ཟངས་མདོག་དཔལ་རིའི་སྨོན་ལམ་དཔལ་རིའི་གསང་ལམཿ

Previous Text Back to Volume Page Next Text

Wylie title	zangs mdog dpal ri'i smon lam dpal ri'i gsang lam:
Location	'jigs gling bka' 'bum Volume 10, Text 10, Pages 197-200 (Folios 1a1 to 2b6)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Zangs mdog dpal ri'i smon lam dpal ri'i gsang lam. In Kun mkhyen rig 'dzin 'jigs med gling pa'i gsung 'bum, Vol. 10: 197-200. New Delhi: Shechen Publications, 2025.
Genre	Prayers - smon lam
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)

[edit]

༼ཏ༽ ཟངས་མདོག་དཔལ་རིའི་སྨོན་ལམ་དཔལ་རིའི་གསང་ལམ་ཞེས་བྱ་བ་བཞུགསཿ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃཿ རང་བཞིན་རྣམ་དག་བློ་བྲལ་གཉུག་མའི་སྦུབསཿ གསལ་མདངས་འགགས་མེད་བདེ་སྟོང་ལོངས་སྐུའི་རྩལཿ སྤྲུལ་སྐུའི་ཞིང་ཁམས་མི་མཇེད་བཀོད་པའི་ཆཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ འཛམ་གླིང་ས་ཡི་ལྟེ་བ་རྡོ་རྗེ་གདནཿ དུས་གསུམ་རྒྱལ་བས་ཆོས་འཁོར་བསྐོར་བའི་གནསཿ དེ་ཡི་ནུབ་བྱང་རྔ་ཡབ་ལངྐའི་གླིངཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ བཀོད་པ་ལྷུན་གྲུབ་ཙིཏྟའི་ས་འཛིན་སྤོཿ རྩ་བ་གདེངས་ཅན་འཇོག་པོའི་ཐོད་དུ་བཅིངཿ སྐེད་པར་ལུས་མེད་མཁའ་འགྲོས་ཚོགས་འཁོར་བསྐོརཿ རྩེ་མོ་གཟུགས་ཁམས་བསམ་གཏན་སྙོགས་པ་ལྟའིཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ རི་རྒྱལ་དེ་ཡི་རྩེ་མོའི་གཞལ་མེད་ཁངཿ ཤར་ཤེལ་ལྷོ་ཕྱོགས་དབང་སྔོན་བཻཌཱུརྱཿ ནུབ་ཕྱོགས་པད་རག་བྱང་ཕྱོགས་ཨིནྡྲ་ནིཿ ཕྱི་ནང་བར་མེད་ཟང་ཐལ་དབང་གཞུའི་མདངསཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ ཁྱམས་དང་གྲུ་ཆད་གློ་འབུར་འཇའ་རིས་འཁྱིལཿ འདོད་སྣམ་ཕ་གུ་དྲྭ་བ་དྲྭ་ཕྱེད་དངཿ ཤར་བུ་མདའ་ཡབ་སྒོ་རྒྱན་རྟ་བབས་ཅནཿ ཆོས་འཁོར་གདུགས་ཏོག་བརྡ་དོན་རྟགས་རྫོགས་པའིཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ དཔག་བསམ་ལྗོན་པའི་ཤིང་དང་བདུད་རྩིའི་ཆུཿ ནེའུ་སེང་སྨན་ལྗོངས་དྲི་བསུང་འཐུལ་བའི་ཁྲོདཿ དྲང་སྲོང་རིག་འཛིན་བྱ་ཚོགས་བྷྲ་མ་རཿ ཐེག་གསུམ་ཆོས་ཀྱི་སྒྲ་དང་བརྡ་གླུ་སྒྱུརཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ ཕོ་བྲང་གཞལ་མེད་ཆེན་པོའི་ལྟེ་བ་ལཿ རིན་ཆེན་ཟུར་བརྒྱད་པདྨ་ཉི་ཟླའི་སྟེངཿ བདེ་གཤེགས་ཀུན་འདུས་རང་བྱུང་པདྨ་འབྱུངཿ སྐུ་གསུམ་རིགས་འདུས་འཇའ་ཟེར་ཀློང་ན་བཞུགསཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ གང་གི་ཟབ་གསལ་བདེ་ཆེན་ཡེ་ཤེས་རྩལཿ སྟོང་ཉིད་སྙིང་རྗེར་ཤར་བའི་སྒྱུ་འཕྲུལ་ལསཿ ཕྱོགས་བཅུ་ཀུན་དང་ཁྱད་པར་བོད་ཡུལ་དུཿ སྤྲུལ་པ་བྱེ་བ་ཕྲག་བརྒྱ་བར་མེད་འགྱེདཿ ཟངས་མདོག་དཔལ་གྱི་རི་བོར་སྐྱེས་བར་ཤོགཿ གཡས་ཀྱི་གྲལ་ན་རྒྱ་བོད་རིག་འཛིན་རྣམསཿ འོད་གསལ་རྡོ་རྗེའི་རོལ་ངོར་འབྱམས་སུ་ཀླསཿ གཡོན་གྱི་གྲལ་ན་འཕགས་བོད་པཎ་གྲུབ་རྣམསཿ བཤད་སྒྲུབ་ཉམས་རྟོགས་བགྲོ་གླེང་ཆོས་སྒྲ་འུརཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ མཐའ་སྐོར་བར་མཚམས་རྗེ་འབངས་ཉེར་ལྔ་དངཿ སྤྲུལ་པའི་གཏེར་སྟོན་གྲུབ་པའི་ཁྱུ་མཆོག་རྣམསཿ ཐེག་པ་རིམ་དགུའི་འཁོར་ལོ་ལ་སྤྱོད་ཅིངཿ གཡོ་མེད་དགོངས་པའི་གཟེར་གྱི་བརྟུལ་ཞུགས་འཛིནཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ ཕྱོགས་བཞི་མཚམས་བརྒྱད་གྲུ་ཆད་བར་ཁྱམས་ཀུནཿ དཔའ་བོ་ཌཱཀི་ལྷ་དང་ལྷ་མོས་ཁེངསཿ རྡོ་རྗེའི་གླུ་གར་མིག་འཕྲུལ་ལྟ་བུར་གཡོཿ ཕྱི་ནང་གསང་བའི་མཆོད་སྤྲིན་སྟོབ་པར་བྱེདཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ དེ་སྟེང་ལོངས་སྐུའི་གཞལ་མེད་བཀོད་མཛེས་ནངཿ ཕྱག་ན་པདྨ་འཇིག་རྟེན་དབང་ཕྱུག་ལཿ ཚོམ་བུའི་དཀྱིལ་འཁོར་བསམ་ཡས་འཁོར་གྱིས་བསྐོརཿ རྣམ་རྟོག་བག་ཆགས་དགྲ་གདོན་ཐལ་བར་བྱེདཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ དེ་སྟེང་ཆོས་སྐུའི་ཞིང་ཁམས་ཉམས་དགའ་བརཿ གཞི་སྣང་ཡེ་ཤེས་སྙིང་པོ་ཀུན་ཏུ་བཟངཿ སྣང་མཐའ་རིག་པའི་འཁོར་ལ་བརྡ་ཆོས་སྟོནཿ སྟོན་འཁོར་དགོངས་པ་མཉམ་པའི་ཕྲིན་ལས་ཅནཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ སྒོ་བཞིར་བཀའ་ཉན་རྒྱལ་པོ་ཆེན་པོ་བཞིཿ ཕྱི་ནང་གསང་པའི་ལྷ་སྲིན་སྡེ་བརྒྱད་ཀུནཿ ཕོ་ཉར་མངགས་ནས་མུ་སྟེགས་དམ་སྲི་འདུལཿ དམ་ཅན་རྒྱ་མཚོ་དཔའ་རྟགས་རྒྱལ་རྔ་བརྡུངཿ ཟངས་མདོག་དཔལ་གྱི་རི་བོར་སྐྱེ་བར་ཤོགཿ དེ་ལྟར་ཞིང་གི་བཀོད་པ་གསལ་བཏབ་ནསཿ ཕྱི་རོལ་ཡུལ་ཀྱི་ཟངས་མདོག་དཔལ་རི་ལཿ ཡུལ་ཅན་ནང་གི་རིག་པས་སྨོན་དེའི་མཐུསཿ རང་ལུས་མི་མཇེད་ཞིང་གི་བཀོད་པའི་ནངཿ རང་སྣང་ཟངས་མདོག་དཔལ་རིར་མངོན་པར་ཤོགཿ ཁྱད་པར་བསྐྱེད་རྫོགས་ཟབ་མོའི་རྟེན་འབྲེལ་གྱིསཿ རྩ་གསུམ་འཁོར་ལྔའི་མདུད་པ་གྲོལ་ནས་ཀྱངཿ སྙིང་དབུས་ཟངས་མདོག་དཔལ་རིའི་ཕོ་བྲང་ཆེརཿ ལྷན་སྐྱེས་ཡེ་ཤེས་རོལ་པའི་རྩལ་རྫོགས་ནསཿ རང་རིག་པད་འབྱུང་རྗེ་དང་མཇལ་བར་ཤོགཿ ཚོགས་སྦྱོར་མཐོང་སྒོམ་མི་སློབ་ལམ་ལྔའི་སྦུབསཿ རབ་དགའ་ནས་བཟུང་ཀུན་ཏུ་འོད་ཀྱི་བརཿ དེ་ལ་རྡོ་རྗེ་ཐེག་པའི་ས་མཆོག་གཉིསཿ ཁྱད་པར་འོད་གསལ་རྫོགས་པ་ཆེན་པོ་ཡིཿ ཐུན་མོང་མ་ཡིན་ཡེ་ཤེས་བླ་མའི་སཿ བྱར་མེད་ལྷུག་པའི་ངང་དུ་རྫོགས་ནས་ཀྱངཿ གཞི་དབྱིངས་པདྨ་འོད་དུ་གྲོལ་བར་ཤོགཿ གལ་ཏེ་དགོངས་པའི་རྩལ་ཆེན་མ་རྫོགས་ནཿ གསོལ་འདེབས་སྨོན་ལམ་དྲག་པོའི་འཕེན་པ་ཡིསཿ ནམ་ཞིག་འཆི་བ་བཙན་ཐབས་བྱུང་བའི་ཚེཿ པདྨའི་ཕོ་ཉ་མཁའ་འགྲོ་གར་མཁན་མསཿ མངོན་སུམ་ལག་པའི་ཁུ་ཚུར་ནས་བཟུང་ནསཿ མཁར་ཆེན་བཟའ་དང་མཐོང་སྣང་སྣ་ཚོགས་ཡོད་པའི་ལུགས་ལྟར་བཤད་པ་ཡིན། གུ་ཎ་ནཱ་ཐ་ལྟརཿ བདག་ཀྱང་པདྨ་འོད་དུ་འཁྲིད་པར་ཤོགཿ ཆོས་དབྱིངས་རྣམ་པར་དག་པའི་བདེན་པ་དངཿ དཀོན་མཆོག་རྩ་གསུམ་རྒྱ་མཚོའི་ཐུགས་རྗེ་ཡིསཿ བདག་གི་སྨོན་པ་ཡིད་བཞིན་འགྲུབ་གྱུར་ནསཿ འགྲོ་བ་འདྲེན་པའི་དེད་དཔོན་བྱེད་པར་ཤོགཿ