JKW-KABUM-23-'A-001-057

Previous Text Back to Volume PageNext Text

རྫོགས་པ་ཆེན་པོ་འབྲས་བུ་འཁོར་འདས་རང་གྲོལ།

Wylie title	rdzogs pa chen po 'bras bu 'khor 'das rang grol
Location	mkhyen brtse'i bka' 'bum Volume 23, sde tshan 1, Text 57, Pages 108-109 (Folios 54b4 to 55a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdzogs pa chen po 'bras bu 'khor 'das rang grol. In 'jam dbyangs mkhyen brtse'i dbang po'i bka' 'bum, Vol. 23: 108-109. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

རྫོགས་པ་ཆེན་པོ་འབྲས་བུ་འཁོར་འདས་རང་གྲོལ་ཞེས་བྱ་བ། གཟོད་ནས་འཁྲུལ་བྲལ་གཏིང་གསལ་ཡེ་ཤེས་ནི། །ཕྲ་བའི་རང་བཞིན་འདུས་བྱས་ལས་འདས་ཕྱིར། །ཀུན་རྫོབ་ཆོས་ཀུན་དབྱིངས་སུ་ཐིམ་པ་ཡིས། །དོན་དམ་འགོག་བདེན་རྫོགས་པ་ཆེན་པོར་འདུད། །གང་ཞིག་ཡང་དག་དོན་ལ་བློ་སྦྱངས་ཏེ། །ལམ་གྱི་རིམ་པ་མཐར་ཕྱིན་མཚན་ཉིད་ནི། །མདོར་བསྡུས་རྡོ་རྗེའི་གླུ་རུ་བསྒྲགས་པ་ཡིས། །སྲིད་དང་ཞི་བའི་རྫུན་ཕུག་གཅིག་ཅར་རྡིབ། །འདི་ནི་འཁོར་དང་མྱ་ངན་འདས་པ་སྟེ། །སྤང་བླང་བསལ་གྲུབ་ཆོས་འགའ་མ་མཆིས་པས། །ཐོབ་བྱའི་འབྲས་བུ་གུད་ན་མ་དམིགས་ཀྱང་། །བཞུགས་ཚུལ་མངོན་དུ་གྱུར་ལ་འབྲས་བུར་བརྗོད། །ཀ་དག་གཞོན་ནུ་བུམ་སྐུའི་རང་རྩལ་ནི། །ལྷུན་གྲུབ་སྐུ་དང་ཡེ་ཤེས་རོལ་པ་ཅན། །ཟུང་འཇུག་སྒྱུ་འཕྲུལ་དྲྭ་བའི་རྡོ་རྗེའི་སྤྲིན། །རྣམ་པ་ཀུན་གྱི་མཆོག་ལྡན་དེ་ལ་སྣང་། །གློ་བུར་བསལ་རུང་དྲི་མའི་ཚོན་རྣམས་ཀུན། །ཇི་བཞིན་ཉིད་དུ་བཞག་པའི་མཐུས་བཅོམ་པས། །སྤངས་པ་ཕུན་ཚོགས་བྲལ་བྱ་ལས་འདས་པ། །མངོན་སུམ་རྗེན་པར་རྟོགས་པས་དབུགས་འབྱིན་བྱ། །དེ་ཕྱིར་རིས་སུ་བཅད་པའི་སངས་རྒྱས་ཞེས། །གུད་ན་མེད་དོ་བཟོ་མེད་བདེ་བ་ཆེ། ཁོར་ཡུག་འོད་གསལ་རོལ་པར་འབྱམས་ཀླས་ཚེ། །སློབ་པ་མིན་པའི་དེ་ཉིད་རང་སར་གྲོལ། །ཤིན་ཏུ་ཞི་བས་སྲིད་ལ་མི་གནས་ཤིང་། །འགག་མེད་རྩལ་གྱིས་མྱང་འདས་མཐར་མ་ལྷུང་། །མཚན་མ་མེད་པའི་ཐུགས་རྗེའི་ཟློས་གར་གྱིས། །འགྲོ་སྒྲོལ་བར་དུ་རྟག་པའི་ཕྲིན་ལས་བརྙེས། །དེ་སྐད་ཤེས་པར་བྱ་བའི་དོན་གྱི་མཆོག །མཆོག་གསང་འབྲས་བུའི་ཐུས་ཀ་གསལ་སྟོན་གང་། །གང་བློ་སྤྲོས་དང་བྲལ་བའི་རྗེས་ཐོབ་ལས། །ལས་སྣང་སྒྱུ་མའི་རོལ་མོར་སྤྱོད་བཞིན་བཀོད། ། ༈

[edit]

rdzogs pa chen po 'bras bu 'khor 'das rang grol/ rdzogs pa chen po 'bras bu 'khor 'das rang grol zhes bya ba/__gzod nas 'khrul bral gting gsal ye shes ni/__/phra ba'i rang bzhin 'dus byas las 'das phyir/__/kun rdzob chos kun dbyings su thim pa yis/__/don dam 'gog bden rdzogs pa chen por 'dud/__/gang zhig yang dag don la blo sbyangs te/__/lam gyi rim pa mthar phyin mtshan nyid ni/__/mdor bsdus rdo rje'i glu ru bsgrags pa yis/__/srid dang zhi ba'i rdzun phug gcig car rdib/__/'di ni 'khor dang mya ngan 'das pa ste/__/spang blang bsal grub chos 'ga' ma mchis pas/__/thob bya'i 'bras bu gud na ma dmigs kyang /__/bzhugs tshul mngon du gyur la 'bras bur brjod/__/ka dag gzhon nu bum sku'i rang rtsal ni/__/lhun grub sku dang ye shes rol pa can/__/zung 'jug sgyu 'phrul drwa ba'i rdo rje'i sprin/__/rnam pa kun gyi mchog ldan de la snang /__/glo bur bsal rung dri ma'i tshon rnams kun/__/ji bzhin nyid du bzhag pa'i mthus bcom pas/__/spangs pa phun tshogs bral bya las 'das pa/__/mngon sum rjen par rtogs pas dbugs 'byin bya/__/de phyir ris su bcad pa'i sangs rgyas zhes/__/gud na med do bzo med bde ba che/__khor yug 'od gsal rol par 'byams klas tshe/__/slob pa min pa'i de nyid rang sar grol/__/shin tu zhi bas srid la mi gnas shing /__/'gag med rtsal gyis myang 'das mthar ma lhung /__/mtshan ma med pa'i thugs rje'i zlos gar gyis/__/'gro sgrol bar du rtag pa'i phrin las brnyes/__/de skad shes par bya ba'i don gyi mchog__/mchog gsang 'bras bu'i thus ka gsal ston gang /__/gang blo spros dang bral ba'i rjes thob las/__/las snang sgyu ma'i rol mor spyod bzhin bkod/___/__!