སྙན་བརྒྱུད་ཤོག་དྲིལ་ཡིད་བཞིན་ནོར་བུའི་སྦས་དོན་ཐབས་ལམ་མ་བསྒོམས་སངས་རྒྱསཿ

Previous Text Back to Volume Page Next Text

Wylie title	snyan brgyud shog dril yid bzhin nor bu'i sbas don thabs lam ma bsgoms sangs rgyas
Location	'jigs gling bka' 'bum Volume 12, Text 3, Pages 15-23 (Folios 1a1 to 5a6)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Snyan brgyud shog dril yid bzhin nor bu'i sbas don thabs lam ma bsgoms sangs rgyas. In Kun mkhyen rig 'dzin 'jigs med gling pa'i gsung 'bum, Vol. 12: 15-23. New Delhi: Shechen Publications, 2025.
Genre	Yogic Exercises - 'khrul 'khor
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)

[edit]

འུྃཿ སྙན་བརྒྱུད་ཤོག་དྲིལ་ཡིད་བཞིན་ནོར་བུའི་སྦས་དོན་ཐབས་ལམ་མ་བསྒོམས་སངས་རྒྱས་བཞུགསཿ

འུྃཿ དཔའ་བོ་དང་ནི་རྣལ་འབྱོར་མའིཿ གྲོང་ཁྱེར་མཆོག་ལ་ཕྱག་འཚལ་ལོཿ རང་ལུས་བདེ་ཆེན་ཙཎྜ་ལིཿ འབར་འཛག་དབང་དང་དགའ་བཞིའི་ལམཿ གབ་དོན་ནམ་མཁའི་ཙཎྜ་ལིཿ སྲོག་ཐུར་ཡེ་ཤེས་དབྱིངས་སུ་བསྲེཿ གཟུང་འཛིན་སྤངས་པའི་སྒྲ་གཅན་གྱིཿ དུས་མེ་ནོར་བུའི་ཁོང་སེང་རྩེརཿ རླུང་སེམས་འདྲེས་པའི་ཐིག་ལེ་ནིཿ གསལ་འཚེར་འོད་ཀྱི་རྣམ་པ་གཞགཿ ཐུར་སེལ་སྟེང་དུ་སྲོག་སྦུབ་པསཿ སྒྲ་གཅན་སྔངས་པའི་ཤུགས་རིངས་ཀྱིསཿ ཐིག་ལེ་སྦས་མའི་མཁའ་གསང་དུཿ སྐར་མདའ་འཕངས་པ་བཞིན་དུ་དཀྲོགསཿ ཧཱུྃ་དང་རླུང་གི་ལྕགས་ཀྱུ་ཡིསཿ གོ་ལྡོག་དྲངས་པ་གཙུག་ཏོར་ལམཿ བརྒྱུད་དེ་མཁའ་དབྱིངས་རྡོ་རྗེར་བཅིངཿ དེ་ལྟར་ཡང་ཡང་གོམས་པ་ཡིསཿ མེ་ཆུའི་ཁམས་གཉིས་གོ་ལྡོག་པསཿ འཆི་བ་མེད་པའི་བཅུད་ལེན་ཅིངཿ ནང་དུ་སྟེང་འོག་རླུང་འདྲེས་ནསཿ ཕྱི་རུ་སྣང་སེམས་རོ་གཅིག་འགྱུརཿ ས་མ་ཡཿ གཞན་ལུས་ཞུ་བདེའི་ཙཎྜ་ལིཿ རིག་མ་བརྟག་འགུགས་སྦྱང་བ་སོགསཿ སྤྱི་དང་མཐུན་པ་ཉིད་དུ་སྤྱདཿ བསླབ་པ་གསུམ་གྱིས་གཡའ་བླང་ཞིངཿ བདེ་བ་བསྐྱེད་པའི་ཐབས་ལ་འབདཿ འདུ་ཤེས་གསུམ་གྱིས་ཐ་མལ་ལསཿ ལྡོག་ནས་འབེབས་དང་སྤོར་དང་བསྐྱིལཿ ཤེས་པ་གསུམ་གྱི་གནད་ལ་བསླབཿ དབབ་ལ་མཁས་པ་རུས་སྦལ་བཞིནཿ བསྐྱོད་པ་དལ་བ་མན་ངག་ཡིནཿ བདེ་བ་རྫོགས་ནས་མ་ཡིན་ཏེཿ གཡོ་དུས་བསྲུབ་འཕྲོ་བཅད་ལ་བཟུངཿ ནོར་བུའི་རྩེ་ནས་ལྡོག་དཀའ་བསཿ རྩ་བར་རྨ་བྱའི་སྟངས་ཀྱིས་བཟུངཿ རིག་པ་སྤྱི་བོའི་ཧཾ་དང་འགྲོགསཿ རླུང་ནི་སྲིན་ཞལ་ནང་དུ་སྡིགསཿ ཨཱི་ཞེས་བྱ་བ་རྨ་བྱའི་སྟངསཿ བསྐྱིལ་ལ་མཁས་པ་ཐེམ་བུ་བཞིནཿ རླུང་རིག་འདྲེས་པའི་དབྱིངས་ལ་བཞགཿ འདྲེན་ལ་མཁས་པ་ཧུབ་ཀྱིས་སྒྲསཿ བར་རླུང་རྒྱངས་ཤིང་གསང་རླུང་ཐོནཿ ལྡོག་ལ་མཁས་པ་ཧིག་གི་སྒྲསཿ དུང་དཀར་དང་ནི་གར་མཁན་བཞིནཿ འགྲེམས་ལ་མཁས་པ་གཏུམ་མོ་དངཿ ཁྱད་པར་བརྗོད་བྲལ་ལྷན་ཅིག་སྐྱེསཿ འཛིན་འདྲེན་དགྲམ་པ་ཀུན་གྱི་གནདཿ ཁྱད་པར་བྱེད་པ་བྲབ་གཞིལ་ཏེཿ དེ་ལྟར་ལས་རྒྱའི་གནད་བདུན་གྱིསཿ ཐིག་ལེ་རྩ་ཡི་ནང་དུ་སྦཿ རྣམ་རྟོག་ཡེ་ཤེས་དབྱིངས་སུ་སྦཿ བདེ་བ་འོད་གསལ་ཀློང་དུ་སྦཿ འོད་གསལ་འཛིན་མེད་ངང་དུ་སྦཿ སྦ་བཞིའི་གནད་ལ་གོམས་པ་ཡིསཿ རླུང་སེམས་དབུ་མར་ཡང་དག་འཛུདཿ ཀུན་ལ་སྲོག་རྩོལ་ལོག་པའི་གེགསཿ བཅོས་ཤིང་རྩ་མདུད་གྲོལ་བའི་ཐབསཿ རྣམ་པ་ཉི་ཤུས་བྱང་ཆུབ་པའིཿ རྡོ་རྗེ་ལུས་ཀྱི་འཁྲུལ་འཁོར་གཅེསཿ ས་མ་ཡཿ རྒྱ་རྒྱ་རྒྱཿ དེ་ལ་རིག་འཛིན་འཁྲུལ་འཁོར་ནིཿ གསོལ་བ་བཏབ་ཅིང་བུམ་ཅན་བཟུངཿ དང་པོ་རྡོ་རྗེ་སྐྱིལ་མོ་ཀྲུངཿ ལག་གཉིས་ཆུན་བཙལ་མཆན་སྐོར་་་ཡན་ལག་གི་ནད་སེལ་་་བརྡེབཿ འཁྱུད་ཚུལ་བྱ་ཞིང་སེ་གོལ་གཏོགསཿ གཉིས་པ་ལག་གཉིས་ཨ་བ་མཉེཿ མིག་ནས་རིམ་པར་ལུས་ཀུན་ཕུརཿ གསུམ་པ་སོར་བསྣོལ་བྲང་ལ་་་ཧ་སྒྲ་འདོན་ཅིང་བྲང་ལ་ཤུགས་ཀྱིས་གཏད་པས་སྲོག་རྩོལ་ལོག་པའི་གེགས་སེལཿ་་་གཏདཿ ཐད་ཀར་རྒྱངས་ཞིང་ཕྱི་ལ་ཐེནཿ བཞི་པ་དཔུང་པ་གཡས་་་རྩ་དཀར་སོགས་དཔུང་པའི་ནད་སེལཿ་་་གཡོན་གཅུཿ ལག་གཉིས་ནང་དུ་སྐོར་ཞིང་སྤྲུགསཿ ལྔ་པ་བྱ་རྒོད་དཔུང་སྟངས་ནིཿ ཁུ་ཚུར་་་ཤ་ལྤགས་ཆུ་སེར་གྱི་ནད་སེལཿ་་་སྙིང་ནས་ཕྱི་རུ་འཕངསཿ འབེབས་ཆུང་གསུམ་དང་འབའ་དཀྲུགས་གཅིགཿ དྲུག་པ་ལག་གཉིས་དཔུང་མགོར་བསྣོལཿ བསྡམས་ཏེ་ལུས་ཀུན་གཅུད་པའི་་་སྐེད་པའི་ནད་གཙོ་བོར་སེལཿ་་་མཐརཿ སྡིགས་མཛུབ་ཕྱིར་སྟོན་ཧཱུྃ་ཀར་རྒྱཿ ༼བགྲད། བདུན་པ་རྐང་པའི་བྲང་ས་ནསཿ ལག་གཉིས་ཁུ་ཚུར་དཔུང་མགོར་་་ཆུ་རྒྱུས་ཀྱི་ནད་སེལཿ་་་ཐེནཿ གཡས་གཡོན་ལྟ་སྟངས་མཉྫུ་ཤྲཱིཿ ༼སྒུར། བརྒྱད་པ་གཞུ་འགེངས་མཁྲིག་མ་གཉིསཿ མཆན་སྐོར་གཞུ་རྒྱུད་རེ་མོས་་་སོག་དབྲག་དང་ཚིགས་པའི་ནད་སེལཿ་་་ཐེནཿ རྟ་རྒྱ་སྤྱིར་བཞག་ལུས་སྤྲུགས་ཤིངཿ ཧི་སྒྲ་བསྟུད་པ་ནཱ་གཱརྫུཿ ༼ཆེན། དགུ་པ་རི་འཕུལ་ལག་ངར་གཉིསཿ ཆུན་བཙལ་མདུན་རི་འཕུལ་ཚུལ་རྗེསཿ ཆུ་སྲིན་རྣམ་རོལ་ཕྱག་རྒྱའི་ནངཿ ཧ་སྒྲ་གསུམ་བསྟུད་པྲ་བྷ་ཧཿ ༼བར། བཅུ་པ་དགྱེ་དགུ་ལུས་བསྲང་བཿ རྒྱབ་ཏུ་དགྱེ་་་མཁལ་མ་མཚེར་པའི་ནད་སེལཿ་་་ཞིང་མདུན་དུ་དགུཿ ཆུན་བཙལ་ཐོད་རྔ་འཁྲོལ་ཚུལ་དངཿ རྐང་པའི་སྟབས་བསྟུན་དྷ་ན་སཾཿ ༼སྒུར། བཅུ་གཅིག་རྡོ་རྗེའི་འདུག་སྟངས་ལསཿ ལག་པའི་མཐེ་འུ་ཆུང་གཉིས་སྦྲེལཿ མཛུབ་་་རྩིབ་ལོགས་ནད་སེལཿ་་་རྩེ་སྤྲད་པ་སྤྱི་གཙུག་བཞགཿ སྣ་རྩེར་ཤེས་པ་ཨ་ལ་གཏདཿ ལྔ་ཚར་བརྗོད་པ་བི་མ་ལཿ ༼གཅུས། བཅུ་གཉིས་མེ་རླུང་ཁ་སྦྱོར་འདྲེནཿ ལྟེ་བའི་རླུང་ནི་འོག་ཏུ་མནནཿ ལག་གཉིས་འདོད་རྒྱལ་དམ་རྒྱ་ནིཿ ས་ལ་བཏུགས་ནས་་་མ་ཞུ་བ་དང་ཕོ་བའི་ནད་སེལཿ་་་དགྱེ་བ་དངཿ ལྷན་ཅིག་ལྟེ་བ་ནང་དུ་ཐེནཿ གུ་ཧྱ་ཙཎྜའི་འཁྲུལ་འཁོར་རྒྱཿ ༼བགྲད། བཅུ་གསུམ་ལག་གཉིས་བསྣོལ་བྱས་ཏེཿ སྤྱི་་་རོ་སྟོད་དང་སོག་པའི་ནད་སེལཿ་་་བོར་འཇོག་དང་སྙིང་ག་རུཿ འཁོར་ལོའི་ཕྱག་རྒྱ་རེ་མོས་སྤེལཿ ཤཱནྟིང་གརྦྷའི་འཁྲུལ་འཁོར་རྒྱཿ ༼བགྲད། བཅུ་བཞི་གླང་ཆེན་ཧུ་འདྲེན་ནིཿ དཔྱང་་་མིག་གཉིས་ཀ་སྤྱི་བོ་ལ་གཏད། ཡིད་ཀྱི་རླུང་སྟོང་འདྲེན་དང་ལྟེ་བ་བསྐྱིལ་བྱེད།་་་ཐག་སྟོང་འདྲེན་ཐེམ་བུ་ཡིནཿ རྐང་ལག་མཐིལ་བཞི་ས་ལ་བཙུགསཿ ཧུ་སྒྲ་འདོན་ཅིང་མགོ་ཅོག་་་ཡན་ལག་དང་ཉིང་ལག་གི་ནད་སེལཿ་་་བྱཿ ༼སྒུར། བཅོ་ལྔ་སེང་གེ་རལ་རྔོམ་ནིཿ སྲོག་རྩོལ་གོ་ལྡོག་ཐེམ་བུ་་་མདུན་རླུང་ཅུང་ཟད་ཆུན་བཙལ་རྒྱབ་རླུང་ཡིད་ཀྱི་ཐེན་ཨ་ཧཾ་ཞེས་སྟོང་འདྲེན་བྱེདཿ་་་ཡིནཿ མཐིལ་བཞི་བཙུགས་ལ་གཡས་༼༢༥༽གཡོན་བལྟ་་་རྩེའུ་ཆུང་གི་ནད་སེལ།་་་ཿ ༼སྒུར། བཅུ་དྲུག་གྱི་ལིང་ཁྲེ་ཆེན་འགྲེམསཿ ཨུར་མོ་ཁ་ཡན་ཐེམ་་་རླུང་ཕྱིར་བུས་འོག་སྒོ་གཉིས་མཉམ་པར་ཆུན་བཙལ་བར་རླུང་ཐད་ཀར་རྒྱངས་པ་དང་རིག་པ་ཚངས་བུག་ལ་གཏོད།་་་བུ་ཡིནཿ གན་རྐྱལ་པུས་མོ་རོང་བྱས་ལཿ ཐལ་མོ་སྦྱོར་ཞིང་འགྲེ་་་རྐང་པ་དང་ལག་པའི་ཚིགས་ནད་སེལ།་་་ལྡོག་བྱཿ ༼འབེབས་ཆེན༽ བཅུ་བདུན་རྨ་བྱ་བྱ་རྨྱང་ནིཿ འགྲམ་ཆེན་བུམ་པའི་རླུང་ནང་དུ་རྔུབས་ཏེ་འོག་ཏུ་མནན། ཐད་ཀར་རྒྱངས་པས་ལུས་ཀྱི་སྨད་ཐམས་ཅད་ཁྱབ་པར་བྱ། ཐེམ་བུ་ཡིནཿ ཁ་སྦུབ་གྲུ་མོ་བྲང་ལ་གཏདཿ ལག་མཐིལ་སར་བགྲང་་་རོ་སྟོད་དང་དོན་ལྔའི་ནད་སེལ།་་་རྐང་པ་རྨྱངཿ ༼བགྲད་ཆུང༽ བཅོ་བརྒྱད་ཤང་ཤང་གཤོག་འགྱུར་ནིཿ རྡོ་རྗེ་རྒྱ་གྲམ་ཐེམ་་་རླུང་ནང་དུ་བཞག་ནས་ཕྱོགས་མཉམ་པར་ཆུན་བཙལ།་་་བུ་ཡིནཿ རྐང་གཉིས་ལག་པའི་གྲུ་མོའི་ཁུདཿ རེ་མོས་བླང་ཞིང་ལག་ཅིག་ཤོསཿ བརྐྱང་བསྐུམ་གཤོག་འགྱུར་བསྐོར་བའི་་་རྐང་པའི་ཉྭ་ཤ་དང་དཔུང་པའི་ནད་སེལཿ་་་ཚུལཿ རིགས་ལྔའི་དམ་ཚིག་འཁྲུལ་འཁོར་རྒྱཿ ༼རྡོར། བཅུ་དགུ་དབུ་མ་འཛུགས་བསྐོར་འཐེནཿ འཁོར་ལོ་ཁ་སྦྱོར་ཐེམ་་་མཁལ་མ་ཁ་སྦྱར་ནས་རླུང་དབུ་མར་འཛུད།་་་བུ་ཡིནཿ ༼སྒུར་བགྲད། ཉི་ཤུ་ཛ་ལན་དྷ་ར་ནིཿ རྐང་པ་པུས་སྟེང་རེ་མོས་བཞགཿ བརླ་དང་སྒྱིད་ཁུང་སྟེང་འོག་ནསཿ ལག་གཉིས་ཐལ་སྦྱར་མགོ་བོ་བསྐོར་་་རོ་སྨད་ཐམས་ཅད་ཀྱི་ནད་སེལཿ ༼བགྲད། གེགས་སེལ་རྡོ་རྗེ་དབའ་རླབས་ནིཿ བྲབ་གཞིལ་ཞགས་འཕེན་གླིང་བཞི་སྡུདཿ ཀུན་ལ་ལུས་དང་ཡན་ལག་དངཿ ཉིང་ལག་སོ་སོའི་ཆ་ཆ་ནསཿ སྒྲིམ་དང་ཆུན་བཙལ་འཁྲུལ་འཁོར་གནད༔ རྗེས་ལ་བསྔོ་སྨོན་རྒྱ་ཡིས་གདབཿ ལུས་སྒྲིབ་དག་ཅིང་ཉམས་ཆག་བསྐངཿ མཁའ་འགྲོ་མཉེས་ཤིང་རྩ་མདུད་གྲོལཿ ཕོ་ཉའི་ལམ་མཆོག་བསམ་མི་ཁྱབཿ རྡོ་རྗེ་ལུས་ཀྱི་བྱེད་བཅིངས་ལཿ ཡས་བབས་དབང་ནི་རྣམ་པ་ལྔཿ དེ་ལ་ལུགས་འབྱུང་ལུགས་ལྡོག་གཉིསཿ མས་བརྟན་དགའ་བ་བཅུ་དྲུག་འགྲོསཿ འཁོར་ལོ་ལྔ་ཡི་ཞུ་བདེ་དངཿ མཉམ་སྦྱོར་དབུ་མའི་རྩ་མདུད་ནིཿ ཉི་ཤུ་རྩ་གཅིག་མ་ལུས་པཿ ཚོགས་དང་སྦྱོར་མཐོང་སྒོམ་པའི་ལམཿ མི་སློབ་ལམ་གྱི་འབྲས་བུ་རུཿ གྲོལ་འགྱུར་འདི་ལ་ཐེ་ཚོམ་མེདཿ ས་མ་ཡཿ རྒྱ་རྒྱ་རྒྱཿ གཏེར་རྒྱཿ སྦས་རྒྱཿ དམ་རྒྱཿ ཟབ་རྒྱཿ འདི་ནི་སྔོན་ཆད་བུ་དཔེར་ཕབ་པ་མེད་ཀྱང་མྱུར་ལམ་ཟབ་མོ་སྙན་བརྒྱུད་འཛིན་པར་མི་ནུས་པར་ཕངས་ནས་བཀོད་པ་ལ་མཁའ་འགྲོ་མ་རྣམས་བཟོད་པར་མཛད་དུ་གསོལ། བེམ་པོའི་རེག་བྱ་དོར་བས་བློ་ཚིམ་སྟེ། །མ་སྨིན་སེམས་ཅན་མདུན་ནས་རྩ་ལྟུང་རིན། །རྒྱབ་མདུན་ཐུར་མས་ཉོ་ཙམ་སྔགས་ལམ་མིན། །ཟབ་མོའི་ལམ་གནད་ཇི་བཞིན་རྟོགས་འདོད་རྣམས། །ཡིད་བཞིན་རིན་ཆེན་མཛོད་ཀྱི་རིམ་པའི་ཁོང་། །ཉི་ཤུ་པ་དང་དེ་ཡི་ཕྱི་མའི་གནས། །རྡོ་རྗེའི་ལམ་གྱི་ལྡེ་མིག་ཆེན་པོར་ཟུངས།། །།