JKW-KABUM-23-'A-001-056

🚧 This website is under continued development. We appreciate your patience!

Previous Text Back to Volume PageNext Text

Wylie title	rdzogs pa chen po spyod pa gang shar rang grol
Location	mkhyen brtse'i bka' 'bum Volume 23, sde tshan 1, Text 56, Pages 107-108 (Folios 54a4 to 54b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdzogs pa chen po spyod pa gang shar rang grol. In 'jam dbyangs mkhyen brtse'i dbang po'i bka' 'bum, Vol. 23: 107-108. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

རྫོགས་པ་ཆེན་པོ་སྤྱོད་པ་གང་ཤར་རང་གྲོལ་ཞེས་བྱ་བ། ལྟ་བས་མ་མཐོང་སྒོམ་པས་མ་བཅིངས་ཤིང་། །སྤྱོད་པས་མ་བཟུང་འབྲས་བུས་མ་བསླད་པའི། །རིག་སྟོང་རྗེན་པ་དོན་གྱི་ཡེ་ཤེས་ལ། །འདུ་འབྲལ་མེད་པའི་ངང་ནས་ཕྱག་བྱས་ཏེ། །ལམ་གྱི་ལམ་མཆོག་འོད་གསལ་སྙིང་པོ་ལ། །ཞུགས་པའི་སྐལ་བཟང་ཐོབ་ལ་འཕྲིན་འདི་གདམས། །དེ་ཡིས་སྤྱོད་པའི་འཛིན་པ་མ་ལུས་ཀུན། །བློ་འདས་དབུ་མའི་དབྱིངས་སུ་གྲོལ་གྱུར་ཅིག །ད་ནི་གང་ཤར་ཆོས་རྣམས་ཇི་སྙེད་ཀྱང་། །ཤར་དུས་ཉིད་ནས་བཟང་ངན་མེད་པར་མཉམ། །མཉམ་ཉིད་ཐ་མལ་ཤེས་པར་གྲོལ་བའི་ཚེ། །སྔ་ཕྱི་མེད་དོ་ཀུན་བཟང་དགོངས་པའི་ཀློང་། །ཕྱི་རོལ་ཡུལ་གྱི་སྣང་བ་སྣ་ཚོགས་པ། །ཚོགས་དྲུག་ལྟད་མོར་ཤར་བའི་མོད་ཉིད་ནས། །གཉིས་སུ་འཛིན་པ་ཞིག་པའི་ཕྱམས་བརྡལ་འདི། །དུས་གསུམ་རྒྱལ་བ་ཡོངས་ཀྱི་གཤེགས་ཤུལ་ཡིན། །སྔོན་བསུའི་རྟོག་པ་ཐམས་ཅད་དབྱིངས་སུ་ནུབ། །ད་ལྟའི་རྟོག་པ་ཐམས་ཅད་ཐད་ཀར་ཆོད། །མ་འོངས་རྟོག་པ་ཀུན་ལ་གཟའ་གཏད་བྲལ། །དུས་གསུམ་དུས་མེད་རང་གྲོལ་ཆེན་པོར་སྤྱོད། །དེ་སྐད་བརྗོད་དུ་མེད་པའི་ཡི་གེའི་སྤྲིན། །བརྗོད་བྱར་བྱས་པའི་ལམ་གྱི་འདྲ་འབག་འདི། །ཆགས་བྲལ་པདྨ་དགྱེས་པའི་སྙིང་དབུས་ནས། །རིག་སྟོང་སེམས་ཀྱི་རྡོ་རྗེས་བསྟན་ཏེ་སོང་། ། ༈

[edit]

rdzogs pa chen po spyod pa gang shar rang grol/ rdzogs pa chen po spyod pa gang shar rang grol zhes bya ba/__lta bas ma mthong sgom pas ma bcings shing /__/spyod pas ma bzung 'bras bus ma bslad pa'i/__/rig stong rjen pa don gyi ye shes la/__/'du 'bral med pa'i ngang nas phyag byas te/__/lam gyi lam mchog 'od gsal snying po la/__/zhugs pa'i skal bzang thob la 'phrin 'di gdams/__/de yis spyod pa'i 'dzin pa ma lus kun/__/blo 'das dbu ma'i dbyings su grol gyur cig__/da ni gang shar chos rnams ji snyed kyang /__/shar dus nyid nas bzang ngan med par mnyam/__/mnyam nyid tha mal shes par grol ba'i tshe/__/snga phyi med do kun bzang dgongs pa'i klong /__/phyi rol yul gyi snang ba sna tshogs pa/__/tshogs drug ltad mor shar ba'i mod nyid nas/__/gnyis su 'dzin pa zhig pa'i phyams brdal 'di/__/dus gsum rgyal ba yongs kyi gshegs shul yin/__/sngon bsu'i rtog pa thams cad dbyings su nub/__/da lta'i rtog pa thams cad thad kar chod/__/ma 'ongs rtog pa kun la gza' gtad bral/__/dus gsum dus med rang grol chen por spyod/__/de skad brjod du med pa'i yi ge'i sprin/__/brjod byar byas pa'i lam gyi 'dra 'bag 'di/__/chags bral pad+ma dgyes pa'i snying dbus nas/__/rig stong sems kyi rdo rjes bstan te song /___/__!_