JKW-KABUM-22-ZA-012-079

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 22, sde tshan 12, Text 79, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 22: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

79 562-565	ཡན་ལག་བདུན་པ་དང་འབྲེལ་བའི་རྡོ་རྗེའི་ཐོལ་གླུ་འཁོར་ལོའི་མགོན་པོ་དགྱེས་པའི་རོལ་མོ། yan lag bdun pa dang 'brel ba'i rdo rje'i thol glu 'khor lo'i mgon po dgyes pa'i rol mo Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཡན་ལག་བདུན་པ་དང་འབྲེལ་བའི་རྡོ་རྗེའི་ཐོལ་གླུ་འཁོར་ལོའི་མགོན་པོ་དགྱེས་པའི་རོལ་མོ། ཡན་ལག་བདུན་པ་དང་འབྲེལ་བའི་རྡོ་རྗེའི་ཐོལ་གླུ་འཁོར་ལོའི་མགོན་པོ་དགྱེས་པའི་རོལ་མོ་ཞེས་བྱ་བ། ཨ་ཧོ། དཔལ་ལྡན་སྐུ་བཞིའི་དབང་ཕྱུག་བདེ་ཆེན་རྡོ་རྗེའི་དངོས། །དཀྱིལ་འཁོར་འཁོར་ལོ་རྒྱ་མཚོའི་བདག་ཉིད་བདེ་བར་གཤེགས། །གང་ཁྱོད་གཙུག་ཏོར་ནོར་བུའི་ཁང་བུར་ལེགས་བཞུགས་ཏེ། །རྟག་པར་རྒྱུན་དུ་འབྲལ་མེད་ཐུགས་རྗེས་གཟིགས་མཛོད་ཀྱེ། །རྟག་ཆད་རྡུལ་བྲལ་དོན་དམ་བདེན་པའི་ཡེ་ཤེས་ཆེར། །མཉམ་པར་སྦྱོར་བས་འདུད་བྱེད་བྲལ་བའི་གུས་ཕྱག་ནི། །མཐའ་གྲོལ་ཀློང་ཡངས་འོད་གསལ་སྦུབས་སུ་ཉེར་ཞི་ནས། །རོ་གཅིག་ཉིད་གྱུར་དབྱེར་མེད་མཇལ་བའི་དོན་ལ་སྤྱོད། །རྗེས་ཆགས་གོས་དཀར་ཌཱ་ཀི་བསྐུལ་བའི་ཧེ་རུ་ཀཿ །འཁོར་ལོ་ལྔ་ཡི་གཞལ་མེད་ཁང་དུ་ལེགས་སྤྱོན་པས། །ཟག་བྲལ་དགའ་བཞིའི་མཆོད་པའི་སྤྲིན་ཕུང་འབྱམས་ཀླས་པ། །ཚོགས་དྲུག་སྣང་བ་དབུ་མར་ཐིམ་པའི་ངང་དུ་འབུལ། །ཀུན་ཏུ་བྲལ་ཐོབ་སྤངས་པའི་དེ་ཉིད་ཆོས་ཀྱི་དབྱིངས། །གནག་པའི་ལས་ལ་རྗེས་སུ་གོམས་པས་བསླད་གྱུར་གང་། །འཁོར་གསུམ་མི་དམིགས་མཁའ་ལྟར་རབ་ཞི་དེ་ཉིད་ཀློང་། །ཉེ་བར་ཞི་བས་ལས་དང་བག་ཆགས་འབྲེལ་རྒྱུན་ཆད། །གང་ན་སྣ་ཚོགས་ཐེག་པའི་རིམ་པ་རྨད་བྱུང་དང་། །བགྲོད་བྱའི་རྩེར་གྱུར་མཆོག་ཏུ་ཟབ་པའི་གཞུང་ལམ་ལ། །བསྙེན་ཅིང་གྲོལ་བའི་འཕགས་དང་སློབ་པའི་ཚོགས་རྣམས་ལ། །མི་ཕྱེད་དགའ་བས་རྗེས་སུ་ཡི་རང་འཛུམ་དཀར་གྲོལ། །སྲིད་པའི་རྟེན་འབྲེལ་ཉི་ཟླའི་རྒྱུ་བ་གང་ཡིན་པ། །གཟུང་འཛིན་ཀུན་བྲལ་དབུ་མ་སྒྲ་གཅན་མཁར་རོལ་པས། །དོན་དམ་ཟག་བྲལ་དབྱིངས་སུ་གཤེགས་པའི་རྒྱལ་ཀུན་ལ། །མི་ཕྱེད་ཉེར་གསང་རྡོ་རྗེའི་ཆོས་འཁོར་བསྐོར་བར་བསྐུལ། །འཕོ་འཇིག་བྲལ་བའི་ཡེ་ཤེས་མི་འགྱུར་རྟག་པ་ཉིད། །ཚུ་རོལ་སྣང་ངོར་སྐྱེ་དང་འགགས་པའི་ཟློས་གར་ཀུན། །བསྒྱུར་བ་མ་ཡིན་ཐབས་ཤེས་མཚན་དཔེའི་ཟ་མ་ཏོག །ཕྱོགས་བཅུའི་གཙུག་ཏོར་རྩེ་མོར་མཆོག་ཏུ་ངལ་བསོས་མཛོད། །ཁྱོད་ནི་བདག་གི་ཕ་དང་མ་སྟེ་དེ་བཞིན་དུ། །སྐྱོབ་པའི་མགོན་དང་མཛའ་བའི་བཤེས་གཉེན་ཉིད་ལགས་ན། །ལས་ཀྱི་རྗེས་འབྲངས་སྐྱེ་བའི་འཁྲི་ཤིང་གཙུག་ཀུན་ཏུ། །རིགས་བདག་པདྨ་དཀར་པོའི་ལ་ཐོད་དམ་པར་མཛོད། །ཨེ་མ་ཕྱོགས་བཅུའི་མགོན་པོ་ཀུན་གྱིས་དུས་ཀུན་ཏུ། །དད་པའི་ཕྱག་གིས་ཞབས་ཀྱི་འཁོར་ལོ་ལ་བཏུད་ནས། །ཉོན་མོངས་ལྕགས་སྒྲོག་དམ་པོས་བཅིངས་པ་བདག་སོགས་ཀྱིས། །རུས་པའི་ཁོང་ནས་མི་འགྱུར་དད་པ་དང་བཅས་ཏེ། །དངོས་དང་ཡིད་ཀྱི་ཉམས་སམ་གཞན་དུ་རྨི་ལམ་སྐབས། །ངེས་པར་མི་འབྲལ་ཁྱོད་ཞལ་དགྱེས་པར་མཐོང་བ་དང་། །ཐུགས་ཀྱི་དགོངས་ཏེ་འབྲལ་མེད་དལ་འབབ་ཇི་བཞིན་དུ། །བཟུང་བར་མཛོད་ཅེས་གུས་དང་སྐྱོ་བས་མངོན་པར་གསོལ། །དེ་ལས་བསྐྲུན་པའི་དགེ་བ་ཀུན་དང་དུས་གཞན་དུ། །བསགས་པ་ཆབས་གཅིག་བསྡོམས་ཏེ་ཆོས་དབྱིངས་ཟད་མེད་པ། །དག་པ་དོན་དམ་གཞོན་ནུ་བུམ་སྐུར་ཉེར་བསྔོས་པས། །འགྲོ་སྒྲོལ་ཕྲིན་ལས་ཡིད་བཞིན་འཁྲི་ཤིང་ངེས་རྙེད་ཤོག །ཅེས་པའང་ཟབ་མོའི་དོན་གྱི་ཕྱོགས་ནས་གཙོ་བོར་བགྱིས་ཏེ་གང་ཤར་རྡོ་རྗེའི་གླུར་བླངས་པ་གུ་ཧྱ།། །། ༈

[edit]

yan lag bdun pa dang 'brel ba'i rdo rje'i thol glu 'khor lo'i mgon po dgyes pa'i rol mo/__ yan lag bdun pa dang 'brel ba'i rdo rje'i thol glu 'khor lo'i mgon po dgyes pa'i rol mo zhes bya ba/__a ho/__dpal ldan sku bzhi'i dbang phyug bde chen rdo rje'i dngos/__/dkyil 'khor 'khor lo rgya mtsho'i bdag nyid bde bar gshegs/__/gang khyod gtsug tor nor bu'i khang bur legs bzhugs te/__/rtag par rgyun du 'bral med thugs rjes gzigs mdzod kye/__/rtag chad rdul bral don dam bden pa'i ye shes cher/__/mnyam par sbyor bas 'dud byed bral ba'i gus phyag ni/__/mtha' grol klong yangs 'od gsal sbubs su nyer zhi nas/__/ro gcig nyid gyur dbyer med mjal ba'i don la spyod/__/rjes chags gos dkar DA ki bskul ba'i he ru kaH__/'khor lo lnga yi gzhal med khang du legs spyon pas/__/zag bral dga' bzhi'i mchod pa'i sprin phung 'byams klas pa/__/tshogs drug snang ba dbu mar thim pa'i ngang du 'bul/__/kun tu bral thob spangs pa'i de nyid chos kyi dbyings/__/gnag pa'i las la rjes su goms pas bslad gyur gang /__/'khor gsum mi dmigs mkha' ltar rab zhi de nyid klong /__/nye bar zhi bas las dang bag chags 'brel rgyun chad/__/gang na sna tshogs theg pa'i rim pa rmad byung dang /__/bgrod bya'i rtser gyur mchog tu zab pa'i gzhung lam la/__/bsnyen cing grol ba'i 'phags dang slob pa'i tshogs rnams la/__/mi phyed dga' bas rjes su yi rang 'dzum dkar grol/__/srid pa'i rten 'brel nyi zla'i rgyu ba gang yin pa/__/gzung 'dzin kun bral dbu ma sgra gcan mkhar rol pas/__/don dam zag bral dbyings su gshegs pa'i rgyal kun la/__/mi phyed nyer gsang rdo rje'i chos 'khor bskor bar bskul/__/'pho 'jig bral ba'i ye shes mi 'gyur rtag pa nyid/__/tshu rol snang ngor skye dang 'gags pa'i zlos gar kun/__/bsgyur ba ma yin thabs shes mtshan dpe'i za ma tog__/phyogs bcu'i gtsug tor rtse mor mchog tu ngal bsos mdzod/__/khyod ni bdag gi pha dang ma ste de bzhin du/__/skyob pa'i mgon dang mdza' ba'i bshes gnyen nyid lags na/__/las kyi rjes 'brangs skye ba'i 'khri shing gtsug kun tu/__/rigs bdag pad+ma dkar po'i la thod dam par mdzod/__/e ma phyogs bcu'i mgon po kun gyis dus kun tu/__/dad pa'i phyag gis zhabs kyi 'khor lo la btud nas/__/nyon mongs lcags sgrog dam pos bcings pa bdag sogs kyis/__/rus pa'i khong nas mi 'gyur dad pa dang bcas te/__/dngos dang yid kyi nyams sam gzhan du rmi lam skabs/__/nges par mi 'bral khyod zhal dgyes par mthong ba dang /__/thugs kyi dgongs te 'bral med dal 'bab ji bzhin du/__/bzung bar mdzod ces gus dang skyo bas mngon par gsol/__/de las bskrun pa'i dge ba kun dang dus gzhan du/__/bsags pa chabs gcig bsdoms te chos dbyings zad med pa/__/dag pa don dam gzhon nu bum skur nyer bsngos pas/__/'gro sgrol phrin las yid bzhin 'khri shing nges rnyed shog__/ces pa'ang zab mo'i don gyi phyogs nas gtso bor bgyis te gang shar rdo rje'i glur blangs pa gu h+ya//__//___!__