DKR-KABUM-06-CHA-033

🚧 This website is under continued development. We appreciate your patience!

Previous Text Back to Volume PageNext Text

Wylie title	rtsa gsum 'od gsal snying thig las: phur pa 'dus pa'i dril sgrub kyi dbang chog
Location	dil mgo mkhyen brtse bka' 'bum Volume 6, Text 33, Pages 270-273 (Folios 1a to 4a3)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	Khyentse, Dilgo. Rtsa gsum 'od gsal snying thig las phur pa 'dus pa'i dril sgrub kyi dbang chog. In Skyabs rje dil mgo mkhyen brtse rin po che'i bka' 'bum, Vol. 6: 270-273. Delhi: Shechen Publications, 1994.
Genre	Empowerment Ritual - dbang chog - dbang skur
Cycle	རྩ་གསུམ་འོད་གསལ་སྙིང་ཏིག་ (rtsa gsum 'od gsal snying tig)
Deity	rdo rje phur pa
Colophon	པདྨ་གར་དབང་མདོ་སྔགས་གླིང་པ་རང་བྱུང་འོད་གསལ་སྤྲུལ་པའི་རྡོ་རྗེས་ཡུད་ཙམ་ལ་བྲིས་པ་ཡི་གེ་གཉིས་པའི་གྲོགས་དན་དོ་སྐྱ་ཆོས་ཀྱི་ཉི་མས་མཛད་པ་ཛ་ཡནྟུ།
	pad+ma gar dbang mdo sngags gling pa rang byung 'od gsal sprul pa'i rdo rjes yud tsam la bris pa yi ge gnyis pa'i grogs dan do skya chos kyi nyi mas mdzad pa dza yan+tu/

Tibetan Text

Wylie

[edit]

དྷཱི༔ རྩ་གསུམ་འོད་གསལ་སྙིང་ཐིག་ལས༔ ཕུར་པ་འདུས་པའི་དྲིལ་སྒྲུབ་ཀྱི་དབང་ཆོག་བཞུགས༔

དྷཱི༔ དཔལ་ཆེན་རུ་ཀ་ལ་འདུད༔ དེ་ཡི་སྐུ་གསུང་ཐུགས་ཀྱི་དབྱིངས༔ འཇུག་པ་དབང་གི་ཆོ་ག་སྟེ༔ མཚན་ཉིད་ལྡན་པའི་སློབ་དཔོན་གྱིས༔ བཅོས་མའི་དཀྱིལ་འཁོར་བཀོད་ལེགས་པར༔ བུམ་པ་གསང་ཐོད་རིག་མ་དང༔ མེ་ལོང་ཤེལ་རྡོ་སྐུ་དང་སྔགས༔ ཕྱག་མཚན་དཔལ་དང་དུར་ཁྲོད་ཆས༔ བསྒྲལ་ཕུར་མཚོན་ཆ་ལིངྒ་བཅས༔ འདུ་བྱས་བདག་མདུན་གཞུང་བསྲངས་ཤིང༔ བསྙེན་སྒྲུབ་ལས་གསུམ་བུམ་པའི་ནང༔ ལྷ་ཚོགས་བསྐྱེད་བཟླས་ལས་བུམ་བསྒྲུབས༔ སྣོད་དུ་ངེས་ཤིང་དོན་གཉེར་གྱི༔ སློབ་མ་ཟུང་དུ་མ་གྱུར་པ༔ ཁྲུས་དང་བགེགས་བསལ་སྲུང་བས་བཅིངས༔ ལོ་རྒྱུས་བརྗོད་པས་ཡིད་ཆེས་བསྐྱེད༔ མཎྜལ་ཕུལ་ལ་གསོལ་བ་གདབ༔ ཧེ་རུ་ཀ་དཔལ་དཀྱིལ་འཁོར་གཙོ༔ སངས་རྒྱས་ཀུན་གྱི་ཕྲིན་ལས་བདག༔ ཡེ་ཤེས་ཁྲོ་བོ་ཆེན་པོ་ཡིས༔ བདག་ཅག་སྨིན་པར་མཛད་དུ་གསོལ༔ ལན་གསུམ་སྐྱབས་སེམས་རྒྱུད་སྦྱངས་ཤིང༔ སྡོམ་པ་གསུམ་བཟུང་གཡར་དམ་བླང༔ རྡོ་རྗེའི་ཆུ་སྦྱིན་དམ་ལ་བཞག༔ ཡེ་ཤེས་རྡོ་རྗེ་འདའ་དཀའི་ཆུ༔ སྙིང་ལ་བསྟིམ་པས་དམ་བསྲུངས་ན༔ སེམས་དཔའ་མཆོག་གྱུར་དངོས་གྲུབ་སྟེར༔ འདས་ན་བརླག་པར་གདོན་མི་ཟ༔ ས་མ་ཡ་ཨི་དཾ་ན་ར་ཀན༔ སློབ་མའི་སྒོ་གསུམ་མ་དག་སྦྱངས༔ སྲས་སུ་བསྐྲུན་ནས་ཕུང་ཁམས་ཀུན༔ དག་པའི་ལྷར་བསྐྱེད་བྱིན་གྱིས་བརླབས༔ རྡོ་རྗེའི་ཡེ་ཤེས་ནན་ཏན་དབབ༔ གཉིས་མེད་རྒྱས་བཏབ་བརྟན་པ་ལ༔ གདན་གསུམ་ཚང་བ་དབང་གི་ལྷས༔ བདུད་རྩིའི་བུམ་པས་གཏོར་བླུགས་བྱ༔ ཧཱུྃ༔ རིན་ཆེན་བུམ་པ་མཚན་རྫོགས་ནང༔ བདེ་ཆེན་བདུད་རྩིའི་བཅུད་ཀྱིས་གཏམས༔ རིགས་ལྔ་འདུས་པའི་དམ་རྫས་འདིས༔ སྐལ་ལྡན་བུ་ལ་དབང་བསྐུར་རོ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ༔ བུམ་ཆུ་འཐོར་འཐུང་ཁྲུས་བྱས་པས༔ སྒྲིབ་དག་ཡེ་ཤེས་མངོན་དུ་གྱུར༔ ཕུང་ཁམས་ལྷ་ཡི་སྐུར་སྨིན་པའི༔ བྱིན་རླབས་བརྟན་པར་བྱ་བའི་ཕྱིར༔ ཧཱུྃ༔ མཐིང་ནག་ཨེ་ཡི་ཀློང་དཀྱིལ་ནས༔ འབར་བ་གར་དགུའི་གཟི་བྱིན་ཅན༔ རྡོ་རྗེ་གཞོན་ནུའི་དབང་བསྐུར་བས༔ སྣང་སྟོང་ཕྱག་རྒྱར་སད་པར་ཤོག༔ ཀཱ་ཡ་ཨ་བྷི་ཥིཉྩ་ཨོཾ༔ བསྙེན་སྒྲུབ་ལས་ཀྱི་བཟླས་ལུང་སྦྱིན༔ ཨཱཿ རྣམ་པ་ཐམས་ཅད་རྡོ་རྗེའི་སྒྲ༔ རང་བྱུང་གསང་བའི་སྔགས་སུ་ཤར༔ དངོས་གྲུབ་ཀུན་གྱི་བཅུད་འཛིན་པ༔ སྙིང་པོ་ལུང་གིས་དབང་བསྐུར་རོ༔ ཝཱཀ་ཨ་བྷི་ཥིཉྩ་ཨཱཿ ཡེ་ཤེས་སེམས་དཔའི་ཐུགས་བྱིན་རླབས༔ ཧཱུྃ༔ འཁོར་དང་འདས་པའི་སྲོག་གི་གོར༔ སྙིང་དབུས་ཡེ་ཤེས་སེམས་དཔའ་ཆེ༔ བཛྲ་སཏྭ་ཚོན་གང་བས༔ བདེ་བ་ཆེན་པོའི་ཐུགས་དབང་སྦྱིན༔ ཙིཏྟ་ཨ་བྷི་ཥིཉྩ་ཧཱུྃ༔ ཧཱུྃ༔ སྟོབས་དང་རྣམ་ཐར་བརྒྱད་ལ་སོགས༔ ཟག་མེད་ཡོན་ཏན་ལེགས་མཚོན་པ༔ དྲེགས་པ་བསྒྲལ་བའི་ལོངས་སྤྱོད་ཆེ༔ ཡོངས་སུ་རྫོགས་པས་དབང་བསྐུར་རོ༔ གུ་ཎ་ཨ་བྷི་ཥིཉྩ་སྭཱ༔ ཧཱུྃ༔ འབར་བའི་རྡོ་རྗེས་མཚན་རྟོགས་འཇོམས༔ ཁཊྭཱཾ་དུག་གསུམ་དབྱིངས་སུ་གསོད༔ ཁྱབ་བརྡལ་ཐུགས་རྗེའི་མེ་དཔུང་དང༔ ཕྲིན་ལས་ཕུར་བུས་དབང་བསྐུར་རོ༔ ཀརྨ་ཨ་བྷི་ཥིཉྩ་ཧཱ༔ ཡབ་ཡུམ་རོལ་པའི་བྱང་སེམས་སྦྱིན༔ ཧཱུྃ༔ ཆོས་ཀུན་ཐབས་ཤེས་མཉམ་པར་སྦྱོར༔ བདེ་ཆེན་བདུད་རྩིའི་སྙིང་པོར་བསྐྱིལ༔ གཉིས་མེད་རོལ་པའི་སེམས་སྤྲིན་སྦྱིན༔ ལྷན་ཅིག་སྐྱེས་པའི་དོན་རྟོགས་ཤོག༔ གུ་ཧྱ་ཨ་བྷི་ཥིཉྩ་མ་ཧཱ་སུ་ཁ་ཧོཿ ཤེས་རབ་མཚན་ལྡན་ཕྱག་རྒྱར་གཏད༔ ཧཱུྃ༔ བདེ་བ་ཆེན་པོ་ནམ་མཁའི་དཀྱིལ༔ པདྨའི་ཟེའུ་འབྲུར་རེག་པ་ཡིས༔ མངོན་སུམ་མྱོང་ཞིང་རྟོགས་པའི་དབང༔ ཕྱག་རྒྱའི་དབང་བསྐུར་ཁྱོད་ལ་སྦྱིན༔ ཀརྨ་མུ་དྲ་ས་མ་ཡ་ཧོཿ བཞི་པ་ཚིག་གིས་དོན་ངོ་སྤྲད༔ ཧཱུྃ༔ མི་གནས་ཡེ་ཤེས་ནམ་མཁའི་དབྱིངས༔ རྡོ་རྗེ་རང་བྱུང་འོད་གསལ་ཆེ༔ རང་དང་གདོད་ནས་འདུ་འབྲལ་མེད༔ རྣམ་པར་དག་པའི་ཆོས་ཉིད་དོ༔ དྷརྨ་དྷཱ་ཏུ་ཨ་བྷི་ཥིཉྩ་ཨ༔ ཉམས་པ་བསྒྲལ་བ་མངོན་སྤྱོད་དབང༔ རཱུ་པར་གནོད་བྱེད་འགུགས་བསྟིམ་དབྱེ༔ ཐུན་གྱིས་གཟིར་ཞིང་གདབ་པས་གྲུབ༔ ལས་ཀྱི་ཕུར་བུས་བདག་ཕུར་འབེན༔ ཚེ་ཁྲུས་གནས་ལུང་དགོངས་པས་གདབ༔ ཧཱུྃ༔ སྒྲོལ་བྱེད་འབར་བ་ཀཱི་ལ་ཡ༔ ཁམས་གསུམ་སྐུ་གསུང་ཐུགས་སུ་རྫོགས༔ དུག་ལྔ་བསྒྲལ་བའི་ལས་བྱས་པས༔ ཉམས་པ་རྩད་གཅོད་དབང་ཐོབ་ཤོག༔ དྲག་སྔགས་བཟླ་ཞིང་གཏུན་ལ་བརྡུང༔ གཟུགས་ཕུང་ཞལ་བསྟབ་བྱིན་ཟར་འབུལ༔ ཧཱུྃ༔ ཨེ་དབྱིངས་འབར་བའི་མེ་ཧོམ་དུ༔ རིག་པ་རྡོ་རྗེ་ཕུར་པའི་ལྷ༔ དགྲ་བགེགས་ཤ་རུས་ཁྲག་ཀུན་འབུལ༔ བདུད་བགེགས་བསྲེག་པའི་དབང་ཐོབ་ཤོག༔ ཨགྣི་ཛྭ་ལ་ཨ་བྷི་ཥིཉྩ་ཨ༔ ཧཱུྃ༔ རྡོ་རྗེ་འབར་བའི་རི་རབ་ཀྱིས༔ མནན་ན་ལྷ་ཡང་རློག་ནུས་པའི༔ དྲག་ཤུལ་ལས་ཀྱིས་དབང་བསྐུར་བས༔ གདུག་པ་མཐའ་དག་ཚར་གཅོད་ཤོག༔ སྟྭཾ་བྷ་ཡ་ཨ་བྷི་ཥིཉྩ་ཧོཿ ཧཱུྃ༔ གདུག་པ་ཟོར་གྱི་མཚོན་ཆ་ནི༔ རྔམས་བརྗིད་འཇིགས་པའི་ཆོ་འཕྲུལ་ཅན༔ ཕུང་བྱེད་རྡོ་རྗེའི་མཚོན་ཆེན་པོས༔ ཉམས་པ་སྒྲོལ་བའི་དབང་ཐོབ་ཤོག༔ སརྦ་ས་མ་ཡ་བྷྱོ་བྷྱོ་བྷྱོ་བཟློག་བཟློག་བཟློག༔ མཱ་ར་ཡ་ཕཊ༔ ལས་གཞུག་རྒྱལ་དབྱངས་ཤིས་པ་བརྗོད༔ དམ་ཚིག་ཁས་བླང་གཏང་འབུལ་ཞིང༔ བསྔོ་སྨོན་རྒྱས་གདབ་ལས་གཞུག་བསྡུ༔ རྡོ་རྗེ་ཐེག་པའི་གཞི་ལམ་འབྲས༔ ཀུན་ཀྱང་སྙིང་པོའི་དབང་ལ་རྫོགས༔ ཐབས་འདིས་སྨིན་པའི་གང་ཟག་ཀུན༔ ཡོངས་རྫོགས་ལམ་སྤྱོད་ནུས་པ་ཐོབ༔ དེ་ཕྱིར་འདི་ལ་གཅེས་པར་ཟུངས༔ མན་ངག་ཀུན་གྱི་སྙིང་པོའོ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ པདྨ་གར་དབང་མདོ་སྔགས་གླིང་པ་རང་བྱུང་འོད་གསལ་སྤྲུལ་པའི་རྡོ་རྗེས་ཡུད་ཙམ་ལ་བྲིས་པ་ཡི་གེ་གཉིས་པའི་གྲོགས་དན་དོ་སྐྱ་ཆོས་ཀྱི་ཉི་མས་མཛད་པ་ཛ་ཡནྟུ། །།

[edit]

d+hI:___rtsa gsum 'od gsal snying thig las:_phur pa 'dus pa'i dril sgrub kyi dbang chog bzhugs:

d+hI:___dpal chen ru ka la 'dud:_de yi sku gsung thugs kyi dbyings:_'jug pa dbang gi cho ga ste:_mtshan nyid ldan pa'i slob dpon gyis:_bcos ma'i dkyil 'khor bkod legs par:_bum pa gsang thod rig ma dang:_me long shel rdo sku dang sngags:_phyag mtshan dpal dang dur khrod chas:_bsgral phur mtshon cha ling+ga bcas:_'du byas bdag mdun gzhung bsrangs shing:_bsnyen sgrub las gsum bum pa'i nang:_lha tshogs bskyed bzlas las bum bsgrubs:__snod du nges shing don gnyer gyi:_slob ma zung du ma gyur pa:_khrus dang bgegs bsal srung bas bcings:_lo rgyus brjod pas yid ches bskyed:_maN+Dal phul la gsol ba gdab:_he ru ka dpal dkyil 'khor gtso:_sangs rgyas kun gyi phrin las bdag:_ye shes khro bo chen po yis:_bdag cag smin par mdzad du gsol:_lan gsum skyabs sems rgyud sbyangs shing:_sdom pa gsum bzung g.yar dam blang:_rdo rje'i chu sbyin dam la bzhag:_ye shes rdo rje 'da' dka'i chu:_snying la bstim pas dam bsrungs na:_sems dpa' mchog gyur dngos grub ster:_'das na brlag par gdon mi za:_sa ma ya i daM na ra kan:_slob ma'i sgo gsum ma dag sbyangs:_sras su bskrun nas phung khams kun:_dag pa'i lhar bskyed byin gyis brlabs:_rdo rje'i ye shes nan tan dbab:_gnyis med rgyas btab brtan pa la:_gdan gsum tshang ba dbang gi lhas:_bdud rtsi'i bum pas gtor blugs bya:_hU~M:_rin chen bum pa mtshan rdzogs nang:_bde chen bdud rtsi'i bcud kyis gtams:_rigs lnga 'dus pa'i dam rdzas 'dis:_skal ldan bu la dbang bskur ro:_oM sarba ta thA ga ta a b+hi She ka te sa ma ya shrI hU~M:_bum chu 'thor 'thung khrus byas pas:_sgrib dag ye shes mngon du gyur:_phung khams lha yi skur smin pa'i:_byin rlabs brtan par bya ba'i phyir:_hU~M:_mthing nag e yi klong dkyil nas:_'bar ba gar dgu'i gzi byin can:_rdo rje gzhon nu'i dbang bskur bas:_snang stong phyag rgyar sad par shog:_kA ya a b+hi Shiny+tsa oM:_bsnyen sgrub las kyi bzlas lung sbyin:_AH_rnam pa thams cad rdo rje'i sgra:_rang byung gsang ba'i sngags su shar:_dngos grub kun gyi bcud 'dzin pa:_snying po lung gis dbang bskur ro:_wAka a b+hi Shiny+tsa AH_ye shes sems dpa'i thugs byin rlabs:_hU~M:_'khor dang 'das pa'i srog gi gor:_snying dbus ye shes sems dpa' che:_badz+ra satwa tshon gang bas:_bde ba chen po'i thugs dbang sbyin:_tsit+ta a b+hi Shiny+tsa hU~M:_hU~M:_stobs dang rnam thar brgyad la sogs:_zag med yon tan legs mtshon pa:_dregs pa bsgral ba'i longs spyod che:_yongs su rdzogs pas dbang bskur ro:_gu Na a b+hi Shiny+tsa swA:_hU~M:_'bar ba'i rdo rjes mtshan rtogs 'joms:_khaT+wAM dug gsum dbyings su gsod:_khyab brdal thugs rje'i me dpung dang:_phrin las phur bus dbang bskur ro:_karma a b+hi Shiny+tsa hA:_yab yum rol pa'i byang sems sbyin:_hU~M:_chos kun thabs shes mnyam par sbyor:_bde chen bdud rtsi'i snying por bskyil:_gnyis med rol pa'i sems sprin sbyin:_lhan cig skyes pa'i don rtogs shog:_gu h+ya a b+hi Shiny+tsa ma hA su kha hoH_shes rab mtshan ldan phyag rgyar gtad:_hU~M:_bde ba chen po nam mkha'i dkyil:_pad+ma'i ze'u 'brur reg pa yis:_mngon sum myong zhing rtogs pa'i dbang:_phyag rgya'i dbang bskur khyod la sbyin:_karma mu dra sa ma ya hoH_bzhi pa tshig gis don ngo sprad:_hU~M:_mi gnas ye shes nam mkha'i dbyings:_rdo rje rang byung 'od gsal che:_rang dang gdod nas 'du 'bral med:_rnam par dag pa'i chos nyid do:_d+harma d+hA tu a b+hi Shiny+tsa a:_nyams pa bsgral ba mngon spyod dbang:_rU par gnod byed 'gugs bstim dbye:_thun gyis gzir zhing gdab pas grub:_las kyi phur bus bdag phur 'ben:_tshe khrus gnas lung dgongs pas gdab:_hU~M:_sgrol byed 'bar ba kI la ya:_khams gsum sku gsung thugs su rdzogs:_dug lnga bsgral ba'i las byas pas:_nyams pa rtsad gcod dbang thob shog:_drag sngags bzla zhing gtun la brdung:_gzugs phung zhal bstab byin zar 'bul:_hU~M:_e dbyings 'bar ba'i me hom du:_rig pa rdo rje phur pa'i lha:_dgra bgegs sha rus khrag kun 'bul:_bdud bgegs bsreg pa'i dbang thob shog:_ag+ni dz+wa la a b+hi Shiny+tsa a:_hU~M:_rdo rje 'bar ba'i ri rab kyis:_mnan na lha yang rlog nus pa'i:_drag shul las kyis dbang bskur bas:_gdug pa mtha' dag tshar gcod shog:_s+t+waM b+ha ya a b+hi Shiny+tsa hoH_hU~M:_gdug pa zor gyi mtshon cha ni:_rngams brjid 'jigs pa'i cho 'phrul can:_phung byed rdo rje'i mtshon chen pos:_nyams pa sgrol ba'i dbang thob shog:_sarba sa ma ya b+h+yo b+h+yo b+h+yo bzlog bzlog bzlog:_mA ra ya phaT:_las gzhug rgyal dbyangs shis pa brjod:_dam tshig khas blang gtang 'bul zhing:_bsngo smon rgyas gdab las gzhug bsdu:_rdo rje theg pa'i gzhi lam 'bras:_kun kyang snying po'i dbang la rdzogs:_thabs 'dis smin pa'i gang zag kun:_yongs rdzogs lam spyod nus pa thob:_de phyir 'di la gces par zungs:_man ngag kun gyi snying po'o:_sa ma ya:_rgya rgya rgya:_brda thim:_pad+ma gar dbang mdo sngags gling pa rang byung 'od gsal sprul pa'i rdo rjes yud tsam la bris pa yi ge gnyis pa'i grogs dan do skya chos kyi nyi mas mdzad pa dza yan+tu/_//