JKW-KABUM-22-ZA-012-012

🚧 This website is under continued development. We appreciate your patience!

Previous Text Back to Volume PageNext Text

Wylie title	'od gsal rdo rje snying po'i shing rta pa chen po kun mkhyen gnyis pa'i zhabs la gsol ba 'debs pa rdo rje'i thol glu grub gnyis rna rgyan
Location	mkhyen brtse'i bka' 'bum Volume 22, sde tshan 12, Text 12, Pages 381-383 (Folios 19a4 to 20a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'od gsal rdo rje snying po'i shing rta pa chen po kun mkhyen gnyis pa'i zhabs la gsol ba 'debs pa rdo rje'i thol glu grub gnyis rna rgyan. In 'jam dbyangs mkhyen brtse'i dbang po'i bka' 'bum, Vol. 22: 381-383. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs  ·  Vajra Songs - rdo rje'i glu
Colophon	།ཞེས་པའང་གྲུབ་པ་མཆོག་གི་བསྟི་གནས་དཔལ་ལྡན་པདྨ་འོད་གླིང་ཐེག་མཆོག་གླིང་གི་དྲི་གཙང་ཁང་དུ་ཚོགས་ཀྱི་འཁོར་ལོའི་མཆོད་པ་འདུ་བགྱིས་པའི་རྗེས་ཐོག་ཏུ་སྨྲས་པའི་དྷྱནྟུ།།
	zhes pa'ang grub pa mchog gi bsti gnas dpal ldan pad+ma 'od gling theg mchog gling gi dri gtsang khang du tshogs kyi 'khor lo'i mchod pa 'du bgyis pa'i rjes thog tu smras pa'i d+h+yan+tu

1 Texts in this Section (sde tshan or chos tshan)

12 381-383	འོད་གསལ་རྡོ་རྗེ་སྙིང་པོའི་ཤིང་རྟ་པ་ཆེན་པོ་ཀུན་མཁྱེན་གཉིས་པའི་ཞབས་ལ་གསོལ་བ་འདེབས་པ་རྡོ་རྗེའི་ཐོལ་གླུ་གྲུབ་གཉིས་རྣ་རྒྱན་། 'od gsal rdo rje snying po'i shing rta pa chen po kun mkhyen gnyis pa'i zhabs la gsol ba 'debs pa rdo rje'i thol glu grub gnyis rna rgyan Supplications - gsol 'debs   ·   Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

འོད་གསལ་རྡོ་རྗེ་སྙིང་པོའི་ཤིང་རྟ་པ་ཆེན་པོ་ཀུན་མཁྱེན་གཉིས་པའི་ཞབས་ལ་གསོལ་བ་འདེབས་པ་རྡོ་རྗེའི་ཐོལ་གླུ་གྲུབ་གཉིས་རྣ་རྒྱན་ཅེས་བྱ་བ། ཨ་ཧོ། གཅིག་པུ་མ་ཡིན་འཁོར་འདས་བསྟན་གཡོ་ཀུན་ཁྱབ་ཅིང་། །དུ་མར་མི་གནས་བློ་བྲལ་རང་བྱུང་གི་གཤིས་ལུགས། །ཐིམ་ལ་མ་རྨུགས་ནང་གསལ་ཀ་དག་གི་བདག་ཉིད། །ངོ་བོ་ཆོས་སྐུ་ཁྱབ་བདག་ཀུན་མཁྱེན་གྱི་བླ་མར། །གཞི་གྲོལ་རིག་པའི་ངང་ནས་གསོལ་བ་ཞིག་འདེབས་སོ། །ཤིན་ཏུ་རྣམ་པར་གྲོལ་བའི་བདེ་སྟོང་གི་ཡེ་ཤེས། །ཟག་བྲལ་བཞིན་ལག་མཚན་དཔེའི་སྣང་ཆ་རུ་ཤར་བའི། །ཁ་སྦྱོར་ཡན་ལག་བདུན་ལྡན་ཕྱིར་གསལ་གྱི་རོལ་མོ། །རང་བཞིན་ལོངས་སྐུ་ཁྱབ་བདག་ཀུན་མཁྱེན་གྱི་བླ་མར། །ཟུང་འཇུག་དགའ་བཞིའི་ངང་ནས་གསོལ་བ་ཞིག་འདེབས་སོ། །འགྲོ་འོང་རྟོག་པའི་མཚན་མ་རང་གྲོལ་དུ་ཞིག་ཀྱང་། །གཞན་ཕན་སྙིང་རྗེ་ཆེན་པོའི་ཐབས་མཁས་ལ་སྦྱར་བས། །སྣ་ཚོགས་སྒྱུ་འཕྲུལ་དྲྭ་བའི་ཟློས་གར་ལ་རྩེན་པའི། །ཐུགས་རྗེ་སྤྲུལ་སྐུ་ཁྱབ་བདག་ཀུན་མཁྱེན་གྱི་བླ་མར། །མི་ཕྱེད་གུས་པའི་ངང་ནས་གསོལ་བ་ཞིག་འདེབས་སོ། །ཆོས་དང་ཆོས་ཅན་རོ་གཅིག་གདོད་མ་ཡི་དབྱིངས་སུ། །སྒྲིབ་གཉིས་གློ་བུར་རྟོག་པའི་འཇུག་ལྡང་ཀུན་ཟད་པས། །སྐུ་གསུམ་དབྱེར་མེད་མི་ཕྱེད་འོད་གསལ་གྱི་ཐིག་ལེ། །ངོ་བོ་ཉིད་སྐུ་ཁྱབ་བདག་ཀུན་མཁྱེན་གྱི་བླ་མར། །མངོན་སུམ་ལྷུག་པའི་ངང་ནས་གུས་ཕྱག་ཞིག་འཚལ་ལོ། །ཨ་ཧོ། སྐྱེ་གནས་རྣམ་བཞིའི་འདྲ་འབག་བསྐྱེད་རིམ་གྱི་ཐབས་མཁས། །གཡོ་ཐོབ་གོམས་བརྟན་མཐར་ཕྱིན་ཕ་རོལ་དུ་སོན་པས། །ཐ་མལ་འཁྲུལ་པའི་རྒྱུ་བ་ལྷ་སྐུ་རུ་བསྡམས་པའི། །བུམ་དབང་གྲུབ་མཐའ་སྙོགས་པར་བྱིན་གྱིས་རང་རློབས་ཤིག །མཐའ་མེད་འཁོར་བར་འཆིང་བའི་རླུང་སེམས་ཀྱི་གར་མཁན། །འོད་གསལ་ཨ་ཝ་དྷཱུ་ཏཱིའི་ཁྲི་མུན་དུ་བཅུག་པས། །གསལ་སྟོང་བསམ་མི་ཁྱབ་པའི་ཡེ་ཤེས་ལ་སྦྱོར་བའི། །གསང་དབང་གྲུབ་མཐའ་སྙོགས་པར་བྱིན་གྱིས་རང་རློབས་ཤིག །ལུགས་འབྱུང་དགའ་བ་རྣམ་བཞིའི་ཕོ་ཉ་ཡི་རྣམ་འགྱུར། །ལུགས་ལྡོག་ཛ་ལནྡྷ་རའི་གྲོང་ཁྱེར་དུ་སོན་པས། །སེམས་དང་སེམས་བྱུང་འཇུག་པ་བདེ་སྟོང་དུ་ནུབ་པའི། །ཤེར་དབང་གྲུབ་མཐའ་སྙོགས་པར་བྱིན་གྱིས་རང་རློབས་ཤིག །སྐྱེ་འགགས་གནས་གསུམ་བྲལ་བ་དོན་དམ་གྱི་བདེན་པ། །བསམ་གྱིས་མི་ཁྱབ་བརྗོད་བྲལ་རང་བྱུང་དུ་མཐོང་བས། །གཟུང་འཛིན་སྤྲོས་པའི་འཆིང་བ་བཙན་ཐབས་སུ་ཞིག་པའི། །ཚིག་དབང་གྲུབ་མཐའ་སྙོགས་པར་བྱིན་གྱིས་རང་རློབས་ཤིག །མངོན་སུམ་རིག་པ་མཐོང་ཞིང་གོམས་པ་ལ་འཆེལ་བས། །ཉམས་སྣང་གོང་འཕེལ་ཚད་ཕེབས་ངལ་གསོ་ལ་སྦྱར་ཏེ། །ཆོས་ཉིད་ཟད་པའི་ཀློང་དུ་འཁོར་འདས་ཀུན་གྲོལ་བའི། །རྩལ་དབང་གྲུབ་མཐའ་སྙོགས་པར་བྱིན་གྱིས་རང་རློབས་ཤིག །གལ་ཏེ་གྲུབ་པའི་གསང་ལམ་མ་སྙོགས་སུ་ཟིན་ན། །ནམ་ཞིག་འཕོས་ཚེ་མཁའ་སྤྱོད་ཌཱ་ཀི་ཡི་གྲོང་ཁྱེར། །འོག་མིན་པདྨ་དྲྭ་བའི་དགའ་ཚལ་དུ་རྩེན་ནས། །ས་ལམ་གཅིག་ཆར་རྫོགས་པར་བྱིན་གྱིས་རང་རློབས་ཤིག །དེ་སྐད་གང་ཤར་རང་གྲོལ་གྲགས་སྟོང་གི་གླུ་དབྱངས། །རིག་འཛིན་བླ་མ་དགྱེས་པའི་མཆོད་སྤྲིན་དུ་སྤྲོས་པས། །སྐྱེ་བའི་ཕྲེང་བ་ཀུན་ཏུ་ངེས་དོན་གྱི་ཐེག་མཆོག །འོད་གསལ་རྫོགས་ཆེན་སྒོམ་པའི་སྨོན་ལམ་ཞིག་ཞུའོ། །ཞེས་པའང་གྲུབ་པ་མཆོག་གི་བསྟི་གནས་དཔལ་ལྡན་པདྨ་འོད་གླིང་ཐེག་མཆོག་གླིང་གི་དྲི་གཙང་ཁང་དུ་ཚོགས་ཀྱི་འཁོར་ལོའི་མཆོད་པ་འདུ་བགྱིས་པའི་རྗེས་ཐོག་ཏུ་སྨྲས་པའི་དྷྱནྟུ།། །། ༈

[edit]

kun mkhyen gnyis pa'i zhabs la gsol 'debs rdo rje'i thol glu grub gnyis rna rgyan/_ 'od gsal rdo rje snying po'i shing rta pa chen po kun mkhyen gnyis pa'i zhabs la gsol ba 'debs pa rdo rje'i thol glu grub gnyis rna rgyan ces bya ba/__a ho/__gcig pu ma yin 'khor 'das bstan g.yo kun khyab cing /__/du mar mi gnas blo bral rang byung gi gshis lugs/__/thim la ma rmugs nang gsal ka dag gi bdag nyid/__/ngo bo chos sku khyab bdag kun mkhyen gyi bla mar/__/gzhi grol rig pa'i ngang nas gsol ba zhig 'debs so/__/shin tu rnam par grol ba'i bde stong gi ye shes/__/zag bral bzhin lag mtshan dpe'i snang cha ru shar ba'i/__/kha sbyor yan lag bdun ldan phyir gsal gyi rol mo/___/rang bzhin longs sku khyab bdag kun mkhyen gyi bla mar/__/zung 'jug dga' bzhi'i ngang nas gsol ba zhig 'debs so/__/'gro 'ong rtog pa'i mtshan ma rang grol du zhig kyang /__/gzhan phan snying rje chen po'i thabs mkhas la sbyar bas/__/sna tshogs sgyu 'phrul drwa ba'i zlos gar la rtsen pa'i/__/thugs rje sprul sku khyab bdag kun mkhyen gyi bla mar/__/mi phyed gus pa'i ngang nas gsol ba zhig 'debs so/__/chos dang chos can ro gcig gdod ma yi dbyings su/__/sgrib gnyis glo bur rtog pa'i 'jug ldang kun zad pas/__/sku gsum dbyer med mi phyed 'od gsal gyi thig le/__/ngo bo nyid sku khyab bdag kun mkhyen gyi bla mar/__/mngon sum lhug pa'i ngang nas gus phyag zhig 'tshal lo/__/a ho/__skye gnas rnam bzhi'i 'dra 'bag bskyed rim gyi thabs mkhas/__/g.yo thob goms brtan mthar phyin pha rol du son pas/__/tha mal 'khrul pa'i rgyu ba lha sku ru bsdams pa'i/__/bum dbang grub mtha' snyogs par byin gyis rang rlobs shig__/mtha' med 'khor bar 'ching ba'i rlung sems kyi gar mkhan/__/'od gsal a wa d+hU tI'i khri mun du bcug pas/____/gsal stong bsam mi khyab pa'i ye shes la sbyor ba'i/__/gsang dbang grub mtha' snyogs par byin gyis rang rlobs shig__/lugs 'byung dga' ba rnam bzhi'i pho nya yi rnam 'gyur/__/lugs ldog dza lan+d+ha ra'i grong khyer du son pas/__/sems dang sems byung 'jug pa bde stong du nub pa'i/__/sher dbang grub mtha' snyogs par byin gyis rang rlobs shig__/skye 'gags gnas gsum bral ba don dam gyi bden pa/__/bsam gyis mi khyab brjod bral rang byung du mthong bas/__/gzung 'dzin spros pa'i 'ching ba btsan thabs su zhig pa'i/__/tshig dbang grub mtha' snyogs par byin gyis rang rlobs shig__/mngon sum rig pa mthong zhing goms pa la 'chel bas/__/nyams snang gong 'phel tshad phebs ngal gso la sbyar te/__/chos nyid zad pa'i klong du 'khor 'das kun grol ba'i/__/rtsal dbang grub mtha' snyogs par byin gyis rang rlobs shig__/gal te grub pa'i gsang lam ma snyogs su zin na/__/nam zhig 'phos tshe mkha' spyod DA ki yi grong khyer/__/'og min pad+ma drwa ba'i dga' tshal du rtsen nas/__/sa lam gcig char rdzogs par byin gyis rang rlobs shig__/de skad gang shar rang grol grags stong gi glu dbyangs/__/rig 'dzin bla ma dgyes pa'i mchod sprin du spros pas/__/skye ba'i phreng ba kun tu nges don gyi theg mchog__/'od gsal rdzogs chen sgom pa'i smon lam zhig zhu'o/__/zhes pa'ang grub pa mchog gi bsti gnas dpal ldan pad+ma 'od gling theg mchog gling gi dri gtsang khang du tshogs kyi 'khor lo'i mchod pa 'du bgyis pa'i rjes thog tu smras pa'i d+h+yan+tu//__//__!