JKW-KABUM-19-DZA-001-039

🚧 This website is under continued development. We appreciate your patience!

Previous Text Back to Volume PageNext Text

Wylie title	rje btsun sa skya pa chen po ngag dbang kun dga' blo gros sangs rgyas bstan pa'i rgyal mtshan dpal bzang po ni
Location	mkhyen brtse'i bka' 'bum Volume 19, sde tshan 1, Text 39, Pages 326-334 (Folios 163b3 to 167b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rje btsun sa skya pa chen po ngag dbang kun dga' blo gros sangs rgyas bstan pa'i rgyal mtshan dpal bzang po ni. In 'jam dbyangs mkhyen brtse'i dbang po'i bka' 'bum, Vol. 19: 326-334. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

39 326-334	རྗེ་བཙུན་ས་སྐྱ་པ་ཆེན་པོ་ངག་དབང་ཀུན་དགའ་བློ་གྲོས་སངས་རྒྱས་བསྟན་པའི་རྒྱལ་མཚན་དཔལ་བཟང་པོ་ནི། rje btsun sa skya pa chen po ngag dbang kun dga' blo gros sangs rgyas bstan pa'i rgyal mtshan dpal bzang po ni History Texts - lo rgyus   ·   Religious History Texts - chos 'byung	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །རྗེ་བཙུན་ས་སྐྱ་པ་ཆེན་པོ་ངག་དབང་ཀུན་དགའ་བློ་གྲོས་སངས་རྒྱས་བསྟན་པའི་རྒྱལ་མཚན་དཔལ་བཟང་པོ་ནི། དུས་གསུམ་གྱི་དེ་བཞིན་གཤེགས་པ་མཐའ་དག་གི་སྙིང་རྗེའི་རང་གཟུགས་གཅིག་ཏུ་འདྲིལ་བ་བྱང་ཆུབ་སེམས་དཔའ་ཆེན་པོ་ལག་ན་པདྨའི་ཞབས་ཀྱི་ཡེ་ཤེས་སྒྱུ་འཕྲུལ་དྲྭ་བའི་ཟློས་གར་ལས། རྒྱ་གར་འཕགས་པའི་ཡུལ་དུ་མ་ཧཱ་པཎྜི་ཏ་དྲི་མེད་བཤེས་གཉེན་དང་། ཛཻ་ཏཱ་རི་དགྲ་ལས་རྣམ་པར་རྒྱལ་བ། བོད་འདིར་བསྟན་པ་སྔ་དར་གྱི་དུས་སུ་མཐུ་སྟོབས་ནུས་པའི་དབང་ཕྱུག་ལྷ་ལུང་དཔལ་གྱི་རྡོ་རྗེ་དང་། ཕྱི་དར་གྱི་ཚེ་བླ་མ་དྷཱ་བྱང་ཆུབ་སེམས་དཔའ། ཁྱད་པར་དུ་ཡོངས་རྫོགས་བསྟན་པའི་མངའ་བདག་བརྩེ་ཆེན་ཀུན་དགའ་སྙིང་པོ། བདག་ཆེན་རྡོ་རྗེ་འཆང་བློ་གྲོས་རྒྱལ་མཚན། གྲུབ་པའི་དབང་ཕྱུག་ཐང་སྟོང་རྒྱལ་པོ། རྗེ་བཙུན་གྲོ་ལུང་པ་ཆེན་པོ་མང་ཐོས་བསོད་ནམས་ཆོས་འཕེལ་སོགས་སྐྱེས་རབས་ཀྱི་ཕྲེང་བ་ཚར་དུ་དངར་བ་བཟུང་བའི་མཐར། ཁ་བ་ཅན་ཙམ་ན་རིགས་རུས་ཕུན་སུམ་ཚོགས་པ་ཀུན་གྱི་རྩེ་མོར་སོན་པ་འོད་གསལ་འཁོན་གྱི་གདུང་ལས། ཡབ་རྗེ་འཇམ་དབྱངས་བསོད་ནམས་རིན་ཆེན་དང་། ཡུམ་གྲུབ་པའི་དབང་ཕྱུག་ལང་གྲོ་ལོ་ཙཱ་བ་དཀོན་མཆོག་འབྱུང་གནས་ཀྱི་བརྒྱུད་ལས་སོན་པ། ཀོ་ཅག་སྔགས་པའམ་འགྲོ་མགོན་པར་གྲགས་པའི་སྲས་མོ་ཡེ་ཤེས་ཀྱི་མཁའ་འགྲོའི་མཚན་དང་ལྡན་པ་བསོད་ནམས་དཔལ་གྱི་དབང་མོའི་སྲས་སུ་རབ་བྱུང་བཅུ་གཉིས་པའི་ནང་ཚན་ཞི་བ་སྟེ་ས་བྱར་འབོད་པའི་དཔྱིད་ཐ་ནག་པ་ཟླ་བའི་ཡར་ཚེས་བཅུ་གཅིག་གི་ཉི་ཤར་ལ་ནམ་མཁའ་འཇའ་འོད་ཀྱིས་གང་བ་དང་། མེ་ཏོག་གི་ཆར་བསྙིལ་བ་སོགས་བཀྲ་ཤིས་པའི་དགེ་མཚན་བསམ་གྱིས་མི་ཁྱབ་པ་དང་བཅས་ཏེ་འཁྲུངས། དེ་མ་ཐག་ནས་ཐུགས་དྲན་གྱི་རྣམ་པ་གསལ་ཞིང་། ཡབ་རྗེ་མཆོག་ནས་མཚན་ངག་དབང་ཀུན་དགའ་བསོད་ནམས་གྲགས་པ་བློ་གྲོས་ཞེས་གསོལ་ཞིང་། འདུས་པ་འཕགས་ལུགས་ཀྱི་དཀྱིལ་འཁོར་དུ་ཐོག་མར་སྨིན་པར་མཛད། གསུང་དང་པོ་བྱེ་བའི་ཚེ་ཨ་ར་པ་ཙ་ན་དྷཱིཿཞེས་གསུངས་པ་སོགས་ངོ་མཚར་གྱི་མཛད་སྤྱོད་མཐའ་ཀླས། དགུང་ལོ་བདུན་པ་ལྗགས་ཀློག་ཕུལ་བ་ཙམ་གྱིས་ཚེགས་མེད་པར་མཁྱེན་པ་ནས་བཟུང་རིམ་གྱིས་ཐོས་བསམ་གྱི་ཚུལ་འཇུག་པར་མཛད་དེ། ཡབ་རྗེ་མཆོག་ལས་ལམ་འབྲས་ཚོགས་བཤད་ཀྱིས་མཚོན་ཟབ་རྒྱས་ཀྱི་གདམས་པ་རྒྱ་མཚོ་ལྟ་བུ་བཞེས། དགུང་གྲངས་བཅུ་གཉིས་པར་གསེར་ཁྲིར་རིན་པོ་ཆེ་མངའ་གསོལ་ཞིང་། དགུང་གྲངས་བཅུ་གསུམ་པའི་ཚེ་ཡབ་རྗེ་ཞི་བར་གཤེགས་པའི་དགོངས་རྫོགས་ཕོགས་མཛད། བཅུ་བཞི་པ་ཐར་རྩེ་རྡོ་རྗེ་འཆང་ནམ་མཁའ་བསམ་འགྲུབ་ལས་དགེ་བསྙེན་གྱི་སྡོམ་པ་བཞེས་ཏེ་ངག་གི་དབང་ཕྱུག་ཀུན་དགའ་བློ་གྲོས་བསྟན་པའི་རྒྱལ་མཚན་དཔལ་བཟང་པོ་ཞེས་མཚན་དུ་གསོལ། དེ་ནས་མི་རིང་བར་ལྷ་ཁང་མཁན་པོ་དབང་ཕྱུག་ཕུན་ཚོགས་པའི་དྲུང་དུ་རབ་ཏུ་བྱུང་བར་མཛད་དེ། སྔར་གྱི་མཚན་གྱི་སྟེང་དུ་སངས་རྒྱས་བསྣན་པས། དེ་ཕྱིན་ཆད་ངག་དབང་ཀུན་དགའ་བློ་གྲོས་སངས་རྒྱས་བསྟན་པའི་རྒྱལ་མཚན་དཔལ་བཟང་པོ་ཞེས་དོན་ལྡན་གྱི་སྙན་པས་སྲིད་པའི་རྩེ་མོར་བརྒལ་བར་གྱུར་ཅིང། ཐར་རྩེ་རྡོ་རྗེ་འཆང་ཆེན་པོ་ལས་ལུགས་གཉིས་ཀྱི་བཀའ་དྲིན་མཆོག་ཏུ་ནོས། དགུང་གྲངས་བཅོ་ལྔ་པར་དབུས་ཕེབས་སྐབས་ཡར་ཀ་པོ་རུ་ཀླུང་ཁྲ་འབྲུག་ཏུ་གནས་གསར་རྡོ་རྗེ་འཆང་ཐོག་མར་མཇལ་བའི་ཚེ་མི་ཕྱེད་པའི་ཐུགས་དད་འཁྲུངས། བཀའ་ཆོས་ཀྱི་སྒོ་དབྱེ་བའི་དང་པོར་སྒྲོལ་དཀར་ཡིད་བཞིན་འཁོར་ལོ་ཐུན་མོང་མ་ཡིན་པའི་རྗེས་གནང་ཞིག་སྩལ་བས་གསང་ཆེན་སློབ་བཤད་ཀྱི་བསྟན་པའི་བདག་པོར་འགྱུར་བའི་རྟེན་འབྲེལ་ཁྱད་པར་ཅན་འགྲིགས། བཅུ་དྲུག་པར་གདན་ས་ཆེན་པོར་རྗེ་དེ་ཉིད་སྤྱན་དྲངས་ཏེ་ལམ་འབྲས་བུ་དང་བཅས་པ་གསང་ཆེན་སློབ་བཤད་ཀྱིས་མཚོན་པའི་སྔ་ཕྱིར་ཟབ་པ་དང་རྒྱ་ཆེ་བའི་དམ་པའི་ཆོས་ཀྱི་བདུད་རྩི་བགྲང་ཡས་ཤིག་བཞེས་པར་མཛད། གཞན་ཡང་རྗེ་ཉིད་ཀྱི་གསུང་ལས། ཡབ་རྗེ་རྡོ་རྗེ་འཆང་དང་ཐར་རྩེ་རྗེས། །གནས་གསར་རྗེ་དང་བྲག་རྩ་རྗེ་བཙུན་དྲུང་། །གཞི་དགོན་རབ་བརྟན་བཟང་དང་རྟ་ནག་མཁན། །ཚུལ་ཁྲིམས་བཟང་དང་ངོར་ཆེན་བསོད་ནམས་མཚན། །སངས་རྒྱས་ཡེ་ཤེས་དཔལ་ལྡན་ཆོས་སྐྱོང་ཞབས། །གོང་དཀར་བསོད་ནམས་བློ་གྲོས་རྣམ་མཁྱེན་གྲོལ། །ཆོས་དབང་རྒྱ་མཚོ་ཆུ་རི་བཀྲ་ཤིས་དོན། །ཀུན་དགའ་ཆོས་འཕེལ་རིན་ཆེན་བཟང་པོ་སྟེ། །གོང་དཀར་རྣམ་ལྔ་རིན་ཆེན་མི་འགྱུར་ཞབས། །འགྲོ་མགོན་མཐུ་དབང་དེ་སྲས་རིག་འཛིན་མཚན། །མཁན་ཆེན་དབང་ཕུན་མཁན་ཆེན་ཀུན་དགའ་ཟླ། །སེང་གེ་རྒྱལ་མཚན་ཤར་རི་མངའ་བདག་རྗེ། །རྒྱལ་དབང་སྐལ་བཟང་རྗེ་དང་མཆོག་སྤྲུལ་ཞབས། །དཔལ་ལྡན་ནོ་མི་ཧན་དང་འོན་རྒྱལ་སྲས། ཁྲི་ཆེན་རིན་ཆེན་རྣམ་རྒྱལ་སྲས་མཆོག་བཅས། །འབྲི་གུང་རྗེ་དང་བསམ་སྡིང་ཡང་ཟབ་རྗེ། །ཀུན་དགའ་སངས་རྒྱས་ཞྭ་ལུ་ཡེ་ཤེས་གྲགས། །དངོས་གྲུབ་སྡིང་དང་ཀུན་དགའ་དོན་གསལ་སོགས། །གུས་པས་བསྟེན་ནས་རིས་མེད་ཆོས་རྒྱུད་ཞུས། །ཞེས་གསུངས་པ་ལྟར་ཡོངས་འཛིན་དམ་པ་དེ་དག་རྣམས་ལས་དམ་པའི་ཆོས་ཀྱི་བདུད་རྩི་བླངས་ཏེ་མང་དུ་ཐོས་པ་རྒྱ་མཚོའི་མཐར་སོན་པར་མཛད་པའི་ཚུལ་གསན་ཐོ་རིན་པོ་ཆེ་པོད་ཆེན་གཉིས་སུ་གསལ་བ་ལྟར་དང་། དེ་དག་གི་བསམ་པས་སྒྲོ་འདོགས་བཅད་པས་རང་གཞན་གྱི་གཞུང་ལུགས་མ་འདྲེས་པར་རྟོགས་ཏེ་ཀློག་པ་ཐོས་བསམ་གྱི་འཁོར་ལོ་དང་། དཔལ་ཀྱེ་རྡོ་རྗེའི་གཞི་ཡི་བསྙེན་༡༣པ་ལན་གསུམ་གྱིས་མཚོན་ལྷག་པའི་ལྷ་དང་ཆོས་སྲུང་རྒྱ་མཚོའི་བསྐྱེད་རྫོགས་ཀྱི་ཉམས་ལེན་མཚམས་སུ་བཅད་པ་དུ་མ་དང་། རྒྱུན་བར་ཀྱང་ཉིན་ཞག་ཕྲུག་རེར་ལྷག་པའི་ལྷ་མི་འདྲ་བ་སུམ་༢༧ཅུར་ཉེ་བའི་སྒོམ་བཟླས་སོགས་ཀྱིས་མཚོན་སྤོང་བ་བསམ་གཏན་གྱི་འཁོར་ལོ་དང་། ཐུབ་བསྟན་ལྷ་ཁང་ཆེན་མོ་ཞིག་གསོས་གསར་བཞེངས་ལྟ་བུ་དང་། མཆོད་སྡོང་འཛམ་གླིང་འོད་གསལ་གྱིས་མཚོན་སྐུ་གསུང་ཐུགས་རྟེན་གསར་བཞེངས་གྲངས་མང་། དབུས་ཕེབས་ལན་གསུམ་དང་། གདན་ས་ཆེན་པོར་སྔ་ཕྱི་དུ་མར་གསུང་ངག་ལམ་འབྲས་ཚོགས་བཤད་ཚར་ལྔ། སློབ་བཤད་ཚར་གཅིག་གིས་ཐོག་དྲངས་གང་གསན་པ་ཐམས་ཅད་ལན་གྲངས་དུ་མར་ཆོས་ཀྱི་སྦྱིན་པ་རྒྱ་ཆེ་ལ་རྒྱུན་མི་འཆད་པར་སྩལ་བས་བསྟན་པའི་སྲོག་མཐུད་པ་ལྟ་བུའི་སྐུ་དྲིན་གཞལ་བར་དཀའ་བ་སོགས་བྱ་བ་ལས་ཀྱི་འཁོར་ལོ་དང་། གཞན་ཡང་ཆོས་ཉིད་ཇི་ལྟ་བའི་གནས་ལུགས་མངོན་དུ་གཟིགས་ཤིང་། ཆོས་ཅན་ཤེས་བྱའི་ཡུལ་ལ་མངོན་གྱུར་དང་ལྐོག་གྱུར་མཐའ་དག་རྗེན་པར་གཟིགས་པའི་མཁྱེན་པ། སེམས་ཅན་དབུལ་ཕོངས་སོགས་སྡུག་བསྔལ་བ་དག་གཟིགས་པ་ན། ང་ཁྲི་མཐོན་པོར་ཟས་གོས་གྱ་ནོམ་པ་ལ་ལོངས་སྤྱོད་པ་འདི་ལྟར་ན། ཁོང་སྙིང་རྗེ་གསུངས་ནས་ཟས་གོས་སོགས་ཀྱིས་ཚིམ་པར་མཛད་པ་དང། ཁྲོམ་གྱི་འདུ་ཚོགས་ཆེན་པོ་གཟིགས་པ་ན་སྤྱན་ཆབ་ཤར་གྱིས་འབྱུང་བ་སོགས་བྱང་ཆུབ་ཀྱི་སེམས་བཅོས་མིན་རྒྱུད་ལ་འཁྲུངས་པའི་བརྩེ་བ། ཕྱི་ནང་གསང་བའི་ཆོས་སྲུང་ཐམས་ཅད་བྲན་དུ་ཁོལ་བས་བསྟན་དགྲར་གྱུར་པ་སོགས་ལའང་ཐུགས་དམིགས་གཏད་པ་ཙམ་གྱིས་ཚར་བཅད་པ་གྲུབ་པ་སོགས་ནུས་པའི་ཕུལ་དུ་ཕྱིན་ཅིང་། རྒྱུན་དུ་དག་པའི་འོད་གསལ་གྱི་གཟིགས་ངོར་བླ་མ་ཡི་དམ་མཁའ་འགྲོའི་གཟིགས་སྣང་རྒྱུན་མི་འཆད་ཅིང་། ཁྱད་པར་ཡབ་རྗེ་དམ་པ་དང་། གནས་གསར་རྡོ་རྗེ་འཆང་ཆེན་པོ་ནས་ཡེ་ཤེས་ཀྱི་སྐུས་ཡང་ཡང་དུ་རྗེས་སུ་བཟུང་ཞིང་ཆོས་སྟོན་པར་མཛད། གུར་ཞལ་སོགས་ཆོས་སྲུང་རྒྱ་མཚོས་དངོས་ཉམས་མནལ་ལམ་དུ་ཞལ་བསྟན་ཅིང་ཕྲིན་ལས་སྒྲུབ་པར་ཁས་བླངས། ཁྱད་པར་དམ་ཅན་པུ་ཏྲ་ལྕམ་དྲལ་དང་། ཕུར་སྲུང་དཀར་བདུད་ལ་སོགས་པས་བྲན་བཞིན་དུ་བཀུར་ནས་སྐུ་མཚམས་སོགས་ཀྱི་ཚེ་མཆོད་མེ་སྦར་བ་དང་། བཞེངས་པར་བསྐུལ་བ་ཚུན་ཆད་མངོན་སུམ་དུ་མཛད་པར་གྲགས། གཞན་ཡང་གྲུབ་པའི་རྟགས་མཚན་བསམ་ལས་འདས་ཤིང་། ལྷག་པར་ཕྱིས་སུ་ལམ་འབྲས་སློབ་བཤད་གནང་བའི་ཚེ། འོད་གསལ་གྱི་ངང་ལ་ངོར་ཆེན་རྡོ་རྗེ་འཆང་གིས་ཞལ་གཟིགས་ཏེ་སློབ་མ་ཀ་བཞི་གདུང་བརྒྱད་སོགས་འབྱུང་བ་ལུང་བསྟན་པ་དང་། རྗེ་ཉིད་ཀྱི་གསུང་ལས་ཀྱང་། ཚར་ཆེན་ཡབ་སྲས་ད་ལྟའི་དཔོན་སློབ་འདིའི་ཁྲོད་ན་ཡོད། ཅེས་དང་། བདག་མེད་ལྷ་མོ་བཅོ་ལྔ་སྩལ་བའི་ཚེ་ནང་མཆོད་ལག་པས་རེག་མི་བཟོད་པ་ཙམ་དུ་ཁོལ་ཞིང་ལུད་པ་དང་། བིར་སྲུང་ཕྱི་མའི་ཚེ་ཉི་འཛིན་ཡོང་བར་བྱེད་གྲུབ་དགོངས་མཐུན་དུ་རི་མོས་གཏན་ལ་ཕེབས་ཀྱང་། རྗེ་ཉིད་ཀྱི་གྲུབ་མཚན་མངོན་དུ་འཇོག་བྱེད་ཀྱིས། དེ་རིང་ཉི་འཛིན་ཡོང་བར་ཐག་ཆོད་དེ་བཞིན་ལ། རྒན་བུ་རྣལ་འབྱོར་དབང་ཕྱུག་ཏུ་ལངས་རྒྱུ་ཡིན་པས་ཁྱེད་རང་ཀུན་ཉི་འཛིན་རྩིས་པའི་སྒོ་ཡིག་དང་བཅས་པ་ལ་ལྟད་མོ་ལྟོས་ཤིག་གསུངས་ནས་རོ་མའི་རླུང་དྷཱུ་ཏིར་ཞུགས་སུ་མ་སྟེར་བས་ཉི་འཛིན་མི་མངོན་པའི་དབྱིངས་སུ་བྱིན་གྱིས་བརླབས་པ་སོགས་ས་ལམ་མཐོན་པོར་གཤེགས་པའི་རྟགས་མཚན་ངོ་མཚར་བ་མཐའ་ཀླས་པའང་བསྟན་པར་མཛད། དགུང་གྲངས་ཉེར་བརྒྱད་པ་ཡན་རྟེན་རབ་བྱུང་དུ་བཞུགས་ཀྱང་། ཉེར་དགུའི་ཚེ་གཅུང་རིན་པོ་ཆེ་མཐུ་སྟོབས་དབང་ཕྱུག་དགོངས་པ་ཆོས་དབྱིངས་སུ་ཐིམ་པས་གདུང་འཛིན་གྱི་གོ་སར་ཕེབས་པར་མཛད་ཅིང་། རིགས་སྲས་མཆེད་ཞལ་སོགས་ཀྱང་འཁྲུངས། དེ་ལྟ་བུའི་ཞལ་སློབ་སྤྱིར་བསམ་གྱིས་མི་ཁྱབ་ཀྱང་། གཙོ་བོར་ཐར་རྩེ་རྡོ་རྗེ་འཆང་དང་། གནས་གསར་རྗེ་སོགས་ཉིད་ཀྱི་དབུ་བླ་རྣམས་ཀྱིས་ཀྱང་བཀའ་ཆོས་ཀྱི་འབྲེལ་བ་ཅི་རིགས་པར་གསན་ཅིང་། ཁྱད་པར་གསན་གསར་མཆོག་སྤྲུལ་རིན་པོ་ཆེ་ནམ་མཁའ་ལེགས་པ་ལྷུན་གྲུབ། ཐར་རྩེ་རྡོ་རྗེ་འཆང་ནམ་མཁའ་འཆི་མེད། འཕན་ཡུལ་བཅོ་བརྒྱད་པ་སྐུ་མཆེད། གཟིམས་འོག་སྤྲུལ་པའི་སྐུ། ངོར་ཕན་བདེ་ཞབས་དྲུང་དཔལ་ལྡན་རིན་ཆེན་ཆོས་མཛད། སློབ་དཔོན་པ་ཀུན་དགའ་བཀྲ་ཤིས། གྲུབ་དབང་རིན་ཆེན་རྒྱལ་མཚན་སོགས་མཐའ་ཀླས་སོ། །མཐར་དགུང་གྲངས་ལྔ་བཅུ་རྩ་ལྔ་པ་ཆུ་ཡོས་སྤྲེལ་ཟླ་ཕྱི་མའི་ཡར་ངོའི་གྲལ་ཚེས་གཉིས་པའི་ཉི་དྲོས་ཙམ་ལ་གྲུབ་མཐའ་སྙོགས་ཏེ་མཁའ་སྤྱོད་རྡོ་རྗེ་བཙུན་མོའི་ཞིང་ཁམས་སུ་ནམ་མཁའ་གཡའ་དག་པའི་ཁྲོད་དུ་འཇའ་དཀར་པོ་མེ་ཏོག་རྒྱས་པའི་དབྱིབས་ཅན་དང་། མེ་ཏོག་གི་ཆར་རྒྱུན་རིང་པོར་སིལ་སིལ་དུ་འབེབས་བཞིན་པར་དཔའ་བོ་ཌཱ་ཀིའི་ཚོགས་ཀྱིས་མདུན་བདར་ཏེ་གཤེགས་པར་གྱུར་ཏོ།། །། ༈

[edit]

rje btsun sa skya pa chen po ngag dbang kun dga' blo gros sangs rgyas bstan pa'i rgyal mtshan dpal bzang po ni/ @#/_/rje btsun sa skya pa chen po ngag dbang kun dga' blo gros sangs rgyas bstan pa'i rgyal mtshan dpal bzang po ni/__dus gsum gyi de bzhin gshegs pa mtha' dag gi snying rje'i rang gzugs gcig tu 'dril ba byang chub sems dpa' chen po lag na pad+ma'i zhabs kyi ye shes sgyu 'phrul drwa ba'i zlos gar las/__rgya gar 'phags pa'i yul du ma hA paN+Di ta dri med bshes gnyen dang /__dzai tA ri dgra las rnam par rgyal ba/__bod 'dir bstan pa snga dar gyi dus su mthu stobs nus pa'i dbang phyug lha lung dpal gyi rdo rje dang /__phyi dar gyi tshe bla ma d+hA byang chub sems dpa'/__khyad par du yongs rdzogs bstan pa'i mnga' bdag brtse chen kun dga' snying po/__bdag chen rdo rje 'chang blo gros rgyal mtshan/__grub pa'i dbang phyug thang stong rgyal po/__rje btsun gro lung pa chen po mang thos bsod nams chos 'phel sogs skyes rabs kyi phreng ba tshar du dngar ba bzung ba'i mthar/__kha ba can tsam na rigs rus phun sum tshogs pa kun gyi rtse mor son pa 'od gsal 'khon gyi gdung las/__yab rje 'jam dbyangs bsod nams rin chen dang /__yum grub pa'i dbang phyug lang gro lo tsA ba dkon mchog 'byung gnas kyi brgyud las son pa/__ko cag sngags pa'am 'gro mgon par grags pa'i sras mo ye shes kyi mkha' 'gro'i mtshan dang ldan pa bsod nams dpal gyi dbang mo'i sras su rab byung bcu gnyis pa'i nang tshan zhi ba ste sa byar 'bod pa'i dpyid tha nag pa zla ba'i yar tshes bcu gcig gi nyi shar la nam mkha' 'ja' 'od kyis gang ba dang /__me tog gi char bsnyil ba sogs bkra shis pa'i dge mtshan bsam gyis mi khyab pa dang bcas te 'khrungs/__de ma thag nas thugs dran gyi rnam pa gsal zhing /__yab rje mchog nas mtshan ngag dbang kun dga' bsod nams grags pa blo gros zhes gsol zhing /__'dus pa 'phags lugs kyi dkyil 'khor du thog mar smin par mdzad/__gsung dang po bye ba'i tshe a ra pa tsa na d+hIHzhes gsungs pa sogs ngo mtshar gyi mdzad spyod mtha' klas/__dgung lo bdun pa ljags klog phul ba tsam gyis tshegs med par mkhyen pa nas bzung rim gyis thos bsam gyi tshul 'jug par mdzad de/__yab rje mchog las lam 'bras tshogs bshad kyis mtshon zab rgyas kyi gdams pa rgya mtsho lta bu bzhes/__dgung grangs bcu gnyis par gser khrir rin po che mnga' gsol zhing /__dgung grangs bcu gsum pa'i tshe yab rje zhi bar gshegs pa'i dgongs rdzogs phogs mdzad/__bcu bzhi pa thar rtse rdo rje 'chang nam mkha' bsam 'grub las dge bsnyen gyi sdom pa bzhes te ngag gi dbang phyug kun dga' blo gros bstan pa'i rgyal mtshan dpal bzang po zhes mtshan du gsol/__de nas mi ring bar lha khang mkhan po dbang phyug phun tshogs pa'i drung du rab tu byung bar mdzad de/__sngar gyi mtshan gyi steng du sangs rgyas bsnan pas/__de phyin chad ngag dbang kun dga' blo gros sangs rgyas bstan pa'i rgyal mtshan dpal bzang po zhes don ldan gyi snyan pas srid pa'i rtse mor brgal bar gyur cing/__thar rtse rdo rje 'chang chen po las lugs gnyis kyi bka' drin mchog tu nos/__dgung grangs bco lnga par dbus phebs skabs yar ka po ru klung khra 'brug tu gnas gsar rdo rje 'chang thog mar mjal ba'i tshe mi phyed pa'i thugs dad 'khrungs/__bka' chos kyi sgo dbye ba'i dang por sgrol dkar yid bzhin 'khor lo thun mong ma yin pa'i rjes gnang zhig stsal bas gsang chen slob bshad kyi bstan pa'i bdag por 'gyur ba'i rten 'brel khyad par can 'grigs/__bcu drug par gdan sa chen por rje de nyid spyan drangs te lam 'bras bu dang bcas pa gsang chen slob bshad kyis mtshon pa'i snga phyir zab pa dang rgya che ba'i dam pa'i chos kyi bdud rtsi bgrang yas shig bzhes par mdzad/__gzhan yang rje nyid kyi gsung las/__yab rje rdo rje 'chang dang thar rtse rjes/__/gnas gsar rje dang brag rtsa rje btsun drung /__/gzhi dgon rab brtan bzang dang rta nag mkhan/__/tshul khrims bzang dang ngor chen bsod nams mtshan/__/sangs rgyas ye shes dpal ldan chos skyong zhabs/__/gong dkar bsod nams blo gros rnam mkhyen grol/__/chos dbang rgya mtsho chu ri bkra shis don/__/kun dga' chos 'phel rin chen bzang po ste/__/gong dkar rnam lnga rin chen mi 'gyur zhabs/__/'gro mgon mthu dbang de sras rig 'dzin mtshan/__/mkhan chen dbang phun mkhan chen kun dga' zla/__/seng ge rgyal mtshan shar ri mnga' bdag rje/__/rgyal dbang skal bzang rje dang mchog sprul zhabs/__/dpal ldan no mi han dang 'on rgyal sras/__khri chen rin chen rnam rgyal sras mchog bcas/__/'bri gung rje dang bsam sding yang zab rje/__/kun dga' sangs rgyas zhwa lu ye shes grags/__/dngos grub sding dang kun dga' don gsal sogs/__/gus pas bsten nas ris med chos rgyud zhus/__/zhes gsungs pa ltar yongs 'dzin dam pa de dag rnams las dam pa'i chos kyi bdud rtsi blangs te mang du thos pa rgya mtsho'i mthar son par mdzad pa'i tshul gsan tho rin po che pod chen gnyis su gsal ba ltar dang /__de dag gi bsam pas sgro 'dogs bcad pas rang gzhan gyi gzhung lugs ma 'dres par rtogs te klog pa thos bsam gyi 'khor lo dang /__dpal kye rdo rje'i gzhi yi bsnyen 13pa lan gsum gyis mtshon lhag pa'i lha dang chos srung rgya mtsho'i bskyed rdzogs kyi nyams len mtshams su bcad pa du ma dang /__rgyun bar kyang nyin zhag phrug rer lhag pa'i lha mi 'dra ba sum 27cur nye ba'i sgom bzlas sogs kyis mtshon spong ba bsam gtan gyi 'khor lo dang /__thub bstan lha khang chen mo zhig gsos gsar bzhengs lta bu dang /__mchod sdong 'dzam gling 'od gsal gyis mtshon sku gsung thugs rten gsar bzhengs grangs mang /__dbus phebs lan gsum dang /__gdan sa chen por snga phyi du mar gsung ngag lam 'bras tshogs bshad tshar lnga/__slob bshad tshar gcig gis thog drangs gang gsan pa thams cad lan grangs du mar chos kyi sbyin pa rgya che la rgyun mi 'chad par stsal bas bstan pa'i srog mthud pa lta bu'i sku drin gzhal bar dka' ba sogs bya ba las kyi 'khor lo dang /__gzhan yang chos nyid ji lta ba'i gnas lugs mngon du gzigs shing /__chos can shes bya'i yul la mngon gyur dang lkog gyur mtha' dag rjen par gzigs pa'i mkhyen pa/__sems can dbul phongs sogs sdug bsngal ba dag gzigs pa na/__nga khri mthon por zas gos gya nom pa la longs spyod pa 'di ltar na/__khong snying rje gsungs nas zas gos sogs kyis tshim par mdzad pa dang/__khrom gyi 'du tshogs chen po gzigs pa na spyan chab shar gyis 'byung ba sogs byang chub kyi sems bcos min rgyud la 'khrungs pa'i brtse ba/__phyi nang gsang ba'i chos srung thams cad bran du khol bas bstan dgrar gyur pa sogs la'ang thugs dmigs gtad pa tsam gyis tshar bcad pa grub pa sogs nus pa'i phul du phyin cing /__rgyun du dag pa'i 'od gsal gyi gzigs ngor bla ma yi dam mkha' 'gro'i gzigs snang rgyun mi 'chad cing /__khyad par yab rje dam pa dang /__gnas gsar rdo rje 'chang chen po nas ye shes kyi skus yang yang du rjes su bzung zhing chos ston par mdzad/__gur zhal sogs chos srung rgya mtshos dngos nyams mnal lam du zhal bstan cing phrin las sgrub par khas blangs/__khyad par dam can pu tra lcam dral dang /__phur srung dkar bdud la sogs pas bran bzhin du bkur nas sku mtshams sogs kyi tshe mchod me sbar ba dang /__bzhengs par bskul ba tshun chad mngon sum du mdzad par grags/__gzhan yang grub pa'i rtags mtshan bsam las 'das shing /__lhag par phyis su lam 'bras slob bshad gnang ba'i tshe/__'od gsal gyi ngang la ngor chen rdo rje 'chang gis zhal gzigs te slob ma ka bzhi gdung brgyad sogs 'byung ba lung bstan pa dang /__rje nyid kyi gsung las kyang /__tshar chen yab sras da lta'i dpon slob 'di'i khrod na yod/__ces dang /__bdag med lha mo bco lnga stsal ba'i tshe nang mchod lag pas reg mi bzod pa tsam du khol zhing lud pa dang /__bir srung phyi ma'i tshe nyi 'dzin yong bar byed grub dgongs mthun du ri mos gtan la phebs kyang /__rje nyid kyi grub mtshan mngon du 'jog byed kyis/__de ring nyi 'dzin yong bar thag chod de bzhin la/__rgan bu rnal 'byor dbang phyug tu langs rgyu yin pas khyed rang kun nyi 'dzin rtsis pa'i sgo yig dang bcas pa la ltad mo ltos shig gsungs nas ro ma'i rlung d+hU tir zhugs su ma ster bas nyi 'dzin mi mngon pa'i dbyings su byin gyis brlabs pa sogs sa lam mthon por gshegs pa'i rtags mtshan ngo mtshar ba mtha' klas pa'ang bstan par mdzad/__dgung grangs nyer brgyad pa yan rten rab byung du bzhugs kyang /__nyer dgu'i tshe gcung rin po che mthu stobs dbang phyug dgongs pa chos dbyings su thim pas gdung 'dzin gyi go sar phebs par mdzad cing /__rigs sras mched zhal sogs kyang 'khrungs/__de lta bu'i zhal slob spyir bsam gyis mi khyab kyang /__gtso bor thar rtse rdo rje 'chang dang /__gnas gsar rje sogs nyid kyi dbu bla rnams kyis kyang bka' chos kyi 'brel ba ci rigs par gsan cing /__khyad par gsan gsar mchog sprul rin po che nam mkha' legs pa lhun grub/__thar rtse rdo rje 'chang nam mkha' 'chi med/__'phan yul bco brgyad pa sku mched/__gzims 'og sprul pa'i sku/__ngor phan bde zhabs drung dpal ldan rin chen chos mdzad/__slob dpon pa kun dga' bkra shis/__grub dbang rin chen rgyal mtshan sogs mtha' klas so/__/mthar dgung grangs lnga bcu rtsa lnga pa chu yos sprel zla phyi ma'i yar ngo'i gral tshes gnyis pa'i nyi dros tsam la grub mtha' snyogs te mkha' spyod rdo rje btsun mo'i zhing khams su nam mkha' g.ya' dag pa'i khrod du 'ja' dkar po me tog rgyas pa'i dbyibs can dang /__me tog gi char rgyun ring por sil sil du 'bebs bzhin par dpa' bo DA ki'i tshogs kyis mdun bdar te gshegs par gyur to//____//_!_