JKW-KABUM-16-MA-002

🚧 This website is under continued development. We appreciate your patience!

Previous Section Back to Volume PageNext Section

Wylie title	rig 'dzin thugs sgrub dpal chen 'dus pa'i rgyun khyer phyag rgya gcig pa
Location	mkhyen brtse'i bka' 'bum Volume 16, sde tshan 2, Pages 17-21 (Folios 1a1 to 3a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jam dbyangs mkhyen brtse'i dbang po. rig 'dzin thugs sgrub dpal chen 'dus pa'i rgyun khyer phyag rgya gcig pa. In 'jam dbyangs mkhyen brtse'i dbang po'i bka' 'bum, Vol. 16: 17-21. Khams sde dge rdzong sar dgon: Rdzong sar blo gros phun tshogs, 2020.
Genre	Daily Practice - rgyun khyer
Cycle	རིག་འཛིན་ཐུགས་སྒྲུབ་དཔལ་ཆེན་འདུས་པ་ (rig 'dzin thugs sgrub dpal chen 'dus pa)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Deity	dpal chen
Lotsawa House Link	https://www.lotsawahouse.org/tibetan-masters/jamyang-khyentse-wangpo/palchen-dupa-daily-practice
Colophon	།ཞེས་པའང་གཏེར་གཞུང་རྩ་བའི་དགོངས་དོན་རྒྱུད་སྡེའི་རིང་ལུགས་དང་འབྲེལ་བར་ཀུན་མཁྱེན་བླ་མ་དགྱེས་པའི་འབངས་ཀྱིས་བྲིས་པ་དགེ། །།སརྦ་མངྒ་ལཾ།།
	zhes pa'ang gter gzhung rtsa ba'i dgongs don rgyud sde'i ring lugs dang 'brel bar kun mkhyen bla ma dgyes pa'i 'bangs kyis bris pa dge/__//sarba mang+ga laM//

1 Texts in this Section (sde tshan or chos tshan)

17-21	རིག་འཛིན་ཐུགས་སྒྲུབ་དཔལ་ཆེན་འདུས་པའི་རྒྱུན་ཁྱེར་ཕྱག་རྒྱ་གཅིག་པ། rig 'dzin thugs sgrub dpal chen 'dus pa'i rgyun khyer phyag rgya gcig pa Daily Practice - rgyun khyer	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །རིག་འཛིན་ཐུགས་སྒྲུབ་དཔལ་ཆེན་འདུས་པའི་རྒྱུན་ཁྱེར་ཕྱག་རྒྱ་གཅིག་པ་བཞུགས་སོ།

།ན་མོ་གུ་རུ་མ་ཧཱ་ཤྲཱི་ཡེ། རིག་འཛིན་ཐུགས་སྒྲུབ་དཔལ་ཆེན་འདུས་པའི་རྒྱུན་ཁྱེར་ཕྱག་རྒྱ་གཅིག་པའི་རྣལ་འབྱོར་ལ་གཉིས། དངོས་དང་། ཞར་ལས་བྱུང་བའོ། །དང་པོ་ལ་གསུམ། སྦྱོར་བ་ཚོགས་བསག་པ། དངོས་གཞི་བསྐྱེད་བཟླས་ཀྱི་རྣལ་འབྱོར། རྗེས་ཐུན་མཚམས་ཀྱི་བྱ་བ་ལ་འཇུག་པའོ། །དང་པོ་ནི། ཚོགས་ཞིང་མཁའ་ཁྱབ་ཏུ་སད་པའི་སྤྱན་སྔར། རྡོ་རྗེ་སློབ་དཔོན་སངས་རྒྱས་དཔལ༔ ཞེས་སོགས་ལན་གསུམ་གྱིས་ཚོགས་བསགས་རྗེས་རང་ལ་བསྟིམ། གཉིས་པ་ལ་གཉིས། ལྷ་བསྐྱེད་པ་དང་། སྔགས་བཟླ་བའོ། །དང་པོ་ནི། ཧཱུྃ། རང་བྱུང་རིག་པ་དེ་བཞིན་ཉིད༔ རོལ་རྩལ་ཀུན་སྣང་སྙིང་རྗེའི་གདངས༔ རྒྱུ་ཡི་ཧཱུྃ་གིས་སྣོད་བཅུད་སྦྱངས༔ འབྱུང་བ་རིམ་བརྩེགས་རི་རབ་སྟེང་༔ ཕྱི་རོལ་རྡོ་རྗེའི་སྲུང་འཁོར་དང་༔ དྲག་པོའི་གཞལ་ཡས་མཚན་རྫོགས་དབུས༔ བྱོལ་སོང་དྲེགས་པ་པད་ཉིའི་གདན༔ དེ་སྟེང་ཧཱུྃ་བབས་ཡོངས་གྱུར་ལས༔ རྡོ་རྗེ་སྔོན་པོ་རྩེ་ལྔ་པ༔ དེ་ལས་སྐད་ཅིག་དྲན་རྫོགས་སུ༔ ཆེ་མཆོག་བཛྲ་ཐོད་ཕྲེང་རྩལ༔ མཐིང་ནག་དབུ་གསུམ་ཕྱག་དྲུག་པ༔ ཞབས་བཞི་གྱད་ཀྱི་དོར་སྟབས་བགྲད༔ རྒྱལ་འགོང་བདུད་བཞིའི་དཔྱི་ནས་བརྫིས༔ གཡས་དཀར་དགོད་ཅིང་གཤེ་བའི་ཞལ༔ གཡོན་དམར་ཨཾ་གཙིགས་འཇིགས་པར་སྟོན༔ དབུས་མཐིང་རྔམས་བརྗིད་ཁྲོ་བོའི་ཞལ༔ སྐུ་མཆོག་རིགས་ལྔ་དབུ་ལ་རྫོགས༔ རྡོ་རྗེའི་བྱ་ཁྱུང་སྤྱི་བོར་ལྡིང་༔ སྤྱན་དགུ་ལྗགས་འདྲིལ་མཆེ་བ་གཙིགས༔ གཡས་ཀྱི་དང་པོ་རྡོ་རྗེ་དང་༔ བར་པ་ཁ་ཊྭཱཾ་ཐ་མ་མེ༔ གཡོན་གྱི་དང་པོ་བྷནྡྷ་དམར༔ བར་པ་ཐོང་གཤོལ་ཐ་མ་ན༔ ལྕགས་ཀྱི་སྡིག་པ་མགོ་དགུ་བསྣམས༔ དུར་ཁྲོད་དཔལ་གྱི་ཆས་རྣམས་རྫོགས༔ གནམ་ཞལ་ཡུམ་མཆོག་ཀུན་བཟང་སྦྱོར༔ གཡས་པ་གཙོ་འཁྱུད་ཁ་ཊྭཱཾ་བསྣམས༔ གཡོན་པ་ཆགས་པའི་དུང་དམར་སྟོབ༔ སྐུ་མདོག་སྔོན་མོ་རྒྱན་དང་ལྡན༔ བསྐལ་པའི་མེ་ཕུང་འབར་བའི་ཀློང་༔ དགའ་བཞི་བདེ་བ་ཆེན་པོར་བཞུགས༔ དམ་ཚིག་ཡེ་ཤེས་དབྱེར་མེད་གྱུར༔ ཅེས་བརྗོད་ཅིང་བསམས་ལ་ལྷར་སྣང་སྒྱུ་མ་ལྟ་བུ་ལ་སེམས་ཡུན་རིང་དུ་གཟུང་། གཉིས་པ་ལ་གཉིས། བསྙེན་པ་དང་། སྒྲུབ་པའོ། །དང་པོ་ནི། བདག་ཉིད་ཆེ་མཆོག་ཡབ་ཡུམ་གྱི༔ ཐུགས་མཆོག་འོད་ཀྱི་དྲྭ་བའི་ཀློང་༔ གསལ་སྟོང་ཟུང་འཇུག་ཉི་ཟླའི་སྟེང་༔ ཀུན་བཟང་ཡབ་ཡུམ་ཞལ་སྦྱོར་ལ༔ རྡོ་རྗེ་སྐྱིལ་ཀྲུང་མཉམ་གཞག་ཅན༔ ཐུགས་ཀར་བདེ་གཤེགས་ཀུན་གྱི་སྲོག༔ ཡི་གེ་འབྲུ་གསུམ་བརྩེགས་མར་གསལ༔ དེ་ལས་འོད་འཕྲོས་སྣང་སྲིད་ཀུན༔ ཡེ་ཤེས་ལྔ་རུ་སངས་རྒྱས་གྱུར༔ འཁོར་འདས་རོ་གཅིག་ལྟ་བའི་ངང་༔ ཨོཾ་ཨཱཿཧཱུྃ༔ ཞེས་ཡིད་བཟླས་སམ་ཤུབ་བུར་བཟླ། གཉིས་པ་ནི། ཡེ་ཤེས་རྒྱལ་པོ་སྟང་དཔྱལ་གྱི༔ ཐུགས་ཀར་པདྨ་ཉི་ཟླའི་སྟེང་༔ གསེར་གྱི་རྡོ་རྗེ་རྭ་དགུ་པའི༔ དབུས་རྭར་ཏིང་འཛིན་སེམས་དཔའ་ཧཱུྃ༔ རྭ་བརྒྱད་མདུན་ནས་རིམ་པ་བཞིན༔ ཐོག་མཐའ་གཉིས་དང་གྲོང་ཁྱེར་དྲུག༔ ཀུན་ཀྱང་ཐུགས་ཀའི་ཧཱུྃ་ལ་བལྟ༔ ཤིན་ཏུ་ཕྲ་ཞིང་འོད་ཟེར་འབར༔ ཨོཾ་གུ་རུ་ཤྲཱི་བཛྲ་ཡཀྴ་ཀྲོ་དྷ་ཙིཏྟ་ཧཱུྃ༔ ལྷ་ལ་གསལ་སྣང་ཐོན་པ་དང་༔ འཕྲོ་འདུའི་གཟེར་ལ་ལྡེ་ཁ་བསྒྱུར༔ རང་རང་སྔགས་ཀྱི་ཡིག་འབྲུ་ལས༔ སྔགས་ཕྲེང་ལུ་གུ་རྒྱུད་དུ་ཐོན༔ ཡབ་ནས་ཡུམ་གྱི་ཞལ་དུ་ཞུགས༔ སྐུ་ཡི་དབྱིབས་བརྒྱུད་མཁའ་གསང་ནས༔ རྡོ་རྗེ་ནོར་བུའི་ལམ་ཞུགས་ཏེ༔ ཐུགས་སྲོག་ཧཱུྃ་ལ་ཐིམ་ཞིང་འཁོར༔ བདེ་བ་ཆེན་པོའི་འོད་ཟེར་གྱིས༔ རྒྱལ་བ་མཆོད་ཅིང་དངོས་གྲུབ་དབྱིག༔ ཐམས་ཅད་བསྡུས་ནས་རང་ལ་བསྟིམས༔ སླར་འཕྲོས་འགྲོ་བའི་ལས་ཉོན་སྦྱངས༔ ཞེས་དམིགས་ཤིང་བཟླ། སྤྲོ་ན་ཧཱུྃ་བཟླས་ཀྱང་བྱ། གསུམ་པ་ནི། རྟེན་དང་བརྟེན་པའི་སྣང་ཆ་ཀུན། །འོད་གསལ་གདོད་མའི་གཤིས་སུ་ཐིམ། །སླར་ཡང་ཟུང་འཇུག་སྒྱུ་མའི་སྐུའི། །གནས་གསུམ་རྡོ་རྗེའི་འབྲུ་གསུམ་མཚན། །བཛྲ་རཀྵ་ཧཱུྃ། དགེ་བ་འདི་ཡིས་མྱུར་དུ་བདག །ཧེ་རུ་ཀ་དཔལ་འགྲུབ་གྱུར་ནས། །ཞེས་སོགས་བསྔོ་སྨོན་དང་ཤིས་བརྗོད་ཀྱིས་མཚམས་སྦྱར་ཏེ་སྤྱོད་ལམ་ལ་འཇུག་གོ། །གཉིས་པ་ཞར་བྱུང་ལྷ་ཚོགས་ཡོངས་རྫོགས་ལུས་དཀྱིལ་ལྟར་བསྒོམ་པར་སྤྲོ་ན། ཚོགས་བསག་ནས་བཟུང་སྟེ། དགའ་བཞི་བདེ་བ་ཆེན་པོར་བཞུགས༔ ཞེས་པའི་བར་གོང་ལྟར་ལ། དེ་ནས། དཔལ་ཆེན་ཡབ་ཡུམ་སྦྱོར་མཚམས་ནས༔ མཐིང་ནག་ཧཱུྃ་གི་ཡི་གེ་སྤྲོས༔ རྡོ་རྗེའི་སྐུ་ཡི་གནས་རྣམས་སུ༔ ཁྲག་འཐུང་ཡབ་ཡུམ་སྲས་བཅས་བསྐྱེད༔ ཧཱུྃཿཧཱུྃཿཧཱུྃཿཧཱུྃཿཧཱུྃཿཧཱུྃཿཧཱུྃཿཧཱུྃཿ ཧཱུྃ་ཆེན་སྔགས་ཀྱི་སྒྲ་བསྒྲགས་པས༔ ཁྲོ་རྒྱལ་དཀྱིལ་འཁོར་ལྷུན་གྱིས་གྲུབ༔ བསྐལ་པའི་མེ་ལྟར་འབར་ཀློང་ནས༔ རང་བྱུང་ཡེ་ཤེས་ཁྲོ་ཚོགས་ཤར༔ སྤྱི་བོར་འཇམ་དཔལ་གཤིན་རྗེ་སེར༔ བེ་ཅོན་གཡས་ལ་སྡིགས་མཛུབ་གཡོན༔ མགྲིན་པར་དབང་ཆེན་རྟ་མགྲིན་དམར༔ རལ་གྲི་གཡས་ལ་པདྨ་གཡོན༔ ཐུགས་ཀར་བཛྲ་ཧེ་རུ་མཐིང་༔ རྡོ་རྗེ་གཡས་ལ་དུང་ཁྲག་གཡོན༔ ལྟེ་བར་རྡོ་རྗེ་གཞོན་ནུ་ལྗང་༔ ཕྱག་གཉིས་རྡོ་རྗེ་ཕུར་བུ་འདྲིལ༔ གསང་བར་བླ་མེད་ཧེ་རུ་ཀ༔ མཐིང་ནག་བྱ་ཁྱུང་ཞིང་དབྱུག་ཐོགས༔ སྤྱི་གཙུག་རིག་འཛིན་རྡོ་རྗེ་དཀར༔ ཐོད་དབྱུག་གཡས་ལ་དྲིལ་བུ་གཡོན༔ བརླ་གཡས་དྲེགས་པ་ཀུན་འདུལ་མཐིང་༔ ཐོ་བ་གཡས་ལ་མདུང་ཐུང་གཡོན༔ བརླ་གཡོན་སྟོབས་ལྡན་ནག་པོ་ཆེ༔ ལྕགས་ཀྱུ་གཡས་ལ་སྦྲུལ་ཞགས་གཡོན༔ ཀུན་ཀྱང་རིགས་བཞིའི་འཁོར་དང་བཅས༔ ཞབས་ཀྱིས་ལྷ་ཆེན་ཕོ་མོ་བརྫིས༔ ཆོས་ཉིད་མི་འགྱུར་ཡུམ་རྣམས་མཐིང་༔ གྲི་གུག་ཐོད་འཛིན་ཡབ་ལ་འཁྱུད༔ ཡན་ལག་སྒོ་བ་རིགས་བཞི་ནི༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ ཚོམ་བུ་དགུ་ཡི་གཙོ་མཆོག་ལས༔ བདུན་བརྒྱ་ཉེར་ལྔའི་ལྷ་ཚོགས་ཀུན༔ ཉི་ལས་འོད་ཟེར་བཞིན་དུ་ཤར༔ སྐུ་མདོག་ཕྱག་མཚན་རྒྱན་ཆ་ལུགས༔ མ་འདྲེས་ཡོངས་རྫོགས་ཆེན་པོར་གསལ༔ དམ་ཚིག་ཡེ་ཤེས་དབྱེར་མེད་གྱུར༔ ཅེས་རྡོ་རྗེའི་ལུས་ལ་གདོད་ནས་གྲུབ་པའི་གཉུག་མའི་ལྷ་སྔགས་ཀྱི་རྐྱེན་གྱིས་སད་པས་གཙོ་བོ་རྣམས་ཞལ་ཕྱག་ཡོངས་རྫོགས་དང་འཁོར་རྣམས་མོས་བསྐྱེད་ཀྱི་ཚུལ་དུ་གསལ་གདབ། བསྙེན་སྒྲུབ་ཀྱི་བཟླས་པ་གོང་ལྟར་དང་། ཁྲོ་བོ་སྤྱི་སྔགས་བཟླ་བར་སྤྲོ་ན། སྐུའི་གནས་ཀྱི་ལྷ་སོ་སོར་སྔགས་ཕྲེང་དོ་ལིའི་དམིགས་པ་དང་། ལྷ་ཚོགས་ཀུན་ཀྱང་སྤྱི་དྲིལ་སྔགས༔ འུར་ཆེམ་འབྲུག་གི་སྒྲ་བཞིན་སྒྲོགས༔ ལྔ་ལྡན་འོད་ཀྱིས་སྟོང་གསུམ་གང་༔ ནད་གདོན་ཞི་ཞིང་ཚེ་དཔལ་རྒྱས༔ ཁམས་གསུམ་དབང་འདུས་དམིགས་བྱ་བསྒྲལ༔ རིག་འཛིན་བཞི་ཡི་གནས་ཐོབ་གྱུར༔ ཅེས་བརྗོད་ཅིང་དམིགས་ལ། ཨོཾ་བཛྲ་ཙཎྜ་སརྦ་དུཥྟཱཾ་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ ཅེས་ཅི་ནུས་བཟླ། རྗེས་ཉེར་བསྡུ་སོགས་འདྲའོ། །དེའང་བསྙེན་སྒྲུབ་སྔོན་དུ་མ་སོང་བའི་ལས་དང་པོ་པའི་རྒྱུན་ཁྱེར་ལ་སྔ་མ་དང་། བསྙེན་སྒྲུབ་ཐེམས་ཤིང་རྩ་བའི་བསྐྱེད་རིམ་ལ་གསལ་བརྟན་ཅི་རིགས་པ་ཐོབ་པས་གཙོ་བོར་ལུས་དཀྱིལ་ལྟར་ཉམས་སུ་བླངས་ན་ལེགས་པར་འགྱུར་རོ། །ཞེས་པའང་གཏེར་གཞུང་རྩ་བའི་དགོངས་དོན་རྒྱུད་སྡེའི་རིང་ལུགས་དང་འབྲེལ་བར་ཀུན་མཁྱེན་བླ་མ་དགྱེས་པའི་འབངས་ཀྱིས་བྲིས་པ་དགེ། །།སརྦ་མངྒ་ལཾ།།

[edit]

rig 'dzin thugs sgrub dpal chen 'dus pa'i rgyun khyer phyag rgya gcig pa/___ @#/_/rig 'dzin thugs sgrub dpal chen 'dus pa'i rgyun khyer phyag rgya gcig pa bzhugs so/__/ na mo gu ru ma hA shrI ye/__rig 'dzin thugs sgrub dpal chen 'dus pa'i rgyun khyer phyag rgya gcig pa'i rnal 'byor la gnyis/__dngos dang /__zhar las byung ba'o/__/dang po la gsum/__sbyor ba tshogs bsag pa/__dngos gzhi bskyed bzlas kyi rnal 'byor/__rjes thun mtshams kyi bya ba la 'jug pa'o/__/dang po ni/__tshogs zhing mkha' khyab tu sad pa'i spyan sngar/__rdo rje slob dpon sangs rgyas dpal:__zhes sogs lan gsum gyis tshogs bsags rjes rang la bstim/__gnyis pa la gnyis/__lha bskyed pa dang /__sngags bzla ba'o/__/dang po ni/__hU~M/__rang byung rig pa de bzhin nyid:__rol rtsal kun snang snying rje'i gdangs:__rgyu yi hU~M gis snod bcud sbyangs:__'byung ba rim brtsegs ri rab steng :__phyi rol rdo rje'i srung 'khor dang :__drag po'i gzhal yas mtshan rdzogs dbus:__byol song dregs pa pad nyi'i gdan:__de steng hU~M babs yongs gyur las:__rdo rje sngon po rtse lnga pa:__de las skad cig dran rdzogs su:__che mchog badz+ra thod phreng rtsal:__mthing nag dbu gsum phyag drug pa:__zhabs bzhi gyad kyi dor stabs bgrad:__rgyal 'gong bdud bzhi'i dpyi nas brdzis:__g.yas dkar dgod cing gshe ba'i zhal:__g.yon dmar aM gtsigs 'jigs par ston:__dbus mthing rngams brjid khro bo'i zhal:__sku mchog rigs lnga dbu la rdzogs:__rdo rje'i bya khyung spyi bor lding :__spyan dgu ljags 'dril mche ba gtsigs:__g.yas kyi dang po rdo rje dang :__bar pa kha T+wAM tha ma me:__g.yon gyi dang po b+han+d+ha dmar:__bar pa thong gshol tha ma na:__lcags kyi sdig pa mgo dgu bsnams:__dur khrod dpal gyi chas rnams rdzogs:__gnam zhal yum mchog kun bzang sbyor:__g.yas pa gtso 'khyud kha T+wAM bsnams:__g.yon pa chags pa'i dung dmar stob:__sku mdog sngon mo rgyan dang ldan:__bskal pa'i me phung 'bar ba'i klong :__dga' bzhi bde ba chen por bzhugs:__dam tshig ye shes dbyer med gyur:__ces brjod cing bsams la lhar snang sgyu ma lta bu la sems yun ring du gzung /__gnyis pa la gnyis/__bsnyen pa dang /__sgrub pa'o/__/dang po ni/__bdag nyid che mchog yab yum gyi:__thugs mchog 'od kyi drwa ba'i klong :__gsal stong zung 'jug nyi zla'i steng :__kun bzang yab yum zhal sbyor la:__rdo rje skyil krung mnyam gzhag can:__thugs kar bde gshegs kun gyi srog:__yi ge 'bru gsum brtsegs mar gsal:__de las 'od 'phros snang srid kun:__ye shes lnga ru sangs rgyas gyur:__'khor 'das ro gcig lta ba'i ngang :__oM AHhU~M:__zhes yid bzlas sam shub bur bzla/__gnyis pa ni/__ye shes rgyal po stang dpyal gyi:__thugs kar pad+ma nyi zla'i steng :__gser gyi rdo rje rwa dgu pa'i:__dbus rwar ting 'dzin sems dpa' hU~M:__rwa brgyad mdun nas rim pa bzhin:__thog mtha' gnyis dang grong khyer drug:__kun kyang thugs ka'i hU~M la blta:__shin tu phra zhing 'od zer 'bar:__oM gu ru shrI badz+ra yak+sha kro d+ha tsit+ta hU~M:__lha la gsal snang thon pa dang :__'phro 'du'i gzer la lde kha bsgyur:__rang rang sngags kyi yig 'bru las:__sngags phreng lu gu rgyud du thon:__yab nas yum gyi zhal du zhugs:__sku yi dbyibs brgyud mkha' gsang nas:__rdo rje nor bu'i lam zhugs te:__thugs srog hU~M la thim zhing 'khor:__bde ba chen po'i 'od zer gyis:__rgyal ba mchod cing dngos grub dbyig:__thams cad bsdus nas rang la bstims:__slar 'phros 'gro ba'i las nyon sbyangs:__zhes dmigs shing bzla/__spro na hU~M bzlas kyang bya/__gsum pa ni/__rten dang brten pa'i snang cha kun/__/'od gsal gdod ma'i gshis su thim/__/slar yang zung 'jug sgyu ma'i sku'i/__/gnas gsum rdo rje'i 'bru gsum mtshan/__/badz+ra rak+Sha hU~M/__dge ba 'di yis myur du bdag__/he ru ka dpal 'grub gyur nas/__/zhes sogs bsngo smon dang shis brjod kyis mtshams sbyar te spyod lam la 'jug go/__/gnyis pa zhar byung lha tshogs yongs rdzogs lus dkyil ltar bsgom par spro na/__tshogs bsag nas bzung ste/__dga' bzhi bde ba chen por bzhugs:__zhes pa'i bar gong ltar la/__de nas/__dpal chen yab yum sbyor mtshams nas:__mthing nag hU~M gi yi ge spros:__rdo rje'i sku yi gnas rnams su:__khrag 'thung yab yum sras bcas bskyed:__hU~MHhU~MHhU~MHhU~MHhU~MHhU~MHhU~MHhU~MH__hU~M chen sngags kyi sgra bsgrags pas:__khro rgyal dkyil 'khor lhun gyis grub:__bskal pa'i me ltar 'bar klong nas:__rang byung ye shes khro tshogs shar:__spyi bor 'jam dpal gshin rje ser:__be con g.yas la sdigs mdzub g.yon:__mgrin par dbang chen rta mgrin dmar:__ral gri g.yas la pad+ma g.yon:__thugs kar badz+ra he ru mthing :__rdo rje g.yas la dung khrag g.yon:__lte bar rdo rje gzhon nu ljang :__phyag gnyis rdo rje phur bu 'dril:__gsang bar bla med he ru ka:__mthing nag bya khyung zhing dbyug thogs:__spyi gtsug rig 'dzin rdo rje dkar:__thod dbyug g.yas la dril bu g.yon:__brla g.yas dregs pa kun 'dul mthing :__tho ba g.yas la mdung thung g.yon:__brla g.yon stobs ldan nag po che:__lcags kyu g.yas la sbrul zhags g.yon:__kun kyang rigs bzhi'i 'khor dang bcas:__zhabs kyis lha chen pho mo brdzis:__chos nyid mi 'gyur yum rnams mthing :__gri gug thod 'dzin yab la 'khyud:__yan lag sgo ba rigs bzhi ni:__lcags kyu zhags pa lcags sgrog dril:__tshom bu dgu yi gtso mchog las:__bdun brgya nyer lnga'i lha tshogs kun:__nyi las 'od zer bzhin du shar:__sku mdog phyag mtshan rgyan cha lugs:__ma 'dres yongs rdzogs chen por gsal:__dam tshig ye shes dbyer med gyur:__ces rdo rje'i lus la gdod nas grub pa'i gnyug ma'i lha sngags kyi rkyen gyis sad pas gtso bo rnams zhal phyag yongs rdzogs dang 'khor rnams mos bskyed kyi tshul du gsal gdab/__bsnyen sgrub kyi bzlas pa gong ltar dang /__khro bo spyi sngags bzla bar spro na/__sku'i gnas kyi lha so sor sngags phreng do li'i dmigs pa dang /__lha tshogs kun kyang spyi dril sngags:__'ur chem 'brug gi sgra bzhin sgrogs:__lnga ldan 'od kyis stong gsum gang :__nad gdon zhi zhing tshe dpal rgyas:__khams gsum dbang 'dus dmigs bya bsgral:__rig 'dzin bzhi yi gnas thob gyur:__ces brjod cing dmigs la/__oM badz+ra tsaN+Da sarba duSh+tAM ta ka ha na da ha pa tsa hU~M phaT:__ces ci nus bzla/__rjes nyer bsdu sogs 'dra'o/__/de'ang bsnyen sgrub sngon du ma song ba'i las dang po pa'i rgyun khyer la snga ma dang /__bsnyen sgrub thems shing rtsa ba'i bskyed rim la gsal brtan ci rigs pa thob pas gtso bor lus dkyil ltar nyams su blangs na legs par 'gyur ro/__/zhes pa'ang gter gzhung rtsa ba'i dgongs don rgyud sde'i ring lugs dang 'brel bar kun mkhyen bla ma dgyes pa'i 'bangs kyis bris pa dge/__//sarba mang+ga laM//