JKW-KABUM-09-TA-001-010

🚧 This website is under continued development. We appreciate your patience!

Previous Text Back to Volume PageNext Text

Wylie title	'chi med rang gzungs kyi sgom bzlas snying por dril ba tshe srog rdo rjer bsgrub pa'i bcud len
Location	mkhyen brtse'i bka' 'bum Volume 9, sde tshan 1, Text 10, Pages 74-80 (Folios 37b5 to 40b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. chi med rang gzungs kyi sgom bzlas snying por dril ba tshe srog rdo rjer bsgrub pa'i bcud len. In jam dbyangs mkhyen brtse'i dbang po'i bka' 'bum, Vol. 9: 74-80. Khams sde dge rdzong sar dgon: Rdzong sar blo gros phun tshogs, 2020.
Genre	Longevity Rituals - tshe sgrub
Colophon	།ཞེས་པའང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གཅིག་ཏུ་གཞན་ལ་ཕན་པར་འདོད་པའི་བསམ་པ་ཁོ་ནས་བླ་མ་ལས་ཐོས་པ་དང་། ཡིག་རྙིང་གསལ་བྱེད་དང་བཅས་པའི་དགོངས་བཅུད་སྙིང་པོར་དྲིལ་ཏེ་སྦྱར་བ་འདིས་ཀྱང་འགྲོ་ཀུན་འཆི་མེད་གྲུབ་པའི་རིག་འཛིན་གྱི་གོ་འཕང་ལ་འདོད་རྒུར་རྩེན་པའི་རྒྱུར་གྱུར་ཅིག །ཨཱ་ཡུརྫྙཱ་ན་བརྡྷནྟུ།།
	zhes pa'ang bya bral ba 'jam dbyangs mkhyen brtse'i dbang pos gcig tu gzhan la phan par 'dod pa'i bsam pa kho nas bla ma las thos pa dang /__yig rnying gsal byed dang bcas pa'i dgongs bcud snying por dril te sbyar ba 'dis kyang 'gro kun 'chi med grub pa'i rig 'dzin gyi go 'phang la 'dod rgur rtsen pa'i rgyur gyur cig__/A yur+dz+nyA na bar+d+han+tu//

1 Texts in this Section (sde tshan or chos tshan)

10 74-80	འཆི་མེད་རང་གཟུངས་ཀྱི་སྒོམ་བཟླས་སྙིང་པོར་དྲིལ་བ་ཚེ་སྲོག་རྡོ་རྗེར་བསྒྲུབ་པའི་བཅུད་ལེན། 'chi med rang gzungs kyi sgom bzlas snying por dril ba tshe srog rdo rjer bsgrub pa'i bcud len Longevity Rituals - tshe sgrub	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །འཆི་མེད་རང་གཟུངས་ཀྱི་སྒོམ་བཟླས་སྙིང་པོར་དྲིལ་བ་ཚེ་སྲོག་རྡོ་རྗེར་བསྒྲུབ་པའི་བཅུད་ལེན་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། རྨད་དུ་བྱུང་བའི་སློབ་དཔོན་ཆེན་པོ་ཞི་བ་ལྷས་བྱང་ཆུབ་སེམས་དཔའི་བསླབ་པ་ཀུན་ལས་བཏུས་པར། འཇིགས་པ་ཐམས་ཅད་ལས་སྲུང་བའི་ཕྱིར་རིག་སྔགས་འཆང་གི་སྡེ་སྣོད་ལས་བྱུང་བའི་ཚེ་རབས་མཐའ་ཡས་པ་དྲན་པར་འགྱུར་བའི་རྒྱུ་མཐུ་ཆེ་བའི་ཡི་གེ་ལྔ་བཅུ་རྩ་བདུན་པོ་འདི་ལ་ཡང་སྦྱར་བར་བྱའོ། །ཞེས་ལུས་སྲུང་བའི་རིག་སྔགས་ཐམས་ཅད་ཀྱི་མཆོག་ཏུ་གསུངས་ཤིང་། གཞན་དུ་སྒྲ་མི་སྙན་པའི་འཆི་མེད་ཀྱི་རང་གཟུངས་ཞེས་ཡོངས་སུ་གྲགས་པའི་གདམས་པ་ཟབ་མོ་འདི་ལ་རིང་བརྒྱུད་དང་། ཉེ་བརྒྱུད་ཀྱི་བཀའ་སྲོལ་ཐ་དད་པ་དང་། སྔ་མ་ལའང་ལོ་རྒྱུས་དང་། སྔགས་དང་། དམིགས་པའི་ཁྱད་པར་ཅུང་ཟད་མི་འདྲ་བ་མང་དུ་འབྱུང་བ་ལས། འདིར་རེ་ཞིག་རང་གི་བླ་མ་ལས་ཐོབ་པའི་ཉམས་ལེན་ཕྱོགས་གཅིག་པ་དག་མདོར་བསྡུས་སུ་བྱ་བའི་ཚུལ་ལའང་གཉིས་ཏེ། དང་པོ་ཚེ་སྒྲུབ་གཙོ་བོར་བྱེད་ན། ཐོ་རངས་བྱ་ཁྭ་ཏའི་སྐད་མ་བསྒྲགས་པའི་དུས་སུ་བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་དོ། །སྐྱབས་སེམས་ཚད་མེད་བཞི་བསྒོམ་པ་རྣམས་སྤྱིར་ལྟར་སྔོན་དུ་འགྲོ་བས། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། སྟོང་པའི་ངང་ལས་ལྕགས་ཀྱི་པདྨ་འདབ་མ་བརྒྱད་པའི་སྟེང་དུ། རང་ཉིད་སྐད་ཅིག་གིས་མགོན་པོ་ཚེ་དཔག་ཏུ་མེད་པ་སྐུ་མདོག་དམར་པོ་ཞལ་གཅིག་ཕྱག་གཉིས་མཉམ་གཞག་གི་སྟེང་ན་འཆི་མེད་བདུད་རྩིས་གང་བའི་ཚེའི་བུམ་པ་བསྣམས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་འོད་ཟེར་སྣ་ཚོགས་པའི་རྒྱབ་ཡོལ་ཅན། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། སྣང་ལ་རང་བཞིན་མེད་པའི་སྐུ་ཅན་དུ་གསལ་བའི་སྤྱི་བོར་པད་ཟླའི་གདན་ལ་རང་འདྲ་བའི་ཚེ་དཔག་མེད་མཚན་དཔེའི་གཟི་བྱིན་གྱི་དཔལ་མཆོག་ཏུ་འབར་བ། རང་གི་སྤྱི་བོ་ནས་གསང་གནས་ཀྱི་བར་ལ་ལྕགས་ཀྱི་སྲོག་རྩ་མདའ་སྨྱུག་ཙམ་པ་སྐྱ་ཁྲོལ་པ་གཅིག་གི་ནང་ན་སྲོག་རླུང་དམར་ལྗང་ཁྱུག་གེ་བས་གང་བའི་ཕྱི་རོལ་གྱི་ཕྱོགས་བཞིར་གཟུངས་སྔགས་རྣམས་བདུད་རྩིའི་ཟིལ་པ་ཕྲམ་མེར་གནས་པའི་དབུས་སུ་རང་སེམས་ཀྱི་ངོ་བོ་ཧཱུྃ་མཐིང་ག་འོད་ཟེར་འབར་བ། སྤྱི་བོའི་ཚེ་དཔག་མེད་ལ་གུས་འདུད་དུང་བ་ཞིག་བྱས་པས་ཐུགས་ཀ་ནས་འོད་ཟེར་ཕྱོགས་བཅུར་འཕྲོས། རང་གི་བླ་ཚེ་ཆད་ཉམས་ཡར་བ་དང་འབྱུང་བ་བཞིའི་དྭངས་བཅུད། འཇིག་རྟེན་དང་འཇིག་རྟེན་ལས་འདས་པའི་ཚེ་བསོད་དཔལ་འབྱོར་ཡེ་ཤེས་ཡོན་ཏན་ཐམས་ཅད་བསྡུས་ནས་ཕྱག་གི་བུམ་པའི་ནང་དུ་ཞུགས། ཞུ་ཞིང་ལུད་པའི་བདུད་རྩིའི་རྒྱུན་སྤྱི་བོ་ཚངས་པའི་བུ་ག་ནས་མར་བྱུང་། ལུས་ཐམས་ཅད་དང་ཁྱད་པར་དབུ་མའི་ནང་ཐམས་ཅད་གང་བས་དུས་མ་ཡིན་པའི་འཆི་བའི་འཇིགས་པ་སྦྱངས། འཆི་མེད་ཚེའི་དངོས་གྲུབ་ཐོབ་པར་གྱུར། ཅེས་བརྗོད་ཅིང་བསམས་ལ། ན་མོ་བུདྡྷཱ་ཡ། ན་མོ་དྷརྨཱ་ཡ། ན་མཿསངྒྷཱ་ཡ། ཏདྱ་ཐཱ། ཨིཊྚེ། བཊྚེ། ནཊྚེ། ཀུ་ནཊྚེ། ཊཀྐེ། ཋཀྐེ། ཋ་རཀྐེ། ཨུ་རུ་མ་ཏི། རུ་རུ་མ་ཏི། རུ་རུ་ཧིལླི་མིལླི། སབྦ་ཛྙཱ། དུ་པ་ད་གྒ། ན་མཿསབྦ། སམྨ་ས་མུཛྫྷཱ་ནི། སིཛྫྷཱནྟུ་མེ་མནྟཱ་པཱ་དཱཿསྭཱ་ཧཱ། འདིའི་ཨིཊྚེ་མན་ཡི་གེ་ལྔ་བཅུ་རྩ་བདུན་ཡོད། ཞེས་བརྒྱ་རྩ་ལ་སོགས་པ་ཅི་ཙམ་ནུས་པ་ཚིག་གཞན་གྱིས་བར་མཆོད་པར་བཟླས་པའི་མཐར། །དགེ་བ་འདི་ཡིས་མྱུར་དུ་བདག །འཆི་མེད་རིག་འཛིན་འགྲུབ་གྱུར་ནས། །ཞེས་སོགས་བསྔོ་སྨོན་ཤིས་བརྗོད་བྱའོ། །གཉིས་པ་སྲུང་བ་གཙོ་བོར་བྱེད་ན། སྲོད་འཁོར་གྱི་དུས་སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས། རང་ཐ་མལ་དུ་གནས་པའི་སྙིང་གར་པདྨ་དཀར་པོ་འདབ་མ་བཞི་པའི་ལྟེ་བར་སེམས་ཉིད་ཀྱི་ངོ་བོ་ཧཱུྃ་མཐིང་ག་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ལྷ་མིའི་རིག་འཛིན་རྣམས་ཀྱི་ཚེ་དང་བསོད་ནམས། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་རྗེའི་བྱིན་རླབས་ནུས་མཐུ་སོགས་སྲིད་ཞིའི་དྭངས་བཅུད་ཐམས་ཅད་སྤྱན་དྲངས་ནས་ཧཱུྃ་ལ་ཐིམ། དེ་ཡོངས་སུ་གྱུར་པ་ལས། རང་ལུས་སྐད་ཅིག་གིས་གནམ་ལྕགས་ཀྱི་རྡོ་རྗེ་རྩེ་ལྔ་པ་གྱེན་དུ་ལངས་པ་ལས་ཡེ་ཤེས་ཀྱི་མེ་འབར་བས་མི་མཐུན་པའི་ཕྱོགས་ཐམས་ཅད་སྲེག་པར་བྱེད་པའི་ལྟེ་བ་སྦུབས་སྟོང་གི་དབུས་སུ་རང་སེམས་ཉི་མ་ལ་གནས་པའི་ཧཱུྃ་ཡིག་མཐིང་ག་དྲི་མ་མེད་པའི་འོད་ཟེར་ཁ་དོག་སྣ་ཚོགས་པ་འཕྲོ་བའི་མཐར་སྔགས་ཀྱི་ཕྲེང་བ་དཀར་པོ་གཡས་སྐོར་དུ་འཁོད་པ་ལས་འོད་ཟེར་འཕྲོས། རྩ་བརྒྱུད་ཀྱི་བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་སྲུང་མ་དང་བཅས་པའི་བྱིན་རླབས་ནུས་མཐུ་གཟི་བརྗིད་ཐམས་ཅད་དང་། ཁམས་གསུམ་གྱི་སེམས་ཅན་རྣམས་ཀྱི་ཚེ་དཔལ་བསོད་ནམས། བཀྲག་དང་གཟི་མདངས། འབྱུང་བ་བཞིའི་དྭངས་བཅུད། ཉི་མ་དང་ཟླ་བའི་གཟི་བརྗིད་དང་བཅས་པ་འོད་ཟེར་གྱི་སྣ་ལ་སྤྱན་དྲངས་ཏེ་རྡོ་རྗེའི་ལྟེ་བའི་ས་བོན་དང་སྔགས་ཕྲེང་ལ་ཐིམ་པས། རང་གི་དུས་མ་ཡིན་པའི་འཆི་བའི་འཇིགས་པ་ཐམས་ཅད་སྦྱངས། གཟི་བརྗིད་དང་ནུས་སྟོབས་ཕུན་སུམ་ཚོགས་པ་དང་ལྡན་པའི་འཆི་མེད་ཚེའི་རིག་འཛིན་འགྲུབ་པར་གྱུར། ཅེས་དམིགས་ལ་སྔགས་ཀྱི་ཕྲེང་བར་ཡིད་རྩེ་གཅིག་ཏུ་གཏད་དེ་ཅི་ནུས་བཟླས་མཐར་བསྔོ་སྨོན་སོགས་བྱའོ། །རིམ་པ་གཉིས་པོ་འདི་དག་ཀྱང་ཚེ་སྒྲུབ་དང་སྲུང་བའི་དམིགས་པ་གཙོ་ཆེ་བ་ཙམ་གྱི་སྒོ་ནས་དེ་ལྟར་སྨོས་པ་ལས། དོན་དུ་གཉིས་ཀའང་ཚེ་སྒྲུབ་ཀྱི་མཆོག་ཡིན་པས་རང་གང་མོས་ཤིག་ཤིན་ཏུ་གསང་བའི་སྒོ་ནས་ཆགས་མེད་དུ་ཉམས་སུ་བླངས་པ་ཁོ་ནས་དོན་འགྲུབ་ཅིང་། དུས་ཀྱི་ངེས་པའང་དམིགས་བསལ་མ་བྱུང་ན་ཉི་མ་ནུབ་ཁ་མ་གཏོགས་ནམ་ཉམས་སུ་བླང་ཡང་རུང་བར་གསུངས་སོ། །ཡང་འདིའི་སྒོ་ནས་འཆི་ལྟས་སོགས་ཟློག་པའི་སླད་དུ་བསྙེན་པ་དམིགས་བསལ་བཏང་བར་འདོད་ན། ཟླ་བ་གང་ཡང་རུང་བའི་ཡར་ངོའི་ཚེས་གཅིག་ནས་བརྩམས་ཏེ་ཞག་བདུན་དུ་མཚམས་ཤིན་ཏུ་དམ་པར་བཅད་ལ་གོང་གི་དམིགས་པ་གཉིས་རང་གང་མོས་སམ། གཉིས་ཀ་ཉམས་སུ་ལེན་ན། སྔ་དྲོའི་ཐུན་ལ་ཚེ་སྒྲུབ་དང་། ཕྱི་ཐུན་ལ་སྲུང་བ་གཙོ་བོར་བྱས་ཏེ་སྨྲ་བ་གཞན་སྤངས་ལ་ཐུན་བཞི་སོགས་ཀྱི་རིམ་པས་སྒོམ་བཟླས་རྩེ་གཅིག་ཏུ་འབད་པ་ན། ཐོག་མར་རྨི་ལམ་ངན་པ་དང་། ཆོ་འཕྲུལ་ཆེར་འགྲོ་བ་བྱུང་ན་བར་ཆད་ཀྱི་སློང་ཡིན་པས་མ་འཇིགས་པར་བྱ། དེ་ནས་རྨི་ལྟས་ཇེ་བཟང་དུ་འགྲོ་སྟེ། ཉི་མ་ཤར་བ་དང་། ནམ་ལངས་པ་དང་། མེ་ཏོག་འཐུ་བ་དང་། གྲུ་དང་གཟིངས་ལས་བརྒལ་བ་དང་། ནམ་མཁའ་ལ་འཕུར་བ་དང་། རི་མཐོན་པོར་ཕྱིན་པ་དང་། མཁར་གྱི་རྩེ་དང་། མཆོད་རྟེན་གྱི་རྩེ་ལ་འདུག་པ་དང་། སྐས་དང་ལྕགས་ཐག་ལ་འཛེགས་པ་དང་། གྱེན་ལ་ཕྱིན་པ་སོགས་དགེ་བའི་མཚན་མ་རྨི་ན་དངོས་གྲུབ་ཐོབ་པའི་ལྟས་སུ་ཤེས་པར་བྱའོ། །དེ་ལྟ་བུའི་རྒྱུན་དང་དུས་ཀྱི་ཉམས་ལེན་ལ་བརྩོན་པས་ལུས་ཀྱི་ཤེད་སྐྱེ་ཞིང་ཁམས་བདེ། རིག་པ་དྭངས་ཤིང་དགེ་སྦྱོར་འཕེལ། མདངས་དང་གཟི་བརྗིད་ཆེ་བ་སོགས་ཡོན་ཏན་བསམ་གྱིས་མི་ཁྱབ་ཅིང་། མི་མཐུན་པའི་ཕྱོགས་ཐམས་ཅད་སྲུང་ཞིང་ཞི་བ་དང་། ཕྱིར་ཟློག་པའི་མཆོག་ཏུ་འགྱུར། ཁྱད་པར་དུས་མ་ཡིན་པའི་འཆི་བའི་འཇིགས་པ་མཐའ་དག་ཞི་ཞིང་འཆི་མེད་ཚེའི་རིག་འཛིན་འགྲུབ་པར་འགྱུར་བ་ནི་ངེས་པའོ། །ཞེས་པའང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གཅིག་ཏུ་གཞན་ལ་ཕན་པར་འདོད་པའི་བསམ་པ་ཁོ་ནས་བླ་མ་ལས་ཐོས་པ་དང་། ཡིག་རྙིང་གསལ་བྱེད་དང་བཅས་པའི་དགོངས་བཅུད་སྙིང་པོར་དྲིལ་ཏེ་སྦྱར་བ་འདིས་ཀྱང་འགྲོ་ཀུན་འཆི་མེད་གྲུབ་པའི་རིག་འཛིན་གྱི་གོ་འཕང་ལ་འདོད་རྒུར་རྩེན་པའི་རྒྱུར་གྱུར་ཅིག །ཨཱ་ཡུརྫྙཱ་ན་བརྡྷནྟུ།། །། ༈

[edit]

'chi med rang gzungs kyi sgom bzlas snying por dril ba tshe srog rdo rjer bsgrub pa'i bcud len/ @#/_/'chi med rang gzungs kyi sgom bzlas snying por dril ba tshe srog rdo rjer bsgrub pa'i bcud len zhes bya ba bzhugs so/__/oM swa sti sid+d+haM/__rmad du byung ba'i slob dpon chen po zhi ba lhas byang chub sems dpa'i bslab pa kun las btus par/__'jigs pa thams cad las srung ba'i phyir rig sngags 'chang gi sde snod las byung ba'i tshe rabs mtha' yas pa dran par 'gyur ba'i rgyu mthu che ba'i yi ge lnga bcu rtsa bdun po 'di la yang sbyar bar bya'o/__/zhes lus srung ba'i rig sngags thams cad kyi mchog tu gsungs shing /__gzhan du sgra mi snyan pa'i 'chi med kyi rang gzungs zhes yongs su grags pa'i gdams pa zab mo 'di la ring brgyud dang /__nye brgyud kyi bka' srol tha dad pa dang /__snga ma la'ang lo rgyus dang /__sngags dang /__dmigs pa'i khyad par cung zad mi 'dra ba mang du 'byung ba las/__'dir re zhig rang gi bla ma las thob pa'i nyams len phyogs gcig pa dag mdor bsdus su bya ba'i tshul la'ang gnyis te/__dang po tshe sgrub gtso bor byed na/__tho rangs bya khwa ta'i skad ma bsgrags pa'i dus su bde ba'i stan la bsam gtan gyi spyod lam dang ldan pas 'khod do/__/skyabs sems tshad med bzhi bsgom pa rnams spyir ltar sngon du 'gro bas/__oM swa b+hA ba shud+d+haHsarba d+harmAHswa b+hA ba shud+d+ho\u0f85haM/__stong pa'i ngang las lcags kyi pad+ma 'dab ma brgyad pa'i steng du/__rang nyid skad cig gis mgon po tshe dpag tu med pa sku mdog dmar po zhal gcig phyag gnyis mnyam gzhag gi steng na 'chi med bdud rtsis gang ba'i tshe'i bum pa bsnams pa/__dar dang rin po che'i rgyan thams cad kyis brgyan cing 'od zer sna tshogs pa'i rgyab yol can/__zhabs rdo rje'i skyil mo krung gis bzhugs pa/__snang la rang bzhin med pa'i sku can du gsal ba'i spyi bor pad zla'i gdan la rang 'dra ba'i tshe dpag med mtshan dpe'i gzi byin gyi dpal mchog tu 'bar ba/__rang gi spyi bo nas gsang gnas kyi bar la lcags kyi srog rtsa mda' smyug tsam pa skya khrol pa gcig gi nang na srog rlung dmar ljang khyug ge bas gang ba'i phyi rol gyi phyogs bzhir gzungs sngags rnams bdud rtsi'i zil pa phram mer gnas pa'i dbus su rang sems kyi ngo bo hU~M mthing ga 'od zer 'bar ba/__spyi bo'i tshe dpag med la gus 'dud dung ba zhig byas pas thugs ka nas 'od zer phyogs bcur 'phros/__rang gi bla tshe chad nyams yar ba dang 'byung ba bzhi'i dwangs bcud/__'jig rten dang 'jig rten las 'das pa'i tshe bsod dpal 'byor ye shes yon tan thams cad bsdus nas phyag gi bum pa'i nang du zhugs/__zhu zhing lud pa'i bdud rtsi'i rgyun spyi bo tshangs pa'i bu ga nas mar byung /__lus thams cad dang khyad par dbu ma'i nang thams cad gang bas dus ma yin pa'i 'chi ba'i 'jigs pa sbyangs/__'chi med tshe'i dngos grub thob par gyur/__ces brjod cing bsams la/__na mo bud+d+hA ya/__na mo d+harmA ya/__na maHsang+g+hA ya/__tad+ya thA/__iT+Te/__baT+Te/__naT+Te/__ku naT+Te/__Tak+ke/__Thak+ke/__Tha rak+ke/__u ru ma ti/__ru ru ma ti/__ru ru hil+li mil+li/__sab+ba dz+nyA/__du pa da g+ga/__na maHsab+ba/__sam+ma sa mudz+dz+hA ni/__sidz+dz+hAn+tu me man+tA pA dAHswA hA/__'di'i iT+Te man yi ge lnga bcu rtsa bdun yod/__zhes brgya rtsa la sogs pa ci tsam nus pa tshig gzhan gyis bar mchod par bzlas pa'i mthar/__/dge ba 'di yis myur du bdag__/'chi med rig 'dzin 'grub gyur nas/__/zhes sogs bsngo smon shis brjod bya'o/__/gnyis pa srung ba gtso bor byed na/__srod 'khor gyi dus skyabs sems tshad med bzhi bsgom pa sngon du 'gro bas/__rang tha mal du gnas pa'i snying gar pad+ma dkar po 'dab ma bzhi pa'i lte bar sems nyid kyi ngo bo hU~M mthing ga las 'od zer 'phros/__'phags pa mchod/__sems can gyi don byas/__lha mi'i rig 'dzin rnams kyi tshe dang bsod nams/__sangs rgyas dang byang chub sems dpa' rnams kyi thugs rje'i byin rlabs nus mthu sogs srid zhi'i dwangs bcud thams cad spyan drangs nas hU~M la thim/__de yongs su gyur pa las/__rang lus skad cig gis gnam lcags kyi rdo rje rtse lnga pa gyen du langs pa las ye shes kyi me 'bar bas mi mthun pa'i phyogs thams cad sreg par byed pa'i lte ba sbubs stong gi dbus su rang sems nyi ma la gnas pa'i hU~M yig mthing ga dri ma med pa'i 'od zer kha dog sna tshogs pa 'phro ba'i mthar sngags kyi phreng ba dkar po g.yas skor du 'khod pa las 'od zer 'phros/__rtsa brgyud kyi bla ma yi dam dpa' bo mkha' 'gro chos skyong srung ma dang bcas pa'i byin rlabs nus mthu gzi brjid thams cad dang /__khams gsum gyi sems can rnams kyi tshe dpal bsod nams/__bkrag dang gzi mdangs/__'byung ba bzhi'i dwangs bcud/__nyi ma dang zla ba'i gzi brjid dang bcas pa 'od zer gyi sna la spyan drangs te rdo rje'i lte ba'i sa bon dang sngags phreng la thim pas/__rang gi dus ma yin pa'i 'chi ba'i 'jigs pa thams cad sbyangs/__gzi brjid dang nus stobs phun sum tshogs pa dang ldan pa'i 'chi med tshe'i rig 'dzin 'grub par gyur/__ces dmigs la sngags kyi phreng bar yid rtse gcig tu gtad de ci nus bzlas mthar bsngo smon sogs bya'o/__/rim pa gnyis po 'di dag kyang tshe sgrub dang srung ba'i dmigs pa gtso che ba tsam gyi sgo nas de ltar smos pa las/__don du gnyis ka'ang tshe sgrub kyi mchog yin pas rang gang mos shig shin tu gsang ba'i sgo nas chags med du nyams su blangs pa kho nas don 'grub cing /__dus kyi nges pa'ang dmigs bsal ma byung na nyi ma nub kha ma gtogs nam nyams su blang yang rung bar gsungs so/__/yang 'di'i sgo nas 'chi ltas sogs zlog pa'i slad du bsnyen pa dmigs bsal btang bar 'dod na/__zla ba gang yang rung ba'i yar ngo'i tshes gcig nas brtsams te zhag bdun du mtshams shin tu dam par bcad la gong gi dmigs pa gnyis rang gang mos sam/__gnyis ka nyams su len na/__snga dro'i thun la tshe sgrub dang /__phyi thun la srung ba gtso bor byas te smra ba gzhan spangs la thun bzhi sogs kyi rim pas sgom bzlas rtse gcig tu 'bad pa na/__thog mar rmi lam ngan pa dang /__cho 'phrul cher 'gro ba byung na bar chad kyi slong yin pas ma 'jigs par bya/__de nas rmi ltas je bzang du 'gro ste/__nyi ma shar ba dang /__nam langs pa dang /__me tog 'thu ba dang /__gru dang gzings las brgal ba dang /__nam mkha' la 'phur ba dang /__ri mthon por phyin pa dang /__mkhar gyi rtse dang /__mchod rten gyi rtse la 'dug pa dang /__skas dang lcags thag la 'dzegs pa dang /__gyen la phyin pa sogs dge ba'i mtshan ma rmi na dngos grub thob pa'i ltas su shes par bya'o/__/de lta bu'i rgyun dang dus kyi nyams len la brtson pas lus kyi shed skye zhing khams bde/__rig pa dwangs shing dge sbyor 'phel/__mdangs dang gzi brjid che ba sogs yon tan bsam gyis mi khyab cing /__mi mthun pa'i phyogs thams cad srung zhing zhi ba dang /__phyir zlog pa'i mchog tu 'gyur/__khyad par dus ma yin pa'i 'chi ba'i 'jigs pa mtha' dag zhi zhing 'chi med tshe'i rig 'dzin 'grub par 'gyur ba ni nges pa'o/__/zhes pa'ang bya bral ba 'jam dbyangs mkhyen brtse'i dbang pos gcig tu gzhan la phan par 'dod pa'i bsam pa kho nas bla ma las thos pa dang /__yig rnying gsal byed dang bcas pa'i dgongs bcud snying por dril te sbyar ba 'dis kyang 'gro kun 'chi med grub pa'i rig 'dzin gyi go 'phang la 'dod rgur rtsen pa'i rgyur gyur cig__/A yur+dz+nyA na bar+d+han+tu//___//__!_