PJCW-KABUM-02-KHA-041

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	dpal sprul bka' 'bum Volume 2, Text 41, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre

Tibetan Text

[edit]

༄༅། །བྱང་ཆུབ་སེམས་དཔའི་བསླབ་བྱ་བསྡུས་པ་བཞུགས་སོ། །

བྱང་ཆུབ་སེམས་དཔའི་བསླབ་བྱ་མདོར་བསྡུས་བཞུགས། ཨོཾ། ཡང་དག་པའི་བཤེས་གཉེན་ཐམས་ཅད་དང་རྗེ་བཙུན་འཇམ་དཔལ་དབྱངས་ལ་ཕྱག་འཚལ་ལོ། །འདིར་རྒྱལ་བའི་སྲས་པོ་རྣམས་ཀྱི་བསླབ་བྱའི་ལག་ལེན་ལ་སྤྱིར། སྤྱོད་འཇུག་ལས། རྒྱལ་སྲས་རྣམས་ཀྱིས་མི་སློབ་པའི། ། དངོས་དེ་གང་ཡང་ཡོད་མ་ཡིན། །དེ་ལྟར་གནས་པའི་མཁས་པ་ལ། །བསོད་ནམས་མི་འགྱུར་གང་ཡང་མེད། །ཅེས་པ་ལྟར། བྱང་ཆུབ་སེམས་དཔའ་ཆེན་པོ་རྣམས་ཀྱི་མཛད་སྤྱོད་ལ་མུ་དང་མཐའ་དང་། ཚད་གཟུང་དུ་མེད་ཅིང་། རྣམ་པར་ཐར་བ་མཐའ་ཡས་པའི་བདག་ཉིད་ཅན་ལགས་ན་ཡང་། འདིར་བརྒྱུད་པའི་མན་ངག་དང་བླ་མ་རྣམས་ཀྱི་ཞལ་ནས་ཐོས་པ་བཞིན་སོ་སྐྱེས་བྱང་ཆུབ་ཏུ་སྨོན་ལམ་བཏབ་ཅིང་། འཇུག་པའི་སྤྱོད་པ་ལ་སློབ་པར་འདོད་ པ་རྣམས་ཀྱི་ཉམས་ལེན་གྱི་འགགས་མདོར་བསྡུས་པ་ནི་རྣམ་པ་གསུམ་སྟེ། ཉེས་སྤྱོད་སྡོམ་པའི་ཚུལ་ཁྲིམས་དང་། དགེ་བ་ཆོས་སྡུད་ཀྱི་ཚུལ་ཁྲིམས་དང་། སེམས་ཅན་དོན་བྱེད་ཀྱི་ ཚུལ་ཁྲིམས་སོ། །དང་པོ་ཉེས་སྤྱོད་སྡོམ་པའི་ཚུལ་ཁྲིམས་ནི། རྩ་བ་དང་ཡན་ལག་གི་ལྟུང་ བ་རྣམས་སྤང་བར་བྱ་བ་འདི་ལ་རྒྱལ་སྲས་ཞི་བ་ལྷའི་རྗེས་སུ་འབྲང་བ་རྩ་བའི་ལྟུང་བ་བཅོ་བརྒྱད་སྤོང་དགོས་ཏེ། སྐུ་གཟུགས་དང་མཆོད་རྟེན་ལ་སོགས་པའི་ཡོ་བྱད་དང་མཆོད་རྫས་ནི་སངས་རྒྱས་ཀྱི་དཀོར། གླེགས་བམ་དང་ཡི་གེའི་ཡོ་བྱད་མཆོད་རྫས་སོགས་དང་ཆོས་འཆད་པ་པོའི་ཡོ་བྱད་སོགས་ཆོས་ཀྱི་དཀོར། དགེ་སློང་། དགེ་ཚུལ། དགེ་བསྙེན་སོགས་བཞི་ཡན་ཆད་དུ་ཐུན་མོང་ལ་དབང་བའི་ཡོ་བྱད་དང་འབུལ་བ་སོགས་དགེ་འདུན་གྱི་དཀོར་ཡིན། དཀོན་མཆོག་གསུམ་གྱི་དཀོར་ལས་དངོས་པོ་ཕྲ་མོ་ཁབ་ཙམ་ཡན་ཆད་མ་བྱིན་པར་བླང་ན་དཀོན་མཆོག་གི་དཀོར་འཕྲོག་པ་ཞེས་བྱ་བ་རྩ་ལྟུང་དང་པོ་ཡིན། རྒྱལ་བའི་བཀའ་ཡང་དག་པའི་མདོ་སོགས་ལ་འདི་རྒྱལ་བའི་བཀའ་མ་ཡིན་ཞེས་སྐུར་བ་བཏབ་ན་ཆོས་སྤོང་བའི་ལས་ཞེས་བྱ་བ་རྩ་ལྟུང་གཉིས་པའོ། །རབ་ཏུ་བྱུང་བ་ཚུལ་ཁྲིམས་དང་ལྡན་པའམ་ཚུལ་ཁྲིམས་འཆལ་བ་ཡང་འདྲ་སྟེ། དེ་ལ་ཆད་པས་གཅོད་པ་དང་བརྩོན་རར་འཇུག་པ་དང་། ངུར་སྨིག་ གི་ན་བཟའ་འཕྲོག་པ་དང་། ཁྱིམ་སར་འབེབས་པ་སོགས་བྱེད་ན་རྩ་ལྟུང་གསུམ་པའོ། ། མཚམས་མེད་ལྔའི་ལས་གང་བྱས་ཀྱང་རྩ་ལྟུང་བཞི་པ། ལས་རྒྱུ་འབྲས་མི་བདེན་སྙམ་པའི་ལོག་ལྟ་སྐྱེས་ན་རྩ་ལྟུང་ལྔ་པའོ། །གྲོང་ལ་སོགས་པའི་གནས་བཤིག་པར་བྱེད་པ་རྩ་ལྟུང་དྲུག་པ་དང་། དང་པོ་ལས་རྒྱུ་འབྲས་དང་སེམས་བསྐྱེད་སོགས་ཀྱིས་བློ་སྦྱང་མ་བྱས་པ་ལ་སྟོང་པ་ཉིད་ཀྱི་དོན་སྟོན་ན་རྩ་ལྟུང་བདུན་པ། རྫོགས་པའི་བྱང་ཆུབ་ཏུ་སེམས་བསྐྱེད་པ་སྤང་ཏུ་བཅུག་ནས་ཐེག་དམན་ཉན་རང་གི་ལམ་ལ་སློབ་ཏུ་བཅུག་ན་རྩ་ལྟུང་བརྒྱད་པ། སོ་ཐར་ལ་དགའ་པའི་རིགས་ཅན་ལ་སོ་ཐར་སྤང་དུ་བཅུག་ན་རྩ་ལྟུང་དགུ་པ་ཡིན། ཉན་རང་གི་ཐེག་པ་ལ་འདོད་ཆགས་སོགས་ཉོན་མོངས་པ་རྣམས་རྩ་བ་ནས་སྤོང་བའི་ནུས་པ་མེད་པར་རང་གིས་འཛིན་ཞིང་། གཞན་ལའང་དེ་ལྟར་སྟོན་ན་རྩ་ལྟུང་བཅུ་པའོ། །ཕྲག་དོག་གི་དབང་གིས་བདག་ལ་བསྟོད་པའམ་གཞན་ལ་སྨོད་ན་རྩ་ལྟུང་བཅུ་གཅིག་པའོ། །རྙེད་པ་དང་བཀུར་སྟིའི་ཕྱིར་དུ་རང་གི་སྟོང་ཉིད་ཀྱི་དོན་མ་རྟོགས་ཀྱང་། ངས་སྟོང་ཉིད་རྟོགས་སོ་ཞེས་མི་ཆོས་བླ་མའི་རྫུན་སྨྲ་ན་རྩ་ལྟུང་བཅུ་གཉིས་པའོ། །དགེ་སློང་གཞན་ལ་ཆད་པ་གཅོད་དུ་འཇུག་པ་དང་། དེ་བསྡིག་ནས་དེ་ལས་ལྐོག་ཟན་སོགས་ལེན་ན་རྩ་ལྟུང་བཅུ་གསུམ་པའོ། །དགེ་སློང་བསམ་གཏན་སྒོམ་པ་ལ་བསམ་གཏན་ལ་གནོད་པའི་ལས་བྱེད་པ་དང་། དེའི་རྙེད་པ་སོགས་ཕྱོགས་གཞན་དུ་སྒྱུར་ན་རྩ་ལྟུང་བཅུ་བཞི་པའོ། །གཞན་དོན་དུ་རྫོགས་པའི་བྱང་ཆུབ་ཀྱི་གོ་འཕང་ཐོབ་འདོད་ཀྱི་བློ་དེ་སྨོན་སེམས་ཡིན་པས་དེ་བཏང་ན་རྩ་ལྟུང་བཅོ་ལྔ་པའོ། །འདོད་ཆགས་དང་སེར་སྣའི་ཀུན་སློང་གིས་ཆོས་དང་ནོར་སློང་བ་ལ་མི་སྦྱིན་ན་རྩ་ལྟུང་བཅུ་དྲུག་པའོ། །རང་དང་འཁོན་ཡོད་པའི་གང་ཟག་གཞན་གྱིས་ཚུར་ཚིག་གིས་བཅོས་ནས་བཤགས་པ་བྱེད་ཀྱང་ད་དུང་དེ་ལ་ཁྲོ་བ་མི་འདོར་བ་དང་གཞན་ལ་ཁྲོས་པས་བརྡུང་བརྡེག་བྱེད་ན་རྩ་ལྟུང་བཅུ་བདུན་པའོ། །གཏི་མུག་གི་ཀུན་སློང་གིས་ཆོས་མ་ཡིན་པ་ཆོས་ལྟར་དུ་བཅོས་ནས་སྟོན་ན་རྩ་ལྟུང་བཅོ་བརྒྱད་པ་ཡིན་ནོ། །ཡན་ལག་གི་ཉེས་བྱས་བརྒྱད་ཅུ་ཡོད་ཀྱང་མདོར་བསྡུ་ན་རང་བཞིན་གྱི་ཕན་པ་དེ་སྒྲུབ་པའི་ཐབས་གང་ཡིན་ཐམས་ཅད་ལྷུར་ལེན་པ་ལ་མ་འདུས་པ་མེད་དོ། །དོན་གཉིས་པ་དགེ་བ་ཆོས་སྡུད་ཀྱི་ཚུལ་ཁྲིམས་ལ་སྨོན་པ་བྱང་ཆུབ་སེམས་ཀྱི་བསླབ་ བྱ་དང་། འཇུག་པ་བྱང་ཆུབ་སེམས་ཀྱི་བསླབ་བྱ་གཉིས། དང་པོ་ལ་ལྔ་ལས། དང་པོ་སྨོན་སེམས་མི་འཆོར་བའི་ཐབས་སུ་སེམས་ཅན་བློས་མི་གཏོང་བ་ནི་སེམས་ཅན་སུ་ཡང་རུང་བས་རང་གི་སེམས་སུན་ཕྱུང་བ་ལ་བརྟེན་ནས་ད་ཕྱིན་ཆད་ངས་འདི་ལ་གནོད་པ་སེལ་ནུས་པའི་དུས་བྱུང་ཀྱང་མི་སེལ། ཕན་ཐོག་པའི་དུས་བྱུང་ཀྱང་ཕན་མི་འདོགས་སྙམ་དུ་སེམས་ཅན་གཅིག་བློས་བཏང་ན་སེམས་ཅན་ཐམས་ཅད་བློས་བཏང་པ་དང་འདྲ་བས་དེ་སྤང་ནས་སེམས་ཅན་ཐམས་ཅད་སྙིང་རྗེ་ཆེན་པོའི་བློས་བཟུང་སྟེ་དངོས་སུ་ཕན་ཅི་ཐོགས་སུ་གདག །ནམ་ཡང་ཕན་འདོགས་པའི་སྨོན་ལམ་འདེབས་པ་སོགས་བྱའོ། །གཉིས་པ་སྨོན་སེམས་མི་ཉམས་པའི་ཐབས་སུ་བྱང་ཆུབ་སེམས་ཀྱི་ཕན་ཡོན་དྲན་པ་ནི། བྱང་ཆུབ་ཀྱི་སེམས་ནི་རྒྱལ་བ་སྲས་བཅས་ཀྱི་གཤེགས་ཤུལ། ཕན་བདེ་ཐམས་ཅད་ཀྱི་འབྱུང་གནས་ཡིན་པས། བྱང་ཆུབ་སེམས་ཀྱི་ཕན་ཡོན་ཚད་མེད་པའི་ཚུལ་ལ་སངས་རྒྱས་ཕལ་པོ་ཆེར། བྱང་ཆུབ་སེམས་དཔའ་ནོར་བཟང་གིས་དགེ་བའི་བཤེས་གཉེན་བརྟེན་པའི་ལེའུ་ལས་བྱང་ཆུབ་སེམས་དཔའ་བྱམས་པས་དཔེ་ཉིས་བརྒྱ་དང་སུམ་ཅུས་བསྟན་པ་དང་། སྤྱོད་འཇུག་ལེའུ་དང་པོ་དང་། གཞན་ཡང་བཀའ་དང་བསྟན་བཅོས་དུ་མ་ནས་བྱང་ཆུབ་སེམས་ཀྱི་ཕན་ཡོན་བསྟན་པ་རྣམས་ལ་བལྟ་ཞིང་བློ་ལ་ངེས་པར་བྱས་ནས་རྒྱུན་དུ་དྲན་པ་དང་། བསྡུ་ན། ངན་འགྲོ་རྣམས་ནི་བཟློག་བགྱིད་ ཅིང་། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བགྱིད་པའི། །བྱང་ཆུབ་སེམས་ལ་ཕྱག་འཚལ་ལོ། །ཞེས་པ་ཙམ་ནམ་དྲན་དྲན་དུ་འདོན་ཞིང་དེའི་དོན་བསམ་མོ། ། གསུམ་པ་བྱང་ཆུབ་སེམས་ཀྱི་སྟོབས་བསྐྱེད་པའི་ཆེད་དུ་ཚོགས་བསགས་པ་ནི། བྱང་ཆུབ་ཀྱི་སེམས་ཀྱིས་ཟིན་པའི་སྒོ་ནས་སྦྱིན་སོགས་བསོད་ནམས་ཀྱི་ཚོགས་དང་། འཁོར་གསུམ་རྣམ་པར་མི་རྟོག་པ་ཤེས་རབ་ཀྱི་ཚོགས་སྟེ་ཚོགས་གཉིས་ཟུང་འབྲེལ་དུ་བསླབ་པ་ལ་འབད་ཅིང་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པས་ཟིན་ན་ཚོགས་ཆེན་པོ་བསག་པ་ལ་དངོས་པོ་རྒྱ་ཆེན་པོ་དང་བརྩོན་འགྲུས་ཡུན་རིང་བ་མི་དགོས་པར། སྐད་ཅིག་རེ་རེས་ཀྱང་བསྐལ་པ་མང་པོའི་ཚོགས་རྫོགས་པའི་ཚུལ་རྣམས་ཀྱང་ཤེས་པར་བྱའོ། །བཞི་པ་བྱང་ཆུབ་ཀྱི་སེམས་གོང་ནས་གོང་དུ་འཕེལ་བའི་ཆེད་དུ་སེམས་སྦྱང་བར་བརྩོན་པ་ལ་གསུམ། བྱང་ཆུབ་སེམས་ཀྱི་རྒྱུ་ལ་སྦྱང་བ་བྱམས་སྙིང་རྗེ་སྒོམ་པ་ནི། དང་པོ་སེམས་ཅན་བདེ་བ་དང་མི་ལྡན་པ་ཞིག་དངོས་སུ་མཐོང་བའམ་བློ་ཡུལ་དུ་བླངས་ཏེ། དེ་ལ་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་སྙམ་པའི་བློ་དྭངས་དྭངས་པ་ཡང་དང་ཡང་དུ་བསྐྱེད་ཅིང་དེ་ལ་སེམས་རྩེ་གཅིག་ ཏུ་འཛིན་པ་ནི་བྱམས་པ། སེམས་ཅན་སྡུག་བསྔལ་གྱིས་ཉམས་ཐག་པ་ཞིག་དངོས་སུ་མཐོང་བའམ་བློ་ཡུལ་དུ་བླངས་ནས་དེ་ལ་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག་སྙམ་དུ་སྔར་ལྟར་སྒོམ་པ་སྙིང་རྗེ་ཡིན་ལ། འདི་གཉིས་ཀ་ཡང་དང་པོ་རང་གི་མ་ལྟ་བུ་གང་ལ་སྒོམ་སླ་བ་ལ་བསྒོམས་ནས། རིམ་གྱིས་རང་གི་དགྲའི་བར་དུ་བསྒོམ། མཐར་ནམ་མཁའི་མཐའ་ཁྱབ་ཀྱི་སེམས་ཅན་ཐམས་ཅད་ལ་བསྒོམ་ཞིང་མཇུག་བསྔོ་བ་བྱ་བ་ནི་ཕན་ཡོན་ཚད་མེད་ཅིང་བྱང་ཆུབ་ཀྱི་སེམས་རྒྱུད་ལ་སྐྱེ་བའི་རྒྱུ་ཡིན་ནོ། །གཉིས་པ་སེམས་དངོས་ལ་སྦྱང་བ་ནི། ཉིན་ལན་གསུམ། མཚན་ལན་གསུམ། དུ་ཡན་ལག་བདུན་པ་སྔོན་དུ་འགྲོ་བས་བྱང་ཆུབ་སྙིང་པོར་མཆིས་ཀྱི་བར་སོགས་སྐྱབས་འགྲོ་དང་། ཇི་ལྟར་སྔོན་གྱི་སོགས་བྱང་སྡོམ་ ལེན་ཆོག་གིས་སྡོམ་པ་ཡང་དང་ཡང་དུ་བླང་ཞིང་རང་གཞན་དགའ་བ་སྒོམ་པ་སོགས་བྱའོ། ། གསུམ་པ་བྱང་ཆུབ་སེམས་ཀྱི་བསླབ་བྱ་ལ་སྦྱང་བ་ནི་བདག་གཞན་མཉམ་པ། བརྗེ་བ། བདག་པས་གཞན་གཅེས་པ་བསྒོམ་པ་རྣམས་ལ་བློ་སྦྱོང་། ལྔ་པ་ཚེ་རབས་ཐམས་ཅད་དུ་ བྱང་ཆུབ་ཀྱི་སེམས་མི་བརྗེད་པའི་ཐབས་སུ་དཀར་ནག་གི་ཆོས་བརྒྱད་ལ་བླང་དོར་བྱ་བ་ནི་དཀར་པོའི་ཆོས་བཞི་ཉམས་སུ་བླང་ཞིང་ནག་པོའི་ཆོས་བཞི་སྤང་བར་བྱ་བ་ལས་སྤང་བྱ་ནག་པོའི་ཆོས་བཞི་ནི། བླ་མ་སོགས་མཆོད་པར་འོས་ལ་རྫུན་གྱིས་བསླུ་བ་དང་། འགྱོད་པའི་གནས་མ་ཡིན་པ་བྱང་ཆུབ་ཏུ་སེམས་བསྐྱེད་པ་ལ་འགྱོད་པ་བསྐྱེད་པ་དང་། དམ་པ་བྱང་ཆུབ་སེམས་དཔའ་རྣམས་ལ་སྐུར་པ་འདེབས་པ་དང་། འགྲོ་བ་གཞན་ལ་གཡོ་དང་སྒྱུས་སྤྱོད་པའོ། ། བླང་བྱ་དཀར་པོའི་ཆོས་བཞི་ནི། སྲོག་ལ་བབས་ཀྱང་ཤེས་བཞིན་དུ་རྫུན་མི་སྨྲ་བ་དང་། དུས་རྟག་ཏུ་བྱང་ཆུབ་སེམས་ཀྱི་ཕན་ཡོན་དང་བསྔགས་པ་བརྗོད་ཅིང་སེམས་ཅན་རྣམས་ཐེག་པ་ཆེན་པོ་ལ་འགོད་པ་དང་། རྒྱལ་སྲས་བྱང་ཆུབ་སེམས་དཔའ་རྣམས་ལ་སྟོན་པ་རྫོགས་པའི་སངས་རྒྱས་དངོས་དང་འདྲ་བར་གུས་ཤིང་ཡོན་ཏན་གྱི་བསྔགས་པ་བརྗོད་པ་དང་། སེམས་ཅན་ཐམས་ཅད་ལ་གཡོ་སྒྱུ་མེད་པར་ལྷག་པའི་བསམ་པས་གནས་པའོ། །འཇུག་པའི་བསླབ་བྱ་ཕ་རོལ་ཏུ་ཕྱིན་པ་དྲུག་ལ་སྤྱོད་པ་ནི། ནོར་དང་ཆོས་དང་མི་འཇིགས་པའི་སྦྱིན་པ་གསུམ་གཏོང་བ་ནི་སྦྱིན་པའི་ཕ་རོལ་ཏུ་ཕྱིན་པ། ཚུལ་ཁྲིམས་རྣམ་པ་གསུམ་བསྲུང་བ་ནི་ཚུལ་ཁྲིམས་ཀྱི་ཕར་ཕྱིན། སྡུག་བསྔལ་ཁོང་ཁྲོ་ཟབ་མོ་གསུམ་བཟོད་པ་ནི་བཟོད་པའི་ཕར་ཕྱིན། གོ་ཆ་སྦྱོར་བ་ཆོག་པར་མི་འཛིན་པའི་བརྩོན་འགྲུས་གསུམ་རྩོམ་པ་ནི་བརྩོན་འགྲུས་ཀྱི་ཕར་ཕྱིན། བྱིས་པ་ཉེར་སྤྱོད། དོན་རབ་འབྱེད་པ། དེ་བཞིན་གཤེགས་དགའི་བསམ་གཏན་གསུམ་སྒོམ་པ་ནི་བསམ་གཏན་གྱི་ཕར་ཕྱིན། ཐོས་བསམ་བསྒོམ་པའི་ཤེས་རབ་གསུམ་ལ་བསླབ་པ་ནི་ཤེས་རབ་ཀྱི་ཕར་ཕྱིན་ཏེ། དེ་དག་ཀྱང་རྩ་བ་སེམས་གཙོ་ཆེ་བས། སེམས་ཐོག་ནས་སྦྱོང་པ་ལ་འབད་དགོས། དང་པོ་སྦྱིན་པའི་ཕ་རོལ་ཏུ་ཕྱིན་པ་ནི་རང་གི་ཡོ་བྱད་ཐམས་ཅད་སེམས་ཅན་ལ་སྦྱིན་འདོད་ཀྱི་གཏོང་སེམས་ལ་འདུས་ཏེ་དེ་ལྟ་བུའི་གཏོང་སེམས་ཡོད་ན་སྦྱིན་པའི་ཕར་ཕྱིན་ཡིན་གྱི། སེམས་ཅན་ཐམས་ཅད་ཀྱི་དབུལ་བ་བོར་བ་མི་དགོས་ཏེ། སྤྱོད་འཇུག་ལས། གལ་ཏེ་འགྲོ་བ་དབུལ་བོར་བས། །སྦྱིན་པའི་ཕ་རོལ་ཕྱིན་ཡིན་ན། །ད་དུང་འགྲོ་བཀྲེན་ཡོད་ན་སྔོན། །སྐྱོབ་པ་ཇི་ལྟར་ཕ་རོལ་ཕྱིན། །བདོག་པ་ཐམས་ཅད་འབྲས་བཅས་ཏེ། །སྐྱེ་བོ་ཀུན་ལ་གཏོང་སེམས་ཀྱིས། །སྦྱིན་པའི་ཕ་རོལ་ཕྱིན་གསུངས་ཏེ། །དེ་ལྟས་དེ་ནི་སེམས་ཉིད་དོ། །ཞེས་སོ། །ཚུལ་ཁྲིམས་ཀྱང་རང་གི་སྤོང་བའི་སེམས་ཐོབ་པ་དེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡིན་ཏེ། དཔེར་ན། རང་གི་ངོས་ནས་སེམས་ཅན་གྱི་སྲོག་མི་གཅོད་སྙམ་པའི་སྤོང་སེམས་དེ་ཚུལ་ཁྲིམས་ཡིན་གྱིས། གསད་བྱའི་སེམས་ཅན་དེ་དག་ངེས་པར་སུས་ཀྱང་གསོད་པར་མི་འགྱུར་བའི་གནས་སྐབས་ཐོབ་པ་ནི་མི་དགོས་ཏེ། སྔ་མ་ལས། ཉ་ལ་སོགས་པ་གང་ཞིག་ཏུ། །དེ་དག་གསོད་མི་འགྱུར་བར་བསྐྲད། །སྤང་བའི་སེམས་ཉིད་ཐོབ་པ་ལས། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་སོ། །བཟོད་པ་ཡང་། རང་གི་སེམས་ཀྱི་ཁྲོ་བ་ཐུལ་ན་དེ་ལས་ལྷག་པ་མེད་དོ། །ཕྱི་རོལ་གྱི་སེམས་ཅན་མི་བསྲུན་པ་ནི། ནམ་མཁའ་ལྟར་ཚད་མེད་པས་དེ་དག་ཐམས་ཅད་གཞོམ་པར་ག་ལ་ལང་སྟེ། རང་གི་སེམས་ཁོ་ན་བཏུལ་བས་དགྲ་དེ་དག་ཐམས་ཅད་ཐུལ་བ། དཔེར་ན་རྐང་པ་ལ་ཚེར་མ་བསྲུང་བའི་དོན་དུ་ས་སྟེང་ཐམས་ཅད་ཀོ་བས་གཡོག་དགོས་ན་ཤིན་ཏུ་དཀའ་ཡང་། རང་གི་རྐང་མཐིལ་ཀོ་བས་གཡོག་པས་ས་སྟེང་ཐམས་ཅད་གཡོག་པ་དང་ཁྱད་མེད་ལྟ་བུ་སྟེ། སྤྱོད་འཇུག་ལས། སེམས་ཅན་མི་བསྲུན་ནམ་མཁའ་བཞིན། །དེ་དག་གཞོམ་གྱིས་ཡོངས་མི་ལང་། །ཁྲོ་བའི་སེམས་འདི་གཅིག་བཅོམ་ན། ། དགྲ་དེ་ཐམས་ཅད་ཆོམས་དང་འདྲ། །དེ་བཞིན་ཕྱི་རོལ་དངོས་པོ་ཡང་། །བདག་གིས་ཕྱིར་བཟློག་མི་ལང་གིས། །བདག་གི་སེམས་འདི་ཕྱིར་བཟློག་བྱའི། །གཞན་རྣམས་བཟློག་གོ་ཅི་ཞིག་དགོས། །ས་སྟེང་འདི་དག་ཀོས་གཡོག་ཏུ། །དེ་སྙེད་ཀོ་བས་ག་ལ་ལང་། །ལྷམ་མཐིལ་ཙམ་གྱི་ཀོ་བས་ནི། །ས་སྟེང་ཐམས་ཅད་གཡོགས་དང་འདྲ། །ཞེས་སོ། །བརྩོན་འགྲུས་ཀྱི་ཕར་ཕྱིན་ཡང་སེམས་དགེ་བའི་བརྩོན་འགྲུས་ཁོ་ན་གལ་ཆེ་སྟེ། ལུས་ངག་གི་བརྩོན་འགྲུས་ཡུན་རིང་དུ་འབད་ཀྱང་ཐོབ་མི་ནུས་པའི་ཚངས་པའི་གོ་འཕང་ལྟ་བུ་ཡང་བྱམས་པའི་སེམས་སྐད་ཅིག་མ་ཞིག་སྐྱེས་པས་འཐོབ་པ་ཡིན། དེ་ལས། སེམས་གསལ་གཅིག་བསྐྱེད་འབྲས་བུ་གང་། །ཚངས་ལ་སོགས་པ་ཡིན་པ་ལྟར། །ལུས་ངག་བཅས་པའི་འབྲས་བུ་ཡང་། །སྤྱོད་པ་ཞན་པས་དེ་ལྟ་མིན། །ཞེས་སོ། །བསམ་གཏན་གྱི་ཕར་ཕྱིན་ནི་ངེས་པར་སེམས་ཁོ་ན་ལ་བརྟེན་པར་ཡིན་པའི་ཕྱིར་སེམས་གཞན་དུ་མི་གཡེང་བ་ནི་བསམ་གཏན་གྱི་ངོ་བོ་ཡིན་ཏེ། སྔ་མ་ལས། བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྤྱད་བྱས་ཀྱང་། །སེམས་གཞན་གཡེངས་པས་བྱས་པ་ནི། །དེ་ཉིད་རིག་པས་དོན་མེད་གསུང་། །ཞེས་སོ། །ཤེས་རབ་ཀྱང་སེམས་ཀྱི་གསང་བ་སེམས་རང་བཞིན་གྱི་འོད་གསལ་བའི་གནད་མ་ཤེས་ན། ཆོས་མང་པོ་ཤེས་ཀྱང་མི་གྲོལ་ཏེ། དེ་ལས། གང་གིས་ཆོས་ཀྱི་གཙོ་བོ་མཆོག །སེམས་ཀྱི་གསང་འདི་མ་ཤེས་ན། །བདེ་ཐོབ་སྡུག་བསྔལ་གཞོམ་འདོད་ཀྱང་། །དེ་དག་དོན་མེད་གྱི་ནར་འཁྱམས། ། ཞེས་སོ། །དེས་ན་ཕ་རོལ་ཏུ་ཕྱིན་པ་ཐམས་ཅད་ལ་དེ་ལྟར་སྦྱང་བ་ནི་འཇུག་པའི་བསླབ་བྱ་ཡིན་ནོ། །གསུམ་པ་སེམས་ཅན་དོན་བྱེད་ཀྱི་ཚུལ་ཁྲིམས་ནི་བསྡུ་བའི་དངོས་པོ་བཞི་སྟེ། དང་པོ་སྦྱིན་པ་ནི་ཕར་ཕྱིན་དྲུག་གི་ནང་ཚན་གྱི་སྦྱིན་པ་དང་མཚུངས་ལ། ཕ་རོལ་ཏུ་ཕྱིན་པ་དྲུག་པོ་དེ་གཞན་ལ་སྟོན་པ་ནི་སྙན་སྨྲ། ཕྱིན་དྲུག་ཉམས་སུ་ལེན་དུ་འཇུག་པ་ནི་དོན་སྤྱོད། རང་ཉིད་ཀྱང་དེ་དང་རྗེས་སུ་མཐུན་པར་སྤྱོད་ཅིང་། དེ་ལ་ཕྱིན་དྲུག་སྒྲུབ་པའི་གྲོགས་བྱེད་པ་ནི་དོན་མཐུན་ཡིན་ཏེ། མདོ་སྡེ་རྒྱན་ལས། སྦྱིན་མཚུངས་དེ་སྟོན་ལེན་འཇུག་དང་། །བདག་ཉིད་རྗེས་སུ་འཇུག་རྣམས་ཀྱིས། །སྙན་པར་སྨྲ་དང་དོན་སྤྱོད་དང་། །དོན་མཐུན་ཉིད་དུ་འདོད་པ་ཡིན། ། ཞེས་སོ། །དེ་ལྟར་ཚུལ་ཁྲིམས་རྣམ་པ་གསུམ་པོ་དེ་ཡང་ཚོགས་ལམ་པས་ཉེས་སྤྱོད་སྡོམ་པ། སྦྱོར་ལམ་པས་དགེ་བ་ཆོས་སྡུད། མཐོང་ལམ་ཡན་ཆད་དུ་སེམས་ཅན་དོན་བྱེད་ཀྱི་ཚུལ་ཁྲིམས་ལ་གཙོ་བོར་བསླབ་དགོས་པ་ཡིན་ནོ། །དེ་ལྟ་བུའི་ཚུལ་ཁྲིམས་རྣམ་པ་གསུམ་པོ་དེ་ཉིད་སྲུང་བྱེད་ཀྱི་ཐབས་ནི། དྲན་པ་དང་། ཤེས་བཞིན་དང་། བག་ཡོད་པ་གསུམ་གྱིས་བསྲུང་དགོས་པ་ལས། དང་པོ་ནི་ཚུལ་ཁྲིམས་རྣམ་པ་གསུམ་དང་འབྲེལ་བའི་བྱང་ཆུབ་སེམས་དཔའི་ བསླབ་བྱའི་གནས་ཐམས་ཅད་དགེ་བའི་བཤེས་གཉེན་ལས་ཉན་པ་དང་མདོ་སྡེ་དག་ལ་བལྟ་བས་རང་གིས་ངོ་ཤེས་པར་བྱས་ནས་དེ་ཉིད་མི་བརྗེད་པར་བློ་ལ་དམ་དུ་འཛིན་ཅིང་། བསླབ་བྱའི་གནས་འདི་དང་འདི་ལྟ་བུ་ནི་བྱང་ཆུབ་སེམས་དཔའ་རྣམས་ཀྱིས་ཉམས་སུ་བླང་བར་བྱ་བ་ཡིན་པས་བདག་གིས་ཀྱང་ཉམས་སུ་བླང་དགོས་སོ་སྙམ་དུ་མི་བརྗེད་པར་བྱ་བ་ནི་དྲན་པ་ཡིན། གཉིས་པ་ནི། དུས་དང་གནས་སྐབས་ཐམས་ཅད་དུ་རང་གིས་རང་ལ་བརྟགས་ཤིང་། ལུས་ངག་ཡིད་གསུམ་གྱི་བྱ་བ་ཐམས་ཅད་ལ་ཤེས་བཞིན་སྔོན་དུ་བཏང་སྟེ། ད་ལྟ་ནི་ང་འདི་ལྟ་བུ་བསམ་མོ། །འདི་ལྟ་བུ་སྨྲའོ། །འདི་ལྟ་བུ་བྱེད་དོ་སྙམ་དུ་ཡང་ནས་ཡང་དུ་བརྟགས་ནས་རྒྱལ་བའི་སྲས་ཀྱི་བསླབ་བྱ་དང་འགལ་བའི་སྒོ་གསུམ་གྱི་བྱེད་སྤྱོད་ཐམས་ཅད་སྤང་ཤིང་། བསྒྲུབ་བྱ་ཐམས་ཅད་ཉམས་སུ་ལེན་དགོས་པ་ཡིན་ཏེ། སྤྱོད་འཇུག་ལས། ལུས་དང་སེམས་ཀྱི་གནས་སྐབས་ལ། །ཡང་དང་ཡང་དུ་བརྟག་བྱ་བ། །དེ་ཉིད་ཁོ་ན་མདོར་ན་ནི། །ཤེས་བཞིན་སྲུང་བའི་མཚན་ཉིད་དོ། །ཞེས་སོ། །གསུམ་པ་ནི་དེ་ལྟར་དྲན་ཤེས་དང་ལྡན་པས་དུས་རྟག་ཏུ་ཉེས་སྤྱོད་མི་དགེ་བའི་ཕྱོགས་ཐམས་ཅད་ལ་འཛེམས་པ་ལྷུར་ལེན་ཞིང་། རང་རྒྱུད་ཀྱི་ཉོན་མོངས་པའི་གཉེན་པོ་བརྟེན་ཏེ་སེམས་ཀྱི་རྣམ་རྟོག་སྐད་ཅིག་མ་ཡན་ཆད་དགེ་བའི་ལམ་དུ་བསྒྱུར་བ་ལ་འབད་དགོས་སོ། །དེས་ན་དྲན་ཤེས་བག་ཡོད་གསུམ་ནི་བསླབ་པ་ཐམས་ཅད་ཀྱི་མདོ་འགག་གལ་པོ་ཆེ་ཡིན་ཏེ། སྤྱོད་འཇུག་ལས། བདག་གི་རྙེད་དང་བཀུར་སྟི་དང་། ། ལུས་དང་འཚོ་བ་མེད་སླ་ཞིང་། །དགེ་བ་གཞན་ཡང་ཉམས་བླ་ཡིས། །སེམས་ནི་ནམ་ཡང་ཉམས་མི་བྱ། །སེམས་བསྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དང་། །ཐམས་ ཅད་འབད་པས་སྲུངས་ཤིག་ཅེས། །བདག་ནི་དེ་ལྟར་ཐལ་མོ་སྦྱོར། །ཞེས་དང་། བཤེས་སྤྲིང་ལས། བག་ཡོད་བདུད་རྩིའི་གནས་ཏེ་བག་མེད་པ། །འཆི་བའི་གནས་སུ་ཐུབ་པས་བཀའ་སྩལ་ཏེ། །དེ་བས་ཁྱོད་ཀྱིས་དགེ་ཆོས་སྤེལ་སླད་དུ། །གུས་པས་རྟག་ཏུ་བག་དང་ལྡན་པར་མཛོད། །ཅེས་སོ། །དེ་ལྟར་དྲན་ཤེས་བག་ཡོད་དང་ལྡན་པའི་སྒོ་ནས་བྱང་ཆུབ་སེམས་དཔའི་བསླབ་པ་ཐམས་ཅད་བསླབ་དགོས་ཀྱི། གཞན་དུ། རང་གིས་བླ་མ་དགེ་བའི་བཤེས་གཉེན་གྱི་དྲུང་དུ་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་དཔང་དུ་བཞག་ནས་བྱང་ཆུབ་ཏུ་སེམས་བསྐྱེད་པ་བླངས་ཏེ་བསླབ་བྱ་ལ་མི་སློབ་ན་ནི། རྒྱལ་བ་སྲས་བཅས་དེ་དག་ཀྱང་བསླུས་པར་གྱུར་ལ། ཁམས་གསུམ་གྱི་སེམས་ཅན་ཐམས་ཅད་ཀྱང་བསླུས་པར་གྱུར་པའི་ཉེས་པ་ཚད་མེད་པ་ཡོད་པས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་སྒྱིད་ལུག་དང་ཞུམ་པ་སྤངས་ནས་ཅི་ནུས་པ་ཐམས་ཅད་ཉམས་སུ་བླང་ཤིང་། མི་ནུས་པ་རྣམས་སྨོན་པའི་ཡུལ་ཏུ་བྱ་དགོས་པ་ཡིན་ནོ། །དེ་ལྟར་འབད་པ་དང་བརྩོན་པས་ཉམས་སུ་བླང་ཀྱང་། མི་ཤེས་པ་དང་། མ་གུས་པ་དང་། བག་མེད་པ་དང་། ཉོན་མོངས་པ་མང་བ་སྟེ། ལྟུང་བ་འབྱུང་བའི་རྒྱུ་བཞིའི་དབང་གིས་ཉེས་པ་བྱུང་ན་ཡང་དེ་མ་ཐག་བཤགས་པས་རྩིས་ཟིན་བྱ་དགོས་པ་ལས། དབང་པོ་རབ་རྣམས་ནི་ཀུན་རྫོབ་ཙམ་དུ་རྒྱལ་བ་སྲས་བཅས་ཀྱི་སྤྱན་སྔར། མཐོལ་བཤགས་ཀྱི་འདུན་པ་བྱེད་ཅིང་། ཉེས་ལྟུང་རང་བཞིན་མེད་པའི་དོན་ལ་མཉམ་པར་བཞག ། འབྲིང་རྣམས་ནི་རིགས་སྔགས་དང་གསང་སྔགས་ཀྱི་ལྷ་འཕགས་པ་ནམ་མཁའི་སྙིང་པོ་སོགས་

ལ་གསོལ་བ་བཏབ་སྟེ་ལྟུང་བ་ལས་ལྡང་། ཐ་མ་རྣམས་ནི་ཉེས་པ་གང་བྱུང་བྱང་ཆུབ་སེམས་དཔའི་ཚོགས་སུ་ཞུ་ཞིང་གཉེན་པོ་སྟོབས་བཞི་ཚངས་པའི་བཤགས་སྡོམ་ལ་འབད་པས་སོར་ཆུད་པར་གྱུར་རོ། །རྒྱལ་དང་རྒྱལ་སྲས་རྣམས་ཀྱི་གཤེགས་པའི་ཤུལ། །བྱང་ཆུབ་སེམས་དཔའི་སྤྱོད་པ་རྨད་བྱུང་བ། །སོ་སྐྱེས་དག་གིས་འདོམ་པར་སླ་མིན་ཡང་། །བླ་མས་གསུང་བཞིན་སྙིང་པོར་དྲིལ་ནས་བཀོད། །དགེ་བ་འདི་ཡིས་བདག་དང་འགྲོ་བ་ཀུན། །རྣམ་ཐར་རྒྱ་མཚོ་ཕ་མཐའ་མེད་གྱུར་པའི། །རྒྱལ་སྲས་སྤྱོད་པའི་འཇུག་ངོགས་ཡིད་འོང་འདི། །ཤེས་ནས་ཉམས་ལེན་སྟོན་པ་ཉིད་གྱུར་ཅིག །ཅེས་བྱང་ཆུབ་དམ་པའི་ལམ་བཟང་དོན་དུ་གཉེར་བ་འཆི་མེད་རྡོ་རྗེ་ནས་བྱང་ཆུབ་སེམས་དཔའ་དགེ་བའི་བཤེས་གཉེན་བཀྲ་ཤིས་དོན་འགྲུབ་ཀྱི་དྲུང་ནས་བྱང་ཆུབ་ཏུ་སེམས་བསྐྱེད་དེ་འདིར་བསླབ་བྱའི་གནས་དྲི་བ་ལ་ཆེད་དུ་འོང་བའི་ངོར་ཟབ་མོ་ལྟ་བ། རྒྱ་ཆེན་སྤྱོད་པ། ཟབ་ཅིང་རྒྱ་ཆེའི་རྒྱུད་པ་གསུམ་འདུས་ཀྱི་མན་ངག་གི་སྙིང་པོ་དྲིལ་ནས་བྱང་ཆུབ་ཏུ་སྨོན་ལམ་ཙམ་བཏབ་ཀྱང་འཇུག་སྤྱོད་རླབས་པོ་ཆེ་ལེ་ལོས་བཅོམ་པ་ཨ་བུ་ཧྲལ་པོས་བྲིས་པ་དགེའོ། །