DKR-KABUM-11-DA-020

🚧 This website is under continued development. We appreciate your patience!

Previous Text Back to Volume PageNext Text

Wylie title	rtsa gsum gsol bsdus grub gnyis 'dod 'jo/ rdo rje'i chos skyong ba'i tshogs la phrin las su bcol ba che mchog bzhad pa'i rngams sgra
Location	dil mgo mkhyen brtse bka' 'bum Volume 11, Text 20, Pages 104-106 (Folios 1a to 3b4)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Rtsa gsum gsol bsdus grub gnyis 'dod 'jo rdo rje'i chos skyong ba'i tshogs la phrin las su bcol ba che mchog bzhad pa'i rngams sgra. In Skyabs rje dil mgo mkhyen brtse rin po che'i bka' 'bum, Vol. 11: 104-106. Delhi: Shechen Publications, 1994.
Genre	Protector Rituals - gsol mchod

Tibetan Text

Wylie

[edit]

༄༅། རྩ་གསུམ་གསོལ་བསྡུས་གྲུབ་གཉིས་འདོད་འཇོ་བཞུགས། མཆོད་གཏོར་སོགས་འབྲུ་གསུམ་དང་ནམ་མཁའ་མཛོད་ཀྱི་སྔགས་རྒྱས་བརླབས་ལ། ཧཱུྃ། ཆོས་དབྱིངས་སྐྱེ་བ་མེད་པའི་མཁའ་ཀློང་ནས། །མ་འགགས་ཐབས་མཆོག་སྒྱུ་མ་རོལ་པའི་གར། །དྲན་པ་ཙམ་གྱིས་ཕན་བདེའི་རེ་སྐོང་བའི། །སྐྱབས་གནས་དཀོན་མཆོག་སྤྱི་དང་ཁྱད་པར་དུ། །སྔ་འགྱུར་བཀའ་གཏེར་བཀའ་གདམས་ལམ་འབྲས་དང༌། །མར་ཤངས་བཀའ་བརྒྱུད་ཞི་གཅོད་སྦྱོར་བ་དྲུག །ཨོ་རྒྱན་བསྙེན་སྒྲུབ་རྩ་གསུམ་ཆོས་སྲུང་སོགས། །མཆོད་ཅིང་བསྟོད་པའི་མགྲོན་དུ་འོས་པ་རྣམས། །འདིར་གཤེགས་རང་མཐུན་གདན་ལ་དགྱེས་པར་བཞུགས། །ཆོས་ཀུན་ཀ་དག་བྱང་ཆུབ་སེམས་ཀྱི་རྩལ། །རོལ་པ་འགགས་མེད་རྩ་གསུམ་དཀྱིལ་འཁོར་སྤྲིན། །ཇི་ལྟར་ཤར་ཡང་ཆོས་ཉིད་གཉུག་མའི་བབས། །བསལ་བཞག་སྤང་བླང་བྲལ་བའི་ཕྱག་གིས་འདུད། །ཚོགས་དྲུག་རང་གྲོལ་ཕྱི་མཆོད་འདོད་ཡོན་རྫས། །དུག་ལྔ་གནས་དག་ནང་གི་མཆོད་པའི་སྤྲིན། །བདེ་སྟོང་དགའ་བཞིས་ཉམས་རྩལ་གསང་མཆོད་འབུལ། །ཆོས་ཉིད་འོད་གསལ་གཉུག་མའི་ཀློང་དུ་འབུལ། །བདེ་ཆེན་འདུ་འབྲལ་མེད་པའི་རང་རྩལ་ལས། །ཞི་ཆགས་ཁྲོ་བོའི་རྣམ་འགྱུར་མ་འགགས་པ། །གང་འདུལ་མོས་ངོར་གཙོ་དང་འཁོར་གྱི་ཚུལ། །དག་པ་རབ་འབྱམས་འཁོར་ལོར་འཆར་ལ་བསྟོད། །ཅིར་སྣང་རྒྱན་དུ་ཤར་བའི་ཨ་མྲྀ་ཏ། །སྲིད་རྩ་ཉོན་མོངས་བསྒྲལ་བའི་དམར་ཆེན་བཅུད། །གཟུང་འཛིན་འཁྲུལ་རྟོག་དབྱིངས་དག་བ་ལིཾ་ཏ། །ཟག་མེད་མཆོད་བསྐང་ནམ་མཁའ་མཛོད་ཀྱི་སྒོ། །དགྱེས་དགུར་འཆར་བའི་ཏིང་འཛིན་རོལ་མོ་འདིས། །རང་ཤར་རྩ་གསུམ་དཀྱིལ་འཁོར་ལྷ་ཚོགས་བསྐང༌། །དེ་ལྟར་ཐུགས་དམ་གཉན་པོ་བསྐང་བའི་མཐུས། །ཉམས་ཆགས་འགལ་འཁྲུལ་ནོངས་པ་སོར་ཆུད་ནས། །མི་འབྲལ་དམ་ཚིག་གཉན་པོ་རྗེས་དགོངས་ལ། །བདག་ལ་མཆོག་ཐུན་འདོད་དགུའི་དངོས་གྲུབ་སྩོལ། །རྒྱལ་བསྟན་སྤྱི་དང་ངེས་གསང་སྒྲུབ་བརྒྱུད་བརྒྱད། །ལོག་རྟོག་རྐྱེན་གྱིས་ནམ་ཡང་མི་སྒྲིབ་པར། །བཤད་སྒྲུབ་ཕྲིན་ལས་ནམ་མཁའི་མཐའ་དང་མཉམ། །དོན་གཉིས་ཕན་བདེའི་དགའ་སྟོན་རྒྱས་པར་མཛོད། །མཁས་གྲུབ་སྐྱེས་ཆེན་ཕྲེང་བར་ཕྱོགས་ཀུན་ཁྱབ། །རིགས་བཟང་བློ་གསལ་དད་ལྡན་འདུ་ཚོགས་རྒྱས། །ཀུན་ཀྱང་ལྟ་སྤྱོད་ཏིང་འཛིན་དོན་མཐུན་པས། །འཁོར་ལོ་གསུམ་གྱི་ཕྲིན་ལས་རྒྱས་པར་མཛོད། །ཆོས་ལྡན་རྒྱལ་པོ་སྡེ་བཞིའི་མངའ་ཐང་དར། །ནད་མུག་འཁྲུགས་སོགས་དུས་ཀྱི་རྒུད་ཀུན་ཞི། །སྐྱེ་དགུ་ལས་འབྲས་ཡིད་ཆེས་བསྟན་ལ་གུས། །བདེ་སྐྱིད་རྫོགས་ལྡན་གསར་པའི་སྒོ་འཕར་ཕྱེས། །ཁྱད་པར་རྣལ་འབྱོར་བདག་ཅག་འཁོར་བཅས་ཀྱི། །ཞི་རྒྱས་དབང་དང་མངོན་སྤྱོད་ལས་ལ་སོགས། །གང་བཅོལ་ཐོགས་མེད་འགྲུབ་པའི་དགེ་མཚན་གྱིས། །ཕྱོགས་ལས་རྣམ་རྒྱལ་གྲགས་པའི་རུ་མཚོན་སྒྲེངས། །མདོར་ན་འདི་ནས་བྱང་ཆུབ་སྙིང་པོའི་བར། །སྲུང་སྐྱོབ་ཕྲིན་ལས་ཟབ་མོའི་རོལ་རྩེད་ཀྱིས། །དམ་ཆོས་སྒྲུབ་པའི་འགལ་རྐྱེན་ཀུན་ཞི་ཞིང༌། །ཆོས་མཐུན་བསམ་པའི་དོན་ཀུན་འགྲུབ་པར་མཛོད། །ཅེས་མཆོད་གཏོར་ཡོད་ན་གཙང་སར་འབུལ་བ་སོགས་རྗེས་སྤྱི་ལྟར་བྱའོ། །ཞེས་པའང་སྔགས་བཙུན་རྡོ་རྗེ་དབང་མཆོག་དགྱེས་རབ་རྩལ་གྱིས་བྲིས་ཤིང་ཕྲིན་ལས་སུ་གསོལ་བ་ཛ་ཡནྟུ། ༈ གྲངས་གསོག་སོགས་ཤིན་ཏུ་བསྡུས་པར་འདོན་ན། སྔ་འགྱུར་བཀའ་གཏེར་བཀའ་གདམས་ལམ་འབྲས་དང༌། །མར་ཤངས་བཀའ་བརྒྱུད་ཞི་གཅོད་སྦྱོར་བ་དྲུག །ཨོ་རྒྱན་བསྙེན་སྒྲུབ་རྩ་གསུམ་ཆོས་སྲུང་རྣམས། །གསོལ་ལོ་མཆོད་དོ་མཆོག་ཐུན་དངོས་གྲུབ་སྩོལ། །ཁྱད་པར་གྲུབ་པའི་རིག་འཛིན་མཚོ་སྐྱེས་རྗེའི། །སྤྱན་སྔར་ཞལ་བཞེས་བསྟན་པ་སྲུང་མཛད་པའི། །ཡེ་ཤེས་ལས་དང་འཇིག་རྟེན་ཚུལ་འཛིན་རྣམས། །མཆོད་གཏོར་འདི་བཞེས་ལས་བཞིའི་དངོས་གྲུབ་སྩོལ། །བསྟན་པ་དར་ཞིང་བསྟན་འཛིན་དབུ་རྨོག་བཙན། །རྒྱལ་ཁམས་བདེ་ཞིང་སྣོད་བཅུད་དཔལ་འབྱོར་རྒྱས། །ཁྱད་པར་རྣལ་འབྱོར་བདག་ཅག་འཁོར་བཅས་ཀྱི། །འདོད་དོན་བཅོལ་བའི་ཕྲིན་ལས་འགྲུབ་པར་མཛོད། །ཨོཾ་ཤྲཱི་དྷརྨ་པཱ་ལ་ས་པ་རི་ཝཱ་ར་ཨི་དཾ་བ་ལིཾ་ཏ་ཁཱ་ཧི། ཞེས་བརྗོད་དོ།། ༈ རྡོ་རྗེའི་ཆོས་སྐྱོང་བའི་ཚོགས་ལ་ཕྲིན་ལས་སུ་བཅོལ་བ་ཆེ་མཆོག་བཞད་པའི་རྔམས་སྒྲ་བཞུགས་སོ།། ཀཱ་ལ་མ་ཧཱ་རྡོ་རྗེ་སྲིན་པོ་ཚོགས་ཀྱི་བདག །ཁ་བ་ལྟར་དཀར་ཐུབ་བསྟན་སྲུང་མཛད་ཕྱག་བཞི་པ། །ག་བུར་ངད་བཞིན་ཕྲིན་ལས་ཀུན་ཁྱབ་མ་ནིང་ནག །ང་བདག་དབྱིངས་སྒྲོལ་མཐུ་སྟོབས་དབང་ཕྱུག་ཞལ་བཞི་པ། །ཅ་རེའི་སྤྱན་གྱིས་ཐེག་མཆོག་བསྟན་སྲུང་ཨེ་ཀ་ཙ། །ཆ་ཤས་ཕྲིན་ལས་རེ་ཁཱ་ཡོངས་རྫོགས་ལྷ་ཆེན་པོ། །ཇ་ཧང་མཚམས་སྤྲིན་དུག་གི་ཟེར་འཕྲོ་ཁྱབ་འཇུག་ཆེ། །ཉ་ཟླའི་མདངས་བཞིན་འདོད་དགུའི་སིམ་སྟེར་ངལ་གསོས་པོ། །ཏ་ཐཱ་ག་ཏའི་བསྟན་སྲུང་མཚུངས་མེད་ཞིང་སྐྱོང་མ། །ཐ་ཚིག་ཉེར་དགོངས་ཞིང་སྐྱོང་དྲེགས་པའི་སྡེ་དཔོན་ཆེ། །དཱ་ནུའི་བུའི་དགྲ་ཕུར་སྲུང་སྨན་བཙུན་རྡོ་རྗེ་ལེགས། །ནཱ་ག་བཙན་རྒོད་པེ་ཧར་ཙིའུ་དམར་བདུད་བཙན་ཀླུ། །པཱ་ར་མི་ཏའི་ཐེག་མཆོག་བསྟན་སྲུང་རབ་འབྱམས་ཀུན། །ཕ་མཐའ་བརྡལ་བའི་མཆོད་སྤྲིན་དགྱེས་དགུར་སྟོབས་དང་བཅས། །བ་གླང་ལྟར་རྨོངས་ཡིད་ཅན་སྒྲོལ་དང་བསྟན་རྒྱས་ཕྱིར། །མ་མ་སྡུག་གུས་བུ་ལ་སྐྱོབ་བཞིན་ཁྱེད་བསྐུལ་ན། །ཙ་ཏུར་ཕྲིན་ལས་སྟོབས་ཀྱིས་ཚར་གཅོད་རྗེས་འཛིན་ཞིང༌། །ཚ་གྲང་ནད་གདོན་བགེགས་དང་བར་ཆད་མཐའ་དག་ཞི། །ཛ་ཏིའི་ཤིང་བཞིན་ལུང་རྟོགས་ཕྲིན་ལས་མངའ་ཐང་རྒྱས། །ཝ་སྤྲེལ་ལྟ་བུའི་སྡང་བྱེད་མིང་ཡང་མེད་པར་མཛོད། །ཞྭ་ལམ་རབ་འབྱམས་རྒྱལ་ཚབ་ཆོས་རྗེའི་ཕྱག་སྲོལ་བསྟན། །ཟ་མའི་ཡུན་ཙམ་མ་ཡིན་རྟག་འཕེལ་བཤད་སྒྲུབ་ལས། །འ་འུར་ཙམ་མིན་ཡར་ཟླ་ལྟ་བུར་རྒྱས་པ་ཡི། །ཡ་མཚན་ཆེན་པོས་ས་གསུམ་འཇིག་རྟེན་དགེ་བར་མཛོད། །ར་བ་རྒྱ་མཚོ་ཆེན་པོའི་མུ་ཁྱུད་ཚུན་གནས་འགྲོ། །ལ་ལ་ཙམ་མིན་ཆོས་བཞིན་སྤྱོད་ཅིང་དཀོན་མཆོག་མཆོད། །ཤཱ་ས་ན་ཡི་ལུང་རྟོགས་དབུ་འཕང་ཆེས་མཐོ་བས། །ས་གསུམ་སྐྱེ་དགུའི་ཡིད་ལ་ཕན་བདེའི་དཔལ་སྐྱེད་མཛོད། །ཧ་ལོའི་ལྟ་བུའི་སྙིགས་མའི་ནད་མཚོན་རྒུད་པ་ཞི། །ཨ་ཧོ་ངོ་མཚར་བསྟན་པའི་ཉིན་བྱེད་ས་གསུམ་གསལ། །ཧ་ཧིའི་གསུང་བཞིན་གདུལ་བྱ་ཀུན་གྱི་ཡིད་འཕྲོག་པའི། །ཨ་ཧོའི་ཤིས་པའི་གླུ་སྙན་རབ་ཏུ་སྒྲོགས་པར་མཛོད། །ཅེས་མེ་ཁམས་སྟག་གིས་ངར་སྒྲ་སྒྲོགས་པ་རབ་བྱུང་བཅུ་དྲུག་པའི་ལོར་ཉེ་བའི་ཚནྡྷོ་ཧའི་གདོད་ནས་གྲུབ་པའི་གནས་ཀྱི་ལྟེ་བར་ཞེ་ཆེན་བསྟན་གཉིས་དར་རྒྱས་གླིང་གི་དགེ་འདུན་འདུས་པའི་སྡེར་བཤད་སྒྲུབ་ལས་གསུམ་གྱི་བསྟན་པའི་རྒྱུན་འཛུགས་པའི་ཚེ་ཐུན་མོང་མ་ཡིན་པའི་སྲུང་མའི་ཚོགས་ལ་ཕྲིན་ལས་སུ་བཅོལ་བ་འདི་ཡང་རིག་འཛིན་གྱི་བཙུན་པ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ནག་ཟླའི་བཟང་པོ་གཉིས་པར་བྲིས་པ་འདིས་ཀྱང་བསྟན་འགྲོའི་ཕན་བདེའི་དཔལ་ཡོན་ཅི་དགའ་རྒྱས་ཤིང་བརྟན་པའི་རྒྱུར་གྱུར་ཅིག །།

[edit]

@#/__rtsa gsum gsol bsdus grub gnyis 'dod 'jo bzhugs/_mchod gtor sogs 'bru gsum dang nam mkha' mdzod kyi sngags rgyas brlabs la/_hU~M/_chos dbyings skye ba med pa'i mkha' klong nas/_/ma 'gags thabs mchog sgyu ma rol pa'i gar/_/dran pa tsam gyis phan bde'i re skong ba'i/_/skyabs gnas dkon mchog spyi dang khyad par du/_/snga 'gyur bka' gter bka' gdams lam 'bras dang*/_/mar shangs bka' brgyud zhi gcod sbyor ba drug_/o rgyan bsnyen sgrub rtsa gsum chos srung sogs/_/mchod cing bstod pa'i mgron du 'os pa rnams/_/'dir gshegs rang mthun gdan la dgyes par bzhugs/_/chos kun ka dag byang chub sems kyi rtsal/_/rol pa 'gags med rtsa gsum dkyil 'khor sprin/_/ji ltar shar yang chos nyid gnyug ma'i babs/_/bsal bzhag spang blang bral ba'i phyag gis 'dud/_/tshogs drug rang grol phyi mchod 'dod yon rdzas/_/dug lnga gnas dag nang gi mchod pa'i sprin/_/bde stong dga' bzhis nyams rtsal gsang mchod 'bul/_/chos nyid 'od gsal gnyug ma'i klong du 'bul/_/bde chen 'du 'bral med pa'i rang rtsal las/_/zhi chags khro bo'i rnam 'gyur ma 'gags pa/_/gang 'dul mos ngor gtso dang 'khor gyi tshul/_/dag pa rab 'byams 'khor lor 'char la bstod/_/cir snang rgyan du shar ba'i a mr-i ta/_/srid rtsa nyon mongs bsgral ba'i dmar chen bcud/_/gzung 'dzin 'khrul rtog dbyings dag ba liM ta/_/zag med mchod bskang nam mkha' mdzod kyi sgo/_/dgyes dgur 'char ba'i ting 'dzin rol mo 'dis/_/rang shar rtsa gsum dkyil 'khor lha tshogs bskang*/_/de ltar thugs dam gnyan po bskang ba'i mthus/_/nyams chags 'gal 'khrul nongs pa sor chud nas/_/mi 'bral dam tshig gnyan po rjes dgongs la/_/bdag la mchog thun 'dod dgu'i dngos grub stsol/_/rgyal bstan spyi dang nges gsang sgrub brgyud brgyad/_/log rtog rkyen gyis nam yang mi sgrib par/_/bshad sgrub phrin las nam mkha'i mtha' dang mnyam/_/don gnyis phan bde'i dga' ston rgyas par mdzod/_/mkhas grub skyes chen phreng bar phyogs kun khyab/_/rigs bzang blo gsal dad ldan 'du tshogs rgyas/_/kun kyang lta spyod ting 'dzin don mthun pas/_/'khor lo gsum gyi phrin las rgyas par mdzod/_/chos ldan rgyal po sde bzhi'i mnga' thang dar/_/nad mug 'khrugs sogs dus kyi rgud kun zhi/_/skye dgu las 'bras yid ches bstan la gus/_/bde skyid rdzogs ldan gsar pa'i sgo 'phar phyes/_/khyad par rnal 'byor bdag cag 'khor bcas kyi/_/zhi rgyas dbang dang mngon spyod las la sogs/_/gang bcol thogs med 'grub pa'i dge mtshan gyis/_/phyogs las rnam rgyal grags pa'i ru mtshon sgrengs/_/mdor na 'di nas byang chub snying po'i bar/_/srung skyob phrin las zab mo'i rol rtsed kyis/_/dam chos sgrub pa'i 'gal rkyen kun zhi zhing*/_/chos mthun bsam pa'i don kun 'grub par mdzod/_/ces mchod gtor yod na gtsang sar 'bul ba sogs rjes spyi ltar bya'o/__/zhes pa'ang sngags btsun rdo rje dbang mchog dgyes rab rtsal gyis bris shing phrin las su gsol ba dza yan+tu/_!_grangs gsog sogs shin tu bsdus par 'don na/_snga 'gyur bka' gter bka' gdams lam 'bras dang*/_/mar shangs bka' brgyud zhi gcod sbyor ba drug_/o rgyan bsnyen sgrub rtsa gsum chos srung rnams/_/gsol lo mchod do mchog thun dngos grub stsol/_/khyad par grub pa'i rig 'dzin mtsho skyes rje'i/_/spyan sngar zhal bzhes bstan pa srung mdzad pa'i/_/ye shes las dang 'jig rten tshul 'dzin rnams/_/mchod gtor 'di bzhes las bzhi'i dngos grub stsol/_/bstan pa dar zhing bstan 'dzin dbu rmog btsan/_/rgyal khams bde zhing snod bcud dpal 'byor rgyas/_/khyad par rnal 'byor bdag cag 'khor bcas kyi/_/'dod don bcol ba'i phrin las 'grub par mdzod/_/oM shrI d+harma pA la sa pa ri wA ra i daM ba liM ta khA hi/_zhes brjod do//__!__rdo rje'i chos skyong ba'i tshogs la phrin las su bcol ba che mchog bzhad pa'i rngams sgra bzhugs so//_kA la ma hA rdo rje srin po tshogs kyi bdag_/kha ba ltar dkar thub bstan srung mdzad phyag bzhi pa/_/ga bur ngad bzhin phrin las kun khyab ma ning nag_/nga bdag dbyings sgrol mthu stobs dbang phyug zhal bzhi pa/_/ca re'i spyan gyis theg mchog bstan srung e ka tsa/_/cha shas phrin las re khA yongs rdzogs lha chen po/_/ja hang mtshams sprin dug gi zer 'phro khyab 'jug che/_/nya zla'i mdangs bzhin 'dod dgu'i sim ster ngal gsos po/_/ta thA ga ta'i bstan srung mtshungs med zhing skyong ma/_/tha tshig nyer dgongs zhing skyong dregs pa'i sde dpon che/_/dA nu'i bu'i dgra phur srung sman btsun rdo rje legs/_/nA ga btsan rgod pe har tsi'u dmar bdud btsan klu/_/pA ra mi ta'i theg mchog bstan srung rab 'byams kun/_/pha mtha' brdal ba'i mchod sprin dgyes dgur stobs dang bcas/_/ba glang ltar rmongs yid can sgrol dang bstan rgyas phyir/_/ma ma sdug gus bu la skyob bzhin khyed bskul na/_/tsa tur phrin las stobs kyis tshar gcod rjes 'dzin zhing*/_/tsha grang nad gdon bgegs dang bar chad mtha' dag zhi/_/dza ti'i shing bzhin lung rtogs phrin las mnga' thang rgyas/_/wa sprel lta bu'i sdang byed ming yang med par mdzod/_/zhwa lam rab 'byams rgyal tshab chos rje'i phyag srol bstan/_/za ma'i yun tsam ma yin rtag 'phel bshad sgrub las/_/'a 'ur tsam min yar zla lta bur rgyas pa yi/_/ya mtshan chen pos sa gsum 'jig rten dge bar mdzod/_/ra ba rgya mtsho chen po'i mu khyud tshun gnas 'gro/_/la la tsam min chos bzhin spyod cing dkon mchog mchod/_/shA sa na yi lung rtogs dbu 'phang ches mtho bas/_/sa gsum skye dgu'i yid la phan bde'i dpal skyed mdzod/_/ha lo'i lta bu'i snyigs ma'i nad mtshon rgud pa zhi/_/a ho ngo mtshar bstan pa'i nyin byed sa gsum gsal/_/ha hi'i gsung bzhin gdul bya kun gyi yid 'phrog pa'i/_/a ho'i shis pa'i glu snyan rab tu sgrogs par mdzod/_/ces me khams stag gis ngar sgra sgrogs pa rab byung bcu drug pa'i lor nye ba'i tshan+d+ho ha'i gdod nas grub pa'i gnas kyi lte bar zhe chen bstan gnyis dar rgyas gling gi dge 'dun 'dus pa'i sder bshad sgrub las gsum gyi bstan pa'i rgyun 'dzugs pa'i tshe thun mong ma yin pa'i srung ma'i tshogs la phrin las su bcol ba 'di yang rig 'dzin gyi btsun pa 'gyur med theg mchog bstan pa'i rgyal mtshan gyis nag zla'i bzang po gnyis par bris pa 'dis kyang bstan 'gro'i phan bde'i dpal yon ci dga' rgyas shing brtan pa'i rgyur gyur cig_//