ཀློང་ཆེན་སྙིང་གི་ཐིག་ལེ་ལསཿ གཞི་ལམ་འབྲས་བུའི་སྨོན་ལམཿ

Previous Text Back to Volume Page Next Text

Wylie title	klong chen snying gi thig le las: gzhi lam 'bras bu'i smon lam:
Location	'jigs gling bka' 'bum Volume 11, Text 20, Pages 371-373 (Folios 1a1 to 2a3)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Klong chen snying gi thig le las gzhi lam 'bras bu'i smon lam. In Kun mkhyen rig 'dzin 'jigs med gling pa'i gsung 'bum, Vol. 11: 371-373. New Delhi: Shechen Publications, 2025.
Genre	Prayers - smon lam
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)

[edit]

འུཾཿ ཀློང་ཆེན་སྙིང་གི་ཐིག་ལེ་ལསཿ གཞི་ལམ་འབྲས་བུའི་སྨོན་ལམ་བཞུགསཿ དཔལ་ཀུན་ཏུ་བཟང་པོ་ལ་ཕྱག་འཚལ་ལོཿ གདོད་མའི་གནས་ལུགས་རང་བཞིན་སྤྲོས་དང་བྲལཿ ཡོད་པ་མ་ཡིན་རྒྱལ་བས་འདི་མ་གཟིགསཿ མེད་པ་མ་ཡིན་འཁོར་འདས་ཀུན་གྱི་གཞིཿ འགལ་འདུ་མ་ཡིན་བརྗོད་བྱའི་ཡུལ་ལས་འདསཿ རྫོགས་ཆེན་གཞི་ཡི་གནས་ལུགས་རྟོགས་པར་ཤོགཿ ངོ་བོ་སྟོང་པས་རྟག་པའི་མཐའ་ལས་གྲོལཿ རང་བཞིན་གསལ་བས་ཆད་པའི་མུ་དང་བྲལཿ ཐུགས་རྗེ་འགག་མེད་སྣ་ཚོགས་སྤྲུལ་པའི་གཞིཿ གསུམ་དུ་དབྱེ་ཡང་དོན་ལ་ཐ་མི་དདཿ རྫོགས་ཆེན་གཞི་ཡི་གནས་ལུགས་རྟོགས་པར་ཤོགཿ བསམ་གྱིས་མི་ཁྱབ་སྒྲོ་འདོགས་ཀུན་དང་བྲལཿ ཡོད་དང་མེད་པའི་ཕྱོགས་འཛིན་རྣམ་པར་ཞིགཿ འདི་དོན་བརྗོད་ལ་རྒྱལ་བའི་ལྗགས་ཀྱང་རྡུགསཿ ཐོག་མཐའ་བར་མེད་གཏིང་གསལ་ཆེན་པོའི་དབྱིངསཿ རྫོགས་ཆེན་གཞི་ཡི་གནས་ལུགས་རྟོགས་པར་ཤོགཿ རང་ངོ་རྣམ་དག་སྐྱེ་མེད་ཀ་དག་ལཿ ལྷུན་གྲུབ་འདུས་མ་བྱས་པའི་གདངས་ཤར་བཿ གུད་དུ་མ་བཟུང་རིག་སྟོང་ཟུང་འཇུག་ཆེརཿ རྟོགས་པས་གཞི་ཡི་དགོངས་པ་ཚད་དུ་ཕྱིནཿ ལམ་གྱི་གནད་ལ་གོལ་འཕྱུགས་མེད་པར་ཤོགཿ ཡེ་ནས་དག་པས་ལྟ་བའི་མིང་ཡང་མེདཿ རང་ངོ་རིག་པས་སྒོམ་རྒྱུའི་ཤུབས་ནས་དོནཿ གཟའ་གཏད་མེད་པས་སྤྱོད་པའི་སྒྲོག་དང་བྲལཿ རང་བཞིན་ལྷུམས་ཞུགས་སྤྲོས་བྲལ་རྗེན་པའི་ངངཿ ལམ་གྱི་གནད་ལ་གོལ་འཕྱུགས་མེད་པར་ཤོགཿ བཟང་ངན་རྣམ་རྟོག་ཕྱོགས་སུ་མ་ལྷུང་ཞིངཿ བཏང་སྙོམས་ལུང་མ་བསྟན་དུ་མ་འབྱམས་པརཿ ཤར་གྲོལ་རིས་མེད་རྒྱ་ཡན་ལྷུན་འབྱམས་ཀློངཿ སྤང་བླང་ཡེ་ཟད་རང་བཞིན་ཡོངས་ཤེས་དངཿ ལམ་གྱི་གནད་ལ་གོལ་འཕྱུགས་མེད་པར་ཤོགཿ ཐོག་མའི་སྤྱི་གཞི་ནམ་མཁའ་ལྟ་བུའི་ངངཿ གཞི་སྣང་རིག་པ་མཁའ་ལ་སྤྲིན་དེངས་བཞིནཿ ཕྱི་གསལ་ཤེས་པ་ནང་དུ་ལྡོག་པ་ལསཿ ཁྱད་ཆོས་དྲུག་ལྡན་གཞོན་ནུ་བུམ་སྐུའི་སྦུབསཿ འབྲས་བུའི་རྒྱལ་པོ་བཙན་ས་ཟིན་པར་ཤོགཿ ཡེ་ནས་རང་རིག་ཀུན་ཏུ་བཟང་པོ་ལཿ ཐོབ་བྱའི་ཞེ་འདོད་མཐའ་དག་དབྱིངས་སུ་ཡལཿ བྱ་རྩོལ་བློ་འདས་རྫོགས་པ་ཆེན་པོའི་གཤིསཿ དབྱིངས་རིག་ཀུན་ཏུ་བཟང་མོའི་མཁའ་ཀློང་སྦུབསཿ འབྲས་བུའི་རྒྱལ་པོ་བཙན་ས་ཟིན་པར་ཤོགཿ རབ་ཏུ་མི་གནས་དབུ་མ་ཆེན་པོའི་དོནཿ ཁྱབ་གདལ་ལྷུན་འབྱམས་ཕྱག་རྒྱ་ཆེན་པོའི་ངངཿ མཐའ་གྲོལ་ཀློང་ཡངས་རྫོགས་པ་ཆེན་པོའི་གནདཿ ས་ལམ་ཡོན་ཏན་གཞིར་རྫོགས་ལྷུན་གྲུབ་སྦུབསཿ འབྲས་བུའི་རྒྱལ་པོ་བཙན་ས་ཟིན་པར་ཤོགཿ ཐུགས་བཅུད་ཀློང་ཆེན་ཟབ་རྒྱ་ཡིཿ མཐའ་སྡུད་སྨོན་ལམ་ཟབ་མོ་འདིཿ བཀའ་སྲུང་དྲང་སྲོང་རཱ་ཧུ་ལཿ བནྡེའི་ཚུལ་གྱིས་བསྐུལ་ནས་བཀོདཿ ཟབ་དོན་སྤེལ་བ་དོན་ཡོད་ཅིངཿ རྟེན་འབྲེལ་སྨོན་ལམ་མཐར་ཕྱིན་ཕྱིརཿ ནམ་མཁའི་སྙིང་པོས་བྱིན་བརླབས་པའིཿ ཀོང་སྨྱོན་སྦས་པའི་རིག་འཛིན་ལཿ ཟབ་རྒྱ་བཀྲོལ་ཏེ་གཏད་རྒྱ་བྱསཿ འགྲོ་དོན་ནམ་མཁའ་མཉམ་པར་ཤོགཿ ཿ