གསོལ་འདེབས་མཚང་འདོན་མ།

Previous Text Back to Volume Page Next Text

Wylie title	gsol 'debs mtshang 'don ma
Location	'jigs gling bka' 'bum Volume 8, Text 45, Pages 805-806 (Folios 1a1 to 1b6)
Author	འཇིགས་མེད་གླིང་པ་
Less details More details
Citation	'jigs med gling pa. Gsol 'debs mtshang 'don ma. In Kun mkhyen rig 'dzin 'jigs med gling pa'i gsung 'bum, Vol. 8: 805-806. New Delhi: Shechen Publications, 2025.
Genre	Supplications - gsol 'debs
Colophon	།དགེ་འདུན་དོན་གྲུབ་ཀྱི་ངོར་གང་བོ་རིའི་ཉེ་འདབས་སུ། རིག་འཛིན་འཇིགས་མེད་གླིང་པས་སོ།།
Colophon	dge 'dun don grub kyi ngor gang bo ri'i nye 'dabs su/_rig 'dzin 'jigs med gling pas so//

[edit]

༄༅། །གསོལ་འདེབས་མཚང་འདོན་མ་བཞུགས། །རྒྱལ་ཀུན་འདུས་པའི་སྤྱི་གཟུགས་ནི། །མཚན་ཉིད་ཀུན་ལྡན་བླ་མ་སྟེ། །རང་སེམས་ཆོས་སྐུར་ངོ་སྤྲོད་པ། །བདག་ལ་སངས་རྒྱས་ཀུན་ལས་ལྷག །རེ་ས་ཁྱོད་ལས་མེད་པ་ལ། །ཐུགས་རྗེའི་ཀློང་ནས་འདོར་ཕོད་དམ། །བྱིས་དང་སྡིག་གྲོགས་འདུ་འཛིའི་ཁྲོད། །ཆོས་མིན་ཆོས་ལྟར་བཅོས་པ་ཡི། །སྐལ་བ་ངན་པ་བདག་ཅག་གི། །རྒྱུད་ལ་ངེས་འབྱུང་སྐྱོ་ཤས་དང་། །བྱང་ཆུབ་སེམས་གཉིས་བསྐྱེད་བྱིན་རློབས། །སྔོན་ཆད་ཚུལ་ཁྲིམས་གོས་ལ་རེ། །དཀོན་མཆོག་དཀོར་ལ་བག་མེད་སྤྱད། །ལྟར་སྣང་ཆོས་བརྒྱད་ཆོས་དང་འཁྲུལ། །ད་ནི་འཆི་བ་སྙིང་དྲན་གྱི། །རི་ཁྲོད་ནགས་ཁྲོད་དབེན་པ་རུ། །གཏན་གྱི་མདུན་མ་སྒྲུབ་བྱིན་རློབས། །ཆོས་ཀྱི་གེགས་ནི་ཅིར་ཡང་བརྫུ། །གཉེན་བཤེས་འདུ་ལོང་ཟང་ཟིང་དང་། །རང་དོན་ཤོར་བའི་གཞན་དོན་དང་། །འགྲན་སེམས་ཕྲག་དོག་སྙན་གྲག་བསྒྲུབ། །དབེན་པ་བརྟེན་ཀྱང་ཞི་བདེར་གཞོལ། །སྒོ་གསུམ་ཐ་མར་ཤོར་བའི་ཚེ། །རང་སྐྱོན་རང་གིས་རིགས་གྱུར་ནས། །བླ་མའི་ཞལ་གདམས་དྲན་པར་ཤོག །དྲན་ཤེས་མེད་པའི་དགེ་སྦྱོར་དང་། །ལྟ་བས་མ་ཟིན་བསྐྱེད་རིམ་དང་། །གོ་ཡུལ་ཤོར་བའི་སྟོང་ལྟ་སོགས། །སངས་རྒྱས་ལམ་ལ་ཐག་རིང་བས། །བླ་མ་མཆོག་ལ་མོས་གུས་དང་། །ཟོལ་འགྲོགས་མེད་པའི་དད་པ་དང་། །སེམས་ཅན་ཕ་མར་ཤེས་པ་ཡི། །སྙིང་རྗེ་རྒྱུན་ཆད་མེད་པར་ཤོག །ཆོས་ཕུང་བརྒྱད་ཁྲི་བཞི་སྟོང་གི། །རྩ་བ་བྱང་ཆུབ་སེམས་ལ་འདུ། །དེ་ཕྱིར་གཞན་ལ་ཕན་སྲིད་ན། །སྲོག་ཀྱང་གཏང་བའི་སྙིང་སྟོབས་དང་། །དེ་ལའང་བྱས་ཡུས་མི་སྐྱེ་བར། །རང་བཞིན་མེད་པའི་སྟོང་ཉིད་ཀྱི། །དྲན་པའི་རྩི་དང་མི་འབྲལ་ཤོག །སེམས་ཅན་ཀུན་ལ་བུ་གཅིག་ལྟར། །བརྩེ་ཞིང་མཛད་པ་ཕྲིན་ལས་ཀུན། །འགྲོ་ལ་ཕན་པ་ལྷུར་མཛད་པའི། །སྐྱེས་བུ་དམ་པ་ཐམས་ཅད་དང་། །བདག་ཉིད་སྨིན་གྲོལ་ལམ་བཀོད་པའི། །བཀའ་དྲིན་ཅན་གྱི་བླ་མ་མཆོག །ཞབས་པད་བསྐལ་བརྒྱར་བརྟན་པ་དང་། །བདག་གི་མོས་གུས་ལྕགས་ཀྱུ་ཡིས། །བླ་མ་དམ་པའི་ལུང་རྟོགས་ཀྱི། །དགོངས་སྤྱོད་སྙིང་དབུས་སྤྱན་འདྲོངས་ནས། །ཐུགས་ཡིད་གཅིག་ཏུ་འདྲེས་གྱུར་ཏེ། །ཁམས་གསུམ་འཁོར་བའི་རྒྱ་མཚོ་འདི། །ཅིག་ཅར་དོང་ནས་སྤྲུགས་ནུས་ཤོག །དགེ་འདུན་དོན་གྲུབ་ཀྱི་ངོར་གང་བོ་རིའི་ཉེ་འདབས་སུ། རིག་འཛིན་འཇིགས་མེད་གླིང་པས་སོ།། །།