ཐེག་པ་ཆེན་པོའི་གསོ་སྦྱོང་གི་སྡོམ་པ་ལེན་ཐབས།

🚧 This website is under continued development. We appreciate your patience!

Previous Text Back to Volume Page Next Text

Wylie title	theg pa chen po'i gso sbyong gi sdom pa len thabs
Location	dpal sprul bka' 'bum Volume 2, Text 31, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Mending and Purifying Vows and Breaches - gso sbyong · Practical Instructions - lag len - len thabs

[edit]

༄༅། །ཐེག་པ་ཆེན་པོའི་གསོ་སྦྱོང་གི་སྡོམ་པ་ལེན་ཐབས།

བླ་མ་ལ་ཕྱག་འཚལ་ལོ། །འོ་དེ་རིང་གི་སྐབས་སུ་ཐེག་པ་ཆེན་པོའི་གསོ་སྦྱོང་གི་སྡོམ་པ་ལེན་པ་ནི། སྐྱབས་སེམས་མཎྜལ་སོགས་སྔོན་དུ་འགྲོ་བས་དགོངས་གསོལ་སོང་རྗེས། ཇི་ལྟར་སྔོན་གྱི་སོགས་ཀྱི་འབྲུ་འགྲེལ་ཅུང་ཟད་བཤད་ན། ཇི་ལྟར་ན་དུས་སྔོན་གྱི་དེ་བཞིན་གཤེགས་པ་ཆོས་ཉིད་དེ་བཞིན་ཉིད་དང་རྗེས་སུ་མཐུན་པར་གཤེགས་པས་ན་དེ་བཞིན་གཤེགས་པ། ལས་ཉོན་གྱི་དགྲ་ཐམས་ཅད་བཅོམ་པས་ན་དགྲ་བཅོམ་པ། ཆོས་ཐམས་ཅད་ཕྱིན་ཅི་མ་ལོག་པར་ཡང་དག་པར་མཁྱེན་ཅིང་། མ་རིག་པའི་གཉིད་ལས་སངས་པ་དང་། ཤེས་བྱ་ཐམས་ཅད་ལ་ཐོགས་པ་མེད་པའི་ཡེ་ཤེས་རྒྱས་པར་སངས་རྒྱས་ཏེ། སྔོན་སྲིན་མོའི་གླིང་དུ་འཁྱམས་པའི་དེད་དཔོན་སེངྒེ་སོགས་ཚོང་པ་ལྔ་བརྒྱ་ཚེའི་དུས་བྱེད་དུ་ཉེ་བ་ན་རྟ་ཅང་ཤེས་སྤྲིན་གྱི་ཤུག་ཅན་གྱིས་སྲོག་གི་འཇིག་པ་ལས་བསྐྱབས་ཏེ་འཛམ་བུ་གླིང་དུ་ཕྱིན་པ་ལྟར་སྟོན་པས་གནང་བའི་ཡན་ལག་བརྒྱད་ཀྱི་ཚུལ་ཁྲིམས་སོགས་བསླབ་པ་སྣ་གཅིག་བསྲུང་བ་ཡན་ཆད་འཁོར་བའི་སྲིན་གླིང་ནས་ཐར་བའི་གྲོང་དུ་ཕྱིན་པས་ན་རྟ་ཅང་ཤེས་ལྟ་བུ། བརྒྱ་བྱིན་གྱི་གླང་ཆེན་ས་ལ་རབ་བརྟན་མགོ་བོ་སུམ་ཅུ་རྩ་གསུམ་པ། དེས་སྣ་ལྗགས་དེ་སྙེད་ཀྱིས་གནམ་ལྕགས་ཀྱི་རལ་གྲི་འཁོར་ལོ་རི་བོ་སོགས་འཕེན་པས་ལྷ་མིན་གྱི་གཡུལ་ངོ་བཟློག་པ་ལྟར། སངས་རྒྱས་བཅོམ་ལྡན་འདས་ཀྱིས་འཁོར་བའི་གཡུལ་དང་བདུད་ཀྱི་དཔུང་རྣམས་ཕམ་པར་མཛད་པས་གླང་པོ་ཆེན་པོ། རང་དོན་བྱང་ཆུབ་སྒྲུབ་པའི་བྱ་བ་ཆེན་པོ་བྱས་ཤིང་། དེ་ཡང་བྱེད་པ་ཕ་རོལ་ཏུ་ཕྱིན་པ་དྲུག་གི་སྒོ་ནས་བྱས་ལ། སྡུག་བསྔལ་གྱི་ཁུར་མ་ལུས་པ་བོར་ཞིང་། དང་པོ་གཞན་དོན་དུ་ཐུགས་བསྐྱེད་དེ་བསྐལ་པ་མང་པོར་ཚོགས་བསགས་ཀྱང་འབྲས་བུ་རང་གི་དོན་སྤང་རྟོགས་མཐར་ཕྱིན་པ་སངས་རྒྱས་ཀྱི་གོ་འཕང་རྗེས་སུ་ཐོབ་པ། སྲིད་པ་འདིར་རྣམ་པ་ཀུན་ཏུ་སྦྱོར་བའི་སྲེད་ལེན་མ་རིག་པ་དང་བཅས་པ་གཏན་ནས་ཟད་པ། བསླུ་བ་མེད་པ་ཡང་དག་པའི་བཀའ་དང་། ངོ་བོ་ཡེ་ནས་རྣམ་པར་དག་ཅིང་གློ་བུར་སྒྲིབ་གཉིས་ཀྱི་དྲི་མ་ལས་ལེགས་པར་རྣམ་པར་གྲོལ་བའི་ཐུགས་དང་། མ་རིག་པའི་འཆིང་བ་ལས་ལེགས་པར་གྲོལ་ཞིང་ཤེས་བྱ་ཐམས་ཅད་མཁྱེན་པའི་ཤེས་རབ་ཅན་རྒྱལ་བ་དེ་དག་གིས། སེམས་ཅན་ཉི་ཚེ་ཙམ་མ་ཡིན་པར་མཐའ་ཡས་པའི་སེམས་ཅན་ཐམས་ཅད་ཀྱི་དོན་དང་། དེ་ཡང་གནས་སྐབས་སུ་ཕན་པ་དང་མཐར་ཐུག་གི་གྲོལ་བ་ཐོབ་པའི་ཕྱིར་དང་། གནས་སྐབས་ཀྱི་ཕན་པ་ལ་བཀྲེས་ཤིང་སྐོམ་པས་གདུང་བའི་མུ་གེ་དང་། རླུང་མཁྲིས་བད་ཀན་སོགས་ཀྱི་ནད་མེད་པར་བྱ་བའི་ཕྱིར་དང་། མཐར་ཐུག་གི་གྲོལ་བ་ལ་ཡང་རིགས་ཅན་གསུམ་གྱི་ཁམས་དབང་བསམ་པའི་དབྱེ་བས་ཐེག་པ་རང་རང་གི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡོངས་སུ་རྫོགས་ཏེ་མྱ་ངན་ལས་འདས་པའི་གོ་འཕང་ཐོབ་པར་བྱ་བའི་ཕྱིར་དང་། མཐར་ཐུག་ཉན་རང་གི་བྱང་ཆུབ་ལས་དྲངས་ཏེ་རིགས་ཅན་གསུམ་གྱི་གདུལ་བྱ་མཐའ་དག་བླ་ན་མེད་པའི་བྱང་ཆུབ་ཆེན་པོའི་གོ་འཕང་མངོན་དུ་ཐོབ་པར་བྱེད་བའི་ཕྱིར་གསོ་སྦྱོང་ཡང་དག་པར་མཛད་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་ཀུན་སློང་དེ་ལྟ་བུའི་སྒོ་ནས་དགེ་ཚོགས་གསོ་ཞིང་ཉེས་ལྟུང་སྦྱོང་བར་བྱེད་པ་གསོ་སྦྱོང་བར་བྱེད་པ་གསོ་སྦྱོང་གི་སྡོམ་པ་བླངས་ཏེ་སང་ཉིན་མ་མ་ཤར་གྱི་བར་དུ། ཇི་ལྟར་སྔོན་གྱི་དགྲ་བཅོམ་པ་རྣམས་ཀྱིས་སྲོག་གཅོད་སོགས་ཉེས་སྤྱོད་མཐའ་དག་རྟག་ཏུ་སྤངས་པ་ལྟར། ཡན་ལག་བརྒྱད་ཀྱི་བསྲུང་བྱ་རྣམས་ཤེས་བཞིན་དུ་བསྲུང་བར་བྱའོ་སྙམ་པའི་ཚིག་རྗེས་དོན་དྲན་དུ་མཛོད་ཅིག །དགེའོ། །