ཡུམ་ཀ་བདེ་ཆེན་རྒྱལ་མོའི་ལོ་རྒྱུསཿ

Previous Text Back to Volume Page Next Text

Wylie title	yum ka bde chen rgyal mo'i lo rgyus:
Location	'jigs gling bka' 'bum Volume 10, Text 18, Pages 261-262 (Folios 1a1 to 1b6)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Yum ka bde chen rgyal mo'i lo rgyus. In Kun mkhyen rig 'dzin 'jigs med gling pa'i gsung 'bum, Vol. 10: 261-262. New Delhi: Shechen Publications, 2025.
Genre	History Texts - lo rgyus
Cycle	ཡུམ་བཀའ་བདེ་ཆེན་རྒྱལ་མོ་ (yum bka' bde chen rgyal mo)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)

[edit]

༄༅། །ཡུམ་ཀ་བདེ་ཆེན་རྒྱལ་མོའི་ལོ་རྒྱུས་བཞུགསཿ ཌཱཀྐི་ལ་ན་མོཿ ཆུ་མོ་སྦྲུལ་གྱི་ལོརཿ སྐུའི་དབེན་གནས་སྒྲགས་ཀྱི་ཡོངས་རྫོང་དུ་ཚོགས་ཀྱི་འཁོར་ལོ་སྟོང་རྩ་དང་ཿ མཁའ་འགྲོའི་མེ་མཆོད་སོགས་ཀྱི་ཆེད་གནས་འབྲེལ་དུ་ལྷགས་པ་ལསཿ རེ་ཞིག་ན་གཡོ་རུ་སྒྲགས་ཀྱི་གྲོང་མོ་ཆེ་དང་ཉེ་བ་མཚོ་རྒྱལ་བླ་མཚོར་སླེབས་པའི་ཚེཿ མྱོང་གྲོལ་བདུད་རྩིའི་ཕུར་མ་དང་ཿ མཚོ་དར་བཅས་ཕུལ་བ་སྲོག་ཆགས་འཛུལ་བ་ལྟར་དལ་རིམ་གྱིས་གཏིང་དུ་སོང་བའི་དར་མཇུག་མཚོ་ཁར་སྐྱ་ཡ་ལེར་བསྡད་སོང་བསཿ ངོ་མཚར་གྱི་སྣང་བ་ཅུང་ཟད་སྐྱེསཿ དེར་དག་པའི་ཤེས་པ་ལྷན་སྐྱེས་སུ་ཤར་ནས་ཐ་མལ་གྱི་སྣང་བ་སྤངས་པས་ཆུ་ལ་བཏུང་བ་དང་ཿ ཉེ་རེག་བྱས་པའི་ཚེཿ སྐད་ཅིག་དེར་བུང་བ་ཤིན་ཏུ་གནག་པ་མེ་ཏོག་ཨུཏྤ་ལའི་རྣམ་པ་ལྟ་བུ་ཞིག་འཕུར་ལྡིང་བྱེད་པ་དང་ཿ རྒྱུད་མངས་ཀྱི་སྒྲ་ལྟ་བུ་སྦོམ་ལ་འགྱུར་བ་ལན་གསུམ་སྒྲོགས་པའི་རྐྱེན་ལས་ཐ་མལ་གྱི་སྣང་བ་གཏད་མེད་དུ་སོང་ཿ སྣང་སེམས་ཆོས་ཉིད་གསུམ་འདྲེས་པའི་ཀློང་ནས་ཡེ་ཤེས་ཀྱི་མཁའ་འགྲོ་མ་སྐུ་མདོག་དམར་གསལ་རིན་པོ་ཆེ་དང་རུས་པའི་རྒྱན་དྲུགཿ མེ་ཏོག་གི་དོ་ཤལ་འཕྱང་འཕྲུལ་དུ་གཡོ་བ་ཞིག་གིསཿ རང་གི་མངོན་པར་རྟོགས་པའི་ཚོགས་སྙིང་པོ་དང་བཅས་པ་ལེགས་པར་བསྟན་ནསཿ མཁའ་འགྲོ་ང་ནི་ཆོས་སྐུའི་ཀློང་ནས་འོང་ཿ འགྲོ་དང་འོང་བའི་རྣམ་རྟོག་ཡོད་མ་ཡིནཿ བུ་མོ་ང་ནི་གནས་ཡུལ་ཉེར་བཞིའི་བདགཿ རྔ་ཡབ་དཔལ་རི་སྤྲུལ་པའི་ཞིང་ནས་འོང་ཿ བཀོད་པ་ལུས་ལ་སྔགས་ཀྱི་ཡོན་ཏན་རྫོགསཿ བུ་མོ་ང་ནི་དུས་གསུམ་རྒྱལ་བའི་ཡུམཿ ང་ལས་མ་སྐྱེས་དཀོན་མཆོག་གསུམ་ཡང་མེདཿ མཁའ་འགྲོ་ང་སྒྲུབས་སྐུ་གསུམ་དངོས་གྲུབ་ཐོབཿ གདུལ་བྱའི་འགྲོ་དོན་ལྷོ་ནུབ་ཕྱོགས་ལ་ཡོདཿ རྟེན་འབྲེལ་མ་འཆོལ་ལས་ཅན་སྐྱེས་བུའི་ཚེཿ ཐིག་ལེ་དྲུག་གི་ཀློང་དུ་ངས་ྈྈྈགསོས་བཏབཿ ཞེས་གསུངས་པའི་མོད་ལ་མཁའ་འགྲོ་གསང་བའི་ཡི་གེ་རྫུ་འཕྲུལ་གྱི་བཀོད་པ་ཟད་མི་ཤེས་པ་དང་གཉིས་སུ་མེད་པར་འདྲེས་ནས་སྙིང་གི་དབུས་སུ་ཐིམ་པར་བྱས་སོཿ དེའི་ཚེ་ཆོས་རྗེ་བྲག་ཕུག་པ་མདུན་ན་ཡོད་པ་ནན་གྱིས་བཏུད་ནས་གཟིགས་སྣང་ཅི་བྱུང་ཞེས་དྲི་བར་མཛད་པས་བཏང་སྙོམས་སུ་འཇོག་པའི་རྟེན་འབྲེལ་ནི་སདཿ གསང་བའི་དམ་ཚིག་ཞག་ལྔར་བསྲུངས་ནས་དམར་ཕྱོགས་ཀྱི་མཁའ་འགྲོ་འདུ་བའི་ཚེས་ལ་ཚོགས་དང་མཆོད་པའི་འདུ་བ་རྒྱ་ཆེན་པོ་དང་བཅས་ཡོངས་རྫོང་དུས་དགྲའི་དབང་པོའི་ཕོ་བྲང་དུ་རྟེན་འབྲེལ་ཟབ་མོའི་མཚམས་སྦྱོར་དང་བཅས་རྒྱ་ཁྲོལཿ