JKCL-KABUM-09-TA-022: Difference between revisions
From Khyentse Lineage - A Tsadra Foundation Project
WikiBot2015 (talk | contribs) No edit summary |
m (Text replacement - "Khyentse Metadata" to "Text") |
||
(5 intermediate revisions by one other user not shown) | |||
Line 1: | Line 1: | ||
{{ | {{Text | ||
|classification=Tibetan Publications | |classification=Tibetan Publications | ||
|subclass=Tibetan Texts | |subclass=Tibetan Texts | ||
|fulltitletib=འཇམ་དཔལ་ཡེ་ཤེས་སེམས་དཔའ་ཡི་སྒྲུབ་པའི་ཐབས། | |||
|fulltitle='jam dpal ye shes sems dpa' yi sgrub pa'i thabs | |||
|citation=[['jam dbyangs mkhyen brtse chos kyi blo gros]]. '''jam dpal ye shes sems dpa' yi sgrub pa'i thabs''. In ''Rdzong sar mkhyen brtse 'jam dbyangs chos kyi blo gros kyi gsung 'bum'', Vol. 9: 425-451. Bir, H.P.: Khyentse Labrang, 2012. | |||
|collectiontitletib=ཆོས་ཀྱི་བློ་གྲོས་བཀའ་འབུམ་ | |||
|collectiontitle=chos kyi blo gros bka' 'bum | |collectiontitle=chos kyi blo gros bka' 'bum | ||
|author='jam dbyangs mkhyen brtse chos kyi blo gros | |author='jam dbyangs mkhyen brtse chos kyi blo gros | ||
|authortib=འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ | |authortib=འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ | ||
|sourcerevealer='jam dbyangs mkhyen brtse chos kyi blo gros | |||
|sourcerevealertib=འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ | |||
|tibgenre=Revelations - gter ma, Sadhanas - Evocation Ritual - sgrub thabs | |||
|terma=No | |||
|jkcloutline=Eleven | |||
|deity='jam dpal ye shes sems dpa' | |||
|language=Tibetan | |language=Tibetan | ||
| | |volumenumber=009 | ||
| | |volnumtib=༩ | ||
|volyigtib=ཏ་ | |||
|totalvolumes=12 | |||
|textnuminvol=022 | |textnuminvol=022 | ||
|pagenumbers=425-451 | |||
|totalpages=27 | |||
|beginfolioline=1a1 | |||
|endfolioline=14a4 | |||
|totalfolios=14 | |||
|multivolumework=No | |||
|pdflink=File:JKCL-KABUM-09-TA-022.pdf | |pdflink=File:JKCL-KABUM-09-TA-022.pdf | ||
}} | }} | ||
Line 16: | Line 32: | ||
<h1 style="font-size: 24px !important;">Tibetan Text</h1> | <h1 style="font-size: 24px !important;">Tibetan Text</h1> | ||
<onlyinclude> | <onlyinclude> | ||
{{TibP|༡༩༦༩༧ལ་རྒྱ༔ | {{TibP|{{TibChung|༡༩༦༩༧ལ་རྒྱ༔}} {{TibChung|རང་བྱུང་ཡེ་ཤེས་ལྷ་ལ་འདུད་འཇམ་དཔལ་ཡེ་ཤེས་སེམས་དཔའ་ཡིཿ སྒྲུབ་པའི་ཐབས་ཆེན་རྨད་བྱུང་བཿ འཇམ་དཔལ་ཏནྟྲ་རྒྱ་མཚོ་ལས༔ སྙིང་པོར་དྲིལ་བའི་སྒྲུབ་ཚུལ་བསྟན། །དེ་ལ་སྒྲུབ་པའི་གནས་མཆོག་ནི༔ ཡིད་འོང་བཀྲ་ཤིས་གནས་དེ་རུ། །སྐུ་གསུང་ཐུགས་ཀྱི་རྟེན་རྣམས་བཀྲམ༔ སྒྲུབ་པོ་བདེ་བའི་སྟན་ལ་འདུག༔ ཕྱི་ནང་མཆོད་གཏོར་མཛེས་པར་བཤམས༔ མདུན་མཁར་སྐྱབས་ཡུལ་མངོན་སུམ་བལྟས༔}} ན་མོ༔ བདག་སོགས་འགྲོ་བ་སེམས་ཅན་རྣམསཿདེང་བཟུང་བྱང་ཆུབ་མ་ཐོབ་བར༔ སྐྱབས་ཀྱི་སྙིང་པོར་བཟུང་བྱས་ཏེ༔ རྟག་པར་བདག་ནི་སྐྱབས་སུ་མཆི༔ སེམས་བསྐྱེད་པ་ནི། སེམས་ཅན་སྲིད་པའི་རྒྱ་མཚོར་ལྟུང་༔ ཚད་མེད་རྣམ་བཞིའི་བློ་སྦྱངས་ཏེཿཐར་པ་དམ་པར་འགོད་པའི་ཕྱིར༔ སྨོན་འཇུག་བྱང་ཆུབ་མཆོག་སེམས་བསྐྱེད༔ ཡན་ལག་བདུན་པ་ནི། ཨཿརང་རིག་དབྱིངས་ནས་ཤར་བ་ཡི༔ འཇམ་དཔལ་རྡོ་རྗེའི་ལྷ་ཚོགས་ལཿཕྱག་འཚལ་མཆོད་འབུལ་སྡིག་ལྟུང་བཤགས༔ དགེ་ལ་ཡི་རང་ཆོས་འཁོར་བསྐུལ༔ མྱ་ངན་མི་འདའ་བཞུགས་གསོལ་འདེབས༔ དགེ་ཚོགས་ཆོས་དབྱིངས་སྙིང་པོར་བསྔོ༔ འགྲོ་ཀུན་བྱང་ཆུབ་མྱུར་ཐོབ་ཤོག༔ བགེགས་ལ་གཏོར་མ་སྦྱིན་ཞིང་བསྐྲདཿཧཱུྃཿགཉིས་འཛིན་རྟོག་པའི་བདུད་བགེགས་ལ༔ མཁའ་ཁྱབ་འདོད་ཡོན་གཏོར་མ་སྦྱིན༔ གནོད་འཚེ་གདུག་སེམས་ཀུན་ཞི་ཞིང་༔ གནས་འདིར་མ་འདུག་གཞན་དུ་དེངས༔ གལ་ཏེ་མི་འགྲོ་འདུག་གྱུར་ན༔ འཇམ་དཔལ་ཁྲོས་པའི་རྒྱལ་པོ་ཡིསཿཁྱེད་རྣམས་ལུས་སེམས་རྡུལ་དུ་བརླག༔ དེ་བས་བཀའ་ལས་མ་འདའ་ཞིག༔ དྲག་སྔགས་ཐུན་དང་རྡོ་རྗེས་བསྐྲད༔ བསྲུང་བའི་མཚམས་གཅོད་པ་ནི། ཧཱུྃ་ཨེཿགཤིན་རྗེ་རོལ་པའི་འདུ་འཕྲོ་ཡི༔ འབར་བའི་གུར་ཁང་འཁྲིགས་པ་ལས༔ ཁྲོ་བོ་ཁྲོ་མོ་སྐར་ལྟར་འཁྲུགས༔ མཚོན་ཆ་སྣ་ཚོགས་གུར་གྱིས་གཏམསཿམེ་རླུང་ཆུ་ཡི་རྦ་རླབས་གཡོ༔ བར་ཆད་གདོན་བགེགས་འབྱུང་པོའི་ཚོགས༔ ནམ་ཡང་རྒྱུ་བའི་སྐབས་མེད་དོ༔ བཛྲ་ཨུཥྞི་ཥ་ཙཀྲ་རཀྵ་རཀྵ་ཧཱུྃ་རཾ་ཕཊ༔ བྱིན་དབབ་པ་ནི། ཧཱུྃ་ཧྲཱི༔ མི་གནས་ཡེ་ཤེས་དཀྱིལ་འཁོར་ནས༔ དུས་གསུམ་རྒྱལ་བ་བསྐྱེད་པའི་ཡབ༔ འཇམ་དཔལ་ཞི་ཁྲོའི་དཀྱིལ་འཁོར་ལ༔ རྩ་གསུམ་རྒྱ་མཚོའི་ཚོགས་དང་བཅས༔ གནས་འདིར་དབང་བསྐུར་བྱིན་ཆེན་ཕོབས༔ རྡོ་རྗེའི་ཡེ་ཤེས་བསྐྱེད་དུ་གསོལ༔ ཨོཾ་མཉྫུ་ཤྲཱི་ཛྙཱ་ན་སཏྭ་ཀཱ་ཡ་ཝཱ་ཀ་ཙིཏྟ་བཛྲ་ས་མ་ཡ་ཛ༔ ཨཱ་ཝེ་ཤ་ཡ་ཨ་ཨ༔ ཨེ་ཨ་རལླི་ཕེཾ་ཕེཾ་ཧཱུྃ་ཧཱུྃ་ཧཱུྃ༔ ཛཿཧཱུྃ་བཾ་ཧོཿམཆོད་པ་བྱིན་བརླབ་ནི། རྃ་ཡྃ་ཁྃ༔ མཆོད་སྣོད་རིན་པོ་ཆེ་ཡི་ནང་༔ མཆོད་རྫས་ཉེར་སྤྱོད་འདོད་ཡོན་ལྔ༔ སྨན་གཏོར་རཀྟ་དྭངས་རེ་སྤྲོ༔ ཀུན་བཟང་རྣམ་འཕྲུལ་ཆེན་པོར་གྱུར༔ ཨོཾ་ཨཱཿཧཱུྃ་བཛྲ་ཨརྒྷཾ་ནསཤབྡ་རུ་པ་ཤབྡ་གྷནྡྷེ་རཱ་ས་སྤཪྴེ་སརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་སརྦ་པཱུ་ཙ་ཨཱཿཧཱུྃཿས་མ་ཡ༔ རྟེན་དང་བརྟེན་པའི་དཀྱིལ་འཁོར་བསྐྱེད༔ དྷཱིཿངང་ཉིད་རྡོ་རྗེ་ཆོས་དབྱིངས་ལས༔ ཡེ་ཤེས་སྙིང་པོ་ཀུན་ཏུ་སྣང་༔ རང་བྱུང་རིག་པ་དྷཱི་སེར་པོ༔ དེ་ལས་སྤྲོ་བསྡུའི་འོད་ཟེར་གྱིས༔ བརྟན་གཡོ་སྣོད་བཅུད་ཀུན་སྦྱངས་ནས༔ འབྱུང་ལྔ་རིམ་བརྩེགས་རི་རབ་སྟེང་༔ རྡོ་རྗེའི་སྲུང་འཁོར་རྒྱ་ཆེའི་དབུས༔ པདྨ་སྣ་ཚོགས་རྡོ་རྗེའི་ལྟེར༔ ཐར་པ་ཆེན་པོའི་གཞལ་མེད་ཁང་༔ གྲུ་བཞི་སྒོ་བཞི་མཛེས་པར་སྣང་༔ ཡེ་ཤེས་ལྔ་ཡི་རྩིགས་པའི་སྟེང་༔ ཕ་གུ་དྲྭ་བ་དྲྭ་ཕྱེད་དང་༔ ཤར་བུ་མདའ་ཡབ་དབུས་ཕྱུར་བུ༔ ནོར་བུ་འོད་འབར་ཏོག་གི་འཕྲོ༔ རྟ་བབས་བང་རིམ་བརྒྱད་པ་ལས༔ རི་དྭགས་ཆོས་འཁོར་གདུགས་འཕན་དང་༔ རྔ་ཡབ་ནོར་བུའི་ཡུ་བས་མཛེས༔ འདོད་སྣམ་མཆོད་པའི་ལྷ་མོས་བསྐོར༔ ཕྱི་གསལ་ནང་གསལ་དེ་ཡི་ནང་༔ གདུང་བཞི་ཀ་བ་བརྒྱད་ཀྱིས་འདེགས༔ གྲུ་ཆད་ཕྱི་ནང་ཉིས་རིམ་ཅན༔ ལྟེ་བའི་ལེའུ་ཚེ་འཕར་མའི་དབུས༔ སེང་ཁྲི་པདྨ་ཉི་ཟླའི་སྟེང་༔ དྷཱིཿཡིག་ལྔ་ལྡན་བབ་པ་ལས༔ སྤྲོ་བསྡུའི་ཆོ་འཕྲུལ་ཆེན་པོ་ཡི༔ དམར་སེར་འོད་ཀྱི་གོང་བུར་གྱུར༔ དེ་ཉིད་ཡོངས་གྱུར་འཇམ་པའི་དབྱངས༔ དམར་སེར་ཞལ་གཅིག་ཕྱག་བཞི་པ༔ དང་པོ་གཉིས་ཀྱི་རལ་གྲི་དང་༔ ཤེར་ཕྱིན་གླེགས་བམ་འོག་མ་གཉིས༔ མདའ་གཞུ་འཛིན་ཞིང་འགྱིང་བག་ཅན༔ སྟོད་གཡོགས་སྨད་གཡོགས་མཛེས་པར་བཀླུབས༔ དར་དང་རིན་ཆེན་རྒྱན་གྱིས་བརྒྱན༔ པང་དུ་རྡོ་རྗེ་དབྱངས་ཅན་མ༔ སྔོ་སངས་རལ་གྲི་པུསྟི་འཛིན། །མཛེས་འཛུམ་ཡིད་འོང་ལྷ་མོའི་ཆས༔ ཐབས་ཤེས་བདེ་སྟོང་ཆེན་པོར་བཞུགས༔ ཕྱོགས་བཞིའི་ལེའུ་ཚེར་ཁྲི་པད་ཟླར༔ མི་བསྐྱོད་རིན་འབྱུང་དཔག་མེད་མགོན༔ དོན་གྲུབ་རང་འོད་ཡུམ་དང་འཁྲིལ༔ རང་རྟགས་ཕྱག་མཚན་དྲིལ་བུ་བསྣམས༔ ཞི་ཆས་བཅུ་གསུམ་ཡོངས་སུ་རྫོགས༔ མཚམས་བཞིར་དབྱངས་ཅན་རིགས་བཞི་པོ༔ དཀར་སེར་དམར་དང་ལྗང་བའི་མདོག༔ ཞི་འཛུམ་བཅུ་དྲུག་ལང་ཚོ་ཅན༔ ཕྱག་མཚན་རང་རྟགས་པི་ཝཾ་སྒྲེངས༔ ཞབས་གཉིས་མཉམ་པའི་སྟབས་ཀྱིས་བཞེངས༔ ལྷ་མོའི་ཆ་བྱད་རྫོགས་པར་གསལ༔ གྲུ་ཆད་སེམས་དཔའ་ཡབ་ཡུམ་བརྒྱད༔ ནམ་སྙིང་མཱ༷་ལེ༷་མ༷་སྔོ་སངས་རལ་གྲི་འཛིན༔ སྒྲིབ་སེལ་མེ༷་ཏོག༷་མ༷་དམར་སེར་པུ་སྟིའི་མཚན༔ བྱམས་པ་བདུག༷་སྤོས༷་མ༷་དཀར་སེར་ཀླུ་ཤིང་བསྣམས༔ འཇམ་དཔལ་དྲི༷་ཆབ༷་མ༷་དཀར་པོ་རལ་གྲི་འཛིན༔ ཀུན་བཟང་ཨཱ༷་ལོ༷་ཀེ༷་ལྗང་གུ་ནོར་བུ་བསྣམས༔ སྤྱན་གཟི༷གས་ནི་རྟཱི༷་མ༷་དཀར་པོ་པདྨ་འཛིན༔ ཕྱག་རྡོར་གཱི༷་རྟཱི༷་མ༷་སྔོན་པོ་རྡོ་རྗེ་དང་༔ ས་ཡི་སྙིང་པོ༷་ལཱ༷་སྱེ༷་མ༷་འབྲས་སྙེ་བསྣམས༔ དེ་ལ་དགྱེས་བསྐྱེད་སེམས་དཔའ་ཡུམ༔ མེ་ཏོག་བདུག་སྤོས་མར་མེ་དང་༔ དྲི་ཆབ་ལཱ་སྱེ་མཱ་ལེ་མ༔ ནི་རྟཱི་གི་རྟཱི་མ་རྣམས་ནི༔ རང་རང་མཆོད་པའི་རྫས་ཐོགས་ནས༔ རང་རིགས་ཡབ་ལ་དགྱེས་པར་འཁྲིལ༔ ཁྱམས་ཀྱི་སྟེང་འོག་ཕྱོགས་མཚམས་སུ༔ ཐུབ་ཆེན་དྲུག་པོ་སྤྲུལ་སྐུའི་ཆས༔ རང་རྟགས་ཕྱག་མཚན་འཛིན་པ་དང་༔ པད་ཟླར་འགྲོ་དོན་བཞེངས་སྟབས་བཞུགས༔ སྒོ་བཞིར་ཉི་མ་ཞིང་གི་གདན༔ རྣམ་རྒྱལ་དཀར་པོ་ལྕགས་ཀྱུ་གདེངས༔ གཤིན་རྗེ་སེར་པོ་བེ་ཅོན་བསྣམས༔ རྟ་མགྲིན་དམར་པོ་པདྨ་འཛིན༔ བདུད་རྩི་འཁྱིལ་བ་རྒྱ་གྲམ་བསྣམས༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ ཡུམ་བཞི་རང་རྟགས་ཕྱག་རྒྱ་འཛིན༔ ཡབ་ལ་འཁྱུད་ཅིང་ཁྲོ་བོའི་ཆས༔ ཞབས་གཉིས་གྱད་ཀྱི་དོར་སྟབས་བཞུགས༔ བར་ཁྱམས་རྩ་གསུམ་ཡི་དམ་ལྷ༔ མཁའ་འགྲོ་ཆོས་སྐྱོང་ཚོགས་རྣམས་ཀུན༔ ཏིལ་གྱི་གོང་བུ་ལྟར་བཞུགས་པའི༔ གནས་གསུམ་རྡོ་རྗེ་གསུམ་གྱིས་མཚན༔ ཐུགས་ལས་འོད་འཕྲོས་དབང་ལྷའི་ཚོགས༔ སྤྱན་དྲངས་ནམ་མཁའ་གང་བར་གྱུར༔ ཡེ་ཤེས་ལྔ་ཡི་དབང་བསྐུར་བས༔ རང་རང་རིགས་ཀྱིས་དབུ་བརྒྱན་གྱུར༔ ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ༔ ཨཱ་དཪྴ༴ ས་མ་ཏ༴ པྲ་ཏྱ་བེཀྵ་ན༴ ཀྲྀ་ཏྱཱ་ནུཥྛ་ན༴ སྐུ་གང་སྒྲིབ་དག་དབང་རྣམས་ཐོབ༔ ཆུ་ལྷག་སྤྱི་བོར་འཁྱིལ་པ་ལས༔ རིགས་ཀྱི་བདག་པོས་དབུར་བརྒྱན་བསམ༔ ཡེ་ཤེས་ཀྱི་འཁོར་ལོ་སྤྱན་དྲངས་པ་ནི༔ ཨོཾ༔ སྟོང་པ་ཤིན་ཏུ་ཡོད་མེད་ལས༔ ནམ་མཁའ་ལྟ་བུར་མཐའ་དབུས་བྲལ༔ ཡེ་ཤེས་བཞི་འཕྲོ་འབར་བའི་ཚུལ༔ ཚོགས་མཆོག་དཀྱིལ་འཁོར་གཤེགས་སུ་གསོལ༔ སེམས་དཔའ་རྡོ་རྗེ་ཆེ་རང་བཞིན༔ རྡོ་རྗེ་སྙེམས་བདག་གྲུབ་པར་མཛོད༔ ཀུན་ནས་ཀུན་ཏུ་འོད་གསལ་བའི༔ ནོར་བུའི་གཟི་བརྗིད་ལྟ་ན་སྡུག༔ ཡེ་ཤེས་སྐུ་ཅན་འཇམ་པའི་དཔལ༔ དཀྱིལ་དང་འཁོར་བཅས་གཤེགས་སུ་གསོལ༔ ཨོཾ་ཨེ་ཧྱེ་ཧི་བྷ་ག་ཝཱན་ཛྙཱ་ན་སཏྭ་མཎྜལ་ས་པ་རི་ཝཱ་ར་བཛྲ་ས་མཱ་ཛཿས་སྤྱན་དྲངས་་ཛཿཧཱུྃ་བྃ་ཧོཿས་བསྟིམ༔ ཧོཿཡེ་ཤེས་རྡོ་རྗེའི་དཀྱིལ་འཁོར་པ༔ དབྱིངས་ནས་སྤྱན་དྲངས་དབྱེར་མེད་ཐིམཿདམ་ཚིག་དཀྱིལ་འཁོར་དབྱེར་མེད་པ༔ བྱང་ཆུབ་བར་དུ་དགྱེས་པར་བཞུགས༔ ཛྙཱ་ན་ཀཱ་ཡ་ཝཱཀ་ཙིཏྟ་ས་མ་ཡ་ཏིཥྛ་ལྷན༔ ཕྱག་མཆོད་བསྟོད་པ་བྱ་བ་ནི། ན་མོ༔ སྐྱེ་འགགས་གནས་མེད་འགྲོ་འོང་བྲལ༔ རང་རིག་འཇམ་དཔལ་རྡོ་རྗེ་ལ༔ གཉིས་མེད་རྟོགས་པའི་ཕྱག་གིས་འདུད༔ བརྡའ་དང་གར་གྱི་སྟོབས་པར་བགྱི༔ ཨ་ཏི་པུ་ཧོ༔ པྲ་ཏཱིཙྪ་ཧོཿཨོཾ་ཨཱཿཧཱུྃ༔ ཕྱི་ནང་ཉེར་སྤྱོད་འདོད་ཡོན་ལྔ༔ བཀྲ་ཤིས་རྫས་རྟགས་རྒྱལ་སྲིད་བདུན༔ ལྷ་རྫས་ན་བཟའ་དར་དཔྱངས་དང་། །རིན་ཆེན་རྒྱན་མཆོག་བརྒྱ་ཕྲག་འབུལ༔ ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་སོགས། ཨོཾ་ཨ་ཧ་ར་ཨ་ཧ་ར་སརྦ་བིདྱ་དྷཱ་ར་པཱུ་ཛི་ཏེ་ཨཱཿཧཱུྃ༔ ཨོཾ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ༔ ནས་ཤབྡའི་བར་དང་། ཨོཾ་རཱུ་པ་ནས་སྤཪྴེ་པྲ་ཏཱིཙྪ་སྭཱ་ཧཱ༔ ཨོཾ་སརྦ་ཏ་ཐཱ་ག་ཏ་ཨཥྚ་མངྒ་ལཾ་སཔྟ་རཏྣ་པཱུ་ཛི་ཏེ་ཨཱཿཧཱུྃ༔ ཨོཾ་བཛྲ་ཝསྟྲ་ཨ་ལཾ་ཀ་ར་ཨཱཿཧཱུྃ༔ ཨོཾ་རྩ་བརྒྱད་སྟོང་ལ་སྦྱར་བའི་སྨན༔ འདོད་ཡོན་ལྔ་ལྡན་གཏོར་མ་དང་༔ ཆགས་བྲལ་རཀྟའི་སྦུ་ཕྲེང་གཡོ༔ དཀྱིལ་འཁོར་ལྷ་ཚོགས་མཉེས་པར་བགྱི༔ ཨོཾ་སརྦ་པཉྩ་ཨ་མྲྀ་ཏ་ཁཱ་ཧིཿཨོཾ་མ་ཧ་བ་ལིཾ་ཏ་ཁཱ་ཧི༔ ཨོཾ་མ་ཧཱ་རཀྟ་ཁཱ་ཧི༔ ཧཱུྃ༔ ཞི་འཛུམ་མཚན་དཔེའི་དཔལ་འབར་སྐུ༔ མཉེན་ལྕུགས་འཁྲིལ་ལྡེམ་འགྱིང་བག་ཅན༔ ནམ་མཁའི་ལུས་ཅན་ཡེ་ཤེས་སྐུཿཕྱག་རྒྱ་གར་གྱི་མཆོད་པར་བགྱི༔ ཨོཾ་མ་ཧཱ་མུ་དྲ་པཱུ་ཙ་ཧོཿཧཱུྃ༔ བཅུ་དྲུག་ལང་ཚོའི་མཚར་སྡུག་ཅནཿཔདྨ་ཅན་སོགས་ཕྱག་རྒྱའི་ཚོགས༔ འཇོ་སྒེག་རིན་ཆེན་སིལ་ཁྲོལ་ཅན༔ ཟག་མེད་བདེ་བསྐྱེད་དགྱེས་མཆོད་ཀྱི༔ འཇམ་དཔལ་རྡོ་རྗེའི་དཀྱིལ་འཁོར་མཆོད༔ མ་ཧཱ་ཏ་ཏེ་ཏེ་ཧཱུྃ༔ ཨ་ཧཾ་ཀུནྡ་རུ་བཛྲ་དྷྲིཀྵ་ཨ་ཧོ་མ་ཧཱ་སུ་ཁ་ཧོ༔ ཨཿམཆོད་བྱ་མཆོད་བྱེད་མཆོད་ཡུལ་ཀུན༔ གདོད་ནས་རང་རིག་ཆེན་པོར་དག༔ མ་བཅོས་མཉམ་པ་ཉིད་ཀྱི་ངང་༔ དེ་བཞིན་ཉིད་ཀྱིས་མཆོད་པར་བགྱི༔ དྷརྨ་དྷཱ་ཏུ་ཨཿཧོ༔ ཕྱོགས་བཅུ་ཀུན་ཏུ་རོལ་མོའི་སྤྲིན༔ མཐའ་ཡས་རྣམ་པར་བཀོད་པ་ཡི༔ དཀྱིལ་འཁོར་བསམ་ཡས་ལྷུན་གྱིས་གྲུབ༔ བདེ་ཆེན་རོལ་མོས་མཉེས་པར་བགྱི༔ ཨོཾ་ཀ་ཀོ་ལ་ཀཱ་ཧ་བཛྲ་ཤཔྟ་ཙ་ཀ་ར་བཛྲ་ཧ་ཧ་ཧི་ཧོཿསརྦ་པཱུ་ཙ་ཧོཿཨོཾ༔ ཕྱོགས་དུས་བདེ་བར་གཤེགས་པ་ཡི༔ ཡེ་ཤེས་སྐུ་སྟེ་སྐུ་ཡི་མཆོག༔ བདེ་ཆེན་རྡོ་རྗེའི་ཆོས་ཀྱི་སྐུ༔ རང་བཞིན་བརྗོད་བྲལ་སྐུ་ལ་བསྟོད༔ ཨཱཿའགགས་མེད་གསུང་སྟེ་གསུང་གི་མཆོག༔ རྡོ་རྗེའི་སྒྲ་ཆེན་མཐའ་ཡས་འཕྲོ༔ ཡི་གེ་འཁོར་ལོའི་སྤྲིན་དུ་ཤར༔ འཇམ་དབྱངས་གསུང་ལ་ཕྱག་འཚལ་བསྟོད༔ ཧཱུྃ༔ འཇམ་དཔལ་ཐུགས་ནི་ཀུན་ཏུ་ཞི༔ རྟོག་པའི་སྤྲོས་ལས་རབ་འདས་པ༔ འགྱུར་མེད་བདེན་དོན་ཡེ་ཤེས་མཛོད༔ རྡོ་རྗེའི་ཐུགས་ལ་ཕྱག་འཚལ་བསྟོད༔ སྭཱ༔ སངས་རྒྱས་ཀུན་གྱི་འབྱུང་གནས་ཆེ༔ འཇམ་དཔལ་ཡིད་བཞིན་ནོར་བུའི་བདག༔ བྲལ་སྨིན་རྒྱ་མཚོའི་གཏེར་འཆང་བ༔ ཡོན་ཏན་བསམ་མི་ཁྱབ་ལ་བསྟོད༔ ཧ༔ མཁའ་དང་མཉམ་པའི་སྐུ་མངའ་བས༔ འགྲོ་བའི་ཁམས་ལ་རྟག་པར་འཇུག༔ ཕྲིན་ལས་འཛད་མེད་ལྷུན་གྱིས་གྲུབ༔ སྐུ་བཞིའི་དབང་ཕྱུག་ཁྱོད་ལ་བསྟོད༔ རྡོ་རྗེའི་དབྱངས་ཀྱི་བསྟོད་པ་ཡི༔ རྣམ་པར་གྲོལ་བའི་བྱང་ཆུབ་ཆེར༔ མཐའ་ཡས་འགྲོ་རྣམས་འགོད་པ་དང་༔ མཁྱེན་བརྩེའི་ཡེ་ཤེས་མཆོག་ཐོབ་ཤོག༔ ཛབ྄་ཀྱི་བཟླས་པས་ཉེ་བར་བསྙེན༔ ཐུགས་དབུས་འོད་ལྔའི་གུར་ཁྱིམ་དུ༔ ཡེ་ཤེས་སེམས་དཔའ་འཇམ་པའི་དབྱངས༔ སྔོ་སངས་ནམ་མཁའི་མདངས་ལྡན་སྐུ༔ རྡོ་རྗེ་དྲིལ་བུ་ཐུགས་ཀར་བསྣོལ༔ རྣལ་འབྱོར་མ་དཔལ་དཀར་མོ་ནི༔ གྲི་ཐོད་འཛིན་དང་མཉམ་སྦྱོར་ཞིང་༔ ལོངས་སྐུའི་ཆས་ཅན་ཐུགས་ཀའི་དབུས༔ ཉི་ཟླའི་གའུའི་ནང་ཁོངས་སུ༔ རལ་གྲི་ཡུ་བར་དྷཱི་ཡིས་མཚན༔ དེ་མཐར་སྔགས་ཀྱི་ཕྲེང་བས་བསྐོརཿའོད་འཕྲོས་འཕགས་མཆོད་བྱིན་རླབས་བསྡུས༔ འགྲོ་བའི་སྒྲིབ་སྦྱངས་ཚུར་འདུས་ཤིང་༔ འོད་ཀྱིས་རྨོངས་པའི་མུན་པ་སེལ༔ ཡེ་ཤེས་སྣང་བ་རྒྱས་པར་མོས༔ ཨོཾ་ཝཱ་གཱི་ཤྭ་རི་མུཾ༔ འབུམ་ཕྲག་བཅུ་གཉིས་བཟླ་བར་བྱ༔ དངོས་གྲུབ་སྒྲུབ་པའི་བཟླས་པ་ནི༔ ཐུགས་ཀའི་སྔགས་ཀྱི་ཕྲེང་བ་ནི༔ ཡབ་ནས་ཡུམ་གྱི་ཞལ་དུ་བརྒྱུད༔ མགལ་མེ་ལྟ་བུར་འཁོར་བ་ལས༔ སྐུ་དང་འོད་ཟེར་སྔགས་ཕྲེང་དང་༔ ཕྱག་མཚན་དཔག་མེད་འཕྲོས་པ་ལས༔ ཐ་མལ་སྣང་ཞེན་ཀུན་སྦྱངས་ཏེ༔ འཇམ་དཔལ་དཀྱིལ་འཁོར་ཆེན་པོར་རྫོགས༔ ཨོཾ་ཨཱ་ར་པ་ཙ་ན་དྷཱི༔ རྩ་བའི་རིག་པ་འབུམ་ཕྲག་བཅུ༔ ཨོཾ་སརྦ་དྷརྨ༔ སོགས་ཉེ་སྙིང་། ཨ་ཨཱ་ཨི་ཨཱི་སོགས་འབུམ་ཕྲག་གཅིག་ཏུ་བཟླ་བར་བྱ༔ ལས་ལ་སྦྱོར་བའི་ཆེད་དུ་ནི༔ དཀྱིལ་འཁོར་ལྷ་ཚོགས་ཐམས་ཅད་ལས༔ འོད་ཟེར་དཀར་སེར་དམར་ལྗང་དང་༔ སྐུ་ནི་ཉི་ཟེར་རྡུལ་ལྟར་འཕྲོས༔ འཇིགས་བརྒྱད་ནད་གདོན་སྡིག་སྒྲིབ་ཞི༔ ཚེ་དང་བསོད་ནམས་ཡེ་ཤེས་རྒྱས༔ བརྟན་གཡོ་རླུང་སེམས་དབང་དུ་སྡུདཿདགྲ་གདོན་དམ་སྲི་ཚར་གཅོད་ཅིང་༔ ལས་བཞིའི་ཕྲིན་ལས་སྒྲུབ་པར་བསམ༔ སྒྲུབ་སྔགས་ཡི་གེ་དྲུག་པའི་མཐར༔ ཤཱནྟིཾ་པུཥྚིཾ་ཝ་ཤཾ་མཱ་ར་ཡ་ཕཊཿཅེས་བཏགས་པ་ཁྲི་བཟླས་འགྲུབ༔ ཐུན་མཚམས་མཆོད་བསྟོད་ནོངས་བཤགས་དང་། མཎྜལ་འབུལ་ཞིང་མཚན་བརྗོད་བཀླགས༔ ས་མ་ཡ༔ བསྙེན་སྒྲུབ་རྟགས་མཐོང་དངོས་གྲུབ་བླངས༔ བྷནྫ་བཟང་པོའི་ནང་དུ་ནི༔ ཨ་མྲྀ་ཏ་ཡི་གཏམས་བྱས་ཏེ༔ དཀྱིལ་འཁོར་ལྷ་ཚོགས་ཐམས་ཅད་ཀྱི༔ བདེ་བའི་སྒྲ་བཅས་སྙོམས་པར་ཞུགས༔ རྗེས་སུ་ཆགས་པའི་འོད་ཟེར་གྱིས༔ སྲིད་ཞིའི་དྭངས་བཅུད་ཐམས་ཅད་རྣམས༔ འོད་དམར་རྣམ་པར་དབང་དུ་བསྡུས༔ བདག་དང་སྒྲུབ་པའི་རྫས་ལ་ཐིམ༔ སླར་ཡང་ལྷ་རྣམས་རྗེས་ཆགས་ཀྱི༔ སྦྱོར་བའི་བདུད་རྩི་བྷནྡྷར་བསྐྱིལ༔ ཡེ་ཤེས་ཆེན་པོའི་བཅུད་དུ་གྱུར༔ དངོས་གྲུབ་རྒྱ་མཚོ་བསྐྱིལ་བར་གྱུར༔ སྒྲུབ་སྔགས་མཐར་ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧོ༔ ཞེས་སྟོང་རྩ་བཟླཿརྡོ་རྗེའི་ནམ་ལངས་དངོས་གྲུབ་བསྐུལ༔ ཨེ་མ་ཧོ༔ དེ་བཞིན་གཤེགས་པ་ཡི༔ དངོས་གྲུབ་རྒྱ་མཚོ་འབྱུང་བའི་གནས༔ འཇམ་དཔལ་རྡོ་རྗེའི་དཀྱིལ་འཁོར་པ༔ བསྙེན་ཅིང་སྒྲུབ་པའི་དམ་ཚིག་ཐིམ༔ དངོས་གྲུབ་སྩོལ་བའི་དུས་ལ་བབ༔ མཁྱེན་པའི་ཡེ་ཤེས་སྤོབས་པའི་གཏེར༔ དངོས་གྲུབ་བརྒྱད་དང་རྡོ་རྗེའི་ཚ༔ སྲིད་ཞིར་མི་གནས་རྫོགས་པ་ཆེའི༔ མཆོག་གི་དངོས་གྲུབ་སྩལ་དུ་གསོལ༔ ཐུན་མོང་ལས་བཞིའི་དངོས་གྲུབ་སྩོལ༔ འཇམ་དཔལ་རྡོ་རྗེའི་དཀྱིལ་འཁོར་པའི༔ དངོས་གྲུབ་དམ་པ་དེང་འདིར་སྩོལ༔ ཞེས་བསྐུལ་སྔགས་ཀྱི་སྒྲུབ་རྫས་རྣམས༔ གནས་གསུམ་འཇོག་ཅིང་བདུད་རྩིར་རོལ༔ དངོས་གྲུབ་སྟན་ཐོག་གཅིག་ཉིད་ལ༔ ཐོབ་པར་གྱུར་པའི་ངེས་ཤེས་བསྐྱེདཿདགའ་སྟོན་བྱ་ཞིང་གླུ་གར་བྱཿས་མ་ཡ༔ རྗེས་ལ་ཚོགས་ཀྱི་མཆོད་པ་ནི། ཐབས་ཤེས་ཡོ་བྱད་གྱ་ནོམ་བཤམ༔ ཧཱུྃཿབདག་ཉིད་ལྷ་ཡི་ཐུགས་ཀ་ནས༔ ཡི་གེ་རཾ་ཡཾ་ཁཾ་གསུམ་འཕྲོས༔ ཚོགས་ཀྱི་དངོས་འཛིན་བསྲེགས་གཏོར་བཀྲུས༔ འབྲུ་གསུམ་བདུད་རྩིའི་ཆར་བབ་པས༔ ཡེ་ཤེས་ལོངས་སྤྱོད་ཆེན་པོར་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿཧཱུྃ་ཧྲཱིཿདམིགས་མེད་ཡེ་ཤེས་མཁའ་ལྟར་ཁྱབ༔ སྙིང་རྗེ་སྒྱུ་མའི་སྐུར་བཞིངས་པ། །རྩ་གསུམ་འཇམ་དཔལ་ཞི་ཁྲོའི་ཚོགས༔ འདོད་ཡོན་ཚོགས་ལ་སྤྱན་འདྲེན་གཤེགས༔ རྣལ་འབྱོར་སྒྲུབ་མཆོག་བྱིན་གྱིས་རློབས༔ མཆོག་ཐུན་དངོས་གྲུབ་སྩལ་དུ་གསོལ༔ བཛྲ་ས་མཱ་ཛ༔ འདོད་ཡོན་རྣམ་ལྔའི་སྔགས་ཀྱིས་མཆོད༔ ཨཿགཟུགས་སྒྲ་དྲི་རོ་རེག་ལྡན་པའི༔ འདོད་ཡོན་རྣམ་པ་ཐམས་ཅད་པའི༔ ཚོགས་ཀྱི་འཁོར་ལོའི་སྤྲིན་ཆེན་པོས༔ དཀྱིལ་འཁོར་ལྷ་ཚོགས་མཆོད་པར་བགྱི༔ མ་ཧཱ་ག་ཎ་ཙཀྲ་ཁཱ་ཧི༔ ཧོཿཐོག་མེད་དུས་ནས་ད་ལྟའི་བར༔ བདག་གཞན་ཚེ་རབས་ཐོག་མེད་ནས༔ བསགས་པའི་ལས་ཉོན་སྡིག་སྒྲིབ་ཀུན༔ ཚོགས་ཀྱི་མཆོད་པས་བཤགས་པར་བགྱི༔ ས་མ་ཡ་ཤུདྡྷེ་ཨ༔ ཨེ་ལས་ཐར་མེད་བཙོན་ཁང་དུ༔ དགྲ་བགེགས་བྱད་མ་དངོས་སུ་གསལ༔ དགུགས་བསྟིམས་གཟིར་མནན་ལས་མཛད་བསམ༔ ཧཱུྃ༔ འཇམ་དཔལ་ཁྲོས་པ་ཀཱི་ལ་ཡ༔ སངས་རྒྱས་ཀུན་གྱི་ཕྲིན་ལས་རྫོགས༔ མཐུ་སྟོབས་ནུས་པའི་ཤུགས་འཆང་བས༔ དགྲ་བགེགས་གནོད་བྱེད་དམ་སྲི་རྣམས༔ ལྔ་ཕུང་དུག་ལྔ་རྩད་ནས་གཅོད༔ རྣམ་ཤེས་རྒྱལ་བའི་སྲས་སུ་བསྐྲུན༔ གཟུགས་ཕུང་འབར་བའི་མཚོན་ཆས་གཏུབ༔ རྡུལ་ཕྲན་ཙམ་ཡང་མེད་པར་མཛོད༔ ཨོཾ་ཡ་མཱནྟ་ཀ་ཀཱ་ལ་རཱུ་པ་ཧྲཱི་ཥྚྲི་ཨི་དཾ་དུཥྚ་ན་སརྦ་ཤ་ཏྲཱུཾ་མཱ་ར་ཡ་རྦད་ཕཊ༔ མཚོན་ཆས་གཏུབ་ཅིང་ལིང་རོ་རྣམས༔ བདུད་རྩིར་བསྒྱུར་ལ་ཞལ་དུ་བསྟབ༔ ཨེ་སངས་རྒྱས་ཕྲིན་ལས་རྫོགས་པའི་དཔལ༔ འཇམ་དཔལ་ཞི་ཁྲོའི་ལྷ་ཚོགས་ལ༔ དགྲ་བགེགས་ལྔ་ཕུང་ཞལ་དུ་བསྟབ༔ དགྱེས་པར་རོལ་ཅིག་ཁ་རཾ་ཁཱ་ཧི༔ ཧ་ཧ་ཧི་ཧི་ཧེ་ཧེ་ཧོ་ཧོ་ཕཊ་ཕཊ༔ བརྡ་དང་བརྡ་ཡི་ལེན་དང་བཅས༔ ཚོགས་ལ་རོལ་ཞིང་ལྷག་མ་བསྔོ༔ ཞལ་ཆབ་སྨན་རཀ་བྲན་ལ་བཤམས༔ ཧཱུྃ་ཧྲཱི༔ དཔལ་གྱི་བཀའ་ཉན་ཕོ་ཉ་ནི༔ མ་ཚོགས་དབང་ཕྱུག་གིང་ལངྐ༔ འབར་མ་སྲིན་མོའི་ཚོགས་དང་བཅས༔ འདིར་གཤེགས་དཔལ་གྱི་ལྷག་གཏོར་བཞེས༔ བཅོལ་པའི་ཕྲིན་ལས་འགྲུབ་པར་མཛོད༔ ཨུཥྩི་ཊ་མ་མ་ཧྲཱིང་ཧྲཱིང་བ་ལིནྟ་ཁཱ་ཧི༔ ཧོཿཨ་ལ་ལ་ཧོཿམཆོག་ཏུ་མི་འགྱུར་བདེ་བ་ཆེན་པོའི་སྐུ་ནི་ཉི་མ་སྟོང་གི་གཟི་འོད་ལྡན༔ གསང་སྔགས་སྒྲ་ཆེན་དོན་རིག་ཐེ་ཚོམ་གསུམ་བྲལ་གཉིས་སུ་མེད་པའི་རིག་སྔགས་འཆང་༔ དོན་ཟབ་རྒྱ་ཆེ་སྤྲོས་པ་རབ་ཞི་ཀུན་ཁྱབ་ཀུན་བཟང་བདེ་བ་ཆེན་པོའི་སྐུ༔ ཁམས་གསུམ་ཀུན་ཏུ་སྒྱུ་མའི་གར་མཛད་ཡང་དག་ཡེ་ཤེས་མཆོག་གྲུབ་ཨེ་མ་ཧོ༔ ཏེ་ན་ཧཱུྃ། ཏེ་ན་ཧཱུྃ་ཏེ་ན་ཏེ་ཏེ་ཧོཿསརྦ་མ་ཧཱ་སུ་ཁ་གི་རྟི་ཨ་ལ་ལ་ཧོཿཞེས་གླུ་བླངས༔ ཧོཿའཇམ་དཔལ་ཡེ་ཤེས་སེམས་དཔའི་དཀྱིལ་འཁོར་དུ༔ གསང་ཆེན་གྷ་ཎ་ཙཀྲའི་སྤྱོད་པ་ཡིས༔ སྒྲིབ་གསུམ་སྙིང་གི་མུན་པ་ཀུན་བཅོམ་ནས༔ ཀུན་བཟང་འཇམ་དཔལ་ཞི་ཁྲོ་མྱུར་ཐོབ་ཤོག༔ གཏོར་མ་སྦྱིན་ཞིང་ཐ་ཚིག་བསྒྲགས༔ ཧཱུྃ༔ སྔོན་ཚེ་ཀ་དག་ཀུན་ཏུ་བཟང་༔ ཆོས་ཉིད་གདོད་མའི་རང་དུས་ན༔ གཞི་སྣང་རྒྱུད་གསུམ་དྲེགས་པའི་ཚོགས༔ གཞི་གྲོལ་རིག་རྩལ་གཏོར་མ་སྦྱིན༔ བར་དུ་འཇམ་དཔལ་དཀྱིལ་འཁོར་དུ༔ ཚོགས་ཀྱི་གྲལ་དུ་བཅུག་བྱས་ནས༔ དབང་བསྐུར་དམ་བསྒོས་སྲུང་མར་བཞག༔ ད་ལྟ་རྣལ་འབྱོར་སྒྲུབ་པ་པོས༔ འཇམ་དཔལ་དཀྱིལ་འཁོར་ཞལ་ཕྱེས་ཤིང་༔ དམ་རྫས་རྒྱན་གྱི་གཏོར་མས་མཆོད༔ སྔོན་གྱི་དམ་བཅའ་དྲན་གྱིས་ལ༔ བཅོལ་པའི་ཕྲིན་ལས་འགྲུབ་པར་མཛོད༔ བཤལ་ཆུས་བརྟན་མ་སྐྱོང་བྱས་ཏེ༔ བྷྱོ༔ དཔལ་གྱི་སྤྱན་སྔར་དམ་མནོས་པའི༔ བདུད་མོ་བཞི་དང་གནོད་སྦྱིན་བཞི༔ སྨན་བཙུན་མཆེད་བཞི་འཁོར་བཅས་དང་༔ སྐྱོང་མ་ཡ་མ་འབུམ་སྡེའི་ཚོགས༔ འདིར་གཤེགས་དམ་རྫས་གཏོར་མ་བཞེས༔ བཅོལ་བའི་ལས་ཀུན་བསྒྲུབ་པར་གྱིས༔ མ་མ་ཧྲཱིང་ཧྲཱིང་བ་ལིཾ་ཏ་ཁཱ་ཧི༔ གཏོར་གཞོང་སྦུབས་ལ་རྡོ་རྗེས་མནན༔ ཧཱུྃ༔ རྟ་ཡི་བརྟུལ་བཞུགས་ཆེན་པོ་ནི༔ དབང་ཆེན་རྔམས་པའི་སྒྲ་སྒྲོགས་ཤིང་༔ དཔལ་གྱི་རྟ་སྐད་ཙེ་རེ་རེ༔ རོལ་པའི་རྟ་བྲོ་ཆེམས་སེ་ཆེམ༔ རྟ་བྲོ་འཁོར་ས་དང་པོ་ལ༔ ཀ་དག་ཆོས་སྐུའི་བྲོ་བརྡུངས་པས༔ མནན་ནོ་སྐྱེ་མེད་ཀློང་དུ་མནན༔ རྟ་བྲོ་འཁོར་ས་བར་པ་ལ༔ འོད་གསལ་ལོངས་སྐུའི་བྲོ་བརྡུངས་པས༔ རང་གྲོལ་འགགས་མེད་ཀློང་དུ་མནན༔ རྟ་བྲོ་འཁོར་ས་ཐ་མ་ལ༔ ཐུགས་རྗེ་སྤྲུལ་སྐུའི་བྲོ་བརྡུངས་པས༔ གནས་མེད་སྙིང་རྗེའི་ཀློང་དུ་མནན༔ མནན་པ་ཡིན་ནོ་མ་ལྡང་ཞིག༔ བྱང་ཆུབ་སེམས་ནི་མ་སྐྱེས་བར༔ ལྡང་བར་མ་གྱུར་སྟྭམྦྷ་ཡ་ནན༔ མཆོད་བསྟོད་ནོངས་བཤགས་རྗེས་བསྡུ་ལྡང་༔ ཧོཿཡེ་ཤེས་ལྷ་རྣམས་ཐུགས་རྗེས་དགོངས༔ བདག་ཅག་བག་མེད་སྤྱོད་པ་ཡི༔ ཏིང་འཛིན་དགོངས་པའི་རྩལ་མ་རྫོགས༔ ཆོ་ག་ལྷག་ཆད་ནོངས་པ་ཀུན༔ མཐོལ་ཞིང་བཤགས་སོ་བྱང་བར་མཛོད༔ སྒྲིབ་མེད་ཚངས་པའི་དངོས་གྲུབ་སྩོལ༔ ཡིག་བརྒྱ་བརྗོད༔ ཨ་ཨ་ཨ༔ ལྷར་སྣང་སྤྲུལ་པའི་སྣང་བ་ཀུན༔ ཆོས་ཉིད་རིག་པའི་དབྱིངས་སུ་ཐིམ༔ སླར་ཡང་སྣང་གྲགས་རྟོག་ཚོགས་རྣམས༔ ལྷ་སྔགས་ཡེ་ཤེས་རོལ་པར་ཤར༔ ཕཊ་ཕཊ་ཕཊ༔ དགེ་བ་བསྔོ་ཞིང་ཤིས་པར་བརྗོད༔ ཧོཿདགེ་བ་འདི་ཡིས་བདག་དང་སེམས་ཅན་ཀུན༔ རྗེ་བཙུན་འཇམ་དཔལ་རྡོ་རྗེ་རབ་བསྒྲུབས་ཏེ༔ ནམ་མཁའ་མཉམ་པའི་རིགས་དྲུག་སེམས་ཅན་རྣམས༔ རྣམ་གྲོལ་ཐར་པའི་ལམ་ལ་འགོད་པར་ཤོག༔ དེང་ནས་བཟུང་སྟེ་ཚེ་རབས་ཐམས་ཅད་དུ༔ དལ་འབྱོར་རྟེན་ཐོབ་ཚུལ་ཁྲིམས་ནོར་གྱིས་ཕྱུག༔ དད་བརྩོན་ཤེས་རབ་དམ་ཚིག་རྣམ་པར་དག༔ དབང་གིས་རྒྱུད་སྨིན་རིམ་གཉིས་སྒོམ་པར་ཤོག༔ གཞི་ཡི་རིགས་སད་ངེས་གསང་རྫོགས་པ་ཆེའི༔ རིག་དོན་ངེས་གསང་མངོན་སུམ་རྟོགས་པ་དང་༔ སྣང་བཞིའི་ལམ་གྱི་བགྲོད་པ་མཐར་ཕྱིན་ནས༔ འཇམ་དཔལ་རྡོ་རྗེའི་ངོ་བོར་བྱང་ཆུབ་ཤོག༔ ཨོཾ༔ རིག་འཛིན་བརྒྱུད་པའི་ཚོགས་རྣམས་ཀྱིས༔ བྱིན་གྱིས་རློབས་པའི་བཀྲ་ཤིས་ཤོག༔ ཡི་དམ་ཞི་ཁྲོ་རབ་འབྱམས་ཀྱིས༔ དངོས་གྲུབ་སྩོལ་བའི་བཀྲ་ཤིས་ཤོག༔ མཁའ་འགྲོ་ཆོས་སྐྱོང་སྲུང་མ་ཡི༔ ཕྲིན་ལས་རྣམ་བཞིའི་བཀྲ་ཤིས་ཤོག༔ ནོར་ལྷ་གཏེར་བདག་རབ་འབྱམས་ཀྱིས༔ འདོད་དོན་འགྲུབ་པའི་བཀྲ་ཤིས་ཤོག༔ རྩ་གསུམ་ཚེ་ལྷའི་ཚོགས་རྣམས་ཀྱིས༔ འཆི་མེད་ཚེ་ཡི་བཀྲ་ཤིས་ཤོག༔ ཅི་བསམ་འབད་མེད་ལྷུན་གྱིས་གྲུབ༔ དོན་གཉིས་མཐར་ཕྱིན་བཀྲ་ཤིས་ཤོག༔ བསྟན་དང་བསྟན་འཛིན་དར་ཞིང་རྒྱས༔ འཇིག་རྟེན་བདེ་བའི་བཀྲ་ཤིས་ཤོག༔ ཉིན་མཚན་ཀུན་ཏུ་མཆོག་གསུམ་གྱི༔ བཀྲ་ཤིས་བདེན་པས་བཀྲ་ཤིས་ཤོག༔ ཅེས་བརྗོད་མེ་ཏོག་ཆར་བསྙིལ་ཞིང་༔ བཀྲ་ཤིས་རོལ་མོ་རྒྱ་ཆེར་སྒྲོགས༔ ཨེ་མ༔ ཡང་ཟབ་དགོངས་པའི་གཏེར་གྱི་བཅུད༔ འཇམ་དཔལ་བཤེས་གཉེན་སྙིང་ཐིག་འདི༔ གཞན་དུ་འཕོ་བའི་སྐབས་མེད་པས༔ འཇམ་དཔལ་ཆོས་ཀྱི་བཤེས་གཉེན་གྱིཿའོད་གསལ་དབུ་མའི་སྒྲོམ་དུ་སྦས༔ དེས་ཀྱང་གསང་བས་རྒྱས་བཏབ་ན༔ ཡང་སྲིད་ཕྱི་མའི་དུས་ཀྱི་ཚེ༔ སྤྲུལ་པའི་རིག་འཛིན་ཟུང་ཉིད་ཀྱི༔ ཐུགས་ཀྱི་གསང་མཛོད་སྨུག་པོར་སྦས༔ སྐལ་ལྡན་གདུལ་བྱ་དུས་བབ་ཚེ༔ ཅི་རིགས་སྣང་བར་འགྱུར་བ་དང་༔ བསྟན་འགྲོར་ཕན་པ་རྒྱ་ཆེར་འབྱུང་༔ དམ་མེད་ལག་ཏུ་མ་སྤྲོད་ཅིག༔ མནྟྲ་གུ་ཧྱ་གརྒྷ་ས་མ་ཡ༔ རྒྱ་རྒྱ་རྒྱ༔ ཅེས་པའང་རིག་འཛིན་གྱི་བཙུན་པ་འཇམ་དཔལ་དགའ་བའི་གོ་ཆས། ས་གླང་གྲོ་བཞིན་ཟླ་བའི་ཚེས་༢༥ལ་གང་ཤར་ཡི་གེར་བཏབ་པ་སརྦ་ཛྙཱ་མཉྫུ་གྷོ་ཥ་སིདྡྷི་རསྟུ། ཞལ་གྲོ་བར་གྱུར་ཅིག །བཀྲ་ཤིས་པར་གྱུར་ཅིག །དངོས་གྲུབ་ཀྱི་གཏེར་མཛོད་ཆེན་པོར་བླ་མ་རྩ་བ་གསུམ་གྱིས་བྱིན་གྱིས་བརླབ་ཏུ་གསོལ༔ འདིར་འབྲེལ་ཚད་དོན་དང་ལྡན་པར་གྱུར་ཅིག༔ ༈རྩ་གསུམ་འཇམ་དཔལ་སྙིང་ཐིག་ལས༔ རྡོ་རྗེའི་དབང་གི་ཆོ་ག་བཞུགས༔ འཇམ་དཔལ་ཡེ་ཤེས་སྒྲོན་མེར་འདུད༔ གདོད་ནས་བཞུགས་པའི་ཡེ་ཤེས་སེམས༔ སྲིད་ཞི་ལས་འདས་སྲིད་ཞིའི་བདག༔ ཡེ་ཤེས་གཉིས་མེད་ཚུལ་འཆང་བ༔ གཞོན་ནུའི་ལུས་ཅན་ཉིད་དུ་བཞུགས༔ མ་རྟོགས་འཁྲུལ་པའི་ཡིད་ཅན་རྣམས༔ རྒྱུན་རིང་འཁོར་བར་ཡ་རེ་ང་༔ གཟུང་འཛིན་གཉིས་སུ་སྣང་བས་འཁྲུལ༔ རང་ངོ་ཤེས་ན་ད་ལྟ་ཡང་༔ ཡེ་ཤེས་དབྱིངས་སུ་འདུ་འབྲལ་མེད༔ འཕེལ་འགྲིབ་བྲི་གང་བྲལ་བར་བཞུགས༔ རྡོ་རྗེ་ཐེག་པའི་གསང་བ་ནི༔ ཐབས་མང་དཀའ་བ་མེད་པ་དང་༔ དབང་པོའི་ཐབས་ཀྱི་ཁྱད་པར་གྱིས༔ གཏོར་དང་བླུགས་པའི་ཆོ་ག་ཡིས༔ གང་ཟག་སྨིན་ན་མངོན་སུམ་མཐོང་༔ ལམ་ཀུན་རྩ་བ་དབང་ཉིད་དེ༔ དབང་ནི་རང་སེམས་ཉིད་ལ་རྫོགས༔ ཀུན་རྫོབ་བརྡའ་ཡི་ནུས་པ་ལས༔ བརྟེན་པས་དོན་གྱི་དབང་བཀའ་ཐོབ༔ མངོན་དུ་གྱུར་ན་རྒྱུད་དང་ལུང་༔ མན་ངག་མ་ལུས་གཅིག་ཏུ་དྲིལ༔ དེ་ཕྱིར་ཐོག་མར་དབང་ཉིད་གཅེས༔ བསྒྲུབ་གཞི་གཉུག་མའི་རྡོ་རྗེ་བཞི༔ སྐུ་གསུང་ཐུགས་དང་ཡེ་ཤེས་ཀྱི༔ དཀྱིལ་འཁོར་ཉིད་དུ་ལྷུན་གྱིས་གྲུབ༔ སྒྲུབ་བྱེད་དབང་གི་བུམ་པ་དང་༔ གསང་བ་ཤེར་ཡེ་བཞི་པ་སྟེ༔ ཕྱི་ནང་གསང་བ་དེ་ཁོ་ནའི༔ ཚུལ་དུ་ཡང་དག་ངེས་པར་གནས༔ སྒྲུབ་པོ་རྡོ་རྗེ་སློབ་དཔོན་ནི༔ དཀྱིལ་འཁོར་ཀུན་གྱི་ཁྱབ་བདག་ཆེ༔ སྐུ་བཞི་དབྱེར་མེད་ཧེ་རུ་ཀ༔ དྲུག་པ་རྡོ་རྗེ་འཆང་དུ་བཞེངས༔ ཐབས་རྣམས་ཚོགས་པའི་རྟེན་འབྱུང་གི༔ ནུས་པས་ཅིར་ཡང་རུང་བས་ན༔ རང་བཞིན་ཡོན་ཏན་བརྒྱད་ལྡན་པས༔ རིམ་པ་དབང་གི་ཆོ་ག་ཡིས༔ རྡོ་རྗེའི་སློབ་མ་རྗེས་འཛིན་བྱ༔ ས་མ་ཡ༔ དེ་ལ་དང་པོ་སའི་ཆོ་ག༔ ཡན་ལག་བཅས་པ་ལས་རུང་ཚེ༔ ལྷ་དང་བུམ་པ་སློབ་མ་རྣམས༔ ལྷག་པར་གནས་པས་ཉེ་བར་བསྙེན༔ དངོས་གཞི་བཀྲ་ཤིས་སྟེགས་ཡངས་པར༔ རྡུལ་ཚོན་ཆོ་གས་སྒྲུབ་པ་ཡི༔ དཀྱིལ་འཁོར་ཚད་དང་ལྡན་པར་བཞེངས༔ སྐུ་གསུང་ཐུགས་ཀྱི་རྟེན་རྣམས་དང་༔ བུམ་པ་བྷནྡྷ་བདུད་རྩིས་གཏམས༔ མེ་ལོང་ལི་ཁྲིའི་རྡུལ་ལྡན་པར༔ རྡོ་རྗེ་སེམས་དཔའི་མན་ཤེལ་འགོད༔ མཆོད་པ་རྒྱན་གྱིས་མཛེས་པར་བྲེས༔ བདག་མདུན་ཆོ་གས་ཡང་དག་སྒྲུབ༔ བསྐྱེད་དང་བཟླས་པས་ལས་རུང་བྱ༔ སྣོད་དུ་གྱུར་པའི་སློབ་མ་རྣམས༔ བྱུང་བསལ་བགེགས་ཀྱི་འཇུག་པ་བསྐྲད༔ ཕྱོགས་བཅིངས་དད་པས་འཁོད་པ་ལ༔ བློ་བཅོས་ལོ་རྒྱུས་རྒྱས་པར་བཤད༔ མཎྜལ་ཕུལ་ལ་གསོལ་བ་གདབ༔ ཨེ་མ་ཡང་དག་དཀྱིལ་འཁོར་ཆེ༔ རྡོ་རྗེ་འཆང་དབང་ཀུན་གྱི་རྗེ༔ དམིགས་མེད་བརྩེ་བས་ཉེར་དགོངས་ལ༔ བདག་ཅག་དཀྱིལ་འཁོར་འཇུག་པར་མཛོད༔ སྐྱབས་སེམས་བསགས་སྦྱངས་སྡོམ་པ་བཟུང་༔ མིག་དར་འཆིང་ཞིང་མེ་ཏོག་གཏད༔ སློབ་མ་རང་ཉིད་སྲས་སུ་བསྐྲུན༔ རྒྱས་གདབ་མིག་འབྱེད་མཐོང་བ་བསྟན༔ རིགས་ངེས་ཤེས་ཕྱིར་མེ་ཏོག་དོར༔ དབང་རྟགས་ཚུལ་དུ་སྤྱི་བོར་བཅིངས༔ མདུན་བསྐྱེད་འོད་ཀྱིས་ཡེ་ཤེས་བསྐུལ༔ མངོན་སུམ་བྱིན་དབབ་དམིགས་པ་གཟིར༔ བརྡ་དང་སྤོས་རོལ་དབྱངས་ཀྱིས་བསྐུལ༔ བརྟན་པར་བྱེད་པ་ནང་འཇུག་གོ༔ སླར་ཡང་གསོལ་བ་གདབ་པ་ནི༔ བྱང་ཆུབ་རྡོ་རྗེ་དཀྱིལ་འཁོར་གཙོ༔ ཡེ་ཤེས་གཉིས་མེད་ཚུལ་འཆང་བ༔ གསང་བ་རྡོ་རྗེའི་ཡང་དག་དབང་༔ བདག་ལ་ངེས་པར་སྩལ་དུ་གསོལ༔ སློབ་དཔོན་ལྷ་ཡི་འོད་ཟེར་གྱིས༔ མཁའ་ཁྱབ་གདན་གསུམ་དབང་གི་ལྷ༔ མདུན་དུ་སྤྱན་དྲངས་མཆོད་ཅིང་བསྟོད༔ གསོལ་བ་གདབ་པས་ཉེར་བསྐུལ་ཏེ༔ ཐོག་མར་བུམ་དབང་སྦྱིན་པ་ནི༔ ཧཱུྃ༔ བཀྲ་ཤིས་རིན་ཆེན་བུམ་པ་ན༔ ཡེ་ཤེས་བདུད་རྩིའི་བཅུད་ཀྱིས་གཏམས༔ སྒྱུ་འཕྲུལ་དྲྭ་བའི་དབང་བསྐུར་གྱིས༔ རྡོ་རྗེའི་སྐུ་གསུང་ཐུགས་སུ་ཤོག༔ ཨོཾ་ཀཱ་ལ་ཤ་ཨ་བྷི་ཥིཉྩ་ཨོཾ་ཧཱུྃ་ཏྲཱྃ་ཧྲཱིཿཨཱཿབདུད་རྩི་སྦྱིན་ཞིང་འཐོར་འཐུང་བྱ༔ སྤྲོ་ན་རིགས་པའི་དབང་ལྔ་བསྐུར༔ ལུས་གང་ཡེ་ཤེས་མངོན་དུ་གྱུར༔ སྣང་སྟོང་ལྷ་ཡི་ཕྱག་རྒྱར་སད༔ བརྟན་ཕྱིར་ནུས་པ་འཇུག་དབང་ནི༔ ཨོཾ༔ ཡེ་ཤེས་སྐུ་སྟེ་སྐུ་ཡི་མཆོག༔ གཞོན་ནུའི་ལུས་ཅན་མཉྫུ་ཤྲཱི༔ དཀྱིལ་འཁོར་ཀུན་གྱི་དབང་ཕྱུག་ནི༔ ཡབ་ཡུམ་གཉིས་མེད་དབང་བསྐུར་རོ༔ ཨོཾ་ཨ་ར་པ་ཙ་ན་དྷཱིཿཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ ཟག་པ་ཟད་པ་རྡོ་རྗེའི་རིགས༔ དཀྱིལ་འཁོར་ཀུན་བདག་ཆེ་བའི་མཆོག༔ རིགས་ཀྱི་བདག་པོ་ལྔ་རྣམས་ཀྱིས༔ ཡབ་ཡུམ་གཉིས་མེད་དབང་བསྐུར་རོ༔ ཨོཾ་ཧཱུྃ་ཏྲཱྃ་ཧྲཱིཿཨཱཿཀཱ་ཡ་ཨ༴ ཧཱུྃ༔ སྐྱེ་མེད་དག་པ་གཟུང་འཛིན་འདས༔ གཉིས་སུ་མེད་ཀྱང་དུ་མར་སྣང་༔ རྒྱལ་སྲས་སེམས་དཔའ་ལྕམ་དྲལ་སྟེ༔ ཡབ་ཡུམ་གཉིས་མེད་དབང་བསྐུར་རོ༔ ཨོཾ་བྷོ་དྷི་ས་ཏྭ་ཀཱ་ཡ་ཨ༔ ཧཱུྃ༔ ཉོན་མོངས་དག་པའི་ཡེ་ཤེས་ཀྱིས༔ མ་ལུས་འགྲོ་བ་སྒྲོལ་བའི་ལྷ༔ རིག་པའི་སྐྱེས་བུ་ཆེན་པོ་ནི༔ ཐུབ་པ་དྲུག་གིས་དབང་བསྐུར་རོ༔ མ་ཧཱ་མུ་ནེ་ཨ༴ ཧཱུྃཿཚད་མེད་དག་པ་འགྲོ་བའི་མགོན༔ རང་བྱུང་ཁྲོ་རྒྱལ་དཀྱིལ་འཁོར་སྐྱོངས༔ མཐར་བྱེད་སྒོ་བ་རྣམ་པ་བཞི༔ ཡབ་ཡུམ་གཉིས་མེད་དབང་བསྐུར་རོ༔ ཛཿཧཱུྃ་བྃ་ཧོཿཀཱ་ཡ༴ རྡོ་རྗེའི་བཟླས་པའི་ལུང་སྦྱིན་ཞིང་༔ སྔགས་ཀྱི་ཕྲེང་བ་མགྲིན་པར་བཞག༔ ཨཱཿགསང་སྔགས་རྒྱལ་པོ་དྲུག་ལྡན་ཞིང་༔ དངོས་གྲུབ་ཀུན་གྱི་གཞི་འཛིན་པ༔ བརྗོད་པ་ཀུན་གྱི་རྒྱུ་ཡི་མཆོག༔ ཡང་དག་རོལ་པས་དབང་བསྐུར་རོཿཝཱ་ཀ་ཨ་བྷི་ཥིཉྩ་ཨཱཿཕྱག་མཚན་གཏད་ལ་དོན་ངོ་སྤྲད༔ ཧཱུྃ༔ ཡེ་ཤེས་སྐུ་སྟེ་རང་བྱུང་བ༔ འགྲོ་བའི་མར་མེ་ཡེ་ཤེས་སྒྲོན༔ གཉིས་ཆོས་རྡོ་རྗེ་བདེ་བ་ཆེའི༔ དཀྱིལ་འཁོར་འདི་ནི་རྟག་ཏུ་གནས༔ ཙིཏྟ་ཨ་བྷི་ཥིཉྩ་ཧཱུྃ༔ ཡོན་ཏན་རྒྱན་ཆས་ཡན་ལག་གཏད༔ ཧོཿཕ་རོལ་ཕྱིན་བཅུའི་དག་པའི་མཐའ༔ ཟག་མེད་དཀྱིལ་འཁོར་འབྱུང་བའི་གཞི༔ ཡོན་ཏན་ལྡན་པ་ཡོན་ཏན་ཤེས༔ རིན་ཆེན་ཀུན་བདག་དབང་མཆོག་སྦྱིན༔ རཏྣ་ཨཱ་ལངྐ་གུ་ཎ་ཨ་བྷི་ཥིཉྩ་ཏྲཱྃ༔ ཕྲིན་ལས་སྣ་ཚོགས་རྡོ་རྗེ་གཏད༔ ཧོཿསངས་རྒྱས་ཕྲིན་ལས་བྱེད་པའི་མགོན༔ འགྲོ་ལ་ཕན་པའི་བྱེད་པ་ཅན༔ ཚར་གཅོད་རྗེས་སུ་འཛིན་པ་ཡི༔ སྒྱུ་འཕྲུལ་འདི་ནི་ཁྱོད་ལ་སྦྱིན༔ བི་ཤྭ་ཀརྨ་ཨ་བྷི་ཥིཉྩ་ཨཱཿགསང་བའི་དབང་ལ་དཀྱིལ་འཁོར་གཙོ༔ སྦྱོར་བའི་སྒྲ་དང་འོད་ཟེར་གྱིས༔ ཕྱོགས་བཅུའི་བུདྡྷ་བཀུག་ཅིང་བསྟིམ༔ ཞལ་ཞུགས་ཐུགས་ཀར་ཆགས་པས་ཞུ༔ མཁའ་གསང་ནས་སྤྲོས་ལྷག་པའི་སེམས༔ བུ་ཡིས་ལེན་ནམ་ཡང་ན་སྦྱིན༔ ཨཿབདེ་ཆེན་རོལ་པའི་ཡེ་ཤེས་ནིཿདཀར་དམར་བྱང་ཆུབ་སེམས་ཀྱི་གཟུགས༔ བཅུ་དྲུག་ཕྱེད་ཕྱེད་ཐིག་ལེ་འཆང་༔ རྟོག་བྲལ་གསང་བའི་དབང་བསྐུར་རོ༔ ཨོཾ་བོ་དྷི་ཙིཏྟ་གུ་ཧྱ་ཨ་བྷི་ཥིཉྩ་མ་ཧཱ་སུ་ཁ་ཧོཿམགྲིན་པར་རོ་རྣམས་འདུས་པའི་རྩར༔ བརྒྱུད་དེ་ལུས་གང་རྟོག་པ་བཅོམ༔ ཐབས་ཀྱི་བདེ་བས་དྲངས་པ་ཡི༔ ཡེ་ཤེས་ཉིད་ལ་ཡང་དག་བལྟ༔ ཤིན་ཏུ་གསང་བ་རྡོ་རྗེའི་ལུས༔ དོན་གྱི་ངེས་པའི་དབང་ཉིད་དོ༔ བློ་ལྡན་བརྟུལ་ཞུགས་རིགས་ཅན་ལ༔ མཚན་ལྡན་རིགས་ཀྱི་བུ་མོ་བཙལ༔ རྒྱུད་སྦྱངས་སྣོད་དུ་གྱུར་པ་དག༔ རྡོ་རྗེའི་གཟུངས་མར་གཏད་ནས་སུ༔ ཧོཿཡང་དག་སངས་རྒྱས་ཀུན་གྱི་ལམ༔ སྣ་ཚོགས་གཟུགས་ཅན་དབྱིངས་ལས་བྱུང་༔ ཁྱེར་ལ་རོལ་ཅིག་དཔའ་བོ་ཆེ༔ བདེ་མཆོག་བརྟུལ་ཞུགས་གྲུབ་པར་གྱིས༔ རྨ་མུ་དྲ་ཛྙཱན་མཎྜ་ལ་ཨ་བྷི་ཥིཉྩ་ཨཱ༔ འདུ་ཤེས་གསུམ་གྱི་རོལ་པ་ལས༔ བྱུང་བའི་ཡས་བབ་མས་བརྟན་གྱི༔ རྒྱུ་འབྲས་དགའ་བ་ངོ་སྤྲད་པས༔ བཅུ་དྲུག་ཕྱེད་ཕྱེད་ཐིག་ལེ་འཆང་༔ ཞུ་བས་དགའ་བ་སྐྱེས་པ་ན༔ བདེ་བས་མྱོས་ཚེ་སྟོང་པར་བལྟ༔ གཉིས་མེད་གཉིས་སུ་ལྷུན་གྲུབ་པས༔ ནམ་མཁའི་དེ་ཉིད་ངོ་སྤྲོད་གཅེས༔ ཐབས་ཀྱི་གསང་བ་བླ་མེད་པའི༔ ལམ་འདི་སངས་རྒྱས་ཀུན་གྱི་སྲོག༔ རྣམ་གྲོལ་ཞི་བའི་མཐར་ཐུག་པ༔ རང་ངོ་འཕྲོད་པ་ཤིན་ཏུ་གནད༔ བཞི་པ་ཡེ་ཤེས་དབང་བསྐུར་ནི༔ མི་ཕྱེད་ཅོད་པན་འཆང་བ་སྟེཿཤེལ་དང་མེ་ལོང་བརྡ་ཡི་ཐབས༔ བདེ་བའི་རྗེས་སྐྱོང་གནད་ཀྱི་གསང་༔ རྡོ་རྗེའི་ཚིག་གི་མཚམས་སྦྱར་བས༔ ཡེ་ཤེས་སེམས་དཔའི་ཞལ་མཐོང་འགྱུར༔ ཨཿཀ་དག་མེ་ལོང་དྭངས་མའི་ངོགས༔ ལྷུན་གྲུབ་འོད་གསལ་ཟེར་དང་ལྡན༔ ཀུན་ཁྱབ་ཀུན་ལས་འདས་པ་ཡི༔ ཡེ་ཤེས་དམ་པས་ཁྱོད་སྨིན་བྱ༔ ཨེ་མ་སངས་རྒྱས་གདོད་ནས་དག༔ རྡོ་རྗེའི་རིགས་ཏེ་དཀྱིལ་འཁོར་གཙོ༔ མཉམ་ཉིད་དབང་འདི་བླ་མེད་པཿརང་ཉིད་དེ་ཉིད་ངང་ལྟོས་ཤིག༔ འཇམ་དཔལ་དཔལ་གྱུར་རྫོགས་པའི་སྐུ༔ ཕྱག་བྱར་འོས་པ་བླ་མའི་རབ༔ ངོ་བོ་ཉིད་དུ་ལྷུན་གྲུབ་པ༔ ལྟོས་ཤིག་ལྟོས་ཤིག་རིགས་ཀྱི་བུ༔ སྙིང་དབུས་ཡེ་ཤེས་གསང་བ་ཆེའི༔ ཤེས་རབ་རང་བྱུང་སྒྲོན་མ་ནི༔ ཆོས་ཀུན་འབྱུང་གནས་དམ་པ་སྟེ༔ སྐུ་ལྔའི་བདག་ཉིད་ཤེས་པར་གྱིས༔ དབྱིངས་དང་རིག་པ་གཉིས་སུ་མེད༔ ངོ་བོ་བལྟས་པས་ས་ལེར་མཐོང་༔ འོད་གསལ་བླ་ན་མེད་པའི་ལམ༔ རང་ངོ་འདི་ལ་ཡང་དག་རྫོགས༔ འདི་སྟེ་དོན་གྱི་མཉྫུ་ཤྲཱི༔ ནམ་མཁའ་ཆེན་པོ་ཡོངས་སུ་དག༔ དེ་ཀོ་ངེས་པའི་རྡོ་རྗེ་སེམས༔ ཁྱོད་ཀྱི་སྙིང་ལ་ཡང་དག་གནས༔ དྷརྨ་དྷཱ་ཏུ་ཛྙཱ་ན་ཨ་བྷི་ཥིཉྩ་ཨ་ཨ༔ ངོ་བོ་མ་བཅོས་ངང་ལ་བཞག༔ ཕཊ་ཀྱིས་རྟོག་པའི་འཕྲོ་འདུ་བཅད༔ སལ་ལེ་ཧྲིག་གེའི་དོན་ངོས་བཟུང་༔ སྙིང་པོའི་གནད་ཀྱི་ངོ་སྤྲོད་གདབ༔ དབང་ལྷ་སློབ་མ་ཉིད་ལ་བསྟིམ༔ དག་བྱ་དག་བྱེད་ངོ་འཕྲོད་པས༔ དབང་བསྐུར་བས་ཀྱང་ལམ་རྣམས་རྫོགས༔ རྡོ་རྗེ་གསང་བའི་སྣོད་དུ་འགྱུར༔ ཉན་འཆད་བསྒོམ་དང་སློབ་མ་བསྡུ༔ ཆོས་ཀྱི་རྒྱལ་པོར་མངའ་དབང་བསྒྱུར་རྗེས་ལ་གཏང་རག་ལུས་འབུལ་ཞིང་༔ དམ་ཚིག་ཁས་བླངས་བསྔོ་སྨོན་བྱ༔ ཕྲིན་ལས་རིམ་པ་མཐར་དབྱུང་བས༔ ཡང་དག་འབྲས་བུའི་སར་སྦྱོར་འགྱུར༔ ཡེ་ཤེས་ལུས་ཅན་འཇམ་དཔལ་གྱི༔ ལྷ་དང་སྔགས་ཀྱི་གསང་བ་འདི༔ དུས་གསུམ་རྒྱལ་བའི་ཐུགས་ལ་གནས༔ ངེས་པའི་མཐར་ཐུག་འདི་ཡིན་པས༔ ཟབ་ཅིང་རྒྱ་ཆེ་བླ་ན་མེད༔ བསམ་མི་ཁྱབ་པར་སྣང་བ་ལས༔ ཀུན་གྱི་མཐར་ཐུག་སྙིང་པོའི་ལམ༔ དེ་ཉིད་ངེས་པའི་དོན་སྟོན་པ༔ ཐུགས་ཀྱི་ཏི་ལ་ཀ་འདི་ཉིད༔ སློབ་དཔོན་འཇམ་དཔལ་བཤེས་གཉེན་ལ༔ ཡེ་ཤེས་སེམས་དཔའ་ཉིད་ཀྱིས་སྩལ༔ དངོས་གྲུབ་འབད་མེད་ཕྱོགས་པར་བྱུང་༔ ཁྱབ་བརྡལ་སྤེལ་བར་ཤིན་ཏུ་ཕོངས༔ འོན་ཀྱང་ཐ་མའི་གདུལ་བྱ་རྣམས༔ ཡང་བར་དོར་བ་བློས་མ་བཟོད༔ སྨོན་ལམ་བཙན་པོས་རྒྱས་བཏབ་པས༔ བདག་གི་ཡེ་ཤེས་སྒྱུ་མ་ནི༔ དུས་གསུམ་ཅིར་ཡང་སྣང་བ་ལས༔ སྙིགས་མའི་དུས་ཀྱི་སྐྱེས་བུ་ནི༔ འཇམ་དཔལ་ཆོས་ཀྱི་བཤེས་གཉེན་ཞེས༔ ཟབ་རྒྱས་ཆོས་ཀྱི་བཀའ་བབ་བདུན༔ ཐུབ་པའི་བསྟན་ལ་མཆོག་ཏུ་སྨན༔ དེ་ཡི་སྐལ་བར་གཏད་རྒྱས་གདབ༔ ཕྱི་ནང་རྟེན་འབྱུང་ལེགས་ཚོགས་ན༔ རིག་པའི་རྩལ་གྱི་ཆོ་འཕྲུལ་ནི༔ ཡི་གེ་སྤྲིན་གྱི་འཁོར་ལོར་སྣང་༔ བཅས་བཅོས་མ་བྱེད་གཏན་ལ་ཕོབ༔ དད་བརྩོན་བརྟུལ་ཞུགས་ལྡན་ལ་སྦྱིན༔ ཚུལ་བཞིན་ཉམས་བླང་དྲོད་ཐོབ་པས༔ དོན་གཉིས་རྒྱ་ཆེར་འགྲུབ་པར་འགྱུར༔ ས་མ་ཡ༔ རྒྱ་རྒྱ་རྒྱ༔ ཨྠི་གུ་ཧྱཿབརྡ་ཐིམ༔ ༈ འཇམ་པའི་དཔལ་དང་ལྡན་པ་ཡི། །ཡེ་ཤེས་སྒྱུ་མ་ཞི་དང་ཁྲོ། །ཇི་སྙེད་སྣང་བ་ཐམས་ཅད་ཀུན། །གདུལ་བྱའི་རྒྱུད་དང་མཐུན་པར་ཤར། །དེ་ལས་རབ་མཆོག་གསང་བ་ཡི། །བླ་མེད་ངེས་པར་ཐིག་པ་ནི། །འཇམ་དཔལ་ཞི་ཁྲོའི་ལྷ་རྒྱུད་བཅུད། །སྟོང་སྲོག་ཡི་གེའི་རྣམ་པར་ཤར། །རྡོ་རྗེའི་སྒྲ་ཆེན་མཐའ་ཡས་པ། །འགགས་མེད་ཕྱག་རྒྱ་ཟིལ་གྱིས་གནོན། །འཁོར་འདས་ཀུན་ལ་ཁྱབ་པ་ཡི། །ཡ་མ་མོན་པ་བདུད་ཀྱི་ཚོགས། །མ་གཤིན་བདུན་བརྒྱ་ཉི་ཤུ་རྣམས། །རྡོ་རྗེའི་སྔགས་འདི་ལས་ཤར་བའི། །རང་བྱུང་གསང་བའི་ཡི་གེ་ཆེ་ཧོ། །བརྗོད་མེད་བརྗོད་པ་ཀུན་གྱི་གཞི། །ཨཱ་ལི་ཀཱ་ལིའི་སྲོག་ལྡན་པ། །ཐབས་ཤེས་ཟུང་འཇུག་ཕྱག་རྒྱ་ཆེ། །དོན་དམ་རྡོ་རྗེའི་སྒྲ་དབྱངས་ནི། །ཅིར་ཡང་འཕྲོ་ཞིང་ཅིར་ཡང་སྣང་། །དེ་ལ་ཨྱེ་ཨྱེ་ཨྱེ་རྣམ་ཐར་གྱི། །སྒོ་གསུམ་ཆོས་ཀྱི་འབྱུང་གནས་ཆེ། །ཨ་ཀྲོ་ཏེ་ཀ་འཇམ་པའི་དཔལ། །དཔའ་བོ་ཆེན་པོ་རང་བྱུང་བ། །ཡ་མནྟ་ཀ་གཤིན་རྗེའི་རྒྱལ། །ཡ་མ་ཡེ་ཡི་བདག་པོ་ནི། །ཀཱ་ལ་རཱུ་པ་ཀ་པ་ཡེ། །ཁྲོ་གཤིན་གཟུགས་ཀྱི་རྒྱལ་པོ་གང་། །ཧྲཱིཿཥྚྲི་ཨ་པ་ཡེ་ཕྱོགས་སྐྱོང་། །བདག་པོ་ཆེན་པོ་ཨ་ཨ་ནེ། །ཨ་ཨ་ནེ་སྟེ་གཤེད་ཆེན་རྣམས། །ཨུ་ཨུ་ནེ་ཨ་ནེ་འཆི་སྲོག །དུ་དུ་ནེ་དུ་ནེ་བདུད་ཀྱི་གཤེད། །ཨ་ཨི་ཨུ་ཨེ་ཨོ་ཨཾ་དབྱངས། །བཅུ་གཉིས་བདག་པོ་འཇིག་རྟེན་རྒྱལ། །ར་རཱི་ལ་ལཱི་སྲིན་པོའི་རྒྱལ། །དུ་རུ་ཡེ་ནི་ཀླུ་བདུད་གཤེད། །བྱ་ཚ་ཡེ་ནི་མཁའ་འགྲོ་དང་། །སིདྷ་ཡེཿཡི་རིག་པ་འཛིན། །ཧྲཱི་ད་ཡེ་ནི་ཞི་ཁྲོའི་ཚོགས། །བྷི་ཏ་ཡེ་ཏེ་གཟའ་བདུད་དང་། །ཙིཏྟ་ཡེ་ཡི་རུ་ཏྲའི་ཚོགས། །ཧ་ལ་ཡེ་ནི་འཕྲོག་པར་བྱེད། །མུ་ཀ་ཡེ་ནི་རྨུ་བདུད་དང་། །ཨུ་ཨུ་ནེ་ཨུ་ཨུ་ནེ་སྔགས་ཀྱི་བདག །བྱི་ཏྲི་ཏ་ནི་འདྲེ་རྣམས་དང་། །ཨ་ཨ་ན་ན་བཙན་གྱི་ཚོགས། །ཡ་མ་རཱ་ཛ་གཤིན་རྗེའི་རྒྱལ། །ཡ་མ་རཀྴ་སྲིན་གཤིན་རྣམས། །ཡ་མ་རཀ་ཨ་ལྷ་ཡི་བཙན། །ཡ་མ་རཀྵ་རོ་ལངས་དང་། །འབྱུང་པོའི་ཚོགས་རྣམས་ཐམས་ཅད་དང་། །བཻ་ཏ་ལི་ནི་ཟ་བྱེད་མ། །ཀྲོ་ཏཱི་ཤྭ་རཱི་དབང་མོའི་ཚོགས། །མ་མོ་མཁའ་འགྲོ་འབར་སྲིན་མོན། །ཨེ་ཀ་ཛཱ་ཊི་རལ་གཅིག་མ། །དེ་མ་ཁ་ལ་བཾ་རིལ་ནི། །ལྷ་མ་སྲིན་དང་སྡེ་བརྒྱད་དང་། །བགེགས་རྒྱལ་འབྱུང་པོ་ཇི་སྙེད་ཀུན། །རུ་ལུ་རུ་ལུའི་སྒྲ་ལྡན་པའི། །དྲག་པོར་ཁྲོས་པ་མ་ལུས་རྣམས། །ཤྲཱི་བཛྲ་ཀྲོ་དྷ་སྟེ། །དཔལ་ཆེན་རྡོ་རྗེ་སྲིན་པོ་ཡི། །ཡ་མ་ཀརྨ་རོ་ཥ་ཎ། །ཕྲིན་ལས་གཤེད་བུ་མི་གཡོ་བ། །ཀྲོ་དྷ་ཙཎྜ་རཀྴ་མོནྟ་ནི། །ཁྲོ་བོའི་བཀའ་ལས་མི་འདའ་ཞིང་། །འདའ་ན་ཀླད་པ་ཚལ་པར་འགེམ། ཨཱཿཧཱུྃ་ཛཿཡིས་སྲོག་མནན་པའི། །སྤུ་གྲི་ཆེན་པོ་འབར་བ་སྟེ། །རབ་ཏུ་འཇོམས་བྱེད་གསང་སྔགས་རྒྱལ། །དུས་གསུམ་དུས་མེད་ཀུན་ཏུ་སྣང་། །བརྟན་དང་གཡོ་བའི་སྒྲ་སྐད་ཀུན། །འདི་ཡི་སྲོག་ལས་མི་འདའ་ཞིང་། །དུས་གསུམ་རྒྱལ་བ་ཞི་དང་ཁྲོའི། །གསུང་དབྱངས་སྙིང་པོའི་རྡོ་རྗེའི་སྒྲ། །རང་བྱུང་གཞོམ་མེད་རང་ཤར་བ། །རྡོ་རྗེའི་ལྕེ་ཡི་སུས་བཀླག་པའི། །ཡོན་ཏན་བསྐལ་པར་བརྗོད་མི་ཤེས། །ལས་རྣམས་ཐམས་ཅད་འདིས་འགྲུབ་བོ། །བསྟན་པ་ཀུན་གྱི་འཕྲོ་བའི་གཞི། །འཇམ་དཔལ་ཞི་ཁྲོའི་ལྷ་རྒྱུད་ཀྱི། །སྙིང་པོའི་སྙིང་པོ་གསང་སྔགས་ཆེ། །འདི་ཁོ་ན་ཉིད་ངེས་པའི་དོན། །མཐར་ཐུག་དོན་དམ་བདེ་བ་ཆེ། །རང་བྱུང་གསང་བ་ཆེན་པོའི་སྔགས། །དོན་གྱི་གསལ་བྱར་བྱེད་པ་འདི། །རྡོ་རྗེའི་རིག་པ་འཛིན་པ་ཡི། །ཙིཏྟའི་དཀྱིལ་དུ་ཨ་ཐཾ་རྒྱ། །དུས་སུ་བབ་ཚེ་སྣང་བར་འགྱུར། །ཨི་ཐི་ས་མ་ཡ། རྒྱ་རྒྱ་རྒྱ། །མནྟྲ་གུ་ཧྱ་གརྦྷ་ཨ་ཏི་ཧོ༔ ༔ ༔ ༔ }} | ||
</onlyinclude> | </onlyinclude> | ||
{{TsagliCall}} | {{TsagliCall}} |
Latest revision as of 09:38, 1 June 2024
🚧 This website is under continued development. We appreciate your patience!
Wylie title | 'jam dpal ye shes sems dpa' yi sgrub pa'i thabs | ![]() |
---|---|---|
Location | chos kyi blo gros bka' 'bum Volume 9, Text 22, Pages 425-451 (Folios 1a1 to 14a4) | |
Author | འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ | |
Less details More details | ||
Tertön | འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros) | |
Citation | 'jam dbyangs mkhyen brtse chos kyi blo gros. 'jam dpal ye shes sems dpa' yi sgrub pa'i thabs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 9: 425-451. Bir, H.P.: Khyentse Labrang, 2012. | |
Genre | Revelations - gter ma · Sadhanas - Evocation Ritual - sgrub thabs | |
Deity | 'jam dpal ye shes sems dpa' |
1 Texts in this Section (sde tshan or chos tshan)