གནས་གསར་རྡོ་རྗེ་འཆང་ངག་དབང་ཀུན་དགའ་ལེགས་པའི་འབྱུང་གནས་ནི།

🚧 This website is under continued development. We appreciate your patience!

Previous Text Back to Volume PageNext Text

Wylie title	gnas gsar rdo rje 'chang ngag dbang kun dga' legs pa'i 'byung gnas ni
Location	mkhyen brtse'i bka' 'bum Volume 19, sde tshan 1, Text 40, Pages 334-370 (Folios 167b2 to 185b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gnas gsar rdo rje 'chang ngag dbang kun dga' legs pa'i 'byung gnas ni. In 'jam dbyangs mkhyen brtse'i dbang po'i bka' 'bum, Vol. 19: 334-370. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

40 334-370	གནས་གསར་རྡོ་རྗེ་འཆང་ངག་དབང་ཀུན་དགའ་ལེགས་པའི་འབྱུང་གནས་ནི། gnas gsar rdo rje 'chang ngag dbang kun dga' legs pa'i 'byung gnas ni History Texts - lo rgyus   ·   Religious History Texts - chos 'byung	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །གནས་གསར་རྡོ་རྗེ་འཆང་ངག་དབང་ཀུན་དགའ་ལེགས་པའི་འབྱུང་གནས་ནི། ཆོས་སྐུ་བདེ་བ་ཆེན་པོའི་ངང་ལས་མ་གཡོས་བཞིན་དུ། གཟུགས་སྐུ་རྣམ་པ་གཉིས་ཀྱི་སྒྱུ་འཕྲུལ་ཅིར་ཡང་འཆར་བ་ལས། རྩོད་དུས་ཚེ་ལོ་བརྒྱ་པའི་དུས་འདིར་བདག་ཅག་གི་སྟོན་མཆོག་ཉི་མའི་གཉེན་དུ་གྱུར་ཏེ་མཛད་པ་བཅུ་གཉིས་ཀྱི་སྒོ་ནས་ཡིད་ཅན་མཐའ་ཀླས་པ་ལམ་དང་འབྲས་བུའི་གོ་འཕང་ལ་སྦྱར་བའི་མཐར། སླར་ཡང་ཚར་ཆེན་རྡོ་རྗེ་འཆང་གི་རྣམ་ཐར་དུ་གསལ་བ་ལྟར་ངོ་མཚར་སྐྱེ་བའི་ཕྲེང་བ་བཅུ་གསུམ་དང་། གཞན་ཡང་འཕགས་པའི་དགེ་བསྙེན་དྷརྨ་ཏཱ་ལ། གྲུབ་ཆེན་རྡོ་རྗེ་དྲིལ་བུ་པ། པཎ་ཆེན་གང་བ་སྤེལ། དཔལ་ཆོས་ཀྱི་གྲགས་པ། དགེ་སློང་ནམ་མཁའི་སྙིང་པོ། དཔལ་ལྡན་ཨ་ཏི་ཤ །ཁྱབ་བདག་བཀའ་འགྱུར་བ་མགོན་པོ་བསོད་ནམས་མཆོག་ལྡན་སོགས་དག་པའི་སྐྱེ་སྲིད་ཚད་མེད་པར་བཟུང་བའི་མཐར་ཤངས་རྒྱ་མཚོ་ལོ་ཚ་ཞེས་བྱ་བའི་ཡུལ་དུ། ཡབ་བཀའ་འགྱུར་བ་མགོན་པོ་བསོད་ནམས་མཆོག་ལྡན་གྱི་སྐུ་མཆེད་འ་ཞྭ་དོན་གྲུབ་དབང་པོའི་སྲས། གྲུབ་པའི་མཚན་མ་བརྙེས་པའི་འ་ཞྭ་མཁྱེན་རབ་རྣམ་རྒྱལ་དང་། དེ་སྲས་ནམ་མཁའ་བསོད་ནམས་དབང་གི་རྒྱལ་པོའམ་ངག་དབང་བློ་གསལ་མཆོག་ལྡན་དང་། ཀུན་དགའ་བསྟན་པའི་རྒྱལ་མཚན། ནམ་མཁའ་དོན་གྲུབ་རྒྱལ་པོ་གསུམ་ལས། ཕྱི་མ་དང་ཡུམ་གླན་གྱི་རིགས་ལས་སོན་པ་ཁར་ཁ་འཕིར་བྱུང་གི་བརྒྱུད་པ་ཕུན་ཚོགས་སྒྲོལ་མའི་སྲས་སུ་རབ་བྱུང་ཉི་མའི་ནང་གསེས་ཉི་སྒྲོལ་བྱེད་དེ་ཤིང་ཕོ་སྤྲེའུའི་ལོ་སྨལ་པོ་ཟླ་བའི་དམར་ཕྱོགས་ཀྱི་ཚེས་བཅུར་ངོ་མཚར་བའི་ལྟས་དུ་མ་དང་བཅས་ཏེ་སྐུ་འཁྲུངས། སྐུ་ན་ཕྲ་མོའི་དུས་ནས་སཾ་སྐྲྀ་ཏའི་སྐད་གསུངས་པ་སོགས་བཟང་པོའི་བག་ཆགས་སད། དགུང་ལོ་དྲུག་པ་ས་གླང་ལོར་བཀྲ་ཤིས་ཆོས་སྡེར་སྤྱན་དྲངས། གནས་ཀྱི་སློབ་དཔོན་བསོད་ནམས་སྣང་བྱེད་དང། བསོད་ནམས་རིན་ཆེན་གཉིས་ཀྱིས་ཡི་གེའི་ཕྱི་མོ་འབྲི་ཀློག་དང་། ཆོས་སྤྱོད་ཀྱི་རིམ་པ་སོགས་འབུལ་བར་མཛད་པས་བརྡ་བསྟན་པ་ཙམ་དང་ལན་རེ་གཟིགས་པ་ཙམ་གྱིས་མཁྱེན། དགུང་ལོ་བརྒྱད་པ་ལྕགས་ཡོས་དབོ་ཟླ་བའི་ནང་རྨོར་དགོན་དུ་ཁྱབ་བདག་རྡོ་རྗེ་འཆང་དང་ངག་དབང་ཀུན་དགའ་ལྷུན་གྲུབ་ཐོག་མར་མཇལ་ཞིང་། པོ་ཏཱ་ལར་པད་དཀར་འཛིན་པ་ངག་དབང་ཡེ་ཤེས་རྒྱ་མཚོའི་དྲུང་དུ་གཙུག་ཕུད་ཕུལ་བས་མཚན་ངག་དབང་སྦྱིན་པ་ཞེས་གསོལ། སླར་གསང་ཆེན་རྒྱུད་སྡེའི་འབྱུང་གནས་བཀྲ་ཤིས་ཆོས་སྡེའི་བླ་བྲང་དུ་རྨོར་ཆེན་ཐམས་ཅད་མཁྱེན་པ་ལས་སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་གསན་ཅིང་མཚན་ཀུན་དགའ་ལེགས་པའི་འབྱུང་གནས་ཞེས་སྩལ། ཚར་ལུགས་དཀར་པོའི་ལྷ་གསུམ་གྱི་རྗེས་གནང་གིས་ཆོས་ཀྱི་སྒོ་ཕྱེ་སྟེ། སྲུང་འཁོར་རྡོ་རྗེ་བྲག་རྫོང་མའི་ཉམས་ཁྲིད་སོགས་ཟབ་ཆོས་མང་དུ་གསན། དགུང་ལོ་དགུ་པར་སེམས་བསྐྱེད་ལུགས་གཉིས་དང་། རྡོ་རྗེ་ཕྲེང་བ་ཀྲྀ་ཡ་སཱ་མུཙྪའི་དབང་། གསུང་ངག་རིན་པོ་ཆེ་སློབ་བཤད་སོགས་ཟབ་ཆོས་རྒྱ་མཚོ་ལྟ་བུ་རིམ་པར་གསན་བཞེས་མཛད། རྡོ་རྗེ་བྲག་རིག་འཛིན་པདྨ་ཕྲིན་ལས་ལ་སྔོན་སྨོན་དུས་སུ་སད་པས་དད་གདུང་ཤིན་ཏུ་ཆེ་བ་འཁྲུངས་ཀྱང་དངོས་སུ་མཇལ་བའི་སྟབས་མ་འགྲིགས། དགུང་ལོ་བཅོ་ལྔ་པར་ཡར་ཀླུང་བཀྲ་ཤིས་ཆོས་སྡེར་རྡོ་རྗེ་འཆང་གཞོན་ནུ་བློ་གྲོས་པའི་ཆོས་ཀྱི་ཁྲི་ལ་མངའ་གསོལ། བཅུ་བདུན་པ་ལྕགས་བྱི་ལོར་རྨོར་དགོན་དུ་ཕེབས་ནས། ཁྱབ་བདག་བླ་མ་ལས་ཟབ་ཆོས་མང་དུ་གསན་ཅིང། རྒྱལ་དབང་བདུན་པ་རིན་པོ་ཆེ་གསེར་ཁྲིར་ཕེབས་སྐབས། འོན་རྒྱལ་སྲས་རིན་པོ་ཆེ་འཇིགས་མེད་གྲགས་པས་མཐུན་རྐྱེན་སྦྱར་ཏེ་ཆིབས་བསུར་ཕེབས་ཤིང་། འཇམ་མགོན་ས་སྐྱ་པ་བསོད་ནམས་རིན་ཆེན་དབུས་སུ་ཆིབས་བསྒྱུར་བསྐྱང་བ་དང་ཞལ་འཛོམ་མཛད། དགུང་ལོ་བཅོ་བརྒྱད་པར་ལྷ་ལྡན་དུ་རྒྱལ་དབང་ཐམས་ཅད་མཁྱེན་པའི་མདུན་ཞབས་བརྟན་ཕུལ་བར་ཕེབས་པ་དང་འབྲེལ་མཚུངས་སུ་རྨོར་ཆེན་རྡོ་རྗེ་འཆང་ལའང་ཞབས་པད་བརྟན་པའི་མཎྜལ་ཕུལ། ཟླ་བ་ལྔ་པ་ནས་བརྩམས་ཏེ་མདོ་སྔགས་གཞུང་བརྒྱ་སྨྲ་བའི་ཁྱབ་བདག་བཀའ་འགྱུར་བ་སངས་རྒྱས་རྒྱལ་མཚན་ལས་རྒྱལ་བའི་བཀའ་འགྱུར་རིན་པོ་ཆེའི་ལུང་གསལ་དག་སྙན་གསུམ་གྱི་སྒོ་ནས་ལེགས་པར་གསན། ཁྱད་པར་དགུང་ལོ་བཅུ་དགུར་ཕེབས་པ་དགེ་བྱེད་ཅེས་པ་ཆུ་ཕོ་སྟག་གི་ལོར་བསམ་ཡས་ཆོས་འཁོར་ཆེན་པོར་རྨོར་ཆེན་རྡོ་རྗེ་འཆང་ཆེན་པོ་ལས་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་དབང་། བྱིན་རླབས། ཁྲིད། ལུང་སོགས་སླར་ཡང་བསྐྱར་ནས་གསན་ཅིང་། རྒྱུ་དབང་སྐབས་རྡུལ་ཚོན་གྱི་དཀྱིལ་འཁོར་ལ་རྗེ་ཉིད་བཞུགས་སུ་གསོལ་ཏེ་བསྟན་པའི་བདག་པོར་དབང་བསྐུར་བ་བཞིན་སྙན་བརྒྱུད་ཀྱི་བསྟན་པ་ཕྱོགས་མཐར་ཁྱབ་པའི་རྟེན་འབྲེལ་གྱི་སྒོ་ཡངས་པོར་བྱེ། ནག་པ་ཟླ་བའི་ནང་མཁན་པོ་ཡོངས་རྫོགས་བསྟན་པའི་མངའ་བདག་རྨོར་ཆེན་ཐམས་ཅད་མཁྱེན་པ། ལས་ཀྱི་སློབ་དཔོན་བཀའ་འགྱུར་བ་སངས་རྒྱས་རྒྱ་མཚོ་སོགས་དད་པའི་དགེ་སློང་གྲངས་ཚང་གི་དབུས་སུ་ཚིགས་གསུམ་རིམ་ནོད་ཀྱིས་བསྙེན་པར་རྫོགས་པའི་དགེ་སློང་གི་དངོས་པོར་བསྒྲུབ་ཅིང་། སྔར་གྱི་མཚན་གྱི་ཐོག་མར་ངག་དབང་དང་། མཐར་ཐེག་མཆོག་དབང་གི་རྒྱལ་པོ་ཞེས་གསོལ་བར་མཛད་དེ། འདུལ་བ་འཛིན་པ་ཐམས་ཅད་ཀྱི་གཙུག་གི་ནོར་བུས་ཞབས་བསྟེན་གྱི་པདྨོ་ལ་ཕྱག་བྱ་བར་འོས་པའི་དཔལ་ཡོན་ངང་གིས་འཕེལ། དེ་ནས་ཆོས་སྡེར་དཔལ་ཀྱཻ་རྡོ་རྗེའི་གཞིའི་བསྙེན་པ་ཁ་སྐོང་གི་སྦྱིན་སྲེག་དང་བཅས་པ་མཛད་ཅིང་། མཁའ་འགྲོ་མས་རྨི་ལམ་བཟུང་བའི་གྲོགས་མཛད་པ་སོགས་རྟགས་མཚན་ཁྱད་པར་ཅན་བརྙེས། ཉེར་གཉིས་པ་ཤིང་སྦྲུལ་ལོར་གཙང་དུ་ཆིབས་ཁ་བསྒྱུར་ཏེ། དཔལ་ཞྭ་ལུ་གསེར་ཁང་དུ་བླ་ཆེན་རྡོ་རྗེ་འཆང་ཐུགས་རྗེ་བརྩོན་འགྲུས་ལས་དཔལ་དུས་ཀྱི་འཁོར་ལོའི་དབང་ལུང་མན་ངག་སོགས་གསན་ཅིང་། ངོར་ཨེ་ཝྃ་ཆོས་ལྡན་སོགས་བརྒྱུད། གངས་ཅན་བོད་ཀྱི་རྡོ་རྗེ་གདན་དཔལ་ས་སྐྱར་ཡབ་རྗེ་བསོད་ནམས་རིན་ཆེན་ལས་བཅོམ་ལྡན་འདས་རྡོ་རྗེ་གཞོན་ནུའི་བསྟོད་ལས་བྱང་ཆུབ་སྒྲུབ་པའི་དབང་དང་། ལམ་དབང་སོགས་གསན། འདི་སྐབས་ཡིན་ནམ་འཇམ་དབྱངས་ངག་གི་དབང་ཕྱུག་རྒྱལ་མཚན་རབ་བརྟན་དཔལ་བཟང་པོ་ཞེས་པའི་མཚན་འབུལ་དང། བཀུར་བཟོས་ཆེ་བར་མཛད། རྟེན་དང་བརྟེན་པར་བཅས་པ་མཇལ་ཞིང་ཕྱག་མཆོད་སྨོན་ལམ་སོགས་མཛད་ནས། སྒྲོ་མོ་ལུང་དུ་གྲུབ་ཆེན་ཐང་སྟོང་པའི་རྣམ་འཕྲུལ་མང་ཐོས་བསོད་ནམས་ཆོས་འཕེལ་གྱི་སྤྱན་སྔར་ཕེབས་ཤིང་། དཔལ་ལྡན་ཤངས་པ་བཀའ་བརྒྱུད་ཀྱི་ཟབ་ཆོས་མཐའ་དག་བུམ་པ་གང་བྱོའི་ཚུལ་དུ་གསན་པས་སྒྱུ་མ་ལྟ་བུའི་ཏིང་ངེ་འཛིན་ཁྱད་པར་ཅན་ཐུགས་རྒྱུད་ལ་འཁྲུངས། ཁྱབ་བདག་བཀའ་འགྱུར་བའི་རྣམ་འཕྲུལ་དུ་ཡེ་ཤེས་གཟིགས་པའི་ལུང་གིས་གསལ་བར་བསྟན། དེ་ནས་འདར་གཞུང་ནས་རིམ་གྱིས་བརྒྱུད་དེ། འདར་གྲང་མོ་ཆེར་ཕེབས་ཤིང་བྲག་རྩ་རྡོ་རྗེ་འཆང་བློ་གསལ་བསྟན་འཛིན་དང་ཞལ་འཛོམ་མཛད། རྨུ་གཤོང་། མུ་གུ་ལུང་། ཐུབ་བསྟན་དགེ་འཕེལ། ཆ་ལུང་རྡོ་རྗེའི་བྲག་སོགས་བརྒྱུད་ནས་སླར་ས་སྐྱར་ཕེབས་ཤིང་ཞབས་བརྟན་གདུགས་དཀར་གྱི་མདོས་ཆེན་སོགས་མཛད་ནས་རིམ་གྱིས་རང་དགོན་དུ་ཞབས་བསྐྱོད། ཉེར་གསུམ་པར་ཡར་ཀླུང་བཀྲ་ཤིས་ཆོས་སྡེར་རྡོ་རྗེ་ཕྲེང་བ་དང་། དུས་ཀྱི་འཁོར་ལོ་སོགས་དབང་བཀའ་ཆེན་པོ་རྣམས་སྩལ་ཞིང་། ཕྱག་དཔེ་ཚར་ལན་རེ་ཟུང་རེ་གཟིགས་པ་ཙམ་གྱིས་ཐོགས་མེད་དུ་མཁྱེན་པའི་སྤོབས་པའི་གཏེར་མཛོད་གྲོལ། སླར་ཡང་རྨོར་ཆེན་རིན་པོ་ཆེའི་ཞབས་པད་དུ་བསྙེན་ནས་གསུང་ངག་རིན་པོ་ཆེའི་བཀའ་ཐུན་མོང་མ་ཡིན་པ་སོགས་ཟླ་བ་དྲུག་ཏུ་གསན། དེ་དང་དུས་མཚུངས་ཙམ་ལ་མདོ་ཁམས་སྡེ་དགེ་ཆོས་རྒྱལ་ཆེན་པོ་བསྟན་པ་ཚེ་རིང་གིས་དཔལ་དུས་ཀྱི་འཁོར་ལོའི་སྒྲུབ་མཆོད་ཁྱད་པར་ཅན་འཛུགས་བཞེད་ཀྱིས་གདན་འདྲེན་དང་། འདར་གྲོང་ཆེན་པོས་གདན་ས་འཛིན་པར་གསོལ་བ་བཏབ་པའང་ཞལ་གྱིས་བཞེས། སྤྲེལ་ལོར་དུས་ཀྱི་འགྱུར་བས་རྨོར་ཆེན་རྡོ་རྗེ་འཆང་འོན་ཆོས་སྡིང་རྒོད་ཚང་རི་ཁྲོད་དུ་ཕེབས་པའི་ཞབས་པད་དུ་བཅར། སླར་སྐུ་གཤེགས་པའི་རྗེས་ཀྱི་བྱ་བ་དང་། དགོངས་པ་རྫོགས་པའི་ཐབས་ཕུལ་དུ་ཕྱིན་པ་མཛད། དགུང་ལོ་ཉེར་དྲུག་པ་ས་བྱ་ལོར་བསམ་ཡས་སུ་རབ་བྱུང་གྲྭ་ཚང་ཤིན་ཏུ་མང་བར་རབ་བྱུང་གནང་། ཆོས་སྐྱོང་ཆེན་པོས་ཀྱང་བཀའ་བཞིན་བསྒྲུབ་པར་ཁས་བླངས། ཟླ་བ་དྲུག་པར་མི་དབང་ཆེན་པོས་ཞབས་འགྱུར་གྱི་མཐུན་རྐྱེན་དང་བཅས་མདོ་ཁམས་སྡེ་དགེར་ཆིབས་ཀྱི་ཁ་ལོ་བསྒྱུར་ཞིང་། ཕེབས་ལམ་རོང་ཕྱོགས་ནས་མཛད་དེ་ཏལ་དཀར་ལ་རྩེར་གྲུབ་དབང་སངས་རྒྱས་རྒྱ་མཚོ་དང་མཇལ་བའི་སྐབས་ཀྱང་གྲུབ་དབང་དམ་པས་ཁྱབ་བདག་བཀའ་འགྱུར་བའི་ཡང་སྲིད་དུ་ངེས་པ་རྙེད་པའི་གསུང་གིས་དབུགས་དབྱུང་། ལམ་བར་དུ་འཁོད་པའི་ལྷ་སྡེ་མི་སྡེ་རྣམས་ཀྱིས་ཀྱང་གུས་པས་མཆོད་དེ། རིམ་གྱིས་སྡེ་དགེ་ལྷུན་གྲུབ་སྟེང་གི་ཆོས་གྲྭར་ཕེབས་ཉེའི་ཚེ་མཁས་གྲུབ་ཁྱུང་པོ་རྣལ་འབྱོར་གྱི་ཡེ་ཤེས་ཀྱི་སྐུ་གཟུགས་གཞན་དུ་བསྒྱུར་བས་མངོན་སུམ་དུ་རྗེས་སུ་བཟུང་ཞིང་ཟུང་འཇུག་གི་རྟེན་འབྲེལ་བསྒྲིགས། ཆོས་རྒྱལ་ཆེན་པོ་དང་མཇལ་འཛོམ་དང་ལེགས་ཚོགས་རྟེན་འབྲེལ་གྱི་སྒོ་འཕར་ཡངས་པོར་ཕྱེ། དཔལ་དུས་ཀྱི་འཁོར་ལོའི་སྒྲུབ་དཀྱིལ་ནག་འགྲོས་ལྗགས་བསྒྲིགས་བཀའ་དྲིན་བསྐྱང་ཞིང་། དགོན་དེའི་གྲྭ་པ་རྣམས་ལ་དཔེ་ཆ་བློ་འཛིན་བྱེད་དགོས་ཀྱི་བཀའ་ཁྱབ་གནང་བས་ཟླ་བ་གཉིས་ལྷག་ཙམ་ལ་བརྒྱུད་འདེབས་མངོན་དཀྱིལ་བཅས་ཆིག་ཤུར་ཕེར་བ་བདུན་ཅུ་རྩ་ལྷག་བྱུང་བ་རྣམས་ལ་གདངས་དང་གར་ཐིག་སོགས་ཕྱག་ལེན་རྣམས་བསླབས་ཤིང་། ལུགས་གཉིས་ཀའི་སྒོ་ནས་ཐབས་མཁས་ཀྱིས་བསྐྱངས་པ་དང་། དཔལ་དུས་ཀྱི་འཁོར་ལོ་སྐུ་གསུང་ཐུགས་ཡོངས་རྫོགས་ཀྱི་དཀྱིལ་འཁོར་དུ་རྒྱུད་སྨིན་པར་མཛད་དེ། ལྕགས་ཁྱི་ནག་པ་ཟླ་བའི་ཡར་ཚེས་ནས་བཟུང་སྟེ་དཔལ་དམ་པ་དང་པོའི་སངས་རྒྱས་ཀྱི་སྒྲུབ་མཆོད་ཀུན་མཁྱེན་བུ་སྟོན་རིན་པོ་ཆེའི་ཕྱག་བཞེས་ཇི་ལྟ་བ་བཞིན་འཛུགས་པར་མཛད། གཞན་ཡང་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་བསྐོར། ཟང་ཟིང་གི་དངོས་པོ་ཇི་སྙེད་བྱུང་བ་རྣམས་བཀྲ་ཤིས་ཆོས་སྡེར་དུས་ཇའི་ཐེབས་སུ་འབུལ་བར་མཛོད་པ་ཆེད་གཏད་དུ་གཏོང་། ཕག་ལོར་འགའ་ཐར་དུ་སྐྱབས་མགོན་བདུན་པ་རིན་པོ་ཆེ་སྐལ་བཟང་རྒྱ་མཚོ་མཇལ་བར་ཆེད་ཀྱིས་ཕེབས་ཤིང་། ཁྲི་ཆེན་ནོ་མི་ཧན་ལས་ཚེ་སྒྲུབ་འཆི་མེད་རྡོ་རྗེའི་སྲོག་ཤིང་གི་དབང་བཀའ་ཡང་གསན། བྱི་ལོར་སྡེ་དགེའི་རྒྱལ་ཁབ་ཏུ་རྣམ་སྲས་ཀྱི་རྟེན་འཛུགས་དང་། དམར་པོ་སྐོར་གསུམ་གྱི་དབང་ལུང་སོགས་སྩལ་བས་བསྟན་པའི་སྦྱིན་བདག་ཆེན་པོ་ཉིད་ལ་འཇམ་དབྱངས་གོང་མ་ཆེན་པོས་ལུང་ལས་ཀྱིས་མངོན་པར་བསྔགས་པ་དང་གསོལ་རས་རྒྱ་ཆེར་གནང་བས་སླར་ཡང་ཡིད་ཆེས་ཀྱི་དད་པ་བརྟན་པོར་ཐོབ། གྲུབ་དབང་སངས་རྒྱས་རྒྱ་མཚོས་མཚམས་སྦྱར་ཏེ་ཕོ་བྲང་ཆེན་པོའི་ཤར་དུ་ཚར་ལུགས་པའི་མགོན་ཁང་རྟེན་དང་བརྟེན་པར་བཅས་པ་བཞེངས་ཤིང་ཕྱག་ལེན་ཁྱད་པར་འཕགས་པས་ཡེ་ཤེས་པ་མངོན་སུམ་དུ་བཞུགས་པའི་གྲགས་པས་ཁྱབ། སྔ་ཕྱིར་ཆོས་རྗེ་བཀྲ་ཤིས་བཟང་པོ་ལས། ཀྱེ་རྡོར་བཀའ་བབས་བཞི་དང་། མཁའ་འགྲོ་རྒྱ་མཚོ་སོགས། མཁན་ཆེན་བཀྲ་ཤིས་ལྷུན་གྲུབ་ལས་སྦྱོང་དཀྱིལ་བཅུ་གཉིས་ཀྱི་དབང་སོགས་གསན། ས་སྐྱོང་ཆེན་པོ་དཔོན་བློན་སོགས་ལ་རྡོ་རྗེ་ཕྲེང་བའི་དབང་བཀའ་རྒྱས་པར་སྩལ། ཕྱོགས་དེའི་མཛད་པ་རེ་ཞིག་རྫོགས་ནས་བྱང་ལམ་བརྒྱུད་དབུས་སུ་ཕེབས་པར། འཕན་ཡུལ་ནཱ་ལེནྡྲ་ཆོས་རྗེ་བཅོ་བརྒྱད་པ་དང་མཇལ་འཛོམ་ཡང་དག་པར་མཛད། ལྷ་ལྡན་དུ་ཇོ་ཤཱཀ་རྣམ་གཉིས་སོགས་ལ་མཆོད་འབུལ་དང་། མི་དབང་ཆེན་པོར་མཇལ་ཕྱག་གནང་བས་ཐུགས་དགེས་པའི་རྩེར་སོན། རིམ་གྱིས་ཡར་ཀླུང་བཀྲ་ཤིས་ཆོས་སྡེར་ཕེབས་ནས་དུས་ཇའི་སྦྱོར་འཇགས་དང་། ཡབ་གཤེགས་པའི་དགོངས་རྫོགས་རྒྱ་ཆེར་གནང་། ཤིང་སྟག་ལོར་གྲུབ་དབང་སངས་རྒྱས་རྒྱ་མཚོ་དང་། བླ་མ་ཀུན་དགའ་རྒྱ་མཚོ་སོགས་ལ་རྒྱལ་བའི་བཀའ་འགྱུར་རིན་པོ་ཆེའི་ལུང་རྫོགས་པར་སྩལ་ཞིང་། ཆུ་སྟོད་ཟླ་བའི་ནང་གཙང་ཕྱོགས་སུ་ཆིབས་ཁ་བསྒྱུར། གྲོ་བཞིན་ཟླ་བའི་ཡར་ཚེས་བཅོ་ལྔ་ལ་འདར་སྟོད་ཆོས་འཁོར་ཡང་རྩེར་ཚར་རྡོ་རྗེ་འཆང་ཆེན་པོའི་ཆོས་ཀྱི་ཁྲི་ལ་ཞབས་པད་བཀོད་ཅིང་གཞུངས་དང་། ས་སྐྱ་སོགས་ཀྱིས་ཐོག་དྲངས་ཏེ་ལེགས་འབུལ་མཁན་རྒྱ་ཆེར་བྱུང་། དེ་ནས་ས་སྐྱར་ཕེབས་ནས་ཡབ་རྗེ་བསོད་ནམས་རིན་ཆེན་མཇལ་ཞིང་ཟང་ཟིང་གི་མཆོད་སྤྲིན་རྒྱ་ཆེར་སྤྲོས། སླར་འདར་དུ་ཕེབས་ནས་གསུང་ཆོས་ཅི་རིགས་པ་སྩལ། ཟླ་བ་དགུ་པར་ངོར་ཨེ་ཝྃ་སོགས་བརྒྱུད་དེ་སླར་དབུས་ཕྱོགས་སུ་ཕེབས། རི་བོ་ཆོས་གླིང་པ་དང་། བཀྲས་ཆོས་ཕན་ཚུན་རྩོད་པ་ཕྲན་བུ་བྱུང་བར་བརྟེན་བླ་གཞིས་གྲྭ་ཚང་ལ་སྦྱར་གནང་མཛད། སྡེ་དགེ་ནས་རྒྱལ་བའི་བཀའ་འགྱུར་རིན་པོ་ཆེ་བསླུ་མ་གནང་བའི་སྤར་ཕུད་ཕེབས་པས་གྲྭ་ཚང་དུ་སྦྱོར་འཇགས་མཛད། རྨོར་ཆེན་རིན་པོ་ཆེའི་ཐུགས་སྲས་འཕགས་སྡེ་མཁན་ཆེན་ངག་དབང་བློ་གསལ་བསྟན་འཛིན་ནས་མཚན་ཉིད་སྐོར་པུསྟི་གྲགས་ཆེན་བཅོ་བརྒྱད་སོགས་རྒྱ་གཞུང་གི་ལུང་རྒྱུན་གང་བཞུགས་སོགས་ལུང་དང་། དྲི་མེད་རྣམ་གཉིས་ཀྱི་དབང་ལུང་། གཞན་ཡང་རྗེས་གནང་གི་རིགས་མང་བ། གནུབས་སྟོན་བློ་བཟང་དོན་གྲུབ་ལས་བྱང་གཏེར་ཐུགས་སྒྲུབ་དྲག་པོ་རྩལ་གྱི་ཆོས་སྐོར་ཕལ་ཆེར། སྤུ་བྲག་བླ་ཆེན་ལེགས་པ་དོན་གྲུབ་ལས་རྨོར་ཆེན་ལས་མ་གསན་པའི་འཇིགས་བྱེད་སྐོར་འགའ་ཞིག་དང་། བཀའ་འགྱུར་བ་རིན་ཆེན་དམ་ཆོས་ལས་འདུལ་བའི་ལས་ཆོག་རྣམ་རྒྱལ་གསེར་མདོག་སོགས་གོང་ས་ལྔ་པའི་གསུང་འགའ་ཞིག་དང་སྙན་ངག་གི་ཕྱག་ཁྲིད་སོགས་ཞུ་བར་མཛད། འབྲུག་ལོར་སླར་ཡང་སྡེ་དགེ་ནས་གདན་འདྲེན་ནན་བསྟུད་ཕེབས་པ་བཞིན་མདོ་ཁམས་སུ་ཆིབས་ཁ་བསྒྱུར་བའི་སྐབས། བསམ་ཡས་ཆོས་འཁོར་ཆེན་པོར་འོད་གསལ་གྱི་སྣང་བར་གྲུབ་ཆེན་ཐང་སྟོང་རྒྱལ་པོ་དང་ཡེ་ཤེས་ཀྱི་མཁའ་འགྲོ་ནི་གུ་མས་རྗེས་སུ་བཟུང་བའི་གཟིགས་སྣང་ངོ་མཚར་བའང་བྱུང་། རིམ་གྱིས་བྱང་ལམ་བརྒྱུད་ནས་ལྷུན་གྲུབ་སྟེང་དུ་ཕེབས་ཤིང་མཆོད་ཡོན་མཇལ་འཛོམ་ལེགས་ལམ་དང་། འཇིགས་བྱེད་རྭ་ལུགས་ལྷ་བཅུ་གསུམ་མའི་དབང་བཀའ་བརྒྱ་ཚར་འབུལ་བའི་མགོ་འཛུགས་པར་གནང་། སྦྲུལ་ལོར་དབང་བརྒྱའི་འཕྲོས་སྐྱོང་བ་དང་ཙནྡན་དཀར་དམར་གྱི་བདེར་གཤེགས་མཆོད་རྟེན་བརྒྱད་ཐོག་སོ་ཕྱེད་གཉིས་ཙམ་པ་ཤིན་ཏུ་ཁྱད་འཕགས་བཞེངས་པར་དྲི་མེད་རྣམ་གཉིས་ཀྱི་དཀྱིལ་འཁོར་བཞེངས་པ་དང་རབ་གནས་སོགས་མཛད། རྟ་ལོར་སྦྱིན་བདག་ཆེན་པོ་གཤེགས་པའི་རྗེས་ཀྱི་བྱ་བ་སྤྱི་དང་། ཁྱད་པར་འཇིགས་བྱེད་བཅུ་གསུམ་མའི་སྒྲུབ་མཆོད་གསར་འཛུགས་སོགས་ཀྱིས་མཚོན་སྔ་ཕྱིར་ཆོས་ཀྱི་འཁོར་ལོ་རྒྱ་ཆེར་བསྐོར་བ་དང་། དངོས་པོའི་ཚོགས་བསགས་ཀྱང་བསམ་གྱིས་མི་ཁྱབ་པར་མཛད། ངོར་ཆོས་རྗེ་བསྟན་འཛིན་ཕུན་ཚོགས་ལས་རིགས་གསུམ་སྤྱི། གུར་སམ་མི་འཁྲུགས་པ་སོགས་ཀྱི་དབང་། ངོར་ཆེན་དང་དཀོན་མཆོག་ལྷུན་གྲུབ་ཀྱི་བཀའ་འབུམ་ཚང་མའི་ལུང་སོགས་གསན། བྱ་ལོ་ཟླ་བ་བདུན་པའི་ནང་དུ་དབུས་ཕྱོགས་སུ་ཕེབས། གོང་མ་མཆོད་ཡོན་མཇལ་བ་དང་། ཚོགས་གསོག་གི་བྱ་བ་རྒྱ་ཆེར་མཛད། བཀྲ་ཤིས་ཆོས་སྡེར་གླང་ནག་བླ་མ་ཀུན་དགའ་དཔལ་འབྱོར་སོགས་ལ་ལམ་འབྲས་བུ་དང་བཅས་པ་གསང་ཆེན་སློབ་བཤད་པའི་ལུགས་ཀྱི་དབང་ཁྲིད་མན་ངག་རྒྱས་པར་སྩལ༡༽། ཆུ་ཁྱི་ཟླ་བ་ལྔ་པའི་ནང་བསམ་ཡས་ཆོས་འཁོར་ཆེན་པོའི་བར་ཁང་གཡུ་ཞལ་འབར་བར་བཅོ་བརྒྱད་ཆོས་རྗེ་ཡབ་སྲས། ཁ་རག་བོང་འབྲུག་ཆོས་རྗེ། ཉན་པོ་ཆོས་རྗེ་མཆེད། གླིང་སྨད་ཞབས་དྲུང་། གཞི་པ་དཔོན་སློབ། བཀྲས་ཆོས་པ་སོགས་ལ་གསུང་ངག་རིན་པོ་ཆེ་དང་༢༽། རྣལ་འབྱོར་མ་སོགས་ཆོས་འཁོར་རྒྱ་ཆེར་བསྐོར་རྗེས། སྙེ་ཐང་འཕགས་སྡེར་འཕགས་ཆེན་དཔལ་ལྡན་གྲགས་པའི་ཆོས་ཀྱི་ཁྲི་ལ་ཞབས་བཀོད་ཅིང་། དེ་དང་ལྷ་ལྡན་དུ་གསུང་ཆོས་མང་དུ་སྩལ། སེ་རའི་གཏོར་སྒྲུབ་སློབ་དཔོན་རྟ་མགྲིན་གྱི་གྲུབ་ཐོབ་ཏུ་གྲགས་པ་ཞིག་ལས་རྟ་མཆོག་རོལ་པའི་ཆོས་སྐོར་འགའ་ཞིག་ཀྱང་གསན། ཆུ་ཕག་ཟླ་༡ཚེས་༡༠ནས་བཟུང་བཀྲས་ཆོས་སུ་སྤོ་བོ་ཡར་འབྲོག་དགོན་གྱི་སྤྲུལ་སྐུ་ལྷུན་གྲུབ་ཕུན་ཚོགས་དང་། འབྲས་གླིང་རབ་འབྱམས་པ། ཚར་གུར་རབ་འབྱམས་པ། རིག་འཛིན་སྐལ་བཟང་རྣམ་གྲོལ་སོགས་ལ་གསུང་ངག་རིན་པོ་ཆེའི་ཆོས་འཁོར་རྒྱ་ཆེར་བསྐོར། སྔོན་ས་སྐྱ་པ་འཇམ་མགོན་ཀུན་དགའ་བློ་གྲོས་དབུས་ཕེབས་ཀྱི་སྐབས་ཡར་ཀླུང་ཁྲ་འབྲུག་ཏུ་ཐོག་མར་མཇལ་བས། དཔོན་སློབ་ཕན་ཚུན་སྐུ་ཚེ་དུ་མར་བླ་སློབ་ཏུ་འབྲེལ་བའི་བག་ཆགས་སད་དེ་ཐུགས་དད་བཅོས་མིན་དུ་འཁྲུངས་ཤིང་ཡོངས་འཛིན་དུ་བཞེས་པས་སྙན་བརྒྱུད་ཀྱི་བསྟན་པ་ཕྱོགས་བརྒྱར་འཕེལ་བའི་རྟེན་འབྲེལ་གྱི་སྒོ་དང་པོར་བྱེ་སྟེ། དེ་རེས་ཆོས་འབྲེལ་གྱི་ཐོག་མར་སྒྲོལ་དཀར་ཡིད་བཞིན་འཁོར་ལོའི་རྗེས་གནང་གསུང་བཤད་ཤིན་ཏུ་རྒྱས་པ། ཀྱེ་རྡོར་རྒྱུ་དབང་མདོར་བསྡུས་བསྐུར་བའི་ཡུན་ཙམ་གྱི་ཚོད་ཞིག་སྩལ་བས་སྟོན་དང་བསྟན་པ་གཞན་ནས་མི་འཚོལ་བའི་ཐུགས་དད་ཁྱད་པར་ཅན་ཤར། ཤིང་བྱི་ལོར་རྨོར་དུ་གསུང་ངག་རིན་པོ་ཆེ་དང་། འཕགས་སྡེར་བཅོ་བརྒྱད་པ་དང་། བོང་འབྲུག་ཆོས་རྗེ་སོགས་ལ་རྣལ་འབྱོར་མའི་ཟབ་ཁྲིད་ལུང་བཅས་ཀྱིས་མཚོན་འདོད་ཆོས་རྒྱ་ཆེར་སྩལ། མང་ཐོས་ཆོས་རྗེ་རིན་ཆེན་བཀྲ་ཤིས་ལས་ལྔ་པ་རིན་པོ་ཆེའི་གསུང་རབ་ཕལ་ཆེར་དང་། རྨོར་ཆེན་རྡོ་རྗེ་འཆང་གི་ཞལ་སློབ་གྲུབ་དབང་པ་རྒྱལ་མཚན་ལས་དཀོན་མཆོག་སྤྱི་འདུས་ཀྱི་དབང་ལུང་ཁྲིད་གསུམ་སོགས། ཞྭ་ལུ་པ་རིན་ཆེན་འཇམ་དཔལ་ལས་དུས་འཁོར་སྒྲུབ་ཐབས་རིན་ཆེན་སྙིང་པོ། གནུབས་སྟོན་བློ་བཟང་དོན་གྲུབ་ལས་བྱང་གཏེར་ལྕགས་སྡོང་མ་དང་། རྒྱ་ཅན་དྭང་མ་བཅུད་འདྲེན་གྱི་དབང་ལུང་ཁྲིད་གསུམ་སོགས་ཟབ་ཆོས་མང་དུ་གསན། ཟླ་བ་དགུ་པའི་ནང་གཙང་དུ་ཕེབས་པར། ཡར་ལམ་བཀྲ་ཤིས་ལྷུན་པོར་པཎ་ཆེན་ཐམས་ཅད་མཁྱེན་པ་མཇལ་ཕྱག་དང་། རིམ་གྱིས་འདར་གྲོང་ཆེན་དུ་ཕེབས། རྒྱལ་བའི་བཀའ་འགྱུར་རིན་པོ་ཆེ་ཚལ་པར་ཤིན་ཏུ་ལེགས་པ་སྦྱོར་འཇགས་སུ་སྩལ། ཟླ་བ་བཅུ་པའི་ཚེས་༢༣ལ་དཔལ་ས་སྐྱར་ཆིབས་བསུ་སོགས་བཀུར་བཟོས་ཁྱད་འཕགས་དང་བཅས་ཏེ་འཕྱག་ཕེབས། དམར་ཕྱོགས་མཁའ་འགྲོ་འདུ་བའི་དུས་ཁྱད་པར་ཅན་གྱི་ཉིན་མགོ་བརྩམས་ཏེ་དཔལ་ས་སྐྱ་པ་འཇམ་མགོན་ཀུན་དགའ་བློ་གྲོས་མཆེད་གཉིས་དང་། རྩེ་གདོང་སྤྲུལ་སྐུ་མཁྱེན་རབ་བསྟན་འཛིན་ལྷུན་གྲུབ་སོགས་ལ་གསུང་ངག་རིན་པོ་ཆེ་སློབ་བཤད་ཀྱི་དབང་བྱིན་རླབས་ལུང་ཁྲིད་བཀའ་བཅས་དང་། ཞར་བྱུང་རྗེས་གནང་ཟུར་བཀའི་རིགས་སོགས་བསམ་གྱིས་མི་ཁྱབ་པ་རིམ་པར་སྩལ་བས་སྙན་བརྒྱུད་བསྟན་པའི་ཉི་མ་ཕྱོགས་བརྒྱར་འཆར་བའི་རྟེན་འབྲེལ་ངང་གིས་འགྲིགས། ཤིང་གླང་རྒྱལ་ཟླའི་ཚེས་བདུན་ནས་བཟུང་རྒྱལ་བའི་བཀའ་འགྱུར་རིན་པོ་ཆེའི་ལྗགས་ལུང་གཙོ་བོར་གྱུར་པའི་བཀའ་ལུང་བསམ་གྱིས་མི་ཁྱབ་པར་སྩལ་བའི། ལོ་དེའི་ཆུ་སྟོད་ཟླ་བ་ཕྱི་མའི་ཚེས་༥ལ་རེ་ཞིག་ཆོས་མཚམས་མཛད་ནས། གདན་ས་ཆེན་པོ་ནས་ཀྱང་ཆོས་ཡོན་གྱི་མཎྜལ་སོགས་བསྙེན་བཀུར་བསམ་གྱིས་མི་ཁྱབ་པ་མཛད། དེ་ནས་གྲོང་ཆེན་ཆོས་འཁོར་ཡང་རྩེར་ཕེབས་ནས་གྲོ་བཞིན་ཟླ་བའི་དཀར་ཕྱོགས་མཁའ་འགྲོ་འདུ་བའི་ཚེས་༡༤ནས་བཟུང་གསུང་ངག་རིན་པོ་ཆེའི་ཆོས་འཁོར་རྒྱ་ཆེར་བསྐོར། འདི་སྐབས་ཡོངས་འཛིན་ཆོས་གྲགས་བཟང་པོ་ལས་དུས་འཁོར་རིགས་ལྡན་ལུགས་ཀྱི་དབང་བཀའ་གསན། གཞན་ཡང་རྟེན་གསུམ་ཉམས་གསོ་གསར་བཞེངས་སོགས་བྱ་བ་ལས་ཀྱི་འཁོར་ལོ་ཡང་ཅི་རིགས་པར་མཛད། གྲུབ་ཆེན་ཐང་སྟོང་རྒྱལ་པོས་བྱིན་གྱིས་བརླབས་པའི་གཅུང་རི་བོ་ཆེར་གདན་འདྲེན་ལྟར་ཕེབས་ནས། རིག་འཛིན་བློ་བཟང་སྟོབས་ལྡན་སོགས་ལ་ཤངས་ཆོས་ཀྱི་སྨིན་གྲོལ་ཡོངས་རྫོགས་སོགས་བཀའ་ཆོས་བསམ་གྱིས་མི་ཁྱབ་པ་སྩལ། རྗེ་གྲུབ་ཐོབ་ཆེན་པོས་བྱིན་གྱིས་བརླབས་པའི་ཐུགས་ཉམས་ཁྱད་པར་ཅན་འཁྲུངས། རི་བོ་ཆེའི་མཁན་ཆེན་དྲུང་ནས་དོན་ཏིག་འགྲོ་བ་ཀུན་གྲོལ་གྱི་དབང་ལུང་ཁྲིད་གསུམ། ཐང་སྟོང་པ་ནས་བརྒྱུད་པའི་བརྒྱད་སྟོང་པའི་བསྡུས་ལུང་། མཁའ་གྲིབ་གླུད། བླ་མའི་རྣལ་འབྱོར། སྤྱན་རས་གཟིགས་སེམས་དཔའ་བཞི་བརྩེགས་ཀྱི་མ་ཎི་བུམ་དབང་། རིལ་བུ་དཀར་དམར་གྱི་ཡིག་སྐོར་སོགས་ཀྱི་ལུང་། བྱང་གཏེར་ཐུགས་རྗེ་ཆེན་པོའི་དབང་ལུང་སོགས་གསན་ཅིང་། ཕར་ཡང་ནཱ་རོ་མཁའ་སྤྱོད་ཀྱི་བྱིན་རླབས་སོགས་སྩལ། མེ་སྟག་ལོར་གཏེར་བདག་གླིང་པའི་དངོས་སློབ་ཀུན་བཟང་ཀློང་གྲོལ་ལས་སྒྲུབ་ཐབས་འདོད་བུམ་གྱི་དབང་རྗེས་གནང་ལུང་བཅས་དང་། གཏེར་གསར་སྐོར་གྱི་དབང་ལུང་ཁྲིད་གསུམ་ཕལ་ཆེར་ཚང་བར་གསན། བཀྲ་བཟང་པ་བླ་ཆེན་ཀུན་བཟང་ཡེ་ཤེས་ལས་མཁའ་འགྲོ་སྙིང་ཏིག་གི་ཁྲིད་ཡིག་ནོར་བུ་ལུགས་བསྡེབས་པའི་ལུང་གསན། གྲོང་ཆེན་ཤིང་མང་གི་འདུ་ཁང་ཉམས་གསོ་སོགས་གནང་། ནག་ཟླའི་ནང་དཔལ་ས་སྐྱར་སླར་ཡང་ཕེབས་ཏེ། འཇིགས་བྱེད་རྭ་ལུགས་ཐུན་མོང་མ་ཡིན་པ་བཅུ་གསུམ་མའི་དབང་ལུང་ཁྲིད་གསུམ་ཆ་ཚང་སོགས་དབང་ཁྲིད་དང་། སྒྲུབ་ཐབས་རྒྱ་མཚོ་སོགས་རྗེས་གནང་དང་མཚན་ཉིད་སྐོར་པུསྟི་གྲགས་ཆེ་བ་བཅོ་བརྒྱད་སོགས་ལུང་གི་སྐོར་དང་། གསེར་ཆོས་དང་མགོན་པོ་ཆེ་ཆུང་སོགས་སྙན་བརྒྱུད་ཀྱི་སྐོར་བསམ་གྱིས་མི་ཁྱབ་པ་རྗེ་ཉིད་ལ་མངའ་བ་ཕལ་ཆེར་བུམ་པ་གང་བྱོའི་ཚུལ་དུ་གནང་། ས་ཆེན་ཀུན་བློ་ལས་རྡོ་རྗེ་ཕུར་པའི་སྟོད་ལས་དང་། ཡང་དག་ལྷ་དགུ་སོགས་དབང་ལུང་མང་པོ། གཅུང་མཐུ་སྟོབས་དབང་ཕྱུག་ལས་འཇམ་དཔལ་དམར་སེར་གྱི་རྗེས་གནང་། རྗེ་བཙུན་ཀུན་དགའ་བསྟན་པའི་ཉི་མ་ལས་བསམ་གླིང་ཨ་ཏི་སོགས། ཀུན་དགའ་བསྟན་པའི་སྒྲོན་མེ་ལས་དྲག་དམར་མྱང་ལུགས་ཀྱི་དབང། ཞི་དགོན་མཁན་ཆེན་བསོད་ནམས་དཔལ་བཟང་ལས་བདེ་མཆོག་དང་ཡོ་གའི་སྐོར་རྒྱུན་དཀོན་གྲས་དང་། གཟིམས་ཕུག་སྤྲུལ་སྐུ་བློ་བཟང་བསྟན་འཛིན་མགོན་པོ་ལས་ཏཱ་ར་ནཱ་ཐས་མཛད་པའི་ནི་གུའི་ཁྲིད་ཡིག་དང་། གྲུབ་དབོན་བསྟན་འཛིན་ཕུན་ཚོགས་ཀྱི་རྣམ་ཐར་ཞལ་གསུང་མ། མཁྱེན་བརྩེ་ཕུན་ཚོགས་ཀྱི་ཞལ་བསྐངས་དང་བཅས་པ། མཁན་ཆེན་ཀུན་དགའ་ཟླ་འོད་ལས་རྗེ་རང་ཉིད་ཀྱིས་མཛད་པའི་ཡབ་རྗེ་བསོད་ནམས་རིན་ཆེན་གྱི་རྣམ་ཐར། དྲུང་ཡིག་ཀུན་དགའ་སངས་རྒྱས་ལས་སྒྲ་མདོ་པཱ་ཎི་པའི་ཕྱག་ཁྲིད་སོགས་གསན། དེ་ནས་བཀྲ་ཤིས་ཆོས་སྡིང་ཞེས་པའི་བཙུན་དགོན་གསར་བསོད་ནམས་ཆོས་འཕེལ་གྱི་ཞལ་སློབ་བཙུན་མ་རྣམས་ཀྱི་རྟེན་གཞི། མའི་དགོན་པ་གསར་འདེབས་མཛད་པར་འཕྱག་ཕེབས་ཤིང་གང་ཅིར་བཀའ་དྲིན་ཆེན་པོས་ཁྱབ་པར་མཛད་ཅིང་། དམག་ཟོར་མར་གཉེར་དུ་གཏད་པས་ཤིན་ཏུ་འགོ་བའི་མཚན་མའང་སྣང་། གྲོང་ཆེན་དུ་ཕེབས་ནས་གྲུབ་དབང་ཀུན་བཟང་ཀློང་གྲོལ་ལས་མཁའ་འགྲོ་སྙིང་ཏིག་གི་དབང་ལུང་སྨིན་ཁྲིད་དང་། གཡུ་ཐོག་སྙིང་ཏིག་གི་སྨིན་གྲོལ་སོགས་རྒྱ་ཆེར་གསན། མུས་ཆེན་ལས་གཅོད་ཐང་སྟོང་སྙན་བརྒྱུད་སྐོར་གསན། དེ་དག་གི་སྐབས་དུད་སོལ་མས་ཞལ་བསྟན་པ་དང་། མ་གཅིག་གིས་བྱིན་གྱིས་བརླབས་པའི་གཟིགས་སྣང་སོགས་བྱུང་། མེ་ཡོས་ཟླ་བ་གཉིས་པར་དབུས་ཕྱོགས་སུ་འཕྲལ་དུ་ཕེབས་ཤིང་། ཆོས་ཀྱི་ཕྲིན་ལས་སྤྱི་དང་། སོག་ཡུལ་ཧ་ལ་ཤན་གྱི་བླ་དཔོན་ཟུང་འབྲེལ་ཐོ་ཡོན་དར་རྒྱས་ལ་དབང་ལུང་མང་དུ་གནང་ཞིང་། ཕྱོགས་དེར་གདན་འདྲེན་ཞུས་ཀྱང་ཕེབས་པའི་ཞལ་བཞེས་མ་གནང་། དེ་ནས་ཡར་ཀླུང་དུ་ཕེབས་ནས་འབྲུག་ལོར་བཅད་རྒྱའི་ཐོག་བཅོ་བརྒྱད་གདུང་བརྒྱུད་རིན་པོ་ཆེ་དང་། བོང་འབྲུག་ཆོས་རྗེ་སོགས་ལ་ཟབ་རྒྱས་ཀྱི་ཆོས་འཁོར་བསམ་གྱིས་མི་ཁྱབ་པ་བསྐོར། བཅོ་བརྒྱད་གདུང་བརྒྱུད་རིན་པོ་ཆེ་འཇམ་དབྱངས་མཁྱེན་བརྩེའི་ཡང་སྲིད་ངོས་བཟུང་ཞིང་ཤིན་ཏུ་ཐུགས་མཉེས་པར་མཛད། ས་སྦྲུལ་ཕལ་ཆེར་བཅད་རྒྱ་དང་། རྨོར་དུ་ཕེབས་ཤིང་རྨོར་ཆེན་རིན་པོ་ཆེའི་ཟླ་མཆོད་བཙུགས། ལྕགས་རྟ་ལོར་ཤེའུ་གྲོང་དུ་རྣལ་འབྱོར་མའི་བཀའ་ཆོས་སྩལ་ཞིང་རྨོར་ཆེན་རིན་པོ་ཆེའི་དགོངས་རྫོགས་རྣལ་འབྱོར་མའི་སྒྲུབ་མཆོད་སོགས་བཙུགས། ལྕགས་ལུག་ལོར་རྒྱལ་དབང་བདུན་པ་རིན་པོ་ཆེར་ཞབས་བརྟན་འབུལ་བ་དང་། ཕྱག་རྡོར་འཁོར་ཆེན་གྱི་བཀའ་དབང་གསན། བཅོ་བརྒྱད་པ། བོང་འབྲུག་པ། ཞི་བ་ལྷ་སོགས་ལ་གྲབ་ཆོས་མང་བ་དང་། འཕན་ཡུལ་བཅོ་བརྒྱད་པས་གདན་དྲངས་པ་བཞིན་ཕེབས་ནས་སྒྲུབ་ཐབས་རྒྱ་མཚོའི་རྗེས་གནང་སོགས་སྩལ། ལོ་སྔ་ཕྱི་འདི་ལ་ཚོགས་གསོག་ཀྱང་རྒྱ་ཆེར་གནང་། དེ་ནས་ལྷ་ལྡན་དང་འོན་ཆོས་སྡིང་སོགས་བརྒྱུད་གདན་སར་ཕེབས། ཆུ་སྤྲེལ་ཆོ་འཕྲུལ་ཟླ་བར་གཙང་ཕྱོགས་སུ་ཆིབས་ཁ་བསྒྱུར་ནས་གནས་གཟིགས་དང་བསྟུན་རིམ་གྱིས་གྲོང་ཆེན་དུ་ཕེབས། ས་ག་ཟླ་བར་དཔལ་ས་སྐྱར་ཞབས་པད་བཀོད་དེ། འཇམ་མགོན་སྐུ་མཆེད་དང་། ཞི་དགོན་བསོད་ནམས་དཔལ་བཟང་དང་། སྐལ་བཟང་རྣམ་གྲོལ་སོགས་ལ་ངོར་ཆེན་བཀའ་འབུམ་པོད་བཞི་མ་སོགས་ལུང་དང་། གཤེད་དམར་སྤྲོས་མེད་དང་། ཤངས་ཆོས་ཡོངས་རྫོགས་སོགས་ཟབ་རྒྱས་ཀྱི་ཆོས་འཁོར་མཐའ་ཀླས་པ་བསྐོར། སླར་གྲང་ཆེན་དུ་ཕེབས་ནས་མུས་ཆེན་དང་། རྫོང་རམ། ངག་དབང་ཤེས་རབ་སོགས་ལ་ཆོས་དང་ཟང་ཟིང་གི་ལེགས་ཚོགས་རྒྱ་ཆེར་སྤེལ། ཐ་སྐར་ཟླ་བར་ལ་སྟོད་དིང་རི་གླང་འཁོར་དུ་ཆེད་གཏད་ཀྱིས་ཕེབས་ནས། གླང་འཁོར་གདན་ས་པ་འཆི་མེད་ཀྱི་དངོས་གྲུབ་བརྙེས་པ་འཆི་མེད་གཞོན་ནུ་བློ་གྲོས་ཀྱི་སྤྱན་སྔར་ཞི་བྱེད་བརྒྱུད་པ་ཕྱི་མའི་སྐོར་གྱི་དབང་དང་ཁྲིད་སྐོར་ཚང་མ་དང་། རིག་པ་གཅེར་མཐོང་གི་ཉམས་ཁྲིད་གསན་ཅིང་། ལུང་སྐོར་ཆོས་མཛད་སྐལ་བཟང་རྣམ་གྲོལ་ནས་གསན་པར་བཞག་སྟེ་སླར་གསན་བཞེས་གནང་། རི་བོ་ཆེ་བརྒྱུད་གྲོང་ཆེན་དུ་ཕེབས། ཛ་ལུང་རྡོ་རྗེ་འཛིན་པ་ལས་རིག་འཛིན་སྲོག་སྒྲུབ་ཀྱི་དབང་ལུང་ཆ་ཚང་སོགས་གསན། གཞན་ཡང་འཁོར་ལོ་གསུམ་གྱི་མཛད་བཟང་གོང་འཕེལ་དུ་གནང་། ལོ་ཕྱི་མའི་ཆུ་སྟོད་ཟླ་བར་སླར་དཔལ་ས་སྐྱར་ཕེབས་ནས་ཐར་རྩེ་རྡོ་རྗེ་འཆང་དང་ཞལ་རྒྱས་སུ་མཛད་ཅིང་ཏྲཀྴད་ཀྱི་རྗེས་གནང་གསན། འཇམ་མགོན་སྐུ་མཆེད་སོགས་ལ་ངག་དབང་ཆོས་གྲགས་ཀྱི་ལམ་འབྲས་སྐོར་དང་། ངག་དབང་བསྟན་རྡོར་གྱི་ལམ་འབྲས། ཀུན་མཁྱེན་ཀློང་ཆེན་པའི་སེམས་ཉིད་ངལ་བསོ་རྩ་འགྲེལ་སོགས་ངལ་བསོ་སྐོར་གསུམ། ཁྱད་པར་མགོན་པོ་བེང་གི་སྐོར་ཡོངས་སུ་རྫོགས་པ་དང་། གཞན་ཡང་སྨིན་གླིང་གཏེར་གསར་ཕལ་ཆེར་དང་། སྒྲུབ་ཐབས་འདོད་བུམ་སོགས་རྒྱ་ཆེར་སྩལ་བ་སྟེ་འདི་ནི་ས་སྐྱར་ཕེབས་པའི་ཐ་མའོ། །དེ་ནས་གྲོང་ཆེན་བརྒྱུད་རིམ་གྱིས་རྒྱལ་ཟླའི་ཚེས་བཅུ་བཞི་ནས་དབུས་སུ་ཆིབས་ཁ་བསྒྱུར། འཕགས་སྡེར་འདུ་ཁང་ཞིག་གསོའི་ཞལ་འདེབས་གནང་། ལྷ་ལྡན་དུ་རྒྱལ་དབང་རིན་པོ་ཆེར་མཇལ་ཕྱག་གནང་ཞིང་དགྱེས་པའི་བཀའ་ལུང་གིས་དབུགས་དབྱུང་། དེ་ནས་བཀྲས་ཆོས་སུ་ཕེབས། ཤིང་ཁྱི་ཟླ་བ་བཞི་པར་ནཱ་ལེནྡྲར་སྤྱན་དྲངས་པ་བཞིན་ཕེབས་ཏེ། བཅོ་བརྒྱད་བླ་བྲང་གི་ཞལ་ངོ་རྣམས་དང་། བོང་འབྲུག་རིན་པོ་ཆེ། སྐྱིད་ཚལ་ཆོས་རྗེ་སོགས་རིགས་པར་སྨྲ་བའི་བཤེས་གཉེན་མང་པོར་གསུང་ངག་༧༽རིན་པོ་ཆེའི་ཆོས་འཁོར་རྒྱས་པར་བསྐོར་ཏེ། གསུང་ངག་གནང་བའི་ཐ་མའོ། །སླར་ལྷ་ལྡན་བརྒྱུད་དེ་བཀྲས་ཆོས་སུ་ཕེབས་ནས་ཕལ་ཆེར་བཅད་རྒྱ་ཁོ་ནར་བཞུགས་མུར། མཁན་ཆེན་ངག་དབང་ཤེས་རབ་དང་། ཞི་བ་ལྷ་སྤྲུལ་པའི་སྐུ་སོགས་ལ་གསུང་ཆོས་ཅི་རིགས་པའང་སྩལ། ཤིང་ཕག་སྟོན་མཇུག་ས་སྐྱ་ནས་འཇམ་མགོན་སྐུ་མཆེད་དབུས་སུ་ཕེབས་པ་དང་བཀྲས་ཆོས་སུ་ཞལ་འཛོམ་གྱི་ཐོག་བསྙེན་བཀུར་སོགས་ངོ་མཚར་གྱི་མཛད་པ་གོང་འཕེལ་དུ་སྩལ། མེ་བྱི་ལོར་ལྷ་ལྡན་དུ་ཕེབས་ནས་གོང་ཞབས་རིན་པོ་ཆེར་ཞབས་བརྟན་ལེགས་འབུལ་དང་། ཚལ་ནས་རིག་འཛིན་ངག་དབང་པདྨ་དང་། དགེ་སློང་འགྱུར་མེད་ཆོས་འཕེལ་གཉིས་གདན་འདྲེན་མཛད་ནས་བླ་མ་ཞང་གི་ཟབ་རྒྱའི་སྐོར་གྱི་དབང་ལུང་ཆ་ཚང་། དགེ་སློང་བློ་བཟང་བསོད་ནམས་ལས་ལྔ་པ་རིན་པོ་ཆེའི་བཀའ་འབུམ། བཀའ་ཆེན་ཐབས་མཁས་རྒྱ་མཚོ་ལས་རྗེའི་ལམ་རིམ་གཉིས། རིག་འཛིན་པདྨ་བདེ་ཆེན་ལས་མི་བསྐྱོད་དཀོན་མཆོག་ལྷུན་གྲུབ་མའི་རྣམ་ཐར་སོགས་གསན། ཟླ་བ་བཅུ་པའི་ཚེས་བཅུ་ལ་ཤེའུ་གྲོལ་གསང་སྔགས་གླིང་གི་ཆོས་ཁྲིར་ཞབས་བཀོད། མེ་གླང་ལོར་རྨོར་ཆེན་རིན་པོ་ཆེའི་གདན་ས་སྨོན་དགའ་རིན་ཆེན་བསམ་གཏན་གླིང་སེང་གེའི་ཁྲིར་མངའ་གསོལ། དེའི་ས་ག་ཟླ་བར་བདུད་རྩི་རིལ་བུ་བསྒྲུབ་གནང་དང་། སྣྲོན་ཟླར་རིག་འཛིན་ཚེ་དབང་བཀྲ་ཤིས་ལས་གཏེར་ཆེན་སངས་རྒྱས་གླིང་པའི་གཏེར་ཆོས་བླ་མ་དགོངས་པ་འདུས་པའི་དབང་ལུང་ཆ་ཚང་དང་། འཇའ་ཚོན་པའི་གཏེར་ཆོས་ཕལ་ཆེར་སོགས་གསན། སྟོན་མཇུག་ས་སྐྱ་ནས་གཅུང་རིན་པོ་ཆེ་དག་ཞིང་དུ་གཤེགས་སྐབས་འཇམ་མགོན་ཀུན་བློར་གདུང་སྤེལ་དགོས་ཚུལ་གྱི་གསོལ་འདེབས་མཛད་པས་གངས་ཅན་བསྟན་འགྲོའི་ལེགས་ཚོགས་ཀྱི་རྩ་བ་ཚུགས། ལྷ་ལྡན་དུ་ལྕང་སྐྱ་རིན་པོ་ཆེར་ཆོས་ཀྱི་འབེལ་གཏམ་མང་དུ་གནང་བས་ཐུགས་དགྱེས་པའི་པདྨོ་བྱེ། གཏེར་ཆེན་ཀུན་བཟང་བདེ་ཆེན་རྒྱལ་པོ་ལས་རྩ་གསུམ་བཀའ་འདུས་རྒྱུད་ཀྱི་ལུང་དང་། བཅོ་བརྒྱད་སྐུ་གཞོན་བསྙེན་པར་རྫོགས་ཤིང་མཚན་ངག་དབང་ཀུན་དགའ་མཁྱེན་རབ་སངས་རྒྱས་བསྟན་པའི་རྒྱལ་མཚན་དུ་གསོལ། རིག་འཛིན་སྐལ་བཟང་རྣམ་གྲོལ་ལས། དག་སྣང་རྒྱ་ཅན་སྐོར། ཞི་བྱེད་ལུང་སོགས། གྲུབ་ཆེན་བློ་བཟང་གར་དབང་ལས་གཏེར་ཆེན་འཛམ་གླིང་རྡོ་རྗེ་ནས་བརྒྱུད་པའི་ཁྱབ་འཇུག་ཆེན་པོའི་སྐོར་སོགས་གསན། བཀའ་ཆོས་འཆད་སྤེལ་རྒྱུན་མི་འཆད་པར་གནང་། ས་སྟག་ལོར་ཤེའུ་གྲོང་དུ་ཕེབས་ཤིང་། ལྷ་ལྡན་དུ་རྒྱལ་ཚབ་རིན་པོ་ཆེར་རྐྱེན་སེལ་གྱི་དབང་བཀའ་དང། མགོན་པོ་བྲག་རྫོང་མའི་རྗེས་ཁྲིད་སོགས་ཕུལ། ལྕང་སྐྱ་རིན་པོ་ཆེ་ཐོན་ཕྱག་ཕུལ་ཞིང་ཐུགས་དགྱེས་པའི་རྩེར་སོན། དགུན་ལོར་སྡེ་དགེ་དུས་འཁོར་བླ་མ་ཕྲིན་ལས་པ། བོང་འབྲུག་པ། ཞབས་འབྲིང་དགེ་སློང་ངག་དབང་འཇམ་དབྱངས་སོགས་ལ་དུས་འཁོར་གྱི་དབང་ལུང་རྒྱས་པར་སྩལ། ལྷ་ལྡན་དུ་རྒྱལ་ཚབ་རིན་པོ་ཆེར་བཀའ་ཆོས་འགའ་ཞིག་ཕུལ་ཅིང་། གཞན་ཡང་དོན་གཉེར་ཅན་ཅི་རིགས་པར་སྙིང་ཏིག་ཆེན་མོ་བཀའ་ཆོས་རྒྱ་ཆེར་སྩལ། མང་ར་མཁན་ཟུར་ལས་ཆོས་རྗེ་གླིང་པའི་ཕྱག་རྡོར་སེང་སྒྲོག་གི་རྗེས་གནང་སོགས་དང་། རྩོད་བྲལ་དུས་བབས་ཀྱི་གཏེར་ཆེན་ཐེག་ཆེན་གླིང་པ་གར་དབང་ལས་རབ་རྩལ་ལས་ཉིད་ཀྱི་གཏེར་ཆོས་ཕལ་ཆེར་གྱི་དབང་ལུང་གསན་པ་སོགས་དང་། ཕ་བོང་ཁ་མཁན་པོ་སོགས་ལ་རྣལ་འབྱོར་མའི་སྐོར་དང་། བོང་འབྲུག་ཆོས་རྗེ་བསྙེན་པར་རྫོགས་ཤིང་མཚན་མཁྱེན་རབ་ངག་དབང་བློ་གསལ་ཕུན་ཚོགས་སུ་གནང་ངོ་། །མདོར་ན་བདག་ཉིད་ཆེན་པོ་འདི་ནི་རང་དོན་དུ་གསན་བསམ་སྒོམ་གསུམ་མཐར་སོན་ནས། གཞན་དོན་དུ་འཆད་རྩོད་རྩོམ་གསུམ་གྱིས་ཐུབ་བསྟན་ཉིན་མོར་མཛད་པའི་རྣམ་ཐར་འགྲན་ཟླ་དང་བྲལ་བ་སྟེ། དེ་ཡང་སྔར་སྨོས་པ་ལྟར་གཙོ་བོར་རྨོར་ཆེན་རྡོ་རྗེ་འཆང་ཀུན་དགའ་ལྷུན་གྲུབ་ཉིད་རྩ་བའི་བླ་མ་གཅིག་པུར་བཟུང་ནས། དེའི་ཐུགས་སྲས་འཕགས་སྡེ་མཁན་ཆེན་ངག་དབང་བློ་གསལ། བསམ་ཡས་བཀའ་འགྱུར་བ་སངས་རྒྱས་རྒྱལ་མཚན། གྲུབ་དབང་ཀུན་དགའ་ཚུལ་ཁྲིམས། ཁམ་སྟོན་སངས་རྒྱས་རྒྱ་མཚོ། འཁོར་ལོ་སྡོམ་པ། ཆོས་འཁོར་སློབ་དཔོན་ཀུན་དགའ་བསམ་གཏན། འཇིགས་བྱེད་གྲུབ་བརྙེས་བཀྲ་ཤིས་ཆོས་སྡེའི་སློབ་དཔོན་བསོད་ནམས་སྣང་བྱེད། གྲུབ་དབང་པདྨ་རྒྱལ་མཚན། རིག་འཛིན་སྐལ་བཟང་རྣམ་གྲོལ། རྟོགས་པའི་མངའ་བདག་པུ་ཏྲག་བླ་མ་ལེགས་པ་དོན་གྲུབ། རྟ་མགྲིན་གྲུབ་བརྙེས་སློབ་དཔོན་ངག་དབང་གྲགས་པ། མང་ར་མཁན་པོ་བློ་བཟང་དགེ་འདུན། མཁས་བཙུན་དམ་པ་གངས་ཅན་མཁན་པོ་ངག་དབང་རབ་བརྟན། འཕགས་སྡེ་བ་བསྟན་པ་རྒྱལ་མཚན། དགོན་གསར་སློབ་དཔོན་བསྟན་འཛིན་བཟང་པོ། འཚོ་བྱེད་ངག་དབང་དོན་གྲུབ་སྟེ་རྨོར་ཆེན་རྡོ་རྗེ་འཆང་ཡབ་སྲས་བཅུ་དྲུག་དང་། གཞན་ཡང་ཡབ་རྗེ་བསོད་ནམས་རིན་ཆེན། རྗེ་བཙུན་མཁའ་སྤྱོད་དབང་མོ། གྲུབ་སྒྲོ་ལུང་པ་བསོད་ནམས་ཆོས་འཕེལ། བླ་ཆེན་དཀོན་མཆོག་རྒྱལ་པོ། གོང་དཀར་ཆོས་རྗེ་བློ་གྲོས་དབང་ཕྱུག །ངོར་ཆེན་བཀྲ་ཤིས་ལྷུན་གྲུབ། ཐར་རྩེ་ནམ་མཁའ་བསམ་འགྲུབ། འཇམ་མགོན་དཔལ་ལྡན་ཆོས་སྐྱོང་། ཆོས་རྗེ་བཀྲ་ཤིས་བཟང་པོ། བླ་མ་ནམ་མཁའ་དཔལ་བཟང་། བླ་མ་ཀུན་དགའ་བསྟན་འཛིན། ཆོས་རྗེ་བསྟན་འཛིན་ཕུན་ཚོགས། ས་སྐྱ་པ་ངག་དབང་ཀུན་དགའ་བློ་གྲོས་སྐུ་མཆེད། རྗེ་བཙུན་བསོད་ནམས་བསྟན་པའི་ཉི་མ། མཆོག་གསུམ་ཕྲིན་ལས་དབང་མོ། རབ་བྱུང་མཁན་པོ་བཟོད་པ་འོད་ཟེར། དབོན་ཡིག་པ་ཀུན་དགའ་སངས་རྒྱས། ཞེ་དགོན་མཁན་ཆེན་བསོད་ནམས་དཔལ་བཟང་། གཟིམས་ཕུག་སྤྲུལ་སྐུ་བློ་བཟང་བསྟན་འཛིན་མགོན་པོ། གཟིམས་འོག་སྤྲུལ་སྐུ་སངས་རྒྱས་བསྟན་འཛིན། བོད་འབྲུག་ཆོས་རྗེ་བློ་གསལ་ཕུན་ཚོགས་ཏེ་དཔལ་ས་སྐྱ་པའི་བསྟན་འཛིན་ཆེན་པོ་ཉེར་གཉིས། རྒྱལ་དབང་བདུན་པ་རིན་པོ་ཆེ་སྐལ་བཟང་རྒྱ་མཚོ། ཁྲི་ཆེན་ངག་དབང་མཆོག་ལྡན། རྒྱལ་སྲས་སྤྲུལ་སྐུ་འཇིགས་མེད་གྲགས་པ། ཞི་བ་ལྷ་འཕགས་པ་དགེ་ལེགས་རྒྱལ་མཚན། འབྲས་སྤུངས་བཀའ་འགྱུར་བ་རིན་ཆེན་དམ་ཆོས། བཀའ་འགྱུར་བ་ཐབས་མཁས་རྒྱ་མཚོ་སྟེ་དགའ་ལྡན་པའི་བསྟན་འཛིན་ཆེན་པོ་དྲུག །གྲུབ་དབང་ཀུན་བཟང་ཀློང་གྲོལ། ཐུགས་སྲས་སྤྲུལ་སྐུ་མཆོག་གྲུབ་དཔལ་འབར། ཀཿཐོག་རིག་འཛིན་ཚེ་དབང་ནོར་བུ། དཔལ་ཡུལ་བ་པདྨ་ནོར་བུ། ཟུར་ཕྲིན་ལས་བློ་ལྡན། གླན་སྟོན་འོད་གསལ་རང་གྲོལ། གར་དབང་ལས་རབ་རྩལ། ཀུན་བཟང་བདེ་ཆེན་རྒྱལ་པོ། རིག་འཛིན་ཚེ་དབང་བཀྲ་ཤིས། གནུབས་སྟོན་བློ་བཟང་དོན་གྲུབ། སྔགས་འཆང་རིན་ཆེན་བཀྲ་ཤིས། རྡོར་འཛིན་བློ་བཟང་བསོད་ནམས། གྲུབ་དབང་པདྨ་བདེ་ཆེན། གྲུབ་དབང་རྣམ་སྲས་རྒྱལ་པོ་སྟེ་གསང་ཆེན་རྙིང་མའི་བསྟན་འཛིན་བཅུ་བཞི། མཚུར་ཕུའི་བླ་ཆེན་ཏྲེ་བོ་གོང་མ། སི་ཏུ་རིན་པོ་ཆེ་ཆོས་ཀྱི་འབྱུང་གནས། འབྲུག་པ་ཐམས་ཅད་མཁྱེན་པ་བཀའ་བརྒྱུད་ཕྲིན་ལས་ཤིང་རྟ། རི་བོ་ཆེའི་མཁན་ཆེན་བློ་བཟང་སྟོབས་ལྡན། གྲུབ་རིགས་ངག་དབང་ཡོངས་གྲགས། ལྕགས་ཟམ་པ་བློ་བཟང་དཔལ་གྲུབ། གླང་འཁོར་པ་འཆི་མེད་གཞོན་ནུ་བློ་གྲོས། གྲུབ་དབང་ངག་དབང་པདྨ། དགེ་སློང་འགྱུར་མེད་ཆོས་འཕེལ། ཞྭ་ལུ་བླ་ཆེན་ཐུགས་རྗེ་བརྩོན་འགྲུས་དང་། རིན་ཆེན་འཇམ་དཔལ་ཆོས་མཆོག །སྤོ་ར་དབུ་ཆེན་ཆོས་གྲགས་བཟང་པོ། གྲུབ་མཆོག་བློ་བཟང་གར་དབང་། སྡེ་བཞི་འཚོ་བྱེད་ཆེན་པོ་སྟེ་གྲུབ་མཐའ་རིས་མེད་གསན་པའི་བླ་མ་བཅུ་བཞི་སྟེ་བསྡོམས་པས་བདུན་ཅུ་རྩ་གཉིས་དང་། གཞན་ཡང་ཕྱག་ཆེན་དང་རིག་གནས་སྐོར་གསན་སྦྱངས་དོགས་གཅོད་མཛད་པའི་ཡོངས་འཛིན་མང་པོ་སོགས་མཁས་གྲུབ་ཀྱི་བླ་མ་བསམ་གྱིས་མི་ཁྱབ་པ་བསྟེན་ཏེ། མདོ་སྔགས་གསར་རྙིང་རིག་གནས་དང་བཅས་པ་གངས་ཅན་གྱི་ལྗོངས་སུ་བཞུགས་པ་ཕལ་མོ་ཆེའི་དབང་ཁྲིད་མན་ངག་ལུང་སོགས་མང་དུ་གསན་པ་རྒྱ་མཚོའི་མཐར་སོན་ཅིང་། དེ་ཡང་གསན་ལོ་ཙམ་དུ་མ་བཞགས་པར། གཙོ་བོར་སོ་བྱང་སྔགས་གསུམ་གྱི་སྡོམ་པའི་སྲུང་མཚམས་ལས་ནམ་ཡང་མི་འདའ་བའི་ཚུལ་ཁྲིམས་ཀྱི་བསླབ་པའི་ཀུན་སྤྱོད་རྣམ་པར་དག་པས་གཞི་བཟུང་། གྲུབ་མཐའ་སོ་སོའི་ཚིག་གི་བཤད་ཚུལ། དོན་གྱི་དགོངས་པ། ཕྱག་ལེན་ཕྲ་མོ་ཚུན་ཆོད་ཀྱང་བསམ་བྱུང་གི་ངེས་པས་སྒྲོ་འདོགས་བཅད་པས་ཇི་བཞིན་དུ་མཁྱེན་ཅིང་གཟིགས་ཤིང་། ཟབ་ལམ་ཀུན་གཞིའི་རྣལ་འབྱོར་ལས་ནམ་ཡང་མི་གཡོ་བའི་རྒྱུན་དང་། དབེན་པའི་གནས་རྣམས་སུ་དུས་དང་དུས་སུ་དཔལ་དགེས་པ་རྡོ་རྗེ། རྡོ་རྗེ་རྣལ་འབྱོར་མ། རྡོ་རྗེ་འཇིགས་བྱེད། ཆོས་སྐྱོང་མ་ཧཱ་ཀཱ་ལ་སོགས་ཡི་དམ་ཆོས་སྲུང་རྒྱ་མཚོའི་བསྙེན་སྒྲུབ་དང་། བསྐྱེད་རྫོགས་ཟབ་མོའི་རྣལ་འབྱོར་ཚུལ་བཞིན་དུ་ཉམས་སུ་བཞེས་པས་ཉམས་རྟོགས་ཀྱི་ཡོན་ཏན་བསམ་གྱིས་མི་ཁྱབ་པ་འཁྲུངས་ཤིང་། ཨོ་རྒྱན་ཆེན་པོ་དང་། མཁས་གྲུབ་ཁྱུང་པོ། གྲུབ་ཆེན་ཐང་སྟོང་པ་སོགས་ཀྱིས་དངོས་ཉམས་མནལ་ལམ་གྱི་ཚུལ་དུ་བྱིན་གྱིས་བརླབས་ཤིང་། བཅོམ་ལྡན་འདས་རྡོ་རྗེ་འཇིགས་བྱེད། སངས་རྒྱས་སྨན་གྱི་བླ་མ། འཕགས་མཆོག་སྤྱན་རས་གཟིགས་སོགས་མནལ་ལམ་གྱི་ཚུལ་དུ་ཞལ་གཟིགས། བཅོམ་ལྡན་འདས་འཁོར་ལོ་བདེ་མཆོག་ཛོ་ཀིའི་ཚུལ་གྱིས་རྗེས་སུ་བཟུང་བ་དང་། ཁྱད་པར་རྒྱལ་ཡུམ་རྡོ་རྗེ་རྣལ་འབྱོར་མས་དངོས་ཉམས་མནལ་ལམ་དུ་ཡང་ཡང་རྗེས་སུ་བཟུང་ཞིང་། རྡོ་རྗེའི་ཆོས་སྲུང་རྒྱ་མཚོ་བྲན་བཞིན་དུ་བཀའ་ཉན་པ་དང་། ལྐོག་གྱུར་གནས་དུ་མ་དང་། ཕ་རོལ་གྱི་སེམས་ཤེས་པ་དང་། ཞི་རྒྱས་དབང་དྲག་གི་ལས་རབ་འབྱམས་གང་ལའང་དགོངས་པ་གཏོད་པ་ཙམ་གྱིས་འགྲུབ་པས་མཚོན་ཐུན་མོང་གི་སྣང་ངོར་ཀྱང་འཕགས་ལམ་གྱི་གོ་འཕང་མཐོན་པོར་གཤེགས་པའི་ངོ་མཚར་གྱི་ཡོན་ཏན་རྒྱ་མཚོ་ལྟ་བུ་ལ་དབང་འབྱོར་པ་ལ་བརྟེན་ནས་གཞན་དོན་ཕྲིན་ལས་ཀྱི་རིམ་པ་དང་། འཆད་པའི་དབང་དུ་བྱས་ན། ཟང་ཟིང་དང་སྙན་གྲགས་ལ་སོགས་པའི་ཀུན་སློང་ཐམས་ཅད་རིང་དུ་དོར་ནས། གཅིག་ཏུ་བསྟན་པ་དང་སེམས་ཅན་ལ་ཕན་ན་སྐུ་སྲོག་ཀྱང་འདོར་བ་ལ་ཞུམ་པ་མེད་པའི་ལྷག་བསམ་ཁྱད་པར་ཅན་གྱིས། མདོ་རྒྱུད་བསྟན་བཅོས་དང་སྨིན་གྲོལ་རྗེ་ཉིད་ཀྱིས་གསན་པ་ལས། ལམ་འབྲས་ཚར་བདུན་གྱིས་མཚོན་ཕལ་ཆེར་ལན་གྲངས་དུ་མ་དང་། ཐ་ནའང་ལན་རེར་མ་འཆད་པ་མེད་པ་ལྟ་བུ་དང་། དེ་ཐམས་ཅད་ཀྱང་སླ་བཅོས་དང་། རིགས་འགྲེ་དང་། མི་འོས་པའི་རུང་མཐུན་སྦྱར་བ་སོགས་རང་བཟོའི་དྲི་མ་ཕྲ་མོ་ཙམ་དང་ཡང་བྲལ་ཞིང་། ཕྱག་ལེན་ཕྲ་རགས་ཐམས་ཅད་རང་རང་གི་ལུགས་སྲོལ་མ་འདྲེས་པའི་སྒོ་ནས་ཚིག་དོན་མཐའ་ཆོད་པར་གནང་བས་དཔྱོད་ལྡན་ཐམས་ཅད་ཡིད་དབང་མེད་དུ་འཕྲོག་པར་མཛད། རྩོད་པའི་ཚུལ་ཡང་། སྤྱིར་སྐུ་ཚེ་དུ་མར་མཁས་པའི་སྐྱེ་བ་བརྒྱུད་མར་བཟུང་བ་དང་། ཁྱད་པར་འཕགས་ཡུལ་དུ་རྟོག་གེ་བ་ཐམས་ཅད་ཀྱི་གཙུག་གི་ནོར་བུ་དཔལ་ཆོས་ཀྱི་གྲགས་པར་སྐྱེ་བ་བཞེས་པའི་བག་ཆགས་ཀྱིས་སྐུ་ཚེ་འདིར་ཚད་མ་མ་བསླབ་པ་ཕུལ་དུ་ཕྱིན་པ་མཁྱེན་ཅིང་། གཞུང་ལུགས་དུ་མའི་འགལ་འབྲེལ་དཔྱོད་ལ་སྤོབས་པའི་གཏེར་མཛོད་གྲོལ་བར་གྱུར་ཀྱང་། སྐབས་སུ་བབས་པ་རེ་གཉིས་ཙམ་ལས་སྙིགས་མའི་དུས་ཀྱི་གཞན་དབང་གིས་ཆགས་སྡང་གི་རྒྱུར་འགྱུར་དོགས་དགག་སྒྲུབ་ཀྱི་སྤྲོས་པ་ཆེར་མི་མཛད། བརྩམས་པའི་དབང་དུ་བྱུས་ན། ཐོས་བསམ་གྱི་རིམ་པ་མཐར་སོན་ཅིང་ལྷག་པའི་ལྷས་རྗེས་སུ་བཟུང་བ་སོགས་རྩོམ་པའི་རྒྱུ་གསུམ་ཐམས་ཅད་ཚང་མ་བསྟན་བཅོས་ཇི་ལྟ་བུ་ཞིག་རྩོམ་ཡང་ཐོགས་པ་མི་མངའ་མོད། བླ་མ་གོང་མ་རྡོ་རྗེ་འཆང་དང་ཞལ་མི་གཉིས་པ་དེ་རྣམས་ཀྱི་ལེགས་པར་བཤད་པའི་རྒྱུན་ལ་གནོད་དོགས་གསུང་རྩོམ་རྒྱུ་ཆེར་མ་མཛད་ཀྱང་། ཞུ་བ་པོ་སོ་སོའི་བློ་དང་མཐུན་པར་བཀའ་རྩོམ་ཕྲན་བུ་གནང་བ་ལ། དུས་འཁོར། བླ་མ་ཞི་ཁྲོའི་ཚེ་དབང་། གསོ་རིག་རྒྱུད་བཞི་རྣམས་ཀྱི་བརྒྱུད་འདེབས། གསུང་ངག་རིན་པོ་ཆེ། འཇིགས་བྱེད་དབང་བརྒྱུད་ལུགས་གསུམ། སྨིན་ཁྲིད་ཚེམ་བུ་ལུགས། ནཱ་རོ་མཁའ་སྤྱོད། གུར་ཞལ་རྣམས་ཀྱི་བརྒྱུད་འདེབས་ཀྱི་ཁ་སྐོང་། སྒྲོལ་མའི་གསོལ་འདེབས། རྨོར་ཆེན་མཆོག་སྤྲུལ་མྱུར་ཕེབས། ཡབ་རྗེ་བསོད་ནམས་རིན་ཆེན། བཅོ་བརྒྱད་པ་ཁྱབ་བདག་མཚན་ཅན། ངོར་ཆེན་བཀྲ་ཤིས་ལྷུན་གྲུབ། བསམ་ཡས་ས་ཕུག་པ་ཀུན་དགའ་ཚུལ་ཁྲིམས། ཁམ་ལ་སྟོན་པ་སངས་རྒྱས་རྒྱ་མཚོ། བླ་མ་ལྕགས་ཟམ་པ་རྣམས་ཀྱི་གསོལ་འདེབས། རྗེ་ཉིད་ཀྱི་འཁྲུངས་རབ་དང་རྣམ་ཐར་གསོལ་འདེབས། སྐུ་བསྟོད་བརྟན་བཞུགས་དང་བཅས་པ་སུམ་ཅུ་རྩ་གྲངས། གཞན་ཡང་རིང་འཚོའི་བདེན་ཚིག །འདོད་གསོལ། ཞལ་བྱང་སྣ་ཚོགས། ཡི་གེའི་མ་མོ་སྤེལ་བའི་གསུང་མགུར་གསུམ། སོ་འབྲང་བསྙེན་ཐབས། ཁྱུང་ཁྲ་ནག །སྒྲོལ་དཀར། སྨེ་བ་རྩེགས་དུད་ཁ། བགེགས་མཐར་བྱེད། རྡོར་སེམས། དབྱངས་ཅན་དམར་མོ་རྣམས་ཀྱི་སྒྲུབ་ཐབས་ཚིགས་བཅད། རླུང་ཛ་བཱིར་དང་། ནམ་མཁའ་ཟས་སུ་ཟ་བའི་ཚེ་སྒྲུབ། རས་ཆེན་དཔལ་འབྱོར་བཟང་པོའི་གསེར་ཆོས་འཕོ་བ། རིགས་བྱེད་མའི་རང་བྱིན་རླབས་རྣམས་ཀྱི་གསལ་བྱེད་ཁྱད་པར་ཅན་རེ་རེ། དུས་འཁོར་སྒྲུབ་དཀྱིལ། སྦྱིན་སྲེག །དེའི་དཀྱིལ་འཁོར་གྱི་ཚོན་ཐོ། དྲི་མེད་ཚྭ་ཆོག་གི་ཐིག་རྩ། རྡོ་རྗེ་རྣལ་འབྱོར་མའི་སྒྲུབ་ཐབས་ཚིགས་བཅད་ལྷུག་གཉིས། དཀྱིལ་ཆོག་དང་སྦྱིན་སྲེག་ནག་འགྲོས། མཚམས་ཐོ་བསྐྱེད་ཆོག །ཆ་གསུམ་ནག་འགྲོས། རྫོགས་ཆེན་སྙིང་ཏིག་གི་ཟིན་བྲིས། ཞལ་བཞི་པའི་བསྟོད་པ། གཏོ་མདོས་ཟུང་འབྲེལ། སྔགས་དྲུག་ཕྱག་དྲུག་ཟིན་བྲིས། རྣམ་སྲས་གཏོར་བསྔོ། བསྟོད་བསྐུལ་འོག་མིན་བདེ་ཆེན་མའི་ཁ་སྐོང་། ཆོས་སྲུང་གཞི་བདག་འགའ་ཞིག་གི་གསོལ་མཆོད། གོང་ས་མཆོད་ཡོན་གྱི་ཞབས་བརྟན་འབུལ་སྐབས་ཞལ་བཞེས་ཞུ་བའི་ལེགས་བཤད་དང་། སྒྲ་མདོ་པཱ་ཎའི་བསྡུས་དོན་སོགས་བརྗོད་བྱའི་དོན་རྒྱ་ཆེ་ཞིང་། བརྗོད་བྱེད་ཀྱི་ཚིག་བརླིང་བ། མཁས་བླུན་ཀུན་གྱི་རྣ་བར་སྙན་པ་སོགས་སྡེབ་ལེགས་བརྩམས་པའི་ཕྲེང་བ་འགའ་ཞིག་བཞུགས་སོ། །དེ་ལྟར་འཆད་རྩོད་རྩོམ་གསུམ་གྱི་ཕྲིན་ལས་ནམས་མཁའ་དང་མཉམ་པའི་རང་འབྲས་གསུང་གི་བདུད་རྩི་བཞེས་པའི་བསྟན་འཛིན་གྱི་སློབ་མའང་། དེ་མོ་རིན་པོ་ཆེ་ངག་དབང་འཇམ་དཔལ་བདེ་ལེགས་རྒྱ་མཚོ། ཐར་རྩེ་རྡོ་རྗེ་འཆང་ནམ་མཁའ་བསམ་འགྲུབ། འཇམ་མགོན་དཔལ་ལྡན་ཆོས་སྐྱོང་། འཇམ་དབྱངས་སངས་རྒྱས་ཡེ་ཤེས། དྲག་རྩ་རྡོ་རྗེ་འཆང་བློ་བསལ་བསྟན་འཕེལ། ཤར་ཆེན་མི་འགྱུར་རྒྱལ་མཚན། དཔལ་ས་སྐྱ་པ་འཇམ་མགོན་ཀུན་དགའ་བློ་གྲོས། གཅུང་མཐུ་སྟོབས་དབང་ཕྱུག །བཅོ་བརྒྱད་པ་དགའ་ཆེན་ཁྱབ་བདག་སྙིང་པོ་སོགས་ཞལ་ངོ་གསུམ། རི་བོ་ཆེ་པ་བློ་བཟང་སྟོབས་ལྡན་སྐུ་མཆེད། མདོ་ཁམས་པ་སངས་རྒྱས་རྒྱ་མཚོ་སོགས་མདོ་ཁམས་ཕྱོགས་ཀྱི་མཁས་གྲུབ་དུ་མ། བོང་འབྲུག་ཆོས་རྗེ་བློ་གསལ་ཕུན་ཚོགས་ཆོས་གྲྭ་ཆེན་པོ་ན་ལན་དྲའི་བླ་མ་སློབ་དཔོན་དུ་མ། རྩེ་གདོང་སྤྲུལ་སྐུ་བསྟན་འཛིན་ལྷུན་གྲུབ། གཟིམས་ཕུག་སྤྲུལ་སྐུ་བློ་བཟང་མགོན་པོ། མུས་ཞི་དགོན་མཁན་ཆེན་བསོད་ནམས་དཔལ་བཟང་། གྲོང་ཆེན་མཁན་པོ་ངག་དབང་ཤེས་རབ། རིག་འཛིན་བསྐལ་བཟང་རྣམ་གྲོལ། རྫོང་རི་རབ་འབྱམས་པ་བསྐལ་བཟང་བསྟན་འཛིན། གླིང་སྨད་ཞབས་དྲུང་ཕུན་ཚོགས་བཀྲ་ཤིས་སོགས་གསང་ཕུ་དང་སྐྱེད་ཚལ་གྱི་བླ་མ་སློབ་དཔོན་དུ་མ། རྡོ་རྗེ་འཛིན་པ་བསོད་ནམས་སྣང་བྱེད་དང་། བསོད་ནམས་རིན་ཆེན། ཀུན་དགའ་དཔལ་འབྱོར་སོགས་ཆོས་སྡེའི་བླ་མ་སློབ་དཔོན་མཐའ་དག །རབ་བྱུང་མཁན་པོ་བཟོད་པ་འོད་ཟེར། བཀའ་འགྱུར་བ་སངས་རྒྱས་རྒྱལ་མཚན། ས་ཕུག་གྲུབ་དབང་ཀུན་དགའ་ཚུལ་ཁྲིམས། དགེ་སློང་སངས་རྒྱས་རྒྱལ་མཚན། འབྲུག་པ་ཐམས་ཅད་མཁྱེན་པ། སི་ཏུ་མ་ཧཱ་པཎྜི་ཏ་ཆོས་ཀྱི་འབྱུང་གནས། རྒྱལ་སྲས་བློ་བཟང་འཇིགས་མེད། ཞི་བ་ལྷ་འཕགས་བ་དགེ་ལེགས་རྒྱལ་མཚན། རྫོག་གི་གདུང་འཛིན་ཉག་པོ་ཁུ་དབོན། ཟུར་སྤྲུལ་ཕྲིན་ལས་རྒྱ་མཚོ། པོ་བོ་སྤྲུལ་སྐུ་ལྷུན་གྲུབ་ཕུན་ཚོགས། གངས་ཅན་མཁན་ཆེན་ངག་དབང་རབ་བརྟན། རི་བོ་བདེ་ཆེན་གྱི་མཁན་པོ་བསྟན་འཛིན་རྒྱ་མཚོ། ཕ་བོང་ཁའི་མཁན་ཆེན་སྐལ་བཟང་མཆོག་གྲུབ། མང་ར་མཁན་ཆེན་བློ་བཟང་དཔལ་འབར། ཀོང་པོ་ཞོ་ཁ་བླ་མ་ཟླ་བ་བཟང་པོ། སློབ་དཔོན་ལྷུན་གྲུབ་རྒྱལ་པོ། ཉང་སྟོད་རྩེ་ཆེན་བླ་མ་བྱམས་པ་ཤེས་རབ་སྐྱེད་ཚལ་འོག་བླ་མ་སྐྱེད་གཤོང་ཆོས་རྗེ། འབྲས་གླིང་བླ་མ་མདོ་སྔགས་ཆོས་འཕེལ། བཀའ་ཆེན་ཐབས་མཁས་རྒྱ་མཚོ། ཞྭ་ལུ་དབུ་བྱེད་ཀུན་སྤངས་པ། སོག་ཡུལ་ཧ་ལ་ཤན་གྱི་བླ་དཔོན་ཟུང་འབྲེལ་ཐོ་ཡོན་དར་རྒྱས་སོགས་ཀྱིས་མཚོན་བསྟན་འཛིན་གྱི་སྐྱེ་བུ་མང་དུ་བསྐྲུན་ཅིང་། ས་སྐྱོང་སྡེ་དགེ་ཆོས་རྒྱལ་བསྟན་པ་ཚེ་རིང་ཡབ་སྲས་དང་། འདར་པ་ཡབ་སྲས། མདོ་མཁར་ཞབས་དྲུང་པཎྜི་ཏ་ཚེ་རིང་དབང་རྒྱལ་སོགས་བསྟན་པའི་སྦྱིན་བདག་དུ་མའི་ཐུགས་ཀྱི་བཞེད་པ་ཆོས་མཐུན་དུ་བསྒྲུབས་པས་བསྟན་འགྲོའི་ཕན་བདེ་ལྷག་པར་སྤེལ། ཁྱད་པར་དུ་ནང་ཐུགས་ཀྱི་སྲས་གཅིག་པུ་དཔལ་ས་སྐྱ་པ་ངག་དབང་ཀུན་དགའ་བློ་གྲོས་ཀྱིས་རྗེ་ཉིད་ཀྱི་བཀའ་སྲོལ་ཉམས་མེད་དུ་བཟུང་ནས་འཆད་སྤེལ་རྒྱ་ཆེར་གནང་བས་ད་ལྟའི་བར་དུ་དཔལ་ས་སྐྱ་པའི་སྙན་བརྒྱུད་གཙོ་བོར་གྱུར་པའི་བསྟན་པའི་ཉི་མ་ཕྱོགས་བཅུར་འབར་བར་གྱུར་ཏོ། །དེ་ལྟར་རེ་ཞིག་ཞིང་འདིའི་མཛད་པ་རྫོགས་ནས་ཞིང་ཁམས་གཞན་གྱི་དོན་རྒྱ་ཆེ་བར་དགོངས་ནས། ལྕགས་འབྲུག་ལོར་ལྷ་ལྡན་སོགས་སུ་སྐུ་ཁམས་ལྷག་པར་དྭངས་ཤིང་ཆོས་འཆད་པ་ལ་སྔར་ལས་ཐུགས་སྤྲོ་བའི་ཚུལ་མཛད། བོང་འབྲུག་ཆོས་རྗེ་སོགས་ལ་བི་མ་སྙིང་ཏིག་གི་དབང་ལུང་སྩལ་སྐབས་འོད་གསལ་གྱི་སྣང་བར་འཇའ་ཚོན་སྣ་ལྔ་ཞིག་མདུན་དུ་ཟུག་པར་ཐུགས་གཏད་པའང་བདེ་སྟོང་གི་ངང་དུ་འབྱམས་པ་དང་། ཐུགས་རྗེ་ཆེན་པོ་རྒྱལ་པོ་ལུགས་ཀྱི་ཁྲིད་སྩལ་སྐབས་ཐུགས་རྗེ་ཆེན་པོ་ཞལ་བཅུ་གཅིག་པའི་ཡེ་ཤེས་ཀྱི་སྐུས་རྗེས་སུ་བཟུང་བ་སོགས་ངོ་མཚར་བའི་རྟགས་དང་ནང་གི་ཉམས་མྱོང་གོང་དུ་འཕེལ་བའི་ཚུལ་བསྟན། ཡུལ་ཁོང་ཕུར་ཞབས་པད་མི་བརྟན་པའི་མཚན་མའང་སྣ་ཚོགས་པ་བྱུང་ཞིང་། རྗེ་ཉིད་ནས་ཀྱང་འཆི་འཕོ་སྐྱེ་བ་གཟིགས་པའི་ཕྱིར་གཤེགས་ཚུལ་གྱི་བཀའ་ཕེབས་ཀྱང་སྩལ། ཟླ་བ་དྲུག་པའི་ཚེས་བདུན་ནས་ཡར་ཀླུང་བཀྲས་ཆོས་སུ་བཞུགས་བཞིན་པའི་སྐབས་ཅུང་ཟད་བསྙུན་བའི་ཚུལ་བཞེས། ཚེས་བཅུའི་ཉིན་རིག་འཛིན་སྐལ་བཟང་རྣམ་གྲོལ་སོགས་ལ་ས་པཎ་གྱིས་མཛད་པའི་ལམ་སྦས་བཤད་ཀྱི་ཁྲིད་ཡིག་གི་ལྗགས་ལུང་གསུང་ཆོས་ཐམས་ཅད་ཀྱི་ཐ་མར་སྩལ། དགུང་ལོ་ང་བདུན་བཞེས་པ་ལྕགས་འབྲུག་ཆུ་སྟོད་ཟླ་བའི་ཚེས་བཅུ་དྲུག་ཉིན་ཞབས་ཕྱི་རྣམས་ལ་ལུགས་གཉིས་ཀྱི་བཀའ་སློབ་མཐར་ཕྱིན་པ་དང་། གཟུགས་སྐུའི་རྣམ་འཕྲུལ་འབྱོན་པའི་ཞལ་བཞེས་དང་བཅས། དེའི་སྲོད་འཁོར་སྔ་མ་ཙམ་ནས་བཞུགས་གདན་སྲབ་མོར་ཞབས་རྡོ་རྗེའི་སྐྱིལ་ཀྲུང་དུ་བཞུགས། སྐུ་དྲང་པོར་བསྲངས། ཕྱག་མཉམ་གཞག་གི་ངང་རྒྱལ་ཡུམ་རྡོ་རྗེ་བཙུན་མོའི་མྱུར་ལམ་ལ་བརྟེན་ནས་འོད་གསལ་ཆོས་སྐུའི་དབྱིངས་སུ་སྙོམས་པར་ཞུགས་ཤིང་། ཚེས་བཅུ་དགུའི་ཐོ་རངས་འུར་སྒྲ་ཤིན་ཏུ་ཆེ་བ་དང་བཅས་དྲི་བསུང་ཕུན་སུམ་ཚོགས་པས་གཟིམ་ཁང་ནང་ཁེངས་པ་སོགས་ངོ་མཚར་གྱི་ལྟས་དུ་མ་དང་བཅས་ཏེ་འོད་གསལ་ལས་ཟུང་འཇུག་གི་གཟུགས་སྐུ་མཁའ་སྤྱོད་ཆེན་པོར་ཟང་ཐལ་དུ་གཤེགས་པའི་བརྡར་ཤངས་བུག་གཡོན་ནས་རྡོ་རྗེ་ཟླ་བའི་ཉིང་ཁུ་དང་། ཉིན་མོར་བྱེད་པ་རོ་གཅིག་ཏུ་གྱུར་པ་མཐོ་གང་ཙམ་བབས་ཤིང་དབུ་ཅུང་ཟད་དུད་ཉམས་དང་བཅས་པར་གྱུར། ཚེས་ཉེར་གཉིས་ལ་སྐུ་གདུང་ཞུགས་པ་བཞིན་པས་མེ་ཏོག་གི་ཆར་ཟིམ་བུར་བབས་ཤིང་འཇའ་སྤྲིན་ཁ་དོག་དང་དབྱིབས་རྣམ་པ་ཐམས་ཅད་པས་ནམ་མཁའི་ཁམས་གང་། ཉེར་ལྔ་ལ་གདུང་ཁང་ཞལ་ཕྱེ་བ་ན། གདུང་རུས་ལ་བྃ་ཡིག་ལི་ཁྲིའི་མདོག་ཅན་མང་པོ་དང་། ཧཱུྃ་ཡིག་དང་། དགའ་བ་འཁྱིལ་པ་དང་། རིང་བསྲེལ་ཕྲ་མོ་གྲངས་མེད་པ་སོགས་བྱོན་ནས་མ་དད་པ་རྣམས་དད་པ་དང་། དད་པ་རྣམས་སླར་ཡང་མོས་གུས་གོང་དུ་འཕེལ་བར་མཛད། གཙོ་བོར་བཀྲ་ཤིས་ཆོས་སྡེའི་ཕྱག་མཛོད་དང་གྲྭ་ཚང་གིས་མཚོན། གཞན་ཡང་དཔལ་ས་སྐྱ་པ་ཆེན་པོ་སོགས་ཀྱིས་ཟབ་དགོངས་ཆོས་ཀྱི་དབྱིངས་སུ་རྫོགས་པའི་ཐབས་ཕུལ་དུ་ཕྱིན་པ་དང་། གསེར་དངུལ་སྤེལ་མའི་གདུང་ཁང་བྱང་ཆེན་མཆོད་རྟེན་རྒྱབ་མཐོ་བཅུ་དྲུག་པ་རྒྱན་ཕུན་སུམ་ཚོགས་པ་དང་། སྐུ་རྟེན་གསེར་ཟངས་ཀྱི་འདྲ་སྐུ་དང་། རྡོ་རྗེ་ནག་པོ་ཆེན་པོའི་བླ་བརྒྱུད་སྨན་འདམ་བྱོན་གཙང་། གསུང་རྟེན་བསྟན་འགྱུར་རིན་པོ་ཆེ་སྡེ་དགེའི་སྤར་མ་ཤིན་ཏུ་སྒྲོས་གཙང་བཅས་བཞུགས་ཡུལ་གྱི་དྲི་གཙང་ཁང་དང་། མཆོད་པའི་བྱེ་བྲག་བསམ་གྱིས་མི་ཁྱབ་པ་དང་བཅས་ཏེ་ད་ལྟའང་བཀྲ་ཤིས་ཆོས་སྡེར་བཞུགས་བཞིན་པ་འདི་ལྟར་ལགས་ཤིང་། རྣམ་པར་ཐར་པ་རྒྱས་པ་ནི་དཔལ་ས་སྐྱ་པ་འཇམ་མགོན་ཀུན་དགའ་བློ་གྲོས་ཀྱིས་༡༦༤མཛད་པའི་ངོ་མཚར་རབ་འབྱམས་ཞེས་ལེགས་བཤད་ཕུལ་དུ་ཕྱིན་པ་དང་། རྗེ་ཉིད་ཀྱི་གསན་ཡིག་གླེགས་བམ་གཉིས་བཞུགས་པ་སོགས་ལས་རྟོགས་པར་བྱའོ།། །། ༈

[edit]

gnas gsar rdo rje 'chang ngag dbang kun dga' legs pa'i 'byung gnas ni/ @#/_/gnas gsar rdo rje 'chang ngag dbang kun dga' legs pa'i 'byung gnas ni/__chos sku bde ba chen po'i ngang las ma g.yos bzhin du/__gzugs sku rnam pa gnyis kyi sgyu 'phrul cir yang 'char ba las/__rtsod dus tshe lo brgya pa'i dus 'dir bdag cag gi ston mchog nyi ma'i gnyen du gyur te mdzad pa bcu gnyis kyi sgo nas yid can mtha' klas pa lam dang 'bras bu'i go 'phang la sbyar ba'i mthar/__slar yang tshar chen rdo rje 'chang gi rnam thar du gsal ba ltar ngo mtshar skye ba'i phreng ba bcu gsum dang /__gzhan yang 'phags pa'i dge bsnyen d+harma tA la/__grub chen rdo rje dril bu pa/__paN chen gang ba spel/__dpal chos kyi grags pa/__dge slong nam mkha'i snying po/__dpal ldan a ti sha__/khyab bdag bka' 'gyur ba mgon po bsod nams mchog ldan sogs dag pa'i skye srid tshad med par bzung ba'i mthar shangs rgya mtsho lo tsha zhes bya ba'i yul du/__yab bka' 'gyur ba mgon po bsod nams mchog ldan gyi sku mched 'a zhwa don grub dbang po'i sras/__grub pa'i mtshan ma brnyes pa'i 'a zhwa mkhyen rab rnam rgyal dang /__de sras nam mkha' bsod nams dbang gi rgyal po'am ngag dbang blo gsal mchog ldan dang /__kun dga' bstan pa'i rgyal mtshan/__nam mkha' don grub rgyal po gsum las/__phyi ma dang yum glan gyi rigs las son pa khar kha 'phir byung gi brgyud pa phun tshogs sgrol ma'i sras su rab byung nyi ma'i nang gses nyi sgrol byed de shing pho spre'u'i lo smal po zla ba'i dmar phyogs kyi tshes bcur ngo mtshar ba'i ltas du ma dang bcas te sku 'khrungs/__sku na phra mo'i dus nas saM skr-i ta'i skad gsungs pa sogs bzang po'i bag chags sad/__dgung lo drug pa sa glang lor bkra shis chos sder spyan drangs/__gnas kyi slob dpon bsod nams snang byed dang/__bsod nams rin chen gnyis kyis yi ge'i phyi mo 'bri klog dang /__chos spyod kyi rim pa sogs 'bul bar mdzad pas brda bstan pa tsam dang lan re gzigs pa tsam gyis mkhyen/__dgung lo brgyad pa lcags yos dbo zla ba'i nang rmor dgon du khyab bdag rdo rje 'chang dang ngag dbang kun dga' lhun grub thog mar mjal zhing /__po tA lar pad dkar 'dzin pa ngag dbang ye shes rgya mtsho'i drung du gtsug phud phul bas mtshan ngag dbang sbyin pa zhes gsol/__slar gsang chen rgyud sde'i 'byung gnas bkra shis chos sde'i bla brang du rmor chen thams cad mkhyen pa las skyabs gsum 'dzin pa'i dge bsnyen gyi sdom pa gsan cing mtshan kun dga' legs pa'i 'byung gnas zhes stsal/__tshar lugs dkar po'i lha gsum gyi rjes gnang gis chos kyi sgo phye ste/__srung 'khor rdo rje brag rdzong ma'i nyams khrid sogs zab chos mang du gsan/_dgung lo dgu par sems bskyed lugs gnyis dang /__rdo rje phreng ba kr-i ya sA muts+tsha'i dbang /__gsung ngag rin po che slob bshad sogs zab chos rgya mtsho lta bu rim par gsan bzhes mdzad/__rdo rje brag rig 'dzin pad+ma phrin las la sngon smon dus su sad pas dad gdung shin tu che ba 'khrungs kyang dngos su mjal ba'i stabs ma 'grigs/__dgung lo bco lnga par yar klung bkra shis chos sder rdo rje 'chang gzhon nu blo gros pa'i chos kyi khri la mnga' gsol/__bcu bdun pa lcags byi lor rmor dgon du phebs nas/__khyab bdag bla ma las zab chos mang du gsan cing/__rgyal dbang bdun pa rin po che gser khrir phebs skabs/__'on rgyal sras rin po che 'jigs med grags pas mthun rkyen sbyar te chibs bsur phebs shing /__'jam mgon sa skya pa bsod nams rin chen dbus su chibs bsgyur bskyang ba dang zhal 'dzom mdzad/__dgung lo bco brgyad par lha ldan du rgyal dbang thams cad mkhyen pa'i mdun zhabs brtan phul bar phebs pa dang 'brel mtshungs su rmor chen rdo rje 'chang la'ang zhabs pad brtan pa'i maN+Dal phul/__zla ba lnga pa nas brtsams te mdo sngags gzhung brgya smra ba'i khyab bdag bka' 'gyur ba sangs rgyas rgyal mtshan las rgyal ba'i bka' 'gyur rin po che'i lung gsal dag snyan gsum gyi sgo nas legs par gsan/__khyad par dgung lo bcu dgur phebs pa dge byed ces pa chu pho stag gi lor bsam yas chos 'khor chen por rmor chen rdo rje 'chang chen po las gsung ngag rin po che lam 'bras bu dang bcas pa'i dbang /__byin rlabs/__khrid/__lung sogs slar yang bskyar nas gsan cing /__rgyu dbang skabs rdul tshon gyi dkyil 'khor la rje nyid bzhugs su gsol te bstan pa'i bdag por dbang bskur ba bzhin snyan brgyud kyi bstan pa phyogs mthar khyab pa'i rten 'brel gyi sgo yangs por bye/__nag pa zla ba'i nang mkhan po yongs rdzogs bstan pa'i mnga' bdag rmor chen thams cad mkhyen pa/__las kyi slob dpon bka' 'gyur ba sangs rgyas rgya mtsho sogs dad pa'i dge slong grangs tshang gi dbus su tshigs gsum rim nod kyis bsnyen par rdzogs pa'i dge slong gi dngos por bsgrub cing /__sngar gyi mtshan gyi thog mar ngag dbang dang /__mthar theg mchog dbang gi rgyal po zhes gsol bar mdzad de/__'dul ba 'dzin pa thams cad kyi gtsug gi nor bus zhabs bsten gyi pad+mo la phyag bya bar 'os pa'i dpal yon ngang gis 'phel/__de nas chos sder dpal kyai rdo rje'i gzhi'i bsnyen pa kha skong gi sbyin sreg dang bcas pa mdzad cing /__mkha' 'gro mas rmi lam bzung ba'i grogs mdzad pa sogs rtags mtshan khyad par can brnyes/__nyer gnyis pa shing sbrul lor gtsang du chibs kha bsgyur te/__dpal zhwa lu gser khang du bla chen rdo rje 'chang thugs rje brtson 'grus las dpal dus kyi 'khor lo'i dbang lung man ngag sogs gsan cing /__ngor e wa~M chos ldan sogs brgyud/__gangs can bod kyi rdo rje gdan dpal sa skyar yab rje bsod nams rin chen las bcom ldan 'das rdo rje gzhon nu'i bstod las byang chub sgrub pa'i dbang dang /__lam dbang sogs gsan/__'di skabs yin nam 'jam dbyangs ngag gi dbang phyug rgyal mtshan rab brtan dpal bzang po zhes pa'i mtshan 'bul dang/__bkur bzos che bar mdzad/__rten dang brten par bcas pa mjal zhing phyag mchod smon lam sogs mdzad nas/__sgro mo lung du grub chen thang stong pa'i rnam 'phrul mang thos bsod nams chos 'phel gyi spyan sngar phebs shing /__dpal ldan shangs pa bka' brgyud kyi zab chos mtha' dag bum pa gang byo'i tshul du gsan pas sgyu ma lta bu'i ting nge 'dzin khyad par can thugs rgyud la 'khrungs/__khyab bdag bka' 'gyur ba'i rnam 'phrul du ye shes gzigs pa'i lung gis gsal bar bstan/__de nas 'dar gzhung nas rim gyis brgyud de/__'dar grang mo cher phebs shing brag rtsa rdo rje 'chang blo gsal bstan 'dzin dang zhal 'dzom mdzad/__rmu gshong /__mu gu lung /__thub bstan dge 'phel/__cha lung rdo rje'i brag sogs brgyud nas slar sa skyar phebs shing zhabs brtan gdugs dkar gyi mdos chen sogs mdzad nas rim gyis rang dgon du zhabs bskyod/__nyer gsum par yar klung bkra shis chos sder rdo rje phreng ba dang /__dus kyi 'khor lo sogs dbang bka' chen po rnams stsal zhing /__phyag dpe tshar lan re zung re gzigs pa tsam gyis thogs med du mkhyen pa'i spobs pa'i gter mdzod grol/__slar yang rmor chen rin po che'i zhabs pad du bsnyen nas gsung ngag rin po che'i bka' thun mong ma yin pa sogs zla ba drug tu gsan/__de dang dus mtshungs tsam la mdo khams sde dge chos rgyal chen po bstan pa tshe ring gis dpal dus kyi 'khor lo'i sgrub mchod khyad par can 'dzugs bzhed kyis gdan 'dren dang /__'dar grong chen pos gdan sa 'dzin par gsol ba btab pa'ang zhal gyis bzhes/__sprel lor dus kyi 'gyur bas rmor chen rdo rje 'chang 'on chos sding rgod tshang ri khrod du phebs pa'i zhabs pad du bcar/__slar sku gshegs pa'i rjes kyi bya ba dang /__dgongs pa rdzogs pa'i thabs phul du phyin pa mdzad/__dgung lo nyer drug pa sa bya lor bsam yas su rab byung grwa tshang shin tu mang bar rab byung gnang /__chos skyong chen pos kyang bka' bzhin bsgrub par khas blangs/__zla ba drug par mi dbang chen pos zhabs 'gyur gyi mthun rkyen dang bcas mdo khams sde dger chibs kyi kha lo bsgyur zhing /__phebs lam rong phyogs nas mdzad de tal dkar la rtser grub dbang sangs rgyas rgya mtsho dang mjal ba'i skabs kyang grub dbang dam pas khyab bdag bka' 'gyur ba'i yang srid du nges pa rnyed pa'i gsung gis dbugs dbyung /__lam bar du 'khod pa'i lha sde mi sde rnams kyis kyang gus pas mchod de/__rim gyis sde dge lhun grub steng gi chos grwar phebs nye'i tshe mkhas grub khyung po rnal 'byor gyi ye shes kyi sku gzugs gzhan du bsgyur bas mngon sum du rjes su bzung zhing zung 'jug gi rten 'brel bsgrigs/__chos rgyal chen po dang mjal 'dzom dang legs tshogs rten 'brel gyi sgo 'phar yangs por phye/__dpal dus kyi 'khor lo'i sgrub dkyil nag 'gros ljags bsgrigs bka' drin bskyang zhing /__dgon de'i grwa pa rnams la dpe cha blo 'dzin byed dgos kyi bka' khyab gnang bas zla ba gnyis lhag tsam la brgyud 'debs mngon dkyil bcas chig shur pher ba bdun cu rtsa lhag byung ba rnams la gdangs dang gar thig sogs phyag len rnams bslabs shing /__lugs gnyis ka'i sgo nas thabs mkhas kyis bskyangs pa dang /__dpal dus kyi 'khor lo sku gsung thugs yongs rdzogs kyi dkyil 'khor du rgyud smin par mdzad de/__lcags khyi nag pa zla ba'i yar tshes nas bzung ste dpal dam pa dang po'i sangs rgyas kyi sgrub mchod kun mkhyen bu ston rin po che'i phyag bzhes ji lta ba bzhin 'dzugs par mdzad/__gzhan yang chos kyi 'khor lo bsam gyis mi khyab pa bskor/__zang zing gi dngos po ji snyed byung ba rnams bkra shis chos sder dus ja'i thebs su 'bul bar mdzod pa ched gtad du gtong /__phag lor 'ga' thar du skyabs mgon bdun pa rin po che skal bzang rgya mtsho mjal bar ched kyis phebs shing /__khri chen no mi han las tshe sgrub 'chi med rdo rje'i srog shing gi dbang bka' yang gsan/__byi lor sde dge'i rgyal khab tu rnam sras kyi rten 'dzugs dang /__dmar po skor gsum gyi dbang lung sogs stsal bas bstan pa'i sbyin bdag chen po nyid la 'jam dbyangs gong ma chen pos lung las kyis mngon par bsngags pa dang gsol ras rgya cher gnang bas slar yang yid ches kyi dad pa brtan por thob/__grub dbang sangs rgyas rgya mtshos mtshams sbyar te pho brang chen po'i shar du tshar lugs pa'i mgon khang rten dang brten par bcas pa bzhengs shing phyag len khyad par 'phags pas ye shes pa mngon sum du bzhugs pa'i grags pas khyab/__snga phyir chos rje bkra shis bzang po las/__kye rdor bka' babs bzhi dang /__mkha' 'gro rgya mtsho sogs/__mkhan chen bkra shis lhun grub las sbyong dkyil bcu gnyis kyi dbang sogs gsan/__sa skyong chen po dpon blon sogs la rdo rje phreng ba'i dbang bka' rgyas par stsal/__phyogs de'i mdzad pa re zhig rdzogs nas byang lam brgyud dbus su phebs par/__'phan yul nA len+d+ra chos rje bco brgyad pa dang mjal 'dzom yang dag par mdzad/__lha ldan du jo shAka rnam gnyis sogs la mchod 'bul dang /__mi dbang chen por mjal phyag gnang bas thugs dges pa'i rtser son/__rim gyis yar klung bkra shis chos sder phebs nas dus ja'i sbyor 'jags dang /__yab gshegs pa'i dgongs rdzogs rgya cher gnang /__shing stag lor grub dbang sangs rgyas rgya mtsho dang /__bla ma kun dga' rgya mtsho sogs la rgyal ba'i bka' 'gyur rin po che'i lung rdzogs par stsal zhing /__chu stod zla ba'i nang gtsang phyogs su chibs kha bsgyur/__gro bzhin zla ba'i yar tshes bco lnga la 'dar stod chos 'khor yang rtser tshar rdo rje 'chang chen po'i chos kyi khri la zhabs pad bkod cing gzhungs dang /__sa skya sogs kyis thog drangs te legs 'bul mkhan rgya cher byung /__de nas sa skyar phebs nas yab rje bsod nams rin chen mjal zhing zang zing gi mchod sprin rgya cher spros/__slar 'dar du phebs nas gsung chos ci rigs pa stsal/__zla ba dgu par ngor e wa~M sogs brgyud de slar dbus phyogs su phebs/__ri bo chos gling pa dang /__bkras chos phan tshun rtsod pa phran bu byung bar brten bla gzhis grwa tshang la sbyar gnang mdzad/__sde dge nas rgyal ba'i bka' 'gyur rin po che bslu ma gnang ba'i spar phud phebs pas grwa tshang du sbyor 'jags mdzad/__rmor chen rin po che'i thugs sras 'phags sde mkhan chen ngag dbang blo gsal bstan 'dzin nas mtshan nyid skor pusti grags chen bco brgyad sogs rgya gzhung gi lung rgyun gang bzhugs sogs lung dang /__dri med rnam gnyis kyi dbang lung /__gzhan yang rjes gnang gi rigs mang ba/__gnubs ston blo bzang don grub las byang gter thugs sgrub drag po rtsal gyi chos skor phal cher/__spu brag bla chen legs pa don grub las rmor chen las ma gsan pa'i 'jigs byed skor 'ga' zhig dang /__bka' 'gyur ba rin chen dam chos las 'dul ba'i las chog rnam rgyal gser mdog sogs gong sa lnga pa'i gsung 'ga' zhig dang snyan ngag gi phyag khrid sogs zhu bar mdzad/__'brug lor slar yang sde dge nas gdan 'dren nan bstud phebs pa bzhin mdo khams su chibs kha bsgyur ba'i skabs/__bsam yas chos 'khor chen por 'od gsal gyi snang bar grub chen thang stong rgyal po dang ye shes kyi mkha' 'gro ni gu mas rjes su bzung ba'i gzigs snang ngo mtshar ba'ang byung /__rim gyis byang lam brgyud nas lhun grub steng du phebs shing mchod yon mjal 'dzom legs lam dang /__'jigs byed rwa lugs lha bcu gsum ma'i dbang bka' brgya tshar 'bul ba'i mgo 'dzugs par gnang /__sbrul lor dbang brgya'i 'phros skyong ba dang tsan+dan dkar dmar gyi bder gshegs mchod rten brgyad thog so phyed gnyis tsam pa shin tu khyad 'phags bzhengs par dri med rnam gnyis kyi dkyil 'khor bzhengs pa dang rab gnas sogs mdzad/__rta lor sbyin bdag chen po gshegs pa'i rjes kyi bya ba spyi dang /__khyad par 'jigs byed bcu gsum ma'i sgrub mchod gsar 'dzugs sogs kyis mtshon snga phyir chos kyi 'khor lo rgya cher bskor ba dang /__dngos po'i tshogs bsags kyang bsam gyis mi khyab par mdzad/__ngor chos rje bstan 'dzin phun tshogs las rigs gsum spyi/__gur sam mi 'khrugs pa sogs kyi dbang /__ngor chen dang dkon mchog lhun grub kyi bka' 'bum tshang ma'i lung sogs gsan/__bya lo zla ba bdun pa'i nang du dbus phyogs su phebs/__gong ma mchod yon mjal ba dang /__tshogs gsog gi bya ba rgya cher mdzad/__bkra shis chos sder glang nag bla ma kun dga' dpal 'byor sogs la lam 'bras bu dang bcas pa gsang chen slob bshad pa'i lugs kyi dbang khrid man ngag rgyas par stsal1)/__chu khyi zla ba lnga pa'i nang bsam yas chos 'khor chen po'i bar khang g.yu zhal 'bar bar bco brgyad chos rje yab sras/__kha rag bong 'brug chos rje/__nyan po chos rje mched/__gling smad zhabs drung /__gzhi pa dpon slob/__bkras chos pa sogs la gsung ngag rin po che dang 2)/__rnal 'byor ma sogs chos 'khor rgya cher bskor rjes/__snye thang 'phags sder 'phags chen dpal ldan grags pa'i chos kyi khri la zhabs bkod cing /__de dang lha ldan du gsung chos mang du stsal/__se ra'i gtor sgrub slob dpon rta mgrin gyi grub thob tu grags pa zhig las rta mchog rol pa'i chos skor 'ga' zhig kyang gsan/__chu phag zla 1tshes 10nas bzung bkras chos su spo bo yar 'brog dgon gyi sprul sku lhun grub phun tshogs dang /__'bras gling rab 'byams pa/__tshar gur rab 'byams pa/__rig 'dzin skal bzang rnam grol sogs la gsung ngag rin po che'i chos 'khor rgya cher bskor/__sngon sa skya pa 'jam mgon kun dga' blo gros dbus phebs kyi skabs yar klung khra 'brug tu thog mar mjal bas/__dpon slob phan tshun sku tshe du mar bla slob tu 'brel ba'i bag chags sad de thugs dad bcos min du 'khrungs shing yongs 'dzin du bzhes pas snyan brgyud kyi bstan pa phyogs brgyar 'phel ba'i rten 'brel gyi sgo dang por bye ste/__de res chos 'brel gyi thog mar sgrol dkar yid bzhin 'khor lo'i rjes gnang gsung bshad shin tu rgyas pa/__kye rdor rgyu dbang mdor bsdus bskur ba'i yun tsam gyi tshod zhig stsal bas ston dang bstan pa gzhan nas mi 'tshol ba'i thugs dad khyad par can shar/__shing byi lor rmor du gsung ngag rin po che dang /__'phags sder bco brgyad pa dang /__bong 'brug chos rje sogs la rnal 'byor ma'i zab khrid lung bcas kyis mtshon 'dod chos rgya cher stsal/__mang thos chos rje rin chen bkra shis las lnga pa rin po che'i gsung rab phal cher dang /__rmor chen rdo rje 'chang gi zhal slob grub dbang pa rgyal mtshan las dkon mchog spyi 'dus kyi dbang lung khrid gsum sogs/__zhwa lu pa rin chen 'jam dpal las dus 'khor sgrub thabs rin chen snying po/__gnubs ston blo bzang don grub las byang gter lcags sdong ma dang /__rgya can dwang ma bcud 'dren gyi dbang lung khrid gsum sogs zab chos mang du gsan/__zla ba dgu pa'i nang gtsang du phebs par/__yar lam bkra shis lhun por paN chen thams cad mkhyen pa mjal phyag dang /__rim gyis 'dar grong chen du phebs/__rgyal ba'i bka' 'gyur rin po che tshal par shin tu legs pa sbyor 'jags su stsal/__zla ba bcu pa'i tshes 23la dpal sa skyar chibs bsu sogs bkur bzos khyad 'phags dang bcas te 'phyag phebs/__dmar phyogs mkha' 'gro 'du ba'i dus khyad par can gyi nyin mgo brtsams te dpal sa skya pa 'jam mgon kun dga' blo gros mched gnyis dang /__rtse gdong sprul sku mkhyen rab bstan 'dzin lhun grub sogs la gsung ngag rin po che slob bshad kyi dbang byin rlabs lung khrid bka' bcas dang /__zhar byung rjes gnang zur bka'i rigs sogs bsam gyis mi khyab pa rim par stsal bas snyan brgyud bstan pa'i nyi ma phyogs brgyar 'char ba'i rten 'brel ngang gis 'grigs/__shing glang rgyal zla'i tshes bdun nas bzung rgyal ba'i bka' 'gyur rin po che'i ljags lung gtso bor gyur pa'i bka' lung bsam gyis mi khyab par stsal ba'i/__lo de'i chu stod zla ba phyi ma'i tshes 5la re zhig chos mtshams mdzad nas/__gdan sa chen po nas kyang chos yon gyi maN+Dal sogs bsnyen bkur bsam gyis mi khyab pa mdzad/__de nas grong chen chos 'khor yang rtser phebs nas gro bzhin zla ba'i dkar phyogs mkha' 'gro 'du ba'i tshes 14nas bzung gsung ngag rin po che'i chos 'khor rgya cher bskor/__'di skabs yongs 'dzin chos grags bzang po las dus 'khor rigs ldan lugs kyi dbang bka' gsan/__gzhan yang rten gsum nyams gso gsar bzhengs sogs bya ba las kyi 'khor lo yang ci rigs par mdzad/__grub chen thang stong rgyal pos byin gyis brlabs pa'i gcung ri bo cher gdan 'dren ltar phebs nas/__rig 'dzin blo bzang stobs ldan sogs la shangs chos kyi smin grol yongs rdzogs sogs bka' chos bsam gyis mi khyab pa stsal/__rje grub thob chen pos byin gyis brlabs pa'i thugs nyams khyad par can 'khrungs/__ri bo che'i mkhan chen drung nas don tig 'gro ba kun grol gyi dbang lung khrid gsum/__thang stong pa nas brgyud pa'i brgyad stong pa'i bsdus lung /__mkha' grib glud/__bla ma'i rnal 'byor/__spyan ras gzigs sems dpa' bzhi brtsegs kyi ma Ni bum dbang /__ril bu dkar dmar gyi yig skor sogs kyi lung /__byang gter thugs rje chen po'i dbang lung sogs gsan cing /__phar yang nA ro mkha' spyod kyi byin rlabs sogs stsal/__me stag lor gter bdag gling pa'i dngos slob kun bzang klong grol las sgrub thabs 'dod bum gyi dbang rjes gnang lung bcas dang /__gter gsar skor gyi dbang lung khrid gsum phal cher tshang bar gsan/__bkra bzang pa bla chen kun bzang ye shes las mkha' 'gro snying tig gi khrid yig nor bu lugs bsdebs pa'i lung gsan/__grong chen shing mang gi 'du khang nyams gso sogs gnang /__nag zla'i nang dpal sa skyar slar yang phebs te/__'jigs byed rwa lugs thun mong ma yin pa bcu gsum ma'i dbang lung khrid gsum cha tshang sogs dbang khrid dang /__sgrub thabs rgya mtsho sogs rjes gnang dang mtshan nyid skor pusti grags che ba bco brgyad sogs lung gi skor dang /__gser chos dang mgon po che chung sogs snyan brgyud kyi skor bsam gyis mi khyab pa rje nyid la mnga' ba phal cher bum pa gang byo'i tshul du gnang /__sa chen kun blo las rdo rje phur pa'i stod las dang /__yang dag lha dgu sogs dbang lung mang po/__gcung mthu stobs dbang phyug las 'jam dpal dmar ser gyi rjes gnang /__rje btsun kun dga' bstan pa'i nyi ma las bsam gling a ti sogs/__kun dga' bstan pa'i sgron me las drag dmar myang lugs kyi dbang/__zhi dgon mkhan chen bsod nams dpal bzang las bde mchog dang yo ga'i skor rgyun dkon gras dang /__gzims phug sprul sku blo bzang bstan 'dzin mgon po las tA ra nA thas mdzad pa'i ni gu'i khrid yig dang /__grub dbon bstan 'dzin phun tshogs kyi rnam thar zhal gsung ma/__mkhyen brtse phun tshogs kyi zhal bskangs dang bcas pa/__mkhan chen kun dga' zla 'od las rje rang nyid kyis mdzad pa'i yab rje bsod nams rin chen gyi rnam thar/__drung yig kun dga' sangs rgyas las sgra mdo pA Ni pa'i phyag khrid sogs gsan/__de nas bkra shis chos sding zhes pa'i btsun dgon gsar bsod nams chos 'phel gyi zhal slob btsun ma rnams kyi rten gzhi/__ma'i dgon pa gsar 'debs mdzad par 'phyag phebs shing gang cir bka' drin chen pos khyab par mdzad cing /__dmag zor mar gnyer du gtad pas shin tu 'go ba'i mtshan ma'ang snang /__grong chen du phebs nas grub dbang kun bzang klong grol las mkha' 'gro snying tig gi dbang lung smin khrid dang /__g.yu thog snying tig gi smin grol sogs rgya cher gsan/__mus chen las gcod thang stong snyan brgyud skor gsan/__de dag gi skabs dud sol mas zhal bstan pa dang /__ma gcig gis byin gyis brlabs pa'i gzigs snang sogs byung /__me yos zla ba gnyis par dbus phyogs su 'phral du phebs shing /__chos kyi phrin las spyi dang /__sog yul ha la shan gyi bla dpon zung 'brel tho yon dar rgyas la dbang lung mang du gnang zhing /__phyogs der gdan 'dren zhus kyang phebs pa'i zhal bzhes ma gnang /__de nas yar klung du phebs nas 'brug lor bcad rgya'i thog bco brgyad gdung brgyud rin po che dang /__bong 'brug chos rje sogs la zab rgyas kyi chos 'khor bsam gyis mi khyab pa bskor/__bco brgyad gdung brgyud rin po che 'jam dbyangs mkhyen brtse'i yang srid ngos bzung zhing shin tu thugs mnyes par mdzad/__sa sbrul phal cher bcad rgya dang /__rmor du phebs shing rmor chen rin po che'i zla mchod btsugs/__lcags rta lor she'u grong du rnal 'byor ma'i bka' chos stsal zhing rmor chen rin po che'i dgongs rdzogs rnal 'byor ma'i sgrub mchod sogs btsugs/__lcags lug lor rgyal dbang bdun pa rin po cher zhabs brtan 'bul ba dang /__phyag rdor 'khor chen gyi bka' dbang gsan/__bco brgyad pa/__bong 'brug pa/__zhi ba lha sogs la grab chos mang ba dang /__'phan yul bco brgyad pas gdan drangs pa bzhin phebs nas sgrub thabs rgya mtsho'i rjes gnang sogs stsal/__lo snga phyi 'di la tshogs gsog kyang rgya cher gnang /__de nas lha ldan dang 'on chos sding sogs brgyud gdan sar phebs/__chu sprel cho 'phrul zla bar gtsang phyogs su chibs kha bsgyur nas gnas gzigs dang bstun rim gyis grong chen du phebs/__sa ga zla bar dpal sa skyar zhabs pad bkod de/__'jam mgon sku mched dang /__zhi dgon bsod nams dpal bzang dang /__skal bzang rnam grol sogs la ngor chen bka' 'bum pod bzhi ma sogs lung dang /__gshed dmar spros med dang /__shangs chos yongs rdzogs sogs zab rgyas kyi chos 'khor mtha' klas pa bskor/__slar grang chen du phebs nas mus chen dang /__rdzong ram/__ngag dbang shes rab sogs la chos dang zang zing gi legs tshogs rgya cher spel/__tha skar zla bar la stod ding ri glang 'khor du ched gtad kyis phebs nas/__glang 'khor gdan sa pa 'chi med kyi dngos grub brnyes pa 'chi med gzhon nu blo gros kyi spyan sngar zhi byed brgyud pa phyi ma'i skor gyi dbang dang khrid skor tshang ma dang /__rig pa gcer mthong gi nyams khrid gsan cing /__lung skor chos mdzad skal bzang rnam grol nas gsan par bzhag ste slar gsan bzhes gnang /__ri bo che brgyud grong chen du phebs/__dza lung rdo rje 'dzin pa las rig 'dzin srog sgrub kyi dbang lung cha tshang sogs gsan/__gzhan yang 'khor lo gsum gyi mdzad bzang gong 'phel du gnang /__lo phyi ma'i chu stod zla bar slar dpal sa skyar phebs nas thar rtse rdo rje 'chang dang zhal rgyas su mdzad cing trak+shad kyi rjes gnang gsan/__'jam mgon sku mched sogs la ngag dbang chos grags kyi lam 'bras skor dang /__ngag dbang bstan rdor gyi lam 'bras/__kun mkhyen klong chen pa'i sems nyid ngal bso rtsa 'grel sogs ngal bso skor gsum/__khyad par mgon po beng gi skor yongs su rdzogs pa dang /__gzhan yang smin gling gter gsar phal cher dang /__sgrub thabs 'dod bum sogs rgya cher stsal ba ste 'di ni sa skyar phebs pa'i tha ma'o/__/de nas grong chen brgyud rim gyis rgyal zla'i tshes bcu bzhi nas dbus su chibs kha bsgyur/__'phags sder 'du khang zhig gso'i zhal 'debs gnang /__lha ldan du rgyal dbang rin po cher mjal phyag gnang zhing dgyes pa'i bka' lung gis dbugs dbyung /__de nas bkras chos su phebs/__shing khyi zla ba bzhi par nA len+d+rar spyan drangs pa bzhin phebs te/__bco brgyad bla brang gi zhal ngo rnams dang /__bong 'brug rin po che/__skyid tshal chos rje sogs rigs par smra ba'i bshes gnyen mang por gsung ngag 7)rin po che'i chos 'khor rgyas par bskor te/__gsung ngag gnang ba'i tha ma'o/__/slar lha ldan brgyud de bkras chos su phebs nas phal cher bcad rgya kho nar bzhugs mur/__mkhan chen ngag dbang shes rab dang /__zhi ba lha sprul pa'i sku sogs la gsung chos ci rigs pa'ang stsal/__shing phag ston mjug sa skya nas 'jam mgon sku mched dbus su phebs pa dang bkras chos su zhal 'dzom gyi thog bsnyen bkur sogs ngo mtshar gyi mdzad pa gong 'phel du stsal/__me byi lor lha ldan du phebs nas gong zhabs rin po cher zhabs brtan legs 'bul dang /__tshal nas rig 'dzin ngag dbang pad+ma dang /__dge slong 'gyur med chos 'phel gnyis gdan 'dren mdzad nas bla ma zhang gi zab rgya'i skor gyi dbang lung cha tshang /__dge slong blo bzang bsod nams las lnga pa rin po che'i bka' 'bum/__bka' chen thabs mkhas rgya mtsho las rje'i lam rim gnyis/__rig 'dzin pad+ma bde chen las mi bskyod dkon mchog lhun grub ma'i rnam thar sogs gsan/__zla ba bcu pa'i tshes bcu la she'u grol gsang sngags gling gi chos khrir zhabs bkod/__me glang lor rmor chen rin po che'i gdan sa smon dga' rin chen bsam gtan gling seng ge'i khrir mnga' gsol/__de'i sa ga zla bar bdud rtsi ril bu bsgrub gnang dang /__snron zlar rig 'dzin tshe dbang bkra shis las gter chen sangs rgyas gling pa'i gter chos bla ma dgongs pa 'dus pa'i dbang lung cha tshang dang /__'ja' tshon pa'i gter chos phal cher sogs gsan/__ston mjug sa skya nas gcung rin po che dag zhing du gshegs skabs 'jam mgon kun blor gdung spel dgos tshul gyi gsol 'debs mdzad pas gangs can bstan 'gro'i legs tshogs kyi rtsa ba tshugs/__lha ldan du lcang skya rin po cher chos kyi 'bel gtam mang du gnang bas thugs dgyes pa'i pad+mo bye/__gter chen kun bzang bde chen rgyal po las rtsa gsum bka' 'dus rgyud kyi lung dang /__bco brgyad sku gzhon bsnyen par rdzogs shing mtshan ngag dbang kun dga' mkhyen rab sangs rgyas bstan pa'i rgyal mtshan du gsol/__rig 'dzin skal bzang rnam grol las/__dag snang rgya can skor/__zhi byed lung sogs/__grub chen blo bzang gar dbang las gter chen 'dzam gling rdo rje nas brgyud pa'i khyab 'jug chen po'i skor sogs gsan/__bka' chos 'chad spel rgyun mi 'chad par gnang /__sa stag lor she'u grong du phebs shing /__lha ldan du rgyal tshab rin po cher rkyen sel gyi dbang bka' dang/__mgon po brag rdzong ma'i rjes khrid sogs phul/__lcang skya rin po che thon phyag phul zhing thugs dgyes pa'i rtser son/__dgun lor sde dge dus 'khor bla ma phrin las pa/__bong 'brug pa/__zhabs 'bring dge slong ngag dbang 'jam dbyangs sogs la dus 'khor gyi dbang lung rgyas par stsal/__lha ldan du rgyal tshab rin po cher bka' chos 'ga' zhig phul cing /__gzhan yang don gnyer can ci rigs par snying tig chen mo bka' chos rgya cher stsal/__mang ra mkhan zur las chos rje gling pa'i phyag rdor seng sgrog gi rjes gnang sogs dang /__rtsod bral dus babs kyi gter chen theg chen gling pa gar dbang las rab rtsal las nyid kyi gter chos phal cher gyi dbang lung gsan pa sogs dang /__pha bong kha mkhan po sogs la rnal 'byor ma'i skor dang /__bong 'brug chos rje bsnyen par rdzogs shing mtshan mkhyen rab ngag dbang blo gsal phun tshogs su gnang ngo /__/mdor na bdag nyid chen po 'di ni rang don du gsan bsam sgom gsum mthar son nas/__gzhan don du 'chad rtsod rtsom gsum gyis thub bstan nyin mor mdzad pa'i rnam thar 'gran zla dang bral ba ste/__de yang sngar smos pa ltar gtso bor rmor chen rdo rje 'chang kun dga' lhun grub nyid rtsa ba'i bla ma gcig pur bzung nas/__de'i thugs sras 'phags sde mkhan chen ngag dbang blo gsal/__bsam yas bka' 'gyur ba sangs rgyas rgyal mtshan/__grub dbang kun dga' tshul khrims/__kham ston sangs rgyas rgya mtsho/__'khor lo sdom pa/__chos 'khor slob dpon kun dga' bsam gtan/__'jigs byed grub brnyes bkra shis chos sde'i slob dpon bsod nams snang byed/__grub dbang pad+ma rgyal mtshan/__rig 'dzin skal bzang rnam grol/__rtogs pa'i mnga' bdag pu trag bla ma legs pa don grub/__rta mgrin grub brnyes slob dpon ngag dbang grags pa/__mang ra mkhan po blo bzang dge 'dun/__mkhas btsun dam pa gangs can mkhan po ngag dbang rab brtan/__'phags sde ba bstan pa rgyal mtshan/__dgon gsar slob dpon bstan 'dzin bzang po/__'tsho byed ngag dbang don grub ste rmor chen rdo rje 'chang yab sras bcu drug dang /__gzhan yang yab rje bsod nams rin chen/__rje btsun mkha' spyod dbang mo/__grub sgro lung pa bsod nams chos 'phel/__bla chen dkon mchog rgyal po/__gong dkar chos rje blo gros dbang phyug__/ngor chen bkra shis lhun grub/__thar rtse nam mkha' bsam 'grub/__'jam mgon dpal ldan chos skyong /__chos rje bkra shis bzang po/__bla ma nam mkha' dpal bzang /__bla ma kun dga' bstan 'dzin/__chos rje bstan 'dzin phun tshogs/__sa skya pa ngag dbang kun dga' blo gros sku mched/__rje btsun bsod nams bstan pa'i nyi ma/__mchog gsum phrin las dbang mo/__rab byung mkhan po bzod pa 'od zer/__dbon yig pa kun dga' sangs rgyas/__zhe dgon mkhan chen bsod nams dpal bzang /__gzims phug sprul sku blo bzang bstan 'dzin mgon po/__gzims 'og sprul sku sangs rgyas bstan 'dzin/__bod 'brug chos rje blo gsal phun tshogs te dpal sa skya pa'i bstan 'dzin chen po nyer gnyis/__rgyal dbang bdun pa rin po che skal bzang rgya mtsho/__khri chen ngag dbang mchog ldan/__rgyal sras sprul sku 'jigs med grags pa/__zhi ba lha 'phags pa dge legs rgyal mtshan/__'bras spungs bka' 'gyur ba rin chen dam chos/__bka' 'gyur ba thabs mkhas rgya mtsho ste dga' ldan pa'i bstan 'dzin chen po drug__/grub dbang kun bzang klong grol/__thugs sras sprul sku mchog grub dpal 'bar/__kaHthog rig 'dzin tshe dbang nor bu/__dpal yul ba pad+ma nor bu/__zur phrin las blo ldan/__glan ston 'od gsal rang grol/__gar dbang las rab rtsal/__kun bzang bde chen rgyal po/__rig 'dzin tshe dbang bkra shis/__gnubs ston blo bzang don grub/__sngags 'chang rin chen bkra shis/__rdor 'dzin blo bzang bsod nams/__grub dbang pad+ma bde chen/__grub dbang rnam sras rgyal po ste gsang chen rnying ma'i bstan 'dzin bcu bzhi/__mtshur phu'i bla chen tre bo gong ma/__si tu rin po che chos kyi 'byung gnas/__'brug pa thams cad mkhyen pa bka' brgyud phrin las shing rta/__ri bo che'i mkhan chen blo bzang stobs ldan/__grub rigs ngag dbang yongs grags/__lcags zam pa blo bzang dpal grub/__glang 'khor pa 'chi med gzhon nu blo gros/__grub dbang ngag dbang pad+ma/__dge slong 'gyur med chos 'phel/__zhwa lu bla chen thugs rje brtson 'grus dang /__rin chen 'jam dpal chos mchog_/spo ra dbu chen chos grags bzang po/_grub mchog blo bzang gar dbang /__sde bzhi 'tsho byed chen po ste grub mtha' ris med gsan pa'i bla ma bcu bzhi ste bsdoms pas bdun cu rtsa gnyis dang /__gzhan yang phyag chen dang rig gnas skor gsan sbyangs dogs gcod mdzad pa'i yongs 'dzin mang po sogs mkhas grub kyi bla ma bsam gyis mi khyab pa bsten te/__mdo sngags gsar rnying rig gnas dang bcas pa gangs can gyi ljongs su bzhugs pa phal mo che'i dbang khrid man ngag lung sogs mang du gsan pa rgya mtsho'i mthar son cing /__de yang gsan lo tsam du ma bzhags par/__gtso bor so byang sngags gsum gyi sdom pa'i srung mtshams las nam yang mi 'da' ba'i tshul khrims kyi bslab pa'i kun spyod rnam par dag pas gzhi bzung /__grub mtha' so so'i tshig gi bshad tshul/__don gyi dgongs pa/__phyag len phra mo tshun chod kyang bsam byung gi nges pas sgro 'dogs bcad pas ji bzhin du mkhyen cing gzigs shing /__zab lam kun gzhi'i rnal 'byor las nam yang mi g.yo ba'i rgyun dang /__dben pa'i gnas rnams su dus dang dus su dpal dges pa rdo rje/__rdo rje rnal 'byor ma/__rdo rje 'jigs byed/__chos skyong ma hA kA la sogs yi dam chos srung rgya mtsho'i bsnyen sgrub dang /__bskyed rdzogs zab mo'i rnal 'byor tshul bzhin du nyams su bzhes pas nyams rtogs kyi yon tan bsam gyis mi khyab pa 'khrungs shing /__o rgyan chen po dang /__mkhas grub khyung po/__grub chen thang stong pa sogs kyis dngos nyams mnal lam gyi tshul du byin gyis brlabs shing /__bcom ldan 'das rdo rje 'jigs byed/__sangs rgyas sman gyi bla ma/__'phags mchog spyan ras gzigs sogs mnal lam gyi tshul du zhal gzigs/__bcom ldan 'das 'khor lo bde mchog dzo ki'i tshul gyis rjes su bzung ba dang /__khyad par rgyal yum rdo rje rnal 'byor mas dngos nyams mnal lam du yang yang rjes su bzung zhing /__rdo rje'i chos srung rgya mtsho bran bzhin du bka' nyan pa dang /__lkog gyur gnas du ma dang /__pha rol gyi sems shes pa dang /__zhi rgyas dbang drag gi las rab 'byams gang la'ang dgongs pa gtod pa tsam gyis 'grub pas mtshon thun mong gi snang ngor kyang 'phags lam gyi go 'phang mthon por gshegs pa'i ngo mtshar gyi yon tan rgya mtsho lta bu la dbang 'byor pa la brten nas gzhan don phrin las kyi rim pa dang /__'chad pa'i dbang du byas na/__zang zing dang snyan grags la sogs pa'i kun slong thams cad ring du dor nas/__gcig tu bstan pa dang sems can la phan na sku srog kyang 'dor ba la zhum pa med pa'i lhag bsam khyad par can gyis/__mdo rgyud bstan bcos dang smin grol rje nyid kyis gsan pa las/__lam 'bras tshar bdun gyis mtshon phal cher lan grangs du ma dang /__tha na'ang lan rer ma 'chad pa med pa lta bu dang /__de thams cad kyang sla bcos dang /__rigs 'gre dang /__mi 'os pa'i rung mthun sbyar ba sogs rang bzo'i dri ma phra mo tsam dang yang bral zhing /__phyag len phra rags thams cad rang rang gi lugs srol ma 'dres pa'i sgo nas tshig don mtha' chod par gnang bas dpyod ldan thams cad yid dbang med du 'phrog par mdzad/__rtsod pa'i tshul yang /__spyir sku tshe du mar mkhas pa'i skye ba brgyud mar bzung ba dang /__khyad par 'phags yul du rtog ge ba thams cad kyi gtsug gi nor bu dpal chos kyi grags par skye ba bzhes pa'i bag chags kyis sku tshe 'dir tshad ma ma bslab pa phul du phyin pa mkhyen cing /__gzhung lugs du ma'i 'gal 'brel dpyod la spobs pa'i gter mdzod grol bar gyur kyang /__skabs su babs pa re gnyis tsam las snyigs ma'i dus kyi gzhan dbang gis chags sdang gi rgyur 'gyur dogs dgag sgrub kyi spros pa cher mi mdzad/__brtsams pa'i dbang du byus na/__thos bsam gyi rim pa mthar son cing lhag pa'i lhas rjes su bzung ba sogs rtsom pa'i rgyu gsum thams cad tshang ma bstan bcos ji lta bu zhig rtsom yang thogs pa mi mnga' mod/_bla ma gong ma rdo rje 'chang dang zhal mi gnyis pa de rnams kyi legs par bshad pa'i rgyun la gnod dogs gsung rtsom rgyu cher ma mdzad kyang /__zhu ba po so so'i blo dang mthun par bka' rtsom phran bu gnang ba la/__dus 'khor/__bla ma zhi khro'i tshe dbang /__gso rig rgyud bzhi rnams kyi brgyud 'debs/__gsung ngag rin po che/__'jigs byed dbang brgyud lugs gsum/__smin khrid tshem bu lugs/__nA ro mkha' spyod/__gur zhal rnams kyi brgyud 'debs kyi kha skong /__sgrol ma'i gsol 'debs/__rmor chen mchog sprul myur phebs/__yab rje bsod nams rin chen/__bco brgyad pa khyab bdag mtshan can/__ngor chen bkra shis lhun grub/__bsam yas sa phug pa kun dga' tshul khrims/__kham la ston pa sangs rgyas rgya mtsho/__bla ma lcags zam pa rnams kyi gsol 'debs/__rje nyid kyi 'khrungs rab dang rnam thar gsol 'debs/__sku bstod brtan bzhugs dang bcas pa sum cu rtsa grangs/__gzhan yang ring 'tsho'i bden tshig__/'dod gsol/__zhal byang sna tshogs/__yi ge'i ma mo spel ba'i gsung mgur gsum/__so 'brang bsnyen thabs/__khyung khra nag__/sgrol dkar/__sme ba rtsegs dud kha/__bgegs mthar byed/__rdor sems/__dbyangs can dmar mo rnams kyi sgrub thabs tshigs bcad/__rlung dza bIr dang /__nam mkha' zas su za ba'i tshe sgrub/__ras chen dpal 'byor bzang po'i gser chos 'pho ba/__rigs byed ma'i rang byin rlabs rnams kyi gsal byed khyad par can re re/__dus 'khor sgrub dkyil/__sbyin sreg__/de'i dkyil 'khor gyi tshon tho/__dri med tshwa chog gi thig rtsa/__rdo rje rnal 'byor ma'i sgrub thabs tshigs bcad lhug gnyis/__dkyil chog dang sbyin sreg nag 'gros/__mtshams tho bskyed chog__/cha gsum nag 'gros/__rdzogs chen snying tig gi zin bris/__zhal bzhi pa'i bstod pa/__gto mdos zung 'brel/__sngags drug phyag drug zin bris/__rnam sras gtor bsngo/__bstod bskul 'og min bde chen ma'i kha skong /__chos srung gzhi bdag 'ga' zhig gi gsol mchod/__gong sa mchod yon gyi zhabs brtan 'bul skabs zhal bzhes zhu ba'i legs bshad dang /__sgra mdo pA Na'i bsdus don sogs brjod bya'i don rgya che zhing /__brjod byed kyi tshig brling ba/__mkhas blun kun gyi rna bar snyan pa sogs sdeb legs brtsams pa'i phreng ba 'ga' zhig bzhugs so/__/de ltar 'chad rtsod rtsom gsum gyi phrin las nams mkha' dang mnyam pa'i rang 'bras gsung gi bdud rtsi bzhes pa'i bstan 'dzin gyi slob ma'ang /__de mo rin po che ngag dbang 'jam dpal bde legs rgya mtsho/__thar rtse rdo rje 'chang nam mkha' bsam 'grub/__'jam mgon dpal ldan chos skyong /__'jam dbyangs sangs rgyas ye shes/__drag rtsa rdo rje 'chang blo bsal bstan 'phel/__shar chen mi 'gyur rgyal mtshan/__dpal sa skya pa 'jam mgon kun dga' blo gros/__gcung mthu stobs dbang phyug__/bco brgyad pa dga' chen khyab bdag snying po sogs zhal ngo gsum/__ri bo che pa blo bzang stobs ldan sku mched/__mdo khams pa sangs rgyas rgya mtsho sogs mdo khams phyogs kyi mkhas grub du ma/__bong 'brug chos rje blo gsal phun tshogs chos grwa chen po na lan dra'i bla ma slob dpon du ma/__rtse gdong sprul sku bstan 'dzin lhun grub/__gzims phug sprul sku blo bzang mgon po/__mus zhi dgon mkhan chen bsod nams dpal bzang /__grong chen mkhan po ngag dbang shes rab/__rig 'dzin bskal bzang rnam grol/__rdzong ri rab 'byams pa bskal bzang bstan 'dzin/__gling smad zhabs drung phun tshogs bkra shis sogs gsang phu dang skyed tshal gyi bla ma slob dpon du ma/__rdo rje 'dzin pa bsod nams snang byed dang /__bsod nams rin chen/__kun dga' dpal 'byor sogs chos sde'i bla ma slob dpon mtha' dag__/rab byung mkhan po bzod pa 'od zer/__bka' 'gyur ba sangs rgyas rgyal mtshan/__sa phug grub dbang kun dga' tshul khrims/__dge slong sangs rgyas rgyal mtshan/__'brug pa thams cad mkhyen pa/__si tu ma hA paN+Di ta chos kyi 'byung gnas/__rgyal sras blo bzang 'jigs med/__zhi ba lha 'phags ba dge legs rgyal mtshan/__rdzog gi gdung 'dzin nyag po khu dbon/__zur sprul phrin las rgya mtsho/___po bo sprul sku lhun grub phun tshogs/__gangs can mkhan chen ngag dbang rab brtan/__ri bo bde chen gyi mkhan po bstan 'dzin rgya mtsho/__pha bong kha'i mkhan chen skal bzang mchog grub/__mang ra mkhan chen blo bzang dpal 'bar/__kong po zho kha bla ma zla ba bzang po/__slob dpon lhun grub rgyal po/__nyang stod rtse chen bla ma byams pa shes rab skyed tshal 'og bla ma skyed gshong chos rje/__'bras gling bla ma mdo sngags chos 'phel/__bka' chen thabs mkhas rgya mtsho/__zhwa lu dbu byed kun spangs pa/__sog yul ha la shan gyi bla dpon zung 'brel tho yon dar rgyas sogs kyis mtshon bstan 'dzin gyi skye bu mang du bskrun cing /__sa skyong sde dge chos rgyal bstan pa tshe ring yab sras dang /__'dar pa yab sras/__mdo mkhar zhabs drung paN+Di ta tshe ring dbang rgyal sogs bstan pa'i sbyin bdag du ma'i thugs kyi bzhed pa chos mthun du bsgrubs pas bstan 'gro'i phan bde lhag par spel/__khyad par du nang thugs kyi sras gcig pu dpal sa skya pa ngag dbang kun dga' blo gros kyis rje nyid kyi bka' srol nyams med du bzung nas 'chad spel rgya cher gnang bas da lta'i bar du dpal sa skya pa'i snyan brgyud gtso bor gyur pa'i bstan pa'i nyi ma phyogs bcur 'bar bar gyur to/__/de ltar re zhig zhing 'di'i mdzad pa rdzogs nas zhing khams gzhan gyi don rgya che bar dgongs nas/__lcags 'brug lor lha ldan sogs su sku khams lhag par dwangs shing chos 'chad pa la sngar las thugs spro ba'i tshul mdzad/__bong 'brug chos rje sogs la bi ma snying tig gi dbang lung stsal skabs 'od gsal gyi snang bar 'ja' tshon sna lnga zhig mdun du zug par thugs gtad pa'ang bde stong gi ngang du 'byams pa dang /__thugs rje chen po rgyal po lugs kyi khrid stsal skabs thugs rje chen po zhal bcu gcig pa'i ye shes kyi skus rjes su bzung ba sogs ngo mtshar ba'i rtags dang nang gi nyams myong gong du 'phel ba'i tshul bstan/__yul khong phur zhabs pad mi brtan pa'i mtshan ma'ang sna tshogs pa byung zhing /__rje nyid nas kyang 'chi 'pho skye ba gzigs pa'i phyir gshegs tshul gyi bka' phebs kyang stsal/__zla ba drug pa'i tshes bdun nas yar klung bkras chos su bzhugs bzhin pa'i skabs cung zad bsnyun ba'i tshul bzhes/__tshes bcu'i nyin rig 'dzin skal bzang rnam grol sogs la sa paN gyis mdzad pa'i lam sbas bshad kyi khrid yig gi ljags lung gsung chos thams cad kyi tha mar stsal/__dgung lo nga bdun bzhes pa lcags 'brug chu stod zla ba'i tshes bcu drug nyin zhabs phyi rnams la lugs gnyis kyi bka' slob mthar phyin pa dang /__gzugs sku'i rnam 'phrul 'byon pa'i zhal bzhes dang bcas/__de'i srod 'khor snga ma tsam nas bzhugs gdan srab mor zhabs rdo rje'i skyil krung du bzhugs/__sku drang por bsrangs/__phyag mnyam gzhag gi ngang rgyal yum rdo rje btsun mo'i myur lam la brten nas 'od gsal chos sku'i dbyings su snyoms par zhugs shing /__tshes bcu dgu'i tho rangs 'ur sgra shin tu che ba dang bcas dri bsung phun sum tshogs pas gzim khang nang khengs pa sogs ngo mtshar gyi ltas du ma dang bcas te 'od gsal las zung 'jug gi gzugs sku mkha' spyod chen por zang thal du gshegs pa'i brdar shangs bug g.yon nas rdo rje zla ba'i nying khu dang /__nyin mor byed pa ro gcig tu gyur pa mtho gang tsam babs shing dbu cung zad dud nyams dang bcas par gyur/__tshes nyer gnyis la sku gdung zhugs pa bzhin pas me tog gi char zim bur babs shing 'ja' sprin kha dog dang dbyibs rnam pa thams cad pas nam mkha'i khams gang /__nyer lnga la gdung khang zhal phye ba na/__gdung rus la ba~M yig li khri'i mdog can mang po dang /__hU~M yig dang /__dga' ba 'khyil pa dang /__ring bsrel phra mo grangs med pa sogs byon nas ma dad pa rnams dad pa dang /__dad pa rnams slar yang mos gus gong du 'phel bar mdzad/__gtso bor bkra shis chos sde'i phyag mdzod dang grwa tshang gis mtshon/__gzhan yang dpal sa skya pa chen po sogs kyis zab dgongs chos kyi dbyings su rdzogs pa'i thabs phul du phyin pa dang /__gser dngul spel ma'i gdung khang byang chen mchod rten rgyab mtho bcu drug pa rgyan phun sum tshogs pa dang /__sku rten gser zangs kyi 'dra sku dang /__rdo rje nag po chen po'i bla brgyud sman 'dam byon gtsang /__gsung rten bstan 'gyur rin po che sde dge'i spar ma shin tu sgros gtsang bcas bzhugs yul gyi dri gtsang khang dang /__mchod pa'i bye brag bsam gyis mi khyab pa dang bcas te da lta'ang bkra shis chos sder bzhugs bzhin pa 'di ltar lags shing /__rnam par thar pa rgyas pa ni dpal sa skya pa 'jam mgon kun dga' blo gros kyis 164mdzad pa'i ngo mtshar rab 'byams zhes legs bshad phul du phyin pa dang /__rje nyid kyi gsan yig glegs bam gnyis bzhugs pa sogs las rtogs par bya'o//____//_!