ཕྲིན་བཅོལ།

🚧 This website is under continued development. We appreciate your patience!

Previous Text Back to Volume PageNext Text

Wylie title	phrin bcol
Location	'phags mchog bka' 'bum Volume 2, Text 24, Pages 529-531 (Folios 1a1 to 2a2)
Author	འཕགས་མཆོག་རྡོ་རྗེ་
Less details More details
Citation	'phags mchog rdo rje. Phrin bcol. In Mtshungs med grub sras 'phags mchog rdo rje mchog gi gsung 'bum rin po che , Vol. 2: 529-531. Kathmandu: Khenpo Shedup Tenzin & Lama Thinley Namgyal, 2004.
Genre	Exhortations to Act - phrin bcol
Colophon	ཅེས་པའང་། འལ་འོལ་ཟང་ཟིང་ཕྲན་བུ་བྱུང་སྐབས་དངངས་སྐྲག་གིས་བསྙད་བཏགས་ཏེ་ཕྲིན་བཅོལ་དོན་ལྡན་ཞིག་འབྲི་འདོད་བྱུང་ཡང་། བླུན་པོའི་ཚིག་ལ་རྩོམ་པའི་གནས་དབེན་བཞིན་གང་དྲན་ཤར་མར་དུ་འབྲི་བ་པོ་སྲས་མིང་ལྷུན་གྲུབ་རྒྱལ་པོས་སོ། །དགེའོ།།
	ces pa'ang /_'al 'ol zang zing phran bu byung skabs dngangs skrag gis bsnyad btags te phrin bcol don ldan zhig 'bri 'dod byung yang /_blun po'i tshig la rtsom pa'i gnas dben bzhin gang dran shar mar du 'bri ba po sras ming lhun grub rgyal pos so/_/dge'o//

Tibetan Text

[edit]

༄༅། །ཕྲིན་བཅོལ་བཞུགས། ཀྱཻ། ལུང་རྟོགས་རྒྱ་མཚོའི་བསྟན་སྲུང་ཡེ་ཤེས་ཀྱི་སྤྱན་མངའ། །རྣམ་ཀུན་ལེགས་ཉེས་སྟངས་འཛིན་དྲག་རྩལ་གྱི་སྟོབས་ལྡན། །དཔལ་གྱི་མགོན་པོ་མ་ནིང་སྔགས་སྲུང་གི་རྒྱལ་མོ། །གཟའ་མཆོག་རྒྱལ་པོ་དམ་ཅན་རྡོར་ལེགས་སོགས་འཁོར་ཚོགས། །རྒྱུན་དུ་མཆོད་བསྟོད་ཕྲིན་ལས་བཅོལ་བ་ཡི་དོན་དེ། །རྣལ་འབྱོར་སྒྲུབ་པ་པོ་ཡིས་ད་ལན་དུ་བསྐུལ་འཚལ། །ངེས་འབྱུང་སྐྱོ་ཤས་དྲག་པོས་རང་རྒྱུད་འདི་རྙེད་དེ། །སྒྲུབ་བརྒྱུད་གོང་མའི་རྣམ་ཐར་སྙིང་དབུས་སུ་འཆར་བྱུང་། །ཤིན་ཏུ་དབེན་པའི་རི་སུལ་གཏན་དུ་རང་བཅས་ནས། །གཉིས་འཛིན་སེམས་ཀྱི་འཁྲུལ་སྣང་སྒྱུ་མ་རུ་གཤེགས་ཤིང་། །ཡང་དག་ཡེ་ཤེས་སྣང་བའི་ལམ་གསང་ཉིད་བགྲོད་ཕྱིར། །གཅིག་པུར་སྒོ་གསུམ་རྣལ་དབབ་ཉིན་མཚན་ཀུན་དྲིལ་ཚེ། །སྙིགས་མའི་དབང་གིས་ལོག་སྒྲུབ་བར་ཆད་ཅན་སྲིད་དེ། །ཆོས་བརྒྱད་ཆོས་ལྟར་འཆོས་པས་ཆོས་དྲེད་དུ་ལྷག་པའི། །འཁོར་བའི་བྱ་བ་ཆེ་ལས་ལྡོག་པ་ནི་མེད་བཞིན། །ཀུ་ཅོ་རྩིང་སྤྱོད་དྲག་པོས་དབེན་གནས་འདི་བཅུམ་བཞིན། །བསླུ་བྲིད་མཁས་པའི་གཡོ་ཟོལ་ཁོག་འགྱིངས་ཅན་འགའ་ཡང་། །སྔར་ཡང་སྲིད་དེ་ད་ཡང་ངེས་མེད་དུ་འདུག་ན། །ཕྱི་ནང་ཁྱད་མེད་དམ་སྲི་ཉམས་པ་ཡི་ཚོགས་ལ། །འགལ་རྐྱེན་ངན་པའི་རྟགས་མཚན་ནོན་ངེས་རེ་ཆོད་ལ། །ཡུལ་ཕྱོགས་འདི་ཡི་རྒྱངས་སུ་མྱུར་བར་གྱིས་བཏོན་ཏེ། །དེ་ལྟའི་བྱུང་དང་འབྱུང་རྒྱུའི་ཁ་མཚམས་ཀུན་སྲུངས་ཤིག །ཡང་དག་ལམ་ལ་དད་ཅིང་གཞོལ་བ་ནི་སུ་འང་། །བསམ་དོན་བཞིན་དུ་མཐུན་རྐྱེན་ཆར་བཞིན་དུ་བསྙེལ་ཅིང་། །བཤད་སྒྲུབ་ཐོས་བསམ་སྒོམ་པའི་འདབ་སྟོང་དག་གྲོལ་ཏེ། །རིས་མེད་བུང་བ་ཚོགས་པའི་ཕྲིན་ལས་དེ་མ་གཡེལ། །རྒྱལ་བ་གོང་མའི་སྒྲུབ་པའི་རྒྱལ་མཚན་རང་འཛིན་ཅིང་། །གཞན་དོན་ཕྲིན་ལས་རྒྱ་མཚོ་འབད་མེད་དུ་བརྙེས་མོད། །འཁོས་ཉམས་ཞན་རུང་ལྷག་བསམ་ཚུལ་བཞིན་དུ་ཕྱོགས་པའི། །རྣལ་འབྱོར་བདག་གི་སྡོང་གྲོགས་བརྟན་པོ་རུ་མཛོད་ཅིག །ཅེས་པའང་། འལ་འོལ་ཟང་ཟིང་ཕྲན་བུ་བྱུང་སྐབས་དངངས་སྐྲག་གིས་བསྙད་བཏགས་ཏེ་ཕྲིན་བཅོལ་དོན་ལྡན་ཞིག་འབྲི་འདོད་བྱུང་ཡང་། བླུན་པོའི་ཚིག་ལ་རྩོམ་པའི་གནས་དབེན་བཞིན་གང་དྲན་ཤར་མར་དུ་འབྲི་བ་པོ་སྲས་མིང་ལྷུན་གྲུབ་རྒྱལ་པོས་སོ། །དགེའོ།། །།