ཐུགས་སྒྲུབ་དཔལ་ཆེན་འདུས་པ་ལསཿ ཁྲག་འཐུང་རིགས་བཞིའི་སྒོས་དབངཿ

Previous Text Back to Volume Page Next Text

Wylie title	thugs sgrub dpal chen 'dus pa las: khrag 'thung rigs bzhi'i sgos dbang:
Location	'jigs gling bka' 'bum Volume 10, Text 58, Pages 689-703 (Folios 1a1 to 8a2)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Thugs sgrub dpal chen 'dus pa las khrag 'thung rigs bzhi'i sgos dbang. In Kun mkhyen rig 'dzin 'jigs med gling pa'i gsung 'bum, Vol. 10: 689-703. New Delhi: Shechen Publications, 2025.
Genre	Empowerment Ritual - dbang chog - dbang skur
Cycle	རིག་འཛིན་ཐུགས་སྒྲུབ་དཔལ་ཆེན་འདུས་པ་ (rig 'dzin thugs sgrub dpal chen 'dus pa)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Deity	dpal chen he ru ka

[edit]

འུྃཿ ཐུགས་སྒྲུབ་དཔལ་ཆེན་འདུས་པ་ལསཿ ཁྲག་འཐུང་རིགས་བཞིའི་སྒོས་དབང་བཞུགསཿ

༄༅། །རིགས་བཞི་ཧེ་རུ་ཀ་ལ་འདུདཿ དབང་བསྐུར་མ་རྫོགས་དོན་ལ་གཡེལཿ རྒྱལ་བུ་རྒྱལ་སར་མ་ཕྱིན་པཿ དེ་སྲིད་རྒྱལ་པོའི་མིང་མི་ཐོབཿ དེ་ལ་སྒོས་དབང་ཁྱད་པར་ནིཿ སོ་སོའི་དཀྱིལ་འཁོར་དབང་རྫས་རྣམསཿ འདུ་བྱས་རང་རང་གཞུང་བཞིན་བསྒྲུབཿ བུམ་པར་དམིགས་ཕྱེད་བསྐྱེད་བཟླས་བྱཿ སྡོམ་བཟུང་དཀྱིལ་འཁོར་བསྟན་པའི་རྗེསཿ བཀྲ་ཤིས་བུམ་པའི་མལ་དག་ཏུཿ གཤིན་རྗེའི་གཤེད་པོའི་བུམ་དབང་ནིཿ ཧོཿ ཡེ་ཤེས་ལྷུན་གྲུབ་བུམ་པ་ཡིཿ བརྟུལ་ཞུགས་དག་པའི་དབང་བསྐུར་བསཿ འཁོར་བ་རྣམ་དག་ཆོས་སྐུར་གསལཿ རང་བྱུང་ཡེ་ཤེས་དབང་ཐོབ་ཤོགཿ ཨེ་ཀ་ཡ་མ་གུ་ཧྱ་བྷ་ག་བོ་དྷི་ཙིཏྟ་ཧོཿ དེ་ནས་དུར་ཁྲོད་རྒྱན་གྱི་དབངཿ ཧོཿ གླང་ཆེན་སྟག་ཤམ་ཞིང་ལྤགས་སྦྲུལཿ ཐོད་པ་སྙིང་ཕྲེང་ཀེང་རུས་རྒྱནཿ མེ་རི་དུར་ཁྲོད་དབང་བསྐུར་བསཿ དྲེགས་པའི་སྟོབས་དང་ལྡན་པར་ཤོགཿ ཨེ་ཀ་ཡ་མ་ཧ་སྟི་མ་ཧཱ་ནཱ་ག་པཱ་ལི་ཙིཏྟ་ཛྭ་ལ་ནི་རི་ཧོཿ དེ་ནས་ཕྱག་མཚན་དབང་སྦྱིན་ལཿ ཧོཿ རྡོ་རྗེ་བེ་ཅོན་དུག་ལྔ་ཟིལ་གྱིས་གནོནཿ འཁོར་ལོ་གཏུན་ཤིང་གདུག་པ་གནས་སུ་འཇོམསཿ རལ་གྲི་སྡིགས་མཛུབ་དུག་གསུམ་སྐུ་གསུམ་རྫོགསཿ རིག་པ་སྟོབས་ཀྱི་སྒོ་གསུམ་དབང་ཐབ་ཤོགཿ ཨེ་ཀ་ཡ་མ་བྷི་ཧ་ཧུ་སྟིས་ར་ས་ཧོཿ མཉམ་པའི་བརྟུལ་ཞུགས་བམ་ཆེན་གྱི་དབང་ནིཿ ཧོཿ རྡོ་རྗེ་པདྨ་མཉམ་སྦྱོར་ནསཿ པདྨ་རཀྟ་བྱང་ཆུབ་སེམསཿ བམ་ཆེན་སྨེ་བའི་དོན་དང་སྦྱརཿ བརྟུལ་ཞུགས་རོལ་པའི་དབང་བསྐུར་བསཿ མི་ཟད་རྒྱན་གྱི་དབང་ཐོབ་ཤོགཿ ཨེ་ཀ་ཡ་མ་གུ་ཧྱ་རཀྟ་བོ་དྷི་ཙིཏྟ་ཧོཿ མཾ་ས་རཀྟ་ཙིཏྟ་ཧོཿ སྥུ་ཏ་ཀེཾ་ནི་རི་ཏི་ཧོཿ དཔའ་བརྟུལ་སྔགས་ཀྱི་གཟི་བྱིན་བསྐྱེདཿ ཧོཿ བམ་ཆེན་རོ་ལ་མཉམ་པར་རོལཿ རྡོ་རྗེ་བརྗིད་པའི་དབང་ཐོབ་ནསཿ བདེ་ཆེན་མཉམ་ཉིད་ཐོབ་པར་ཤོགཿ ཨེ་ཀ་ཡ་མ་ཨ་ཏི་པ་ཏི་སིདྡྷི་ཧོཿ ལོངས་སྤྱོད་དག་པའི་དབང་བསྐུར་ནིཿ ཧཱུྃཿ འཆི་མེད་རང་བྱུང་ར་ས་ཡནཿ བཀྲ་ཤིས་མཚན་ལྡན་ལྷག་པའི་རྫསཿ འཕེལ་འགྲིབ་མེད་པའི་དབང་བསྐུར་བསཿ རིགས་ལྔ་ཡེ་ཤེས་ལྔ་ཐོབ་ཤོགཿ ཨེ་ཀ་ཡ་མ་སརྦ་པཉྩ་ཨ་མྲྀ་ཏ་ཛྙཱ་ན་བུདྡྷ་ཧོཿ ཚེ་གལ་བྱིན་ནསཿ ཧོཿ བཀྲ་ཤིས་དངོས་གྲུབ་གའུ་རུཿ མི་འགྱུར་བརྟན་པའི་ཚེ་བསྐྱིལ་ནསཿ རང་རྟགས་ཚེ་ཡི་དབང་བསྐུར་བསཿ འཆི་མེད་བརྟན་པའི་དབང་ཐོབ་ཤོགཿ ཨེ་ཀ་ཡ་མ་ཨཱ་ཡུརྫྙཱ་ན་སིདྡྷི་ཧོཿ གཏོར་མ་གཏད་ནསཿ ཧོཿ སྣོད་ཀྱི་འཇིག་རྟེན་གཏོར་གཞོང་དུཿ བཅུད་ཀྱི་འཇིག་རྟེན་གཏོར་མར་གསལཿ འབྱུང་བ་རྣམ་ལྔ་གཏོར་མའི་རྒྱུཿ ལྷུན་གྲུབ་ཀུན་འབྱུང་གཏོར་མའི་རྒྱནཿ འཛིན་ཆགས་མེད་པའི་སྟོབས་ཀྱིས་རོལཿ ཨེ་ཀ་ཡ་མ་མ་ཧཱ་བ་ལིངྟ་པཱུ་ཛཿཧོཿ མནའ་ཆུ་བླུད་ལ་དམ་ཚིག་བསྒྲགཿ ཧོཿ སྣོད་མེད་བརྟུལ་ཞུགས་ཞན་པ་ལཿ སྤེལ་ཞིང་སྨྲས་ན་རྡོ་རྗེ་ཁྲོ་བོ་དངཿ གཏུམ་པོ་གནོད་སྦྱིན་མཁའ་འགྲོ་དབང་ཆེན་གྱིསཿ ལུས་འདྲལ་མགོ་གཤགས་ཙིཏྟ་ཁྲག་ཏུ་འཐུངཿ ཁྱོད་ཀྱི་རྡོ་རྗེ་འཆང་ཆེན་ང་ཡིན་པསཿ བཀའ་ཡི་ཟུར་ཡང་བཅག་པར་བྱ་བ་མིནཿ བསྒོ་བ་བྱོས་ལ་དམ་ཚིག་སྲོག་ལྟར་སྲུངསཿ གལ་ཏེ་འདས་ན་རྡོ་རྗེའི་དམྱལ་བར་ལྷུངཿ ཨེ་ཀ་ཡ་མ་དུ་ན་རཀྟཾ་ཧོཿ འདི་ནི་རྡོ་རྗེ་དམྱལ་བའི་ཆུཿ ཚུལ་འདི་བསྲུངས་ན་དངོས་གྲུབ་ཐོབཿ ཉམས་ན་ཙིཏྟ་གཤགས་ཏེ་འཕོཿ རྡོ་རྗེའི་ཆུ་འདི་ཁྱོད་ཀྱིས་ལོངསཿ བཛྲོད་ཀ་ཨི་དཾ་ཧོཿ རྗེས་ལ་ཚོགས་ཀྱི་འཁོར་ལོ་བྱཿ བམ་ཆེན་གསང་བའི་དབང་བསྐུར་ཏེཿ རྒྱུད་ཀྱི་ངེས་པ་ཁོ་ནའོཿ ས་མ་ཡཿ འུྃཿ རྟ་མཆོག་རོལ་པའི་སྒོས་དབང་ནིཿ ས་ཆོག་སྟ་གོན་གཞུང་བཞིན་ལཿ ཕོ་བྲང་ལྟེ་བའི་ལྷ་གནས་དངཿ བསྐྱེད་རིམ་རོལ་བའི་གཞུང་ལ་བརྟེནཿ བུམ་པར་དམིགས་ཕྱེད་བཟླས་པ་བྱཿ བུམ་དབང་ཡན་ཆད་གཞུང་ལྟར་ལཿ ལྷ་དབང་ཁྱད་པར་འདི་ལྟར་དབྱེཿ གཙོ་བོའི་སྐུ་སྤྱི་བོར་བཞག་ལཿ ཨེ་མ་གསང་མཆོག་གསང་བའི་བདགཿ རིག་པ་བདེ་ཆེན་རྒྱལ་བའི་ཡབཿ སངས་རྒྱས་ཀུན་འདུས་རྒྱལ་པོ་ཡིཿ སྐུ་གསུང་ཐུགས་ཀྱི་དབང་བསྐུར་བསཿ རིགས་ཀྱི་དབང་མཆོག་ཐོབ་པར་ཤོགཿ ཀྲོ་ཏ་དེ་ཝཱ་ཨ་ཨཿཨ་བྷི་ཥིཉྩ་ཧཱུྃཿ རྟ་མགོ་ལྔས་དབང་བསྐུར་ལཿ ཧཱུྃཿ དཔའ་བོ་ཡེ་ཤེས་སྒོ་སྲུང་ནིཿ ཟླ་གམ་འོད་ཀྱི་ཐིག་ལེ་ཆེཿ འབར་བའི་ཡེ་ཤེས་རྟ་མགོ་ལྔསཿ རྟ་མགྲིན་དབང་གི་སྐུ་ཐོབ་ཤོགཿ ཧྱ་གྷྲྀ་ཝ་ཛྙཱ་ན་ཧྲཱིཿཧྲཱིཿཧྲཱིཿཧྲཱིཿཧྲཱིཿཨ་བྷི་ཥིཉྩ་ཧཱུྃཿ གཤོག་པས་དབང་བསྐུར་ལཿ ཧཱུྃཿ གཡས་པ་རྡོ་རྗེའི་གཤོག་པ་བརྒྱད་དུ་གདེངསཿ གཡོན་པ་རིན་ཆེན་གཤོག་པ་བརྒྱད་དུ་གདེངསཿ སྟེང་དང་འོག་དང་བར་བར་ནཿ རྡོ་རྗེའི་ཐེའུ་གཤོག་རེ་རེས་བརྒྱནཿ གཤོག་པའི་དང་རུ་རྩེ་མཆན་ལཿ དབང་གི་སྤྲུལ་པ་ཆེན་པོ་ནིཿ བྱ་ཁྱུང་འབར་བའི་སྐུར་བསྟན་འདིསཿ དེ་རིང་ཁྱོད་ལ་དབང་བསྐུར་བསཿ ཀླུ་གཉན་འདུལ་བའི་དབང་ཐོབ་ཤོགཿ ཙིཏྟ་བཛྲ་ག་རུ་ཊ་ཨ་བྷི་ཥཉྩ་ཧཱུྃཿ དུར་ཁྲོད་ཆས་བརྒྱད་གཏད་ལཿ ཧཱུྃཿ དཔལ་གྱི་སྐུ་མཆོག་གཉིས་མེད་རོལ་པའི་སྟབསཿ དུར་ཁྲོད་ཆས་བརྒྱད་གསང་བའི་ངང་དུ་རོལཿ དུར་ཁྲོད་ཆེན་པོའི་དབང་མཆོག་འདི་བསྐུར་བསཿ ཏན་གན་རོལ་པ་རྟགས་ཆེན་དབང་ཐོབ་ཤོགཿ ཧཱུྃཿ ཀྲོ་དྷ་ཧུ་ལུ་ཧཱུྃ་ཕཊཿཨ་བྷི་ཥིཉྩ་ཧཱུྃཿ དཔལ་གྱི་ཆས་བརྒྱད་གཏད་ལཿ ཧཱུྃཿ དཔའ་བོ་ཏིང་འཛིན་རྣོན་པོ་སྟག་གི་ཆསཿ རྣོ་གདུག་ཟློག་བྱེད་རྒྱ་གྲམ་ལྕགས་ཀྱི་ཆསཿ ཤེས་རབ་ཏིང་འཛིན་རྡོ་རྗེ་འཆོལ་བའི་ཆསཿ དབང་གི་བསྭེ་ཁྲབ་དམར་པོ་གཟི་བརྗིད་ཆསཿ དཔའ་བརྗིད་མཉེན་ལྕུག་སྦྲུལ་ནག་རྒྱན་གྱི་ཆསཿ དབང་ཕྱུག་ཟ་བྱེད་ཏིང་འཛིན་མཆེ་བའི་ཆསཿ རྡོ་རྗེའི་སློག་པ་མཐིང་ག་ལེ་བརྒན་ཆསཿ སྡུད་བྱེད་གཅན་གཟན་གཏུམ་པ་གཟིག་གི་ཆསཿ བསྐུར་བས་རྣམ་ཐར་བརྒྱད་དང་ལྡན་པར་ཤོགཿ རྩ་སྔགས་མཐར། ཀརྨཱ་ཨ་བྷི་ཥིཉྩ་ཧཱུྃཿ ཕྱག་མཚན་རྣམས་གཏད་ལཿ ཧཱུྃཿ རྡོ་རྗེ་ཁ་ཊྭཱཾ་དྲིལ་བུ་ལྕགས་ཀྱུ་དངཿ སྦྲུལ་ཞགས་མཚོན་ཆ་འཁོར་ལོ་རལ་གྲི་འབརཿ རྡོ་རྗེའི་ཕྲེང་བ་ཐོད་ཁྲག་པདྨ་སྙིངཿ དབྱུག་པ་རྒྱ་གྲམ་བེ་ཅོན་མེ་དཔུང་འབརཿ ཏྲི་ཤུ་ལ་དང་ཁྱུང་ཁྲ་འབར་བ་ཡིསཿ རྒྱུད་དྲུག་རྩད་ནས་འབྱིན་པའི་དབང་ཐོབ་ཤོགཿ རྩ་སྔགས་མཐར་ མ་ཧཱ་མུ་དྲ་ཨ་བྷི་ཥིཉྩ་ཧཱུྃཿ ཡེ་ཤེས་སེམས་དཔའ་གཏད་ལཿ ཧཱུྃཿ ཐུགས་ཀར་སྦས་པ་གསང་བའི་ཡུམཿ རྒྱལ་བས་བསྔགས་པའི་གཟི་ལྡན་པདྨ་ཅནཿ གསང་མཛོད་ཡུམ་གྱི་དབང་བསྐུར་བསཿ ཤེས་རབ་ཕ་རོལ་ཕྱིན་མའི་དབང་ཐོབ་ཤོགཿ པདྨ་རཱ་ག་ཀྲོ་དྷ་མ་ཨ་བྷི་ཥིཉྩ་ཧཱུྃཿ གོ་ལ་མ་དྲུག་དང་ཡུམ་བཞི་གཏད་ལཿ ཧཱུྃཿ སྲིད་གསུམ་སྒྲོལ་ཞིང་ལས་མཛད་དམ་སྲུང་མཿ གདུལ་བྱ་དྲག་པོ་འདུལ་བའི་དབང་མོ་ཆེཿ གོ་ལ་མ་དང་ཡུམ་བཞིར་སྟོན་པ་སྟེཿ གསང་བའི་ལས་མཛད་མ་སྲིང་དབང་ཐོབ་ཤོགཿ མ་མ་རུ་ཙ་ཨ་བྷི་ཥིཉྩ་ཧཱུྃཿ ལོང་བ་རྒྱབ་འབྲེལ་གཏད་ལཿ ཧཱུྃཿ ཉོན་མོངས་དུག་གསུམ་ནད་ཀྱིས་གདུངས་པ་ཡིཿ བདུད་དང་སྲིན་པོ་མ་ལུས་འདུལ་བ་དངཿ ལས་ཀྱི་མཐའ་རྣམས་གྲུབ་པར་བྱ་བའི་ཕྱིརཿ མཁའ་འགྲོ་དམུས་ལོང་ཚོགས་ཀྱི་དབང་བསྐུར་བསཿ རྒྱབ་འབྲེལ་སུམ་ཅུ་རྩ་གཉིས་ལས་འཁོལ་ཤོགཿ ཁྱི་སྤྱང་རྣམས་གཏད་ལཿ ཧཱུྃྃཿ ཡུལ་བརྒྱད་གནས་སུ་དག་པ་ཁྱི་སྤྱང་ཚུལཿ འགུགས་འདྲེན་ལས་ཀྱིས་དཔལ་གྱི་ཐུགས་དམ་སྐོངཿ ཐོགས་མེད་སྒྲོལ་བའི་མཐུ་ལྡན་དབང་ཐོབ་ཤོགཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཨ་བྷི་ཥིཉྩ་ཧཱུྃཿ སྒོ་བ་བཞི་གཏད་ལཿ ཧཱུྃཿ ཡེ་ཤེས་དགུ་ཡི་དོན་ལྡན་ཞིངཿ ཐེག་པ་དགུ་ཡི་བྱེ་བྲག་ཚུལཿ མགོ་དགུ་ལ་སོགས་རྐང་གཅིག་ལྡནཿ སྒོ་བ་བཞི་ཡི་དབང་ཐོབ་ཤོགཿ ཛཿཧཱུྃ་བཾ་ཧོཿ ཨ་བྷི་ཥིཉྩ་ཧཱུྃཿ ཡི་གེ་འབྲུ་ལྔ་གནས་ལྔར་གཏད་ལཿ ཧཱུྃཿ ལྷ་ཡི་སྙན་དང་ལྷ་ཡི་སྤྱནཿ དེ་བཞིན་སྔོན་གནས་རྗེས་དྲན་སོགསཿ མངོན་ཤེས་ལྔ་ཡི་དབང་ཐོབ་ཤོགཿ ཨོཾ་ཨཱཿཧཱུྃ་སྭཱ་ཧཱཿཨ་བྷི་ཥིཉྩ་ཧཱུཾཿ དེ་ནས་དྲག་པོ་སྒྲོལ་བའི་དབངཿ རཱུ་པར་དགྲ་བགེགས་དགུག་ཅིང་གཞུགཿ ཕུར་པ་སློབ་བུའི་ལག་ཏུ་གཏདཿ ཧཱུྃཿ དབྱིངས་དང་ཡེ་ཤེས་དོན་གྱི་ཕོ་ཉ་དངཿ ཐབས་དང་ཤེས་རབ་རྟགས་ཀྱི་ཕོ་ཉ་མོཿ རྡོ་རྗེ་དབང་གི་ཕུར་པ་འདི་བྱིན་པསཿ ཡེ་ཤེས་དབྱིངས་ལ་ཕུར་པ་འདེབས་པར་ཤོགཿ རྩ་སྔགས་མཐར་ནྲྀ་ཏྲི་ཤ་ཏྲཱུན་མཱ་ར་ཡ་ཕཊཿ དེ་ནས་གོང་མའི་དབང་གསུམ་པོཿ གཞུང་བཞིན་བསྐུར་ལ་དམ་ཚིག་བསྒྲགཿ རྗེས་ཀྱི་བྱ་བ་སྤྱི་དང་མཐུནཿ ས་མ་ཡཿ འུྃཿ ཆོས་དབྱིངས་ཡང་དག་ཐུགས་རྡོ་རྗེཿ ཟླ་གམ་དགུ་པའི་སྒོས་དབང་ནིཿ ས་ཆོག་སྟ་གོན་གཞུང་བཞིན་ལཿ ཕོ་བྲང་ལྟེ་བའི་ལྷ་གནས་བསྒྱུརཿ མར་མེ་དགུ་དང་བྷནྡྷ་ནཿ དུམ་བུ་གཅིག་པར་ཞིང་རས་སྦྱརཿ གཙོ་བོའི་སྐུའམ་སྔགས་བྱང་བྲིཿ ལྡིང་ཁྲིར་བཀོད་ཅིང་དབང་རྫས་གཞནཿ གཞུང་བཞིན་བཤམས་ལ་མངོན་རྟོགས་བསྒོམཿ བུམ་དམིགས་ཕྱེད་པའི་བཟླས་པའང་བྱཿ རིགས་དབང་ལྔ་ཡན་གཞུང་བཞིན་ལཿ མཐའ་བརྟེན་བུམ་པའི་བཅུད་དབང་ནིཿ ཧཱུྃཿ སངས་རྒྱས་རྣམས་ནི་ཐམས་ཅད་ཀྱིཿ ཆོས་དབྱིངས་ཡུམ་གྱི་བུམ་པ་ནསཿ འདི་ཉིད་ལ་ནི་དབང་བསྐུར་བསཿ བག་ཆགས་མ་ལུས་དག་གྱུར་ཅིགཿ ཨོཾ་བཛྲ་ཨ་བྷི་ཥིཉྩ་ཧཱུྃཿ ཞེས་དང་ཐོད་སྐུ་སྤྱི་བོར་བཞགཿ ཧཱུྃཿ སངས་རྒྱས་ཀུན་གྱི་སྐུ་ཡི་དབངཿ ཕྱག་མཚན་རྡོ་རྗེ་ཀ་པཱ་ལཿ སྐུ་ཡི་དངོས་གྲུབ་ཐོབ་བྱེད་པཿ ཁྲག་འཐུང་ཡབ་ཡུམ་དབང་བསྐུར་རོཿ ཨོཾ་ཀ་པཱ་ལ་སིདྡྷི་ཧེ་རུ་ཀ་ཀ་པཱ་ལ་ཨ་བྷི་ཥིཉྩ་ཧཱུཾཿ སྤྱི་བོར་བཞག་པས་ཐིམ་པར་བསམཿ དྲིལ་བུའི་དབང་ནིཿ ཧཱུྃཿ སངས་རྒྱས་ཀུན་གྱི་གསུང་གི་དབངཿ ཤེས་རབ་དབྱངས་ཀྱི་རྗེས་འགྲོ་བཿ མཁའ་འགྲོ་སྒྱུ་མའི་སྙིང་པོ་འདིཿ གྲགས་སྟོང་གསུང་གི་དངོས་གྲུབ་ཐོབཿ ཝཱཀྐ་ཨ་བྷི་ཥིཉྩ་ཨཱཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃཿ ཞེས་འཁྲོལ་ཞིང་གཏད་ནས་སྒྲ་གྲགས་སྟོང་ལས་ཆོས་ཉིད་ཀྱི་དོན་ངོ་སྤྲདཿ རྡོ་རྗེ་གཏད་ལཿ ཧཱུྃཿ སངས་རྒྱས་ཀུན་གྱི་ཐུགས་ཀྱི་དབངཿ གཉིས་མེད་ཡེ་ཤེས་བསྐྱེད་པ་པོཿ རྡོ་རྗེ་ལྟ་བུའི་ཏིང་འཛིན་ནིཿ ཆོས་ཀྱི་རྒྱལ་པོར་དབང་བསྐུར་རོཿ ཙིཏྟ་སིདྡྷི་བཛྲ་ཨ་བྷི་ཥིཉྩ་ཧཱུྃཿ རྡོ་རྗེ་གཏད་དེ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེའི་ཆོས་བདུན་ལྡན་དུ་ངོ་སྤྲདཿ རྡོར་དྲིལ་ཟུང་འཇུག་ཏུ་གཏད་ནསཿ ཧཱུྃཿ ཐབས་དང་ཤེས་རབ་གཉིས་མེད་པའིཿ དམ་ཚིག་རྡོ་རྗེ་དྲིལ་བུ་འདིཿ ཡོན་ཏན་ཕྲིན་ལས་བསྒྲུབ་པའི་ཕྱིརཿ ཕྲིན་ལས་རྫོགས་བྱེད་དབང་བསྐུར་རོཿ ཨོཾ་བཛྲ་གཎྜེ་ཨ་བྷི་ཥིཉྩ་མཾཿ ཁ་ཊྭཱཾ་ཀ་དང་གསང་བའི་རྔེའུ་ཆུང་གཏད་ལཿ ཧཱུྃཿ ཧེ་རུ་ཀ་དཔལ་ཁ་ཊྭཱཾ་ཀཿ མཁའ་འགྲོ་འབོད་པའི་རྔེའུ་ཆུངཿ དཔའ་བོ་ཆེན་པོས་བླང་བར་བགྱིཿ ཁྱོད་ཀྱིས་ཀྱང་ནི་རྟག་ཏུ་ཟུངཿ མར་མེ་རྣམས་གཏད་ལཿ ཧཱུྃཿ སྐྱེ་མེད་དབྱིངས་ལས་ཡེ་ཤེས་ཆེཿ སེམས་ཅན་མ་རིག་མུན་པ་སེལཿ སེམས་ཉིད་འོད་གསལ་ཆོས་ཀྱི་དབྱིངསཿ གསལ་བྱེད་མར་མེས་དབང་བསྐུར་རོཿ ཨོཾ་བཛྲ་ཨ་ལོ་ཀེ་ཛྙཱ་ན་ཨ་བྷི་ཥིཉྩ་མཾཿ དེ་ལྟར་དབང་དྲུག་གི་བྱིན་རླབས་ལས་དབང་པོ་དྲུག་དང་སྐྱེ་མཆེད་ཕྱེད་པའི་རྣམ་པར་ཤེས་པའི་ཚོགས་དྲུག་འགགས་ནས་ཡེ་ཤེས་དྲུག་མངོན་དུ་གསལ་བ་ཡིན་ནོཿ ཞེས་རྟོགས་པ་བསྐྱེདཿ དེ་ནས་དག་བརྗོད་ནིཿ གལ་པོ་ལསཿ གཞལ་ཡས་ཁང་ཆེན་ཡེ་ཤེས་ཏེཿ འཁོར་འདས་མཉམ་པ་གྲུ་བཞི་པཿ སྒོ་བཞི་དྲན་པ་ཉེར་གཞག་བཞིཿ རྣམ་ཐར་བརྒྱད་ལྡན་རྟ་བབས་སོཿ རིན་ཆེན་སྒོ་སྟེ་ཐུགས་རྗེའི་ངངཿ ཡང་དག་སྤོང་བཞི་ཏྭ་ར་ནཿ དྲན་པ་ཉེར་གཞག་སྒོ་ཁྱུད་དངཿ རྫུ་འཕྲུལ་རྐང་བཞི་སྒོ་ཡི་ཁྱམསཿ ཕྲེང་བ་བྱང་ཆུབ་ཡན་ལག་བདུནཿ འཕགས་ལམ་བརྒྱད་ཀྱི་ཀ་བ་མཛེསཿ ལམ་གྱི་ཡེ་ཤེས་རྔ་ཡབ་དངཿ ཉོན་མོངས་ཚོགས་འཇོམས་མུ་ཏིག་ཕྲེངཿ དྲིལ་བུ་བ་དན་རླུང་བསྐྱོད་པཿ ཤེས་རབ་ཆོས་ཀྱི་སྒྲ་སྒྲོག་དངཿ ཆེ་བའི་ཡོན་ཏན་འདུས་པའི་རྟགསཿ བདུད་བཞི་འཇོམས་པའི་རྒྱལ་མཚན་དངཿ ཐོད་ཕྲེང་སྐུ་གསུམ་ཐོབ་པའི་རྟགསཿ གཞལ་ཡས་ཁང་མཆོག་དམ་པའོཿ བཅུ་ལྡན་ཡེ་ཤེས་དཔལ་ཡང་དགཿ གཉིས་ལྡན་ཟག་མེད་ཡུམ་གྱི་སྐུཿ རྣམ་ཤེས་བརྒྱད་དག་མཁའ་འགྲོ་བརྒྱདཿ སྣོད་བཅུད་ལྷ་དང་གཞལ་ཡས་ཁངཿ ཕུང་པོ་ལྔ་ལ་སོགས་པའི་ཆོསཿ དེ་ནི་སྤང་བར་བྱ་བ་ཡིནཿ ཐེག་པ་གསུམ་ནི་སྤང་བ་མིནཿ ཀ་ལི་ཏི་བཞིན་ཡོངས་སུ་ཟུངསཿ ཞེས་སོཿ དེ་ནས་བུམ་དབང་གི་དག་བརྗོད་ནས་བཟུང་དབང་གོང་མ་རྣམས་ནི་གཞུང་བཞིན་ལ་བཀའ་གཏད་དོར་ཏེ་དམ་ཚིག་བསྒྲགས་པས་མཐའ་བསྡུའོཿ ས་མ་ཡཿ འུྃཿ ཕུར་པ་ཕྲིན་ལས་སྒོས་དབང་ནིཿ ས་ཆོག་སྟ་གོན་ལྷ་གནས་བསྒྱུརཿ མངོན་རྟོགས་སྒོམ་དང་བུམ་བཟླས་ནསཿ རིགས་དབང་ལྔ་ཡན་སྤྱི་ལྟར་ལཿ མཐའ་རྟེན་བུམ་པའི་ཆུ་དབང་ནིཿ ཧཱུྃཿ དཔལ་ཆེན་རྡོ་རྗེ་གཞོན་ནུ་དངཿ ཡུམ་ཆེན་འཁོར་ལོ་རྒྱས་འདེབས་གཉིསཿ གཡོན་ནས་ཡུམ་གྱིས་ཡབ་ལ་འཁྱུདཿ ཕྱག་གིས་བུམ་པ་རབ་ཏུ་བླངཿ ཡེ་ཤེས་དབང་གི་ཆུ་བོ་འདིཿ ཉོན་མོངས་མ་གོས་དཀར་ལ་འཚེརཿ སྐལ་ལྡན་རིགས་ཀྱི་བུ་ཁྱོད་ལཿ སྤྱི་བོར་བུམ་པས་དབང་བསྐུར་བསཿ ཉོན་མོངས་གསུམ་དང་དུག་གསུམ་སྦྱངསཿ དབང་གི་ཆུ་བོ་རྒྱུན་བཞིན་འབབཿ ཨོཾ་བཛྲ་ཀཱི་ལི་ཀཱི་ལ་ཡ་དིཔྟ་ཙཀྲ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཀཱ་ལ་ཤ་ཨ་བྷི་ཥིཉྩ་ཧཱུྃཿ གཙོ་བོའི་སྐུ་སྤྱི་བོར་བཞག་ལཿ ཧཱུྃཿ ཀུན་ཏུ་བཟང་པོའི་རོལ་པ་ལསཿ ཐུགས་རྗེས་ཁམས་གསུམ་གདུག་པ་འདུལཿ གཉེན་པོ་ལས་སུ་རུང་མཛད་པའིཿ འཇིགས་བྱེད་གཉེན་པོའི་དབང་ཐོབ་ཤོགཿ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊཿ ཀཱ་ཡ་ཨ་བྷི་ཥིཉྩ་ཧཱུྃཿ དར་དམར་ལ་བྲིས་པའི་སྔགས་བྱང་མགྲིན་པར་གཏད་ལཿ ཧཱུྃཿ གསུང་གི་རང་བཞིན་མཚོན་བྱེད་པཿ ལེ་བརྒན་འབར་བའི་ཁ་དོག་ལཿ སྙིང་པོ་ནུས་པའི་དོན་དང་ལྡནཿ ནུས་པ་ཅན་གྱི་དབང་ཐོབ་ཤོགཿ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊཿ ཝཱཀྐ་ཨ་བྷི་ཥིཉྩ་ཧཱུཾཿ ཕུར་པ་སྙིང་གར་བཞག་ལཿ ཧཱུྃཿ ཙིཏྟ་དམར་པོའི་གཞལ་ཡས་ནཿ ཁམས་གསུམ་དབང་གི་བདག་པོ་སྟེཿ བརྐྱང་བསྐུམས་རབ་ཏུ་གདེངས་པ་ཡིསཿ གདུག་པ་འཇོམས་པའི་དབང་ཐོབ་ཤོགཿ རྩ་སྔགས་མཐར་ཙིཏྟ་ཨ་བྷི་ཥིཉྩ་ཧཱུྃཿ ཡོན་ཏན་དང་ཕྲིན་ལས་ཡེ་ཤེས་སེམས་དཔའི་ཙཀླི་སྙིང་གར་བཞག་ལཿ ཧཱུྃཿ ཐུགས་ཀ་རིན་ཆེན་ཟུར་བརྒྱད་ལཿ ཕྲིན་ལས་སྣ་ཚོགས་ལྷུན་གྱིས་གྲུབཿ ཐམས་ཅད་ཀུན་ལ་རང་བཞིན་གནསཿ ཡེ་ཤེས་སེམས་དཔའི་དབང་ཐོབ་ཤོགཿ རྩ་སྔགས་མཐར་གུ་ཎ་ཀརྨ་ཨ་བྷི་ཥིཉྩ་ཧཱུྃཿ དུར་ཁྲོད་རྒྱན་རྣམས་གཏད་ལཿ ཧཱུྃཿ གླང་ཆེན་སྟག་ཤམ་ཞིང་ལྤགས་སྦྲུལཿ ཐོད་པ་ཚར་གསུམ་བྱུག་རྫས་གསུམཿ རྡོ་རྗེའི་ཁྱུང་གཤོག་ལ་སོགས་པཿ དུར་ཁྲོད་དཔལ་ཆས་དབང་ཐོབ་ཤོགཿ དེ་ནས་རྡོ་རྗེ་སློབ་དཔོན་གྱི་དབང་ནིཿ རྡོར་དྲིལ་གཏད་ལ་དམ་ཚིག་གསུམ་བྱིན་ནསཿ ཧཱུྃཿ ཐབས་ཀྱི་སྤྱོད་པས་གཞན་དོན་དུཿ བྱམས་དང་སྙིང་རྗེས་གང་འདུལ་བཿ སངས་རྒྱས་ཕྲིན་ལས་རྫོགས་མཛད་པའིཿ དབང་དང་བྱིན་རླབས་འདིར་སྩོལ་ཏོཿ ཨོཾ་བོ་དྷི་ཙིཏྟ་ས་མ་ཡ་སྟྭཾ་ཨ་བྷི་ཥིཉྩ་མཾཿ ཞེས་རྟོགས་པ་བསྐྱེདཿ མཆོག་དབང་གོང་མ་གཞུང་ལྟར་བྱཿ དེ་ནས་སྨད་ལས་སྒྲོལ་དབང་ནིཿ སློབ་བུའི་ལག་ཏུ་ཕུར་པ་གཏདཿ ལས་དྲུག་རྣམ་དབྱེ་ལེགས་བཤད་ལཿ ཧཱུྃཿ དངོས་གྲུབ་བར་ཆད་བྱེད་པའི་བགེགསཿ སོགས་ཀྱིས་རཀྟ་ཚར་གསུམ་འབུལཿ རྩ་དུམ་རྒྱུད་ཀྱི་དགོངས་པའོཿ རྗེས་ཀྱི་ལས་རིམ་སྤྱི་དང་མཐུནཿ ས་མ་ཡཿ དེ་ནི་སོ་སོའི་སྒོས་དབང་གིསཿ སྨིན་པར་བྱེད་པའི་ལུགས་ཡིན་ཏེཿ དོན་ཚང་འཇུག་པ་བདེ་བའི་ཕྱིརཿ རྒྱལ་ཐབས་སྤྱི་བླུགས་ལྟར་བསྐུར་ནཿ ས་ཆོག་སྟ་གོན་ནས་བཟུང་སྟེཿ དཀྱིལ་འཁོར་ཆེན་པོར་འཇུག་པ་དངཿ རིགས་པའི་དབང་ལྔས་སྨིན་པའི་བརཿ གདན་གསུམ་ཚང་བའི་དཀྱིལ་འཁོར་ནིཿ ཞི་ཁྲོའམ་དཔལ་ཆེན་འདུས་པ་ལཿ བརྟེན་རྗེས་སོ་སོའི་དབང་སྒྲུབ་དངཿ འབྲེལ་བར་བུམ་དབང་རྗེས་འབྲང་རྣམསཿ ཁོལ་བུར་བཏོན་ནས་བསྐུར་པའི་མཐརཿ སྤྱོད་པ་དང་ནི་རིག་པ་དངཿ མཉམ་པའི་བརྟུལ་ཞུགས་ཅན་གསུམ་ལཿ མཆོག་དབང་གོང་མ་གསུམ་པོའི་དོནཿ བློ་དང་འཚམས་པར་བཀྲལ་ནས་སྟེརཿ དབང་ལ་རྡོ་རྗེའི་ཐེག་པ་ཡིཿ གཞི་ལམ་འབྲས་གསུམ་རྫོགས་པའི་ཕྱིརཿ རྒྱུད་ཀྱི་དངོས་པོ་བཅུ་ཤེས་ཤིངཿ བསྙེན་རྫོགས་རྟོགས་པས་རྒྱུད་གྲོལ་བའིཿ རྡོ་རྗེ་སློབ་དཔོན་ཁོ་ན་ལསཿ གཟུ་ལུམ་རང་དགར་སྤྱད་པ་ནཿ སློབ་མ་སྨིན་པ་ལྟ་ཅི་སྨོསཿ རང་གི་སྲོག་ལའང་ཧུར་ཐུམས་བྱེདཿ དེ་ཕྱིར་མཁས་པས་འཚོ་ཤེས་སྤྱོདཿ དུས་མཐར་གསང་སྔགས་འཆལ་བའི་དུསཿ རང་བྱུང་སྤྲུལ་པའི་རྡོ་རྗེ་དེསཿ རྒྱུད་དོན་གསལ་བར་བྱེད་པར་ཤོགཿ ས་མ་ཡཿ རྒྱ་རྒྱ་རྒྱཿ དགོངས་རྒྱཿ གཏེར་རྒྱཿ དྷ་ཐིམཿ སརྦ་མངྒ་ལཾཿ