་ཐོད་པ་བསྣམས། །དགྲ་བགེགས་སྙིང་རློན་ཞལ་དུ་གསོལ་ཞིང་རྔུབས། །དུར་ཁྲོད་ཆས་བརྒྱད་བོང་བུ་དམར་གྭ་ཆིབས། །ཤ་ཟ་ལས་ཀྱི་མཁའ་འགྲོ་ཆེན་མོ་ནི། །དཔལ་ལྡན་འདོད་པའི་ཁམས་ལ་དབང་བསྒྱུར་མ། །ཝ་མ་བི་དང་རླུང་ནག་འཚུབས་མར་རོལ། །ནད་དང་རིམས་གྱི་བདག་མོ་ཆེན་མོ་མཛད། །རབ་འཇིགས་བསྐལ་པའི་ཤུགས་འཆང་ཁྱེད་ལ་བསྟོད། །གཞན་ཡང་སྤྲུལ་པའི་ཕྱག་བརྙན་ཆེན་མོ་ནི། །གསོད་བྱེད་ཟ་བྱེད་འཕྲོག་བྱེད་མ་མོ་ཆེ། །དམར་དང་ལྗང་མོ་ལེ་རྒན་མདོག་ཅན་རྣམས། །ལྕགས་ཀྱུ་ནད་རྐྱལ་ཐོགས་ཤིང་མི་ལྤགས་གྱོན། །ཧ་ཧ་ཧི་ཧིའི་གད་མོ་སྒྲ་སྒྲོགས་ཤིང་། གདུག་པའི་སྲོག་རྩ་གཅོད་ཅིང་ཚེ་སྲོག་བསྟབས། །དགྲ་བགེགས་ཤ་ཁྲག་རུས་པ་སྤར་གྱིས་འདེབས། །དམ་ཉམས་གདུག་ཅན་རྩད་ནས་བརླག་བྱེད་མ། །ཕྲིན་ལས་དྲག་མོ་ཆེན་མོ་ཁྱེད་ལ་བསྟོད། །དེ་ལྟར་བསྟོད་པས་བདག་ཅག་དཔོན་སློབ་ཀྱི། །འགལ་རྐྱེན་ཀུན་ཞི་ཚེ་བསོད་དཔལ་འབྱོར་རྒྱས། །སྣང་སེམས་དབང་སྡུད་དྲག་པོའི་ཕྲིན་ལས་རྣམས། །འབད་མེད་མྱུར་བ་ཉིད་དུ་གྲུབ་པར་མཛོད། །ཅེས་བསྟོད་པར་བགྱིའོ། །གསུམ་པ་བསྐང་བཤགས་བྱ་ཞིང་ཕྲིན་ལས་བཅོལ་བ་ནི། བསྐང་རྫས་རྣམས། ཨ་མྲྀ་ཏས་བསངས། སྭ་བྷ་ཝས་སྦྱངས། བསྐང་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཞུ་བ་ལས་བྱུང་བའི་ཕྱི་ནང་གསང་བའི་བསྐང་རྫས་ནམ་མཁའ་མཛོད་ཀྱི་འཁོར་ལོའི་སྤྲིན་ཆེན་པོར་གྱུར། ཨོཾ་སརྦ་བིད་པུ་ར་པུ་ར་སུ་ར་སུ་ར་ཨཱ་བརྟ་ཡ་ཨཱ་བརྟ་ཡ་ཧོཿཨོཾ་བཛྲ་སྥ་ར་ཎ་ཁཾ། ཞེས་པས་བྱིན་བརླབ། བསྐང་བ་དངོས་ནི། ཧཱུྃ་བྷྱོ། རྡོ་རྗེ་མཁའ་འགྲོ་འབུམ་གྱི་གཙོ། །དཔལ་ལྡན་ལྷ་མོ་ཆེན་མོ་ནི། །དབྱིངས་ཕྱུག་ཆོས་ཀྱི་སྒྲོན་མ་ཞེས། །མིང་བརྒྱ་མ་ལ་མཚན་སྟོང་མ། །མཆོད་པའི་གནས་འདིར་སྤྱན་འདྲེན་གཤེགས། །ཁྱེད་ལ་མཆོད་པ་འབུལ་བ་ནི། །ཉེར་སྤྱོད་ལྔ་དང་རིན་ཆེན་བདུན། །འདོད་ཡོན་ལྔ་དང་རྫས་རྟགས་སོགས། །བཀྲ་ཤིས་དཔལ་གྱི་རྫས་རྣམས་དང་། །གླིང་བཞི་རི་རབ་ཉི་ཟླ་དང་། །བུམ་བཟང་དཔག་བསམ་མ་རྨོས་འབྲུ། །འདོད་འཇོའི་བ་དང་གླང་ཆེན་སོགས། །འདོད་པའི་ཁམས་ལ་ཅི་མཆིས་པའི། །མཐུན་པའི་རྫས་ཀྱིས་ཐུགས་དམ་བསྐང་། །རིན་པོ་ཆེ་དང་རུས་པའི་རྒྱན། །དར་ཆེན་ན་བཟའ་ལྷབ་ལྷུབ་ནི། །དཀར་སེར་དམར་དང་ལྗང་བའི་མདོག །དབང་པོའི་གཞུ་ལྟར་བཀྲ་བའི་གོས། །མྱུར་མགྱོགས་རྩལ་འཆང་ཤུགས་ལྡན་རྟ། །རི་ལྟར་འགྱིང་བའི་འགྲོས་ཆེན་དང་། །མགྲིན་བཟང་དམར་གྭ་གློག་ལྟར་མྱུར། །སྟོང་གསུམ་འགྲོ་བའི་རྩལ་ལྡན་དང་། །གནག་ལུག་མ་ཧེ་གླང་པོ་ཆེ། །ཙཱ་ར་ལུག་དང་ཟ་ལེ་འབྲི། །མཁའ་ལྡིང་ལྕགས་ཀྱི་མཆུ་སྡེར་ཅན། །སེང་གེ་སྟག་གཟིག་དོམ་དྲེད་དང་། །ལྕེ་སྤྱང་རི་དྭགས་ཚོགས་ཆེན་པོས། །ལྷ་མོ་འཁོར་བཅས་ཐུགས་དམ་བསྐང་། །ཅང་ཏེའུ་ཐོད་ཁྲག་ནོར་བུ་དང་། །ནེའུ་རྐྱལ་ཟངས་གྲི་ལྕགས་ཀྱུ་རྔམས། །མདའ་དར་མེ་ལོང་ཚེ་བུམ་བཟང་། །རལ་གྲི་ཁྲམ་ཤིང་ནད་རྐྱལ་དང་། །མཚོན་གྱི་གྲུ་གུ་ལ་སོགས་པས། །ལྷ་མོ་འཁོར་བཅས་ཐུགས་དམ་བསྐང་། ལུག་ནག་སྙིང་དང་སྲོག་འཁོར་དང་། །སྐུ་འབགས་བྷནྡྷ་མཚན་ཉིད་ལྡན། །ཤིང་ལོ་ས་ལ་མ་ལྷུང་དང་། །མི་དབང་ཤ་དང་མཚལ་གྱི་འབྲས། །རྨ་བྱ་སེང་གེའི་རྒྱལ་མཚན་དང་། །གཡང་གཞི་རེ་སྡེ་གཡུ་དྲིལ་སོགས། །བརྟེན་པའི་རྫས་ཀྱིས་ཐུགས་དམ་བསྐང་། །སྨན་ཕུད་བདུད་རྩི་མཚོ་ལྟར་འཁྱིལ། །རཀྟ་འཁྲུགས་པའི་སྦུ་ཕྲེང་གཡོ། །དཀར་དམར་གཏོར་མ་རི་ལྟར་སྤུངས། །ཇ་ཆང་ཁྲག་སྐྱེམས་མཚོ་ལྟར་འཁྱིལ། །ཞི་དྲག་བདུག་སྤོས་སྤྲིན་ལྟར་གཏིབས། །གཡབ་དར་སྣ་ཚོགས་འབོད་བའི་རྫས། །ཐོད་རྔ་རྐང་གླིང་རོལ་མོ་སོགས། །མཆོད་རྫས་སྒྲུབ་རྫས་དཔག་མེད་ཀྱིས། །ལྷ་མོ་འཁོར་བཅས་ཐུགས་དམ་བསྐང་། །ཕྱི་ལྟར་དཔལ་ལྡན་ལྷ་མོ་ཆེ། །ནང་དུ་ལྟེ་བའི་རྩ་མདུད་འཁྱིལ། །ཐིག་ལེའི་གཟུགས་སུ་རབ་གནས་ཤིང་། །གསང་བ་རང་སེམས་དེ་ཁོ་ན། །ལྷ་མོར་ཤེས་པས་ཐུགས་དམ་བསྐང་། །ཨེ་ཝཾ་ཐབས་ཤེས་སྦྱོར་བ་ཡི། །མཁའ་ཁམས་རོལ་པའི་འབར་འཛག་གིས། །ཟག་མེད་རང་བྱུང་བླ་ན་མེད། །བདེ་ཆེན་མཆོད་པས་ཐུགས་དམ་བསྐང་། །དེ་ལྟར་བསྐང་བསྐང་གསོལ་གསོལ་ནས། །རྣལ་འབྱོར་བདག་ཅག་དཔོན་སློབ་ཀྱི། །མི་ཤེས་ཉོན་མོངས་གཏི་མུག་པས། །བཅས་དང་རང་བཞིན་སྡིག་པའི་ལས། །ཁྱོད་ཐུགས་འགལ་བ་མཐོལ་ལོ་བཤགས། །བྱང་ཆུབ་སེམས་དང་བླ་མ་སྤངས། །སྔགས་དང་ཕྱག་རྒྱ་རྒྱུན་ཆད་ཅིང་། །ཡང་དག་དོན་ལས་འགལ་བ་ཡིས། །ལྷ་མོ་འཁྲུགས་པ་མཐོལ་ལོ་བཤགས། །དུས་ཀྱི་མཆོད་པ་ཆག་པ་དང་། །ཕྱི་ནང་གསང་བའི་རྟེན་མ་འཛོམས། །བསྙེན་སྒྲུབ་གཡེལ་ཞིང་བག་མེད་སྤྱོད། །འགལ་འཁྲུལ་ནོངས་པ་ཅི་མཆིས་པ། །ལྷ་མོ་ཁྱོད་ལ་བཤགས་པར་བགྱི། །ཁྱོད་ཀྱི་རང་བཞིན་རྣམ་པར་དག །ས་བརྒྱད་སེམས་མ་ཆེན་མོ་ལ། །ཁྲོ་བའི་རྣམ་རྟོག་མི་མངའ་ཡང་། །བདག་ཅག་ཉེས་པར་སྤྱོད་པའི་མཐུས། །ཁྲོས་པའི་སྐུར་སྣང་ལྷ་མོ་ལ། །སྙིང་ནས་གདུང་བས་བཤགས་པར་བགྱི། །མཐོལ་བཤགས་བཟོད་བཞེས་ཚངས་པར་གསོལ། །ཞེས་དང་ཡིག་བརྒྱ་ཅི་ནུས་བཟླས་པས་བཤགས་པ་བཅས་ཚར་གྲངས་བསོག་ནས་བར་འདིར། རྗེ་བླ་མ་མཁྱེན་བརྩེའི་དབང་པོས་མཛད་པའི་གསོལ་བསྡུས་བྱའོ། །འདོད་དོན་གསོལ་ཞིང་ཕྲིན་ལས་བཅོལ་བ་ནི། ཧཱུྃ་བྷྱོཿབདེ་ཆེན་ངང་ལས་སྙིང་རྗེའི་སྐུར་བཞེངས་ནས། །སྣང་སྲིད་མ་མོ་བྱེ་བའི་སྡེ་དཔོན་ཆེ། །དཔལ་ལྡན་མཁའ་འགྲོ་ཆེན་མོ་འཁོར་བཅས་ཀྱིས། །དགྱེས་པའི་མཆོད་གཏོར་དམ་རྫས་འདི་བཞེས་ལ། བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །ནད་གདོན་བགེགས་དང་དུས་མིན་འཆི་བ་དང་། །འཇིགས་པ་ཆེན་པོ་བརྒྱད་དང་བཅུ་དྲུག་སོགས། །མི་མཐུན་ཕྱོགས་ཀུན་ཞི་བར་མཛད་དུ་གསོལ། །མཐུན་རྐྱེན་དཔག་བསམ་རྒྱས་པའི་སྤྲིན་ཆེན་ལས། །འདོད་དགུ་འབྱོར་བའི་གྲུ་ཆར་ཟད་མི་ཤེས། །ཕུན་ཚོགས་དབྱིག་གིས་གང་བའི་ནོར་བུ་དང་། །རིང་འཚོའི་དཔལ་ཡོན་རྒྱས་པའི་ཕྲིན་ལས་མཛོད། །གསེར་འགྱུར་རྩི་ཡིས་རེག་པ་ཇི་བཞིན་དུ། །ཁྱོད་ཉིད་དྲན་པ་དེ་ཡི་མོད་ཉིད་ལ། །བརྟན་གཡོའི་དངོས་ཀུན་རྗེས་ཆགས་འོད་ཀྱིས་བཅིངས། །ཕུན་ཚོགས་དཔལ་ཀུན་དབང་དུ་བསྡུ་བར་མཛོད། །དཀར་པོའི་ཕྱོགས་ལ་སྡང་བའི་སེམས་ལྡན་རྣམས། །དྲག་མོའི་མི་བཟད་རྡོ་རྗེའི་ཐོག་ཆར་གྱིས། །ཐལ་བ་ཇི་བཞིན་ཕྱེ་མར་འཐག་མཛད་དེ། །རྣམ་ཤེས་རྡོ་རྗེ་བཙུན་མོའི་མཁར་བསྟིམ་མཛོད། །བདག་ལུས་གདན་གསུམ་ཚང་བའི་དཀྱིལ་འཁོར་ཆེར། །ཁྱོད་སྐུ་རྗེས་ཆགས་སྒྱུ་མའི་རོལ་རྩེད་ཀྱིས། །དགའ་བཞིའི་ཐིག་འདྲེན་དབབ་བཟློག་གྲུབ་པའི་མཐར། །གཙུག་ཏོར་རྩེར་བཅིང་མཆོག་དངོས་གྲུབ་པར་མཛོད། །འཇིག་རྟེན་ཁམས་ཀྱི་ཕན་བདེའི་འབྱུང་གནས་ཆེ། །རྒྱལ་བའི་བསྟན་པ་རིང་དུ་གནས་པ་དང་། །དེ་འཛིན་བྱེད་རྣམས་སྐུ་ཚེ་རབ་བརྟན་ཞིང་། །སྙན་གྲགས་དབྱར་རྔ་ཕྱོགས་བརྒྱར་གྲགས་པ་དང་། །རིག་གྲོལ་གཉིས་ལྡན་འདུས་པའི་སྡེ་ཚོགས་རྣམས། །བསླབ་ཁྲིམས་ལ་གནས་སྤོང་ཀློག་བྱ་བར་བརྩོན། །བསྟན་པའི་སྦྱིན་བདག་ཆོས་སྐྱོང་རྒྱལ་པོ་རྣམས། །ཆབ་སྲིད་དཔལ་འབྱོར་རྒྱས་པའི་ཕྲིན་ལས་མཛོད། །ཁྱད་པར་སྡེ་བཞི་དགེ་བཅུའི་དབུ་རྨོག་བཙན། །ཆོས་སྐྱོང་རྒྱལ་པོ་རིགས་རྒྱུད་བཅས་སྲུང་ཤིང་། །གཞན་སྡེའི་འཇུག་པ་ཐམས་ཅད་ཟིལ་གནོན་ཏེ། །རང་སྲིད་དབང་དུ་འདུས་པའི་ཕྲིན་ལས་མཛོད། །རྡོ་རྗེ་འཆང་དངོས་རྩ་བརྒྱུད་བླ་མ་དང་། །ཁྱད་པར་འཇིག་རྟེན་གསུམ་གྱི་མགོན་པོ་ཡི། །སྤྱན་སྔར་ཞལ་བཞེས་ཐ་ཚིག་མ་གཡེལ་བར། །ཇི་ལྟར་བཅོལ་པའི་ལས་རྣམས་འགྲུབ་པར་མཛོད། །འཇིག་རྟེན་བདེ་ཞིང་ལོ་ཕྱུགས་རྟག་ཏུ་ལེགས། །ནད་ཡམས་དུས་ཀྱི་འཁྲུགས་པ་རྒྱུན་ཆད་ནས། །རབ་འཕེལ་རྫོགས་ལྡན་དཔལ་གྱི་འབྱོར་པ་ལ། །ཅི་དགར་སྤྱོད་པའི་ཕྲིན་ལས་མཛད་དུ་གསོལ། །བདག་ཅག་ཚེ་ཡི་རྒྱུན་བཟང་བརྟན་པ་དང་། །འདུ་བ་གསུམ་དང་འབར་བ་གསུམ་ལ་སྤྱོད། །ཕྲིན་ལས་རྣམ་བཞི་འབད་མེད་འབྱུང་བ་དང་། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། བཞི་པ་གཏོར་མ་སྟབས་ཤིང་རྗེས་ཀྱི་བྱ་བ་ནི་ཐུན་གཏོར་ལ་བདུད་རྩི་བྲན། ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབས། །བྷྱོ། མ་གཡེལ་མ་གཡེལ་དཔལ་ལྡན་ཆོས་ཀྱི་སྒྲོན། །གནས་ཡུལ་དུར་ཁྲོད་གར་བཞུགས་གནས་རྣམས་དང་། །ཁྱད་པར་འབྲི་གུང་གསེར་ཁང་ཆེན་པོ་དང་། །དབུ་སྟོད་ལ་ཕྱི་པུ་རོང་ལ་སོགས་ནས། །འདི་གཤེགས་རྒྱན་གྱི་གཏོར་མ་འདིར་བཞེས་ཤིག །སྨན་རག་ཕུད་ཀྱི་མཆོད་པ་འདི་བཞེས་ཤིག །ཁྲག་རྒོད་གསེར་སྐྱེམས་བཏུང་བ་འདི་བཞེས་ཤིག །སྔར་བཅོལ་ལེགས་པའི་གཏོང་རག་ཆེན་པོ་འབུལ། །ད་བཅོལ་ལས་ཀྱི་གསོལ་འདེབས་གཉེན་པོ་བཞེས། །སྡང་དགྲ་གནོད་བྱེད་བདུད་སྡེ་གཞོམ་པར་གྱིས། །བསྟན་པ་རྒྱས་པའི་ལས་འདི་མྱུར་དུ་སྒྲུབས། །རྣལ་འབྱོར་བཅོལ་པའི་ཕྲིན་ལས་འགྲུབ་པར་མཛོད། །ཅེས་བརྗོད་ལ་གོང་གི་གཏོར་སྔགས་ལན་གསུམ་དང་། དཔལ་ལྡན་ཌཱ་ཀིའི་གཙོ་མོ་སོགས་གོང་ལྟར་གྱི་ཕྲིན་ལས་བཅོལ། །ཕུད་གཙང་སར་གཤེགས། རྗེས་ལ་སྔགས་ཙམ་གྱིས་མཆོད། བསྟོད་པ་ནི། བྷྱོ། བདེ་ཆེན་རྡོ་རྗེ་བཙུན་མོའི་རྣམ་པར་འཕྲུལ། །འཇིག་རྟེན་སྐྱོང་མཛད་རྡོ་རྗེ་མཁའ་འགྲོ་ཆེ། །གཙོ་འཁོར་སྤྲུལ་པར་བཅས་པ་ཐམས་ཅད་ལ། །མཆོག་ཏུ་དྭངས་བའི་སེམས་ཀྱིས་བསྟོད་པར་བགྱི། །ཞེས་པས་བསྟོད། མ་རྙེད་ཡོངས་སུ་མ་ཚང་དང་། །སོགས་དང་ཡིག་བརྒྱ་ལན་གསུམ་གྱིས་བཤགས་གསོལ་བྱ། རྟེན་ཡོད་ན། འདིར་ནི་རྟེན་དང་སོགས་ཀྱིས་བརྟན་བཞུགས་དང་། མེད་ན། ཨོཾ་བཛྲ་མུཿགཏོར་མགྲོན་རྣམས་རང་གནས་སུ་གཤེགས་པར་གྱུར། །དགེ་བ་འདི་ཡིས་མཐའ་ཡས་འགྲོ་བ་རྣམས། །འཇིགས་རུང་བདུད་སྡེའི་གཡུལ་ལས་རྣམ་རྒྱལ་ནས། །ཕྲིན་ལས་རྣམ་བཞི་ལྷུན་གྱིས་གྲུབ་པ་དང་། །དངོས་གྲུབ་རྒྱ་མཚོའི་དགའ་སྟོན་རོལ་པར་ཤོག །ཤིས་བརྗོད་ནི། བླ་མ་ཧེ་རུ་ཀ་དཔལ་རྡོ་རྗེ་འཆང་། །དཀྱིལ་འཁོར་རྒྱ་མཚོའི་བདག་པོར་ཤར་བ་ཡི། །བྱིན་རླབས་བཀྲ་ཤིས་རྒྱ་མཚོའི་ཆར་སྤྲིན་དེས། །སྲིད་ཞི་ཀུན་ན་རྟག་ཏུ་བདེ་ལེགས་ཤོག །དངོས་གྲུབ་དེད་དཔོན་ཡི་དམ་ཞི་དང་ཁྲོ། །ཁྱད་པར་ཁྱབ་བདག་རྡོ་རྗེ་བཙུན་མོ་དང་། །གནས་ཡུལ་དཔའ་བོ་མཁའ་འགྲོའི་ཚོགས་རྣམས་ཀྱིས། །འཇིག་རྟེན་ཁམས་སུ་བཀྲ་ཤིས་དགེ་ལེགས་སྩོལ། །རྒྱུད་གསུམ་དམ་ཅན་རྒྱ་མཚོའི་ཚོགས་རྣམས་དང་། །ཞིང་སྐྱོང་སྲུང་མ་ཌཱ་ཀི་ཆོས་སྒྲོན་མ། །གཙོ་མོ་འཁོར་དང་སྤྲུལ་པར་བཅས་པ་ཡིས། །རྟག་ཏུ་སྲུང་སྐྱོབ་མི་གཡེལ་བཀྲ་ཤིས་ཤོག །ཅེས་བརྗོད་པས་དགེ་ལེགས་སུ་བྱའོ། །བསྟན་སྲུང་ལྷ་མོའི་མཆོད་ཕྲེང་གི །རིམ་པ་གསལ་བར་བཀོད་པ་ཡི། །ལེགས་བྱས་སྣང་བས་ས་གསུམ་ཁྱབ། །དོན་གཉིས་ལྷུན་གྱིས་གྲུབ་པར་ཤོག །ཅེས་པའང་ལྕགས་ར་བསམ་འགྲུབ་རྩེ་དང་སྡེ་དགེའི་དངུལ་གདུང་ཁང་ལ་སོགས་ལ་ལྷ་མོ་འདི་ཉིད་ཀྱི་གསོལ་མཆོད་དགོས་པ་ལ་བརྟེན། ལྕགས་ར་དབུ་མཛད་འཇམ་དབྱངས་ཉི་མ་དང་། འཚོ་བྱེད་ཆེན་པོ་བླ་མ་ཨ་ཚང་ནས་ཀྱང་གསུང་བསྐུལ་གྱིས་རྐྱེན་བྱས་རང་ཉིད་ཀྱང་སྤྲོ་བས་མཚམས་སྦྱར་ཏེ་འཇམ་དབྱངས་ཆོས་ཀྱི་བློ་གྲོས་པས། ཆུ་བྱ་མགོ་ཟླ་བའི་ཚེས་ལྔ་བཟང་པོར་བཀྲ་ཤིས་འཆི་མེད་གྲུབ་པའི་དགའ་ཚལ་དུ་སྨྲས་རིམ་བཞིན་ཡི་གེའི་བྱེད་པོ་རིག་གནས་ཀུན་ལ་སྤོབས་པ་དགེ་བ་ཅན་དགེ་སློང་འཇམ་དབྱངས་བློ་གྲོས་འཕེལ་རྒྱས་ནས་བགྱིས་པ་འདིས་ཀྱང་སྲུང་མ་ཆེན་མོ་དགྱེས་པའི་མཆོད་སྤྲིན་ཆེན་པོར་གྱུར་ཏེ་ཕྲིན་ལས་རྣམ་པ་བཞི་འབད་མེད་དུ་འགྲུབ་པའི་རྒྱུར་གྱུར་ཅིག །སརྦ་མངྒ་ལཾ།། །།

[edit]

@#/__/'bri gung a phyi rdo rje chos sgron gyi gsol mchod phrin las char 'bebs bzhugs so/__/ oM swa sti/__/bde stong nyams brgyas sgeg pa'i sku/__/dmar ser li khri'i mdangs 'od can/__/bla ma rdo rje rnal 'byor mar/__mi phyed gus pa'i phyag gis 'dud/__gsang sngags bka' yi srung ma che/__/dbyings phyug DA ki'i gtso mo yi/__/rnam rol bde chen chos sgron gyi/__/thugs dam dgyes bskang 'dir dbye bya/__/de la 'dir gsang sngags rgyud kyi srung ma chen mo dpal ldan rnal 'byor gyi thugs dam chen po rnams kyi grogs mo chos kyi sgron mar gsol mchod bya bar 'dod pas/__gnas gtsang mar/__sku rten sogs bkram pa'i mdun/__yi dam rdo rje rnal 'byor ma'i gtor ma dang /__'di nyid la rin po che'i snod du gtor ma smad zlum po stod zur cung yod par phyogs bzhir pad 'dab dang mtshams bzhir mtheb skyu brtsegs/__rtse la nyi zla nor bu'i rgyan can/__g.yas g.yon du sman phud dang /__rak+ta thun gtor ni dmar gtor bzhi bsgrigs can dang /__dkar mngar dang sha khrag gi bza' bca'/__chang phud gser skyems dang mchod pa rnam lnga sogs gtsang shing mdzes par bshams la/__stan bde ba la 'khod de/__yi dam rnal 'byor ma lta bu mchog tu shis pas de'i bskyed bzlas dang /__mchod gtor 'bul ba sngon du 'gro bas/__'di nyid kyi phrin las dngos la don bzhi ste/__dang po mchod gtor byin gyis brlab pa ni/__oM badz+ra a mr-i ta kuN+Da li ha na ha na hU~M phaT/__kyis bsangs/__swa b+hA was sbyangs/__stong pa'i ngang las rab dkar thod pa'i snod/__/yangs shing rgya cher mchod pa'i yo byad rnams/__/dwangs shing thogs med sa dang bar snang khyab/__/'dod yon 'byung ba'i sprin phung chen por gyur/__/oM AHhU~M/__lan gsum dang nam mkha' mdzod kyi sngags rgya lan gsum gyis byin gyis brlabs/__khyad par du gtor ma byin gyis brlab pa ni/__ra~M ya~M kha~M/__stong pa'i ngang las ya~M ra~M rlung me yi/__/dkyil 'khor steng du kaM las thod sgyed gsum/__/de steng a las thod snod rgya che'i nang /__/sha lnga bdud rtsi lnga yi rang bzhin gyi/__/gtor ma zag med bdud rtsi'i rgya mtshor gyur/__oM AHhU~M ha ho hrIHphyag rgya dang bcas lan gsum brjod/__gnyis pa dam tshig pa bskyed cing spyan drangs/__mchod bstod 'bul ba ni/__swa b+hA was sbyangs/__phyi nang chos kun stong pa'i ngang nyid las/__/sa phyogs dag cing gtsang ma'i zhing khams su/__/yangs shing rgya che'i bkod pa phun tshogs nang /__/rta mchog sngon po sprin gyi shugs 'chang steng /__/zab chen stan dang gser sga g.yu mthur sogs/__/rin chen rnam mang rgyan chas spras pa'i steng /__/'dod dgu'i mchog stsol sgrub po'i re skong ma/__/dbyings phyug dpal ldan chos kyi sgron ma ni/__/sku mdog zla ba gsar pa'i lang tsho la/__/rgya skyegs thig les mdzes pa'i mdangs ldan ma/__/zhi 'dzum cung zad khro ba'i nyams dang ldan/__/gnag snum ral pa'i thor tshugs spyi bor bcings/__/lhag ma sku rgyab kheb par grol ba yi/__/sku la lha rdzas bzang po'i gos kyis klubs/__/dbu la dung thod rin chen 'od 'phro ba'i/__/mdzes pa'i rgyan cha ma mo'i rnam par spras/__/dar sna lnga yi cod pan rab tu 'phur/__/phyag g.yas gser gyi cang te'u khro lo lo/__/'khrol bas ma mo mkha' 'gro dbang du sdud/__/g.yon pas thod pa khrag bkang zhal du gsol/__/gdug pa'i dgra bgegs ma lus tshar gcod cing /__/drag shul rol pa'i stabs kyis 'gying bar byed/__/dbang sdud rtsal dang drag po'i mthu ldan ma/__/bka' nyan bran g.yog 'bum phrag 'khor gyis bskor/__/gnas gsum 'bru gsum thugs srog hrIHyis mtshan/__/'od 'phros gar bzhugs gnas nas spyan drangs gyur/__/mi rkang gi gling bu thod rnga sogs rol mo'i sgra sna tshogs dang /__spos kyi dud sprin 'thul ba dang bcas/__b+h+yo/__ye shes DA ki'i gtso mo dpal ldan ma/__/bde chen chos kyi sgron ma dbyings nas bzhengs/__/dpa' bo DA ki'i 'khor tshogs dang bcas pa/__/kun kyang rus rgyan g.yel kha si li li/__/cang te'u dril bu gser gyi rnga chung gi__/sgra snyan dir dir sgrogs bzhin gnas 'dir byon/__/ma thogs myur du dgyes bzhin rab dgongs la/__/gnas yul zhing skyong dgyes pas rol pa yi/__/dga' ba'i tshal dang dbur stod gser khang dang /__/la phyi pu rong la sogs gnas mchog nas/__/rdo rje 'chang gi bka' bsgos dam tshig ltar/__/dran par gyis la myur du gshegs su gsol/__/oM hrIHbadz+ra DA ki nI d+harma dI pa sarba sa ma ya dza dzaHe A ral+li hrIM hrIM phaiM phaiM/__zhes pas spyan drangs/__dzaHhU~M ba~M hoHsa dbyer med bstim/__hU~M/__mdzes pa'i spu sdug baiDUr sngon po'i mdog__/gom stabs bskyod pa'i rlung gis stong gsum bskor/__/yid 'ong rta mchog rin chen rgyan ldan steng /__/dgyes par bzhugs la phrin las mdzad du gsol/__/sa ma ya tiSh+Tha lhan/__de nas mchod gtor 'bul ba ni/__hU~M b+h+yoHdngos su 'byor dang yid las byung ba yi/__/mchod yon zhabs bsil me tog bdug spos dang /__/mar me dri chab zhal zas rol mo'i sgra/__/bkra shis rdzas rtags rin chen rnam pa bdun/__/yid 'ong gzugs dang pi waM snyan pa'i sgra/__/sbyar dang lhan skyes dri dang ro ldan zas/__/'jam mnyen rig bya'i tshogs ni sprin ltar gtibs/__/nyon mongs gdung ba sel ba'i bdud rtsi dang /__/'dod chags rnam dag ma hA ru d+hi ra/__/gsang ba'i dam rdzas ba ling chen po yis/__/gsol lo mchod do dgyes par bzhugs su gsol/__/oM hrIHshrI badz+ra d+harma dI pa sa pa ri wA ra oM badz+ra ar+g+haM pra tIts+tsha swA hA/__nas shab+da'i bar dang /__de bzhin du sbyar te/__rU pa nas spaR+she'i bar dang /__ma hA pany+tsa a mr-i ta khA hi/__ma hA rak+ta khA hi/__ma hA ba ling ta khA hi/__zhes pa rnams kyis mchod/__gtso mo'i ljags rdo rje'i sbu gu las byung ba'i 'od kyis gtor ma'i bcud drangs te gsol bar gyur/__thod rgya dang bcas/__oM hrIHshrI badz+ra DA kA DA ki nI ma hA su kha d+harma dI pa sa pa ri wA ra i daM ba ling+ta kha kha khA hi khA hi/__lan bdun gyis 'bul/__'khor rnams la/__a kA ro lan lnga'am gsum gyis bsngo/__dpal ldan DA ki'i gtso mo/__/dam tshig can gyi srung ma/__dam nyams rnams kyi gshed ma/__ma mo mkha' 'gro bye ba'i sde dpon/__snang srid kun gyi bdag mo chen mo/__bde chen chos kyi sgron ma 'khor dang bcas pa rnams la gsol lo/__/'bul lo/__/mchod do/__/sdang bar byed pa'i dgra sod/__/gnod pa byed pa'i bgegs thul/__/bar du gcod pa'i rkyen zlogadagyes pa'i zhal ston/__sgrub pa'i rtags phyungs/__phrin las mngon du gyis/__bka' dang bstan pa srungs/__'khor dang gang zag skyongs/__dpal dang grags pa sgrubs/__ci bsam pa'i don thams cad yid bzhin du 'grub pa'i phrin las ma lus pa mdzad du gsol/__bzlas pa bya ba ni/__gong non yi dam gyi bsnyen pa cung zad bzlas nas/__srung ma'i thugs ka'i hrIHyig las srog sngags nar gyis byung nas rang yi dam du gsal ba'i thugs srog la thim pas dbang du 'dus par bsam la/__oM hrIHbadz+ra DA ka DA ki nI ma hA su kha d+harma dI pa shAn+tiM puSh+TiM wA shaM mA ra ya sarba sid+d+hi hU~M hoHphaT swA hA/__zhes ci nus bzlas mthar/__sngags tsam gyis mchod/__bstod pa bya ba ni/__b+h+yo/__dus gsum rgyal ba thams cad bskyed pa'i yum/__ma gcig DA ki'i gtso mo dpal ldan ma/__/dbyings phyug bde chen chos kyi sgron ma ni/__/snang srid ma mo yongs kyi 'khor los sgyur/__/'jig rten legs nyes kun gyi stong 'dzin ma/__/dpal ldan he ru ka yi yum chen mo/__/rig 'dzin grub thob yongs kyi gsang ba'i grogs/__/bde chen rdo rje mkha' 'gro khyod la bstod/__khyed kyi rnam 'phrul mi zad mtha' yas shing /__/srid zhi kun la khyab pa'i phyag chen mo/__/dus bzhi 'byung ba lnga yi bdag mo khyod/__/res 'ga' gangs ri'i phung po ltar dkar la/__/bcu drug lang tsho mdzes pa'i gzi 'od 'bar/__/mda' dar dang ni tshe yi bum bzang 'dzin/__/sgrub pa po la 'chi med dngos grub stsol/__/res 'ga' gser gyi 'od ltar 'tsher ba yi/__/phyag na nor bu dang ni thod pa 'dzin/__/'brong chen rngams pa brjid pa'i steng na 'gying /__/bsod nams 'dod dgu'i sprin chen rgyas par byed/__/dbang gi las mdzad pad+ma rA ga'i mdangs/__/lcags kyu thod pa 'dzin cing rta dmar chibs/__/snang srid 'od dmar dbang gi lcags kyus sdud/__/zangs gri dang ni 'gugs byed rnon po bsnams/__/mkha' lding la chibs myur ba'i shugs 'chang bas/__/brtan g.yo thams cad 'dar zhing 'gugs par byed/__/res 'ga' mi bzad khro gtum rngams pa'i gzugs/__/mthing nag ral gri dang ni thod pa bsnams/__/dgra bgegs snying rlon zhal du gsol zhing rngubs/__/dur khrod chas brgyad bong bu dmar gwa chibs/__/sha za las kyi mkha' 'gro chen mo ni/__/dpal ldan 'dod pa'i khams la dbang bsgyur ma/__/wa ma bi dang rlung nag 'tshubs mar rol/__/nad dang rims gyi bdag mo chen mo mdzad/__/rab 'jigs bskal pa'i shugs 'chang khyed la bstod/__/gzhan yang sprul pa'i phyag brnyan chen mo ni/__/gsod byed za byed 'phrog byed ma mo che/__/dmar dang ljang mo le rgan mdog can rnams/__/lcags kyu nad rkyal thogs shing mi lpags gyon/__/ha ha hi hi'i gad mo sgra sgrogs shing /__gdug pa'i srog rtsa gcod cing tshe srog bstabs/__/dgra bgegs sha khrag rus pa spar gyis 'debs/__/dam nyams gdug can rtsad nas brlag byed ma/__/phrin las drag mo chen mo khyed la bstod/__/de ltar bstod pas bdag cag dpon slob kyi/__/'gal rkyen kun zhi tshe bsod dpal 'byor rgyas/__/snang sems dbang sdud drag po'i phrin las rnams/__/'bad med myur ba nyid du grub par mdzod/__/ces bstod par bgyi'o/__/gsum pa bskang bshags bya zhing phrin las bcol ba ni/__bskang rdzas rnams/__a mr-i tas bsangs/__swa b+ha was sbyangs/__bskang rdzas rnams rang rang gi ming yig dang po thig les brgyan pa zhu ba las byung ba'i phyi nang gsang ba'i bskang rdzas nam mkha' mdzod kyi 'khor lo'i sprin chen por gyur/__oM sarba bid pu ra pu ra su ra su ra A brta ya A brta ya hoHoM badz+ra s+pha ra Na khaM/__zhes pas byin brlab/__bskang ba dngos ni/__hU~M b+h+yo/__rdo rje mkha' 'gro 'bum gyi gtso/__/dpal ldan lha mo chen mo ni/__/dbyings phyug chos kyi sgron ma zhes/__/ming brgya ma la mtshan stong ma/__/mchod pa'i gnas 'dir spyan 'dren gshegs/__/khyed la mchod pa 'bul ba ni/__/nyer spyod lnga dang rin chen bdun/__/'dod yon lnga dang rdzas rtags sogs/__/bkra shis dpal gyi rdzas rnams dang /__/gling bzhi ri rab nyi zla dang /__/bum bzang dpag bsam ma rmos 'bru/__/'dod 'jo'i ba dang glang chen sogs/__/'dod pa'i khams la ci mchis pa'i/__/mthun pa'i rdzas kyis thugs dam bskang /__/rin po che dang rus pa'i rgyan/__/dar chen na bza' lhab lhub ni/__/dkar ser dmar dang ljang ba'i mdog__/dbang po'i gzhu ltar bkra ba'i gos/__/myur mgyogs rtsal 'chang shugs ldan rta/__/ri ltar 'gying ba'i 'gros chen dang /__/mgrin bzang dmar gwa glog ltar myur/__/stong gsum 'gro ba'i rtsal ldan dang /__/gnag lug ma he glang po che/__/tsA ra lug dang za le 'bri/__/mkha' lding lcags kyi mchu sder can/__/seng ge stag gzig dom dred dang /__/lce spyang ri dwags tshogs chen pos/__/lha mo 'khor bcas thugs dam bskang /__/cang te'u thod khrag nor bu dang /__/ne'u rkyal zangs gri lcags kyu rngams/__/mda' dar me long tshe bum bzang /__/ral gri khram shing nad rkyal dang /__/mtshon gyi gru gu la sogs pas/__/lha mo 'khor bcas thugs dam bskang /__lug nag snying dang srog 'khor dang /__/sku 'bags b+han+d+ha mtshan nyid ldan/__/shing lo sa la ma lhung dang /__/mi dbang sha dang mtshal gyi 'bras/__/rma bya seng ge'i rgyal mtshan dang /__/g.yang gzhi re sde g.yu dril sogs/__/brten pa'i rdzas kyis thugs dam bskang /__/sman phud bdud rtsi mtsho ltar 'khyil/__/rak+ta 'khrugs pa'i sbu phreng g.yo/__/dkar dmar gtor ma ri ltar spungs/__/ja chang khrag skyems mtsho ltar 'khyil/__/zhi drag bdug spos sprin ltar gtibs/__/g.yab dar sna tshogs 'bod ba'i rdzas/__/thod rnga rkang gling rol mo sogs/__/mchod rdzas sgrub rdzas dpag med kyis/__/lha mo 'khor bcas thugs dam bskang /__/phyi ltar dpal ldan lha mo che/__/nang du lte ba'i rtsa mdud 'khyil/__/thig le'i gzugs su rab gnas shing /__/gsang ba rang sems de kho na/__/lha mor shes pas thugs dam bskang /__/e waM thabs shes sbyor ba yi/__/mkha' khams rol pa'i 'bar 'dzag gis/__/zag med rang byung bla na med/__/bde chen mchod pas thugs dam bskang /__/de ltar bskang bskang gsol gsol nas/__/rnal 'byor bdag cag dpon slob kyi/__/mi shes nyon mongs gti mug pas/__/bcas dang rang bzhin sdig pa'i las/__/khyod thugs 'gal ba mthol lo bshags/__/byang chub sems dang bla ma spangs/__/sngags dang phyag rgya rgyun chad cing /__/yang dag don las 'gal ba yis/__/lha mo 'khrugs pa mthol lo bshags/__/dus kyi mchod pa chag pa dang /__/phyi nang gsang ba'i rten ma 'dzoms/__/bsnyen sgrub g.yel zhing bag med spyod/__/'gal 'khrul nongs pa ci mchis pa/__/lha mo khyod la bshags par bgyi/__/khyod kyi rang bzhin rnam par dag__/sa brgyad sems ma chen mo la/__/khro ba'i rnam rtog mi mnga' yang /__/bdag cag nyes par spyod pa'i mthus/__/khros pa'i skur snang lha mo la/__/snying nas gdung bas bshags par bgyi/__/mthol bshags bzod bzhes tshangs par gsol/__/zhes dang yig brgya ci nus bzlas pas bshags pa bcas tshar grangs bsog nas bar 'dir/__rje bla ma mkhyen brtse'i dbang pos mdzad pa'i gsol bsdus bya'o/__/'dod don gsol zhing phrin las bcol ba ni/__hU~M b+h+yoHbde chen ngang las snying rje'i skur bzhengs nas/__/snang srid ma mo bye ba'i sde dpon che/__/dpal ldan mkha' 'gro chen mo 'khor bcas kyis/__/dgyes pa'i mchod gtor dam rdzas 'di bzhes la/__bdag cag dpon slob yon mchod 'khor bcas kyi/__/nad gdon bgegs dang dus min 'chi ba dang /__/'jigs pa chen po brgyad dang bcu drug sogs/__/mi mthun phyogs kun zhi bar mdzad du gsol/__/mthun rkyen dpag bsam rgyas pa'i sprin chen las/__/'dod dgu 'byor ba'i gru char zad mi shes/__/phun tshogs dbyig gis gang ba'i nor bu dang /__/ring 'tsho'i dpal yon rgyas pa'i phrin las mdzod/__/gser 'gyur rtsi yis reg pa ji bzhin du/__/khyod nyid dran pa de yi mod nyid la/__/brtan g.yo'i dngos kun rjes chags 'od kyis bcings/__/phun tshogs dpal kun dbang du bsdu bar mdzod/__/dkar po'i phyogs la sdang ba'i sems ldan rnams/__/drag mo'i mi bzad rdo rje'i thog char gyis/__/thal ba ji bzhin phye mar 'thag mdzad de/__/rnam shes rdo rje btsun mo'i mkhar bstim mdzod/__/bdag lus gdan gsum tshang ba'i dkyil 'khor cher/__/khyod sku rjes chags sgyu ma'i rol rtsed kyis/__/dga' bzhi'i thig 'dren dbab bzlog grub pa'i mthar/__/gtsug tor rtser bcing mchog dngos grub par mdzod/__/'jig rten khams kyi phan bde'i 'byung gnas che/__/rgyal ba'i bstan pa ring du gnas pa dang /__/de 'dzin byed rnams sku tshe rab brtan zhing /__/snyan grags dbyar rnga phyogs brgyar grags pa dang /__/rig grol gnyis ldan 'dus pa'i sde tshogs rnams/__/bslab khrims la gnas spong klog bya bar brtson/__/bstan pa'i sbyin bdag chos skyong rgyal po rnams/__/chab srid dpal 'byor rgyas pa'i phrin las mdzod/__/khyad par sde bzhi dge bcu'i dbu rmog btsan/__/chos skyong rgyal po rigs rgyud bcas srung shing /__/gzhan sde'i 'jug pa thams cad zil gnon te/__/rang srid dbang du 'dus pa'i phrin las mdzod/__/rdo rje 'chang dngos rtsa brgyud bla ma dang /__/khyad par 'jig rten gsum gyi mgon po yi/__/spyan sngar zhal bzhes tha tshig ma g.yel bar/__/ji ltar bcol pa'i las rnams 'grub par mdzod/__/'jig rten bde zhing lo phyugs rtag tu legs/__/nad yams dus kyi 'khrugs pa rgyun chad nas/__/rab 'phel rdzogs ldan dpal gyi 'byor pa la/__/ci dgar spyod pa'i phrin las mdzad du gsol/__/bdag cag tshe yi rgyun bzang brtan pa dang /__/'du ba gsum dang 'bar ba gsum la spyod/__/phrin las rnam bzhi 'bad med 'byung ba dang /__/phyogs las rnam par rgyal ba'i phrin las mdzod/__bzhi pa gtor ma stabs shing rjes kyi bya ba ni thun gtor la bdud rtsi bran/__oM AHhU~M ha ho hrIHsa byin gyis brlabs/__/b+h+yo/__ma g.yel ma g.yel dpal ldan chos kyi sgron/__/gnas yul dur khrod gar bzhugs gnas rnams dang /__/khyad par 'bri gung gser khang chen po dang /__/dbu stod la phyi pu rong la sogs nas/__/'di gshegs rgyan gyi gtor ma 'dir bzhes shig__/sman rag phud kyi mchod pa 'di bzhes shig__/khrag rgod gser skyems btung ba 'di bzhes shig__/sngar bcol legs pa'i gtong rag chen po 'bul/__/da bcol las kyi gsol 'debs gnyen po bzhes/__/sdang dgra gnod byed bdud sde gzhom par gyis/__/bstan pa rgyas pa'i las 'di myur du sgrubs/__/rnal 'byor bcol pa'i phrin las 'grub par mdzod/__/ces brjod la gong gi gtor sngags lan gsum dang /__dpal ldan DA ki'i gtso mo sogs gong ltar gyi phrin las bcol/__/phud gtsang sar gshegs/__rjes la sngags tsam gyis mchod/__bstod pa ni/__b+h+yo/__bde chen rdo rje btsun mo'i rnam par 'phrul/__/'jig rten skyong mdzad rdo rje mkha' 'gro che/__/gtso 'khor sprul par bcas pa thams cad la/__/mchog tu dwangs ba'i sems kyis bstod par bgyi/__/zhes pas bstod/__ma rnyed yongs su ma tshang dang /__/sogs dang yig brgya lan gsum gyis bshags gsol bya/__rten yod na/__'dir ni rten dang sogs kyis brtan bzhugs dang /__med na/__oM badz+ra muHgtor mgron rnams rang gnas su gshegs par gyur/__/dge ba 'di yis mtha' yas 'gro ba rnams/__/'jigs rung bdud sde'i g.yul las rnam rgyal nas/__/phrin las rnam bzhi lhun gyis grub pa dang /__/dngos grub rgya mtsho'i dga' ston rol par shog__/shis brjod ni/__bla ma he ru ka dpal rdo rje 'chang /__/dkyil 'khor rgya mtsho'i bdag por shar ba yi/__/byin rlabs bkra shis rgya mtsho'i char sprin des/__/srid zhi kun na rtag tu bde legs shog__/dngos grub ded dpon yi dam zhi dang khro/__/khyad par khyab bdag rdo rje btsun mo dang /__/gnas yul dpa' bo mkha' 'gro'i tshogs rnams kyis/__/'jig rten khams su bkra shis dge legs stsol/__/rgyud gsum dam can rgya mtsho'i tshogs rnams dang /__/zhing skyong srung ma DA ki chos sgron ma/__/gtso mo 'khor dang sprul par bcas pa yis/__/rtag tu srung skyob mi g.yel bkra shis shog__/ces brjod pas dge legs su bya'o/__/bstan srung lha mo'i mchod phreng gi__/rim pa gsal bar bkod pa yi/__/legs byas snang bas sa gsum khyab/__/don gnyis lhun gyis grub par shog__/ces pa'ang lcags ra bsam 'grub rtse dang sde dge'i dngul gdung khang la sogs la lha mo 'di nyid kyi gsol mchod dgos pa la brten/__lcags ra dbu mdzad 'jam dbyangs nyi ma dang /__'tsho byed chen po bla ma a tshang nas kyang gsung bskul gyis rkyen byas rang nyid kyang spro bas mtshams sbyar te 'jam dbyangs chos kyi blo gros pas/__chu bya mgo zla ba'i tshes lnga bzang por bkra shis 'chi med grub pa'i dga' tshal du smras rim bzhin yi ge'i byed po rig gnas kun la spobs pa dge ba can dge slong 'jam dbyangs blo gros 'phel rgyas nas bgyis pa 'dis kyang srung ma chen mo dgyes pa'i mchod sprin chen por gyur te phrin las rnam pa bzhi 'bad med du 'grub pa'i rgyur gyur cig__/sarba mang+ga laM//__//