ཕུར་པ་རྒྱུད་ལུགས་ལས་ཆོས་འབྱུང་ངོ་མཚར་སྣང་བྱེད།

First text in volume. Back to Volume Page Next Text

Wylie title	phur pa rgyud lugs las chos 'byung ngo mtshar snang byed
Location	'jigs gling bka' 'bum Volume 9, Text 1, Pages 1-12 (Folios 1a1 to 6b6)
Author	འཇིགས་མེད་གླིང་པ་
Less details More details
Citation	'jigs med gling pa. Phur pa rgyud lugs las chos 'byung ngo mtshar snang byed. In Kun mkhyen rig 'dzin 'jigs med gling pa'i gsung 'bum, Vol. 9: 1-12. New Delhi: Shechen Publications, 2025.
Genre	Religious History Texts - chos 'byung
Cycle	ཕུར་པ་རྒྱུད་ལུགས་ (phur pa rgyud lugs)
Deity	rdo rje phur pa
Colophon	།ཅེས་པའང་རིག་འཛིན་འཇིགས་མེད་གླིང་པས་གསང་རྒྱ་གྲོལ་ནས་ཡི་གེ་སྔ་མ་ལས་ཞིབ་ཏུ་བསྣན་པའོ། །དགེའོ། །དགེའོ། །དགེའོ། །མངྒ་ལཾ།།
Colophon	ces pa'ang rig 'dzin 'jigs med gling pas gsang rgya grol nas yi ge snga ma las zhib tu bsnan pa'o/_/dge'o/_/dge'o/_/dge'o/_/mang+ga laM//

[edit]

༄༅། །ཕུར་པ་རྒྱུད་ལུགས་ལས་ཆོས་འབྱུང་ངོ་མཚར་སྣང་བྱེད་ཅེས་བྱ་བ་བཞུགས། །

༄༅། །བཅོམ་ལྡན་འདས་ཕྲིན་ལས་ཀྱི་བདག་ཉིད་ལ་ཕྱག་འཚལ་ལོ། །ཕུར་པ་རྒྱུད་ལུགས་ཀྱི་ལོ་རྒྱུས་ལ་སྔོན་བྱུང་རྒྱུད་ཀྱི་ལུགས་དང་། ཕྱིས་བྱུང་མན་ངག་གི་ལུགས་སོ། །དང་པོ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཟག་པ་མེད་པར་མཉམ་པར་བཞག་པའི་ཚེ། རྡོ་རྗེ་འཛིན་པས་འདི་སྐད་ཅེས་བསྐུལ་ཏོ། །བདེ་ཆེན་ཞི་བ་ཆོས་ཉིད་མཆོག །སྟོན་པ་རྡོ་རྗེ་ཆོས་ཉིད་ཀྱིས། །ཨེ་མ་ཧོ་འདུལ་བར་འགྱུར་བ་ཡིན། །དེ་ལས་ལོངས་སྤྱོད་རྫོགས་པའི་སྐུ། །འཇིགས་བྱེད་ཆེན་པོའི་སྐུར་བཞེངས་ལ། །གདུག་པའི་ཚོགས་རྣམས་གདུལ་དུ་གསོལ། །ཞེས་བསྐུལ་བས། བཅོམ་ལྡན་འདས་འཇིགས་བྱེད་ཆེན་པོའི་སྐུར་བཞེངས་ཏེ། ཐུན་མོང་མ་ཡིན་པའི་མཚན་མཆོག་གིས་མངོན་པར་སྤྲས་པའི་སྐུ་དེས། འོག་མིན་གྱི་གནས་ལྕང་ལོ་ཅན་གྱི་ཕོ་བྲང་དུ། འཁོར་སེམས་དཔའ་དང་སེམས་མ་རྣམས་ལ་དམ་ཆོས་བདུད་རྩི་ཕུར་པའི་ཆོས་རྣམས་སྐུའི་སྒོ་ནས་འཇལ་བར་བསྟན་ཏེ། འཁོར་བའི་སྤོང་སྒྲིབ་ལས་ཀུན་རྣམ་པར་སྤངས་ཏེ་གྲོལ་བའི་ས་ལ་ལེགས་པར་གནས་སོ། །ཐུགས་རྗེའི་སྟོབས་ཀྱིས་ཕྱག་ན་རྡོ་རྗེས་མངོན་པར་བསྡུས་ཏེ། ཡང་སྙིང་འབྲུ་དགུའི་ཚུལ་དུ་ཐུགས་ཀར་བསྟན། དེ་ནས་སེམས་དཔའ་རྡོ་རྗེ་ཉིད་ཀྱིས་འདོད་ཁམས་མཐོང་བའི་ལམ་དུ་གྱུར་པ་རྣམས་ལ་དེ་མངོན་པར་བརྟག་པར་བྱ་བའི་ཕྱིར་ཕྱག་ན་རྡོ་རྗེ་ལ་བསྐུལ་ཏེ། འདོད་ཁམས་གནས་རིགས་ཉི་ཤུའི་སྟོན་པར་གཤེགས་སོ། །ཞེས་པས་མཚོན་ཏེ་རྒྱུད་སོ་སོའི་གླེང་གཞི་ལ་འཇུག་པ་ལྟར་རོ། །གཉིས་པ་ནི། སློབ་དཔོན་ཆེན་པོ་པྲ་བྷ་ཧསྟི་དང་། བི་མ་ལ་དང་། པདྨ་སམྦྷ་ཝ་ལ་སོགས་སངས་རྒྱས་ཀྱི་ས་ལ་བཞུགས་པའི་རིག་འཛིན་རྣམས་ཀྱིས་རྒྱུད་ལས་མན་ངག་ཏུ་བཏུས་ནས་རྣམ་པར་རིག་བྱེད་ཀྱི་བདག་རྐྱེན་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་ཞིག་ལས་ཅན་སོ་སོར་བཀའ་བབས་པའི་དོན་འགོག་ལམ་གྱི་བདེན་པའི་འབྲས་བུའི་ངོ་བོ་ཉིད་དུ་གྲུབ་པ་འཕགས་ཡུལ་ཆོས་ཀྱི་གན་མཛོད་ནས་གངས་རིའི་ཁྲོད་དུ་བཙད་པོ་ཁྲི་སྲོང་ལྡེ་བཙན་གྱི་ཐུགས་བསྐྱེད་ལ་བརྟེན་ནས་མངོན་སུམ་དུ་སྣང་ཞིང་། དངོས་གྲུབ་ཐོབ་པའི་བརྒྱུད་པ་ཟམ་མ་ཆད་ལ་ཕུར་པ་རྒྱལ་པོ་ལུགས་དང་། ཇོ་མོ་ལུགས་དང་། ལྕམ་ལུགས་གཙོ་བོར་གྱུར་པའི་བཀའ་བབས་ཀྱི་ངེས་པ་ཐ་དད་མོད། དེ་དག་ལས་དང་པོ་ནི། རྒྱ་གར་གྱི་པཎྜི་ཏ་ཤྲཱི་ཛྙཱ་ན་དང་། སློབ་དཔོན་ཆེན་པོ་དང་། ལོ་ཙཱ་བ་དཔལ་གྱི་ཡེ་ཤེས་ཀྱིས་བསྒྱུར་བ་རྡོ་རྗེ་བཀོད་པ་རྣལ་འབྱོར་ཆེན་པོའི་རྒྱུད་ལེའུ་བཅོ་ལྔ་པ་མངའ་བདག་རྒྱལ་པོའི་ཐུགས་དམ་དུ་བཞག་པ་ཉིད་ལུགས་སྲོལ་འདིའི་བརྟེན་པའི་གཙོ་བོའི་མངོན་རྟོགས་ཀྱང་དེའི་ལུགས་སོར་བཞག་དང་། རྟེན་དང་བརྟེན་པ་གཞན་རྣམས་ནི་ཡེ་ཤེས་རྩེ་མོ་དང་། རྡོ་རྗེ་ཁྲོས་པ་ལ་སོགས་པའི་རྒྱུད་དོན་སྒྲུབ་ཐབས་ལ་འཇུག་ཆེ་བའི་ཆ་བསགས་ཤིང་། འཇུག་སྒོ་དབང་གིས་མཚོན་པའི་ཕྲིན་ལས་ཀྱི་རིམ་པ་ཇི་སྙེད་ནི་རྩ་རྒྱུད་དང་རྣལ་འབྱོར་ཆེན་པོ་ལ་སོགས་པ་རྒྱ་ཆེ་ལ་དོན་ཟབ་པའི་ནང་ནས་བསྡུ་བ་བྱས་པའི་ཕྱིར་ན་གཙོ་བོའི་མངོན་རྟོགས་ལས་ཕུར་པ་རྒྱལ་པོ་ལུགས་ཀྱི་རྩ་བར་འདི་ཉིད་གཟུང་ངོ་། །ཇོ་མོ་ལུགས་ནི། སློབ་དཔོན་ཆེན་པོ་གཤེགས་ཁར་ཉུང་ལ་འདུས་པ་ཕུར་པ་རྩ་དུམ་གྱི་དོན་རྡོ་རྗེ་ཁྲོས་པ་རྩ་བཤད་གཉིས་ཀྱིས་བཀྲལ་ནས་མཁར་ཆེན་བཟའ་ལ་བསྟན་པས། ཇོ་མོས་མོན་ཁ་སེང་གེ་རྫོང་དུ་དཀྱིལ་འཁོར་རྣམ་པ་གསུམ་ལ་བརྟེན་ནས་བསྒྲུབས་པས་བདུན་གསུམ་ནས་ཕུར་པ་ཐམས་ཅད་བཞད་ཅིང་། འཕར་གཡོ་དང་འོད་འཕྲོ་བ་བྱུང་། ཕ་མེས་ཀྱི་ཟ་འདྲེ་ལ་གདབ་པའི་ཕྱིར་བསྙེན་ཕུར་དྲིལ་བས་ནམ་མཁའ་ལ་དེང་ངེ་སོང་ནས་ཟ་འདྲེ་གནས་པའི་རྟེན་དང་བརྟེན་པ་ཚར་བཅད། ཕུར་པ་དེ་ཇོ་མོའི་དབོན་བརྒྱུད་རྣམས་ཀྱིས་གདེངས་པས་ཆོག་པ་བྱུང་བས་མཁར་ཆེན་འདྲེ་འདུལ་གྱི་བརྒྱུད་པར་གྲགས། ཇོ་མོས་རང་གི་མིང་པོ་དཔལ་གྱི་གཞོན་ནུ་ལ་བཤད། དེས་ལོ་རྒྱལ་བའི་བློ་གྲོས། དེས་མི་བུ་རྒྱལ་བའི་སྙིང་པོ། དེས་འབྲེ་ཤེས་རབ། དེས་འབྲེ་ས་ལེ། དེས་ལག་ལྷག་རྡོ་རྗེ་བྱང་ཆུབ་ལ་བཤད་དེ་བསྒྲུབས་ཀྱང་ནུས་པ་མ་བྱུང་། དེའི་ཚེ་ཁོས་ཆོས་ལ་ཐེ་ཚོམ་མ་ཟོས། རང་ཉིད་ལས་འཕྲོ་ཞན་པར་རྟོག་པས་རྟེན་འབྲེལ་མ་ལོག་མཁར་ཆེན་བཟའི་དངོས་སློབ་ཨ་ཙཱར་ས་ལེ་ཞེས་བྱ་བ་ཕུར་པ་གདེངས་པས་གཙང་ཆུ་ཡན་མན་དུ་ཆད་ཅིང་ཚེའི་རིག་འཛིན་ཐོབ་པ་དེ་དང་འཕྲད་པར་སྨོན་ལམ་བཏབ། དེའི་ཕྱོགས་སུ་མགོ་བསྟན་ནས་ཉལ་ཞིང་བསྒྲུབས་པས་ཨ་ཙཱར་ས་ལེ་མུ་ཏོ་བར་བརྫུས་པ་ཡར་འབྲོག་ཁོར་རེར་བྱུང་ནས་ལག་ལྷག་ལ་སྐྲུ་བ་བྱས་པས། ཨ་ཙཱར་ས་ལེར་དོགས་ནས་ཁྱེད་རང་འདིར་བཞུགས། ད་ལྟ་སྐྱ་ནམ་ངན་པས་ཟས་མི་རྙེད་བྱས་ཏེ་དབྱར་ཐོག་གྲོ་སྟབས་ཆོས་ཞུ་བ་སྐད་མ་བྱས་པ་ཡོད་ཙ་ན། སྟོན་སེར་བོན་པོའི་རྔ་གཤང་ཐོས་ནས་སྒྲུབ་ལ་འགྲོ་ཆས་པ་ལ། ཁྱེད་རང་ད་དུང་བཞུགས། ང་ཕ་སྤུན་དགྲར་ལངས་པ་གཅིག་ཡིན་པས། ང་ཡི་ཡུལ་ཞིང་ནི་ཁོང་ཚོས་འཕྲོག་ན། འདི་ཀུན་ཟད་པར་བྱས། དེ་ནས་ང་ཡང་ཁྱེད་དང་སྡོང་བྱས་པས། ཨ་ཙཱར་ན་རེ། དེ་ཚར་གཅོད་པའི་གདམས་ངག་ང་ལ་ཡོད་ཟེར་ནས་ཕྱིང་ཁུག་ནང་ནས་བེ་བུམ་དང་། ཕུར་པ་བཏོན་ནས་མན་ངག་ཇི་ལྟ་བ་བཞིན་བྱིན་ནོ། །དེར་ལག་ལྷག་གིས་བསྒྲུབས་པས་ཤིང་སྡོང་བོ་བཅོ་ལྔ་སྟྭ་རེས་བཅད། གཅིག་ཕྱེད་ཙམ་ཆོད་ཙ་ན་གཉིད་སད། རང་གི་མ་ལ་དགྲ་ལ་མཐུ་རྟགས་འོང་ཞེས་སྨྲས། དེའི་ཚེ་ཕ་ཚན་རྣམས་ལག་ལྷག་གིས་མཐུ་བྱས་དོགས་ནས་གསོད་པའི་གྲོས་བྱེད་ཅིང་། ར་བསད་པའི་ཤ་བསྡུ་ཚགས་བྱེད་ཙ་ན་ཁང་པ་རྡིབ་ནས་མི་བཅོ་ལྔ་ཤི། གཅིག་རྐང་པ་ཆག །གཤིན་རྗེའི་མཐུ་མཁན་ལ་འཇིགས་པ་དགེ་བཤེས་ར་ལོ་ཙཱ་བ་ཡང་སྐྲག་པར་བྱས་པས་གཤིན་རྗེ་མཁན་པོ་ཕུར་པ་ལ་རྡུགས་ཞེས་གྲགས། དེའི་ཐུགས་ཀྱི་སྲས་བཞི་ནི། ཉང་བེར་སྔོན་ཅན། ཀྱི་གྱང་འགྱེལ། སྐྲངས་ཕུར་བུའི་མགོ །སྣ་ནམ་ཤེས་རབ་ཚུལ་ཁྲིམས་བཞི་ལས། ཉང་ལ་ཡིག་ཆུང་ཅན་གྱི་ལུགས་སུ་གནང་བའི་ཚུལ་ནི། ཉང་གི་སློབ་དཔོན་གྱི་ཇོ་མོ་དང་མཛའ་བར་བྱས་པས་མོས་ཇོ་བོའི་ཐུགས་དམ་རྩ་དུམ་བྱ་བ་ལ་བྱེད། འཁོར་གྱི་སྔགས་ཅན་དེ་མིན་བྱས་པས་ཁོས་སློབ་དཔོན་གྱི་དཔེ་སྣོད་དོམ་སྒྲོའི་ཞབས་བརྟོལ་ནས་དཔེ་བརྐུས་ཏེ་བྲིས་པ་སློབ་དཔོན་གྱིས་མཁྱེན་ནས་དམ་ཉམས་བཀའ་རྐུན་ཁྱོད་དང་ང་མི་འགྲོགས་གསུངས། དེར་ཉང་ནད་དྲག་པོས་ཐེབས་པ་ལ། བར་པ་བཏང་གིན་བཤགས་པ་བྱེད་བྱས་ཀྱང་མ་གནང་། ཡང་ཡང་ཞུས་པས། ད་འོ་ན་དབེན་རྩེའི་ཕ་ལོགས་ལ་དབེན་རྩ་བརྩིགས། ཤ་ཁོག་བརྒྱའི་གཏོར་མ་ཐོང་། ཁྲབ་བརྒྱ་ཐམ་པས་བཤགས་པ་གྱིས་གསུངས་པ་ལྟར་བྱས་པས་ནད་ལས་ཐར། ད་གདམས་ངག་ཞུ་བྱས་པས། ཁྱོད་དང་འཕྲད་དུ་མི་རུང་གསུངས་ནས་ཡིག་ཆུང་བྱས་ཀྱིན་བྱིན། དེ་ལ་དྲི་བ་དྲིས་ལན་མང་དུ་བྱུང་བས་ཉང་གི་ཡིག་ཆུང་ཅན་གྱི་ལུགས་སུ་གྲགས། ཁོས་བཀའ་བརྐུས་པས་བཀྲ་མི་ཤིས་པ་ཡིན་སྐད། སྐྲངས་ཕུར་བུ་མགོ་ལ་གནད་ཚུལ་ནི། སློབ་མས་བླ་མ་བཙལ། བླ་མས་སློབ་མ་བཙལ་བས། ཁོ་མགོ་བོ་རྒྱ་མདུད་ལ་སོགས་ཕུར་པ་བསྒྲུབ་པའི་མཚན་དང་ལྡན་པར་གཟིགས་ནས། དཀྱུས་ལ་གདམས་ངག་མཆན་དུ་བཏབ་ནས་གནང་བས། སྐྲངས་མཆན་ཊིཀ་ཅན་གྱི་ལུགས་ཞེས་གྲགས། ཀྱི་གྱང་འགྱེལ་ནི། རྒན་པོ་བློ་བརྟུལ་བ་ཡིན་པས་མ་འཁྲུགས་པར་བཤད་པས་ནོར་བུའི་ལུགས་སུ་གྲགས། །ཁོ་རྟོག་པ་ཉུང་བས་ཕུར་ཚུགས་སུ་སྒྲུབས་པས་གྲུབ་སྟེ། དགྲ་རྣམས་གྱང་གི་རྩ་བར་ཉི་མ་འདེ་བ་ལ་ཕུར་པ་འཕངས་པས་གྱང་འགྱེལ་ཏེ་ཐམས་ཅད་ཤི་བས་དེ་ལྟར་དུ་གྲགས། སྣ་ནམ་ལུགས་ནི། ཁོང་ཤེས་རབ་ཆེ། བླ་མའི་ཐུགས་ཀྱིས་ཀྱང་ཟིན་པས། གདམས་ངག་ཐམས་ཅད་ཞལ་ནས་གསུང་པས་གསུང་སྒྲོས་ཟིན་ཅིང་གནད་ལ་ཕོག་པའི་སྣ་ནམ་གདམས་ངག་ཅན་གྱི་ལུགས་ཞེས་གྲགས་ཏེ། ཡིག་ཆ་མཛད་པའང་ཤིན་ཏུ་དཔྱད་བཟོད། རྒྱུད་ལུགས་འདིའང་རྒྱུད་ཀྱི་ཁོག་ཕུབ། མན་ངག་སྣ་ནམ་ལུགས་དང་བསྟུན་པས་གཞན་ལ་མེད་པའི་གདམས་ངག་གོ །སྤྱིར་སྣ་ནམ་ལ་ལུགས་གཉིས་ཡོད་དེ། དྷ་ཏི་རྒྱས་འབྲིང་ལ་བརྟེན་པ་ཀྱི་སྐོར་དང་། ཞལ་གདམས་རྣ་བརྒྱུད་ལ་བརྟེན་པ་རིན་ཆེན་ཕྲེང་བའི་ལུགས་སོ། །དེ་ལྟར་བཞི་པོ་ལ་མི་ཐེ་བའི་སྤྱང་ཀིར་ཆུང་ཞེས་པ་ལས་བརྒྱུད་པའང་ཡོད་དོ། །ཡང་ཕུར་པ་ལྕམ་ལུགས་སུ་གྲགས་པ་ནི། ཅོག་རོ་བཟས་སློབ་དཔོན་དངོས་ལ་ཐུག་ཀྱང་། སློབ་དཔོན་གྱིས་ནམ་མཁའ་ལ་དཀྱིལ་འཁོར་སྤྲུལ་པའི་ཚེ། དབང་ཡི་དམ་ལ་ཞུས་པས་ཡི་དམ་སློབ་དཔོན་གྱི་ཐུགས་ཀར་བསྡུས་པས་སྐལ་བ་ཆད། སླར་ཇོ་མོ་མཚོ་རྒྱལ་ལ་རྗེས་སུ་གནང་ནས་ཇོ་མོས་ཅོག་རོ་བཟའ་ལ་གདམས་པ་ལས་བརྒྱུད་པའོ། །ཕུར་པ་ལྷ་ནག་ནི། ཨོ་རྒྱན་ཡབ་ཡུམ་ནས་འབྲེ་ཨ་ཙཱརྱ་ས་ལེ། ལག་ལྷག་ནས་རིམ་པར་ཡར་འབྲོག་པ་གུ་རུབ་ཡང་དག །འདིས་རྫོགས་རིམ་གཙོ་བོར་འདོན་པ་ཕུར་པ་མྱང་འདས་ཀྱི་རྒྱུད་ཆེན་པོ་ལ་བརྟེན་ནས་ལྷ་ཐམས་ཅད་ནག་པོར་མཛད་པས་ལྷ་ནག་ཏུ་གྲགས་ལ། གཞན་རྒྱུད་སྡེ་ཕལ་ཆེར་མཐུན་པ་ལྷ་ཁྲ་ཤས་ཆེ། དེས་གྲུབ་ཐོབ་སྐོར་ཆུང་ལ་བཤད། དེས་རྒྱ་སྟོན་ཇོ་གདོང་། རྒྱ་ཆོས་བཀྲས། རྒྱ་ལམ་གྲགས་སོགས་ལ་བཤད་པས་བླ་མ་རྒྱའི་ལུགས་ཞེས་གྲགས། གཞན་ཡང་ཁྱུང་པོ་དང་། འགོས་དང་། རམ་དང་། དཔྱལ་དང་། སོ་དང་། ཟུར་དང་། གནུབས་དང་། གུར་དང་། རོག་དང་། རོང་ལུགས་ལ་སོགས་ཏེ་བརྒྱུད་ཚུལ་ཐ་དད་ཅིང་། དེ་དག་ཐམས་ཅད་ཀྱང་མཆོག་གི་དངོས་གྲུབ་ཐོབ་པ། ཐུན་མོང་ཙམ་དུའང་དགྲ་ཐུལ་བ་དང་། སྲིའུ་གསོས་པ་དང་། ལྷ་མ་སྲིན་བྲན་དུ་འཁོལ་བ་སོགས་མངོན་རྟགས་གཞན་ལས་མྱུར་བ་བྱུང་བས། གསར་མ་མཁན་པོ་རཾ་ལ་སོགས་པས་ཀྱང་། དགྱེས་རྡོར་རམ་རྗེ་བཙུན་མ་ཆོས་ཟབ་ཀྱང་བྱིན་རླབས་ཕུར་པ་འདི་ལས་ཆེ་བ་མེད་ཅེས་བསྒྲགས་ཤིང་། གསར་མ་མ་དར་གོང་དུ་བོད་སྤྱིའི་ཡི་དམ་ཡང་ཕུར་ཁོ་ན་ཡིན་པས་བརྒྱུད་པ་རབས་སུ་བསྔགས་འོས་པ་ཤ་སྟག་བྱུང་། ཁྱད་པར་ཕུར་པ་འདི་སངས་རྒྱས་ཐམས་ཅད་ཀྱི་ཕྲིན་ལས་ཀྱི་བདག་ཉིད་ཡིན་པས། ཕུར་པ་མཁན་པོ་ཚེ་རིང་། ལོངས་སྤྱོད་ལྡན། མཐུ་ཆེ་ཟེར་བ་ལྟར་སྔོན་བྱུང་དང་བསྟུན་ན་སློབ་དཔོན་ཆེན་པོས་ཙནྡན་གྱི་ནགས་ལ་མེ་ཤོར་བ་ལ་བསྡིགས་པས་ནགས་ཚལ་སྔར་བཞིན་གྱུར། བི་མ་ལས་གངྒཱ་གྱེན་དུ་ལོག་པ་ལ་གདེངས་པས་ཀླུང་ཆེན་ཡན་མན་དུ་ཆད། བལ་པོ་ཤཱི་ལ་མཉྫུས་བྲག་མཁར་གོང་ཅན་ལ་གདེངས་པས་བྲག་རི་དུམ་བུར་སོང་། ཇོ་མོ་མཁར་ཆེན་བཟས་སྤྱང་ཀིའི་རྗེས་ལ་བཏབ་པས་སྤྱང་ཀི་རྦབ་ཏུ་ཤོར། མེ་ནུ་རྒྱལ་བའི་སྙིང་པོས་བྱ་རོག་གིས་ཕྲེང་བ་ཁྱེར་བ་ལ་བསྡིགས་པས་བྱ་རོག་ཐང་ལ་ལྷུང་། ལོ་དཔལ་གྱི་བློ་གྲོས་ཀྱིས་དམག་གི་སྤང་ཁྱིམ་ས་ལ་བཏབ་པས་མོན་དམག་ཆམ་ལ་ཕོབ། གྲུབ་ཆེན་འདར་ཕྱར་གྱིས་མུ་སྟེགས་འཕྲོག་བྱེད་ཀྱི་གྲིབ་མ་ལ་བཏབ་པས་འཕུར་འཕྲོར་ས་ལ་ལྷུང་། གཉགས་ཛྙཱ་ནས་ཕ་སྤུན་ཆམ་ལ་ཕབ་པ་སོགས་ཕྱིར་དགྲ་བགེགས་གཉིས་ལ་ཐེབས་པ་དང་། ནང་དུ་རང་རྒྱུད་ཀྱི་ཉོན་མོངས་ལ་ཐེབས་པས་ཆོས་ཉིད་ཀྱི་རྟོགས་པ་མངོན་དུ་གྱུར་པ་བརྗོད་ཀྱིས་མི་ལྡང་ལ། མདོར་ན་ཕུར་པའི་རྒྱུད་སྡེ་བོད་དུ་ཕེབས་ཙམ་ནས་བར་ཆད་གདོན་བགེགས་ཞི་བ་བལ་ཡུལ་ཡང་ལེ་ཤོད་ཀྱི་ལོ་རྒྱུས་སོགས་ལས་ཡོངས་སུ་གྲགས་པས་མཚོན། ཡུལ་ལ་མངོན་སུམ་དུ་སྣང་བའི་མཐུ་རྩལ་དང་། ཡུལ་ཅན་ཆོས་ཉིད་དུ་གྲོལ་བའི་བྱིན་རླབས་བསམ་གྱིས་མི་ཁྱབ་པས་རིག་འཛིན་གྱི་སློབ་དཔོན་ཆེན་པོས་ཀྱང་ཐུགས་དམ་གྱི་ངོ་བོ་ཉིད་དུ་མཛད། སྤྱིར་རྡོ་རྗེ་ཕུར་པའི་རྒྱུད་སྡེའི་རིང་ལུགས་ཟབ་ལ་བྱིངས་ཆེ། རྒྱ་ཆེ་ལ་རྣམ་གྲངས་མང་ཡང་ཚིག་དོན་གཉིས་ཀའི་ཆ་གླེགས་བམ་གྱི་དབུས་ན་གཏེར་དུ་གཏམས་པ་ལྟར་བཞུགས་པ་མངོན་དུ་འབྱུང་བའི་དུས་ལ་བབ་པ་ན། ཕུར་པ་རྣལ་འབྱོར་ཆེན་པོའི་རྒྱུད་ཕྱི་མ་ལས། འདི་ནི་ཀོ་ས་ལ་ཡི་གླིང་། །དེ་རིང་རིགས་ཅན་དེ་ལ་འབབ། །སྤྲུལ་པ་འཇིག་རྟེན་མི་གནས་ཚེ། །ཁྱོད་ཀྱི་སྤྲུལ་པ་པདྨའི་རྒྱལ། །དེ་ཡི་ནུས་པ་དོན་བྱེད་འགྱུར། །ཞེས་ཅིག་ཆར་བའི་རིགས་ཅན་བི་མ་ལ་ལ་སྔོན་དུ་བབས་ཤིང་། ཕྱི་ནས་བདག་ཉིད་ཀྱི་ཚོགས་བདུན་རོལ་པའི་སྣང་ཆ་ལ་སྤ་གྲོ་སྟག་ཚང་ཡིན་རྒྱུ་བའི་ཕུག་པ་ཁ་ཤར་ལྷོར་བསྟན་པ་ཞིག་ཏུ་རླངས་པ་དཔལ་སེང་གོས་དཀར་ཆས་ཞུགས་ཀྱིས་རྡོ་རྗེ་ཕུར་པའི་དབང་བསྐུར་རྫོགས་པར་བྱིན་པ་སོགས་ལྷ་དང་བླ་མའི་བྱིན་རླབས་ཀྱི་མཚན་མ་མང་དུ་ཐོབ་པའི་ཚེ། བཀའི་བསྡུ་བ་གསར་དུ་བྱས་ཤིང་། མངོན་རྟོགས་དང་དབང་ཆོག་གཉིས་ཀྱི་བསྡུ་བ་ཟིན་ཙམ་ན་ས་སྐྱ་བདག་པོ་དབང་སྡུད་སྙིང་པོའི་མནལ་ལམ་དུ་ད་རེས་ཕུར་ཁང་དུ་བླ་མ་རྫོགས་ཆེན་པ་ལ་ཡང་དག་གི་དབང་བསྐུར་ཞུས་ཤིག་ཅེས་བྱུང་བས། ཡང་དག་པའི་ཆོས་ཚུལ་དུ་ངེས་པ་རྙེད་ནས་དབང་གི་སྒོ་འཕར་དང་པོར་ཕྱེ་ནས་རིམ་པར་སྤེལ་བས་བྱིན་རླབས་ཀྱི་ཚན་ཁ་ཆེན་པོ་དང་། བསྟན་སྲིད་ཀྱི་བདེ་ཐབས་ཀྱང་རྒྱ་ཆེན་པོ་འགྲུབ་པ་ཡིན་པས་ཡིད་བཞིན་གྱི་ནོར་བུ་ལྟར་གཅེས་སྤྲས་སུ་ཟུང་ཞིག །ཅེས་པའང་རིག་འཛིན་འཇིགས་མེད་གླིང་པས་གསང་རྒྱ་གྲོལ་ནས་ཡི་གེ་སྔ་མ་ལས་ཞིབ་ཏུ་བསྣན་པའོ། །དགེའོ། །དགེའོ། །དགེའོ། །མངྒ་ལཾ།། །།