བར་དོའི་ངོ་སྤྲོད་བསྡུས་པ།

🚧 This website is under continued development. We appreciate your patience!

Previous Text Back to Volume Page Next Text

Wylie title	bar do'i ngo sprod bsdus pa
Location	dpal sprul bka' 'bum Volume 2, Text 37, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Key Points - gnad yig

[edit]

༄༅། །བར་དོའི་ངོ་སྤྲོད་བསྡུས་པ་བཞུགས་སོ། །

སྤྱིར་ལུས་ཅན་རྣམས་འཆི་བའི་ཚེ་དང་པོ་རགས་པའི་ཐིམ་རིམ་ཉི་ཤུ་ནི། གཟུགས་ཀྱི་ཕུང་པོ་ཐིམ་པས་ཡན་ལག་ཐམས་ཅད་ཕྲ་བ་དང་། ལུས་ཀྱི་ཉམས་ཞན་ཅིང་ནུས་པ་མེད་པར་འགྱུར། མེ་ལོང་ལྟ་བུའི་ཡེ་ཤེས་ཐིམ་པས་སེམས་མི་གསལ་ཞིང་རབ་རིབ་ཏུ་འགྱུར། སའི་ཁམས་ཐིམ་པས་ལུས་ཐམས་ཅད་སྐམ་པར་འགྱུར། མིག་གི་དབང་པོ་ཐིམ་པས་མིག་མི་གསལ་བར་འགྱུར་ཞིང་ཟླུམ་པར་འགྱུར། ཡུལ་གཟུགས་ཐིམ་པས་ལུས་ཀྱི་མདངས་མེད་ཅིང་ཉམས་པར་འགྱུར། ཡང་ཚོར་བའི་ཕུང་པོ་ཐིམ་པས་ཚོར་བ་ཉམས་སུ་མི་མྱོང་། མཉམ་ཉིད་ཡེ་ཤེས་ཐིམ་པས་ཚོར་བ་གསུམ་དྲན་པར་མི་འགྱུར། ཆུའི་ཁམས་ཐིམ་པས་རང་ལུས་ཀྱི་མཆུ་དང་རྡུལ་དང་གཅིན་དང་ཁུ་ཁྲག་སོགས་སྐམ་པར་འགྱུར། རྣ་བའི་དབང་པོ་ཐིམ་པས་ཕྱི་ནང་གི་སྒྲ་མི་ཐོས། ཡུལ་སྒྲ་ཐིམ་པས་རང་ལུས་ཀྱི་སྒྲ་མི་ཐོས། ཡང་འདུ་ཤེས་ཀྱི་ཕུང་པོ་ཐིམ་པས་རྐང་གཉིས་ལ་སོགས་པའི་སེམས་ཅན་རྣམས་མི་དྲན། སོ་སོར་རྟོགས་པའི་ཡེ་ཤེས་ཐིམ་པས་ཕ་མ་བུ་སྲིང་ལ་སོགས་པའི་མིང་མི་དྲན། མེའི་ཁམས་ཐིམ་པས་ཟས་མི་འཇུ། སྣའི་དབང་པོ་ཐིམ་པས་སྟེང་རླུང་དལ་གྱིས་འགྲོ། །ཡུལ་གྱི་དྲི་ཐིམ་པས་རང་གི་ལུས་ལ་དྲི་མི་བྲོའོ། །ཡང་འདུ་བྱེད་ཀྱི་ཕུང་པོ་ཐིམ་པས་ལུས་ཀྱི་བྱ་བ་ཐམས་ཅད་ལ་འཇུག་པར་མི་འགྱུར། བྱ་བ་གྲུབ་པའི་ཡེ་ཤེས་ཐིམ་པས་འཇིག་རྟེན་གྱི་བྱ་བ་དང་དགོས་པ་མི་དྲན། རླུང་གི་ཁམས་ཐིམ་པས་རླུང་བཅུ་གནས་ནས་འཕོ། ལྕེའི་དབང་པོ་ཐིམ་པས་ལྕེ་སྦོམ་ཞིང་ཐུང་ལ་རྩ་བ་སྔོན་པོར་འགྲོ། ཡུལ་གྱི་རོ་ཐིམ་པས་རོ་དྲུག་ཉམས་སུ་མི་མྱོང་ངོ་། །དེ་ལྟར་རགས་པ་ཉི་ཤུ་ཐིམ་ནས། ཕྲ་བ་ནང་གི་འབྱུང་བའི་ཐིམ་ལུགས་ནི། ས་ཆུ་ལ་ཐིམ་པས་ལུས་བསྒུལ་བསྐྱོད་མི་ནུས་ཤིང་ཟུངས་མི་ཐུབ། ལུས་ས་ལ་བྱིང་བ་སྙམ་བྱེད། །ནང་རྟགས་རྨིག་རྒྱུ་ལྟ་བུ་སྔོ་མེར་མེར་བ་དང་། ཆར་ཟིམ་དང་ཆུ་གཡོ་བའི་རྣམ་པ་ལྟ་བུ་འབྱུང་། ཆུ་མེ་ལ་ཐིམ་པས། ཁ་སྣ་སྐམ་ཞིང་ལྕེ་རྐན་ཕུག་ཏུ་འགྲོ། ནང་རྟགས་སུ་དུ་བ་འཕྱུར་བ་ལྟ་བུ་དང་། དུ་ཐང་ཆགས་པ་ལྟ་བུ་འབྱུང་། མེ་རླུང་ལ་ཐིམ་པས་ལུས་ཀྱི་དྲོད་མཐའ་ནས་སྡུད་ཅིང་ཕོ་བའི་མེ་དྲོད་ཉམས། ནང་རྟགས་སུ་སྲིན་བུ་མེ་ཁྱེར་ལྟ་བུ་དམར་ཙག་ཙག་དང་། དམར་ཕྲམ་ཕྲོམ་འབྱུང་། རླུང་རྣམ་ཤེས་ལ་ཐིམ་པས། དབུགས་ཕྱིར་རིང་དུ་རྒྱུ་ཞིང་ནང་དུ་སྡུད་མི་ཤེས་པར་རགས་པའི་རྒྱུ་བ་ཆད། ནང་རྟགས་སུ་མར་མེ་འབར་བའི་སྣང་བ་དང་། སྒྲོན་མེའི་ཕྲེང་བ་བསྒྲིགས་པ་ལྟ་བུ་འབྱུང་། རྣམ་ཤེས་ནམ་མཁའ་ལ་ཐིམ་པས་ནང་རྟགས་སུ་ཤེས་པ་དྭངས་པ་དང་། ཕྱི་རྟགས་སུ་སྤྲིན་མེད་པའི་ནམ་མཁའ་ལྟ་བུ་འབྱུང་། དེ་ནས་ནམ་མཁའ་འོད་གསལ་ལ་ཐིམ་པས། སྣང་བཞི་རིམ་གྱིས་འཆར་ཏེ། དང་པོ་སྤྱི་བོ་ནས་ཕ་ལས་ཐོབ་པའི་ཐིག་ལེ་དཀར་ཆ་དེ་ཉིད་ཐུར་དུ་བབས་ནས་སྙིང་གར་སོན་པ་ན་སྣང་བ་ཞེས་བྱ་སྟེ། ཕྱི་རྟགས་སུ་སྣང་བ་ཐམས་ཅད་སྤྲིན་བྲལ་གྱི་ནམ་མཁའ་གཡའ་དག་པ་ལ་ཟླ་འོད་ཀྱིས་ཁྱབ་པ་ལྟ་བུ་དཀར་ལམ་པ་བྱུང་། ནང་རྟགས་སུ་གཟུང་བའི་རྣམ་རྟོག་རགས་པས་སྟོང་པའི་ཤེས་པའི་རང་གདངས་གསལ་བར་སྣང་བ་འཆར། གཉིས་པ་དབུ་མའི་མས་སྣའི་ཁམས་དམར་ཆ་དྭངས་མ་གྱེན་དུ་སོང་པས་སྣང་བའི་ཡེ་ཤེས་འཆེད་པ་ལ་ཐིམ། ཕྱི་རྟགས་སུ་སྤྲིན་མེད་པའི་ནམ་མཁའ་ཉི་འོད་ཀྱིས་ཁྱབ་པ་ལྟ་བུ་དམར་ལམ་པ་འཆར། ནང་རྟགས་སུ་འཛིན་པའི་རྣམ་རྟོག་རགས་པའི་ཆོས་སྟོང་པའི་སེམས་ཤིན་ཏུ་གསལ་བར་སྣང་བ་འཆར། གསུམ་པ་དྭངས་མ་དཀར་དམར་སྙིང་གར་འཕྲད་པའི་དུས་སུ་མཆེད་པའི་ཡེ་ཤེས་ཐོབ་པ་ལ་ཐིམ་པས། ཕྱི་རྟགས་སུ་ནམ་མཁའ་ལ་མུན་ནག་གིས་ཁྱབ་པ་ལྟར་ནག་ཐིབས་ཀྱིས་འགྲོ་བའི་ནག་ལམ་དང་། ནང་རྟགས་སུ་ཤིན་ཏུ་ཕྲ་བའི་གཟུང་འཛིན་གྱི་རྟོག་པའི་ཆེས་ཆེར་སྟོང་པ་སྣང་ཆའི་སྟེང་དུ་ཐ་དད་པའི་མཚན་མ་ཐམས་ཅད་ནུབ་པས་སེམས་འགག་པ་ལ་ཕྱོགས་པ་སྣང་བ་ཐོབ་པའི་ཡེ་ཤེས་འཆར། བཞི་པ་དེ་ནས་སྙིང་གའི་རྩ་དར་དཀར་གྱི་སྐུད་པ་འདྲ་བའི་ནང་གི་ཁྲག་དབུགས་ཀྱི་དྭངས་མ་ཐིག་ལེ་ཨ་ཧཾ་སོགས་རྫོགས་པར་ཐིམ་པས་འཆི་ཁའི་གཞི་དུས་ཀྱི་འོད་གསལ་འཆར་སྟེ། ཕྱི་རྟགས་སུ་སྤྲིན་དང་བྲལ་བའི་ནམ་མཁའ་གཡའ་དག་པ་ལྟ་བུ་དང་སྟོང་གསལ་མཐའ་དབུས་མེད་པའི་སྣང་བ་དང་། ནང་རྟགས་སུ་རྣམ་པར་མི་རྟོག་པ་ལྷན་ཅིག་སྐྱེས་པ་ཤིན་ཏུ་སྤྲོས་པ་དང་བྲལ་བའི་ཡེ་ཤེས་ལ་གནས་པ་སྟེ་འདི་ངོས་ཟིན་ནས་ད་ལྟའི་ཉམས་ལེན་གྱི་ངང་དུ་བཞག་ན་འོད་གསལ་མ་བུ་འདྲེས་ཏེ་བར་དོ་དང་པོ་ལ་གྲོལ་བ་ཡིན་ནོ། །འདི་ནི་སྟོང་བའི་འོད་གསལ་རྒྱུད་སྡེ་སྤྱི་དང་མཐུན་པར་བཤད་པ་ཡིན་ལ་འདིའི་སྐབས་སུ་སྣང་བའི་འོད་གསལ་ལྷ་སྐུ་དང་། ཐིག་ལེ་ལ་སོགས་པ་འཆར་ཚུལ་རྫོགས་ཆེན་གྱི་རྒྱུད་སྡེ་རྣམས་ནས་བཤད་པ་ཡོད་ཀྱང་ཇི་ལྟ་བར་གྲོལ་བ་ལོང་ཡོད་དུ་འཆར་དཀའ་བར་སྣང་ངོ་། །དེ་ནས་སྣང་གསུམ་ཐིམ་པའི་འོད་གསལ་དེ་ལས་སླར་ཡང་རིམ་གྱིས་མཆེད་དེ་སྲིད་པ་བར་དོའི་ལུས་སུ་འགྲུབ་པ་ནི། བར་དོར་ཅི་ཙམ་གནས་པའི་ཕྱེད་སྔ་མ་ལ་ཚེ་སྔ་མའི་གཟུགས་དང་། ཕྱི་མ་ལ་ཕྱི་མ་གང་དུ་སྐྱེ་འགྱུར་གྱི་གཟུགས་ཀྱི་རྣམ་པ་ཅན་དབང་པོ་ཐམས་ཅད་ཚང་ཞིང་། མའི་མངལ་མ་གཏོགས་པར་རྫུ་འཕྲུལ་གྱིས་ཐོགས་མེད་དུ་རྒྱུ་བ་བར་དོ་རིགས་མཐུན་པ་རྣམས་དང་ལྷའི་མིག་དག་པ་ཐོབ་པ་རྣམས་མ་གཏོགས་གཞན་གྱིས་མི་མཐོང་བ། དཔེར་ན་རྨི་ལམ་གྱི་ལུས་ལྟ་བུར་སྐད་ཅིག་ལ་སྐྱེ་ནས་སྣང་བའང་མ་ཡིན་མུན་པའང་མ་ཡིན་པའི་སྣང་མུན་འོད་ཀྱི་བར་དོ་ཞེས་བྱ། འདིའི་སྐབས་སུ་ཤི་བ་ངོ་ཤེས་དཀའ་བས། ནམ་མཁར་བལྟས་ན་ཉི་ཟླ་མི་མཐོང་བ་དང་། ས་ལ་རྐང་རྗེས་དང་། གྲིབ་མ་མེད་པ་སོགས་བར་དོ་ཡིན་པའི་རྟགས་སུ་བཤད། འདིའི་ཚེ་ལས་དག་མ་དག་གི་སྣང་བ་བཟང་ངན་སྣ་ཚོགས་དང་། ཁྱད་པར་འཇིགས་པའི་སྒྲ་བཞི་ཞེས་པས་རླུང་ལས་རི་ཉིལ་བ་ལྟ་བུའི་སྒྲ། ཆུ་རླུང་ལས་རྒྱ་མཚོའི་རླབས་འཆོལ་བའི་སྒྲ། མེ་རླུང་ལས་ནགས་ལ་མེ་མཆེད་པའི་སྒྲ། རླུང་གི་རླུང་ལས་འབྲུག་སྒྲ་སྟོང་དུས་གཅིག་ཏུ་ལྡིར་བའི་སྒྲ། ཉམ་ང་བའི་གཡང་ས་གསུམ་ནི། དུག་གསུམ་གྱི་རང་གཟུགས་གཡང་ས་དཀར་དམར་ནག་གསུམ་མཐོང་ནས། དེར་ལྟུང་བ་ན་མངལ་དུ་ཆུད་པ་སོགས་འབྱུང་། འདི་དག་གི་ཚེ་སྐྱེ་གནས་འཚོལ་བ་དང་། གནས་ལུས་ལ་སྲེད་པ་སོགས་རྒྱུན་མར་འབྱུང་བ་ཡིན་ཞིང་། འོད་ཀྱི་འཁོར་ལོ་དང་། ས་ཕུག་དང་། གང་སྟོད་དང་། དུད་འགྲོ་ཕོ་མོ་དང་། མི་ཕོ་མོ་ལ་སོགས་པ་མངལ་སྒོ་དང་སྐྱེ་གནས་ཀྱི་སྣང་བ་མི་འདྲ་བ་སྣ་ཚོགས་འཆར་བ་ཡིན་ནོ། །དེ་དག་གི་ཚེ་ཉམས་ལེན་གྱི་གནད་ནི། དང་པོ་འཆི་ངེས་པར་བློ་ཐག་ཆོད་པའི་ཚེ་ཚེ་འདིའི་ཞེན་པ་དང་འབྲེལ་བ་ཐམས་ཅད་བཅད། དམ་ཚིག་ཉམས་ཆགས་དང་སྡིག་ལྟུང་སོགས་ལ་སྙིང་ཐག་པ་ནས་བཤག་པ་བྱ། རང་བྱས་ཀྱི་སྡིག་པ་དྲན་ནས་འགྱོད་པ་དང་། འཆི་བ་ལ་འཇིགས་སྐྲག། ཚེ་འདིའི་ཞེན་པ་སོགས་སྐད་ཅིག་ཙམ་ཡང་མི་བྱ་བར། དགའ་ཡལ་ལེ། སྤྲོ་སང་ངེ་། ད་རེས་འཆི་བ་འོད་གསལ་ངོས་ཟིན་པར་བྱ་བའམ་མིན་ཡང་བར་དོར་འོག་མིན་མཁའ་སྤྱོད་ཀྱི་གནས་སམ་ཟངས་མདོག་དཔལ་རི། བདེ་བ་ཅན་ལ་སོགས་པར་ངེས་པར་འགྲོ་ཆོག་པས་རེ་དགའ། དག་པའི་ཞིང་ཁམས་དེ་དག་ཏུ་འགྲོ་བར་བྱའོ་སྙམ་པའི་འདུན་པ་དྲག་པོ་མ་བརྗེད་པར་བྱ། ད་ལྟའི་རང་རྒྱུད་ལ་ཉམས་ལེན་གང་གསལ་དེ་གའི་ངང་དུ་བློ་ལྷོད་ཀྱིས་བཞག་ནས་ཚེའི་འདུ་བྱེད་གཏོང་བ་ལས། ད་ལྟ་གོམས་འདྲིས་མེད་པའི་མན་ངག་གཞན་དེའི་ཚེ་ཉམས་སུ་མི་ལོན་པས་ད་ལྟ་རང་གི་ཉམས་ལེན་གང་གསལ་པ་དེའི་ངང་དུ་འཇོག་པ་དང་། ཟངས་མདོག་དཔལ་རི་སོགས་དག་པའི་ཞིང་དུ་འགྲོ་སྙམ་པའི་འདུན་པ་གཉིས་པོ་འདི་ལས་ལྷག་པ་མེད་དོ། །ཁྱད་པར་རང་ཉིད་གང་ལ་འདུན་པ་གཏད་པའི་དག་པའི་ཞིང་ཁམས་དེར་འགྲོ་བར་བྱའོ་སྙམ་པའི་འདུན་པ་ཡང་དང་ཡང་དུ་ཡིད་ལ་བྱ་བ་ནི་གནད་ཁྱད་པར་ཅན་ཡིན་པས་ད་ལྟའང་ཉིན་མཚན་རྒྱུན་དུ་ཡིད་ལ་མི་འབྲལ་བར་ཤེས་པར་གནད་གལ་ཆེན་པོ་ཡིན་ནོ། །