JKW-KABUM-22-ZA-006-003

🚧 This website is under continued development. We appreciate your patience!

Previous Text Back to Volume PageNext Text

Wylie title	'dus pa mdo'i bdud rtsi chos sman bde chen rol ba'i dkar chag
Location	mkhyen brtse'i bka' 'bum Volume 22, sde tshan 6, Text 3, Pages 130-145 (Folios 40b6 to 48a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'dus pa mdo'i bdud rtsi chos sman bde chen rol ba'i dkar chag. In 'jam dbyangs mkhyen brtse'i dbang po'i bka' 'bum, Vol. 22: 130-145. Khams sde dge rdzong sar dgon: Rdzong sar blo gros phun tshogs, 2020.
Genre	Catalogue of Contents - dkar chag  ·  Medicinal Pills - Making and Activating Practices - sman sgrub

1 Texts in this Section (sde tshan or chos tshan)

3 130-145	འདུས་པ་མདོའི་བདུད་རྩི་ཆོས་སྨན་བདེ་ཆེན་རོལ་བའི་དཀར་ཆག། 'dus pa mdo'i bdud rtsi chos sman bde chen rol ba'i dkar chag Catalogue of Contents - dkar chag   ·   Medicinal Pills - Making and Activating Practices - sman sgrub	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

འདུས་པ་མདོའི་བདུད་རྩི་ཆོས་སྨན་བདེ་ཆེན་རོལ་བའི་དཀར་ཆག་བཞུགས་སོ།། །།ཨོཾ་སྭ་སྟི། སྤྲུལ་པའི་གཏེར་སྟོན་རིན་པོ་ཆེ་ཨོ་རྒྱན་མཆོག་གྱུར་བདེ་ཆེན་གླིང་པ་ལ། ས་རྟ་དབྱུག་པ་ཟླ་བའི་དམར་ཕྱོགས་མཁའ་འགྲོ་འདུ་བའི་དུས་བཟང་པོར། བོད་ཆེན་པོའི་ལྗོངས་ཀྱི་ཐིག་ལེའི་གནས་ཆེན་ཉི་ཤུ་རྩ་ལྔའི་ཡ་གྱལ། ཐུགས་ཀྱི་ཡོན་ཏན་གྱི་གནས་མཆོག་ལྷོ་ཟླ་ཀརྨའི་འབུམ་རྫོང་ནས། གཏེར་སྲུང་མཚོ་སྨན་གྱིས་བྱིན་བརླབས་ཀྱི་ཟིལ་པ་ཕྲོམ་མེར་མངོན་སུམ་དུ་ཕུལ་བའི་ངོ་མཚར་གྱི་རྫས་མཆོག་འདུས་པ་མདོའི་ཆོས་སྨན་བདེ་ཆེན་རོལ་པའི་ལོ་རྒྱུས་ནི། གོ་སྟོད་འོད་འབར་བྲག་ནས་བཞེས་པའི་མཐོང་གྲོལ་སྐུ་རྟེན་རྣམ་གཉིས་ཀྱི་དཀར་ཆག་སློབ་དཔོན་རིན་པོ་ཆེའི་གསུང་ལ་མཁའ་འགྲོ་ཡེ་ཤེས་མཚོ་རྒྱལ་གྱིས་ཟིན་བྲིས་སུ་མཛད་པ་ལས། རྫ་རྒྱལ་གོ་བོ་ཕུག་གི་གནས་མཆོག་ཏུ༔ འདུས་པ་ཆེན་པོ་པདྨ་འབྱུང་གནས་དང་༔ ཡེ་ཤེས་སྐུ་དང་ལས་ལུས་ཚུལ་བཟུང་བའི༔ རྗེས་འབྲངས་ཚོམ་བུར་འདུས་པ་སྟོང་ཕྲག་གིས༔ སྒྲོལ་བྱེད་ཐུགས་རྗེའི་རྒྱལ་པོ་ཆེ་བའི་མཆོག༔ ཤིན་ཏུ་རྣམ་པར་གྲོལ་བའི་ཧེ་རུ་ཀ༔ ཆོས་ཉིད་རང་སྒྲས་མངོན་སུམ་བསྟན་པའི་རྒྱུད༔ རྡོ་རྗེ་བཀོད་པ་གསང་བ་ཟབ་མོའི་དོན༔ འདུས་པ་མདོ་ཡི་དཀྱིལ་འཁོར་ཞལ་ཕྱེས་ཏེ༔ བདུད་རྩི་སྨན་གྱི་སྒྲུབ་པ་མཛད་པའི་ཚེ༔ ནམ་མཁའ་གང་བའི་ཁྲག་འཐུང་དཀྱིལ་འཁོར་ལྷ༔ རབ་འབྱམས་སྒྲུབ་པའི་རྫས་ལ་མངོན་སུམ་ཐིམ༔ དེ་ཚེ་སྨན་ལས་ཡེ་ཤེས་འོད་འབར་ཞིང་༔ ཛམ་གླིང་ཐམས་ཅད་ཚོར་གྲོལ་དྲི་ཡི་ཁྱབ༔ གང་གིས་མཐོང་དང་ཐོས་དང་དྲན་རེག་གམ༔ ཐུན་ཕྲན་གཅིག་ལ་ཐུན་ཆེན་འབུམ་སྤེལ་ཏེ༔ དེ་ཉིད་ཏིལ་འབྲུ་ཙམ་ཞིག་མྱོང་བས་ཀྱང་༔ ནད་དང་སྡུག་བསྔལ་བར་གཅོད་ཀུན་ཞི་ཞིང་༔ རྡོ་རྗེའི་ཚེ་དང་ལང་ཚོ་མཆོག་ཏུ་འགྲུབ༔ བདེ་ཆེན་ཡེ་ཤེས་རྩོལ་བ་མེད་པར་འཆར༔ ཧེ་རུ་ཀ་དང་སྤྱོད་ཡུལ་མཉམ་པ་ཡིས༔ སྐྱེ་བ་བདུན་ན་འབད་མེད་གྲོལ་བའི་ཚུལ༔ ཌཱ་ཀི་བྱེ་བས་རྡོ་རྗེའི་གླུ་རུ་བླངས༔ ཞེས་སོགས་རྒྱ་ཆེར་བསྔགས་པ་ལ་མཆོག་ཏུ་དད་པ་དང་། གཞན་སྨན་པར་འདོད་པའི་ལྷག་བསམ་ཟོལ་མེད་པ་དང་། སྤྲུལ་པའི་གཏེར་ཆེན་རིན་པོ་ཆེ་ནས་ཀྱང་ལེགས་སོའི་བཀའ་གནང་བས་གཟེངས་བསྟོད་པ་དང་། དཔལ་སའི་ཚངས་པ་ཆེན་པོ་རྒྱལ་བློན་གྱིས་ཡོ་བྱད་ནམ་མཁའ་མཛོད་ཀྱི་མཐུན་རྐྱེན་རྩལ་བས་རྟེན་འབྲེལ་དུས་སུ་སོན་པ་བཅས། ཁོ་བོ་ཅག་གིས་དེང་དུས་རྡོ་རྗེ་སློབ་དཔོན་གྱི་གཟུགས་བརྙན་ལས་ཀྱང་ཆེས་གཟུགས་བརྙན་གྱི་ཁུར་མི་ཐེགས་བཞིན་རང་གིར་བྱས་ཏེ། ས་སྐྱོང་ཆོས་ཀྱི་རྒྱལ་པོའི་དབུའི་མཆོད་གནས་རྡོ་རྗེ་འཛིན་པ་ཆེན་པོ་འཇམས་དབྱངས་བློ་གསལ་དང་། རྒྱ་ཆེན་ཆོས་ཀྱི་སྤྱན་ལྡན་ཤར་བླ་མ་མཁས་བཙུན་གྲུབ་པའི་བདག་ཉིད་ཀུན་དགའ་དཔལ་ལྡན་སོགས་དབང་གིས་རྒྱུད་སྨིན་ཅིང་། དམ་ཚིག་དང་སྡོམ་པ་རྣམ་པར་དག་པ། ལུང་དང་རིག་པར་སྨྲ་བའི་བཤེས་གཉེན་གྲོགས་དང་བཅས་པ་འདུས་པས། ཕུན་ཚོགས་ལུགས་བརྒྱའི་མདུན་ས་དཔལ་སྡེ་དགེ་ལྷུན་གྲུབ་སྟེང་གི་སྤྲུལ་པའི་ཆོས་རྒྱལ་ཆེན་པོ་རྣམས་རིམ་པར་བྱོན་པའི་གཟིམ་ཆུང་ཁམས་གསུམ་ཟིལ་གནོན་འཆི་མེད་བདེ་ལྡན་བཀོད་པར། དོན་གྲུབ་ཅེས་པ་ས་མོ་ལུག་གི་གནམ་ལོ་གསར་དུ་འཆར་བའི་ཆོ་འཕྲུལ་ཆེན་པོའི་ཟླ་བའི་དབང་ཕྱོགས་ཀྱི་རྒྱལ་བ་དང་པོར། བྲང་ཏི་མཁས་པའི་རིགས་འཁྲུངས་ལྷར་བཅས་བསྟན་འགྲོའི་སྐྱབས་གཅིག་ཐར་རྩེ་ཞབས་དྲུང་རིན་པོ་ཆེ་འཇམ་དབྱངས་ནམ་མཁའ་རྒྱལ་མཚན་དཔལ་བཟང་པོ། བདག་ཆེན་ཤར་པའི་རིགས་ཀྱི་ཐིག་ལེ་ཀླུ་ལྡིང་ཞབས་དྲུང་རིན་པོ་ཆེ་རྣམ་འདྲེན་རྒྱལ་བའི་མྱུ་གུ་ཆེན་པོ་ཤེས་རབ་ཆོས་ཀྱི་རྒྱལ་མཚན། མངའ་བདག་ཁྲི་སྲོང་ལྡེའུ་བཙན་གྱི་ལྷ་སྲས་བར་པས་བཅུའི་དབང་ཕྱུག་མུ་རུབ་བཙད་པོ་ཡེ་ཤེས་རོལ་པ་རྩལ་གྱི་རྣམ་འཕྲུལ་རྩོད་བྲལ་དུས་བབས་ཀྱི་སྤྲུལ་པའི་གཏེར་ཆེན་ཆོས་ཀྱི་རྒྱལ་པོ་ཨོ་རྒྱན་མཆོག་གྱུར་བདེ་ཆེན་གླིང་པ། ལོ་ཆེན་བཻ་རོའི་རྣམ་འཕྲུལ་དུ་ཚད་མ་གསུམ་གྱིས་གྲུབ་པ་མཁས་བཙུན་གྲུབ་པའི་ཁྱུ་མཆོག་འཇམ་པའི་དབྱངས་བློ་གྲོས་མཐའ་ཡས། རྒྱལ་སྲས་མུ་ཏིག་བཙད་བོ་དགེ་བ་དཔལ་གྱི་རྣམ་འཕྲུལ་དུ་འཁྲུལ་མེད་རྡོ་རྗེའི་ལུང་གིས་ཡང་ཡང་བསྔགས་པ་དཔལ་སའི་ཚངས་པ་སྡེ་དགེ་ཆོས་ཀྱི་རྒྱལ་པོའི་ལྷ་སྲས་བྱང་ཆུབ་སེམས་དཔའ་དཔལ་ལྡན་འཆི་མེད་རྟག་པའི་རྡོ་རྗེ་མཆེད་ཡུམ་བློན་འཁོར་དང་བཅས་པས་མཚོན་ཕུན་སུམ་ཚོགས་པའི་རྡོ་རྗེའི་འདུས་པ་ཆེན་པོར། རྣལ་གྲོལ་གྱི་ལམ་མཐའ་དག་ཐེག་པ་རིམས་དགུར་འདུ་བ་ལས། བརྒྱད་པ་ལུང་ཨ་ནུ་ཡོ་ག་སྟེ་རྗེས་སུ་རྣལ་འབྱོར་གྱི་ཐེག་པ། དཔལ་རྡོ་རྗེ་བཀོད་པ་ཀུན་འདུས་རིག་པ་ཆེན་པོ་མདོའི་རྩ་བཤད་ཀྱི་རྒྱུད་རྣམས་ལ་བརྟེན་ནས། གྲུབ་པའི་སློབ་དཔོན་བདེ་བ་གསལ་མཛད་ལ་སོགས་པས་ཇི་ལྟར་བཀྲལ་བའི་དགོངས་པ། དམ་ཉམས་དང་འདྲེས་ཁྱེར་གྱི་སེལ་མེད་ཅིང་། རང་བཟོ་དང་རྙོག་པའི་དྲི་མ་ཕྲ་མོས་ཀྱང་མ་སླད་པར་གཏེར་ཆེན་ཆོས་ཀྱི་རྒྱལ་པོ་རིག་འཛིན་གཏེར་བདག་གླིང་པ་སྐུ་མཆེད་ཀྱིས་ལེགས་པར་བཤད་པའི་གཞུང་བཟང་ཟླ་མེད་པའི་རྗེས་སུ་འབྲངས་ཏེ། ཐེག་དགུ་ཡོངས་སུ་རྫོགས་པ་འོག་མིན་ཚོགས་ཆེན་འདུས་པའི་རས་བྲིས་ཀྱི་དཀྱིལ་འཁོར་ཆེན་པོར་བསྙེན་སྒྲུབ་ཡན་ལག་བཞི་དང་ལྡན་པའི་ཚོམ་བུ་ཚོགས་ཀྱི་སྒྲུབ་པ་དང་འབྲེལ་བར་རྡོ་རྗེའི་གཏོར་བླུགས་ཀྱིས་མངའ་དབུལ་ཞིང་། བདུད་རྩི་སྨན་གྱི་དགའ་སྟོན་སྤེལ་བ་ལ། ཐོག་མར་དངོས་གྲུབ་ཀྱི་སྣོད་དུ་རུང་བར་བྱ་བ་བསྙེན་པའི་ཡན་ལག་ལ། ནུབ་དང་པོར་དཀྱིལ་ཆོག་ལྟར་སའི་ཆོག་དང་ཆ་གསུམ་རྒྱས་པ་སྔོན་དུ་འགྲོ་བས། སྒོ་འབྱེད་ཀྱི་དབང་། གཉིས་པར་ལྷ་མི། ཉན་ཐོས། རང་རྒྱལ། བྱང་སེམས་ཏེ་དཀྱིལ་འཁོར་བཞིའི་དབང་དང་། བྱ་སྤྱོད་ཐུན་མོང་གི་སྟ་གོན། གསུམ་པར་ སྤྱོད་ཐུན་མོང་གི་དབང་དངོས་གཞིའི་དབང་དང་། ཡོ་གའི་སྟ་གོན། བཞི་པར་ཡོ་གའི་དངོས་གཞིའི་དབང་སྟེ་ཡན་ལག་གི་དཀྱིལ་འཁོར་རྣམས་དང་། དེ་དག་གི་སྐབས་སུ་ཟུར་འདེབས་ལྟར་ཞི་ཐུང་ཁྲོ་ཐུང་གི་གཞུང་བསྲང་བ་དང་། གཏོར་ཆོག ཆ་གསུམ། ཚོགས་མཆོད་སོགས་རྒྱས་པར་བགྱིས། ལྔ་པར་ཡན་ལག་ཅན་རྩ་བའི་དཀྱིལ་འཁོར་གྱི་བསྙེན་པའི་ཡན་ལག་ལ། ཞི་ཐུང་གི་གཞུང་བསྲང་བ་སྔོན་ཏུ་འགྲོ་བས་ཚོགས་ཀྱི་འཁོར་ལོ་དང་། ཞི་བའི་སྦྱིན་སྲེག །དཀྱིལ་ཆོག་ལྟར་ཡན་ལག་རྫས་ལྔ་དང་། ཡན་ལག་ཅན་ལྷ་བུམ་སློབ་མ་ལྷག་གནས་སོགས་དང་། སྒྲུབ་པའི་གྲོགས་དག་གི་སྐོང་གི་ཆོ་ག །དྲུག་པར། ཁྲོ་བོའི་གཞུང་བསྲང་བ་སྔོན་ཏུ་འགྲོ་བས་ཆ་གསུམ་བཏང་ཞིང་མཚམས་གསུམ་བཅད་པ་དང་། གནས་འཁོར་ཡོ་བྱད་བྱིན་གྱིས་བརླབས་པ། ཁྱད་པར་སྨན་ཁྲོལ་བུ་དང་ཕྱེ་མའི་སྒྲུབ་པ་ནི། སྒྲུབ་པའི་སྐབས་ཀྱི་རྩ་དཀྱིལ་བདེ་བ་ཆེན་པོའི་དཀྱིལ་འཁོར་དུ་ཞལ་བསྒྱུར་བ་ཙམ་ལ་བརྟེན་པའི་སྐབས་འདིར་དམིགས་ཀྱིས་བསལ་བར་མ་གསུངས་ཀྱང་། ཕུན་སུམ་ཚོགས་པའི་ཡན་ལག་ཏུ། སྔ་མ་ནས་རོ་ནུས་ཁ་དོག་སོགས་མཐུན་བསྡེབས་ཤིང་ལེགས་པར་སྦྱར་བའི་སྨན་རྣམས། གཏེར་ཆེན་ཆོས་ཀྱི་རྒྱལ་པོས་བཀའ་བརྒྱད་བདེ་གཤེགས་འདུས་པའི་ཚོམ་བུ་ཚོགས་སྒྲུབ་ཆེན་མོ་དང་འབྲེལ་བར་ཡུན་རིང་དུ་བྱིན་གྱིས་བརླབས་པར་མ་ཟད། འདིར་ཡང་ས་ཁོངས་འཛིན་བྱེད་དུ་ཁྲོལ་བུའི་བཟླས་ཐུན་དང་། བཏགས་བཙག་བསྲེ་སྦོལ་སོགས་རྒྱུད་དང་གྲུབ་པའི་མན་ངག་ལ་ཡིད་གཞུང་པར་བགྱིས་ཤིང་། དེ་མ་ཐག་དངོས་གྲུབ་ཀྱི་སྦྱོར་བ་ལ་ཞུགས་པ་ཉེ་བར་བསྙེན་པའི་ཡན་ལག་༢༽རས་བྲིས་ཀྱི་དཀྱིལ་འཁོར་དགྲམ་ཞིང་རྒྱན་བཀོད་ནས་བྱིན་དབབ། གྲལ་ལ་དགོད་ཅིང་བསྙེན་པར་གནང་བའི་དབང་བསྐུར། བརྡ་སྒོ་དབྱེ་ཞིང་སྒྲུབ་ཐབས་ལྟར་ལས་ཀྱི་དབུ་དྲངས་པ་ནས། བྱིན་དབབས་པའི་བར་གྱི་རྗེས། སྒྲུབ་ཁོག་ལྟར་མ་ཊཾ་བསྒྲལ་ཞིང་ཁྲོ་བོ་བཅུའི་ལྟངས་སྟབས་ཀྱིས་བགེགས་གཟིར། མཆོད་པ་བྱིན་རླབས་སོགས་སྒྲུབ་ཐབས་ཀྱི་གཞུང་རྫོགས་པར་བསྲངས། བདུན་པ་ནས་བརྩམས་ཏེ་དངོས་གྲུབ་ཀྱི་ཐབས་དངོས་ལ་ཞུགས་པ་སྒྲུབ་པའི་ཡན་ལག་༣༽གི་གཞུང་ཞག་གསུམ་དུ་བསྲངས་ཏེ། དེའང་ཉིན་མཚན་དུས་དྲུག་ཏུ་སྒྲུབ་ཁོག་ལྟར་བདག་ཅག་སོགས་རྩ་བའི་གཞུང་བསྲང་མཁན་དང་། རྟོགས་ལྡན་བླ་མ་དམ་པ་དཀོན་མཆོག་བསྟན་འཛིན་ཆོས་ཀྱི་རྒྱལ་མཚན་སོགས་སྒྲུབ་པའི་གྲོགས་དང་བཅས་པས་ཆོག་ཁྲིགས་རྒྱས་འབྲིང་བསྡུས་པའི་ཚུལ་གྱིས་ཕྲིན་ལས་བཏང་བ་དང་། ཏིང་ངེ་འཛིན་དང་། བཟླས་པའི་རྒྱུན་མ་ཆད་པར་བསྒྲུབས་ཤིང་། ཉིན་བར་པར་ཟུར་འདེབས་ལྟར་ཛཔྲ་སྐུལ་རྒྱས་པ་དང་། ཕྱི་མར་ཟུར་འདེབས་ལྟར་ལྷ་དབང་དུ་བྱ་བའི་བསྲེགས་བླུགས་ཀྱི་ཆོ་ག་སོགས་ཀྱང་བཤད་ཚོད་ལྟར་ལག་ལེན་དུ་བཏབ། དངོས་གྲུབ་ཀྱི་གེགས་སེལ་དང་བོགས་འབྱིན་པའི་ཕྱིར་ཉུལ་ལེ་གཟར་བ་དང་། བྱིན་དབབས་པ་སོགས་ཀྱང་ཐུན་རེ་བཞིན་བགྱིས། ནུབ་དགུ་པའི་ཕྱི་དྲོ་ནས་དངོས་གྲུབ་ཀྱི་རྫས་རྣམས་ལེགས་པར་བཤམ་སྟེ། བཅུ་པའི་ཐོ་རེངས་སྔ་བར་དངོས་གྲུབ་མངོན་དུ་བྱ་བ་སྒྲུབ་པ་ཆེན་པོའི་༤ཡན་ལག་ནི། སྒྲུབ་པའི་གཞུང་བསྲངས་ཏེ་སྒྲུབ་ཁོག་ལྟར་བདག་དོན་ཏུ་དངོས་གྲུབ་ལེན་པའི་ཆོ་ག་རྒྱས་པར་བགྱིས་ཤིང་དངོས་གྲུབ་ཀྱི་དགའ་སྟོན་སྤེལ། ཟུར་འདེབས་ལྟར་རྒྱས་པའི་སྦྱིན་སྲེག་གི་ཐབ་ཏུ་བདུད་རྩི་སྨན་གྱི་ཕུད་ཕུལ་ཞིང་བདེ་བ་ཆེན་པོའི་ཡེ་ཤེས་ཀྱི་སྣང་བས་ཁྱབ་པའི་འདུན་པ་བསྒྱུར། རུ་ལུའི་ཛཔ྄་དབྱངས་དང་རྡོ་རྗེའི་བྲོ་བསྐོར་བ་སོགས་ཕྱག་བཞེས་ལྟར་བགྱིས། །བཅུ་གཅིག་པར་མདོ་རྩ་བའི་དཀྱིལ་འཁོར་དུ་སྒྲུབ་ཅིང་མཆོད་པ། ཚོགས་ཀྱི་འཁོར་ལོ། བདག་ཉིད་འཇུག་ཅིང་དབང་མདོར་བསྡུས་ཏེ་བླངས་པ་སོགས་སྔོན་ཏུ་འགྲོ་བས། ནང་དང་སྒྲུབ་པའི་དབང་སྟེ་བུམ་པའི་དབང་དང་། དབང་གོང་མ་གསུམ་མདོར་བསྡུས་པ་བཅས་པ་རྫོགས་པར་ཕུལ། བཅུ་གཉིས་པར་གསང་དཀྱིལ་དང་། རྫོགས་དཀྱིལ་དུ་དབང་གོང་མ་གཏད་རྒྱ་དང་བཅས་ཕུལ་ཞིང་། རྗེས་ཀྱི་ཆོ་ག་མར་མེའི་སྨོན་ལམ་གདབ་པ་སོགས་ནས་བརྩམས་ཟུར་འདེབས་བཞིན་ལུང་གི་ལྷག་ཆོག་ཆབ་དང་བཅས་བསྔོ་སྨོན་ཤིས་བརྗོད་ཀྱི་བར་སྒྲུབ་ཐབས་དང་སྒྲུབ་ཁོག་ནས་ཇི་ལྟར་འབྱུང་བ་བཞིན་བགྱིས་ཏེ་གནས་སྲུང་། བཅུ་གསུམ་པའི་སྔ་བར་འདུས་པ་གཉུག་མར་གནས་པ་རྣམས་ཀྱི་སྟེང་དུ་གློ་བུར་དུ་ལྷག་པ་དང་བཅས་སུམ་བརྒྱར་ཉེ་བ་ལ་ཚོམ་ཆེན་ཏུ་བཀྲ་ཤིས་ཚེའི་དབང་དང་། ཕྱི་རོལ་གྱི་ཁོར་ཡུག་ཏུ་འདུས་པ་ལྔ་སྟོང་ཙམ་ལ་སྒྲུབ་པའི་རྫས་རྣམས་ཀྱི་དངོས་གྲུབ་ཀྱི་སྐལ་བ་ཅི་རིགས་པ་སྦྱིན་ཏེ་སྙིང་རྗེའི་ཤུགས་ཀྱི་ཡིད་དྲངས་པས་མ་འོངས་པ་ན་གདུལ་བྱ་རིན་པོ་ཆེ་ལྟ་བུའི་གང་ཟག་ཤ་སྟག་ཏུ་གྱུར་ནས། ཚོམ་བུ་ཚོགས་ཀྱི་སྒྲུབ་པའི་ཉེ་རྒྱུས་སྤྱོད་པས་ཁ་སྦྱོར་བདུན་ལྡན་དཔལ་ཧེ་རུ་ཀའི་གོ་འཕང་དུས་མྱུར་བ་ཉིད་དུ་འགྲུབ་པར་སྨོན་པའང་གཅམ་བུ་མིན་པར་སྙིང་ཐག་པ་ནས་བགྱིས་སོ། །དེ་ལྟར་སྦྱོར་དངོས་རྗེས་གསུམ་ཚང་བའི་སྒོ་ནས་ཕྱི་ནང་གི་དགེ་མཚན་མངོན་ཏུ་གྱུར་བ་དང་། དོན་ཆེན་པོ་གྲུབ་པ་དང་བཅས་ལེགས་པར་བསྒྲུབས་པའི་དམ་ཚིག་གི་རྫས་ཆེན་པོ་འདིའི་རྒྱུན་ཇི་སྲིད་ནམ་མཁའ་གནས་ཀྱི་བར་དུ་རྟག་པ་དང་། ཁྱབ་པ་དང་། ལྷུན་གྱིས་གྲུབ་པར་གནས་པའི་ཕྲིན་ལས་ཀྱིས། སྣོད་ཐམས་ཅད་འོག་མིན་རྡོ་རྗེ་བཀོད་པའི་ཞིང་དུ་གནས་འགྱུར་ཞིང་། བཅུད་ཀྱི་ཡིད་ཅན་མཐོང་ཐོས་དྲན་རེག་གི་འབྲེལ་པས་བསྡུས་པ་ཐམས་ཅད་དོན་གཉིས་ཀྱི་བསམ་སྦྱོར་ཡིད་བཞིན་དུ་འགྲུབ་པ་དང་། འཆི་མེད་རྟག་པའི་སྐུ་ཅན་དཔལ་ཁྲག་འཐུང་མངོན་རྫོགས་རྒྱལ་པོའི་སྐུ་གསུང་ཐུགས་ཡེ་ཤེས་རྡོ་རྗེའི་ངོ་བོར་རྣམ་པ་ཉི་ཤུའི་བྱང་ཆུབ་པར་སྨོན་པ་དེ་དེ་བཞིན་ཏུ་བླ་མ་ལྷ་དང་མཁའ་འགྲོ་རྒྱ་མཚོའི་ཚོགས་ཀྱིས་བྱིན་གྱིས་བརླབ་ཏུ་གསོལ། །ཞེས་པའང་མཚོ་སྐྱེས་བླ་མ་དགྱེས་པའི་འབངས་རྡོ་རྗེ་གཟི་བརྗིད་རྩལ་གྱིས་བྲིས་པ་སརྦ་དཱ་སུ་ཤྲེ་ཡོ་བྷ་བ་ཏུ། ། ༈

ཨོཾ་སྭ་སྟི་ཛཱི་བནྟུ། སྤྱིར་རྩ་བརྒྱད་ཡན་ལག་སྟོང་དང་སྦྱར་བའི་དམ་ཚིག་གི་རྫས་ཉིད་བསྒྲུབ་པའི་གཞིར་བཟུང་སྟེ། སྒྲུབ་བྱེད་བསྙེན་སྒྲུབ་ཡན་ལག་བཞི་ལྡན་མཐར་ཕྱིན་པས་གྲུབ་པའི་འབྲས་བུ་བདུད་རྩི་རཱ་ས་ཡཱ་ན་ལ་བརྟེན་ནས་གནས་སྐབས་དང་མཐར་ཐུག་གི་དངོས་གྲུབ་འབད་མེད་ལྷུན་གྱིས་གྲུབ་པའི་ཚུལ་ཡོན་ཏན་བདུད་རྩིའི་རོལ་པའི་རྒྱུད་སྡེ་རྣམས་ལས་བསམ་གྱིས་མི་ཁྱབ་ཞིང་བགྲང་ལས་འདས་པར་གསུངས་པ། བྱེ་བྲག་ཏུ་ལྷ་སྲས་ཡེ་ཤེས་རོལ་པ་རྩལ་གྱི་རྣམ་འཕྲུལ་རྩོད་བྲལ་དུས་བབ་ཀྱི་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་མཆོག་གྱུར་བདེ་ཆེན་གླིང་པའི་སེང་གནམ་བྲག་གི་གཏེར་བྱོན་ཟབ་གཏེར་གྱི་ཐོ་བྱང་མཚོ་རྒྱལ་གྱི་ཕྱག་བྲིས་མ་ལས། ཨོ་རྒྱན་ཆེན་པོ་པདྨ་འབྱུང་གནས་དང་༔ མཁས་གྲུབ་རྗེ་འབངས་ཉེར་ལྔས་མཆིམས་ཕུ་རུ༔ སློབ་དཔོན་བརྒྱད་ཀྱི་ཆོས་སྨན་གཞིར་བྱས་ནས༔ བཀའ་བརྒྱད་སྒོ་ནས་བསྒྲུབས་པའི་སྨན་སྒྲུབ་ནི༔ ཚོན་ཚད་མེ་ལོང་ཡུ་བ་ཅན་ཞིག་གིས༔ གཞལ་བའི་མེ་ལོང་བཅུ་ཕྲག་བཞུགས་པ་འདི༔ མེ་ལོང་གཅིག་ལ་མེ་ལོང་འབུམ་ཕྲག་སྤེལ༔ གྲོག་མའི་རྐང་ཙམ་སུ་ཡི་ལྟོར་སོང་བ༔ དེ་ཉིད་ངན་སོང་གནས་ནས་ངེས་པར་ཐར༔ བླ་མེད་འཕགས་པའི་ས་ལ་ཕྱིན་པ་ནི༔ དུས་གསུམ་རྒྱལ་བ་རྣམས་ཀྱིས་ཡང་ཡང་བསྔགས༔ དེ་བས་གཅེས་པར་ཟུང་ཤིག་ས་མ་ཡ༔ ཞེས་དང་། ཟབ་བདུན་བདུད་རྩིའི་སྐོར་ལས་ཀྱང་། བླ་མེད་མཆོག་གི་བདུད་རྩི་འདི༔ ཏིལ་འབྲུ་ཙམ་ཞིག་སུས་མྱོང་བ༔ ཧེ་རུ་ཀ་དང་གོ་འཕང་མཉམ༔ ཞེས་གསུངས་ཤིང་། ཁྱད་པར་བཅོམ་ལྡན་འདས་རྡོ་རྗེ་སེམས་དཔའ་དངོས་སྣང་རིག་འཛིན་དགའ་རབ་རྡོ་རྗེའི་བདུད་རྩི་ཆོས་སྨན་འདི་ནི་བདེ་ཆེན་ཡེ་ཤེས་སྐྱེད་བྱེད་ཅེས་བྱ་སྟེ། འདི་མྱོང་ནས་དམ་ཚིག་མ་ཉམས་ན་སྐྱེ་བ་བདུན་ནམ་བཅུ་གཉིས་ཚུན་ནས་མཆོག་གི་དངོས་གྲུབ་འགྲུབ་པ་དང་། རིག་འཛིན་ཤྲཱི་སེདྷའི་བདུད་རྩི་ཆོས་སྨན་འདི་ནི། གཏེར་ལུང་ལས། ཟུང་འཇུག་རིག་འཛིན་ཤྲཱི་སེདྷའི༔ འཆི་མེད་བདུད་རྩི་སྨན་གྱི་བཅུད༔ མཐོང་བས་བསྐལ་མང་སྡིག་སྒྲིབ་འདག༔ དྲི་ཚོར་ཙམ་གྱིས་ནད་གདོན་ཞི༔ ལུས་ལ་རེག་པས་བདེ་ཆེན་སྐྱེ༔ རྡུལ་ཕྲན་ཙམ་ཞིག་མྱོང་བས་ཀྱང་༔ མཆོག་ཐུན་དངོས་གྲུབ་ངེས་པར་ཐོབ༔ མདོར་ན་འབྲེལ་ཚད་ཐམས་ཅད་ཀུན༔ ངན་སོང་འཁོར་བའི་སྒོ་འགེག་ཅིང་༔ མཐོ་རིས་ཐར་པའི་ལམ་རྙེད་ཕྱིར༔ རང་བྱུང་ཡེ་ཤེས་ཐུགས་རྗེའི་མཐུ༔ རྩོལ་མེད་ངང་གིས་འཆར་བ་སྟེ༔ དེ་ཕྱིར་ཐུན་ཕྲན་རེ་རེ་ལ༔ ཁྲི་འབུམ་སྤེལ་ཞིང་བསྒྲུབ་པ་བསྐྱར༔ མཁའ་ཁྱབ་འགྲོ་དོན་བླ་ན་མེད༔ བདེ་ཆེན་རྡོ་རྗེའི་གསེང་ལམ་མོ༔ ཞེས་སོགས་ཆེད་དུ་བསྔགས་པ་དང་། བི་མ་མི་ཏྲ་ནི་བདུད་རྩི་སྨན་གྱི་བཀའ་བབ་པའི་ཕྱིར། དེས་བསྒྲུབ་པའི་བདུད་རྩི་ཉིད་གཞན་ལས་ཁྱད་པར་དུ་མས་འཕགས་པར་གྲུབ་ཅིང་། །འཇམ་དཔལ་བཤེས་གཉེན། ཀླུ་སྒྲུབ། ཧཱུྃ་ཀཱ་ར། བི་མ་མི་ཏྲ། པྲ་བྷ་ཧས་སྟི། རྡ་ན་སཾ་སྐྲྀ་ཏ་གུ་ཧྱ་ཙནྡྲ། ཤཱིནྟཾ་གརྦྷ་སྟེ་རིག་འཛིན་ཆེན་པོ་བརྒྱད་ནི། དོན་དམ་པར་འཇམ་དཔལ་ཧེ་རུ་ཀ་སོགས་དཔལ་ཆེན་སྒྲུབ་སྡེ་བརྒྱད་དང་ཐ་མི་དད་པར་རིག་འཛིན་རྩ་བའི་རྒྱུད་ལས་བསྔགས་པའི་ཕྱིར་དེ་རྣམས་མཆོད་རྟེན་བདེ་བྱེད་བརྩེགས་པར་གདན་འཇོམས་ནས་བསྒྲུབས་པའི་བདུད་རྩི་ནི་འཇིག་རྟེན་ན་རྙེད་པར་དཀའ་ཞིང་དཀོན་པའི་དམ་ཚིག་གི་རྫས་མཐོང་ཐོས་དྲན་རེག་ཐམས་ཅད་གྲོལ་བ་དང་། དེ་ལ་གཞི་བྱས་ཏེ་ཨོ་རྒྱན་རྗེ་འབངས་ཉེར་ལྔས་བསྒྲུབས་པའི་བདུད་རྩིའི་ཆེ་བ་གོང་དུ་སྨོས་པའི་ལུང་གིས་གྲུབ་པས་མཚོན། མདོར་ན་རེ་རེ་ནས་བསྔགས་པའི་ལུང་མཐའ་ཡས་ཀྱང་འདིར་མདོར་བསྡུས་ཕྱོགས་ཙམ་དད་ལྡན་སྤྲོ་བ་བསྐྱེད་པའི་ཆེད་དུ་སྨོས་པ་ལགས། མྱོང་གྲོལ་རིལ་བུའི་སྐོར་ལ། གཏེར་ཁ་འདིའི་ཐུགས་རྗེ་ཆེན་པོ་འཁོར་བ་དོང་སྤྲུགས་ཀྱི་རིལ་བུའི་ལོ་རྒྱུས་ལས༔ འཁོར་བ་དོང་སྤྲུགས་རིལ་བུ་འདི༔ བདག་དང་རྗེ་འབངས་སྟོང་ཕྲག་གིས༔ བསྒྲུབ་ཚེའི་ཐུགས་རྗེའི་ལྷ་ཚོགས་རྣམས༔ དངོས་སུ་ཐིམ་པས་སུས་མྱོང་བ༔ ཐུགས་རྗེ་ཆེན་པོར་གཉིས་སུ་མེད༔ གཞན་ཡང་འདི་ལས་ཆེས་ཆེར་སྤེལ༔ རིལ་བུ་རེ་ལ་ཁྲི་རེ་བསྒྲུབ༔ ཡིག་དྲུག་ཁྲི་ཕྲག་རེ་བཟླས་ནས༔ རིལ་བུ་སུ་དང་སུས་མྱོང་བ༔ ངན་སོང་མེད་པར་ཐེ་ཚོམ་མེད༔ ཅེས་གསུངས་བས་མཚོན་རྒྱ་ཆེར་བསྔགས། ། ༈ སྐྱེ་བདུན་རིལ་བུའི་ཕན་ཡོན་ཀྱང་༔ གཏེར་གསར་ཐུགས་སྒྲུབ་བར་ཆད་ཀུན་སེལ་གྱི་ཞལ་གདམས་སྙིང་བྱང་དུ་ལུང་དྲངས་པས། ངན་སོང་དོང་སྤྲུགས་འགྲོ་བ་འདུལ་བའི་རྒྱུད་ཆེན་པོ་ལས༔ བཅོམ་ལྡན་འདས་པདྨའི་སྤྱན་གྱིས་མཁའ་འགྲོ་མ་གར་གྱི་དབང་མོ་ལ་བཀའ་སྩལ་པ༔ དོན་གྱི་བདུད་རྩི་མྱོང་གྲོལ་ནི་སྐྱེ་བ་མེད་པའོ། །རྟགས་ཀྱི་བདུད་རྩི་མྱོང་གྲོལ་ནི་སྐྱེ་བ་བདུན་པའི་བཅུད་དོ༔ མཚན་མའི་བདུད་རྩི་མྱོང་གྲོལ་ནི་ཚུལ་བཞིན་དུ་བསྒྲུབས་པའི་རིལ་བུའོ༔ འདི་ནི་ངན་སོང་དང་འཁོར་བ་ཐམས་ཅད་དོང་ནས་སྤྲུགས་པའི་ཐབས་ཆེན་པོ་འཕགས་པའི་ཐུགས་རྗེ་ལས་རང་བྱུང་བའོ༔ འགྲོ་བའི་རེ་འདོད་ཚུལ་བཞིན་དུ་སྐོང་བའི་ཡིད་བཞིན་གྱི་ནོར་བུའོ༔ འདི་ཉིད་སེམས་ཅན་གང་དང་གང་གིས་མཐོང་ངམ༔ ཐོས་སམ༔ རེག་གམ༔ མགུལ་དུ་འཆང་བའམ༔ དྲི་ཚོར་བའམ༔ ཁར་མྱོང་བ་སོགས་འབྲེལ་ཚད་ཐམས་ཅད་ཀྱི་ཚེ་རབས་ཐོགས་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་དུང་དཀར་གྱི་རྡུལ་ཕྱིས་པ་བཞིན་དག་པར་འགྱུར་རོ༔ འཁོར་བ་དང་ངན་སོང་དུ་སྐྱེ་བའི་ལས་ཀྱི་སྒོ་ཆོད་པར་འགྱུར་རོ༔ མཐོ་རིས་དང་ཐར་པའི་ས་བོན་ཐེབ་པར་འགྱུར་རོ། གཞན་ཡང་ནད་དང་༔ གདོན་དང་༔ ཡིད་མི་བདེ་བ་ཐམས་ཅད་ཞི་ཞིང་༔ ཚེ་དང་བསོད་ནམས་ཡེ་ཤེས་ཐམས་ཅད་རྒྱས་པར་འགྱུར་རོ༔ བགེགས་དང་བར་དུ་གཅོད་པས་མི་ཚུགས་པའི་སྲུང་བ་ཆེན་པོར་འགྱུར་རོ༔ མདོར་ན་གཞན་མང་དུ་སྨོས་ཅི་དགོས་ཏེ༔ རིལ་བུ་གང་གི་ལྟོར་སོང་བའི་སེམས་ཅན་དེ་འཕགས་པའི་གདུང་འཛིན་པས་སྤྱན་རས་གཟིགས་དབང་ཕྱུག་དང་སྐལ་བ་མཉམ་པར་ཤེས་པར་བྱའོ༔ ཞེས་གསུངས། ། ༈

རིག་འཛིན་དགའ་རབ་རྡོ་རྗེའི་གདུང་རྟེན་རིལ་བུ་ནི། རིག་འཛིན་དེ་ཉིད་ཟག་མེད་འོད་སྐུར་གཤེགས་པའི་སྐབས། འོད་གསལ་ཐུགས་ཀྱི་དཱང་མ་ཐིག་ལེ་དཀར་པོའི་རྣམ་པར་འཇམ་དཔལ་བཤེས་གཉེན་གྱི་ཕྱག་ཏུ་བབས་པ་འགྲོ་བའི་དོན་ཏུ་རིང་བསྲེལ་གྱི་གཟུགས་སུ་གྱུར་པ་ཉིད་རིག་འཛིན་ཤྲཱི་སིདྷ་ལ་གནང་། དེས་ཨོ་རྒྱན་པདྨ་ལ་གནང་ནས་ཤྲཱི་སེདྷ་ཡབ་ཡུམ་དང་། ཨོ་རྒྱན་ཡབ་ཡུམ་གྱི་བྱང་སེམས་བདེ་བར་གཤེགས་པ་ཐམས་ཅད་ཀྱི་ཡེ་ཤེས་འདུས་པའི་དྭང་བཅུད་དང་། འཕགས་པའི་རྣམ་འཕྲུལ་བྲམ་ཟེ་སྐྱེ་བ་བདུན་པ་ཟླ་བ་དྲི་མེད་ཀྱི་གདུང་རུས་བཅས་སྦྱར་ཏེ་སྒྲུབ་གནས་ཀྱི་རྒྱལ་པོ་བདེ་ཆེན་པདྨ་ཤེལ་གྱི་ཕུག་པའི་དབུ་རྩེར་སྙིང་ཏིག་རྣམ་གཉིས་དང་ལྷན་ཅིག་ཏུ་སྦ་བར་མཛད་པ་སྟེ། གཏེར་ལུང་ལས། འཇིག་རྟེན་ཀུན་ཏུ་རྙེད་དཀའ་བ༔ མྱོང་གྲོལ་བྱེ་བའི་རྒྱལ་པོ་ནི༔ རིན་ཆེན་ནོར་བུ་ཀུན་གྱི་མཆོག༔ དགའ་རབ་དགྱེས་པ་རྡོ་རྗེ་ཡི༔ ཤེལ་གྱི་གོང་བུའི་གདུང་རྟེན་ཆེ༔ ཤྲཱི་སིདྷ་ཡབ་ཡུམ་དང་༔ ཨོ་རྒྱན་ཡབ་ཡུམ་སྙོམས་ཞུགས་པས༔ བདེ་བར་གཤེགས་པ་ཐམས་ཅད་ཀྱི༔ ཡེ་ཤེས་གཟུགས་སྐུ་ཞལ་དུ་དྲངས༔ སྐུ་ཡི་དབྱིབས་བརྒྱུད་མཁར་འཁྱིལ་བའི༔ བྱང་ཆུབ་སེམས་ཀྱིས་རབ་ཏུ་སྤེལ༔ འཕགས་མཆོག་སྙིང་རྗེ་ཆེན་པོ་ཡི༔ རྣམ་འཕྲུལ་འབྲེལ་ཚད་དོན་ལྡན་པ༔ བྲམ་ཟེ་ཟླ་བ་དྲི་མེད་ཀྱི༔ གདུང་གི་རུས་པས་བུང་བསྐྱེད་དེ༔ མ་འོངས་སེམས་ཅན་དོན་སླད་དུ༔ སྒྲུབ་གནས་ཀུན་གྱི་རྒྱལ་པོ་ནི༔ པདྨ་ཤེལ་གྱི་ཕུག་པ་ཡི༔ སྒོ་སྐྱོང་དྷཱ་ཀིའི་བྲག་ལ་སྦས༔ ནམ་ཞིག་སྨོན་ལམ་དུས་བབས་ཚེ༔ གཏེར་འབྱིན་ཀུན་གྱི་རྒྱལ་པོ་ཆེ༔ མཆོག་གི་མིང་ཅན་སྐྱེས་བུ་ཡིས༔ ཕྱི་ནང་རྟེན་འབྲེལ་གནད་འགྲིག་པས༔ གློ་བུར་ཐོག་བབས་ཚུལ་དུ་འདོན༔ འཇམ་དཔལ་ཆོས་ཀྱི་བཤེས་གཉེན་གྱི༔ བྱིན་བརླབས་དབང་གི་མིང་ཅན་སོགས༔ ལས་ཅན་རྣམས་ཀྱི་སྐལ་བར་འགྱུར༔ ཞེས་དང་༔ དེ་ལྟ་བུ་ཡི་མྱོང་གྲོལ་རྒྱལ༔ འདི་ཉིད་མྱོང་བས་ངན་སོང་མེད༔ གལ་སྟེ་ངན་སོང་ཡོད་སྲིད་ན༔ རྡོ་རྗེ་སེམས་དཔའ་རྫུན་དུ་ཐལ༔ དགའ་རབ་རྡོ་རྗེའི་བདེན་པ་རྫུན༔ འཇམ་དཔལ་བཤེས་གཉེན་མཁྱེན་རབ་རྫུན༔ ཤྲཱི་སེདྷའི་ཡེ་ཤེས་རྫུན༔ ཨོ་རྒྱན་པདྨའི་རྫུ་འཕྲུལ་རྫུན༔ དེ་རྣམས་འཕགས་ཆེན་ས་བརྙེས་ཕྱིར༔ རྫུན་མི་སྲིད་ཅིང་བདེན་པ་ཆེ༔ དེ་བས་གྲུབ་པའི་རྫས་མཆོག་འདི༔ གནས་སྐབས་བཅུད་ལེན་རྣམས་ཀྱི་མཆོག༔ མཐར་ཐུག་ཐར་པར་འདྲེན་པའི་ལམ༔ བདེ་ཆེན་འཕོ་བ་ཆེན་པོའི་རྫས༔ དྭང་མ་འོད་སྐུར་སྒྲུབ་པའི་བཅུད༔ མཐོང་ཐོས་དྲན་རེག་ཐམས་ཅད་ཀུན༔ རྩོལ་མེད་ངང་གིས་གྲོལ་བྱེད་པ༔ རྡོ་རྗེ་སེམས་དཔའ་ཉིད་དང་མཚུངས༔ ཞེས་ཆེས་མཆོག་ཏུ་བསྔགས་སོ།། །། ༈

[edit]

'dus pa mdo'i bdud rtsi chos sman bde chen rol ba'i dkar chag 'dus pa mdo'i bdud rtsi chos sman bde chen rol ba'i dkar chag bzhugs so//__//oM swa sti/__sprul pa'i gter ston rin po che o rgyan mchog gyur bde chen gling pa la/__sa rta dbyug pa zla ba'i dmar phyogs mkha' 'gro 'du ba'i dus bzang por/__bod chen po'i ljongs kyi thig le'i gnas chen nyi shu rtsa lnga'i ya gyal/__thugs kyi yon tan gyi gnas mchog lho zla karma'i 'bum rdzong nas/__gter srung mtsho sman gyis byin brlabs kyi zil pa phrom mer mngon sum du phul ba'i ngo mtshar gyi rdzas mchog 'dus pa mdo'i chos sman bde chen rol pa'i lo rgyus ni/__go stod 'od 'bar brag nas bzhes pa'i mthong grol sku rten rnam gnyis kyi dkar chag slob dpon rin po che'i gsung la mkha' 'gro ye shes mtsho rgyal gyis zin bris su mdzad pa las/__rdza rgyal go bo phug gi gnas mchog tu:__'dus pa chen po pad+ma 'byung gnas dang :__ye shes sku dang las lus tshul bzung ba'i:__rjes 'brangs tshom bur 'dus pa stong phrag gis:__sgrol byed thugs rje'i rgyal po che ba'i mchog:__shin tu rnam par grol ba'i he ru ka:__chos nyid rang sgras mngon sum bstan pa'i rgyud:__rdo rje bkod pa gsang ba zab mo'i don:__'dus pa mdo yi dkyil 'khor zhal phyes te:__bdud rtsi sman gyi sgrub pa mdzad pa'i tshe:__nam mkha' gang ba'i khrag 'thung dkyil 'khor lha:__rab 'byams sgrub pa'i rdzas la mngon sum thim:__de tshe sman las ye shes 'od 'bar zhing :__dzam gling thams cad tshor grol dri yi khyab:__gang gis mthong dang thos dang dran reg gam:__thun phran gcig la thun chen 'bum spel te:__de nyid til 'bru tsam zhig myong bas kyang :__nad dang sdug bsngal bar gcod kun zhi zhing :__rdo rje'i tshe dang lang tsho mchog tu 'grub:__bde chen ye shes rtsol ba med par 'char:__he ru ka dang spyod yul mnyam pa yis:__skye ba bdun na 'bad med grol ba'i tshul:__DA ki bye bas rdo rje'i glu ru blangs:__zhes sogs rgya cher bsngags pa la mchog tu dad pa dang /__gzhan sman par 'dod pa'i lhag bsam zol med pa dang /__sprul pa'i gter chen rin po che nas kyang legs so'i bka' gnang bas gzengs bstod pa dang /__dpal sa'i tshangs pa chen po rgyal blon gyis yo byad nam mkha' mdzod kyi mthun rkyen rtsal bas rten 'brel dus su son pa bcas/__kho bo cag gis deng dus rdo rje slob dpon gyi gzugs brnyan las kyang ches gzugs brnyan gyi khur mi thegs bzhin rang gir byas te/__sa skyong chos kyi rgyal po'i dbu'i mchod gnas rdo rje 'dzin pa chen po 'jams dbyangs blo gsal dang /__rgya chen chos kyi spyan ldan shar bla ma mkhas btsun grub pa'i bdag nyid kun dga' dpal ldan sogs dbang gis rgyud smin cing /__dam tshig dang sdom pa rnam par dag pa/__lung dang rig par smra ba'i bshes gnyen grogs dang bcas pa 'dus pas/__phun tshogs lugs brgya'i mdun sa dpal sde dge lhun grub steng gi sprul pa'i chos rgyal chen po rnams rim par byon pa'i gzim chung khams gsum zil gnon 'chi med bde ldan bkod par/__don grub ces pa sa mo lug gi gnam lo gsar du 'char ba'i cho 'phrul chen po'i zla ba'i dbang phyogs kyi rgyal ba dang por/__brang ti mkhas pa'i rigs 'khrungs lhar bcas bstan 'gro'i skyabs gcig thar rtse zhabs drung rin po che 'jam dbyangs nam mkha' rgyal mtshan dpal bzang po/__bdag chen shar pa'i rigs kyi thig le klu lding zhabs drung rin po che rnam 'dren rgyal ba'i myu gu chen po shes rab chos kyi rgyal mtshan/__mnga' bdag khri srong lde'u btsan gyi lha sras bar pas bcu'i dbang phyug mu rub btsad po ye shes rol pa rtsal gyi rnam 'phrul rtsod bral dus babs kyi sprul pa'i gter chen chos kyi rgyal po o rgyan mchog gyur bde chen gling pa/__lo chen bai ro'i rnam 'phrul du tshad ma gsum gyis grub pa mkhas btsun grub pa'i khyu mchog 'jam pa'i dbyangs blo gros mtha' yas/__rgyal sras mu tig btsad bo dge ba dpal gyi rnam 'phrul du 'khrul med rdo rje'i lung gis yang yang bsngags pa dpal sa'i tshangs pa sde dge chos kyi rgyal po'i lha sras byang chub sems dpa' dpal ldan 'chi med rtag pa'i rdo rje mched yum blon 'khor dang bcas pas mtshon phun sum tshogs pa'i rdo rje'i 'dus pa chen por/__rnal grol gyi lam mtha' dag theg pa rims dgur 'du ba las/__brgyad pa lung a nu yo ga ste rjes su rnal 'byor gyi theg pa/__dpal rdo rje bkod pa kun 'dus rig pa chen po mdo'i rtsa bshad kyi rgyud rnams la brten nas/__grub pa'i slob dpon bde ba gsal mdzad la sogs pas ji ltar bkral ba'i dgongs pa/__dam nyams dang 'dres khyer gyi sel med cing /__rang bzo dang rnyog pa'i dri ma phra mos kyang ma slad par gter chen chos kyi rgyal po rig 'dzin gter bdag gling pa sku mched kyis legs par bshad pa'i gzhung bzang zla med pa'i rjes su 'brangs te/__theg dgu yongs su rdzogs pa 'og min tshogs chen 'dus pa'i ras bris kyi dkyil 'khor chen por bsnyen sgrub yan lag bzhi dang ldan pa'i tshom bu tshogs kyi sgrub pa dang 'brel bar rdo rje'i gtor blugs kyis mnga' dbul zhing /__bdud rtsi sman gyi dga' ston spel ba la/__thog mar dngos grub kyi snod du rung bar bya ba bsnyen pa'i yan lag la/__nub dang por dkyil chog ltar sa'i chog dang cha gsum rgyas pa sngon du 'gro bas/__sgo 'byed kyi dbang /__gnyis par lha mi/__nyan thos/__rang rgyal/__byang sems te dkyil 'khor bzhi'i dbang dang /__bya spyod thun mong gi sta gon/__gsum par _spyod thun mong gi dbang dngos gzhi'i dbang dang /__yo ga'i sta gon/__bzhi par yo ga'i dngos gzhi'i dbang ste yan lag gi dkyil 'khor rnams dang /__de dag gi skabs su zur 'debs ltar zhi thung khro thung gi gzhung bsrang ba dang /__gtor chog__cha gsum/__tshogs mchod sogs rgyas par bgyis/__lnga par yan lag can rtsa ba'i dkyil 'khor gyi bsnyen pa'i yan lag la/__zhi thung gi gzhung bsrang ba sngon tu 'gro bas tshogs kyi 'khor lo dang /__zhi ba'i sbyin sreg__/dkyil chog ltar yan lag rdzas lnga dang /__yan lag can lha bum slob ma lhag gnas sogs dang /__sgrub pa'i grogs dag gi skong gi cho ga__/drug par/__khro bo'i gzhung bsrang ba sngon tu 'gro bas cha gsum btang zhing mtshams gsum bcad pa dang /__gnas 'khor yo byad byin gyis brlabs pa/__khyad par sman khrol bu dang phye ma'i sgrub pa ni/__sgrub pa'i skabs kyi rtsa dkyil bde ba chen po'i dkyil 'khor du zhal bsgyur ba tsam la brten pa'i skabs 'dir dmigs kyis bsal bar ma gsungs kyang /__phun sum tshogs pa'i yan lag tu/__snga ma nas ro nus kha dog sogs mthun bsdebs shing legs par sbyar ba'i sman rnams/__gter chen chos kyi rgyal pos bka' brgyad bde gshegs 'dus pa'i tshom bu tshogs sgrub chen mo dang 'brel bar yun ring du byin gyis brlabs par ma zad/__'dir yang sa khongs 'dzin byed du khrol bu'i bzlas thun dang /__btags btsag bsre sbol sogs rgyud dang grub pa'i man ngag la yid gzhung par bgyis shing /__de ma thag dngos grub kyi sbyor ba la zhugs pa nye bar bsnyen pa'i yan lag 2)ras bris kyi dkyil 'khor dgram zhing rgyan bkod nas byin dbab/__gral la dgod cing bsnyen par gnang ba'i dbang bskur/__brda sgo dbye zhing sgrub thabs ltar las kyi dbu drangs pa nas/__byin dbabs pa'i bar gyi rjes/__sgrub khog ltar ma TaM bsgral zhing khro bo bcu'i ltangs stabs kyis bgegs gzir/__mchod pa byin rlabs sogs sgrub thabs kyi gzhung rdzogs par bsrangs/__bdun pa nas brtsams te dngos grub kyi thabs dngos la zhugs pa sgrub pa'i yan lag 3)gi gzhung zhag gsum du bsrangs te/__de'ang nyin mtshan dus drug tu sgrub khog ltar bdag cag sogs rtsa ba'i gzhung bsrang mkhan dang /__rtogs ldan bla ma dam pa dkon mchog bstan 'dzin chos kyi rgyal mtshan sogs sgrub pa'i grogs dang bcas pas chog khrigs rgyas 'bring bsdus pa'i tshul gyis phrin las btang ba dang /__ting nge 'dzin dang /__bzlas pa'i rgyun ma chad par bsgrubs shing /__nyin bar par zur 'debs ltar dzapra skul rgyas pa dang /__phyi mar zur 'debs ltar lha dbang du bya ba'i bsregs blugs kyi cho ga sogs kyang bshad tshod ltar lag len du btab/__dngos grub kyi gegs sel dang bogs 'byin pa'i phyir nyul le gzar ba dang /__byin dbabs pa sogs kyang thun re bzhin bgyis/__nub dgu pa'i phyi dro nas dngos grub kyi rdzas rnams legs par bsham ste/__bcu pa'i tho rengs snga bar dngos grub mngon du bya ba sgrub pa chen po'i 4yan lag ni/__sgrub pa'i gzhung bsrangs te sgrub khog ltar bdag don tu dngos grub len pa'i cho ga rgyas par bgyis shing dngos grub kyi dga' ston spel/__zur 'debs ltar rgyas pa'i sbyin sreg gi thab tu bdud rtsi sman gyi phud phul zhing bde ba chen po'i ye shes kyi snang bas khyab pa'i 'dun pa bsgyur/__ru lu'i dzapa? dbyangs dang rdo rje'i bro bskor ba sogs phyag bzhes ltar bgyis/__/bcu gcig par mdo rtsa ba'i dkyil 'khor du sgrub cing mchod pa/__tshogs kyi 'khor lo/__bdag nyid 'jug cing dbang mdor bsdus te blangs pa sogs sngon tu 'gro bas/__nang dang sgrub pa'i dbang ste bum pa'i dbang dang /__dbang gong ma gsum mdor bsdus pa bcas pa rdzogs par phul/__bcu gnyis par gsang dkyil dang /__rdzogs dkyil du dbang gong ma gtad rgya dang bcas phul zhing /__rjes kyi cho ga mar me'i smon lam gdab pa sogs nas brtsams zur 'debs bzhin lung gi lhag chog chab dang bcas bsngo smon shis brjod kyi bar sgrub thabs dang sgrub khog nas ji ltar 'byung ba bzhin bgyis te gnas srung /__bcu gsum pa'i snga bar 'dus pa gnyug mar gnas pa rnams kyi steng du glo bur du lhag pa dang bcas sum brgyar nye ba la tshom chen tu bkra shis tshe'i dbang dang /__phyi rol gyi khor yug tu 'dus pa lnga stong tsam la sgrub pa'i rdzas rnams kyi dngos grub kyi skal ba ci rigs pa sbyin te snying rje'i shugs kyi yid drangs pas ma 'ongs pa na gdul bya rin po che lta bu'i gang zag sha stag tu gyur nas/__tshom bu tshogs kyi sgrub pa'i nye rgyus spyod pas kha sbyor bdun ldan dpal he ru ka'i go 'phang dus myur ba nyid du 'grub par smon pa'ang gcam bu min par snying thag pa nas bgyis so/__/de ltar sbyor dngos rjes gsum tshang ba'i sgo nas phyi nang gi dge mtshan mngon tu gyur ba dang /__don chen po grub pa dang bcas legs par bsgrubs pa'i dam tshig gi rdzas chen po 'di'i rgyun ji srid nam mkha' gnas kyi bar du rtag pa dang /__khyab pa dang /__lhun gyis grub par gnas pa'i phrin las kyis/__snod thams cad 'og min rdo rje bkod pa'i zhing du gnas 'gyur zhing /__bcud kyi yid can mthong thos dran reg gi 'brel pas bsdus pa thams cad don gnyis kyi bsam sbyor yid bzhin du 'grub pa dang /__'chi med rtag pa'i sku can dpal khrag 'thung mngon rdzogs rgyal po'i sku gsung thugs ye shes rdo rje'i ngo bor rnam pa nyi shu'i byang chub par smon pa de de bzhin tu bla ma lha dang mkha' 'gro rgya mtsho'i tshogs kyis byin gyis brlab tu gsol/__/zhes pa'ang mtsho skyes bla ma dgyes pa'i 'bangs rdo rje gzi brjid rtsal gyis bris pa sarba dA su shre yo b+ha ba tu/___/__!_ oM swa sti dzI ban+tu/__spyir rtsa brgyad yan lag stong dang sbyar ba'i dam tshig gi rdzas nyid bsgrub pa'i gzhir bzung ste/__sgrub byed bsnyen sgrub yan lag bzhi ldan mthar phyin pas grub pa'i 'bras bu bdud rtsi rA sa yA na la brten nas gnas skabs dang mthar thug gi dngos grub 'bad med lhun gyis grub pa'i tshul yon tan bdud rtsi'i rol pa'i rgyud sde rnams las bsam gyis mi khyab zhing bgrang las 'das par gsungs pa/__bye brag tu lha sras ye shes rol pa rtsal gyi rnam 'phrul rtsod bral dus bab kyi gter chen chos kyi rgyal po 'gro 'dul mchog gyur bde chen gling pa'i seng gnam brag gi gter byon zab gter gyi tho byang mtsho rgyal gyi phyag bris ma las/__o rgyan chen po pad+ma 'byung gnas dang :__mkhas grub rje 'bangs nyer lngas mchims phu ru:__slob dpon brgyad kyi chos sman gzhir byas nas:__bka' brgyad sgo nas bsgrubs pa'i sman sgrub ni:__tshon tshad me long yu ba can zhig gis:__gzhal ba'i me long bcu phrag bzhugs pa 'di:__me long gcig la me long 'bum phrag spel:__grog ma'i rkang tsam su yi ltor song ba:__de nyid ngan song gnas nas nges par thar:__bla med 'phags pa'i sa la phyin pa ni:__dus gsum rgyal ba rnams kyis yang yang bsngags:__de bas gces par zung shig sa ma ya:__zhes dang /__zab bdun bdud rtsi'i skor las kyang /__bla med mchog gi bdud rtsi 'di:__til 'bru tsam zhig sus myong ba:__he ru ka dang go 'phang mnyam:__zhes gsungs shing /__khyad par bcom ldan 'das rdo rje sems dpa' dngos snang rig 'dzin dga' rab rdo rje'i bdud rtsi chos sman 'di ni bde chen ye shes skyed byed ces bya ste/__'di myong nas dam tshig ma nyams na skye ba bdun nam bcu gnyis tshun nas mchog gi dngos grub 'grub pa dang /__rig 'dzin shrI sed+ha'i bdud rtsi chos sman 'di ni/__gter lung las/__zung 'jug rig 'dzin shrI sed+ha'i:__'chi med bdud rtsi sman gyi bcud:__mthong bas bskal mang sdig sgrib 'dag:__dri tshor tsam gyis nad gdon zhi:__lus la reg pas bde chen skye:__rdul phran tsam zhig myong bas kyang :__mchog thun dngos grub nges par thob:__mdor na 'brel tshad thams cad kun:__ngan song 'khor ba'i sgo 'geg cing :__mtho ris thar pa'i lam rnyed phyir:__rang byung ye shes thugs rje'i mthu:__rtsol med ngang gis 'char ba ste:__de phyir thun phran re re la:__khri 'bum spel zhing bsgrub pa bskyar:__mkha' khyab 'gro don bla na med:__bde chen rdo rje'i gseng lam mo:__zhes sogs ched du bsngags pa dang /__bi ma mi tra ni bdud rtsi sman gyi bka' bab pa'i phyir/__des bsgrub pa'i bdud rtsi nyid gzhan las khyad par du mas 'phags par grub cing /__/'jam dpal bshes gnyen/__klu sgrub/__hU~M kA ra/__bi ma mi tra/__pra b+ha has sti/__rda na saM skr-i ta gu h+ya tsan+d+ra/__shIn+taM gar+b+ha ste rig 'dzin chen po brgyad ni/__don dam par 'jam dpal he ru ka sogs dpal chen sgrub sde brgyad dang tha mi dad par rig 'dzin rtsa ba'i rgyud las bsngags pa'i phyir de rnams mchod rten bde byed brtsegs par gdan 'joms nas bsgrubs pa'i bdud rtsi ni 'jig rten na rnyed par dka' zhing dkon pa'i dam tshig gi rdzas mthong thos dran reg thams cad grol ba dang /__de la gzhi byas te o rgyan rje 'bangs nyer lngas bsgrubs pa'i bdud rtsi'i che ba gong du smos pa'i lung gis grub pas mtshon/__mdor na re re nas bsngags pa'i lung mtha' yas kyang 'dir mdor bsdus phyogs tsam dad ldan spro ba bskyed pa'i ched du smos pa lags/__myong grol ril bu'i skor la/__gter kha 'di'i thugs rje chen po 'khor ba dong sprugs kyi ril bu'i lo rgyus las:__'khor ba dong sprugs ril bu 'di:__bdag dang rje 'bangs stong phrag gis:__bsgrub tshe'i thugs rje'i lha tshogs rnams:__dngos su thim pas sus myong ba:__thugs rje chen por gnyis su med:__gzhan yang 'di las ches cher spel:__ril bu re la khri re bsgrub:__yig drug khri phrag re bzlas nas:__ril bu su dang sus myong ba:__ngan song med par the tshom med:__ces gsungs bas mtshon rgya cher bsngags/___/__!_skye bdun ril bu'i phan yon kyang :__gter gsar thugs sgrub bar chad kun sel gyi zhal gdams snying byang du lung drangs pas/__ngan song dong sprugs 'gro ba 'dul ba'i rgyud chen po las:__bcom ldan 'das pad+ma'i spyan gyis mkha' 'gro ma gar gyi dbang mo la bka' stsal pa:__don gyi bdud rtsi myong grol ni skye ba med pa'o/__/rtags kyi bdud rtsi myong grol ni skye ba bdun pa'i bcud do:__mtshan ma'i bdud rtsi myong grol ni tshul bzhin du bsgrubs pa'i ril bu'o:__'di ni ngan song dang 'khor ba thams cad dong nas sprugs pa'i thabs chen po 'phags pa'i thugs rje las rang byung ba'o:__'gro ba'i re 'dod tshul bzhin du skong ba'i yid bzhin gyi nor bu'o:__'di nyid sems can gang dang gang gis mthong ngam:__thos sam:__reg gam:__mgul du 'chang ba'am:__dri tshor ba'am:__khar myong ba sogs 'brel tshad thams cad kyi tshe rabs thogs ma med pa nas bsags pa'i sdig sgrib thams cad dung dkar gyi rdul phyis pa bzhin dag par 'gyur ro:__'khor ba dang ngan song du skye ba'i las kyi sgo chod par 'gyur ro:__mtho ris dang thar pa'i sa bon theb par 'gyur ro/__gzhan yang nad dang :__gdon dang :__yid mi bde ba thams cad zhi zhing :__tshe dang bsod nams ye shes thams cad rgyas par 'gyur ro:__bgegs dang bar du gcod pas mi tshugs pa'i srung ba chen por 'gyur ro:__mdor na gzhan mang du smos ci dgos te:__ril bu gang gi ltor song ba'i sems can de 'phags pa'i gdung 'dzin pas spyan ras gzigs dbang phyug dang skal ba mnyam par shes par bya'o:__zhes gsungs/__/__!_ rig 'dzin dga' rab rdo rje'i gdung rten ril bu ni/__rig 'dzin de nyid zag med 'od skur gshegs pa'i skabs/__'od gsal thugs kyi dAng ma thig le dkar po'i rnam par 'jam dpal bshes gnyen gyi phyag tu babs pa 'gro ba'i don tu ring bsrel gyi gzugs su gyur pa nyid rig 'dzin shrI sid+ha la gnang /__des o rgyan pad+ma la gnang nas shrI sed+ha yab yum dang /__o rgyan yab yum gyi byang sems bde bar gshegs pa thams cad kyi ye shes 'dus pa'i dwang bcud dang /__'phags pa'i rnam 'phrul bram ze skye ba bdun pa zla ba dri med kyi gdung rus bcas sbyar te sgrub gnas kyi rgyal po bde chen pad+ma shel gyi phug pa'i dbu rtser snying tig rnam gnyis dang lhan cig tu sba bar mdzad pa ste/__gter lung las/__'jig rten kun tu rnyed dka' ba:__myong grol bye ba'i rgyal po ni:__rin chen nor bu kun gyi mchog:__dga' rab dgyes pa rdo rje yi:__shel gyi gong bu'i gdung rten che:__shrI sid+ha yab yum dang :__o rgyan yab yum snyoms zhugs pas:__bde bar gshegs pa thams cad kyi:__ye shes gzugs sku zhal du drangs:__sku yi dbyibs brgyud mkhar 'khyil ba'i:__byang chub sems kyis rab tu spel:__'phags mchog snying rje chen po yi:__rnam 'phrul 'brel tshad don ldan pa:__bram ze zla ba dri med kyi:__gdung gi rus pas bung bskyed de:__ma 'ongs sems can don slad du:__sgrub gnas kun gyi rgyal po ni:__pad+ma shel gyi phug pa yi:__sgo skyong d+hA ki'i brag la sbas:__nam zhig smon lam dus babs tshe:__gter 'byin kun gyi rgyal po che:__mchog gi ming can skyes bu yis:__phyi nang rten 'brel gnad 'grig pas:__glo bur thog babs tshul du 'don:__'jam dpal chos kyi bshes gnyen gyi:__byin brlabs dbang gi ming can sogs:__las can rnams kyi skal bar 'gyur:__zhes dang :__de lta bu yi myong grol rgyal:__'di nyid myong bas ngan song med:__gal ste ngan song yod srid na:__rdo rje sems dpa' rdzun du thal:__dga' rab rdo rje'i bden pa rdzun:__'jam dpal bshes gnyen mkhyen rab rdzun:__shrI sed+ha'i ye shes rdzun:__o rgyan pad+ma'i rdzu 'phrul rdzun:__de rnams 'phags chen sa brnyes phyir:__rdzun mi srid cing bden pa che:__de bas grub pa'i rdzas mchog 'di:__gnas skabs bcud len rnams kyi mchog:__mthar thug thar par 'dren pa'i lam:__bde chen 'pho ba chen po'i rdzas:__dwang ma 'od skur sgrub pa'i bcud:__mthong thos dran reg thams cad kun:__rtsol med ngang gis grol byed pa:__rdo rje sems dpa' nyid dang mtshungs:__zhes ches mchog tu bsngags so//__//__!