JKW-KABUM-12-NA-013

🚧 This website is under continued development. We appreciate your patience!

Previous Section Back to Volume PageNext Section

Wylie title	bla ma gsang 'dus tshes bcu'i mchod pa dang 'brel ba'i gtor dbang bskur tshul
Location	mkhyen brtse'i bka' 'bum Volume 12, sde tshan 13, Pages 467-479 (Folios 1a to 7a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	གུ་རུ་ཆོས་ཀྱི་དབང་ཕྱུག་ (Gu ru chos kyi dbang phyug)
Citation	'jam dbyangs mkhyen brtse'i dbang po. bla ma gsang 'dus tshes bcu'i mchod pa dang 'brel ba'i gtor dbang bskur tshul. In 'jam dbyangs mkhyen brtse'i dbang po'i bka' 'bum, Vol. 12: 467-479. Khams sde dge rdzong sar dgon: Rdzong sar blo gros phun tshogs, 2020.
Genre	Torma Empowerments - gtor dbang
Cycle	བླ་མ་གསང་བ་འདུས་པ་ (bla ma gsang ba 'dus pa)
Colophon	།བླ་མ་བསང་བ་འདུས་པའི་ཚེས་བཅུའི་མཆོད་པ་དང་འབྲེལ་བར་གཏོར་དབང་གནད་ཀྱི་ཤོག་གཅིག་མ་ཇི་ལྟར་བསྐུར་བའི་ཚུལ་བཀླགས་ཆོག་ཏུ་བཀོད་པ་འདིའང་། ཤཱཀྱའི་དགེ་སློང་རིག་པ་འཛིན་པ་མཚོ་སྐྱེས་བླ་མ་དགྱེས་པའི་འབངས་ཀྱིས་སྦྱར་བའི་དགེ་བས་མཐའ་ཀླས་པའི་ཡིད་ཅན་རྒྱ་མཚོའི་རྡུལ་སྙེད་པདྨ་དྲྭ་བ་ཅན་གྱི་དགའ་ཚལ་དུ་འདོད་རྒུར་རྩེན་པའི་རྒྱུར་གྱུར་ཅིག། །།སརྦ་དཱ་ཀ་ལྱཱ་ཎཾ་བྷ་བ་ཏུ།།
	bla ma bsang ba 'dus pa'i tshes bcu'i mchod pa dang 'brel bar gtor dbang gnad kyi shog gcig ma ji ltar bskur ba'i tshul bklags chog tu bkod pa 'di'ang /__shAkya'i dge slong rig pa 'dzin pa mtsho skyes bla ma dgyes pa'i 'bangs kyis sbyar ba'i dge bas mtha' klas pa'i yid can rgya mtsho'i rdul snyed pad+ma drwa ba can gyi dga' tshal du 'dod rgur rtsen pa'i rgyur gyur cig/__//sarba dA ka l+yA NaM b+ha ba tu

1 Texts in this Section (sde tshan or chos tshan)

467-479	བླ་མ་གསང་འདུས་ཚེས་བཅུའི་མཆོད་པ་དང་འབྲེལ་བའི་གཏོར་དབང་བསྐུར་ཚུལ། bla ma gsang 'dus tshes bcu'i mchod pa dang 'brel ba'i gtor dbang bskur tshul Torma Empowerments - gtor dbang	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །བླ་མ་གསང་བ་འདུས་པའི་ཚེས་བཅུའི་དུས་མཆོད་དང་འབྲེལ་བར་བྱིན་རླབས་གཏོར་མའི་དབང་བསྐུར་བྱ་བའི་ཚུལ་བཞུགས་སོ།། །།

ན་མོ་གུ་རུ་པདྨ་ཀ་རཱ་ཡ། །རབ་འབྱམས་དཀྱིལ་འཁོར་རྒྱ་མཚོ་ཡི། །གསང་གསུམ་ཀུན་འདུས་ཐོད་ཕྲེང་རྩལ། །སྙིང་དབུས་པདྨོའི་ཟེའུ་འབྲུའི་རྩེར། །བཞུགས་ལ་བདག་རྒྱུད་བྱིན་གྱིས་རློབས། །དེ་ལ་འདིར་བླ་མ་གསང་བ་འདུས་པའི་ཚེས་བཅུའི་དུས་མཆོད་དང་འབྲེལ་བར་གཏོར་དབང་གནད་ཀྱི་ཤོག་གཅིག་མ་བསྐུར་བར་སྤྲོ་ན། ལས་གཞུང་གི་དངོས་གྲུབ་བླང་བའི་བར་དཀྱུས་ལྟར་སོང་ནས། དཀྱིལ་འཁོར་དུ་ཚོགས་པའི་འདུས་པ་རྣམས་ལས་གཞན་པ་གསར་དུ་འཇུག་ན། ཁྲུས་བྱ། བགེགས་བྲལ། སྲུང་འཁོར་བསྒོམ་པ་རྣམས་མདོར་བསྡུས་ཙམ་སྔོན་དུ་གཏོང་། ཇི་ལྟར་ཡང་སློབ་དཔོན་གྱིས། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་བྱིན་རླབས་དབང་བསྐུར་གྱི་རིམ་པ་ཟབ་མོ་གསན་ལ་དོན་ཚུལ་བཞིན་དུ་ཉམས་སུ་བླང་བར་བགྱིའོ་སྙམ་པ་བྱང་ཆུབ་ཀྱི་མཆོག་ཏུ་ཐུགས་བསྐྱེད་པ་གསལ་བཏབ་སྟེ་གསན་འཚལ། དེ་ལ་འདིར་གང་གསན་པར་བྱ་བའི་ཆོས་ནི། ཇི་སྐད་དུ་དཔལ་འཁོར་ལོ་སྡོམ་པ་རྩ་བའི་རྒྱུད་ལས། རང་འདོད་ལས་ལ་རྣལ་འབྱོར་པས། །ཆོ་ག་ཇི་བཞིན་སྦྱིན་པར་བྱ། །མར་གྱི་ངོ་ཡི་ཚེས་བཅུ་དང་། །ཟླ་བ་ཡར་ངོར་གྱུར་པ་ལ། །མྱུར་དུ་འབད་པས་མཆོད་བྱ་སྟེ། །ཞེས་དང་། ཀུན་མཁྱེན་ཆེན་པོ་དྲི་མེད་འོད་ཟེར་གྱི་ཞལ་ནས། ཚེས་བཅུ་ཡར་ངོ་མར་ངོའི་ཉིན་དང་མཚན། །བསྙེན་སྒྲུབ་སྐོང་བཤགས་ཚོགས་མཆོད་འབད་པར་བྱ། །ཞེས་གསུངས་པ་ལྟར་ཡར་ངོ་དང་མར་ངོའི་ཚེས་བཅུའི་དུས་སུ་ཕྱི་རོལ་དུ་ཡུལ་ཉི་ཤུ་རྩ་བཞིའི་དཔའ་བོ་དང་རྣལ་འབྱོར་མ་རྣམས་སྒྲུབ་པ་པོའི་རྒྱུད་བྱིན་གྱིས་རློབ་པའི་ཕྱིར་རང་བཞིན་གྱིས་འདུ་ཞིང་། ནང་དུ་རྣལ་འབྱོར་བའི་རྩ་རླུང་ཐིག་ལེ་རྣམས་ཐིམ་དང་ལོངས་སྤྱོད་བདག་པོའི་འགྲོས་ཀྱིས་དབུ་མར་འདུ་བས་ཉེ་བའི་འདུ་བ་ཞེས་དུས་ཁྱད་པར་དུ་འཕགས་པའི་སྐབས་འདིར་སྣང་གྲགས་རིག་གསུམ་རྡོ་རྗེའི་རྣལ་འབྱོར་ཟབ་མོ་ལས་མི་འདའ་བའི་སྒོ་ནས་ཕྱི་ནང་གི་དཀྱིལ་འཁོར་ཚོགས་ཀྱི་ལོངས་སྤྱོད་ཀུན་བཟང་མཆོད་པའི་སྤྲིན་ལྟ་བུས་ཡུལ་དང་དབང་པོ་གཉིས་སུ་མེད་པའི་བདེ་ཆེན་རྡོ་རྗེའི་དམ་ཚིག་གིས་མཉེས་པར་བྱ་བ་ནི་བསོད་ནམས་དང་དངོས་གྲུབ་རྒྱ་མཚོའི་ཉེར་ལེན་མཆོག་ཏུ་གྲུབ་པར་མ་ཟད། རང་ཅག་གངས་ཅན་པའི་འགྲོ་བ་རྣམས་ལ་སངས་རྒྱས་ལས་ཀྱང་བཀའ་དྲིན་ཆེས་རྨད་དུ་བྱུང་བའི་སྐྱབས་དང་། མགོན་དང་དཔུང་གཉེན་གཅིག་པུར་གྱུར་པ། སྲས་བཅས་རྒྱལ་བ་ཐམས་ཅད་ཀྱི་ཡེ་ཤེས་གཅིག་ཏུ་བསྡུས་པའི་རང་གཟུགས། དུས་གསུམ་མཁྱེན་པ་དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་སཾ་བྷ་ཝས་ཞིང་འདིར་ངོ་མཚར་མཛད་པའི་གཙོ་བོ་རགས་རིམ་རྣམས་བསྟན་པ་དང་། རྗེས་འཇུག་གི་གདུལ་བྱ་རྣམས་ལ་ཐུགས་རྗེའི་གཟིགས་པ་ཁྱད་པར་ཅན་མངོན་སུམ་དུ་འཇུག་པས་བྱིན་གྱིས་བརླབ་པར་ཞལ་གྱིས་བཞེས་པའི་དུས་ཀྱང་ཡར་ངོའི་ཚེས་བཅུའི་དུས་ཆེན་འདི་རྣམས་ཡིན་པའི་ཚུལ་བླ་མ་གསང་བ་འདུས་པའི་ཞལ་གདམས་ལས། དབང་ཆེན་སྤྲེལ་ཟླའི་ཚེས་བཅུ་དང་༔ དུས་ཀྱི་ཚེས་བཅུ་ཐམས་ཅད་ལ༔ སྤྲུལ་པ་འཛམ་གླིང་ཁྱབ་པར་འགྱེད༔ མཆོག་ཐུན་དངོས་གྲུབ་ང་ཡིས་སྟེར༔ ཞེས་དང་། རིག་འཛིན་རྒོད་ལྡེམ་གྱི་གཏེར་བྱོན་མངའ་བསྐྱེད་ནོར་བུའི་བང་མཛོད་ལས། བོད་ལ་བདེ་སྐྱིད་འབྱུང་འདོད་ན༔ ཡར་ངོའི་ཚེས་བཅུ་ནམ་ཤར་ཚེ༔ ཨོ་རྒྱན་པདྨའི་སྤྲུལ་པ་འབྱུང་༔ དེ་དུས་ང་ལ་མོས་པ་ཡིས༔ རབ་ཀྱིས་བསྐྱེད་རྫོགས་གནས་ལུགས་ལྟོས༔ ཕྱི་ནང་གསང་བའི་སྒྲུབ་པ་ཚུགས༔ སེམས་བསྐྱེད་བསམ་པ་བཟང་པོ་ཡིས༔ འགྲོ་དྲུག་ཐུགས་རྗེས་འདྲེན་པ་ཡི༔ ལས་དང་སྨོན་ལམ་རྒྱ་ཆེར་ཐོབ༔ འབྲིང་གིས་ལུས་ངག་ཡིད་གསུམ་གྱིས༔ སྒྲིབ་སྦྱོང་ལས་ལ་བརྩོན་པར་གྱིས༔ ཞེས་དང་། ཡང་སྙིང་འདུས་པའི་སྐུལ་བྱང་ལས། །ང་ཉིད་སྲིན་ཡུལ་འགྲོ་བའི་ཚེ༔ བོད་ཀྱི་རྒྱལ་བློན་སྔགས་སློབ་ལ༔ འབྱུང་ངོ་ཅོག་གི་ཚེས་བཅུའི་དུས༔ ང་ཉིད་འབྱོན་པའི་དབུ་བསྙུངས་བཞེས༔ པདྨ་འབྱུང་གནས་གཞན་མི་བསླུ༔ ཐེ་ཚོམ་སྤོངས་ཤིག་རྗེས་འཇུག་རྣམས༔ ལས་སུ་རུང་བའི་བློ་ཡོད་ན༔ འདི་ལྟར་ང་ཡི་ཚེས་བཅུ་ལ༔ བརྩོན་ཅིང་གསོལ་བ་འདེབས་པའི་བུ༔ འཁོར་བར་ལྟུང་ན་ངས་ཤེས་ཀྱིས༔ བློ་སྙིང་བྲང་གསུམ་ང་ལ་གཏོད༔ ཅེས་དང་། ཞལ་གདམས་གསེར་ཕྲེང་ལས༔ སྤྲེལ་ལོ་སྤྲེལ་ཟླའི་ཚེས་ཆེན་བཅུ་ཡི་ཉིན༔ ཨོ་རྒྱན་ང་དངོས་བོད་ཡུལ་ཐམས་ཅད་དུ༔ ངེས་པར་འབྱོན་ནོ་ང་ཡི་ཐ་ཚིག་ཡིན༔ བྱུང་ངོ་ཅོག་གི་ཟླ་བའི་ཚེས་བཅུ་ལ༔ སྤྲུལ་པས་གངས་ཅན་ཁྱབ་པར་མི་འབྱོན་རེའི༔ ཐ་ཚིག་ཡིན་ནོ་པད་འབྱུང་བསླུ་མི་སྲིད༔ མདོར་ན་ང་ཡི་རྗེས་འཇུག་དད་ལྡན་རྣམས༔ སྤོད་ལྡན་གཏོར་མ་རིན་ཆེན་འབར་བ་བཤམས༔ ཚིག་བདུན་གསོལ་འདེབས་གདུང་བའི་དབྱངས་དང་བཅས༔ ཐོད་པ་ལྟག་སྤྲོད་རོལ་མོའི་སྒྲས་བསྐུལ་ན༔ ཨོ་རྒྱན་ང་ཉིད་རྔ་ཡབ་དཔལ་རི་ནས༔ གཅེས་པའི་བུ་ངུས་མ་ཡིས་མི་བཟོད་ལྟར༔ བྱིན་གྱིས་རློབ་འབྱོན་དམ་ཚིག་ན་ར་ཀན༔ ཞེས་སོགས་རྒྱ་ཆེར་གསུངས་པ་ལྟར་སྤྱི་དང་བྱེ་བྲག་གི་ཕན་ཡོན་ཁྱད་པར་བསམ་གྱིས་མི་ཁྱབ་པ་དང་ལྡན་པའི་དུས་བཟང་ཚེས་བཅུའི་མཆོད་པའི་དངོས་གྲུབ་བླང་བའི་ཆོ་ག་དང་རྗེས་སུ་འབྲེལ་བར། འཇམ་དཔལ་དབྱངས་དངོས་མངའ་བདག་ཁྲི་སྲོང་ལྡེའུ་བཙན་གྱི་ཡེ་ཤེས་སྒྱུ་འཕྲུལ་དྲྭ་བའི་རོལ་གར་གཏེར་སྟོན་གྲུབ་ཐོབ་ཐམས་ཅད་ཀྱི་རྒྱལ་པོ་གུ་རུ་ཆོས་ཀྱི་དབང་ཕྱུག་གིས་ལྷོ་བྲག་མཁར་ཆུ་གནམ་སྐས་ཅན་ནས་སྤྱན་དྲངས་པའི་བླ་མའི་ཐུགས་སྒྲུབ་གསང་བ་འདུས་པའི་གཏོར་དབང་གནད་ཀྱི་ཤོག་གཅིག་མ་དང་། རིག་འཛིན་པདྨ་གླིང་པའི་བླ་མ་ནོར་བུ་རྒྱ་མཚོའི་རབ་འབྱམས་བཀའི་དབང་བསྐུར་ལས་འབྱུང་བའི་གཏོར་དབང་སྟེ། བརྒྱུད་པའི་ཁྱད་པར་གཉིས་ཆུ་བོ་གཅིག་འདྲེས་སུ་གྱུར་པའི་བྱིན་རླབས་དབང་བསྐུར་གྱི་རིམ་པ་ཟབ་མོ་ཞུ་བའི་ཡོན་དུ་དམིགས་ཏེ་མཎྜལ་ཞིག་ཕུལ་མཛོད། མཎྜལ་ཕུལ། དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་མཛོད། ཧོཿ བླ་མ་རྡོ་རྗེ་སློབ་དཔོན་དགོངས༔ རྩ་བ་གསུམ་གྱི་དཀྱིལ་འཁོར་དུ༔ བདག་ཅག་འཇུག་ཅིང་བསྙེན་སྒྲུབ་སྤྲོ༔ གུས་པས་འཇུག་འདོད་བསྟན་དུ་གསོལ༔ ཞེས་ལན་གསུམ་གྱིས་གསོལ་བ་བཏབ་ནས། སྤྲོ་ན། རྒྱུད་དག་པར་བྱ་བའི་སླད་དུ་མདུན་གྱི་ནམ་མཁར་སྐྱབས་གནས་རྩ་གསུམ་རྒྱ་མཚོའི་དཀྱིལ་འཁོར་གྱི་ལྷ་ཚོགས་རྣམས་མངོན་སུམ་ལྟ་བུར་བཞུགས་པའི་སྤྱན་སྔར་སྐྱབས་སུ་འགྲོ་བ་དང་བྱང་ཆུབ་མཆོག་ཏུ་སེམས་བསྐྱེད་སྙམ་པས་འདིའི་རྗེས་ཟློས་མཛོད། །ཅེས་བརྡ་སྦྱར་ལ་ལས་གཞུང་གི་སྐྱབས་སེམས་ལན་གསུམ། བྱིན་རླབས་ཀྱི་གཞི་བརྟན་པར་བྱེད་པ་ཡེ་ཤེས་དབབ་པའི་སླད་དུ། ཁྱེད་རང་རྣམས་སྐད་ཅིག་དྲན་རྫོགས་སུ་ཆུ་ལས་ཉ་འཕར་བའི་ཚུལ་གྱིས་པདྨ་ཉི་ཟླ་བདུད་བཞི་བསྣོལ་བའི་གདན་གྱི་སྟེང་དུ་གཞི་ལུས་ཀྱི་བཀོད་པ་དབང་ཆེན་རྟ་མཆོག་ཧེ་རུ་ཀ་སྐུ་མདོག་དམར་ནག་ཞལ་གཅིག་ཕྱག་གཉིས་པ། ཕྱག་གཉིས་ཀྱིས་གྲི་གུག་དང་ཐོད་པ་འཛིན་པས་རང་འོད་ཀྱི་ཡུམ་རྡོ་རྗེ་ཕག་མོ་དང་མཉམ་པར་སྦྱོར་བ། ཡབ་ཡུམ་གྱི་སྤྱི་བོར་རྟ་གདོང་དང་ཕག་ཞལ་བཞད་ཅིང་དཔལ་དང་དུར་ཁྲོད་ཀྱི་ཆས་ཀྱིས་བརྒྱན་པ། ཞབས་གཉིས་བརྐྱངས་བསྐུམས་གར་གྱི་རོལ་པས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་སྐུ་ཅན་དུ་ལམ་གྱིས་གསལ་བའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་སྔོན་པོ། ལྟེ་བར་ཧྲཱིཿདམར་སེར་རྣམས་ཀྱིས་མཚན་པ་ལས་འོད་ཟེར་གྱི་ཚོགས་བསམ་གྱིས་མི་ཁྱབ་པ་འཕྲོས་པས་རང་བཞིན་གྱི་གནས་དང་། རྔ་ཡབ་དཔལ་རི་སྤྲུལ་པའི་ཞིང་ནས་རབ་འབྱམས་རྩ་བ་གསུམ་གྱི་དཀྱིལ་འཁོར་གྱི་ལྷ་ཚོགས་མ་ལུས་ཤིང་ལུས་པ་མེད་པ་ཐམས་ཅད་ཁ་ཆར་བུ་ཡུག་འཚུབས་པ་བཞིན་དུ་སྤྱན་དྲངས་ཏེ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་ཐུགས་མོས་མཛོད། སྤྱན་འདྲེན་རྒྱས་བསྡུས་ཇི་ལྟར་རིགས་པའི་མཐར། ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ༔ ཛྙཱ་ན་བཛྲ་ཨཱ་བེ་ཤ་ཡ་ཨ་ཨཱཿ ཛཿཧཱུྃ་བྃ་ཧོཿཞེས་པས་བྱིན་དབབ། ཨོཾ་ཏིཥྛ་བཛྲ་ས་བརྟན་པར་བྱ། དེ་ལྟར་ཡེ་ཤེས་དབབ་ཅིང་བརྟན་པར་བྱ་བ་སྔོན་དུ་སོང་ནས་བྱིན་རླབས་གཏོར་མའི་དབང་བསྐུར་བ་དངོས་ལའང་། གཏོར་མཆོད་དུས་སུ་གཏོར་མར་ཤེས་པ། དབང་གི་དུས་སུ་ལྷར་ཤེས་པ། དངོས་གྲུབ་བླང་བའི་དུས་སུ་དམ་རྫས་སུ་ཤེས་པ་སྟེ་གསུམ་ལས། འདིར་དབང་དུས་སུ་ལྷར་ཤེས་པ་ཡིན་པས་དམིགས་པ་འདི་བཞིན་དུ་མཛོད། གཏོར་མ་འབྱུང་བ་རིམ་བརྩེགས་རིན་ཆེན་འབར་བའི་གཞལ་ཡས་ཁང་དང་བཅས་པའི་དབུས་སུ་པད་ཉི་ཟླ་བའི་གདན་ལ་རྩ་གསུམ་ཀུན་འདུས་བླ་མ་རྡོ་རྗེ་ཐོད་ཕྲེང་རྩལ་ཡབ་ཡུམ་མཚན་དཔེའི་གཟི་བྱིན་མཆོག་ཏུ་འབར་བ། རྒྱན་ཆ་ལུགས་ཐམས་ཅད་མ་འདྲེས་ཤིང་ཡོངས་སུ་རྫོགས་པ་ཆུ་ཟླའམ་འཇའ་ཚོན་ལྟ་བུར་གསལ་བའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་མཐིང་ག །ལྟེ་བར་ཧྲཱིཿདམར་སེར་རྣམས་ཀྱིས་མཚན་པར་གྱུར་པ་ལ་དངོས་སུ་འབྱོར་པ་དང་ཡིད་ཀྱིས་སྤྲུལ་པ་ལས་བྱུང་བའི་མཆོད་པའི་སྤྲིན་རབ་འབྱམས་བསམ་གྱིས་མི་ཁྱབ་པས་མཆོད་པའི་མོས་པ་མཛོད། ཅེས་བརྡ་སྦྱར་ལ། །སློབ་དཔོན་གྱིས། ཨོཾ་སརྦ་ཏ་ཐཱ་ག་ཏ་བཛྲ་ཨརྒྷཾ་པྲ་ཏིཙྪ་སྭཱ་ཧཱ་ནས། ཤཔྡའི་བར་གྱིས་མཆོད། དེ་ནས་སླར་ཡང་བླ་མ་དང་དཀྱིལ་འཁོར་གྱི་གཙོ་བོ་རྡོ་རྗེ་ཐོད་ཕྲེང་རྩལ་ཐ་མི་དད ་པ་ལ་མི་ཕྱེད་དད་པའི་གདུང་ཤུགས་དྲག་པོས་དངོས་གཞིའི་དབང་བསྐུར་བ་མ་ལུས་པ་སྩལ་དུ་གསོལ་སྙམ་པའི་ཡིད་ཀྱིས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། རྡོ་རྗེ་སློབ་དཔོན་འདྲེན་པའི་གཙོ༔ བདག་ཅག་ལས་འཕྲོ་སྐལ་པར་ལྡན༔ རང་གཞན་དོན་ཀུན་བསྒྲུབ་བྱའི་ཕྱིར༔ དབང་ཆེན་ཡོངས་རྫོགས་བསྐུར་དུ་གསོལ༔ དེ་ནས་གཏོར་མ་བཏེགས་ལ། ཞེས་གསོལ་བ་བཏབ་པས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་གཏོར་མ་ལྷར་གསལ་བའི་ཐུགས་རྒྱུད་བསྐུལ་ཏེ་སྐུ་དགེས་པའི་གར་མཛད། གསུང་སྔགས་ཀྱི་རང་སྒྲ་སྒྲོགས། ཐུགས་མཁྱེན་བརྩེ་ནུས་པའི་སྒོ་འཕར་བརྒྱ་ཕྲག་ཏུ་དབྱེ་བཞིན་པས་སོ་སོ་རང་རང་གི་མདུན་གྱི་ནམ་མཁར་མངོན་སུམ་ལྟ་བུར་བྱོན་ནས། སྤྱི་བོའི་ཨོཾ་ལས་འོད་ཟེར་དཀར་པོ་ཨོཾ་ཡིག་གི་ཕྲེང་བ་དང་བཅས་པ་དཔག་ཏུ་མེད་པ་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱུང་། ཁྱེད་རང་རྣམས་ཀྱི་སྤྱི་བོའི་ཨོཾ་ལ་ཐིམ་པས་བུམ་པའི་དབང་ཐོབ། ལུས་ཀྱི་དྲི་མ་སྦྱངས། ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྐུ་རྡོ་རྗེ་སྤྲུལ་པའི་སྐུ་ཐོབ་པའི་སྐལ་བ་ཅན་དུ་བྱས། མགྲིན་པའི་ཨཱཿལས་འོད་ཟེར་དམར་པོ་ཨཱཿཡིག་གི་ཕྲེང་བ་དང་བཅས་པ་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་མགྲིན་པའི་ཨཱཿལ་ཐིམ་པས་གསང་བའི་དབང་ཐོབ། ངག་གི་དྲི་མ་སྦྱངས། ལམ་རྩ་རླུང་བསྒོམ་པ་ལ་དབང་། འབྲས་བུ་གསུང་རྡོ་རྗེ་ལོངས་སྤྱོད་རྫོགས་སྐུ་ཐོབ་པའི་སྐལ་བ་ཅན་དུ་བྱས། ཐུགས་ཀའི་ཧཱུྃ་ལས་འོད་ཟེར་སྔོན་པོ་ཧཱུྃ་ཡིག་གི་ཕྲེང་བ་དང་བཅས་པ་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྙིང་གའི་ཧཱུྃ་ལ་ཐིམ་པས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་སྦྱངས། ལམ་ཐིག་ལེ་བསྒོམ་པ་ལ་དབང་། འབྲས་བུ་ཐུགས་རྡོ་རྗེ་ཆོས་ཀྱི་སྐུ་ཐོབ་པའི་སྐལ་བ་ཅན་དུ་བྱས། ལྟེ་བའི་ཧྲཱིཿལས་འོད་ཟེར་དམར་སེར་ཧྲཱིཿཡིག་གི་ཕྲེང་བ་དང་བཅས་པ་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་ལྟེ་བའི་ཧྲཱིཿལ་ཐིམ་པས་དབང་བཞི་པ་ཐོབ། བག་ཆགས་ཀྱི་དྲི་མ་སྦྱངས། ལམ་རྫོགས་པ་ཆེན་པོ་བསྒོམ་པ་ལ་དབང་། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་པའི་མོས་པ་དུང་དུང་མཛོད་ཅིག །ཨེ་མ་ཧོཿ ངོ་མཚར་རྨད་དུ་བྱུང་བའི་ཆོས༔ བླ་མ་རྣམས་དང་གཅིག་པ་ལ༔ ཡི་དམ་ལྷ་དང་དབྱེར་མེད་ཅིང་༔ མཁའ་འགྲོ་དབང་དུ་བསྡུ་བའི་ཕྱིར༔ དམ་རྫས་གཏོར་མའི་དབང་བསྐུར་བས༔ རྩ་བ་གསུམ་གྱི་བྱིན་རླབས་ཀྱིས༔ སྐུ་གསུང་ཐུགས་དབང་ཡོངས་རྫོགས་པ༔ སྐལ་ལྡན་འདི་ལ་བསྐུར་ཐོབ་ཤོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྷི་ཕ་ལ་ཧཱུྃ༔ གུ་རུ་དེ་ཝ་ཌཱ་ཀི་ནཱི་ཀཱ་ཡ་ཨ་བྷི་ཥིཉྩ་ཨོཾ༔ ཝཱ་ཀ་ཨ་བྷི་ཥིཉྩ་ཨཱཿ ཙིཏྟ་ཨབྷི་ཥིཉྩ་ཧཱུྃ༔ སརྦ་ཨབྷི་ཥིཉྩ་ཧྲཱིཿ ཀཱ་ཡ་ཝཱ་ཀ་ཙིཏྟ་ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿ ཀཱ་ཡ་ཝཱ་ཀ་ཙིཏྟ་རཀྵ་རཀྵ་ཀུ་རུ་སྭཱ་ཧཱ༔ ཞེས་ཛབ་དབྱངས་དང་བཅས་ཏེ་གཏོར་མ་སྤྱི་བོ་ལ་སོགས་པའི་གནས་རྣམས་སུ་རེག་ཅིར། སླར་ཡང་གཏོར་མའི་བླ་མ་ཉིད་ཁྱེད་རང་རྣམས་ཀྱི་སྤྱི་བོར་བྱོན་ནས་འབྲལ་མེད་དུ་བཞུགས་པའི་མོས་པ་མཛོད། ཅེས་དང་རྩ་སྔགས་བརྗོད་ཅིང་གཏོར་མ་སྤྱི་བོར་བཞག །མཐར་གཏོར་མ་དངོས་གྲུབ་ཏུ་ཤེས་པ་ནི། ཁྱེད་རང་རྣམས་ལྷར་གསལ་བའི་སྤྱི་བོར་བླ་མ་དང་རྩ་ཁམས་དཔའ་བོ་དང་རྣལ་འབྱོར་མར་དག་པས། གཏོར་མ་དངོས་གྲུབ་ཀྱི་བདུད་རྩིར་འཁྱིལ་པ་དེ་རོལ་པས་དངོས་གྲུབ་རྣམ་གཉིས་བདེ་བླག་ཏུ་འགྲུབ་པའི་མོས་པ་མཛོད། ཅེས་བརྗོད་གཏོར་མའི་མཐའ་རས་དངོས་གྲུབ་ཀྱི་རྫས་སུ་སྦྱིན་ཅིང་ཚེ་རིལ་གཡས་དང་ཚེ་ཆང་གཡོན་སྐོར་དུ་འགྱེད། དེས་དབང་གི་དངོས་གཞི་ལེགས་པར་གྲུབ་ནས་མཐའ་བརྟན་ཤིས་པར་བྱ་བའི་སླད་དུ། མདུན་གྱི་ནམ་མཁར་ཕྱོགས་དུས་ཀྱི་རྒྱལ་བ་སྲས་དང་བཅས་པ་རྣམས་དང་། བྱེ་བྲག་ཏུ་ཡང་བདེར་གཤེགས་ཀུན་འདུས་རྡོ་རྗེ་ཐོད་ཕྲེང་རྩལ་ལ་དཔའ་བོ་དང་རྣལ་འབྱོར་མ་ལྷ་དང་དྲང་སྲོང་བདེན་ཚིག་གྲུབ་པའི་ཚོགས་ཀྱིས་བསྐོར་ཏེ་ཤིས་པ་བརྗོད་པའི་གླུ་དབྱངས་དི་རི་རི་སྒྲོགས་ཤིང་མེ་ཏོག་མནྡཱ་རའི་ཆར་ཆེན་པོ་ཕབ་པས་ཤིན་ཏུ་བཀྲ་ཤིས་པར་བྱས་པའི་ཐུགས་མོས་མཛོད། ཕུན་སུམ་ཚོགས་པ་མངའ་བ་ལ་སོགས་པའི་ཤིས་བརྗོད་ཇི་ལྟར་རིགས་པ་དང་བཅས་ཏེ་མེ་ཏོག་གི་ཆར་ཕབ། སྤྲོ་ན་དམ་ཚིག་ཁས་བླང་བ་སོགས་སྤྱི་ལྟར་བྱའོ། །རྩ་གསུམ་ཀུན་འདུས་མཚོ་སྐྱེས་རྗེའི། །བྱིན་རླབས་དབང་བསྐུར་རིམ་པ་འདིས། །འགྲོ་ཀུན་རྔ་ཡབ་དཔལ་གྱི་རིར། །འཇུག་པའི་ལམ་བཟང་ཉིད་གྱུར་ཅིག །བླ་མ་བསང་བ་འདུས་པའི་ཚེས་བཅུའི་མཆོད་པ་དང་འབྲེལ་བར་གཏོར་དབང་གནད་ཀྱི་ཤོག་གཅིག་མ་ཇི་ལྟར་བསྐུར་བའི་ཚུལ་བཀླགས་ཆོག་ཏུ་བཀོད་པ་འདིའང་། ཤཱཀྱའི་དགེ་སློང་རིག་པ་འཛིན་པ་མཚོ་སྐྱེས་བླ་མ་དགྱེས་པའི་འབངས་ཀྱིས་སྦྱར་བའི་དགེ་བས་མཐའ་ཀླས་པའི་ཡིད་ཅན་རྒྱ་མཚོའི་རྡུལ་སྙེད་པདྨ་དྲྭ་བ་ཅན་གྱི་དགའ་ཚལ་དུ་འདོད་རྒུར་རྩེན་པའི་རྒྱུར་གྱུར་ཅིག། །།སརྦ་དཱ་ཀ་ལྱཱ་ཎཾ་བྷ་བ་ཏུ།། །།

[edit]

bla ma gsang 'dus tshes bcu'i mchod pa dang 'brel ba'i gtor dbang bskur tshul/ @#/__/bla ma gsang ba 'dus pa'i tshes bcu'i dus mchod dang 'brel bar byin rlabs gtor ma'i dbang bskur bya ba'i tshul bzhugs so//__// na mo gu ru pad+ma ka rA ya/__/rab 'byams dkyil 'khor rgya mtsho yi/__/gsang gsum kun 'dus thod phreng rtsal/__/snying dbus pad+mo'i ze'u 'bru'i rtser/__/bzhugs la bdag rgyud byin gyis rlobs/__/de la 'dir bla ma gsang ba 'dus pa'i tshes bcu'i dus mchod dang 'brel bar gtor dbang gnad kyi shog gcig ma bskur bar spro na/__las gzhung gi dngos grub blang ba'i bar dkyus ltar song nas/__dkyil 'khor du tshogs pa'i 'dus pa rnams las gzhan pa gsar du 'jug na/__khrus bya/__bgegs bral/__srung 'khor bsgom pa rnams mdor bsdus tsam sngon du gtong /__ji ltar yang slob dpon gyis/__'o/__nam mkha' dang mnyam pa'i sems can thams cad kyi don du bla na med pa yang dag par rdzogs pa'i sangs rgyas kyi go 'phang rin po che thob par bya/__de'i ched du byin rlabs dbang bskur gyi rim pa zab mo gsan la don tshul bzhin du nyams su blang bar bgyi'o snyam pa byang chub kyi mchog tu thugs bskyed pa gsal btab ste gsan 'tshal/__de la 'dir gang gsan par bya ba'i chos ni/__ji skad du dpal 'khor lo sdom pa rtsa ba'i rgyud las/__rang 'dod las la rnal 'byor pas/__/cho ga ji bzhin sbyin par bya/__/mar gyi ngo yi tshes bcu dang /__/zla ba yar ngor gyur pa la/__/myur du 'bad pas mchod bya ste/__/zhes dang /__kun mkhyen chen po dri med 'od zer gyi zhal nas/__tshes bcu yar ngo mar ngo'i nyin dang mtshan/__/bsnyen sgrub skong bshags tshogs mchod 'bad par bya/__/zhes gsungs pa ltar yar ngo dang mar ngo'i tshes bcu'i dus su phyi rol du yul nyi shu rtsa bzhi'i dpa' bo dang rnal 'byor ma rnams sgrub pa po'i rgyud byin gyis rlob pa'i phyir rang bzhin gyis 'du zhing /__nang du rnal 'byor ba'i rtsa rlung thig le rnams thim dang longs spyod bdag po'i 'gros kyis dbu mar 'du bas nye ba'i 'du ba zhes dus khyad par du 'phags pa'i skabs 'dir snang grags rig gsum rdo rje'i rnal 'byor zab mo las mi 'da' ba'i sgo nas phyi nang gi dkyil 'khor tshogs kyi longs spyod kun bzang mchod pa'i sprin lta bus yul dang dbang po gnyis su med pa'i bde chen rdo rje'i dam tshig gis mnyes par bya ba ni bsod nams dang dngos grub rgya mtsho'i nyer len mchog tu grub par ma zad/__rang cag gangs can pa'i 'gro ba rnams la sangs rgyas las kyang bka' drin ches rmad du byung ba'i skyabs dang /__mgon dang dpung gnyen gcig pur gyur pa/__sras bcas rgyal ba thams cad kyi ye shes gcig tu bsdus pa'i rang gzugs/__dus gsum mkhyen pa dpal o rgyan gyi slob dpon chen po pad+ma saM b+ha was zhing 'dir ngo mtshar mdzad pa'i gtso bo rags rim rnams bstan pa dang /__rjes 'jug gi gdul bya rnams la thugs rje'i gzigs pa khyad par can mngon sum du 'jug pas byin gyis brlab par zhal gyis bzhes pa'i dus kyang yar ngo'i tshes bcu'i dus chen 'di rnams yin pa'i tshul bla ma gsang ba 'dus pa'i zhal gdams las/__dbang chen sprel zla'i tshes bcu dang :__dus kyi tshes bcu thams cad la:__sprul pa 'dzam gling khyab par 'gyed:__mchog thun dngos grub nga yis ster:__zhes dang /__rig 'dzin rgod ldem gyi gter byon mnga' bskyed nor bu'i bang mdzod las/__bod la bde skyid 'byung 'dod na:__yar ngo'i tshes bcu nam shar tshe:__o rgyan pad+ma'i sprul pa 'byung :__de dus nga la mos pa yis:__rab kyis bskyed rdzogs gnas lugs ltos:__phyi nang gsang ba'i sgrub pa tshugs:__sems bskyed bsam pa bzang po yis:__'gro drug thugs rjes 'dren pa yi:__las dang smon lam rgya cher thob:__'bring gis lus ngag yid gsum gyis:__sgrib sbyong las la brtson par gyis:__zhes dang /__yang snying 'dus pa'i skul byang las/__/nga nyid srin yul 'gro ba'i tshe:__bod kyi rgyal blon sngags slob la:__'byung ngo cog gi tshes bcu'i dus:__nga nyid 'byon pa'i dbu bsnyungs bzhes:__pad+ma 'byung gnas gzhan mi bslu:__the tshom spongs shig rjes 'jug rnams:__las su rung ba'i blo yod na:__'di ltar nga yi tshes bcu la:__brtson cing gsol ba 'debs pa'i bu:__'khor bar ltung na ngas shes kyis:__blo snying brang gsum nga la gtod:__ces dang /__zhal gdams gser phreng las:__sprel lo sprel zla'i tshes chen bcu yi nyin:__o rgyan nga dngos bod yul thams cad du:__nges par 'byon no nga yi tha tshig yin:__byung ngo cog gi zla ba'i tshes bcu la:__sprul pas gangs can khyab par mi 'byon re'i:__tha tshig yin no pad 'byung bslu mi srid:__mdor na nga yi rjes 'jug dad ldan rnams:__spod ldan gtor ma rin chen 'bar ba bshams:__tshig bdun gsol 'debs gdung ba'i dbyangs dang bcas:__thod pa ltag sprod rol mo'i sgras bskul na:__o rgyan nga nyid rnga yab dpal ri nas:__gces pa'i bu ngus ma yis mi bzod ltar:__byin gyis rlob 'byon dam tshig na ra kan:__zhes sogs rgya cher gsungs pa ltar spyi dang bye brag gi phan yon khyad par bsam gyis mi khyab pa dang ldan pa'i dus bzang tshes bcu'i mchod pa'i dngos grub blang ba'i cho ga dang rjes su 'brel bar/__'jam dpal dbyangs dngos mnga' bdag khri srong lde'u btsan gyi ye shes sgyu 'phrul drwa ba'i rol gar gter ston grub thob thams cad kyi rgyal po gu ru chos kyi dbang phyug gis lho brag mkhar chu gnam skas can nas spyan drangs pa'i bla ma'i thugs sgrub gsang ba 'dus pa'i gtor dbang gnad kyi shog gcig ma dang /__rig 'dzin pad+ma gling pa'i bla ma nor bu rgya mtsho'i rab 'byams bka'i dbang bskur las 'byung ba'i gtor dbang ste/__brgyud pa'i khyad par gnyis chu bo gcig 'dres su gyur pa'i byin rlabs dbang bskur gyi rim pa zab mo zhu ba'i yon du dmigs te maN+Dal zhig phul mdzod/__maN+Dal phul/__de ltar maN+Dal phul nas gsol ba 'debs pa 'di'i rjes zlos mdzod/__hoH__bla ma rdo rje slob dpon dgongs:__rtsa ba gsum gyi dkyil 'khor du:__bdag cag 'jug cing bsnyen sgrub spro:__gus pas 'jug 'dod bstan du gsol:__zhes lan gsum gyis gsol ba btab nas/__spro na/__rgyud dag par bya ba'i slad du mdun gyi nam mkhar skyabs gnas rtsa gsum rgya mtsho'i dkyil 'khor gyi lha tshogs rnams mngon sum lta bur bzhugs pa'i spyan sngar skyabs su 'gro ba dang byang chub mchog tu sems bskyed snyam pas 'di'i rjes zlos mdzod/__/ces brda sbyar la las gzhung gi skyabs sems lan gsum/__byin rlabs kyi gzhi brtan par byed pa ye shes dbab pa'i slad du/__khyed rang rnams skad cig dran rdzogs su chu las nya 'phar ba'i tshul gyis pad+ma nyi zla bdud bzhi bsnol ba'i gdan gyi steng du gzhi lus kyi bkod pa dbang chen rta mchog he ru ka sku mdog dmar nag zhal gcig phyag gnyis pa/__phyag gnyis kyis gri gug dang thod pa 'dzin pas rang 'od kyi yum rdo rje phag mo dang mnyam par sbyor ba/__yab yum gyi spyi bor rta gdong dang phag zhal bzhad cing dpal dang dur khrod kyi chas kyis brgyan pa/__zhabs gnyis brkyangs bskums gar gyi rol pas ye shes kyi me 'bar ba'i dbus na bzhugs pa'i sku can du lam gyis gsal ba'i spyi bor oM dkar po/__mgrin par AHdmar po/__snying gar hU~M sngon po/__lte bar hrIHdmar ser rnams kyis mtshan pa las 'od zer gyi tshogs bsam gyis mi khyab pa 'phros pas rang bzhin gyi gnas dang /__rnga yab dpal ri sprul pa'i zhing nas rab 'byams rtsa ba gsum gyi dkyil 'khor gyi lha tshogs ma lus shing lus pa med pa thams cad kha char bu yug 'tshubs pa bzhin du spyan drangs te sib sib thim pas rgyud byin gyis brlabs pa'i thugs mos mdzod/__spyan 'dren rgyas bsdus ji ltar rigs pa'i mthar/__oM AHhU~M badz+ra gu ru pad+ma thod phreng rtsal badz+ra sa ma ya dza:__sid+d+hi pha la hU~M:__dz+nyA na badz+ra A be sha ya a AH__dzaHhU~M ba~M hoHzhes pas byin dbab/__oM tiSh+Tha badz+ra sa brtan par bya/__de ltar ye shes dbab cing brtan par bya ba sngon du song nas byin rlabs gtor ma'i dbang bskur ba dngos la'ang /__gtor mchod dus su gtor mar shes pa/__dbang gi dus su lhar shes pa/__dngos grub blang ba'i dus su dam rdzas su shes pa ste gsum las/__'dir dbang dus su lhar shes pa yin pas dmigs pa 'di bzhin du mdzod/__gtor ma 'byung ba rim brtsegs rin chen 'bar ba'i gzhal yas khang dang bcas pa'i dbus su pad nyi zla ba'i gdan la rtsa gsum kun 'dus bla ma rdo rje thod phreng rtsal yab yum mtshan dpe'i gzi byin mchog tu 'bar ba/__rgyan cha lugs thams cad ma 'dres shing yongs su rdzogs pa chu zla'am 'ja' tshon lta bur gsal ba'i spyi bor oM dkar po/__mgrin par AHdmar po/__thugs kar hU~M mthing ga__/lte bar hrIHdmar ser rnams kyis mtshan par gyur pa la dngos su 'byor pa dang yid kyis sprul pa las byung ba'i mchod pa'i sprin rab 'byams bsam gyis mi khyab pas mchod pa'i mos pa mdzod/__ces brda sbyar la/__/slob dpon gyis/__oM sarba ta thA ga ta badz+ra ar+g+haM pra tits+tsha swA hA nas/__shap+da'i bar gyis mchod/__de nas slar yang bla ma dang dkyil 'khor gyi gtso bo rdo rje thod phreng rtsal tha mi dad_ pa la mi phyed dad pa'i gdung shugs drag pos dngos gzhi'i dbang bskur ba ma lus pa stsal du gsol snyam pa'i yid kyis gsol ba 'debs pa 'di'i rjes zlos lan gsum mdzod/__rdo rje slob dpon 'dren pa'i gtso:__bdag cag las 'phro skal par ldan:__rang gzhan don kun bsgrub bya'i phyir:__dbang chen yongs rdzogs bskur du gsol:__de nas gtor ma btegs la/__zhes gsol ba btab pas slob dpon gyi thugs ka nas 'od zer 'phros/__mdun bskyed gtor ma lhar gsal ba'i thugs rgyud bskul te sku dges pa'i gar mdzad/__gsung sngags kyi rang sgra sgrogs/__thugs mkhyen brtse nus pa'i sgo 'phar brgya phrag tu dbye bzhin pas so so rang rang gi mdun gyi nam mkhar mngon sum lta bur byon nas/__spyi bo'i oM las 'od zer dkar po oM yig gi phreng ba dang bcas pa dpag tu med pa mar me gcig las gnyis mched kyi tshul du byung /__khyed rang rnams kyi spyi bo'i oM la thim pas bum pa'i dbang thob/__lus kyi dri ma sbyangs/__lam bskyed rim bsgom pa la dbang /__'bras bu sku rdo rje sprul pa'i sku thob pa'i skal ba can du byas/__mgrin pa'i AHlas 'od zer dmar po AHyig gi phreng ba dang bcas pa dpag tu med pa byung /__khyed rang rnams kyi mgrin pa'i AHla thim pas gsang ba'i dbang thob/__ngag gi dri ma sbyangs/__lam rtsa rlung bsgom pa la dbang /__'bras bu gsung rdo rje longs spyod rdzogs sku thob pa'i skal ba can du byas/__thugs ka'i hU~M las 'od zer sngon po hU~M yig gi phreng ba dang bcas pa dpag tu med pa byung /__khyed rang rnams kyi snying ga'i hU~M la thim pas shes rab ye shes kyi dbang thob/__yid kyi dri ma sbyangs/__lam thig le bsgom pa la dbang /__'bras bu thugs rdo rje chos kyi sku thob pa'i skal ba can du byas/__lte ba'i hrIHlas 'od zer dmar ser hrIHyig gi phreng ba dang bcas pa dpag tu med pa byung /__khyed rang rnams kyi lte ba'i hrIHla thim pas dbang bzhi pa thob/__bag chags kyi dri ma sbyangs/__lam rdzogs pa chen po bsgom pa la dbang /__'bras bu ye shes rdo rje ngo bo nyid sku thob pa'i skal ba can du byas pa'i mos pa dung dung mdzod cig__/e ma hoH__ngo mtshar rmad du byung ba'i chos:__bla ma rnams dang gcig pa la:__yi dam lha dang dbyer med cing :__mkha' 'gro dbang du bsdu ba'i phyir:__dam rdzas gtor ma'i dbang bskur bas:__rtsa ba gsum gyi byin rlabs kyis:__sku gsung thugs dbang yongs rdzogs pa:__skal ldan 'di la bskur thob shog:__oM AHhU~M badz+ra gu ru pad+ma sid+d+hi hU~M:__oM AHhU~M badz+ra gu ru pad+ma thod phreng rtsal badz+ra sa ma ya dzaHsid+hi pha la hU~M:__gu ru de wa DA ki nI kA ya a b+hi Shiny+tsa oM:__wA ka a b+hi Shiny+tsa AH__tsit+ta ab+hi Shiny+tsa hU~M:__sarba ab+hi Shiny+tsa hrIH__kA ya wA ka tsit+ta a b+hi Shiny+tsa oM AHhU~M hrIH__kA ya wA ka tsit+ta rak+Sha rak+Sha ku ru swA hA:__zhes dzab dbyangs dang bcas te gtor ma spyi bo la sogs pa'i gnas rnams su reg cir/__slar yang gtor ma'i bla ma nyid khyed rang rnams kyi spyi bor byon nas 'bral med du bzhugs pa'i mos pa mdzod/__ces dang rtsa sngags brjod cing gtor ma spyi bor bzhag__/mthar gtor ma dngos grub tu shes pa ni/__khyed rang rnams lhar gsal ba'i spyi bor bla ma dang rtsa khams dpa' bo dang rnal 'byor mar dag pas/__gtor ma dngos grub kyi bdud rtsir 'khyil pa de rol pas dngos grub rnam gnyis bde blag tu 'grub pa'i mos pa mdzod/__ces brjod gtor ma'i mtha' ras dngos grub kyi rdzas su sbyin cing tshe ril g.yas dang tshe chang g.yon skor du 'gyed/__des dbang gi dngos gzhi legs par grub nas mtha' brtan shis par bya ba'i slad du/__mdun gyi nam mkhar phyogs dus kyi rgyal ba sras dang bcas pa rnams dang /__bye brag tu yang bder gshegs kun 'dus rdo rje thod phreng rtsal la dpa' bo dang rnal 'byor ma lha dang drang srong bden tshig grub pa'i tshogs kyis bskor te shis pa brjod pa'i glu dbyangs di ri ri sgrogs shing me tog man+dA ra'i char chen po phab pas shin tu bkra shis par byas pa'i thugs mos mdzod/__phun sum tshogs pa mnga' ba la sogs pa'i shis brjod ji ltar rigs pa dang bcas te me tog gi char phab/__spro na dam tshig khas blang ba sogs spyi ltar bya'o/__/rtsa gsum kun 'dus mtsho skyes rje'i/__/byin rlabs dbang bskur rim pa 'dis/__/'gro kun rnga yab dpal gyi rir/__/'jug pa'i lam bzang nyid gyur cig__/bla ma bsang ba 'dus pa'i tshes bcu'i mchod pa dang 'brel bar gtor dbang gnad kyi shog gcig ma ji ltar bskur ba'i tshul bklags chog tu bkod pa 'di'ang /__shAkya'i dge slong rig pa 'dzin pa mtsho skyes bla ma dgyes pa'i 'bangs kyis sbyar ba'i dge bas mtha' klas pa'i yid can rgya mtsho'i rdul snyed pad+ma drwa ba can gyi dga' tshal du 'dod rgur rtsen pa'i rgyur gyur cig/__//sarba dA ka l+yA NaM b+ha ba tu//__//_