མཚུངས་དོན་མན་ངག་རྡོ་རྗེའི་ཐོལ་གླུ་སྤྲོས་བྲལ་སྒྲ་དབྱངས།

🚧 This website is under continued development. We appreciate your patience!

Previous Text Back to Volume Page Next Text

Wylie title	mtshungs don man ngag rdo rje'i thol glu spros bral sgra dbyangs
Location	dpal sprul bka' 'bum Volume 6, Text 30, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Vajra Songs - rdo rje'i glu

[edit]

༄༅། །མཚུངས་དོན་མན་ངག་རྡོ་རྗེའི་ཐོལ་གླུ་སྤྲོས་བྲལ་སྒྲ་དབྱངས་ཞེས་བྱ་བ་བཞུགས་སོ། །

ན་མོ་གུ་རུ། སྐྱེ་མེད་ཆོས་སྐུའི་ཕོ་བྲང་བློ་བྲལ་གྱི་རྒྱལ་ཁབ། །གཉུག་མ་ཟང་ཐལ་གདོད་མའི་གཞི་ཀློང་ན་བཞུགས་པའི། །ཆོས་ཟད་རིག་པའི་ཆོས་ཉིད་ཡེ་གྲོལ་གྱི་ཐིག་ལེ། །དྲི་མེད་འོད་ཟེར་ཆོས་སྐུའི་བླ་མ་དེ་མཁྱེན་ནོ། །འགག་མེད་རང་མདངས་སྣང་ཆ་འོད་གསལ་གྱི་ཚོམ་བུ། །བསྐྱེད་རྫོགས་དགོངས་པ་དབྱེར་མེད་ཚད་ཕེབས་ཀྱི་རིགས་གདངས། །ལྷུན་གྲུབ་ཞི་ཁྲོའི་རྣམ་རོལ་སྒྱུ་འཕྲུལ་གྱི་རོལ་གར། །ལོངས་སྐུའི་བླ་མ་མཁྱེན་བརྩེའི་འོད་ཟེར་དེ་མཁྱེན་ནོ། །ཐུགས་རྗེ་སྤྲུལ་པའི་རྣམ་རོལ་འགྲོ་ཀུན་གྱི་ལམ་སྟོན། །གང་འདུལ་སྒྱུ་མའི་ཆོ་འཕྲུལ་ཐར་ལམ་གྱི་ས་མཁན། །འབྲེལ་ཚད་ཐེག་གསུམ་བདུད་རྩིའི་ལམ་བཟང་ལ་འགོད་པའི། །སྐུ་གསུམ་དབྱེར་མེད་རྩ་བའི་བླ་མ་དེ་མཁྱེན་ནོ། །མི་རྟག་སྡུག་བསྔལ་གྲོང་ཁྱེར་འཁོར་བ་ཡི་གནས་རིས། །ཕྱི་ནང་གང་ལ་བསམ་ཡང་སྐྱོ་ཤས་ཀྱི་སྣོན་མ། །སྡུག་བསྔལ་ཟད་མཐའ་མེད་པའི་སྣང་ཚུལ་འདི་མཐོང་ནས། །སེམས་ཡོད་སྐལ་བཟང་ཡོད་ན་ཐར་ལམ་ལ་སྙོགས་རན། །ཡིད་འོང་མེ་ཏོག་སྐྱེད་ཚལ་འཇའ་ཚོན་ལས་བཀྲ་བ། །སྐལ་བཟང་ལྷ་ཡུལ་ལགས་སྙམ་ཡིད་སྨོན་རང་ཤོར་ཡང་། །གྲང་ངར་དགུན་ཟླའི་རྒྱལ་མོའི་རེག་བྱ་ཡིས་བྲན་ཚེ། །མི་སྡུག་ཡི་དྭགས་སྲིན་པོའི་ཡུལ་ལྗོངས་ལྟར་གྱུར་སོང་། །ལྕུགས་ཕྲན་ཡལ་ག་སྐྱོད་པའི་ལོ་འདབས་ཀྱི་ཁྲོད་ནས། །དབྱངས་སྙན་ཁུ་བྱུག་བུ་མོའི་སྙན་འགྱུར་གྱི་གླུ་སྒྲ། །གདངས་སྙན་དྲི་ཟའི་ན་ཆུང་པི་ཝང་ལ་འགྲན་ཡང་། །སྐྱི་སེར་སྟོན་ཟླའི་རྒྱལ་མོའི་བང་ཆེན་གྱིས་བསྐུལ་ནས། །མི་སྡོད་ལྷོ་མོན་ནགས་མའི་ལྗོངས་ཚལ་དུ་ཐེག་དུས། །འདུས་ཚད་བྲལ་བའི་ཆོས་ལ་ཡིད་ཆེས་རང་སྐྱེས་བྱུང་། །དར་ཕྱུག་ལྕང་དཀར་སྡོང་པོའི་ལོ་འདབས་ཀྱི་ཕང་ཕུང་། །ཁར་སང་ཟླ་བ་སྔ་མར་མིག་ལམ་ན་མེད་དེ། །དེང་སང་བཀྲག་དར་འཛོམ་པའི་ངོ་མཚར་གྱི་ལྟད་མོ། །སྐད་སྙན་བྱེའུ་ཆུང་ཁྱུ་ཡི་འདུན་ས་རུ་མཛེས་ཀྱང་། །སང་ཞོག་ཆུ་ཤེལ་དཀྱིལ་འཁོར་སྨིན་དྲུག་གི་ཉ་ཚེ། །ཕུན་ཚོགས་ལང་ཚོའི་བཀྲག་དར་འདི་བཞིན་དུ་ཡོད་དམ། །ལོངས་སྤྱོད་རྟག་པ་མེད་པ་གཡར་པོ་ཡི་རྫས་ལ། །བག་ཙམ་རང་དབང་ཡོད་དུས་ཡུན་རིང་གི་རྒྱག་ཕྱེ། །སྦྱིན་པའི་ཐབས་ཀྱིས་མ་ལོན་སེར་སྣ་ཡིས་བཅིང་རྣམས། །འཕྲལ་སྣང་རྨི་ལམ་སད་འདྲའི་དུཿཁ་ཡིས་སླེབ་དུས། །གསོག་བསྲུང་སྡིག་པའི་ཁུར་ལས་སྤྱོད་རྒྱུ་གཞན་མི་འདུག །ཀྱེ་མ་ཕྱི་ཡུལ་འཁྲུལ་བ་སྡུག་བསྔལ་གྱི་སྣོད་ལ། །བདེན་ཞེན་རྟག་ཆད་ཞེན་པའི་ཉམ་ཐག་གི་འགྲོ་ཁམས། །དྲིན་ཅན་མཚུངས་མེད་བླ་མའི་ཐུགས་རྗེ་ཡིས་གཟིགས་ནས། །ཡུལ་སྣང་དཔེ་རུ་འཆར་བར་བྱིན་གྱིས་རང་རློབས་ཤིག །སྐྱེས་ཚད་འཆི་བའི་ལམ་དུ་འཛོལ་མེད་དུ་ཞུགས་པའི། །གཟུར་མེད་དོགས་མོའི་འཕྲང་ན་འཆི་བདག་གི་གཤིན་རྗེས། །ཁྲོས་པའི་སྡང་མིག་གཡོ་ཞིང་མི་སྡུག་གི་བཞིན་ངོམ། །གསོད་བྱེད་དགྲ་སྟྭ་གདེང་ནས་ཞག་ནག་གིས་འདེབས་དྲུང་། །མི་སྡོད་འཕྲལ་འཕྲལ་རྒྱུག་པའི་གསོན་ལུས་ཀྱི་སེམས་ཅན། །སང་ཕོད་སོ་ཚེས་གཉེར་ལས་འཆི་སྙམ་རང་མི་འདུག །འབྲུ་དཀར་སྣོད་དུ་བསགས་པ་ས་འོག་ཏུ་གཏོར་ནས། །སང་ཕོད་སྙེ་མ་ལེགས་པའི་འབྲས་དྲུག་ལ་རློམ་སྟེ། །བདག་པོའི་ཚེ་ཚད་བརྐོས་བཞག་རང་རེའི་ནི་མི་ཤེས། །སྟོན་ཟླའི་འབྲུ་ཆང་འཐུང་དུས་ཡོད་ཐག་རང་ཆོད་དམ། །ཤི་སྙམ་ཡིད་ལ་མེད་པའི་ཕོ་རྒོད་ཀྱི་བཙན་པོ། །མི་དང་རོ་ཡི་འགྱུར་འཚམ་དབུགས་གཅིག་གི་འགྲོ་ལུགས། །ཨེ་གཟིགས་གཞོན་པ་འཆི་བའི་ལུས་སེམས་ཀྱི་འབྲལ་ཚུལ། །སླ་ལ་འཇིགས་སྐྲག་སྐྱེ་བའི་ཉམ་ང་ཞིག་ཡོད་སྐད། །ཐོད་རྒྱན་མེ་ཏོག་འཕྱང་བའི་ན་ཆུང་གི་མཛེས་མ། །སྐྲ་དཀར་ལང་ཚོས་ནོན་པ་ནམ་རེད་རང་ཨེ་ཤེས། །རྒ་ཤི་འཇབ་ནས་འོང་བ་མེལ་ཚེ་ཡིས་མི་ཁེག །ཅི་བྱས་རྒ་བའི་སྡུག་བསྔལ་འཆི་བ་ལས་ཐུ་འོང་། །ལུས་ཞེས་གཅེས་པར་བསྐྱང་ཡང་འབྱུང་འདུས་ཀྱི་ནད་རེད། །རྐྱེན་ངན་གློ་བུར་བྱུང་ན་ཟུག་གཟེར་གྱི་མདའ་མོས། །ལུས་སེམས་བར་ལག་ཕྲལ་ནས་འཆི་བདག་ལ་གཏོད་གཏོང་། །རོ་ཞེས་འཇིགས་སྣང་སྐྱེ་བ་རང་དྲུང་ན་འདུག་གོ །ཀྱེ་མ་འཁྲུལ་སྣང་འཁོར་བས་ཡུན་རིང་དུ་བསླུས་བསླུས། །འཁྲུལ་རྟོག་རྩ་བ་མ་ཆོད་ཉམས་ཐག་གི་འགྲོ་ལ། །མཚུངས་མེད་དྲིན་ཆེན་བླ་མའི་ཐུགས་རྗེ་ཡིས་གཟིགས་ནས། །ཨ་འཐས་འཁྲུལ་བ་ཞིག་པར་བྱིན་གྱིས་རང་རློབས་ཤིག །མཐོན་པོ་རང་དབང་ཡོད་ཚད་རང་འདོད་ཀྱི་ང་རོ། །དམའ་མོ་རང་སྤྱོད་སྐྱོང་ཚད་གཞན་བསླུ་ཡི་གཡོ་སྒྱུ། །སུ་དང་གང་ལ་བལྟས་ཀྱང་ཡིད་ཆེས་རང་མི་འདུག །སྙིང་ནས་བློ་གཏད་ཕེར་བ་དཀོན་མཆོག་གསུམ་ཁོ་ན། །རྒྱལ་པོས་མངའ་རིས་མི་སྐྱོང་ཏིལ་འབྲུ་བཞིན་བཙིར་ནས། །ལོངས་སྤྱོད་ཏིལ་མར་འཐུང་སྟེ་བྱམས་སྐྱོང་དང་བྲལ་འདུག །འབངས་མིས་དཔོན་པོ་མི་ཁུར་དགྲ་ཟླ་བཞིན་བལྟས་ནས། །བཅོས་མའི་ཁ་གསག་འཇམ་པོས་ངོ་བསྲུང་ཙམ་བྱེད་འདུག །བླ་མས་དམ་ཆོས་མི་གསུང་མངའ་ཐང་རྒྱ་བསྐྱེད་ནས། །ཆེ་བཙན་རྒྱལ་པོའི་ལད་མོ་ཐུགས་ཉམས་ལ་བཞེས་འདུག །སློབ་མས་ཆོས་དོན་མི་གཉེར་བླ་མ་ལ་བརྟེན་ནས། །འཇིག་རྟེན་ཚེ་འདི་སྒྲུབ་པའི་གཡོ་ཐབས་ཤིག་བྱེད་འདུག །དེང་སང་སྙིགས་མའི་སྐྱེ་བོ་སུ་དང་གང་ཡིན་ཡང་། །སྤྱོད་ལམ་བརྟགས་ཤིང་བརྟགས་ན་ཡིད་སྐྱོ་ལས་མི་འདུག །དང་པོ་ཆོས་པར་རློམ་ཡང་ཚུལ་འཆོས་ཀྱི་བསླུ་བྲིད། །འདྲིས་གཤིས་བཟང་བཟང་འདྲ་ཡང་གཡོ་སྒྱུ་ཡི་མགོ་བསྐོར། །ཀྱེ་མ་སྙིགས་མའི་སྤྱོད་པ་རླུང་དམར་ལྟར་འཚུར་དབུས། །ཚེ་སྲོག་གཡོ་པའི་རང་བཞིན་མར་མེ་ལྟར་གནས་པ། །ཉམ་ཐག་ནམ་འཆི་མི་ཤེས་རྨོངས་པ་ཡི་སེམས་ཅན། །རྟག་འཛིན་འཁྲུལ་བ་དུ་མའི་བློ་ངན་གྱི་གནས་ལས། །མཚུངས་མེད་དྲིན་ཆེན་བླ་མའི་ཐུགས་རྗེ་ཡིས་སྐྱོབས་ཤིག །མཁའ་ལ་སྤྲིན་དཀར་ཕུང་པོ་ལང་ལོང་ཞིག་འདུས་ནས། །སིབ་སིབ་སྦྲང་ཆར་ཟིམ་བུའི་ཁ་ཆུ་ཡིས་འདེབས་པ། །སྐད་ཅིག་རླུང་པོ་གཡོ་བའི་གཞན་དབང་དུ་གྱུར་ནས། །ཕྱོགས་ཕྱོགས་སྣང་བ་མིན་པའི་རང་ལམ་ལ་འཐོར་སོང་། །ཡིད་མཐུན་མི་ཡུལ་ལྗོངས་ན་ལས་དབང་གིས་འདུས་ནས། །བརྩེ་གདུང་ཉམས་དགའ་སྐྱོ་བའི་དགའ་སྟོན་ལ་རོལ་ཡང་། །བཟློག་མེད་སྔོན་ལས་དྲག་པོའི་སུན་མ་ཡིས་སླེབ་ཚེ། །དབང་མེད་ཤི་གསོན་སྣང་བ་སོ་སོར་རུ་བྲལ་སོང་། །སྔར་ཞིག་ཡུན་རིང་འགྲོགས་པའི་ཕ་མ་དང་གཉེན་བཤེས། །བརྩེ་གདུང་སྙིང་ལ་བཅག་པ་དུ་མ་ཞིག་ཡོད་ཀྱང་། །ད་ཙམ་གར་ཡོད་འདིར་ཡོད་ཕྱོགས་མགོ་རང་མི་ཤེས། །སྐྱིད་སྡུག་ཅི་རང་ཡོད་སྙམ་སེམས་པ་འདི་སྐྱོའོ། །ཡིད་འོང་མཛེས་པའི་མལ་ན་འཁོར་གཡོག་གིས་བསྐོར་ནས། །བག་ཕེབས་ལྷོད་པོར་གནས་ཀྱང་འཇིགས་སྐྲག་གི་དུཿཁ། །མི་འགོག་ལང་ཚོ་མ་སྨིན་གཞོན་ནུ་ཡི་སྣང་བས། །འཕྲང་རིང་བར་དོ་འགྲིམ་དུས་ཅི་འདྲ་ཞིག་ཡོད་གྲགས། །བརྩེ་བས་ཡུན་དུ་སྐྱོང་བའི་སྤུན་ཟླ་དང་སྡུག་པ། །ལམ་རིང་གཤིན་རྗེས་ཡུལ་ལ་གཅིག་པུ་རུ་ཆས་དུས། །གྲོགས་དང་ཐབས་ཤིག་ཡོད་ན་བྱེད་རྒྱུ་ཞིག་འདུག་རུང་། །ལས་དབང་ཁྲིམས་ཁ་ཚ་བས་བྱ་ཐབས་རང་ཟད་འདུག །འཇམ་ལེགས་དར་གྱིས་གཡོགས་ཤིང་ནོར་བུ་ཡི་རྒྱན་སྤྲས། །ལྷ་ཡུལ་ལྷ་ལ་འགྲན་པའི་མཛེས་སྡུག་གི་རི་མོ། །འཆི་བདག་མཆི་རིས་གསར་པའི་རླན་གཤེར་གྱིས་བསྲུབ་ཚེ། །ཁྭ་དང་བྱ་རྒོད་ཁོ་ནས་ཁ་ཟས་སུ་བགྱིས་སོང་། །ཀྱེ་ཧུད་རྟག་པ་མེད་པའི་མཛའ་བཤེས་ཀྱི་གྲོགས་ལ། །ཡུན་རིང་འགྲོགས་རློམ་བྱེད་པའི་རྨོངས་པ་ཡི་སེམས་ཅན། །མཚུངས་མེད་དྲིན་ཆེན་བླ་མའི་ཐུགས་རྗེ་ཡིས་བཟུང་ནས། །འབྲལ་མེད་རང་བྱུང་རིག་པའི་གྲོགས་མཆོག་དང་སྤྲོད་ཅིག །སྔོན་བྱོན་རྒྱལ་བ་སྟོང་གིས་ལན་བརྒྱ་རུ་བསྔགས་ཤིང་། །གྲུབ་བརྙེས་སེམས་དཔའ་དུ་མས་ཡུན་རིང་དུ་བསྟེན་པའི། །ཕུན་ཚོགས་དབེན་པའི་གནས་ཞེས་བྱང་ཆུབ་དང་མཐུན་པ། །ཉམས་དགའ་རྒྱལ་བ་དགྱེས་པའི་གནས་མཆོག་ཅིག་ཡོད་སྐད། །ཕུན་ཚོགས་མེ་ཏོག་འཛིན་པའི་ལྗོན་ཤིང་གི་ལང་ཚོ། །རྙེད་དཀའི་དལ་འབྱོར་ལུས་ཀྱི་མཚོན་དཔེ་རུ་བྱེད་ཅིང་། །ལྷུང་ལྷུང་ཕུ་ཆུ་འབབས་པའི་སྐད་ཅིག་གིས་འགྱུར་སྒྲས། །མི་རྟག་མྱུར་མྱུར་འོང་ཞེས་བསྐུལ་འདེབས་སུ་བརྩོན་ལ། །སྐད་སྙན་བུང་བའི་བུ་མོའི་འཕུར་ལྡིང་གི་གླུ་སྒྲ། །སྐྱོ་ཤས་གཏིང་ནས་བསྐྱེད་པའི་གསལ་འདེབས་ལ་ཆས་པའི། །ཆོས་མཐུན་ཉམས་དགའ་བརྒྱ་ཕྲག་དབེན་རི་ན་ཡོད་སྐད། །འཁྲི་ཤིང་ལྕུགས་ཕྲན་ཕྲ་མོའི་མེ་ཏོག་གི་ཕང་ཕུང་། །མཐོན་པོའི་ཐང་ཤིང་རྩེ་ན་བླ་རེ་རུ་བྲེས་པས། །སེམས་བསྐྱེད་ཐབས་དང་འགྲོགས་ནས་ཉམས་ཐག་གི་འགྲོ་བས། །བྱང་ཆུབ་ས་མཐོར་བགྲོད་ཅེས་ཐེག་མཆོག་གི་ལམ་མཚོན། །དེ་ན་འདུ་འཛི་མེད་དེ་སྡིག་པའི་གྲོགས་ལྟ་ཅི། །འདོད་ཡོན་སྣང་བ་བྲིད་པའི་ཡུལ་གྱི་དུག་མི་གནས། །བག་ཕེབས་བསམ་གཏན་མཆོག་དང་རང་བབ་ཀྱིས་མཐུན་པའི། །ངོ་མཚར་རི་ཁྲོད་དགོན་པ་བྱང་ཆུབ་ཀྱི་ཕོ་བྲང་། །སྲས་བཅས་རྒྱལ་བ་དགྱེས་པའི་དབེན་རི་ཡི་རྒྱལ་ཁབ། །ཡབ་མེས་དམ་པ་གོང་མའི་གདན་ས་དེ་དེ་ལགས། །ཉམས་དགའ་དེ་རུ་སྐྱོང་བའི་བག་ཡངས་ལ་སྨོན་ཡང་། །ལས་དབང་འཁོར་བའི་སྙི་འདིས་གཏོང་བ་རང་དཀའ་འདུག །ཀྱེ་མ་ཐུགས་རྗེས་གཟིགས་ཤིག་དྲིན་ཆེན་གྱི་བླ་མ། །འདི་སྣང་ཞེན་པའི་སྒྲོགས་འདི་སྐད་ཅིག་གིས་ཕྲོལ་ལ། །འདུ་འཛི་བྲེལ་དོ་མང་པོའི་འཆིང་ཐག་འདི་བཅད་ནས། །ཡིད་འོང་དབེན་པའི་གནས་སུ་ཐུགས་རྗེ་ཡིས་སྐྱོལ་ཤིག །དགྲ་ཞེས་གནོད་པར་བཟུང་ཡང་འཕྲལ་སྤྱོད་ཀྱིས་འགྱུར་བ། །དེ་ལ་ཐབས་ཀྱིས་བསྟུན་ན་མཛའ་བཤེས་ཀྱི་དྭངས་མ། །གཉེན་ཞེས་ཕན་པར་རློམ་ཡང་སྡིག་སྡུག་གི་གྲོགས་པོ། །དེ་ཡང་སྐད་ཅིག་མི་རྟག་དགྲ་ཟླ་རུ་འགྱུར་འགྲོ། །དགྲ་གཉེན་ངེས་པ་མེད་པའི་སྣང་ཚུལ་ལ་བརྟགས་ན། །གང་ཡང་ཆགས་སྡང་བློ་ལ་དགོས་པ་རང་ཅི་ཡོད། །ཐམས་ཅད་ཕ་མར་ཤེས་པའི་མཛའ་གཅུགས་ཀྱིས་སྐྱོང་ན། །འཁྲུལ་མེད་རྒྱལ་བ་དགྱེས་པའི་སྤྱོད་པ་དེ་དེ་ལགས། །དགྲ་ཡང་དགེ་བའི་བཤེས་ཡིན་བཟོད་པ་ཡི་བསྐུལ་མ། །གཉེན་ཡང་དགེ་བའི་བཤེས་ཡིན་བྱམས་པ་ཡི་བསྐུལ་མ། །ཐམས་ཅད་དགེ་བའི་བཤེས་ཡིན་སྙིང་རྗེ་ཡི་བསྐུལ་མ། །སྣང་བ་དག་པར་ཤར་ན་དཀྱིལ་འཁོར་གྱི་འཁོར་ལོ། །ཆགས་སྡང་ཆུ་རིས་ཡལ་ན་གཏད་མེད་ཀྱི་རྣལ་འབྱོར། །བློ་བྲལ་གཤིས་ལུགས་སྐྱོང་དང་དགྲ་གཉེན་ནི་ཅི་ཡོད། །ཆོས་བརྒྱད་འཇའ་རིས་ལ་ཞེན་འཁྲུལ་སྣང་གི་བྱིས་པ། །འདིར་སྣང་སེར་བའི་རིལ་བུ་ནོར་བུ་རུ་རློམ་ཡང་། །མི་རྟག་སྤྲིན་བྲལ་ཉི་མའི་འོད་སྣང་གིས་བྲན་ཚེ། །འཁྲུལ་སྣང་སྙིང་པོ་མེད་པའི་རང་མཚང་དེ་ངོམ་འོང་། །གཏད་མེད་ཆོས་སྐུའི་རིག་པ་ཟང་ཐལ་དུ་དག་ན། །ཞེན་མེད་རྣལ་འབྱོར་སྤྱོད་པའི་སྐལ་བཟང་གི་བློ་ངོར། །འཁོར་འདས་བཟང་ངན་འབྱེད་པའི་སྤུ་རིས་ཀྱང་མི་དམིགས། །ཆོས་ཟད་དགོངས་པའི་ཀློང་ན་གྲུབ་ཐོབ་ཀུན་བདེ་སྐད། །དབྱིངས་ནས་ཐུགས་རྗེའི་གཟིགས་ཤིག་བརྒྱུད་གསུམ་གྱི་བླ་མ། །ཟག་མེད་ཆོས་སྐུའི་ཀློང་ནས་ཡེ་ཤེས་ཀྱི་གཟིགས་པས། །ཆོས་ཟད་དགོངས་པ་སྟོན་ཤོག་ཆོས་སྐུ་ཡི་བླ་མ། །འགགས་མེད་ལོངས་སྐུའི་ཀློང་ནས་རྣམ་འཕྲུལ་གྱི་བཀོད་པ། །འཁྲུལ་མེད་ལམ་བཟང་སྟོན་ཤོག་ལོངས་སྐུ་ཡི་བླ་མ། །ཐུགས་རྗེ་སྤྲུལ་པའི་ཀློང་ནས་གང་འདུལ་གྱི་མཛད་པས། །འཁོར་བ་དོང་ནས་སྤྲུགས་ཤིག་དྲིན་ཆེན་གྱི་བླ་མ། །ཚེ་འདིར་ཆོས་བརྒྱད་འདིར་སྣང་ཞེན་པ་ལས་གྲོལ་ཞིང་། །རྩེ་གཅིག་དབེན་པའི་གནས་སུ་སྒྲུབ་པ་ལ་གཞོལ་བས། །བསྐྱེད་རྫོགས་ཟབ་ལམ་རྟོགས་པའི་དྲོད་ཚད་དང་ཕྲད་ནས། །གོང་མའི་རྗེས་ཤུལ་སྙོགས་པར་བྱིན་གྱིས་རང་རློབས་ཤིག །མི་རྟག་སྒྱུ་མའི་ལུས་ཀྱི་གཡར་པོ་འདི་འདོར་ཚེ། །སྐྱེ་འཆིའི་སྣང་བ་སྒྱུ་མའི་སྣང་ཚུལ་དུ་ཤེས་ནས། །འཆི་མེད་ཆོས་སྐུའི་འོད་གསལ་མ་བུ་རུ་འཕྲོད་པའི། །འཁྲུལ་མེད་དགོངས་པ་སྟོན་ཤོག་དྲིན་ཆེན་གྱི་བླ་མ། །སྣང་གསུམ་རང་བཞིན་རྟོག་པའི་གཡོ་འཁྲུལ་གྱིས་བསླངས་ནས། །ཡིད་ལུས་བར་དོའི་སྣང་བ་དབང་མེད་དུ་ཤར་ན། །མཁའ་སྤྱོད་མཁའ་འགྲོ་སྟོང་གི་འཁོར་ཚོགས་ཀྱིས་བསྐོར་ནས། །མཚུངས་མེད་དྲིན་ཆེན་བླ་མ་བསུ་མ་ལ་ཕེབས་ཤོག །འཕྱང་འཕྲུལ་དྲིལ་གཡེར་ཁྲོལ་ཁྲོལ་མིག་ཡངས་ཀྱི་གླུ་གར། །འཇའ་འོད་དར་ལམ་ཁྱུག་ཁྱུག་ཡེ་ཤེས་ཀྱི་རང་གདངས། །ལྔ་ཚོམ་རང་བཞིན་སྤྲུལ་པའི་ཞིང་ཁམས་ཀྱི་གྲོང་དུ། །འདྲེན་པའི་དེད་དཔོན་མཛོད་ཅིག་དྲིན་ཆེན་གྱི་བླ་མ། །ཇི་སྲིད་མཁའ་མཉམ་འཁོར་བ་མ་སྟོང་གི་བར་དུ། །སྐྱེ་བ་སྐྱེད་མོའི་ཚལ་འགྲོ་སྒྱུ་འཕྲུལ་གྱི་བཀོད་པ། །མཚུངས་མེད་དྲིན་ཆེན་བླ་མའི་ཞབས་འབྲིང་དུ་ཆས་ནས། །མ་རྒན་འགྲོ་དྲུག་སྡུག་བསྔལ་རྒྱ་མཚོ་ལས་སྒྲོལ་བའི། །རྒྱལ་བའི་ཕྲིན་ལས་སྒྲུབ་ལ་ཡིད་སྨོན་དུ་བགྱིད་དོ། །རྣམ་དག་སྨོན་པའི་གནས་ཀུན་གེགས་མེད་དུ་འགྲུབ་པའི། །མཐུན་འགྱུར་སྲས་བཅས་རྒྱལ་བའི་བདེན་གསུངས་ཀྱིས་སྒྲོགས་ཤིག །དགོངས་རིག་རྣ་བར་བརྒྱུད་པའི་བརྒྱུད་གསུམ་གྱི་བླ་མས། །བརྩེ་ཆེན་ཐུགས་རྗེའི་སྒོ་ནས་བྱིན་གྱིས་རང་རློབས་ཤིག །དགེའོ། །དགེའོ། །དགེའོ། །