JKW-KABUM-22-ZA-003

🚧 This website is under continued development. We appreciate your patience!

Previous Section Back to Volume PageNext Section

Wylie title	rgyal po chen po rnam mang thos sras kyi gtor ma'i cho ga mdor bsdus pa 'dod dgu'i dpal ster
Location	mkhyen brtse'i bka' 'bum Volume 22, sde tshan 3, Pages 37-43 (Folios 1a to 4a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rgyal po chen po rnam mang thos sras kyi gtor ma'i cho ga mdor bsdus pa 'dod dgu'i dpal ster. In 'jam dbyangs mkhyen brtse'i dbang po'i bka' 'bum, Vol. 22: 37-43. Khams sde dge rdzong sar dgon: Rdzong sar blo gros phun tshogs, 2020.
Genre	Torma-offering Rituals - gtor chog
Deity	rnam mang thos sras
Colophon	།ཞེས་པའང་ཉེར་མཁོའི་ཡན་ལག་ཏུ་བསྐུལ་བ་པོའི་བཞེད་པ་བཞིན་གཞུང་སྔ་མ་ལས་མདོར་བསྡུས་པའི་ཚུལ་གྱིས་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་འགྲོ་རྣམས་འདོད་དགུའི་འབྱོར་པ་རྫོགས་ལྡན་དུས་ཀྱི་དགའ་སྟོན་ལ་ཡོངས་སུ་སྤྱོད་པའི་རྒྱུར་གྱུར་ཅིག །སརྦ་དཱ་ཤྲི་ཡོ་བྷ་བ་ཏུ། མངྒ་ལཾ།།
	zhes pa'ang nyer mkho'i yan lag tu bskul ba po'i bzhed pa bzhin gzhung snga ma las mdor bsdus pa'i tshul gyis 'jam dbyangs mkhyen brtse'i dbang pos sbyar ba'i dge bas 'gro rnams 'dod dgu'i 'byor pa rdzogs ldan dus kyi dga' ston la yongs su spyod pa'i rgyur gyur cig__/sarba dA shri yo b+ha ba tu/__mang+ga laM//

1 Texts in this Section (sde tshan or chos tshan)

37-43	རྒྱལ་པོ་ཆེན་པོ་རྣམ་མང་ཐོས་སྲས་ཀྱི་གཏོར་མའི་ཆོ་ག་མདོར་བསྡུས་པ་འདོད་དགུའི་དཔལ་སྟེར། rgyal po chen po rnam mang thos sras kyi gtor ma'i cho ga mdor bsdus pa 'dod dgu'i dpal ster Torma-offering Rituals - gtor chog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅།།རྒྱལ་པོ་ཆེན་པོ་རྣམ་མང་ཐོས་སྲས་ཀྱི་གཏོར་མའི་ཆོ་ག་མདོར་བསྡུས་པ་འདོད་དགུའི་དཔལ་སྟེར་བཞུགས་སོ།། །། ན་མོ་གུ་རུ་པཱ་དཱ་ཡ། འདིར་རྒྱལ་པོ་ཆེན་པོ་རྣམ་ཐོས་སྲས་ལ་གཏོར་མ་མདོར་བསྡུས་པའི་ཚུལ་གྱིས་དབུལ་བར་འདོད་ན། བདག་གི་རྣལ་འབྱོར་སྔོན་དུ་འགྲོ་བས། ལེགས་པར་བཤམས་པའི་མཆོད་གཏོར། ཨོཾ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་དུ་ཁཾ་ལས་གཏོར་མ་ལྷ་ཡི་ཞལ་ཟས་ཁ་དོག་དྲི་རོ་ནུས་པ་ཕུན་སུམ་ཚོགས་པར་བསམ། ཨོཾ་ཨཱཿཧཱུྃ་གིས་བརླབ། ཨ་ཀ་རོས་བདུད་རྩིར་བསྒྱུར། ཨོཾ་རུ་རུ་སྥུ་རུ་སོགས་དང་། ནམ་མཁའ་མཛོད་སྔགས་ཀྱིས་སྤེལ། དེ་ནས་མདུན་བསྐྱེད་ནི། མདུན་དུ་བྷྲཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་པ། རྟ་བབས་དང་བཅས་པ། འཁོར་ས་རིམ་པ་གསུམ་དང་ལྡན་པའི་དབུས་ཁང་པ་བརྩེགས་པ་དགུ་ཡོད་པ། དབུས་མའི་ཕོ་བྲང་སུམ་བརྩེགས་སུ་གནས་པ་ལ། ནོར་བུ་རིན་པོ་ཆེའི་རྒྱན་སྣ་ཚོགས་པས་བརྒྱན་ཅིང་མཚན་ཉིད་ཐམས་ཅད་ཡོངས་སུ་རྫོགས་པ་གནོད་སྦྱིན་བྱེ་བའི་བསྟི་གནས་ལྕང་ལོ་ཅན་གྱི་དགའ་ཚལ་དང་དབྱེར་མེད་པའི་ཕོ་བྲང་དབུས་མའི་ནང་དུ་ཧྲཱིཿལས་སྣ་ཚོགས་པདྨ་འདབ་མ་བརྒྱད་པའི་ལྟེ་བར། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བཻ་ཡིག་སེར་པོ་གསེར་གྱི་མདོག་ཅན། དེ་ལས་འོད་ཟེར་འཕྲོས་ཚུར་འདུས་ཡོངས་སུ་གྱུར་པ་ལས་རྒྱལ་པོ་ཆེན་པོ་ངལ་བསོས་པོ་སྐུ་མདོག་ཛམ་བུ་ནཱ་དའི་ལྷུན་པོ་ལ་ཉི་མ་འབུམ་གྱིས་འཁྱུད་པའི་གཟི་བརྗིད་ཅན། ཞལ་གཅིག་ཕྱག་གཉིས་པ་གཡས་ཡིད་བཞིན་གྱི་ནོར་བུའི་རྒྱལ་མཚན་དང་། གཡོན་རིན་པོ་ཆེ་སྣ་ཚོགས་སྐྱུགས་པའི་ནེའུ་ལེ་འཛིན་པ། རིན་པོ་ཆེའི་རྒྱན་གྱིས་བརྒྱན་ཅིང་ཕྲག་གོང་གཡས་གཡོན་ན་ཉི་མ་དང་ཟླ་བ་འཆར་བ། སེངྒེ་དཀར་མོ་ཉལ་ཐབས་སུ་གནས་ཤིང་གདོང་གྱེན་དུ་ལྟ་བའི་སྟེང་ན་སེམས་དཔའི་སྐྱིལ་མོ་ཀྲུང་གིས་བཞུགས་པ། ཕྱོགས་མཚམས་ཀྱི་ཁང་བརྩེགས་རྣམས་སུ་གནོད་སྦྱིན་རྟ་བདག་བརྒྱད་དང་། འཁོར་ས་བར་པ་ན་གནོད་སྦྱིན་བྱེ་བའི་ཚོགས། འཁོར་ས་ཐ་མ་ན་སྡེ་དཔོན་ཉི་ཤུ་རྩ་བརྒྱད། སྟོབས་ཆེན་སུམ་ཅུ་རྩ་གཉིས་ལ་སོགས་པ་ལྷ་མ་སྲིན་སྡེ་བརྒྱད་དང་། གནོད་སྦྱིན་དང་སྲིན་པོའི་ཚོགས་བསམ་གྱིས་མི་ཁྱབ་པས་བསྐོར་བ། རང་གི་ཐུགས་ཀའི་འོད་ཟེར་གྱི་སྣེ་ལ་འདོད་རྒྱལ་དམར་པོ་ལྕགས་ཀྱུ་དང་ཞགས་པ་འཛིན་པ་འཕྲོས་པས་བྱང་ཕྱོགས་ལྕང་ལོ་ཅན་ནས་རྒྱལ་པོ་ཆེན་པོ་རྣམ་ཐོས་སྲས་འཁོར་དང་བཅས་པ་སྤྱན་དྲངས་ཏེ་མདུན་བསྐྱེད་ལ་ཐིམ་པར་བསམ་ཞིང་། རྡོ་རྗེ་དྲིལ་བུ་འཛིན་པས། མགོན་པོ་ཀུན་གཤེགས་ཐུགས་དམ་ཅན། །ད་ལྟ་སྙིགས་མ་ལྔ་ཡི་དུས། །ཐམས་ཅད་ཉོན་མོངས་འདམ་བྱིང་བས། །མཚམས་མེད་ལྔ་ནི་ཀུན་སྤྱོད་ཅིང་། །གཟིགས་ཤིང་གཤེགས་པའི་གནས་པའི་ཡང་། །ཤཱཀྱ་སེངྒེའི་སྤྱན་སྔར་ཁྱོད། །ཐུགས་དམ་ཞལ་བཞེས་དེ་དགོངས་ལ། །འདྲེན་པའི་བསྟན་པ་སྲུང་བ་དང་། །སེམས་ཅན་ཀུན་ལ་ཕན་སླད་དུ། །བྱང་ཕྱོགས་གནས་ན་བཞུགས་པ་རྣམས། །སེམས་ཅན་དོན་ཕྱིར་གཤེགས་སུ་གསོལ། ཨོཾ་བཻ་ཤྲཱ་མ་ཎ་ས་པ་རི་ཝཱ་ར་ས་མཱ་ཛཱཿ ཛཿཧཱུྃ་བཾ་ཧོཿ ཨོཾ་བཻ་སྭཱ་ཧཱ། ཨོཾ་ཤྲཱ་མ་ཎ་ཨཱ་ཀཪྵཱ་ཡ་ཛཿ ཞེས་དང་། བཻ་རིང་པོ་མིག ་འཛུ མ་སུམ་ཅུ་རྩ་གཉིས་ཀྱི་ཡུན་ཙམ་བརྗོད་ལ། རྒྱལ་པོའི་ཐུགས་ཀར་པདྨ་འདབ་མ་རེ་རེ་ལ་བཻ་བཞི་བཞི་བསམ་ཞིང་། དམ་ཚིག་པ་དང་ཡེ་ཤེས་པའི་ཐུགས་ཀར་འོད་ཟེར་གྱི་ལྕགས་ཀྱུས་དབྱེར་མེད་དུ་བྱས་པར་བསམ། ཨོཾ་རཏྣ་མུ་ཀུ་ཊ་ཨ་བྷི་ཥིཉྩ་མི། ཞེས་རིན་པོ་ཆེའི་ཅོད་པན་གྱི་དབང་བསྐུར། གཙོ་འཁོར་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོས་མཚན་བར་བསམ། ཨོཾ་བཻ་ཤྲཱ་མ་ཎ་ས་པ་རི་ཝཱ་སྲོཀྵ་ཎཾ་པྲ་ཏིཙྪ་ཨོཾ་ཨཱཿཧཱུྃ། དེ་བཞིན་དུ་ཐོག་མཐའ་འདྲ་བ་ལ། ཨརྒྷཾ་པདྱཾ་ཨཉྪ་མ་ཎཾ་པུཥྤེ་དྷུ་པེ་ཨཱ་ལོ་ཀེ་གནྡྷེ་ནཻ་ཝིཏྱཱ་ཤབྡ་རྣམས་སྤེལ་བས་མཆོད། རྡོ་རྗེ་ཐལ་མོ་ཁ་གྱེན་དུ་ཕྱེ་བས། ཨོཾ་བཛྲ་ཨ་མྲྀ་ཏ་ཀུཎྜལི་ཧ་ན་ཧ་ན་ཧཱུྃ་ཕ྄ཊ། ཨོཾ་བཻ་ཤྲཱ་མ་ཎ་ས་པ་རི་ཝཱ་ར་ཨི་དཾ་བ་ལིང་གྲྀཧྞ་ཏུ། ས་མ་ཡ་རཀྵནྟུ། མ་མ་སརྦ་སིདྡྷི་མྨེ་པྲ་ཡཙྪནྟུ། མ་མ་སརྦ་ཀཪྻ་སཱདྷ་ཨ་མོ་གྷ་སྭཱ་ཧཱ། ཞེས་ལྔའམ་བདུན་དང་། འཁོར་སྤྱི་ལ་ཐུན་མོང་དུ་དམིགས་ཏེ། ཨ་ཀཱ་རོ་ལན་གསུམ་གྱིས་གཏོར་མ་ཕུལ། སྤྲོ་ན། རྒྱལ་པོ་ཆེན་པོ་རྣམ་མང་ཐོས་སྲས། གནོད་སྦྱིན་རྟ་བདག་བརྒྱད། སྡེ་དཔོན་ཉི་ཤུ་རྩ་བརྒྱད། སྟོབས་ཆེན་སུམ་ཅུ་རྩ་གཉིས། གནོད་སྦྱིན་བྱེ་བའི་ཚོགས་འཁོར་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། དུས་འདི་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ་བདག་གི་ལུས་དང་གྲིབ་མ་བཞིན་དུ་འབྲལ་བ་མེད་པར་འགྲོགས་ནས་བར་དུ་གཅོད་པ་ཐམས་ཅད་ལས་བསྲུང་བ་དང་། བསྐྱབ་པ་དང་། སྦ་བར་མཛད་དུ་གསོལ། ཞི་རྒྱས་དབང་དྲག་གི་ཕྲིན་ལས་ཐམས་ཅད་ཐོགས་པ་མེད་པར་འགྲུབ་པ་དང་། ལྷ་འདྲེ་མི་གསུམ་གྱི་འགྲོ་བ་མང་པོ་དབང་དུ་འདུས་ནས་ཟས་གོས་ལོངས་སྤྱོད་ཐམས་ཅད་ཕོངས་པ་མེད་པར་ཡིད་བཞིན་དུ་འབྱོར་པ་དང་། དེ་དག་གིས་ཀྱང་སངས་རྒྱས་ཀྱི་བསྟན་པ་དང་། སེམས་ཅན་དཔག་ཏུ་མེད་པ་ལ་ཕན་པ་རྒྱ་ཆེན་པོ་འབྱུང་བར་མཛད་དུ་གསོལ། མདོར་ན་ཇི་ལྟར་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པ་དང་། མཐར་ཐུག་སངས་རྒྱས་ཀྱི་གོ་འཕང་ཐོབ་པའི་ཕྲིན་ལས་དང་སྟོང་གྲོགས་རྒྱ་ཆེན་པོ་མཛད་དུ་གསོལ། ཞེས་འདོད་པའི་དོན་ལ་གསོལ་བ་གདབ། ཧཱུྃ། མི་འཇིགས་སེངྒེའི་གདན་སྟེང་ན། །བཻ་ལས་བྱུང་བའི་མགོན་པོ་ནི། །ངལ་བསོས་དགེ་བ་སྟོབས་པོ་ཆེ། །ས་བརྒྱད་དབང་ཕྱུག་ཁྱེད་ལ་བསྟོད། །བཙུན་མོ་བཞི་དང་སྲས་བཞི་དང་། ཁྱད་པར་ལས་སྒྲུབ་གནོད་སྦྱིན་བརྒྱད། །ནོར་སྟེར་བ་ཡི་ཀླུ་ཆེན་བརྒྱད། །ལྷ་སྲིན་སྡེ་བརྒྱད་འཁོར་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། ཅེས་པས་བསྟོད། དགྲ་བགེགས་མ་ལུས་གཞོམ་པ་དང་། །འབྱོར་པའི་ལོངས་སྤྱོད་ཕུན་ཚོགས་ཤིང་། །འདོད་དགུ་ཡིད་བཞིན་འགྲུབ་པ་དང་། །གཞན་དོན་ལྷུན་གྱིས་གྲུབ་པར་ཤོག །ཅེས་ཕྲིན་ལས་བཅོལ། གཏོར་ཆོས་གཞན་དང་འབྲེལ་ན་རྗེས་ཐུན་མོང་དུ་བྱ་ཞིང་། འདི་རྐྱང་པའི་ཚེ། ཡི་གེ་བརྒྱ་པས་ལྷག་ཆད་ཁ་བསྐང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། རྟེན་ཡོད་ན་བརྟན་བཞུགས་དང་། མེད་ན། བཻ་སྔར་བཞིན་བརྗོད་པས་ཐུགས་ཀའི་འོད་ཀྱི་ལྕགས་ཀྱུས་གྲོལ་ཏེ་པད་འདབ་ཀྱི་བཻ་རྣམས་གཤེགས་པར་བསམ། ཨོཾ་བཛྲ་མུཿས་ཡེ་ཤེས་པ་གཤེགས་སུ་གསོལ། དམ་ཚིག་པ་རང་ལ་ཐིམ་པར་མོས་ལ། གནས་གསུམ་བྱིན་བརླབས་དང་། བསྔོ་སྨོན་བཀྲ་ཤིས་སོགས་སྤྱི་དང་མཐུན་པར་བྱའོ། །ཞེས་པའང་ཉེར་མཁོའི་ཡན་ལག་ཏུ་བསྐུལ་བ་པོའི་བཞེད་པ་བཞིན་གཞུང་སྔ་མ་ལས་མདོར་བསྡུས་པའི་ཚུལ་གྱིས་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་འགྲོ་རྣམས་འདོད་དགུའི་འབྱོར་པ་རྫོགས་ལྡན་དུས་ཀྱི་དགའ་སྟོན་ལ་ཡོངས་སུ་སྤྱོད་པའི་རྒྱུར་གྱུར་ཅིག །སརྦ་དཱ་ཤྲི་ཡོ་བྷ་བ་ཏུ། མངྒ་ལཾ།། །།

[edit]

rgyal po chen po rnam mang thos sras kyi gtor ma'i cho ga mdor bsdus pa 'dod dgu'i dpal ster/ @#//rgyal po chen po rnam mang thos sras kyi gtor ma'i cho ga mdor bsdus pa 'dod dgu'i dpal ster bzhugs so//__// na mo gu ru pA dA ya/__'dir rgyal po chen po rnam thos sras la gtor ma mdor bsdus pa'i tshul gyis dbul bar 'dod na/__bdag gi rnal 'byor sngon du 'gro bas/__legs par bshams pa'i mchod gtor/__oM a mr-i tas bsangs/__swa b+hA was sbyangs/__stong pa'i ngang las b+h+rU~M las rin po che'i snod du khaM las gtor ma lha yi zhal zas kha dog dri ro nus pa phun sum tshogs par bsam/__oM AHhU~M gis brlab/__a ka ros bdud rtsir bsgyur/__oM ru ru s+phu ru sogs dang /__nam mkha' mdzod sngags kyis spel/__de nas mdun bskyed ni/__mdun du b+h+rU~M las rin po che sna tshogs las grub pa'i gzhal yas khang gru bzhi sgo bzhi pa/__rta babs dang bcas pa/__'khor sa rim pa gsum dang ldan pa'i dbus khang pa brtsegs pa dgu yod pa/__dbus ma'i pho brang sum brtsegs su gnas pa la/__nor bu rin po che'i rgyan sna tshogs pas brgyan cing mtshan nyid thams cad yongs su rdzogs pa gnod sbyin bye ba'i bsti gnas lcang lo can gyi dga' tshal dang dbyer med pa'i pho brang dbus ma'i nang du hrIHlas sna tshogs pad+ma 'dab ma brgyad pa'i lte bar/__a las zla ba'i dkyil 'khor gyi steng du bai yig ser po gser gyi mdog can/__de las 'od zer 'phros tshur 'dus yongs su gyur pa las rgyal po chen po ngal bsos po sku mdog dzam bu nA da'i lhun po la nyi ma 'bum gyis 'khyud pa'i gzi brjid can/__zhal gcig phyag gnyis pa g.yas yid bzhin gyi nor bu'i rgyal mtshan dang /__g.yon rin po che sna tshogs skyugs pa'i ne'u le 'dzin pa/__rin po che'i rgyan gyis brgyan cing phrag gong g.yas g.yon na nyi ma dang zla ba 'char ba/__seng+ge dkar mo nyal thabs su gnas shing gdong gyen du lta ba'i steng na sems dpa'i skyil mo krung gis bzhugs pa/__phyogs mtshams kyi khang brtsegs rnams su gnod sbyin rta bdag brgyad dang /__'khor sa bar pa na gnod sbyin bye ba'i tshogs/__'khor sa tha ma na sde dpon nyi shu rtsa brgyad/__stobs chen sum cu rtsa gnyis la sogs pa lha ma srin sde brgyad dang /__gnod sbyin dang srin po'i tshogs bsam gyis mi khyab pas bskor ba/__rang gi thugs ka'i 'od zer gyi sne la 'dod rgyal dmar po lcags kyu dang zhags pa 'dzin pa 'phros pas byang phyogs lcang lo can nas rgyal po chen po rnam thos sras 'khor dang bcas pa spyan drangs te mdun bskyed la thim par bsam zhing /__rdo rje dril bu 'dzin pas/__mgon po kun gshegs thugs dam can/__/da lta snyigs ma lnga yi dus/__/thams cad nyon mongs 'dam bying bas/__/mtshams med lnga ni kun spyod cing /__/gzigs shing gshegs pa'i gnas pa'i yang /__/shAkya seng+ge'i spyan sngar khyod/__/thugs dam zhal bzhes de dgongs la/__/'dren pa'i bstan pa srung ba dang /__/sems can kun la phan slad du/__/byang phyogs gnas na bzhugs pa rnams/__/sems can don phyir gshegs su gsol/__oM bai shrA ma Na sa pa ri wA ra sa mA dzAH__dzaHhU~M baM hoH__oM bai swA hA/__oM shrA ma Na A kaR+ShA ya dzaH__zhes dang /__bai ring po mig__ 'dzu_ma sum cu rtsa gnyis kyi yun tsam brjod la/__rgyal po'i thugs kar pad+ma 'dab ma re re la bai bzhi bzhi bsam zhing /__dam tshig pa dang ye shes pa'i thugs kar 'od zer gyi lcags kyus dbyer med du byas par bsam/__oM rat+na mu ku Ta a b+hi Shiny+tsa mi/__zhes rin po che'i cod pan gyi dbang bskur/__gtso 'khor thams cad kyi spyi bor oM dkar po/__mgrin par AHdmar po/__thugs kar hU~M sngon pos mtshan bar bsam/__oM bai shrA ma Na sa pa ri wA srok+Sha NaM pra tits+tsha oM AHhU~M/__de bzhin du thog mtha' 'dra ba la/__ar+g+haM pad+yaM any+tsha ma NaM puSh+pe d+hu pe A lo ke gan+d+he nai wit+yA shab+da rnams spel bas mchod/__rdo rje thal mo kha gyen du phye bas/__oM badz+ra a mr-i ta kuN+Dali ha na ha na hU~M pha?T/__oM bai shrA ma Na sa pa ri wA ra i daM ba ling gr-ih+Na tu/__sa ma ya rak+Shan+tu/__ma ma sarba sid+d+hi m+me pra yats+tshan+tu/__ma ma sarba kaR+Ya sAd+ha a mo g+ha swA hA/__zhes lnga'am bdun dang /__'khor spyi la thun mong du dmigs te/__a kA ro lan gsum gyis gtor ma phul/__spro na/__rgyal po chen po rnam mang thos sras/__gnod sbyin rta bdag brgyad/__sde dpon nyi shu rtsa brgyad/__stobs chen sum cu rtsa gnyis/__gnod sbyin bye ba'i tshogs 'khor dang bcas pa rnams kyis mchod sbyin gyi gtor ma rgya chen po 'di bzhes la/__dus 'di nas bzung ste byang chub ma thob kyi bar du bdag gi lus dang grib ma bzhin du 'bral ba med par 'grogs nas bar du gcod pa thams cad las bsrung ba dang /__bskyab pa dang /__sba bar mdzad du gsol/__zhi rgyas dbang drag gi phrin las thams cad thogs pa med par 'grub pa dang /__lha 'dre mi gsum gyi 'gro ba mang po dbang du 'dus nas zas gos longs spyod thams cad phongs pa med par yid bzhin du 'byor pa dang /__de dag gis kyang sangs rgyas kyi bstan pa dang /__sems can dpag tu med pa la phan pa rgya chen po 'byung bar mdzad du gsol/__mdor na ji ltar bsam pa'i don thams cad yid bzhin du 'grub pa dang /__mthar thug sangs rgyas kyi go 'phang thob pa'i phrin las dang stong grogs rgya chen po mdzad du gsol/__zhes 'dod pa'i don la gsol ba gdab/__hU~M/__mi 'jigs seng+ge'i gdan steng na/__/bai las byung ba'i mgon po ni/__/ngal bsos dge ba stobs po che/__/sa brgyad dbang phyug khyed la bstod/__/btsun mo bzhi dang sras bzhi dang /__khyad par las sgrub gnod sbyin brgyad/__/nor ster ba yi klu chen brgyad/__/lha srin sde brgyad 'khor bcas la/__/mchod cing bstod de phyag kyang 'tshal/__ces pas bstod/__dgra bgegs ma lus gzhom pa dang /__/'byor pa'i longs spyod phun tshogs shing /__/'dod dgu yid bzhin 'grub pa dang /__/gzhan don lhun gyis grub par shog__/ces phrin las bcol/__gtor chos gzhan dang 'brel na rjes thun mong du bya zhing /__'di rkyang pa'i tshe/__yi ge brgya pas lhag chad kha bskang /__ma 'byor pa dang sogs kyis nongs pa bzod par gsol/__rten yod na brtan bzhugs dang /__med na/__bai sngar bzhin brjod pas thugs ka'i 'od kyi lcags kyus grol te pad 'dab kyi bai rnams gshegs par bsam/__oM badz+ra muHsa ye shes pa gshegs su gsol/__dam tshig pa rang la thim par mos la/__gnas gsum byin brlabs dang /__bsngo smon bkra shis sogs spyi dang mthun par bya'o/__/zhes pa'ang nyer mkho'i yan lag tu bskul ba po'i bzhed pa bzhin gzhung snga ma las mdor bsdus pa'i tshul gyis 'jam dbyangs mkhyen brtse'i dbang pos sbyar ba'i dge bas 'gro rnams 'dod dgu'i 'byor pa rdzogs ldan dus kyi dga' ston la yongs su spyod pa'i rgyur gyur cig__/sarba dA shri yo b+ha ba tu/__mang+ga laM//__// [�]