མདོ་ཁམས་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་ཚེ་དབང་གྲུབ་པ་རྩལ།

🚧 This website is under continued development. We appreciate your patience!

Previous Text Back to Volume PageNext Text

Wylie title	mdo khams rdzogs chen bzhi pa mi 'gyur nam mkha'i rdo rje tshe dbang grub pa rtsal
Location	mkhyen brtse'i bka' 'bum Volume 19, sde tshan 1, Text 38, Pages 303-326 (Folios 152a4 to 163b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. mdo khams rdzogs chen bzhi pa mi 'gyur nam mkha'i rdo rje tshe dbang grub pa rtsal. In 'jam dbyangs mkhyen brtse'i dbang po'i bka' 'bum, Vol. 19: 303-326. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

38 303-326	མདོ་ཁམས་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་ཚེ་དབང་གྲུབ་པ་རྩལ། mdo khams rdzogs chen bzhi pa mi 'gyur nam mkha'i rdo rje tshe dbang grub pa rtsal History Texts - lo rgyus   ·   Religious History Texts - chos 'byung	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །མདོ་ཁམས་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་ཚེ་དབང་གྲུབ་པ་རྩལ་ལམ། འཇིགས་མེད་མཁྱེན་བརྩེའི་དབང་ཕྱུག་ཕྲིན་ལས་རྣམ་རྒྱལ་རྡོ་རྗེ་ནི། ཀུན་མཁྱེན་རིག་འཛིན་འཇིགས་མེད་གླིང་པའི་རྡོ་རྗེའི་གསུང་ལས། གནས་དང་འབྲེལ་ལ་གངས་ཀྱི་མཚམས། །ཤུལ་གསུམ་བགྲོད་ལ་བལྟ་རྟོགས་ཀྱིས། །ཨེ་ཀ་ཛ་ཊཱིའི་སྐོང་སྟོང་འབུངས། །ཞེས་དང་། ལྐོག་གྱུར་འདི་དོན་ལྐོག་ཏུ་མ་གྱུར་ཏེ། །རྡོ་རྗེ་གསུམ་སྤྲུལ་གཉིས་ནི་དབུས་མཐར་གབ། །འགྲོ་དོན་ཐུགས་བབས་དག་ཆེན་ཐུགས་ཀྱི་སྤྲུལ། །གནས་དེའི་ནུབ་ཕྱོགས་གནས་དང་ཉེ་བའི་ཆར། །གངས་རིའི་མིང་མཚམས་གསེར་ལྡན་ཀླུང་ཆེན་འགྲམ། །ཆེ་བཙན་རིགས་བཙུན་གསུམ་ཤུལ་གཙང་མའི་བརྒྱུད། །བསོད་ནམས་ཕ་མ་ནོར་འཛིན་མིང་ཐོགས་པར། །ཡོད་ཅེས་ལུང་ཤེས་འདྲེས་པའི་ངང་ནས་གོ། །ཞེས་ཤིན་ཏུ་གསལ་བར་ལུང་བསྟན་ཅིང་། སྐུ་གོང་མ་ངེས་དོན་བསྟན་འཛིན་བཟང་པོའི་ཞལ་ནས། ཁོ་བོ་ཡུན་རིང་དུ་འཚོ་དཀའང་། སྤྲུལ་པ་གསུམ་འབྱུང་བའི་གཉིས་མངའ་རིས་དང་དབུས་ཕྱོགས། གཅིག་འདི་ཕྱོགས་དང་མི་རིང་བའི་ས། ཤིང་སྡོང་ཆེན་པོ་ཡོད་པ་ཞིག་གི་རྩར་འཁྲུངས། དེས་བསྟན་པ་ལ་ཕན་པར་འོང་ཞེས་ཞབས་གྲས་ནང་མ་རྣམས་ལ་གསུང་འཕྲོས་སུ་སྩལ་བ་དང། གཞན་ཡང་གྲུབ་དབང་ཆོས་ཀྱི་རྡོ་རྗེས་གཡུ་སྒྲ་སྙིང་པོའི་སྐྱེ་མཐའ་ཡིན་ཚུལ་དང་བཅས་ཀུན་མཁྱེན་རིན་པོ་ཆེའི་གསུང་དང་མཚུངས་པའི་གསང་ལུང་གསལ་པོ་དང་། ཕྱིས་སུ་ཆོས་གླིང་བཅུ་གསུམ་པ་སྤུ་བོ་གཏེར་ཆེན་འཆི་མེད་རྡོ་རྗེའམ་ཀུན་བཟང་འོད་ཟེར་གྱིས་བཻ་རོའི་སྤྲུལ་པར་ལུང་བསྟན་པ་དང་། ས་སྐྱ་པ་འགྲོ་མགོན་དབང་སྡུད་སྙིང་པོའི་གཟིགས་སྣང་དང་། གླིང་གཏེར་ཆེན་པདྨ་འགྲོ་འདུལ་རྩལ་གྱི་ལུང་བྱང་ལས་ཨོ་རྒྱན་ཉིད་ཀྱི་སྤྲུལ་པར་གསུངས་ཤིང་། ཟུང་མཁར་གཏེར་ཆེན་ཟླ་བའི་འོད་ཟེར་གྱི་གཏེར་ལུང་ལས་རྡོ་རྗེ་བདུད་འཇོམས། ནགས་ཤོད་གཏེར་ཆེན་ཀློང་ཆེན་རོལ་པ་རྩལ་དང་། སྤྲུལ་པའི་གཏེར་འབྱིན་ཡོངས་ཀྱི་འཁོར་ལོས་སྒྱུར་བ་མཆོག་གྱུར་བདེ་ཆེན་གླིང་པའི་གཏེར་ལུང་ལས་བི་མ་ལ་མི་ཏྲ། དྭགས་གཏེར་བདེ་ཆེན་རྡོ་རྗེའི་གཏེར་ལུང་ལས་གནུབས་སངས་རྒྱས་ཡེ་ཤེས་ཀྱི་སྤྲུལ་པར་བསྔགས་པ་སོགས་དངོས་གཅིག་དུ་མའི་ཚུལ་དུ་རྣམ་པར་འཕྲུལ་པ་འཕགས་པའི་ས་ཆེན་པོ་ལ་བཞུགས་པ་རྣམས་ཀྱི་ཆོས་ཉིད་ལྟར་འགལ་བར་མི་འདུ་ལ། དེ་ལྟ་བུའི་རིག་འཛིན་རྒྱལ་བའི་སྤྱི་གཟུགས་དམ་པ་གང་ཉིད་སྐུ་འཁྲུངས་པའི་ཡུལ་ནི། གདན་ས་ཆེན་པོ་རུ་དམ་ཨོ་རྒྱན་བསམ་གཏན་ཆོས་གླིང་གི་ནུབ་ཕྱོགས་ཉིན་ཞག་གསུམ་ཙམ་གྱི་སའི་ཆ། སྔོན་གྱི་ཚེ་ལོ་ཆེན་ལྡན་མ་རྩེ་མང་དང་། པཎ་ཆེན་སྨྲི་ཏི་ཛྙཱ་ན། འབྲོམ་སྟོན་རྒྱལ་བའི་འབྱུང་གནས་སོགས་འཕགས་བོད་ཀྱི་སྐྱེས་བུ་དུ་མས་ཞབས་ཀྱིས་བཅགས་པའི་ལྡན་ཡུལ་ཞེས་ཡུལ་གྱི་དགེ་བཅུའི་དཔྱད་པ་ཡོངས་སུ་རྫོགས་པའི་ནོར་འཛིན་གྱི་ཐིག་ལེ། གཞིའི་བདག་པོ་གངས་མཆེད་བརྒྱད་ཀྱིས་སྐྱོང་བ་གངས་རི་ཞེས་པའི་སའི་མཚམས། གནས་ཆེན་སེང་གེ་གནམ་རྫོང་དང་མཐའ་འདུལ་གྱི་གཙུག་ལག་ཁང་གླང་བན་སྒྲོན་མེ་ལྟ་བུ་ཞེས་གྲགས་པའི་ཕྱོགས། རི་བོ་དགེ་ལྡན་པའི་རིང་ལུགས་འཛིན་པ་ཐུབ་བསྟན་ཆོས་འཁོར་གླིང་གི་ཉེ་འགྲམ། གསེར་ལྡན་འབྲི་ཆུའི་ཀླུང་ཆེན་དལ་གྱིས་འབབ་པའི་གཡས་ཟུར། ར་ཁོ་དཔོན་ཚང་ཞེས་ཆེ་བཙན་གྱི་རིགས་བརྒྱུད་མ་ཉམས་ཤིང་། དམ་པའི་སྐྱེས་བུ་གསུམ་བརྒྱུད་མར་བྱོན་པའི་བསྟི་གནས། ལྕང་མའི་སྡོང་བོ་ཆེན་པོས་མནན་པའི་དཔལ་གྱི་ཁང་ཁྱིམ་དེ་ཉིད་དུ། ཡབ་བསོད་ནམས་རབ་བརྟན་དང་། ཡུམ་ནམ་མཁའ་འཛིན་དབང་མོའི་སྲས་སུ། རབ་བྱུང་བཅུ་གསུམ་པའི་ནང་ཚན་ཆུ་མོ་གླང་གི་ལོར་ཡབ་ཡུམ་ལ་མནལ་ལྟས་ངོ་མཚར་ཅན་དུ་མ་བཅས་བདེ་བར་སྐུ་བལྟམས། འཁྲུངས་ནས་རིང་པོར་མ་ལོན་པར་རྫོགས་ཆེན་རྫོགས་ཆེན་ཅེས་ཡང་ཡང་གསུངས། འབྱོག་རུ་ཚལ་ནས་རྔ་བོ་ཆེ་ཞིག་ཡོད་པ་བརྡུང་ཞིང་བཛྲ་གུ་རུའི་ཛཔྲ་སྒྲ་སྒྲོགས་པ་སོགས་ཀྱིས་མཚོན་དབང་བསྐུར་ཆོས་བཤད་དམ་པའི་བག་ཆགས་གསལ་བར་སད། དགུང་ལོ་ལྔ་པའི་སྐབས་རིག་འཛིན་ཆེན་པོ་དཔའ་བོ་ལས་རབ་རྩལ་ལྡན་ལོ་ཆུང་ནང་དུ་སྡེ་དགེའི་གཉེར་ཆེན་གཤེན་རབ་སྟག་རྒྱལ་གྱིས་གདན་དྲངས། ཚེ་སྒྲུབ་བདུད་བཞི་རྣམ་རྒྱལ་གྱི་སྒྲུབ་ཆེན་མཛད་སྐབས། རིག་འཛིན་བླ་མའི་ཞལ་ནས་ར་ཁོ་དཔོན་ཚང་གི་བུ་ཆུང་བ་དེ་འདིར་མ་བྱོན་ཀ་མེད་ཡོད་ཅེས་གསུང་ནན་གནང་། སྒྲུབ་དབང་རྒྱས་པ་སྐུ་རྐྱང་ལ་སྩལ། ཚེ་སྒྲུབ་ཀྱི་ཕྱག་དཔེ་ཞིག་ཀྱང་གནང་ནས་ལྗགས་ཀློག་ནམ་མཁྱེན་པ་ན་དཔེ་འདི་ཐུགས་འཛིན་གྱིས་ཆད་མེད་མཛད་དགོས་ཚུལ་དང་། དབུ་བྱུག་སོགས་སྩལ་ནས་ཤིན་ཏུ་དགྱེས་པས་དོན་གྱི་ངོས་འཛིན་གསལ་བར་མཛད། དགུང་ལོ་བདུན་བཞེས་པ་ས་མོ་ལུག་ལོར་རྫོགས་ཆེན་གདན་ཚབ་རྒྱལ་རོང་སྐུ་ཆེན་ནམ་མཁའ་ཚེ་དབང་མཆོག་གྲུབ་དང་། ཆོས་རྒྱལ་ཆེན་པོ་སོགས་མཆོད་ཡོན་རྣམས་ཀྱིས་ཐུགས་རྩ་ཆེ་བར་མཛད་དེ། རྒྱལ་རོང་དབོན་སྤྲུལ་བསྟན་པའི་ཉི་མ། དབོན་ཨོ་རྒྱན་བསམ་འགྲུབ། བླ་མ་རིག་འཛིན་བཟང་པོ་སོགས་དབུ་ཆེ་རགས་རིམ་དཔོན་སློབ་སུམ་ཅུ་སྐོར་ཡབ་གཞིས་སུ་བྱོན་པ་ན། སྤྲུལ་པའི་སྐུས་སྔོན་གནས་རྗེས་དྲན་དང་དགྱེས་པའི་རྣམ་འགྱུར་དུ་མ་མཛད་པས་ཡིད་ཆེས་ཀྱི་ངེས་ཤེས་ལྷག་པར་འཁྲུངས། ཡབ་ཡུམ་སོགས་སྐུ་རྒྱབ་པ་དང་ས་དབང་སྡེ་དགེའི་ཆིབས་ཁ་པ་སོགས་དཔོན་འཁོར་སུམ་ཅུ་སྐོར་དང་བཅས་པ་གསེར་ལྡན་གྱི་ཆུ་བོ་ལས་བརྒལ་ཏེ་རིམ་པར་དལ་འགྲོས་ཀྱིས་ཆུ་སྟོད་ཟླ་བའི་ཚེས་བཅུའི་སྔ་ཆར་ཆིབས་བསུ་རིང་ཐུང་དགོན་སྡེའི་སེར་བྲེང་གི་བཀོད་བཤམ་སོགས་ཕལ་པའི་བློའི་ར་བ་ལས་འདས་བའི་དཔལ་གྱི་འབྱོར་པ་ཕུན་སུམ་ཚོགས་པ་ལྔ་ལྡན་གྱི་ངོ་མཚར་འབྱམས་ཀླས་པས་གོང་མའི་གདན་ས་རུ་དམ་ཨོ་རྒྱན་བསམ་གཏན་ཆོས་གླིང་གི་གཙུག་ལག་ཁང་ཆེན་པོར་འཇིགས་མེད་སེང་གེའི་ཁྲི་ལ་ཞབས་པད་བཀོད་རྗེས། གཙང་ཁང་ཐུབ་ཆེན་གྱི་སྤྱན་སྔར་མཁས་གྲུབ་ཆེན་པོ་ནམ་མཁའ་ཚེ་དབང་མཆོག་གྲུབ་ཀྱིས་གཙུག་ཕུད་བཞེས་ཏེ། མཚན་འཇིགས་མེད་མཁྱེན་བརྩེའི་དབང་ཕྱུག་གམ་རྣམ་རྒྱལ་རྡོ་རྗེ་ཞེས་གསོལ། སླར་གསེར་ཁྲིར་ཞབས་པད་བཀོད་པ་དང་ཆབ་གཅིག་ཚེ་སྒྲུབ་འཆི་མེད་ཡང་སྙིང་གི་བརྟན་བཞུགས་དང་འབྲེལ་བར་རྫོགས་ཆེན་གཞུང་གི་ཁྲི་འབུལ་དང། ཆོས་རྒྱལ་ཆེན་པོས་ཤུག་ཙ་གཉེར་ཆེན་དངོས་གྲུབ་གཉིས་ཆེད་མངགས་ལྟར་ཁྲི་འབུལ་ཕུལ། རྒྱལ་རོང་དཔོན་བསམ་འགྲུབ་ནས་གསུང་བཤད་ཞོམ་ཐོག་ཆོད་པར་མཛད། ཕྱིར་ཉིན་ཟེ་ཆེན་རིག་འཛིན་དཔལ་འབྱོར་རྒྱ་མཚོ་དབུ་བཞུགས་ཀྱིས་ཚེ་ཆོག་དང་འབྲེལ་བར་ཞབས་བརྟན་ལེགས་འབུལ་རྒྱ་ཆེར་སྤྲོས་པ་དང་ཆབ་གཅིག །དབོན་སྤྲུལ་མཐུ་སྟོབས་རྣམ་རྒྱལ་དགུང་ལོ་བཅུ་གསུམ་དུ་སོན་པས་ཕུན་སུམ་ཚོགས་པ་ལྔ་ལྡན་གྱི་ལྗགས་བཤད་རྒྱ་ཆེར་སྤྲོས་ཤིང་། རྒྱལ་ཚབ་རིན་པོ་ཆེ་པདྨ་གསང་སྔགས་བསྟན་འཛིན་གྱིས་སྔ་འགྱུར་བསྟན་པའི་བབས་ལུགས་སོགས་ཀྱིས་བྱང་དྲངས་ཏེ་སྐབས་སུ་བབས་པའི་འབེལ་བའི་གཏམ་འབྱམས་ཀླས་པ་གནང་། དེ་འབྲེལ་སྟག་སྒང་གདན་ས་ནས་དབོན་སྤྲུལ་ཨོ་རྒྱན་ཉི་མ་སོགས་རྫོགས་ཆེན་ཕྱོགས་གཏོགས་དང་། གཞན་ཡང་གྲུབ་མཐའ་རིས་མེད་འབྲེལ་ཅན། གླིང་རྒྱལ་པོ་སོགས་ལྷ་སྡེ་མི་སྡེ་ཀུན་གྱིས་ཁྲི་འབུལ་དཔང་བསྟོད་དེ་ཕུལ། ཉིན་གསུམ་པར་སུ་ར་ཏོ་བཅུ་དྲུག་གིས་མཆོད་གར་སོགས་དགའ་སྟོན་མཐའ་རྒྱས་སུ་མཛད། ཡབ་ཚང་ལ་བསླུ་ཡོན་དངུལ་སྲང་ཉིས་བརྒྱས་གཙོས་རྣམ་གྲངས་སུམ་བརྒྱ་ལྷག་པ་དང་། སྟོན་ཆེན་ཀྱིས་གཙོས་ལྷ་སྡེ་མི་སྡེ་ཀུན་ལ་གསོལ་སྟོན་འབུལ་གནང་རིགས་རྒྱ་ཆེར་སྩལ། དེ་ནས་བཟུང་སྟེ་ཉེ་བར་གནས་པའི་སློབ་དཔོན་དབོན་པོ་ཆོས་གྲགས་བཟང་པོས་མཛད་དེ་བགྲང་བྱ་བཞིའི་བར་དུ་ཡི་གེའི་ཕྱི་མོ་ནས་བཟུང་བསླབ་སྦྱང་ནན་ཏན་དུ་མཛད་པས་མཁས་པར་མཁྱེན། དབང་ལུང་གསན་བཞེས་དང་བསྙེན་སྒྲུབ་སོགས་ཀྱང་ཅི་རིགས་མཛད། དགུང་ལོ་བཅུ་གཅིག་པར་སློབ་དཔོན་ཞི་བར་གཤེགས་པའི་ཚབ་མཁས་དབང་ཐུགས་རྗེ་བཀྲ་ཤིས་བརྐོས། འདི་ལོར་རྒྱལ་རོང་དུ་ཆིབས་བསྐྱོད་ནས་ཉི་སྤྲུལ་གསུམ་པ་རིན་པོ་ཆེ་མི་འགྱུར་ཕན་བདེ་རྒྱ་མཚོ་ལས་ལྷ་བཙུན་རྡོ་རྗེའི་རིག་འཛིན་སྲོག་སྒྲུབ། ལྔ་པའི་རྒྱ་ཅན། རིག་འཛིན་ཉི་མ་གྲགས་པའི་གཏེར་ཆོས་ཡོངས་རྫོགས། ཐུགས་མཆོག་རྡོ་རྗེའི་ནཱ་ག་རཀྴ། ཀུན་མཁྱེན་འཇིགས་མེད་གླིང་པའི་དགོངས་གཏེར་ཀློང་ཆེན་སྙིང་ཐིག་གི་སྐོར་སོགས་དབང་ལུང་བཀའ་རྫོགས་སུ་གསན། སོག་རུ་ཀུན་བཟང་ལས་ཕྱག་བྲིས་བསླབ། དགུང་ལོ་བཅུ་གཉིས་ལོ་གསར་ཚེས་བཅུའི་བུམ་སྒྲུབ་ཀྱི་ཚོགས་དབུར་ཕེབས་པ་ནས་བཟུང་སྐུ་ཚེའི་རིང་བཅད་རྒྱ་སོགས་དམིགས་བསལ་རེ་གཉིས་སྐབས་མ་གཏོགས་པར་དུས་མཆོད་ཐམས་ཅད་ལ་བྱོན་ནས་བསྒྲིགས་ཀུན་སྤྱོད་ཕྱག་བཞེས་འཁྲུལ་མེད་ཡིད་ཆེས་ཁུངས་བཙུན་ངོ་མཚར་བྱིན་རླབས་ཀྱི་དཔལ་དུ་འབར་བས་བློ་ལྡན་ཐམས་ཅད་དད་པའི་པདྨོ་སླར་ཡང་རྒྱས། གདོད་མའི་མགོན་པོ་རྩ་བའི་ཡོངས་འཛིན་ནམ་མཁའ་ཚེ་དབང་མཆོག་གྲུབ་ལས་མཁའ་འགྲོའི་སྙིང་ཏིག །གསང་བ་སྙིང་ཏིག །རྡོར་སེམས་སྙིང་ཏིག་རྣམས་ཀྱི་ཉམས་ཁྲིད་གསན་ནས་སྔོན་འགྲོའི་ཐུགས་སྦྱང་མཛད་པས། དད་པ་དང་ངེས་འབྱུང་བྱང་ཆུབ་ཀྱི་སེམས་རིན་པོ་ཆེ་རྣམས་ལ་ཉམས་མྱོང་བཅོས་མིན་རང་ཤར་ཐུགས་ལ་འཁྲུངས་ཤིང་། ཁྱད་པར་གྱི་སྔོན་འགྲོ་འཁོར་འདས་རུ་ཤན་དབྱེ་བ་དང་། ལུས་ངག་ཡིད་གསུམ་སྦྱོང་བ་རྡོ་རུས་འཕྲོད་པ་སྔོན་དུ་འགྲོ་བས་སེམས་རིག་ཤན་དབྱེ་བས་རིག་པ་རྗེན་པར་ངོ་འཕྲོད་པར་དྲན་པ་བསྟེན་ཚུལ་སོགས་ཞལ་ཁྲིད་གནད་སྨིན་མཛད་པས་ཀུན་བཟང་གདོད་མའི་རྒྱལ་ཐབས་ལ་དབང་བསྒྱུར་ནས་མདོ་ཁམས་རྫོགས་ཆེན་པ་ཞེས་མཚན་དོན་དང་ལྡན་པར་མཛད། གཞན་ཡང་གོང་གསལ་སྙིང་ཏིག་གསུམ་གྱི་དབང་ལུང་ཡོངས་རྫོགས། ཉང་གཏེར་རྟ་ནག །མགོན་པོ་ཕྱག་བཞི་སོགས་ཉང་ཆོས་ཀྱི་ཟབ་གཏེར། རྒྱལ་སྲས་རྡོ་རྗེ་གླིང་པའི་རྫོགས་ཆེན་ལྟ་བ་ཀློང་ཡངས། ཀར་གླིང་ཞི་ཁྲོ། ཞང་ཁྲོམ་གྱི་གཤིན་རྗེ་ཁྲོ་ཆུ། སངས་རྒྱས་གླིང་པའི་བླ་མ་དགོངས་འདུས། རཏྣའི་ཕུར་པ། རིག་འཛིན་ཆེན་པོ་ཉི་མ་གྲགས་པའི་ཟབ་གཏེར་ཕལ་ཆེར། རིག་འཛིན་དཔའ་བོ་ལས་རབ་ཀྱི་ཐུགས་གཏེར། གར་དབང་འཆི་མེད་གླིང་པའི་འཆི་མེད་ཐུགས་ཏིག །ཐེག་གླིང་དང་། གླིང་གཏེར་ཆེན་པདྨ་འགྲོ་འདུལ་རྩལ་གྱི་ཟབ་གཏེར་ཕལ་ཆེར་སོགས་ཆོས་བཀའ་དབང་ལུང་དཀོན་རིགས་རྒྱ་ཆེར་གསན། མཁན་ཆེན་རིག་འཛིན་བཟང་པོའི་མདུན་ནས་ཉང་གཏེར་བཀའ་བརྒྱད་དབང་ལུང་། དགེ་རྩེ་བླ་མ་བསོད་བསྟན་ལས་འདུས་མདོ་དང་། སྙིང་ཏིག་བཀའ་གཏེར་སྐོར། ཞེ་ཆེན་རབ་འབྱམས་དང་རྒྱལ་ཚབ་མཁན་སློབ་ལས་བཀའ་གཏེར་གྱི་དབང་ལུང་རྒྱ་ཆེར་གསན་བཞེས་དང་། ཤིང་བྱི་ནས་བཟུང་ལྕགས་རྟའི་བར་ལོ་བདུན་དུ་གདུལ་བྱ་གྲོང་ཆོག་སོགས་རྣམ་གཡེངས་རྒྱ་ཆེ་རིགས་ཀྱིས་མ་གོས་པར། ལོ་རེ་རེ་བཞིན་ཟླ་བ་དྲུག་ལས་མི་ཐུང་བར་བཅད་རྒྱ་གང་དམ་གྱིས་བླ་མ་གོང་མའི་ཐུགས་དམ་ལྷ་ཡི་གཙོས་བཀའ་གཏེར་གྱི་རྩ་གསུམ་རབ་འབྱམས་ཀྱི་བསྙེན་སྒྲུབ་ཤིན་ཏུ་གནད་སྨིན། བར་སྐབས་ཐམས་ཅད་དུ་ཕྱོགས་སོ་སོ་ནས་དགེ་བའི་བཤེས་གཉེན་རྡོ་རྗེ་འཛིན་པ་ཆེན་པོ་རྣམས་ཆེད་དུ་གདན་དྲངས་ནས་དབང་ལུང་སྨིན་ཁྲིད་རྒྱ་ཆེར་གསན་པ་ནི་མཚན་ཙམ་ཡང་བརྗོད་པར་དཀའ་བས་མང་དུ་གསན་པའི་མཆོག་ཏུ་གྱུར་པ་སོགས་གསན་ཡིག་པོད་ཆེན་ལས་ཤེས། འདི་དག་གི་ཞབས་བསྐུལ་དང་དོ་དམ་རྗེ་བླ་མ་ནམ་མཁའ་ཚེ་དབང་མཆོག་གྲུབ་ནས་མཛད་ཅིང་བླ་མའི་བཀའ་བཞིན་མཐར་ཕྱིན་པར་མཛད། བྱ་བ་ལས་ཀྱི་འཁོར་ལོའང་རྗེ་བླ་མ་ནམ་མཁའ་དང་དབོན་སྤྲུལ་སྐུ་མཆེད་ནས་ཐུགས་གཉེར་མཛད་དེ་དགུང་གྲངས་བཅུ་གསུམ་པར་ཚེས་བཅུའི་མཆོད་པས་འཁོར་ལོ་གཉིས་མཉམ་རྫོགས་སུ་མཛད་ཅིང་། གར་རྒྱས་སྤྲོས་ཅན་བཙུགས། འདུ་ཁང་མ་གཏོགས་པའི་བླ་བྲང་ཉམས་གསོ་གསར་བསྐྲུན་ཡིད་ཅན་མིག་གི་བདུད་རྩིར་སྤེལ། དགུང་གྲངས་བཅོ་ལྔ་པར་མཁས་གྲུབ་མཚུངས་མེད་དཔོན་གུར་བླ་མ་ངག་དབང་བློ་གྲོས་གདན་དྲངས་ནས་བཀའ་བརྒྱད་གསང་རྫོགས། ཚེ་བདག་ལྕགས་འདྲ་སྡིག །རྫོགས་ཆེན་སྙན་བརྒྱུད། པད་གླིང་བླ་མ་ནོར་བུ་རྒྱ་མཚོ། དྲི་མེད་ལྷུན་པོའི་དོན་ཏིག་སོགས་དབང་ལུང་རྒྱུན་དཀོན་ཤིན་ཏུ་མང་བར་གསན། ལོ་དེར་ཞེ་ཆེན་རབ་འབྱམས་གསུམ་པ་རིག་འཛིན་དཔལ་འབྱོར་རྒྱ་མཚོ་ལས་དགེ་ཚུལ་གྱི་སྡོམ་པ་བཞེས་ཤིང་། རིག་འཛིན་འགྱུར་མེད་ཀུན་བཟང་ཐེག་མཆོག་བསྟན་འཛིན་དཔལ་བཟང་པོར་གསོལ་ནས་སྟོན་མཆོག་ཤཱཀྱ་སེང་གེའི་རྒྱལ་ཚབ་ཏུ་མངའ་གསོལ། གུང་ཚིགས་དགོངས་བཅད་སོགས་འདུལ་བའི་ཕྱག་བཞེས་སོར་བཞག་གནང་། མེ་ཡོས་ལོར་བྱང་འབྲོག་རྫ་ཆུ་རྒྱུད་དུ་གདུལ་བྱ་ལ་ཕེབས་པ་ནས་བཟུང་བསྙེན་བཀུར་རྒྱ་ཆེར་བྱུང་བ་དག་རྟེན་བཞེངས་སྒྲུབ་མཆོད་སོགས་ཀྱི་རྩ་བར་ཆུད་མི་ཟ་བར་མཛད། དགུང་གྲངས་ཉི་ཤུ་པ་ཆུ་བྱ་ལོར་སྔར་ནས་ཀྱང་དབང་ལུང་ཁྲིད་གསུམ་རྒྱ་ཆེར་གསན་པ་ལྟར་གྲུབ་པའི་དབང་ཕྱུག་ཆེན་པོ་འཇིགས་མེད་ཕྲིན་ལས་འོད་ཟེར་གྱི་སྤྱན་སྔར་ཆེད་ཀྱིས་ཕེབས་ནས། ཀློང་ཆེན་གོང་འོག་གི་བཀའ་གཏེར་བསྟན་བཅོས་སྐོར། བི་མ་སྙིང་ཏིག །སྙན་བརྒྱུད་རྡོ་རྗེ་ཟམ་པ་སོགས་ཀྱི་དབང་ལུང་ཁྲིད་གསུམ་རྒྱ་ཆེར་གསན་ཅིང་། ཁྱད་པར་རྫོགས་པ་ཆེན་པོ་སྙིང་ཏིག་གི་དགོངས་པ་ཐུན་མོང་མ་ཡིན་པ་བྱིན་རླབས་འཕོ་བའི་སྟོབས་ཀྱིས་མངོན་དུ་མཛད་པས། རྗེ་ནམ་མཁའ་དང་། གྲུབ་དབང་འདི་གཉིས་ཁྱད་མེད་ཀྱི་རྩ་བའི་བླ་མ་དམ་པར་མཛད། ཤིང་ཁྱི་དགུང་གྲངས་ཉེར་གཉིས་པར་ལྷ་ལྡན་སྤྲུལ་པའི་ཞིང་ཁམས་ཆེན་པོར་ཆིབས་བསྒྱུར་གནང་། རྩེ་ཤོད་ཆོས་འཁོར་རྣམ་གཉིས་རྡོར་སྨིན་སོགས་སུ་མཆོད་སྤྲིན་ཤིན་ཏུ་རྒྱས་པར་སྤྲོས། རྒྱལ་དབང་དགུ་པ་ངག་དབང་ལུང་རྟོགས་རྒྱ་མཚོ་ལྡན་ཆོས་འཁོར་དུ་འཁྲུངས་པར་ར་ཁོ་དང་སྐུ་རིགས་གཅིག་པའི་དཔོན་དུ་སོང་བས་ནང་བརྩེའི་གཟིགས་གསོལ་ཚད་མེད་པ་དང་བོད་སྐྱོང་རྒྱལ་ཚབ་དེ་མོ་རིན་པོ་ཆེས་ཀྱང་མཐོང་བཀུར་ཚད་མེད་སྩལ། སྤྲུལ་པའི་གཏེར་ཆེན་ཀློང་ཆེན་རོལ་པ་རྩལ་གྱིས་རང་གཏེར་གཙོར་གྱུར་སྨིན་གྲོལ་གདམས་པ་སྩལ་ཞིང་ལྷག་པར་རྫོགས་པ་ཆེན་པོ་སྙིང་ཏིག་ཐུན་མོང་མ་ཡིན་པའི་ཁྱད་ཆོས་ཐོད་རྒལ་གྱི་ཉམས་ཁྲིད་སྩལ་བ་ཐུགས་ཉམས་སུ་བཞེས་པ་རིག་པ་ཚད་ཕེབས་ཀྱི་རྟགས་སྣང་མངོན་དུ་གྱུར། ཟུར་ཕུ་ལྷ་ལྡིང་གཏེར་ཆེན་ཟླ་བའི་འོད་ཟེར་ལས་རང་གཏེར་རིག་འཛིན་བདེ་འདུས་ཀྱི་སྨིན་གྲོལ་རྫོགས་པར་གསན་ཅིང་ཆོས་ཀྱི་བདག་པོར་དབུགས་དབྱུང་། དེ་མཚུངས་མཁར་རྡོ་གྲུབ་དབང་ཆོས་ཀྱི་རྡོ་རྗེར་ཡང་ཆོས་འབྲེལ་གསན་ཅིང་ཆོས་བདག་ཏུ་དབུགས་དབྱུང་། ཐུབ་བསྟན་རྡོ་རྗེ་བྲག་ཏུ་ཕེབས་སྐབས་རིག་འཛིན་ཀུན་བཟང་ཞིང་གཤེགས་པས་མི་བཞུགས་ཀྱང་། རྒྱལ་ཚབ་ལྕགས་ལའི་ཐུགས་སྲས་རིན་པོ་ཆེ་མཇལ་ཞིང་ཚེ་དབང་གསན། འབུལ་ནོད་རྒྱ་ཆེར་ཕུལ། སྨིན་གླིང་དུ་ཟླ་འཁོར་ལྷག་ཙམ་བཞུགས་ནས། ཁྲི་ཆེན་པདྨ་དབང་རྒྱལ་ལས་བཀའ་མའི་དབང་ལུང་རྒྱ་ཆེ་དང་། གཏེར་བདག་གླིང་པའི་ཟབ་གཏེར་གྱི་སྨིན་གྲོལ་རྫོགས་པ་རྒྱ་ཆེར་གསན་བཞེས་དང་། ཐུགས་ཡིད་གཅིག་འདྲེས་ཀྱིས་མཐོང་བཀུར་ཚད་མེད་པ་གནང་། འབུལ་ནོད་དང་འདུས་སྡེར་བསྙེན་བཀུར་སོགས་ཤིན་ཏུ་རྒྱས་པར་སྤྲོས། ལྕགས་ཟམ་མཆོག་སྤྲུལ་རིན་པོ་ཆེ་ལའང་བཀའ་འབྲེལ་ཙམ་གསན། སླར་ལྷ་ལྡན་དུ་ཕེབས་བསྟུན་མཁན་ཆེན་ཞི་བ་འཚོའི་རྣམ་འཕྲུལ་རྒྱལ་ཚབ་དེ་མོ་ཧུ་ཐོག་ཐུ་བློ་བཟང་ཐུབ་བསྟན་རྒྱལ་མཚན་སོགས་དད་པའི་དགེ་འདུན་གྲངས་ཚང་ལས་བསྙེན་པར་རྫོགས་པའི་དགེ་སློང་གི་སྡོམ་པ་བཞེས་ནས་མཁན་ཆེན་དམ་པས་ཀྱང་མངའ་གསོལ་གཟེངས་བསྟོད་མཐོང་བཀུར་དཔེ་བྲལ་དུ་གནང་། སྨོན་ལམ་ཆེན་མོའི་ཚོགས་དབུར་རྒྱལ་དབང་དགུ་པ་ལུང་རྟོགས་རྒྱ་མཚོ་ཡབ་སྲས་ལྷན་རྒྱས་སྤྱན་དྲངས་པའི་སྤྱན་སྔར་མཆོད་སྤྲིན་ཤིན་ཏུ་རྒྱས་པར་སྤྲོས་ནས། མཎྜལ་རྒྱས་བཤད་རྗེ་ཉིད་ཀྱིས་མཛད་པས་ཐམས་ཅད་ཡིད་འཕྲོག །སྨོན་ལམ་ཆེན་མོའི་དགེ་འདུན་ལ་ཚོགས་འགྱེད་སོགས་ཁྱད་འཕགས་གནང་བས་གྲགས་པའི་རྔ་ཆེན་ཕྱོགས་ཀུན་ཁྱབ། དེ་ནས་རིམ་པར་ཁམས་སུ་ཆིབས་ཁ་བསྒྱུར་ནས་རང་གནས་སུ་གེགས་མེད་པར་ཕེབས་བསུའི་བཀོད་བཤམས་རྒྱ་ཆེན་དང་བཅས་ཕེབས་ནས་ལུགས་གཉིས་དགའ་སྟོན་ཕུན་སུམ་ཚོགས་པ་ཀུན་ཀྱང་རྗེས་སུ་ཡི་རངས། གླིང་གཏེར་ཆེན་པདྨ་འགྲོ་འདུལ་རྩལ་ཡང་ཕེབས་ནས་ཐུགས་ཡིད་གཅིག་འདྲེས་རྟེན་འབྲེལ་ལེགས་ཚོགས་རྒྱས། མེ་གླང་ལོར་སྡེ་དགེར་ལྕང་རའི་བུམ་སྒྲུབ་ཆེན་མོར་སྔར་སྲོལ་གདན་དྲངས་ཤིང་འགྲོ་ཕན་རྒྱ་ཆེར་སྤེལ། དེ་ནས་བཟུང་ལོ་གསུམ་རེ་ཙམ་གྱི་མཚམས་བུམ་སྒྲུབ་ལ་བསྟར་ཆགས་སུ་ཕེབས་པས་མཚོན་ཆོས་རྒྱལ་ཆེན་པོས་དད་གུས་ཚད་མེད་པས་མཆོད་ཅིང་དབུའི་ཅོད་པན་གཅིག་པུར་གྱུར། དེ་ལྟ་བུའི་མཛད་པས་མཚོན་ལོ་བསྟར་རྫ་རྒྱུད་སོགས་ལ་རེས་མོས་ཀྱིས་འགྲོ་དོན་དང་། བར་སྐབས་ཐམས་ཅད་དུ་ཐུགས་དམ་གྱི་གཙོ་བོ་བཀའ་བརྒྱད་དྲག་པོ་དཔལ་ཆེན་འདུས་པ། རྗེ་དྲུང་རིན་པོ་ཆེའི་དགོངས་གཏེར་པདྨ་རྒྱལ་པོ། ཟུར་ཕུ་གཏེར་ཆེན་ཟླ་འོད་དང་། ཀློང་ཆེན་རོལ་པ་རྩལ་གྱི་གཏེར་གསར་རྣམས་ཀྱིས་གཙོས་བཀའ་གཏེར་ཚད་ལྡན་བླ་མ་ཡི་དམ་གྱི་བསྙེན་སྒྲུབ་དཔག་ཏུ་མེད་པ་མཛད། སྐུ་གེགས་འཚུབས་འགྱུར་རིགས་ཀྱང་དགོངས་པའི་རྩལ་དང་། ཞབས་བརྟན་རྒྱ་ཆེར་བསྒྲུབས་པས་ཅུང་ཟད་ཀྱང་མ་གོས་པ་སྐུ་ཚེ་ཕྲིན་ལས་མཐར་ཕྱིན་པ་སྙིགས་དུས་ཀྱི་བསྟན་འཛིན་ཆེན་པོ་ཞིག་ལ་འགྲན་ཟླ་དང་བྲལ་ཞིང་། སྐུ་ཚེ་རིལ་པོར་ཐུགས་ནམ་སྐབས་སུ་ཞུ་མཁན་སུ་ཡོད་ལ་སྔ་འགྱུར་བཀའ་གཏེར་གྱི་དབང་ལུང་ཁྲིད་གསུམ་རྒྱ་ཆེར་ཆད་མེད་དུ་གནང་བས་བསྟན་པའི་སྲོག་མཐུད། བྱ་བ་ལས་ཀྱི་འཁོར་ལོ་སྐུ་ན་ཕྲ་མོའི་སྐབས་སློབ་དཔོན་རིན་པོ་ཆེ། མཁན་ཆེན། ཆོས་རྒྱལ་བཅས་ཀྱི་སྣང་བརྙན་གསེར་ཟངས་ལས་ཐོག་ཚད་བཞེངས་པ་ནས་བཟུང་རྟེན་བཞེངས་དང་སྒྲུབ་ཁག་རྣམས་ཀྱི་ཞལ་ཐང་དང་ཡོ་བྱད་སོགས་བར་མ་ཆད་པར་བཞེངས་ཤིང་། ལྷག་པར་དགུང་གྲངས་ལྔ་བཅུར་ཕེབས་པ་ཆུ་སྟག་དབྱུག་པ་ཟླ་བའི་ཚེས་དྲུག་གི་ནམ་ལངས་བསྟན་པའི་གེགས་ཆགས་སྟོབས་སུ་བདོ་བས་ཧོར་ཁོག་ནས་བརྩམས་ས་གཡོས་ཀྱི་འཇིགས་པ་ཆེན་པོས་དགོན་གནས་ཀྱང་རྨིང་མེད་དུ་གྱུར་བ། རྗེ་ཉིད་སྡེ་དགེའི་རྒྱལ་ཁབ་ཏུ་བཞུགས་སྐབས་ཇི་བཞིན་དུ་གཟིགས། སྔོན་ནས་ལུང་བསྟན་པ་མངོན་དུ་གྱུར་པས་ཐུགས་དབྱུང་སྟེ་བྱ་བཏང་སྤོང་བ་པའི་བརྟུལ་ཞུགས་ལ་ཐུགས་གཏད་སྐབས། སྡེ་དགེ་ཆོས་རྒྱལ་དམ་ཚིག་རྡོ་རྗེས་ཐུགས་གསོས་རྒྱ་ཆེར་སྤྲོ་བ་དང་། དེ་ལྟ་བུའི་དགོངས་པ་མི་བཞེས་པར་ཉམས་གསོ་གསར་བཞེངས་སྔར་ལྟར་སོར་ཆུད་མ་མཛད་ཀ་མེད་དང་། དེའི་ཞབས་འདེགས་གང་དགོས་རྩེ་གཅིག་ཏུ་བསྒྲུབ་པར་ཞལ་གྱིས་བཞེས་ཤིང་། བདག་པོ་ནས་ཀྱང་ཞལ་ཡོད་དོན་མེད་ལྟ་བུ་མ་ཡིན་པར་ལས་མགོ་བརྩམས་ནས་མཐར་མ་ཕྱིན་པར། སྐུ་ཚབ་དད་དམ་མཁྱེན་ཡངས་བར་ཤར་སྐལ་བཟང་རྣམ་རྒྱལ་རིང་བསྐོས་དང་། ཤིང་བཟོ་དང་། རུ་གར་སྡེ་ཤོག་རེས་མོས་དང་། ཤིང་ཆ་སོགས་དགོས་འདོད་ལྷུག་པར་སྩལ་ཞིང་གཙོ་ཆེར་རྗེ་ཉིད་ཀྱི་ཐུགས་བཞེད་ཕྲིན་ལས་རྨད་དུ་བྱུང་བ་དང་། གཞན་དགོན་སྡེ་དང་འབྱོར་ལྡན་རྣམས་ཀྱིས་ཞལ་འདེབས་ཀྱི་གཏོང་སྒོ་རྒྱ་ཆེས་མཚམས་སྦྱར། བསྟན་པ་རིན་པོ་ཆེ་གསར་དུ་འཆར་བའི་ཐུགས་བསྐྱེད་དང་སྨོན་ལམ་གྱི་མཐུ་གྲུབ་པ་རྗེ་རྒྱལ་བའི་སྲས་པོ་ཀུན་མཁྱེན་གཞན་ཕན་མཐའ་ཡས་ཀྱིས་ཞིབ་གཟིགས་དང་། རྗེས་སུ་ལྷོ་རི་བླ་མ་འགྱུར་མེད་བསྟན་འཕེལ་གྱིས་ཞབས་འདེགས་འཕྲོ་མཐུད་བཅས་རྟེན་དང་བརྟེན་པར་བཅས་པའི་གཙུག་ལག་ཁང་ཆེན་བླ་བྲང་དང་བཅས་སྔར་ལས་ཆེས་ཆེར་ལྷག་པའི་བཞེངས་བཀོད་དང་། ཉམས་གསོ་འགྲན་བྲལ་དུ་བཀའ་དྲིན་བསྐྱངས་པས་མཚོན་བསམ་གྱིས་མི་ཁྱབ་པའི་ཕྲིན་ལས་རྒྱས། ལྷག་པར་ཀློག་པ་ཐོས་བསམ་གྱི་འཁོར་ལོ་ཀུན་མཁྱེན་བླ་མ་གཞན་ཕན་མཐའ་ཡས་དང་བཀའ་འགྲོས་ཏེ། དམ་པའི་ཆོས་འདུལ་བའི་ཕྱག་བཞེས་ཕྲ་ཞིབ་ཏུ་གཏན་ལ་ཕབ་ནས་གཞི་གསུམ་སོགས་ཀྱི་ཕྱག་བཞེས་མིང་ཙམ་དུ་མ་སོང་བའི་གཞན་འགྲན་བྲལ་བ་གསར་འཛུགས་དང་འབྲེལ་བར། ཀུན་མཁྱེན་པྲཛྙཱ་ར་སྨིའི་གསུང་རབ་མདོ་སྔགས་སྨོན་ལམ་དང་། སུམ་རྟགས་སོགས་རྒྱ་ཆེར་བཤད་པས་བློ་གྲོས་ཀྱི་སྒོ་བྱེ་ནས། ཆོས་ཀྱི་རྒྱལ་པོ་ཀློང་ཆེན་པ་གོང་འོག་གི་གསུང་རབ་རིན་པོ་ཆེའི་མཛོད། ཡོན་ཏན་རིན་པོ་ཆེའི་མཛོད། པཎ་ཆེན་པདྨ་དབང་རྒྱལ་གྱི་སྡོམ་གསུམ་སོགས་ཉེར་མཁོའི་གཞུང་སྙིང་པོར་དྲིལ་བ་དང་། དབུ་ཕར་འདུལ་མཛོད་ཀྱི་གཞུང་ཆེན། དཔལ་གསང་བ་སྙིང་པོ་སོགས་མདོ་སྔགས་ཀྱི་བཤད་ཉན་ཤིན་ཏུ་དར་ཞིང་། དེ་དག་གི་རྒྱུན་དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་། མཁན་ཆེན་པདྨ་བཛྲ་སོགས་ལ་གཉེར་དུ་སྩལ་ནས་མཁན་རབས་རྣམས་ཀྱིས་བཟུང་སྟེ་ད་ལྟའི་བར་ཤིན་ཏུ་དར་ཞིང་རྒྱས་པར་མཛད་པའི་ཕྲིན་ལས་འདི་ཁོ་ནའང་སྙིགས་དུས་བསྟན་པའི་ཉི་མ་གཅིག་པུར་བསྔགས་པའི་མེ་ཏོག་མཁས་དང་འཕགས་པའི་ཚོགས་ཀྱིས་ཉིན་བཞིན་དུ་འགྲེམ། དེ་ལྟ་བུའི་གསན་བསམ་སྒོམ་པ་གཙོ་གྱུར་འཁོར་ལོ་གསུམ་གྱི་མཛད་པ་མཐའ་ཡས་པའི། ཐོག་མར་ཟབ་ཆོས་རྒྱ་ཆེར་གསན་པའི་ཡོངས་འཛིན་གྱི་གཙོ་བོ་ནི། གོང་དུ་སྨོས་པ་ལྟར་མཁས་ཤིང་གྲུབ་པའི་དབང་ཕྱུག་ནམ་མཁའ་ཚེ་དབང་མཆོག་གྲུབ་དང་། ལྷ་སྲས་རྒྱལ་པོའི་རྣམ་འཕྲུལ་གྲུབ་པའི་དབང་ཕྱུག་ཆེན་པོ་འཇིགས་མེད་ཕྲིན་ལས་འོད་ཟེར་ཏེ་བཀའ་དྲིན་འགྲན་ཟླ་དང་བྲལ་བའི་རྩ་བའི་བླ་མ་རྣམ་པ་གཉིས་ཀྱིས་གཙོས། རྗེ་རྒྱལ་བའི་སྲས་པོ་ཀུན་མཁྱེན་བླ་མ་གཞན་ཕན་མཐའ་ཡས་ལས་བཀའ་བསྟན་ལུང་རྒྱུན་གང་ཡོད་དང་། གཞུང་བཤད་སོགས་དབང་ལུང་རྒྱ་ཆེར་གསན་པ་དང་། གྲུབ་དབང་དཔོན་སློབ་རིན་པོ་ཆེ་པདྨ་མདོ་སྔགས་བསྟན་འཛིན་ཞལ་མཇལ་ཞིང་བྱིན་གྱིས་བརླབས། བླ་མ་ཚེ་དབང་ལས་བཀའ་བརྒྱད་དབང་ཆེན། དགེ་རྩེ་བླ་མ་འཇིགས་མེད་ངོ་མཚར་ལས་འདུས་པ་མདོ་དབང་ཆེན་མོ། ཟེ་ཆེན་རྒྱལ་ཚབ་རིན་པོ་ཆེ་བསྟན་འཛིན་ཆོས་རྒྱལ་ལས་བཀའ་གཏེར་གྱི་དབང་ལུང་། གོང་སྨོས་རབ་འབྱམས་གསུམ་པ་རིག་འཛིན་དཔལ་འབྱོར་རྒྱ་མཚོ་ལས་རབ་ཏུ་བྱུང་ཞིང་དབང་ཆོས་ཆེ་རིགས། གཞན་ཡང་ཉི་སྤྲུལ་གསུམ་པ་མི་འགྱུར་ཕན་བདེ་རྒྱ་མཚོ། གླིང་གཏེར་ཆེན་པདྨ་འགྲོ་འདུལ་རྩལ། བདུད་འདུལ་གདུང་བརྒྱུད་རྒྱལ་སྲས་པདྨ་རྣམ་རྒྱལ། འཕགས་མཆོག་ཕྱག་ན་པདྨོ་འཇིགས་མེད་རྒྱ་བའི་མྱུ་གུ་འབར་ཆུང་བཀྲ་ཤིས་རྒྱ་མཚོའི་དབོན་བསྟན་འཛིན་ནོར་བུ། གྲུབ་མཆོག་འཇིགས་མེད་གོ་ཆའི་དབོན་མཁས་གྲུབ་ཕྲིན་ལས་དར་རྒྱས་སོགས་ལས་གསར་རྙིང་བཀའ་གཏེར་དག་སྣང་གི་སྨིན་གྲོལ་ལུང་བཅས་རྒྱ་མཚོ་ལྟ་བུ་གསན། གཞན་ཡང་ཀཿཐོག་ཞིང་སྐྱོང་མཆོག་སྤྲུལ་རིག་འཛིན་འཇིགས་མེད་མགོན་པོ། རྨོག་སྟོན་མཆོག་སྤྲུལ་འཇིགས་བྲལ་ཆོས་དབྱིངས་རྡོ་རྗེ། རྒྱལ་རོང་དབོན་སྤྲུལ་བསྟན་པའི་ཉི་མ་གོང་འོག །ནམ་སྤྲུལ་ཀུན་བཟང་ཐེག་མཆོག་རྡོ་རྗེ། ཟེ་ཆེན་རབ་འབྱམས་མི་མཇེད་ཞིང་གི་མགོན་པོ་དང་། རྒྱལ་ཚབ་ཨོ་རྒྱན་རང་བྱུང་རྡོ་རྗེ། གྲུབ་ཆེན་མཆོག་སྤྲུལ་སོགས་རང་ལུགས་དང་། གངས་ཅན་གྱི་མགོན་པོ་རྒྱལ་དབང་ལུང་རྟོགས་རྒྱ་མཚོ། དེ་མོ་ཧུ་ཐོག་ཐུ་ཡབ་སྲས། མདོ་ཁམས་ལྔ་པ་སྒྲུབ་བརྒྱུད་ཉི་མ། ངོར་ཐར་རྩེ་མཁན་ཆེན་བྱམས་པ་ནམ་མཁའ་འཆི་མེད་དང་། བྱམས་པ་ཀུན་དགའ་བསྟན་འཛིན། རྣལ་འབྱོར་འཇམ་དཔལ་བཟང་པོ། ཕན་ཁང་མཁན་ཀུན་དགའ་བསྟན་པའི་བློ་གྲོས། ཞབས་དྲུང་ཁག །ནཱ་ལེནྡྲ་གཟིམས་འོག་མཆོག་སྤྲུལ་བྱམས་པ་བསྟན་འཛིན་སྙན་གྲགས་སོགས་ས་དགེའི་ཕྱོགས་དང་། ལྷ་འབྲང་རིག་འཛིན་དཔལ་ལྡན་ཆོས་རྒྱལ། ཁྱད་པར་ཀུན་མཁྱེན་འཇིགས་མེད་གླིང་པའི་རྣམ་འཕྲུལ་འཇིགས་མེད་ཡེ་ཤེས་རྡོ་རྗེ། མཁས་གྲུབ་འཇིགས་མེད་སྐལ་བཟང་། ཕྱིས་སུ་སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པའི་བར་རིས་མེད་པའི་བསྟན་འཛིན་གྱི་སྐྱེས་བུ་རྣམས་ལས་ཆོས་འབྲེལ་ཅི་རིགས་པ་གསན་པས་གསན་རྒྱ་ཤིན་ཏུ་ཆེ་བ་གསན་ཡིག་པོད་ཆེན་ལས་གསལ་བ་དང་། དེ་ལྟར་གསན་པ་རྣམས་ཀྱང་བཀའ་གཏེར་གལ་ཆེ་བ་རྣམས་ལན་མང་འཆད་སྤེལ་དང་། ཚར་རེ་མ་འཆད་པ་མེད་པ་ལྟ་བུས་སྐུ་ཚེ་རིལ་པོར་འཆད་ཉན་རླབས་པོ་ཆེ་གནང་བའི་གྲུབ་འབྲས་བརྒྱུད་འཛིན་ཞལ་སློབ་ནམ་མཁའི་སྐར་ཚོགས་ལྟར་ཚད་བཟུང་མེད་པར་འཕེལ་བ་སྟེ། རགས་རིམ་ཙམ་བརྗོད་ན། དཔོན་སློབ་རིན་པོ་ཆེ་གསུམ་པ་ནམ་མཁའ་ཆོས་ཀྱི་རྒྱ་མཚོ། བཞི་པ་འཇིགས་མེད་ཆོས་དབྱིངས་འོད་གསལ། ཤིང་རྟ་ཆེན་པོ་ཀུན་མཁྱེན་གཞན་ཕན་མཐའ་ཡས་འོད་ཟེར་ཏེ་རྒྱལ་ཚབ་ཆེན་པོའི་ས་བརྙེས་པ་གསུམ། ཉི་གྲགས་མཆོག་སྤྲུལ་བཞི་པ་དཀོན་མཆོག་འཇིགས་མེད་རྒྱལ་མཚན། རབ་འབྱམས་བཞི་པ་མི་མཇེད་ཞིང་མགོན། རྒྱལ་ཚབ་མི་བསྐྱོད་མཁས་གྲུབ། རྗེ་དཔོན་གསུམ་པ་གར་དབང་ཐུགས་མཆོག་རྡོ་རྗེ། ནམ་སྤྲུལ་རིན་པོ་ཆེ་ཀུན་བཟང་ཐེག་མཆོག་རྡོ་རྗེ་སྟེ་བརྒྱུད་འཛིན་གདམས་པའི་གཏེར་འཛིན་ལྔ། མཁྱེན་སྤྲུལ་ཡེ་ཤེས་རྡོ་རྗེ། གླིང་གཏེར་ཆེན་པདྨ་འགྲོ་འདུལ། མཆོག་གྱུར་བདེ་ཆེན་གླིང་པ་སྟེ་སྤྲུལ་པའི་གཏེར་ཆེན་རྣམ་གསུམ། འཕགས་མཆོག་འཇིགས་མེད་རྒྱལ་བའི་མྱུ་གུ་ཞེས་འགྲོ་དོན་མཐའ་ཡས་པའི་སེམས་དཔའ་གཅིག །གྲུབ་ཆེན་མཆོག་སྤྲུལ་བསྟན་པའི་རྒྱལ་མཚན། རིག་རྩལ་ཐོགས་མེད་གླིང་པའི་རྣམ་སྤྲུལ་ཨོ་རྒྱན་འཇིགས་མེད་ཕྲིན་ལས་འགྲོ་འདུལ། མཆོག་སྤྲུལ་པདྨ་བདེ་ཆེན་ཏེ་མཁྱེན་བརྩེ་ནུས་ལྡན་གྱི་བརྒྱུད་འཛིན་གསུམ། མཁས་གྲུབ་འཇིགས་མེད་སྐལ་བཟང་དང་། དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ་སྟེ་མཁྱེན་རབ་ཟླ་མེད་པའི་མཁས་པ་གཉིས། མཁན་ཆེན་པདྨ་བཀྲ་ཤིས། པདྨ་དམ་ཆོས། པདྨ་འོད་ཟེར་དཔལ་བཟང་པོ་སོགས་རང་དགོན་གྱི་མཁན་རབས་མཁས་གྲུབ་བཅུ། དེའི་ནང་ནས་པདྨ་འོད་ཟེར་དང་། གླིང་སྤྲུལ་ཐུབ་བསྟན་རྒྱལ་མཚན་གཉིས་ནང་ཐུགས་ཀྱི་སྲས་ཟུང་སྟེ་བསྟན་པ་ལ་བྱ་བ་རྒྱ་ཆེར་མཛད་པ། ཀཿཐོག་ཞིང་སྐྱོང་དང་། རྨོག་གྲུབ་རིན་པོ་ཆེ་གོང་འོག་སྟེ་བཀའ་གཏེར་གྱི་བསྟན་འཛིན་ཆེན་པོ་བཞི། རིགས་དཔོན་འཇིགས་མེད་སོགས་ཕྱག་བཞེས་ཕྲིན་སྒྲུབ་ཀྱི་རྒྱལ་ཚབ་དགུ །མཁས་སྤྲུལ་སྒྲུབ་བརྒྱུད་ཉི་མ་གོང་འོག་སྟེ་སྒྲུབ་བརྒྱུད་བསྟན་འཛིན་མཆོག་ཟུང་། ཟེ་ཆེན་མ་ཧཱ་པཎྜི་ཏ་དབོན་སྤྲུལ་མཐུ་སྟོབས་རྣམ་རྒྱལ་སོགས་བཤེས་གཉེན་ཆེན་པོ་བཅུ། སེང་གེ་བླ་མ་ཀུན་བཟང་བསྟན་དར་སོགས་མདོ་སྔགས་འཆད་པའི་བཀའ་བབས་ཉེར་བདུན། མང་ཟ་བླ་མ་དཔལ་གྱི་སེང་གེ་སོགས་སྒྲུབ་པའི་བསྟན་འཛིན་སྤོང་བ་པ་ཆེན་པོ་ཉེར་བདུན། མ་གཅིག་མཁའ་འགྲོས་བྱིན་བརླབས་གཅོད་པ་པདྨ་སོགས་གཅོད་ཡུལ་བཀའ་བབས་ལུང་ཟིན་བཞི། དགེ་རྒྱལ་གཅོད་པ་སོགས་བརྟུལ་ཞུགས་སྤྱོད་པའི་རྣལ་འབྱོར་དབང་ཕྱུག་བརྒྱད། རས་སྤྲུལ་འཁྲུལ་སྣང་རང་གྲོལ་སོགས་ཕྱོགས་མེད་འགྲོ་དོན་མཛད་པའི་རྣལ་འབྱོར་པ་ཆེན་པོ་དགུ། དཔལ་ནཱ་ལེནྡྲའི་གཟིམས་འོག་ཐམས་ཅད་མཁྱེན་པ་ངག་དབང་བསྟན་འཛིན་སྙན་གྲགས་དང་། འཇམ་དབྱངས་ཞེ་ཆེན་དབོན་སྤྲུལ་རིན་པོ་ཆེས་མཛད་པའི་རྗེ་འདིའི་རྣམ་ཐར་སྒྲ་དབྱངས་རྒྱ་མཚོ་ནས་བཏུས་མཛད་པར་འདུག་མཆན། མཁྱེན་བརྩེའི་དབང་པོ་གཉིས་ལ་དགོངས་པས་བྱིན་རླབས་ཐུགས་སྲས་ཟླ་མེད་ཉི་ཟླ་ཟུང་གཅིག་ཏུ་གྲགས། འཛམ་གླིང་ཆོས་ཀྱི་ཤིང་རྟ་ཀོང་སྤྲུལ་ཐམས་ཅད་མཁྱེན་པ་ཀརྨ་ངག་དབང་ཡོན་ཏན་རྒྱ་མཚོ། ཤིང་རྟ་ཆེན་པོ་ལི་ཐང་མཁན་ཆེན་མཁས་མཆོག་བྱམས་པ་ཕུན་ཚོགས། མཁས་ཤིང་གྲུབ་པའི་དབང་ཕྱུག་གྱི་ལིང་སྤྲུལ་པའི་སྐུ་ཐུགས་མཆོག་སོགས་ཕྱོགས་ཀྱི་བསྟན་འཛིན་ཆེན་པོ་བཅུ། ཉི་གྲགས་དབོན་སྤྲུལ་དམ་པ་སོགས་སེམས་དཔའ་ཆེན་པོ་བཅུ། བདུད་འདུལ་གདུང་འཛིན་རྒྱལ་སྲས་སྙན་གྲགས་སོགས་གྲུབ་མཆོག་རྣམ་བཞི། ཁྲོ་ཟུར་གཏེར་སྟོན། ཟེ་ཆེན་རང་གྲོལ། རིག་འཛིན་ནོར་བུ། མ་ཧཱ་གཏེར་སྟོན། འོད་ལུས་པ་པདྨ་བདུད་འདུལ་ཏེ་ཟབ་གཏེར་བཀའ་བབས་ལྔ། གྲུབ་ཆེན་རྣམ་འཕྲུལ་དྲི་མེད་གྲགས་པ་དང་། ཀློང་ཆེན་རོལ་པ་རྩལ་གྱི་རྣམ་འཕྲུལ་ཏེ་སྙིང་པོའི་བསྟན་འཛིན་ཟུང་གཅིག །རྒྱལ་སྲས་གཞན་ཕན་སྤྲུལ་སྐུ། རབ་འབྱམས་ལྔ་པ། རྒྱལ་རོང་དབོན་སྤྲུལ་ལྔ་པ་སྟེ་འཁྲུལ་མེད་རྡོ་རྗེའི་ལུང་གིས་དབུགས་འབྱིན་ཐོབ་པའི་རྣམ་འདྲེན་གསུམ། རིག་འཛིན་ཉི་མ་གྲགས་པའི་ཡང་སྲིད་དྲུག་པ་ལྷ་རིགས་དམ་པ་དང་། གྲུབ་ཆེན་འཇིགས་མེད་ཕྲིན་ལས་འོད་ཟེར་གྱི་ཡང་སྲིད་གསུམ། ནོར་གླིང་མཆོག་སྤྲུལ། གླིང་གཏེར་ཆེན་གསུམ་པ་སྟེ་རྡོ་རྗེའི་ལུང་གིས་བསྟན་པའི་བསྟན་འཛིན་བཞི། རང་དགོན་འབྲུག་སྤྲུལ་རྣམ་གཉིས་དང་། ཀུན་བཟང་སྤྲུལ་པའི་སྐུ་སྟེ་རྒྱལ་བསྟན་འཛིན་སྤེལ་ལ་བསྔགས་པ་གསུམ། གྲུབ་མཆོག་སྟོབས་ལྡན་རྡོ་རྗེ་གོང་འོག །ནམ་མཁའ་རྒྱ་མཚོ་སྟེ་རེ་སྐོང་རྡོ་རྗེ་འཛིན་པ་དྲག་སྔགས་ནུས་མཐུའི་བཀའ་བབས་གསུམ། རིག་འཛིན་ཉི་མ་གྲགས་པའི་སྤྲུལ་པའི་བྱེ་བྲག་ཏུ་བསྔགས་པ་ས་སྐྱོང་སྡེ་དགེའི་རྒྱལ་སྲས་བླ་མ། འཇུ་སྤྲུལ་པདྨ་བསྟན་འཛིན། ལེགས་དགོན་སྤྲུལ་པའི་སྐུ་སོགས་སྨིན་གྲོལ་ཕྱོགས་བརྒྱར་སྤེལ་བའི་སྤྲུལ་དབོན་ཆེན་པོ་ལྔ་བཅུ། དཔལ་ཡུལ་དབོན་སྤྲུལ། གཞི་ཆེན་སྤྲུལ་སྐུ། ཛར་ཀ་དཔོན་པོ་སོགས་ཕྱོགས་མཐའི་གསར་རྙིང་གི་བཤེས་གཉེན་ཆེན་པོ་བཅུ་དྲུག །གསེར་ཏོག་དཔོན་པོ་ཁུ་དབོན། སྟོང་དཔོན་རྡོར་ལྷུན། ཆོས་སྐོར་ཀློང་གསལ་སོགས་རང་དགོན་མ་ལག་དང་། ཕྱོགས་བྲལ་དུ་བཞུགས་པའི་བླ་མ་བསྟན་འགྲོའི་དགེ་ལེགས་སྤེལ་བ་རྣམ་ཐར་ཆེན་མོར་མཚན་གསོལ་བ་བརྒྱ་རྩ་ལྷག་པ་སོགས་བགྲངས་ཀྱིས་མི་ལང་པ། མདོར་ན་དུས་དེར་བོད་ཆེན་སྡེ་དགེའི་ཕྱོགས་གཙོར་གྱུར་མདོ་སྨད་ཀྱི་སྔ་འགྱུར་རིང་ལུགས་འཛིན་པ་དང་། གྲུབ་མཐའ་རིས་བྲལ་གྱི་སྐྱེས་ཆེན་མཆོག་ཕལ་རྣམས་ཀྱིས་རྗེ་འདིའི་ཞལ་མཇལ་ཆོས་འབྲེལ་མ་ནོས་པ་འགའ་ཡང་མེད་པ་ལྟ་བུར་གྱུར་པས་གྲོལ་བ་བཞི་ལྡན་གྱི་ཕྲིན་ལས་དགོན་ཡུལ་ཐམས་ཅད་ལ་བསམ་གྱིས་མི་ཁྱབ་པས་བརྗོད་པའི་ཡུལ་ལས་འདས་པ་དང་། བསྟན་པ་སྟོབས་ཀྱིས་འདེགས་པའི་སྦྱིན་བདག་ཀྱང་། དཔལ་མིའི་ཚངས་པ་སྡེ་དགེ་ཆོས་རྒྱལ་ཡབ་སྲས་དབོན་བཅས། ལྕགས་ལ་མི་ཆེན་རྒྱལ་པོ། གླིང་རྒྱལ་པོ་ཡབ་སྲས་གཙོར་གྱུར་ཐུ་སི་ཁག་སོ་གཉིས། དེ་མ་འཕྱི་ཉེར་ལྔར་གྲགས་པ་ཕལ་ཆེར་དང་། གཞུང་ས་དགའ་ལྡན་ཕོ་བྲང་པའི་བཀའི་བློན་ཞབས་པད་ས་དབང་ཕུ་ལུང་པ་སོགས་མི་ཆེན་ཐམས་ཅད་ཀྱིས་ཀྱང་གུས་པས་བཏུད་ཅིང་མི་ཕྱེད་པའི་དད་པས་མཆོད་པ་སོགས་མདོར་ན་ལུགས་གཉིས་ཀྱི་སྒོ་ནས་ཕྱི་མའི་དུས་འདིར་རྗེ་འདི་ཁོ་ན་ཕྲིན་ལས་རླབས་ཆེ། དེ་ལྟ་བུའི་མཛད་ཕྲིན་བསམ་གྱིས་མི་ཁྱབ་པ་གོང་འཕེལ་དུ་གྱུར་ཏོ།། །། ༈

[edit]

mdo khams rdzogs chen bzhi pa mi 'gyur nam mkha'i rdo rje tshe dbang grub pa rtsal/ @#/_/mdo khams rdzogs chen bzhi pa mi 'gyur nam mkha'i rdo rje tshe dbang grub pa rtsal lam/__'jigs med mkhyen brtse'i dbang phyug phrin las rnam rgyal rdo rje ni/__kun mkhyen rig 'dzin 'jigs med gling pa'i rdo rje'i gsung las/__gnas dang 'brel la gangs kyi mtshams/__/shul gsum bgrod la blta rtogs kyis/__/e ka dza TI'i skong stong 'bungs/_/zhes dang /__lkog gyur 'di don lkog tu ma gyur te/__/rdo rje gsum sprul gnyis ni dbus mthar gab/__/'gro don thugs babs dag chen thugs kyi sprul/__/gnas de'i nub phyogs gnas dang nye ba'i char/__/gangs ri'i ming mtshams gser ldan klung chen 'gram/_/che btsan rigs btsun gsum shul gtsang ma'i brgyud/__/bsod nams pha ma nor 'dzin ming thogs par/__/yod ces lung shes 'dres pa'i ngang nas go/__/zhes shin tu gsal bar lung bstan cing /__sku gong ma nges don bstan 'dzin bzang po'i zhal nas/__kho bo yun ring du 'tsho dka'ang /__sprul pa gsum 'byung ba'i gnyis mnga' ris dang dbus phyogs/__gcig 'di phyogs dang mi ring ba'i sa/__shing sdong chen po yod pa zhig gi rtsar 'khrungs/__des bstan pa la phan par 'ong zhes zhabs gras nang ma rnams la gsung 'phros su stsal ba dang/__gzhan yang grub dbang chos kyi rdo rjes g.yu sgra snying po'i skye mtha' yin tshul dang bcas kun mkhyen rin po che'i gsung dang mtshungs pa'i gsang lung gsal po dang /__phyis su chos gling bcu gsum pa spu bo gter chen 'chi med rdo rje'am kun bzang 'od zer gyis bai ro'i sprul par lung bstan pa dang /__sa skya pa 'gro mgon dbang sdud snying po'i gzigs snang dang /__gling gter chen pad+ma 'gro 'dul rtsal gyi lung byang las o rgyan nyid kyi sprul par gsungs shing /__zung mkhar gter chen zla ba'i 'od zer gyi gter lung las rdo rje bdud 'joms/__nags shod gter chen klong chen rol pa rtsal dang /__sprul pa'i gter 'byin yongs kyi 'khor los sgyur ba mchog gyur bde chen gling pa'i gter lung las bi ma la mi tra/__dwags gter bde chen rdo rje'i gter lung las gnubs sangs rgyas ye shes kyi sprul par bsngags pa sogs dngos gcig du ma'i tshul du rnam par 'phrul pa 'phags pa'i sa chen po la bzhugs pa rnams kyi chos nyid ltar 'gal bar mi 'du la/__de lta bu'i rig 'dzin rgyal ba'i spyi gzugs dam pa gang nyid sku 'khrungs pa'i yul ni/__gdan sa chen po ru dam o rgyan bsam gtan chos gling gi nub phyogs nyin zhag gsum tsam gyi sa'i cha/__sngon gyi tshe lo chen ldan ma rtse mang dang /__paN chen smri ti dz+nyA na/__'brom ston rgyal ba'i 'byung gnas sogs 'phags bod kyi skyes bu du mas zhabs kyis bcags pa'i ldan yul zhes yul gyi dge bcu'i dpyad pa yongs su rdzogs pa'i nor 'dzin gyi thig le/__gzhi'i bdag po gangs mched brgyad kyis skyong ba gangs ri zhes pa'i sa'i mtshams/__gnas chen seng ge gnam rdzong dang mtha' 'dul gyi gtsug lag khang glang ban sgron me lta bu zhes grags pa'i phyogs/__ri bo dge ldan pa'i ring lugs 'dzin pa thub bstan chos 'khor gling gi nye 'gram/__gser ldan 'bri chu'i klung chen dal gyis 'bab pa'i g.yas zur/__ra kho dpon tshang zhes che btsan gyi rigs brgyud ma nyams shing /__dam pa'i skyes bu gsum brgyud mar byon pa'i bsti gnas/__lcang ma'i sdong bo chen pos mnan pa'i dpal gyi khang khyim de nyid du/__yab bsod nams rab brtan dang /__yum nam mkha' 'dzin dbang mo'i sras su/__rab byung bcu gsum pa'i nang tshan chu mo glang gi lor yab yum la mnal ltas ngo mtshar can du ma bcas bde bar sku bltams/__'khrungs nas ring por ma lon par rdzogs chen rdzogs chen ces yang yang gsungs/__'byog ru tshal nas rnga bo che zhig yod pa brdung zhing badz+ra gu ru'i dzapra sgra sgrogs pa sogs kyis mtshon dbang bskur chos bshad dam pa'i bag chags gsal bar sad/__dgung lo lnga pa'i skabs rig 'dzin chen po dpa' bo las rab rtsal ldan lo chung nang du sde dge'i gnyer chen gshen rab stag rgyal gyis gdan drangs/__tshe sgrub bdud bzhi rnam rgyal gyi sgrub chen mdzad skabs/__rig 'dzin bla ma'i zhal nas ra kho dpon tshang gi bu chung ba de 'dir ma byon ka med yod ces gsung nan gnang /__sgrub dbang rgyas pa sku rkyang la stsal/__tshe sgrub kyi phyag dpe zhig kyang gnang nas ljags klog nam mkhyen pa na dpe 'di thugs 'dzin gyis chad med mdzad dgos tshul dang /__dbu byug sogs stsal nas shin tu dgyes pas don gyi ngos 'dzin gsal bar mdzad/__dgung lo bdun bzhes pa sa mo lug lor rdzogs chen gdan tshab rgyal rong sku chen nam mkha' tshe dbang mchog grub dang /__chos rgyal chen po sogs mchod yon rnams kyis thugs rtsa che bar mdzad de/__rgyal rong dbon sprul bstan pa'i nyi ma/__dbon o rgyan bsam 'grub/__bla ma rig 'dzin bzang po sogs dbu che rags rim dpon slob sum cu skor yab gzhis su byon pa na/__sprul pa'i skus sngon gnas rjes dran dang dgyes pa'i rnam 'gyur du ma mdzad pas yid ches kyi nges shes lhag par 'khrungs/__yab yum sogs sku rgyab pa dang sa dbang sde dge'i chibs kha pa sogs dpon 'khor sum cu skor dang bcas pa gser ldan gyi chu bo las brgal te rim par dal 'gros kyis chu stod zla ba'i tshes bcu'i snga char chibs bsu ring thung dgon sde'i ser breng gi bkod bsham sogs phal pa'i blo'i ra ba las 'das ba'i dpal gyi 'byor pa phun sum tshogs pa lnga ldan gyi ngo mtshar 'byams klas pas gong ma'i gdan sa ru dam o rgyan bsam gtan chos gling gi gtsug lag khang chen por 'jigs med seng ge'i khri la zhabs pad bkod rjes/__gtsang khang thub chen gyi spyan sngar mkhas grub chen po nam mkha' tshe dbang mchog grub kyis gtsug phud bzhes te/__mtshan 'jigs med mkhyen brtse'i dbang phyug gam rnam rgyal rdo rje zhes gsol/__slar gser khrir zhabs pad bkod pa dang chab gcig tshe sgrub 'chi med yang snying gi brtan bzhugs dang 'brel bar rdzogs chen gzhung gi khri 'bul dang/__chos rgyal chen pos shug tsa gnyer chen dngos grub gnyis ched mngags ltar khri 'bul phul/__rgyal rong dpon bsam 'grub nas gsung bshad zhom thog chod par mdzad/__phyir nyin ze chen rig 'dzin dpal 'byor rgya mtsho dbu bzhugs kyis tshe chog dang 'brel bar zhabs brtan legs 'bul rgya cher spros pa dang chab gcig__/dbon sprul mthu stobs rnam rgyal dgung lo bcu gsum du son pas phun sum tshogs pa lnga ldan gyi ljags bshad rgya cher spros shing /__rgyal tshab rin po che pad+ma gsang sngags bstan 'dzin gyis snga 'gyur bstan pa'i babs lugs sogs kyis byang drangs te skabs su babs pa'i 'bel ba'i gtam 'byams klas pa gnang /__de 'brel stag sgang gdan sa nas dbon sprul o rgyan nyi ma sogs rdzogs chen phyogs gtogs dang /__gzhan yang grub mtha' ris med 'brel can/__gling rgyal po sogs lha sde mi sde kun gyis khri 'bul dpang bstod de phul/__nyin gsum par su ra to bcu drug gis mchod gar sogs dga' ston mtha' rgyas su mdzad/__yab tshang la bslu yon dngul srang nyis brgyas gtsos rnam grangs sum brgya lhag pa dang /__ston chen kyis gtsos lha sde mi sde kun la gsol ston 'bul gnang rigs rgya cher stsal/__de nas bzung ste nye bar gnas pa'i slob dpon dbon po chos grags bzang pos mdzad de bgrang bya bzhi'i bar du yi ge'i phyi mo nas bzung bslab sbyang nan tan du mdzad pas mkhas par mkhyen/__dbang lung gsan bzhes dang bsnyen sgrub sogs kyang ci rigs mdzad/__dgung lo bcu gcig par slob dpon zhi bar gshegs pa'i tshab mkhas dbang thugs rje bkra shis brkos/__'di lor rgyal rong du chibs bskyod nas nyi sprul gsum pa rin po che mi 'gyur phan bde rgya mtsho las lha btsun rdo rje'i rig 'dzin srog sgrub/__lnga pa'i rgya can/__rig 'dzin nyi ma grags pa'i gter chos yongs rdzogs/__thugs mchog rdo rje'i nA ga rak+sha/__kun mkhyen 'jigs med gling pa'i dgongs gter klong chen snying thig gi skor sogs dbang lung bka' rdzogs su gsan/__sog ru kun bzang las phyag bris bslab/__dgung lo bcu gnyis lo gsar tshes bcu'i bum sgrub kyi tshogs dbur phebs pa nas bzung sku tshe'i ring bcad rgya sogs dmigs bsal re gnyis skabs ma gtogs par dus mchod thams cad la byon nas bsgrigs kun spyod phyag bzhes 'khrul med yid ches khungs btsun ngo mtshar byin rlabs kyi dpal du 'bar bas blo ldan thams cad dad pa'i pad+mo slar yang rgyas/__gdod ma'i mgon po rtsa ba'i yongs 'dzin nam mkha' tshe dbang mchog grub las mkha' 'gro'i snying tig__/gsang ba snying tig__/rdor sems snying tig rnams kyi nyams khrid gsan nas sngon 'gro'i thugs sbyang mdzad pas/__dad pa dang nges 'byung byang chub kyi sems rin po che rnams la nyams myong bcos min rang shar thugs la 'khrungs shing /__khyad par gyi sngon 'gro 'khor 'das ru shan dbye ba dang /__lus ngag yid gsum sbyong ba rdo rus 'phrod pa sngon du 'gro bas sems rig shan dbye bas rig pa rjen par ngo 'phrod par dran pa bsten tshul sogs zhal khrid gnad smin mdzad pas kun bzang gdod ma'i rgyal thabs la dbang bsgyur nas mdo khams rdzogs chen pa zhes mtshan don dang ldan par mdzad/__gzhan yang gong gsal snying tig gsum gyi dbang lung yongs rdzogs/__nyang gter rta nag__/mgon po phyag bzhi sogs nyang chos kyi zab gter/__rgyal sras rdo rje gling pa'i rdzogs chen lta ba klong yangs/__kar gling zhi khro/__zhang khrom gyi gshin rje khro chu/__sangs rgyas gling pa'i bla ma dgongs 'dus/__rat+na'i phur pa/__rig 'dzin chen po nyi ma grags pa'i zab gter phal cher/__rig 'dzin dpa' bo las rab kyi thugs gter/__gar dbang 'chi med gling pa'i 'chi med thugs tig__/theg gling dang /__gling gter chen pad+ma 'gro 'dul rtsal gyi zab gter phal cher sogs chos bka' dbang lung dkon rigs rgya cher gsan/__mkhan chen rig 'dzin bzang po'i mdun nas nyang gter bka' brgyad dbang lung /__dge rtse bla ma bsod bstan las 'dus mdo dang /__snying tig bka' gter skor/__zhe chen rab 'byams dang rgyal tshab mkhan slob las bka' gter gyi dbang lung rgya cher gsan bzhes dang /__shing byi nas bzung lcags rta'i bar lo bdun du gdul bya grong chog sogs rnam g.yengs rgya che rigs kyis ma gos par/__lo re re bzhin zla ba drug las mi thung bar bcad rgya gang dam gyis bla ma gong ma'i thugs dam lha yi gtsos bka' gter gyi rtsa gsum rab 'byams kyi bsnyen sgrub shin tu gnad smin/__bar skabs thams cad du phyogs so so nas dge ba'i bshes gnyen rdo rje 'dzin pa chen po rnams ched du gdan drangs nas dbang lung smin khrid rgya cher gsan pa ni mtshan tsam yang brjod par dka' bas mang du gsan pa'i mchog tu gyur pa sogs gsan yig pod chen las shes/__'di dag gi zhabs bskul dang do dam rje bla ma nam mkha' tshe dbang mchog grub nas mdzad cing bla ma'i bka' bzhin mthar phyin par mdzad/__bya ba las kyi 'khor lo'ang rje bla ma nam mkha' dang dbon sprul sku mched nas thugs gnyer mdzad de dgung grangs bcu gsum par tshes bcu'i mchod pas 'khor lo gnyis mnyam rdzogs su mdzad cing /__gar rgyas spros can btsugs/__'du khang ma gtogs pa'i bla brang nyams gso gsar bskrun yid can mig gi bdud rtsir spel/__dgung grangs bco lnga par mkhas grub mtshungs med dpon gur bla ma ngag dbang blo gros gdan drangs nas bka' brgyad gsang rdzogs/__tshe bdag lcags 'dra sdig__/rdzogs chen snyan brgyud/__pad gling bla ma nor bu rgya mtsho/__dri med lhun po'i don tig sogs dbang lung rgyun dkon shin tu mang bar gsan/__lo der zhe chen rab 'byams gsum pa rig 'dzin dpal 'byor rgya mtsho las dge tshul gyi sdom pa bzhes shing /__rig 'dzin 'gyur med kun bzang theg mchog bstan 'dzin dpal bzang por gsol nas ston mchog shAkya seng ge'i rgyal tshab tu mnga' gsol/__gung tshigs dgongs bcad sogs 'dul ba'i phyag bzhes sor bzhag gnang /__me yos lor byang 'brog rdza chu rgyud du gdul bya la phebs pa nas bzung bsnyen bkur rgya cher byung ba dag rten bzhengs sgrub mchod sogs kyi rtsa bar chud mi za bar mdzad/__dgung grangs nyi shu pa chu bya lor sngar nas kyang dbang lung khrid gsum rgya cher gsan pa ltar grub pa'i dbang phyug chen po 'jigs med phrin las 'od zer gyi spyan sngar ched kyis phebs nas/__klong chen gong 'og gi bka' gter bstan bcos skor/__bi ma snying tig__/snyan brgyud rdo rje zam pa sogs kyi dbang lung khrid gsum rgya cher gsan cing /__khyad par rdzogs pa chen po snying tig gi dgongs pa thun mong ma yin pa byin rlabs 'pho ba'i stobs kyis mngon du mdzad pas/__rje nam mkha' dang /__grub dbang 'di gnyis khyad med kyi rtsa ba'i bla ma dam par mdzad/__shing khyi dgung grangs nyer gnyis par lha ldan sprul pa'i zhing khams chen por chibs bsgyur gnang /__rtse shod chos 'khor rnam gnyis rdor smin sogs su mchod sprin shin tu rgyas par spros/__rgyal dbang dgu pa ngag dbang lung rtogs rgya mtsho ldan chos 'khor du 'khrungs par ra kho dang sku rigs gcig pa'i dpon du song bas nang brtse'i gzigs gsol tshad med pa dang bod skyong rgyal tshab de mo rin po ches kyang mthong bkur tshad med stsal/__sprul pa'i gter chen klong chen rol pa rtsal gyis rang gter gtsor gyur smin grol gdams pa stsal zhing lhag par rdzogs pa chen po snying tig thun mong ma yin pa'i khyad chos thod rgal gyi nyams khrid stsal ba thugs nyams su bzhes pa rig pa tshad phebs kyi rtags snang mngon du gyur/__zur phu lha lding gter chen zla ba'i 'od zer las rang gter rig 'dzin bde 'dus kyi smin grol rdzogs par gsan cing chos kyi bdag por dbugs dbyung /__de mtshungs mkhar rdo grub dbang chos kyi rdo rjer yang chos 'brel gsan cing chos bdag tu dbugs dbyung /__thub bstan rdo rje brag tu phebs skabs rig 'dzin kun bzang zhing gshegs pas mi bzhugs kyang /__rgyal tshab lcags la'i thugs sras rin po che mjal zhing tshe dbang gsan/__'bul nod rgya cher phul/__smin gling du zla 'khor lhag tsam bzhugs nas/__khri chen pad+ma dbang rgyal las bka' ma'i dbang lung rgya che dang /__gter bdag gling pa'i zab gter gyi smin grol rdzogs pa rgya cher gsan bzhes dang /__thugs yid gcig 'dres kyis mthong bkur tshad med pa gnang /__'bul nod dang 'dus sder bsnyen bkur sogs shin tu rgyas par spros/__lcags zam mchog sprul rin po che la'ang bka' 'brel tsam gsan/__slar lha ldan du phebs bstun mkhan chen zhi ba 'tsho'i rnam 'phrul rgyal tshab de mo hu thog thu blo bzang thub bstan rgyal mtshan sogs dad pa'i dge 'dun grangs tshang las bsnyen par rdzogs pa'i dge slong gi sdom pa bzhes nas mkhan chen dam pas kyang mnga' gsol gzengs bstod mthong bkur dpe bral du gnang /__smon lam chen mo'i tshogs dbur rgyal dbang dgu pa lung rtogs rgya mtsho yab sras lhan rgyas spyan drangs pa'i spyan sngar mchod sprin shin tu rgyas par spros nas/__maN+Dal rgyas bshad rje nyid kyis mdzad pas thams cad yid 'phrog__/smon lam chen mo'i dge 'dun la tshogs 'gyed sogs khyad 'phags gnang bas grags pa'i rnga chen phyogs kun khyab/__de nas rim par khams su chibs kha bsgyur nas rang gnas su gegs med par phebs bsu'i bkod bshams rgya chen dang bcas phebs nas lugs gnyis dga' ston phun sum tshogs pa kun kyang rjes su yi rangs/__gling gter chen pad+ma 'gro 'dul rtsal yang phebs nas thugs yid gcig 'dres rten 'brel legs tshogs rgyas/__me glang lor sde dger lcang ra'i bum sgrub chen mor sngar srol gdan drangs shing 'gro phan rgya cher spel/__de nas bzung lo gsum re tsam gyi mtshams bum sgrub la bstar chags su phebs pas mtshon chos rgyal chen pos dad gus tshad med pas mchod cing dbu'i cod pan gcig pur gyur/__de lta bu'i mdzad pas mtshon lo bstar rdza rgyud sogs la res mos kyis 'gro don dang /__bar skabs thams cad du thugs dam gyi gtso bo bka' brgyad drag po dpal chen 'dus pa/__rje drung rin po che'i dgongs gter pad+ma rgyal po/__zur phu gter chen zla 'od dang /__klong chen rol pa rtsal gyi gter gsar rnams kyis gtsos bka' gter tshad ldan bla ma yi dam gyi bsnyen sgrub dpag tu med pa mdzad/__sku gegs 'tshubs 'gyur rigs kyang dgongs pa'i rtsal dang /__zhabs brtan rgya cher bsgrubs pas cung zad kyang ma gos pa sku tshe phrin las mthar phyin pa snyigs dus kyi bstan 'dzin chen po zhig la 'gran zla dang bral zhing /__sku tshe ril por thugs nam skabs su zhu mkhan su yod la snga 'gyur bka' gter gyi dbang lung khrid gsum rgya cher chad med du gnang bas bstan pa'i srog mthud/__bya ba las kyi 'khor lo sku na phra mo'i skabs slob dpon rin po che/__mkhan chen/__chos rgyal bcas kyi snang brnyan gser zangs las thog tshad bzhengs pa nas bzung rten bzhengs dang sgrub khag rnams kyi zhal thang dang yo byad sogs bar ma chad par bzhengs shing /__lhag par dgung grangs lnga bcur phebs pa chu stag dbyug pa zla ba'i tshes drug gi nam langs bstan pa'i gegs chags stobs su bdo bas hor khog nas brtsams sa g.yos kyi 'jigs pa chen pos dgon gnas kyang rming med du gyur ba/__rje nyid sde dge'i rgyal khab tu bzhugs skabs ji bzhin du gzigs/__sngon nas lung bstan pa mngon du gyur pas thugs dbyung ste bya btang spong ba pa'i brtul zhugs la thugs gtad skabs/__sde dge chos rgyal dam tshig rdo rjes thugs gsos rgya cher spro ba dang /__de lta bu'i dgongs pa mi bzhes par nyams gso gsar bzhengs sngar ltar sor chud ma mdzad ka med dang /__de'i zhabs 'degs gang dgos rtse gcig tu bsgrub par zhal gyis bzhes shing /__bdag po nas kyang zhal yod don med lta bu ma yin par las mgo brtsams nas mthar ma phyin par/__sku tshab dad dam mkhyen yangs bar shar skal bzang rnam rgyal ring bskos dang /__shing bzo dang /__ru gar sde shog res mos dang /__shing cha sogs dgos 'dod lhug par stsal zhing gtso cher rje nyid kyi thugs bzhed phrin las rmad du byung ba dang /__gzhan dgon sde dang 'byor ldan rnams kyis zhal 'debs kyi gtong sgo rgya ches mtshams sbyar/__bstan pa rin po che gsar du 'char ba'i thugs bskyed dang smon lam gyi mthu grub pa rje rgyal ba'i sras po kun mkhyen gzhan phan mtha' yas kyis zhib gzigs dang /__rjes su lho ri bla ma 'gyur med bstan 'phel gyis zhabs 'degs 'phro mthud bcas rten dang brten par bcas pa'i gtsug lag khang chen bla brang dang bcas sngar las ches cher lhag pa'i bzhengs bkod dang /__nyams gso 'gran bral du bka' drin bskyangs pas mtshon bsam gyis mi khyab pa'i phrin las rgyas/__lhag par klog pa thos bsam gyi 'khor lo kun mkhyen bla ma gzhan phan mtha' yas dang bka' 'gros te/__dam pa'i chos 'dul ba'i phyag bzhes phra zhib tu gtan la phab nas gzhi gsum sogs kyi phyag bzhes ming tsam du ma song ba'i gzhan 'gran bral ba gsar 'dzugs dang 'brel bar/__kun mkhyen pradz+nyA ra smi'i gsung rab mdo sngags smon lam dang /__sum rtags sogs rgya cher bshad pas blo gros kyi sgo bye nas/__chos kyi rgyal po klong chen pa gong 'og gi gsung rab rin po che'i mdzod/__yon tan rin po che'i mdzod/__paN chen pad+ma dbang rgyal gyi sdom gsum sogs nyer mkho'i gzhung snying por dril ba dang /__dbu phar 'dul mdzod kyi gzhung chen/__dpal gsang ba snying po sogs mdo sngags kyi bshad nyan shin tu dar zhing /__de dag gi rgyun dpal sprul 'jigs med chos kyi dbang po dang /__mkhan chen pad+ma badz+ra sogs la gnyer du stsal nas mkhan rabs rnams kyis bzung ste da lta'i bar shin tu dar zhing rgyas par mdzad pa'i phrin las 'di kho na'ang snyigs dus bstan pa'i nyi ma gcig pur bsngags pa'i me tog mkhas dang 'phags pa'i tshogs kyis nyin bzhin du 'grem/__de lta bu'i gsan bsam sgom pa gtso gyur 'khor lo gsum gyi mdzad pa mtha' yas pa'i/__thog mar zab chos rgya cher gsan pa'i yongs 'dzin gyi gtso bo ni/__gong du smos pa ltar mkhas shing grub pa'i dbang phyug nam mkha' tshe dbang mchog grub dang /__lha sras rgyal po'i rnam 'phrul grub pa'i dbang phyug chen po 'jigs med phrin las 'od zer te bka' drin 'gran zla dang bral ba'i rtsa ba'i bla ma rnam pa gnyis kyis gtsos/__rje rgyal ba'i sras po kun mkhyen bla ma gzhan phan mtha' yas las bka' bstan lung rgyun gang yod dang /__gzhung bshad sogs dbang lung rgya cher gsan pa dang /__grub dbang dpon slob rin po che pad+ma mdo sngags bstan 'dzin zhal mjal zhing byin gyis brlabs/__bla ma tshe dbang las bka' brgyad dbang chen/__dge rtse bla ma 'jigs med ngo mtshar las 'dus pa mdo dbang chen mo/__ze chen rgyal tshab rin po che bstan 'dzin chos rgyal las bka' gter gyi dbang lung /__gong smos rab 'byams gsum pa rig 'dzin dpal 'byor rgya mtsho las rab tu byung zhing dbang chos che rigs/__gzhan yang nyi sprul gsum pa mi 'gyur phan bde rgya mtsho/__gling gter chen pad+ma 'gro 'dul rtsal/__bdud 'dul gdung brgyud rgyal sras pad+ma rnam rgyal/__'phags mchog phyag na pad+mo 'jigs med rgya ba'i myu gu 'bar chung bkra shis rgya mtsho'i dbon bstan 'dzin nor bu/__grub mchog 'jigs med go cha'i dbon mkhas grub phrin las dar rgyas sogs las gsar rnying bka' gter dag snang gi smin grol lung bcas rgya mtsho lta bu gsan/__gzhan yang kaHthog zhing skyong mchog sprul rig 'dzin 'jigs med mgon po/__rmog ston mchog sprul 'jigs bral chos dbyings rdo rje/__rgyal rong dbon sprul bstan pa'i nyi ma gong 'og__/nam sprul kun bzang theg mchog rdo rje/__ze chen rab 'byams mi mjed zhing gi mgon po dang /__rgyal tshab o rgyan rang byung rdo rje/__grub chen mchog sprul sogs rang lugs dang /__gangs can gyi mgon po rgyal dbang lung rtogs rgya mtsho/__de mo hu thog thu yab sras/__mdo khams lnga pa sgrub brgyud nyi ma/__ngor thar rtse mkhan chen byams pa nam mkha' 'chi med dang /__byams pa kun dga' bstan 'dzin/__rnal 'byor 'jam dpal bzang po/__phan khang mkhan kun dga' bstan pa'i blo gros/__zhabs drung khag__/nA len+d+ra gzims 'og mchog sprul byams pa bstan 'dzin snyan grags sogs sa dge'i phyogs dang /__lha 'brang rig 'dzin dpal ldan chos rgyal/__khyad par kun mkhyen 'jigs med gling pa'i rnam 'phrul 'jigs med ye shes rdo rje/__mkhas grub 'jigs med skal bzang /__phyis su sprul pa'i gter chen mchog gyur bde chen gling pa'i bar ris med pa'i bstan 'dzin gyi skyes bu rnams las chos 'brel ci rigs pa gsan pas gsan rgya shin tu che ba gsan yig pod chen las gsal ba dang /__de ltar gsan pa rnams kyang bka' gter gal che ba rnams lan mang 'chad spel dang /__tshar re ma 'chad pa med pa lta bus sku tshe ril por 'chad nyan rlabs po che gnang ba'i grub 'bras brgyud 'dzin zhal slob nam mkha'i skar tshogs ltar tshad bzung med par 'phel ba ste/__rags rim tsam brjod na/__dpon slob rin po che gsum pa nam mkha' chos kyi rgya mtsho/__bzhi pa 'jigs med chos dbyings 'od gsal/__shing rta chen po kun mkhyen gzhan phan mtha' yas 'od zer te rgyal tshab chen po'i sa brnyes pa gsum/__nyi grags mchog sprul bzhi pa dkon mchog 'jigs med rgyal mtshan/__rab 'byams bzhi pa mi mjed zhing mgon/__rgyal tshab mi bskyod mkhas grub/__rje dpon gsum pa gar dbang thugs mchog rdo rje/__nam sprul rin po che kun bzang theg mchog rdo rje ste brgyud 'dzin gdams pa'i gter 'dzin lnga/__mkhyen sprul ye shes rdo rje/__gling gter chen pad+ma 'gro 'dul/__mchog gyur bde chen gling pa ste sprul pa'i gter chen rnam gsum/__'phags mchog 'jigs med rgyal ba'i myu gu zhes 'gro don mtha' yas pa'i sems dpa' gcig__/grub chen mchog sprul bstan pa'i rgyal mtshan/__rig rtsal thogs med gling pa'i rnam sprul o rgyan 'jigs med phrin las 'gro 'dul/__mchog sprul pad+ma bde chen te mkhyen brtse nus ldan gyi brgyud 'dzin gsum/__mkhas grub 'jigs med skal bzang dang /__dpal sprul o rgyan 'jigs med chos kyi dbang po ste mkhyen rab zla med pa'i mkhas pa gnyis/__mkhan chen pad+ma bkra shis/__pad+ma dam chos/__pad+ma 'od zer dpal bzang po sogs rang dgon gyi mkhan rabs mkhas grub bcu/__de'i nang nas pad+ma 'od zer dang /__gling sprul thub bstan rgyal mtshan gnyis nang thugs kyi sras zung ste bstan pa la bya ba rgya cher mdzad pa/__kaHthog zhing skyong dang /__rmog grub rin po che gong 'og ste bka' gter gyi bstan 'dzin chen po bzhi/__rigs dpon 'jigs med sogs phyag bzhes phrin sgrub kyi rgyal tshab dgu__/mkhas sprul sgrub brgyud nyi ma gong 'og ste sgrub brgyud bstan 'dzin mchog zung /__ze chen ma hA paN+Di ta dbon sprul mthu stobs rnam rgyal sogs bshes gnyen chen po bcu/__seng ge bla ma kun bzang bstan dar sogs mdo sngags 'chad pa'i bka' babs nyer bdun/__mang za bla ma dpal gyi seng ge sogs sgrub pa'i bstan 'dzin spong ba pa chen po nyer bdun/__ma gcig mkha' 'gros byin brlabs gcod pa pad+ma sogs gcod yul bka' babs lung zin bzhi/__dge rgyal gcod pa sogs brtul zhugs spyod pa'i rnal 'byor dbang phyug brgyad/__ras sprul 'khrul snang rang grol sogs phyogs med 'gro don mdzad pa'i rnal 'byor pa chen po dgu/__dpal nA len+d+ra'i gzims 'og thams cad mkhyen pa ngag dbang bstan 'dzin snyan grags dang /__'jam dbyangs zhe chen dbon sprul rin po ches mdzad pa'i rje 'di'i rnam thar sgra dbyangs rgya mtsho nas btus mdzad par 'dug mchan/__mkhyen brtse'i dbang po gnyis la dgongs pas byin rlabs thugs sras zla med nyi zla zung gcig tu grags/__'dzam gling chos kyi shing rta kong sprul thams cad mkhyen pa karma ngag dbang yon tan rgya mtsho/__shing rta chen po li thang mkhan chen mkhas mchog byams pa phun tshogs/__mkhas shing grub pa'i dbang phyug gyi ling sprul pa'i sku thugs mchog sogs phyogs kyi bstan 'dzin chen po bcu/__nyi grags dbon sprul dam pa sogs sems dpa' chen po bcu/__bdud 'dul gdung 'dzin rgyal sras snyan grags sogs grub mchog rnam bzhi/__khro zur gter ston/__ze chen rang grol/__rig 'dzin nor bu/__ma hA gter ston/__'od lus pa pad+ma bdud 'dul te zab gter bka' babs lnga/__grub chen rnam 'phrul dri med grags pa dang /__klong chen rol pa rtsal gyi rnam 'phrul te snying po'i bstan 'dzin zung gcig__/rgyal sras gzhan phan sprul sku/__rab 'byams lnga pa/__rgyal rong dbon sprul lnga pa ste 'khrul med rdo rje'i lung gis dbugs 'byin thob pa'i rnam 'dren gsum/__rig 'dzin nyi ma grags pa'i yang srid drug pa lha rigs dam pa dang /__grub chen 'jigs med phrin las 'od zer gyi yang srid gsum/__nor gling mchog sprul/__gling gter chen gsum pa ste rdo rje'i lung gis bstan pa'i bstan 'dzin bzhi/__rang dgon 'brug sprul rnam gnyis dang /__kun bzang sprul pa'i sku ste rgyal bstan 'dzin spel la bsngags pa gsum/__grub mchog stobs ldan rdo rje gong 'og__/nam mkha' rgya mtsho ste re skong rdo rje 'dzin pa drag sngags nus mthu'i bka' babs gsum/__rig 'dzin nyi ma grags pa'i sprul pa'i bye brag tu bsngags pa sa skyong sde dge'i rgyal sras bla ma/__'ju sprul pad+ma bstan 'dzin/__legs dgon sprul pa'i sku sogs smin grol phyogs brgyar spel ba'i sprul dbon chen po lnga bcu/__dpal yul dbon sprul/__gzhi chen sprul sku/__dzar ka dpon po sogs phyogs mtha'i gsar rnying gi bshes gnyen chen po bcu drug__/gser tog dpon po khu dbon/__stong dpon rdor lhun/__chos skor klong gsal sogs rang dgon ma lag dang /__phyogs bral du bzhugs pa'i bla ma bstan 'gro'i dge legs spel ba rnam thar chen mor mtshan gsol ba brgya rtsa lhag pa sogs bgrangs kyis mi lang pa/__mdor na dus der bod chen sde dge'i phyogs gtsor gyur mdo smad kyi snga 'gyur ring lugs 'dzin pa dang /__grub mtha' ris bral gyi skyes chen mchog phal rnams kyis rje 'di'i zhal mjal chos 'brel ma nos pa 'ga' yang med pa lta bur gyur pas grol ba bzhi ldan gyi phrin las dgon yul thams cad la bsam gyis mi khyab pas brjod pa'i yul las 'das pa dang /__bstan pa stobs kyis 'degs pa'i sbyin bdag kyang /__dpal mi'i tshangs pa sde dge chos rgyal yab sras dbon bcas/__lcags la mi chen rgyal po/__gling rgyal po yab sras gtsor gyur thu si khag so gnyis/__de ma 'phyi nyer lngar grags pa phal cher dang /__gzhung sa dga' ldan pho brang pa'i bka'i blon zhabs pad sa dbang phu lung pa sogs mi chen thams cad kyis kyang gus pas btud cing mi phyed pa'i dad pas mchod pa sogs mdor na lugs gnyis kyi sgo nas phyi ma'i dus 'dir rje 'di kho na phrin las rlabs che/__de lta bu'i mdzad phrin bsam gyis mi khyab pa gong 'phel du gyur to//____//_!_