JKW-KABUM-23-'A-001-055

Previous Text Back to Volume PageNext Text

རྫོགས་པ་ཆེན་པོ་སྒོམ་པ་སྣང་སེམས་རང་གྲོལ།

Wylie title	rdzogs pa chen po sgom pa snang sems rang grol
Location	mkhyen brtse'i bka' 'bum Volume 23, sde tshan 1, Text 55, Pages 105-107 (Folios 53a5 to 54a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdzogs pa chen po sgom pa snang sems rang grol. In 'jam dbyangs mkhyen brtse'i dbang po'i bka' 'bum, Vol. 23: 105-107. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

རྫོགས་པ་ཆེན་པོ་སྒོམ་པ་སྣང་སེམས་རང་གྲོལ་ཞེས་བྱ་བ། གང་གི་ཡེ་ཤེས་ཆེད་འཛིན་རྟོག་དཔྱོད་ཀྱི། །བློ་ལ་མི་གནས་ཡེངས་མེད་དྲན་པའི་ངང་། །བསྒོམ་དང་མི་བསྒོམ་དམིགས་གཏད་ལས་འདས་པའི། །དོན་དམ་ཀ་དག་ཆེན་པོའི་གཤིས་ལ་མཆོད། །ཡང་གཅིག་གསོན་དང་དོན་མཐོང་སྐལ་བཟང་ཀུན། །ད་ནི་སྣང་སེམས་རང་སར་གྲོལ་བའི་ཕྱིར། །སྤྱོད་ཡུལ་དག་པའི་དེ་ཉིད་བསྒོམ་འདོད་པས། །རྣམ་དག་ལམ་བཟང་འདི་ལ་ནན་ཏན་མཛོད། །དང་པོའི་ལས་ཅན་འདུ་བྱེད་དྲན་པ་ཡིས། །མཉམ་པར་བཞག་པའི་ངོ་བོ་མ་ཡེངས་བྱ། །ཆོས་ཉིད་གཉུག་མའི་ངང་ལས་རྟོག་ཚོགས་གང་། །ཤར་ཡང་རང་ཉིད་དྲན་པར་གནས་འགྱུར་ཏེ། །མཉམ་རྗེས་ཀུན་ཏུ་རང་སར་བཞག་པ་ཡིས། །གཡོ་བ་མེད་པས་ཞི་ལྷག་ཟུང་འཇུག་འགྲུབ། །དེ་ནས་དྲན་པ་ཉིད་ཀྱང་བློ་འདས་ཀྱི། །ངོ་བོ་རྒྱུན་ཆད་མེད་པའི་སྲོག་ཤིང་ཅན། །དྲི་མེད་གཅེར་བུར་མཐོང་བའི་མོད་ཉིད་ནས། །སྣང་སྤྱོད་ཐམས་ཅད་ཡེ་ཤེས་རོལ་པར་འཆར། །ནམ་ཞིག་རེས་འཇོག་མེད་པར་གཅིག་ཅར་དུ། །ཀློང་ཆེན་རིག་པའི་སྦུབས་སུ་དག་པའི་ཚེ། །ད་ལྟའི་ཤེས་པ་བཟོ་མེད་འདི་ཀ་ལ། །སྣང་སྲིད་འཁོར་འདས་ཀུན་གྱི་གནད་མཚངས་རིག །བརྟན་པ་མཐར་ཕྱིན་གཉིས་སུ་འཛིན་པའི་ཆོས། །ལན་ཚྭ་ཆུ་ལ་ཐིམ་ལྟར་རང་ཞི་བས། །ཡེངས་གཞིའི་ཡུལ་དང་ཡེངས་རྒྱུའི་མཁན་པོ་ཟད། །གཏད་མེད་འོད་གསལ་དབུ་མའི་དབྱིངས་སུ་གྲོལ། །མཐར་ཐུག་གཞི་ལས་འཕགས་པའི་གཞི་སྣང་དུ། །སྲིད་དང་ཞི་བའི་རྩ་བ་ཟད་པས་ན། །མཁལ་ཁྱབ་རྡུལ་བྲལ་དྭངས་མའི་ལུས་ཅན་ལ། །སོ་སྐྱེས་བརྟགས་པའི་མཚོན་བརྗོད་དབྱིངས་སུ་ཟད། །མདོར་ན་སྣང་བ་སྒྱུ་མར་རྟོགས་པ་དང་། །སེམས་ཉིད་རྗེན་པར་རང་ངོ་འཕྲོད་པའི་ཚེ། །ཡེངས་མེད་དྲན་པས་ངང་བཞག་འབད་པ་ཡིས། །དམིགས་པ་མཐའ་དག་རང་སར་གྲོལ་བར་འགྱུར། །ཧྲིལ་གྱིས་སྒྲིམ་ལ་འཛིན་མེད་ལྷོད་ཀྱིས་ཀློད། །ཅེར་གྱིས་ལྟོས་ལ་ལྟ་བྱེད་མེད་པར་ཞོག །དྲན་པས་ཟུངས་ལ་དྲན་མེད་སྦུབས་སུ་སྐྱོལ། །འདི་ལས་གཞན་དུ་མེད་དོ་ཨེ་མ་ཧོ། །དེ་སྐད་ངེས་པ་དོན་གྱི་རྡོ་རྗེའི་གླུ། །རང་བྱུང་དྷཱུ་ཏཱིའི་དབུས་ནས་བླངས་པའི་མཐུས། །བློ་འདས་ཤེས་པ་ཟང་ཀ་རྒྱ་ཡན་དབྱིངས། །འཁྲུལ་སྣང་སྒྱུ་མའི་གར་མཁན་གྲོལ་གྱུར་ཅིག ། ༈

[edit]

rdzogs pa chen po sgom pa snang sems rang grol/ rdzogs pa chen po sgom pa snang sems rang grol zhes bya ba/__gang gi ye shes ched 'dzin rtog dpyod kyi/__/blo la mi gnas yengs med dran pa'i ngang /__/bsgom dang mi bsgom dmigs gtad las 'das pa'i/__/don dam ka dag chen po'i gshis la mchod/__/yang gcig gson dang don mthong skal bzang kun/__/da ni snang sems rang sar grol ba'i phyir/__/spyod yul dag pa'i de nyid bsgom 'dod pas/__/rnam dag lam bzang 'di la nan tan mdzod/__/dang po'i las can 'du byed dran pa yis/__/mnyam par bzhag pa'i ngo bo ma yengs bya/__/chos nyid gnyug ma'i ngang las rtog tshogs gang /__/shar yang rang nyid dran par gnas 'gyur te/__/mnyam rjes kun tu rang sar bzhag pa yis/__/g.yo ba med pas zhi lhag zung 'jug 'grub/__/de nas dran pa nyid kyang blo 'das kyi/__/ngo bo rgyun chad med pa'i srog shing can/__/dri med gcer bur mthong ba'i mod nyid nas/__/snang spyod thams cad ye shes rol par 'char/__/nam zhig res 'jog med par gcig car du/__/klong chen rig pa'i sbubs su dag pa'i tshe/__/da lta'i shes pa bzo med 'di ka la/__/snang srid 'khor 'das kun gyi gnad mtshangs rig__/brtan pa mthar phyin gnyis su 'dzin pa'i chos/__/lan tshwa chu la thim ltar rang zhi bas/__/yengs gzhi'i yul dang yengs rgyu'i mkhan po zad/__/gtad med 'od gsal dbu ma'i dbyings su grol/__/mthar thug gzhi las 'phags pa'i gzhi snang du/__/srid dang zhi ba'i rtsa ba zad pas na/__/mkhal khyab rdul bral dwangs ma'i lus can la/__/so skyes brtags pa'i mtshon brjod dbyings su zad/__/mdor na snang ba sgyu mar rtogs pa dang /__/sems nyid rjen par rang ngo 'phrod pa'i tshe/__/yengs med dran pas ngang bzhag 'bad pa yis/__/dmigs pa mtha' dag rang sar grol bar 'gyur/__/hril gyis sgrim la 'dzin med lhod kyis klod/__/cer gyis ltos la lta byed med par zhog__/dran pas zungs la dran med sbubs su skyol/__/'di las gzhan du med do e ma ho/__/de skad nges pa don gyi rdo rje'i glu/__/rang byung d+hU tI'i dbus nas blangs pa'i mthus/__/blo 'das shes pa zang ka rgya yan dbyings/__/'khrul snang sgyu ma'i gar mkhan grol gyur cig__/__!