ཡོན་ཏན་རིན་པོ་ཆེའི་མཛོད་ཀྱི་རྒྱ་ཆེར་འགྲེལ་པ་བདེན་གཉིས་ཤིང་རྟ།

Previous Text Back to Volume PageLast text in volume.

Wylie title	yon tan rin po che'i mdzod kyi rgya cher 'grel pa bden gnyis shing rta
Location	'jigs gling bka' 'bum Volume 1, Text 3, Pages 175-810 (Folios 1a1 to 318b6)
Author	འཇིགས་མེད་གླིང་པ་
Less details More details
Citation	'jigs med gling pa. Yon tan rin po che'i mdzod kyi rgya cher 'grel pa bden gnyis shing rta. In Kun mkhyen rig 'dzin 'jigs med gling pa'i gsung 'bum, Vol. 1: 175-810. New Delhi: Shechen Publications, 2025
Genre	Commentary Extensive - rgya cher 'grel pa

Tibetan Text

[edit]

༄། །གུ ཎ ར ཏྣཱ ནཱཾ ཀོ ཥ བི སྟཱ རཾ པྲྀ ཏྟི དྭི ས ཏྱ ར ཐཾ ནཱ མ བི ཧ ར ཏི སྨ།།

༄༅། །ཡོན་ཏན་རིན་པོ་ཆེའི་མཛོད་ཀྱི་རྒྱ་ཆེར་འགྲེལ་པ་བདེན་གཉིས་ཤིང་རྟ་ཞེས་བྱ་བ་བཞུགས་སོ།།

༄༅། །མ ཉྫུ ཤྲཱི ཀུ མཱ ར བྷུ ཏ ཤྩ བོ དྷི ས ཏྭ བི མ ལ ཀི རྟྟཱི བྲ ན མྱཾ།།

༄༅། །འཇམ་པའི་གཞོན་ནུར་གྱུར་པ་དང་བྱང་ཆུབ་སེམས་དཔའ་དྲི་མེད་གྲགས་པ་ལ་ཕྱག་འཚལ་ལོ།།

༄༅། །ནོ ཙེ ཏེ ཀཾ ནོ བ ཧུ ཙི ཏྟཾ པྲ ཏི ས མྦི ཏྲ།།

༄༅། །གཅིག་པུ་མ་ཡིན་དུ་མར་མི་གནས་སོ་སོ་ཡང་དག་རིག་པའི་ཐུགས། །

༄༅། །ཝཱ གྦྷེ ད རྟཽ བ ནྠི ནི རོ དྷ ཤྩ སུ ཙ ཀྲྱཻཿ

༄༅། །འགོག་དང་ལམ་བདེན་འཁོར་ལོ་རྣམ་གསུམ་བདེན་གཉིས་རྣམ་པར་འབྱེད་པའི་གསུང་། །

༄། ཀཱ ཡཱོ ྅ ནུ གྲཻཿ ད རྴ ན ཀ ནྟེ ཧ ཏ ལོ ལཱ།

༄༅། །ཁྲོ་བ་མེད་བཞིན་འཁོར་བའི་དགྲ་བཅོམ་མཐོང་ན་མི་མཐུན་མེད་པའི་སྐུ། །

༄༅། །ཨཱ ཁྱཱ བུ དྡྷཱཿ ར ཏྣ ཏྲྀ ཏཱི ཡ ཤྩ གུ རུ སྟྭི།།

༄༅། །རྒྱལ་བ་རྣམས་ཀྱི་མངོན་བརྗོད་ཉིད་དེ་དཀོན་ཅོག་གསུམ་གའང་བླ་མའོ། །

རེ་ཞིག་འདིར་ནི་རྗོད་བྱེད་ལ་ལྟོས་ཡན་ལག་བཅུ་གཉིས་ལུང་གི་ཆོས། །མཐའ་དག་བསོད་ནམས་ལམ་དང་མྱ་ངན་འདའ་བ་གསུམ་གྱི་མཚན་ཉིད་ནི། །བརྗོད་བྱ་རྟོགས་པའི་དོན་ལ་འཇུག་པ་བསྟན་པ་དམ་པའི་ཆོས་ཀྱི་རྒྱུད། །ཐེག་པ་གསུམ་གྱི་ལམ་དུ་གྲགས་པའི་གདུགས་དཀར་གཅིག་གིས་འགྲོ་འདི་སྐྱོབས། །ལྷག་པའི་ཚུལ་ཁྲིམས་གོམས་པར་གྱུར་ལས་སེམས་ཀྱི་བསླབ་པས་ཡང་དག་འབྱོར། །དེ་དེའི་བརྟེན་པ་ཤེས་རབ་བསླབ་པས་ཉོན་མོངས་དགྲ་བཅོམ་ཟག་པ་ཟད། །འཕགས་པའི་རྒྱུད་ནི་རིག་གྲོལ་གཉིས་ལྡན་བསླབ་པ་གསུམ་གྱི་ངོ་བོ་ཉིད། །ཆོས་རབ་འབྱེད་པའི་བློ་གྲོས་མཆོག་ལྡན་བྱང་ཆུབ་སེམས་དཔའི་ཚོགས་ལའང་འདུད། །ཅེས་པ་ནི་དཀོན་མཆོག་གསུམ་ལ་ཕྱག་འཚལ་ལོ་ཞེས་པའི་དངོས་པོ་ངེས་པར་བསྟན་པ་ཉིད་མཆོད་བརྗོད་ཀྱི་ལུས་སུ་དྲངས་པའོ། །དགོས་པ་ནི་ཀླུ་སྒྲུབ་ཀྱིས། བསྟན་བཅོས་བྱེད་པོས་སྟོན་པ་ལ། །མཆོད་པར་བརྗོད་པ་འབྲས་མེད་མིན། །སྟོན་པ་དང་ནི་བསྟན་བཅོས་ལ། །དད་འདུན་བསྐྱེད་པར་བྱ་ཕྱིར་རོ། །ཞེས་གསུངས་པའི་ཕྱིར་རོ། །རིན་ཆེན་རྣམ་གསུམ་གྲགས་པའི་སྤྲིང་ཡིག་གིས། །མུ་ཏིག་འཁྲི་ཤིང་རབ་ཏུ་དགའ་བྱས་ནས། །བདུད་ཀྱི་བུ་མོའི་བཞིན་རས་ཀུནྡའི་ཚལ། །སྐལ་ངན་བགྱིད་ལ་མངོན་ཕྱོགས་སངས་རྒྱས་མཐུ། །ཞེས་སྨོས་ཏེ། དེ་ལ་དཀོན་མཆོག་གསུམ་ནི་བསོད་ནམས་ཀྱི་ས་བོན་བསྐྱེད་པའི་གཞི། འགྲོ་བ་ཐམས་ཅད་ལ་མཉེས་གཤིན་པའི་སྐྱབས་ཁ་ན་མ་ཐོ་བ་མེད་པར་བཞུགས་པ། འཇིག་རྟེན་སྒྲོལ་བ། འཕགས་པའི་བདེན་པ་བཞི་ལ་གནས་པ། ཞི་བའི་ལམ་དུ་འདྲེན་པ། མུ་སྟེགས་ཅན་དང་། བདུད་སྡིག་ཅན་གྱི་རྒོལ་བ་ངན་པས་གསུང་དང་། ཐུགས་དང་། དཔལ་དང་མཐུ་ལ་མི་གནོད་པ། མཚན་དང་དཔེ་བྱད་དང་། སྟོབས་བཅུ་མི་འཇིགས་རྣམ་བཞི་ལ་སོགས་པ་མཐའ་དག་གི་འབྱུང་གནས་ཡིན་པའི་གྲགས་པའི་སྤྲིང་ཡིག་གང་གི་རྣ་ལམ་དུ་སོང་བའང་དོན་དང་ལྡན་པའི་ཚུལ་སྔོན་བྱུང་གི་གཏམ་དང་སྦྱར་ནས་སྟོན་པ་སྟེ། དཔག་བསམ་འཁྲི་ཤིང་ལས། ནོར་ཆེན་ཞེས་བྱའི་ཚོང་པ་ནི། །ཝ་ར་ཎཱ་སིར་སྔོན་བྱུང་གྱུར། །དེ་ཡི་ཁྱིམ་ཐབ་བསོད་ནམས་ཅན། །རིན་ཆེན་ལྡན་ཞེས་བྱ་བར་གྱུར། །བདག་པོ་ལྔ་པ་ཉིད་གྱུར་ཚེ། །བུད་མེད་དེ་ཡིས་མཆོད་རྟེན་རྩེར། །དོ་ཤལ་ཆེན་པོ་གུས་ལྡན་པས། །མཆོད་པ་བྱས་ནས་ཕུལ་བར་གྱུར། །བསོད་ནམས་རྣམ་སྨིན་དེས་དེ་ཉིད། །སིངྒ་ལ་ཡི་བདག་པོ་ཡི། །བུ་མོ་མུ་ཏིག་འཁྲི་ཤིང་གྱུར། །དེ་ཉིད་སྐྱེ་བ་གཞན་ལ་ནི། །ཕྱུག་པས་རྒྱགས་ཤིང་རྨོངས་གྱུར་ནས། །མཆོད་པ་སྨོད་ཅིང་སྒྲིན་གྱུར་པ། །དེ་ཡིས་ཡུན་རིང་འབངས་མོར་གྱུར། །དགེ་དང་མི་དགེའི་ལས་གང་གང་། །སྐྱེ་བའི་ཞིང་ལ་སྐྱེ་བོས་བཏབ། །ཅེས་པ་ལྟར་ཤཱཀྱའི་ཁྱིམ་དུ་འབངས་མོ་རོ་ཧི་ཏ་ཞེས་བྱ་བ་ཚེ་འཕོས་ནས་སིངྒ་ལའི་རྒྱལ་པོའི་བུ་མོ་མུ་ཏིག་འཁྲི་ཤིང་ཞེས་བྱ་བར་གྱུར། དེའི་བསོད་ནམས་ཀྱི་མཐུས་མཉན་ཡོད་ཀྱི་ཚོང་པ་རྣམས་རྒྱ་མཚོར་སོང་ནས་སིངྒ་ལར་སླེབ། མཚན་མོའི་ཐུན་མཐར་ངལ་གསོའི་དབུགས་འབྱིན་ཐོབ་པའི་ཚེ། སངས་རྒྱས་ཀྱིས་གསུངས་པའི་ཆོས་ཚིགས་སུ་བཅད་པ་དག་གླུར་བླངས་པས། བུ་མོས་ཐོས་ནས་ཚོང་པ་རྣམས་ལ་དེའི་རྒྱུ་དྲིས་སོ། །དེ་དག་གིས་འདི་ནི་སངས་རྒྱས་ཀྱི་གསུང་ཞེས་སྨྲའོ། །དེས་སངས་རྒྱས་ཀྱི་མཚན་ཐོས་པ་ཙམ་གྱིས་རྨ་བྱ་ལ་འབྲུག་གི་སྒྲ་གྲགས་པ་ལྟར་གྱུར་ཀྱང་སངས་རྒྱས་ཀྱི་རང་བཞིན་མི་ཤེས་ནས་སླར་དྲིས་པ་ན། ཚོང་པ་དེ་དག་གིས་བསོད་ནམས་ཀྱི་རང་བཞིན་བཅོམ་ལྡན་འདས་དེའི་སྤྱོད་པའི་ལུགས་སྨྲས་པས། དེ་དེའི་རྐྱེན་གྱིས་སྔོན་བས་དགའ་བའི་དགའ་བ་རྒྱ་ཆེན་པོ་ཐོབ་ནས་བཅོམ་ལྡན་འདས་ལ་གསོལ་བའི་སྤྲིང་ཡིག་ཕུལ་ཏེ། ཐམས་ཅད་མཁྱེན་པ་བཅོམ་ལྡན་འདས་ཀྱིས་མཁྱེན་བཞིན་དུ་སྤྲིང་ཡིག་བཀླགས་པའི་དོན། ཀྱེ་མ་བསོད་ནམས་ཚོང་ཟོང་དག་གིས་རྙེད་པར་གྱུར་པ་ཁྱོད་ནི་དྲན་པ་ཉིད། །རྒུད་དང་གདུང་བ་དང་ནི་སྲེད་པ་འཇོམས་པའི་སྲིད་པའི་སྨན་བཟང་ཅི་ཡང་ཡིན། །བཅོམ་ལྡན་ལས་བྱུང་གཏམ་གྱིས་ཉེར་བསྐྲུན་ཡང་དག་རིག་པ་མྱོང་བའི་ས། །བཅོམ་ལྡན་འདི་དེ་བདག་གི་བདུད་རྩི་ཡང་དག་བགོ་སྐལ་ཆེན་པོར་གྱུར་པ་ཡིན། །ཅེས་པ་ཉིད་དུ་ནི་གཟིགས། རི་མོ་མཁན་གྱིས་བྲི་བར་མི་ནུས་པའི་རང་གི་སྐུ་གཟུགས་རས་ལ་བཀོད་པ་དེ་ལ་སྤྲིངས་པས་ཚོང་པ་དེ་དག་གིས་སླར་བསྟན་ཏོ། །མུ་ཏིག་འཁྲི་ཤིང་གིས་དེ་མཐོང་བའི་མོད་ལ་དེ་ལས་བྱུང་བའི་བསམ་གཏན་དགོངས་པ་གཅིག་པ་ལྟ་བུ་ཉམས་སུ་མྱོང་ནས། སྐྱབས་སུ་འགྲོ་བ་གསུམ་དང་། བསླབ་པའི་གནས་ལྔ་དང་། རྟེན་ཅིང་འབྲེལ་བར་འབྱུང་བ་དང་། འཕགས་པའི་ལམ་ཡན་ལག་བརྒྱད་ལ་སོགས་པའི་བདུད་རྩིའི་རང་བཞིན་ཤེས་ནས་རྒྱུན་དུ་ཞུགས་པའི་འབྲས་བུ་ལ་མངོན་དུ་སྤྱོད་དོ། །དེའི་ཕྱིར་དཀོན་མཆོག་གསུམ་གྱི་རྒྱུ་འབྲས་མཐའ་དག་དང་འབྲེལ་པའི་ཆོས་ཀྱི་གཏམ་ཡང་དག་པ་ནི་འགྲོ་བ་མཐའ་དག་གིས་མཉན་པར་འོས་པའི་སྤྲིང་ཡིག་ལྟ་བུའང་ཡིན་ལ། སྲིད་པའི་རང་བཞིན་ཉོན་མོངས་པ་དང་། རྣམ་རྟོག་ལས་གྱུར་པའི་བདུད་ཀྱི་བུ་མོའི་བཞིན་རས་ཉམས་པར་བྱེད་པའི་གཉན་པོར་ཆེ་བས་ན་དེ་སྐད་ཅེས་གཟུགས་ཅན་གྱི་རྒྱན་དུ་བསྔགས་པའོ། །བློ་མཆོག་རྣམས་ཀྱི་ཡོན་ཏན་དག་བྱེད་གཏེར། །གཅིག་ཏུ་བརླིང་ན་སྤྱི་བརྟོལ་རླབས་ཕྲེང་གི། །ཅ་ཅོ་སྒྲོག་འདི་མཛེས་པ་མི་དངོམ་ཡང་། །དམ་ཆོས་བརྗོད་ལ་བརྟེན་སླད་མཉན་པར་འོས། །ཞེས་འདོམས་པ་ནི། འདི་ལྟར་བློ་མཆོག་ཐུབ་པ་ཆེན་པོ་རྣམས་ཀྱི་ཕུན་སུམ་ཚོགས་པ་ལྔས་བསྟན་པའི་མདོ་དང་སྔགས་ཀྱི་སྡེ་སྣོད་རྒྱ་མཚོ་ལྟ་བུ་དང་། འཕགས་པའི་གང་ཟག་རྣམས་ཀྱི་ཆིངས་ཆེན་པོ་ལྔས་འབྲེལ་དགོད། དགོས་འབྲེལ་ཡན་ལག་བཞིས་གཏན་ལ་ཕབ་པའི་བསྟན་བཅོས་བརླིང་ཞིང་ཟབ་ལ་གཏིང་དཔག་དཀའ་བ་རྣམས་ལ་བརྟེན་ནས་རྒྱལ་བའི་བསྟན་པ་ཡུན་དུ་གནས་པ་ཡིན་ཏེ། མ་ཕམ་མགོན་པོས། ཆོས་རྣམས་ཐམས་ཅད་བཀའ་དང་བསྟན་བཅོས་གཉིས། །ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་འདི། །འཇིག་རྟེན་ཁམས་འདིར་ཡུན་རིང་གནས་པར་འགྱུར། །ཞེས་པ་ལྟར་རོ། །དེ་ལྟ་བུའི་བཀའ་དང་དགོངས་འགྲེལ་མཆིས་བཞིན་དུ་ཆོས་ཉིད་ཀྱི་བདེན་པ་མ་མཐོང་། ལྷག་པའི་ལྷས་གནང་བ་མ་བྱིན། རིག་པའི་གནས་ལྔ་ལ་མ་སྦྱངས་པ་སྟེ་རྒྱུ་གསུམ་མ་ཚང་བའི་གྱི་ནར་སྨྲ་བ་དག་གིས་སྤྱི་བརྟོལ་གྱི་བསྟན་བཅོས་དག་ལ་འཆོས་སྐྱོབ་ཀྱི་ཡོན་ཏན་གཉིས་དང་། ནང་པའི་ཚུལ་གསུམ་ཉུང་ཞིང་། ཕྱི་རོལ་པའི་ངན་པ་དྲུག་གི་ལྷད་ཀྱང་སྲིད་པས་ནགས་ཚལ་སྟུག་པོའི་གཅོང་རོང་གི་འབབ་ཆུ་གནོད་པ་ཅན་བཞིན་དུ་ཁ་ན་མ་ཐོ་བའི་ཅ་ཅོའི་རླབས་ཕྲེང་མཆིས་ཀྱི་དོགས་པའི་གནས་ཐོབ་པ་ཡང་ཆོས་ཚུལ་རྒྱ་མཚོར་མང་དུ་ཐོས་པའི་ཡོན་ཏན་ཡིན་པར་རྟོགས་ཏེ། སློབ་དཔོན་ཞི་བ་ལྷས། སྔོན་ཆད་མ་བྱུང་བ་ཡང་འདིར་བརྗོད་མེད། །སྡེབ་སྦྱོར་མཁས་པའང་བདག་ལ་ཡོད་མིན་ཏེ། །དེ་ཕྱིར་གཞན་དོན་བསམ་པ་བདག་ལ་མེད། །རང་གི་ཡིད་ལ་གོམས་ཕྱིར་ངས་འདི་བརྩམས། །ཞེས་འབྱུང་བས་སོ། །དེ་ལྟ་ནའང་དམ་པའི་ཆོས་ཀྱི་གཏམ་ཡང་དག་པ་ལ་བསྟེན་པའི་ཕྱིར་མཉན་པར་འོས་པའི་ཚུལ། བཤེས་སྤྲིང་ལས། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་། །བགྱིས་པ་ཅི་འདྲའང་རུང་སྟེ་མཁས་པས་མཆོད། །དེ་བཞིན་བདག་གི་སྙན་དངགས་འདི་ངན་ཡང་། །དམ་ཆོས་བརྗོད་ལ་བརྟེན་སླད་སྨད་མི་བགྱིད། །ཅེས་གསུངས་པའི་ཕྱིར་རོ། །དེ་ལྟར་བཤད་ཅིང་ཉན་པའི་དགོས་པའང་། སྦྱིན་པ་རྣམས་ཀྱི་ནང་ནས་ཆོས་ཀྱི་སྦྱིན་པ་མཆོག་ཏུ་འཕགས་པའི་ཚུལ་ལ་སྤྲོ་བར་བྱ་སྟེ། མདོ་ལས། དགེ་སློང་དག་གང་ཟག་གཉིས་པོ་འདིས་བསོད་ནམས་མང་པོ་བསྐྱེད་དེ་སྡིག་པའི་རྩ་བ་འབྱིན་ཅིང་བདུད་དང་གཡུལ་འགྱེད་པར་བྱེད། བདུད་ཀྱི་རྒྱལ་མཚན་སྙོལ་བར་བྱེད། ཆོས་ཀྱི་རྒྱལ་མཚན་བསྒྲེང་བར་བྱེད། དེ་བཞིན་གཤེགས་པའི་ཆོས་ཀྱི་འཁོར་ལོ་བསྐོར་བར་བྱེད་དོ། །གཉིས་གང་ཞེ་ན། གང་གུས་པར་བྱས་ཏེ་ཆོས་འཆད་པ་དང་། གང་འདི་ན་གུས་པར་བྱས་ཏེ་ཆོས་ཉན་པའོ། །དེ་བས་ན་ཁྱོད་ཀྱིས་གུས་པས་ཆོས་བཤད་པར་བྱ་ཞིང་བླ་མ་རྣམས་ལ་གུས་པར་བྱས་ཏེ་ཆོས་མཉན་པར་བྱའོ། །ཞེས་གསུངས་ལ་ཡོན་ཏན་གྱི་སྒོ་ནས་ཚེ་རབས་གང་དུའང་ཆོས་ཀྱི་མཛོད་འཛིན། དེ་བཞིན་གཤེགས་པ་སྲས་དང་བཅས་པས་དགོངས་པར་འགྱུར། རྟག་ཏུ་ཚེ་རབས་དྲན། སངས་རྒྱས་ལས་ཆོས་ཐོས་ཤིང་མྱུར་དུ་དེའི་གོ་འཕང་འཐོབ་པ་ལ་སོགས་པའོ། །ཉན་པས་ནི་སེམས་ཀྱི་སྒྲིབ་པ་སྦྱོང་། ཐེ་ཚོམ་གྱི་འཆིང་བ་གཅོད། རྟག་ཏུ་དམ་པའི་ཆོས་དང་མི་འབྲལ། མི་བརྗེད་པའི་གཟུངས་འཐོབ། ངན་འགྲོ་དང་ལོག་པར་མི་ལྟུང་། དཀར་ཕྱོགས་ཀྱི་ལྷས་བསྲུངས་ཤིང་ནད་དང་གནོད་པ་ཉུང་། ཤེས་རབ་ཀྱི་མིག་རྙེད་པས་མྱུར་དུ་འཁོར་བ་ལས་འདས་ནས་ཐམས་ཅད་མཁྱེན་པའི་གོ་འཕང་རྙེད་པར་གདོན་མི་ཟ་བས་ན། མདོ་ལས། ཐོས་པས་ཆོས་རྣམས་ཤེས་པར་བྱེད། །ཐོས་པས་སྡིག་ལས་ལྡོག་པར་བྱེད། །ཐོས་པས་དོན་མ་ཡིན་པ་སྤོང་། །ཐོས་པས་མྱ་ངན་འདས་པ་འཐོབ། །ཅེས་སོ། །དེ་ལྟར་གྱུར་པའི་མཐོང་ཆོས་སུ་ལ་ཡོད་སྨྲ་ན། དམ་པའི་ཆོས་ཐོས་པས་སོར་མོའི་ཕྲེང་བ་མ་གསོད་པ་ལས་ལོག་པར་གྱུར་པ་དང་། གནོད་སྦྱིན་འབྲོག་གནས་མི་རྣམས་གསོད་པ་ལས་ལོག་པར་གྱུར་པ་དང་། །ཀླུའི་རྒྱལ་པོ་སོག་མ་མེད་ལོ་ཏོག་འཇོམས་པར་བྱེད་པ་དང་། གནོད་སྦྱིན་མོ་འཕྲོག་མ་སྲོག་ཆགས་བརྒྱ་ཕྲག་དུ་མ་གསོད་པ་ལས་ལོག་པར་གྱུར་པ་དང་། གནོད་སྦྱིན་བ་སྤུ་ཁབ་དུག་གིས་བརྡེག་པར་བྱེད་ཅིང་གསོད་པ་དང་། རྒྱ་མཚོའི་ཉ་ཏ་མིང་གིས་ཚོང་པ་སྟོང་ཕྲག་དུ་མ་གསོད་པར་བྱེད་པ་དང་། སྦལ་པ་དུད་འགྲོ་ལོག་པར་ལྟུང་བའི་འཇིགས་པ་དང་། ཟླ་བ་སྒྲ་གཅན་གྱི་འཇིགས་པ་དང་། ཉི་མ་ལྷ་མ་ཡིན་གྱི་འཇིགས་པ་དང་། བརྒྱ་བྱིན་ངན་སོང་གི་འཇིགས་པ་དང་། ཚངས་པ་རྟག་པར་ལྟ་བ་ལས་དང་གཅེར་བུ་པའི་བུ་ལོག་པར་བྱ་བ་ལ་མངོན་པར་སྦྱོར་བའི་ལས་དང་། བྲམ་ཟེ་གྲགས་པའི་རིགས་མངོན་པར་ཞེན་པ་དམ་པའི་ཆོས་ཐོས་པས་ལོག་གོ །ཞེས་སློབ་དཔོན་ས་མཚོ་བྱིན་གྱིས་བཤད་ལ། དེ་བཞིན་དུ་ལྷའི་བུ་ཤིན་ཏུ་བརྟན་པ་དང་གཅུང་དགའ་བོ་འཆི་བའི་འཇིགས་པས་རྟབས་ཤིང་སྐྲག་པར་གྱུར་པ་ལས་ཐར་པ་སོགས་བརྗོད་ཀྱིས་མི་ལྡང་བ་ཡོད་པས་སོ། །དེ་དག་ཀྱང་ཉན་པ་པོས་སྣོད་ཀྱི་སྐྱོན་གསུམ་དང་། དྲི་མ་དྲུག་དང་། མི་འཛིན་པའི་སྐྱོན་ལྔ་སྤངས་པ་ལས་འབྱུང་སྟེ། སྣོད་ཁ་སྦུབ་ཀྱིས་བཅུད་ནམ་ཡང་མི་འཛིན་པའི་དཔེས། ཆོས་ཉན་པའི་ཚེའང་ཤེས་པ་གཞན་དུ་གཡེངས་པའམ། གཉིད་རྨུགས་སུ་གྱུར་པ་དང་། དམིགས་པ་གཞན་ལ་ཡིད་བསྡུས་ན་ཆོས་ཀྱི་ཚིག་དོན་དང་བརྡའ་མི་འཕྲོད། སྣོད་ཞབས་རྡོལ་གྱིས་བཅུད་ཐལ་མར་འབྱིན་པ་ལྟར་བག་རེ་གོ་ཡང་ཚིག་དོན་ལ་དཔྱད་པ་མ་ཞུགས་ན་རྒྱུད་ལ་ཡོན་ཏན་མི་འགོ །སྣོད་དུག་ཅན་གྱིས་བཅུད་ཀྱང་མ་རུངས་པར་བྱེད་པ་བཞིན། ཤེས་ལོ་དང་གྲགས་འདོད་ཀྱི་ཐོས་བསམ། བདག་ཉིད་བསྟོད་ཀྱི་ཤེས་པའི་སླད་དུ་མང་པོའི་དབུས་སུ་གཞན་ཚར་གཅོད་པ་ལ་དམིགས་པའམ། དེ་བཞིན་དུ་རྙེད་བཀུར་དང་འགྲན་སེམས་དང་། ཕྲག་དོག་གི་ཀུན་སློང་ངན་པས་ཐོས་བསམ་བྱེད་པ་ནི་བྱང་ཆུབ་ཀྱི་རྒྱུར་མི་འགྲོ། སྡིག་པས་ཀུན་ནས་དཀྲིས་པས་རང་གཞན་གཉིས་ཀ་ལ་ཕན་མི་ཐོགས། དེའི་ཕྱིར་ཀུན་སློང་བཟང་པོ་དང་ལྡན་པ་གལ་ཆེ། དྲི་མ་དྲུག་ནི། དབྱིག་གཉེན་གྱིས་རྣམ་བཤད་རིག་པར། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེངས་ཡིད་བསྡུད་དང་། །སྐྱོ་བ་ཉན་པའི་དྲི་མ་ཡིན། །ཅེས་པས། འཆད་པ་པོའི་སློབ་དཔོན་ལས་རང་ཉིད་གནས་མཐོ་སྙམ་པའི་བརྙས་པའམ། ཆོས་མཁས་སྙམ་པའི་ང་རྒྱལ་བ། ཆོས་དང་སློབ་དཔོན་གྱི་སྐྱོན་ལ་རྟོག་པའམ། ཞེ་ངན་པས་གཞན་གྱི་བརྗོད་པ་ལ་དད་པ་མི་སྟོན་པའི་མ་དད་པ་དང་། ཐོས་ཀྱང་རུང་ལ་མ་ཐོས་ཀྱང་ཆོག་སྙམ་ནས་དོན་དུ་མི་གཉེར་བ། མིག་ལ་སོགས་པ་ཚོགས་དྲུག་གི་ཡུལ་གཞན་ལ་སེམས་རྣམ་པར་གཡེངས་བ། ཆོས་ཀྱི་ཚིག་དོན་ལ་འདུ་ཤེས་མི་འཇུག་པར་བསམ་གཏན་ནམ། གཉིད་རྨུགས་ལ་སོགས་པར་ཡིད་སྡུད་པ། ཧ་ཅང་ཡུན་རིང་བས་སམ། མ་གོ་བས་སྐྱོ་བ་སྟེ་དྲུག་གི་གཉེན་པོར། སྔོན་རྒྱལ་པོ་ཤ་ནི་པ་ལིས་ཆོས་ཚིག་བཞི་པ་གཅིག་ཐོས་པར་བྱ་བའི་སླད་དུ་ལུས་ལ་མར་མེ་སྟོང་བཙུགས་པ་དང་། རྒྱལ་པོ་གར་ལིང་གིས་ལུས་ལ་ལྕགས་གཟེར་སྟོང་བཏབ་པའི་སྙིང་སྟོབས་ལ་བསམ་ཞིང་ཐུབ་པའི་དབང་པོས། དེ་བཞིན་གཤེགས་པ་རྣམས་ནི་འབྱུང་བ་དཀོན་ནོ། །མིར་སྐྱེ་བ་ནི་རབ་ཏུ་དཀོན་ནོ། །དལ་འབྱོར་ཕུན་སུམ་ཚོགས་པ་ནི་དཀོན་ནོ། །དེ་བཞིན་གཤེགས་པའི་བསྟན་པ་ལ་དད་པ་ནི་དཀོན་ནོ། །དེ་བས་ན་འཁོར་བའི་ཉེས་པ་ལ་ཀུན་ཏུ་བརྟགས་ལ་གུས་པར་བྱས་ཏེ་ཆོས་མཉན་པར་བྱའོ། །དེ་ཅིའི་ཕྱིར་ཞེ་ན། འདིར་བརྗོད་པར་བྱ་སྟེ། ངེས་པར་དམ་པའི་ཆོས་ནུབ་པར་འགྱུར་ཞིང་ཆོས་ཀྱི་སྣང་བ་དང་བྲལ་བར་འགྱུར། ཡེ་ཤེས་ཀྱི་སྣང་བ་རབ་ཏུ་ནུབ་པར་འགྱུར་ལ། དགེ་བའི་བཤེས་གཉེན་དང་ཕྲད་པར་མི་འགྱུར་ཏེ། རབ་ཏུ་འཇིགས་པ་དང་བཅས་པའི་དུས་ཉེ་བར་གནས་ཤིང་། ཆོས་དང་མི་ལྡན་པའི་སེམས་ཅན་རྣམས་དང་ལྷན་ཅིག་འགྲོགས་པར་འགྱུར་བ་ཤེས་པར་བྱས་ནས་གུས་པར་བྱས་ཏེ་ཆོས་ཉན་པར་བྱའོ། །ཞེས་པའི་དོན་ལ་རིག་པ་གཟེངས་བསྟོད་ནས་ཉན་དགོས། མི་འཛིན་པའི་སྐྱོན་ལྔ་ནི། ཚིག་མི་འཛིན་པར་དོན་ལ་ནན་ཏན་བྱེད་པ་སྐད་ཟེར་ཡང་། ཚིག་ནོར་ན་དོན་ཡང་ནོར་ནས་འགྲོ་བས་ཚིག་ལ་བརྟེན་ནས་དོན་ལ་གོ་བ་བསྐྱེད། དོན་མི་འཛིན་པ་ནི་ལ་ལ་ཚིག་གཅིག་པུ་ལ་ནན་ཏན་བྱེད་པ་ཡོད་དོ། །ཚིག་དེས་བསྟན་པའི་དོན་ལ་མ་སེམས་ན་དགེ་སློང་ལྷས་བྱིན་གྱིས་སྡེ་སྣོད་མང་པོ་བློ་ལ་ཟིན་པ་དང་འདྲ། བརྡའ་མ་འཕྲོད་པར་འཛིན་པ་ནི་བསྟན་བཅོས་འདིའི་དབང་དུ་བགྱིས་ན་དོན་ལ་མིང་བཏགས་པ་ཡོན་ཏན་རིན་པོ་ཆེའི་མཛོད། དཔེ་ལ་མིང་བཏགས་པ་འགྲེལ་པ་བདེན་གཉིས་ཤིང་རྟ། དེའང་འབྲས་བུའི་ཐེག་པ་ནི་བདེན་པ་དག་མཉམ་ཆེན་པོ་ཉིད་པས་རྣམ་མཁྱེན་ཤིང་རྟར་མིང་འགྱུར་པའི་གཞུང་ཉེ་བར་བཀོད་པ་ལ། གང་ཟག་གིས་བསྐལ་པས་བཏང་ནས་ཐོས་པ་དང་། བསམ་པ་དང་། བསྒོམས་པའི་རང་བཞིན་གྱིས་བདེ་བླག་ཏུ་རྟོགས་པའི་ཐབས་ལ་མི་རྩོལ་ན་གནས་སྐབས་དང་མཐར་ཐུག་གི་དོན་གཉིས་འགྲུབ་པའི་དགོས་པའི་དོན་སྟོར་བར་བྱེད་དོ། །དེ་བཞིན་དུ་གཞི་ལྟ་བ་དང་། ལམ་བསྒོམ་པ་དང་། གྲོགས་སྤྱོད་པ་གསུམ་ཚང་ལ་མ་ནོར་བར་སྟོན་པ་བསྡུས་པའི་དོན་དང་། ཚིག་གི་དོན་གཞུང་ལེའུ་བཅུ་གསུམ་པ་འགྲེལ་པས་རྒྱ་ཆེར་བཤད་པ་དང་། སྔ་ཕྱི་འབྲེལ་པའི་མཚམས་སྦྱོར་གང་ཟག་གཅིག་ལམ་དུ་འཇུག་པ་ན་ཆོས་ཀྱི་གཞི་འཆའ་བ་ལེའུ་དང་པོ་ནས་བཅུ་པའི་བར་གྱིས་རྒྱས་པར་བསྟན་ནས། ལེའུ་ཕྱི་མ་གསུམ་གྱིས་རང་བཞིན་རྫོགས་པ་ཆེན་པོའི་གཞི་ལམ་འབྲས་གསུམ་ཐུན་མོང་མ་ཡིན་པ་སྟོན་པས་ཉིང་དགོས་དང་། འཕྲོས་དོན་བརྒལ་ལན་དང་བཅས་པས་རང་གི་གྲུབ་པའི་མཐའ་གཏན་ལ་དབབ་པའི་ཚིག་དོན་གྱི་རྣམ་དབྱེ་ཆ་མ་ཕྱེད་པར་འཛིན་པ་རྣམས་སོ། །དེ་དག་ནི་འཆད་པ་པོའི་གནས་སྐབས་ལ་སྦྱར་ན་རྣམ་བཤད་རིག་པར། མདོ་དོན་སྨྲ་བར་འདོད་རྣམས་ལ། །མན་ངག་ཅུང་ཟད་སྦྱིན་པར་བྱ། །དེ་ལ་མན་ངག་འདི་ཡིན་ཏེ། །དགོས་པ་བསྡུས་པའི་དོན་བཅས་དང་། །བརྒལ་ལན་བཅས་དང་མཚམས་སྦྱོར་བཅས། །ཚིག་དོན་བཅས་ཏེ་བསྙད་པར་བྱ། །ཞེས་པའི་དོན་ཡིན་ནོ། །ལོག་པར་འཛིན་པ་ནི། བསྟན་པའི་སྲོལ་གཞུང་ལ་མ་ཚུགས་པར་བཤད་ཀྱང་། གདམས་ཕྲན་ཀོལ་ལེ་བའི་ཁ་བཟུང་ནས་ཆོས་དོན་གྱི་དབྱིངས་འཇལ་བར་མི་སྤྲོ་བའོ། །མ་ཚང་བར་འཛིན་པ་ནི། གལ་ཆེ་ཆེ་དང་བློ་ལ་འཐད་འཐད་ནས་འཛིན། ཆུང་ཆུང་དང་གནད་དཀའ་ས་ནས་སྒྱིད་ལུག་སྟེ་བསྟན་བཅོས་ཀྱི་ལུས་མ་རྫོགས་པར་བཟུང་བས་རང་གཞན་ལ་ཕན་མི་ཐོགས་པ་དག་ཡིན་ནོ། །དེའི་ཕྱིར་བུང་བས་མེ་ཏོག་གི་བཅུད་ལ་མྱང་བ་བཞིན་འོག་ནས་འབྱུང་བའི་ཆོས་ཉན་པའི་ཀུན་ཏུ་སྤྱོད་པ་ལ་ཉེ་བར་སྤྲོ་བ་ནི་མེད་དུ་མི་རུང་བ་ཡིན་ནོ། །ཐོག་མ་མེད་ནས་སྐྱེ་རྒ་ན་འཆི་ཡི། །རིམས་ཀྱིས་བཏབ་པར་སྨན་ཆེན་བདུད་རྩིའི་རོ། །དམ་ཆོས་ལག་ཏུ་མཆིས་པ་སྤོང་བྱེད་པའི། །སྐྱེ་བོ་རྣམས་ལ་བདག་གིས་ཇི་ལྟར་འདོམས། །ཞེས་སྨོས་ནས་དམ་པའི་ཆོས་མི་འཛིན་པའི་ཉེས་དམིགས་བརྗོད་པ་སྟེ། འདི་ལྟར་སྐྱེ་བ་ནི་མངལ་ལ་སོགས་པ་རྣམ་པ་བཞི་ལས་འབྱུང་བའོ། །རྒ་བ་ནི་ན་ཚོད་གྱུར་པའོ། །ན་བ་ནི་འདུ་བ་བསླད་པའོ། །ཤི་བ་ནི་སྲོག་བཏང་བ་སྟེ། དེ་ལྟ་བུའི་རིམས་ནད་ཤིན་ཏུ་དྲག་པོས་ཐོག་མ་མེད་པ་ནས་ད་ལྟ་ལ་ཐུག་གི་བར་བཏབ་ནས་འཇིག་རྟེན་མ་རུངས་པར་བྱས་ཀྱང་། དེའི་གཉེན་པོར་གྱུར་པའི་སྨན་ཆེན་པོ་དམ་པའི་ཆོས་ཀྱི་བདུད་རྩི་ཐོས་པས་ཐོབ་པར་མི་བྱེད། བསམ་པས་མངོན་དུ་མི་སྤྱོད། བསྒོམ་པས་འཛིན་པར་མི་བྱེད་པ་དེའི་ཉེས་པ་ནི་ནད་ཀྱི་ཚབས་ཆེར་བཏབ་པའི་སྐྱེས་བུ་སྨན་པ་ལ་བྱོལ་ནས་མྱ་ངམ་གྱི་ཐང་ལ་འབད་པས་འཁྱམས་པ་ལྟ་བུ་ཡིན་ཏེ། སློབ་སྤྲིང་ལས། གང་ཞིག་སྐྱེ་ནད་རྒ་ཤི་སེལ་བའི་བདུད་རྩི་དེ། །ཐོབ་པར་མི་བྱེད་མི་སྤྱོད་འཛིན་པར་མི་བྱེད་པ། །དེ་དག་ཉེས་མང་གཏི་མུག་འཐིབས་པོས་བསླད་པ་སྟེ། །ཡུན་རིང་ནད་ཀྱིས་ཐེབས་པ་སྨན་ཆེན་མི་བསྟེན་བཞིན། །ཞེས་སོ། །ཁྱད་པར་ཐར་པའི་ལམ་དུ་འགྲོ་བའི་མིག་གཅིག་པ་ལྟ་བུ། ལམ་དང་ལམ་མ་ཡིན་པའི་གནས་མཐོང་ཞིང་ཤེས་པ། ཁམས་གསུམ་གྱི་རང་བཞིན་མུན་ནག་སྟུག་པོ་འདྲ་བའི་སྒྲོན་མ་ལམ་བསླབ་པ་གསུམ་དང་། ངེས་བརྗོད་ཐེག་པ་གསུམ་ལག་ཏུ་མཆིས་པ་ལྟ་བུའང་གཏོང་བ་དག་གཏི་མུག་གི་གཡུལ་ངོར་ཕམ་པ་ཡིན་ཏེ་ཙནྡྲ་གོ་མིས། འགྲོ་བ་ཀུན་གྱི་མིག་གཅིག་དྲི་མ་མེད་པ་གང་། །དེ་ནི་ས་རྣམ་གསུམ་པོའི་སྤྱི་མཐུན་སྒྲོན་མ་སྟེ། །བསྟན་པ་བདེ་ལེགས་རྙེད་ནས་གང་ཞིག་འདོར་བ་དེ། །གཏི་མུག་ཤིན་ཏུ་རྨད་བྱུང་དག་གིས་གཙེས་པར་ཟད། །ཅེས་གསུངས་པ་ལྟར་རོ། །དེ་དག་གིས་གཞུང་འདིའི་ཀླད་ཀྱི་དོན་དང་བརྩམ་པར་དམ་བཅའ་བའི་སྐབས་དབྱེ་ནས་བསླབ་པའི་ལམ་གྱི་གང་ཟག་རྣམས་ཉན་པའི་སྣོད་རུང་དུ་བྱས་པའོ། །ད་ནི་གཞུང་གི་ལུས་དངོས་རྣམ་པར་བཞག་པར་བྱེད་པ་ལ་སྤྱིར་བསྟན་བཅོས་རྣམས་རྩིས་མགོ་རྣམ་པ་ལྔའི་ཆིངས་ཀྱིས་བཅིངས། བསྟན་བཤད་བསྡུ་གསུམ་གྱིས་གཏན་ལ་འབེབས་པའམ་ཆུ་བབས་སུ་བཀྲལ་ཀྱང་རུང་སྟེ། འགྲེལ་ཚུལ་ལ་ཚིག་འགྲེལ། དོན་འགྲེལ། འབྱེད་འགྲེལ། རྒྱ་ཆེར་འགྲེལ། དཀའ་འགྲེལ། སྒྲུང་འགྲེལ་རྣམ་པ་དྲུག་གིས་སྟོན་པའི་སྐབས་མ་ངེས་པས་ན་འདིར་ངོ་བོ་རྒྱ་ཆེར་འགྲེལ་ལ་ཚིག་བསྡེབས་པ་ཉམས་སུ་མྱོང་བ་གཙོ་བོར་བྱ་བ་ཡིན་ནོ། །དེ་ལ་རེ་ཞིག་དང་པོར་དལ་འབྱོར་གྱི་ཚོམས་རྣམ་པར་བཞག་པ་ལ་ལྔ། མི་ལུས་རྣམ་པར་དབྱེ་བ། འགལ་ཟླ་མི་ཁོམ་པ་བརྒྱད་བཤད་པ། དལ་འབྱོར་གྱི་རང་བཞིན་ངོས་བཟུང་བ། རྙེད་པར་དཀའ་བའི་རྒྱུ་མཚན་བཤད་པ། སྐབས་ཀྱི་དོན་བསྡུ་བའོ། །དང་པོ་ནི། འདི་ལྟར་འཁོར་བ་སྡུག་བསྔལ་གྱི་འབྲོག་དགོན་པ་ནི་ཉེས་པ་མཐའ་དག་གི་སྣོད། སྐྱེ་བ་སྣ་ཚོགས་ཀྱི་འོབས། དུར་ཁྲོད་ཆེན་པོ་ལྟར་མི་གཙང་ཞིང་ཆོ་ངེས་འདེབས་པའི་གནས་ལ་མིའི་ལུས་རྟེན་འཐོབ་པ་མཐའ་དག་ཆོས་ཀྱི་སྣོད་གཙང་མར་རུང་བ་མ་ཡིན་པའི་ཚུལ། རིང་ནས་བཤེས་པ་འཁོར་བའི་འབྲོག་དགོན་དུ། །མགོ་དང་ཡན་ལག་བཅད་པས་གདུང་གྱུར་ཅིང་། །ཕྱིན་ཆད་གདུང་འགྱུར་ལྐོག་ཏུ་གྱུར་པ་རྣམས། །ད་དུང་མཐོ་རིས་བདེ་ལ་སྲེད་ཅིང་རྨོངས། །ཞེས་པས་གང་དུ་བསྟི་བ་ཙམ་ནས་སྡུག་བསྔལ་འབའ་ཞིག་འཐོབ་པ། བྱ་བ་མཐའ་དག་ཉེས་པར་སྤྱོད་པ། སྡིག་པའི་རང་བཞིན་དང་ཡོངས་སུ་འདྲེས་པ། བྱེད་པ་མང་ལ་འབྲས་བུ་ཉུང་བ། སྙན་པ་མ་ཡིན་པའི་སྒྲ་དང་བཅས་པ། ལོངས་སྤྱོད་ཐོབ་ཀྱང་ཡིད་བརྟན་མེད་པ། མང་པོའི་ཁྲོད་དུའང་འཇིགས་པ་དང་བཅས་པ། སོ་མ་བཏང་བའི་ཆུ་སྣོད་ལྟར་ཡོན་ཏན་གྱི་ཕྱོགས་མི་འཛིན་པ། མཛའ་བཤེས་དང་ཉེ་དུ་འདྲལ་བ། སྔོན་ཆད་ཀྱང་མགོ་དང་ཡན་ལག་གཅད་པའི་ལས་ཚུལ་མཐའ་མི་ཐུག་པ་མྱོང་ཟིན་པ། ད་དུང་ཡང་གདོན་མི་ཟ་བར་མྱོང་བར་འགྱུར་བ་དམ་པ་རྣམས་ཀྱིས་ནམ་ཡང་བསྔགས་པར་མ་བྱས་པའི་གནས་སུ་དགེ་སྡིག་གི་འཇུག་ལྡོག་གང་ཡང་མི་ཤེས་པའི་རྨོངས་པ་འདི་དག་ནི་མི་ལུས་ཙམ་པོ་བ་ཞེས་བྱ་སྟེ་འཁོར་བའི་གནས་ནས་ནམ་ཡང་ཐར་བའི་གོ་སྐབས་མེད་དོ་ཞེས་སྟོན་པ་སྟེ། དེ་སྐད་དུ་ནམ་མཁའ་རིན་པོ་ཆེའི་མདོ་ལས་ཀྱང་། གང་དག་སྔོན་གྱི་དགེ་བའི་རྒྱུས་མིའི་འཇིག་རྟེན་དུ་ཡང་སྐྱེས། དབང་པོ་རྣམས་ཀྱང་ཡོངས་སུ་ཚང་། རྟག་ཏུ་ཆོས་སྤྱོད་པའི་ཡུལ་དུ་སྐྱེས་ཀྱང་ལས་དང་ལས་ཀྱི་རྣམ་པར་སྨིན་པ་མི་ཤེས། མི་དགེ་བའི་ལམ་ལ་མང་དུ་བརྟེན་ཅིང་སྤྱོད་པ་དེ་དག་མིར་གྱུར་པ་ཞེས་བརྗོད་ཀྱང་ཐ་མར་གྱུར་པ་སྟེ་ཤི་བའི་འོག་ཏུ་ངན་འགྲོ་མུ་མཐའ་མེད་པར་ལྟུང་བའི་ཕྱིར་རོ། །ཞེས་སོ། །དེ་བཞིན་དུ་བསྟན་པའི་ལམ་སྲོལ་ལ་མ་ཞུགས་པའམ། ཞུགས་ཀྱང་དགེ་སྡིག་འདྲེས་མར་སྤྱོད་པ་དང་། ཚེ་འདི་འབའ་ཞིག་ལས་ཕྱི་མའི་གནས་སྐབས་ཅུང་མི་དྲན་པས་འདུ་འཛི་དང་འདོད་པའི་ཡོན་ཏན་ལ་གཅིག་ཏུ་ཡིད་གཞོལ་ཞིང་ངེས་འབྱུང་གི་དམ་ལ་མི་འདུ། ཡུལ་གྱི་ལོངས་སྤྱོད་འབའ་ཞིག་ལ་ཆགས། མངའ་རིས་དང་ལང་ཚོས་རྒྱགས། འདོད་པའི་ཡུལ་ལྔ་ལ་རང་དགར་སྲེད་ཅིང་རྨོངས་པ་ནི་སློབ་དཔོན་མ་ཏི་ཙི་ཏྲས། དགའ་བར་བགྱིད་བའི་ཡུལ་རྣམས་དང་། །རྒྱགས་པར་བགྱིད་པའི་ལང་ཚོ་དང་། །བདག་ཉིད་རང་དགར་སྤྱོད་པ་དེ། །ཀུན་ཏུ་དོན་མེད་བགྱིད་པའི་སྒོ། །ཞེས་བཤད་པ་ལྟར་ལུས་དང་ངག་དང་ཡིད་ཤིན་ཏུ་མི་བསྲུན་ཞིང་འཕྱར་གཡེང་བ་དེ་དག་གིས་ནི་རེ་ཞིག་ཆོས་ཐོས་པའམ། ཁྱིམ་པའི་རྟགས་སྤངས་པའམ། ངག་ནས་ཆོས་ཀྱི་གཏམ་ཚོན་པོ་སྒྲོག་ཅིང་རེས་འགའ་ནི་དགེ་བའི་ཆོས་ལ་སྤྱོད་པ་ལྟར་སྣང་ཡང་རྒྱུན་ཆགས་པ་ཉིད་ནི་སྡིག་པའི་བསམ་སྦྱོར་དང་ཤིན་ཏུ་འདྲེས་ཤིང་རྨོངས་པའི་ཕྱིར། ཡང་ངན་སོང་དུ་འབབ་ཅིང་གཞོལ་བར་འགྱུར་ལ། དེ་ལྟ་ནའང་ངན་འགྲོ་དང་། མིའི་ལུས་རྟེན་ཙམ་པོ་པ་ལས་ཅུང་ཟད་འཕགས་ཤིང་ཐར་པའི་ས་བོན་དང་ལྡན་པས་ན་མི་ལུས་ཁྱད་པར་ཅན་ཞེས་བརྗོད་དུ་རུང་བའི་ཚུལ། ནམ་མཁའ་རིན་པོ་ཆེའི་མདོ་ལས། སེམས་ཅན་གྱི་ཁམས་ན་གང་དག་ཆོས་འདི་པ་དག་ཏུ་མ་ཞུགས་པའམ། ཞུགས་ཀྱང་རུང་སྟེ་དགེ་བ་དང་མི་དགེ་བ་འདྲེས་མར་སྤྱོད་ཅིང་འདུ་འཛི་དང་རྣམ་པར་གཡེང་བ་ལྷུར་ལེན་པས། ལུས་དང་ངག་དང་ཡིད་མི་བསྲུན་ཞིང་འཕྱར་བ། ངན་སོང་གསུམ་དུ་འབབ་ཅིང་ངན་འགྲོར་གཞོལ་བའི་ལས་ཅན་དེ་དག་ཀྱང་། སངས་རྒྱས་ཀྱི་ཐུགས་རྗེ་ཉི་མའི་འོད་ཀྱིས་གཟིགས་ཏེ་ཡུན་རིང་མོ་ཞིག་ན་ཐར་པའི་ས་བོན་དང་ལྡན་པས། དེའི་ཕྱིར་མི་ལུས་ཁྱད་པར་ཅན་ཞེས་བྱའོ། །ཞེས་དང་། སློབ་སྤྲིང་ལས། གང་ཞིག་འཁོར་བའི་འཁོར་ལོ་རྟག་ཏུ་འཁོར་གྱུར་པའི། །ནང་དུ་ཞུགས་ནས་བསྟི་བ་ཙམ་ལ་བདེར་སེམས་པ། །དེ་ནི་ངེས་པར་རིམ་གྱིས་དབང་མེད་བརྒྱ་ཕྲག་ཏུ། །འགྲོ་བ་མཉམ་དང་མི་མཉམ་ཀུན་ཏུ་འཁྱམས་པར་འགྱུར། །ཞེས་མཉམ་པ་ནི་ལྷ་དང་མི། མི་མཉམ་པ་ནི་ངན་འགྲོར་ཤེས་པར་བྱའོ། །གཉིས་པ་ནི། སྤྱིར་གནས་རིགས་དྲུག་ཏུ་འཁྱམས་ཤིང་ཁྱད་པར་དལ་བ་ཕུན་སུམ་ཚོགས་པའི་མི་མཐུན་ཕྱོགས་ལས་དང་། ཉོན་མོངས་པ་དང་སྡུག་བསྔལ་དང་རྣམ་པར་རྟོག་པས་དབྱེན་བཅོས་ཏེ་དགེ་བའི་ཕྱོགས་ལ་ཁོམ་དུ་མི་སྟེར་བ་བརྒྱད་དུ་འཁྱམས་ན་ཆོས་བསྒྲུབ་པའི་སྐབས་མེད་པར་སྟོན་པ་སྟེ། བསམ་བརླག་དེ་ནི་འདི་ནས་ཡང་ལྟུང་ལ། །ངན་སོང་གསུམ་དང་འདུ་ཤེས་མེད་པའི་ལྷ། །མཐའ་འཁོབ་དབང་པོ་མ་ཚང་ལྟ་བ་ལོག །སངས་རྒྱས་འབྱུང་བ་མེད་པ་དག་ཏུ་འཁྱམས། །ཞེས་སྨོས་སོ། །རྣམ་གྲངས་ཀྱི་སྒོ་ནས་བཞག་ན། རང་རྒྱུད་རྟེན་གྱི་མི་ཁོམ་པ་བརྒྱད་འཕྲལ་བྱུང་རྐྱེན་གྱིས་མི་ཁོམ་པ་བརྒྱད། རིས་ཆད་བློའི་མི་ཁོམ་པ་བརྒྱད་ལས། དང་པོ་དངོས་བསྟན་ནི། བཤེས་སྤྲིང་ལས། ལོག་པར་ལྟ་བ་འཛིན་དང་དུད་འགྲོ་ཉིད། །ཡི་དྭགས་ཉིད་དང་དམྱལ་བར་སྐྱེ་བ་ཉིད། །རྒྱལ་བའི་བཀའ་མེད་པ་དང་མཐའ་འཁོབ་ཏུ། །ཀླ་ཀློར་སྐྱེས་དང་གླེན་ཞིང་ལྐུགས་པ་ཉིད། །ཚེ་རིང་ལྷ་ཉིད་གང་ཡང་རུང་བར་ནི། །སྐྱེ་བ་ཞེས་བགྱི་མི་ཁོམ་སྐྱོན་བརྒྱད་པོ། །ཞེས་རང་རྒྱུད་ཀྱི་རྟེན་ཅན་བརྒྱད་ལས། དང་པོ་དམྱལ་བ་ནི། ཐང་ཅིག་སྐབས་བཙལ་མ་ཡིན་ལྕགས་བསྲེགས་གཞིར། །མཚོན་གྱི་ཆད་པ་རྩུབ་མོས་ཡང་དང་ཡང་། །སྲོག་འཕྲོག་འཆི་བར་མི་ནུས་དམྱལ་བ་པ། །ད་དུང་ཁོང་ཁྲོའི་ལས་ངན་རྙི་ལ་ཐོགས། །ཞེས་སྨོས་ནས་གང་ཞིག་སེམས་ཅན་དམྱལ་བ་པར་གྱུར་པ་དེ་ནི་ལྕགས་བསྲེགས་ཀྱི་ས་གཞི་ལ་མཚོན་གྱི་ཆད་པ་འབའ་ཞིག་གིས་ཚར་གཅོད་པ་ལ་སོགས་པའི་སྡུག་བསྔལ་དྲག་པོ་ལ་ངལ་གསོ་བའམ། བག་ཡངས་པའི་སྐབས་ཅུང་ཟད་ཀྱང་བཙལ་དུ་མེད་ཅིང་། ད་དུང་ཁོང་ཁྲོའི་རྙི་ལ་ཐོགས་པའི་ཚེའི་ཚད་ནི་དཔག་ཏུ་མེད་ན་ཆོས་ཀྱི་རྟེན་དུ་ཁོམ་པའི་གནས་སྐབས་མེད་པའོ། །དེ་བཞིན་དུ་ཡི་དྭགས་ཕོངས་པས་ཉམ་ཐག་ཅིང་། ནང་ཁྲོལ་ཚིག་པའི་གདུང་བ་དང་། དུད་འགྲོ་རྣམས་ཕན་ཚུན་ནང་དུ་བཟའ་ཞིང་། རྔོན་པས་མཐའ་དང་། གོ་ར་དང་། རྒྱ་ལ་སོགས་པའི་དམ་ལ་གཅུར་ཞིང་། མཚོན་ཆའི་ཐབས་ལ་མཁས་པས་སྲོག་འཕྲོག་པ་དང་། སྣ་འབིགས་པ་དང་། ལྕགས་ཀྱུས་འཚེ་བ་དང་། ཐ་གུས་འཆིང་བ་ལ་སོགས་འདུལ་བ་འཛིན་པའི་སྡུག་བསྔལ་བཟོད་མི་ཤེས་པས་མི་ཁོམ་པའི་ཚུལ། རྣག་ཁྲག་ཕྱི་ས་སོགས་ཀྱང་མི་རྙེད་པའི། །ཡི་དྭགས་ཕོངས་པས་ཉམ་ཐག་སྨོས་ཅི་དགོས། །ཆུ་ཀླུང་ལྗོན་པ་བལྟས་པའི་མོད་ལ་བརྐམས། །ནང་ཁྲོལ་ཚིག་པའི་སྡུག་བསྔལ་ཟད་མི་ཤེས། །སྒྲིབ་པའི་མཐུས་བྱས་ཚེ་ཚད་ངེས་པ་མེད། །དུད་འགྲོ་ཕན་ཚུན་གཅིག་ལ་གཅིག་བཟའ་ཞིང་། །རྔོན་པའི་དམ་བཞག་རྩུབ་མོས་སྲོག་འཕྲོག་དང་། །བཀོལ་ཕྱིར་འདུལ་བ་འཛིན་པས་ཉམ་ཐག་པའི། །གནས་སུ་སྐྱེ་བ་ཐོབ་ན་ཅི་བྱར་ཡོད། །ཅེས་དོན་བསྡུས་པའོ། །ཡང་། འཚོ་བའི་ལས་མཐའ་ཤིན་ཏུ་རིང་པོས་བསྲིང་། །སྐྱོ་བའི་གོ་སྐབས་མི་དབྱེ་གཟུགས་མེད་དང་། །ཐོས་བསམ་རྟེན་འགགས་འདུ་ཤེས་མེད་པའི་ལྷ། །འཆི་ཁར་ལོག་པར་ལྟ་བས་ཁོམ་ལྡན་མིན། །ཅེས་པས་འདུ་ཤེས་མེད་པ་དང་། གཟུགས་མེད་པའི་ལྷ་ནི་ཚེ་རིང་པོར་འཚོ་ཡང་ཐོས་བསམ་གྱི་རྟེན་འགགས་པས་མི་ཁོམ་པའོ། །རྐང་པ་གཉིས་པའི་ཁྱོགས་ལ་རབ་བསྟན་ཡང་། །དེ་ཡི་འདུ་ཤེས་བསོད་ནམས་མ་ཡིན་པས། །དམ་ལ་བཞག་ཅིང་གཞུངས་པའི་ཀླ་ཀློ་རྣམས། །བླང་དོར་ཤིན་ཏུ་འཆོལ་བའི་ནགས་ན་འཁྱམས། །ཞེས་སྨོས་ཏེ། གང་ཞིག་རྣམ་པ་མིའི་གཟུགས་སུ་འདུག་ཀྱང་ཆུ་དང་ནགས་མའི་མི་ལྟར་རང་གི་ངོ་བོ་དུད་འགྲོ་ལྟ་བུ་ལ། སྡིག་པའི་ལས་ཐབས་ལ་དུད་འགྲོ་ལས་ཐབས་མཁས་ཤིང་ཡིད་གཞུངས་པའི་འདུ་ཤེས་ཅན་ཀླ་ཀློ་ནི་ཆོས་ཀྱི་ཕྱོགས་ལ་བསོད་ནམས་མ་ཡིན་པའི་རྟེན་དུ་གྱུར་པས་འདུ་ཤེས་མི་ཁོམ་པའོ། །དབང་པོའི་དམ་བཅའ་ཉམས་པའི་ལྐུགས་པ་རྣམས། །འཕགས་པའི་དེད་དཔོན་དག་དང་ཕྲད་གྱུར་ཀྱང་། །བྲག་ཅའི་ཆོ་གས་བཟུང་བའི་ཅ་ཅོ་བཞིན། །བརྡའ་མི་འཕྲོད་པའི་འབྲོག་དགོན་ཆེན་པོར་གདུངས། །ཞེས་འདོམས་ནས་འདི་ལྟར་ངག་ལྐུགས་པས་ཚིག་གི་བརྡའ་མི་འཕྲོད་པའམ། ཡིད་ལྐུགས་པས་དོན་གྱི་བརྡའ་མི་འཕྲོད་པ་དག་ནི་འཕགས་པའི་དེད་དཔོན་དང་ཕུ་ནུའམ། མཛའ་བཤེས་ལྟ་བུར་གྱུར་ཀྱང་བྲག་ཅ་དང་གཏམ་བསྲེ་བ་བཞིན་དོན་དུ་གྱུར་པ་ཅུང་ཟད་ཙམ་ཡང་མེད་པས་རྟེན་མི་ཁོམ་པའོ། །སྐྱེ་བའི་རྒྱ་མཚོ་བརྒལ་བའི་གྲུ་བོ་ཆེ། །རྣམ་རིག་བ་དན་གཡོ་བ་ཐོབ་ནས་སླར། །སངས་རྒྱས་འབྱུང་ལ་མཉེས་པར་མི་བགྱིད་པའི། །ལོག་པར་ལྟ་བ་འཛིན་དེ་བདུད་ཀྱིས་གཙེས། །གང་དག་དབང་པོ་ཚང་ལ་རྣམ་རིག་ཅང་ཤེས་པར་གྱུར་ཀྱང་སངས་རྒྱས་འབྱུང་བ་ལ་མཉེས་པར་མི་བགྱིད་ཅིང་འཇིག་རྟེན་ཕ་རོལ་མེད་དོ་ཞེས་པ་ལ་སོགས་པའི་ལོག་པར་བལྟ་བ་འཛིན་པའི་མུ་སྟེགས་བྱེད་ནི་ཡིད་མི་ཁོམ་པའོ། །ཐུབ་པ་རྣམས་ཀྱིས་སྤངས་པའི་བསྐལ་པ་ཡི། །གཅོང་རོང་མུན་ནག་འཐིབས་པོར་ལྷུང་དེ་སླར། །ལྡང་བར་བརྩོན་ཀྱང་ལམ་མིན་རྒྱུན་ལྡན་ཏེ། །ཉམ་ངའི་ལྟུང་བར་འོག་ནས་འོག་ཏུ་འགྲོ །ཞེས་འདོམས་ཏེ། སངས་རྒྱས་འཇིག་རྟེན་དུ་བྱོན་པ་དེའི་ཚེ་བསྟན་པའི་སྣང་བའང་ཡོད་པས་སྒྲོན་མའི་བསྐལ་པ་ཞེས་བྱ་ལ། དེས་སྟོངས་པ་ནི་མུན་པའི་བསྐལ་པ་སྟེ། དུས་དེར་མིའི་ལུས་རྟེན་འཐོབ་ཀྱང་ལམ་མིན་རྒྱུན་ལྡན་གྱི་སྐྱེས་བུ་གཅོང་རོང་ཟབ་མོར་ལྷུང་སྟེ་རྐང་པ་ཆག་པ་ལྟར་འོག་ནས་འོག་ཏུ་འགྲོ་བ་ལས་ཐར་པའི་ཐབས་དང་བྲལ་བས་དུས་མི་ཁོམ་པའོ། །གཉིས་པ་འཕྲལ་བྱུང་རྐྱེན་གྱི་མི་ཁོམ་པ་བརྒྱད་ནི། ཡིད་བཞིན་རིན་པོ་ཆེར། དུག་ལྔ་འཁྲུགས་དང་བླུན་རྨོངས་བདུད་ཀྱིས་ཟིན། །ལེ་ལོ་ཅན་དང་ལས་ངན་མཚོ་ཆེན་བརྡོལ། །གཞན་དབང་འཇིགས་སྐྱོབ་ཆོས་ལྟར་བཅོས་པ་སྟེ། །འཕྲལ་བྱུང་རྐྱེན་གྱི་མི་ཁོམ་རྣམ་པ་བརྒྱད། །ཐར་ལམ་ཆོས་ཀྱི་སྣོད་མིན་ཕྱིན་ཅི་ལོག །ཅེས་པས། རྣམ་པ་ཙམ་དུ་རང་རྒྱུད་ཀྱི་རྟེན་ཅན་མི་ཁོམ་པའི་གནས་བརྒྱད་ལས་ཐར་ཏེ་ཆོས་སྤྱོད་པའི་ཡུལ་དུ་སྐྱེས་ཀྱང་། དུག་ལྔ་རགས་པས་རྒྱུད་མི་དགེ་བ་ལ་སྦྱར་བ་དང་། རང་རྒྱུད་བླུན་ཞིང་རྨོངས་པས་སྡིག་པའི་གྲོགས་པོའི་དབང་དུ་སོང་བ་དང་། བདུད་ཀྱི་བཤེས་གཉེན་དང་འཕྲད་ནས་ལྟ་སྤྱོད་ཕྱིན་ཅི་ལོག་དང་། ཆོས་ལ་དང་བ་ཙམ་ཡོད་ཀྱང་བརྩོན་འགྲུས་གཏན་ནས་མེད་པའི་ལེ་ལོ་ཅན་དང་། ལས་ངན་གྱི་མཚོ་བརྡོལ་བ་ལམ་དུ་ཁྱེར་མ་ཤེས་བས་བར་ཆོད་ཀྱི་དབང་དུ་སོང་བ་དང་། ཆོས་ལ་མོས་བློ་ཡོད་ཀྱང་ལུས་ངག་གཞན་དབང་དུ་སོང་བ་དང་། ལྟོ་གོས་སམ་དཔྱ་ཁྲལ་གྱིས་འཇིགས་ནས་བསྟན་པ་ལ་ཞུགས་ཀྱང་ཆོས་མིན་གྱི་སྤྱོད་པས་དུས་འདའ་བ་དང་། སེམས་རྒྱུད་ཆོས་དང་འགལ་ཡང་གཞན་ངོར་ཆོས་ལྟར་བཅོས་ནས་རྙེད་བཀུར་དང་གྲགས་པ་འཚོལ་བ་རྣམས་སོ། །གསུམ་པ་རིས་ཆད་བློའི་མི་ཁོམ་པ་བརྒྱད་ནི། སྔ་མ་ལས། འཆིང་བ་དམ་ལྡན་ཀུན་སྤྱོད་ཤིན་ཏུ་ངན། །འཁོར་བར་མི་སྐྱོ་དད་པ་ཅུང་ཟད་མེད། །མི་དགེ་སྡིག་སྤྱོད་ཆོས་ལ་སེམས་པ་མེད། །སྡོམ་དང་དམ་ཚིག་ཉམས་པ་ཞེས་བྱ་བ། །རིས་ཆད་བློ་ཡི་མི་ཁོམ་རྣམ་པ་བརྒྱད། །ཆོས་ལས་རིང་གྱུར་ཐར་ལམ་སྒྲོན་མེ་ནུབ། །ཅེས་པས། རྫས་དང་ཡོ་བྱད་དང་གཉེན་འདུན་གྱི་ཕྱོགས་ལ་ཧ་ཅང་འཆིང་བ་དམ་པ་དང་། མི་གཞི་ངན་པས་ཀུན་སྤྱོད་ལ་བསྐྱེད་འདོན་དུ་མེད་པ་སྡིག་སྦྲུལ་ལྟ་བུ་དང་། ངན་སོང་དང་འཁོར་བའི་ཉེས་དམིགས་ཇི་ཙམ་ཐོས་ཤིང་མཐོང་ནའང་ངེས་འབྱུང་གི་བློ་གཏན་ནས་མི་སྐྱེ་བ་དང་། ཆོས་སྣང་བའི་སྒོ་དད་པ་ཏིལ་འབྲུ་ཙམ་མེད་པ་དང་། སྒོ་གསུམ་ཉེ་བར་མ་ཞི་བས་སྡིག་སྤྱོད་འབའ་ཞིག་གིས་དུས་འདའ་བ་དང་། དམ་པའི་ཆོས་དང་། དེའི་ཡོན་ཏན་དང་། དགེ་བའི་ཆོས་ལ་ཅང་མི་སེམས་པ་ཁྱིས་ལྷ་ཁང་མཐོང་བ་ལྟ་བུ་དང་། བསྟན་པ་ལ་ཞུགས་ཀྱང་སོ་ཐར་རལ་ཞིང་བྱང་སྡོམ་ཉམས་པའམ། དབང་བཞི་ཐོབ་ནས་བླ་མ་དང་རྡོ་རྗེའི་སྤུན་ལ་བརྙས་པ་ལ་སོགས་པའི་དམ་ཚིག་ཉམས་པ་སྟེ། བརྒྱད་ཚན་གཉིས་པོ་འདི་དག་ལ་དཔྱད་པ་ལེགས་པར་ཞུགས་ནས་བླང་དོར་མ་བྱས་ན་མིར་གྱུར་པ་ཙམ་ནི་སོས་དལ་བ་ཙམ་ལས་ཆོས་བསྒྲུབ་པ་ལ་དལ་བའི་རྟེན་དུ་རུང་བར་དཀའ་ཞིང་། ཁྱད་པར་ཆོས་ཀྱི་རྗེས་སུ་ཞུགས་པའམ། ལས་མཐའ་ལོག་པའི་གང་ཟག་ཕལ་ཆེར་ཆོས་དང་ཤིན་ཏུ་རིང་ཞིང་ཐར་པའི་ལམ་དང་རྒྱབ་གྱེས་པའི་ཚུལ། མྱང་འདས་ལས། རིགས་ཀྱི་བུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་འོག་ཏུ། ནང་འཁྲུགས་དང་། ཡུལ་བཅོམ་པ་དག་འབྱུང་བར་འགྱུར་ཏེ། དུས་ངན་པ་དེའི་ཚེ་མུ་གེའི་ཉེས་པས་ཕལ་ཆེར་རབ་ཏུ་འབྱུང་ཞིང་མགོ་རེག་ཏུ་འགྱུར་ཏེ། དེ་དག་གིས་དགེ་སློང་ཚུལ་ཁྲིམས་དང་། ཆོ་ག་དང་། ཡོན་ཏན་དང་། སྤྱོད་པ་ཕུན་སུམ་ཚོགས་པ་དག་བསྐྲོད་པར་འགྱུར། ཞེས་དང་། མདོ་ཏིང་ངེ་འཛིན་མཆོག་ལས། ལོ་ལྔ་བརྒྱ་ཕན་ཆད་བརྒྱད་བརྒྱ་ཚུན་ཆད་ངའི་ཉེ་གནས་རྣམས་ཁྱིམ་པའི་གོས་གྱོན་ནས། བ་ལང་དང་། ལུག་དང་། བྱི་ལ་དང་། བོང་བུ་དང་རྟ་གསོ་ཞིང་འབྲུ་མང་པོ་གསོག་སྟེ། རང་གི་ལག་དར་ཞིང་རང་བཟའ་བ་དང་། བྲན་ཕོ་དང་བྲན་མོའང་གསོ་བར་འགྱུར་ཏེ། དེའི་ཚེ་སྟོང་ཕྲག་སྟོང་ལ་སྟོང་ཕྲག་གཅིག་གིས་དགེ་སྦྱོང་གི་འབྲས་བུ་བཞི་ཐོབ་པར་འགྱུར་རོ། །ལོ་བརྒྱད་བརྒྱ་ཕན་ཆད་ནས་ལོ་སྟོང་ཚུན་ཆད་ནི་ངའི་ཉེ་གནས་རྣམས་སྡིག་པའི་ཆོས་བསླབ་སྟེ། རྒྱལ་པོ་དང་། རྒྱལ་བུ་དང་། བློན་པོ་དང་། ཁྱིམ་བདག་གྲོགས་པོར་བསྟེན་ཅིང་། ཕན་ཚུན་ཐ་ན་འཕྲིན་གྱིས་འདྲུལ་ཞིང་། ཞིང་རྨོ་བརྐོ་བྱེད། འབྲུ་གཟན་མང་པོ་དང་། གསེར་དང་དངུལ་དང་། རིན་པོ་ཆེ་སྣ་བདུན་གསོག་ཅིང་། ཤ་ཟ་ཆང་འཐུང་སྟེ། སྨད་འཚོང་མ་ལྟར་གོས་སྦུ་གུ་ཅན་གྱོན་ཤིང་འདྲིད་པ་དང་། གླུ་པའི་ལས་བྱེད། ཅེས་དང་། ལོ་སྟོང་ཕན་ཆད་ཆེ་ཐང་དུ་འཁྲུགས་ཏེ་ངའི་ཉེ་གནས་རྣམས་ཆོས་གོས་གྱོན་ཡང་ཤིང་གི་ཁ་ལ་འཕན་བཏགས་པ་འདྲ་སྟེ། གཟི་བྱིན་ཡང་མེད། ཁྱིམ་པས་མཐོང་ནའང་བཀུར་སྟི་མི་བྱེད་ཤན་པ་དང་འདྲ་བར་འགྱུར་རོ། །ཞེས་པ་ལ་སོགས་རྒྱ་ཆེར་གསུངས་པའི་ཕྱིར་རོ། །དེའི་ཕྱིར་མི་ཁོམ་པའི་གནས་དངོས་བསྟན་བརྒྱད་དུ་མ་སྐྱེས་ཤིང་། དེ་དང་རྗེས་སུ་མཐུན་པ་བཅུ་དྲུག་དུའང་མ་གྱུར་ལ། རེ་ཞིག་གྱུར་ཀྱང་དམ་པའི་བླ་མ་དང་ཟབ་མོའི་མན་ངག་ལ་བརྟེན་ནས་བློ་བཅོས་སུ་ཡོད་པའི་སྐབས་འདིར་བརྩོན་པས་ཉིན་མཚན་འདའ་བར་མཛོད་ཅིག །ཅེས་དོན་བསྡུ་བ་ནི། སྡིག་སྡུག་འཐོར་རླུང་འཁྲུགས་པའི་གནས་རིགས་སུ། །ངལ་ཞིང་སྐྲག་བཅས་བསོད་ནམས་རྙོག་པ་ཅན། །ཆོས་ལ་ཕྲག་པ་དོག་པའི་མི་ཁོམ་བརྒྱད། །བསམས་ནས་རང་གི་དལ་བ་དོན་ཡོད་མཛོད། །ཅེས་གདམས་སོ། །གསུམ་པ་དལ་འབྱོར་གྱི་རང་བཞིན་ངོས་བཟུང་བ་ལ་གཉིས། ངོ་བོ་དལ་བ་བཤད་པ་དང་། ཁྱད་པར་གྱི་ཆོས་འབྱོར་པ་བཤད་པའོ། །དང་པོ་ནི། དེ་ལྟར་མི་ཁོམ་པའི་གནས་རིགས་ཉི་ཤུ་རྩ་བཞིས་ལུས་སེམས་ལ་དབྱེན་བཅོས་ཏེ་བྲེལ་བ་ལས་ལྡོག་པས་ན་དལ་བ། ལུས་རྟེན་དང་བློ་ཡང་དག་པའི་དོན་ལ་འབྱོར་པས་ན་འབྱོར་པའོ། ཁྱད་པར་ཐེག་པ་ཆེན་པོ་བླ་ན་མེད་པའི་དལ་འབྱོར་ནི། ནམ་མཁའ་རིན་པོ་ཆེའི་མདོ་ལས། བཅོམ་ལྡན་འདས་དལ་འབྱོར་ཇི་ལྟར་བལྟ་བ་བགྱི། བཀའ་སྩལ་པ། སེམས་རྣམ་པར་རྟོག་པས་དབྱེན་བཅོས་ཏེ་གཡེང་བ་ནི་བྲེལ་བ་ཞེས་བྱའོ། །སེམས་རྣམ་པར་རྟོག་པ་ཞི་ནས་རང་བཞིན་དུ་གནས་པ་ནི་དལ་བ་ཞེས་བྱའོ། །འབྱོར་པ་ནི་སེམས་ཀྱི་རང་བཞིན་ཤེས་པ། བློ་ཡང་དག་པའི་དོན་ལ་འབྱོར་པས་ན་འབྱོར་པ་ཞེས་བྱའོ། །ཞེས་སོ། །འདིར་རེ་ཞིག་སའི་སྙིང་པོའི་མདོ་ལས། འཁོར་བར་མི་ཉིད་སྐྱེ་བར་དཀའ་བའི་གང་ཟག་བཅུ་ཡོད་དེ། གང་ཞེ་ན། དགེ་བའི་རྩ་བ་མི་བསྐྱེད་པ་དང་། བསོད་ནམས་ཀྱི་ཚོགས་མི་གསོག་པ་དང་། སྡིག་པའི་གྲོགས་པོའི་རྗེས་སུ་སྤྱོད་པ་དང་། ཉོན་མོངས་པའི་ཉིང་མཚམས་སྦྱོར་བ་དང་། ཚེ་ཕྱི་མའི་སྡུག་བསྔལ་ལ་མི་འཇིགས་པ་དང་། ཉོན་མོངས་པས་སེམས་འཁྲུགས་པ་དང་། ལེ་ལོ་དང་གཡེང་བས་ཆོས་ལས་རྟག་ཏུ་གཡེལ་བ་དང་། སངས་རྒྱས་ཀྱི་བཀའ་ལ་ཞུགས་ཀྱང་རྗེས་སུ་མི་སྤྱོད་པ་དང་། ལོག་པར་ལྟ་བའི་རྗེས་སུ་འཇུག་པ་དང་། ལོག་པར་ལྟ་བ་དམ་དུ་འཛིན་པའོ། །ཞེས་གསུངས་པ་ལྟར་བྱེད་པ་ངན་པའི་རྒྱུ་འབྲས་ཀྱི་ལས་འཕྲོ་ལས་ཐར་ཏེ། ད་ལྟ་དཀར་པོ་དགེ་བ་ལ་སྤྱོད་པའི་ལས་ཀྱི་འཕྲོ་མཐོ་རིས་ཀྱི་རྟེན་ཁྱད་པར་ཅན་ཐོབ་ནས་དལ་བའི་ངོ་བོ་ཉིད་དུ་གྱུར་པ་ནི་བསོད་ནམས་དམ་པའི་མཛོད་ཡིན་ཏེ་ཡབ་སྲས་མཇལ་བའི་མདོ་ལས། མི་ཁོམ་བརྒྱད་པོ་ཐམས་ཅད་རབ་སྤངས་ཤིང་། །དལ་བ་ཕུན་ཚོགས་རྙེད་དཀའ་ཐོབ་གྱུར་ནས། །བདེ་གཤེགས་བསྟན་ལ་དད་པ་རྙེད་གྱུར་པའི། །མཁས་པ་རྣམས་ཀྱི་རིག་པའི་རྣལ་འབྱོར་སྤྱོད། །ཅེས་དང་། དྲན་པ་ཉེར་བཞག་ལས། དགའ་བྱེད་ཁྱོད་ཀྱིས་ལེགས་པར་མཐོང་བ་དང་། ལེགས་པར་ཐོས་པ་གང་ཡིན་པ་དེ་ནི་དལ་བ་བསམས་པ་ལས་བྱུང་བ་ཇི་ལྟ་བ་བཞིན་དུ། མི་རྣམས་ཀྱང་བདེ་བ་དང་ལེགས་པའི་ཆོས་གང་ཡིན་པ་དེ་དག་ཐམས་ཅད་འགྲུབ་པར་བལྟའོ། །ཞེས་སོ། །གཉིས་པ་དེ་ལ་འབྱོར་པ་བཅུ་ཇི་ལྟར་ལྡན་པ་ནི། ཡུལ་དབུས་ས་གཞི་གཙང་མར་དབང་པོ་དང་། །ཡན་ལག་རབ་རྫོགས་དད་པའི་གནས་ལ་དད། །ལས་མཐའི་མེ་ཏོག་སྡིག་ཏོས་མ་བཅོམ་པའི། །མིར་གྱུར་དཔག་བསམ་ལྗོན་པ་ཤིན་ཏུ་དཀོན། །རྒྱལ་བ་ཨུ་དུམ་ཝཱ་ར་འཇིག་རྟེན་བྱོན། །ཆོས་ཀྱི་མེ་ཏོག་ཁ་བྱེ་བསྟན་པའི་ཚལ། །ནུབ་པ་མེད་པར་གནས་ལ་ཡང་དག་ཞུགས། །དམ་པའི་གྲིབ་བསིལ་ལ་བརྟེན་དེ་བས་ཉུང་། །ཞེས་སྨོས་ཏེ། དལ་བ་ཕུན་སུམ་ཚོགས་པ་བཅུ་གཉིས་བསྟན་པའི་མདོ་ལས། མི་ཉིད་ཐོབ་པ་དང་། འཕགས་པའི་ཡུལ་དུ་སྐྱེས་པ་དང་། དབང་པོ་ཚང་བ་དང་། ལས་ཀྱི་མཐའ་མ་ལོག་པ་དང་། གནས་ལ་དད་པ་སྟེ་ལྔ་ནི་བདག་ཕུན་སུམ་ཚོགས་པ་ཡིན་ནོ། །སངས་རྒྱས་བྱོན་པ་དང་། ཆོས་གསུངས་པ་དང་། དམ་པའི་ཆོས་གནས་པ་དང་། གཞན་དག་ཀྱང་དེ་ལ་སྤྱོད་པ་དང་། ཆོས་བྱེད་པ་ལ་གཞན་བརྩེ་བ་སྟེ་ལྔ་ནི་གཞན་ཕུན་སུམ་ཚོགས་པའོ། །ཞེས་གསུངས་པ་ལྟར། རང་འབྱོར་ལྔ་ནི་བདག་ཉིད་ལ་ལྟོས་པ་སྟེ། ལྷ་ཆོས་ཀྱི་རྟེན་མིའི་ལུས་ཁྱད་པར་ཅན་ཐོབ་པས་འབྱོར་པ། བསྟན་པ་གནས་པའི་ཡུལ་དབུས་སུ་སྐྱེས་པས་འབྱོར་པ། ཐོས་བསམ་གྱི་རྟེན་དབང་པོ་ཚང་བས་འབྱོར་པ། ལས་ཀྱི་མཐའ་མ་ལོག་པར་རྟག་ཏུ་དགེ་བ་ལ་སྤྱོད་པས་འབྱོར་པ། དད་པའི་གནས་རྒྱལ་བའི་བསྟན་པ་ལ་དད་པས་འབྱོར་པའོ། །གཞན་འབྱོར་ལྔ་ནི་རྐྱེན་ལ་ལྟོས་པ་སྟེ་ད་རེས་སངས་རྒྱས་འཇིག་རྟེན་དུ་བྱོན་པས་གཞན་འབྱོར་པ། ཆོས་ཀྱི་འཁོར་ལོ་གསུམ་ལ་སོགས་པ་བསྐོར་བས་གཞན་འབྱོར་པ། བསྟན་པའང་ད་ལྟ་མ་ནུབ་ཙམ་དུ་གནས་པས་གཞན་འབྱོར་པ། བསྟན་པ་ལ་ཞུགས་པས་ཀྱང་གཞན་འབྱོར་པ། ཐར་པའི་ལམ་མཁན་དགེ་བའི་བཤེས་གཉེན་ལ་བརྟེན་ས་ཡོད་པས་ཀྱང་གཞན་འབྱོར་པ་སྟེ། དེ་ལྟར་དལ་འབྱོར་གྱི་ཆོས་བཅོ་བརྒྱད་པོ་ཡོངས་སུ་མ་ཚང་ན་ཆོས་བསྒྲུབ་པའི་རྟེན་ཁྱད་པར་ཅན་དུ་མི་རུང་བས་ན་སྤྱོད་འཇུག་ལས། མི་ལུས་ཐོབ་པར་མ་གྱུར་ན། །སྡིག་པ་འབའ་ཞིག་དགེ་བ་མེད། །གང་ཚེ་དགེ་སྤྱད་སྐལ་ལྡན་ཡང་། །དགེ་བ་བདག་གིས་མ་བྱས་ན། །ངན་སོང་སྡུག་བསྔལ་ཀུན་རྨོངས་པས། །དེ་ཚེ་བདག་གིས་ཅི་བྱར་ཡོད། །ཅེས་སོ། །བཞི་པ་རྙེད་པར་དཀའ་བའི་ཚུལ་ནི། གང་ཕྱིར་རང་ཉིད་འབྱོར་པའི་ལྗོན་པ་དང་། །གཞན་དབང་རྐྱེན་གྱིས་འབྱོར་པའི་ཨུ་དུམ་ཝཱར། །གཉིས་ཀའི་ཡོན་ཏན་འབྱོར་པ་རྣམ་པ་བཅུས། །དལ་བ་བརྒྱད་ལ་འཁྱུད་འདི་སླར་མི་རྙེད། །ཅི་ཕྱིར་རུས་སྦལ་མགྲིན་དང་གཉའ་ཤིང་དཔེ། །གྲངས་ནི་མི་དང་དུད་འགྲོ་ཉིན་མཚན་གྱི། །སྐར་མས་ཕྱེ་བ་དེ་སྙེད་ཡི་དྭགས་དང་། །དམྱལ་བ་རྣམས་ལ་རིམ་པས་ཤེས་པར་འགྱུར། །ཞེས་སྨོས་ནས། རང་འབྱོར་ནི་དཔག་བསམ་གྱི་ལྗོན་ཤིང་ཙམ་དུ་དཀོན་ན། གཞན་འབྱོར་ནི་དེ་བས་ཀྱང་དཀོན་པ་ཨུ་དུམ་ཝཱ་ར་ལྟ་བུ་སྟེ། རྟོགས་པ་བརྗོད་པའི་མདོ་ལས། མཚོ་ཆེན་པོ་མ་དྲོས་པ་འདས་པའི་བྱང་ཕྱོགས་ན་རི་རྩེ་ལྔ་པ་ཞེས་བྱ་བ་དེའི་ཕ་རོལ་ན་ཨུ་དུམ་ཝཱ་རའི་ཚལ་ཡོད་དེ། ནམ་སངས་རྒྱས་བཅོམ་ལྡན་འདས་དག་དགའ་ལྡན་གྱི་ལྷའི་རིས་ནས་བབས་ཏེ་ཡུམ་གྱི་ལྷུམས་སུ་ཞུགས་པ་དེའི་ཚེ་ཚལ་དེ་ཁ་འབུ་བར་འགྱུར་རོ། །ནམ་ཡུམ་གྱི་ལྷུམས་ནས་བལྟམས་པ་དེའི་ཚེ་ཚལ་དེ་ཁ་བྱེ་བར་འགྱུར་རོ། །ནམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་དེའི་ཚེ་ཚལ་དེའི་མེ་ཏོག་ཀྱང་རབ་ཏུ་རྒྱས་པར་འགྱུར་རོ། །ནམ་ཚེའི་འདུ་བྱེད་བོར་བ་དེའི་ཚེ་ཚལ་དེ་རྙིངས་པར་འགྱུར་རོ། །ནམ་ཡོངས་སུ་མྱ་ངན་ལས་འདས་པ་དེའི་ཚེ་ཚལ་དེའི་ལོ་མ་དང་མེ་ཏོག་དང་འདབ་མ་དང་འབྲས་བུ་ཡང་ལྷགས་པར་འགྱུར་རོ། །ཞེས་དང་། སྙིང་པོའི་ལེའུ་ལས་ཀྱང་། སངས་རྒྱས་རྣམས་འཇིག་རྟེན་དུ་འབྱུང་བ་ནི་རྙེད་པར་དཀའ་སྟེ། ཨུ་དུམ་ཝཱ་རའི་མེ་ཏོག་དཔེར་བརྗོད་པ་དང་མཚུངས་སོ། །ཞེས་སོ། །དེ་གཉིས་ཀ་དལ་བའི་རྟེན་ལ་ཡོངས་སུ་རྫོགས་པའི་སྐྱེས་བུ་ལ་ནི་མི་ལུས་རིན་པོ་ཆེ་ཞེས་བརྗོད་ཀྱིས། རྙེད་པར་དཀའ་བའི་དཔེ་ནི། བཤེས་པའི་སྤྲིང་ཡིག་ལས། རྒྱ་མཚོ་གཅིག་གནས་ཞེས་པ་ལ་སོགས་པའི་དོན་མདོ་སྡེ་ཉིད་ལས་རྒྱས་པར་བསྟན་ཏེ། དགེ་སློང་དག་འཇིག་རྟེན་རྒྱ་མཚོ་གཅིག་ཏུ་གྱུར་པའི་ནང་ན་རུས་སྦལ་ལོང་བ་ཚེ་རིང་བ་ཡུན་རིང་པོར་འཚོ་བ་ཞིག་གནས་ཤིང་དེ་ལོ་བརྒྱ་འདས་ནས་ལན་གཅིག་གྱེན་དུ་འབྱུང་ལ། རྒྱ་མཚོ་ཆེན་པོ་དེ་ན་གཉའ་ཤིང་བུག་པ་གཅིག་ཕུག་པ་གཅིག་ཡོད་པ་དེ་ཤར་གྱི་རླུང་གིས་བདས་ན་ནི་ནུབ་ཕྱོགས་སུ་འགྲོ། །ནུབ་ཀྱི་རླུང་གིས་དེད་ན་ནི་ཤར་དུ་འཕྱོ། །དེ་བཞིན་དུ་ཕྱོགས་མཚམས་ཐམས་ཅད་དུ་འཕྱོ་བ་གཅིག་ཡོད་པའི་བུ་གར་རུས་སྦལ་གྱི་མགྲིན་པ་དེ་ཆུད་དམ་མི་ཆུད་ཅེས་གསུངས་པས། འཁོར་རྣམས་ཀྱིས། རྒྱ་མཚོ་ཁ་ཆུང་ནའང་ཆུད་སྲིད་ཀྱི་རྒྱ་མཚོ་ཁ་ཆེ། གཉའ་ཤིང་ཕྱོགས་གཅིག་ཏུ་སྡོད་ཅིང་བུ་ག་མང་ནའང་ཆུད་སྲིད་ཀྱི། ཤར་དང་ནུབ་དང་ལྷོ་བྱང་དུ་འཕྱོ་ཤིང་བུ་ག་གཅིག་ལས་མེད། རུས་སྦལ་ཙོག་གེ་མི་སྡོད་པར་དུས་ཐམས་ཅད་དུ་རྒྱ་མཚོའི་ཁར་སྙོགས་ཤིང་མིག་དང་ལྡན་ན་ཆུད་སྲིད་ཀྱིས་ལོ་བརྒྱ་བརྒྱ་ན་ཐེངས་རེ་ལས་མི་ཡོང་ཞིང་མིག་མེད་པའི་ཕྱིར་ཡེ་མི་ཚུད་དོ་ཞེས་ཞུས་སོ། །དགེ་སློང་དག་གང་རུས་སྦལ་ལོང་བ་དེ་གྱེན་དུ་འབྱུང་བའི་མགྲིན་པ་གཉའ་ཤིང་དེའི་བུ་གར་ཆུད་པར་འགྱུར་བའི་དུས་དེ་ཡོད་ཀྱིས། དགེ་སློང་དག་མིར་སྐྱེ་བ་ཐོབ་པ་ནི་དེ་བས་ཀྱང་ཆེས་དཀའ་བར་ང་སྨྲའོ། །ཞེས་དང་། དེ་ལྟར་ཡིན་གྱིས་དལ་བ་འདི་དོན་མེད་པར་མ་བྱེད་ཅིག །མི་ཁོམ་པར་གྱུར་ན་ནི་ཕྱིས་གསོར་མི་རུང་བར་འགྱུར་ཏ་རེ། ཞེས་པ་དང་ཚུལ་མཚུངས་པ་མེ་ཏོག་གི་ཚོམས་ལས་ཀྱང་རྒྱ་ཆེར་གསུངས་པ་ཡིན་ནོ། །དེ་ཙམ་དུ་མི་ལུས་ཐོབ་པར་དཀའ་ན། མི་མང་པོ་འདི་ཙམ་འདུག་པ་སྙམ་ན། སྤྱིར་ཁོམ་ལྡན་གྱི་མི་ལུས་ཁབ་རྩེར་ཡུངས་འབྲུ་ཆགས་པ་ལྟ་བུ་ཡིན། ཁྱད་པར་འགྲོ་བ་གཞན་གྱི་གྲངས་ལ་བསམས་ན་མིའི་ལུས་རྟེན་ཙམ་ཐོབ་པ་ཡང་དཀའ་བའི་ཚུལ། འདི་ལྟར་མིའི་ལུས་ཉིན་མོའི་སྐར་མ་ཙམ་ལ། དུད་འགྲོ་ནི་མཚན་མོའི་སྐར་མ་ཙམ་མོ། །དུད་འགྲོ་ནི་ཉིན་མོའི་སྐར་མ་ཙམ་ལ། ཡི་དྭགས་ནི་ནུབ་མོའི་སྐར་མ་ཙམ་མོ། །ཡི་དྭགས་ཀྱང་ཉིན་མོའི་སྐར་མ་ཙམ་ལ། དམྱལ་བ་ནི་ནུབ་མོའི་སྐར་མ་ཙམ་སྟེ་དེ་སྐད་དུ། དུད་འགྲོ་ནི་ཕྱིའི་རྒྱ་མཚོ་ལ་ཆང་གི་སྦང་མ་ཙམ་ཡོད། ཡི་དྭགས་ནི་ཁ་བ་བུ་ཡུག་འཚུབས་པ་ཙམ་ཡོད། དམྱལ་བ་ནི་ས་ཆེན་པོའི་རྡུལ་ཕྲ་རབ་ཀྱི་གྲངས་དང་མཉམ་པ་ཙམ་ཡོད་ཅེས་གསུངས་པ་ཡིན་ནོ། །འདི་ནི་རིག་པས་ཀྱང་ཤེས་ཏེ། ནགས་ཚལ་གཅིག་གམ། ཆུ་ཀླུང་གཅིག་གམ། སྦྲང་ཚང་གཅིག་གམ། ཉི་ཟེར་གཅིག་ལ་མཐོང་བའི་སྲོག་ཆགས་ལ་ལྟོས་ན། སྣོད་ཀྱི་འཇིག་རྟེན་ཐམས་ཅད་མི་མེད་པ། གྲོང་ཁྱེར་མེད་པའི་སྟོང་པ་ཡུལ་ཡུལ་བ་ལྟ་བུ་ཡིན་ཏེ། མི་ལུས་ཐོབ་པ་འཁོར་ལོས་སྒྱུར་བའི་རྒྱལ་པོ་ལས་ཉུང་ངོ་། །མི་རྣམས་ལ་བསམས་ན་གྲོང་ཁྱེར་ཆེན་པོ་གཅིག་ཏུ་ལྟད་སྟོན་ལ་ཚོགས་པ་རྒྱ་དཀར་ནག །མོན་ལྷོ་བལ། ཞང་ཞུང་ཁ་ཆེ། ཧོར་སོག་གི་རིགས་ལ་སོགས་པ་མང་པོའི་ཁྲོད་ན་སངས་རྒྱས་ཀྱི་བསྟན་པ་ལ་ཞུགས་པའམ། རྗེས་སུ་སློབ་པའམ། དད་པ་ཅན་ལས་འབྲས་ལ་བླང་དོར་བྱེད་པའང་སངས་རྒྱས་འཇིག་རྟེན་དུ་བྱོན་པ་ལས་དཀོན་པར་འདུག་པའི་ཚུལ་ལ་བསམས་ཏེ་རང་ལ་རང་གིས་སྤྲོ་བ་བསྐྱེད་ནས་དལ་འབྱོར་ཆུད་མ་ཟོས་པའི་ཐབས་ལ་འབད་དགོས་ཏེ། འདུལ་བ་རྣམ་འབྱེད་ལས། །དགེ་སློང་དག །ངན་སོང་བའི་འགྲོ་བ་ལ་ལྟོས། ཕྱི་ཕྱིར་མི་ཉིད་ཀྱི་དངོས་པོ་ཐོབ་པའང་ཤིན་ཏུ་དཀའོ། །ལོག་པར་ལྟ་བའི་སྟོན་པ་འདི་དག་ལ་ལྟོས། ཡང་དག་པའི་དགེ་བའི་བཤེས་གཉེན་དང་ཕྲད་པར་རབ་ཏུ་དཀའོ། །ཚུལ་ཁྲིམས་དང་རྣམ་པར་གྲོལ་བ་ལས་ཉམས་པའི་ཚུལ་ཁྲིམས་འཆལ་བ་འདི་དག་ལ་ལྟོས། སྦྱངས་པའི་ཡོན་ཏན་ལ་གནས་པས་གཅིག་ཏུ་དགེ་བའི་ཆོས་བསྒྲུབ་ཅིང་། ཤིང་དྲུང་ངམ་དགོན་པའི་གནས་སུ་སྤྲོ་བས་ཚེ་འདའ་བར་གྱིས་ཤིག །ཅེས་གསུངས་སོ། །ལྔ་པ་ཕན་ཡོན་གྱི་སྒོ་ནས་སྤྲོ་བ་བསྐྱེད་ཅིང་དལ་འབྱོར་ཐོབ་དུས་ཆོས་ལ་འབད་དགོས་པའི་དུས་ཡིན་པར་གདམས་ནས་དོན་བསྡུ་བ་ནི། དེ་ཕྱིར་དལ་བའི་གྲུ་ཆེན་འཛིན་པའི་དུས། །སྡུག་བསྔལ་ཆུ་གཏེར་ཕ་མཐའ་མ་བརྒལ་ན། །ཆོས་ལམ་མགྲོན་པོས་གཉེར་ཞིང་སྐབས་བཙལ་བའི། །མཉན་པ་འབྲས་མེད་བགྱིད་ལ་ཕྱོགས་པ་ཡིན། །ཞེས་སྨོས་ནས། འདི་ལྟར་འཁོར་བའི་རང་བཞིན་ནི་སྡུག་བསྔལ་གྱི་རྒྱ་མཚོ་མཐའ་ཡངས་ལ་གཏིང་ཟབ་པ་ཡིན་ཏེ། དེ་ལས་ངེས་པར་སྒྲོལ་བའི་རྟེན་དལ་འབྱོར་གྱི་གྲུ་བོ་ཆེ་ནི་ད་རེས་བཟུང་། དེའི་བརྟེན་པ་རྣམ་པར་ཤེས་པ་ལས་སུ་རུང་བ་དང་ཕན་ཚུན་རྟེན་ཅིང་འབྲེལ་འབྱུང་ཚོགས་པ་ནི་ལྷ་ལས་ལྷག་པའི་ལུས་སུ་བཤད་དེ། ལྷའི་གནས་རྣམས་ནི་གནས་རིགས་ལ་ང་རྒྱལ་དུ་བྱེད་པས་བདེན་པ་མངོན་པར་མི་རྟོགས། ཐེག་པ་ཆེ་ཆུང་ཐམས་ཅད་ཀྱི་རྟེན་འཛམ་བུའི་གླིང་པ་ཁོ་ན་ཡིན་པས་བདག་ཅག་གི་སྟོན་པས་ཀྱང་གྲོང་ཁྱེར་སེར་སྐྱར་གཤེགས་པའི་ཕྱིར་ན། བདག་གིས་རྙེད་པའི་མི་ལུས་རིན་པོ་ཆེ་འདི་ངེས་པ་ཉིད་དམ། རྨི་ལམ་མིན་ན་དགའ་བ་ལ་སྙམ་པ་ཙམ་དུ་སྤྲོ་བ་བསྐྱེད་པར་བྱ་སྟེ། ལུང་རྣམ་འབྱེད་ལས། མཽངྒལ། འདི་ལ་གཅིག་ཏུ་བསམ་པར་བྱ་བ་ནི་དལ་བ་སྟེ་སྤྲོ་བས་རྗེས་སུ་དྲན་པར་གྱིས་ཤིག །ཅེས་དང་། ཁྱད་པར་དེད་དཔོན་གྱི་བླ་མ་དམ་པས་གཟིངས་ཀྱི་ཁ་ལོ་སྒྱུར་བའི་སྐབས་འདིར་མ་འབད་ན། སྐྱེ་རྒ་ན་འཆིའི་ཆུ་སྲིན་གྱི་ལྟོ་བ་ནས་ནམ་ཡང་ཐར་པའི་སྐབས་མེད་དེ། སྤྱོད་འཇུག་ལས། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱིས་ནས་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་སོ། །ཡོན་ཏན་རིན་པོ་ཆེའི་མཛོད་ལས། དལ་འབྱོར་གྱི་ཚོམས་རྣམ་པར་བཞག་པ་སྟེ་རབ་བྱེད་དང་པོའི་འགྲེལ་པའོ།། །།དོན་གཉིས་པ་འདུས་བྱས་མི་རྟག་པའི་རང་བཞིན་བཤད་པ་ལ་གཉིས། སྤྱིར་སྣོད་དང་བཅས་པའི་འཇིག་རྟེན་མི་རྟག་པར་བཤད་པ་དང་། སྒོས་བཅུད་ཀྱི་འགྲོ་བ་མི་རྟག་པར་བཤད་པའོ། །དང་པོ་ནི། སྲིད་པ་བརྟན་གཡོ་ཆགས་གནས་འཇིགས་སྟོང་བཞིའི། །ངོ་བོས་བསྐལ་པའི་ཚད་དུ་བཏགས་པའང་། །འཇིག་པའི་རྟེན་གྱུར་མིང་གིས་སྨ་ཕབ་པའི། །ཆད་པ་གཅོད་ལ་མེ་བདུན་ཆུ་གཅིག་འོང་། །ཞེས་སྨོས་ཏེ། སྣོད་ཀྱི་འཇིག་རྟེན་ལ་ཆགས་པ་དང་། གནས་པ་དང་། འཇིག་པ་དང་། སྟོངས་པའི་བསྐལ་པ་བཞི་ཡོད་པ་ལས། དང་པོ་ནི། རྟེན་གཞི་ནི་འབྱུང་བ་ལྔ་ཡིན་ལ། རྟེན་ནི་རི་ལ་སོགས་པ་དང་། བརྟེན་པ་ནི་སེམས་ཅན་རྣམས་སོ། །དེ་སྐད་དུ་སྡུད་པ་ལས། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན། །ཞེས་པ་ལྟར། ནམ་མཁའི་རང་བཞིན་སྟོང་ལ་གོ་འབྱེད་པའི་ཀློང་དུ། རྣམ་པར་སྲ་བྱེད་ལ་སོགས་རླུང་དྲུག་གི་བྱེད་ལས་སྟོབས་སུ་གྱུར་ནས། རླུང་གི་རྡོ་རྗེ་རྒྱ་གྲམ་གང་གིས་ཀྱང་མི་གཞིག་པ་ཆགས་པའི་སྟེང་དུ་ཆུའི་དཀྱིལ་འཁོར་རྟེན་བྱེད་རླུང་གི་མུ་ཁྱུད་ཅན་རྡོ་རྗེ་ལྟར་སྲ་བ་ཆགས། དེའི་སྟེང་དུ་དབང་ཆེན་གསེར་གྱི་ས་གཞི་ཁ་དོག་སེར་པོ་མཚོ་ལ་དར་ཆགས་པ་ལྟར་གྱུར་པ་ནི་རྟེན་གཞིའོ། །རྟེན་ནི་ཆུ་དང་ས་བསྲུབས་པའི་སྤྲིན་ཆར་འཁྲུགས་པའི་ལྦུ་བའི་དྭངས་མ་ལས་རི་དང་གླིང་དུ་སྲིད་པ་ཡིན་ཏེ། དེའང་དབུས་ཀྱི་རི་དབང་ལྷུན་པོ་ནི་ཤར་ཤེལ་ལམ་དངུལ། ལྷོ་བཻ་ཌཱུརྱ། ནུབ་པདྨ་རཱ་ག །བྱང་གསེར་ལས་གྲུབ་པས་དེའི་མདངས་ཀྱིས་ཕྱོགས་སོ་སོའི་ནམ་མཁའ་འང་དེ་ལྟར་སྣང་ངོ་། །ལྷུན་པོ་ནི་ཆུ་ལས་དཔག་ཚད་བརྒྱད་ཁྲི་འཕགས་ཤིང་ནང་དུའང་དེ་སྙེད་ནུབ་པའོ། །དེ་ལ་གསེར་གྱི་རི་བདུན་གྱིས་བསྐོར་བ་ལས། རི་ནང་མ་ནི་ཤིང་རྟའི་གཉའ་ཤིང་ལྟར་རྩེ་མོ་དྲང་བས་ན་གཉའ་ཤིང་འཛིན་ནོ། །རིམ་བཞིན་དེ་ལས་ཕྱི་མ་ཕྱི་མ་ཕྱེད་ཕྱེད་ཀྱི་དམའ་བའི། གཤོལ་མདའ་ལྟར་རྩེ་མོ་དྲང་བས་གཤོལ་མདའ་འཛིན་ནོ། །སེང་ལྡེང་གི་ནགས་ཚལ་ཡོད་པས་སེང་ལྡེང་འཛིན་ནོ། །རྩེ་མོ་མཛེས་པས་བལྟ་ན་སྡུག་གོ །སྟེང་ན་བྲག་རྟའི་རྣ་བ་ལྟ་བུ་ལོགས་སུ་དཔྱངས་པས་རྟ་རྣའོ། །རྩེ་མོ་ནང་དུ་ཅུང་ཟད་འདུད་པས་རྣམ་འདུད་དོ། །ཐམས་ཅད་ཀྱི་མཐའ་མར་མུ་ཁྱུད་ལྟར་ཡོད་པས་མུ་ཁྱུད་འཛིན་ནོ། །རི་དེ་དག་གི་བར་བར་ན་ཀླུ་ཆེན་པོ་བརྒྱད་རོལ་པར་བྱེད་ཅིང་ཡན་ལག་བརྒྱད་དང་ལྡན་པའི་མཚོ་བདུན་ཡོད་པས་རོལ་མཚོ་བདུན་ཞེས་གྲགས་སོ། །ཡན་ལག་བརྒྱད་ནི། འདུལ་བ་ལུང་ལས། བསིལ་དང་ཞིམ་དང་ཡང་དང་འཇམ། །དྭངས་དང་དྲི་མ་མེད་པ་དང་། །འཐུངས་ན་ལྟོ་བར་བྱམས་པ་དང་། །མགྲིན་པ་ལ་ཡང་མི་གནོད་དང་། །ཡན་ལག་བརྒྱད་ལྡན་ཆུར་འདོད་དོ། །ཞེས་སོ། །ཕྱིའི་འཁོར་ཡུག་གི་ལྕགས་རི་ནི་ལྕགས་ལས་གྲུབ་པ་མུ་ཁྱུད་འཛིན་གྱི་ཕྱེད་དང་མཉམ་མོ། །དེ་དག་གི་བར་མཚམས་མཐའ་དག་པའི་རྒྱ་མཚོ་ཆེན་པོ་ནི་བ་ཚྭ་ཅན་ནོ། །བ་ཚྭ་ཅན་གྱི་ཆུ་དང་ཁད་མཉམ་ལས་ཅུང་ཟད་མཐོ་བར་གླིང་བཞི་གླིང་ཕྲན་གྱི་རྩེ་མོ་འཐོན་ཞིང་། རྩ་བ་ནི་ཐུར་དུ་ཟུག་པའི་ཤར་གྱི་ལུས་འཕགས་གླིང་དབྱིབས་ཟླ་བ་ཕྱེད་པ་ལྟ་བུ། དེའི་མི་རྣམས་འཛམ་བུའི་གླིང་པ་ལས་ལུས་ཚད་ཆེས་ཆེ་བར་འཕགས་པས་ལུས་འཕགས་པོ་ཞེས་བྱའོ། །ལྷོ་ན་འཛམ་བུའི་གླིང་སོག་ཀའམ། ཤིང་རྟའི་དབྱིབས་ལྷོར་བསྟན་པ། དེའི་དབུས་ན་བྱང་ཆུབ་སེམས་དཔའ་སྲིད་པ་ཐ་མ་པ་རྣམས་འཚང་རྒྱ་བའི་གནས་རྡོ་རྗེའི་གདན། ཉན་ཐོས་ལྟར་ན་རྡོ་རྗེ་རྩེ་ལྔ་གྱེན་དུ་ཕྱོགས་པའི་དབུས་མ་ལ་བྱང་ཆུབ་ཀྱི་ཤིང་སྐྱེས་ཤིང་། རྭ་བཞི་པོར་མཆོད་རྟེན་གྱིས་མཚན་པར་འདོད་ལ། ཐེག་པ་ཆེན་པོ་པ་རྡོ་རྗེ་རྒྱ་གྲམ་གྱི་ལྟེ་བ་ལ་ཤིང་སྐྱེས་ཤིང་། རྭ་བཞི་པོར་རྡོ་རྗེ་ཕུར་པའི་མཆོད་རྟེན་རེས་མཚན་པར་འདོད་ལ་བསྐལ་པ་བཟང་པོའི་སངས་རྒྱས་ཐམས་ཅད་འཚང་རྒྱ་བའི་གནས། མེ་བདུན་དང་ཆུ་གཅིག་ལ་སོགས་པས་ཀྱང་མི་གནོད་པ་མཁའ་ལ་བླ་བྲེ་དཔྱངས་པ་ལྟར་གནས་པར་འདོད་དོ། །བྱང་ཆུབ་ཀྱི་ཤིང་དེ་ནི་སྔོན་སངས་རྒྱས་འོད་སྲུང་སངས་རྒྱས་པའི་ཚེ་ན་ནྱ་གྲོ་ཏ་དང་། ད་ལྟ་ཤཱཀྱ་ཐུབ་པ་སངས་རྒྱས་པའི་ཚེ་མྱ་ངན་མེད་པར་འདོད་ཅིང་། མ་འོངས་པ་ན་བྱམས་པ་འཚང་རྒྱ་བའི་ཚེ་ཀླུ་ཤིང་ལ་སོགས་རྣམ་གྲངས་སྟོང་དུ་མིང་འགྱུར་བའམ། གནས་འགྱུར་བ་ཉིད་དུ་བལྟའོ། །ནུབ་ན་འདོད་འཇོའི་བ་དང་གླང་པོ་ཆེ་ལ་ཤས་ཆེར་ལོངས་སྤྱོད་པས་ན་བ་གླང་སྤྱོད་བྱ་བའི་གླིང་དབྱིབས་ཟླུམ་པོ། །བྱང་ན་འཆི་བའི་ཞག་བདུན་གྱི་གོང་ནས་དཔག་བསམ་གྱི་ཤིང་ལས་ཁྱོད་འཆིའོ་ཞེས་བྱ་བའི་སྒྲ་འབྱུང་བས་ན་སྒྲ་མི་སྙན་བྱ་བའི་གླིང་དབྱིབས་གྲུ་བཞི། གླིང་ཕྲན་རྣམས་ནི་གླིང་སོ་སོའི་ཕྱེད་ཕྱེད་ཀྱི་ཚད་ཅན་རང་རང་གི་གཡས་གཡོན་ན་ཡོད་དེ། ཤར་གླིང་ལ་ལུས་དང་ལུས་འཕགས་ཆུང་ངུ། ལྷོ་གླིང་ལ་རྔ་ཡབ་དང་རྔ་ཡབ་གཞན། ནུབ་གླིང་ལ་གཡོ་ལྡན་དང་ལམ་མཆོག་འགྲོ། བྱང་གླིང་ལ་སྒྲ་མི་སྙན་དང་སྒྲ་མི་སྙན་གྱི་ཟླ་རྣམས་སོ་སོའི་མདུན་རི་རབ་ལ་བརྟེན་པའོ། །བརྟེན་པ་བཅུད་ཀྱི་སེམས་ཅན་རྣམས་ཀྱང་ས་གཞི་ལ་བརྟེན་པ་རྣམས་ནི་འོག་ནས་ཡས་ཆགས་ཏེ། དེ་ལ་ངན་སོང་དང་མཐོ་རིས་གཉིས་ལས། ངན་སོང་གི་དང་པོ་དམྱལ་བ་ནི་གངས་རི་ཏི་སེའི་འོག་ནས་ཐུར་དུ་དཔག་ཚད་ཉི་ཁྲི་ན་སེམས་ཅན་དམྱལ་བ་ཆེན་པོ་མནར་མེད་པའི་གནས། ལྕགས་ཀྱི་ཁང་པ་སྲིད་དང་ཞེང་དུ་དཔག་ཚད་ཉི་ཁྲི་བ་ཡོད། དེའི་སྟེང་ནས་རིམ་པ་བཞིན་ཡང་སོས་ལ་སོགས་པ་ཡོད་དོ། །སྡིག་པ་རླབས་ཆེན་སྤྱད་པ་རྣམས་ནི་ཐོག་མར་མནར་མེད་དུ་སྐྱེ་ལ། དེ་ནས་ཀྱང་ལས་རིམ་གྱི་བསྲབ་པའི་རྒྱུ་འབྲས་དང་མཚུངས་པར། གྲང་དམྱལ་དང་། ཉི་ཚེ་བ་ལ་སོགས་པར་འཕོའོ། །ཡང་སོས་ནས་བྱང་དུ་དཔག་ཚད་ཉི་ཤུ་ན་ཆུ་བུར་ཅན་གྱི་གནས་ཡོད་དེ། རིམ་བཞིན་ཆུ་བུར་རྡོལ་བ་ལ་སོགས་པ་འོག་ནས་འོག་ཏུ་ཡོད་དོ། །ཉི་ཚེ་བ་ནི་གནས་ངེས་མེད་ན་ཡོད་ལ། ཉེ་འཁོར་བ་ནི་ཚ་དམྱལ་གྱི་འཁོར་ཕྱོགས་བཞི་ན་ལྷག་པའི་གནོད་པ་བཞི་བཞི་སྟེ་བཅུ་དྲུག་གི་ཚུལ་དུ་འཁོར་བའོ། །ཡི་དྭགས་ནི་གཙོ་བོར་གྱུར་པ་རྣམས་འཛམ་བུའི་གླིང་འདི་ཉིད་ལས་རྒྱལ་པོའི་ཁབ་ཀྱི་འོག་དཔག་ཚད་ལྔ་བརྒྱ་ན་ཡོད་ལ། ཡན་ལག་རྣམས་ནི་ལྷ་མིའི་གནས་མ་ངེས་པ་ན་ཡོད་དོ། །དུད་འགྲོ་ནི་བྱིང་གནས་རྒྱ་མཚོ་དང་། ཁ་འཐོར་བ་འདོད་པའི་ཁམས་མཐའ་དག་ན་ཡོད་དོ། །མཐོ་རིས་ཀྱི་དང་པོ་མི་རྣམས་ནི་གླིང་བདུན་ན་ཡོད་ལ། རྔ་ཡབ་གླིང་ཕྲན་ནི་སྲིན་པོའི་གནས་ཡིན་པས། ཡི་དྭགས་སྲིན་པོའི་རིགས་ཅན་དུ་བསྡུའོ། །མཐོ་རིས་ཀྱི་ཕྱོགས་གཉིས་པ་ལྷ་ལ་འདོད་ཁམས་དང་གཟུགས་ཁམས་གཉིས་ལས། འདོད་ལྷ་དྲུག་གི་དང་པོ་རྒྱལ་ཆེན་རིགས་བཞིའི་ལྷ་ནི་རི་རབ་ཀྱི་བང་རིམ་བཞི་དང་། ཉི་ཟླ་གཟའ་སྐར་གྱི་སྟེང་དང་། གསེར་གྱི་རི་བདུན་དང་། ཁོར་ཡུག་གི་རིའི་རྩེ་མོ་དང་། གཞན་ཡང་རི་དང་། ཤིང་དང་། ནགས་ཀྱི་ལྷ་ཡན་ཆད་རྒྱལ་ཆེན་བཞི་པའི་ལྷ་རིགས་སུ་གཏོགས་པས་གནས་རིགས་ཤིན་ཏུ་མང་ངོ་། །དེ་ཡང་བང་རིམ་དང་པོ་ལ་ལག་ན་གཞོང་ཐོག་དང་། གཉིས་པ་ལ་མེ་ཏོག་ཕྲེང་ཐོགས་དང་། གསུམ་པ་ལ་སྦྲང་ཆང་གིས་རྟག་ཏུ་མྱོས་པ་དང་། བཞི་པ་ལ་རྒྱལ་ཆེན་རིགས་བཞི་པའི་སྡེ་དཔོན་གྱི་གནས། གཞི་ཐམས་ཅད་གསེར་གྱི་བྱེ་མ་དང་། མེ་ཏོག་མནྡཱ་ར་བས་ཁེབས་པ་ན། ཕོ་བྲང་གི་ངོས་རེ་ལ་དཔག་ཚད་ཉིས་བརྒྱ་ལྔ་བཅུ་པ་རེ་ཡོད་པའི་མིང་ཤར་ན་ཡུལ་འཁོར་སྲུང་། ལྷོ་ན་འཕགས་སྐྱེས། ནུབ་ན་སྣ་ཚོགས་གཟུགས། བྱང་ན་ལྕང་ལོ་ཅན་རྣམས་ལ་རང་རང་གི་སྡེ་དཔོན་ཆེན་པོ་བཞི། ཤར་ཕྱོགས་པ་ལ་དྲི་ཟ། ལྷོ་ཕྱོགས་པ་ལ་གྲུལ་བུམ། ནུབ་ཕྱོགས་པ་ལ་ཀླུ། བྱང་ཕྱོགས་པ་ལ་གནོད་སྦྱིན་གྱི་རིགས་རྣམས་ཀྱིས་བསྐོར་ཞིང་། འབྱོར་པ་ལོངས་སྤྱོད་དང་སྐྱེད་མོས་ཚལ་ལ་སོགས་པ་དཔག་ཏུ་མེད་དོ། །ལྷུན་པོའི་ཕྱེད་གཉའ་ཤིང་འཛིན་གྱི་རྩེ་དང་ཐད་མཉམ་པ་ན་ཉི་ཟླ་གཟའ་སྐར་གྱི་ལྷའི་གྲོང་ཁྱེར་སྐྱེད་མོས་ཚལ་དང་བཅས་པའི་སྣོད་ལྟ་བུར་གྱུར་པ། ཉི་མའི་དཀྱིལ་འཁོར་ལ་དཔག་ཚད་ལྔ་བཅུ་ང་གཅིག །ཁོར་ཡུག་ལ་དེའི་སུམ་འགྱུར་འོག་གཞི་མེ་ཤེལ་ལས་གྲུབ་པས་རབ་ཏུ་ཚ་ཞིང་འོད་ཟེར་འབར་བའོ། །ཟླ་བའི་དཀྱིལ་འཁོར་དཔག་ཚད་ལྔ་བཅུ། ཁོར་ཡུག་ལ་དེའི་སུམ་འགྱུར། འོག་གཞི་ཆུ་ཤེལ་ལས་གྲུབ་པས་བསིལ་ཞིང་ཁ་དོག་དཀར་བའོ། །གཉིས་ཀའི་སྲིད་དུ་དཔག་ཚད་ཕྱེད་དང་དྲུག་དང་དཔག་ཚད་ཀྱི་བཅོ་བརྒྱད་ཆ་གཅིག་སྟེང་དུ་གནས་སོ། །ཉི་མའི་སྟེང་གི་ཁོར་ཡུག་ལ་གསེར་གྱི་ར་བ་དང་ཟླ་བ་ལ་དངུལ་གྱི་ར་བས་ལེགས་པར་བསྐོར་བ་ལ་རིན་པོ་ཆེ་སྣ་བཞི་ལ་སོགས་པའི་ལྕོག་ཡོན་ཏན་ཕུན་སུམ་ཚོགས་པ་དང་། དེ་གཉིས་ཀྱི་ནང་ན་ལྷའི་བུ་ཉི་མ་དང་། ཟླ་བའི་གྲོང་ཁྱེར་རིན་པོ་ཆེ་སྣ་བཞི་ལས་གྲུབ་པ་ལྷ་དང་ལྷ་མོ་མང་པོས་གང་ཞིང་དགའ་བར་བྱས་པ་ཡོད་དོ། །སྐར་མ་རྣམས་ཆུ་ཤེལ་ལས་གྲུབ་པའི་སྟེང་གི་ཆག་གསེར་གྱི་ར་བས་བསྐོར་བ་ན། ས་གཞི་དང་ལམ་སྲང་བཟང་པོ་ལྷའི་གྲོང་ཁྱེར་དང་བཅས་པ་སྟེ། སྐར་མ་ལ་ལ་གསེར་ཟངས་འཁར་བ་ཅི་རིགས་པའང་ཡོད་ལ། ཆེ་བ་རྣམས་རྒྱང་གྲགས་དྲུག་ནས་ཆུང་བ་རྒྱང་གྲགས་གཅིག་གི་བར་རོ། །ཆེ་ཚད་རྒྱང་གྲགས་བཅོ་བརྒྱད་དུ་འདོད་པའང་ཡོད་དོ། །འདོད་ལྷའི་གནས་གཉིས་པ་ནི། རི་རབ་ཀྱི་སྟེང་ན་ཉེ་དབང་གི་གནས་མ་འདྲེས་པ་དང་། ཆོས་བཟང་ལྷའི་འདུན་ས་ལ་སོགས་པ་སུམ་ཅུ་རྩ་གསུམ་ན་གཙོ་བོ་ཉེ་དབང་སོ་གཉིས། ལྷའི་དབང་པོ་དང་རྩ་གསུམ་ཡོད་པས་སུམ་ཅུ་རྩ་གསུམ་པ་ཞེས་བྱའོ། །དེ་ན་ལྷའི་གྲོང་ཁྱེར་བལྟ་ན་སྡུག་ཅེས་བྱ་བ་གཅིག་པ་གསེར་ལས་བྱས་ཤིང་གསེར་གྱི་ར་བས་བསྐོར་བའི་དབུས་ན་རྣམ་པར་རྒྱལ་བའི་ཁང་བཟང་ངོས་རེ་རེ་ལ་དཔག་ཚད་ཉིས་བརྒྱ་ལྔ་བཅུ་པ། སྲིད་དུ་དཔག་ཚད་བདུན་པ། ནང་གི་རྐང་རྟེན་དང་ཐེམ་སྐས་དང་། ཀ་བ་རྣམས་རིན་པོ་ཆེ་སྣ་བཞི་ལས་གྲུབ་པ། ཀ་བ་དང་། ཀ་གཞུ་དང་། བྲེ་དང་། ཕྱམ་གདུང་རྣམས་རིན་པོ་ཆེ་སྣ་ཚོགས་ལས་གྲུབ་ཅིང་། རིན་པོ་ཆེའི་དྲ་བ་དང་། ཆུན་འཕྱང་གིས་སྤྲས་པ། ཁང་བཟང་དེ་ལ་བ་གམ་བརྒྱད་ཡོད་པའི་རེ་རེ་ལའང་ཁང་བུ་བརྩེགས་པ་བདུན་བདུན་དེ་རེ་རེ་ནའང་གནས་ཁང་བདུན་བདུན་དང་བཅས་པ། དེ་ལ་ཡོངས་སུ་བསྐོར་བའི་གྲོང་ཁྱེར་བལྟ་ན་སྡུག་དེའི་ནང་གི་གཞི་ཐམས་ཅད་དབྱིབས་ལེགས་ཤིང་མིང་དོན་མཐུན་པ། ཚོན་སྣ་བརྒྱ་རྩ་གཅིག་གིས་བཀྲམ་པར་བྱས་ཤིང་མནན་ན་ནེམ་བྱེད་པ། བཏེག་ན་སྤར་བྱེད་པ། ཤིང་བལ་ལྟར་འཇམ་པ། སྒོ་ཆེན་དགུ་བརྒྱ་དང་དགུ་བཅུ་རྩ་དགུ་ཡོད་པ། ཐམས་ཅད་ཀྱང་དཔངས་སུ་དཔག་ཚད་ཕྱེད་དང་གསུམ་ལ་ཞེང་དུ་ཕྱེད་གཉིས་པ། ཟླ་བ་ཚེས་པ་ལྟ་བུ་དང་། བ་ལང་གི་རྨིག་པ་ལྟ་བུ་དང་། མེ་ལོང་ལྟ་བུ་དང་། སྐར་མའི་གཟུགས་སུ་བྱས་པའི་ནོར་བུ་སྣ་ཚོགས་པའི་སྒོ་རྒྱན་ཅན། སྒོ་རེ་རེར་ཡང་ལྷའི་སྲུང་མ་གོ་མཚོན་ཅན་ལྔ་བརྒྱ་ལྔ་བརྒྱ་ཡོད་པ། གྲོང་ཁྱེར་གྱི་ཕྱི་རོལ་རིན་པོ་ཆེའི་ར་བ་བདུན་གྱིས་བསྐོར་ཞིང་བར་བར་རྣམས་འོབས་དང་བཅས་པའང་ཆུ་མཚོ་ངང་པ་ཅན་གྱིས་མཛེས་པའོ། །རི་དབང་གི་རྩེ་མོའི་མཚམས་བཞིའི་ཁང་བུ་བརྩེགས་པ་ལ་གནོད་སྦྱིན་ལག་ན་རྡོ་རྗེ་ཞེས་བྱ་བའི་ལྷའི་རིགས་གནས་པ། གྲོང་ཁྱེར་བལྟ་ན་སྡུག་ནས་དཔག་ཚད་ཉི་ཤུར་དཔགས་པའི་ས་ན་ལྷ་རྣམས་ཀྱི་སྐྱེད་མོའི་ཚལ་བཞི་ཡོད་དོ། །ཤར་ན་ཤིང་རྟ་སྣ་ཚོགས་པའི་ཚལ་ཞེས་བྱ་བ་རིན་པོ་ཆེའི་ཤིང་སྣ་ཚོགས་དང་། གསེར་དངུལ་བཻ་ཌཱུརྱ་དང་ཤེལ་ལས་བྱས་པའི་ཕ་གུས་བརྩིགས་ཤིང་ཐེམ་སྐས་ཡོད་པའི་རོ་བྲོ་བའི་རྫིང་བུ་བཞི་དང་། ལྷའི་གོས་དང་། མེ་ཏོག་དང་། འབྲས་བུ་མང་པོས་བརྒྱན་ཅིང་ཤིང་རྟ་བཟང་པོ་ལྷའི་བུ་མོས་མཛེས་པས་དགའ་བར་བྱས་པས་འདྲེན་པའོ། །ལྷོ་ན་རྩུབ་འགྱུར་ཞེས་བྱ་བའི་ཚལ། ལྷ་རྣམས་དེར་སོང་ན་ལྷ་མ་ཡིན་དང་གཡུལ་འགྱེད་པར་སྤྲོ་ཞིང་། ཤིང་ལས་རིན་པོ་ཆེའི་གོ་ཆ་སྲ་བ་དང་། འཁོར་ལོ་དང་། མདའ་བོ་ཆེ་ལ་སོགས་པའི་མཚོན་ཆ་སྣ་ཚོགས་འབྱུང་བ་ཡོད་དོ། །ནུབ་ན་འདྲེས་པའི་ཚལ་ཞེས་བྱ་བ་འདོད་དགུ་འདྲེས་མར་འབྱུང་བ་དང་། རིན་པོ་ཆེའི་ཤིང་དང་། མེ་ཏོག་དང་། ལྷའི་བུ་མོ་ལ་སོགས་པའང་འདྲེས་ཤིང་། ལོངས་སྤྱོད་རྣམས་ཀྱང་འཆོལ་བར་འཁྱམ་མོ། །བྱང་ན་དགའ་བའི་ཚལ་ཞེས་བྱ་བ། རྫིང་བུ་བཟང་པོ་དགའ་བ་ཞེས་བྱ་བ་དང་། ཤིང་དང་། མེ་ཏོག་དང་། ལྷའི་བུ་མོ་དགའ་བས་བརྒྱན་པ་སྟེ། དེར་སྤྱད་པས་དགའ་བ་འཕེལ་བའོ། །ཚལ་དེ་ན་བསྐལ་པ་བཟང་པོའི་སངས་རྒྱས་སྟོང་གི་གཟིམས་ཁྲི་རིན་པོ་ཆེའི་ལྗོན་པའི་ནང་ན་ཡོད་པའི་འོད་ཟེར་གྱི་བྱིན་ལྷའི་དབང་པོའི་བསོད་ནམས་ཀྱིས་བཟོད་པས་བལྟས་པ་ན། དེའི་ལོགས་ལ་ལྷ་རྣམས་ཀྱི་ཚེ་རབས་དང་། ལེགས་ཉེས་དང་། གཡུལ་དུ་འཇུག་པ་ལ་གནོད་པས་བརྫི་བར་ནུས་པ་དང་། མི་ནུས་པའི་མཚན་མ་མཐའ་དག་མེ་ལོང་ལ་གཟུགས་བརྙན་བཞིན་དུ་གསལ་བ་ཡོད་དོ། །དེ་དག་ཀྱང་རྒྱ་ཆེ་ལ་དབྱིབས་ལེགས་པ། གསེར་གྱི་ར་བ་དང་། རིན་པོ་ཆེའི་ལྕོག་གིས་ཀུན་ནས་མཛེས་པའོ། །དེའི་ཕྱི་རོལ་ན་མིང་དང་བཀོད་པ་མཐུན་པའི་ས་གཞི་བཟང་པོ་བཞི་ཡོད་དེ། སྣ་ཚོགས་ཞེས་བྱ་བ་དང་། འདྲེས་པ་ཞེས་བྱ་བ་དང་། རྩུབ་འགྱུར་ཞེས་བྱ་བ་དང་། དགའ་བ་ཞེས་བྱ་བ་དག་ཡོད་དོ། །དེ་དག་གི་ཚད་དང་བཀོད་པ་ནི་ཚལ་རྣམས་དང་མཚུངས་པ་ལ། བར་བར་ན་འཆག་ས་དང་། འདུག་སའི་ཤང་ཤོང་མཉམ་པ་ཡིད་དུ་འོང་བ་ཐད་ཀ་མཉམ་པར་ཡོད་དོ། །གྲོང་ཁྱེར་དང་ཚལ་དང་། ས་གཞི་དག་ཏུ་འགྲོ་བའི་བར་གྱི་ལམ་སྲང་ཐམས་ཅད་དབྱིབས་ལེགས་ཤིང་བགྲོད་པ་འཇམ་ལ། ཙན་དན་གྱི་ཆུས་ཆག་ཆག་བཏབ་པ། རྟ་དང་གླང་པོ་དང་། ཤིང་རྟ་ལ་སོགས་པའི་བཞོན་པ་དུལ་བས་གང་བ། དེ་དག་གི་ནང་ནས་ཀྱང་གླང་པོ་ཆེ་ས་སྲུང་གི་བུ་ལུས་དཔག་ཚད་སྟོང་པ་ནི་སྤྲུལ་པའི་རང་བཞིན་དུ་དྲན་པ་ཉེར་གཞག་ནས་བཤད་ཅིང་། རྟའི་མཆོག་ནི་སྤྲིན་གྱི་ཤུགས་ཅན་ནོ། །བཞི་མདོ་དེ་དག་ཀྱང་། ཨུཏྤལ་དང་། པདྨ་ཆེན་པོ་ལ་སོགས་པའི་མེ་ཏོག་སྣ་ཚོགས་ཀྱིས་ཁེབས་པ། རྫིང་བུ་ཆུ་བྱ་ཅན་སྙན་པར་སྒྲོག་པ་དང་། ལྗོན་པའི་ཤིང་བལ་ལས་གོས་དང་། མེ་ཏོག་སྣ་ཚོགས་པ་འབྱུང་བ་ནི་ཀུན་ཏུ་ཡོད་དོ། །གྲོང་ཁྱེར་མཆོག་དེའི་བྱང་ཤར་ན་ལྷ་རྣམས་འདུ་བའི་གཞི་རི་རབ་ཀྱི་ས་གཞི་བརྟོལ་ནས་བྱུང་བའི་ཤིང་ཡོངས་འདུ་ས་བརྟོལ་ཞེས་བྱ་བ། གྱེན་དུ་དཔག་ཚད་བརྒྱར་འཕགས་པའི་ཡན་ལག་ཕྱོགས་བཞིར་གྱེས་པ་ལ། ལོ་མ་དང་། མེ་ཏོག་དང་། འབྲས་བུས་གང་བ། རྩེ་མོ་ཀུན་ནས་ཟླུམ་པ་གདུགས་ལྟར་འདུག་པ་ལས་རིན་པོ་ཆེའི་དྲ་བ་དང་། ལྷའི་གོས་ཀྱིས་དཔྱངས་པའི་འོད་ཀྱིས་ཕྱོགས་རྣམས་གསལ་བ། དྲི་བསུང་ཞིམ་པོས་དཔག་ཚད་བརྒྱར་ཁྱབ་པ། ལྷ་རྣམས་ཀྱིས་འདོད་པའི་ཡོན་ཏན་ཡིད་ལ་བསམ་པ་དང་མཉམ་དུ་འབྱུང་བའི་ཤིང་དེའི་དྲུང་ན། རིན་པོ་ཆེ་ཨ་མོ་ནི་ཀ་ལྟར་དཀར་བའི་རྡོ་ལེབ་ཆུ་ཞེང་དཔག་ཚད་ལྔ་བཅུ་པ། དབྱིབས་ལེགས་ཤིང་། ཚོན་སྣ་བརྒྱ་ཕྲག་གཅིག་གིས་བཀྲ་བར་བྱས་པའི་གཞི་འཇམ་ཞིང་། མནན་ན་ནེམས་པ། བཏེགས་ན་སྤར་བྱེད་པ། དེའི་འགྲམ་ཐམས་ཅད་ཤིང་དང་། མེ་ཏོག་དང་། གོས་དང་། ནོར་བུ་དང་། རྒྱན་དང་། རོལ་མོ་དང་། བདུད་རྩི་དང་། ཁ་ཟས་རོ་བརྒྱ་པ་དང་། ཤིང་རྟ་སྣ་ཚོགས་དང་། ཁང་བུ་བརྩེགས་པ་དང་། རྩེད་འཇོ་དང་གླུ་གར་བྱེད་པའི་ལྷའི་བུ་དང་བུ་མོ་མང་པོས་གང་བ་ཡོད་དོ། །རྡོ་ལེབ་དེའི་སྟེང་མེ་ཏོག་མནྡཱ་ར་བས་པུས་ནུབ་ཙམ་དུ་ཁེབས་པའི་དབུས་ན་དབང་པོའི་ཁྲི་ལ་ལྷ་གཞན་རྣམས་ཀྱི་ཁྲིས་བསྐོར་བ། ལྷ་ཉུང་ངུར་འདུས་ཀྱང་ཡངས་པར་མི་མངོན། མང་པོས་ཀྱང་དོག་པར་མི་མངོན་པ་དེར་སུམ་ཅུ་རྩ་གསུམ་པ་རྣམས་དབྱར་ཟླ་ར་བ་ལ་འདུག་ནས་འདོད་པའི་ཡོན་ཏན་ལྔ་ལ་ལོངས་སྤྱོད་དོ། །གྲོང་ཁྱེར་བལྟ་ན་སྡུག་དེའི་ལྷོ་ནུབ་ན་ཆོས་བཟང་ལྷའི་འདུན་ས་ཡོད་དེ། ཀུན་ནས་ཟླུམ་པོར་གྱུར་པའི་མཐའ་སྐོར་དཔག་ཚད་དགུ་བརྒྱ་པའི་དབུས་ན་བཻ་ཌཱུརྱ་ལས་བྱས་པའི་ཀ་བ་ཟུར་བརྒྱད་པ་སྐྲ་རྩེ་ཙམ་གྱིས་ཁང་པ་བརྩེགས་པའི་རྟེན་ལ་མ་རེག་པར་བཏེགས་པའི་རིན་པོ་ཆེའི་ཁང་བརྩེགས་དོན་ཐམས་ཅད་གྲུབ་པར་བྱེད་པ་ཞེས་བྱ་བ་འོད་ཟེར་བརྒྱ་ཕྲག་འབར་བའི་དྲུང་ན། ལྷ་རྣམས་རང་གི་སྲིད་བསྲུང་བ་དང་། ཡང་དག་པར་བྱ་བའི་དོན་བསྒྲུབ་པ་ལ་འདུན་ཅིང་། འགྲོ་བའི་སླད་དུ་འདུས་ནས་བྱ་བ་དང་བྱ་བ་མ་ཡིན་པ་ལ་བླང་དོར་བྱེད་པའི་གནས་ཡིན་པས་ན་འདུན་ས་ཞེས་བྱའོ། །གནས་རིས་དེ་དག་དང་གཞན་གྱི་ཚད་དང་བཀོད་པ་ཧ་ཅང་ཞིབ་པ་ནི་ཡི་གེ་མང་ཀྱིས་དོགས་ནས་མ་བཤད་དོ། །དེ་ལྟར་འདོད་ཁམས་ཀྱི་ལྷ་གནས་གཉིས་པོ་དེ་ནི་ས་གཞི་ལ་བརྟེན་པ་ཡིན་ནོ། །ནམ་མཁའ་ལ་གནས་པའི་འདོད་ལྷ་བཞིའི་གནས་ནི། ཟག་བཅས་བསོད་ནམས་ཆ་མཐུན་གྱི་དགེ་བའི་རྒྱུ་ལས་འདོད་པའི་ལྷ་གནས་ས་གཞི་དང་མ་འབྲེལ་བ་བཞིར་གྲུབ་སྟེ། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་རྣམས་སོ། །དེ་དག་རྣམས་ཀྱི་གཞལ་ཡས་ཁང་ནི་སུམ་ཅུ་རྩ་གསུམ་པའི་སྟེང་གི་ནམ་མཁའ་ལ་གཟའ་སྐར་བཀྲམ་པ་ལྟར་ཡོད་དེ། རྒྱ་ཁྱོན་ནི་སུམ་ཅུ་རྩ་གསུམ་པའི་ཉིས་འགྱུར་འཐབ་བྲལ་ལ་ཡོད་པ་བཞིན་གོང་མ་གོང་མ་ཉིས་འགྱུར་གྱི་དཔག་པ་ཤེས་པར་བྱའོ། །བདུད་ཀྱི་རྒྱལ་པོ་དགའ་རབ་དབང་ཕྱུག་འཁོར་དང་བཅས་པ་ཡང་གཞན་འཕྲུལ་དབང་བྱེད་ཀྱི་ནང་དུ་གཏོགས་ལ་གནས་གཞན་ཁྱད་པར་ཅན་ཡིན་ནོ། །དེ་ལས་གནས་རིགས་གཞན་པ་ལྷ་མ་ཡིན་རྣམས་ཀྱང་འདོད་ཁམས་པ་ཡིན་ཏེ། ལུས་དང་། རྫུ་འཕྲུལ་དང་། ལོངས་སྤྱོད་དང་། འདོད་པའི་རང་བཞིན་ལྷ་དང་འདྲ་ཡང་རིགས་དང་སྐལ་པ་མི་འདྲ་བས་ལྷ་མ་ཡིན་ཞེས་བྱ་སྟེ། དེར་སྐྱེ་བའི་རྒྱུ་ནི། སྔོན་གྱི་ལས་དགེ་སྡིག་སྤེལ་མར་འདྲེས་པས། འགྲོ་བ་གང་དུ་འཕེན་ཞིང་སྐྱེ་བ་འགྲུབ་པའི་ལས་དང་། བདེ་བ་དང་། སྡུག་བསྔལ་བ་ལ་སོགས་རྫོགས་པར་བྱེད་པའི་ལས་ཐ་དད་དུ་བསགས་པ་སྟེ་འདི་དག་རྒྱུ་འཕེན་བྱེད་ཡི་དྭགས་ཀྱི་ལས་ཀྱིས་འཕངས་ཀྱང་། རྫོགས་བྱེད་བསོད་ནམས་ཆ་མཐུན་ལྷའི་དགེ་བས་རྫོགས་པར་བྱས་པས་ལྷ་དང་འགྲན་པའི་དཔལ་འབྱོར་ཡོད་དོ། །དེའང་གསེར་གྱི་ས་གཞི་ནས་རི་རབ་ཀྱི་ཆུ་མཚམས་མན་ཆོད་ཀྱི་ཁོང་སེང་ན་དེ་དག་གི་གནས་ཡོད་པའི་གནས་ཀྱང་གོང་མ་ལས་འོག་མ་བཟང་། རི་རབ་ཀྱི་ཆུ་མཚམས་ཁོང་སེང་ན་སྒྲ་གཅན་འཛིན། དེའི་འོག་ན་མགུལ་ཕྲེང་དང་། སྐར་ཕྲེང་། གསེར་གྱི་ས་གཞི་ལ་ཐགས་བཟང་རིས་གནས་པའི་གོང་མ་གསུམ་གྱི་དཔལ་དང་སྐལ་བ་ནི་རྒྱལ་ཆེན་རིགས་བཞིའི་ལྷ་དང་མཉམ་མོ། །གསེར་གྱི་ས་གཞི་ལ་གནས་པ་རྣམས་ལ་ནི་ལྷ་རྣམས་ཀྱི་འབྱོར་པ་ལྟ་བུའི་གནས་དང་བཀོད་པ་ཡོད་དེ། རྣམ་པར་རྒྱལ་བའི་ཁང་བཟང་དང་མཚུངས་པའི་ཁང་བཟང་གདམས་པ་ཅན། བལྟ་ན་སྡུག་པ་དང་མཉམ་པའི་གྲོང་ཁྱེར་གསེར་ལྡན། དེ་བཞིན་འདུན་ས་ནོར་བཟང་སྐྱེད་མོས་ཚལ་དང་། ཀུན་དགའ་ར་བ་དང་། དགའ་བ་དང་། དགའ་བའི་ཀུན་དགའ་ར་བ། ས་གཞིའི་མིང་ཡང་དེ་དང་འདྲ་སྟེ། ཡོངས་འདུ་ས་བརྟོལ་དང་མཉམ་པའི་ཤིང་རྩི་ཏྲ་བ་ཏྲི། རྡོ་ལེབ་ནི་རབ་ཏུ་བཟང་པོ། སྐྱེད་ཚལ་དུ་སྤྱོད་པའི་གླང་པོ་ཏི་སེ་གངས་བརྩེགས། གཡུལ་ངོར་སྤྱོད་པ་བཟོད་དཀའ། རྟའི་རྒྱལ་པོ་མྱུར་བ་ལ་སོགས་པ་རྣམས་ལྷའི་དཔལ་འབྱོར་གྱི་འགྲན་ཟླ་ལྟ་བུར་གྲུབ་པའོ། །ལྷ་མ་ཡིན་གྱི་ཁོངས་སུ་གཏོགས་པ་གཞན་ནི་འཛམ་བུའི་གླིང་དང་། གླིང་ཕྲན་དང་། རྒྱ་མཚོ་དང་། མུ་ཁྱུད་དང་། རི་རབ་ལ་སོགས་ངེས་པ་མེད་པ་ན་ཡོད་དེ། བདུད་ཀྱི་རིགས་ཀྱི་མི་མ་ཡིན་རྣམས་སོ། །འཇིག་རྟེན་ན་ས་གཡོ་བའི་རྒྱུའང་དགེ་མི་དགེ་ལས་གཡོ་བ་རླུང་ས་འཛིན་གྱི་ཆུ་གཡོས་པ་ལས་འབྱུང་ཡང་། ཀླུའི་རྒྱལ་པོ་རབ་འཇོམས་དང་། ནག་པོ་དང་། བསྒྱིངས་པ་དང་། ཧུ་ལུ་ཧུ་ལུས་སུ་ཆོས་དང་མི་ལྡན་པ་དེའི་ཚེ་ལྷ་མ་ཡིན་མགུལ་ཕྲེང་ལ་སོགས་པས་བསྐུལ་ནས་ཆུ་ལས་ས་གཡོ་བར་བྱེད་ཅིང་། རྒྱ་མཚོའི་ནང་དུ་གཡུལ་འགྱེད་པ་ལ་སོགས་དྲན་པ་ཉེར་བཞག་ལས་བཤད་དོ། །འདོད་པའི་གནས་རིས་བསྟན་ཟིན་ཏོ། །འདོད་ཁམས་ལས་གྱེན་དུ་དཔག་ཚད་བཞི་ཁྲི་འཕགས་པའི་ནམ་མཁའ་ལ་གཟུགས་ཀྱི་ཁམས་གནས་རིས་བཅོ་བརྒྱད་ཡོད་དེ། དེའང་སྔོན་བསམ་གཏན་ཟག་བཅས་བསོད་ནམས་སྐྱེས་ཆུང་འབྲིང་ཆེ་གསུམ་རིམ་པར་གོམས་པ་ལས་འབྲས་བུ་ཆེ་བའི་བར་དུ་སྐྱེ་བའི་ཚུལ། ཚངས་རིས་དང་། ཚངས་པ་མདུན་ན་འདོན་དང་། ཚངས་ཆེན་གསུམ་ནི་བསམ་གཏན་དང་པོ་ཆུང་འབྲིང་ཆེན་པོ་ཐོབ་པ་ལས་བྱུང་ངོ་། །འོད་ཆུང་དང་། ཚད་མེད་འོད་དང་། འོད་གསལ་གསུམ་ནི་བསམ་གཏན་གཉིས་པ་ཆུང་འབྲིང་ཆེ་གསུམ་ཐོབ་པ་ལས་བྱུང་ངོ་། །དགེ་ཆུང་དང་། ཚད་མེད་དགེ་དང་། དགེ་རྒྱས་གསུམ་ནི་བསམ་གཏན་གསུམ་པ་ཆུང་འབྲིང་ཆེ་གསུམ་ཐོབ་པ་ལས་བྱུང་ངོ་། །སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་བ་གསུམ་ནི། བསམ་གཏན་བཞི་པ་ཆུང་འབྲིང་ཆེ་གསུམ་ཐོབ་པ་ལས་བྱུང་ངོ་། །དེ་དག་ནི་སོ་སོ་སྐྱེ་བོའི་གནས་གཞན་བཞིའོ། །དེའི་གོང་ན་ཉན་རང་འཕགས་པའི་གནས་གཙང་རིས་ལྔ་ཡོད་དེ། མི་ཆེ་བ་དང་། མི་གདུང་བ་དང་། གྱ་ནོམ་སྣང་བ་དང་། ཤིན་ཏུ་མཐོང་བ་དང་། འོག་མིན་རྣམས་སོ། །དེའང་བསམ་གཏན་བཞི་པོ་སྤེལ་མར་བསྒོམས་པ་ལས་གྲུབ་སྟེ། བསམ་གཏན་དང་པོ་དང་བཞི་པ་སྤེལ་བ་ཆུང་ངུ་དང་གཉིས་བསྡོམས་པ་ལས་བཞི་པོ་སྤེལ་བ་འབྲིང་། དང་པོ་གཉིས་པ་གསུམ་པ། གསུམ་དང་བཞི་པོ་སྤེལ་བ་ཆེན་པོ། །བཞི་པོ་ནང་ཚན་རེ་རེ་བཞི་པོ་དང་སྤེལ་པ་ཆེས་ཆེ་བ། དེ་དག་ཐོད་རྒལ་དུ་བསྒོམས་པས་མཆོག་ཏུ་ཆེན་པོའོ། །ཐོད་རྒལ་ནི། བཞི་པོའི་ལ་ལ་དོར་བ་ནས་འཕྱོངས་པའི་བར་དུ་བསྒོམས་པས་ཏེ། མས་ཡར་རིམ་དང་། རིམ་མིན་དུ་གཅིག་ནས་གསུམ་གྱི་བར་ནས། ཡས་མར་བོར་བའི་བར་དུ་བཞི་པ་བསྒོམས་པའོ། །དེ་དག་ལས་འདས་པ་ན་སྲིད་པ་ཐ་མ་པས་བཅུ་ཡོངས་སུ་རྫོགས་པ་རྣམས་སྐྱེ་བའི་གནས་འོག་མིན་རྣམ་མཛེས་དབང་ཕྱུག་ཆེན་པོའི་གནས་ཡོད་དེ། ཉན་རང་འཕགས་པ་གཙང་རིས་ལྔ་བགྲོད་པ་ལས་བྱང་ཆུབ་སེམས་དཔའ་འཕགས་པར་གནས་ཀྱི་ཁྱད་པར་གྱིས་ཀྱང་ཆེ་བར་ཤེས་པར་བྱའོ། །སྐྱེ་མཆེད་མུ་བཞི་ནི་དངོས་སྣང་གི་གཟུགས་སུ་གྲུབ་པ་མེད་པས་སྲིད་པའི་རྩེ་མོར་བརྡར་བཏགས་པ་ཙམ་སྟེ། དེའི་གནས་སུ་གྲུབ་པའང་ཕྲ་རག་གཉིས་ཀ་མེད་དོ། །གཟུགས་ཁམས་ཀྱི་ལྷ་གནས་ཚངས་རིས་ནས་བཟུང་བསམ་གཏན་བཞི་པོའི་རྒྱ་ཁྱོན་ནི་རིམ་པ་བཞིན། གླིང་བཞི་དང་། སྟོང་དང་པོ་སྤྱི་ཕུད་དང་། སྟོང་གཉིས་པ་བར་མ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་རེ་རེ་དང་མཚུངས་ལ། གཙང་རིས་ལྔ་ལ་རྒྱ་ཚད་མེད་དེ། ནམ་མཁའ་ལ་གཟའ་སྐར་བཀྲམ་པ་བཞིན་ནོ། །ཁྱད་པར་འོག་མིན་རྣམ་མཛེས་ཆེན་པོ་ནི་སྤྲུལ་པའི་རང་སྣང་གིས་བསྡུས་པས་དངོས་སྣང་མེད་དོ། །སྟོང་གསུམ་གྱི་སྟོང་ཆེན་པོ་ལ་སོགས་པའི་བགྲང་གཞི་ནི་མངོན་པ་མཛོད་ལས། གླིང་བཞི་དང་ནི་ཉི་ཟླ་དང་། །རི་རབ་དང་ནི་འདོད་ལྷར་བཅས། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་སྟེ། །མཉམ་དུ་འཇིག་ཅིང་འབྱུང་བ་ཡིན། །ཅེས་པས་སྟོང་གསུམ་དེ་དག་བགྲང་གཞིའི་ངོས་ནས་ཐ་དད་པར་སྣང་ཀྱང་། འོག་གཞི་རླུང་གི་དཀྱིལ་འཁོར་གཅིག་ལ་བརྟེན་པས་ན་གནས་པ་དང་འཇིག་པའི་དུས་ནི་གཅིག་པ་ཉིད་དོ། །དེ་ལྟ་བུའི་མི་མཇེད་ཀྱི་འཇིག་རྟེན་བྱེ་བ་ཕྲག་བརྒྱ་པོ་ཆགས་པ་ལ་བར་གྱི་བསྐལ་པ་གཅིག་སྟེ། དེའི་རིང་སྣོད་ཀྱི་འཇིག་རྟེན་འདི་སྟོངས་པའི་རང་བཞིན་འགྲོ་བ་མེད་པ། རྩི་ཤིང་མེ་ཏོག་དང་འཇག་མའི་གླིང་དུ་གནས་སོ། །དེ་ནས་བཅུད་ཆགས་ཚུལ་ནི་ཡས་ནས་རིམ་བཞིན་ཏེ། བདུད་རྩིའི་ཆར་བབས་པས་ས་ལས་རླངས་བྱུང་། རིན་པོ་ཆེའི་ཤིང་སྣ་ཚོགས་པདྨའི་རང་བཞིན་དུ་སྨིན་པར་བྱས་པས། ཐོག་མའི་སྣོད་ཀྱི་རྟེན་གཞིའི་འབྱུང་བ་བཞི་ཆགས་པའི་དུས་སོ་སོའི་འདབ་འབྱོར་དུ་རང་བྱུང་བའི་སྲིད་པའི་སེམས་ཅན་རླུང་གི་ལྷ་མོ་བཞི་དང་། ཆུའི་ལྷ་མོ་གར་བྱེད་པ་མང་པོ། སའི་ལྷ་མོ་བཞི་དང་། ཀླུའི་བུ་སྟོབས་ལྡན་བཞི་རྣམས་ཀྱི་ཡིད་ཞུགས་པ་དང་བཅས་པའི་སྒྲས་སྲིད་རྩེའི་གཟུགས་མེད་སྨིན་རུང་གི་རྣམ་ཤེས་བག་ལ་ཉལ་མངོན་གྱུར་དུ་སད་པའི་རྐྱེན་བྱེད་པར་བཤད་པ་ནི་སྲིད་པ་ཆགས་ཚུལ་རང་སའི་གྲུབ་མཐའ་སྟེ། གཞན་དུ་ན་དབྱིངས་ཀྱི་རིག་པ་ལུང་མ་བསྟན་དེ་གཡོས་པ་ལས་སེམས་ཅན་གློ་བུར་བའི་འཁྲུལ་པ་ནི་མ་ངེས་ཏེ། གསང་སྙིང་ལས། ཨེ་མ་ཧོ། བདེ་གཤེགས་སྙིང་པོ་ལས། རང་རང་རྣམ་རྟོག་ལས་ཀྱིས་སྤྲུལ། །ཞེས་པས་སོ། །འདི་སེམས་ཅན་གསར་སྐྱེ་འདྲ་ཡང་། རྒྱུ་རྐྱེན་གཞན་ལས་བྱུང་བའི་གསར་སྐྱེ་མ་ཡིན་ཏེ། རིག་པའི་དབྱིངས་ལ་མཚུངས་ལྡན་གྱི་མ་རིག་པས་དབྱིངས་སུ་སྒྲིབས་པ་ཉིད། རྐྱེན་གློ་བུར་བས་དངོས་སུ་གསལ་བར་བྱས་པ་ཙམ་ལས་དང་པོ་དག་པ་ཕྱིས་འཁྲུལ་པ་ནི་མ་ཡིན་ནོ། །དེའི་ཕྱིར་གཟུགས་མེད་རྣམས་ཀྱི་ཐོག་མའི་རྒྱུའང་དབྱིངས་ཀྱི་ཀུན་གཞི་ལུང་མ་བསྟན་མཚུངས་ལྡན་ལྷན་ཅིག་སྐྱེས་པའི་མ་རིག་པས་བསྒྲིབས་ཤིང་། ཅི་ཡང་མི་སེམས་པ་སྒོ་ང་ལྟ་བུའི་གདངས་མངོན་གྱུར་དུ་སད་མ་ཐག་པ་དེ་བསམ་གཏན་རིགས་བཞིའི་རྒྱར་འཐུམས་པ་ལས། ཉོན་མོངས་པ་མངོན་དུ་རྒྱུ་མེད་ཀྱང་ཕྲ་བ་བག་ལ་ཉལ་དུ་གནས་པའི་རྣམ་ཤེས་ཏིང་ངེ་འཛིན་གྱིས་སྤྲུལ་པའི་ལུས་རང་སྣང་ཙམ་དུ་ཟངས་ཐལ་བས་ལུས་ཀྱི་ཆར་གཏན་ནས་མེད་པའང་མ་ཡིན། ཕྲ་བ་ཡིད་ཀྱི་གཟུགས་ཡི་དྭགས་དང་བར་སྲིད་ལྟ་བུའམ། རག་པ་ཤ་ཁྲག་གི་ལུས་འདོད་ཁམས་པ་ལྟ་བུའམ། དྭངས་པ་འོད་ཀྱི་ལུས་གཟུགས་ཁམས་པ་ལྟ་བུར་ཡོད་པའང་མ་ཡིན། ཐོག་མར་རང་བཞིན་དང་། ཕྱི་ནས་བསོད་ནམས་ཆ་མཐུན་གྱི་འབྲས་བུས་བསྐྱེད་པའི་རང་ཆས་སྤྲུལ་སྣང་གི་གཟུགས་རང་ས་དང་གོང་མར་སྣང་ཙམ་ལས་གཞན་གྱིས་བལྟར་མི་མངོན་པས་གཟུགས་མེད་དེ། ཏིང་ངེ་འཛིན་གྱི་ཆ་ནས་བཏགས་ན། ཡུལ་མི་གསལ་རྟོག་དཔྱོད་ཡོད་མེད་གཉིས་ཆར་མ་ཡིན་པའི་བློའི་རོ་མྱོང་ལ་ཞེན་པས་སྲིད་པའི་རྩེ་མོ་ཡོད་མིན་མེད་མིན་དུ་གྱུར་པའོ། །གོང་མ་ལས་འདུ་ཤེས་ཙམ་དུ་ཡོད་ལ་གཞན་ཅི་ཡང་མེད་པར་གནས་པ་དེ་ལས་འགྲོ་བ་དཔག་ཏུ་མེད་པར་མཆེད་པས་ཅི་ཡང་མེད་པའམ། རྟོག་དཔྱོད་ཞི་བའི་དགའ་བདེས་བརླན་པ་ཅིར་ཡང་མི་སེམས་པའི་ངང་དུ་ཡུལ་དང་བྲལ་བར་བསྒོམས་པས་ཅིར་ཡང་མེད་པའོ། །གཅིག་ལ་གཅིག་རྣམ་པར་ཤེས་པ་ཙམ་ལས་བདག་ཏུ་རྟོག་པའི་ལུས་སྡུད་པའི་དངོས་པོ་མེད་པ་ལས་འགྲོ་བའི་གཟུགས་མཐའ་ཡས་པར་མཆེད་པའམ། དཔྱོད་པ་ཙམ་དང་བཅས་པའི་བསམ་གཏན་གསལ་བ་བྱུང་ཚོར་བཀག་པའི་རྣམ་ཤེས་ཙམ་དུ་བསྒོམས་པས་རྣམ་ཤེས་མཐའ་ཡས་སུ་གོལ། བསོད་ནམས་ཀྱི་སྟོབས་ཉམས་པས་གོང་མ་ལས་ལུས་བོངས་ཆུང་ཞིང་འོད་མི་གསལ། ཏིང་ངེ་འཛིན་དམན་པའི་རང་སྣང་ལ་ཤར་བའི་སྤྲིན་ཁ་དོག་སྣ་ཚོགས་པའི་དུམ་བུས་ལིང་ཚེར་ཁྱབ་ཅིང་། ཤེས་པ་མཆེད་པ་ལས་འགྲོ་བ་དཔག་ཏུ་མེད་པར་མཆེད་པས་ནམ་མཁའ་མཐའ་ཡས་སམ། རྟོག་བཅས་རགས་པའི་འདུ་ཤེས་ནུབ་པ་ཡུལ་མི་གསལ་ནམ་མཁའ་ལྟར་དངོས་མེད་ཕྱང་ཆད་དུ་བསྒོམས་པས་ནམ་མཁའ་མཐའ་ཡས་ཞེས་བྱའོ། །རང་རང་བཞི་པོ་ནང་འཁོར་དུས་སྔར་གྱི་རྟེན་ལ་བསམ་གཏན་དེ་དང་དེའི་སེམས་གཞི་གང་གྲུབ་པ་དེར་སྐྱེ་བ་ནི། དེར་འཕེན་བྱེད་དང་རྫོགས་བྱེད་བསོད་ནམས་ཆ་མཐུན་གྱི་དགེ་བཅུས་བྱེད་པ་མ་ཡིན་པར་རང་སའི་ཏིང་ངེ་འཛིན་དེས་བྱེད་པའི་ཕྱིར་རོ། །རྒྱུ་དེས་གཟུགས་དང་གཟུགས་མེད་པ་ན་སྤྱད་པའི་དགེ་བ་ལ་མི་གཡོ་བ་ཞེས་བཤེས་པའི་འཕྲིན་ཡིག་གི་འགྲེལ་པ་ལས་བཤད་པ་ཡིན་ནོ། །དེའང་ཕལ་ཆེར་འོག་མ་ནས་འོག་མར་ལྟུང་བ་མང་སྟེ། རང་བཞིན་དུ་བསོད་ནམས་ཀྱི་སྟོབས་ཉམས་པས་ཏིང་ངེ་འཛིན་ཡང་དམན་པར་འགྲོ་སླ་བའི་ཚུལ། འཆི་ཀར་སྲིད་རྩེའི་ཏིང་འཛིན་ཞིག་པའི་དུས། ཅི་ཡང་མེད་པའི་འདུ་ཤེས་ཙམ་དུ་ཤར་བས་ཅུང་ཟད་སྔར་བས་རགས་པར་སོང་ལ། དེ་ཉིད་ཚོར་བ་བདེ་བས་དེའི་ངང་ལ་ཆགས་པས་ལྟུང་བ་བཞིན། འོག་མ་འོག་མའི་སེམས་རགས་པ་ཚོར་བ་མྱོང་བ་དེ་བའི་མཚུངས་ལྡན་གྱི་རྒྱུ་ལས་སྐྱེ་བ་ཡིན་ལ། ཁ་ཅིག་དེ་ནས་སྲིད་པ་གཞན་དུའང་འཕོ་བས་གཅིག་ཏུ་ངེས་པ་ནི་མ་ཡིན་ནོ། །ཡང་སྲིད་པ་གསུམ་པོ་ཕན་ཚུན་ནང་འཁོར་དུས་འདོད་གཟུགས་ཀྱི་ཁམས་ནས་སྲིད་རྩེར་འགྲོ་བའི་དཔེ་ནི། བདེ་གཤེགས་རི་རབ་མར་མེའི་རྒྱལ་མཚན་གྱིས། སོ་སོ་རང་གི་རིག་པ་མདའ་ལྟ་བུ། དེས་ཉེ་བར་ལེན་པའི་ཞི་གནས་གོལ་ས་ཅན་ལྟོང་ལྟ་བུ། མཐོ་རིས་ཀྱི་འཕེན་བྱེད་བསོད་ནམས་ཆ་མཐུན་གྱི་ལས་གཞུའི་རྒྱུད་དང་མཐེབ་མཛུབ་ལྟ་བུས་འཕངས་པ་ལས། གཟུགས་མེད་པའི་ས་པ་འབེམ་དང་འདྲ་བ་ལ་ཕྱིན་ཏེ་དེར་གནས་པ་ནི། འཁྲུལ་པ་བསགས་པའི་བསམ་གཏན་བཞི་གོལ་བར་གྲུབ་པ་ལས་བྱུང་བའོ། །ཞེས་གསུངས་པ་ལྟར། སྔོན་གྱི་དགེ་བའི་རྩ་བ་བསོད་ནམས་ཆ་མཐུན་སྟོབས་པོ་ཆེའི་འཕེན་བྱེད་ཡོད་པ་རྣམས་ནི་ས་དེ་བའི་སེམས་ཐོབ་པའི་སྟོབས་ཀྱིས་སྔོན་ལ་གཟུགས་མེད་དང་པོ་ཐོབ། འཆི་ཁར་གཉིས་པའི་སེམས་སྐྱེས་པ་ལས་གོང་ནས་གོང་མར་འགྲོ་བ་དང་། དེ་བཞིན་དུ་གོང་མར་འོག་མའི་སེམས་སྐྱེས་ནས་ལྟུང་བ་སོགས་ལས་བཟང་ངན་གྱི་འཕེན་པ་ཆེ་ཆུང་གི་ཁྱད་པར་དུ་རིགས་པར་བྱའོ། །འདི་དག་གང་དུ་ཡོད་ན་ཁམས་གསུམ་པའི་རྩེ་མོ་ཡིན་པས་ནམ་མཁའ་ལ་བརྟེན་པར་བཤད་ཀྱིས། ཉེ་བར་སྤྱོད་པའི་ཁང་ཁྱིམ་ལ་སོགས་འདུག་གནས་སུ་དོན་བྱེད་པའི་ཡུལ་དང་གནས་སུ་འདོད་པ་ཡང་མ་ཡིན། ཏིང་ངེ་འཛིན་རྩེ་གཅིག་པའི་རྒྱུད་ལ་རིག་པ་བརྟེན་པའི་ཆ་ནས་སྟོང་པ་ལྟར་སྣང་གི་ལུས་མིང་བཞིའི་ཕུང་པོ་ཙམ་ལས་སྒོ་ལྔའི་སྤྱོད་ཡུལ་ཅན་དུ་འདོད་པའང་མ་ཡིན་ནོ། །ཚེ་ཚད་ནི་སྲིད་རྩེས་བསྐལ་ཆེན་བརྒྱད་ཁྲི་ཐུབ་པ་ནས་རིམ་བཞིན་གཉིས་གཉིས་འབྲིའོ། །དེ་ནས་གཟུགས་ཀྱི་ཁམས་ཇི་ལྟར་མཆེད་པ་ནི། སྔོན་ལེགས་པར་སྤྱད་པའི་བསམ་གཏན་བཞི་དང་། ཕ་རོལ་ཏུ་ཕྱིན་པ་དྲུག །དགེ་བ་བཅུའི་ས་བོན་གྱིས་བསྐྱེད་པས་བཀྲེས་སྐོམ་ཚ་གྲང་ནད་འཚེ་རྒས་རྒུད་ལ་སོགས་དབང་ཕྱུག་དང་མི་ལྡན་པའི་སྡུག་བསྔལ་གྱིས་གཏན་སྤངས་པའི་དྭངས་མ་འོད་ཀྱི་ལུས་དང་གཞལ་མེད་ཁང་འཇའ་ཚོན་གྱི་རྣམ་པ་ལྟ་བུ། རླུང་དང་རྫུ་འཕྲུལ་གྱི་སྟོབས་ཀྱིས་འགྲོ་ཞིང་ལྡིང་ལ། ཏིང་ངེ་འཛིན་གྱི་དགའ་བས་ཉིན་དང་མཚན་མོའི་བྱེ་བྲག་མེད་པར་དུས་འདའ་བས་ན་གཟུགས་ཁམས་ཞེས་བརྗོད་དོ། །དེ་ལའང་སྔོན་གྱི་རྒྱུད་དང་། ད་ལྟའི་ཏིང་ངེ་འཛིན་གྱི་གནས་ཚུལ་བཞི་ལ་ལྟོས་ནས་བསམ་གཏན་རིགས་བཞིར་དབྱེ་ལ། དེ་དག་གི་ཏིང་ངེ་འཛིན་ཀྱང་ངོ་བོ་གཅིག་ལ་གོམས་སྟོབས་ཀྱི་དབྱེ་བས་གནས་རིགས་གསུམ་གསུམ་ལ་སོགས་པར་བཞག་གོ །དེ་ལ་སྤྱིར་གཟུགས་ཁམས་གནས་རིགས་བཅོ་བརྒྱད་ལ། འཕགས་པ་དང་། སོ་སོ་སྐྱེ་བོའི་གནས་གཉིས་ལས། དང་པོ་ནི། ཉོན་མོངས་པའི་དྲི་ང་བ་འགའ་ཞིག་མེད་པས་གཙང་མ་རིགས་ཀྱི་ལྷ་ལྔ་སྟེ། དེའི་དང་པོ་ནི་འདོད་གཟུགས་རྣམ་པ་ཅན་ཐམས་ཅད་ཀྱི་གོང་ན་ཡོད་པས་འོག་མིན་ཞེས་བྱ་སྟེ། ལུས་བོངས་དཔག་ཚད་ཁྲི་དང་དྲུག་སྟོང་ལ། ཚེའི་ཚད་ཀྱང་བར་བསྐལ་ཁྲི་དྲུག་སྟོང་ངོ་། །དེའི་འོག་མ་ལ་ཤིན་ཏུ་མཐོང་ཞེས་གྲགས་ཏེ། གཅིག་གིས་གཅིག་མཐོང་ན་ལྷག་པའི་དགའ་བ་སྐྱེ་བའམ། ལྟ་བ་རྣམ་པར་དག་པ་མཐོང་བས་ན་དེ་སྐད་ཅེས་བྱའོ། །ཚེ་ཚད་དང་ལུས་བོངས་ནི་གོང་མ་གོང་མ་ལས་འོག་མ་འོག་མ་རྣམས་ཕྱེད་ཕྱེད་བྲི་བའོ། །དེའི་འོག་མ་ལ་གྱ་ནོམ་སྣང་བ་ཞེས་བྱ་སྟེ། ལུས་སེམས་ཉེ་བར་ཞི་བའི་བདེ་བ་གྱ་ནོམ་པས་སོ། །དེའི་འོག་མ་ལ་མི་གདུང་བ་ཞེས་བྱ་སྟེ། ལུས་སེམས་ལ་འདོད་པའི་གདུང་བ་མེད་པའི་ཕྱིར་རོ། །དེའི་འོག་མ་ལ་མི་ཆེ་བ་ཞེས་བྱ་སྟེ། གོང་མ་བཞི་ཀ་ལས་ལུས་བོངས་ཆུང་ཞིང་སྣང་བ་ལ་འདོད་སྲེད་མི་ཆེ་བ་ཡིན་ནོ། །དེ་དག་ལ་འཕགས་པའི་གནས་ལྔ་ཞེས་བྱའོ། །འཕགས་པའི་གནས་དེའི་ཡང་སྟེང་རོལ་ན། འོག་མིན་རྣམ་མཛེས་ཆེན་པོ་ཞེས་བྱ་བ་བྱང་ཆུབ་སེམས་དཔའ་སྲིད་པ་ཐ་མ་པ་ས་བཅུའི་དབང་ཕྱུག་ཆེན་པོ་རྣམས་སངས་རྒྱ་བའི་གནས་ཡོད་དེ། ཟླ་གསང་ལས། གཙང་མའི་གནས་དག་སྤངས་པ་ཡི། །འོག་མིན་ཞེས་བྱ་ཉམས་དགའ་བར། །ཡང་དག་སངས་རྒྱས་དེར་སངས་རྒྱ། །ཞེས་པ་ལྟར་རོ། །གཉིས་པ་སོ་སོ་སྐྱེ་བོའི་གནས་བསམ་གཏན་རིགས་བཞིའི་གོང་མ་གསུམ་གྱི་རྩེ་མོ་ནི་འབྲས་བུ་ཆེ་བ་སྟེ། བསོད་ནམས་ཆ་མཐུན་གྱི་དགེ་བའི་འབྲས་བུ་ཆེ་བ་ལས་གྲུབ་པའི་ཕྱིར་རོ། །ལུས་བོངས་དཔག་ཚད་ལྔ་བརྒྱ་པ་ཚེ་ཡང་བར་བསྐལ་ལྔ་བརྒྱའོ། །དེའི་འོག་མ་བསོད་ནམས་སྐྱེས་ཞེས་བྱ་སྟེ། ཚད་མེད་བཞི་བསྒོམ་པ་ལ་སོགས་པའི་བསོད་ནམས་ལས་སྐྱེས་པའོ། །ལུས་བོངས་དང་ཚེ་ཚད་ཕྱེེད་ཕྱེད་ཀྱི་བྲི་བ་འཕགས་པའི་གནས་བཞིན་ནོ། །དེའི་འོག་མ་ནི་སྤྲིན་མེད་འོད་དེ། འོད་ཀྱི་སྤྲིན་སྟུག་པོས་ཐ་མལ་གྱི་སྤྲིན་མེད་པར་བྱེད་པས་སོ། །དེའི་འོག་ན་བསམ་གཏན་གསུམ་པའི་ལྷ་གནས་གསུམ་བརྩེགས་པའི་གོང་མ་ལ་དགེ་རྒྱས་ཞེས་བྱ་སྟེ། དགེ་བའི་རྩ་བ་རྒྱ་ཆེན་པོས་བསྐྱེད་པ་ལས་གྲུབ་བོ། །དེའི་འོག་མ་ནི་ཚད་མེད་དགེ་སྟེ། དགེ་བའི་རྩ་བ་ཚད་མེད་པ་ལས་སྐྱེས་སོ། །དེའི་འོག་མ་ནི་དགེ་ཆུང་སྟེ། གོང་མ་ལས་ཆུང་བའི་དགེ་སྤྱད་ཀྱི་འབྲས་བུ་ལས་བྱུང་བས་སོ། །དེའི་འོག་མ་ན་བསམ་གཏན་གཉིས་པའི་ལྷ་གནས་གསུམ་བརྩེགས་པའི་གོང་མ་ལ་འོད་གསལ་ཅེས་བྱ་སྟེ། ལུས་ལ་འོད་གསལ་བའི་ཕྱིར་རོ། །དེའི་འོག་མ་ནི་ཚད་མེད་འོད་དེ། ལུས་ལ་འོད་ཚད་མེད་པས་སོ། །དེའི་འོག་མ་ནི་འོད་ཆུང་སྟེ། གོང་མ་ལས་འོད་ཆུང་བས་སོ། །དེའི་འོག་ན་བསམ་གཏན་དང་པོའི་གནས་རིགས་གསུམ་གྱི་གོང་མ་ལ་ཚངས་ཆེན་ཞེས་བྱ་སྟེ། འདོད་པའི་སྐྱོན་ཚངས་ལ་འོག་མ་ལས་ལུས་བོངས་ཆེ་བས་སམ། རྒྱལ་པོས་རང་གི་གནས་ལས་གཡོས་པ་མེད་བཞིན་འོག་མའི་ལྷ་གནས་ཀུན་ཏུ་སྤྲུལ་པ་སྟོན་པས་ཆེ་བའོ། །དེའི་འོག་མ་ནི་ཚངས་པ་མདུན་ན་འདོན་ཏེ། ཚངས་པ་ཆེན་པོའི་མདུན་ན་འདོན་བྱེད་པས་སམ། རང་རང་གི་མདུན་ན་ཁ་ཏོན་བྱེད་པ་རེ་ཡོད་པས་སམ། འཁོར་ཡིན་པས་ཚངས་པ་ཀུན་འཁོར། ཚངས་པ་ཆེན་པོའི་བྱ་བ་བསྒྲུབ་པ་ལ་ཕན་པས་ཚངས་ལྷ་ཉེ་ཕན་ཞེས་ཀྱང་བརྗོད་དོ། །དེའི་འོག་ན་ཚངས་པ་ཞེས་བྱ་སྟེ་ཚངས་པ་མ་ཡིན་པ་སྡིག་པའི་ལས་སྤངས་ནས་ཚད་མེད་བཞི་ལ་སོགས་དགེ་བའི་ལེགས་ལམ་ལ་ཚངས་པར་སྤྱད་པས་སོ། །དེ་དག་གཞལ་མེད་ཁང་གོས་དང་བཅས་པ་ནམ་མཁའ་ལ་འཇའ་ཚོན་ལྟར་བརྫུས་ཏེ་སྐྱེས། ཁམས་གོང་མའི་ཏིང་ངེ་འཛིན་གྱི་ཚོར་བ་བདེ་བ་ལ་ཆགས་པས་སྲིད་པའི་འདོད་ཆགས་ཅན་རགས་པའི་ཟས་མི་དགོས། འདོད་ཁམས་པ་ལྟ་བུའི་སྡུག་བསྔལ་དང་རྣམ་རྟོག་རགས་པ་མངོན་གྱུར་མེད་པས་ཁྲོ་ཞིང་འཁྲུགས་པ་མེད་དོ། །ཉོན་མོངས་པ་བག་ལ་ཉལ་གྱི་སྒྲིབ་པ་དང་བཅས་པས་འཆི་འཕོ་ཞིང་། གནས་ལ་རང་དབང་མ་ཡིན་པས་གནས་ངན་ལེན་གྱི་སྡུག་བསྔལ་ཡོད་པའོ། །དེ་ནས་འདོད་པའི་ཁམས་ལ་མཐོ་རིས་དང་ངན་སོང་གཉིས་ལས། མཐོ་རིས་ལའང་ལྷ་དང་མི་གཉིས་ཀྱི་དང་པོ་ནི་འདོད་ལྷ་རིགས་དྲུག་སྟེ། ནམ་མཁའ་ལ་བརྟེན་པའི་གོང་མ་གཞན་འཕྲུལ་དབང་བྱེད་ནི་ཚངས་རིས་ཀྱི་འོག་ན་ཡོད་དེ། གཞན་གྱིས་སྤྲུལ་པའི་ལོངས་སྤྱོད་ལ་དབང་བྱེད་པས་དེ་སྐད་ཅེས་བྱ་སྟེ། སྤྲུལ་པའི་དཔག་བསམ་དང་རང་གི་རྣམ་འཕྲུལ་གཞན་དུ་སྣང་བའི་འབྱོར་པར་གྱུར་པས་གཞན་འཕྲུལ་དབང་བྱེད་ཅེས་བྱའོ། །ལུས་རྒྱང་གྲགས་ཕྱེད་དང་གཉིས་ཏེ་གཞུ་འདོམ་བདུན་བརྒྱ་ལྔ་བཅུ་པའོ། །ཚེ་ཚད་རང་གི་ཉིན་ཞག་གཅིག་དང་མིའི་ལོ་ཆིག་སྟོང་དྲུག་བརྒྱ་མཉམ་པའི་ལོ་ཟླའི་འགྱུར་བརྩིས་པའི་རང་ལོ་ཁྲི་དྲུག་སྟོང་ཐུབ་བོ། །དེའི་འོག་ན་འཕྲུལ་དགའ་ཞེས་བྱ་བ་ལུས་ཀྱི་འོད་ལས་བུ་བརྒྱ་སྟོང་དཔག་ཏུ་མེད་པར་སྤྲུལ་ནས་རྩེ་དགའ་བྱེད་པའམ། རང་གིས་སྤྲུལ་པའི་ལོངས་སྤྱོད་ལ་དབང་བྱེད་པས་དེ་སྐད་ཅེས་བྱ་སྟེ། ལུས་རྒྱང་གྲགས་གཅིག་དང་བཞི་ཆའོ། །ཚེ་ཚད་གོང་མ་ལས་ཕྱེད་ཆ་བྲི་བ་རིམ་བཞིན་འོག་མ་དག་ལའང་འགྲེ་ཤེས་པར་བྱའོ། །དེའི་འོག་ན་དགའ་ལྡན་ཞེས་བྱ་བ་ལྷའི་བུ་དམ་པ་ཏོག་དཀར་པོའི་རྒྱལ་ཚབ་ཏུ་རྒྱལ་བ་མ་ཕམ་པ་བཞུགས་པའི་གནས་ཡོད་དེ། ཆོས་དང་ལོངས་སྤྱོད་གཉིས་ཀའི་དགའ་བ་དང་ལྡན་ལ། བསྐལ་པ་བཟང་པོའི་སངས་རྒྱས་རྣམས་ཀྱི་རྒྱལ་ཚབ་རེ་རྟག་པར་བཞུགས་པའི་གནས་ཁྱད་པར་འཕགས་པ་སྟེ་ལུས་ཚད་གཞུ་འདོམ་ལྔ་བརྒྱའོ། །དེའི་འོག་ན་འཐབ་བྲལ་ཞེས་བྱ་བ་ལྷ་མ་ཡིན་དང་འཐབ་རྩོད་བྲལ་བས་སམ། ལྷའི་ཁྱེའུ་ཕོ་མོ་གཉིས་པང་ནས་དུས་གཅིག་ཏུ་སྐྱེ་བས་མཚེ་མ་ཞེས་ཀྱང་གྲགས་ལ། ལུས་རྒྱང་གྲགས་གཅིག་ལ་བཞི་ཆས་དམན་པའོ། །དེ་ལྟར་འདོད་པའི་ལྷ་གནས་ནམ་མཁའ་ལ་བརྟེན་པ་བཞི་པོ་འདི་ནི་ལོངས་སྤྱོད་ཕུན་སུམ་ཚོགས་པ་དང་ལྡན་ཏེ། བདུད་རྩིའི་ཟས་དང་། བཏུང་བ་དང་། ལྷའི་གོས་དང་། སིལ་སྙན་དང་། གླུ་གར་དང་། རྩེད་འཇོ་དང་། དཔག་བསམ་གྱི་ཤིང་ལས་འདོད་པ་ཐམས་ཅད་འབྱུང་བ་དང་། འདོད་ཡོན་ལྔ་ལ་ངོམས་མི་ཤེས་པར་སྤྱོད་ཅིང་། ཡུལ་ཉེ་བར་སྤྱོད་པའི་ལོངས་སྤྱོད་རྣམས་ཀྱི་གཙོ་བོ་ནི། མཆོག་ཏུ་བདེ་བ་དང་། ཁམས་ཀྱི་ཟས་དང་། འདོད་པའི་བདེ་བ་ཡིན་ལ། དེའང་གཞན་འཕྲུལ་དབང་བྱེད་ན་ལྷ་ཕོ་མོ་འདོད་པས་ཡིད་གདུངས་པ་ན་ཕན་ཚུན་བལྟས་པ་ཙམ་གྱིས་གདུངས་བ་ཞི་ལ། འཕྲུལ་དགའ་རྒོད་པ་ཙམ་གྱིས་ཚིམ། དགའ་ལྡན་ཕན་ཚུན་ལག་བཅངས། མཚེ་མ་ན་གཉིས་གཉིས་འཁྱུད་པའོ། །དེའང་བལྟ་བ་ནི་དེ་ཉིད་གཅིག་པུས་ཆོག་པའི་འདོད་ཆགས་སོ། །དགོད་པ་ལ་མཐོང་ནས་བལྟ་བ་དང་། ཕན་ཚུན་དགོད་པའི་འདོད་ཆགས་གཉིས་ལྡན། ལག་བཅངས་ནི་བལྟ་བ། དགོད་པ། ལག་པ་རེག་པ་སྟེ་འདོད་ཆགས་གསུམ་ལྡན། དེའི་སྟེང་དུ་གཉིས་གཉིས་འཁྱུད་ནས་དབང་པོའི་འདུ་འཕྲོད་ལ་སྤྱོད་པ་ནི་བཞི་ཀ་ལྡན་པ་སྟེ་སུམ་ཅུ་རྩ་གསུམ་མན་ཆད་དེ་ཉིད་དོ། །སྤྱིར་སེམས་ཅན་གྱི་སྐྱེ་གནས་རྣམ་པ་བཞི་ལས། འདི་དག་ནི་བརྫུས་ནས་སྐྱེ་བ་སྟེ་པང་ནས་གོས་མེད་གཅེར་བུར་འབྱུང་བ་ཡང་འཛམ་བུའི་གླིང་པ་ཚེ་ལོ་བརྒྱ་པའི་སྐབས་གཞན་འཕྲུལ་པ་ལ་བྱིས་པ་ལོ་བཅུ་པའི་ན་ཚོད། འཕྲུལ་དགའ་བ་དགུ་པ། དགའ་ལྡན་པ་བརྒྱད་པ། འཐབ་བྲལ་པ་བདུན་པ། སུམ་ཅུ་རྩ་གསུམ་པ་དྲུག་པ། རྒྱལ་ཆེན་རིགས་བཞི་པ་ལྔ་པའི་ན་ཚོད་དབང་པོ་ཚང་ཞིང་ཤེས་རབ་དང་ལྡན་པར་བཙས་ནས་སྔར་གྱི་ཚེ་རབས་རྗེས་སུ་དྲན་ནོ། །ས་གཞི་ལ་བརྟེན་པ་ནི། འཐབ་བྲལ་གྱི་འོག་ལྷུན་པོའི་སྟེང་ན་དཔལ་འབྱོར་ཕུན་སུམ་ཚོགས་པས་བརྟེན་པའི་གཞི་ལ། བརྒྱ་བྱིན་གྱི་གླང་པོ་ཆེ་རབ་བརྟན་གསེར་གྱི་མགོ་སུམ་ཅུ་རྩ་གཉིས་གཡུའི་མགོ་དང་རྩ་གསུམ་ལ་ལྷ་དབང་དང་ཉེ་དབང་རྣམས་སྤྱོད་པས་ཀྱང་སུམ་ཅུ་རྩ་གསུམ་པའི་སྒྲར་ཆགས་ལ། ལུས་རྒྱང་གྲགས་ཀྱི་བཞི་ཆ་གཉིས་ཏེ་གཞུ་འདོམ་ཕྱེད་སུམ་བརྒྱ། ཚེ་མིའི་ལོ་བརྒྱ་ལ་རང་གི་ཉིན་ཞག་གཅིག་ཏུ་བརྩིས་པའི་རང་ལོ་སྟོང་ངོ་། །ལྷའི་དབང་པོ་ནི་རྣམ་པར་ཤེས་པ་བརྗེ་ཞིང་འཕོ་བ་ལས་སྐྱེ་འཆི་དང་བཅས་པར་མི་མངོན་པས་ཉིང་མཚམས་སྦྱོར་བ་རང་གི་བཙུན་མོ་དམ་པ་ཐགས་བཟངས་རིས་ཀྱི་བུ་མོ་ལྷ་མོ་བདེ་སོགས་མ་ལས་གཞན་གྱིས་མི་ཤེས་སོ། །གཞན་ཡང་བཙུན་མོའི་འཁོར་དུ་མ་དང་། བུ་སྟོང་དང་། ལྷའི་བུ་མོ་མེ་ཏོག་གི་མགོ་རྒྱན་ཅན་དང་། རིན་པོ་ཆེའི་རྣ་ཆ་གདུབ་སྐོར་གྱིས་སྤྲས་པ་མང་པོས། ཁང་བུ་བརྩེགས་པའི་འཕྱོང་ཀ་དང་། ལམ་སྲང་དང་། ཚལ་དང་། བཞི་མདོ་གང་བར་གླུ་གར་བྱེད་ཅིང་སིལ་སྙན་འཁྲོལ་བས་མཛེས་པར་བྱས་པ་དང་། གདུགས་དང་རྒྱལ་མཚན་ལ་སོགས་པ་བསྒྲེངས་ཤིང་། བརྩེ་བར་འཇུག་པའི་ཚེ་གླང་པོ་ཆེ་ས་སྲུང་གི་བུ་མགོ་བོ་སུམ་ཅུ་རྩ་གསུམ་གྱི་སྟེང་དུ་ཉེ་དབང་གི་འཁོར་དང་བཅས་འདུག་ཅིང་། དགེ་བའི་བྱ་བ་ཡང་བསྒྲུབ་ལ། བརྩེ་དགའི་དུས་སྟོན་གྱིས་ཉིན་མཚན་བར་མེད་དུ་འདའ་བ་ཡིན་ནོ། །འདོད་པའི་བདེ་བ་ལ་ཁུ་ཁྲག་མི་འབབ་ཀྱང་རླུང་སྟོང་པས་གདུང་བ་དང་འབྲལ་བར་བྱེད་དོ། །དེའི་འབྱོར་པའི་ཁྱད་པར་ནི་སྔར་བཤད་ཟིན་ཏོ། །དེའི་འོག་ན་ས་ལ་སྤྱོད་པའི་གནས་གཉིས་པ་ནི། ཉི་ཟླ་གཟའ་སྐར་འཆར་བའི་གནས་བང་རིམ་རྩེ་མོ་དང་གཉའ་ཤིང་འཛིན་ལ་སོགས་པའི་གཞི་ལ་རྒྱལ་ཆེན་རིགས་བཞིའི་ལྷ་རྣམས་ཡོད་པ་སྟེ། སྡེ་བཞིའི་ཁོངས་སུ་བསྡུ་ཞིང་གླིང་བཞིའི་ཡང་བདག་པོར་གྱུར་པས་དེ་སྐད་ཅེས་བྱའོ། །ལུས་རྒྱང་གྲགས་བཞི་ཆ་ལ། ཚེ་མི་ལོ་ལྔ་བཅུ་ལ་ཉིན་ཞག་ཏུ་བརྩིས་པའི་རང་ལོ་ལྔ་བརྒྱའོ། །ལྷ་མ་ཡིན་ལ་རིགས་ལྔ་ཡོད་དེ། ཚེ་དཔལ་ལྷའི་རིགས་སུམ་ཅུ་རྩ་གསུམ་པ་དང་ཚེ་ལུས་མཉམ་ལ་བསྐལ་པ་དང་ངང་ཚུལ་དགེ་བས་ཆོས་ལ་དད། སྟོབས་ཆེན་གནོད་སྦྱིན་གྱི་རིགས་རྒྱལ་ཆེན་བཞི་པ་དང་ཚེ་ལུས་ལོངས་སྤྱོད་མཚུངས་ཤིང་མཐུ་དཔལ་རྫུ་འཕྲུལ་ཆེ། རྩུབ་འགྱུར་བདུད་ཀྱི་རིགས་ནག་པོའི་ཕྱོགས་ལ་དགའ་བ་ཐགས་བཟངས་རིས་ལ་སོགས་གཞན་འཕྲུལ་དབང་བྱེད་དང་ལོངས་སྤྱོད་རྣམ་པ་འདྲ་ཞིང་། ཚེ་སུམ་ཅུ་རྩ་གསུམ་དང་མཉམ། གསོད་བྱེད་སྲིན་པོའི་རིགས་སེམས་ཅན་གྱི་སྲོག་ལ་འཚེ་ཞིང་མཁའ་ལ་རྒྱུ་བའི་ཡི་དྭགས་དང་ཕྱོགས་མཐུན། གདུག་པ་ཀླུའི་རིགས་ཕྱེད་མར་གྱུར་པའི་ལུས་དང་། ལོངས་སྤྱོད་དང་། བདེ་སྡུག་འདྲེས་ཤིང་བླུན་པའོ། །དེའང་བདུད་རིགས་ལྷའི་རིགས་སུ་སྡུད་པ་དང་། ལྷ་དང་དུད་འགྲོ་གཉིས་ཆར་དུ་སྡུད་པའང་ཡོད་དོ། ཁ་འཐོར་བ་རྣམས་ནི་མིའི་ཡུལ་དང་། རྒྱ་མཚོ་དང་། ནགས་ཚལ་དང་། གླིང་ཕྲན་ལ་སོགས་པར་གནས་ཤིང་ཚེ་དང་འབྱོར་བའང་མ་ངེས་པའོ། །དེ་ཐམས་ཅད་སྲིད་རྩེ་ནས་རིམ་གྱིས་འོག་མ་འོག་མར་མཆེད་ལ། དེ་ནས་མིར་མཆེད་པ་ནི། མདོ་སྡེ་ལས་འོད་གསལ་གྱི་ལྷའི་རིགས་ལས་སེམས་ཅན་བསོད་ནམས་དམན་པ་དག་དེར་འོངས་པ་ལས་མིར་མཆེད་པར་བཤད་ལ། ཡང་རྒྱལ་ཆེན་རིགས་བཞི་ནས་མཆེད་པར་བཤད་པའང་ཡོད་དེ། རྒྱུད་དག་ལས་དགའ་ལྡན་ནས་ལྷའི་བུ་ཉི་མ་རབ་ཏུ་སྣང་བྱེད་དང་། ཟླ་བ་དྲི་མ་མེད་པ་གཉིས་པདྨ་ལས་བརྫུས་ཏེ་སྐྱེས་པ་འཛམ་བུའི་གླིང་དུ་འོངས་པ་ལས་གླིང་འདིའི་འགྲོ་བ་རྣམས་ཐོག་མར་མཆེད་པའི་ཕྱིར་ལས་ཀྱི་ས་པ་ཞེས་གྲགས་སོ། །དེའི་ཚེ་གྲོང་དང་མི་མེད་པས་ལྷ་མི་ཞེས་སོ་སོར་ཕྱེ་བ་མེད་ལ། འགྲོ་བ་དེ་དག་གཟུགས་ཁམས་ཀྱི་ལྷ་ལྟར་འོད་ཀྱི་ལུས་གཟུགས་བཟང་ཞིང་བལྟ་ན་སྡུག་པ། དབང་པོ་དང་ཡན་ལག་མཛེས་པ། ནམ་མཁའ་ལ་འགྲོ་ཞིང་འདུག་པ། བསམ་པ་ཙམ་གྱིས་གང་འདོད་དུ་ཕྱིན་པ། ཟས་སུ་དགའ་བདེ་ལ་སྤྱོད་ཅིང་། ཕོ་དང་མོར་མེད་པ། ཉོན་མོངས་པ་མངོན་རྒྱུ་བ་མེད་པ་ལ་བསྐལ་པ་དང་པོ་ཞེས་བྱ་སྟེ་འགྲོ་བ་དེ་དག་གི་མིང་ལ་ཡང་སེམས་ཅན་ཞེས་གྲགས་ལ་ཡོན་ཏན་ཕལ་ཆེར་ལྷ་དང་མཚུངས་པ་ཡོད་དོ། །དེ་ནས་རིང་མོ་ཞིག་འདས་པ་ན་ནམ་མཁའ་ནས་མི་སྣང་ངོ་ཞེས་པའི་སྒྲ་ལན་བདུན་གྲགས་པས་དེ་དག་ལ་མི་ཞེས་བྱ་བར་མིང་ཐོགས། དེའི་ཚེ་སྔོན་གྱི་བསྐལ་པ་བཟང་པོ་ཉམས་པའི་མགོ་ཟུག །བསོད་ནམས་དང་འོད་ཀྱང་བྲི། ཉོན་མོངས་པ་བག་ལ་ཉལ་ལངས་སུ་ཉེའོ། །དེའང་ཚེ་ལོ་དཔག་ཏུ་མེད་པ་ནས་བརྒྱད་ཁྲི་པའི་བར་གྱི་སྐྱེས་བུ་ནར་སོན་པ་དག་གི་ལུས་ཚད་ཀྱང་རང་ཁྲུ་སུམ་ཅུ་རྩ་གཉིས་པར་ཡོད་ལ། རིམ་པ་བཞིན་དུ་ཉི་ཤུ་པ་དང་། བཅུ་དྲུག་པ་དང་། བརྒྱད་པ་དང་། ཚེ་ལོ་བརྒྱ་པའི་ཚེ་ཁྲུ་བཞི་པ་དང་། དེང་སང་ཕྱེད་དང་བཞི་པར་བྲི་ཞིང་། རིམ་བཞིན་བཅུ་པའི་བར་ཚེ་དང་ལུས་བོངས་གཉིས་ཀ་འགྲིབ་ཅིང་། དེ་བཞིན་དུ་ལུས་ཀྱི་འོད་དང་། གཟི་བརྗིད་དང་། དཔལ་ལ་སོགས་པའང་དམན་པར་འགྱུར་རོ། །འཛམ་བུའི་གླིང་དུ་མི་རྣམས་འཕེལ་ནས་རིང་ཞིག་སོང་། འོད་ཀྱང་ཡལ། བསོད་ནམས་ཀྱང་བགས་ཀྱིས་བྲི་བ་ན། ཤར་གྱི་ལུས་འཕགས་གླིང་དུ་ལྷ་ལས་མིར་མཆེད་པ་ནི་ལུས་ཚད་ཁྲུ་བརྒྱད་པ། ཚེ་ཚད་ཉིས་བརྒྱ་ལྔ་བཅུ་ཐུབ་པའོ། །དེ་ནས་སྒྲ་མི་སྙན་པ་ནི་སུམ་ཅུ་རྩ་གསུམ་པ་ལས་མཆེད་དེ། ལུས་ཚད་རང་ཁྲུ་སུམ་ཅུ་རྩ་གཉིས། ཚེ་ལོ་སྟོང་ཕྲག་གཅིག་ལ་དུས་མ་ཡིན་པའི་འཆི་བ་མེད་དོ། །བྷི་ཤ་ཚེ་ཏའི་སྐད་དུ་སྨྲ་བ་སྒྲ་སྐད་མི་སྙན་པས་སྒྲ་མི་སྙན་པ་ཞེས་ཀྱང་བྱ་ལ། ཤིང་སྐམ་པ་ཞག་བདུན་ན་འགྱེལ་བ་དང་མི་དེ་ཡང་ཤི་ནས་སུམ་ཅུ་རྩ་གསུམ་དུ་སྐྱེ་བ་ཡིན་ནོ། །དེ་བཞིན་ནུབ་ཀྱི་བ་གླང་སྤྱོད་པའང་ལྷ་ལས་མཆེད་དེ། ལུས་ཚད་རང་ཁྲུ་བཅུ་དྲུག་པ། ཚེ་ལོ་ལྔ་བརྒྱ་ཐུབ་པའོ། །རིམ་བཞིན་སོ་སོའི་གླིང་ཕྲན་གྱི་མི་ཡང་མཆེད་དོ། །གླིང་བཞིའི་མི་རྣམས་ཀྱི་བྱད་དབྱིབས་ཀྱང་གླིང་དང་རྣམ་པ་མཚུངས་པར་ཡོད་དེ། དཔེར་ན་འཛམ་བུའི་གླིང་སོག་ཀར་ཡོད་པས་མིའི་གདོང་དང་། ལུས་གཉིས་ཀ་སོག་ཀའི་དབྱིབས་སུ་ཡོད་པ་བཞིན་ནོ། །དེ་བཞིན་དུ་གླིང་སོ་སོའི་ནམ་མཁའ་ཡང་རི་རབ་ཀྱི་ཁ་དོག་དང་མཐུན་པར་ཡོད་དོ། །གླིང་འདིའི་ངེས་ཚིག་ནི། འཛམ་བུ་ཏྲི་ཤ་བྱ་བའི་ཤིང་གིས་ཉེ་བར་བརྒྱན་པས་ན་དེ་སྐད་ཅེས་བྱ་ལ་རྡོ་རྗེའི་གདན་གྱི་བྱང་ཕྱོགས་ནས་བྱང་ཕྱོགས་སུ་རི་ནག་པོ་དགུ་གཞལ་བ་ན་གངས་རིའི་རྒྱལ་པོ་ཏི་སེ། དེའི་བྱང་ན་རི་བོ་སྤོས་ངད་ལྡན། གངས་རིའི་བྱང་སྤོས་ངད་ལྡན་གྱི་ལྷོ་གཉིས་ཀྱི་བར་ན་མཚོ་ཆེན་པོ་ཀུན་ནས་བསིལ་བ་མ་དྲོས་པ་ཀླུའི་རྒྱལ་པོ་དང་བཅས་པ་ཡོད་དེ། མཚོ་དེ་ན་པདྨའི་སྡོང་པོ་ཡལ་ག་གཤོལ་མདའ་ཙམ་ལ། འདབ་མ་གླང་གི་ཀོ་བ་ཙམ་ཆུ་བྱ་སྣ་ཚོགས་དང་བཅས་པ་རྫུ་འཕྲུལ་དང་མི་ལྡན་པས་བགྲོད་པར་དཀའ་བའོ། །གངས་རི་དེའི་འདབས་ན། བྲག་གསེར་གྱི་བྱ་སྐྱིབས་ཅན་ལ་དགྲ་བཅོམ་པ་ལྔ་བརྒྱའི་ཕུག་པ་དང་། ལྷ་མ་ཡིན་གྱི་ངོས་བྱ་བ་ཆུ་ཞེང་དཔག་ཚད་ལྔ་བཅུ་པ་བརྒྱ་བྱིན་གྱི་གླང་པོ་ཆེ་རབ་བརྟན་གྱི་གནས། དེ་ན་ཏ་ལའི་ཕྲེང་བ་བདུན་གྱིས་བསྐོར་བའི་ཤིང་གི་རྒྱལ་པོ་རབ་བརྟན་དང་། གླང་པོ་དེའི་བརྩེ་ས་རྫིང་བུ་དལ་གྱིས་འཐོར་བ་ཞེས་བྱ་བ་རྫིང་གཡོག་ལྔ་བརྒྱའི་འཁོར་གྱིས་བསྐོར་བ་སྟེ། དེ་ལ་བོད་ཀྱི་བསྟན་བཅོས་རྣམས་ནས་དཔྱད་པ་སྣ་ཚོགས་སྣང་སྟེ་གསུང་རབ་རྣམས་ནས་གངས་ཅན་རིགས་མི་འདྲ་བ་ལྔར་བཤད་པ་མངོན་པའི་འགྲེལ་ཆེན་གྱིས་བསྟན་པས་མཐའ་གཅིག་ཏུ་མི་གཟུང་ངོ་། །མཚོ་མ་དྲོས་པའི་འགྲམ་ན་བྲག་གི་གཟུགས་ཐ་དད་པའི་ཤར་ཕྱོགས་གླང་པོ་ཆེའི་ཁ་ནས་གངྒཱ་མ་དྲོས་པ་ལ་ལན་བདུན་བསྐོར་ནས་ཆུ་ཕྲན་ལྔ་བརྒྱ་དང་བཅས་ཤར་གྱི་རྒྱ་མཚོར་འབབ་བོ། །དེ་བཞིན་དུ་ལྷོ་ཕྱོགས་ཁྱུ་མཆོག་གི་ཁ་ནས་སིན་དྷུ། ནུབ་ཕྱོགས་རྟ་མཆོག་གི་ཁ་ནས་པཀྵུ། བྱང་ཕྱོགས་སེང་གེའི་ཁ་ནས་སི་ཏ་རྣམས་སྔར་བཞིན་ཕྱོགས་སོ་སོའི་རྒྱ་མཚོར་འབབ་བོ། །ཁ་ཅིག་ཏུ། ཤར་ཕྱོགས་རྟ་མཆོག་གི་ཁ་ནས་ཆུ་ཆེན་ལོ་ཧི་ཏ་དངུལ་གྱི་བྱེ་མ་འདྲེན་པ། ལྷོ་ཕྱོགས་གླང་པོའི་ཁ་ནས་གངྒཱ་གསེར་གྱི་བྱེ་མ་འདྲེན་པ། ནུབ་ཕྱོགས་རྨ་བྱའི་ཁ་ནས་སིནྡྷུ་རིན་པོ་ཆེ་སྣ་ཚོགས་པའི་བྱེ་མ་འདྲེན་པ། བྱང་ཕྱོགས་སེང་གེའི་ཁ་ནས་པཀྵུ་རྡོ་རྗེའི་བྱེ་མ་འདྲེན་པ་སྔར་བཞིན་བསྐོར་བ་དང་བཅས་འབབ་པར་བཤད་དེ། མཚོ་དེའི་འགྲམ་གཡས་རོལ་ན་ཤིང་འཛམ་བུ་ཏྲི་ཤའི་སྡོང་པོ་རྒྱ་དང་འཕང་དུ་ཡངས་པ་ལ་འབྲས་བུ་རོ་བདའ་བ་སྨིན་པ་མཚོ་ནང་དུ་ལྷུང་བ་འཛམ་བུ་ཆུ་བོའི་གསེར་དུ་གྱུར་པ་ནི། གསེར་ཕལ་པ་ལན་བཅུ་དྲུག་ཏུ་བཞུ་བཏུལ་བྱས་པའི་དྭངས་ཞུན་ལྟ་བུའི་ཁ་དོག་དང་འོད་ཡོད་པའོ། །མཚོ་དེའི་བྱང་ཕྱོགས་ན་ཤལ་མ་ལི་རྩེ་མོ་རབ་ཏུ་མཐོ་བ་ལ་ནམ་མཁའ་ལྡིང་རྣམ་པ་བཞིའི་ཚང་ཡོད་དོ། །དེ་ལྟ་བུའི་བཀོད་པ་ཕུན་སུམ་ཚོགས་པའི་འཛམ་བུའི་གླིང་འདིར། བསྐལ་པ་དང་པོར་ཚེ་ལོ་དཔག་ཏུ་མེད། སྤྱི་མཐུན་གྱི་མིང་སེམས་ཅན་ཞེས་གྲགས་པ་ནས། མི་ཞེས་གྲགས་པའི་བར་དུ་དགའ་བདེའི་བག་ལ་ཡེངས་པའི་དུས་རིང་མོ་ཞིག་ནས་རིམ་བཞིན་ཚེ་དང་བསོད་ནམས་ཀྱང་སྔར་བས་བགས་ཀྱིས་བྲི་སྟེ་ཚེ་ལོ་བྱེ་བ་ཐུབ་པའི་དུས་ན་འབྱུང་བཞིའི་རྡུལ་ཕྲན་དང་པོ་འོད་ཀྱི་རང་བཞིན་དུ་འདུས་པའི་སྒོ་ང་ལས་སྐྱེས། ལས་ཀྱི་རླུང་གིས་ནམ་མཁའ་ལ་འགྲོ། ཟས་སུ་འབྱུང་བའི་དྭངས་མ་བཟའ། ཚ་གྲང་གི་སྡུག་བསྔལ་མེད་པས་ལུས་ལ་གོས་མི་དགོས། དེའི་སྟོབས་ཀྱིས་ལུས་ལ་དྲེག་པ་ཆགས་པས་དེ་ཉིད་འཁྲུ་བའི་ཁྲུས་ཀྱི་རྫིང་བུ་བཟང་པོའང་ཡོད་ལ། རང་བཞིན་གྱིས་དགེ་བ་བཅུ་ལ་གནས་པའོ། །དེ་ནས་ཚེ་ལོ་ས་ཡ་དྲུག་འབུམ་ན་ཚ་གྲང་གི་རྒྱུ་རྐྱེན་ལས་འགྲོ་བ་ཐམས་ཅད་དྲོད་གཤེར་དུ་སྐྱེ། འདོད་འཇོའི་བ་ལས་བདུད་རྩི་ལྟ་བུའི་ཞོ་འབྱུང་བས་ལུས་གསོ། འགྲོ་བར་འདོད་པའི་ཚེ་ཅང་ཤེས་ཀྱི་རྟ་ལས་གང་འདོད་དུ་ཕྱིན་པ་སོགས་འདོད་པའི་ཡོན་ཏན་ས་དང་། ཆུ་དང་། ཤིང་གི་ལྗོན་པ་ལས་འབྱུང་ངོ་། །དེ་ནས་ཚེ་ལོ་དགུ་ཁྲི་ཐུབ་པ་ན་སྔར་གྱི་དཔལ་འབྱོར་བྲི་བས། མི་རེ་སྐྱེ་བ་དང་ཤིང་རེ་འབྱུང་། རོ་ཕུན་སུམ་ཚོགས་པའི་ཤིང་འབྲས་བཟའ་ཤིང་། ལོ་མ་གོས་སུ་གྱོན་པའོ། །ཕོ་མོའི་མཚན་མ་མ་དོད་ཀྱང་། ཕན་ཚུན་བལྟས་པས་ཚིམ་པའི་འདོད་ཆགས་ཙམ་གཏི་མུག་བག་ལ་ཉལ་ལངས་པ་ལས་བྱུང་ངོ་། །དེ་ནས་ཚེ་ལོ་ལྔ་བརྒྱ་བྲི་བ་ན་སེམས་པ་དང་། རྟོག་པ་དང་། འགྲེང་བ་ལ་སོགས་པའི་རྣམ་རྟོག་ལས། ང་རྒྱལ་དང་ཕྲག་དོག་བག་ལ་ཉལ་ལངས། ཞེ་སྡང་བག་ལ་ཉལ་གྱི་མཐུས་ཤིང་བཅད་པས་ལྗོན་པའང་ནུབ། ཕོ་མོའི་དབང་པོའང་དངོས་མ་ཡིན་པའི་འབུར་འབུར་པོ་དང་། ཤོང་ཤོང་བུ་ཙམ་དུ་དོད། བགད་པས་ཚིམ་པའི་འདོད་ཆགས་བྱུང་ངོ་། །སྔོན་བས་ཚེ་ལོ་ལྔ་བརྒྱ་བྲི་བ་ནས་སའི་བཅུད་དམ་ཞག་མར་གསར་གྱི་ཁ་དོག་ལྟ་བུ་ལ། སྦྲང་རྩིའི་རོ་བཅུད་ཡོད་པའི་ཟས་ཟ་ཞིང་། ཤིང་བལ་འཇམ་པོ་གོས་སུ་བྱེད་དོ། །དེའི་ཚེ་རེག་པས་ཚིམ་པའི་འདོད་ཆགས་བྱུང་ངོ་། །དེ་ལྟར་ཁམས་ཀྱི་ཟས་རགས་པ་དེས་ལུས་མཁྲང་བར་གྱུར་ཏེ་ལྕི་བ་དང་། ཉོན་མོངས་པ་དང་། གཏི་མུག་བག་ལ་ཉལ་དངོས་སུ་ལངས། ལུས་ཀྱི་འོད་མོག་མོག་པོར་གྱུར་ནས་སྔོན་བས་མི་མཛེས། ས་ལ་སོར་བཞིས་མ་རེག་པར་འགྲོ་བ་ལས་ནམ་མཁའ་ལ་འགྲོ་བའི་མཐུ་ཉམས། འགའ་ཞིག་གིས་སའི་ཞག་ལ་གསོག་འཇོག་བྱས་པའི་རྗེས་སུ་བསླབས་པས་དེའང་ནུབ། བར་དེར་མུ་གེ་དང་། མུན་པའི་གནས་སྐབས་ཀྱང་ལོ་མང་དུ་བྱུང་བ་ན་སྤྱི་མཐུན་གྱི་བསོད་ནམས་ལས་ནམ་མཁའ་ལ་ཉི་མ་ཤར། དེ་ལ་ཉེ་རིང་མེད་པས་ཉེ་བར་ཕན་འདོགས་པའི་མིང་ཉི་མར་གྲགས། དེ་ནུབ་པ་ལ་མཚན་མོའི་མིང་ཆགས་ཤིང་མུན་པ་སེལ་བར་སྨོན་པ་ན་ཟླ་བ་ཤར་བས། འདི་ཡང་དེའི་ཟླ་བོར་འདུག་ཅེས་ཟླ་བར་བཏགས། དེ་ཧ་ཅང་བསིལ་བའི་གདུང་བ་མ་བཟོད་ནས་འདི་བས་མི་བསིལ་བར་གྱུར་ཅིག་སྨྲས་པས་སྐྱེ་འབྲི་ཅན་དུ་གྱུར། སྐྱེ་འབྲིའི་རྟེན་འབྲེལ་ནི་མཛོད་ལས། ཉི་མ་དང་ནི་ཉེ་བ་ལས། །རང་གི་གྲིབ་མས་འགྲིབ་པར་སྣང་། །ཞེས་པ་ལྟར་རམ། ཡང་ན་ཆུ་ཤེལ་ངོས་ཡར་ངོ་ལ་ཐུར་དུ་ཇེ་གསལ་དུ་གྱུར་པའི་སྟོབས་ཀྱིས་བཻ་ཌཱུརྱ་ངོས་ཇེ་འབྲིར་འགྱུར་ལ། བཅོ་ལྔར་རྫོགས་པར་བླ་འོག་འགྱུར་བས་ཆུ་ཤེལ་འབའ་ཞིག་མངོན་ལ། བཅུ་དྲུག་ནས་འགྲིབ་དུས་ཡང་བཻ་ཌཱུརྱ་ཐུར་ལ་ཇེ་ཆེར་གྱུར་པ་སྟོང་ལ་བླ་འོག་རིལ་ལོག་པས་བཻ་ཌཱུརྱ་འབའ་ཞིག་སྣང་བ་ནམ་མཁའ་དང་མདོག་འདྲེས་པས་མི་སྣང་བ་ཡིན་ནོ། །དེ་ལྟར་ཉི་ཟླ་ཤར་དུས་གཟའ་དང་སྐར་མ་ཡང་དེའི་འཁོར་དུ་ཤར་ཞིང་དུས་ཚིགས་རྣམས་ཀྱང་བྱུང་བའི་ཚུལ་དྲང་སྲོང་རྔ་བོང་གིས་བཤད་པ་བཞིན་ནོ། །དེ་ལྟར་སའི་བཅུད་ནུབ་པས་ཀྱེ་མ་ཀྱི་ཧུད་སའི་བཅུད་ཟེར་མྱ་ངན་བྱེད་པ་ན་སའི་ཞག་དོང་ཀའི་མེ་ཏོག་ལྟར་དམར་ལ་སྦྲང་རྩིའི་རོ་ལྟ་བུས་འཚོ་བ་བྱུང་ངོ་། །དེ་ཡང་མངོན་པའི་ང་རྒྱལ་གྱི་རྐྱེན་ལས་ནུབ་པ་ནི། མྱུ་གུའི་ཚལ་སེར་པོ་ཀ་ཏཾ་སུ་ཀའི་མེ་ཏོག་ལྟ་བུར་ཟ་ཞིང་། དེའང་ནང་བརྔས་ན་ནང་སྐྱེ། ནུབ་བརྔས་ན་ནུབ་སྐྱེ་བ་ཡོད་པ་ལ་དེའང་སྔར་བཞིན་ནུབ་པས་མྱ་ངན་བྱེད་དོ། །དེའི་འོག་ཏུ་མ་རྨོས་པའི་འབྲས་སཱ་ལུ་བརྔས་པ་མི་མངོན་པར་རང་འཁྲུངས་བ་ལ་ལོངས་སྤྱད་པས་ལུས་སྟོབས་དང་ལྡན། ཕོ་མོའི་དབང་པོ་དང་། གཤང་གཅིའི་ལམ་དངོས་སུ་དོད། དེ་སྦ་ཕྱིར་རས་བལ་ཐགས་སུ་བྱས་པའི་སྨད་དཀྲིས་དང་གོས་སུ་བྱེད། གཉིས་འཁྱུད་ཀྱི་འདོད་ཆགས་བྱུང་ནས་མངལ་ལས་སྐྱེ་བར་གྱུར། ཕན་ཚུན་འདོད་པ་བསྟེན་པ་གཞན་གྱིས་མཐོང་ནས་ས་རྡོ་འཕངས་པ་ལ་ངོ་ཚ་བའི་སེམས་སྐྱེས་ནས་ཁང་བུ་བྱས་པས་ངོ་ཚའི་ཁྱིམ་དུ་མིང་ཆགས། ནམ་མཁའ་ལས་བདུད་རྩིའི་ཆར་བབས་པ་སྐྱོབ་པའི་ཕྱིར་སྟེང་ནས་འཇག་མས་བཀབ་པས་ཁྱིམ་ལ་སྔ་བ་འཇག་སྤྱིལ་དུ་གྲགས། ལེ་ལོ་ཅན་དག་གིས་འབྲས་ཀྱི་ཞིང་ནས་བླངས་ཏེ་གསོག་འཇོག་བྱས་པས། ཀུན་གྱིས་དེ་ལྟར་ལོབས་ཏེ་གསོག་འཇོག་གི་ཉེས་པས་སཱ་ལུ་ཕུབ་མ་ཅན་དུ་གྱུར། དེ་ནས་མི་རང་བཞིན་ངན་པ་གཅིག་གིས་འབྲས་ཀྱི་ཞིང་ལ་འདིར་དབང་ངོ་ཞེས་རིས་སུ་བཅད་པས་ཀུན་ཀྱང་ཕྲག་དོག་དང་ང་རྒྱལ་གྱི་མུ་འབྲེལ། བསམ་པའི་ཁྱད་པར་ལས་བསོད་ནམས་ཆེ་ཆུང་གིས་ཞིང་གི་ལོ་ཐོག་ལ་བཟང་ངན་བྱུང་བས་ངན་པ་རྣམས་མ་སོས་ཏེ་བཟང་པོ་ལ་བརྐུ་བ་དང་སློང་བ་བྱུང་། ལས་ཀྱི་དབང་གིས་དེ་ཡང་ཟད་དུ་ཉེ་བ་ལ། མི་རང་བཞིན་བཟང་བ་གཅིག་གིས་ཀུན་ལ་སྙོམས་པར་བཀྱེ་བས་རང་སྐལ་ཆད་པ་ལ། ཐམས་ཅད་མགུ་ནས་རྒྱལ་པོར་བསྐོས་པས་མང་པོས་བསྐུར་བའི་རྒྱལ་པོ་བྱུང་། དམངས་མིའི་ནང་ནས་འགའ་ཞིག་ཁྱིམ་ནས་ཡིད་ཕྱིར་ཕྱོགས་ཏེ་གཙང་སྦྲ་ལྷུར་ལེན་པ་ལ་བྲམ་ཟེའི་མིང་དུ་ཆགས། ཁྱིམ་ན་གནས་ཏེ་ཕ་མ་བཀུར་བ་གཙོ་བོར་བྱེད་པ་ལ་རྗེའུ་རིགས་ཞེས་བྱ། གང་དག་ཕ་ལ་ཕར་མི་འཛིན། མ་ལ་མར་མི་འཛིན། རིགས་ཀྱི་རྒན་རབས་ལ་རྒན་རབས་སུ་མི་འཛིན། གསོད་པ་དང་། བརྐུ་བ་དང་ལོག་པར་གཡེམ་པ་སོགས་བརླང་པོར་སྤྱོད་པ་ལ་དམངས་སམ་གདོལ་པའི་རིགས་ཞེས་ངན་པར་བཅད། རིགས་འདྲེས་པས་བསླད་པའམ། གློ་བུར་གྱི་ཀུན་སྤྱོད་དེ་ལྟར་གྱུར་ནའང་དམངས་རིགས་སུ་འབེབས་པར་འཆད་པས་རྒྱ་གར་ན་དེང་སང་གི་བར་དུ་རིགས་བསྲུང་བ་ལ་ནན་ཏན་ཆེ། དེ་ལྟ་ནའང་མུ་སྟེགས་ཚངས་པའི་རྗེས་སུ་འབྲེང་བ་དག་ཚངས་པའི་གདོང་ལས་མི་རིགས་བཞི་བྱུང་བར་སྨྲའོ། །དེ་ནས་ཤིང་གི་ཐོང་པས་རི་ལ་རྨོས་ཏེ་གཟེ་ཀ་ཅུང་ཟད་བཏབ་པས་འབྲུ་ལ་སྔ་བ་སོ་ཀ་བྱུང་། དེ་ནས་སོ་ནམ་གྱི་ལས་ཆེར་བྱས་ཏེ། གྲོང་དང་། ལྗོངས་དང་། རྒྱལ་པོའི་ཕོ་བྲང་དང་། གྲོང་ཁྱེར་རྒྱ་ཆེན་པོར་འཕེལ། ལོ་བརྒྱད་ཁྲི་པའི་དུས་འཛམ་བུའི་གླིང་ཕལ་ཆེར་བྱ་གག་སྤར་པའི་ཚོད་ཙམ་དུ་གྲོང་ཁྱེར་གྱི་གང་བས་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ་བྱུང་སྟེ། ད་ལྟ་ལྔ་བརྒྱའི་ཐ་མ་འདིར་ནི་དཔག་ཚད་དང་རྒྱང་གྲགས་ཀྱི་བར་དུའང་གྲོང་དང་གྲོང་ཁྱེར་གྱིས་སྟོངས་པ། སྔོན་ཆད་བྱུང་བའི་ཤུལ་ཐམས་ཅད་ཀྱང་ཟད་པའི་མུ་ལ་ཐུག་པ། འབྱོར་པ་མ་ཡིན་པ། རྒྱས་པ་ལས་ཉམས་པ། ལོ་ཐོག་ངན་པ། སྐྱེ་བོ་དང་། མི་ཚོགས་ནི་ཉུང་། ངན་སོང་དང་བར་སྲིང་མང་། དེའི་རྒྱུ་བསྒྲུབ་པ་ལ་འབད་རྩོལ་དང་བཅས་ཤིང་། ཐར་པ་དང་ཐམས་ཅད་མཁྱེན་པའི་ལམ་ལ་སེམས་པ་ནི་ཉིན་མོའི་སྐར་མ་ལྟ་བུར་ཉུང་བས་འདི་ཡང་བར་སྐབས་ཀྱི་སྐྱོ་བ་དང་མི་རྟག་པའི་གཏམ་གཅིག་ཏུ་བསྟན་ནས། མཐོ་རིས་ཀྱི་ཆགས་ཚུལ་བཤད་ཟིན་ཏོ། །དེ་ནས་ངན་སོང་ཇི་ལྟར་ཆགས་པ་ནི། མཐོ་རིས་ཀྱི་རྟེན་ལ་དུག་གསུམ་གྱི་ལས་བསགས་པ་ལས་བྱུང་སྟེ། ཁྱད་པར་ཞེ་སྡང་གི་ལས་ལས་དམྱལ་བའི་བདག་པོར་གྱུར་པའི་ལས་བསགས་པ་ཞིག་གཤིན་རྗེའི་རྒྱལ་པོར་སྐྱེས་ནས། དེའི་འོག་ཏུ་དམྱལ་བའི་སྲུང་མ་ཕྲ་མེན་གདོང་དང་། ཁྱི་དང་། བྱ་དང་། ཟངས་དང་། ཁྲོ་ཆུ་དང་། མེ་ཚོགས་དང་། མཚོན་ཆའི་རིགས་རྣམས་སོ་སོའི་ལས་སྣང་གིས་སྤྲུལ་པས་སྣང་བ་ཡིན་ལ། དེ་ལྟར་སྣང་བའི་སྡུག་བསྔལ་ལ་སྤྱོད་པའི་སེམས་ཅན་དམྱལ་བ་པ་མནར་མེད་པ་དང་། རབ་ཏུ་ཚ་བ་དང་། ཚ་བ་དང་། ངུ་འབོད་ཆེན་པོ་དང་། ངུ་འབོད་དང་། བསྡུས་འཇོམས་དང་། ཐིག་ནག་དང་། ཡང་སོས་ཏེ། ཚ་དམྱལ་བརྒྱད་པོའི་བྱང་གི་ཉེ་ལོགས་སུ། པདྨ་ཆེན་པོ་ལྟར་གས་པ་དང་། པདྨ་ལྟར་གས་པ་དང་། ཨུཏྤལ་ལྟར་གས་པ་དང་། སོ་ཐམ་ཐམ་པ་དང་། ཀྱི་ཧུད་པ་དང་། ཨ་ཆུ་པ་དང་། ཆུ་བུར་བརྡོལ་བ་དང་། ཆུ་བུར་ཅན་ཏེ་གྲང་དམྱལ་བརྒྱད། འཁོར་ལྷག་པ་བཅུ་དྲུག་དང་བཅས་ལས་ཀྱི་མཐུས་གྲུབ་པ་ཡིན་ནོ། །འདི་དག་སྤྱོད་འཇུག་ལས་བཤད་པ་བཞིན་ཐེག་པ་ཆེན་པོ་པའི་ལུགས་སུ་སྡིག་སེམས་གོམས་པ་ལས་གྲུབ་པར་འདོད་པ་ལ་གོ་བའི་ཕྱོགས་འཛོལ་ནས་དོན་ལ་མེད་པར་འདོད་པ་ལ་ནི། བདག་ཉིད་ཀྱང་དོན་ལ་མེད་པ་ཞིག་ལས་ཀྱི་གཟུགས་སྣང་དུ་མངོན་སུམ་པ་ཉིད་མེད་དོ་སྨྲས་པས་མེད་པར་མི་འགྲུབ་པའི་གནོད་པ་འཇུག་གོ །འདོད་ཆགས་ཀྱི་སྒོ་ནས་ལས་བསགས་པ་དེ་དག་ནི་ཡི་དྭགས་ཕྱིའི་སྒྲིབ་པ་ཅན་དང་། ནང་གི་སྒྲིབ་པ་ཅན་དང་། སྤྱི་མཐུན་ལས་ཀྱི་སྒྲིབ་པ་ཅན་དང་། སྒོ་ཁྱུད་ཀྱི་སྒྲིབ་པ་ཅན་དུ་སྣང་ལ། གཏི་མུག་གི་སྒོ་ནས་ལས་བསགས་པ་རྣམས་ནི། དུད་འགྲོ་གཅིག་ལ་གཅིག་ཟ་བ་དང་། བཀོལ་སྤྱད་དང་། འཚེ་བ་རྣམ་པ་དུ་མས་ཉམ་ཐག་པ་ཅན་དུ་གྲུབ་བོ། །དེ་ལྟར་སྣོད་བཅུད་ཆགས་པའི་ཐོག་མཐའི་ཚད་གང་གིས་བཟུང་ན། དང་པོའི་གཞི་ནམ་མཁའ་རྣམ་པར་དག་པ་ལ་རླུང་གི་དཀྱིལ་འཁོར་ཆགས་པ་ནས་བཟུང་སྟེ་མནར་མེད་དུ་སེམས་ཅན་གཅིག་སྡུག་བསྔལ་མྱོང་བ་ལ་སྐྱེས་པའི་བར་གྱི་ཡུན་ལ་སྣོད་ཆགས་པའི་བར་བསྐལ་གཅིག་སྟེ། བཅུད་ཆགས་པ་ལ་བཅུ་དགུ། །བསྡོམས་པས་བར་བསྐལ་ཉི་ཤུའོ། །དེ་ཡན་ཆད་ནི་ཆགས་ཚུལ་གཏན་ལ་ཕབ་པའོ། །གཉིས་པ་གནས་པའི་བར་བསྐལ་ཉི་ཤུ་ནི། འགྲིབ་པ་གཅིག་དང་། འཕེལ་འགྲིབ་བཅོ་བརྒྱད་དང་། འཕེལ་བ་གཅིག་སྟེ་རྣམ་གྲངས་གསུམ་ལས། དང་པོ་འགྲིབ་པ་གཅིག་ནི། ཚེ་ལོ་དཔག་མེད་ནས་བརྒྱད་ཁྲིའི་བར་དུ་ལོ་ཉིས་བརྒྱ་ན་རེ་རེ་འབྲིའོ། །བརྒྱད་ཁྲི་ནས་བཅུ་པའི་བར་དུ་བརྒྱ་བརྒྱས་ལོ་རེ་རེ་འབྲིའོ། །གཉིས་པ་འཕེལ་འགྲིབ་བཅོ་བརྒྱད་ནི། བཅུ་པ་རྫོགས་ནས་སྲོག་གཅོད་པ་སྤངས་པས་ཚེ་ལོ་ཉི་ཤུ་པར་འཕེལ། མ་བྱིན་ལེན་སྤངས་པས་བཞི་བཅུ། ལོག་གཡེམ་སྤངས་པས་བརྒྱ་པ་དང་། ཕྲ་མ་སྤངས་པས་ཉིས་བརྒྱ་བར། ངག་འཁྱལ་སྤངས་པས་ལྔ་བརྒྱ་བར། ཚིག་རྩུབ་སྤངས་པས་སྟོང་དང་། བརྣབ་སེམས་སྤངས་པས་ཉིས་སྟོང་དང་། གནོད་སེམས་སྤངས་པས་ཁྲི་དང་། ལོག་པར་ལྟ་བ་སྤངས་པས་ཉི་ཁྲི་དང་། མི་རིགས་པའི་འདོད་ཆགས་སྤངས་པས་བཞི་ཁྲི་དང་། ལོག་པའི་ཆོས་སྤྱོད་པ་སྤངས་པས་བརྒྱད་ཁྲི་བར་འཕེལ་ལོ། །དེ་ལྟར་ཚེ་འཕེལ་བ་ལྟར་གཟུགས་དང་ལོངས་སྤྱོད་ཀྱང་འཕེལ་བས་འབྱོར་ཤིང་རྒྱས་པའོ། །དེ་ནས་ཡང་སྡེ་ཚན་རེས་འགྲིབས་ཤིང་འཕེལ་བ་བཅོ་བརྒྱད་ནི་བར་ཁུག་བཅོ་བརྒྱད་ཅེས་བྱའོ། །གསུམ་པ་ཕྱིས་འཕེལ་བ་གཅིག་ནི། བར་ཁུག་རྫོགས་པའི་རྗེས་ལ་བརྩི་ལུགས་འདྲ་བ་ནས། ཚེ་ལོ་དཔག་མེད་ཐུབ་པར་སོང་ནས་གཅིག་འགྲིབ་དུས་སངས་རྒྱས་མོས་པ་འབྱོན་ལ། དེ་ནས་བརྒྱད་ཁྲི་པའི་བར་ཉིས་བརྒྱས་ལོ་རེ་འབྲི་ཞིང་། བརྒྱད་ཁྲི་ནས་བཅུ་པའི་བར་དུ་བརྒྱ་བརྒྱས་ལོ་རེ་འབྲིའོ། །དེའི་དུས་བུ་མོ་བཙས་པ་རྣམས་ནི་ལོ་ལྔ་བརྒྱ་ན་ཁྱིམ་ཐབ་ཏུ་གཏོང་ལ། མི་རྣམས་ན་བའི་ཚད་ཀྱང་འདོད་པས་གཟིར་བ་དང་། ཟས་མི་ཟ་བ་ཙམ་ལ་བྱེད་དོ། །དེའི་ཚེ་འབྲུའི་སྙེ་མ་རེ་རེ་ལས་ཀྱང་བྲེ་བོ་ཆེ་བཞི་བཞི་འབྱུང་ཞིང་། འབྱོར་པ་ལྷའི་ཡུལ་དང་འགྲན། མི་རྣམས་ཚེ་ལོ་དཔག་མེད་ཐུབ་པ་ནས་བརྒྱད་ཁྲིའི་བར་ལ་འཁོར་ལོས་བསྒྱུར་བའི་རྒྱལ་པོ་སྤྱི་བོ་སྐྱེས་དང་། གསོ་སྦྱོང་འཕགས་དང་། རབ་མཛེས་ལ་སོགས་པ་རབས་བདུན་བྱུང་ལ། གཞན་ཡང་གླིང་གཅིག་པ་ལ་དབང་བ་ལྕགས་ཀྱི་འཁོར་ལོས་སྒྱུར་བ། གཉིས་པ་ལ་དབང་བ་ཟངས། གསུམ་པ་ལ་དབང་བ་དངུལ། བཞི་པ་ལ་དབང་བ་གསེར་ཏེ། རྒྱལ་པོ་གང་ན་འགྲོ་བའི་སྔོན་ནས་འཁོར་ལོ་འགྲོ་ཞིང་རིན་པོ་ཆེ་སྣ་བདུན་དང་ལྷན་ཅིག་སྤྱོད་པས་ན་འཁོར་ལོས་སྒྱུར་བའི་རྒྱལ་པོ་ཞེས་བྱ་སྟེ། འཁོར་ལོ་ནི་རི་རབ་ཀྱི་ཁོང་སེང་ངམ། བང་རིམ་ལ་ཡོད་པ་དང་། བརྒྱ་བྱིན་གྱི་འཁོར་ལོ་ཕལ་བ་དང་། ནམ་མཁའི་དབྱིངས་ནས་སྔོན་ལེགས་པར་སྤྱད་པའི་བསོད་ནམས་ཀྱི་མཐུ་ལས་རང་བྱུང་བར་རྒྱ་ཆེར་རོལ་པ་དང་། མངོན་འབྱུང་གི་མདོ་སོགས་ལས་རང་རང་གིས་ཡོན་ཏན་དང་བཅས་བཤད་དོ། །དེ་ལ་ཉེ་བའི་རིན་པོ་ཆེ་རྣམ་པ་བདུན་ཡང་ཡོད་དེ། རྒྱལ་པོའི་ཡིད་དང་འགལ་བར་བྱེད་པ་དེར་རལ་གྲི་རིན་པོ་ཆེས་ཕྱིན་ནས་འདུད་པར་བྱེད་པ་དང་། རྒྱ་མཚོའི་ཀླུའི་པགས་པ་དབྱར་ཆར་གྱིས་མི་བརླན་པ། དགུན་རླུང་གིས་མི་བསྐྱོད། མེས་མི་འཚིག །གྲང་ན་དྲོ། དྲོ་ན་བསིལ་བར་བྱེད་པ་ཞིང་དུ་དཔག་ཚད་ལྔ། མཆུར་དཔག་ཚད་བཅུ་པ་དང་། མལ་ཆ་རིན་པོ་ཆེ་ཡང་ཞིང་འཇམ་ལ་མཐོ་དམན་ཅན། བཏེག་ན་འཕར། མནན་ན་ནེམས་བྱེད་པ། དེའི་སྟེང་དུ་འདུག་པས་འདོད་ཆགས་ཟིལ་གྱིས་ནོན་པ་སོགས་ཉོན་མོངས་པ་གཞན་ཡང་འཇོམས་པ་དང་། ཚལ་རིན་པོ་ཆེ་རྒྱལ་པོ་དེར་བསམ་གཏན་ལ་དགའ་བར་འགྱུར་ཞིང་། མེ་ཏོག་དང་། འབྲས་བུ་དང་། བྱ་དང་། ལྟེང་ཀ་དང་། འབབ་ཆུ་དང་། ལྷའི་བུ་མོ་དག་ཉེ་བར་འོང་ཞིང་། ལྷའི་འདོད་པའི་ཡོན་ཏན་ལྔ་དང་ལྡན་པ་དང་། ཁྱིམ་རིན་པོ་ཆེ་བལྟ་བར་འདོད་ན་ཟླ་བ་རྒྱུ་སྐར་ཀྱང་དེར་འོང་ཞིང་། མྱ་ངན་དང་བྲལ་བའི་མིའང་དེར་བདེ་བར་གཉིད་ལོག་ཅིང་རྨི་ལམ་བཟང་པོ་མཐོང་བ། གྲང་དུས་སུ་རླུང་དྲོ་བ་དང་། དྲོ་དུས་སུ་རླུང་གྲང་བར་ལྡང་བ་སོགས་བདེ་བ་དང་ལྡན་པའོ། །གོས་རིན་པོ་ཆེ་ནི། ཐགས་བཟང་ཞིང་འཇམ་ལ་དྲི་མས་མ་གོས་པ། མེ་མཚོན་སོགས་ཀྱིས་བསྲེག་བཅད་མི་ནུས་པ། བཀྲེས་སྐོམ་གྲང་དྲོ་ངལ་དུབ་ཀྱིས་གནོད་པ་མེད་པའོ། །ལྷམ་རིན་པོ་ཆེ་ནི། གྱོན་ན་ཆུ་ལ་མི་བྱིང་། དཔག་ཚད་བརྒྱར་ཡང་ངལ་དུབ་མེད་པར་འགྲོ་ནུས་པའི་ཁྱད་པར་རོ། །དེ་ལྟ་བུའི་འཁོར་ལོས་སྒྱུར་བའི་རྒྱལ་པོ་ནི་བརྒྱད་ཁྲི་མན་ཆད་ལ་མི་འབྱུང་སྟེ། དེའི་ཚེ་ཚད་དང་དཔལ་འབྱོར་མི་རྫོགས་པའི་ཕྱིར་རོ། །སངས་རྒྱས་བཅོམ་ལྡན་འདས་རྣམས་ནི་ཕལ་ཆེར་མར་འགྲིབ་ལ་འབྱུང་སྟེ། བརྒྱད་ཁྲི་ཡན་ཆོད་སྐྱོ་ཤས་ཆུང་བས་ཆོས་བསྟན་ཡང་དོན་དུ་འགྱུར་བ་དཀའ་ཞིང་། བདེན་པ་མངོན་པར་རྟོགས་པའང་ཉུང་བའི་ཕྱིར་དང་། བརྒྱ་པ་མན་ཆད་དུའང་མི་འབྱུང་སྟེ། ཚེའི་སྙིགས་མ་དང་། དུས་ཀྱི་སྙིགས་མས་སྲོག་དང་ཡོ་བྱད་རྒུད་པར་བྱེད་པ་དང་། སེམས་ཅན་གྱི་སྙིགས་མས་གཟུགས་རྒུད་པར་བྱེད་པ་དང་། ཉོན་མོངས་པ་དང་ལྟ་བའི་སྙིགས་མས་དགེ་བའི་ཕྱོགས་རྒུད་པར་བྱེད་པའི་སྙིགས་མ་ལྔ་བདོ་བས་སངས་རྒྱས་བྱོན་ཡང་སྒྲོ་སྐུར་གྱི་མཐར་ལྷུང་བས་སྣོད་དུ་མི་རུང་བའི་ཕྱིར་རོ། །དེའི་ཕྱིར་བཟང་པོའི་བསྐལ་པ་འདི་ལ་སངས་རྒྱས་སྟོང་འབྱུང་བའི་དང་པོ་འཁོར་བ་འཇིག་བརྒྱད་ཁྲིའི་དུས་སུ་བྱོན་པ་ནས་རིམ་བཞིན། བཞི་ཁྲིའི་དུས་གསེར་ཐུབ། ཉི་ཁྲི་ན་འོད་སྲུང་། བརྒྱ་པའི་དུས་ཤཱཀྱ་ཐུབ་པ་བྱོན་པ་ནས། མཐར་མོས་པའི་བར་དུ་བརྩི་བ་ཡིན་ནོ། །ཡང་རྣམ་པར་གཟིགས་དང་། མར་མེ་མཛད་དང་། རིན་ཆེན་གཙུག་ཏོར་ཅན་དང་གསུམ་ནི་དེའི་གོང་དུ་བྱོན་པས་བར་གྱི་སངས་རྒྱས་ཞེས་བྱ་སྟེ། ཕྱིས་ཀྱང་འབྱོན་པར་གསུངས་བས་མ་ངེས་པའོ། །དེའི་ཕྱིར་ན་བརྒྱད་ཁྲི་ནས་བརྒྱ་པའི་བར་ཁོ་ན་ལས་གཞན་དུ་མི་འབྱུང་བ་ཉག་གཅིག་ཏུའང་མི་བལྟ་སྟེ། མགོན་པོ་ཚེ་མཐའ་ཡས་པ་དང་། རྣམ་པར་གཟིགས་ཚེ་ལོ་དཔག་མེད་ཀྱི་དུས་ན་བྱོན་པའི་ཕྱིར། བསྐལ་པ་བཟང་པོའི་སངས་རྒྱས་སྟོང་ལ་སོགས་པ་བྱིངས་ཆེ་གདུལ་བྱ་འདུལ་བྱེད་ཀྱི་རྟེན་འབྲེལ་ཁྱད་པར་ཅན་ཚོགས་པའི་དུས་དེར་བྱོན་པར་རིགས་པར་བྱའོ། །རང་སངས་རྒྱས་རྣམས་ནི་དགེ་བའི་བཤེས་གཉེན་ལ་མི་བརྟེན་པས་སངས་རྒྱས་མ་བྱོན་པའི་གནས་སྐབས་དང་། གཞན་དོན་ལ་བསྐུལ་གྱིས་དོགས་པས་ཉན་ཐོས་ཟད་ནས་བསྟན་པ་ནུབ་པའི་དུས་ན་འབྱུང་བ་ཡིན་ནོ། །དེ་ཅིའི་ཕྱིར་ན་རང་གི་ཡེ་ཤེས་ཀྱང་རྟེན་འབྲེལ་ལུགས་ལྡོག་ལ་བརྟེན་ནས་བརྟེན་པ་མེད་པར་སྐྱེ་ཞིང་། ཐེག་པ་ཆེན་པོའི་བློ་དང་བྲལ་བའི་ཕྱིར་རོ། །དེ་སྐད་དུ་རྩ་ཤེར་ལས། རྫོགས་སངས་རྒྱས་རྣམས་མ་བྱུང་ཞིང་། །ཉན་ཐོས་རྣམས་ཀྱང་ཟད་པ་ན། །རང་སངས་རྒྱས་ཀྱི་ཡེ་ཤེས་ནི། །བརྟེན་པ་མེད་པར་རབ་ཏུ་སྐྱེ། །ཞེས་སོ། །དེའང་ཚེ་ལོ་མར་འགྲིབ་པའི་རྒྱུ་ནི། འཇིག་རྟེན་དུ་འཁོར་བའི་ཆོས་ལུགས་མི་དགེ་བ་དུ་མ་འཕེལ་བས་བསོད་ནམས་ཉམས་ཏེ་བརྒྱད་ཁྲི་པ་ནས་བདུན་ཁྲི་པ་དང་། དྲུག་ཁྲི་པ་དང་། ཉི་ཁྲི་པ་དང་། སྟོང་པ་དང་། བརྒྱ་པ་དང་། བཅུ་པའི་བར་དུ་ཚེ་འགྲིབ་པ་བཞིན་དུ། ལོངས་སྤྱོད་དང་། ཁ་དོག་དང་། འོད་དང་། སྟོབས་ལ་སོགས་པའི་ཡོན་ཏན་ཀྱང་འགྲིབ་བོ། །འགྲིབ་པའི་མཐར་ཐུག་ཚེ་ལོ་བཅུ་པ་ནི། ཚེ་རིང་ཚད་ལོ་བཅུར་བྱེད་པའི་དུས་བུ་བཙས་པ་ལོ་བཅུ་ཐུབ་པར་སྨོན་ལམ་འདེབས། བུ་མོ་མོ་ལོ་ལྔ་ནས་ཁྱིམ་ཐབ་ལ་གཏོང་། ལུས་བོངས་ཚེ་ལོ་བརྒྱ་པའི་མི་རྣམས་ཀྱི་མཐོ་གང་ཆག་གང་ངམ། རིང་ཚད་མཐོ་གང་། ཐུང་ཚད་ཆག་གང་དུ་བཤད་པའང་ཡོད་དོ། །ཟས་ཀྱི་མཆོག་ཀོ་ཏྲ་པ། གོས་ཀྱི་མཆོག་སྐྲའི་ལྭ་ཝ། རྒྱན་གྱི་མཆོག་མཚོན་ཆ། དེའི་དུས་སྦྲང་མ་ཡོད་ཀྱང་སྦྲང་རྩི་མི་འབྱུང་། འོ་ཞོ་ཡོད་ཀྱང་མར་མི་འབྱུང་། བུར་ཤིང་དང་ཀར་ཤིང་ཡོད་ཀྱང་བུར་ཀར་མི་འབྱུང་། ཡུངས་ཀར་དང་ཏིལ་ལ་མར་ནག་མེད། ལན་ཚྭའི་མིང་མི་གྲགས། རོ་མངར་བ་དང་། སྐྱུར་བ་དང་། བསྐ་བ་དང་། ཚ་བ་དང་། རྩུབ་པ་དང་། ཁ་བ་དྲུག་ལས། ཕྱི་མ་གཉིས་གང་རུང་གཅིག་ལས་གཞན་རྣམས་ནུབ་བོ། །དེ་དུས་ཕ་མ་དང་། རྒན་རབས་དང་། རིགས་མཆོག་ཏུ་གྱུར་པ་མི་བཀུར་ཞིང་། སྲོག་གཅོད་པ་ལ་སོགས་མི་དགེ་བའི་ལས་སྤྱོད་པ་ལ་རྗེས་སུ་ཡི་རང་བ་དང་བཀུར་སྟི་བྱེད། དགེ་བ་བྱེད་པ་བྱུང་སྲིད་ན་སྨོད་ཅིང་འཁོན་པར་བྱེད་དོ། །ནས་འབྲས་གྲོ་སྲན་ལ་སོགས་པའི་འབྲས་བུ་ནི་ནུབ། བྲ་འོ་གཅིག་པུ་སྐྱེ། དར་དང་། གོས་དང་། རས་ལ་སོགས་པའི་སྲབ་འཇམ་བཟང་པོ་རྣམས་ཀྱང་མེད་དོ། །དུས་ངན་པའི་བསྐལ་པ་དེའང་རྐྱེན་གསུམ་གྱིས་ཟད་པར་བྱེད་དེ། ནད་དང་། མཚོན་དང་། མུ་གེའོ། །ཐོག་མར་མཚོན་གྱི་བསྐལ་པ་ནི། མི་རྣམས་ཆོས་མ་ཡིན་པར་སྤྱོད་པས་གནོད་སེམས་སྐྱེས་ནས། ཕན་ཚུན་གཅིག་ལ་གཅིག་བརྡེག་འཚོག་གི་ལས་བརྩམ་པ་ན། ཤིང་དང་། རྡོ་དང་། བོང་བ་དང་། དབྱུག་པ་ལ་སོགས་གང་བླངས་ཀྱང་མཚོན་ཆར་གྱུར་ཏེ་གཅིག་གིས་གཅིག་གསོད་དོ། །ཤི་ཚད་ཀྱང་དམྱལ་བར་ལྟུང་བས་སེམས་ཅན་དམྱལ་བ་པའང་དེའི་དུས་ལས་མང་བ་མེད་དོ། །དེ་ནས་ནད་ཀྱི་བསྐལ་པ་ནི། སྡིག་སྤྱད་ཀྱི་མཐུས། ལྷ་མ་ཡིན་རྣམས་འཁྲུགས་ནས་ནད་ཀྱི་རྣམ་པ་དུ་མ་གཏོང་བས། ཐེབས་ཚད་གསོར་མི་རུང་བར་འཆི་བའོ། །དེ་ནས་མུ་གེའི་བསྐལ་པ་ནི། མཚོན་དང་ནད་ཀྱིས་གུམ་པའི་མི་ལྷག་མ་དེ་དག་གིས་མི་དགེ་བ་སྤྱད་པས། ཀླུ་རྣམས་ཁྲོས་ནས་ཆར་ཆུ་མི་འབེབས་པས་ཐོག་ངན་པ་དེའང་ཉེས་པར་གྱུར་ཏེ། གབ་ཚེ་པ་དང་། རུས་གོང་དཀར་པོ་པ་དང་། ཐུར་མས་འཚོ་བ་ཞེས་བྱའི་མུ་གེ་འབྱུང་སྟེ། གབ་ཚེ་པ་ནི། དེའི་ཚེ་ནས་ལ་སོགས་པའི་འབྲུ་བཟང་པོ་སྔོན་གྱི་དུས་ན་སྐྱེས་པའི་རུ་མ་རྙེད་ན་ཡ་མཚན་ཆེན་པོར་བྱེད་ཅིང་། ཚེ་ལོ་བཅུ་གཅིག་པའི་དུས་ཀྱི་བྲ་བོ་ལ་སོགས་པའི་འབྲུ་ངན་པ་མཐོང་ནའང་ཟ་མ་ཏོག་ཏུ་བཅུག་ནས་བསྲུང་བར་བྱེད་དོ། །ཧ་ཅང་བཀྲེས་པས་ཉམས་སྟོབས་ཟད་དེ་ས་ལ་འགྱེལ་ན་ལྡང་མི་ནུས་པར་དེ་ཉིད་དུ་འཆི་བར་འགྱུར་རོ། །རུས་གོང་དཀར་པོ་བ་ནི། སྔོན་ཤི་བའི་རུས་པ་འཐུས་ནས་འདི་ནི་ཁམས་ཀྱི་ཟས་ཟོས་པའི་རུས་པའོ་ཟེར་ཞིང་ཆུ་ནང་དུ་བསྐོལ་ནས་འཐུང་བའོ། །ཐུར་མ་བ་ནི། འབྲུའི་ཟེ་ཁ་རྙེད་པ་ཅུང་ཟད་ཀྱང་ཆུ་མང་པོའི་ནང་དུ་བསྐོལ་ནས་འཐུང་ཞིང་། འབྲུ་དེ་ཐུར་མས་ཉབ་པའོ། །དེ་ལྟར་མཚོན་གྱི་བསྐལ་པ་ལ་ཞག་བདུན། ནད་ཀྱི་བསྐལ་པ་ཟླ་བ་བདུན་དང་ཞག་བདུན། མུ་གེའི་བསྐལ་པ་ལོ་བདུན་དང་ཟླ་བ་བདུན་ཞག་བདུན་གྱིས་མི་རྣམས་ཟད་ཅིང་སྟོངས་པར་བྱེད་དོ། །བྱང་ཆུབ་སེམས་དཔའི་ས་ལས་ནི་ཚེ་ལོ་སུམ་ཅུ་པ་ལ་མུ་གེ། ཉི་ཤུ་པ་ལ་ནད། བཅུ་པ་ལ་མཚོན་འབྱུང་བར་བཤད་དོ། །འཛམ་བུའི་གླིང་པ་དང་སེམས་དཔའ་ལ་ཁྱད་ཞུགས་པས་ཤར་ནུབ་ཀྱི་གླིང་གཉིས་ན་ནི་གནོད་སེམས་ལྷག་པར་འགྱུར་བ་ཙམ་དང་། ཁ་དོག་ངན་ཅིང་ཉམ་ཆུང་བ་ཙམ་དང་། བཀྲེས་སྐོམ་གྱི་གདུང་བ་འཕེལ་བ་ཙམ་ལས་མེད་ཅིང་། བྱང་གླིང་ན་དུས་ངན་པའི་འགྱུར་བ་དེ་གཏན་ནས་མེད་དོ། །དེ་ནས་གོང་འཕེལ་ཇི་ལྟར་འབྱུང་བ་ནི། དགེ་བ་ཅན་འགའ་ཞིག་ཙམ་ལུས་པ་ཆུའི་གླིང་དང་། རིའི་ལྗོངས་བྲག་དབར་ལ་སོགས་པར་ཞུགས་པ་ཞག་བདུན་དུ་ཆུས་འཚོ་ཞིང་འདུག་པ་གྲོང་དུ་འོངས་པ་གཅིག་གིས་གཅིག་མཐོང་བ་ན། ཨེ་མ་མི་གསོན་པོ་མཐོང་ངོ་ཞེས་ཕན་ཚུན་དགའ་བ་དང་ཡ་མཚན་སྔོན་མེད་པ་སྐྱེས་ཏེ། སླར་འདུས་ནས་སྔོན་གྱི་ཉེས་པ་སྤྱད་པ་གླེང་ཞིང་། དེ་དག་གི་རྒྱུ་མི་དགེ་བས་བྱས་པར་ཤེས་ནས་རང་རང་གི་རྒྱུད་སྡོམ་པ་ལ་འབད་དོ། །དེའི་ཚེ་བྱམས་པའི་སྤྲུལ་པ་གཟུགས་དང་སྐྱེ་མཆེད་དེ་དག་ལས་འཕགས་པ་ཞིག་མཐོང་ནས་དྲིས་པ། བདག་ཅག་ནི་ཚེ་ལོ་བཅུ་པའི་མིར་མཚུངས་ན། ཁྱོད་ཀྱི་གཟུགས་དང་ལང་ཚོ་མཆོག་ཏུ་གྱུར་པའི་རྒྱུ་གང་ལས་བྱུང་། དེས་སྨྲས་པ། སྲོག་གཅོད་པ་སྤངས་པ་ལས་བྱུང་ངོ་། །དེ་དག་གིས་འོ་ན་བདག་ཅག་ཀྱང་སྲོག་གཅོད་སྤོང་ངོ་ཞེས་དམ་བཅས་པས་སྔོན་བས་ནད་མེད་ཅིང་ཟོ་མདོག་བདེ་བ་དང་སྟོབས་ཆེ་བར་གྱུར་ཏོ། །དེའི་རྒྱུས་དེ་དག་གིས་བུ་དང་བུ་མོ་བཙས་པ་རྣམས་ཚེ་ལོ་ཉི་ཤུ་པར་གྱུར་ཏོ། །ཡང་སྤྲུལ་པ་འབྱུང་བ་ལ་སྔར་ལྟར་དྲིས་པས་མ་བྱིན་ལེན་སྤངས་པའི་ཕན་ཡོན་བཤད་ཅིང་དེ་དག་གིས་དང་དུ་བླངས་པས་ཉི་ཤུ་པའི་བུ་དང་བུ་མོས་བཞི་བཅུ་ཐུབ་པར་གྱུར་ཏོ། །དེ་བཞིན་དུ་སྤྲུལ་པའི་སྐྱེས་བུ་རེ་རེས་ལོག་གཡེམ་དང་། ཕྲ་མ་དང་། ངག་འཁྱལ་དང་། ཚིག་རྩུབ་དང་། བརྣབ་སེམས་དང་། གནོད་སེམས་དང་། ལོག་ལྟ་དང་། མི་རིགས་པའི་འདོད་པ་དང་། ཆོས་མ་ཡིན་པའི་ཆགས་པ་དང་། ལོག་པའི་ཆོས་ཏེ་གསུམ་བསྡོམས་པ་གཅིག་ཏུ་བརྩིས་པའི་ཕྱིན་ཅི་ལོག་ལྷག་མ་དགུ་སྤངས་ཤིང་། ཕ་མ་དང་། དགེ་སྦྱོང་དང་། བྲམ་ཟེ་དང་། རིགས་ཀྱི་གཙོ་བོ་རྣམས་ལ་དེ་དང་དེར་མི་འཛིན་པའི་ཆོས་སྤངས་ཏེ། ཕ་ལ་ཕར་འཛིན་པ་ལ་སོགས་པའི་རིམ་གྲོ་ཆེར་བསྐྱེད་པས། ལོག་པར་གཡེམ་པ་སྤངས་པ་ནས་བཟུང་སྟེ། ཚེ་ལོ་བརྒྱ་ལ་སོགས་པ་ནས་གོང་དུ་སྨོས་པ་ལྟར་བརྒྱད་ཁྲིའི་བར་འཕེལ་བ་སྟེ་བཅུ་པའི་ཡར་འཕེལ་ནས་བརྒྱད་ཁྲིའི་བར་དུ་སྡེ་ཚན་གྱིས་འཕེལ་བ་ནི་བར་གྱི་ཁུག་པ་ཡིན་ནོ། །ཚེ་གོང་དུ་འཕེལ་བ་བཞིན་དུ་གཟུགས་ཀྱང་ཉིས་འགྱུར་གྱི་རིང་དུ་སོང་ལ་ནོར་དང་། འབྲུ་དང་། གོས་དང་། བཞོན་པ་ལ་སོགས་པའི་ལོངས་སྤྱོད་ཀྱང་ཉིས་འགྱུར་དུ་འཕེལ་བས་བསྐལ་པ་བཟང་བར་འགྱུར་རོ། །དེ་ལྟར་འཕེལ་བ་དང་འགྲིབ་པ་བཅོ་བརྒྱད་ནི་བར་གྱི་འཕེལ་འགྲིབ་ཡིན་ལ། ཡ་ཐོག་འགྲིབ་པ་དང་། མ་ཐོག་འཕེལ་འགྲིབ་ནི་ཡུན་ཤིན་ཏུ་རིང་བའོ། །དེ་ལྟར་བསྐལ་པ་གནས་པའི་རིང་ལ་འཇིག་རྟེན་དུ་གྲགས་པའི་ཆོས་ལུགས་ཀྱང་འགྲོ་བ་རྣམས་ཀྱི་བསོད་ནམས་ལས་བདེ་བ་དང་། དགེ་བ་དང་། སངས་རྒྱས་དང་། ཆོས་དང་། དགེ་འདུན་དང་། རྣམ་པར་དཀར་བའི་ཆོས་ཀྱི་རྣམ་གྲངས་དཔག་ཏུ་མེད་པ་དང་། བསོད་ནམས་མ་ཡིན་པ་ལས་སྡུག་བསྔལ་དང་། ལོག་པར་འགྲོ་བ་དང་། ཕྱིན་ཅི་ལོག་གི་སྟོན་པ་དང་། དེའི་གྲུབ་པའི་མཐའ་དང་། ལས་དང་། ཉོན་མོངས་པ་དང་། འགྲོ་བ་དྲུག་དང་། སྒོ་ང་དང་། མངལ་དང་། དྲོད་གཤེར་དང་བརྫུས་ནས་སྐྱེས་པ་སྟེ་རྣམ་པ་བཞི། དེའང་མི་དང་དུད་འགྲོ་ལ་སྐྱེ་བ་བཞི་ག་སྲིད་ཅིང་། ཞིང་དག་པའི་བྱང་ཆུབ་སེམས་དཔའ་དང་། ལྷ་དང་དམྱལ་བ་རྣམས་བརྫུས་ནས་སྐྱེ་ལ། ཡི་དྭགས་ནི་མངལ་སྐྱེས་ཀྱང་སྲིད་ལ་ཕལ་མོ་ཆེ་བརྫུས་སྐྱེས་སོ། །མཁའ་ལ་རྒྱུ་བའི་ཡི་དྭགས་བདུད་དང་གནོད་སྦྱིན་དང་། སྲིན་པོ་ལ་སོགས་པ་འགའ་ཞིག་ནི་སྒོ་ང་ལས་སྐྱེའོ། །ས་རྡོ་ཆུ་ཤིང་ལས་སྐྱེ་བ་ནི་དྲོད་གཤེར་སྐྱེས་སོ། །དེ་བཞིན་དུ་ཡོངས་སུ་གཟུང་བའི་གཞི་དྲུག་དང་། དུས་རྣམ་པ་བཅུ་དང་། བསྐལ་པ་དང་། ལོ་ཟླ་དང་། ཉིན་མཚན་དང་། སྐད་ཅིག་གསུམ་དང་། ཡོངས་སུ་བཟུང་བའི་དངོས་པོ་བཅུ་བདུན་དང་། འཇིག་རྟེན་གྱི་སྤྱོད་པ་བཅུ་དང་། གཏམ་རྣམ་པ་གསུམ་དང་། ཉེས་བརྩམ་ཉི་ཤུ་རྩ་གཉིས་དང་། སེམས་ཅན་གྱི་རིགས་དྲུག་ཅུ་རྩ་གསུམ་དང་། དུས་རྣམ་པ་བརྒྱད་དང་། མངལ་དུ་འཇུག་པ་བཞི་དང་། དེའི་རང་བཞིན་ནི་ཤེས་བཞིན་དུ་འཇུག་པ་ལ་མ་ཤེས་པར་གནས་ཤིང་སྐྱེ་བ་འཁོར་ལོས་སྒྱུར་བ། འཇུག་པ་དང་གནས་པ་ཤེས་ལ་འབྱུང་བ་མི་ཤེས་པ་ཉན་རང་གཉིས། ཤེས་བཞིན་དུ་གསུམ་ཀ་བྱེད་པ་བྱང་ཆུབ་སེམས་དཔའ། གསུམ་ག་མི་ཤེས་པ་འགྲོ་བ་ཕལ་པའོ། །འདོད་པ་གཞན་དུ་ཉན་ཐོས་དང་འཁོར་ལོས་སྒྱུར་བ་ཆ་མཐུན་པར་བཤད་དེ། དེ་ནི་སོ་སོ་སྐྱེ་བོ་བསོད་ནམས་རླབས་ཆེན་བསགས་པའི་དབང་དུ་བྱས་པ་སྟེ། བྱང་ཆུབ་སེམས་དཔའ་འཁོར་ལོས་སྒྱུར་བ་རྣམས་ནི་ཤེས་བཞིན་དུ་འཇུག །ཤེས་བཞིན་དུ་གནས། ཤེས་བཞིན་དུ་འབྱུང་བའོ། །གཞན་ཡང་འཚོ་བ་རྣམ་པ་དྲུག་དང་། ཀུན་ནས་བསྲུང་བ་དྲུག་དང་། སྡུག་བསྔལ་རྣམ་པ་བདུན་པ་དང་། ང་རྒྱལ་བདུན་དང་། རྒྱགས་པ་བདུན་དང་། ཐ་སྙད་བཞི་དང་། མཁས་པར་བྱ་བའི་དོན་རྣམ་པ་དྲུག་དང་། ཕུང་པོ་ལྔ་དང་། ཁམས་དྲུག་དང་། སྐྱེ་མཆེད་བཅུ་གཉིས་དང་། རྟེན་འབྲེལ་བཅུ་གཉིས་དང་། གནས་དང་གནས་མ་ཡིན་པ་དང་། དབང་པོ་དྲུག་དང་། དེ་ལས་འཕགས་པའི་དབང་པོ་ནི། གཟུགས་ཅན་མ་ཡིན་པ་ཡིད་ལས་ཕྱེ་བ་སྟེ། དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་རྣམས་སོ། །སོ་སོ་སྐྱེ་བོའི་དབང་པོ་ནི་གཟུགས་ཅན་མིག་ལ་སོགས་པའོ། །གཞན་ཡང་སངས་རྒྱས་ཀྱི་བཀའི་དངོས་པོ་དགུ་ལ་སོགས་པ་མིང་དུ་སྨོས་པ་རྣམས་ཀྱི་མཚན་ཉིད་ནི་གཞུང་ཚོགས་ཆོས་ཀྱི་དོགས་པས་མ་བཀྲལ་ཡང་། ངེས་པར་འཁོར་བ་དང་མྱ་ངན་ལས་འདས་པའི་རྣམ་གཞག་ཐམས་ཅད་ཀྱི་ཆིངས་ཆེན་པོ་ཡིན་པས་མན་ངག་གི་བསྟན་བཅོས་ཡིད་བཞིན་རིན་པོ་ཆེ་ལས་ཁོང་དུ་ཆུད་པར་བྱའོ། །འདིར་ཁམས་གསུམ་པོ་ལ་རང་བཞིན་དུ་ལྡན་པ་དང་མི་ལྡན་པའི་ཆོས་ཅུང་ཟད་བཤད་ན། བཀྲེས་སྐོམ་ནི་འདོད་པའི་ཁམས་ལས་གོང་མ་གཉིས་ན་མེད་དོ། །གླིང་གསུམ་ན་ཁ་ཟས་ཀྱི་རྣམ་གྲངས་དུ་མ་ཡོད་ལ་བྱང་ན་མ་བཏབ་པའི་སཱ་ལུ་དང་། ཤིང་ལས་རང་བྱུང་བ་གཉིས་ལས་མེད་ཅིང་། དེའི་དབང་གིས་ཡོངས་སུ་འཛིན་པའང་མེད་པས་བུ་ཚ་རྣམས་ཀྱང་སྐྱེས་མ་ཐག་ནས་མས་དོར་ཡང་རང་གི་མཐེ་བོང་ལས་ནུ་ཞོ་འབྱུང་བས་འཚོའོ། །འདོད་ལྷ་དྲུག་ནི་བདུད་རྩི་ཁ་དོག་ལྔ་ལ་སྤྱོད་ལ། དེ་ཡན་ཆད་ན་ཁམས་ཀྱི་ཟས་མེད་དོ། །རྒྱལ་ཆེན་རིགས་བཞི་ཡན་ཆད་ལ་གཤང་གཅི་འང་མེད་དེ། དེ་དག་གི་ལུས་སྟོང་པ་དང་ནང་ཁྲོལ་ཅན་གཉིས་ཀ་མ་ཡིན་པ་ཁམས་ཀྱི་ཟས་ཟོས་པའི་མོད་ལ་བྱེ་མ་ལ་ཆུ་བླུགས་པ་བཞིན་ཞུ་བར་འགྱུར་བས་སོ། །གླིང་གསུམ་ན་ལོ་ལེགས་ཉེས་དང་། ཆར་ཆེ་ཆུང་དང་། བདེ་བ་དང་། འཇིགས་པ་དང་། ཉོ་ཚོང་དང་། ཆེད་དུ་བྱས་པའི་གནས་ཁང་དང་། རས་བལ་དར་ཟབ་སྣལ་མའི་གོས་ལྗིད་ཆེ་བ་དང་། ཁ་དོག་ཐམས་ཅད་པའི་གོས་དང་། ཚ་གྲང་དང་། བག་མ་གཏོང་ལེན་དང་། རྗེ་འབངས་དང་། འབྲུ་ནོར་གཉེན་གསུམ་ལ་མངོན་ཞེན་དང་བཅས་པ་ཡོད་ལ། བྱང་གླིང་དང་འདོད་གཟུགས་ཀྱི་ལྷ་ལ་དེ་དག་ཕལ་མོ་ཆེ་མེད་ཅིང་། འཇིགས་པ་དང་སྡུག་བསྔལ་རེས་འགའ་བ་ཙམ་དང་། ཆེད་དུ་མ་བྱས་པའི་གནས་ཁང་དང་། འདོད་ལྷའི་གནས་ན་ཁ་དོག་བཞི་ཀ་དང་། གཟུགས་དང་སྒྲ་མི་སྙན་ན་ཁ་དོག་དཀར་པོ་འབའ་ཞིག་དང་། བྱང་དང་འདོད་ལྷ་ལ་དཔག་བསམ་གྱི་ཤིང་ལས་བྱུང་བའི་གོས་སྲབ་འཇམ་ཡང་བ་རྣམས་ཡོད་དོ། །དེ་ཡང་བྱང་གི་གོས་ལ་ལྗིད་སྲང་གཅིག །རྒྱལ་ཆེན་བཞི་པའི་གོས་ལ་སྲང་ཕྱེད། སུམ་ཅུ་རྩ་གསུམ་པ་ལ་དེའི་བཞི་ཆ། འཐབ་བྲལ་ལ་བརྒྱད་ཆ། དགའ་ལྡན་ལ་བཅུ་དྲུག་ཆ། འཕྲུལ་དགའ་ལ་སུམ་ཅུ་རྩ་གཉིས་ཆ། གཞན་འཕྲུལ་དབང་བྱེད་ལ་དྲུག་ཅུ་རྩ་བཞིའི་ཆ། ཚངས་རིས་ཡན་ཆད་གཞལ་དུ་མེད་པའི་གོས་གྱོན་ནས་སྐྱེ་ཞིང་ཁ་དོག་ཀྱང་བཞི་ཀ་ཡོད་ལ། ལྗང་གུ་ནི་ཚོས་སུ་མི་བགྲང་ངོ་། །འདོད་ལྷ་དྲུག་ན་བག་མ་གཏོང་ལེན་དང་རྗེ་འབངས་ཡོད་ལ། ཚངས་རིས་ལའང་རྗེ་འབངས་ཡོད་དོ། །ཁམས་གོང་མ་གཉིས་ན་ཕ་མ་དང་ཕོ་མོ་མེད་ལ། འོག་མ་རྣམས་ལ་ཡོད་དོ། །སྒྲ་མི་སྙན་ན་འབྲུ་ཡོད་ནོར་མེད་ལ། འདོད་ལྷ་དྲུག་ན་ནོར་ཡོད་ཀྱང་འབྲུ་མེད་ཅིང་། ཚངས་རིས་ཡན་ཆད་ལ་འབྲུ་ནོར་གཉིས་ཀ་མེད་དོ། །སྐྱེ་བ་གཞན་གསུམ་ནི་སྐྱེ་བའི་རྟེན་ཡང་རགས་པ་དང་བཅས་པས་འཆི་བའི་ཚེ་རོ་ཡོད་ལ། བརྫུས་ཏེ་སྐྱེ་བ་རྣམས་ནི་རྣམ་པར་ཤེས་པ་ནུབ་པ་དང་དུས་མཉམ་དུ་མི་སྣང་ངོ་། །ལྷ་རྣམས་ལ་གནད་འཆད་པའི་སྡུག་བསྔལ་མེད་ཀྱང་། འཆི་འཕོ་ལྟུང་བའི་སྡུག་བསྔལ་ཡོད་ལ། མི་ལ་ནི་འཆི་འཕོ་གནད་འཆད་པ་དང་། ཕྱི་མའི་སྐྱེ་གནས་ལ་འཇིགས་ཤིང་ཕུང་པོ་ཉིང་མཚམས་སྦྱོར་བའི་སྡུག་བསྔལ་ཡོད་དོ། །འཆི་བ་ལ་བདེ་བར་འཛིན་པ་ནི་དམྱལ་བ་པ་ཙམ་མོ། །བགྲོད་པ་དང་མཐོང་བའང་གོང་མས་འོག་མ་ལ་ཡིན་གྱིས། དེ་ལས་གཞན་དུ་རང་གི་རྫུ་འཕྲུལ་ཐོབ་པའམ། ཁམས་གོང་མའི་ལྷས་ཁྲིད་ནས་གནས་གོང་མར་བགྲོད་པ་དང་མཐོང་བར་ནུས་ཀྱིས་གཞན་དུ་མ་ཡིན་ནོ། །དེའང་ཚངས་རིས་ལ་སོགས་པ་འཛམ་བུའི་གླིང་དུ་འོངས་པའི་ཚེ། ལུས་གནས་དེ་ལས་མ་གཡོས་པར། སྤྲུལ་པ་སྔོན་གྱི་ཐོས་པའི་སེམས་ཀྱི་ས་མཚུངས་ཡོད་པའི་རྣམ་པ་ལ་བརྟེན་ནས་འོང་ངོ་། །གཞན་འཕྲུལ་མན་ཆད་འདོད་པའི་ས་མཚུངས་པས་ལུས་དངོས་ཀྱིས་འོང་བའོ། །རྒྱུ་གང་གིས་ན་སེམས་ཀྱི་སྣང་ཚུལ་དང་རླུང་སེམས་ཀྱི་འདུ་ཚུལ་ལས། ཁམས་དང་གནས་རིས་ཐ་དད་ཅིང་ས་མི་མཚུངས་པས་འོག་མས་གོང་མའང་མི་མཐོང་བ་ཉིད་དོ། །དེའང་གཉའ་ཤིང་འཛིན་ཡན་ཆད་ན་ཉི་ཟླ་མེད་པས་འདོད་ལྷ་རྣམས་ཀྱི་ཉིན་མཚན་མེ་ཏོག་ཁ་འབྱེད་ཟུམ་དང་། བྱ་སྐད་འབྱིན་མི་འབྱིན་དང་། གཉིད་བྲོ་བ་དང་། སངས་པས་བྱེད་ལ། རང་རང་གི་ལུས་འོད་དང་ལྡན་པས་མུན་པའི་སྐབས་སུ་གྱུར་པ་ནི་ནམ་ཡང་མེད་དོ། །སྒྲ་མི་སྙན་པའི་མི་རྣམས་ནི་སུམ་ཅུ་རྩ་གསུམ་དུ་ངེས་པར་སྐྱེ་བའི་ལས་བསགས་པས་དེར་སྐྱེ་ལ། ལྷ་མི་ལ་སོགས་གཞན་རྣམས་ནི་ལས་སྣ་ཚོགས་པའི་ཕྱིར་གང་དུ་སྐྱེ་མ་ངེས་པའོ། །དེ་ལྟར་འཁོར་བའི་ཆོས་མཐའ་དག་པའང་བསྡུ་ན་གསུམ་དུ་འདུས་ཏེ། གཟུགས་ཀྱི་མཐའ་རྡུལ་ཕྲ་རབ། དུས་ཀྱི་མཐའ་སྐད་ཅིག་མ། མིང་གི་མཐའ་ཡི་གེའོ། །དེ་ལ་ཕྱོགས་དང་པོ་ནི། རྡུལ་ཕྲ་རབ་བདུན་ལ་རྡུལ་ཕྲན་གཅིག །དེ་བདུན་ལ་ལྕགས་རྡུལ། དེ་བདུན་ལ་ཆུ་རྡུལ། དེ་བདུན་ལ་རི་བོང་རྡུལ། དེ་བདུན་ལ་ལུག་རྡུལ། དེ་བདུན་ལ་གླང་རྡུལ། དེ་བདུན་ལ་ཉི་ཟེར་གྱི་རྡུལ། དེ་བདུན་ལ་སྲོ་མ། དེ་བདུན་ལ་ཤིག །དེ་བདུན་ལ་ནས། དེ་བདུན་ལ་སོར་མོ་དབུས་མའི་ཚིག་གཅིག །སོར་མོ་ཉི་ཤུ་རྩ་བཞིར་ཁྲུ་གང་། ཁྲུ་བཞི་ལ་གཞུ་འདོམ། དེ་ལྔ་བརྒྱ་ལ་རྒྱང་གྲགས། གྲོང་དང་དེ་སྲིད་དུ་རིང་བ་ལ་དགོན་པ་ཞེས་གྲགས་སོ། །དེའང་རྒྱང་གྲགས་ཕྱེད་དམ་གྲོང་ཟད་པའི་མུར་ཐུག་པ་ནི་བས་མཐའ་ཞེས་དབྱེའོ། །རྒྱང་གྲགས་བརྒྱད་ལ་དཔག་ཚད། དེས་རི་དང་ཡུལ་དང་། གནས་ཐམས་ཅད་ཀྱི་ཚད་གཞལ་ལ། དེ་ལྟར་ཆེ་ལ་སྲ་ཞིང་བརྟན་པའང་མཐར་གྱིས་རྡུལ་ཕྲ་རབ་ཏུ་བལྟར་མི་མངོན་པ་ཉིད་དོ། །ཕྱོགས་གཉིས་པ་དུས་མཐའི་སྐད་ཅིག་མ་ནི། སྐྱེས་བུ་སྟོབས་ཆེན་གྱིས་སེ་གོལ་གཏོགས་པའི་ཡུན་ལ་སྐད་ཅིག་མ་དྲུག་ཅུ་རྩ་བཞི་འདའ། དེའི་ཆ་གཅིག་བརྒྱ་ཉི་ཤུ་ལ་དེའི་སྐད་ཅིག །དེའི་སྐད་ཅིག་མ་དྲུག་ཅུ་ལ་ཐང་གཅིག །ཐང་གཅིག་དགུ་བརྒྱ་ལ་ཞག་གཅིག །ཐང་གཅིག་སུམ་ཅུ་ལ་ཡུད་ཙམ། ཡུད་ཙམ་སུམ་ཅུ་ལ་ཉིན་ཞག་གཅིག་གོ །ཉིན་ཞག་སུམ་ཅུ་ལ་ཟླ་བ། དེ་བཅུ་གཉིས་ལ་ལོར་བརྩི་བ་དང་། དུས་ཚད་དེའི་ཁོང་དུ་བྱང་བགྲོད་ཉི་མའི་དཀྱིལ་འཁོར་འཕུལ་བྱེད་ཀྱི་རང་སྟོབས་ཆུང་ལ། རྟེན་བྱེད་སྟོབས་ཆེ་བས་རི་རབ་ངོས་ལ་ཉེར་སོང་ནས་དེས་ཀྱང་སྐྱོབ་པས་དབྱར་ཉི་མ་རིང་ཞིང་ཚ་ལ། ལྷོ་བགྲོད་འཕུལ་བྱེད་སྟོབས་ཆེ་ལ་རྟན་བྱེད་སྟབས་ཆུང་བས་མུ་ཁྱུད་ཀྱི་ནང་རོལ་ལ་ཉེ་བ་ཙམ་དུ་ལྷོར་ཐལ་བས་དགུན་ཉི་ཐུང་ཞིང་། ཉི་ཟེར་ལ་རླུང་གི་རེག་པ་དང་རྒྱང་རིང་བའི་བྱེད་པ་བསྡོམས་པས་གྲང་བའོ། །དེའང་ཉི་ཟླ་གཉིས་ནི་རང་སྟོབས་ཀྱིས་རི་རབ་ལ་གཡོན་དུ་བསྐོར་བ་ཡིན་ཏེ། འཆར་བཞུད་གཡས་སུ་བསྐོར་བར་མཐོང་བ་ནི་གོ་ལའི་འཁྲུལ་འཁོར་གྱི་བྱེད་པ་ལས་སོ། །གཟའ་གཞན་རྣམས་འགྲོས་བཞི་མ་ངེས་པར་བརྩམ་པ་ཡིན་ཏེ། རྒྱུ་སྐར་རྣམས་ལ་ནི་བགྲོད་པ་མེད་དོ། །དེ་ལ་ཉིན་ཞག་དང་། ཚེས་ཞག་དང་། ཁྱིམ་ཞག་དང་། ཞག་མི་ཐུབ་པའི་ཆ་ལས་ཟླ་བཤོལ་འབྱུང་བ་དང་། ཕྱི་ནང་གཞན་གསུམ་གྱི་རྣམ་གཞག་སྦྱར་བའི་གཏན་ཚིགས་ནི་དུས་ཀྱི་འཁོར་ལོའི་ལག་རྩིས་རྣམས་སུའང་གཏན་ལ་ཕེབས་པ་ལྟར་རོ། །དེ་ལྟ་བུའི་ཚུལ་གྱིས་ལོའི་གྲངས་ངེས་པས་སྐྱེ་དགུ་རྣམས་ཀྱི་ཚེ་དང་དུས་ལ་སོགས་གཞལ་ལ། འཇལ་བྱེད་དེ་ཡང་ལུགས་ལས་ལྡོག་ན་དུས་མཐའི་སྐད་ཅིག་མས་འཇིག་གོ །ཕྱོགས་གསུམ་པ་ནི། མིང་གི་མཐའ་ཡི་གེ་འདུས་པ་སྟེ་ཡི་གེ་སིལ་བུ་གསུམ་འདུས་པ་ལས་ཆོས་ཞེས་པ་ལྟ་བུ་སྟེ། ཆ་དང་། ན་རོ་དང་། ས་སོ་སོ་ན་གནས་དུས་ཆོས་ཀྱི་མིང་དུ་མི་འགྲུབ་ཀྱང་། གསུམ་པོ་ཚོགས་པ་ལས་འབྱུང་བའོ། །དེ་ལ་བྲིས་པ་ནི་ཡི་གེའི་རྣམ་པ་སྟེ། མགོ་དང་། དཔུང་པ་དང་། ཟགས་མཆུ་དང་། ཡར་འཐེན་དང་། མར་འཐེན་དང་། སྦོ་དང་། མིག་བུ་ལ་སོགས་ཚོགས་པ་ལས་ཡི་གེའི་གཟུགས་བརྙན་དུ་གྲུབ་པའོ། །ཡི་གེ་ནི་སྒྲ་དང་སྒྲའི་དོན་སྤྱི་ཚོགས་པའི་ཆོས་ཞེས་རྗོད་བྱེད་དུ་གྲུབ་པ་དེ་ཡིན་ལ། དེ་ལ་ཡི་གེའང་གཅིག་ལ་མིང་གཞིའང་གཅིག་ཡོད་པ་ཀ་ཞེས་པ་དང་། ཡི་གེ་གཅིག་ལ་མིང་གཞི་གཉིས་ཡོད་པ་ལྷ་ཞེས་པ་ལྟ་བུ། ལ་དང་ཧ་རྣམ་པ་གཉིས་སོ། །ཡི་གེ་གཅིག་ལ་མིང་གཞི་གསུམ་ཡོད་པ་ནི་གཞན་ཞེས་པ་ལྟ་བུ་ག་དང་། ཞ་དང་། ནའོ། །དེ་བཞིན་དུ་བཞི་ཡོད་པ་ནི། རྒྱན་ཞེས་པ་ལྟ་བུ་སྟེ། ར་དང་། ག་དང་། ཡ་བཏགས་དང་། ནའོ། །ལྔ་ཡོད་པ་ནི་མིང་མཐའ་དབྱངས་ཞེས་པ་ལྟ་བུ་སྟེ། ད་དང་། བ་དང་། ཡ་བཏགས་དང་། ང་དང་། སའོ། །དེའང་གསལ་བྱེད་སུམ་ཅུ་ལ་དབྱངས་ཞུགས་པས་མིང་ལ་སོགས་མངོན་འབྱུང་གི་ཡི་གེ་འགྲུབ་སྟེ། སྡེ་པའི་དང་པོ་ཀ་བརྗོད་པ་ན་དེའི་སྲོག་ཏུ་ཡི་གེ་ཨ་རང་བཞིན་དུ་ཞུགས་པ་ཀ་ཨ་ཞེས་པ་ལྟ་བུའོ། །དེ་ལ་གི་གུ་བྱིན་ན་ཨིར་འགྱུར་ཏེ་ཀི་ཨི་ཞེས་པའོ། །དེ་བཞིན་དུ་ན་རོ་ལས་ཨོ་དང་། འགྲེང་བུ་ལས་ཨེ། ཞབས་ཀྱུ་ལས་ཨུ་རང་བཞིན་དུ་འབྱུང་བའོ། །གསལ་བྱེད་རྣམས་ཉི་ཤུ་རྩ་བཞིར་བསྡུ་བའི་ཚུལ། ཅ་ཆ་ཇ་དང་ཞ་ཟ་འ་རྣམས་རྒྱ་གར་ན་མེད་དེ་བོད་སྐད་ལ་འཇུག་པའི་དབང་དུ་ཐོན་མིས་མཛད་ཅིང་ཕྱོགས་མཚུངས་ཙམ་དུ་བརྩི་ན། ཅ་ཆ་ཇ་གསུམ་ནི་སྡེ་པ་གཉིས་པའི་དང་པོ་གསུམ་དང་ཆ་འདྲ་ལ་ཞ་ནི་ཤ་དང་མཚུངས་ཤིང་། ཟ་ནི་ས་འ་ཨ་དང་མཚུངས་པའི་ཚུལ་རྒྱ་གར་པས་ཞ་ལུ་ལ་ཤ་ལུ་ཟེར་བ་དང་། ཟ་ཧོར་ལ་ས་ཧོ་རར་འབོད་པས་མཚོན་ལ། འ་ནི་རྒྱ་གར་གྱི་ཡི་གེ་ལ་རིང་ཆར་ཡོད་པ་བཞིན་དུ། བོད་དུའང་འཕུལ་རྟེན་དང་རིང་ཆར་འགྱུར་བ་ཤས་ཆེ་ཞིང་། དེ་ལྟར་སྐྲའི་ཉག་མ་འདུས་པ་ལས་ལན་བུ་དང་། ཀུ་ཤའི་ཉག་མ་འདུས་པ་ལས་ཆུན་པོ་དང་། རྩའི་ཉག་མ་འདུས་པ་ལས་ནེའུ་གསིང་དུ་གྲུབ་པ་ལྟར་ཡི་གེ་འདུས་པ་ལས་མིང་། མིང་འདུས་པ་ལས་ཚིག །ཚིག་འདུས་པ་ལས་བཀའ་དང་བསྟན་བཅོས་སུ་འགྲུབ་སྟེ། དེའང་ལེའུ་དང་། བམ་པོ་དང་། སྡེ་ཚན་དང་། ཀླད་དང་། གཞུང་དང་། རྗེས་ཀྱི་དོན་ཚོགས་པ་ལས་གང་ཟག་གཅིག་ཐོག་མར་སེམས་བསྐྱེད་པ་ནས་མཐར་འཚང་རྒྱ་བའི་བར་གྱི་ལུས་ཡོངས་སུ་རྫོགས་པར་སྟོན་པ་ལྟ་བུ་སྟེ། བརྗོད་བྱའི་དོན་གཞན་རྣམ་པ་ཐམས་ཅད་པ་ལའང་མཚུངས་སོ། །དེ་ལྟར་གྲུབ་པའི་དུས་ནའང་རང་བཞིན་དུ་ཡི་གེ་སིལ་བུ་མ་འདྲེས་པར་གནས་ཏེ། ཐག་པ་རང་སའི་དུས་སུ་སྤུ་ཉག་མ་རེ་རེར་གནས་པ་དང་། དེ་བཞིན་དུ་གཡག་རྔ་དང་ནེའུ་གསིང་བཞིན་ནོ། །དེའི་ཕྱིར་སྣང་ཞིང་སྲིད་པ་དང་། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་བློ་དང་། སྙམ་བྱེད་དང་། རྟོག་པ་ལས། མིང་ཚིག་ཡི་གེའི་ཚོགས་ཀྱིས་སྒྲོ་བཏགས་ཤིང་བརྗོད་པའི་དུས་ཉིད་ནས། མིང་དོན་འབྲེལ་པ་མེད་པ་ཡི་གེ་སིལ་བུ་ལྟ་བུ་སྟེ། ཡི་གེའང་སྒྲ་དང་སྒྲའི་དོན་དུ་ཚོགས་པ་སོ་སོར་རྟོག་པའི་ཤེས་རབ་ཀྱི་སྙམ་བྱེད་ལས་བྱུང་བས། སྙམ་བྱེད་ཉིད་ཀྱི་ངོ་བོ་ལ་ཤིན་ཏུ་བརྟགས་ན་ངོས་བཟུང་མེད་པ་ནམ་མཁའི་རང་བཞིན་དུ་གནས་པའི་ཕྱིར། ཆོས་ཐམས་ཅད་སྣང་ལ་རང་བཞིན་མེད་པར་ཤེས་པར་འགྱུར་རོ། །གནས་པའི་བསྐལ་པ་བཤད་ཟིན་ཏོ། །གསུམ་པ་འཇིག་པའི་བར་བསྐལ་ཉི་ཤུ་ནི། བཅུད་ཀྱི་སེམས་ཅན་འཇིག་པ་ལ་བར་བསྐལ་བཅུ་དགུ། སྣོད་ཀྱི་འཇིག་རྟེན་འཇིག་པ་ལ་བར་བསྐལ་གཅིག་གོ །དེ་ལ་བཅུད་འཇིག་པའི་དང་པོ་དམྱལ་བ་ནས་མགོ་བརྩམ་སྟེ། དེར་སེམས་ཅན་གསར་བ་སྐྱེ་བར་མི་འགྱུར་ཞིང་། རྙིང་པ་ལས་ཟད་པ་རྣམས་ནི་གནས་གོང་མ་གང་གི་ལས་མྱོང་དགོས་པ་དེར་སྐྱེ་ལ་ཁ་ཅིག་ཡི་དྭགས་དང་། ཁ་ཅིག་དུད་འགྲོ་དང་། ཁ་ཅིག་ལྷ་མི་ལ་སོགས་པར་རོ། །དེའི་ལས་དང་ཚེ་མ་རྫོགས་པ་རྣམས་ནི་དམྱལ་བའི་གནས་འདི་ཞིག་ཀྱང་ཞིང་གཞན་གྱི་དམྱལ་བར་གནས་འཕོ་བ་ཡིན་ཏེ་སྟོང་ཕྲག་བརྒྱ་པ་ལས། དེ་ཡང་མེས་སྡུད་པའི་བསྐལ་པ་ཆེན་པོ་བྱུང་བ་དེའི་ཚེ། འཇིག་རྟེན་གྱི་ཁམས་གཞན་གྱི་སེམས་ཅན་དམྱལ་བ་ཆེན་པོ་རྣམས་སུ་འདོང་བར་འགྱུར་རོ། །ཞེས་བསྟན་ལ། དེ་ལྟར་དམྱལ་བའི་འཇིག་རྟེན་ཞིག་ནས་རིམ་པ་བཞིན་ཡི་དྭགས་དང་དུད་འགྲོའི་འཇིག་རྟེན་དག་གི་གཙོ་བོ་བྱིངས་ན་གནས་པ་གཉིས་འཇིག་སྟེ། ཁ་འཐོར་བ་ལྷ་མིའི་གནས་ན་ཡོད་པ་རྣམས་མཐོ་རིས་འཇིག་པ་དང་ལྷན་ཅིག་པ་ཡིན་ནོ། །ངན་སོང་དེ་གཉིས་ཀྱང་རང་རང་གི་ལས་མ་ཟད་པ་རྣམས་ཞིང་གཞན་གྱི་ངན་སོང་དུ་འགྲོ་ཚུལ་ནི་གཅིག་གོ །མཐོ་རིས་ཇི་ལྟར་འཇིག་ན། འཛམ་བུའི་གླིང་པའི་མི་རྣམས་ནི་ཚེ་ལོ་བཅུ་པའི་ནད་མཚོན་མུ་གེའི་བསྐལ་ཆུང་གསུམ་འདས་ནས་མི་གཅིག་གིས་དགེ་བའི་བཤེས་གཉེན་ལ་མ་ལྟོས་པར་བསམ་གཏན་གཉིས་པ་ཐོབ་སྟེ། དེ་ལས་ལངས་ནས་དབེན་པ་ལས་སྐྱེས་པའི་དགའ་བ་དང་བདེ་བ་ནི་འདི་ལྟའོ། །ཞེས་ཆེད་དུ་བརྗོད་པས་སྒྲ་དེས་འཛམ་བུའི་གླིང་ཐམས་ཅད་ཁྱབ་སྟེ། གཞན་དག་གིས་ཀྱང་ཐོས་མ་ཐག་ཏུ་དེའི་རྗེས་སུ་བསླབས་པས་སེམས་ཅན་དེ་དག་ཐོག་མའང་འོད་གསལ་གྱི་མཚུངས་པའི་སེམས་ལས་ཆད་པའི་རྟེན་འབྲེལ་གྱིས་མཐར་ཡང་ཏིང་ངེ་འཛིན་དེ་ཐོབ་ནས་འོད་གསལ་གྱི་ལྷར་སྐྱེས་ནས་འཛམ་བུའི་གླིང་ན་སེམས་ཅན་གཅིག་ཀྱང་མ་ལུས་པར་སྟོངས་པར་འགྱུར་རོ། །དེ་ལྟར་སྟོངས་པའི་རྗེས་ནས་ཤར་གྱི་ལུས་འཕགས་གླིང་དང་། ནུབ་ཀྱི་བ་གླང་སྤྱོད་ཀྱང་སྔ་ཕྱི་རིམ་པས་འཛམ་བུའི་གླིང་པ་ལྟར་འདོད་པ་ལ་སྐྱོ་བས་ཁམས་གོང་མར་སྐྱེ་བའི་རྒྱུ་རང་བཞིན་གྱིས་བསམ་གཏན་གཉིས་པ་ཐོབ་ནས་སྟོངས་པར་འགྱུར་རོ། །དེ་ནས་བྱང་གི་སྒྲ་མི་སྙན་པ་རྣམས་ནི་འདོད་པ་ལ་ཆགས་པ་དང་མ་བྲལ་བས་སུམ་ཅུ་རྩ་གསུམ་པའི་ལྷར་སྐྱེའོ། །གླིང་ཕྲན་རྣམས་ཀྱང་གཙོ་བོའི་གླིང་ལྟར་གྱུར་ནས་མི་འགའ་མ་ལུས་པ་དེའི་ཚེ་མིའི་འཇིག་རྟེན་ཞིག་པ་ཞེས་བྱའོ། །དེ་ནས་རྒྱལ་ཆེན་རིགས་བཞི་ནས་གཞན་འཕྲུལ་དབང་བྱེད་ཀྱི་བར་གྱི་འདོད་ལྷ་རིགས་དྲུག་ཀྱང་ལྷ་གཅིག་གིས་བསམ་གཏན་ཐོབ་པའི་ཚུལ་བསྒྲགས་པ་ཐོས་པས་རྐྱེན་བྱས་ཏེ་བསྒོམས་པ་ལས། ཐམས་ཅད་ཀྱིས་སྔ་མ་ལྟར་བསམ་གཏན་གཉིས་པ་ཐོབ་ནས་འོད་གསལ་གྱི་ལྷར་སྐྱེའོ། །དེའི་ཚེ་འདོད་ཁམས་ཞིག་པ་ཞེས་བྱའོ། །དེ་ནས་ཚངས་པའི་འཇིག་རྟེན་དུ་སེམས་ཅན་གང་ཡང་རུང་བས་རང་གི་ཆོས་ཉིད་ཀྱིས་ཐོབ་པའི་བསམ་གཏན་གཉིས་པ་ལ་སྙོམས་པར་ཞུགས་ནས་དེའི་ཚུལ་ཚིག་ཏུ་བརྗོད་པས། ཀུན་གྱིས་དེ་ལྟར་བསླབས་པས་ཤི་འཕོས་ནས་འོད་གསལ་གྱི་ལྷར་སྐྱེའོ། །ཚུལ་དེ་ལྟ་བུས་གཟུགས་ཁམས་ཀྱང་ཞིག་ནས་འཇིག་རྟེན་ན་སེམས་ཅན་གཅིག་ཀྱང་མེད་པར་འགྱུར་རོ། །དེ་ཡང་རྟེན་སྣོད་ནི་འབྱུང་བ་ཆེན་པོ་གསུམ་གྱིས་འཇིག་པར་བྱེད་དེ། ཐོག་མར་མེས་འཇིག་པའི་ཚུལ་ནམ་མཁའ་ལ་ཉི་མ་གཅིག་པོ་འདི་རབ་ཏུ་ཚ་བར་ཤར་ནས་རྩི་ཤིང་ནགས་ཚལ་ཐམས་ཅད་སྐམས་པར་བྱེད་དོ། །གཉིས་ཤར་ནས་ཆུ་ཀླུང་དང་ལྟེང་ཀ་ཐམས་ཅད་སྐེམ་མོ། །གསུམ་ཤར་བས་ཆུ་ཀླུང་ཆེན་པོ་ཐམས་ཅད་སྐེམ་མོ། །བཞི་ཤར་བས་མཚོ་ཆེན་པོ་མ་དྲོས་པ་ཡང་སྐེམ་མོ། །ལྔ་ཤར་བས་རྒྱ་མཚོ་ཆེན་པོ་ཡང་སྐེམ་མོ། །ཇི་ལྟར་སྐེམ་ན་ཐོག་མར་ཟབས་སུ་དཔག་ཚད་བརྒྱ་བསྐམས་ནས། རིམ་བཞིན་ཉིས་བརྒྱ་དང་། བདུན་བརྒྱ་དང་། སྟོང་དང་། ཁྲི་དང་། བརྒྱད་ཁྲིའི་བར་དུ་བསྐམས་ནས་མཐར་ཆུ་རྔམས་དཔག་ཚད་གཅིག་དང་། རྒྱང་གྲགས་ཕྱེད་དང་། བ་གླང་གི་རྨིག་རྗེས་ཙམ་མ་ལུས་པར་བསྐམས་ནས་ཐིགས་པ་གཅིག་ཀྱང་ལུས་པར་མི་འགྱུར་རོ། །དྲུག་ཤར་བས་ས་ཆེན་པོ་གངས་རི་དང་བཅས་པ་འབར་འབུར་དུ་བྱེད་པ་ཐམས་ཅད་བསྲེག་གོ །བདུན་ཤར་བས་ལྷུན་པོ་རི་བདུན་འཁོར་ཡུག་གསེར་གྱི་ས་གཞི་དང་བཅས་པ་བྱེ་བ་ཕྲག་བརྒྱ་པོ་མ་ལུས་པར་བསྲེགས་ནས་འབར་བའི་མེ་ལྕེ་གཅིག་ཏུ་འཁྱིལ་བ། མར་གསེར་གྱི་ས་གཞི་དམྱལ་བའི་གནས་དང་བཅས་པ་ལ་ཐུག་ཅིང་། གྱེན་དུ་རླུང་གིས་སྦར་བ་འཁྱིལ་ནས་རྩེ་མོས་ཚངས་པའི་གཞལ་མེད་ཁང་སྟོང་པ་རྣམས་བསྲེག་ཅིང་འབར་རབ་ཏུ་འབར། ཀུན་ཏུ་འབར། ཤིན་ཏུ་འབར་བས་འོད་གསལ་གྱི་ལྷ་གཞོན་ནུ་རྣམས་སྐྲག་ཅིང་རྟབ་པ་ལ། ལྷ་རྒན་པོ་རྣམས་ཀྱིས། ཀྱེ་གྲོགས་དག་མ་འཇིགས་ཤིག །མེ་ལྕེ་འདི་ལྟ་བུ་ནི་སྔོན་ཡང་ཚངས་པའི་འཇིག་རྟེན་གྱི་བར་བྱུང་ནས་སྟོངས་ཏེ་ཞིག་པ་ཡིན་ནོ། །དེ་ནས་མི་སྣང་བར་འགྱུར་ན་འདིར་ནི་གནོད་པ་མེད་དོ་ཞེས་དབུགས་འབྱིན་པར་བྱེད་དོ། །ཉི་མ་བདུན་ནི་དངོས་བསྟན་དུ་བགྲང་བ་དང་། རིམ་བཞིན་ཚ་ཁྱད་དུ་སྤར་བའི་ཕྱོགས་གཉིས་འདོད་དོ། །དེ་ནས་ཆུས་འཇིག་པ་ནི། ནམ་མཁའ་ལས་ཆར་གྱི་རྒྱུན་གཉའ་ཤིང་ཙམ་དང་། གཤོལ་མདའ་ཙམ་བབས་པས་བསམ་གཏན་གཉིས་པ་མན་ཆད་ལན་ཚྭ་ཆུར་ཞུ་བ་ལྟར་གྱུར་ནས་ཞིག་གོ །རླུང་གིས་འཇིག་པ་ནི། དེ་ནས་འོག་གཞིའི་རླུང་རྡོ་རྗེ་རྒྱ་གྲམ་ལངས་ཏེ་ཀུན་ནས་ཀུན་ཏུ་འཐོར་བས་བསམ་གཏན་གསུམ་པ་མན་ཆད་ཞིག་སྟེ་ནམ་མཁའི་རང་བཞིན་གཅིག་ཏུ་སྟོང་པར་གནས་སོ། །དེའང་བསམ་གཏན་དང་པོ་མན་ཆད་མེས་ལན་བདུན་དུ་འཇིག་པའི་བར་བསམ་གཏན་གཉིས་པ་མི་འཇིག་ལ། བསམ་གཏན་གཉིས་པ་ཆུས་འཇིག་དུས་གསུམ་པ་མི་འཇིག །གསུམ་པ་རླུང་གིས་འཇིག་དུས་བཞི་པ་མི་འཇིག་པ་ནི་མཚུངས་པར་ལྡན་པའི་བསམ་གཏན་གྱི་རྒྱུ་ལས་ཡིན་ཏེ། བསམ་གཏན་དང་པོ་ན་སེམས་དང་སེམས་བྱུང་གི་རྟོག་དཔྱོད་མེ་དང་འདྲ་བ་ཡོད་པས་མེས་འཇིག་ལ། གཉིས་པ་ན་དགའ་བདེའི་ཉམས་ཆུ་རྒྱུན་ལྟ་བུ་ཡོད་པས་ཆུས་འཇིག་ལ། གསུམ་པ་ན་དབུགས་འབྱུང་རྔུབ་ཀྱི་གཡོ་འགུལ་རླུང་ལྟ་བུ་ཡོད་པས་རླུང་གིས་འཇིག་པ་ཡིན་ནོ། །དེའང་འདོད་པའི་ཁམས་ལྟར་རགས་པའི་རླུང་རྩ་འདབ་དང་རྟེན་དང་བརྟེན་པར་འབྲེལ་བ་ནི་མེད་དེ། རྣམ་སྨིན་སྐྱེས་འབྱུང་བའི་རྡུལ་ཕྲན་དང་པོ་ལས་ཐོབ་པའི་ཆ་དང་མཚུངས་པའི་དབུགས་རྒྱུ་བས་བསམ་གཏན་རང་བཞིན་གྱིས་དྭངས་པའང་དེ་ཉིད་དོ། །བསམ་གཏན་འདི་དག་གྲུབ་པ་དང་མ་གྲུབ་པ་ལས་རྣལ་འབྱོར་བསྒོམ་པ་དག་ལའང་འབྱུང་བའི་དགྲས་གནོད་མི་གནོད་ཆོས་མཚུངས་པའི་ཕྱིར། ད་ལྟ་སེམས་དང་སེམས་བྱུང་གི་རྟོག་པའང་མ་འགགས། ཚོར་བ་དགའ་མི་དགའ་རང་སོ་ན་གནས་ཤིང་རླུང་གི་འགྱུ་བ་མ་དག །སོ་སོ་རང་རིག་གི་རྣམ་ཤེས་དྲན་འཛིན་གྱི་ཐག་པས་བཅིངས་པ་དག་གིས་འཇིག་རྟེན་པའི་བསམ་གཏན་ཡང་མ་གྲུབ་ན། འཇིག་རྟེན་ལས་འདས་པ་རྒྱལ་བའི་ཡེ་ཤེས་དང་རེ་ཞིག་རྒྱབ་སྤྲད་པའོ། །བསམ་གཏན་བཞི་པ་ལ་ནི་བསྐལ་པ་འཇིག་པར་མཐུན་སྣང་དུ་གྲུབ་པའི་འབྱུང་བའི་གནོད་པ་མེད་ཀྱང་རང་རང་གི་ལས་ཀྱི་འཆི་འཕོ་ཡོད་པས་རྟག་པ་མ་ཡིན་ནོ། །མི་འཇིག་པའི་རྒྱུ་གང་གིས་ན། དེ་ནས་བསམ་གཏན་དང་པོ་དང་མཚུངས་པའི་རྟོག་དཔྱོད་ཀྱི་འཇུག་པ་སེམས་དང་སེམས་བྱུང་རགས་པ་དང་། གཉིས་པ་དང་མཚུངས་པའི་བསམ་གཏན་གྱི་རོ་མྱོང་ལ་ཆགས་པའི་དགའ་བདེ་དང་། གསུམ་པ་དང་མཚུངས་པའི་གཡོ་བྱེད་ཀྱི་རླུང་རང་བཞིན་རྣམ་པ་གསུམ་གྱིས་དེའི་ཏིང་ངེ་འཛིན་མི་གཡོ་བས། རྐྱེན་གསུམ་དང་མཚུངས་ལྡན་གྱི་འབྱུང་བས་མི་གནོད་དེ། དགྲ་མེད་པ་ལ་མཚོན་གྱི་འཇིག་པ་མེད་པའི་ཕྱིར་རོ། །དེ་ལྟར་འབྱུང་བ་གསུམ་གྱིས་འཇིག་ལ་གཉིས་ཀྱིས་མི་འཇིག་པ་གང་ཡིན་ན། ནམ་མཁའ་འཇིག་པའི་གོ་འབྱེད་པ་དབྱིངས་ཀྱི་ཆར་གནས་པ་ལས་གནོད་བྱེད་ཀྱི་རང་བཞིན་དུ་མེད་ལ། ས་ནི་གཞིག་བྱའི་ཡུལ་དུ་གྲུབ་ཀྱིས་འཇིག་བྱེད་ཀྱི་ཡུལ་དུ་མ་སྐྱེས་པས་སོ། །བསམ་གཏན་དེ་དག་འཇིག་པའི་སྔོན་རོལ་དུ་དེ་ན་ཡོད་པའི་ལྷ་དེ་དག་གིས་གོང་མའི་སེམས་རང་བྱུང་དུ་ཐོབ་ནས་དགེ་རྒྱས་ལ་སོགས་པར་སྐྱེའོ། །དེ་ལྟར་འཇིག་པའི་མགོ་བརྩམས་པ་ནས་རིལ་ཞིག་པའི་བར་དུ་བར་བསྐལ་ཉི་ཤུ་ཡོད་པའོ། །དོན་བཞི་པ་སྟོངས་པའི་བསྐལ་པ་ནི། ཐམས་ཅད་ནམ་མཁའ་གཅིག་གི་རང་བཞིན་དུ་གནས་ནས་རྟེན་སྣོད་དང་། བརྟེན་པ་བཅུད་ཀྱི་འདུས་བྱས་འདུས་མ་བྱས་པའི་དབྱིངས་སུ་སྟོངས་པ་ནི། ངེས་པའི་དོན་ལ་གཟུགས་སྐུ་ཆོས་སྐུའི་དབྱིངས་སུ་ཞི་བའི་མཚོན་དཔེར་གནས་པ་སྟེ། རེ་ཞིག་ནང་གི་ཆགས་གནས་འཇིག་སྟོངས་དང་སྦྱར་ན། ཐལ་འགྱུར་ལས། དོན་ནི་འཇིག་དང་ཆགས་པ་དང་། །གནས་པ་ཉིད་དང་སྟོངས་པ་དག །སྐྱེ་དང་རྒ་དང་ན་དང་འཆི། །སྲིད་པའི་འཁྲུལ་འཁོར་ཉིད་དུའོ། །ཞེས་གསུངས་ལ། དེ་ལྟར་སྟོངས་པའི་ཡུན་སྲིད་ཀྱང་བར་གྱི་བསྐལ་པ་ཉི་ཤུའོ། །སླར་ཡང་དེའི་འོག་ཏུ་རྡུལ་ཕྲན་འདུས་པ་ལས་འཇིག་རྟེན་གྱི་ཁམས་ཞིག་བརྩམ་པའི་མགོ་འཛིན་ཏེ། མུན་པའི་བསྐལ་པ་དྲུག་ཅུར་ཆགས་གནས་འཇིག་སྟོངས་དྲུག་ཅུ་འབྱུང་ལ། དེའི་འོག་ཏུ་བསྐལ་པ་སྐར་མ་ལྟ་བུ་ལ་སངས་རྒྱས་གྲངས་མེད་པར་འབྱུང་བ་ནི་སྒྲོན་མའི་བསྐལ་པ་ཡིན་ཏེ། དེའང་རྣམ་པར་སྣང་མཛད་གངས་ཆེན་མཚོའི་ཕྱག་གི་པདྨའི་ཕྲུམ་ཕྲུམ་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ཞིང་ཁམས་གཞི་དང་སྙིང་པོ་མེ་ཏོག་གིས་བརྒྱན་པ་ཞེས་བྱ་བ་ལྔ་ཚན་ལྔ་ལས། བཅུ་གསུམ་པ་ཐུགས་ཀ་དཔལ་གྱི་བེའུའི་ཐད་དྲང་རྡོ་རྗེ་ཐེག་པའི་ཞིང་ཁམས་མི་མཇེད་ཀྱི་འཇིག་རྟེན་བྱེ་བ་ཕྲག་བརྒྱའི་ས་ཚིགས་འདིའི་ནམ་མཁའ་ལ་སྔོན་ཡང་འཇིག་རྟེན་བསམ་གྱིས་མི་ཁྱབ་པ་བྱུང་ཞིང་། མ་འོངས་པ་ཕྱི་མའི་མཐར་ཡང་ཆགས་འཇིག་གི་བསྐལ་པ་དང་། འཇིག་རྟེན་གྲངས་མེད་པ་འབྱུང་བ་བཞིན་དུ་ཕྱོགས་བཅུ་གཞན་ཡང་རྣམ་པ་མཚུངས་ལ། དེ་ལྟར་ཆགས་གནས་འཇིག་སྟོངས་བཞིའི་བར་དུས་མཉམ་པའི་བར་བསྐལ་ཉི་ཤུ་མཚུངས་པ་བསྡོམས་པས་བརྒྱད་ཅུ་ལ་བསྐལ་པ་ཆེན་པོ་གཅིག་ཅེས་གྲགས་པ་སྟེ། དེ་དག་ཀྱང་ལེགས་པར་གནས་ཤིང་ཆགས་པའི་དུས་སྐབས་ན་སྲ་བ། བརྟན་པ། གཞན་དུ་མི་འཕོ་བ། རྒྱུ་རྐྱེན་གང་གིས་ཀྱང་གཞིག་པར་མི་ནུས་ལ། འབྱོར་ཞིང་རྒྱས་པ། སྐྱེ་བོ་མང་པོས་གང་བ་ཡིན་ནའང་། འཇིག་རྟེན་ཞེས་བྱ་བའི་མིང་ཉིད་ཀྱིས་སྨ་བབས་ནས་ཆགས་པའི་མཐར་ཐུག་པ་ཙམ་ནས་རྒུད་པའི་མགོ་བརྩམས་ཤིང་མཐར་གྱིས་གཅིག་ཀྱང་མེད་པར་འཇིག་ཅིང་སྟོངས་པར་འགྱུར་བའི་ཚུལ་ལ་ལྟོས། དེ་ལྟར་བརྟགས་ན་བདག་ཅག་གི་ལུས་ནི་ཉིན་ཞག་གཅིག་པའི་སྦྲང་བུ་བཞིན་དུ་ཉམ་ཆུང་བ། སྲོག་ནི་ཤིན་ཏུ་གཡོ་བ། གནོད་པ་མང་པོས་མཐའ་ནས་བསྐོར་བ། ཆུའི་ལྦུ་བ་ལས་ཀྱང་ཡིད་བརྟན་དཀའ་བ་འདི་ལ་རབ་ཏུ་སྐྱོ་བས་ཐར་པ་དམ་པའི་ཆོས་ལ་བརྩོན་པར་བྱའོ་ཞེས་དོན་བསྡུ་བ་ཡིན་ཏེ། དེ་སྐད་དུ་མི་རྟག་པའི་གཏམ་ལས། གང་དུ་ས་རྣམས་བསྲེག་འགྱུར་ཏེ། །ལྷུན་པོའང་ཐལ་བར་འཇིག་པ་དང་། །རྒྱ་མཚོའི་ཆུ་ཡང་བསྐམ་འགྱུར་ན། །ལུས་ཅན་དེ་དག་སྨོས་ཅི་དགོས། །ཞེས་བཤད་དོ། །དེའང་ནང་དུ་སེམས་ཅན་རང་རང་གི་འཇིག་རྟེན་ནུབ་པ་ལ་ལྟོས་ན། དང་པོ་ཀུན་གཞིའི་ཆོས་ཉིད་ནམ་མཁའ་ལྟ་བུའི་ངང་ལས། མ་རིག་པ་དང་ཀུན་རྟོག་གི་རླུང་ལ་འཁོར་བར་སྡུད་པའི་ལས་འདོད་ཆགས་ཀྱི་ཆུ་བརྟན་ཞིང་། ཕ་མའི་ཁུ་ཁྲག་ལས་ལྷུན་པོ་ལྟ་བུའི་ལུས། ཉི་ཟླ་ལྟ་བུའི་མིག །གླིང་བཞི་གླིང་ཕྲན་ལྟ་བུའི་སྐྱེ་མཆེད། ཁམས་བཅུ་གཉིས། རི་བདུན་ཁོར་ཡུག་དང་བཅས་པའི་རྣམ་ཤེས་ཚོགས་བརྒྱད། འགྲོ་བ་དྲུག་དང་མཐུན་པའི་རྩ་འཁོར་དྲུག །དེ་དག་ཀྱང་གནས་རིགས་ཐ་དད་པ་བཞིན་དུ་བདེ་སྡུག་ལ་སོགས་དུ་མར་སྣང་བའི་ནང་གི་སྟོང་ཆེན་གྱི་འཇིག་རྟེན་འདི་ཡང་། སྣོད་འཇིག་པ་དང་ཕྱོགས་མཚུངས་པར་འཆི་བའི་དུས་ལ་བབ་པ་ན། ཕྱི་འབྱུང་བཞི་ནང་འབྱུང་བཞིར་སྡུད་པས་མེ་བདུན་དང་ཆུ་གཅིག་སྟེ་བརྒྱད་ཐལ་ནས། ནང་དང་གསང་བའི་འབྱུང་བ་ཐོག་མའི་འོད་གསལ་ལ་ཐིམ་པས་ཐམས་ཅད་ནམ་མཁའ་གཅིག་ཏུ་འགྱུར་བའི་སྐབས་ཡོད་དེ། འདི་ལྟར་ལུས་ཀྱི་འབྱུང་བཞི་བསྡུས། རྩ་ཐིག་རླུང་གསུམ་སྟོངས་པའི་མེ་བདུན་དང་། སྲོག་འཕོ་བའི་ཆུ་གཅིག །དབུགས་འབྲེལ་ཐག་ཆད་པའི་རླུང་གིས་གཏོར་ནས་ལུས་སེམས་སོ་སོར་འབྲལ་ཞིང་། ལུས་ཀྱང་འབྱུང་བའི་གནོད་པས་རྡུལ་ཕྲན་ཆ་མེད་དུ་ཞིག་ནས་ཅི་ཡང་མེད་པར་འགྱུར་བ་ལ་བསམ་མོ། །སྤྱི་དོན་གཉིས་པ་ལ་བཞི་སྟེ། དམ་པའི་སྐྱེས་བུ་ལ་བསམས་ཏེ་མི་རྟག་པ། སྐྱེ་དགུའི་བདག་པོ་ལ་བསམས་ཏེ་མི་རྟག་པ། འཆི་བའི་རང་བཞིན་ལ་བསམས་ཏེ་མི་རྟག་པ། དཔེ་དོན་སྣ་ཚོགས་ལ་བསམས་ཏེ་མི་རྟག་པའོ། །དང་པོ་ནི། ལྷ་མིའི་སྟོན་པ་རྡོ་རྗེའི་སྐུ་མཆོག་ཀྱང་། །རྟག་པར་བལྟ་ལ་གཟིགས་པ་ཡོལ་བ་ཡིས། །གཞོམ་གཞིག་བྲལ་བའི་སྲི་ཞུས་ལྷོད་གྱུར་ནས། །ཞི་བའི་དབྱིངས་ལ་དགྱེས་པའི་མངོན་རྟོགས་ངོམ། །ཞེས་སྨོས་ཏེ། འདི་ལྟར་སངས་རྒྱས་རྣམ་པར་གཟིགས་ནས་ཤཱཀྱ་ཐུབ་པའི་བར་གྱི་རབས་བདུན་དང་། བཟང་པོའི་བསྐལ་པ་འདི་ལ་བྱོན་ཞིང་འབྱོན་པར་འགྱུར་བ་མོས་པའི་བར་གྱི་སངས་རྒྱས་སྟོང་རྩ་གཉིས་དང་། བར་བར་དུ་བྱོན་པའི་རང་སངས་རྒྱས་ལ་སོགས་པ་དེ་དག་ཀྱང་སྤྲུལ་པའི་སྐུའི་ཞིང་ཁམས་སུ་མངོན་པར་འདུ་མཛད་པ་ཙམ་ནས་རྡོ་རྗེའི་སྐུ་ཡང་འཇིག་པའི་མངོན་རྟོགས་ངོམ་པ་ལ་ཞུགས་ཤིང་། སངས་རྒྱས་རྣམས་ཀྱི་བསྟན་པའང་དར་ནུབ་ཀྱི་རིམ་པ་མཐའ་ཡས་ན་བདག་ཅག་གི་ལུས་ནི་དབུ་བ་བརྡོས་པ་ལྟ་བུ། སེམས་ནི་འཁྲུལ་སྣང་གི་ཆོས་ཅན་ཡིན་པའི་ཕྱིར་ཉིན་མོའི་ཐོག་མཐའ་ཙམ་དུའང་རྟག་པའི་གནས་སྐབས་ག་ལ་ཞིག་སྟེ་རྟ་དབྱངས་ཀྱིས། ཅི་སྟེ་སངས་རྒྱས་རྣམས་ཀྱི་སྐུ། །མཚན་དང་དཔེ་བྱད་ཀྱིས་བརྒྱན་པ། །རྡོ་རྗེའི་སྐུ་ཡང་མི་རྟག་ན། །ཆུ་ཤིང་སྙིང་པོ་མེད་འདྲ་བའི། །ལུས་ཅན་གཞན་རྣམས་སྨོས་ཅི་དགོས། །ཞེས་དང་། དགའ་བའི་དབང་པོས། གཟུགས་དང་ལོངས་སྤྱོད་ཐོས་པ་དང་། །ཚུལ་ཁྲིམས་ལ་སོགས་རྟག་མིན་ཏེ། །གང་ཡང་འདོད་ཆགས་བྲལ་བ་ཡང་། །ཀུན་ཏུ་གནས་པ་མ་མཐོང་ངོ་། །ཞེས་སོ། །གཉིས་པ་ནི། བསམ་གཏན་གྲུབ་ནས་བསྐལ་པར་གནས་པའི་ཁུར། །དོན་མེད་གྱུར་ཏེ་འཆི་བ་དེ་མཐོང་ནས། །ཚངས་དབང་བདེ་འབྱུང་འཁོར་ལོས་སྒྱུར་རྣམས་ཀྱང་། །འཆི་བདག་བདུད་ལས་གཟུར་བའི་ཐབས་མི་བསམ། །འཇིག་རྟེན་པའི་བསམ་གཏན་གྲུབ་པ་སྲིད་རྩེས་བསྐལ་ཆེན་བརྒྱད་ཁྲི་ཐུབ་པ་ནས་རིམ་པར་བསམ་གཏན་བཞི་པའི་ལྷའི་བར་བསྐལ་པ་ནས་བསྐལ་པར་འཚོ་བ་རྣམས་ཀྱང་ལས་ཀྱི་ཕྱི་བཞིན་དུ་འབྲང་ནས་གདོན་མི་ཟ་བར་འཆི་བའི་གནས་སྐབས་ཡོད་པས་ཚངས་པ་དང་། དབང་ཕྱུག་དང་། ཁྱབ་འཇུག་དང་། བརྒྱ་བྱིན་དང་། འཇིག་རྟེན་སྐྱོང་བ་བཞི་དང་། དྲང་སྲོང་ཆེན་པོ་རྒྱས་པ་དང་། གྲོག་མཁར་བ་སོགས་རིག་པའི་ཡོན་ཏན་དང་། སྤྱན་དང་མངོན་ཤེས་མངའ་བ་རྣམས་དང་། གླིང་བཞི་ལ་དབང་བའི་འཁོར་ལོས་སྒྱུར་རྒྱལ་སོགས་བསོད་ནམས་དང་གཟི་བརྗིད་ཀྱི་གྲགས་པས་ཀུན་ཏུ་ཁྱབ་ཅིང་། འབྱོར་པའི་ཁྱད་པར་དམ་པས་སྙེམས་ཤིང་དྲེགས་པ་དེ་དག་ཀྱང་མ་ངོམས་བཞིན་དུ་འཆི་འཕོ་བ་ལས་ཐར་པའི་ཐབས་མི་བསམ་སྟེ། འདུལ་བ་ལུང་ལས། དགེ་སློང་དག །འབྱོར་པ་འདི་དག་རྒུད་ཅིང་སྙིང་པོ་མེད་པ་ལ་ལྟོས། ངས་སྔོན་དྲན་པའི་འཁོར་བ་ན། ཚངས་པ་དང་། བརྒྱ་བྱིན་དང་། འཇིག་རྟེན་སྐྱོང་བ་ལ་སོགས་པའི་དབང་པོ་བསམ་གྱིས་མི་ཁྱབ་པ་མྱོང་ཡང་། མ་ངོམས་བཞིན་དུ་ཚེ་འཕོས་ཏེ་ངན་སོང་དུ་གཞོལ་བར་གྱུར་ཏོ། །ཞེས་དང་། མྱ་ངན་བསལ་བ་ཞེས་བྱ་བའི་སྤྲིང་ཡིག་ལས། རྟག་པར་འདུ་ཤེས་རྣམ་ལོག་ན། །སྲིད་རྩེ་ལས་ཀྱང་འགྲོ་བ་རྣམས། །འཆི་བའི་ཞགས་པས་དྲངས་གྱུར་པ། །ཞགས་པས་གླང་པོ་བཞིན་དུའོ། །བསམ་གཏན་ལས་སྐྱེས་བདེ་བ་མྱོང་། །ཚངས་པས་ཚངས་པའི་གནས་ལས་ཀྱང་། །མི་རྟག་ཕྱིར་ནི་ལྷུང་གྱུར་པ། །ཆུ་ཡི་ཀླུང་གི་འགྲམ་པ་བཞིན། །བརྒྱ་བྱིན་དང་ནི་སྟོང་རྣམས་ཀྱང་། །འཁོར་ལོས་སྒྱུར་བ་བརྒྱ་དག་དང་། །དུས་ཀྱི་འཆི་བར་འགྱུར་བ་ནི། །མར་མེ་འབར་བ་རླུང་གིས་བཞིན། །དྲང་སྲོང་ཆེན་པོ་ལྔ་མངོན་ཤེས། །མཁའ་ལ་རྒྱང་རིང་འགྲོ་བ་ཡང་། །གང་ན་སྤྱོད་ཡུལ་འཆི་མེད་པ། །དེར་ནི་འགྲོ་བར་ནུས་པ་མེད། །ཅེས་སོ། །གསུམ་པ་ནི། མཐོ་རིས་སྨན་ལྗོངས་ཉམས་དགར་འཁྲིགས་པ་ཡི། །སྐྱེས་བུའི་ཚེ་སྲོག་ཡིད་ལ་ཡང་ནས་ཡང་། །བརྗིད་པའི་རྔོན་པ་ལག་ན་བེ་ཅོན་ཅན། །དོན་གཉེར་གཅིག་པུ་ཉིད་ལས་གཞན་མི་སེམས། །འདི་ལྟར་མཐོ་རིས་ཀྱི་བདེ་འབྱོར་དང་། ཕུན་སུམ་ཚོགས་པ་དབྱར་ཟླ་གསུམ་ཙམ་དུ་ཉམས་དགའ་བའི་སྨན་ལྗོངས་ལྟ་བུ་ལ། རྟག་པ་རྒྱུན་གྱི་བློ་བག་ཕེབས་སུ་བསྟེན་པའི་རི་དྭགས་ལྟ་བུའི་སྐྱེ་འགྲོ་རྣམས་ཀྱི་ཚེ་སྲོག་ནི། རི་སུལ་ན་བལྟར་མི་མངོན་པ་ལྟ་བུའི་རྔོན་པ་གཤིན་རྗེའི་ཆོམ་པོ་ལག་ན་བེ་ཅོན་ཐོགས་པ་དག་གིས་སྐྱེས་པའི་ནང་པར་ནས་འཆི་བའི་རྒྱ་མིག་མངས་རིས་སུ་བྲེས་པ་ལྟ་བུ་ལ་ཐབས་དུ་མས་འཛུད་ཅིང་། དེའང་རྒྱལ་པོ་དང་། མེ་དང་། ཆོམ་རྐུན་དང་། གཅན་གཟན་དང་། མཚོན་ཆ་དང་། དུག་དང་། གཡང་ས་དང་། རིམས་ནད་དྲག་པོ་དང་། ཕུང་ཀྲོལ་དང་། བྱད་དང་། ཤ་ཟ་དང་། མཁའ་འགྲོ་དང་། གྲིབ་གནོན་ལ་སོགས་པའི་གདོན་མཐུ་བོ་ཆེ་དང་། གློ་བུར་ཡེ་འདྲོག་གི་ཕོ་ཉ་དང་། མཚོན་ཆའི་ཐབས་ལ་མཁས་པས་ཉིན་དང་མཚན་མོ་མེད་པར་སྐྱེས་བུའི་ཚེ་སྲོག་འཕྲོག་པའི་དོན་གཉེར་གཅིག་པུ་ལ་ཡིད་གཞུངས་པའི་འཚེ་བ་ཆེན་པོ་དེ་རྟག་པ་རྒྱུན་གྱི་འཁོར་ལོ་ལྟར་མི་མངོན་པར་ཡོད་པས་འཆི་བ་ལ་ནི་ཉིན་མཚན་སྐད་ཅིག་ཐང་ཅིག་གིས་ཀྱང་ཇེ་ཉེར་འགྲོ་བ་སྟེ། རྒྱལ་པོ་ལ་གདམས་པའི་མདོ་ལས་ཀྱང་། རྒྱལ་པོ་ཆེན་པོ། འདི་ལྟ་སྟེ། དཔེར་ན་རི་དྭགས་ཀྱི་རྒྱལ་པོ་སེང་གེ་རི་དྭགས་ཀྱི་ནང་དུ་ཞུགས་ནས། རི་དྭགས་བཟུང་སྟེ་ཇི་ལྟར་འདོད་པ་བཞིན་དུ་དབང་བྱེད་དོ། །རི་དྭགས་དེ་ནི་སྟོབས་པོ་ཆེའི་ཁ་མི་བཟད་པས་དབང་མེད་པར་འགྱུར་རོ། །རྒྱལ་པོ་ཆེན་པོ། དེ་བཞིན་དུ་འཆི་བདག་གི་གསལ་ཤིང་གིས་གཟུགས་ཏེ་རྒྱགས་པ་དང་ནི་བྲལ། མགོན་ནི་མེད། སྐྱབས་ནི་མེད། དཔུང་གཉེན་ནི་མེད། བཤེས་ནི་མེད། ཚིགས་ནི་འབྱེ་ཞིང་འདྲལ། ཤ་དང་ཁྲག་ནི་བསྐམས། ལུས་ནི་ནད་ཀྱིས་གདུངས། སྐོམ་ནི་སྐོམས། བཞིན་ནི་འགྱུར། རྐང་ལག་ནི་གཡོབ། ལངས་ནི་མི་ནུས། མཐུ་ནི་མེད། ཁ་ཆུ་དང་། སྣབས་དང་། གཅིན་དང་། ངན་སྐྱུགས་ཀྱིས་ལུས་ལ་གོས། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་དབང་པོ་ནི་འགག །སྐྱིགས་བུ་ནི་འབྱུང་། སྒྲ་ངར་ངར་པོ་ནི་འདོན། སྨན་པས་ནི་བོར། སྨན་དང་། ཁ་ཟས་དང་། བཟའ་བ་དང་། བཏུང་བ་ཐམས་ཅད་ཀྱིས་ནི་གླེས་ལ་བོར་ཏེ་འགྲོ་བ་གཞན་དུ་འགྲོ་བར་ཆས་པས། མལ་གྱི་ཐ་མ་ན་ནི་ཉལ། ཐོག་མ་མེད་པའི་སྐྱེ་བ་དང་། རྒ་བ་དང་། འཆི་བའི་འཁོར་བའི་རྒྱུད་དུ་ནི་ནུབ། སྲོག་ནི་ཅུང་ཟད་གཅིག་ལུས། གཤིན་རྗེ་ཡིས་ནི་འཇིགས་ཤིང་སྐྲག །བྱུར་གྱི་དབང་དུ་ནི་སོང་། དབུགས་རྒྱུ་བ་ནི་ཆད། ཁ་དང་སྣ་ནི་གདངས། སོ་ནི་གཙིགས། སྦྱིན་པ་སྦྱིན་ནོ་ཞེས་དེ་སྐད་ཅེས་གསོལ་བ་ནི་འདེབས། ལས་ཀྱི་སྲིད་པ་ནས་སྲིད་པ་ལ་ནི་འཇུག །གཅིག་པུ་གཉིས་སུ་མེད་ཅིང་གྲོགས་ནི་མེད། འཇིག་རྟེན་འདི་ནི་འདོར། འཇིག་རྟེན་ཕ་རོལ་དུ་ནི་འགྲོ། སྐྱས་ཆེན་པོ་ནི་འདེགས། མུན་པ་ཆེན་པོར་ནི་ཞུགས། གཡང་ས་ཆེན་པོར་ནི་ལྟུང་། ཁྲོད་སྟུག་པོར་ནི་ཞུགས། དགོན་པ་ཆེན་པོར་ནི་འགྲོ། རྒྱ་མཚོ་ཆེན་པོས་ནི་འཁྱེར། ལས་ཀྱི་རླུང་གིས་ནི་བདས། ས་ཚུགས་མེད་པའི་ཕྱོགས་སུ་ནི་འགྲོ། གཡུལ་ངོ་ཆེན་པོར་ནི་འཇུག །གདོན་ཆེན་པོས་ནི་འཛིན། ནམ་མཁའ་ལ་ནི་འཆེལ། ཕ་དང་། མ་དང་། ཕོ་ནུ་དང་། སྲིང་མོ་དང་། བུ་དང་། བུ་མོས་ནི་བསྐོར། དབུགས་ནི་ཆད། ནོར་བགོ་བཤའ་བྱ་ཞེས་ནི་ཟེར། ཀྱི་ཧུད་ཕ། ཀྱི་ཧུད་མ། ཀྱི་ཧུད་བུ་ཞེས་ནི་ཟེར། སྐྲ་ནི་ཞིག་སྟེ། སྦྱིན་པ་དང་། དཀའ་ཐུབ་དང་། ཆོས་འབའ་ཞིག་གྲོགས་སུ་གྱུར་པ་ན། ཆོས་མ་གཏོགས་པའི་སྐྱབས་གཞན་མེད། མགོན་གཞན་མེད། དཔུང་གཉེན་གཞན་མེད་དོ། །རྒྱལ་པོ་ཆེན་པོ་དེའི་ཚེ་དེའི་དུས་ན། ཆོས་ནི་གླིང་དང་། གནས་དང་། མགོན་དང་། སྟོན་པར་འགྱུར་རོ། །རྒྱལ་པོ་ཆེན་པོ། དེ་ལྟ་བུའི་དུས་ན། རང་ཉིད་མལ་ན་ཉལ་བཞིན་དུ། ཕྱི་མའི་སྣང་བ་ཉམས་སུ་མྱོང་སྟེ་ངན་སོང་དུ་འགྲོ་ན། དེ་གནས་ལ་འཇིགས་པའི་སྣང་བ་འབྱུང་སྟེ། དེའི་ཚེ་ཆོས་མ་ཡིན་པ་ཅི་ཞིག་ཀྱང་སྐྱབས་སུ་འགྱུར་བ་མེད་དོ། །རྒྱལ་པོ་ཆེན་པོ། ཁྱོད་ཀྱི་ལུས་འདི་ལྟར་ཡོངས་སུ་བསྲུངས། ལེགས་པར་ཡོངས་སུ་བཙས་པ་ཡང་འཆི་བའི་དུས་བྱེད་པར་འགྱུར་རོ། །རྒྱལ་པོ་ཆེན་པོ། འདི་ལྟར་ཁྱོད་ཀྱི་ལུས་བཀྲུས་ཤིང་བསྐུས་ཏེ་བདུག་པས་བདུགས། མེ་ཏོག་དྲི་ཞིམ་པས་བགོས་ཀྱང་གདོན་མི་ཟ་བར་དྲི་མི་ཞིམ་པ་འབྱུང་བར་འགྱུར་རོ། །རྒྱལ་པོ་ཆེན་པོ། འདི་ལྟར་ཀ་ཤི་ཀའི་རས་དང་། དར་ལ་སོགས་པའི་གོས་བཟང་པོས་གཡོགས་ཀྱང་ཐ་མའི་མལ་ན་འདུག་པའི་ཚེ། དྲི་མ་ཅན་གྱོན་བཞིན་དུ་འཆི་བའི་དུས་བྱེད་ཅིང་། གཅིག་པུ་སྒྲེན་མོར་འགྲོ་བར་འགྱུར་རོ། །རྒྱལ་པོ་ཆེན་པོ། འདོད་པའི་ཡོན་ཏན་སྣ་ཚོགས་པས་དགའ་བར་བྱས་ཀྱང་། དེ་ཐམས་ཅད་སྤངས་ནས་མ་ངོམས་བཞིན་དུ་འཆི་བའི་དུས་བྱེད་པར་འགྱུར་རོ། །རྒྱལ་པོ་ཆེན་པོ། འདི་ལྟར་ཁྱོད་ཁྱིམ་གྱི་ནང་ན། སྤོས་དང་། མེ་ཏོག་དང་། དར་གྱི་ལྡ་ལྡི་དང་། སྟན་དང་། གོས་སྣ་ཚོགས་པས་འབྱོར་ཞིང་། གཡས་གཡོན་དུ་སྔས་དང་བཅས་པའི་ཁྲི་ལ་ཉལ་ཡང་། བྱ་རོག་དང་། ཝ་དང་། མི་རོ་སྐྱུག་བྲོ་བ་དག་གིས་གང་བའི་དུར་ཁྲོད་ཆེན་པོར་བོར་ནས་ལུས་གཡོ་བ་མེད་ཅིང་ས་ལ་ཉལ་བར་གདོན་མི་ཟའོ། །རྒྱལ་པོ་ཆེན་པོ། འདི་ལྟར་ཁྱེད་གླང་པོ་ཆེ་དང་། རྟའི་རྒྱབ་ལ་སོགས་པར་ཞོན་ནས་རོལ་མོའི་བྱེ་བྲག་སྙན་ཅིང་ཡིད་དུ་འོང་བས་དགའ་ཞིང་། རྒྱལ་མཚན་དང་གདུགས་ལ་སོགས་པ་བསྒྲེངས་ལ། རྒྱལ་པོ་དང་། བློན་པོ་དང་། མཛའ་བཤེས་རྣམས་ཀྱིས་སྙན་པར་བརྗོད་པས་བསྟོད་ཅིང་མདུན་གྱིས་བལྟས་ཏེ་འགྲོ་ཡང་རིང་པོར་མི་ཐོགས་པ་མལ་དུ་ཤི་ནས་མི་བཞིས་བཏེག་སྟེ་ཕ་མ་དང་། ཕོ་ནུ་ལ་སོགས་པས་ལག་པ་བཏེགས་ནས་བྲང་བརྡུང་ཞིང་མྱ་ངན་གྱིས་ནོན་ཏེ་གྲོང་ཁྱེར་གྱི་ལྷོ་སྒོར་ཕྱུང་ནས་འབྲོག་དགོན་པར་སའི་འོག་ཏུ་འཇུག་གམ། བྱ་རྒོད་དང་། བྱ་རོག་དང་། ཝ་ལ་སོགས་པས་ཟོས་ཤིང་། རུས་པ་དེ་དག་མེས་བསྲེག་གམ། ཆུར་འདོར་རམ། སའི་འོག་ཏུ་བཅུག་ཀྱང་རུང་། རླུང་དང་། ཉི་མ་དང་། ཆར་གྱིས་ཕྱེ་མར་བྱས་ཏེ་ཕྱོགས་ཕྱོགས་སུ་འཐོར་ཞིང་རུལ་བར་འགྱུར་རོ། །རྒྱལ་པོ་ཆེན་པོ། དེ་ལྟར་འདུ་བྱེད་ཐམས་ཅད་མི་རྟག་པ། དེ་ལྟར་མི་བརྟན་པའོ། །ཞེས་གསུངས་པ་ལྟར་སྤྱིར་འདུས་བྱས་ཀྱི་ཆོས་མི་རྟག །སྒོས་སྐྱེས་བུའི་ཚེ་མི་རྟག །ཁྱད་པར་ལུས་སེམས་འབྲེལ་བའི་རྟེན་མི་རྟག་སྟེ། སྔོན་དར་ཞིང་རྒྱས་པའི་གྲོང་དང་། གྲོང་ཁྱེར་དང་། དགོན་གནས་རྣམས་སྟོངས་ཞིང་ཞིག་པའི་དཔེས། རང་གི་ལུས་གྲོང་དང་གྲོང་རྡལ་ལྟ་བུ། སེམས་དེ་དག་གིས་བདག་པོར་གྱུར་པ་རྟེན་དང་བརྟེན་པ་གཉིས་ཀ་མེད་པར་སོང་བའི་མཚན་ཉིད་ལེགས་པར་བསམས་ཏེ། བདག་གི་གནས་ཁང་དང་བླ་གབ་དག་ཀྱང་ཇེ་ཞིག་ན་བྱ་བྱིའི་ཚང་ཡང་མི་བཏུབ་པའི་རྨང་ལ་ཐུག་པར་འགྱུར་ཞིང་རིང་པོ་ལ་དུས་བཏབ་མི་དགོས་པར་གློ་བུར་བའི་འཆི་རྐྱེན་དྲག་པོས་འཇིག་རྟེན་འདིའི་སྣང་བ་འདི་འདོར། ཕྱི་མའི་ལམ་པོ་ཆེར་ཞུགས། མལ་གྱི་མཐའ་མར་ཉལ། ཟས་ཀྱི་རྟིང་མ་ལ་སྤྱོད། གཏམ་གྱི་རྗེས་མ་གང་གིས་བྱེད་མི་ཤེས། འཁོར་དང་། ལོངས་སྤྱོད། ཉེ་དུ་འབྲེལ་བ་ཅན་གྱི་དབུས་ནས་རང་ཉིད་གཅིག་པོར་འགྲོ་བའི་དུས་ལ་སྐྱོ་བར་བྱ་སྟེ་སློབ་དཔོན་རྟ་དབྱངས་ཀྱིས། འཆི་བ་བཟློག་པར་བྱ་བ་ཡིས། །གང་ཚེ་ཐབས་ཀུན་མེད་པས་ན། །སྤྲོ་བསྲིང་བ་དག་མི་བསྐྱེད་པར། །ཆུ་ལ་ཉ་བཞིན་ཅི་ཞིག་འགྲེ། །ས་འམ་འོན་ཏེ་མཐོ་རིས་ན། །སྐྱེས་ནས་ལ་ལ་མ་ཤི་བ། །འགའ་ཞིག་ཁྱོད་ཀྱིས་མ་མཐོང་བ། །ཐོས་སམ་འོན་ཏེ་ཐེ་ཚོམ་ཟ། །ཞེས་སོ། །བཞི་པ་ནི། དཔེ་དོན་སྣ་ཚོགས་ལ་བསམ་པ་སྟེ། མི་རྟག་པ་བག་ལ་ཉལ་མངོན་དུ་སྟོན་པའི་ཕྱིར། སོ་གའི་ཚ་བས་གདུངས་པའི་སྐྱེ་བོ་དག །སྟོན་ཟླ་གསལ་བའི་འོད་ལ་དགའ་གྱུར་ནས། །ཉིན་ཞག་བརྒྱ་ཡིས་རང་གི་ཚེ་ཐལ་བའི། །གནས་ལ་སེམས་ནས་སྐྲག་པར་གྱུར་པ་མེད། །ཅེས་པས། འདི་ལྟར་སྐྱེ་བོ་ཕལ་མོ་ཆེ་ནི་མ་བརྟགས་པ་དང་། བབ་ཅོལ་ལ་གོམས་པ་ཡིན་པས་རང་བཞིན་དུ་འཆི་མི་འཆིའི་རྣམ་པར་རྟོག་པ་གང་ཡང་མེད་པའི་ངང་ལ་ཐུག་ཕྲད་དུ་འཆི་སྟེ། ཆེད་དུ་བརྗོད་པའི་ཚོམས་ལས། མངལ་དུ་དང་པོ་འཇུག་པའི་མི། །དེ་ནི་བསྣོན་མེད་གོད་འགྱུར་ཞིང་། །སོང་བ་ལས་ཀྱང་ལྡོག་པ་མེད། །སྔ་དྲོ་སྐྱེ་བོ་མང་མཐོང་བ། །ཕྱི་དྲོ་ཁ་ཅིག་མཐོང་མི་འགྱུར། །ཞེས་སོ། །གལ་ཏེ་རྐྱེན་སྣ་ཚོགས་པའི་སྟེས་དབང་ལས། མཐར་གྱིས་འཆི་བའི་ཆོས་ཉིད་ལ་ངེས་པ་བརྟན་པར་རློམ་པ་དག་ཀྱང་སྐྱེས་པའི་ནང་པར་ནས་ལས་ཀྱི་གཞན་དབང་གིས་འཕངས་པའི་ཚེའི་ཚད་ཇི་སྙེད་ཡོད་པ་དེ་ལ་བསྣོན་པ་ནི་ཅུང་ཟད་ཀྱང་མེད་ལ། གློ་བུར་གྱིས་འགྲིབ་པའི་རྐྱེན་ནི་ཤིན་ཏུ་མང་སྟེ་ཚེ་རིང་བའི་མི་མཐུན་ཕྱོགས་སྲོག་གཅོད་པ་སོགས་བསོད་ནམས་མ་ཡིན་པ་ལ་སྤྲོ་ཞིང་འཇུག་པ་མང་བའི་ཕྱིར། ཚེའི་ཚད་དེ་སྙེད་ཀྱང་ས་ཚུགས་མེད་པར་འགྲོ་བའི་དཔེ་ནི་འདི་ལྟར་ཐི་བ་བྱ་ལམ་ལ་འགྲོ་བའམ། རི་གཟར་གྱི་འབབ་ཆུ་དྲག་པོ་ལྟར་སྐད་ཅིག་གམ། ཐང་ཅིག་གམ། ཡུད་ཙམ་ཡང་མི་སྡོད་པའི་གནས་སྐབས་ལ་རྣམ་པར་ཤེས་པ་ལྐོག་ཏུ་གྱུར་པས་སོ་གའི་དུས་ཀྱི་ཉི་མའི་གདུང་བ་ཅུང་ཟད་ཀྱིས་ནི་སུན། སྟོན་བསིལ་དྲོད་སྙོམས་པའི་དུས་ལ་ཡིད་སྨོན་དང་རིངས་བར་བྱེད་པ་དེ་དག་གིས་ནི་དེའི་བར་ལ་ཉིན་ཞག་བརྒྱས་རང་གི་ཚེ་བསྟུངས་པ་མ་རིག་པ་ཡིན་ཏེ། མི་རྟག་པའི་གཏམ་ལས། སོ་ཀ་ཟླ་བ་བསིལ་བས་མཚོན་པའི་སྟོན་དུས་འདི་འབྱུང་ཞེས། །རབ་ཏུ་དགར་འགྱུར་སྐྱེ་བོ་ཐམས་ཅད་བདག་གི་ཚེ། །ཟད་པར་འགྱུར་ཞེས་ཤིན་ཏུ་མི་དགར་གྱུར་པ་མེད། །ཅེས་སོ། །དེ་བཞིན་དུ་གཞན་ཤི་བ་ལ་མྱ་ངན་བྱེད། རང་གི་མདུན་དུ་འཆི་བདག་གནས་པ་ལ་ཅང་མི་སེམས་པས་གཏན་དུ་སྡོད་པའི་ཕྱི་ཚེས་རྒྱ་ཆེན་པོས་གཡུལ་འགྱེད་པ་དང་། ཡུལ་གསར་འཛིན་པ་དང་། ཕྲུ་སར་སློག་པ་དང་། མཁར་ལས་རྒྱ་ཆེན་པོ་དང་། བུང་བ་ལྟ་བུར་གསོག་རུམ་འབའ་ཞིག་གིས་ལུས་ངག་ཡིད་གསུམ་གདུང་བར་བྱེད་པ་ནི་རིགས་པ་མིན་པའི་མྱ་ངན་ཏེ། མི་རྟག་པའི་གཏམ་ལས། ལས་ཀྱི་ལམ་ཞུགས་ཐོབ་པ་ཡིས། །བསྣོན་པ་མེད་པའི་སྐྱེ་བོ་གང་། །ཉེས་པ་མེད་པར་སོང་གྱུར་པ། །དེ་ལ་ཅི་ཞིག་ཡོངས་སུ་གདུང་། །ཅིས་ཏེ་དེ་ཉིད་འཆི་བར་འགྱུར། །གཞན་ནི་སུ་ཡང་མིན་ན་ཀོ། །འདི་ནི་བྱུར་ཆེན་ནོན་པ་ཞེས། །ཆོ་ངེ་ཆེན་པོ་གདབ་པར་རིགས། །འདི་ལྟར་ཐམས་ཅད་སྐྱེ་བ་ཡི། །མདུན་ན་གནས་པ་འཆི་བ་སྟེ། །ཀུན་ཀྱང་འཕོ་བ་སྣང་བའི་ཕྱིར། །མྱ་ངན་བྱ་བར་འོས་མ་ཡིན། །ཞེས་སོ། །དེ་ཕྱིར་གཞན་འཇིག་རྟེན་ཕ་རོལ་ཏུ་སོང་བའི་སྣང་ཚུལ་མཐོང་ཀྱིན་བསམ་བརླག་ཉིད་དུ་མི་བསྡད་པར་རང་ཉིད་འཆི་ཆོས་བྱེད་དགོས། ས་གསུམ་པའི་བྱང་ཆུབ་སེམས་དཔའ་ཡང་མི་རྟག་པ་བསྒོམ་པར་གསུངས་ན། སོ་སོ་སྐྱེ་བོས་མི་རྟག་པའི་གཏམ་གོ་བ་ཙམ་གྱིས་མི་ཕན། ཐ་ན་ས་ཀུ་ཙི་ཤི་བའི་རོ་ལའང་གཞིག་འབྲེལ་ཆེན་པོ་བཏང་ནས། འདི་ཡང་སྐྱེ་བ་ཡོད་པས་ཤི་བ་ཡིན། བདག་ཀྱང་སྐྱེས་ཚར་ནས་འཆི་བ་ལས་འོས་ཅི་ཡོད། འཆི་ན་དམ་པའི་ཆོས་མིན་པ་གང་གིས་ཀྱང་མི་ཕན་སྙམ་པའི་ཤེས་པ་ཙབ་ལིང་ངེ་བ་ཞིག་རྟག་པ་རྒྱུན་དུ་དགོས། དེ་ལྟ་བུའི་མི་རྟག་པ་བཅོས་མིན་རེ་རྒྱུད་ལ་སྐྱེས་ཙ་ན་ཚེ་འདིའི་བདེ་སྐྱིད་སྙན་གྲགས་གང་ལའང་ཅང་མི་སེམས་པ་ཞིག་འོང་སྟེ་དྲན་པ་ཉེར་གཞག་ལས། བསྒོམ་པའི་འདུ་ཤེས་ཐམས་ཅད་ཀྱི་ནང་ནས་མི་རྟག་པ་བསྒོམ་པ་ཁོ་ན་མཆོག་ཡིན་ནོ། །ཞེས་གསུངས་སོ། །ཡང་འདི་ལྟར་ཚེ་འགྲོ་བའི་དལ་མྱུར་གྱི་དཔེ་སྟོན་ཕྱིར། སྐྱེས་བུའི་རྩོལ་བས་བྱས་ལ་ཉག་ཕྲན་མྱུར། །དེ་བས་ས་ལ་རྒྱུ་བའི་ཡི་དྭགས་ཏེ། །དེ་བས་མཁར་རྒྱུ་དེ་བས་ཉི་ཟླ་ལྷ། །ཀུན་ལས་མགྱོགས་པ་མི་ཡི་ཚེ་འགྲོ་ཡིན། །འདི་ལྟར་གྱད་སྟོབས་པོ་ཆེ་བཞི་རྒྱབ་སྤྲད་ནས་རང་རང་གི་གདོང་དུ་མདའ་རེ་འཕངས་པ་དེ་མགྱོགས་པའི་མཐར་ཐུག་པ་གཅིག་གིས་བར་སྣང་ནས་དུས་གཅིག་ཏུ་ལོངས་ནས་ས་ལ་མ་རེག་པར་བྱས་པ་དེ་བས་ཀྱང་ས་ལ་རྒྱུ་བའི་ཡི་དྭགས་མགྱོགས། དེ་བས་ཀྱང་ནམ་མཁའ་ལ་རྒྱུ་བའི་ཡི་དྭགས་མགྱོགས། དེ་བས་ཀྱང་ཉི་མ་དང་ཟླ་བའི་རླུང་གི་ཤིང་རྟ་མགྱོགས། དེ་བས་ཀྱང་ཤིན་ཏུ་མྱུར་བའི་ལྷ་མགྱོགས། དེ་ཀུན་ལས་ཀྱང་སྐྱེས་བུའི་ཚེ་འགྲོ་བ་མགྱོགས་པའི་ཕྱིར་ད་གདོད་མ་ཡིན་པར་སེམས་ཅན་ཐམས་ཅད་འཆི་བདག་གི་ཁ་རུ་ཚུད་པ་ཞེས་བྱ་སྟེ། ཆེད་དུ་བརྗོད་པའི་གཏམ་ལས། ཇི་ལྟར་ཆུ་སྲིན་ཁ་རུ་རྒྱ་མཚོའི་གཟིངས་རྒྱུག་བཞིན་དུ་མི་འདོད་ཀྱང་། །རྨོངས་པ་བདག་འདྲ་ལས་ཀྱི་དབང་གིས་འཆི་བདག་ཁ་རུ་རིངས་པར་རྒྱུག །སྙིང་རྗེ་མེད་པའི་འཆི་བདག་བདུད་ཀྱིས་འགྲོ་བ་གཞན་ཡང་དེ་བཞིན་མིད། །ཅེས་དང་། ཤཱནྟ་དེ་ཝས། ཚེ་ནི་སྐད་ཅིག་བསླུ་བ་སྟེ། །ལུས་ནི་ཐང་ཅིག་བརྙན་པོ་བཞིན། །ཞེས་གསུངས་པས་དུས་ཀྱི་ཚེ་ཚད་ལ་སོགས་པའི་ཁོང་དུ་ཆུད་ཀྱང་ལ་ལའི་ཚེ་སུམ་གཉིས་ཟད། ལ་ལའི་སྒང་། ལ་ལའི་ལྷག་མ་ཅུང་ཟད་ལས་མེད་པ་ལ་ལེགས་པར་བསམས་ནས་དགྲ་གཉེན་དང་ཕྱོགས་རིས་ལ་མི་རྟག་པར་བསྒོམས་ཏེ། གཅིག་ལ་གཅིག་མི་གཤེ། མི་འཛིངས། ངན་མི་སྨྲ། ཐ་ན་འགྲུལ་ལམ་ཅུང་ཟད་དུ་བསྡོང་ཡང་རིང་པོ་མི་ཐོགས་པར་བྲལ་ནས་ལ་ལ་ཤི། ལ་ལ་སོང་། ལ་ལ་འདུ། ལ་ལ་འབྲལ། ཤི་བ་དེ་དག་ཀྱང་ལ་ལ་མཐོ་རིས་སུ་འགྲོ། ལ་ལ་ངན་སོང་དུ་འགྲོ། གསོན་པ་དག་ཀྱང་ཡང་ན་རང་ཉིད་སྔོན། ཡང་ན་རྟིང་ནས་འཆི། མཛའ་བ་རྣམས་ཀྱང་སྡོད་དབང་མེད། མི་མཛའ་བ་ཡོད་ཀྱང་མྱུར་དུ་འབྲལ། བདག་ཉིད་ཀྱང་མེད་པར་འགྱུར་ཞིང་། སླད་ཀྱིས་ཚོགས་པར་མི་འགྱུར། ཚོགས་སྲིད་ནའང་དགྲ་གཉེན་གྱི་འདུ་ཤེས་དེ་དང་དེར་མི་གནས། དེ་བཞིན་དུ་བསགས་པའི་ནོར་རྫས་གཞན་ལྟ་ཅི་ཉེ་བར་སྤྱད་པའི་ཕྲེང་བ་དང་། ཞལ་སྐྱོགས་ཚུན་ཆད་ཀྱིས་ཀྱང་བདག་ཉིད་འདོར། བདག་གིས་དེ་ཉིད་འདོར་བའི་ཚུལ་ལ་བསམས་ཏེ། གང་ཞིག་གཞན་ལ་བྱིན་པ་ནི་བདག་གིའོ། །གང་ཞིག་བདག་ལ་ཡོད་པ་ནི་གཞན་གྱིའོ། །ཞེས་པ་ལ་དམིགས་ནས་རང་དབང་ཡོད་དུས་སྤྱད་པའི་དགེ་བ་ནི་བསམ་སྦྱོར་ཐམས་ཅད་བདག་ལ་རག་ལས་པའི་ཕྱིར་ཕྱི་བཞིན་དུ་འབྲང་ལ། ཤི་ནས་གཞན་གྱིས་བསྔོས་པའམ། ཁ་ཆེམས་ལ་སོགས་པའི་ལུགས་བཞིན་བསྒྲུབས་ཀྱང་ཅུང་ཟད་ཕན་པ་ཆུང་ལ། རྣམ་པ་གཞན་དུ་རང་གི་རྫས་ལ་གཞན་གྱིས་བགོ་བས་སྡིག་པའི་རྩ་བ་ཆེན་པོར་ཡང་འགྱུར་སྲིད་པས། ཚེ་ནི་འགྲོ་བའི་ཆོས་ཅན། འབྱོར་པ་རྒུད་པའི་ཆོས་ཅན། ལང་ཚོ་མི་རྟག་པའི་ཆོས་ཅན། གཉེན་གྲོགས་འབྲལ་བའི་ཆོས་ཅན་ལ་ཡིད་བརྟན་མེད་པའི་སྐྱོ་ཤས་བསྐྱེད་པར་བྱའོ། །ཁྱད་པར་འཁོར་བ་འཇིག་པའི་འཁྲུལ་འཁོར་ཆེན་པོ་བཞི་སྟོན་པ་ནི། དར་ལ་བབས་པ་རྒ་བའི་ཆད་པས་འཚེ། །འདུ་བ་རྣལ་མར་གནས་པ་ན་བས་དཀྲུག །ཕུན་ཚོགས་རྟེན་ཅིང་འབྲེལ་འབྱུང་རྒུད་པས་འཇོམས། །འཆི་བས་སྲོག་ལ་རྒོལ་བ་མྱུར་པོར་འོང་། །ཞེས་འདོམས་ཏེ། འཇིག་རྟེན་མ་རུངས་པར་བྱེད་པ་བཞི་པོ་འདི་ནི་ཀུན་དང་མཉམ་པར་འགྲོགས་ཀྱང་མ་རིག་པའི་གཞན་དབང་གིས་གནོད་བྱེད་འདི་ལས་ཐར་པའི་ཐབས་དམ་པའི་ཆོས་མི་བསམ་པའི་ནོངས་པ་ནི་སྐྱེས་པ་རབས་ཀྱི་རྒྱུད་ལས་ཀྱང་དགེ་སྦྱོང་དང་བྲམ་ཟེ་མཁས་པའི་ཚོགས་ཇི་སྙེད་ལ་ཉམས་སད་པ་བཞིན་ནོ། །འདི་ནི་རྒྱལ་པོ་ལ་གདམས་པའི་མདོ་ཉིད་ཀྱིས་གསལ་པོར་སྟོན་ཏེ། རྒྱལ་པོ་ཆེན་པོ། འདི་ལྟ་སྟེ་དཔེར་ན། ཕྱོགས་བཞི་ནས་རི་ཆེན་པོ་སྲ་བ། བརྟན་པ་སྙིང་པོ་དང་ལྡན་པ། མ་ཞིག་པ་མ་གས་པ་ཤིན་ཏུ་མཁྲེགས་པ། འཕན་མེད་པ། ལྷུན་སྟུག་པ་བཞི་གནམ་ལ་རེག་ཅིང་ས་ལ་ལྡོག་སྟེ་རྩ་དང་ཤིང་དང་། ཤིང་གེལ་པ་དང་། ཡལ་ག་དང་ལོ་མ་ཐམས་ཅད་དང་སྲོག་ཆགས་འབྱུང་པོ་ཐམས་ཅད་ཕྱེ་མར་འཐག་ཅིང་འོང་བ་ལ་ནི། མགྱོགས་པས་འབྲོས་པའམ། སྟོབས་ཀྱིས་བཟློག་པའམ། ནོར་གྱིས་བསླུ་བའམ། རྫས་དང་སྔགས་དང་སྨན་རྣམས་ཀྱིས་བཟློག་པར་སླ་བ་མ་ཡིན་ནོ། །རྒྱལ་པོ་ཆེན་པོ། དེ་བཞིན་དུ་འཇིགས་པ་ཆེན་པོ་བཞི་འདི་དག་འོང་སྟེ། བཞི་གང་ཞེ་ན། རྒ་བ་དང་། ན་བ་དང་། འཆི་བ་དང་། རྒུད་པའོ། །རྒྱལ་པོ་ཆེན་པོ། རྒ་བས་ནི་དར་ལ་བབས་པ་འཇོམས་ཤིང་འོང་ངོ་། །ན་བས་ནི་ནད་མེད་པ་འཇོམས་ཤིང་འོང་ངོ་། །རྒུད་པས་ནི་ཕུན་སུམ་ཚོགས་པ་ཐམས་ཅད་འཇོམས་ཤིང་འོང་ངོ་། །འཆི་བས་ནི་སྲོག་འཇོམས་ཤིང་འོང་སྟེ། དེ་དག་ལས་ནི་མགྱོགས་པས་འབྲོས་པའམ། སྟོབས་ཀྱིས་བཟློག་པའམ། ནོར་གྱིས་བསླུ་བའམ། རྫས་དང་སྔགས་དང་། སྨན་རྣམས་ཀྱིས་ཞི་བར་བྱ་བ་སླ་བ་མ་ཡིན་ནོ། །ཅེས་དང་། དེ་སྐད་དུ་ལི་ཙ་བཱི་དྲི་མེད་གྲགས་པས་ཀྱང་གྲོགས་པོ་དག་ལུས་འདི་ནི་འདི་ལྟར་མི་རྟག་པ། འདི་ལྟར་མི་བརྟན་པ། འདི་ལྟར་ཡིད་བརྟན་དུ་མི་རུང་བ། འདི་ལྟར་ཉམ་ཆུང་བ། འདི་ལྟར་སྙིང་པོ་མེད་པ། འདི་ལྟར་ཞིག་པ། འདི་ལྟར་ཡུན་ཐུང་བ། འདི་ལྟར་སྡུག་བསྔལ་བ། འདི་ལྟར་ནད་མང་བ། འདི་ལྟར་འགྱུར་བའི་ཆོས་ཅན་ནོ། །གྲོགས་པོ་དག་འདི་ལྟར་ལུས་འདི་ནི་ནད་མང་པོའི་སྣོད་དེ། མཁས་པས་དེ་ལ་གནས་པར་མི་བྱའོ། །གྲོགས་པོ་དག་ལུས་འདི་ནི་ཅང་མི་བཟོད་པ་སྟེ། དབུ་བ་རྡོས་པ་ལྟ་བུའོ། །ལུས་འདི་ནི་རིང་དུ་མི་གནས་པ་སྟེ། ཆུའི་ཆུ་བུར་ལྟ་བུའོ། །ལུས་འདི་ནི་ཉོན་མོངས་པའི་སྲིད་པ་ལས་བྱུང་བ་སྟེ། སྨིག་རྒྱུ་ལྟ་བུའོ། །ལུས་འདི་ནི་སྙིང་པོ་མེད་པ་སྟེ། ཆུ་ཤིང་གི་སྡོང་པོ་ལྟ་བུའོ། །ཞེས་སོ། །དེ་ནས་ལུས་སེམས་ཚོགས་པ་འབྲལ་བའི་མཚན་ཉིད་གསལ་པོར་བསྟན་ནས་སྐྱོ་བ་བསྐུལ་བ་ནི། གང་ཚེ་གཤིན་རྗེའི་གཡུལ་ངོར་ཕམ་པ་དེ། །སྐྱབས་དང་དཔུང་གཉེན་བྲལ་བའི་གཡང་སར་རྒྱུག །འཚོ་བའི་མདངས་དང་དབང་པོས་རྣམ་པར་སྤང་། །སྨན་དང་སྨན་པ་དག་ཀྱང་དེ་ལ་འབྲོས། །བསྐྱོད་ལ་ངལ་བ་ཐོབ་པའི་ཡན་ལག་དང་། །དབུགས་ནི་དབང་མེད་མཐུ་ཡིས་གཡོབ་ཅིང་ངར། །ཉེ་དུ་འབྲེལ་པས་བསྐོར་ཞིང་གདུང་ནའང་། །བཤོལ་འདེབས་ལྕགས་ཀྱུའི་བརྟན་པ་བྲལ་བར་འགྱུར། །དེ་ཡི་དབུགས་ཀྱི་འགྱུ་བ་རྟ་རྔའི་ལྕེ། །འཆི་བདག་དགྲ་སྟྭ་རྣོན་པོས་བཀས་གྱུར་པས། །མཛེས་པ་སྤངས་པའི་སོ་ཞོ་ངོམ་བཞིན་དུ། །ལས་དབང་སྲིད་པའི་མུན་ནག་སྟུག་པོར་འཇུག །ཀྱེ་མ་འདུ་བྱེད་ཀྱི་ཕུང་པོ་གཤིན་རྗེའི་གཡུལ་ངོ་ལ་ཕམ་པ་དེ་ནི། རྒྱ་གར་ན་གདོལ་པས་མ་ཧེ་གསོད་པའི་ཚེ་གྲོགས་པོ་ཕུག་སྡུགས་སུ་འཛུད་པ་ལྟར་འཆོར་ས་ནི་མེད། མཐུ་སྟོབས་ཀྱི་དབང་ཕྱུག་ལག་ན་རྡོ་རྗེས་ཀྱང་སྐྱབས་དང་དཔུང་གཉེན་ནི་མི་ནུས། རྟག་ཏུ་སྲི་ཞུས་བསྙེན་བཀུར་བའི་ལང་ཚོའི་མཛེས་པ་ནི་སད་ཀྱིས་བཏབ་པའི་མེ་ཏོག་བཞིན་དུ་ཉམས། འབྱུང་བའི་སྡུད་རིམ་གྱིས་དབང་པོ་ལྔའི་བྱེད་ལས་ནི་རླུང་ནང་གི་མར་མེ་བཞིན་དུ་གསད། གནད་འཆད་པའི་ཟུག་རྔུ་ལ་སྨན་གྱིས་བཅོས་སུ་མེད་པས་འཚོ་བྱེད་གཞོན་ནུས་གསོས་མདུན་ན་ཡོད་ཀྱང་མིག་རིག་རིག་པོར་བལྟ་ཞིང་འབྲོས་པ་ལ་རིངས། འདེགས་བྱེད་ཀྱི་རླུང་ཉམས་པས་ཟུངས་ཀྱིས་ཡན་ལག་ཀྱང་མི་ཐེག །རླུང་གི་གནས་མལ་འཕྱུགས་པས་དབུགས་ནི་འབྱུང་བ་འབའ་ཞིག་ལ་བརྩོན། ཉེ་དུ་དང་འབྲེལ་པ་ཅན་གྱིས་མཐའ་ནས་བསྐོར་ཞིང་གདུང་བ་བརྒྱ་ཕྲག་གི་དབུགས་ཕྱུང་ཡང་བཤོལ་ནི་མི་ཐེབས། བརྩེགས་ཤིང་བརྩེག་པའི་དབུགས་ཇེ་ཕྲར་གྱུར་པ་དེའང་སྙིང་རྗེ་མེད་པའི་འཆི་བདག་གིས་དགྲ་སྟྭ་སྤུ་གྲིའི་རྣོ་དབལ་ཅན་གྱིས་བཀས་པའི་མོད་ལ་ཤ་ཟའི་གདོང་པ་ཤིན་ཏུ་མི་སྡུག་པ་ལས་ཀྱང་ཡིད་དུ་མི་འོང་བའི་སོ་ཞོ་ནི་དངོམ། བདེ་འགྲོའི་འཇིག་རྟེན་རྙེད་པར་དཀའ་བ་ལས་ཉམ་ཉེས་པ་ནི་འདི་འདྲ་བའོ། །ཞེས་པའི་ངང་ཚུལ་མཆི་མའི་རྦ་རླབས་ཀྱིས་སྟོན་བཞིན་པར་འཇིག་རྟེན་ཕ་རོལ་ཏུ་འགྲོ་བའི་གནས་སྐབས་བཟོད་པར་དཀའ་བ་འདི་ཡང་ནས་ཡང་། རྣམ་པ་ནས་རྣམ་པ་ཐམས་ཅད་དུ་བསམ་པར་བྱེད་པ་དེས་ནི། དང་པོར་ཆོས་ལ་འཇུག་པའི་རྒྱུ་བྱེད། བར་དུ་ཆོས་ཉམས་སུ་ལེན་པའི་རྐྱེན་བྱེད། ཐ་མར་འཆི་བ་འོད་གསལ་ཉམས་སུ་མྱོང་བའི་གྲོགས་བྱེད་དེ་སྔོན་རྒྱལ་པོའི་ཁབ་ན་ཁྱིམ་བདག་དཔལ་སྐྱེས་ཞེས་བྱ་བ་ལོ་བརྒྱ་ལོན་པ་ཞིག་འཁོར་བ་ལ་སྐྱོ་ནས་བཅོམ་ལྡན་འདས་ལ་རབ་ཏུ་འབྱུང་བར་ཞུས་པས་གནང་སྟེ། མཽངྒལ་གྱི་བུས་དེ་རབ་ཏུ་བྱུང་བས་སྡེ་སྣོད་གསུམ་ཤེས་པ་ཞིག་བྱུང་ངོ་། །དེ་ཧ་ཅང་རྒས་པས་མི་རྟག་པའི་ཆོས་ལ་སྐྱོ་ནས་ཆུ་ལ་མཆོངས་པ་ལས། མཽངྒལ་གྱི་བུས་ཁྲིད་དེ་ཆོས་བསྟན་པས་དགྲ་བཅོམ་པ་ཐོབ་པ་ལྟ་བུའོ། །དེ་ཕྱིར་བཅོམ་ལྡན་འདས་ཀྱིས། མི་རྟག་པ་མང་དུ་བསྒོམས་ན། སངས་རྒྱས་ཐམས་ཅད་ལ་མཆོད་པ་བྱས་པ་ཡིན་ནོ། །མི་རྟག་པ་མང་དུ་བསྒོམས་ན་སངས་རྒྱས་ཐམས་ཅད་ཀྱིས་དབུགས་ཕྱུང་བ་ཡིན་ནོ། །མི་རྟག་པ་མང་དུ་བསྒོམས་ན་སངས་རྒྱས་ཐམས་ཅད་ཀྱི་ལུང་སྟོན་པ་ཡིན་ནོ། །མི་རྟག་པ་མང་དུ་བསྒོམས་ན་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་ཡིན་ནོ། །དཔེར་ན་རྗེས་རྣམས་ཀྱི་ནང་ནས་གླང་པོ་ཆེའི་རྗེས་མཆོག་ཡིན་ནོ། །དེ་བཞིན་དུ་ནང་པ་སངས་རྒྱས་པའི་སྒོམ་པའི་འདུ་ཤེས་ཐམས་ཅད་ཀྱི་ནང་ནས་མི་རྟག་པ་སྒོམ་པའི་འདུ་ཤེས་ཁོ་ན་མཆོག་ཡིན་ནོ། །ཞེས་གསུངས་པས། བྱང་ཆུབ་སེམས་དཔའ་གཞན་དོན་ལ་ཞུགས་པ་རྣམས་ཀྱིས་ཀྱང་རྗེས་ལ་ཐོབ་པའི་ལམ་ལ་འདུན་པ་འདི་བསྟེན་པ་ཡིན་ན། སོ་སོ་སྐྱེ་བོའི་ལམ་གྱི་སྤྱོད་ཡུལ་ཐམས་ཅད་མི་རྟག་པའི་ཆོས་དང་བསྲེ་བ་ཡིན་ཏེ། ལས་བརྒྱ་པ་ལས། རྟག་ཏུ་སྤྱོད་ཡུལ་ཐམས་ཅད་དུ། །འཆི་བདག་རྗེས་སུ་དྲན་པར་བྱ། །ཞེས་དང་། སྤྱོད་འཇུག་ལས། ཉིན་མཚན་ཀུན་ཏུ་བདག་གིས་ནི། །འདི་ཉིད་འབའ་ཞིག་བསམ་པར་རིགས། །ཞེས་གསུངས་པ་ལྟར། སྤྱིར་ལུས་སེམས་ཀྱི་ཚོགས་པ་མི་རྟག་པས་གཡར་པོ་ལ་བདག་ཏུ་མི་འཛིན། འགྲོ་ན་ལམ་མི་རྟག་པས་གོམ་པ་ཆོས་ཕྱོགས་སུ་འདོར། འདུག་ན་གནས་མི་རྟག་པས་དག་པའི་ཞིང་ཁམས་ཡིད་ལ་བྱ། བཟའ་བཏུང་དང་ལོངས་སྤྱོད་མི་རྟག་པས་ཏིང་ངེ་འཛིན་ཟས་སུ་བཟའ། ཉལ་ན་གཉིད་མི་རྟག་པས་འཁྲུལ་པ་འོད་གསལ་དུ་སྦྱང་། འབྱོར་ན་ནོར་མི་རྟག་པས་འཕགས་པའི་ནོར་བདུན་དང་བསྙེན། གཉེན་གྲོགས་དང་སྲིད་སྡེ་མི་རྟག་པས་དབེན་པར་ངེས་འབྱུང་ལ་བསྐུལ། ཆེ་བཙན་དང་སྙན་གྲགས་མི་རྟག་པས་རྟག་ཏུ་དམའ་ས་བཟུང་། སྨྲ་བའི་ཚིག་མི་རྟག་པས་བཟླས་བརྗོད་དང་ཁ་ཏོན་ལ་བསྐུལ། དད་པ་དང་ངེས་འབྱུང་མི་རྟག་པས་དམ་བཅའ་བརྟན་པ་ལ་བརྩོན། འདུ་ཤེས་དང་རྣམ་རྟོག་མི་རྟག་པས་མི་གཞི་བཟང་པོ་ལ་བསླབ། ཉམས་དང་རྟོག་པ་མི་རྟག་པས་ཆོས་ཉིད་ཟད་ས་ལ་སྐྱོལ། དེ་ལྟར་གོམས་པས་ཞེན་པ་ལོག་པའི་ཚད་ནི། རྒྱ་མཚོར་གཟིངས་ཞིག་པ་ལྟ་བུའམ། ཆུ་བོར་གྲུ་བྱིང་བ་ལྟ་བུའམ། རླབས་ཀྱིས་རྐྱལ་མནན་པ་ལྟ་བུའམ། འཇིགས་སར་སྐྱེལ་མས་བསླུས་པ་ལྟ་བུའམ། དུག་སྦྲུལ་གྱི་ཚང་དུ་ཚུད་པ་ལྟ་བུའམ། སྙིང་ལ་མདས་ཟིན་པ་ལྟ་བུའམ། ནག་ཅན་གཤེད་མའི་ལག་ཏུ་གཏད་པ་ལྟ་བུའམ། རི་དྭགས་མཐའ་ལ་གཅུར་བ་ལྟ་བུའམ། ཉ་ཆེན་རྒྱ་ལ་ཟིན་པ་ལྟ་བུའམ། མི་རྒོད་དང་གདོང་ཐུག་ཕྲད་པ་ལྟ་བུའམ། ཆུ་སྲིན་གྱི་གྲེ་བར་ཚུད་པ་ལྟ་བུའམ། སྲིན་མོའི་གླིང་དུ་ཚུད་པ་ལྟར་འཁོར་བའི་ཆོས་ལ་ཡིད་འབྱུང་གཏིང་ནས་སྐྱེས་པའི་ཚེ། རྟག་འཛིན་གྱི་བློ་ལས་ལོག །དགྲ་གཉེན་གྱི་ཕྱོགས་རིས་འཇིག །རྣམ་གཡེང་གི་ཐག་པ་ཆད། བརྩོན་འགྲུས་ཤུགས་ལ་འབྱུང་། ཅི་བྱས་ཆོས་སུ་འགྲོ། ཚོགས་གཉིས་གོང་དུ་འཕེལ། སྔོན་མེད་པའི་ཡོན་ཏན་སྐྱེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཀྱང་རྟག་ཏུ་དགོངས། ཡོན་རྣམས་ཀྱི་ནང་ནས་ཀྱང་མཆོག་ཏུ་གྱུར་པ་ཡིན་ཏེ། འདུལ་བ་ལུང་ལས། དགེ་སློང་བརྒྱ་ལ་གདུགས་ཚོད་ཡོན་དང་བཅས་པ་བྱིན་པ་བས། འདུས་བྱས་མི་རྟག་པར་སེམས་པའི་སྐད་ཅིག་མ་མཆོག་གོ །ཞེས་གསུངས་ལ། མདོར་ན་ཟང་ཟིང་གི་ནོར་དང་། སྡོམ་པའི་ཚུལ་ཁྲིམས་དང་། ལུང་གི་ཡོན་ཏན་དང་། བསྐྱེད་རྫོགས་ཀྱི་རྣལ་འབྱོར་ཐམས་ཅད་བར་མ་དོར་ཆུད་འཛའ་བའི་རྒྱུའང་མི་རྟག་པ་རྒྱུད་ལས་མ་སྐྱེས་པ་ལས་ཡིན་ཏེ། བདོག་པ་ལ་ཆོག་ཤེས་མེད་པས་བརྐམ་ཆགས་བསོད་ནམས་སུ་མི་འགྱུར། ངེས་འབྱུང་གི་དམ་ལ་མ་བཞག་པས་སོ་ཐར་མཚན་ཉིད་པ་ལས་ཉམས་འདིར་སྣང་ཆགས་སྡང་གིས་བསླུས་པས་ཐོས་བསམ་བདུད་ལས་སུ་སོང་། གྲོང་འཁྱམ་འདྲེ་འདུལ་ལ་ཞེན་པས་མཆོག་གི་དངོས་གྲུབ་ལ་བསྒྲིབ་པ་སྟེ། དེའི་ཕྱིར་འདུ་ཤེས་རྣམས་ཀྱི་ནང་ནས་མཆོག་ཏུ་གྱུར་པ་མི་རྟག་པ་སྒོམ་པ་འདི་ནི་མངོན་མཐོ་དང་ངེས་ལེགས་ཀྱི་ལམ་ལ་འགྲོ་བའི་ཅང་ཤེས་ཀྱི་སྲབ་མདའ་ལྟ་བུར་ངེས་ཤེས་བསྐྱེད་པར་བྱའོ། །ཡོན་ཏན་རིན་པོ་ཆེའི་མཛོད་ལས། མི་རྟག་པའི་ཚོམས་ཏེ་རབ་བྱེད་གཉིས་པའི་འགྲེལ་པའོ།། །།སྤྱི་དོན་གསུམ་པ་རྒྱུ་འབྲས་ཀྱི་རྣམ་པར་བཞག་པ་ནི། དེ་ལྟར་འཇིག་རྟེན་ཕ་རོལ་སོན་པ་རྣམས། །གོ་འཕང་གང་གི་ཐ་གུས་འདོགས་པའི་ཚུལ། །དགེ་སྤྱད་སྡིག་གོམས་ཁོ་ནས་ཉེ་བར་ལེན། །ཀུན་རྫོབ་བདེན་པ་བསླུ་བ་མེད་པ་ཡིན། །གང་ཞིག་འཇིག་རྟེན་ཕྱི་མའི་གནས་སུ་སོན་པར་གྱུར་པ་དེ་ནི་ལོག་པར་ལྟ་བ་འཛིན་པ་བཞིན་དུ་གཏན་མེད་པའམ། སྟེས་དབང་གི་གནས་རིས་མཐོ་དམར་འགྲོ་བ་མ་ཡིན་པར། ཕྱི་མའི་སྲིད་པ་མཐོ་དམའ་རྒྱུ་འབྲས་མི་བསླུ་བའི་རྗེས་སུ་འབྲང་བ་ནི་སྙིང་རྗེ་པད་དཀར་ལས། འཇིག་རྟེན་ནི་ལས་ཀྱིས་བྱས་པ། ལས་ཀྱིས་སྤྲུལ་པའོ། །སེམས་ཅན་རྣམས་ནི་ལས་ཀྱིས་བྱས་པ། ལས་ཀྱི་རྒྱུ་ལས་བྱུང་བ། ལས་ཀྱིས་རབ་ཏུ་ཕྱེ་བའོ། །ཞེས་དང་། རིན་ཆེན་ཕྲེང་བ་ལས། དགེ་བ་ལས་ནི་བདེ་བ་དང་། །དེ་བཞིན་བདེ་འགྲོ་ཐམས་ཅད་དོ། །མི་དགེ་བ་ལས་སྡུག་བསྔལ་དང་། །དེ་བཞིན་ངན་འགྲོ་ཐམས་ཅད་དོ། །ཞེས་སོ། །དེ་ཉིད་དཔེ་དོན་གྱིས་སྟོན་པའི་ཕྱིར། གང་ཞིག་ས་བོན་རྣམ་པ་སྣ་ཚོགས་མཐུ། །ཞིང་པ་རྣམས་ཀྱི་ཐོག་ལ་གསལ་བ་བཞིན། །སྐྱེ་བ་གཞན་དུ་འདྲིས་ཤིང་གོམས་བྱས་པའི། །ལས་ཚུལ་མང་པོས་འགྲོ་འདི་སྣ་ཚོགས་བྱས། །དཔེར་ན་ལོ་ཐོག་རྣམས་ནི་ས་བོན་ཉིད་ཀྱི་རྗེས་སུ་འགྲོ་བའི་ཕྱིར་དང་། དེའང་ཏིག་ཏ་དང་པི་པི་ལིང་ལ་སོགས་རོ་ཁ་བ་དང་། ཚ་བའི་ས་བོན་བཏབ་ན་འབྲས་བུའང་ཁ་བ་དང་། ཚ་བ་ཁོ་ན་འབྱུང་ལ། རྒུན་འབྲུ་འམ། ཨ་མྲ་ལ་སོགས་བཏབ་ན་རོ་མངར་བ་ཁོ་ན་འབྱུང་བ་བཞིན་དུ། ལས་མི་དགེ་བ་ལས་འབྲས་བུ་སྡུག་བསྔལ་དང་ངན་འགྲོ། ལས་དགེ་བ་ལས་འབྲས་བུ་བདེ་བ་དང་མཐོ་རིས་ཉིད་དེ། འཕགས་པ་ངེས་པའི་མདོ་ལས། ས་བོན་ཚ་བ་རྣམས་ཀྱིས་ནི། །འབྲས་བུ་ཚ་བ་བསྐྱེད་པར་འགྱུར། །ས་བོན་མངར་བ་རྣམས་ཀྱིས་ནི། །འབྲས་བུ་མངར་བ་སྐྱེ་བར་འགྱུར། །དཔེ་ཟླར་བྱ་བ་འདི་ཡིས་ནི། །སྡིག་པའི་རྣམ་སྨིན་ཚ་བ་དང་། །དཀར་པོའི་འབྲས་བུ་མངར་བ་ཡང་། །མཁས་པ་རྣམས་ཀྱིས་ཤེས་བྱས་ལ། །སྡིག་པ་རྣམ་གསུམ་མི་བྱ་ཞིང་། །གཞན་དག་བྱེད་ཀྱང་མཁས་པ་ཡིས། །རྗེས་སུ་དགའ་བར་མི་བྱའོ། །ལུས་དང་ངག་དང་ཡིད་རྣམས་ཀྱིས། །དཀར་པོ་རྣམ་གསུམ་རྟག་ཏུ་བྱ། །གང་དག་དགེ་བ་སྤྱོད་བྱེད་པ། །གཞན་དག་ལའང་ཡི་རངས་བྱ། །ཞེས་རྒྱུ་ལས་འབྲས་བུ་གྲུབ་པའི་མཚན་ཉིད་དང་བླང་དོར་གྱི་གནས་གཉིས་ཀ་བསྟན་པ་ཡིན་ནོ། །དེ་ལྟ་མོད་ཀྱི་སེམས་ཅན་རྣམས་ནི་ཐོག་མ་མེད་པ་ནས་ལས་དང་ཉོན་མོངས་པའི་གཞན་དབང་ལ་སྤྱོད། དེའི་ཕྱི་བཞིན་དུ་འབྲང་པ་ཡིན་པས་གནས་རིགས་དང་བདེ་སྡུག་ཐ་དད་པར་གྲུབ་པའི་ཚུལ་ནི། སེམས་ཅན་མོས་པ་ཐ་དད་པས། །དེ་ཡིས་འགྲོ་འདི་སྣ་ཚོགས་བྱས། །ཞེས་པ་དང་། ཁྱད་པར་མིའི་འགྲོ་བ་རྣམས་ཀྱི་ཀུན་ཏུ་སྤྱོད་པ་དང་བསམ་པའི་བྱེ་བྲག་ནི་བརྟག་པར་དཀའ་བ་ཡིན་ཀྱང་འབྲས་བུ་ནི་འཆོལ་བ་མེད་པར་སྨིན་པའི་ཚུལ། བཤེས་སྤྲིང་ལས། མི་ནི་ཨ་མྲའི་འབྲས་བཞིན་མ་སྨིན་ལ། །སྨིན་པ་དང་འདྲ་སྨིན་ལ་མ་སྨིན་འདྲ། །མ་སྨིན་མ་སྨིན་པར་སྣང་སྨིན་ལ་ནི། །སྨིན་པར་སྣང་ཞེས་བགྱི་བ་འདྲར་རྟོགས་མཛོད། །ཅེས་བཤད་པའི་ཕྱོགས་དང་པོ་ཨ་མྲའི་འབྲས་བུ་ནང་མ་སྨིན་ཡང་ཕྱི་སྨིན་པ་ལྟ་བུ་ནི་བསམ་པ་ཉམས་ལ་སྦྱོར་བ་ཕུན་སུམ་ཚོགས་པའི་གང་ཟག་ཡིན་ནོ། །སྨིན་ལ་མ་སྨིན་འདྲ་བ་ནང་སྨིན་ཡང་ཕྱི་སྔོན་པོའི་ངོ་བོ་དང་མ་བྲལ་བ་ནི། སྦྱོར་བ་ཉམས་ལ་བསམ་པ་ཕུན་སུམ་ཚོགས་པའི་གང་ཟག་ཡིན་ནོ། །མ་སྨིན་ལ་མ་སྨིན་པ་ཉིད་དུ་སྣང་བ་ནི་བསམ་སྦྱོར་གཉིས་ཀ་ཉམས་པ་རྣམས་སོ། །སྨིན་ལ་སྨིན་པར་སྣང་བ་ནི་བསམ་སྦྱོར་གཉིས་ཀ་ཕུན་སུམ་ཚོགས་པ་ཡིན་ནོ། །རྒྱུ་དེ་བཞིན་དུ་འབྲས་བུའི་ཆོས་ཉིད་ཀྱང་མདོ་ལས་སྣང་བ་ནས་སྣང་བའི་མཐར་འགྲོ་ཞེས་པ་ལ་སོགས་པའི་དོན་བཤེས་སྤྲིང་དུ། སྣང་ནས་སྣང་བའི་མཐར་ཐུག་མུན་པ་ནས། །མུན་པའི་མཐའ་དང་སྣང་ནས་མུན་མཐར་ཐུག །མུན་ནས་སྣང་བའི་མཐར་ཐུག་གང་ཟག་ནི། །བཞི་སྟེ་དེ་དག་རྣམས་ཀྱི་དང་པོ་མཛོད། །ཅེས་སྣང་བ་ནས་སྣང་བའི་མཐར་ཐུག་ཏུ་འགྲོ་བ་ལྷ་དང་མི་དབང་ཐང་ཆེན་པོ་རྣམས་ཀྱི་ནང་དུ་སྐྱེས་ནས་སླར་ཡང་དེ་ཉིད་དུ་སྐྱེ་བ་ལ་བརྗོད་དོ། །མུན་པ་ནས་མུན་པའི་མཐའ་ཞེས་བྱ་བ་ནི་ངན་འགྲོའི་མི་དབང་ཐང་ཆུང་ངུ་རྣམས་ཀྱི་ནང་དུ་སྐྱེས་ནས་ཡང་དེ་གཉིས་གང་རུང་དུ་སྐྱེ་བའོ། །སྣང་ནས་མུན་མཐར་ཐུག་ཅེས་བྱ་བ་ནི་ལྷ་དང་མི་དབང་ཐང་ཆེན་པོ་རྣམས་ཀྱི་ནང་དུ་སྐྱེས་ནས། དེའི་ཕྱི་ན་ངན་སོང་གསུམ་དང་མི་དབང་ཐང་ཆུང་ངུ་རྣམས་ཀྱི་ནང་དུ་སྐྱེ་བ་གང་ཡིན་པའོ། །མུན་ནས་སྣང་བའི་མཐར་ཐུག་ཅེས་བྱ་བ་ནི་ངན་སོང་གསུམ་ལ་སོགས་པ་ནས་ལྷའི་འཇིག་རྟེན་དང་མི་དབང་ཐང་ཆེན་པོ་རྣམས་སུ་སྐྱེ་བ་སྟེ། ཕྱི་མ་གཉིས་ལ་དཔེར་ན། འཇུངས་དགའ་དང་། ལྷའི་བུ་སྦལ་པ་ལྟ་བུའོ། །ཞེས་འགྲེལ་པ་ལས་བཤད་དོ། །དེའི་ཕྱིར་སྐྱེ་བ་སྔ་མའི་དགེ་སྡིག་གི་འབྲས་བུ་ད་ལྟའི་བདེ་སྡུག་མངོན་སུམ་པས་ཤེས་ལ། ད་ལྟའི་ལས་འབྲས་འཕྲལ་དུ་བལྟར་མི་མངོན་ཡང་། ས་བླ་མཐོན་པོར་གཤེགས་པའི་མཁའ་ལྡིང་གི། །གྲིབ་མ་རེ་ཞིག་བལྟ་བར་མི་མངོན་ཡང་། །གཟུགས་ཅན་ཉིད་དང་འདུ་འབྲལ་སྤངས་པ་བཞིན། །ཚོགས་ཤིང་དུས་ལ་བབ་ཚེ་ལྷག་པར་མངོན། །ཞེས་སྦྱར་ནས། དཔེར་ན་འདབ་ཆགས་ནམ་མཁའ་ལ་འགྲོ་བའི་གྲིབ་མ་ལུས་དང་འབྲལ་མ་མྱོང་སྟེ། ས་བླ་མཐོན་པའི་རྐྱེན་གྱིས་རེ་ཞིག་བལྟར་མི་མངོན་པ་དེ། ས་ལ་འབབ་མ་ཁད་ལ་བྲང་འོག་ཏུ་རིལ་གྱིས་འོང་བ་ལྟར། ཚོགས་ཤིང་དུས་ལ་བབ་པའི་ཚེ་གང་དུའང་འགྲོ་བ་མེད་དེ། མདོ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་དང་། བཤེས་སྤྲིང་ལས། སྡིག་པའི་ལས་རྣམས་སྤྱད་པ་གང་ཡིན་པ། །དེ་ཡི་མོད་ལ་མཚོན་བཞིན་མི་གཅོད་ཀྱང་། །འཆི་བའི་དུས་ལ་བབ་ཚེ་ལས་ཀྱི་ནི། །འབྲས་བུ་གང་ལགས་དེ་ནི་མངོན་པར་འགྱུར། །ཞེས་སོ། །ཡང་འདི་ལྟར། བསོད་ནམས་མ་ཡིན་བྱ་བ་རྟ་གདོང་མེས། །མཐོ་རིས་རྒྱ་མཚོའི་རླབས་ཀྱང་སྐེམས་ནུས་ཤིང་། །རྣམ་མཁྱེན་གྲུ་གཟིངས་བཤིག་པའི་དཔེ་དང་དོན། །ལས་བརྒྱ་པ་དང་རྒྱ་ཆེན་རོལ་པས་བསྟན། །ཇི་སྲིད་དུ་དངོས་པོར་འཛིན་པ་མ་ཟད་པའི་བར་ལ་བསོད་ནམས་མ་ཡིན་པའི་ལས་ཕྲ་ཞིང་ཕྲ་བས་ཀྱང་འབྲས་བུ་ཆེན་པོ་འབྱིན་ཏེ། རྒྱ་མཚོ་ཆེན་པོ་མུ་དང་གཏིང་ཟབ་པའི་རླབས་ཀྱང་རྟ་གདོང་རྒོད་མ་ཁའི་མེས་བསྐམས་པར་ནུས་པ་བཞིན་དུ་མཐོ་རིས་ཀྱི་བདེ་འབྲས་རྩ་བ་འབྱིན་ལ། སེམས་ཟག་པ་ལས་གྲོལ་ནས་ཀྱང་ཕུང་པོ་མ་སྤངས་ཀྱི་བར་ལ་ལས་ཀྱི་རྣམ་སྨིན་གྱིས་མ་བཏང་པའི་ཕྱིར། རྣམ་པ་ཐམས་ཅད་མཁྱེན་པའི་གྲུ་གཟིངས་ལྟ་བུའི་ལུས་རྟེན་ཡང་བཤིག་པར་འགྱུར་བ་ནི། འཕགས་པ་མཽངྒལ་གྱི་བུ་ཀུན་ཏུ་རྒྱུས་བཀྲོངས་པ་དང་། འཕགས་པ་སྒུར་ཆུང་བཟའ་བས་ཕོངས་ནས་ལྟོགས་གྲིར་གུམ་པ་དང་། དགེ་སློང་མ་ཨུཏྤ་ལའི་མདོག་ལྷས་སྦྱིན་གྱིས་མགོ་ལ་ཁུ་ཚུར་བརྡེགས་ཏེ་བཀྲོངས་པ་སོགས། དགྲ་བཅོམ་པ་ཐོབ་པའི་གང་ཟག་ཀྱང་ལས་ཀྱི་ཕྱི་བཞིན་འབྲང་བའི་ཕྱིར་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ལས། མི་དགེ་བས་ནི་མཐོ་རིས་སུ་སྐྱེ་བ་ལའང་བར་དུ་གཅོད་ན། ཉན་ཐོས་དང་རང་སངས་རྒྱས་ལ་ལྟ་ཅི་སྨོས། དེ་བས་ཀྱང་རྣམ་པ་ཐམས་ཅད་མཁྱེན་པའི་སངས་རྒྱས་ལ་བར་དུ་གཅོད་པ་ལྟ་ཅི་སྨོས། ཞེས་གསུངས་པས་མཚོན་ལ། ད་དུང་ལས་འབྲས་ཀྱི་རིགས་པ་རྒྱ་ཆེན་པོ་ནི་དྲན་པ་ཉེར་གཞག་དང་། ལས་བརྒྱ་པ་དང་། རྒྱ་ཆེར་རོལ་པ་ལ་སོགས་སུ་བལྟ་བར་བྱའོ་ཞེས་ཁ་འཕངས་པའོ། །མནར་ལ་ཤིན་ཏུ་བརྟུལ་ཕོད་ངན་སོང་གིས། །དགེ་བཅུའི་དཔུང་པ་བཙན་པའི་དཔའ་བོའི་ཡུལ། །གཡུལ་གྱི་ཕྲུ་མས་བཏབ་པ་མ་མཆིས་ཏེ། །དམ་བཅའ་ཉམས་པ་མཐའ་དག་ཁྱོད་དབང་སོང་། །ལ་ལའི་ཚུལ་ཁྲིམས་ལ་ལའི་ཚེ་དང་སྲོག །ལ་ལའི་དཀའ་ཐུབ་ལ་ལའི་ཆོས་དང་ནོར། །ལ་ལའི་ངོ་ཚ་ལ་ལའི་ཁྲེལ་ཡོད་རྣམས། །སྡིག་པའི་ཆེད་དུ་གཏོང་བ་ཤིན་ཏུ་མང་། །དེ་ལ་དགེ་བ་ནི་གཉིས་ཡིན་ཏེ། བསོད་ནམས་ཆ་མཐུན་དང་། ཐར་པ་ཆ་མཐུན་ནོ། །དང་པོ་ནི། སྲིད་པའི་བདེ་འབྲས་བསྐྱེད་པ་ཉིད་ཀྱིས་ཟད་པར་འགྱུར་བ་དགེ་བ་བཅུ་དང་། བསམ་གཏན་བཞི་དང་། གཟུགས་མེད་བཞི་སྟེ་ཐར་པ་དང་མ་འབྲེལ་བ་རྣམས་སོ། །གཉིས་པ་ནི་ཉན་ཐོས་ཀྱི་ལམ་འཚོལ་བར་སེམས་བསྐྱེད་ནས་ལམ་དང་པོ་དྲན་པ་ཉེར་གཞག་སྒོམ་པ་ནས་རྫོགས་ཀྱི་བར་སྤྱོད་པའི་གང་ཟག་ནི་སྐྱེས་བུ་ཆུང་ངུའོ། །རང་སངས་རྒྱས་ཀྱི་ལམ་དུ་ཞུགས་པ་ནི་སྐྱེས་བུ་འབྲིང་པོའོ། །ཐེག་པ་ཆེན་པོར་སེམས་བསྐྱེད་ནས་ལམ་བསྒྲུབ་པ་ནི་སྐྱེས་བུ་ཆེན་པོའོ། །དེའང་འདིར་བསོད་ནམས་ཆ་མཐུན་གྱི་སྐབས་དྲན་པ་ཉེ་བར་གཞག་པའི་ཚིག་ལེའུར་བྱས་པ་ལས། གང་ལ་བྱེད་པོ་གཞན་མེད་པ། །ལུས་དང་ངག་དང་ཡིད་ཀྱི་ལས། །དགེ་དང་མི་དགེ་རང་བྱས་གང་། །འདི་ཡི་འབྲས་བུ་འཇིག་རྟེན་སྤྱོད། །ཅེས་པ་ལྟར་སྒོ་གསུམ་གྱི་མི་དགེ་བའི་ཕྱོགས་ལས་ལོག་པའི་དགེ་བ་བཅུ་པོ་ཉིད་བསམ་གཏན་གཟུགས་མེད་བསྒོམ་པ་དང་མ་འབྲེལ་ན་རྣམ་སྨིན་གྱི་འབྲས་བུ་གླིང་བཞི་གླིང་ཕྲན་གྱི་མི་དང་འདོད་ལྷ་དྲུག་པོ་ཐོབ་ཅིང་། ཡུལ་ལ་སྨིན་པ་བདག་པོའི་འབྲས་བུར་ལོ་ཏོག་དང་འབྲས་བུས་བརྒྱན་ཞིང་འཚེ་བ་མེད་པ་དང་བགྲོད་བདེ་བ་ལ་སོགས་པའོ། །རྒྱུ་མཐུན་ནི་གཉིས་ལས་བྱེད་པ་རྒྱུ་མཐུན་དགེ་བཅུ་བྱེད་པར་སྤྲོ་ཞིང་། མྱོང་བ་རྒྱུ་མཐུན་གྱིས་ཚེ་རིང་བ་དང་ནད་མེད་པ་དང་ལོངས་སྤྱོད་ཆེ་བ་ལ་སོགས་པའོ། །ཁྱད་པར་དགེ་བ་བཅུ་དང་བསམ་གཏན་བཞི་པོ་སྦྲེལ་ནས་འབྱོངས་ན་གཟུགས་ཁམས་སུ་སྐྱེ་ལ། དགེ་བ་བཅུ་དང་གཟུགས་མེད་བཞི་འབྲེལ་བ་ཚད་དུ་ཕྱིན་ན་སྐྱེ་མཆེད་མུ་བཞི་ཐོབ་པའོ། །དེའང་འཕེན་བྱེད་དང་བདེ་བའི་ཆར་རྫོགས་བྱེད་ཀྱི་ལས་དགེ་བ་བཅུས་བྱེད་ལ། བསམ་གཏན་གཟུགས་མེད་ཀྱི་རགས་པའི་སེམས་འགྲུབ་པ་བསམ་གཏན་གཟུགས་མེད་བསྒོམས་ནས་འགྲུབ་པ་དེས་བྱེད་དོ། །དེའི་ཕྱིར་བསམ་གཏན་གཟུགས་མེད་གཉིས་བསྒོམ་པ་དང་འབྲེལ་མ་འབྲེལ་གང་ཡང་རུང་བའི་དགེ་བཅུ་ལ་སྤྱོད་པ་རྣམས་ནི་ངན་སོང་གི་གཡུལ་ལས་རྒྱལ་ཏེ། མཐོ་རིས་ཀྱི་དགའ་བདེ་ལ་སྤྱོད་པ་ཡིན་ཡང་། དམ་བཅའ་ཉམས་པ་སྟེ་དེའི་མི་མཐུན་ཕྱོགས་མི་དགེ་བཅུ་ལ་སྤྱོད་པ་རྣམས་ནི་ངན་སོང་འབའ་ཞིག་གི་གནས་སུ་སོང་ངོ་ཞེས་སྟོན་པ་སྟེ། དེ་ཡང་མངོན་པའི་ང་རྒྱལ་ཅན་ལ་ལ་ནི་གཡུལ་ངོར་སྤྱོད་པ་དང་། ཁྱིམ་ན་གནས་པའི་ཕྱིར་དུ་བསླབ་པ་གཏོང་བ་དཔེར་ན་རྒྱལ་རིགས་རིན་ཅེན་གྲགས་བཞིན་ནོ། །དེ་བཞིན་ཞེ་སྡང་གི་ཆེད་དུ་སྲོག་འདོར་བ་ཀུན་ཏུ་རྒྱུ་སཾ་ག་ཨཱ་ཙརྱ་དང་། ཕྲག་དོག་གི་ཆེད་དུ་དཀའ་ཐུབ་གཏོང་བ་དགེ་སློང་ལྷས་བྱིན་དང་། གཏི་མུག་གི་ཕྱིར་དུ་དམ་ཆོས་གཏོང་བ་རྒྱལ་པོ་ཡན་ལག་མེད་དང་། འདོད་ཆགས་ཀྱི་ཕྱིར་དུ་ངོ་ཚ་གཏོང་བ་ཚོང་དཔོན་གྱི་བུ་མོ་དང་། འདོད་པའི་ཕྱིར་དུ་ཁྲེལ་ཡོད་གཏོང་བ་རྒྱལ་པོ་བདེ་སྤྱོད་ཀྱི་བུ་ལྟ་བུ་ལ་སོགས་མདོར་ན་འཇིག་རྟེན་ན་སྡིག་པའི་ཕྱོགས་སུ་ནི་ལུས་དང་སྲོག་ཀྱང་འདོར་བ་ཕོད་ལ། དགེ་བའི་ཕྱོགས་ལ་ནི་ས་དང་ཆུ་ཡང་ཕོངས་པའི་རྒྱུས་ངན་སོང་ནི་ས་ཆེན་པོའི་རྡུལ་ཙམ་དང་། མཐོ་རིས་ནི་སེན་མོའི་རྡུལ་ཙམ་དུ་གྲུབ་པ་འདི་ནི་རྣམ་པ་ཐམས་ཅད་དུ་སྐྱོ་བའི་གནས་ཆེན་པོའོ། །འདི་ལྟར་མི་དགེ་བའི་ལས་ནི་གཞན་གྱི་ཆེད་དུ་བྱས་ཀྱང་དེའི་རྣམ་སྨིན་བགོ་བཤའ་བྱ་རུ་མེད་པར་སྟོན་པ་ནི། གང་ཕྱིར་ཡོན་གནས་ཉེ་དུ་འཁོར་འབངས་དང་། །ཡུལ་ཁམས་བསྲུང་བའི་སླད་དུ་སྟོབས་ཆེན་གྱི། །སྡིག་པའི་གཉིས་འཐུང་དཀྲིས་པ་བཏང་ནའང་། །རྣམ་སྨིན་བགོ་བཤའ་བྱ་རུ་མེད་པ་ཡིན། །དེ་ལ་སྡིག་པའི་མཚན་ཉིད་ནི་རང་བཞིན་དུ་རྣམ་སྨིན་གཏོས་ཆེ་བ་ཡིན་པས་གླང་པོ་ཆེའི་གཟུགས་བརྙན་ལ་དཔེར་བྱས་ནས། དེ་ཉིད་སྤོང་སེམས་ཀྱི་ཐག་པས་དཀྲིས་པ་ལས་གཏོང་བ་ནི་བག་མེད་དུ་སྤྱོད་པའི་དོན་ནོ། །དེའང་རང་དོན་དུ་སྤྱད་ན་སྨོས་ཅི་དགོས། གཞན་གྱི་དོན་དུ་སྤྱད་ཀྱང་རྣམ་སྨིན་མྱོང་བའི་ཚེ་དེ་དག་གིས་སྡུག་བསྔལ་གྱི་སྐལ་བ་ལེན་པར་མི་བྱེད་ལ། ཁྱད་པར་ཡོན་གནས་ཀྱི་དམ་པ་དཀོན་མཆོག་ནི་སེམས་ཅན་རྣམས་ལ་བུ་གཅིག་པ་ལྟར་བརྩེ་བས་དེ་དག་མནར་ཞིང་སྲོག་བཅད་པ་དང་། མངའ་རིས་དང་ལོངས་སྤྱོད་ཕྲོགས་པའི་རྒྱུ་ལས་བྱུང་བའི་བསྙེན་བཀུར་དང་སྲི་ཞུ་ལ་ནམ་ཡང་དགྱེས་པའི་སྐབས་མེད་དེ། འཚེ་བ་ཆོས་སུ་སྨྲ་བ་ནི་ཀླ་ཀློའི་གྲུབ་མཐའ་ཡིན་པའི་ཕྱིར་རོ། །དེ་བཞིན་དུ་ཉེ་དུའི་སླད་དུ་བགྱིས་ནའང་། མཽངྒལ་གྱི་མས། ཁྱིམ་ཐབ་དང་། བུའི་དོན་དུ་སེར་སྣ་ལ་སོགས་པའི་སྡིག་པ་མང་དུ་བགྱིས་ཀྱང་། ལས་ནི་བྱེད་པ་པོའི་སྟེང་དུ་སྨིན་པ་ཡིན་པས་རང་ཉིད་ངན་སོང་དུ་སྐྱེས། བུས་དགྲ་བཅོམ་པའི་འབྲས་བུ་ཐོབ། ཁྱོ་ཕོ་ཚངས་གནས་སུ་སྐྱེས་པ་ལྟ་བུའོ། །གཞན་ཡང་འཁོར་འབངས་དང་། ཡུལ་ཁམས་བསྲུང་བའི་སླད་དུ་ཞེས་གཡུལ་འཁྲུག་ལ་སོགས་པའི་ལས་སྟོབས་པོ་ཆེ་བགྱིད་པའང་། སྲུང་བ་པོ་བྱང་ཆུབ་སེམས་དཔའི་གང་ཟག་ཐབས་ཀྱིས་ཟིན་པ་ཅན་ཤ་སྟག་ཡིན་པས་མ་ཁྱབ་པའི་ཕྱིར། སོ་སོ་སྐྱེ་བོའི་རྣམ་རྟོག་དང་ཀུན་སློང་གི་མཚང་ལེགས་པར་བརྟགས་ན་གཞན་བསྲུང་བ་མ་ཡིན། རང་བསྲུང་བ་ཁོ་ན་ཡིན་པའི་སྡིག་པ་ཤིན་ཏུ་བཟོད་པར་དཀའོ། །དེ་སྐད་དུ་སློབ་དཔོན་འཕགས་པས་ཀྱང་། ཁྱོད་ཀྱིས་བྲམ་ཟེ་དགེ་སློང་ལྷ་དང་ནི། །མགྲོན་དང་ཡབ་ཡུམ་དག་དང་བཙུན་མོ་དང་། །འཁོར་གྱི་སླད་དུ་སྡིག་པ་མི་བགྱི་སྟེ། །དམྱལ་བའི་རྣམ་སྨིན་སྐལ་ནོད་འགའ་མ་མཆིས། །ཞེས་སོ། །དེ་ལ་ཐེ་ཚོམ་བསལ་བའི་གནས་གཅིག་ཡོད་དེ། གལ་ཏེ་བྲམ་ཟེ་ལ་སོགས་པའི་དོན་དུ་སྡིག་པ་བྱས་པ་རྣམ་པར་སྨིན་པ་མི་འདོད་པ་ཅན་དུ་འགྱུར་ན། ཅིའི་ཕྱིར་དེའི་མོད་ལ་རྣམ་པར་སྨིན་པར་མི་འགྱུར་སྙམ་དུ་སེམས་ན། སྡིག་པའི་ལས་རྣམས་སྤྱད་པ་འགའ་ཡང་ནི། །ཞེས་བྱ་བ་ལ་སོགས་པ་སྨོས་ཏེ། འདི་སྐད་དུ་སྡིག་པའི་ལས་ཀྱི་དེའི་མོད་ཁོ་ན་ལ་མཚོན་བཞིན་དུ་གཅོད་པར་མི་བྱེད་ཀྱང་། འོན་ཀྱང་འཆི་བའི་དུས་ལ་བབ་ན་སྡིག་པའི་ལས་ཀྱི་འབྲས་བུ་མངོན་པར་འགྱུར་རོ་ཞེས་བཤད་པ་ཡིན་ནོ། །ཞེས་སློབ་དཔོན་བློ་གྲོས་ཆེན་པོས་བཀྲལ་ལོ། །ཡང་། འཇིག་རྟེན་པའི་ཆོས་ལ་གནས་པར་འཕགས་པའི་ལམ་མི་སྐྱེ་བར་སྟོན་པ་ནི། རྙེད་ལ་བརྐམ་ཞིང་བདེ་བ་འབའ་ཞིག་སྲེད། །སྙན་པ་ལྷུར་ལེན་བསྟོད་ན་ཁེངས་འགྱུར་ལ། །གང་ལས་ཅིག་ཤོས་བཞི་ཡིས་སྨ་བབ་པའི། །བྱིས་པ་འདི་དག་འཇིག་རྟེན་ཆོས་ཀྱིས་བསླུས། །འདི་ལྟར་འཇིག་རྟེན་ན་དམ་པའི་ཆོས་མ་ཡིན་ཀྱང་འཇིག་རྟེན་གྱི་ཆོས་སུ་གྲགས་པ་བརྒྱད་ཡོད་དེ། རྙེད་པའི་ཆོས་ལ་བརྐམ། བདེ་བའི་ཆོས་ལ་སྲེད། སྙན་པའི་ཆོས་ལྷུར་ལེན། བསྟོད་པའི་ཆོས་ཀྱིས་ཁེངས་པར་འགྱུར་ལ། དེའི་མི་མཐུན་ཕྱོགས་མ་རྙེད་པ་དང་། མི་བདེ་བ་དང་། མི་སྙན་པ་དང་། སྨད་པ་སྟེ་ཅིག་ཤོས་ཀྱི་ཆོས་བཞིས་ཡིད་མི་བདེ་བར་འགྱུར་བ་ནི་བྱིས་པ་རྣམས་བསླུ་བར་བྱེད་པའི་ཆོས་བརྒྱད་དོ། །དེའང་འཕགས་པའི་བསྟན་བཅོས་དགོངས་འགྲེལ་དང་བཅས་པས་ཚིག་དོན་གྱི་དབྱིངས་འཇལ་ན། བཤེས་སྤྲིང་ལས། འཇིག་རྟེན་མཁྱེན་པ་རྙེད་དང་མ་རྙེད་དང་། །བདེ་དང་མི་བདེ་སྙན་དང་མི་སྙན་དང་། །བསྟོད་སྨད་ཅེས་བགྱི་འཇིག་རྟེན་ཆོས་བརྒྱད་པོ། །བདག་གི་ཡིད་ཡུལ་མིན་པར་མགོ་སྙོམས་མཛོད། །ཅེས་པའི་དོན་འགྲེལ་པས་འདིར་འཇིག་རྟེན་གྱི་ཆོས་རྙེད་པ་མ་རྙེད་པ་ལ་སོགས་པ་ལ་དམིགས་པའི་ཡིད་བདེ་བ་དང་མི་བདེ་བ་ལ་ཡིན་གྱིས། རྙེད་པ་ལ་སོགས་པ་ལ་ནི་མ་ཡིན་ཏེ། འཕགས་པ་རྣམས་ལའང་མངའ་བའི་ཕྱིར་རོ། །དེ་ལྟ་བས་ན་དམིགས་པའི་དབང་གིས་འཇིག་རྟེན་གྱི་ཆོས་རྣམ་པ་བརྒྱད་ཡིན་པར་རིགས་པར་བྱའོ། །དེ་ལ་མི་སྙན་པ་དང་སྨད་པ་ནི་ལྐོག་དང་ལྐོག་མ་ཡིན་པའི་བྱེ་བྲག་ལས་རིགས་པར་བྱའོ། །ཞེས་པ་སྟེ། དོན་བསྡུ་ན་འཇིག་རྟེན་གྱི་ཆོས་བརྒྱད་པོ་འདི་དག་ལས་གྱུར་པའི་རྣམ་པར་རྟོག་པ་རྙེད་པ་ལ་སོགས་པ་བཞི་བྱུང་ན་ཡིད་བདེ་བ་དང་། མི་རྙེད་པ་ལ་སོགས་པ་བཞིས་ཡིད་མི་བདེ་བ་མེད་པ་ཉིད་དུ་མགོ་མ་སྙོམས་ན་རྒྱུ་འབྲས་ཀྱི་བླང་དོར་ཕྲ་ཞིབ་ཀྱང་མི་ནུས་ལ། འཇིག་རྟེན་གྱི་ཆོས་འབའ་ཞིག་ལ་གནས་པ་དེ་ལ་འཕགས་པའི་ལམ་སྐྱེ་བ་མེད་པར་སྟོན་པའོ། །དེ་ལས་གཞན་པའི་འཇིག་རྟེན་གྱི་ཆོས་བཅུ་གསུམ་པོ་རྣམས་ལ་མངོན་པར་ཞེན་ནས་བྱ་བ་ངན་པ་ལ་ཆགས་པས་ཀྱང་ངན་སོང་བསྒྲུབ་པ་ཡིན་ནོ་ཅེས་སྟོན་པ་ནི། རིགས་གཟུགས་དབང་ཐང་ལ་སོགས་འཕངས་བསྟོད་ཅིང་། །སྙོམ་ལས་འཕྱེ་བོའི་ཕག་ཏུ་ཡིབས་པ་དང་། །མངོན་པའི་ང་རྒྱལ་མ་རུངས་སློང་བ་རྣམས། །དཀའ་ཐུབ་དཔལ་ལ་སྡང་བའི་སྲིན་པོར་འགྱུར། །བརྐམ་ཆགས་སེམས་ཀྱི་ནུས་པ་བརྟན་པོ་ཡིས། །ཟིལ་གྱིས་ནོན་པའི་གཡོ་སྒྱུའི་འཁྲི་ཤིང་གིས། །གཞན་དག་རྨོངས་བྱས་བདག་ཉིད་བསྲུངས་ན་ཡང་། །གནོད་ཆེན་དེ་ནི་རང་གི་ཁོང་དུ་ཞུགས། །ཞེས་ཚིག་གི་རྒྱན་བསྡེབ་པ་ལ་དོན་བསྐོར་ནས་བཤད་པ་སྟེ། འདི་ལྟར་རིགས་ཀྱིས་རྒྱགས་པ་དང་། གཟུགས་ཀྱིས་རྒྱགས་པ་དང་། དབང་ཐང་གིས་རྒྱགས་པ་དང་། ཐོས་པས་རྒྱགས་པ་དང་། ལང་ཚོས་རྒྱགས་པ་སྟེ་རྣམ་པ་ལྔ་པོ་མགོ་འཕང་བསྟོད་ཅིང་། བརྩོན་འགྲུས་ཀྱི་མི་མཐུན་ཕྱོགས་སྙོམས་ལས་སམ། ལེ་ལོའི་གདོན་འཕྱེ་བོ་ལྟ་བུའི་ཉམས་བག་ཏུ་ཉལ་བ་དང་། ཁྱད་པར་ཐོབ་པར་བྱ་བ་མ་ཐོབ་བཞིན་དུ་བདག་གིས་ཐོབ་བོ་སྙམ་པའི་མངོན་པའི་ང་རྒྱལ་དང་། དཀའ་ཐུབ་ཀྱི་དཔལ་ལ་སྡང་བའི་སྲིན་པོ་ནི་འདོད་ཆགས་དང་ཞེ་སྡང་གཉིས་ཡིན་ལ། བརྐམ་པ་ནི་སྦྱིན་པ་དང་མི་མཐུན་པར་རང་གི་ཕུན་ཚོགས་ལ་ཀུན་ཏུ་འཛིན་པ་དང་། ཆགས་པ་ནི་བདག་དང་ལོངས་སྤྱོད་ལ་སྲེད་པ་དང་། དེ་དག་གིས་སེམས་ཟིལ་གྱིས་ནོན་ནས་བསམ་པ་རབ་ཏུ་མི་བརྟན་པ་གྱ་གྱུའི་འདུ་ཤེས་དང་འགྲོགས་པའི་གཡོ་དང་། གཞན་བསླུ་བ་ལ་གོམས་པ་ནི་སྒྱུ་ཡིན་ཏེ། དེ་ལྟར་བཅུ་གསུམ་པོས་བདག་ཉིད་བསྲུངས་ཤིང་ཕ་རོལ་རྨོངས་པར་བྱེད་པ་འཇིག་རྟེན་གྱི་ཀུན་ཏུ་སྤྱོད་པའི་ཁྱད་པར་ལ་གྲགས་ཀྱང་། དེ་ནི་དུག་ལྡན་གྱི་བཟའ་བ་ཁོང་དུ་ཆུད་པ་བཞིན་དུ་བདག་ཉིད་ལ་གནོད་པ་ཆེན་པོ་ཡིན་པས་དགྲ་བཞིན་དུ་བལྟ་བར་བྱ་བའི་ཚུལ། བཤེས་སྤྲིང་ལས། སེར་སྣ་གཡོ་སྒྱུ་ཆགས་དང་སྙོམས་ལས་དང་། །མངོན་པའི་ང་རྒྱལ་འདོད་ཆགས་ཞེ་སྡང་དང་། །རིགས་དང་གཟུགས་དང་ཐོས་པ་ལང་ཚོ་དང་། །དབང་ཐང་ཆེ་བས་རྒྱགས་པ་དགྲ་བཞིན་གཟིགས། །ཞེས་གསུངས་པ་བཞིན་ནོ། །ཡང་དགེ་སྡིག་སོ་སོའི་རྣམ་སྨིན་ཕྱི་རོལ་གྱི་རྒྱུ་འབྲས་ལས་ཀྱང་ལྷག་པར་འཕེལ་ཆེ་བར་སྟོན་པ་ནི། འཁོར་བར་འདུ་བྱེད་དཀར་ནག་ལས་འབྲས་གཉིས། །ས་བོན་ཉུང་ངུ་ལས་ཀྱང་འབྲས་བུའི་གཟུགས། །སྦོམ་པོར་བསྐྱེད་པ་མི་དབང་ང་ལས་ནུ། །སྲན་རྡོག་བདུན་ལས་འཁོར་ལོས་སྒྱུར་བ་བཞིན། །གང་ཞིག་ས་བོན་ཡུངས་འབྲུ་ཙམ་པའི་ཤིང་། །ཨ་ཤྭ་ཏ་ཡི་འབྲས་བུ་ལོ་དུས་སུ། །ཡལ་ག་རེ་ལའང་དཔག་ཚད་ཙམ་འཕེལ་བས། །དགེ་སྡིག་གཟུགས་བརྙན་འཕེལ་བའི་དཔེར་མི་ཕོད། །འདི་ལྟར་དགེ་སྡིག་གཉིས་ཀྱི་རྣམ་པར་སྨིན་པ་ནི་ཕྱི་རོལ་གྱི་རྒྱུ་འབྲས་ལ་འཕེལ་ཀ་ཆེ་ཤོས་ཨ་ཤྭ་ཏའི་ཤིང་གི་དཔེས་ཕྱོགས་ཙམ་ཡང་མི་མཚོན་པར། རྒྱུ་ཆུང་ངུ་ལའང་འབྲས་བུ་མུ་མཐའ་མེད་པར་བསྐྱེད་པ་ནི་ནང་གི་རྒྱུ་འབྲས་དགེ་སྡིག་གཉིས་ཀྱི་འཕེལ་ཀ་ཡིན་ཏེ། རྒྱལ་པོ་ང་ལས་ནུས་སྐྱེ་བ་སྔ་མའི་དུས་སངས་རྒྱས་རྣམ་གཟིགས་ལ་སྲན་མ་ཁུ་ཚུར་གང་གཏོར་བས་བཞི་ནི་ལྷུང་བཟེད་དུ་སོང་། གཉིས་ནི་ཐུགས་ཀར་ཕོག་པས་གླིང་བཞི་ཀ་ལ་དབང་བ་གསེར་གྱི་འཁོར་ལོས་སྒྱུར་བའི་རྒྱལ་པོར་གྱུར་ཅིང་། རིམ་པས་རྒྱལ་ཆེན་བཞི་དང་། སུམ་ཅུ་རྩ་གསུམ་གྱི་གནས་སུ་ལྷའི་དབང་པོ་དང་སྟན་ཕྱེད་པ་ལ་འདུག་པའི་དབང་ཐང་ཅན་དུ་གྱུར་པ་དང་། ཤཱ་རིའི་བུས་རང་སངས་རྒྱས་ལ་རས་ཡུག་དང་ཁབ་སྐུད་བྱིན་པས་མཁྱེན་རབ་རླབས་ཆེ་བ་དང་། རྣོ་བ་དང་། ཟབ་པའི་ཁྱད་པར་ཐོབ་པས་ཉན་ཐོས་རྣམས་ཀྱི་ནང་ན་ཤེས་རབ་ཅན་གྱི་མཆོག་ཏུ་གྱུར་པ་དང་། ཁྱེའུ་བ་ལང་སྐྱོང་གིས་མཆོད་རྟེན་གྱི་ཁྲིའི་གླང་པོའི་གཟུགས་ལ་ཞིག་གསོ་བྱས་པས་སྐྱེ་བ་ཐམས་ཅད་དུ་གླང་པོ་ཆེའི་ལོངས་སྤྱོད་དང་མི་འབྲལ་བ་དང་། འཕགས་པ་ཀཱ་ཏྱ་ཡ་ན་ལ་རྒན་མོ་ཞིག་གིས་ཆུ་ལྷུང་བཟེད་གང་ཕུལ་བས་ལྷར་སྐྱེས་པ་དང་། གཞན་ཡང་དེ་བཞིན་གཤེགས་པ་ལ་དད་པའི་སེམས་ཀྱིས་ཐལ་བ་གཏོར་བའི་དགེ་བའི་རྩ་བས་ཀྱང་བསྐལ་པ་གྲངས་མེད་པར་བདེ་བ་ཉམས་སུ་མྱོང་བ་དང་། སངས་རྒྱས་ལ་དམིགས་ནས་མེ་ཏོག་གཅིག་ནམ་མཁའ་ལ་གཏོར་བ་དང་། མཆོད་རྟེན་ལ་ཕྱག་གུས་པ་རེ་བཙལ་བས་ཀྱང་སྔོན་གྱི་མཐའ་མི་མངོན་པ་དེ་ཙམ་གྱི་འཁོར་ལོས་སྒྱུར་བའི་རྒྱལ་པོར་འགྱུར་བར་གསུངས་པ་བཞིན་ནོ། །དེ་སྐད་དུ་ལུང་ལས། དགེ་བ་ཆུང་ངུ་དག་ལ་ཡང་། །མི་ཕན་སྙམ་དུ་བརྙས་མི་བྱ། །ཆུ་ཡི་ཐིགས་པ་བསགས་པས་ཀྱང་། །སྣོད་ཆེན་རིམ་གྱིས་འགེངས་པར་འགྱུར། །ཞེས་སོ། །དེ་བཞིན་དུ་མི་དགེ་བ་ཡང་འཕེལ་བའི་དཔེ་ནི། སངས་རྒྱས་འོད་སྲུང་གི་བསྟན་པ་ལ་སྐྱེས་པའི་དགེ་སློང་གཅིག་གིས་དགེ་སློང་ཟླ་བོ་དག་ལ་ངན་སེམས་ཀྱིས་མི་གཙང་བ་ཟོ་ཞིག་སྨྲས་པས། གཤང་གཅི་འདོར་བའི་སྣམ་ཁུང་དུ་སྲིན་འབུར་སྐྱེས་པ་དང་། དེ་བཞིན་དུ་མཛངས་བླུན་ལས་བཤད་པའི་ཁྱེའུ་གསེར་ལྷ་དང་། གསེར་དབྱིག་དང་། གླང་པོ་སྐྱོང་གི་ལོ་རྒྱུས་དང་། ལུང་གཞི་ལས། སྐྱོང་བྱེད་དགའ་བོ་དང་། དེའི་དབྱིག་པས་བརྫིས་པའི་སྦལ་པ་དང་། ངང་པ་དང་། ཉ་དང་། རུས་སྦལ་ལྔ་བརྒྱ་དང་། ཡི་དྭགས་ལྔ་བརྒྱ་དང་། ཞིང་པ་དང་། གླང་ལྔ་བརྒྱའི་གཏམ་རྒྱུད་བཞིན་ཏེ། དེ་སྐད་དུ། སྡིག་པ་ཆུང་ངུ་མོ་ལ་ཡང་། །མི་གནོད་སྙམ་དུ་བརྙས་མི་བྱ། །མེ་སྟག་ཕྲ་མོ་ཙམ་གྱིས་ཀྱང་། །རྩྭ་ཕུང་རི་ཙམ་བསྲེག་པར་བྱེད། །ཅེས་སོ། །སྤྱིར་ཐེག་པ་ཆེ་ཆུང་ལ་རྒྱུ་འབྲས་རྒྱ་ཆེ་ཆུང་ཡོད་དེ། ཐེག་པ་ཆུང་ངུ་བ་རྒྱུ་འབྲས་རྒྱ་ཆུང་བ་ཡིན་ཀྱང་། སྔོན་དགེ་སློང་མ་གཅིག་གིས་རིགས་མཐུན་གཞན་དག་ལ་ཁྱི་མོ་ཞེས་བརྗོད་པས། ངག་གི་ཉེས་བྱས་ཕྲ་མོ་དེས་ཀྱང་སྐྱེ་བ་ལྔ་བརྒྱར་ཁྱིར་སྐྱེས་སོ། །ཐེག་པ་ཆེན་པོ་ལ་རྒྱུ་འབྲས་རྒྱ་ཆེ་སྟེ། སྤྱོད་འཇུག་ལས། གང་ཞིག་དེ་འདྲའི་རྒྱལ་སྲས་སྦྱིན་བདག་ལ། །གལ་ཏེ་ངན་སེམས་བསྐྱེད་པར་བྱེད་པ་ནི། །ངན་སེམས་བསྐྱེད་པའི་གྲངས་བཞིན་བསྐལ་པར་ནི། །དམྱལ་བར་གནས་པར་འགྱུར་ཞེས་ཐུབ་པས་གསུངས། །ཞེས་ཐེག་པ་ཆེན་པོའི་ཆོས་དང་གང་ཟག་ཁྱད་པར་ཅན་ལ་བསྐུར་པ་བཏབ་པ་དང་། ངན་སེམས་སྐྱེས་པས་མཚོན། བྱང་ཆུབ་སེམས་དཔའི་ལྟུང་བ་ཕྲ་མོ་རེས་ཀྱང་བསྐལ་པ་མང་པོར་སྡུག་བསྔལ་མྱོང་བ་ཡིན་ནོ། །སྤྱིར་ལས་དེ་དག་ཀྱང་བྱེད་པ་པོའི་ཀུན་སློང་བཟང་ངན་ཁོ་ན་ནུས་པ་ཆེ་བར་སྟོན་པ་ནི། གང་ལ་བྱེད་པོ་མ་མཆིས་རང་བཞིན་མིན། །དཀར་ནག་ཚོས་ཀྱིས་བཙོས་པའི་ཀུན་སློང་གིས། །ལས་དང་དེ་ཡི་འབྲས་བུ་མཐུ་ཆེན་བྱས། །སྦྱོར་རྗེས་གཉིས་དང་མི་ལྡན་ནུས་པ་ཆུང་། །འདི་ལྟར་ལས་དགེ་སྡིག་གི་རྣམ་པར་སྨིན་པ་ལྕི་ཡང་ནི་བསམ་པའི་ཁྱད་པར་ཁོ་ནས་བྱེད་དེ། བསམ་པ་ཉོན་མོངས་པ་དྲག་པོས་ཀུན་ནས་བསླངས་ན། དངོས་གཞི་སྡིག་པ་ཆུང་ངུ་ལས་མ་བྱས་ཀྱང་རྣམ་སྨིན་ཆེན་པོ་མྱོང་ལ་དེའང་སྦྱོར་བའི་དུས་ལས་དེའི་ཆེད་དུ་ཡུན་རིང་པོར་དམིགས་ནས་བསགས་པ་ཡང་མེད་ཅིང་། རྗེས་ལ་འགྱོད་པ་དྲག་པོའི་གཉེན་པོས་སྡིག་པའི་ལས་གང་དག་བྱས་པའི་སེམས་ཟིལ་གྱིས་ནོན་ན་ནུས་པ་ཆུང་བ་ཡིན་ནོ། །དེ་བཞིན་དུ་ནང་པ་སངས་རྒྱས་པ་ཐམས་ཅད་ཀྱི་ཡང་དག་པའི་ལྟ་བ་ཞེས་འཇིག་རྟེན་ཕ་རོལ་ཡོད་པ་ཉིད་དུ་ཡིད་ཆེས་པའི་ལས་འབྲས་ངེས་པ་ཅན་ནམ་ཡང་མི་བསླུ་བ་ལ་ཡིད་བརྟེན་དུ་མི་རུང་བ་དག་གིས་ཐོས་བསམ་བསྒོམ་གསུམ་དང་། སྦྱིན་པ་ལ་སོགས་པའི་དགེ་བ་བགྱིས་ཀྱང་། རྒྱུ་འབྲས་ལ་ཡིད་མ་ཆེས་པའི་ལོག་པར་བལྟ་བ་དེས་རྣམ་སྨིན་ཕྱིན་ཅི་ལོག་ཏུ་འབྱུང་སྟེ། བཤེས་སྤྲིང་ལས། གལ་ཏེ་མཐོ་རིས་ཐར་པར་མངོན་བཞེད་ན། །ཡང་དག་ལྟ་ལ་བགོམས་པ་ཉིད་དུ་མཛོད། །གང་ཟག་ལོག་པར་བལྟ་བས་ལེགས་སྤྱད་ཀྱང་། །ཐམས་ཅད་རྣམ་པར་སྨིན་པ་མི་བཟད་ལྡན། །ཞེས་སོ། །ཁ་ཅིག་ཡང་དག་ལྟ་བའི་སྒྲ་དོན་དམ་བདེན་པ་ཁོ་ན་ལ་སྦྱོར་ཀྱང་འདིའི་འབྲས་བུ་མཐོ་རིས་དང་འབྲེལ་བས་འཇིག་རྟེན་པའི་ཡང་དག་ལྟ་བ་ཡིན་པའི་ཚུལ་བཅོམ་ལྡན་འདས་ཀྱིས། འཇིག་རྟེན་པ་ཡི་ཡང་དག་བལྟ། །ཆེན་པོ་གང་ལ་ཡོད་གྱུར་པ། །དེ་ནི་བསྐལ་པ་སྟོང་དུ་ཡང་། །ངན་འགྲོར་འགྲོ་བར་མི་འགྱུར་རོ། །ཞེས་པས་གསལ་ལོ། །རྒྱུ་འབྲས་ལ་ཡིད་ཤིན་ཏུ་ཆེས་པ་དག་གིས་ནི་བསོད་ནམས་ཆུང་ངུའི་རྒྱུ་ལས་ཀྱང་འབྲས་བུ་ཆེན་པོ་བསྐྱེད་པས་ཀུན་སློང་གཙོ་ཆེ་བའི་དཔེ་ནི། སྔོན་དགེ་སློང་གཅིག་གིས་ཁྱིམ་བདག་ཞིག་ལ་བསོད་སྙོམས་བསླངས་པས་ཁྱིམ་བདག་ན་རེ། ཁྱོད་དགྲ་བཅོམ་པ་ཡིན་ན་ནི་འདྲེན། དེ་མིན་མི་འདོད་བྱས་པས། དགེ་སློང་ན་རེ། དགྲ་བཅོམ་པ་མིན་ཟེར་ནས་ལོག་གོ །ཡང་འདོད་པ་ཆུང་ལུགས་ཀྱིས་དགྲ་བཅོམ་པ་ཡིན་ངེས་སྙམ་ནས། དགེ་སློང་ཚུར་སྤྱོན། དགྲ་བཅོམ་པ་ཡིན་རུང་མིན་རུང་ཆོས་སྟོན་དྲང་གིས་བྱས་ནས་དྲངས་པས། དགྲ་བཅོམ་པ་ལ་དྲངས་པའི་བསོད་ནམས་ཐོབ་པས་མཚོན་ནོ། །དེའི་ཕྱིར་ཀུན་སློང་བཟང་ངན་གྱི་འཕེན་བྱེད་ཁོ་ན་ལས། དགེ་སྡིག་གི་རྣམ་པ་སྟོབས་ཆེ་ཆུང་གི་རྗེས་སུ་མི་འགྲོ་བའི་ཚུལ། རྩ་བ་སྨན་དུ་མཆིས་ན་མྱུ་གུའང་སྨན། །རྩ་བ་དུག་ཡིན་མྱུ་གུ་སྨོས་ཅི་དགོས། །བསམ་པ་དགེ་དང་མི་དགེའི་འཕེན་བྱེད་ལས། །དགེ་སྡིག་གཟུགས་བརྙན་ཆེ་ཆུང་རྗེས་མི་འགྲོ། །ཞེས་དཔེ་དོན་གཉིས་སུ་སྦྱར་ནས། ཀུན་སློང་རྣམ་པར་དག་ན་ལུས་ངག་གི་ལས་རེ་ཞིག་རྣམ་པ་གཞན་དུ་མངོན་པ་དག་ཀྱང་དགེ་བ་འབའ་ཞིག་ཏུ་འགྲོ་བ་ཐེག་པ་ཆེན་པོའི་གནས་སྐབས་སུ་ཡོད་པ། རིན་ཆེན་ཕྲེང་བ་ལས། མ་ཆགས་མི་སྡང་གཏི་མུག་མེད། །དེས་བསྐྱེད་ལས་ནི་དགེ་བའོ། །ཞེས་དང་། ཀུན་སློང་ངན་པའི་དགེ་བ་ནི། དགེ་བའི་གཟུགས་བརྙན་ཡིན་ཏེ། འདོད་ཆགས་ཞེ་སྡང་གཏི་མུག་དག །དེས་བསྐྱེད་ལས་ནི་མི་དགེ་བའོ། །ཞེས་དང་། མདོ་ལས། བསམ་པ་བཟང་པོས་མཆིལ་ལྷམ་གཉིས། །ཐུབ་པའི་དབུ་ལ་བཞག་པ་དང་། །དེ་བཞིན་གཞན་གྱིས་བསལ་གྱུར་བ། །གཉིས་ཀས་རྒྱལ་སྲིད་ཐོབ་པར་འགྱུར། །ཞེས་པས་དོན་དཔྱིས་ཕྱིན་པ་ཤེས་ཏེ་ཆར་པས་སྐུ་གཟུགས་འཇིག་གི་དོགས་པ་དང་། སྐྲད་པས་སྐུ་ལ་ནོངས་ཀྱི་དོགས་པ་གཉིས་ཀའི་བསམ་པ་རྒྱལ་སྲིད་ཐོབ་པའི་རྒྱུར་སོང་བའི་ཕྱིར་རོ། །དེའང་འདིར་ནི་འདོད་པའི་ཁམས་ན་སྤྱོད་པ་རྣམས་ཀྱི་དགེ་བ་དང་མི་དགེ་བའི་ལྕི་ཡང་གི་བྱེ་བྲག་གཙོ་བོར་སྟོན་པའི་སྐབས་ཡིན་པས། འདི་ལྟར་རྟག་དང་མངོན་ཞེན་གཉེན་པོ་མེད། །ཡོན་ཏན་གཙོ་ལྡན་གཞི་ལས་བྱུང་བའི་ལས། །རྣམ་པ་ལྔ་པོ་དགེ་སྡིག་ལྕི་ཡང་གི། །ཉེ་བར་ལེན་པའི་རྣམ་རིག་ལགས་པར་གསུངས། །ཞེས་སྨོས་ཏེ། དེ་ལ་ལས་ལྕི་བ་ཉིད་ནི་རྒྱུའི་ཁྱད་པར་བཞིས་བྱེད་དེ། སྦྱོར་བ་དང་། བསམ་པ་དང་། གཉེན་པོ་དང་། གཞིའོ། །དེ་ལ་དང་པོ་སྦྱོར་བའི་ཁྱད་པར་ནི་རྟག་པ་སྟེ་ལས་ཆུང་ངུ་ལ་ཡང་དུས་རིང་མོ་ཞིག་ཏུ་སྦྱར་བ་དཔེར་ན་འགྲོ་བ་གཞན་ལ་གནོད་པ་ཆུང་ངུ་ཞིག་བྱ་བའི་དོན་དུའང་དུས་རིང་མོ་ཞིག་ནས་བསམ་པ་ངན་པ་དེ་ལ་རྒྱུན་དུ་ཞུགས་པའི་ཁོང་དུ་ཆུད་པར་བྱས་པའོ། །གཉིས་པ་བསམ་པའི་ཁྱད་པར་ནི་མངོན་པར་ཞེན་པ་སྟེ། ལས་དངོས་ལ་ཡུན་ཐུང་ངུ་ལས་མེད་ཀྱང་ཉོན་མོངས་པ་དང་རབ་ཏུ་དང་བ་དྲག་པོ་དང་ལྡན་པ་ཁྲོ་བཞིན་དུ་འཁྲུགས་བཞིན་དུ་རྔོམས་བཞིན་དུ་ལས་དེ་ཁོ་ན་ལས་གཞན་དུ་ཡིད་མི་གཏོད་པ་དཔེར་ན་རྒྱལ་པོ་མྱ་ངན་མེད་སྡིག་པའི་སེམས་ཀྱིས་གཟིར་བའི་ཚེ་ཉིན་གྱི་དང་པོ་ལ་སྲོག་གཅོད་པ་ལ་སོགས་པའི་བྱ་བ་མངོན་དུ་མ་གྲུབ་པར་སེམས་རྣལ་དུ་མི་ཕེབས་པས་ཟས་ཀྱང་ཟ་བར་མི་བྱེད་པ་བཞིན་ནོ། །གསུམ་པ་གཉེན་པོའི་ཁྱད་པར་ནི། ལས་བྱས་པ་དེ་ཡང་རྟེན་གྱི་རང་བཞིན་བྱང་ཆུབ་སེམས་དཔའ་དང་། དཀོན་ཅོག་གསུམ་ལ་བརྟེན་ཅིང་རྣམ་པར་སུན་འབྱིན་པ་ལ་སོགས་པའི་གཉེན་པོ་སྟོབས་དང་ལྡན་པས་ཟིལ་གྱིས་མནན་ན་ཉམས་ཆུང་ངུར་འགྱུར་ལ། ལས་དེ་ཉིད་གཉེན་པོ་མེད་པར་འདོད་རྒྱལ་དུ་སྤྱོད་ན་སྟོབས་དང་ལྡན་པར་འགྱུར་རོ། །བཞི་པ་གཞི་ནི་རྣམ་པ་གཉིས་ཏེ། ཡོན་ཏན་དང་ལྡན་པ་དང་། ཕན་འདོགས་པའོ། །ཡོན་ཏན་དང་ལྡན་པ་ནི་དཀོན་མཆོག་གསུམ་དང་། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དང་། གང་ཟག་འགོག་པ་ལས་ལངས་པ་ལ་སོགས་པའོ། །ཕན་འདོགས་པ་ཕ་མ་དང་། བྱས་པ་དྲིན་དུ་གཟོ་དགོས་པ་དང་། སྙིང་རྗེའི་ཡུལ་དུ་གྱུར་པ་ལ་སོགས་པའོ། །དེའི་ཕྱིར་རྣམ་པ་ལྔ་པོ་དེ་ནི་དགེ་བ་དང་མི་དགེ་བའི་ལས་གང་བྱེད་ཀྱང་འབྲས་བུ་ངེས་པ་དང་། མང་པོ་འབྱིན་པའི་ཉེ་བར་ལེན་པ་པོ་ཡིན་པས་ན་དཔལ་ལྡན་ནཱ་གཱརྫུ་ནས། རྟག་དང་མངོན་པར་ཞེན་དང་གཉེན་པོ་མེད། །ཡོན་ཏན་གཙོ་ལྡན་གཞི་ལས་བྱུང་བའི་ལས། །དགེ་དང་མི་དགེ་རྣམ་ལྔ་ཆེན་པོ་སྟེ། །དེ་བས་དགེ་བ་སྤྱོད་ལ་བརྩོན་པར་བགྱི། །ཞེས་གསུངས་སོ། །དེ་ལྟར་དགེ་མི་དགེའི་ལས་དེ་དག་གི་འཆར་གཞི་དང་དབྱེ་བ་ཅུང་ཟད་བཤད་ན། ཀུན་གྱི་རྟེན་བྱེད་ཀུན་གཞི་ལུང་མ་བསྟན། །དེ་ལས་ཡིད་དང་ཡུལ་ལྔའི་ཤེས་པ་ལངས། །ཀུན་ལ་ཁྱབ་བྱེད་མ་རིག་གདོན་ཆེན་གྱིས། །ཉོན་མོངས་གསུམ་བཟུང་འཁོར་བར་མཐོ་དམན་བྱས། །འདི་ལྟར་དབྱེ་བསལ་གང་ཡང་སྤངས་པའི་ཀུན་གཞི་ལས་རྣམ་པར་རིག་བྱེད་ཀྱི་སེམས་ཀུན་གཞིའི་རྣམ་ཤེས་སུ་ཤར་བ་དེ་ཉིད་ཀྱི་འཆར་གཞི་བྱེད་ཀྱང་ཡུལ་ལ་འཕྲོ་བ་ནི་མེད་དོ། །དེ་ནས་ཡུལ་ལ་དེར་འཛིན་གྱི་བློ་ཆེ་ལོང་དུ་ཤར་ནས་དཔྱོད་པ་ནི་ང་ཡིར་འཛིན་པའི་ཡིད་དོ། །དེ་ནས་ཉོན་མོངས་པ་ཅན་གྱི་ཡིད་དགག་བསྒྲུབ་ཏུ་ཤར་བ་དང་མིག་ལ་བརྟེན་ནས་གཟུགས་མཐོང་བའི་མཐོང་ཆ་དེ་ཉིད་མིག་གི་རྣམ་པར་ཤེས་པར་གཞག་པས་མཚོན། རྣ་བ་དང་། སྣ་དང་། ལྕེ་དང་། ལུས་ལ་བརྟེན་ནས་སྒྲ་དང་། དྲི་རོ་རེག་བྱར་ཤེས་པའི་ཆ་ནི་ཡུལ་ལྔའི་ཤེས་པ་སྟེ། དེ་དག་སྔ་མའི་ཆ་ལས་ཕྱི་མའི་ཤེས་པ་སྐྱེ་ཞིང་མཆེད་པས་ན་སྐྱེ་མཆེད་ཅེས་ཀྱང་བྱ་ལ་དེའང་ཡུལ་དང་ཡུལ་ཅན་གྱི་བློ་རྟེན་དང་བརྟེན་པ་ལྟར་འདུས་པའི་ཚེ་བདེ་བའམ། སྡུག་བསྔལ་ལ་སོགས་པའི་རྣམ་པར་ཚོར་ཞིང་རིག་པའི་ཆ་ནས་འདུས་ཏེ་རེག་པའི་རྐྱེན་གྱི་ཚོར་བ་ཞེས་བྱའོ། །མདོར་བསྡུ་ན་རྣམ་པར་ཤེས་བྱའི་ཡུལ། ཤེས་བྱེད་ཀྱི་དབང་པོ། ཡིད་ལ་བྱེད་པ་གསུམ་ཚོགས་པ་ལས་སྐྱེས་པའི་དུག་གསུམ་གྱིས་ཀུན་ནས་བསླངས་པའི་ལས་ཐམས་ཅད་ནི་མི་དགེ་བའོ། །བྱམས་པ་ལ་སོགས་དུག་གསུམ་གྱི་ཀུན་སློང་དང་བྲལ་བར་སྐྱེས་པ་ཐམས་ཅད་ནི་དགེ་བའོ། །དེའང་ལམ་གྱི་ངོ་བོ་ཤེས་རབ་དང་སྙིང་རྗེས་མ་ཟིན་པའི་དགེ་བ་བཅུ་ལ་སོགས་པ་གཏི་མུག་གི་ས་པས་བསྡུས་པའི་ཕྱིར་ལྷ་མིའི་བདེ་འབྲས་བསྐྱེད་ནས་ཟད་པར་འགྱུར་བས་ན་བསོད་ནམས་ཆ་མཐུན་གྱི་དགེ་བ་ཞེས་བྱ་སྟེ་འབྲས་བུ་མངོན་མཐོའི་གོ་འཕང་ཙམ་ལས་མེད་པའི་ཕྱིར་རོ། །བཤད་མ་ཐག་པའི་ལམ་གྱིས་ཟིན་ཕན་ཆད་བྱང་ཆུབ་ཀྱི་རྒྱུར་འགྲོ་བས་ཐར་པ་ཆ་མཐུན་གྱི་དགེ་བ་ཡིན་ནོ། །ཐར་པ་ཆ་མཐུན་གྱིས་ནི་གནས་སྐབས་སུ་མངོན་པར་མཐོ་བ་དང་། མཐར་ཐུག་ངེས་པར་ལེགས་པ་གཉིས་ཀའི་རྒྱུ་བྱེད་དོ། །དེ་གཉིས་ཀའི་མི་མཐུན་ཕྱོགས་དུག་གསུམ་གྱིས་ཀུན་ནས་བསླངས་པའི་དགེ་བས་ནི་ངན་སོང་གསུམ་དང་སྡུག་བསྔལ་མཐའ་དག་གི་རྒྱུ་བྱེད་ལ། དེའི་རྟེན་གཞིའང་ནང་གི་ཁམས་གསུམ་ཉིད་ཡིན་ཏེ། སྤྱི་མདོ་ལས། ལུས་རགས་པ་འདོད་པའི་ཁམས་དང་། ངག་ཕྲ་བ་གཟུགས་ཀྱི་ཁམས་དང་། ཡིད་ཆེས་ཕྲ་བ་གཟུགས་མེད་པའི་ཁམས་ཏེ། གྲོང་ཁྱེར་དེ་གསུམ་ན་ཁྱེའུ་སྣང་བ་དམ་པ་གནས་སོ། །ཞེས་རྟེན་ཡིད་དང་བརྟེན་པ་རང་བྱུང་གི་ཡེ་ཤེས་ཀྱི་ཁྱད་པར་ཀྱང་བསྟན་ཏོ། །འདི་གསུམ་ལ་ཕྲ་རགས་ཀྱི་དབྱེ་བས་སྣང་བ་དང་། ཕྱེད་སྣང་བ་དང་། མི་སྣང་བའི་གྲོང་ཁྱེར་ཞེས་བྱ་སྟེ། དེ་ལྟར་གསུམ་པོའི་སྟེང་དུ་སྡུག་བསྔལ་གསུམ་གྱིས་གདུང་ཞིང་། གསུམ་པོ་ལས་བསྐྱེད་པའི་མི་དགེ་བ་ཆུང་ངུ་དང་། གཏི་མུག་གི་ལས་ཀྱིས་དུད་འགྲོ། འབྲིང་དང་འདོད་ཆགས་ཀྱི་ལས་ཀྱིས་ཡི་དྭགས། ཆེན་པོ་དང་ཞེ་སྡང་གི་ལས་ཀྱིས་དམྱལ་བ། དགེ་བ་བསོད་ནམས་ཆ་མཐུན་དང་ང་རྒྱལ་མཚུངས་ལྡན་གྱི་ལྷ་མི་གཉིས། ཕྲག་དོག་མཚུངས་ལྡན་གྱི་དགེ་བས་ལྷ་མ་ཡིན་ཏེ་གནས་རིགས་མཐོ་དམན་དུ་གྲུབ་པའོ། །དེ་ལྟར་གྲུབ་པ་ལའང་དགེ་སྡིག་གཉིས་ཀྱི་འཕེན་རྫོགས་ཀྱི་ཁྱད་པར་ནི། འཕེན་བྱེད་དགེ་བས་འཕངས་ལ་རྫོགས་བྱེད་དགེ་བས་རྫོགས་པ་དང་། འཕེན་བྱེད་དགེ་བས་འཕངས་ཀྱང་རྫོགས་བྱེད་མི་དགེ་བས་རྫོགས་པ་དང་། འཕེན་བྱེད་མི་དགེ་བས་འཕངས་ལ་རྫོགས་བྱེད་མི་དགེ་བས་རྫོགས་པ་དང་། འཕེན་བྱེད་མི་དགེ་བས་འཕངས་ཀྱང་རྫོགས་བྱེད་དགེ་བས་རྫོགས་པ་སྟེ་མུ་བཞིར་ཡོད་པ་ལས། དང་པོ་ནི་ལྷ་མིའི་རྟེན་ལ་རིགས་གཟུགས་དཔལ་འབྱོར་མཐའ་དག་ཕུན་སུམ་ཚོགས་པའོ། །གཉིས་པ་ནི། བདེ་འགྲོར་སྐྱེས་ཀྱང་དབང་པོ་དང་ཡན་ལག་མ་ཚང་ཞིང་དབང་ཐང་ཆུང་ངུར་གྱུར་པ་ལ་སོགས་སྡུག་བསྔལ་བ་རྣམས་སོ། །གསུམ་པ་ནི། ངན་སོང་གང་རུང་དུ་སྐྱེས་ནས་སྡུག་བསྔལ་གྱི་མཐའ་གཅིག་ཏུ་མནར་ཞིང་སྤྱོད་པའོ། །བཞི་པ་ནི། དུད་འགྲོ་འམ་ཡི་དྭགས་གཟུགས་དང་དཔལ་འབྱོར་ཕུན་སུམ་ཚོགས་པའི་རིགས་ཁ་ཅིག་གོ །དེའང་ལས་གཅིག་གིས་ལུས་གཅིག་ལས་མི་འཕེན་པ་ཡང་ཡོད། ལས་གཅིག་གིས་ལུས་དུ་མ་འཕེན་པའང་ཡོད། ལས་དུ་མས་ལུས་གཅིག་འཕེན་པའང་ཡོད། ལས་དུ་མས་ལུས་དུ་མ་འཕེན་པའང་ཡོད་དེ། འཕེན་བྱེད་ཀྱི་རྒྱུ་སྟོབས་དང་ནུས་པ་ཆེ་ཆུང་ལ་རག་ལས་པའི་ཕྱིར་རོ། །དེ་ལ་དང་པོ་ནི། རང་གི་བུ་ལ་སྙིང་རྗེ་སྐྱེས་པའི་བུད་མེད་ཚངས་པར་སྐྱེས་པ་ལྟ་བུ་དང་། གཉིས་པ་ནི་འཕགས་པ་མ་འགགས་པས་བདག་ནི་བསོད་ནམས་གཅིག་པུ་དེའི་རྣམ་པར་སྨིན་པས་སུམ་ཅུ་རྩ་གསུམ་གྱི་ལྷར་ལན་བདུན་སྐྱེས་ཤིང་ད་ལྟར་ཡང་ཤཱཀྱ་ཕྱུག་པོར་སྐྱེས་སོ། །ཞེས་པ་ལྟ་བུ་དང་། གསུམ་པ་ནི། ལྷས་བྱིན་གྱིས་ཚེ་རབས་དུ་མར་བསགས་པའི་ལས་ཀྱིས་དགེ་སློང་གི་གཟུགས་ལ་སྡིག་པའི་ཀུན་ཏུ་སྤྱོད་པ་ཅན་དུ་གྱུར་པ་དང་། བཞི་པ་ནི་འཕགས་པ་ཉེ་སྡེ་ལྟ་བུ་ལས་དུ་མའི་རྐྱེན་གྱིས་གསོས་ནས་ལུས་དུ་མ་གྲུབ་པ་ལྟ་བུ་ནི་མདོ་སྡེ་པ་ཡན་ཆད་འདོད་དོ། །འདི་ལྟར་ལས་བྱས་ལ་མ་བསགས་པ་དང་བསགས་ལ་མ་བྱས་པ་དང་། བྱས་ཤིང་བསགས་པ་དང་། མ་བྱས་ཤིང་མ་བསགས་པ་སྟེ་མུ་བཞིར་དབྱེ་བ་ལྟར་ན། དང་པོ་ནི་གཡུལ་འགྱེད་པ་ལྟ་བུ་ལ་མཚོན་ན། ཕ་རོལ་གྱི་མངའ་ཐང་ཕྲོག་པ་དང་། དགྲ་ཟླ་ཉམས་ཉེས་པར་བྱེད་པའི་འདུ་ཤེས་གང་ཡང་མེད་བཞིན་དུ། གཞན་གྱིས་རང་སྲིད་ལ་གཅེས་ནས་སྲོག་བསྲུང་བ་དང་། སྲིད་སྡེ་ཆོས་བཞིན་དུ་སྐྱོང་བ་ལྟ་བུ་ལ་གེགས་སུ་འགྱུར་བའི་དོགས་པས་སྐྲག་སྟེ། ལས་དེ་མི་འདོད་བཞིན་དུ། འགྱོད་བཞིན་དུ། དབང་མེད་དུ་སྤྱོད་དགོས་པ་ལྟ་བུ་བྱས་ལ་མ་བསགས་པ་ཡིན་ཡང་། ངོ་བོ་སྡིག་པའི་ལས་ཤིན་ཏུ་སྟོབས་ཆེ་ཤིང་། དེ་ལ་རྒྱུ་མཐུན་ཡང་སྣ་ཚོགས་ཚང་པས་ལས་གཅིག་གིས་ལུས་དུ་མ་འཕེན་པ་གྲུབ་པའོ། །གཉིས་པ་ནི། བརྫུན་དུ་སྨྲ་བ་ལྟ་བུས་དུས་རིང་མོ་ནས་བློ་ལ་དང་དུ་བླངས་ཀྱང་། དོན་ལ་མ་སྨྲས་པ་ལྟ་བུའོ། །གསུམ་པ་ནི་གནོད་སེམས་ཀྱང་སྐྱེས། གནོད་པ་ཡང་བློ་ཁེངས་པ་ཙམ་དུ་བྱས་པའོ། །བཞི་པ་ནི་ཀུན་སློང་བཏང་སྙོམས་ལས་རྣམ་པར་སྨིན་པའི་འབྲས་བུ་འབྱིན་མི་ནུས་པས་ལུང་མ་བསྟན་པའི་ལས་སོ། །དེའང་མཛོད་ལས་ནི། གཅིག་གི་སྐྱེ་བ་གཅིག་འཕེན་ནོ། །ཡོངས་རྫོགས་བྱེད་པ་དུ་མ་མིན། །ཞེས་འཕེན་བྱེད་གཅིག་གིས་སྐྱེ་བ་གཅིག་འཕེན་གྱིས་དུ་མ་མི་འཕེན། རྫོགས་བྱེད་ལ་དུ་མ་ཡོད་ཀྱང་། འཕེན་བྱེད་དུ་མས་སྐྱེ་བ་གཅིག་ཁོ་ན་མི་འཕེན་པར་བཤད་ཀྱང་། འདིར་རྟགས་དང་མངོན་པར་ཞེན་པ་ལ་སོགས་རྣམ་པ་ལྔའི་ལྕི་ཡང་གིས་རིགས་པས་གཞལ་བའོ། །དེ་དག་གིས་ནི་དགེ་མི་དགེའི་ལས་དང་། ལས་ཀྱི་འབྲས་བུ་རྟེན་ཅིང་འབྲེལ་འབྱུང་གི་ཆ་འཛིན་པའི་གནས་ཤེས་པར་བྱས་ནས། ད་ནི་ལས་ཀྱི་ལམ་དངོས་གཏན་ལ་དབབ་པའི་ཐོག་མར་དོ་ཟླ་མེད་པ་དཀོན་མཆོག་ལ་བརྟེན་པ་བཤད་པ་ནི། ཇི་ལྟར་མེ་ནི་འབར་ཞིང་བསྲེག་པ་ཡི། །གཉེན་པོར་ཆས་པ་ཆུ་ལས་གཞན་མེད་ན། །དཀོན་ཅོག་གསུམ་པོ་བསླུས་ཤིང་སྤངས་པ་ཡི། །སྡིག་ཆེན་དེ་ལ་དོ་ཟླ་རྙེད་པ་མིན། །འདི་ལྟར་ལས་ཀྱི་འབྲས་བུ་རྒྱ་མཚོ་ལྟ་བུར་མཐའ་གཏུགས་པ་མེད་པའི་ནང་ན་ཆུ་སྲིན་ལྟ་བུར་གཏོས་ཆེ་བ་ནི་དཀོན་མཆོག་གསུམ་ལ་བརྟེན་པའི་སྡིག་པ་རྣམས་ཡིན་ཏེ། ཕ་བསད་པ་དང་། མ་བསད་པ་ལ་སོགས་སྡིག་པའི་ལས་ཚན་པོ་ཆེ་ཡང་ཡུལ་དཀོན་ཅོག་གསུམ་ལ་བརྟེན་ནས་བཤགས་སུ་ཡོད་ལ། སྐུ་གསུང་ཐུགས་ཀྱི་རྟེན་བཤིག་པའམ། བསྐུར་ཞིང་བརྙས་པ་བྱས་པ་དང་། དམ་པའི་ཆོས་སྤངས་པ་དང་། ཐེག་པ་ཆེན་པོའི་དགེ་འདུན་ལ་བསྐུར་པ་དང་། དེ་དག་གི་དཀོར་ལ་འབགས་པ་ལ་སོགས་ནི་བཤགས་ཡུལ་ལ་ཉམས་པས་གཉེན་པོ་གཞན་གྱིས་གསོ་ཐབས་མེད་དེ། དཔེར་ན་མེ་གསོད་པའི་གཉེན་པོ་ནི་ཆུ་ཡིན་ལ། ཆུ་དེ་ཉིད་སྣོད་དུ་བསྩལ་ནས་མེས་མིང་ཙམ་མེད་པར་བསྐམས་པར་བྱས་ན། དེ་ནས་མེ་གསོད་པའི་གཉེན་པོ་གཞན་གང་ཡང་མེད་པ་བཞིན་ནོ། །དེའི་ཕྱིར་དཀོན་མཆོག་གསུམ་ལ་བརྟེན་པའི་སྡིག་པ་བྱུང་ན་གསུམ་པོ་ཉིད་ལ་བརྟེན་ནས་སྦྱང་དགོས། གང་ཞིག་གཙུག་ལག་ཁང་དང་མཆོད་རྟེན་བཤིག་པ་ལ་སོགས་བཤགས་པ་ཐུན་མོང་པས་མི་འདག །གང་བཤིག་པ་དེ་ཉིད་དེ་བས་ཆེས་ཆེ་ལ་མང་བ་བཞེངས། གལ་ཏེ་བདག་གིས་མ་འབྱོར་ན་གཞན་བཞེངས་པའི་རོགས་དན་ལ་ལུས་ངག་ཡིད་གསུམ་ཚུན་ཆད་འདྲེས་པར་བྱ་དགོས། དེ་བཞིན་ཆོས་ལ་ཉོ་ཚོང་དང་གཏའ་མར་བཅུག་པ་དང་། གླེགས་བམ་བཤིག་པ་ལ་སོགས་ལའང་དེའི་ཉིས་ལྡབ་བཞེངས། དགེ་འདུན་གྱི་དབྱེན་བྱས་པ་དང་། དཀོར་ཕྲོགས་པ་ལ་སོགས་ལ། སྡེ་གཟུགས་པ་དང་། དེའི་གཡོག་དང་། བསྙེན་བསྐུར་བྱ་བ་ལ་སོགས་པའི་ཕྱི་ནས་ཐམས་ཅད་ལ་སྟོབས་བཞི་ཚང་བའི་བཤགས་པ་བྱའོ། །དེའང་མེ་ནི་མིའི་བསོད་ནམས་ཡིན་ཀྱང་ཧ་ཅང་ཉེ་ན་འཚིག་པ་བཞིན། དཀོན་མཆོག་གསུམ་ལ་མ་བརྟེན་ན་ནི་ཆོས་བསྒྲུབ་པའི་རྒྱུ་མེད་དོ། །དེ་ལ་བརྟེན་ནས་དྲན་པ་ཉེ་བར་མ་བཞག་པ་ལ་ལ་ནི་མཁས་པའི་ང་རྒྱལ་གྱིས་ཆོས་སྤོང་། དེ་སྤངས་པས་དེའི་ཕྱོགས་འཛིན་པའི་རྨོངས་པ་གླང་པོ་ཆེ་ལུས་སྟོབས་ཀྱིས་བསྒྱིངས་པ་ལྟ་བུའི་གཏི་མུག་ཅན་དག་གིས་སྐུ་གསུང་ཐུགས་རྟེན་བཤིག་པ་ལ་སོགས་པའི་ཕྱོགས་རིས་རྒྱ་བོད་གཉིས་ཀར་བྱུང་ངོ་། །མདོ་ལས་ཆོས་ཀྱིས་ཕོངས་པར་གྱུར་པའི་ལས་བསགས་པ་དེའི་རྣམ་པར་སྨིན་པ་ནི་ཚད་མེད་བསམ་གྱིས་མི་ཁྱབ་སྟེ། མནར་མེད་པའི་སེམས་ཅན་དམྱལ་བ་ཆེན་པོར་སྐྱེས་ནས། དེར་ཡང་མེས་སྡུད་པའི་བསྐལ་པ་བྱུང་བ་དེའི་ཚེ་འཇིག་རྟེན་གྱི་ཁམས་གཞན་གྱི་དམྱལ་བ་ཆེན་པོ་དག་ཏུ་འདོང་ཞིང་དེར་ཡང་ཞེས་སྔར་བཞིན་བསྟན་ནས་ཕྱོགས་བཅུ་གང་གཱའི་ཀླུང་གི་བསྐལ་བའི་བར་དུ་ལས་དེ་མྱོང་བར་གསུངས་པས་བཟོད་པར་དཀའ་བའོ། །སྐྱེ་བོ་མ་བརྟགས་པ་དང་། བབ་ཅོལ་དུ་འཇུག་པ་དག་གིས་ནི་དཀོན་མཆོག་གི་དཀོར་ལ་ཇི་མི་སྙམ་པར་སྤྱོད་ཅིང་། དེའང་བླ་མ་དང་དགེ་འདུན་གྱི་ལས་བྱེད་དང་། དཀོན་མཆོག་གི་དཀོར་གཉེར་བྱེད་པ་དག་ལ་ཁེ་ཉེན་ཆེན་པོ་གཉིས་ཡོད་པའི་ཕྱོགས་མ་ཡིན་པ་ཁོ་ན་ལ་འཇུག་པ་མང་བའི་ཕྱིར་སློབ་དཔོན་འཕགས་པས་ཀྱང་སྨོན་ལམ་བཏབ་པའི་དོན་རང་འདོད་ཀྱིས་དགག་པར་མི་བྱའོ། །ད་ནི་ལུས་ངག་ཡིད་གསུམ་ལ་རྟེན་དང་བརྟེན་པར་འབྲེལ་བའི་རྒྱུ་འབྲས་མཐའ་དག་གི་རྟེན་སེམས་དང་སེམས་བྱུང་གི་རྣམ་གྲངས་སྨོས་ནས་རང་གི་དབྱེ་བ་དངོས་སྟོན་པའི་ཕྱིར། དེ་ལས་གཞན་དུ་འགྲོ་བའི་ཀུན་རྟོག་ལ། །རང་བཞིན་འབྲེལ་གྱུར་སེམས་དང་སེམས་བྱུང་ལས། །མཐའ་དག་བློ་ཡིས་ཐུག་པ་མ་མཆིས་ཀྱང་། །ལུས་ངག་ཡིད་ལ་རྟེན་དང་བརྟེན་པ་ཅན། །སྤང་བྱའི་རྒྱུ་འབྲས་རྣམ་པ་བཅུར་གནས་པའི། །ཞེས་པ་ནི་སྔར་བཤད་པའི་སྒོ་ལྔ་དང་། ཡིད་ཤེས་ཙམ་གྱིས་ལས་མི་གསོག་ཀྱང་ཉོན་ཡིད་ཀྱིས་ཀུན་གཞིའི་སྟེང་དུ་ལས་གསོག་པའི་སེམས་རྟོག་རགས་པའི་ཚོར་བ་ནི་གསུམ་སྟེ། ཡུལ་ཡིད་དུ་འོང་བ་ལ་བདེ་བ། མི་འོང་བ་ལ་སྡུག་བསྔལ། བར་མ་ལ་བཏང་སྙོམས་སོ། །དེ་བཞིན་དུ་འདུ་ཤེས་ལ་གསུམ་སྟེ། ཡུལ་ལ་འཇུག་པ་རྒྱ་ཆེ་བ། ཆུང་བ། བར་མའོ། །དེ་ནས་འདུ་བྱེད་ལ་སེམས་བྱུང་ལྔ་བཅུ་རྩ་གཅིག་སྟེ། ལྡན་པའི་འདུ་བྱེད་ཀུན་ཏུ་འགྲོ་བ་ལྔ་ནི། རེག་པ། ཡིད་ལ་བྱེད་པ། ཚོར་བ། འདུ་ཤེས། སེམས་པའོ། །ཡུལ་སོ་སོར་ངེས་པ་ལྔ་ནི། མོས་པ། འདུན་པ། དྲན་པ། ཏིང་ངེ་འཛིན། ཤེས་རབ་བོ། །དགེ་བ་བཅུ་གཅིག་ནི། དད་པ། ངོ་ཚ། ཁྲེལ་ཡོད་པ། བག་ཡོད་པ། བཏང་སྙོམས། མི་འཚེ་བ། ཤིན་ཏུ་སྦྱངས་པ། འདོད་ཆགས་མེད་པ། ཞེ་སྡང་མེད་པ། གཏི་མུག་མེད་པ། ང་རྒྱལ་མེད་པའོ། །རྩ་བའི་ཉོན་མོངས་པ་དྲུག་ནི། འདོད་ཆགས། ཁོང་ཁྲོ། ང་རྒྱལ། མ་རིག་པ། འཇིག་ཚོགས་ལ་བལྟ་བ། ཐེ་ཚོམ་མོ། །ཉེ་བའི་ཉོན་མོངས་པ་ཉི་ཤུ་ནི། ཕྲག་དོག །སེར་སྣ། གཡོ་སྒྱུ། རྒྱགས་པ། རྨུགས་པ། རྒོད་པ། མ་དད་པ། ལེ་ལོ། གཡེང་བ། བག་མེད་པ། བརྗེད་ངས་པ་ཤེས་བཞིན་མ་ཡིན་པ། འཚེ་བ། ངོ་ཚ་མེད་པ། ཁྲེལ་མེད་པ། ཁྲོ་བ། འཁོན་འཛིན། འཆབ་པ། འཚིག་པ་རྣམས་སོ། །འགྱོད་པ། གཉིད། རྟོག་པ། དཔྱོད་པ་སྟེ་རྣམ་པ་བཞི་ནི་གཞན་དུ་གྱུར་པ་ཡིན་ནོ། །དེ་ལས་གཞན་པའི་རྟོག་ཚོགས་བརྒྱད་ཁྲི་བཞི་སྟོང་ནི་བློས་ཐུག་པ་མ་ཡིན་ལ། འདི་དག་རེ་རེ་བཞིན་ལས་དང་ལས་ཀྱི་འབྲས་བུར་བཞག་པའི་རྣམ་གཞག་གྲགས་མི་ཆེ་ཡང་། ལུས་ངག་ཡིད་གསུམ་གྱི་ཕྱོགས་སུ་བསྡུས་ནས་རྣམ་པ་བཅུར་བསྟན་པ་ནི། མཛོད་ལས། དེ་ལས་ཆེ་ལོང་བསྡུས་ནས་ནི། །དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུར་གསུངས་སོ། །ཞེས་སོ། །སྤྱིར་རྟོག་ཚོགས་རྣམ་པ་ཐ་དད་ཚོགས་པ་ལས་འཇིག་རྟེན་ལས་ཀྱི་གྲུབ་པ་ཡིན་ཏེ། ལས་བརྒྱ་པ་ལས། ཨེ་མ་ཧོ། འཇིག་རྟེན་ལས་ལ་སྐྱེས། །བདེ་དང་སྡུག་བསྔལ་ལས་ཀྱིས་བྲིད། །རྐྱེན་རྣམས་ཚོགས་ན་ལས་འབྱུང་ཞིང་། །ལས་ཀྱིས་བདེ་དང་སྡུག་བསྔལ་བྱེད། །ཅེས་ཀུན་གཞི་ལུང་མ་བསྟན་གྱི་སྟེང་ན་འཁོར་བའི་རྒྱུ་འབྲས་མི་དགེ་བ་དང་། དགེ་བ་དམན་པ་བསོད་ནམས་ཆ་མཐུན་དང་། མྱ་ངན་ལས་འདས་པའི་བྲལ་བྱའི་རྒྱུ་ཐར་པ་ཆ་མཐུན་རྣམས་དང་། རྣམ་པར་བྱང་བའི་ལས་ལམ་མངོན་པར་རྟོགས་པ་ཇི་སྙེད་པ་ཀུན་བརྟེན་པ་ཡིན་ལ། དེ་ཡང་གདོད་མ་ནས་མེད་ཀྱང་གློ་བུར་དུ་སྐྱེས་པ་རྣམས་གསོག་པའི་རྟེན་བྱེད་པ་ཡིན་ནོ། །དེ་ལ་སྡུག་བསྔལ་དང་ངན་འགྲོ་བསྐྱེད་པའི་ཕྱིར་སྤང་བྱའི་སྒོ་ནས་མི་དགེ་བ་བཅུ་དང་། བདེ་བ་དང་མཐོ་རིས་སྡུད་པའི་ཕྱིར་བླང་བྱའི་སྒོ་ནས་དགེ་བ་བཅུར་འགྱུར་པ་བསོད་ནམས་ཆ་མཐུན་གྱི་ལས་ལམ་བཅུ་ལས་ཕྱོགས་དང་པོ་བཤད་པ་ལ། ལུས་ཀྱི་གསུམ་ནི་སྲོག་གཅོད་མ་བྱིན་བླངས། །ལོག་པར་གཡེམ་ལས་དང་པོ་སྲོག་གཅོད་ནི། །འདུ་ཤེས་མ་འཁྲུལ་གཞན་སྲོག་བསམ་བཞིན་གཅོད། །ཕྱོགས་མཐུན་བརྡེག་བཙོག་ལ་སོགས་འཚེ་བ་བགྱིད། །མ་བྱིན་བླང་བ་གཞན་ནོར་ཤེས་བཞིན་བརྐུ། །ཕྱོགས་མཐུན་གཡོ་དང་སྒྱུ་ཡིས་ལེན་པ་དང་། །འདོད་ལོག་གླ་རྔན་ཐོབ་ལ་རེག་པ་སྤྲོད། །ཕྱོགས་མཐུན་བགྲོད་བྱ་མ་ཡིན་འཁྲིག་པའི་ཆོས། །དེ་ལ་སྲོག་གཅོད་པ་དང་། མ་བྱིན་པར་བླང་བ་དང་། འདོད་པས་ལོག་པར་གཡེམ་པ་སྟེ་ལུས་ཀྱི་ལས་རྣམ་པ་གསུམ་པོ་ལ་དངོས་བསྟན་དང་། ཕྱོགས་མཐུན་པ་རེ་རེ་སྟེ་གཉིས་གཉིས་སུ་སྨོས་པ་ལས། དང་པོ་སྲོག་གཅོད་པའི་དངོས་བསྟན་གྱི་ཉེས་པ་ནི་ཡན་ལག་རྣམ་པ་ལྔས་རྫོགས་པར་འགྱུར་ཏེ། གཞི་སེམས་ཅན་ཡིན་པ་དང་། དེར་འདུ་ཤེས་པ་དང་། གསད་པར་བསམ་པ་དང་། སྦྱོར་བ་བྱས་པ་དང་། སྦྱོར་བ་བྱས་པ་དེ་ཉིད་ཀྱི་ཚེའམ། གཞན་གྱི་ཚེ་ཤི་བ་སྟེ་ཡན་ལག་ལྔའོ། །ཕྱོགས་མཐུན་ནི་གསོད་སེམས་མངོན་དུ་གྱུར་པ་མེད་ཀྱང་བརྡེག་བཙོག་ལ་སོགས་པས་རྐྱེན་བྱས་ནས་ཤི་བའོ། །གཉིས་པ་མ་བྱིན་པར་བླང་པ་ནི་ཡན་ལག་བཞིས་རྫོགས་པར་འགྱུར་ཏེ། བླང་བྱའི་རྫས་གཞན་གྱིས་བདག་ཏུ་བཟུང་བ་ཡིན་པ་དང་། ཡིན་པར་རང་གིས་ཀྱང་ངོ་ཤེས་པ་དང་། ཤེས་བཞིན་དུ་བརྐུ་བར་བསམ་པ་དང་། དེ་ནས་གནས་སྤོས་ཏེ་བདག་གིས་ཐོབ་པར་བྱས་པའོ། །ཕྱོགས་མཐུན་པ་ནི་གཡོས་བླང་བ་ཚོང་དང་། འོས་མིན་གྱི་ཆད་པ་སོགས་ཐབས་ལ་བརྟེན་པ་རྣམས་སོ། །སྒྱུས་བླང་བ་ནི་བྲེ་ལོག་དང་སྲང་ལོག་འཛུག་པ་ལྟ་བུའོ། །འདོད་པས་ལོག་པར་གཡེམ་པ་ལ་རྣམ་པ་བདུན་ཏེ། བདག་ཉིད་ལས་བྱུང་བ་དང་། རང་གི་ཆུང་མ་ལས་བྱུང་བ་དང་། ཆུང་མར་མི་རིགས་པ་ཆུང་མར་བྱས་པ་ལས་བྱུང་བ་དང་། སྐྱེས་པ་ལས་བྱུང་བ་དང་། དུད་འགྲོ་ལས་བྱུང་བ་དང་། ཁྱེའུ་དང་བུ་མོ་ལས་བྱུང་བའོ། །དེ་ལ་བདག་ཉིད་ལས་བྱུང་བ་ནི། ཡུལ་བུད་མེད་ལ་སོགས་པ་དྲན་ནས་བདག་ཉིད་ཀྱིས་ཁུ་བ་འབྱིན་པའོ། །རང་གི་ཆུང་མ་ལས་བྱུང་བ་ནི། དུས་མ་ཡིན་པ་ཉིན་པར་དང་། བསྙེན་གནས་ལ་གནས་པ་དང་། ན་བ་དང་། སྒྲུམ་པ་དང་། མྱ་ངན་གྱིས་གདུང་བ་དང་། ཟླ་མཚན་དང་ལྡན་པ་དང་། བང་མ་སངས་པ་དག་གོ །གནས་མ་ཡིན་པ་ནི་ཕ་མ་དང་། བླ་མ་དང་། དཀོན་མཆོག་དང་། མཆོད་རྟེན་ལ་སོགས་པའི་གནས་དང་། ཡན་ལག་མ་ཡིན་པ་ནི། ཁ་དང་། བཤང་ལམ་དང་། ལྟེ་བ་ལ་སོགས་མདོར་ན་བུད་མེད་ཀྱི་དབང་པོ་ལས་གཞན་པ་ཐམས་ཅད་དོ། །གསུམ་པོ་ནི་གཞན་ལའང་འགྲེའོ། །ཆུང་མར་མི་རིགས་པ་ཆུང་མར་བྱས་པ་ལས་བྱུང་བ་ནི། ཚངས་པར་སྤྱོད་པའི་དགེ་བསྙེན་མ་དང་། དགེ་སློང་མ་བོད་ན་མེད་པས་རྒྱུ་མེད་ལ། དགེ་སློབ་མའམ། དགེ་ཚུལ་མའམ། བསྙེན་གནས་ལ་གནས་པའི་བུད་མེད་དེ་ཉིད་དགའ་ཡང་རུང་། མི་དགའ་ཡང་རུང་། སྡོམ་པ་གཏོང་བའི་རྐྱེན་བྱས་པའོ། །ཆུང་མ་མ་ཡིན་པ་ལས་བྱུང་བ་ནི། ཁྱིམ་ཐབ་གཞན་གྱིས་བཟུང་བ་དང་། རང་གིས་བདུན་རྒྱུད་མ་འདས་པའི་ཉེ་དུར་གྱུར་པ་དང་། ཆོས་ཀྱི་རྒྱལ་མཚན་ཅན་དང་། སྡོམ་པ་ཅན་དང་། ཕ་མ་དང་། མིང་པོ་དང་། སྤུན་ཟླ་དང་། རུས་ཆགས་དང་། ཁྱོ་འབྲང་དུ་སྨོས་པས་བསྲུང་བ་དང་། གྱོས་སྒྱུག་དང་། སྐུད་པོ་སྟེ་ཁྱོའི་ཕྱོགས་སྨོས་པས་བསྲུངས་པ་དང་། མི་མཉམ་པའི་རིགས་དང་ཡོན་ཏན་གྱིས་བསྲུངས་པ་དང་། སྨད་འཚོང་མར་གྱུར་ཀྱང་སྐྱེས་བུ་གཞན་གྱིས་རིན་བྱིན་ཟིན་པས་བསྲུང་བ་དང་། གཞན་དག་གིས་ཆུང་མ་དང་འདྲ་བར་བདག་གིར་བྱས་པ་རྣམས་གང་ཡང་རུང་བར་འཁྲིག་པའི་ཆོས་བསྟེན་པ་རྣམས་སོ། །སྐྱེས་པ་ལས་བྱུང་བ་ནི། སྐྱེས་བུ་གཞན་གྱིས་ཁ་དང་། བཤང་བའི་ལམ་ལ་སོགས་པར་མཚན་སྦྱོར་བའོ། །དུད་འགྲོ་ལས་བྱུང་བ་དེ་དང་དེའི་མཚན་དང་བཤང་ལམ་སོགས་པར་རོ། །ཁྱེའུ་དང་བུ་མོ་ལས་བྱུང་བ་ནི། འཁྲིག་པ་སྤྱད་མི་བཟོད་པ་ལ་དབང་མེད་ཀྱིས་ལས་བཅོལ་ནས་དེ་དག་གི་ཁ་དང་། བཤང་ལམ་དང་། མཚན་མར་སྦྱོར་བའོ། །ལོག་པར་གཡེམ་པ་དེ་དག་ནི་ཡན་ལག་གསུམ་གྱིས་རྫོགས་པར་འགྱུར་ཏེ། ཡུལ་དང་དུས་ལ་སོགས་པ་དེ་དང་དེར་འདུ་ཤེས་པ་དང་། སྦྱོར་བ་བྱས་པ་དང་། རྗེས་སུ་མཐུན་པའི་ཚོར་བ་ཉམས་སུ་མྱོང་བའོ། །འདི་དག་ནི་དགེ་བ་བཅུའི་ལས་ལམ་བསྟན་པའི་གཞུང་ཇི་ལྟ་བར་སྨོས་པ་སྟེ། རང་གཞུང་གི་ཚིག་ཟིན་འབྲང་ན། གླ་བརྔན་ཐོབ་པ་ནི། གཞན་གྱིས་གླ་སྤྲད་ནས་བདག་ཏུ་བཟུང་བ་དང་། སྨད་འཚོང་མ་སོགས་པར་བརྔན་བྱིན་པ་དང་། རྟགས་ཀྱིས་སྤྲས་པ་དང་མ་སྤྲས་ཀྱང་རུང་སྟེ་དེ་དང་འདྲ་བར་ཡུལ་དུས་ཀྱིས་བསྲུངས་པའོ། །ཕྱོགས་མཐུན་ནི་བགྲོད་བྱ་མ་ཡིན་པ་དབང་པོ་ལས་གཞན་དུ་གྱུར་པ་མཐའ་དག་སྟེ་མཛོད་འགྲེལ་ལས། ཡན་ལག་གི་དབང་པོ་རང་གི་རྩོལ་བ་ལ་སོགས་པའོ། །ཞེས་སོ། །སློབ་དཔོན་རྟ་དབྱངས་ཀྱིས། བགྲོད་པར་བྱ་མིན་ཞེས་བྱ་ནི། །གཞན་བཟུང་ཆོས་ཀྱི་རྒྱལ་མཚན་ལྡན། །རིགས་ཀྱིས་བསྲུངས་དང་རྒྱལ་པོས་བསྲུངས། །གཞན་གྱིས་བླངས་པའི་སྨད་འཚོང་དང་། །ཉེ་དུ་དག་དང་འབྲེལ་བ་དང་། །དེ་དག་བགྲོད་བྱ་མིན་པ་ཡིན། །ཅེས་ཡན་ལག་མ་ཡིན་པ་ལས་གཞན་དུ་བཤད་པས་མཚོན་རྒྱ་གཞུང་རྣམས་ཀྱང་དོན་ལ་མཐུན་ཀྱང་མིང་གི་གདགས་ཕྱོགས་ཐ་དད་པའོ། །འདིར་ལུས་ངག་གི་ལས་ནི་གཟུགས་ཅན་ཡིན་པས་རང་གིས་དངོས་སུ་བྱས་ན་ལྟ་ཅི་སྨོས། གཞན་བྱེད་པའི་གྲོས་སུ་ཐེ་ནས་བསམ་པ་མཐུན་ནའང་བྱེད་པ་པོ་དང་ཁྱད་པར་མེད་དེ་མཛོད་ལས། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་གསུངས་ལ། དེ་ལྟ་ནའང་སྨྱོས་པ་དང་། སེམས་འཁྲུལ་པ་དང་། ཚོར་བས་གཟིར་བ་རྣམས་ལ་ནི་ཉེས་པ་མེད་ཅིང་། དེ་བཞིན་དུ་གཞི་དང་། བསམ་པ་དང་། སྦྱོར་བ་དང་། མཐར་ཐུག་བཞི་པོ་མ་ཚང་ནའང་ལས་དེ་མཐར་ཐུག་པ་མ་ཡིན་པའི་ཚུལ་ཀུན་ལ་སྦྱར་རོ། །ངག་གི་བཞི་ནི་རྫུན་སྨྲས་གཞན་དག་འཁྲུལ། །ཕྱོགས་མཐུན་འདུ་ཤེས་བསླད་ནས་གཞན་སེམས་བསླུ། །ཕྲ་མ་མཐུན་ནམ་བཏང་སྙོམས་གནས་པ་འདྲལ། །ཕྱོགས་མཐུན་སྐྱོན་ཚིག་གཞན་བཟློས་འཁོན་དུ་འཆོས། །ངག་འཁྱལ་བྲེ་མོའི་གཏམ་ལས་ཆགས་སྡང་བསྐྱེད། །ཕྱོགས་མཐུན་དམག་དང་ཆོམ་རྐུན་འབྲེལ་མེད་གཏམ། །ཚིག་རྩུབ་ཕ་རོལ་སྙིང་ལ་འབིགས་པ་སྟེ། །ཕྱོགས་མཐུན་གཞན་ཡིད་མི་བདེའི་རྐྱེན་དང་སྤྲོད། །ངག་གི་བཞི་པོ་ལའང་དངོས་བསྟན་དང་ཕྱོགས་མཐུན་པ་གཉིས་ལས། དངོས་བསྟན་གྱི་བརྫུན་ནི་ཡན་ལག་བཞིས་རྫོགས་པར་འགྱུར་ཏེ། སྨྲ་བའི་གཞི་མ་ནོར་བ་དང་། གཞན་བསླུ་བའི་བསམ་པ་དང་ལྟ་བ་ཡིད་ལ་བཞག་ནས་བདེན་པ་མ་ཡིན་པར་སྨྲས་པ་དང་། དེའི་འདུ་ཤེས་བསྒྱུར་བའོ། །སློབ་དཔོན་བློ་གྲོས་ཆེན་པོ་ནི། ཐེ་ཚོམ་ཟ་བའི་དངོས་པོ་ལ་ངེས་པ་བཞིན་དུ་སྨྲ་བ་ཡང་བརྫུན་དུ་སྨྲ་བ་ཁོ་ན་ཡིན་ནོ་ཞེས་འཆད་དོ། །དེ་ལ་གཞི་མ་ནོར་བ་ཞེས་པ་ནི། རང་ཉིད་འཕགས་པ་མ་ཡིན་པ་དང་། དེ་བཞིན་དུ་མངོན་ཤེས་མེད་པ་རང་ལ་ལྐོག་ཏུ་མ་གྱུར་བཞིན་དུ། དེ་ལྟར་ཡིན་ནོ་བའི་བདེན་པ་མ་ཡིན་པ་དངོས་སུ་སྨྲ་བའམ། ཡི་གེར་འདྲི་བའམ། ལུས་ཀྱི་བརྡའ་སྤྲད་པ་དེ། ཕ་རོལ་པོས་གོ་ནས་འཕགས་པའམ་མངོན་ཤེས་ཅན་དུ་འཁྲུལ་ཞིང་འདུ་ཤེས་འགྱུར་བ་སྟེ་བརྫུན་རླབས་པོ་ཆེ་མི་ཆོས་བླ་མར་གྲགས་པས་མཚོན་པའོ། །ཕྱོགས་མཐུན་ནི་དྲང་པོ་ལྟར་བརྫུས་པའི་ཚིག་གིས་ཕ་རོལ་བསླུ་བར་ཤེས་ནས་བརྗོད་པའོ། །ཕྲ་མ་ནི་ཡན་ལག་གསུམ་གྱིས་རྫོགས་པ་ཡིན་ཏེ། དབྱེ་བའི་གཞི་གང་ཟག་ཕན་ཚུན་མཛའ་བའམ། བཏང་སྙོམས་སུ་གནས་པ་ལ། དབྱེན་སྦྱོར་གྱི་ཚིག་སྨྲས་པ་དང་། མཐར་དོན་གོ་བའོ། །རྫུན་དང་ཕྲ་མ་གཉིས་ལ་འདྲ་རུང་བའི་གནས་སྐབས་ཀྱང་ཡོད་དེ། བརྫུན་ནི་བསླུ་བའི་བསམ་པ་ཅན་དང་། ཕྲ་མ་ནི་དབྱེ་བའི་བསམ་པ་ཅན་དུ་ཁྱད་པར་དབྱེའོ། །ཕྱོགས་མཐུན་ནི་ཕན་ཚུན་ཡི་མ་རངས་པའི་ཚིག་དེ་དང་དེ་ལ་བསྐྱར་ཞིང་སྨྲས་པའོ། །ངག་འཁྱལ་ནི། གཞན་གསུམ་པོ་གང་དུའང་མ་གཏོགས་པ་ཉོན་མོངས་པའི་སེམས་ཀྱིས་བརྗོད་པ་དང་། གསུམ་པོའི་དོན་མཐར་ཐུག་པ་ཕ་རོལ་པོས་མ་གོ་ནའང་ངག་འཁྱལ་དུ་འགྲོ་བར་ཤེས་མཛོད་གཉིས་ཀའི་འགྲེལ་པས་བསྟན་ཏོ། །དེ་སྐད་དུ་བཙུན་པ་ཆོས་ལྡན་རབ་འབྱོར་དབྱངས་ཀྱིས་ཀྱང་ཚིག་འཁྱལ་པ་ནི་ཡན་ལག་གཉིས་ཀྱིས་རྫོགས་པར་འགྱུར་ཏེ། ཆོས་དང་མི་ལྡན་པ་དེར་བསམ་པ་དང་། ཚིག་འཁྱལ་པ་སྨྲས་པའོ། །ཞེས་ཆོས་དང་མི་ལྡན་པ་ཆོས་སུ་བསམས་ནས་ཚིག་འཁྱལ་པར་སྨྲས་པ་མཐའ་དག་ཡིན་པས། མཆོད་སྦྱིན་དང་། སྙན་དངགས་ལ་སོགས་པ་དང་། བྲམ་ཟེའི་གསང་སྔགས་དང་། ཆགས་སེམས་ཀྱི་གླུ་དང་། ཟློས་གར་གྱི་ཚིག་དང་། སྨད་འཚོང་མའི་གཏམ་དང་། སྔོན་རྒྱ་གར་དུ་གཞི་ལྔ་བསྔགས་པར་བྱས་པ་ལྟ་བུ་ཆོས་དང་འགལ་བའི་བསྟན་བཅོས་ལ་སོགས་དང་། མདོར་ན་བྲེ་མོའི་གཏམ་འདོད་རྒྱལ་ལམ་གནམ་བབས་སུ་བརྗོད་པས་ཆགས་སྡང་སྐྱེ་བའི་གནས་སུ་གྱུར་པ་མཐའ་དག་གོ །ཕྱོགས་མཐུན་ནི། དམག་དང་ཆོམ་རྐུན་ལ་སོགས་དུས་དང་མ་འབྲེལ་བའི་བརྗོད་པ་སྨྲ་བའོ། །ཚིག་རྩུབ་ནི་ཡན་ལག་གསུམ་གྱིས་རྫོགས་པ་ཡིན་ཏེ། གཞི་གང་ཟག་དེ་ལ་ཆེད་དུ་དམིགས་པ་དང་། སྦྱོར་བ་ཚིག་རྩུབ་མོ་སྨྲས་པ་དང་། མཐར་ཐུག་ཡིད་མི་དགའ་བར་བྱས་པའོ། །ཕྱོགས་མཐུན་ནི། ཚིག་སྙན་པར་སྨྲས་ཀྱང་དོན་གྱིས་ཡིད་མི་བདེ་བའི་གནས་ལ་སྦྱར་བའོ། །ཡིད་ཀྱི་གསུམ་ལ་དང་པོ་བརྣབ་སེམས་ནི། གཞན་འབྱོར་དཔལ་ལ་བརྔམས་ཤིང་བདག་གིར་བྱེད། །ཕྱོགས་མཐུན་ཕ་རོལ་རྫས་ལ་བརྐམ་ཞིང་མྱང་། །གནོད་སེམས་གཞན་ལ་ཁོང་འཁྲུགས་འཚེ་བ་སློང་། །ཕྱོགས་མཐུན་ཕན་པས་འབྲེལ་ལ་འདུ་འབྲལ་བསྒོམ། །ལོག་ལྟ་རྒྱུ་འབྲས་མེད་དང་རྟག་ཆད་བལྟ། །ཕྱོགས་མཐུན་མེད་ལ་སྒྲོ་འདོགས་ཡོད་ལ་བསྐུར། །ཡིད་ཀྱི་རྣམ་པ་གསུམ་པོ་ལའང་དངོས་དང་། ཕྱོགས་མཐུན་པ་རེ་རེ་ལས། བརྣབ་སེམས་ནི་ཡན་ལག་གཉིས་ཀྱིས་རྫོགས་པ་སྟེ། གཞི་གང་ལ་བརྣབ་སེམས་སྐྱེ་བའི་དངོས་པོ་གཞན་གྱི་ཡིན་པ་དང་། དེ་ལ་བརྣབ་སེམས་བསྐྱེད་པའོ། །འདི་ལ་ཆོས་ལྔ་ལྡན་གྱི་སེམས་སྦྱོར་བར་དཔྱད་ན། གཞི་གཞན་གྱི་མ་ཡིན་ན་བརྣབ་པའི་རྒྱུ་མེད། དེ་ལ་ཆགས་སེམས་མ་བསྐྱེད་ན་བརྣབ་པའི་རྐྱེན་མེད། རྫས་དེའི་ཁྱད་པར་མཐོང་ནས་རོ་མྱོང་བཞིན་དུ་ཡིད་ཀྱིས་བདག་གིར་མ་བྱས་ན་འཁུ་སེམས་དངོས་བསྟན་དུ་མི་འགྱུར། ཡིད་ཀྱིས་རྩོལ་བ་མི་བྱེད་ན་བརྣབ་སེམས་ཀྱང་མ་ཡིན་པས། ཆོས་བཞི་པོ་དེ་ནི་བརྣབ་སེམས་སྐྱེས་པའི་མོད་ལ་ལྷན་སྐྱེས་སུ་ཚང་བ་ཞིག་ཡིན་ནོ། །ཡང་སྐྱེ་བ་ཕྱི་མ་མངོན་མཐོའི་བདེ་འབྲས་ཐོབ་པར་འདོད་ནས་སྨོན་ལམ་འདེབས་པ་ལྟ་བུའང་བརྣབ་སེམས་ཀྱི་མཐར་ཐུག་ཏུ་འདོད་ན། ལོང་བ་ཞིག་གིས་མིག་འཐོབ་པར་ཤོག་ཅིག་སྨོན་པ་དེའང་བརྣབ་སེམས་སུ་འགྱུར་བས་ན་མིག་ལྡན་སུ་ཞིག་གི་མིག་ལ་དམིགས་པ་ཡིན། རིགས་པ་འདིས་ནི་བསོད་ནམས་ཆ་མཐུན་གྱི་ལས་འབྲས་ལ་ཉེས་པ་བསྐྱེད་པར་ཤེས་པར་བྱའོ། །མཛོད་ལས་ཀྱང་། བརྣབ་སེམས་ལོག་པས་གཞན་ནོར་ཆགས། །གནོད་སེམས་སེམས་ཅན་ལ་སྡང་བ། །དགེ་དང་མི་དགེ་མེད་བལྟ་བ། །ལོག་པར་བལྟ་བ་ཡིན་འདི་ལ། །ཞེས་པས་སྐྱེ་བ་འདིར་གནས་རིགས་མཐུན་པའི་ནོར་ལ་བརྐམ་ཞིང་ཡིད་ཀྱིས་བདག་གིར་བྱེད་པ་ཁོ་ནར་འདོད་ལ། ཚངས་དབང་ལ་སོགས་པའི་གནས་ཐོབ་ན་དེའི་མངའ་རིས་དང་ལོངས་སྤྱོད་དེ་ལ་མི་དབང་པར་གཞན་སུ་ཞིག་གི་བརྣབ་སེམས་ཀྱི་རྗེས་སུ་འགྲོ། །ཡང་འགྲོ་བ་རྣམ་འབྱེད་ཀྱི་འགྲེལ་པ་ལས། ཐོས་པ་སོགས་ལ་ཁྲོ་བས་བརྣབ་སེམས་པ་དང་། ཕན་པར་མི་དགའ་བས་ཁྲོ་བ་དང་། ཡང་དག་པའི་དགེ་བའི་བཤེས་གཉེན་དང་། ཆོས་དང་། གཞན་ལ་བསྐུར་བ་འདེབས་པ་ནི་དེའི་ཕྱོགས་མཐུན་པའོ། །ཞེས་གཞན་གྱི་ཡོ་བྱད་ལ་སོགས་པ་ལ་རང་གི་ཡིན་ན་ཅི་མ་རུང་སྙམ་ནས་འཁུ་སེམས་ཀྱིས་བདག་གིར་བྱེད་པ་ནི་བརྣབ་སེམས་ཡིན་ལ། ཕ་རོལ་གྱི་རྫས་དང་། ཐོས་པ་ལ་སོགས་པ་ལ་མི་བཟོད་བཞིན་དུ་བདག་གི་དབང་དུ་གྱུར་ན་སྙམ་པ་ནི་ཕྱོགས་མཐུན་ནོ། །གནོད་སེམས་ནི་ཡན་ལག་གཉིས་ཀྱི་རྫོགས་པར་འགྱུར་ཏེ། གཞི་སེམས་ཅན་ཡིན་པ་དང་། དེ་ལ་ཀུན་ནས་མནར་སེམས་པའོ། །དེའི་ཁྱད་པར་ཞིབ་ཏུ་བཤད་ན། སེམས་ཅན་གཞན་ལ་ཞེ་སྡང་བའམ། ཁོང་ཁྲོ་བ་སྟེ་དེ་ལ་ཀུན་ནས་མནར་སེམས་ཀྱི་དངོས་པོ་དགུ་ཡིན་ཏེ། བདག་ལ་གནོད་པ་བྱས་སོ། །བྱེད་དོ། །བྱེད་པར་འགྱུར་རོ་སྙམ་པ་དང་། གང་བདག་གི་བཤེས་སུ་གྱུར་པ་ཡིད་དུ་འོང་བ་ཕན་པར་འདོད་པ་གང་ཡིན་པ་དེ་ལ་གནོད་པར་བྱས་སོ། །བྱེད་དོ། །བྱེད་པར་འགྱུར་རོ་སྙམ་པ་དང་། བདག་དང་མི་མཛའ་བ། ཡིད་དུ་མི་འོང་བ། གནོད་པར་འདོད་པ། ཕན་པར་མི་འདོད་པ་གང་ཡིན་པ་དེ་ལ་ཕན་པར་བྱས་སོ། །བྱེད་དོ། །བྱེད་པར་འགྱུར་རོ་ཞེས་སྔོན་གྱི་འཁོན་དང་འབྲེལ་པ་ལས། འདས་པ་དང་། ད་ལྟ་བ་དང་། མ་འོངས་པ་གསུམ་གྱི་རྣམ་པར་རྟོག་པས་སྔོན་བསུ་རྗེས་དཔྱོད་ཀྱི་ཁྱད་པར་ལས། གནོད་བྱེད་ལ་ཤིན་ཏུ་མི་སྡུག་པ་ཞེ་སྡང་གི་སེམས། འཁོན་འཛིན་ཡང་ཡང་དྲན་པ་ཁོང་ཁྲོའི་སེམས། དེ་ལ་ཤིན་ཏུ་མི་བཟོད་པ་ང་རྒྱལ་གྱི་སེམས། བསད་ན་དང་བརྡེག་ན་ཅི་མ་རུང་སྙམ་པ་འཁུ་བའི་སེམས། ངོ་ཚ་དང་ཉེས་དམིགས་ཟིལ་གྱིས་ནོན་པ་གཏི་མུག་གི་སེམས་ཏེ་ཆོས་ལྔ་དང་ལྡན་པ་ཉིད་ཡིན་ནོ། །ཕྱོགས་མཐུན་ནི། ཕན་པར་མི་དགའ་ཞིང་། ངན་པ་འདུ་བ་དང་། བཟང་པོ་དང་འབྲལ་བར་བསྒོམ་པའོ། །ལོག་པར་བལྟ་བ་ནི་ཡན་ལག་གཉིས་ཀྱིས་རྫོགས་པར་འགྱུར་ཏེ། གཞི་ཕྱིན་ཅི་མ་ལོག་པ་རྒྱུ་འབྲས་ཀྱི་ཆོས་ངེས་པར་མི་བསླུ་བ་ཉིད་ལ་བསམ་པ་ཕྱིན་ཅི་ལོག་དགེ་བ་དང་མི་དགེ་བའི་འབྲས་བུ་ནི་མེད་དོ་སྙམ་དུ་ངེས་པར་སེམས་པའི་ལོག་ལྟ་དང་། རྟག་ཆད་དུ་བལྟ་བའོ། ཕྱོགས་མཐུན་པ་ནི་ཆོས་དང་གང་ཟག་ཁྱད་པར་ཅན་ལ་ཞེ་སྡང་བ་དང་། རྨོངས་པ་གང་དག་དགེ་སྡིག་གི་འབྲས་བུ་མཐོང་ཆོས་སུ་མ་སྨིན། ལས་སྟོབས་པོ་ཆེ་བསགས་པའི་གང་ཟག་ལ་ལ་རེ་ཞིག་བདེ་འགྲོར་སྐྱེས་སོ་ཟེར་བ་ལྟ་བུས་ལས་འབྲས་ལ་བདེན་ནམ་མི་བདེན་ནམ་སྙམ་པ་བྱེད་པ་མང་བ་དེའང་རྒྱུ་འབྲས་ལ་ལོག་པར་བལྟ་བའི་ཕྱོགས་མཐུན་དུ་འགྱུར་རོ། །ད་ནི་དེ་དག་གི་འབྲས་བུ་བཤད་པ། ཀུན་ལ་འབྲས་བུ་བཞི་བཞིར་སྨིན་པའི་ཚུལ། །རྣམ་སྨིན་རྒྱུ་མཐུན་དབང་དང་བྱེད་པ་ལས། །ཞེས་ཡུལ་མི་དགེ་བ་དང་། ཀུན་སློང་མི་དགེ་བ་དང་། བསམ་སྦྱོར་མི་དགེ་བས་བསྐྱེད་པས་ན་རྣམ་པར་སྨིན་པ་དང་། རྒྱུ་མཐུན་པ་དང་། དབང་ངམ་བདག་པོའི་འབྲས་བུ་སྟེ་གསུམ་པོའི་སྟེང་དུ། མན་ངག་གིས་བྱེད་པའི་འབྲས་བུ་བསྣན་ཏེ་བཞིར་ཡོད་པ་ལས། ཕྱོགས་དང་པོ་བཤད་པའི་ཕྱིར། རྣམ་སྨིན་འབྲས་བུ་ཆོས་ལྔ་ལྡན་ནམ་མིན། །ཀུན་སློང་གསུམ་གྱི་ཆུང་ངུས་དུད་འགྲོ་དང་། །འབྲིང་གི་ཡི་དྭགས་ཆེན་པོས་དམྱལ་བར་འཕེན། །འདི་ལྟར་མི་དགེ་བའི་ལས་དེ་དག་ལ། ཀུན་ནས་སློང་བའི་སེམས་དང་། རྗེས་སུ་སྤྱོད་པའི་སྦྱོར་བ་དང་། སྦྱོར་བའི་གཞི་བསམ་པ་དེ་ཉིད་དང་། སྦྱོར་བའི་འབྲས་བུ་དངོས་གཞི་ཉིད་སྤྱད་པ་དང་། མཇུག་རྗེས་སུ་ཡི་རང་བ་སྟེ་ཆོས་ལྔའི་ཡན་ལག་དང་ལྡན་ན་མི་དགེ་བའི་ལས་དེ་མཐར་ཕྱིན་པ་རྫོགས་པ་ཡིན་ལ། དེའང་རྩ་བའི་ཉོན་མོངས་གསུམ་གྱི་ཀུན་སློང་དག་གིས་དེ་དང་རྗེས་སུ་མཐུན་པའི་ལས་ལམ་བཅུ་པོ་རྫོགས་པར་བྱེད་པའི་ཚུལ་ཆོས་མངོན་པའི་ཚིག་ལེའུར་བྱས་པ་ལས། གསོད་དང་གནོད་སེམས་ཚིག་རྩུབ་དག །ཞེ་སྡང་གིས་ནི་མཐར་ཕྱིན་བྱེད། །ལོག་གཡེམ་བརྣབ་སེམས་མ་བྱིན་ལེན། །ཆགས་པ་ཡིས་ནི་མཐར་ཕྱིན་བྱེད། །ལོག་པར་བལྟ་བ་གཏི་མུག་གིས། །ལྷག་མ་གསུམ་གྱིས་རྫོགས་པར་འདོད། །ཅེས་སོ། །དེ་ལ་ཀུན་སློང་གི་སྒོ་ནས་བཞག་ན་ཞེ་སྡང་ལ་བརྟེན་པ་རྣམས་ཀྱིས་ནི་དམྱལ་བར་འགྲོ་ལ། འདོད་ཆགས་ལ་བརྟེན་པ་རྣམས་ཀྱིས་ནི་ཡི་དྭགས། གཏི་མུག་ལ་བརྟེན་པ་རྣམས་ཀྱིས་ནི་དུད་འགྲོར་སྐྱེའོ། །ལས་སྟོབས་ཆེ་ཆུང་གི་སྒོ་ནས་བཞག་ན། དྲན་པ་ཉེར་བཞག་ལས། རྣམ་པར་སྨིན་པ་འདི་དག་གི་ཆུང་ངུས་ནི་དུད་འགྲོ་རྣམས་སུ་སྐྱེའོ། །འབྲིང་གིས་ནི་ཡི་དྭགས་རྣམས་སུ་སྐྱེའོ། །ཆེན་པོས་ནི་དམྱལ་བ་རྣམས་སུ་སྐྱེའོ། །ཞེས་སོ། །བྱེད་པའི་ཡུལ་ལྕི་ཡང་གི་སྒོ་ནས་བཞག་ན། འཕགས་པ་དེ་བཞིན་གཤེགས་པའི་མཛོད་ཀྱི་མདོ་ལས། འོད་སྲུངས། ཕ་ཡང་ཡིན་ལ་རང་སངས་རྒྱས་ཀྱང་ཡིན་པ་གསོད་པ་གང་ཡིན་པ་འདི་ནི་སྲོག་གཅོད་པའི་ནང་ན་མ་རུངས་པའོ། །དཀོན་མཆོག་གསུམ་གྱི་དཀོར་འཕྲོག་པ་འདི་ནི་མ་བྱིན་པ་ལེན་པའི་ནང་ན་མ་རུངས་པའོ། །མ་ཡང་ཡིན་ལ། དགྲ་བཅོམ་མ་ཡང་ཡིན་པ་ལས་ཉལ་པོ་བྱས་པ་འདི་ནི་འདོད་པས་ལོག་པར་གཡེམ་པའི་ནང་ན་མ་རུངས་པའོ། །དེ་བཞིན་གཤེགས་པ་ལ་བསྐུར་པ་འདེབས་པ་འདི་ནི་རྫུན་དུ་སྨྲ་བའི་ནང་ན་མ་རུངས་པའོ། །དགེ་འདུན་གྱི་དབྱེན་བྱེད་པ་འདི་ནི་ཕྲ་མའི་ནང་ན་མ་རུངས་པ་ཡིན་ནོ། །འཕགས་པ་རྣམས་ལ་མི་སྙན་པ་བརྗོད་པ་འདི་ནི། ངག་རྩུབ་པོ་རྣམས་ཀྱི་ནང་ན་མ་རུངས་པ་ཡིན་ནོ། །ཆོས་ཐོས་པར་འདོད་པ་རྣམས་རྣམ་པར་གཡེང་བར་འདོད་པ་འདི་ནི། ཚིག་འཁྱལ་བའི་ནང་ན་མ་རུངས་པ་ཡིན་ནོ། །ཡང་དག་པར་སོང་བ་དང་། ཡང་དག་པར་ཞུགས་པ་རྣམས་ཀྱི་རྙེད་པ་ལ་འཕྲོག་པར་སེམས་པ་འདི་ནི། བརྣབ་སེམས་ཀྱི་ནང་ན་མ་རུངས་པ་ཡིན་ནོ། །མཚམས་མེད་པ་བྱེད་པ་འདི་ནི། གནོད་སེམས་ཀྱི་ནང་ན་མ་རུངས་པ་ཡིན་ནོ། །ལྟ་བ་མཆོག་ཏུ་འཛིན་པ་འདི་ནི། ལོག་པར་བལྟ་བའི་ནང་ན་མ་རུངས་པ་ཡིན་ནོ། །ཞེས་གསུངས་སོ། །ཕྱོགས་གཉིས་པ་བཤད་པ། རྒྱུ་མཐུན་འབྲས་བུ་རྣམ་པ་གཉིས་གྲུབ་སྟེ། བྱེད་པ་རྒྱུ་མཐུན་བྱེད་ལས་མཐུན་པར་སྐྱེ། གང་དུ་མི་དགེ་བའི་ཀུན་ཏུ་སྤྱོད་པ་ལ་གོམས་ཤིང་ཀུན་ཆུབ་པར་བྱས་པས། ཕྱིར་ཡང་དེ་དང་བྱེད་པ་མཐུན་པའི་ལུས་རྟེན་ཐོབ་ནས། སྔ་མའི་སྤྱོད་པ་ངན་པ་ལ་འཇུག་ཅིང་། ལས་དེ་མུ་མཐའ་མེད་པར་འཕེལ་ནས་སྡུག་བསྔལ་མཐའ་དག་པ་བསྐྱེད་པ་ཡིན་ཏེ། ལས་བརྒྱ་པ་ལས། དེ་མི་དགེ་བ་ཀུན་ཏུ་སྤྱོད་ལ་གོམས་ཤིང་འདྲིས་པར་བྱས་པས། ཕྱིར་ཡང་མི་དགེ་བ་ལ་བརྟེན། མི་དགེ་བ་ལ་སྤྱོད། མི་དགེ་བའི་རྗེས་སུ་འཇུག་པ་ཉིད་དུ་སྐྱེ་སྟེ། ཞེས་གསུངས་སོ། །མྱོང་བ་རྒྱུ་མཐུན་མཐོ་རིས་ཐོབ་གྱུར་ཀྱང་། །རིམ་བཞིན་མི་དགེ་བཅུ་ལ་གཉིས་གཉིས་ལྡན། །འཚོ་བ་ཐུང་ལ་ནད་ཀྱང་རྣམ་གྲངས་མང་། །ཡོ་བྱད་ཉུང་ཞིང་དགྲ་དང་ཐུན་མོང་ཅན། །ཁྱིམ་ཐབས་མི་མཛེས་དགྲ་ཟླར་འབྲེལ་བ་དང་། །བསྐུར་པས་གདུང་ཞིང་གཞན་གྱིས་བསླུ་བ་མང་། །འཁོར་གཡོག་ངན་ཞིང་འདུམས་པར་དཀའ་བ་དང་། །ཚིག་བཟུང་མི་འོས་ཡིད་ཆེས་ཞན་པ་དང་། །མི་སྙན་མང་ཐོས་འཐབ་མོའི་ཚིག་ཏུ་འདྲུལ། །ཆོག་མི་ཤེས་དང་འདོད་པས་གདུང་བ་དང་། །གནོད་པ་འདུ་ཞིང་ཕན་པ་འབྲལ་བ་དང་། །བལྟ་བ་ངན་དང་གཡོ་སྒྱུས་འཁྲུགས་པའོ། །དེ་སྐད་དུ་འཕགས་པ་སྡོང་པོ་བཀོད་པ་ལས། སྲོག་གཅོད་པས་ནི་སེམས་ཅན་དམྱལ་བར་འཁྲིད་དོ། །བྱོལ་སོང་གི་སྐྱེ་གནས་སུ་འཁྲིད་དོ། །གཤིན་རྗེའི་འཇིག་རྟེན་དུ་འཁྲིད་དོ། །ཞེས་རྣམ་སྨིན་གྱི་འབྲས་བུ་ཐམས་ཅད་ཀྱི་མགོར་སྦྱར་ནས། དེ་ནས་ཅི་སྟེ་མིར་སྐྱེས་ནའང་རྣམ་པར་སྨིན་པ་གཉིས་མངོན་པར་བསྒྲུབ་པ་ནི་འདི་ལྟ་སྟེ། ཚེ་ཐུང་བ་དང་། ནད་མང་བའོ། །མ་བྱིན་པར་ལེན་པ་ནི། དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་བསྒྲུབ་པ་ནི་འདི་ལྟ་སྟེ། ཅེས་པའང་འོག་མ་ཐམས་ཅད་ལ་སྦྱར་རོ། །ལོངས་སྤྱོད་ཆུང་བ་དང་། ཐུན་མོང་གི་ལོངས་སྤྱོད་དུ་འགྱུར་རོ། །འདོད་པས་ལོག་པར་གཡེམ་པས་ནི། ལྷོད་པ་དང་བཅས་པའི་ཆུང་མ་དང་གཡོག་འཁོར་མི་བསྲུན་པའོ། །བརྫུན་དུ་སྨྲ་བས་ནི། བསྐུར་བ་མང་བ་དང་། གཞན་གྱིས་བསླུ་བའོ། །ཕྲ་མས་ནི། གཡོག་མི་མཐུན་པ་དང་། གཡོག་ངན་པར་འགྱུར་རོ། །ཚིག་རྩུབ་པོས་ནི། ཡིད་དུ་མི་འོང་བའི་ཚིག་ཐོས་པ་དང་། འཐབ་མོའི་ཚིག་ཐོས་པར་འགྱུར་བའོ། །ངག་འཁྱལ་པས་ནི། ཚིག་མི་བཙུན་པ་དང་། སྤོབས་པ་མེད་པའོ། །བརྣབ་སེམས་ཀྱིས་ནི། ཆོག་མི་ཤེས་པ་དང་འདོད་པ་མེད་པའོ། །གནོད་སེམས་ཀྱིས་ནི། གནོད་པས་གླགས་བལྟ་བ་དང་། ཕ་རོལ་གྱིས་མནར་བའོ། །ལོག་པར་བལྟ་བས་ནི། ལྟ་བ་ངན་པར་ལྟུང་བ་དང་། གཡོ་སྒྱུ་ཅན་དུ་འགྱུར་བའོ། །ཞེས་པ་དང་མཚུངས་པ་དྲན་པ་ཉེར་གཞག་དང་། རིན་ཆེན་ཕྲེང་བ་ལས་ཀྱང་བཤད་དོ། །ཕྱོགས་གསུམ་པ་ནི། དབང་གི་འབྲས་བུ་ཡུལ་དང་རྟེན་ཅིང་འབྲེལ། །སྲོག་གཅོད་སྡིག་ཏོའི་ཁུར་གྱིས་ནོན་པ་སྟེ། །ས་ཕྱོགས་བག་ཆུང་སྨན་ཤིང་མེ་ཏོག་ཉུང་། །ལོ་འབྲས་བཟའ་བཏུང་མཐུ་ཉམས་འཇུ་དཀའ་ཞིང་། །སྲོག་ལ་ཡ་ངའི་གནས་སུ་ཕྱིན་པར་འགྱུར། །མ་བྱིན་བླངས་པས་མྱུ་གུ་འཇོམས་པ་སླ། །བཟའ་ཤིང་ཡོད་ཀྱང་འབྲས་བུས་རྣམ་པར་སྨད། །སད་ཀྱིས་གདུང་དང་སེར་བས་རྣམ་པར་འཐག །མུ་གེའི་སྡུག་བསྔལ་སྙིང་ལ་འཕོ་བར་སྐྱེ། །ལོག་པར་གཡེམ་པས་བཤང་ཅིའི་འདམ་རྫབ་ཁྲོད། །དྲི་ངའི་ཚོར་བ་རྩུབ་མོས་དབུགས་མི་ཕྱིན། །མི་གཙང་ལྗན་ལྗིན་དོག་ཅིང་ཉམས་མི་དགའི། །ཡུལ་དུ་སྐྱེ་བའི་འཁྲི་ཤིང་དབང་མེད་འཛུགས། །རྫུན་གྱིས་འབྱོར་པ་གཡོ་ཞིང་ཡུལ་མི་མཐུན། །གཞན་གྱིས་བསླུ་དང་འཇིགས་པས་བརྟབས་ཤིང་སྐྲག །ཕྲ་མས་ས་ཕྱོགས་ངམ་གྲོག་གཅོང་རོང་ཅན། །བགྲོད་དཀའ་མཐོ་དམན་ཅན་གྱི་ཡུལ་ལ་གནས། །བརྗོད་པ་རྩུབ་མོས་རྡོ་གསེག་ཚེར་མ་ཅན། །སྡོང་དུམ་འབྲས་ངན་རྩུབ་དང་ཉམས་མི་བདེ། །ཚྭ་སྒོ་ཅན་དང་རྡུལ་མང་ཉལ་ཉིལ་ཁྲོད། །ཡིད་མི་བདེ་བའི་ཚོར་བ་ཉམས་སུ་མྱོང་། །ཀྱལ་ཀས་སོ་ནམས་ངལ་བ་འབྲས་མེད་ཅིང་། །དུས་ཀྱི་རྗེས་སུ་མི་འགྲོ་མི་བརྟན་འགྱུར། །བརྣབ་སེམས་སྤུན་དང་འབྲས་བུ་གོ་ལྡོག་ཅིང་། །གནས་དུས་གདུག་པས་སྐབས་བཙལ་མཐོང་བར་སྐྱེ། །གནོད་སེམས་སྡིག་སྤྱོད་རྒྱལ་པོ་དང་འབྲེལ་ཞིང་། །ཆོམ་རྐུན་སྦྲུལ་གདུག་མི་རྒོད་གཅན་གཟན་རྩུབ། །ལོ་ཏོག་འབྲས་བུའི་རོ་ཡང་ཚ་ཞིང་ཁ། །རང་བཞིན་གནོད་པས་བཀབ་པའི་ཡུལ་དུ་སྐྱེ། །ལོག་ལྟས་རིན་པོ་ཆེ་སོགས་ཕུན་ཚོགས་ཀྱི། །འབྱོར་པས་ཀུན་ནས་སློང་ཞིང་སྨན་ཤིང་ཉུང་། །མེ་ཏོག་འབྲས་བུ་དག་ཀྱང་མཐུ་ཆུང་ལ། །སྐྱབས་དང་སྐྱོབ་པ་དཔུང་གཉེན་མེད་པར་སྐྱེ། །ཞེས་རྣམ་པར་གཏན་ལ་དབབ་པ་བསྡུ་བའི་དོན་རང་ཚིག་གིས་ཡུལ་དང་རྗེས་སུ་འབྲེལ་བ་གསལ་པོར་བསྟན་ཏོ། །ཕྱོགས་བཞི་པ། སྐྱེས་བུ་བྱེད་པའི་འབྲས་བུ་གང་བྱས་ལས། །མང་པོར་འཕེལ་བས་སྡུག་བསྔལ་མཐའ་དག་བསྐྱེད། །སྐྱེས་བུ་བྱེད་པའི་འབྲས་བུ་འདི་ནི་བྱེད་པ་རྒྱུ་མཐུན་དང་མི་འདྲ་བའི་ཁྱད་པར། དྲན་པ་ཉེར་གཞག་ཆུང་ངུ་ལས། སྐྱེས་བུ་གཏི་མུག་ཅན་སྡིག་པ་བྱེད་པ་དེ་དག་ནི། ཡང་ཕྱིར་ཞིང་སྡིག་པ་འཕེལ་བས་རབ་ཏུ་སྡུག་བསྔལ་བར་འགྱུར་རོ། །ཞེས་རྒྱུ་མཐུན་པའི་སྲིད་པར་ཉིང་མཚམས་སྦྱོར་བ་ལ་མི་ལྟོས་པར་མི་དགེ་བ་གང་བྱས་དེ་ཉིད་འཕེལ་བས་སྡུག་བསྔལ་ཐོབ་པར་འགྱུར་རོ། །ད་ནི་དེ་དག་གི་དོན་བསྡུ་བའི་ཕྱིར། འདི་ལྟར་མུན་པ་ལས་ཀྱང་མུན་ནག་ཅན། །འཁོར་བའི་བཙོན་ར་ཤིན་ཏུ་བརྣག་དཀའ་བར། །ཉེར་ལེན་ཕུང་པོའི་སྟེང་དུ་སྡུག་བསྔལ་དཔལ། །བཟོད་དཀའི་ཚོར་བ་ཐོབ་འདི་སྡིག་པས་བྱས། །དེ་ཡང་གཟུགས་ལ་སོགས་ཉེ་བར་ལེན་པའི་ཕུང་པོ་ལྔའི་སྟེང་དུ་སྡུག་བསྔལ་མཐའ་དག་བསྐྱེད་པའི་རྩ་བ་ནི། ཕྲ་རྒྱས་ཀྱི་མི་དགེ་བ་རྣམ་པ་སྣ་ཚོགས་པ་སྟེ། དེའང་ཡུལ་ལ་ལྟོས་ནས་སྟོབས་ཆེ་བ། ཕ་གསོད་པ། མ་གསོད་པ། དགྲ་བཅོམ་པ་གསོད་པ། དགེ་འདུན་གྱི་དབྱེན་བྱེད་པ། དེ་བཞིན་གཤེགས་པའི་སྐུ་ལ་ངན་སེམས་ཀྱི་ཁྲག་འབྱིན་པ་སྟེ་མཚམས་མེད་པ་ལྔ། དེའང་མཛོད་ལས། མཚམས་མེད་གླིང་གསུམ་དག་ན་ཡོད། །ཟ་མ་སོགས་ལ་མི་འདོད་དོ། །ཕན་དང་ངོ་ཚ་ཆུང་བའི་ཕྱིར། །ཞེས་བཤད་པས། སྒྲ་མི་སྙན་མ་གཏོགས་པའི་གླིང་གསུམ་གྱི་སྐྱེས་པ་དང་བུད་མེད་ཀྱི་རྟེན་དུ་འབྱུང་ཞིང་། ཟ་མ་དང་མ་ནིང་སོགས་ལ་ནི་མི་འབྱུང་ལ། དེའི་ནང་ཚན་དགེ་འདུན་འཁོར་ལོའི་དབྱེན་ནི་མི་འབྱུང་སྟེ། སྔ་མ་ལས། སྔ་རོལ་ཐུབ་པ་ནོངས་པ་དང་། །མཚམས་མ་བཅས་པ་དག་ཏུ་ཡང་། །འཁོར་ལོའི་དབྱེན་ནི་མི་འབྱུང་ངོ་། །ཞེས་སོ། །དེ་བཞིན་དུ་ཉན་ཐོས་རང་ལམ་ནས་ཉོན་མོངས་པའི་དགྲ་སྡེ་མཐའ་དག་བཅོམ་པའི་དགྲ་བཅོམ་པ་ཡང་འཚེ་བའི་ཡུལ་དུ་རྔོ་མི་ཐོགས་ཏེ། བདེན་པ་བཞིའི་གནས་ལ་རྩོད་པའི་ཀློག་པ་རྒྱ་ཆེའང་། འགོག་ལམ་གཉིས་ཀྱི་བདེན་པས་ཟག་པ་མེད་པའི་ཤེས་རབ་ལ་དམིགས་པ་ཤིན་ཏུ་ཉུང་བའི་ཕྱིར་རོ། །དེ་བཞིན་དུ་ལྷས་བྱིན་གྱི་སྒྱོགས་རྡོའི་ཟེར་མ་ལྟར་དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་འབྱིན་པ་སོགས་ཐེག་དམན་གྱི་ལམ་ནས་བཤད་པའི་དངོས་བསྟན་འབྱུང་བའི་ཡུལ་མཐའ་དག་མ་ཚོགས་ཀྱང་། དེ་དང་ཉེ་བ་ལྔ་ཡོད་དེ་མཆོད་རྟེན་བཤིག་པ་དང་། བྱང་སེམས་གསོད་པ་དང་། དགྲ་བཅོམ་མ་ལ་མི་ཚངས་པར་སྤྱོད་པ་དང་། འཕགས་པ་སློབ་པ་གསོད་པ་དང་། དགེ་འདུན་གྱི་ཞལ་དུ་འདུ་བའི་སྒོ་འཕྲོག་པ་ལ་སོགས་པ་ནི་ཕལ་ཆེར་འབྱུང་ཉེ་ལ། དེའང་མ་སྐྱེས་དགྲའི་ལྟུང་བ་བྱང་བ་ལས་ནི། རང་སངས་རྒྱས་བསད་པ་དང་། དགྲ་བཅོམ་མ་ལ་མི་ཚངས་སྤྱོད་པ་དང་། དཀོན་མཆོག་གསུམ་གྱི་དཀོར་ནོར་ལ་སྤྱོད་པ། འདུམ་པའི་དགེ་འདུན་གྱི་དབྱེན་བྱེད་པ་སྟེ་ཉེ་བ་བཞིར་བཤད་དོ། །ཞར་ལ་ལྕི་བའི་ཁ་ན་མ་ཐོ་བ་བཅུ་དྲུག་དང་། ལོག་པ་བརྒྱད་ཀྱང་བཤད་སྟེ། མཁས་པའི་གོང་ལྕི། དགེ་སློང་གི་ཕྱག་ལྕི། སྒྲུབ་པ་པོའི་ཟས་ལྕི། སྔགས་པའི་རྫས་ལྕིའོ། །དེ་བཞིན་དུ་མི་ཆོས་ཀྱི་མནའ་ཟོས་པ་དང་། ཉན་ཐོས་ཀྱི་ཁྲིམས་ཉམས་པ་དང་། བྱང་སེམས་ཀྱི་བསླབ་བྱ་ཉམས་པ་དང་། གསང་སྔགས་ཀྱི་དམ་ཚིག་ཉམས་པ་རྣམས་ལྕིའོ། །ཡང་། གཏི་མུག་གི་དབང་གིས་སྟོན་པའི་སྐུ་ལ་སྨད་པ་དང་། ང་རྒྱལ་གྱི་དབང་གིས་མཁས་པའི་ཡོན་ཏན་ལ་སྨད་པ་དང་། ཕྲག་དོག་གི་དབང་གིས་བདེན་པའི་ཚིག་ལ་སྨད་པ་དང་། ཕྱོགས་རིས་ཀྱི་དབང་གིས་ཆོས་ལ་དགག་བསྒྲུབ་བགྱིས་པ་རྣམས་སོ། །མཚམས་མེད་ལྔའི་ནང་ནས་ཁྲག་འབྱིན་པ་དང་། མི་དགེ་བཅུའི་ནང་ནས་ལོག་ལྟ་དང་། མཉམ་པའི་ཆོས་ལ་ཁྱད་དུ་གསོད་པ། རང་བཞིན་མེད་པ་ལ་གལ་འཛུགས་པ་སྟེ། བཞི་ཚན་རེ་རེ་བཞིན་ལོག་པ་དང་། ཉམས་པ་དང་། སྨད་པ་དང་། སྐུར་བའི་ལྕི་བ་ཞེས་རིམ་བཞིན་སྦྱར་རོ། །ལོག་པ་བརྒྱད་ནི། དགེ་བ་ལ་སྨད་པ། སྡིག་པ་ལ་བསྟོད་པ། དགེ་བ་ཅན་དཀྲུགས་པ། དད་པ་ཅན་གྱི་ཚོགས་བཅག་པ། བླ་མ་དང་། ཡི་དམ་དང་། མཆེད་ལྕམ་སྤངས་པ། དཀྱིལ་འཁོར་གཉན་པོ་འདྲལ་བ་རྣམས་སོ། །ཁྱད་པར་བྱང་ཆུབ་སེམས་དཔའ་ལ་བརྟེན་པའི་ཉེས་པ་ནི་བཟོད་པར་དཀའ་སྟེ། དད་སྟོབས་བསྐྱེད་པ་ཕྱག་རྒྱའི་མདོ་ལས། ཕྱོགས་བཅུའི་སེམས་ཅན་ཐམས་ཅད་བཙོན་དུ་བཅུག་པ་ལས། བྱང་ཆུབ་ཏུ་སེམས་བསྐྱེད་པའི་གང་ཟག་ལ་ཁྲོས་ཏེ་རྒྱབ་བསྟན་པས་སྡིག་པ་ཆེའོ། །ཆུ་བོ་གངྒཱའི་བྱེ་མའི་རྡུལ་གྲངས་དང་མཚུངས་པའི་མཆོད་རྟེན་བཤིག་པ་བས། བྱང་ཆུབ་སེམས་དཔའ་ལ་གནོད་སེམས་དང་ཁོང་ཁྲོ་བ་དང་། ཚིག་ངན་དང་སྐུར་པ་བཏབ་པ་རྣམས་སྡིག་པ་ལྕིའོ། །ཞེས་དང་། རྣམ་པར་ངེས་པའི་ཆོ་འཕྲུལ་གྱི་མདོ་ལས་ཀྱང་། འཛམ་བུའི་གླིང་གི་སེམས་ཅན་ཐམས་ཅད་ཀྱི་སྲོག་གཅད་དམ། ཀ་ཆ་འཕྲོག་པ་ལས། བྱང་ཆུབ་སེམས་དཔའ་དུད་འགྲོའི་རིགས་ལ་ཟན་ཆངས་གཅིག་སྟེར་བའི་བར་ཆད་བགྱིས་པའི་སྡིག་པ་སྟོབས་ཆེའོ་གསུངས། དེ་བཞིན་དུ་ཚོགས་ཀྱི་སྒོ་ནས་ཀྱང་སེམས་ཅན་ཐམས་ཅད་བཙོན་ནས་བཏོན་ཏེ་འཁོར་ལོས་སྒྱུར་བ་དང་། ཚངས་པའི་བདེ་བ་ལ་བཀོད་པ་བས་ཀྱང་། བྱང་ཆུབ་སེམས་དཔའ་ལ་བསྔགས་པ་ཅུང་ཟད་ཅིག་བརྗོད་པ་བསོད་ནམས་ཆེ་ཞེས་གསུངས། དེའི་རྒྱུའང་འཇུག་པ་ལས། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང་། །སྙིང་རྗེའི་སེམས་དང་གཉིས་སུ་མེད་བློ་དང་། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་ཉན་རང་གཉིས་སངས་རྒྱས་ལ་བརྟེན་ནས་བྱུང་ཞིང་། སངས་རྒྱས་བྱང་ཆུབ་ཀྱི་སེམས་ལས་བྱུང་བ་དང་། སྙིང་རྗེ་དང་། སྟོང་ཉིད་དང་། བྱང་ཆུབ་ཀྱི་སེམས་མཐའ་དག་དེའི་རྒྱུ་ཡིན་པར་བསྟན་པས་སོ། །དེའང་རྟེན་གྱི་སྒོ་ནས་བྱང་ཆུབ་སེམས་དཔའ་ཁྱིམ་པ་ལས་བྱང་ཆུབ་སེམས་དཔའ་རབ་བྱུང་འཕགས་པ་རིན་པོ་ཆེ་ཕུང་པོའི་མདོར། བྱང་སེམས་ཁྱིམ་པས་མར་ཁུ་རྒྱ་མཚོ་ཙམ་ལ་སྡོང་བུ་རི་རབ་ཙམ་བཙུགས་ནས་མར་མེ་ཕུལ་བ་པས། བྱང་སེམས་རབ་བྱུང་གིས་མར་མེའི་སྙིང་པོ་འབྲུ་མར་གྱིས་བསྐུས་པ་མཆོད་པར་ཕུལ་བ་ཕན་ཡོན་ཆེ་ཞེས་གསུངས། རྒྱུ་དེས་གང་གི་སྤོབས་པ་སངས་རྒྱས་ཀྱིས་མ་གཏོགས་གཞན་གང་གིས་ཀྱང་ཟིལ་གྱིས་མི་ནོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལི་ཙ་བཱི་དྲི་མེད་གྲགས་པས་ཀྱང་བསྟན་པ་ལ་ཆེ་བ་བཞག་པའི་ཕྱིར་ཉན་ཐོས་རྣམས་ལ་ཐོག་མར་ཕྱག་བྱས་ནས་གདོད་ཕྱིར་མི་ལྡོག་པའི་ཆོས་ཀྱི་འཁོར་ལོའི་གཏམ་གྱིས་ཉན་ཐོས་ཆེན་པོ་རྣམས་དང་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་བྱམས་པ་ལྟ་བུའི་ཡང་སྤོབས་པ་ཟིལ་གྱིས་གནོན་པར་བྱེད་པའི་ཕྱིར་རོ། །དེ་ལྟ་ནའང་སྡོམ་པ་གསུམ་ཀ་རྫོགས་ཤིང་མཆོག་གི་དངོས་གྲུབ་བརྙེས་པའི་སྐྱེས་བུ་དམ་པ་རྟགས་ཀྱི་མངོན་རྟོགས་རང་བཞིན་མེད་པར་ཞིག་པ་རྣམས་ལ་ནི་དཔྱད་པར་བྱ་བའི་གནས་དུ་མ་ཡོད་དོ། །དེའི་ཕྱིར་ཡུལ་དཀོན་མཆོག་དང་། ཕ་མ་ལ་བརྟེན་པ་དང་། བསམ་པ་ཉོན་མོངས་པ་དྲག་པོས་ཀུན་ནས་བསླངས་པ་དང་། བསོད་ནམས་མ་ཡིན་པ་ལ་རྒྱུན་དུ་ཞུགས་པ་དང་། འགྱོད་ཚངས་ཀྱི་གཉེན་པོ་མེད་པ་ལ་སོགས་པ་འདི་དག་ནི་ལས་འདག་ཚུལ་བཞི་ཡོད་པའི་ནང་ནས་ཐ་ཆད་པ་མྱོང་བས་འདག་པ་ཁོ་ན་ཡིན་ཏེ། དེའང་སློབ་དཔོན་དབྱིག་གཉེན་གྱིས། མཐོང་བའི་ཆོས་ལ་སོགས་པ་ལ། །མྱོང་འགྱུར་ལ་སོགས་ངེས་རྣམ་གསུམ། །ཞེས་དགེ་སློང་ལྷས་བྱིན་སངས་རྒྱས་ལ་ཁོང་འཁྲུགས་བཞིན་པར་ས་གཞི་གས་པ་མེ་དཔུང་དུ་འབར་བའི་རུམ་དུ་ལྷུང་ནས་དམྱལ་བར་སོང་བའི་མཐོང་ཆོས་མྱོང་གྱུར་དང་། ཙི་ནའི་ཡུལ་དུ་བསྟན་པ་ཐོག་མར་བྱུང་བའི་དུས་ལས་འབྲས་ལ་སྐུར་པ་བཏབ་པས་སྐྱེས་བུ་དེ་ཉིད་མལ་ན་ཉལ་བཞིན་པར་སྦྲུལ་དུ་སོང་བའི་གཏམ་རྒྱུད་དང་། སྔོན་བྱུང་དུ་དགེ་འདུན་ལ་བུད་མེད་ཡིན་ཞེས་བྱས་པས་དེར་མཚན་འགྱུར་བ་ལ་སོགས་པའི་མཐོང་ཆོས་མྱོང་གྱུར་དང་། དེ་ཉིད་སྐྱེ་བ་བརྒྱར་བུད་མེད་ཀྱི་ལུས་བླངས་པ། ལན་གྲངས་གཞན་ལ་མྱོང་འགྱུར་གཉིས་ཀ་ཚང་བ་དང་། ངན་སོང་དུ་སྐྱེ་ངེས་ཀྱི་ལས་ཡོད་ན་ཚེ་དེ་ལ་སྦྱོར་ལམ་བཟོད་པ་ཙམ་ཡང་འཐོབ་མི་ནུས། འདོད་ཁམས་སུ་སྐྱེ་ངེས་ཀྱི་ལས་ཡོད་ན་ཆགས་བྲལ་གྱི་འབྲས་བུ་མི་ཐོབ། འཁོར་བར་སྐྱེ་ངེས་ཀྱི་ལས་ཤིག་ཡོད་ན་ཚེ་དེར་འཁོར་བ་ལས་གྲོལ་མི་ནུས་པར་བཤད་པས། སེམས་ཉིད་རྟོགས་པས་ཆོག་ལས་འབྲས་མི་དགོས་སོ་ཞེས་ནམ་ཡང་སྨྲ་བར་མ་བྱེད་ཅིག་རྟོགས་སོ་སྙམ་པ་དེ་ཀ་མ་རྟོགས་པའི་རྟགས་ཡིན་ཏེ། སེམས་ཉིད་མ་རྟོགས་པས་ལས་འབྲས་མི་དགོས་སོ་སྙམ་པའི་ཆད་ལྟ་སྐྱེས་པའོ། །རིན་ཆེན་ཕྲེང་བ་ལས། ལས་ཀྱི་འབྲས་བུ་མེད་ཅེས་པ། །མདོར་ན་མེད་པར་ལྟ་བ་ཉིད། །བསོད་ནམས་མ་ཡིན་ངན་སོང་པ། །ཞེས་བཤད་པ་ལྟར་རོ། །དགེ་སྡིག་གཉིས་ཀྱི་འབྲས་བུ་སྨིན་པ་སྔ་ཕྱིའང་། སྟོབས་གང་ཆེ་བ་དེ་སྔོན་ལ་སྨིན་པ་ཉིད་དེ། སྟོབས་མཉམ་ན་འཆི་ཁར་དགེ་སྡིག་གི་སེམས་གང་དང་ཉེ་བ་དེ་ཐོག་མར་སྨིན་ནོ། །དེ་གཉིས་ཀ་མཉམ་ན་རྒྱུན་དུ་གང་ལ་གོམས་ཤུགས་ཆེ་བ་དེ་སྔོན་ལ་སྨིན། གོམས་ཤུགས་ཀྱང་འདྲ་ན་བསགས་པའི་སྔ་ཕྱི་ལྟར་སྨིན་པ་ཡིན་ཏེ། མདོ་ལས། ལས་ཀྱི་འཁོར་བར་ལྕི་གང་དང་། །ཉེ་བ་གང་དང་གང་གོམས་པ། །སྔོན་བྱས་གང་ཡིན་དེ་དག་ལས། །སྔ་མ་སྔ་མ་སྨིན་པར་འགྱུར། །ཞེས་སོ། །མདོར་བསྡུ་ན། མཐའ་གཅིག་ཏུ་དཀར་བའི་ལས་དང་། མཐའ་གཅིག་ཏུ་གནག་པའི་ལས་དང་། །མཐའ་གཉིས་ཀ་ལ་མ་ཐུག་པ་འདྲེས་མའི་ལས་ཏེ་གསུམ་དུ་གནས་པ་ལས། དང་པོ་ནི། གཞི། བསམ་པ། སྦྱོར་བ། མཐར་ཐུག་གི་བར་ཐམས་ཅད་དགེ་སེམས་ཁོ་ནས་ཟིན་ཅིང་སྡིག་པའི་ལས་དང་ནམ་ཡང་མ་འདྲེས་པའོ། །གཉིས་པ་ནི། གཞི་བསམ་སྦྱོར་བ་མཐར་ཐུག་ཐམས་ཅད་སྡིག་སེམས་འབའ་ཞིག་གིས་ཟིན་ཅིང་དགེ་བ་དང་མ་འདྲེས་པའོ། །གསུམ་པ་ལ་མུ་གཉིས་ཏེ། ལས་དཀར་ལ་རྣམ་སྨིན་གནག་པ་དང་། ལས་གནག་ལ་རྣམ་སྨིན་དཀར་བའོ། །དང་པོ་ནི། གཞན་འབྱོར་ཕུན་ཚོགས་ལ་མི་བཟོད་ཅིང་། བདག་གི་ཕྱོགས་འབའ་ཞིག་རྒྱལ་བའི་གནས་ཐོབ་ན། མང་པོའི་སྲོག་འགགས་པ་ལའང་ཇི་མི་སྙམ་པས་གཡུལ་སྤྲོད་པའི་ཇུས་རིམ་ལྟ་བུར་མཆོད་སྦྱིན་གྱི་རིམ་པ་རྒྱ་ཆེན་པོ་གཏོང་བ་ལྟ་བུ་སྟེ། དེ་ལ་ནི་རྣམ་སྨིན་དང་བདག་འབྲས་གཉིས་ཀ་སྡུག་བསྔལ་དུ་འབྱིན་ཅིང་། རྒྱུ་མཐུན་གྱི་འབྲས་བུར་ཚེ་ཐུང་བ་དང་ལོངས་སྤྱོད་ཆེ་བའི་འབྲས་བུ་དཀར་ནག་འདྲེས་མར་སྨིན་ནོ། །གཉིས་པ་ནི། བྱང་ཆུབ་སེམས་དཔའི་སྤྱོད་པ་ལ་སྦྱར་ན། དེད་དཔོན་སྙིང་རྗེ་ཆེན་པོས་ཚོང་པ་བརྒྱ་ཕྲག་དུ་མའི་སྲོག་སྐྱོབ་པའི་ཕྱིར་མི་ནག་མདུང་ཐུང་ཅན་བསད་པས་རྣམ་སྨིན་གྱི་འབྲས་བུར་བསྐལ་པ་འབུམ་གྱི་ཚོགས་རྫོགས། བདག་འབྲས་བདེ་བར་འབྱིན་ཡང་། རྒྱུ་མཐུན་པའི་འབྲས་བུས་མངོན་པར་བྱང་ཆུབ་ནས་ཀྱང་། ཞབས་ལ་སེང་ལྡེང་གི་ཚལ་ལ་ཟུག་པ་སུས་ཀྱང་འབྱིན་པར་མི་ནུས་པའི་ཚུལ་གྱིས་ལས་བདག་གིར་བཞེས་པ་ལྟ་བུའོ། །དེའི་ཕྱིར་ན་ཏིང་ངེ་འཛིན་རྒྱལ་པོ་ལས། ལས་བསགས་པ་ནི་ནམ་ཡང་མེད་མི་འགྱུར། །འཁོར་བ་ན་ཡང་དཀར་ནག་འབྲས་བུ་སྨིན། །ཞེས་གསུངས་སོ། །འོ་སྐོལ་སེམས་ཅན་རྣམས་ཀྱི་རྒྱུད་ནི། ཉོན་མོངས་པ་གང་ལ་བལྟས་ཀྱང་འདི་ཁོ་ན་ཆེ་སྙམ་པར་མཆིས་སོ། །ཐོག་མ་མེད་པ་ནས་གོམས་པས་སྡིག་པའི་ལས་ལ་ནི་འབད་རྩོལ་དང་བསླབ་གཉེར་མི་དགོས་པར་མཆིས་སོ། །སྤྱོད་པ་ཐམས་ཅད་མཐོ་རིས་ཐོབ་ཀྱི་དོགས་པར་མཆིས་སོ། །ད་ལྟ་སངས་རྒྱས་ཀྱི་བསྟན་པ་ཉི་མ་ཤར་བ་ལྟར་གནས་ཀྱང་ཕལ་ལ་དམ་པ་ཆོས་ཀྱི་སྐལ་བ་ཆད་ནས་འདུག་གོ །སྨྱོན་པ་རང་སྲོག་ལ་འཚེ་བ་ལྟར་ཚེ་འདིར་བདེ་ཞིང་སྐྱིད་ན་སྡིག་པའི་ལས་ལ་ཅང་མི་སེམས་པས་སྐྱེ་བ་ཕྱི་མ་ཕན་ཆད་ལ་གནོད་པ་འབའ་ཞིག་བྱེད་པར་འདུག་གོ །གྱོང་པོ་སྣུམ་རྩིས་འདུལ་ཀྱང་མར་སྐོགས་སྣུམ་གྱིས་འཚིག་པར་འདུག་གོ །ཁྱིམ་པ་ཆོས་ཀྱིས་འདུལ་ཀྱང་ཆོས་དྲེད་སུས་ཀྱང་མི་ཐུལ་ལོ། །རྟག་ཏུ་བླ་མ་དང་འགྲོགས་ཤིང་ཆོས་ཀྱི་གསེབ་ན་བསྡད་ཀྱང་། རང་རྒྱུད་ཐ་བ་བཞིན་དུ་སྲ་ཞིང་འཐས་པར་སྣང་ངོ་། །གཞན་བག་ཙམ་བཙུན་མི་བཙུན་ལ་འཕྱ་སྟེ། རང་རེ་ཁྱི་ལུད་ཀྱི་གསེབ་ན་ཉལ་བ་མ་མཐོང་ངོ་། །འདི་ཕྱིའི་ཕན་གནོད་མི་ཤེས་པའི་དྲན་པ་གསལ་པོ་ལྐུག་པར་འདུག་གོ །རྒྱུ་དེས་ལས་འབྲས་ལ་ཡིད་མི་ཆེས་པའི་དགེ་བ་ལ་དད་པས་ཀུན་ནས་སློང་བ་ནི་བརྒྱ་ལམ་ན་རེས་འགའ་ཙམ་མོ། ཁ་ཅིག་ནི་ཁྱིམ་པའི་མིག་སྔ་ན་ཚུལ་འཆོས། ཁ་ཅིག་ཟླ་གྲོགས་ཀྱི་སྟབས་ལེགས། ཁ་ཅིག་བཟའ་བཏུང་གི་ངོ་བསྲུང་། ཁྱིམ་པ་རྣམས་ནི་བདེ་སྐྱིད་སྙན་གསུམ་གྱི་ཆེད་དུ་བྱེད་པར་སྣང་བས་མཐའ་གཅིག་ཏུ་དཀར་བའི་ལས་ནི་སུའི་ཡང་དྲུང་ན་མི་ཆགས་པ་ཉིད་དོ། །འདྲེས་མའི་ལས་ནི་ཅུང་ཟད་ཅུང་ཟད་དོ། །མཐའ་གཅིག་ཏུ་གནག་པ་ནི་ཤིན་ཏུ་མང་བས་ན། རྣམ་པ་ཀུན་ཏུ་རང་རྒྱུད་ལ་རྟོགས་དཔྱོད་ལེགས་པར་བཏང་ནས་ལས་འབྲས་ལ་ཤིན་ཏུ་ཡིད་ཆེས་པས་དགེ་སྡིག་གི་སྔོ་བགྲང་བྱེད་པ་བྲམ་ཟེ་སྨྲ་མཁན་དང་། མི་དགེ་བ་ལ་བློ་མི་འཇུག་པ་དབུལ་པོ་དེས་པ་ལྟ་བུ་ཅིག་དགོས། དེ་ལྟར་བྱུང་ན་འདུས་བྱས་ཀྱི་དངོས་པོ་ཐམས་ཅད་དང་པོ་བྱ་རུ་བཏུབ་ན་ཐ་མར་བཤིག་ཏུ་བཏུབ་པ་བཞིན། སྡིག་པའི་ལས་ཀྱང་དང་པོ་བསག་ཏུ་བཏུབ་ན་ཐ་མར་བཤགས་སུ་ཅིས་མི་བཏུབ། ཁྱད་པར་འཆབ་སེམས་མ་བསྐྱེད་པར་ཉེས་པ་ལ་འགྱོད་བཞིན་པས་ཀུན་ཏུ་བསྒྲགས་པ་དེ་གཉེན་པོའི་མཆོག་ཏུ་གྱུར་པ་ཡིན་ནོ། །མདོ་ལས་ཀྱང་། སྐྱེས་བུ་དམ་པ་ནི་གཉིས་ཏེ། ལྟུང་བ་མི་འབྱུང་བ་དང་། ལྟུང་བ་བྱུང་ན་ཕྱིར་བཅོས་པའོ། །ཞེས་གསུངས། འདི་ལྟར་ཁོང་པར་དུག་སོང་ན་དེ་མ་ཐག་ཏུ་སྨན་པ་ལ་བསྟེན་ནས་བཤལ་སྐྱུགས་བྱེད་དགོས་པ་ལྟར། སེམས་ཅན་རྣམས་ཀྱི་རྒྱུད་ལ་ངན་སོང་དུ་སྐྱེ་བའི་རྒྱུ་ལས་དང་ཉོན་མོངས་པ་གྲ་མ་ཉམས་པར་ཡོད་བཞིན་པའི་སྟེང་རྣམ་རྟོག་འགྱུ་ལུགས་ཀྱི་ཁྱད་པར་ཙམ་ལས་ཀྱང་སྡིག་པའི་ལས་ནི་དབུགས་སྔ་ཕྱིའི་བར་དུ་ཡང་འདུ་བྱེད་པ་སླ་ན། དེའི་གཉེན་པོར་སྔར་བྱས་ཀྱི་ལས་ལ་འགྱོད་པ་དྲག་པོ་བསྐྱེད་པ་རྣམ་པར་སུན་འབྱིན་པའི་སྟོབས་དང་། ཡུལ་དཀོན་མཆོག་དང་བླ་མ་ལ་བརྟེན་ནས་བཤགས་པ་རྟེན་གྱི་སྟོབས་དང་། ཕྱག་དང་། བསྐོར་བ་དང་། སྨྲེ་སྔགས་དང་། རྣམ་སྨིན་གྱི་འཇིགས་པ་དྲན་པས་ཆོས་སྤྱོད་ལ་སོགས་དཀར་པོའི་ལས་ཅི་བགྱིད་པ་ཐམས་ཅད་གཉེན་པོ་ཀུན་ཏུ་སྤྱོད་པའི་སྟོབས་དང་། ཉེས་པ་ལས་ལྡོག་པའི་སྟོབས་ཀྱི་ཁྱད་པར་ནི། སྟོང་གསུམ་གྱི་ནོར་རྫས་ཐམས་ཅད་སྡིག་པ་བྱེད་པའི་རྔན་དུ་སྤུངས་པའམ། ཉི་མ་རེ་ལ་ཤ་སེན་མོས་ནོན་པ་ཙམ་རེ་བཅད་ནས་དམ་པའི་ཆོས་བཏང་ན་ནི་འདི་ལས་ལྡོག་གོ་ཟེར་ཡང་མི་གཏོང་བ་གཅིག་དགོས་ཏེ། བདག་ནི་བསྲེགས་ཏེ་བསད་གྱུར་ཏམ། །མགོ་བོ་བརྡུངས་པར་བྱས་ཀྱང་ནི། །ཉོན་མོངས་པ་ཡི་ཡུལ་ལ་ནི། །ནམ་ཡང་འདུད་པར་མི་བྱའོ། །ཞེས་གསུངས་པའི་ཕྱིར་རོ། །དེ་ལྟ་བུའི་གཉེན་པོ་སྟོབས་བཞིའི་ཆོ་གས་བཤགས་ཤིང་། དེ་བཞིན་གཤེགས་པའི་བསྟན་པ་ལ་བསྟེན་ན་མཚམས་མེད་ཀྱི་ལས་ཀྱང་འབྱང་བའི་ཚུལ། བཤེས་སྤྲིང་ལས། གང་ཞིག་སྔོན་ཆད་བག་མེད་གྱུར་པ་ལས། །ཕྱི་ནས་བག་དང་ལྡན་པར་གྱུར་དེ་ཡང་། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་བསྟན་ཏོ། །དེ་ལ་དགའ་བོ་ཞེས་བྱ་བ་ནི་ཤཱཀྱ་གཞོན་ནུ་འདོད་ཆགས་ཅན། རང་གི་ཆུང་མ་པུནྡ་རི་ཀཱ་དང་བྲལ་ན་ཐེང་ཅིག་ཀྱང་དགའ་བ་མི་མྱོང་ངོ་། །དེ་དེ་བཞིན་གཤེགས་པས་རབ་ཏུ་བྱུང་ཡང་ཉིན་དང་མཚན་དུ་མཆིས་བྲང་ཁོ་ན་ལ་རྗེས་སུ་སེམས་པར་བྱེད་ཀྱིས་ཆོས་ལ་ནི་མ་ཡིན་ནོ། །དེ་ལྟ་བུའང་སྟོན་པས་ཐབས་ལ་མཁས་པའི་སྤྱོད་པས་ལྷ་དང་ངན་སོང་གི་གནས་སུ་ཁྲིད་ནས་མཐོ་རིས་ཀྱི་བདེ་བ་ལ་མི་རྟག་པར་བསྟན་ཏེ་དགྲ་བཅོམ་པའི་གོ་འཕང་ལ་སྦྱར་རོ། །སོར་མོའི་ཕྲེང་བ་ནི་བྲམ་ཟེའི་བུ་འཇིག་རྟེན་གྱི་སྐྱེས་བུ་ཕལ་ལྟར་དཔའ་ལ་བླུན་པ་ཞིག་སྟེ། སློབ་དཔོན་ངན་པས་ཆོས་མ་ཡིན་པ་ཆོས་སུ་འགྱུར་རོ་ཞེས་པའི་ལུང་མཉན་ནས་མི་དགུ་བརྒྱ་དང་། དགུ་བཅུ་གོ་དགུ་བསད་དེ་སོར་མོ་གཅིག་པ་རེའི་ཕྲེང་བས་ལུས་ལ་བརྒྱན་ནོ། །དེ་ཡང་སྟོན་པས་རབ་ཏུ་བྱུང་ནས་ཁམས་གསུམ་པའི་འདོད་ཆགས་ལས་གྲོལ་ལོ། །མཐོང་ལྡན་ནི་མ་སྐྱེས་དགྲ་སྟེ། རང་རྒྱུད་ཞེ་སྡང་དང་ལྡན་པའི་སྟེང་དུ་མི་དགེ་བའི་གྲོགས་པོ་དང་ཕྲད་པ་དང་། སྔོན་གྱི་ཤ་འཁོན་ཆགས་པའི་རྒྱུས། ཕ་ཆོས་དང་ལྡན་པའི་རྒྱལ་པོ་གཟུགས་ཅན་སྙིང་པོ་བསད་དོ། །དེའི་རིགས་ཀྱི་བུ་བདེ་བྱེད་ཀྱིས་ཀྱང་ཚུལ་བཞིན་མ་ཡིན་པ་ཡིད་ལ་བྱེད་པའི་དབང་གིས་གཞན་གྱི་ཆུང་མ་ལ་བྱི་བོ་བྱས་པའི་ལེ་ལན་གྱིས་རང་གི་མ་བསད་དོ། །དེ་གཉིས་ཀའང་དེ་བཞིན་གཤེགས་པའི་བསྟན་པ་ཁོ་ན་ལ་བརྟེན་པས་དམྱལ་བར་དར་གྱི་ཕོ་ལོང་བརྡབས་པ་ཙམ་ལས་ཐར་ཏེ་མཐོ་རིས་ཀྱི་བདེ་བ་ཉམས་སུ་མྱོང་བ་བཞིན་ནོ། །དེའི་ཕྱིར་རྣམ་པ་ཐམས་ཅད་དུ་སེམས་འདུལ་བ་ནི་གདམས་ངག་གི་དོན་པོ་ཡིན་ཏེ། ཁྱོད་ཀྱིས་ཐུགས་དུལ་མཛོད་ཅིག་བཅོམ་ལྡན་གྱིས། །སེམས་ནི་ཆོས་ཀྱི་རྩ་བ་ལགས་པར་གསུངས། །ཞེས་པ་ལྟར་ཡིད་ནི་ཆོས་ཐམས་ཅད་ཀྱི་སྔོན་དུ་འགྲོ་བ་ཁོ་ན་ཡིན་པས་དགེ་བའི་སེམས་ནི་རྡོ་ལ་རི་མོ་བྲིས་པ་བཞིན་དུ་བརྟན་པར་བྱས་ལ། མི་དགེ་བའི་སེམས་ནི་ཆུ་ལ་རི་མོ་བྲིས་པ་བཞིན་དུ་འགྱོད་ཚངས་དང་བཅས་ཏེ་དེ་མ་ཐག་ཏུ་བལྟར་མི་མངོན་པར་བྱ་སྟེ། སློབ་དཔོན་འཕགས་པས། སེམས་ནི་ཆུ་དང་ས་དང་རྡོ་བ་ལ། །རི་མོ་བྲིས་པ་དེ་འདྲར་རིགས་པར་བགྱི། །དེའི་ནང་ཉོན་མོངས་ཅན་ལ་དང་པོ་ནི། །མཆོག་སྟེ་ཆོས་འདོད་རྣམས་ལ་ཐ་མ་ལགས། །ཞེས་གསུངས་པ་ཡིན་ནོ། །ད་ནི་འབྲས་བུ་ཡིད་དུ་མི་འོང་བ་དེ་དག་ལས་བཟློག་ཕྱིར་དགེ་བ་བཅུའི་ངོ་བོ་ཉིད་བསྟན་པ། དེ་ཕྱིར་མ་དག་གཞན་དབང་གནས་སྐབས་ན། །མཐོ་རིས་འཕེན་བྱེད་དགེ་བའི་ལས་ལམ་བཅུ། །མི་དགེ་བཅུ་ལས་ཕྱི་རོལ་ཕྱོགས་པ་ཡི། །དགེ་བའི་ལས་བཅུ་ཡང་དག་བསྙེན་པར་མཛོད། །དེ་བསྙེན་པ་ལས་བསོད་ནམས་ཆ་མཐུན་བཅུས། །བདེ་འགྲོར་འཕེན་ཞིང་མི་དགེ་རྣམ་པ་བཅུས། །ངན་འགྲོར་འཕེན་པའི་དཀར་ནག་རྒྱུ་འབྲས་ལ། །བླང་དོར་བགྱིད་པ་སྐྱེས་བུ་ཆུང་ངུའི་ལམ། །དེ་ལ་རྣལ་འབྱོར་སྤྱོད་པའི་གཞུང་ལས། ཀུན་བརྟགས་དང་། གཞན་དབང་དང་། ཡོངས་གྲུབ་ཅེས་པའི་གྲུབ་པའི་མཐའ་ཆེན་པོ་གསུམ་དུ་བཤད་པའི་ཀུན་བརྟགས་ནི་གང་གི་ངོ་བོར་ཡང་མེད་བཞིན་དུ་རྟོག་པས་སྒྲོ་བཏགས་པ། རི་བོང་གི་རྭ་དང་། བདག་མེད་པ་ལ་བདག་ཅེས་པ་ལྟ་བུ་དང་། དེ་དང་ཕྱོགས་མཐུན་པའི་གྲུབ་པའི་མཐའ་ངན་པ་ཐམས་ཅད་དང་། གང་དང་གང་ལ་དོན་གྱི་རྣམས་པ་འདི་ཞེས་བཀོད་ཀྱང་བློས་རློམ་པ་ཙམ་ལས་རང་མཚན་དང་དངོས་པོའི་ཡུལ་དུ་མེད་པ་མཐའ་དག་སྟེ། རྣལ་འབྱོར་སྤྱོད་པའི་གཞུང་ལས། ཀུན་ཏུ་བརྟགས་པ་རྣམས་དེ་ནི། །མེད་བཞིན་འཁྲུལ་པའི་བློས་བསྐྱེད་དོ། །ཞེས་སོ། །གཞན་དབང་ལ་གཉིས་ཏེ། མ་དག་པ་དང་། དག་པ་གཞན་དབང་ངོ་། །མ་དག་པ་གཞན་དབང་ནི། འཁྲུལ་སྣང་གི་བག་ཆགས་བརྟས་པ་ལས་ས་རྡོ་རི་བྲག་ལ་སོགས་སྣོད་བཅུད་ཀྱི་རྣམ་པར་སྐྱེས་ཤིང་། དབང་པོའི་སྒོ་སོ་སོ་ལ་ཤར་བའི་མ་དག་པའི་འཁྲུལ་སྣང་ལས་གནས་རིས་མཐོ་དམན་དུ་ཤར་བ་ཐམས་ཅད་དོ། །དག་པ་གཞན་དབང་ནི། རང་སྣང་དག་པའི་ཞིང་དང་། སངས་རྒྱས་རྣམས་ཀྱི་གཟིགས་པ་དག་པའི་ཡུལ་ལ་སྣང་བའི་ཞིང་ཁམས་དང་། གཞལ་ཡས་ཁང་གི་རྣམ་པར་ཤར་བ་རྣམས་སོ། །དེ་ལ་གཞན་དབང་མི་འཐད་པར་རྩོད་པ་ནི་རྫོགས་པའི་སངས་རྒྱས་དྲི་མེད་འོད་ཀྱིས་ལེགས་པར་བཀག་ཟིན་ཏོ། །ཡོངས་གྲུབ་ལ་གཉིས་ཏེ། འགྱུར་བ་མེད་པ་དང་། ཕྱིན་ཅི་མ་ལོག་པའོ། །དང་པོ་ནི། འདི་ལྟར་འཁྲུལ་པའོ། །འདི་ལྟར་མ་འཁྲུལ་པའོ་ཞེས་པའི་གནས་སྐབས་གཉིས་སུ་མེད་པར་ཆོས་ཐམས་ཅད་རང་བཞིན་གྱིས་དག་པའི་ཆོས་ཉིད་རང་ཆས་སུ་ལྡན་པའི་སྟོང་པ་ཉིད་དེ། དུས་གསུམ་སྔ་ཕྱི་མེད་པར་མི་འགྱུར་བ་གཤིས་ཀྱི་གནས་ལུགས་དམ་པའོ། །དེ་ལ་རང་གིས་སྟོང་པ་དང་། གཞན་གྱིས་སྟོང་པ་དང་། གཉིས་ཀས་སྟོང་པ་རྣམ་པ་གསུམ་བཞག་སྟེ། རང་གིས་སྟོང་པ་ནི་ཆོས་གང་དང་གང་ཡིན་པ་དེའི་རང་བཞིན་བདེན་པ་མེད་པའོ། །གཞན་གྱིས་སྟོང་པ་ནི་ཆོས་དེ་ལ་ཆོས་གཞན་མེད་པའི་ཆ་ནས་བཏགས་པའོ། །གཉིས་ཀས་སྟོང་པ་ནི་ཆོས་གང་ལ་གཉིས་སུ་མེད་པའོ། །གཉིས་པ་ནི། ཇི་ལྟ་བའི་གནས་ལུགས་རྟོགས་པའི་ཀུན་རྫོབ་ཀྱི་ཆར་བསོད་ནམས་ཀྱི་ཚོགས་མི་འགོག་ཀྱང་། དོན་དམ་དུ་ཆོས་ཐམས་ཅད་རང་གི་ངོ་བོས་སྟོང་པའི་ཆོས་ཉིད་ནམ་མཁའ་ལྟ་བུར་རྟོགས་པས་ཡེ་ཤེས་ཀྱི་ཚོགས་དང་མི་འབྲལ་བའི་ཐར་ལམ་དམ་པའོ། །དེ་དག་ལས་རྒྱུ་འབྲས་ཀྱི་གནས་སྐབས་འདིར་ནི། མ་དག་པའི་གཞན་དབང་ལ་བརྟེན། དེས་དགེ་མི་དགེའི་ལས་གསོག །དེ་ལས་དེ་དང་དེའི་འབྲས་བུ་ཉམས་སུ་མྱོང་བར་སྟོན་པ་ཡིན་པས་ན། མི་དགེ་བཅུ་པོ་ལས་ལོག་པ་ཙམ་གྱིས་དགེ་བ་བཅུར་འདོད་པ་ནི་ནོར་བ་སྟེ། རྒྱུད་བསྡམས་པ་མེད་ཅིང་ལུང་མ་བསྟན་ཡིན་པར་རིག་པར་བྱའོ། །ཡུམ་བར་མ་ལས་ཀྱང་། བདག་ཉིད་ཀྱང་སྲོག་གཅོད་པ་སྤངས་པ་ཡིན། ཞེས་པ་ལ་སོགས་རྒྱ་ཆེར་གསུངས་པ་བཞིན་ནོ། །དེ་བས་མི་དགེ་བ་བཅུ་པོ་ནི་བསྡམ་པའི་ཕྱོགས་སུ་བྱས་ནས་དགེ་བ་བཅུ་པོ་ནི་བསྒྲུབ་པའི་ཕྱོགས་སུ་བྱ་བའོ། །དེའི་འབྲས་བུ་ནི་ཐར་པའི་ལམ་དང་མ་འབྲེལ་བའི་བསོད་ནམས་ཆ་མཐུན་གྱི་དགེ་བ་བཅུ་པོ་ཆུང་ངུས་རྣམ་པར་ཤེས་པ་ཚོགས་བདུན་གཙོ་བོར་ལྡན་པས་ཡུལ་གྱི་རྗེས་སུ་སྐྱེས་པ་དབང་པོ་དྲུག་གི་བདག་རྐྱེན་ལས་བྱུང་བའི་ཤེས་པ་རགས་པ་ཅན། བདེ་སྡུག་གི་ཚོར་བ་མྱོང་བདེ་བ་འདོད་པའི་མི་དང་། འབྲིང་གིས་འདོད་པའི་ཁམས་ཀྱི་ལྷར་སྐྱེ་བ་ཡིན་ལ། དགེ་བའི་ལམ་བཅུ་པོ་ཤིན་ཏུ་སྟོབས་ཆེ་ན་དེས་འཕེན་བྱེད་བྱས་ནས། དེར་སྐྱེ་བའི་རྒྱུ་ཚངས་པའི་གནས་པ་གཞི་དང་ས་དེ་པའི་ཏིང་ངེ་འཛིན་གོམས་པ་ལས་ཁམས་གོང་མ་གཉིས་སུ་སྐྱེ་སྟེ། དེའང་གཟུགས་ཁམས་པ་རྣམས་ནི་ཀུན་གཞིའི་རྣམ་པར་ཤེས་པ་དང་། འཇུག་པའི་རྣམ་པར་ཤེས་པ་གཙོ་བོར་ལྡན་ལ་གཞན་དག་ནི་འཁོར་གྱི་ཚུལ་དུ་ཡོད་པའོ། །གཟུགས་མེད་པའི་ཁམས་སུ་ནི་ཀུན་གཞི་ཉིད་གཙོ་བོར་ལྡན་ལ། གཞན་དག་བག་ལ་ཉལ་དུ་ཡོད་པས་གཉིད་འཐུག་པོ་ལོག་པའི་གནས་སྐབས་ལྟ་བུ་ལས་དགེ་བ་བྱེད་པ་ཡང་མེད་ལ། མི་དགེ་བ་ཡང་དངོས་སུ་བྱེད་པ་མེད་ཀྱང་རང་སའི་གཏི་མུག་གི་ས་པས་བསྐྱེད་པའི་ཕྱིར། ངང་གིས་གཏི་མུག་ནི་སྟོབས་ཆེན་པོ་གསོག་པ་ཡིན་ནོ། །དེའི་ཕྱིར་བསམ་གཏན་གཟུགས་མེད་ཀྱི་སེམས་དེ་སྔ་མའི་དགེ་འབྲས་ཡིན་ཀྱང་བསོད་ནམས་ཆ་མཐུན་གྱི་དགེ་བ་ཡིན་པའི་ཕྱིར་ཟད་ནས་ནི་ཚེ་འཕོ་ལ། ངོ་བོ་ལུང་མ་བསྟན་ཡིན་པའི་ཕྱིར་རོ། །མིའི་ལུས་རྟེན་ལས་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པས་ན་ལྷ་བས་ལྷག་པའི་ལུས་ཞེས་ཀྱང་བཤད་དོ། །དེ་ལྟ་ནའང་རིན་ཆེན་ཕྲེང་བ་ལས། ཆོས་འདིས་དམྱལ་བ་ཡི་དྭགས་དང་། །དུད་འགྲོ་རྣམས་ལས་རྣམ་གྲོལ་ཞིང་། །ལྷ་དང་མི་ཡི་ནང་དག་ཏུ། །བདེ་དཔལ་རྒྱལ་སྲིད་རྒྱས་པ་ཐོབ། །བསམ་གཏན་ཚད་མེད་གཟུགས་མེད་ནི། །ཚངས་སོགས་བདེ་བ་མྱོང་བར་བྱེད། །ཅེས་མཐོ་རིས་མངོན་པར་བསྒྲུབས་ཤིང་། །ངན་སོང་གི་སྒོ་གཅོད་པར་བྱེད་པས་ན་ལྷ་མིའི་ཐེག་པའམ་སྐྱེས་བུ་ཆུང་ངུའི་ལམ་ཞེས་བྱ་ལ། དེ་ཉིད་ཐར་པ་ཆ་མཐུན་གྱི་དགེ་བ་དང་འབྲེལ་པས་ངེས་པར་ལེགས་པ་ལ་སྦྱོར་བའི་ཚུལ་ཡང་སྤྱིར་རིགས་ཡོད་པ་ལ་དགེ་རྩ་ཕྲ་མོ་ས་བོན་དུ་བཞག་པ་གཉིས་རྐྱེན་ནུས་པ་སྨིན་པས་སད་དེ་བྱང་ཆུབ་ཏུ་འགྲོ་བའི་ངེས་པའང་ཡོད་དེ། དམ་པའི་ཆོས་པདྨ་དཀར་པོ་ལས། བྱིས་པ་རྩེད་མོ་དགའ་དང་དེ་བཞིན་དུ། །བྱེ་མ་ལ་ནི་མཆོད་རྟེན་བྱེད་པ་དང་། །རྩིག་ངོས་ཤིང་བུ་སེན་མོས་གཟུགས་བྲིས་པ། །དེ་དག་རྣམས་ཀྱང་བྱང་ཆུབ་མཆོག་འདི་ཐོབ། །ཅེས་གསུངས་པས། དཀོན་མཆོག་གསུམ་མཐོང་བ་ཙམ་མམ། མཚན་ཐོས་པ་དང་། མཆོད་རྟེན་ལ་དམིགས་ནས་ཐལ་མོ་ཡ་གཅིག་གིས་བཏུད་དམ། བསྐོར་བ་དང་སྲི་ཞུའི་ཆེད་གོམ་པ་ཡ་གཅིག་དོར་རམ། མེ་ཏོག་གམ་ཆུ་ཐིགས་གཅིག་ཕུལ་ལམ། ངན་འབྲེལ་ཐོགས་པའང་རུང་སྟེ། དཀོན་མཆོག་ལ་བསྟེན་པའི་ལས་ཐམས་ཅད་ཐར་པ་ཆ་མཐུན་དུ་འགྱུར་བ་ནི་ཡུལ་གྱི་ཁྱད་པར་ཆེ་བ་ལས་སོ། །དེའང་བཤད་མ་ཐག་པའི་བསོད་ནམས་ཆ་མཐུན་གྱི་དགེ་བས་སྲིད་པའི་གནས་རིས་མཐོ་དམན་དུ་འཕེན་པའི་ལས་དང་། ངན་འགྲོ་ལ་སོགས་སྡུག་བསྔལ་གྱི་ཡུལ་དང་སྤྲོད་པའི་མི་དགེ་བ་གཉིས་རང་བཞིན་མེད་པར་ཤེས་པ་ལས་སྲིད་པའི་རྒྱུ་ཟག་པ་དང་བཅས་པ་ཀུན་ལས་རྣམ་པར་གྲོལ་བའི་དགེ་བ་ནི་ཐར་པའི་རྒྱུར་གྱུར་པ་ཁོ་ན་སྟེ། སྡུད་པ་ལས། ཤིང་མཁན་བཟོ་བོ་མཁས་པས་སྐྱེས་པ་བུད་མེད་དང་། །འདྲ་བའི་བཟོ་བྱས་དེས་ཀྱང་བྱ་བ་ཐམས་ཅད་བྱེད། །དེ་བཞིན་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང་། །རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད། །ཅེས་གསུངས་པ་དེའི་ཕྱིར། ཐར་པའི་ཆ་མཐུན་ཟག་མེད་དམ་པའི་རྒྱུ། །དགེ་བཅུ་བསམ་གཏན་གཟུགས་མེད་སྦྱིན་སོགས་དྲུག །ཚོགས་སྦྱོར་མཐོང་སྒོམ་མི་སློབ་ལམ་ལྔས་བསྡུས། །འདི་ལྟར་ཀུན་རྫོབ་བདེན་པའི་ཕྱོགས་བསོད་ནམས་ཀྱི་ཚོགས་དགེ་བ་བཅུ་དང་། ཕ་རོལ་ཏུ་ཕྱིན་པ་ལྔས་བསྡུས་པ་རྣམས། དོན་དམ་བདེན་པའི་ཕྱོགས་ཡེ་ཤེས་ཀྱི་ཚོགས་མཐའ་གཉིས་ལ་མི་གནས་པའི་ཤེས་རབ་སྟོང་པ་ཉིད་སྙིང་རྗེའི་སྙིང་པོ་ཅན་གྱིས་ཟིན་ནས། དུས་སྔ་ཕྱི་མེད་པར་ཟུང་དུ་འབྲེལ་བ་ལམ་ལྔའི་རིམ་པས་བསྡུས་པ་མཐའ་དག་གིས་གནས་སྐབས་སུའང་མངོན་པར་མཐོ་བ་དང་། མཐར་ཐུག་ཞི་བ་དམ་པའི་སར་གཞོལ་བ་ནི། ཐར་པ་ཆ་མཐུན་གྱི་རྣམ་པར་སྨིན་པའི་འབྲས་བུ་ཡང་དག་པའོ། །དེ་བཞིན་དུ་རྒྱུ་མཐུན་དང་། དབང་དང་། བྱེད་པའི་འབྲས་བུའང་རིམ་བཞིན། རྒྱུ་མཐུན་ནི་རང་གིས་དགེ་བ་ལ་གཞོལ་བ་དང་། ཚེ་རིང་བ་དང་། ལོངས་སྤྱོད་ཆེ་བ་དང་། དགྲ་ཟླ་མི་འབྱུང་བ་སོགས་མི་དགེ་བའི་འབྲས་བུ་དེ་དག་ལས་ཕྱོགས་ལོག་པ་དང་། དབང་གི་འབྲས་བུར། ཡུལ་བཟང་བ་དང་། གཟི་བརྗིད་ཕུན་སུམ་ཚོགས་པ། བཟའ་བཏུང་དང་སྨན་སོགས་འཇུ་སླ་བ་སོགས་མི་མཐུན་པའི་ཕྱོགས་ལས་ལོག་པ་དང་། བྱེད་པའི་འབྲས་བུར། ཚེ་དེ་ཉིད་ལ་དགེ་བ་ཇེ་འཕེལ་དུ་འགྲོ་ཞིང་། བསམ་པ་ཡིད་བཞིན་དུ་འགྲུབ་པའང་བཟང་པོ་སྤྱོད་པ་ལས། མི་ཚེ་འདིར་ཡང་དེ་དག་ལེགས་པར་འོང་། །ཞེས་པས་མཚོན་ཏེ་དགེ་བ་བཅུ་བསྟན་པའི་མདོ་ལས་རྒྱ་ཆེར་གསུངས་པ་བཞིན་ནོ། །མདོར་བསྡུ་ན་བསོད་ནམས་ཆ་མཐུན་ལྟར་ཟད་པར་འགྱུར་བ་མ་ཡིན་པའི་ཚུལ། བརྒྱད་སྟོང་པ་ལས། བཙུན་པ་ཤཱ་རིའི་བུ། དགེ་བའི་རྩ་བ་གང་གིས་ལྷ་དང་མི་རྣམས་ཀྱི་ནང་དུ་ཕྱིན་ནས་བླ་ན་མེད་པའི་སངས་རྒྱས་སུ་འགྱུར་བ་ཡོད་དེ་གང་ཞེ་ན། བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་གཅིག་དང་ལྡན་པའི་དགེ་བ་བཅུ་དང་། བསམ་གཏན་བཞི་དང་། གཟུགས་མེད་པའི་སྙོམས་པར་འཇུག་པ་བཞི་དང་། ཕ་རོལ་ཏུ་ཕྱིན་པ་དྲུག་སྟེ། ནམ་ཡང་བར་མ་དོར་ཟད་ཅིང་མེད་པར་མི་འགྱུར་རོ། །ཞེས་གསུངས་སོ། །དེའང་བདག་མེད་རྟོགས་པའི་ཤེས་རབ་དང་། ཐབས་སྙིང་རྗེ་ཆེན་པོ་ཁོ་ན་དུས་སྔ་ཕྱི་མེད་པར་འབྲེལ་པ་ཐེག་པ་ཆེན་པོའི་དགེ་བ་རླབས་ཆེ་བའི་ཚུལ། དེ་ཡང་བདག་མེད་གཉིས་ཀྱི་དོན་རྟོགས་ནས། །ཐབས་ཤེས་ཟུང་འབྲེལ་དགེ་བ་གསེར་འགྱུར་རྩིས། །སྲིད་དང་ཞི་བར་འགལ་བའི་ལྕགས་ཁམས་ལ། །ཐེབས་པས་མི་གནས་ཡེ་ཤེས་རྒྱལ་བའི་ཁམས། །གྲུབ་པ་འཇིག་རྟེན་འདས་པའི་དགེ་བ་ཡིན། །འདི་ལྟར་ཉན་རང་གི་ལུགས་ལྟར་གང་ཟག་དང་ཆོས་ཀྱི་བདག་མེད་ལ་དམིགས་པ་ཅན་མ་ཡིན་པར། ནང་དུ་བྱེད་པའི་སྐྱེས་བུ་བྲལ་བས་ཡུལ་རང་བཞིན་མེད་པར་ཤེས་པའི་གཟུང་བ་ཆོས་ཀྱི་བདག་མེད་དང་། ཤེས་བྱ་སྐྱེ་འགག་གནས་གསུམ་དང་བྲལ་བའི་སྟོང་པ་ཉིད་དུ་རང་ཤར་བའི་འཛིན་པ་ཆོས་ཀྱི་བདག་མེད་ཀྱི་ཐབས་ཀྱི་ཆ་ཐམས་ཅད་ལ་རྒྱས་ཐེབས་པས་ཐ་དད་པའམ། གཉིས་པ་མ་ཡིན་པའི་ཐབས་ཤེས་ཟུང་འབྲེལ་གྱི་དགེ་བ་ནི་གསེར་འགྱུར་གྱི་རྩི་ལྟ་བུ་སྟེ། དགེ་བ་སྤྱོད་དུས་ཉིད་ནས་བསོད་ནམས་དང་བསོད་ནམས་མ་ཡིན་པའི་བློ་ལས་གྲོལ་བས། དངོས་པོ་དང་རང་མཚན་དུ་འཛིན་པའི་ཆ་ནས་སྲིད་པ་དང་ཞི་བར་འགལ་བའི་ལྕགས་ཁམས་ལ་ཐེབས་པས། མི་གནས་པའི་ཡེ་ཤེས་རྣམ་པ་ཐམས་ཅད་མཁྱེན་པའི་གྲོང་ཁྱེར་གསེར་གླིང་ནས་རྡོ་མི་རྙེད་པ་ལྟ་བུར་འཇུག་པ་ནི་འཇིག་རྟེན་ལས་འདས་པའི་དགེ་བ་ཡིན་ཏེ། ཁྲི་བརྒྱད་སྟོང་པ་ལས། ཕ་རོལ་ཏུ་ཕྱིན་པ་ལྔ་པོའང་ནམ་ཤེས་རབ་ཀྱི་ཕ་རོལ་ཏུ་ཕྱིན་པས་ཟིན་པ་དེའི་ཚེ་རྣམ་པ་ཐམས་ཅད་མཁྱེན་པ་ཉིད་ཀྱི་གྲོང་ཁྱེར་ཆེན་པོར་འཇུག་པར་འགྱུར་ཏེ། ཞེས་དང་། སྤྱོད་འཇུག་ལས། ཡན་ལག་འདི་དག་ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །ཞེས་པ་ལྟར་རོ། །དེ་ལྟ་བུའི་ཚོགས་གཉིས་ཟུང་དུ་འབྲེལ་བའི་ས་བོན་ལས་ཐར་པའི་འབྲས་བུ་བསླུ་བ་མེད་པ་ནི། ལམ་དུས་དམིགས་པར་བཅས་པ་བསོད་ནམས་ཚོགས། །དམིགས་མེད་ཡེ་ཤེས་ཚོགས་ཏེ་ཟུང་འཇུག་གིས། །སྒྲིབ་པ་གཉིས་སྦྱང་སྐུ་གཉིས་མངོན་དུ་འཐོབ། །དག་པའི་རྒྱུ་འབྲས་ཟབ་མོའི་རྟེན་འབྲེལ་ལགས། །འདི་ལྟར་ཟག་པ་དང་བཅས་པ་ནི་སྦྱིན་པ་ལ་སོགས་པའི་བསོད་ནམས་ཀྱི་ཚོགས་རྣམ་པ་ལྔ་དང་། ཟག་པ་མེད་པའི་ཤེས་རབ་ཟབ་མོ་སྟེ་ཡེ་ཤེས་ཀྱི་ཚོགས། དེ་གཉིས་ཟུང་དུ་འབྲེལ་བ་ལས་ཉོན་མོངས་པ་དང་། ཤེས་བྱའི་སྒྲིབ་པ་རང་བཞིན་མེད་པར་དག་ནས་བསོད་ནམས་ཀྱི་ཚོགས་ལས་གཟུགས་ཀྱི་སྐུ་དང་། ཡེ་ཤེས་ཀྱི་ཚོགས་ལས་ཆོས་ཀྱི་སྐུ་སྟེ་རྣམ་པ་གཉིས་མངོན་དུ་བྱེད་པའི་ཚུལ། རིན་ཆེན་ཕྲེང་བ་ལས། སངས་རྒྱས་རྣམས་ཀྱི་གཟུགས་སྐུ་ནི། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་ནི་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་སོ། །དེའང་ས་མཚམས་ཀྱི་སྒོ་ནས་དབྱེ་ན་སྦྱོར་ལམ་ཆོས་མཆོག་མན་ཆད་ནི་འཇིག་རྟེན་པའི་ལམ་སྟེ་ཟག་པ་དང་བཅས་པའོ། །མཐོང་ལམ་ཐོབ་ནས་ནི་ཟག་པ་མེད་པའི་ཕྱིར་འཇིག་རྟེན་ལས་འདས་པའོ། །ལམ་གྱི་སྒོ་ནས་དབྱེ་ན་མཉམ་གཞག་གི་ཡེ་ཤེས་ཟག་པ་མེད་པ་དང་རྗེས་ཐོབ་ཟག་བཅས་སུ་འདོད་པའོ། །དགེ་བ་དེ་དག་ཐམས་ཅད་ཀྱི་བྱེད་ལས་དང་རྟེན་གཞི་ནི། ཐར་པ་ཆ་མཐུན་གྱི་དགེ་བའི་ངོ་བོ་ལམ་བདེན་བྲལ་རྒྱུས་བསྡུས་པ་ཡིན་པས་བག་ཆགས་སྣ་ཚོགས་པའི་ཀུན་གཞི་ལ་བརྟེན་ཡང་། བྲལ་འབྲས་ནི། རང་བཞིན་མེད་པའམ། སྙིང་པོའི་སྟེང་ན་བརྟེན་པས་འཕོ་འགྱུར་མེད་པའི་ཐར་པ་དམ་པའི་རྒྱུ་བྱེད་པའོ། །དེ་དག་ནི་དག་པའི་རྒྱུ་འབྲས་ཀྱི་རྟེན་ཅིང་འབྲེལ་འབྱུང་ཤིན་ཏུ་ཕྲ་བའི་གནས་དམ་པའོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། ལས་རྒྱུ་འབྲས་ཀྱི་ཚོམས་ཏེ་རབ་བྱེད་གསུམ་པའི་འགྲེལ་པའོ།། །།སྤྱི་དོན་བཞི་པ་འཁོར་བ་སྡུག་བསྔལ་གྱི་རང་བཞིན་རྣམ་པར་གཞག་པ་ནི། འཁོར་ལོ་དང་པོའི་གཏམ་དང་འབྲེལ་བར་སྟོན་པའི་ཕྱིར། མངོན་མཐོའི་གྲུ་བོ་མཆོག་ལ་བརྟེན་པ་རྣམས། །རེ་ཞིག་ངན་སོང་ཆུ་སྲིན་གདུག་པའི་ལྕེས། །བཏང་ཡང་ཐར་པའི་སྐམ་སར་མ་ཕྱིན་པས། །འཕགས་པའི་བདེན་པ་བཞི་ཡི་དེད་དཔོན་བསྙེན། །བདག་ཅག་འཁོར་བའི་གནས་རིས་ན་མངོན་པར་མཐོ་བ་ལྷ་མི་ཁྱད་པར་ཅན་གྱི་རྟེན། གྲུ་བོ་ཆེ་ལྟ་བུར་བག་ཡངས་པ་བདེ་བའི་ཚོར་བ་འབའ་ཞིག་ཉམས་སུ་མྱོང་བ་ལ་བརྟེན་ནའང་། ངན་སོང་གི་གནས་ཆུ་སྲིན་གདུག་པའི་ལྕེས་ལྡག་པ་ལ་ཤིན་ཏུ་ཉེ་ཞིང་། གཏན་གྱི་བཙན་ས་ཐར་པ་དང་ཐམས་ཅད་མཁྱེན་པའི་གོ་འཕང་སྐམ་ས་ལ་ཕྱིན་པ་ལྟ་བུ་ཉེ་ཞོ་མ་མཆིས་པའི་གནས་ཐོབ་པ་མ་ཡིན་པས་འཕགས་པའི་བདེན་པ་བཞིའི་དེད་དཔོན་འབའ་ཞིག་ལ་བསྟེན་པར་བྱའོ། །ཞེས་གཟུགས་ཅན་གྱི་རྒྱན་དུ་སྦྱར་བ་སྟེ། དེ་ལ་བདག་ཅག་གི་སྟོན་པས་ཝཱ་རཱ་ཎ་སཱིར། ལྔ་སྡེ་བཟང་པོ་སོགས་ལ་དགེ་སློང་དག །འདི་ནི་སྡུག་བསྔལ་ལོ། །འདི་ནི་ཀུན་འབྱུང་ངོ་། །འདི་ནི་འགོག་པའོ། །འདི་ནི་ལམ་མོ། །དགེ་སློང་དག་སྡུག་བསྔལ་ཤེས་པར་བྱའོ། །ཀུན་འབྱུང་སྤང་བར་བྱའོ། །འགོག་པ་མངོན་དུ་བྱའོ། །ལམ་རྒྱུད་ལ་བརྟེན་པར་བྱའོ། །དགེ་སློང་དག་སྡུག་བསྔལ་ཤེས་པར་བྱ་སྟེ། ཤེས་པར་བྱར་མེད་པའི་མི་སྐྱེ་བ་ཤེས་པ་དང་ཀུན་འབྱུང་སྤང་བར་བྱ་སྟེ། སྤང་དུ་མེད་པའི་མི་སྐྱེ་བ་ཤེས་པ་དང་། འགོག་པ་མངོན་དུ་བྱ་སྟེ། མངོན་དུ་བྱར་མེད་པའི་མི་སྐྱེ་བ་ཤེས་པ་དང་། ལམ་རྒྱུད་ལ་བརྟེན་པར་བྱ་སྟེ། བརྟེན་པར་བྱར་མེད་པའི་མི་སྐྱེ་བ་ཤེས་པ་དང་། ཞེས་བདེན་པ་བཞི་ལན་གསུམ་དུ་བཟློས་ཏེ་གསུངས་པ་ལས། དེ་ལ་སྡུག་བསྔལ་ཤེས་པར་བྱ་བ་ནི། གནས་རིགས་དྲུག་པོ་དམའ་འམ་མཐོ་ཡང་རུང་། །སྡུག་བསྔལ་འགྱུར་དང་ཁྱབ་པ་འདུ་བྱེད་ཀྱིས། །དམ་ལ་མ་བཞག་འཁོར་བ་ཡོད་མ་ཡིན། །འདི་ལྟར་རྩ་བའི་སྡུག་བསྔལ་ཆེན་པོ་ནི་རྣམ་པ་གསུམ་སྟེ། སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། ཁྱབ་པ་འདུ་བྱེད་ཀྱི་སྡུག་བསྔལ་ལོ། །དང་པོ་ནི་སྡུག་བསྔལ་གཅིག་ཤོས་མ་སངས་པར་གཅིག་ཤོས་ཀྱིས་བརྩེགས་པ་མཛེ་ཐོག་ཏུ་ཕོལ་གྱིས་གཏུགས་པ་ལྟ་བུའོ། །གཉིས་པ་ནི། ད་ལྟ་བདེ་བར་ཡོད་འཕྲོ་ལ་གློ་བུར་དུ་སྡུག་བསྔལ་བའི་རྐྱེན་དང་ཕྲད་པ་སྟེ། དཔེར་ན་ནགས་ཁྲོད་དུ་སྐྱོ་སངས་ལ་ཕྱིན་པས་དུག་སྦྲུལ་གྱིས་གཙེས་པའམ། ཁ་ཟས་རོ་བདའ་བ་ཟོས་པས་སྲིན་ཕོ་བར་ལངས་པ་ལྟ་བུའོ། །གསུམ་པ་ནི། འཇམ་དུག་ཁོང་དུ་སོང་ན་ཕྱིས་ནད་འདུ་བྱེད་ཅིང་། བཙན་པོ་དང་། གདོན་ཆེན་པོ་སོགས་ལ་གནོད་པ་བྱས་པས་ཕྱིས་གནོད་ལན་འདུ་བྱེད་པར་གདོན་མི་ཟ་བ་ལྟར། རྣམ་པ་ཀུན་ཏུ་ཉོན་མོངས་པ་ཅན་གྱི་ཡིད་ཀྱིས་སྡིག་པའི་ལས་ལྐོག་གྱུར་དུ་བྱས་པའང་། ཕྱིས་སྡུག་བསྔལ་གྱི་རང་བཞིན་མངོན་གྱུར་དུ་འདུ་བྱེད་པ་ནི་ཁྱབ་པ་འདུ་བྱེད་ཀྱི་སྡུག་བསྔལ་བལྟར་མི་མངོན་པའི་ཁྱད་པར་རོ། །དེ་ལྟར་སྡུག་བསྔལ་རྣམ་པ་གསུམ་མཐའ་དག་པའམ། ཅི་རིགས་པའི་དམ་འོག་ཏུ་མ་གཅུར་བའི་འཁོར་བ་ནི་ཡོད་མི་སྲིད་པས་ན་འཁོར་བའི་རང་བཞིན་སྡུག་བསྔལ་ཅན་ཁོ་ན་ཏེ། ལས་རྣམ་འབྱེད་ལས། སྲིད་པའི་སྡུག་བསྔལ་ནི་བསིལ་བའི་སྐབས་མེད་པ་མེའི་འོབས་ལྟ་བུའོ། །འཇིགས་ཤིང་ཉམ་ང་བས་གཅན་གཟན་ཁྲོ་བོ་ལྟ་བུའོ། །མི་རྒོད་ཀྱི་ནང་ན་གནས་པ་ལྟ་བུའོ། །ཐར་པའི་གོ་སྐབས་དང་བྲལ་བས་རྒྱལ་པོའི་ཁྲི་མུན་ལྟ་བུའོ། །ཡང་ནས་ཡང་དུ་འབྱུང་བས་རྒྱ་མཚོའི་རླབས་ལྟ་བུའོ། །བདེ་འགྲོའི་སྲོག་འཇོམས་པས་དུག་ཧ་ལ་ཧ་ལ་ལྟ་བུའོ། །ཞེས་སོ། །དེའང་འདོད་པ་དང་ཡུལ་གཉིས་ཕན་ཚུན་རྟེན་དང་བརྟེན་པ་ལྟ་བུར་འབྲེལ་ནས་བསླུ་བའི་ཚུལ། ཕུང་དཀྲོལ་བསྐྱེད་ལ་མགོ་འཕང་བསྟོད་པ་ཡི། །མ་རུངས་འདོད་པའི་གདོན་དང་ཡུལ་གྱི་དུག །ཕན་ཚུན་འཛིངས་ཤིང་གཏུགས་པའི་བཙོན་ར་ནས། །ཐར་པའི་སྐབས་མེད་ཉམ་ཐག་སྐྱོ་བ་འཕེལ། །འདི་ལྟར་འདོད་པ་ནི་ཕུང་དཀྲོལ་ཐམས་ཅད་ཀྱི་རྩ་བ་ཡིན་ཏེ། བདག་དང་གཞན་ལ་གནོད་པའི་ཕྱིར་སྦྲུལ་གདུགས་པ་མགོ་འཕང་བསྟོད་པ་ལྟ་བུའོ། །དགེ་བའི་ལས་ཆུད་གསོན་པར་བྱེད་པས་དུག་བཞིན་དུ་གསོད་པའི་བདག་ཉིད་ཅན་ནོ། །ངན་སོང་དུ་འཁྲིད་པར་བྱེད་པས་ན་མཚོན་བཞིན་དུ་སྡུག་བསྔལ་བསྐྱེད་པའི་རྒྱུ་ཡིན་ནོ། །ལྷ་དང་མིའི་ཕུན་སུམ་ཚོགས་པ་ལས་ཐག་བསྲིང་བར་བྱེད་པས་ན་དགྲ་བོ་བཞིན་ནོ། །ཕྱིན་ཆད་གཡོ་ཞིང་འགྱོད་པ་བསྐྱེད་པའི་ཕྱིར་མེ་བཞིན་ནོ། །དེའི་ཕྱིར་འཇིག་རྟེན་ན་ཐོས་པ་ལ་སོགས་པ་དོན་ཆེན་པོ་ཉིད་ཀྱིས་བསྲུང་བ་བཞིན་དེ་ལ་ཡིད་འབྱུང་ནས་སྲན་བསྐྱེད་པའི་ཚུལ། བཤེས་སྤྲིང་ལས། གཡོ་བའི་སེམས་ནི་ཐོས་མཚུངས་བུ་ལྟ་བུར། །གཏེར་བཞིན་སྲོག་དང་འདྲ་བར་བསྲུང་བགྱི་སྟེ། །གདུག་པ་དུག་དང་མཚོན་དང་དགྲ་བོ་དང་། །མེ་བཞིན་འདོད་པའི་བདེ་ལས་ཡིད་དབྱུང་མཛོད། །ཅེས་འདོད་པའི་ཁམས་པ་ཐམས་ཅད་ཀྱི་སྲེད་པ་འཕེལ་བའི་དང་པོ་ངེས་འབྱུང་གི་བསླབ་པའི་གེགས། ཁྱིམ་གྱི་བཙོན་རར་འཆིང་བའི་སྒྲོག་དམ་པོ་རེག་པའི་བདེ་བ་ལ་སྨད་པའི་སྒོ་བསྟན་ནས་དེའི་གཉེན་པོར། བུད་མེད་གཞོན་ནུའི་ལུས་ནི་ལོགས་ཤིག་ཏུ། །དྲི་ང་བ་དང་སྒོ་དགུ་དོད་པ་དང་། །མི་གཙང་ཀུན་སྣོད་འགྲོ་བ་དགང་དཀའ་དང་། །ལྤགས་པས་གཡོག་པར་རྒྱན་ཡང་ལོགས་ཤིག་གཟིགས། །ཞེས་ལུས་དྲི་ང་བ་དང་། དབྱིབས་དང་། མི་གཙང་བའི་རྟེན་དང་། ངོམས་མི་ཤེས་པ་དང་། ཁོང་ཐམས་ཅད་སྲིན་བུ་དང་ནང་ཁྲོལ་གྱི་སྣོད་དུ་གྱུར་པའི་སྒོ་ནས་བཟང་པོ་མ་ཡིན་པར་སུན་དབྱུང་ནས། དེའི་ལུས་དང་རྒྱན་གཉིས་ཐ་དད་དུ་ཕྱེ་ནས་བལྟས་པས་འདོད་ཆགས་ཀྱི་མེ་ཞི་བར་འགྱུར་བའི་ཐབས་བསྟན་པའོ། །དེ་བཞིན་དུ་འདོད་པ་ནི་དང་པོར་སྤྱོད་པའི་དུས་ན་བདེ་བ་ལྟར་སྣང་མོད་ཀྱིས། ཐ་མར་ནི་ཡོངས་སུ་གདུང་བ་དང་འཁོར་བར་འཆིང་བའི་ལྕགས་སྒྲོག་ལྟ་བུ་ཡིན་པས་ན་ཀིམ་པའི་འབྲས་བུ་དང་མཚུངས་སོ། །ཀིམྤའི་འབྲས་བུ་ནི་ཕྱིའི་ཤུན་པ་ཙམ་བལྟ་ན་སྡུག་པ་ཟད་ཀྱིས། ནང་ཐམས་ཅད་མ་རུངས་པས་ནད་དང་སྡུག་བསྔལ་མཐའ་དག་བསྐྱེད་པའི་ཕྱིར་སྔ་མ་ལས། འདོད་པ་རྣམས་ནི་ཕུང་དཀྲོལ་བསྐྱེད་པ་སྟེ། །ཐུབ་པའི་དབང་པོས་ཀིམྤའི་འབྲས་འདྲར་གསུངས། །དེ་དག་སྤང་བགྱི་དེ་ཡི་ལྕགས་སྒྲོག་གིས། །འཁོར་བའི་བཙོན་རར་འཇིག་རྟེན་འདི་དག་བཅིངས། །ཞེས་དང་། བླ་མ་ལ་སྤྲིང་བར། ནོར་བུའི་རྣ་ཆ་བུ་དང་ཆུང་མ་ལ། །ཡོངས་སུ་ཆགས་སེམས་གང་ཡིན་ལ་ལྟོས་ན། །ལྕགས་ཤིང་གྲེས་མ་ལས་བྱས་འཆིང་མ་གང་། །དེ་དག་དམ་པོ་མིན་ཞེས་འཕགས་པས་གསུངས། །ཞེས་གདམས་པ་ལྟར་རོ། །ཡུལ་ལྔ་སོ་སོ་ལ་བརྟེན་ནས་བསླུ་བ་སྟོན་པའི་ཕྱིར། བདེ་བ་འདོད་ལ་མངོན་སྦྱོར་བརྩོན་པ་དག །གཏི་མུག་མཐུས་ནོན་སྡུག་བསྔལ་རྒྱུ་འབྲས་ཀྱི། །མཚོན་ཆ་རྣོན་པོའི་དབལ་ལ་བརྟེན་བྱས་པས། །གནོད་པའི་གནས་སུ་རང་ཉིད་ཡང་དག་སྦྱར། །མར་མེའི་གཟུགས་དང་ཕྱེ་མ་ལེབ་བཞིན་དུ། །སྒྲ་དང་དྲི་རོ་རེག་བྱས་བསླུ་བ་ནི། །རི་དྭགས་བུང་བ་ཉ་དང་གླང་པོ་ཆེ། །འདོད་པའི་ཡུལ་ལྔ་དག་དང་རྟེན་ཅིང་འབྲེལ། །དེའང་བདེ་བའི་འབྲས་བུ་ལ་སྨོན་པ་ནི་ཐམས་ཅད་དེ། དེའི་རྒྱུ་ལ་བླང་དོར་བྱེད་པ་ནི་སྲིད་པ་ཙམ་མོ། །འདི་ལྟར་བདེ་བ་ཐོབ་པར་འདོད་ཀྱང་དེའི་རྒྱུ་དགེ་བ་ལ་ནི་མི་སྤྱོད། སྡུག་བསྔལ་འདོར་བར་སེམས་ཀྱང་དེའི་རྒྱུ་མི་དགེ་བ་ལ་ནན་གྱིས་འཇུག་པ་འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་དང་། ཕྲག་དོག་འབའ་ཞིག་པའི་ཀུན་འབྱུང་གི་མཚན་ཉིད་ལ་སྤུ་གྲིའི་སོ་ལ་ཆགས་པའི་སྦྲང་རྩིའི་རོ་མྱོང་བ་བཞིན་དུ་སྤྱད་པས་རང་གིས་རང་ཉིད་གནོད་པའི་གནས་སུ་སྦྱར་ཏེ། སྤྱོད་འཇུག་ལས། སྡུག་བསྔལ་འདོར་འདོད་བློ་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུག །བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །ཞེས་སོ། །ཇི་ལྟར་འཇོམས་ན། ཕྱེ་མ་ལེབ་ནི་མར་མེའི་གཟུགས་སམ། མེའི་འོད་ལ་ཆགས་ནས་འཆི་བ་སྟེ། སློབ་དཔོན་དབྱིག་གཉེན་གྱིས། འབར་བ་ཆེན་པོའི་ཚོགས་དག་གི། །མེ་ཆེན་དག་ནི་མཐོང་ནས་ཀྱང་། །གཟུགས་ལ་ཆགས་པ་ཆེན་པོ་ཡང་། །ཕྱེ་ལེབ་མེ་ལ་འཇུག་པར་འགྱུར། །ཞེས་སོ། །དེ་བཞིན་དུ་སྒྲ་ལ་ཆགས་པས་བསླུ་བ་ནི་རི་དྭགས་རྣམས་ཏེ། །རྩྭ་ཡི་མྱུ་གུ་གཙང་མ་ཟ། །ཤིན་ཏུ་རིང་དུ་འགྲོ་ནུས་པ། །རི་དྭགས་རྔོན་པའི་གླུ་དབྱངས་ཀྱིས། །ངེས་པར་གསོད་པ་ཚོལ་བར་འགྱུར། །ཞེས་དང་། དྲིས་བསླུ་བ་ནི་བུང་བ་སྟེ། །རྟག་ཏུ་ནམ་མཁའ་ལ་རྒྱུ་ཞིང་། །གཟུགས་ནི་ཤིན་ཏུ་ཡིད་འོང་བའི། །བུང་བ་དྲི་ཡི་ཉེས་པ་ཡིས། །ངེས་པར་འཆི་བར་འགྱུར་བ་ཡིན། །ཅེས་དང་། ཉ་རྣམས་ལྕགས་ཀྱུའི་རྩེ་ལ་གནས་པའི་རོས་བསླུ་བའང་། བཀག་པ་མེད་པའི་ལམ་འགྲོ་ཞིང་། །རྟག་ཏུ་རྣམ་པར་རྒྱུ་བ་ཡང་། །རོ་མྱོང་བ་ལ་ཆགས་པ་ཡིས། །ཉ་ནི་ལྕགས་ཀྱུས་བརླག་པར་བྱེད། །ཅེས་དང་། གླང་པོ་ཆེ་དགའ་མའི་རེས་བྱས་སྲོག་དང་འབྲལ་བའི་ཚུལ། ས་སྲུངས་དང་ནི་རབ་འགྲན་ཞིང་། །རི་ཡི་རྒྱལ་པོ་རྒྱུན་ཤེས་བྱའི། །བན་གླང་མོ་ཡི་ཉེ་རེག་གིས། །ངེས་པར་གླང་པོ་གསད་པར་སོང་། །ཞེས་སོ།

།དེ་ལྟར་སེམས་ཅན་དེ་དག་ནི་འདོད་པའི་ཡོན་ཏན་རེ་རེས་ཀྱང་སྲོག་དང་འབྲལ་བར་ནུས་ན་སྐྱེས་བུ་རྣམས་ནི་ཡུལ་ལྔ་པོ་འདི་དག་ཐམས་ཅད་དང་རྟག་ཏུ་རྟེན་ཅིང་འབྲེལ་བ་ཡིན་པས་ཅིའི་ཕྱིར་ཉམ་ཉེས་པར་མི་འགྱུར། དེ་སྐད་དུ་སྔ་མ་ལས་ཀྱང་། སྐྱེས་བུ་དག་ནི་གཅིག་ལ་ཡང་། །ལྔ་པོ་འདི་དག་རྟག་ལྡན་ཞིང་། །ཉིན་མཚན་དུ་ནི་རབ་འཇོམས་ན། །བདེ་བའི་གནས་ཇི་ཐོབ་པར་འགྱུར། །ཞེས་བཤད་དོ། །དེ་བས་ན་གཟུང་བའི་ཡུལ་ལྔ་པོ་དང་། འཛིན་པའི་སེམས་གཉིས་འདྲེས་པ་ལས་ཉོན་མོངས་པ་སྐྱེ་ཞིང་། དེས་འཁོར་བ་མུ་མཐའ་མེད་པར་འཁྲིད་པས་ན་འཕགས་པ་སྤྱན་རས་གཟིགས་ཀྱིས་དགེ་སློང་རབ་གསལ་གཞོན་ནུ་ལ་སྤྲིངས་པར། གྲོགས་ཁྱོད་ཅི་སྟེའམ་དམ་བཅས་བརྗེད་དམ་ཅི། །འདོད་པ་མེ་མདག་དོང་འདྲ་འདི་ལ་ཅི་ཞིག་ཆགས། །ཤིན་ཏུ་སྐྱོ་བའི་ཡིད་ཀྱིས་རབ་ཏུ་མི་འབད་པར། །སྲིད་རྒྱུ་འདོད་པ་ད་དུང་གང་བ་ག་ལ་སྲིད། །ཅེས་དང་། བླ་མ་ལ་སྤྲིང་བར། བློ་ངན་ལོངས་སྤྱོད་ཀྱིས་བཅོམ་པ། །ཕ་རོལ་འཚོལ་བར་མི་བྱེད་ཅིང་། །བསམ་བརླག་འདོད་ལ་སྲེད་པ་ཡིས། །བདག་ཕུང་གཞན་ཡང་ཕུང་བར་བྱེད། །འདོད་པའི་རྣམ་སྨིན་སྡུག་བསྔལ་ཏེ། །དང་པོ་མངར་ལ་འབྲས་བུ་ཚ། །མེ་སྒྲོན་ལག་ནས་མ་བོར་ན། །མཇུག་ཏུ་བྱིས་པ་སྲེག་བྱེད་བཞིན། །ཅེས་གདམས་སོ། །འཁོར་བའི་སྡུག་བསྔལ་མཐུ་ཆེ་བར་སྟོན་པ་ནི། སྲིད་པའི་ཡུལ་ལ་ཐུ་བ་གཏུམ་པོའི་མེ། །ཁྲོ་བའི་མངོན་སྤྱོད་རྩུབ་པ་གཅན་གཟན་དང་། །མི་རྒོད་རྒྱལ་པོའི་ཆད་པ་ལས་མྱུར་བའི། །སྡུག་བསྔལ་སྔ་ཕྱི་བརྒྱུད་མས་འགྲོ་འདི་མནར། །འདི་ལྟར་འཁོར་བ་ནི་སྡུག་བསྔལ་གྱི་རང་བཞིན། སྡུག་བསྔལ་གྱི་རྒྱུ་འབྲས། སྡུག་བསྔལ་གྱི་ཕུང་པོ་ཆེན་པོ་འབའ་ཞིག་ལ་བརྟེན་པའི་ཚུལ། འཇིག་རྟེན་ན་གང་དང་འཕྲད་པ་ཚར་གཅོད་པ་ནི་གཏུམ་པོའི་མེ་ཡིན་ཏེ། དེ་བས་ཀྱང་འཕགས་པ་རྣམས་ཀྱིས་གཟིགས་ངོ་ན་སྲིད་པའི་རྩེ་མོ་མན་ཆད་མེ་འབར་བ་ལྟ་བུའི་སྡུག་བསྔལ་ཅན་དུ་རྟག་པར་གཟིགས་པ་ཡིན། དེ་བཞིན་དུ་འབྲོག་དགོན་པ་ཆེན་པོ། མྱ་ངམ་གྱི་ཐང་། བཤེས་མེད་ཀྱི་གནས་སུ་སྟག་དང་། སེང་གེ་དང་། དོམ་དང་། དྲེད་དང་། མི་རྒོད་ལ་སོགས་པས་གཙེས་ནས་འབྲོས་པའི་ཐབས་འགགས་པའམ། རྒྱལ་པོའི་ཆད་པས་བཙོན་དོང་དམ་པོར་བཅུག་ནས་ལྕགས་སྒྲོག་དང་། ཤིང་སྒྲོག་དང་། ཐ་གུས་ནི་བཅིངས། མི་གཙང་བའི་དཀྱིལ་དུ་ཉལ། བདེ་བར་བརྐྱང་བསྐུམ་བྱེད་ས་ནི་མེད། མིག་དང་། སྙིང་དང་། པགས་པའི་སྟེང་དུ་སྤུ་གྲིའི་དཔལ་གྱིས་འཚེ་བར་ཉེ་བ་དེའི་སྡུག་བསྔལ་གྱི་ཚོར་བ་དེ་ཅི་འདྲ། དེ་བས་ཀྱང་སེམས་ཅན་རྣམས་ཐར་དུས་མེད་པ་ཟོ་ཆུན་གྱི་འཁྱུད་མོ་ལྟ་བུའི་འཁོར་བའི་བཙོན་དོང་གཏིང་རིང་པོར་ཞུགས། སྐྱེ་རྒ་ན་འཆི་དང་། སྡུག་བསྔལ་ཆེན་པོ་གསུམ་དང་བརྒྱད་ཀྱི་སྒྲོག་དམ་པོས་ནི་བཅིངས། སྲིད་པར་ཉིང་མཚམས་རེ་སྦྱོར་དུས་བར་མ་དོའི་མྱ་ངམ་གྱི་ཐང་ཆེན་པོ་བཟོད་པར་དཀའ་བ་ལ་ནི་འཁྱམ། ལས་ངན་གྱི་མི་གཙང་བས་ལུས་ལ་གོས། བདེ་བའི་སར་རང་སྟོབས་ཀྱི་དབུགས་མི་ཕྱིན། འོག་འགྱུ་དང་རྣམ་རྟོག་ངན་པའི་མཚོན་རྩེ་རྣོན་པོས་ཤེས་རབ་ཀྱི་མིག་དང་། བཟོད་པའི་སྙིང་དང་། དགེ་ཚོགས་ཀྱི་པགས་པའི་སྟེང་དུ་འཛུགས་པས་འཁོར་བ་སྡུག་བསྔལ་གྱི་རྒྱ་མཚོར་དུས་ཚིགས་མེད་པར་འཁྱམ་དགོས་པ་ནི་གནས་སྐབས་ཀྱི་འཇིགས་པ་དེ་དག་གི་དོ་མ་ཡིན་ཏེ། རྒྱ་ཆེར་རོལ་པ་ལས། བྱིས་རྣམས་འཁོར་བ་འདི་ལ་ཆགས་ཤིང་དགའ་བ་ནི། ཕག་མི་གཙང་བ་ལ་ཆགས་པ་ལྟ་བུའོ། །འདི་ན་སེམས་ཅན་བྱིང་བ་ནི་གླང་པོ་ཆེ་འདམ་དུ་བྱིང་བ་ལྟ་བུའོ། །འདི་ལ་སེམས་ཅན་རྣམས་ཆགས་པ་ནི་ཁྱི་ཀེང་རུས་ལ་ཆགས་པ་ལྟ་བུའོ། །འདི་ན་སེམས་ཅན་རྣམས་ལྷུང་བ་ནི་ཕྱེ་མ་ལེབ་མར་མེ་ལ་ལྷུང་བ་ལྟ་བུའོ། །འདི་ན་སེམས་ཅན་རྣམས་གཏུམས་པ་ནི་ཉ་རྒྱ་ཡིས་གཏུམས་པ་ལྟ་བུའོ། །འདི་ན་སེམས་ཅན་རྣམས་འཁོར་བ་ནི་རྫ་མཁན་གྱི་འཁོར་ལོ་ལྟ་བུའོ། །འདི་ན་སེམས་ཅན་རྣམས་བསླུས་པ་ནི་གཡོན་ཅན་གྱིས་བྱིས་པ་འདྲིད་པ་ལྟ་བུའོ། །ཞེས་སོ། །ཡང་། དགྲ་གཉེན་མ་ངེས་པས་ཕན་གནོད་ཀྱི་རྒྱུ་འབྲས་འཆོལ་བར་སྤྱོད་པས་སྡུག་བསྔལ་བའི་ཚུལ། བདག་ལ་བཤེས་སམ་མི་མཐུན་ཉེ་དང་འཁོན། །བསམ་པར་མི་ནུས་མཐའ་དག་སེམས་ལྡན་གྱིས། །དགྲ་དང་མཛའ་བཤེས་བར་མའི་ཕྱོགས་བཟུང་ནས། །ཕན་དང་གནོད་པ་སྦྱིན་པ་བསམ་ལས་འདས། །དེ་ལ་འཇིག་རྟེན་ན་གྲགས་པ་ཤིན་ཏུ་བརྟན་པའི་འདི་ནི་བདག་གི་མཛའ་བཤེས་སོ། །འདི་ནི་དགྲ་བོར་གྱུར་པའོ། །འདི་ནི་ཕའོ། །འདི་ནི་ཕའི་ཕྱོགས་ཀྱི་ཉེ་དུ་རིགས་དང་རུས་ལ་བརྟེན་པའོ། །འདི་ནི་མའོ། །འདི་ནི་མའི་ཕྱོགས་ཀྱི་ཉེ་དུ་ཆོ་དང་འབྲང་གི་བདག་ཉིད་ཅན་ནོ། །འདི་ནི་བར་མའོ། །བར་མ་ནི་བཏང་སྙོམས་ཀྱི་ཡུལ་ལ། མཛའ་བཤེས་ནི་ཕན་པའི་ཡུལ་ལོ། །དགྲ་བོ་ནི་ཚར་བཅད་པའི་གནས་སོ། །བུ་དང་བུ་མོ་ནི་ཡིད་གཅུགས་པའི་ཡུལ་ཞེས་མངོན་ཞེན་བརྟས་པའི་གནས་སུ་མི་རིགས་ཏེ། ཚེ་སྔ་མའམ། ཡང་ན་ཕྱི་མའི་གནས་སུ་ཕ་ནི་བུར་འགྱུར་རོ། །མ་ནི་ཆུང་མར་འགྱུར་རོ། །དགྲ་བོ་ནི་མཛའ་བཤེས་སུ་འགྱུར་རོ། །ཡང་ནི་དེ་བས་ཀྱང་ལྡོག་པར་འགྱུར་བས་ན། བཤེས་སྤྲིང་ལས། ཕ་ནི་བུ་ཉིད་མ་ནི་ཆུང་མ་ཉིད། །སྐྱེ་བོ་དགྲར་གྱུར་པ་ཡང་བཤེས་ཉིད་དང་། །བཟློག་པ་ཉིད་དུ་མཆི་བས་དེ་སླད་དུ། །འཁོར་བ་དག་ན་ངེས་པ་འགའ་མ་མཆིས། །ཞེས་དང་། འཕགས་པ་ཀཱ་ཏྱཱ་ཡ་ནས། ཁྱིམ་བདག་གཅིག་ལ་བསོད་སྙོམས་བསླངས་པས། དེས་དགྲ་བོ་བུ་ཆུང་དུ་གྱུར་པ་པང་དུ་ཐོགས། ཕ་ཉ་རུ་གྱུར་པ་བཟའ་ཞིང་མུར། མ་ཁྱི་རུ་སྐྱེས་ནས་ཉ་རུས་འཆའ་བ་ལ་བརྡེག་པ་གཟིགས་པས། ཕ་ཤ་བཟའ་ཞིང་མ་ལ་བརྡེག །ལས་ངན་དགྲ་བོ་པང་དུ་ཁུར། །ཆུང་མས་ཁྱོ་ཡི་རུས་པ་འཆའ། །འཁོར་བའི་ཆོས་ལ་གད་མོ་བྲོ། །ཞེས་གསུངས་ལ། ཡང་ནས་ཡང་དུ་ཉིང་མཚམས་སྦྱོར་བའི་སྡུག་བསྔལ་ཀྱང་། བཅོམ་ལྡན་འདས་ཀྱིས། དགེ་སློང་དག་དཔེར་ན་སྐྱེས་བུ་འགའ་ཞིག་གིས་ཆེན་པོ་འདི་ལ་རྒྱ་ཤུག་གི་ཚི་གུ་ཙམ་གྱི་རིལ་བུ་ཐོགས་ཏེ། འདི་ནི་བདག་གི་མའོ། །འདི་ནི་བདག་གི་མ་དེའི་ཡང་མའོ་ཞེས་འདོར་བར་བྱེད་ན། དགེ་སློང་དག་ས་ཆེན་པོ་འདིའི་འཇི་བ་ནི། ཆེས་སྔར་ཟད་པར་འགྱུར་གྱིས། མི་རྣམས་ཀྱི་མ་བརྒྱུད་པ་ནི་དེ་ལྟ་མ་ཡིན་ནོ་ཞེས་ང་སྨྲའོ། །ཞེས་གསུངས་པའི་དོན་སློབ་དཔོན་འཕགས་པས་མའི་ཐུག་མཐའ་ལ་སོགས་པ་ཚིགས་སུ་བཅད་པ་ལྟར་རོ། །རྣམ་པ་ཐ་དད་པའི་ལུས་ཡང་དང་ཡང་དུ་འདོར་བའི་ཉེས་པའི་དབང་དུ་བྱས་ནས་སྤྱིར་བསྟན་པ། རྡུལ་ཕྲན་ལྟ་བུའི་ལུས་ཀྱི་བདག་གཅིག་པུའི། །སྲོག་རྟེན་གཟུགས་སུ་གྱུར་དང་འདོད་པའི་ཕྱིར། །མགོ་དང་ཡན་ལག་གཅད་གཏུབས་བགྱིས་སོ་ཅོག །སྤུངས་ན་ལྷུན་པོའི་ཆེ་ཐང་ཉམས་པར་འགྱུར། །དམྱལ་གནས་ཟངས་ཞུན་ཁོལ་མ་འཐུངས་པ་དང་། །ཡི་དྭགས་ལུས་གྱུར་རྣག་ཁྲག་མི་གཙང་ཟོས། །ཀུན་ཏུ་སྡུག་བསྔལ་རྒྱུ་ལས་མཆི་མ་ཟགས། །ཕྱོགས་མཐའ་གཏུགས་པའི་ཆུ་ཀླུང་དག་ལས་མང་། །དེ་སྐད་དུ་དྲན་པ་ཉེར་གཞག་གིས་གསལ་བར་སྟོན་ཏེ། དགེ་སློང་དག་སྲིད་པའི་ཁམས་ལ་སྐྱོ་བར་གྱིས་ཤིག །དེ་ཅིའི་ཕྱིར་ཞེ་ན། ཐོག་མ་མེད་པའི་འཁོར་བ་ན་འཁོར་བ་གང་གི་ཚེ། གྲོག་སྦུར་དུ་སྐྱེས་ཏེ་དོར་བའི་ལུས་ཀྱང་གཅིག་ཏུ་བསྡོམས་ཏེ་ཕུང་པོར་བྱས་ན་རིའི་རྒྱལ་པོ་རི་རབ་ཀྱང་ཆེས་མཐོ་ཞིང་། དུས་པའི་མཆི་མའང་རྒྱ་མཚོ་བཞིའི་ཆུ་བས་ལྷག་གོ །དམྱལ་བ་དང་ཡི་དྭགས་སུ་གྱུར་པ་དེའི་ཚེ་ལན་གྲངས་མེད་དཔག་མེད་པ་ཞིག་འཐུངས་པའི་ཟངས་ཞུན་ཁོལ་མ་དང་། ཁྲག་དང་། ཆུ་སེར་དང་། རྣག་དང་། ངར་སྣབས་ཀྱང་འདི་ལྟར་གླིང་བཞིའི་ནང་ནས་རྒྱ་མཚོར་འབབ་པའི་ཆུ་ཀླུང་བཞི་ལས་མང་ཞིང་། འདོད་པ་དག་གི་ཕྱིར་མགོ་དང་། མིག་དང་། ཡན་ལག་དང་། ཉིང་ལག་བཅད་པའང་གངྒཱའི་ཀླུང་གི་བྱེ་མ་སྙེད་ཀྱི་ཁམས་ན་ས་དང་། ཆུ་དང་། མེ་དང་། རླུང་གི་རྡུལ་ཤིན་ཏུ་ཕྲ་བ་སྙེད་ལས་འདས་པའི་གྲངས་དང་མཉམ་པར་འགྱུར་རོ། །ཞེས་སོ། །ད་ནི་འགྲོ་དྲུག་སོ་སོའི་ངེས་པའི་སྡུག་བསྔལ་ཉམས་སུ་མྱོང་པའི་ཉེས་པ་བསྟན་པའི་ཕྱིར་དམྱལ་བ་ནས་རིམ་པར་བཤད་པ། ཁྱད་པར་དམྱལ་བའི་སྡུག་བསྔལ་ཚད་མེད་དེ། །ཕན་ཚུན་གཅིག་གིས་གཅིག་གསོད་ཡང་སོས་ལ། །ཐིག་ནག་སོག་ལེས་གཤོག་འབྱར་རྒྱུན་མི་འཆད། །བསྡུས་འཇོམས་མགོ་བརྙན་རི་དང་ཐོ་བས་འཐག །ངུ་འབོད་ལྕགས་ཞུན་བསྐོལ་བར་འཚེད་ཅིང་དབད། །འབོད་སྒྲོག་ཆེན་པོ་ལྕགས་ཁྱིམ་འབར་བར་བསྲེག །ཚ་བ་གསལ་ཤིང་འབར་བས་ལུས་ལ་འབིགས། །རབ་ཏུ་ཚ་བ་མདུང་ཐུང་རྩེ་གསུམ་པས། །ལུས་ཀྱི་གཞུང་འབིགས་ཕྱི་ནས་ལྕགས་བསྲེགས་དཀྲི། །ཁྲོ་ཆུ་ཁོལ་མར་འཚེད་དང་མནར་མེད་ནི། །ལྕགས་ཁྱིམ་འབར་བར་མེ་དང་གཉིས་མེད་བསྲེག །ཅེས་འདོམས་ཏེ། དེ་ལ་དམྱལ་བ་ཡང་སོས་ཞེས་བྱ་བ་ནི། ལྕགས་ཀྱི་མདག་མེ་འབར་བའི་སྟེང་དུ་ཕན་ཚུན་དགྲ་མི་ཤ་བོ་མཐོང་བ་བཞིན་ལས་ལས་བྱུང་བའི་མཚོན་ཆ་སྣ་ཚོགས་པས་ཡན་ལག་དང་ཉིང་ལག་གཅོད་ཅིང་བརྡེག་རེས་བྱེད་པས་ཤི་བ་དང་། ནམ་མཁའ་ནས་ཡང་སོས་པར་གྱུར་ཅིག་ཅེས་བྱ་བའི་སྒྲ་གྲག་མ་ཐག་སོས་ནས་སྔར་བཞིན་སྡུག་བསྔལ་ལོ། །དེའི་ཚེ་ཚད་དྲན་པ་ཉེར་གཞག་ལས། སེམས་ཅན་དམྱལ་བ་ཡང་སོས་པ་དག་གི་མི་རྣམས་ཀྱི་ལོ་བྱེ་བ་ཕྲག་འབུམ་དང་། ཡང་དྲུག་ཁྲི་དང་། སྟོང་ཕྲག་གཉིས་ཀྱི་བར་དུ་ཐུབ་སྟེ། ཞེས་དང་། དྲན་པ་ཉེ་བར་གཞག་པའི་ཚིག་ལེའུར་བྱས་པ་ལས། མི་གང་མི་ནི་གསོད་པ་དང་། །གཞན་ཡང་བསྐྱེད་ནས་གསོད་བྱེད་པ། །དེ་དག་ངེས་པར་ཡང་སོས་འགྲོ། །གང་གི་ཕྱིར་ན་ལོ་སྟོང་ཕྲག །མང་པོར་ཡང་ནི་དེ་དག་ཏུ། །བཏགས་ཤིང་བཏགས་ཤིང་ཡང་འཚོ་བས། །དེ་ཕྱིར་ཡང་སོས་ཡིན་པར་བཤད། །ཅེས་སོ། །ཐིག་ནག་ནི་གཅོད་པའི་འཁྲུལ་འཁོར་གྱིས་མནར་བ་སྟེ། དེ་ན་ཡོད་པའི་སྐྱེས་བུ་གནོད་པ་བྱེད་པ་རྣམས་ཀྱིས་རི་དབྱིབས་སྣ་ཚོགས་པ་དག་གི་གསེབ་ཏུ་བཅུག་ནས་ལུས་ལ་ཐིག་དྲངས་ཏེ་ཤིང་བཞིན་དུ་གཤོག་ཅིང་བརྐོ་བར་བྱེད། དྲལ་ནས་ཡང་འབྱར་བར་བྱེད་དོ། །ཚེ་ཚད་མི་ལོ་བྱེ་བ་ཕྲག་ས་ཡ་ཉིས་འབུམ་དང་། ཡང་དགུ་ཁྲི། དྲུག་སྟོང་རྩ་བཅུ་གཉིས་སོ། །དེ་སྐད་དུ་སྔ་མ་ལས། ཕ་མ་དང་ནི་གྲོགས་དང་གཉེན། །བཤེས་གཉེན་ལ་ནི་འཁུ་བྱེད་དང་། །ཕྲ་མ་རྫུན་ནི་སྨྲ་བའི་མི། །ཐིག་ནག་ཏུ་ནི་འགྲོ་བར་འགྱུར། །གང་ཕྱིར་དེ་ལ་ཤིང་བཞིན་དུ། །ཐིག་ནག་བཏབ་ནས་སོག་ལེ་དང་། །འབར་བ་ཡིས་ནི་གཤོག་བྱེད་དེ། །དེ་ཕྱིར་ཐིག་ནག་ཡིན་པར་བཤད། །ཅེས་སོ། །བསྡུས་འཇོམས་ནི་འཐག་པའི་འཁྲུལ་འཁོར་ཅན་ཏེ། བྲག་རི་སྲོག་ཆགས་མགོ་བརྙན་ཅན་སྣ་ཚོགས་པའི་གསེབ་ཏུ་འཚིར་བ་དང་། དེ་བཞིན་དུ་ལྕགས་ཀྱི་འཚིར་དཔྱད་ཆེན་པོས་འཚིར་ཞིང་། སྟེང་ནས་རྡོ་ཆེན་པོའི་ལྕིད་ཀྱིས་དེའི་ལུས་ས་གཞི་ལ་གདུངས་པར་བྱེད་པས་ཁྲག་ཆུ་ཀླུང་ལྟ་བུར་འབབ་པའོ། །ཚེ་ཚད་མི་ལོ་བྱེ་བ་ཕྲག་སུམ་འབུམ་དང་། ཡང་། དྲུག་ཁྲི་བརྒྱད་སྟོང་རྩ་གཅིག་གི་བར་རོ། །སྔ་མ་ལས། ར་དང་ལུག་དང་ཝ་ཕག་དང་། །རི་བོང་བྱི་བ་རི་དྭགས་ཕག །གཞན་ཡང་བསྐྱེད་ནས་གསད་བྱས་ན། །ལུས་ཅན་བསྡུས་འཇོམས་འགྲོ་བར་འགྱུར། །གང་ཕྱིར་བསྡུས་ནས་དེར་འདོར་ནས། །ཡང་དག་གསོད་པར་བྱེད་པས་ན། །དེ་ཡི་ཕྱིར་ནི་བསྡུས་འཇོམས་ཏེ། །དེ་ལྟར་མིང་ནི་དོན་མཐུན་གྲགས། །ཞེས་སོ། །ངུ་འབོད་ནི། ལྕགས་ཞུན་བསྐོལ་བར་འཚོད་ཅིང་འོ་དོད་དྲག་པོ་དང་ལྡན་ལ། དེར་གནས་འཚོལ་བ་རྣམས་ལྕགས་ཀྱི་ཁང་པར་འཇུག་པར་བྱེད་ཅིང་ཞུགས་ནས་མེ་ལྕེ་དྲག་པོས་སྡུག་བསྔལ་ལོ། །ཚེ་ཚད་མི་ལོ་བྱེ་བ་ཕྲག་ས་ཡ་གཉིས་དང་། བྱེ་བ་ཕྲག་དགུ་འབུམ་བཞི་ཁྲི་དང་། ཡང་སྟོང་དང་བྱེ་བ་ཕྲག་བདུན་དུ་ཐུབ་བོ། །སྔ་མ་ལས། འདིར་ནི་ལུས་ཅན་གང་དག་གིས། །ལུས་དང་ངག་ཡིད་ཉོན་མོངས་བྱེད། །གང་དག་ལྷད་འཇུག་གཞན་གཡོ་བྱེད། །མི་དེ་དག་ནི་ངུ་འབོད་འགྲོ། །དེར་ནི་དྲག་པོའི་མེ་དག་གིས། །རྒྱུན་མི་འཆད་པར་བསྲེག་པས་ན། །གང་ཕྱིར་སྐད་ནི་དྲག་འབྱིན་པས། །དེ་ཕྱིར་དེ་དག་ངུ་འབོད་ཡིན། །ཅེས་སོ། །ངུ་འབོད་ཆེན་པོ་ནི། ལྕགས་ཀྱི་ཁང་སྒྲོམ་འབར་བར་མེས་བསྲེག་ཅིང་འཚེག་གོ །ཚེ་ཚད་མི་ལོ་བྱེ་བ་ཕྲག་ས་ཡ་གསུམ་དང་། ཡང་བྱེ་བ་ཕྲག་ལྔ་འབུམ་ལྔ་ཁྲི་ཉིས་སྟོང་དང་དྲུག་ཅུ་རྩ་དྲུག་གོ །སྔ་མ་ལས། གང་གིས་ལྷ་དང་བྲམ་ཟེ་དང་། །བླ་མའི་རྫས་འཕྲོག་སྡུག་བསྔལ་བྱས། །གང་དག་གཏམས་པ་འཕྲོག་བྱེད་པ། །དེ་དག་ངུ་འབོད་ཆེན་པོར་འགྲོ། །མེས་བསྲེག་པ་ནི་དྲག་ཕྱིར་དང་། །ངུ་འབོད་པ་ཡང་ཆེ་ཕྱིར་དང་། །ལྕི་ཞིང་ཆེ་བ་ཉིད་ཀྱི་ཕྱིར། །དེ་ནི་ངུ་འབོད་ཆེན་པོ་ཡིན། །ཅེས་སོ། །ཚ་བ་ནི། ལྕགས་ཀྱི་གསལ་ཤིང་འབར་བས་ལུས་ཀྱི་གཞུང་འབིགས་ཤིང་ཀླད་པར་ཐལ་འབྱིན་ལ། དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་མེ་འབྱུང་བའོ། །ཡང་སླ་ང་རབ་ཏུ་འབར་བར་བསྲེག་པ་དང་། ལྕགས་ཀྱི་གཞི་ཀུན་ནས་འབར་བ་ལ་གན་རྐྱལ་དུ་བསྙལ་ནས་ལྕགས་ཀྱི་ཐོ་བ་འབར་བས་བརྡུང་བའོ། །ཚེ་ཚད་ནི་མི་ལོ་བྱེ་བ་ཕྲག་ས་ཡ་བརྒྱད་དང་། ཡང་བཞི་འབུམ་དང་། བྱེ་བ་ཕྲག་ཁྲིག་ཕྲག་དྲུག་སྟོང་ལྔ་བརྒྱ་དང་སུམ་ཅུའི་བར་རོ། །རབ་ཏུ་ཚ་བ་ནི། མདུང་རྩེ་གསུམ་པས་རྒྱབ་རོལ་ནས་བཏབ་པས་རྩེ་དབུས་མ་ཀླད་པར་ཐལ་འབྱིན་ལ། ལྷག་མ་གཉིས་པོ་ནི་ཐལ་གང་གཉིས་སུ་འཐོན་པ་དང་། ཡང་ལྕགས་ཀྱི་ལེབ་མ་མེ་འབར་བས་ལུས་ཐམས་ཅད་ལ་དཀྲི་བ་དང་། ཡང་ལྕགས་ཟངས་ཀུན་ཏུ་འབར་བར་ཚ་སྒོའི་ཆུ་བསྐོལ་བའི་ནང་དུ་ཁ་སྦུབ་ཏུ་འཛུད་པར་བྱེད་པས་པགས་པ་དང་ཤ་ཁྲག་འཐོར་ནས་རུས་གོང་དཀར་པོའམ་ཀེང་རུས་ཙམ་གྱི་ལུས་རྟེན་ལ་གདུང་བས་ཤིན་ཏུ་སྡུག་བསྔལ་ལོ། །ཚེ་ཚད་ནི་བར་གྱི་བསྐལ་པ་ཕྱེད་དོ། །དེ་ལྟར་གཉིས་པོ་ནི་དབང་པའི་འཁྲུལ་འཁོར་ཅན་ཏེ་སྡུག་བསྔལ་གྱི་ཁྱད་པར་གཞན་བརྗོད་པ་རྣམ་པར་དག་པ་ཙནྡྲ་གོ་མིས། ཁ་ཅིག་འབྲུ་མར་བསྐོལ་བའི་ཟངས་ཆེན་ནང་དུ་ལྟུང་། །གཞན་དག་བྱེ་མ་བསྲེགས་པའི་མེ་སྟག་འཕྲོ་བ་ཡི། །ས་གཞི་རྐང་པ་བཞག་པའི་གནས་མི་ཐོབ་པར་ལྟུང་། །ཞེས་དང་། རབ་ཏུ་ཚ་བའི་ཁྱད་པར། དམྱལ་མེ་དུ་བ་ཆེ་དཀུ་མནམ་པ་འཐུལ་བས་གནམ་མདོག་འགྱུར། །མེ་ལྕེའི་ལག་མང་རྣམ་པར་འཕྲོས་ནས་ཕྱོགས་ཀྱི་དཀྱིལ་འཁོར་ཁེབས། །རུས་གོང་དཀར་དུམ་ཕྲེང་བའི་རྒྱན་གྱིས་སྤུད་པ་སྐྱི་གཡའ་བ། །གླང་ཆེན་གོས་གྱོན་སྡིག་ཐབས་ཀྱེ་མ་ཀྱི་ཧུད་ཟེར་བ་བཞིན། །ཞེས་དམྱལ་བའི་རྣམ་གྲངས་ཀྱང་རང་བཞིན་བབ་བབ་དུ་བསྟན་པ་ལས་མིང་ཁྲིགས་ཀྱི་ངེས་པ་མི་སྣང་ཞིང་བརྗོད་པ་གཏིང་ཟབ་ཕྱིར་དཀའ་འགྲེལ་གཉིས་པོས་ཀྱང་གསལ་བར་ཁ་མི་ཕྱེད་པས་བསྟན་བཅོས་གཞན་དུ་ལུང་གི་རྒྱབ་སྐྱོར་ཀྱང་ཅི་རིགས་སུ་འབྱུང་མོད། འདིར་ནི་རྒྱ་འགྲེལ་གཉིས་ལ་སློབ་དཔོན་ཤེས་རབ་འབྱུང་གནས་ཀྱི་ལུགས་ལྷག་པར་བཤད་རླབས་ཆེ་བར་མངོན་ནས་དེའི་རྗེས་སུ་རྣམ་པར་དབྱེ་བ་ཡིན་ནོ། །མནར་མེད་པ་ནི་ཕྱོགས་བཞི་དང་། བླ་འོག་མཐའ་དག་མེ་འབར་བས་འཁྲིགས་པར་འདུག་སྟེ། དེ་ན་སེམས་ཅན་དེ་དག་རྩ་སྐམ་ལ་མེ་སྦར་བ་རླུང་གིས་རབ་ཏུ་བསྐྱོད་པ་བཞིན། ཤ་དང་། ཆུ་རྒྱུས་དང་། རུས་པ་དང་། རྐང་གི་བར་དུ་ཞེན་ནས་མར་མེ་སྙིང་པོ་ལ་ཞེན་པའམ། ལྕགས་བསྲེག་དང་སོལ་མེ་མི་ཕྱེད་པ་བཞིན་འདི་དག་ནི་སེམས་ཅན་ནོ། །འདི་དག་ནི་མེའོ་ཞེས་དབྱེ་བར་མི་ནུས་པ་མེའི་ཕུང་པོ་གཅིག་གི་ཀློང་ནས་འོ་དོད་འབོད་པ་ཙམ་སྟེ་སྡུག་བསྔལ་བའི་མཐར་ཐུག་པའོ། །དེ་སྐད་དུ་སློབ་སྤྲིང་ལས། ཕྱི་ནང་གི་གནོད་པ་གཉིས་སུ་བསྟན་པའི་ཕྱིའི་གནོད་པ་ནི། ལ་ལར་མེ་སྟག་ཆེར་འཕྲོ་འཁྲུག་པ་འུར་སྒྲ་ཏོག་ཡར་ལ། །ཞག་གི་བབ་ན་སྐད་ངན་འབོད་པའི་རྩེ་ཞིལ་ཆིལ་ཆིལ་འབར། །ཞེས་དང་། ནང་གི་གནོད་པ་ནི། བྲང་གི་རུས་པའི་ཁོང་དུ་ཐལ་ལ་ལྷག་ལྷག་སྒྲ་གྲགས་པ། །བསྐལ་པའི་དུས་ཀྱི་མེ་ཡིས་བསྐྱོད་དུ་མེད་པའི་ནང་དུ་ལྷུང་། །ཞེས་མདོར་བསྟན་ནས། རྒྱས་པར་བཤད་པའི་དོན་ལའང་ནང་གི་གནོད་པ་དང་། ཕྱིའི་གནོད་པ་གཉིས་སུ་དབྱེ་བའི་དང་པོ་ནི། གློ་ནས་རྩ་སྐམ་སྙིང་ལ་སྦར་བ་ལྟ་བུའི་མེ་ཚོགས་འབར། །མགྲིན་དང་ཁ་ནས་མེ་ལྕེ་འབར་བ་དུད་བཅས་བསྟུད་མར་འབྱུང་། །ཁོང་ལྟོགས་པ་ནས་ལོང་ག་ནང་ཁྲོལ་ནར་པས་ཀུན་བྲེད་ཅིང་། །བརྡའ་མི་འཕྲོད་པའི་སྐད་ཆེན་ཙམ་ཞིག་འདོན་པར་བྱེད་པར་ཟད། །ཅེས་དང་། ཕྱིའི་གནོད་པ་ནི། སྡུག་བསྔལ་ཆེ་ལས་ཐར་བར་འདོད་པ་དེ་དག་ཡང་དང་ཡང་། །སྒོ་བྱེ་གསེབ་གཞན་མཐོང་ནས་ཐག་རིང་ཅི་ཞིག་ལྟར་ཏེ་འབྱེར། །གང་ཚེ་ལས་ཀྱི་སྒོ་འཕར་དམ་པོས་དེ་ཡང་བཅད་གྱུར་པ། །དེ་ཚེ་ཡི་མུག་བཟློག་བརླག་སྡུག་བསྔལ་གཞན་ཡང་འབྱུང་བར་འགྱུར། །ཞེས་གནས་ཁང་གི་གནོད་པ་དང་། དེ་བཞིན་དུ་མདའ་བོ་ཆེ་དང་། དབྱུག་པ་དང་། ཁུ་བ་འབར་བའི་གནོད་པ་རྣམས་སྟོན་པའི་ཕྱིར། མདའ་ཆེན་སྣ་ཚོགས་འབར་བ་ཆར་བཞིན་འབབ་པའི་རྗེས་ལ་ཡང་། །དམྱལ་བའི་སྲུང་མས་དབྱུག་པ་བཏབ་ཅིང་མཆི་མ་འཇོག་བཞིན་དུ། །ལྕགས་ཞུན་ཁུ་བ་མེ་སྟག་འབར་བའི་ཕྲེང་བ་འཁྲིགས་པ་ལྡུད། །ཁ་སྣ་རྣ་བའི་བུ་ག་དག་ནས་དུད་འཐུལ་གྱེན་དུ་འབྱུང་། །མིག་དང་ཀླད་སྤྲིས་བརྡོལ་གྱི་བར་དུ་ཀུན་བསྲེག་ཅིང་། །ཀླད་པའི་རྒྱས་ལ་འབར་བའི་མེ་ལྕེ་སྨུག་ནག་ཚོགས། །མེ་དེ་ཁྲོས་པ་ལྟ་བུར་དེ་ཡི་ལུས་ཕུང་ལ། །བུད་ཤིང་སྐམ་པོ་བཅེར་ལ་སྦར་བ་བཞིན་དུ་མཆེད། །ཅེས་དང་། དེ་དག་གི་དོན་བསྡུ་བའི་ཕྱིར། སྐྱེ་བོ་དེ་སྲོག་རི་གཟར་ཀླུང་གི་ཆུ་ལྟར་གཡོ། །དམྱལ་བའི་མེ་ཡང་དེར་ཟད་ཚ་བའང་དེར་ཟད་དེ། །ལས་རྣམས་ཇི་ལྟར་ཐམས་ཅད་ཤིན་ཏུ་མི་བཟད་པ། །སྣང་བར་འགྱུར་བ་དེ་ལྟར་ཡོངས་སུ་བསྒྱུར་བ་བྱེད། །སྐྱེ་བོ་རང་གི་ལས་ཀྱིས་དབང་མེད་སྤྱོད་འཚལ་བ། །བརྒྱ་ལ་སྡིག་གནས་དམྱལ་བ་དག་ནས་ཐར་ན་ཡང་། །འཇིག་རྟེན་འགྲོ་བ་མཐའ་ཡས་བྱེ་བ་འཕྱེས་རྣམས་སུ། །མི་ཡི་དངོས་པོ་ཤིན་ཏུ་རྙེད་པར་དཀའ་བ་ཉིད། །ཅེས་མནར་མེད་པའི་སེམས་ཅན་དམྱལ་བ་པ་དེའི་སྡུག་བསྔལ་ནི་ངོ་བོ་དབལ་ཚ་ཞིང་། རྣམ་པ་གྲངས་མང་བ། བར་དང་མཚམས་མེད་པས་ན་མཚམས་མེད་དམ་མནར་མེད་ཅེས་བཤད་ལ། དེ་དག་གི་ལུས་ཚད་ཀྱང་། མདོ་སྡེ་མྱང་འདས་ལས། མཚམས་མེད་བརྒྱད་བྱས་པ་ལ་དཔག་ཚད་བརྒྱད་ཁྲི་པའི་ལུས་ཡོད་ཀྱང་གཅིག་ལ་གཅིག་མི་ཐོགས་པར་བཤད་པ་དང་། ཐེག་པ་ཆེན་པོ་སྐུར་བའི་ལྕེ་དཔག་ཚད་འབུམ་དུ་བཤད་པ་སོགས་ཚོར་བ་རྒྱ་ཆེ་ལ། ཚེའི་ཚད་ཀྱང་དྲན་པ་ཉེར་གཞག་ལས་བར་གྱི་བསྐལ་པ་གཅིག་དང་། ལས་རྣམ་འབྱེད་ལས། མནར་མེད་པའི་སྒོ་ན་ལྕགས་ཀྱི་རི་དཔག་ཚད་སྟོང་དྲུག་ཁྲི་བ་ཞིག་ཡོད་དེ། དེ་ཉིད་སེམས་ཅན་དམྱལ་བ་པ་དག་གིས་དོང་བས་ཟད་པ་ན་དེ་དག་གི་ཚེ་འཕོ་བ་ཡིན་ཏེ་དཔག་ཏུ་མེད་དོ། །ཞེས་གསུངས་ལ། གལ་ཏེ་དེ་ནས་ཐར་ནའང་མིའི་དངོས་པོ་ནི་ཤིན་ཏུ་རྙེད་པར་དཀའ་ཞིང་རྙེད་ནའང་དབང་པོ་མ་ཚང་བ་ལ་སོགས་པར་སྐྱེ་བ་ནི་རྒྱུ་རླབས་པོ་ཆེའི་འབྲས་བུ་ལ་སྤྱོད་པའི་གནས་སྐབས་ཚོགས་ཤིང་དུས་ལ་བབ་པ་ཡིན་པའི་ཕྱིར་ཏེ། དམྱལ་བའི་རབས་ལས། ཡོན་ཏན་དག་གིས་ཆེ་བ་ལ། །གནོད་པ་དྲག་པོ་བྱས་པ་ལས། །ཕ་མ་བླ་མ་གསད་བྱས་པ། །ངེས་པར་བསྐལ་པར་མནར་མེད་འཚེད། །མེ་དྲག་དེར་ནི་ལུས་དག་གི། །རུས་པ་དག་ཀྱང་ལྷག་པར་འགྱུར། །གང་ཕྱིར་བདེ་བའི་སྐབས་མེད་པར། །དེ་ཕྱིར་མནར་མེད་ཡིན་པར་བཤད། །ཅེས་ཡོན་ཏན་གྱིས་ཆེ་བ་དམ་པའི་ཆོས་སྤངས་ཤིང་བསྐུར་བ་བཏབ་པ་དང་། དམ་ཚིག་ཉམས་པ་ལ་སོགས་དམྱལ་བ་མནར་མེད་དུ་སྐྱེ་བར་བཤད་དོ། །དེ་ལྟར་དམྱལ་བ་བརྒྱད་པོ་དེ་དག་གི་མེའི་ཚ་ཁྱད་ཀྱང་སྔ་མ་སྔ་མ་ལས་ཕྱི་མ་ཕྱི་མ་བདུན་འགྱུར་གྱིས་ཚ་བ་ནི་ཤིང་ཐ་མལ་དང་། ཙན་དན་དང་། དུས་མཐའི་མེ་ལ་ཁྱད་ཞུགས་པ་བཞིན་ཏེ། ལས་རྣམ་འབྱེད་ལས། ཐ་མལ་ཙན་དན་དུས་མཐའ་དང་། །དམྱལ་མེ་རྣམས་ཀྱང་གོ་རིམ་བཞིན། །དེ་བཞིན་སྡུག་བསྔལ་བདུན་ཕྲག་འགྱུར། །ཞེས་ཚོར་བའང་བདུན་འགྱུར་གྱིས་རགས་སུ་འགྲོ་བས། སྡུག་བསྔལ་ཀྱང་བདུན་འགྱུར་རེས་ཆེར་འགྲོ་བ་ཡིན་ནོ། །ད་ནི་དེ་དག་གི་འཁོར་ལྷག་པ་ཉེ་འཁོར་བ་བཤད་པའི་ཕྱིར། སྡུག་བསྔལ་ཉིད་ལས་དབུགས་འབྱིན་ཀུན་རྟོག་གིས། །ཉེ་འཁོར་སྒོ་འཕར་བྱེ་བ་མདག་མེའི་འོབས། །རོ་མྱགས་འདམ་རྫབ་སྟུག་དང་རལ་གྲིའི་ནགས། །ཆུ་བོ་རབ་མེད་གཤིན་རྗེའི་ཁ་བས་ཐུ། །འདི་ལྟར་སེམས་ཅན་དམྱལ་བ་ཆེན་པོ་བརྒྱད་པོ་རེ་རེ་ཞིང་གི་ཕྱོགས་བཞི་པོ་སོ་སོར། མེ་མ་མུར་གྱི་འོབས། རོ་མྱགས་ཀྱི་འདམ། རལ་གྲི་ལོ་མའི་ནགས་ཚལ། ཆུ་བོ་རབ་མེད་དེ། བཞི་ཚན་རེ་རེ་འཁོར་གྱི་ཚུལ་དུ་གནས་པ་ལ་ལྷག་པ་བཅུ་དྲུག་ཞེས་བྱའོ། །དེ་སྐད་དུ་བཤེས་སྤྲིང་གི་འགྲེལ་པར། ལྷག་པ་བཞི་པོ་འདི་དག་ནི་སེམས་ཅན་དམྱལ་བ་ཐམས་ཅད་ཀྱི་སྒོ་བཞིན་གོ་རིམ་བཞིན་དུ་རྣམ་པར་གནས་ཏེ། དེ་ལྟ་བས་ན་སེམས་ཅན་དམྱལ་བ་ཆེན་པོ་བརྒྱད་འཆད་པར་འགྱུར་བ་རེ་རེ་ཞིང་ལྷག་པ་བཅུ་དྲུག་ཡིན་ནོ། །ཞེས་བཤད་དོ། །གོང་དུ་མྱོང་བྱའི་ལས་ཕལ་ཆེར་བསྲབས་པ་ན་ཕྱོགས་བཞིར་སྒོ་བྱེ་བ་སྙམ་བྱེད་ཅིང་དེར་འབྲོས་པའི་སྣང་བ་ཤར་བ་ན་ཐལ་ཚན་ཆུ་ཀླུང་དུ་འཁྲུལ་ནས་འཚིག་པའི་ཚུལ་དྲན་པ་ཉེར་གཞག་ལས། དེ་དེ་ལྟར་སོང་བ་ལས་ཆུ་ཀླུང་གི་འདུ་ཤེས་སྐྱེས་ཏེ་བརྒལ་མ་ཐག་ཏུ་རྐེད་པ་ལ་ཐུག་གི་ཤ་རྣམས་ཀྱང་ཚིག །རུས་པ་རྣམས་ཀྱང་བྱེ་ཞིང་དྲལ་བར་གྱུར་པ་ལས་སླར་སོས་ཤིང་། འགྲམ་དག་ན་སྔོན་རྣམ་པར་རྩེན་པའི་གཤིན་རྗེའི་སྐྱེས་བུས་བསྲུང་བར་སྣང་ངོ་། །ཞེས་པ་ལྟར། དེར་སྙེགས་པའི་ལམ་དུ་ལྕགས་ཀྱི་ཁྱི་རལ་པ་ཅན་གྱིས་འདེད་ཅིང་། མདག་མེ་འབར་བ་རྡོ་རྣོན་ཟུར་ཅན་གྱིས་གང་བའི་འོབས། པུས་མོ་ནུབ་པ་ཙམ་དེར་རྐང་པ་བཞག་པ་དང་། པགས་པ་དང་ཤ་ཁྲག་ཞིག་པར་འགྱུར་ལ་བཏེགས་ན་སླར་སྐྱེ་བའི་སྡུག་བསྔལ་ལ་སྤྱོད་པ་སྟེ། སློབ་སྤྲིང་ལས། རལ་པའི་ཚོགས་མང་སྤུངས་པས་བསྒྱིངས་པའི་ཁྱི་དག་གིས། །མཆེ་བ་གཟེང་རིང་རྡོ་རྗེའི་རྩེ་མོས་ལུས་འདྲད་ཅིང་། །ཆུ་བོ་རབ་མེད་ཐལ་སྐྱོ་མེ་ལྕེས་གང་བའི་ངོགས། །རྡོ་བ་ཟུར་རྔོམ་རྩེ་རྣོན་མི་བཟད་ཅན་དུ་བདའ། །ཞེས་རོ་མྱགས་ཀྱི་འདམ་ནི། ཕྱི་སའི་འདམ་རྫབ་ཆེན་པོར་ཚུད་ནས་སྲོག་ཆགས་ལུས་དཀར་ལ་མགོ་བོ་གནག་པ་མཆུ་རྣོན་ཅན་གྱིས་པགས་པ་འབིགས་ཤིང་། སྡུག་བསྔལ་གྱིས་མནར་ཆེས་པས་ལུས་བསྒུལ་བསྐྱོད་མི་ནུས་པར་སོང་ཡང་། ལས་རྙི་དང་འདྲ་བ་ལ་སྲོག་བྱ་དང་འདྲ་བ་ཉིད་འཐོགས་པའི་ཚུལ། སྔ་མ་ལས། ཁ་ཅིག་འབུ་སྦྲང་ཕྲ་མོ་ལྕིག་ལྕིག་འདུག་པ་ཡི། །ཚོགས་ཀྱིས་ལུས་རྨུགས་བམ་ཞིང་རྣམ་པར་འདྲུལ། །ལས་ཀྱི་རང་བཞིན་རྙི་ལ་ཚོར་བ་འཐོགས་པ་རྣམས། །བསྐྱོད་པ་ཙམ་ཡང་བྱ་བར་མི་ནུས་བཞིན་དུ་གསོན། །ཞེས་སོ། །རལ་གྲི་ལྟ་བུའི་ཚལ་ནི། མེ་མ་མུར་དང་། རོ་མྱགས་དང་། སྤུ་གྲིའི་སོ་གཏམས་པའི་ལམ་པོ་ཆེ་ལས་ཐལ་ནས་རྒྱས་བཅད་པ་ཞིག་ན་ནགས་ཚལ་སྔོན་པོའི་རྣམ་པར་ཡོད་པ་བཤེས་འགྲེལ་གྱིས་བསྟན་ཏེ། དེར་སྐྱབས་འཚོལ་ཕྱིར་བརྒྱུགས་པས། ལས་ལས་བྱུང་བའི་རླུང་གིས་ལྗོན་ཤིང་གཡོས་ནས་ལོ་མ་ཐམས་ཅད་མཚོན་ཆའི་ཆར་དུ་བབས་པས་ལུས་དབད་ཅིང་ངུ་འབོད་བྱེད་པ་ཙམ་ལས་གཞན་པའི་བཤེས་དང་བྲལ་བའི་ཚུལ། སློབ་སྤྲིང་ལས། ཉི་ཚན་གྱིས་གདུངས་བཟོད་དཀའ་བརླག་པས་སྐྱོ་བའི་ལུས། །ལྗོན་ཤིང་ལ་ོམ་སྔོ་སྟུག་མཐོང་ནས་སོང་བ་དང་། །དེ་ཡི་ལོ་མ་མཚོན་བརྒྱར་ལྷུང་བས་ལུས་རྦད་ཅིང་། །དེ་ན་ཡུན་རིང་དུད་མོ་ལས་བཤེས་བརླག་པར་གནས། །ཞེས་སོ། །ཆུ་བོ་རབ་མེད་ནི། བཤེས་འགྲེལ་ལས། ཚྭ་སྒོ་བཟོད་བརླག་ཆུ་ཚན་དུ་སྟེ། ཆུ་བོ་རབ་མེད་ཅེས་བྱ་བ་ལོ་མ་རལ་གྲི་ལྟ་བུའི་ཚལ་འདབས་ན་དམྱལ་བ་འོབས་བཞིན་དུ་བསྐོར་ཏེ་འདུག་པ། ཞེས་བསྟན་ལ་དེའི་ལམ་ཐམས་ཅད་ཀྱང་སྤུ་གྲིའི་ཐང་དུ་ཡོད་ཅིང་། སྟེང་ནས་ལྕུག་ཚལ་གྱི་རལ་གྲིས་ཀྱང་སྣད་པར་བྱེད་པས་ལམ་ལ་ལྟོས་ནས་སྤུ་གྲིའི་ཐང་དང་། ངོ་བོ་ཆུ་བོ་རབ་མེད་ཅེས་བུལ་ཏོག་ཚྭ་སྒོ་ཅན་གྱི་ཆུ་ཚན་མཚོན་ཆ་གཟིངས་པར་ལྟུང་བའི་ཚུལ། སློབ་སྤྲིང་ལས། སྤུ་གྲིའི་སོ་གཏམས་ལྕུག་ཚལ་ལོ་མ་རལ་གྲི་ཡི། །ནང་དུ་ཐང་ཆད་བརྒྱུགས་ན་ལུས་རྨས་སྐྱབས་མེད་པར། །རྩེ་གསུམ་མདུང་ཐུང་མདའ་དང་རལ་གྲི་རྣོས་གང་བའི། །ཁྲོན་པ་གཤིན་རྗེའི་ཁ་བས་ཐུ་བའི་ནང་དུ་ལྷུང་། །ཞེས་སོ། །བཤད་མ་ཐག་པ་མཚོན་ཆའི་ཐང་དང་། འཆད་པར་འགྱུར་བའི་ཤལ་མ་ལི་ནི་ལྷག་པ་བཞི་པོར་མི་བགྲང་སྟེ། སློབ་དཔོན་བློ་གྲོས་ཆེན་པོས། བཞི་པོ་འདི་དག་ནི་ལྷག་པ་ཡིན་པར་བཤད་པ་འདི་དག་སྟེ། མེ་མ་མུར་དང་། རོ་མྱགས་དང་། ལོ་མ་རལ་གྲི་ལྟ་བུའི་ཚལ་དང་། ཆུ་བོ་རབ་མེད་དོ། །ཞེས་བཤད་པའི་ཕྱིར་འདིར་སློབ་སྤྲིང་དང་ལྟོ་སྦྱར་ནས་རྣམ་པར་དཔྱད་པར་རིགས་པར་བྱའོ། །ཁྱད་པར་གཞན་ཤལ་མ་ལི་ནི། མཛའ་གཅུགས་དམ་བཅའ་དྲན་ནས་བསྙེགས་པའི་ལམ། །ཚེར་མ་རྣོན་པོས་ཚབས་ཆེར་ཕུག་པའི་ལུས། །འབར་ཞིང་རྩུབ་པའི་ལྕགས་ཀྱི་བུད་མེད་ཀྱིས། །འཁྱུད་མཐར་ཁྭ་དང་བྱ་རྒོད་མིག་ལ་འབྲུ། །འདི་ལྟར་ལྕགས་ཀྱི་ཤལ་མ་ལི་གནོད་པའི་རང་བཞིན་ཅན་དེ་ཉམས་དགའ་བར་མངོན་པའི་རྩེ་མོ་ནས་སྔོན་ཆད་འཁྲིག་པའི་ཆོས་བརྟེན་པའམ། མཛའ་བར་གྱུར་པ་དག་གིས་འབོད་པར་མཐོང་ནས་དེར་ཕྱིན་པའི་ལམ་དུ་ཅེ་སྤྱང་དང་། ཁྱི་དང་། བོང་བུ་ལ་སོགས་པས་དེད་ཅིང་ལམ་ཐམས་ཅད་ལྕགས་ཀྱི་ཚེར་མ་རྣོན་པོ་གཟིངས་པས་ཤ་ཁྲག་གཟགས་པར་བྱེད་དེ། སྔ་མ་ལས། སྲེ་ཁྱི་བོང་བུ་ཅེ་སྤྱང་སྟོང་ཕྲག་གིས་བྲེད་ནས། །ཤལ་མ་ལི་མཐོ་མི་བཟད་དེ་ལ་མྱུར་འཛེགས་ན། །ཚེར་མའི་ཚོགས་ཁ་ཐུར་དུ་བལྟས་པས་ཐལ་འབྱིན་ཞིང་། །ཟུག་རྔུ་ཚབས་པོ་ཆེ་དག་ཁོང་བརླག་ནུབ་པར་འགྱུར། །ཞེས་དང་། དེའི་དྲུང་ན་སླེབས་པའི་ཚེ་ཡིད་དུ་གཅུགས་པ་དེ་མ་ཡིན་པར་ལྕགས་ཀྱི་བུད་མེད་འཇིགས་སུ་རུང་བ་སོག་ལེ་ལྟ་བུར་རྩུབ་ལ་མེ་སྟག་འཕྲོ་བས་འཁྱུད་ཅིང་དམ་པོར་འཛིན་པ་སྟེ། སྔ་མ་ལས། བུད་མེད་ཀུན་ནས་མེ་ལྕེ་བརྒྱ་ཕྲག་འཐོན་པའི་མེ། །མེ་སྟག་ཕྲེང་བ་འཁྲིགས་པའི་རྒྱན་གྱིས་བཞབས་གྱུར་ཅིང་། །སོག་ལེ་ལྟ་བུར་རྩུབ་པའི་ལུས་ཀྱིས་བྲོན་མེད་པར། །ཤིན་ཏུ་སྡུག་པའི་ཚུལ་གྱིས་བཅུམ་ནས་འཁྱུད་པར་བྱེད། །ཅེས་སོ། །ཡང་རིའི་རྩ་བ་ནས་མཆིས་བྲང་དང་། ཉེ་དུ་ལ་སོགས་པས་འབོད་པར་མཐོང་ནས་ཕྱིན་པ་ན་ལྕགས་ཀྱི་ཚེར་མ་དང་། མདུང་ཐུང་ལ་སོགས་པས་སྔར་བཞིན་དུ་འབིགས་ཤིང་དྲན་པ་ཉམས་པ་ལས་གཡང་སར་ལྷུང་བ་དང་། ཁྭ་དང་། བྱ་རྒོད་དང་། སྦྲུལ་གདུག་པ་ཅན་དང་། དུར་བྱ་དང་། བྱ་གག་ལ་སོགས་པས་མིག་འབྱིན་རྒྱུ་ལྟོ་འདྲེན་པ་ལ་སོགས་པའི་སྡུག་བསྔལ་གྱིས་མནར་བར་བྱེད་པའི་ཚུལ། ཐུར་དུ་བབས་ན་ལྕགས་ཚེར་གྱེན་དུ་ཁ་བལྟས་པ། །རྩུབ་ལ་རྣོ་བ་མང་པོས་ལུས་ཕུག་དྲན་པ་ཉམས། །དེ་ན་ཁ་ཅིག་མདུང་ཐུང་རྩེ་གསུམ་འབར་བ་དང་། །ཟུག་རྔུ་རྣོན་པོས་ལུས་དབང་ཐུར་དུ་འབབ་མི་ནུས། །དེ་ཚེ་མཚོན་ཆ་བརྡར་བའི་མཆུ་ཅན་ཁྭ་རྣམས་ཀྱིས། །ཀུན་ཏུ་དྲངས་པས་རྒྱུ་ལྟོ་བྲང་བྲེང་ནར་ཞིང་འཐོར། །ཁ་ཅིག་རི་བོའི་གཡང་ས་ཡ་ངར་གཡང་དུ་ལྷུང་། །ཞེས་དང་། གཤིན་རྗེའི་ལག་ན་ཐོགས་པ་དུས་ཀྱི་ཞགས་པ་ལྟའི། །སྦྲུལ་གདུག་མགོ་འཕང་བསྟོད་པས་དམ་བཞག་གཞུངས་ནས་ནི། །གསོན་པོར་ཁྭ་དང་བྱ་གར་ཀཾ་ཀ་བྱ་རྒོད་ཀྱིས། །དེ་ན་གནས་པའི་མིག་དག་ཚམ་ཚོམ་མེད་པར་འདྲུ། །ཞེས་སོ། །དེ་དག་གི་རྒྱུ་འབྲས་ཀྱང་དྲན་པ་ཉེ་བར་གཞག་པའི་ཚིག་ལེའུར་བྱས་པ་ལས། ལུས་ཅན་གང་དག་གཅིག་ལས་གཅིག །གནོད་པར་དགའ་བས་གཡུལ་ངོར་གསོད། །སྡིག་ཅན་དེ་དག་སྡུག་བསྔལ་དང་། །ལྡན་པའི་རལ་གྲིའི་སེམས་ཅན་སྐྱེ། །ཞེས་པ་ལ་སོགས་པའི་དོན་ཉེ་བར་བསྡུ་ན། བྱི་བོ་བྱེད་པ་ཤལ་མ་ལིར། །འཇོག་ཅིང་ལྕགས་ཀྱི་བུད་མེད་འཚེ། །བག་ཕེབས་པ་ལ་གནོད་བྱས་ན། །རལ་གྲིའི་ཚལ་དུ་ལུས་ཆད་ནས། །ཁྱི་དང་བྱ་རྒོད་འུག་པས་ཟ། །གཞན་ནོར་འཕྲོག་པ་ཟངས་ཆེན་འཚོད། །ལྕགས་ཀྱི་ཐོ་ལུམ་འབར་བས་འཚིག །རྔོན་པའི་ལས་ལ་དགའ་བ་ནི། །ལོ་ནི་བྱེ་བར་ལྕགས་ཁྱིས་ཟ། །ཉ་གསོད་ཆུ་བོ་རབ་མེད་འགྲོ། །ཟངས་ཞུན་བསྐོལ་བའི་ནང་དུའང་འཚེད། །ཆོས་མིན་རང་འདོད་གཤགས་འགྱེད་ན། །ངུ་འབོད་གནས་སུ་འཁོར་ལོས་གཟིར། །གཟུགས་ཅན་ཀུན་ལ་གནོད་བྱེད་པ། །དེ་དག་རི་དང་ཐོ་བས་འཐག །ཆོས་ཀྱི་སྟེགས་བཤིག་ཆོས་མིན་སྨྲ། །སྤུ་གྲིའི་སོས་གཏམས་ལམ་དུ་འགྲོ། །སེན་མོས་ཤིག་གསོད་དེ་ཡི་ལུས། །ཆེར་སོང་བྲག་སྒོར་ཡང་ཡང་བཅར། །བརྟུལ་ཞུགས་བཟང་མནོས་མི་བསྲུང་བ། །དེ་ནི་མེ་མ་མུར་དུ་བསྲེག །ལོག་འཚོ་ལྔ་ལ་ལོངས་སྤྱོད་པ། །ཕྱི་སའི་འདམ་དུ་སྲིན་བུས་ཟ། །འབྲུ་ནང་འཁོད་པའི་སྲོག་ཆགས་ལ། །འཚེ་བ་བྱས་ན་གཏུན་བུར་འཐག །ཁྲོ་གཏུམ་གཡོ་དང་རྫུན་ལ་དགའ། །གཞན་གནོད་གཤིན་རྗེའི་སྲིན་པོར་སྐྱེ། །ཞེས་སོ། །དེ་ནས་གྲང་དམྱལ་བཤད་པ་ལ། སྤྱི་མཐུན་གྱི་སྡུག་བསྔལ་བསྟན་པ་དང་། སོ་སོའི་རང་བཞིན་བཤད་པ་ལས། དང་པོ་ནི། བུ་ཡུག་སྦྲེབས་ཅིང་འདར་བའི་ཐག་པ་ཡིས། །བཅིངས་ཏེ་བསྐྱོད་པར་མི་ནུས་བཞིན་གསོན་ཡང་། །རླུང་གི་མཚོན་ཆས་རུས་པའི་གཏིང་ཕུག་པའི། །གྲང་རེག་སོ་ཡི་བར་དུ་འཚིར་ལྟར་གདུང་། །འདི་ལྟར་གྲང་བའི་དམྱལ་བ་རྣམས་ནི་སའི་དཀྱིལ་འཁོར་རྡོག་པ་བཞག་ས་ཙམ་ཡང་མི་མངོན་པའི་གངས་རི་ཆེན་པོ་གཅོང་རོང་མི་བཟོད་པ་ཅན་གྱི་ལྟོངས། ཁ་ཆར་དང་རླུང་འཐབས་པའི་བུ་ཡུག་གིས་རབ་ཏུ་སྦྲེབས་པའི་གནས་མུན་ནག་འཐིབས་པོར། དཔེས་མི་མཚོན་པའི་ལྷགས་པའི་རེག་བྱ་རྣོ་ངར་ཅན་གྱིས་རུས་པའི་གཏིང་ཕུག་པར་ཕྱིན་པས་ལུས་ཀུམ་ཀུམ་པོར་གྱུར་ཏེ་བསྒུལ་བསྐྱོད་ཀྱི་གནས་སྐབས་ལས་ཐལ་ཀྱང་། ད་དུང་སྡུག་བསྔལ་གྱི་ཚོར་བ་ལ་རྣམ་པར་ཤེས་པ་འཐོག་ནས་གསོན་པའི་གནས་སྐབས་ལས་མི་ཡོལ་བའོ། །སོ་སོའི་ཁྱད་པར་དབྱེ་བ་ནི། ཆུ་བུར་ཅན་དང་ཆུ་བུར་བརྡོལ་བ་དང་། །ཨ་ཆུའི་སྨྲེ་སྔགས་ཀྱི་ཧུད་སོ་འཐམས་ཅན། །ཨུཏྤ་ལ་ལྟར་པགས་པ་དྲུག་ཚལ་འགས། །པདྨ་དང་ནི་པདྨ་ཆེན་པོ་ལྟར། །བརྒྱད་དང་བཅུ་དྲུག་གྲངས་མེད་གས་པའི་རྨ། །སྲོག་ཆགས་མཆུ་རྣོན་ཅན་གྱིས་འབིགས་ཤིང་བཟའ། །ཞེས་འདོམས་པ་ལས། ཆུ་བུར་ཅན་ནི་ཧ་ཅང་གྲང་ཆེས་པས་ལུས་ཆུ་བུར་གྱིས་གང་བ་དང་། དེ་བཞིན་དུ་ཆུ་བུར་བརྡོལ་ནས་རྨར་གྱུར་པ་དང་། གྱུར་པ་དེས་ཨ་ཆུའི་སྨྲེ་སྔགས་ནར་མར་འབྱིན་པ་དང་། ཀྱི་ཧུད་ཅེས་ཤུགས་རིང་འབྱིན་པ་ཙམ་ལས་སྐད་ཀྱི་གདངས་ཆག་པ་དང་། དེའང་འདོན་པར་མ་ནུས་པས་སོ་ཐམ་ཐམ་པ་དང་། རྨ་དེ་དག་ལས་སྐྱེས་པའི་སྲོག་ཆགས་ཀྱིས་མཚོན་ཆའི་མཆུས་དབད་ནས་ཨུཏྤ་ལ་ལྟར་པགས་པ་དྲུག་ཚན་དུ་གས་པ་དང་། པདྨ་ལྟར་བརྒྱད་ཚལ་དུ་གས་པ་དང་། པདྨ་ཆེན་པོ་ལྟར་ལྡབ་འགྱུར་གསུམ་འགྱུར་ནས་གྲངས་མེད་ཀྱི་བར་དུ་གས་པའི་ནང་ནས་ཆུ་སེར་དང་། ཞག་དང་། རྐང་མར་ཀྱང་འཛག་པ་སྟེ། སློབ་མ་ལ་སྤྲིངས་པར། ལྷགས་པ་དཔེ་མེད་རུས་པ་ལ་ཡང་ཐིམ་པ་ཡིས། །ལུས་སྦྲེབ་འདར་ཤིང་བསྐུར་ནས་གུམ་གུམ་པོར་འདུག་པ། །ཆུ་བུར་བརྒྱ་བྱུང་བརྡོལ་བ་ལས་སྐྱེས་སྲོག་ཆགས་ཀྱིས། །རལ་གྲིས་དབད་ནས་ཞག་དང་ཆུ་སེར་རྐང་བཅས་འཛག །ཀོས་ཐག་སོ་འཐམས་སྐྲ་དང་སྤུ་རྣམས་གཡེང་གྱུར་པ། །མིག་དང་རྣ་བ་ལྐོག་མ་གནོད་པས་ཀུན་གཟིར་ཞིང་། །ལུས་དང་སེམས་ཀྱི་བར་དག་རབ་ཏུ་བློང་གྱུར་ནས། །གྲང་བའི་དམྱལ་བར་གནས་ཤིང་ཤིན་ཏུ་འོ་དོད་འབོད། །ཅེས་པ་ལ་རྒྱ་འགྲེལ་ནས། ཆུ་བུར་ཅན་ནི་ལྷགས་པ་ཞེས་རྐང་པ་ཕྱེད་དང་གསུམ་མོ། །ཆུ་བུར་བརྡོལ་བ་ནི་བརྡོལ་བ་ཞེས་རྐང་པ་ཕྱེད་དང་གཉིས་སོ། །སོ་ཐམ་ཐམ་པ་ནི་ཀོས་ཐག་ཅེས་ཚིགས་སུ་བཅད་པ་གཅིག་གོ །ཞེས་པ་ལས་མ་བཤད་ཀྱང་། ཨུཏྤལ་ལྟར་གས་པ་ལ་སོགས་པ་རྣམ་པ་གསུམ་སྲོག་ཆགས་ཀྱིས་མཆུས་དབད་པ་ལས་བྱུང་བར་སྟོན་ཅིང་། ལུས་སེམས་ཀྱི་བར་རབ་ཏུ་བློང་བ་ལས་ཡིད་མི་བདེ་བའི་ཤུགས་རིང་ཀྱི་ཧུད་འབྱུང་བ་དང་། འོ་དོད་འབོད་པས་ཨ་ཆུའི་སྒྲ་འདོན་པར་ཤུགས་ཀྱིས་སྟོན་པར་གོ་བ་བླང་ཤེས་སོ། །དེ་དག་གི་ཚེའི་ཚད་ནི་དྲན་པ་ཉེར་གཞག་ལས། འདི་ལྟ་སྟེ། གྲོང་ཁྱེར་ཀོ་ས་ལའི་བྲེས་གྲངས་སུ་བཅལ་བའི་ཏིལ་གྱི་ཚོགས་བཅུ་ཚད་ཉི་ཤུ་ཤོང་བའི་རྫང་བ་ཞིག་ཏིལ་གྱིས་བར་མཚམས་མེད་པར་ཡོངས་སུ་གང་སྟེ། ཆུ་བུར་ཅན་གྱི་དམྱལ་བ་ལས་ལོ་བརྒྱ་བརྒྱ་ན་ཏིལ་ཉག་མ་རེ་རེ་ཕྱིར་ཕྱུང་བས་ཟད་པར་གྱུར་པ་དེའི་ཚེ། ཆུ་བུར་ཅན་གྱི་སེམས་ཅན་དམྱལ་བ་པ་དེ་དག་ཚེ་འཕོ་བར་རིགས་པར་བྱ་སྟེ། གཞན་དག་ནི་དེ་ལས་ཀྱང་ཆེས་ལྷག་པ་ཉི་ཤུས་བསྒྲེས་པར་སྡུག་བསྔལ་ཆེན་པོ་མནག་དགོས་སོ། །ཞེས་པའི་བསྒྲེས་པ་ནི་བསྒྱུར་བའི་དོན་ཡིན་ནོ། །དེ་ཡང་ཚེའི་ཚད་ངེས་པ་ལྟར་བཤད་པ་ནི་ཐེག་དམན་རང་ལུགས་ཉིད་དེ། ཐེག་པ་ཆེན་པོའི་ལུགས་སུ་ནི་བྱང་ཆུབ་སེམས་དཔའ་དམྱལ་བའི་ཤིང་རྟ་འདྲེན་པ་གྱད་འབག་ཤི་ཧས་གྲོགས་པོ་ལ་སྙིང་རྗེ་སྐྱེས་ནས་འདིའི་ཐག་པ་ཡང་བདག་གི་གཉའ་བར་ཐོགས་ཤིག་ཅེས་གཞན་གྱི་སྡུག་བསྔལ་གྱི་ཁུར་བཟོད་པའི་ཐུགས་བསྐྱེད་པས་དམྱལ་སྲུང་ཁྲོས་ཏེ་མགོ་ལ་ལྕགས་ཀྱི་ཐོ་ལུམ་བསྣུན་པས་གློ་བུར་དུ་ཚེ་འཕོས་པ་དང་། དེ་བཞིན་དུ་དེད་དཔོན་མཛའ་བོའི་བུ་མོ་བཞིན་གཉེན་པོ་དྲག་པོ་རྒྱུད་ལ་སྐྱེས་པ་ལ་ནི་མ་ངེས་སོ། །ཡང་རྡོ་རྗེའི་བླ་མ་ལ་བརྙས་པ་དང་དམ་པའི་ཆོས་སྤངས་པ་ལ་སོགས་པས་བསྐལ་ཆེན་དུ་མར་མི་འཕོ་བའང་ཡོད་དེ། ལས་ཀྱི་སྒྲིབ་པ་མཐུ་ཆེ་བའི་སེམས་ཅན་གང་དག་སྡུག་བསྔལ་དྲག་པོའི་ཚོར་བ་འདི་ལྟ་བུས་ཀྱང་འཆི་བར་མི་འགྱུར་བའི་ཚུལ་བཤེས་སྤྲིང་ལས། དེ་ལྟར་སྡུག་བསྔལ་ཤིན་ཏུ་མི་བཟད་ལོ། །བྱེ་བ་ཕྲག་བརྒྱར་ཉམས་སུ་མྱོང་ཡང་ནི། །ཇི་སྲིད་མི་དགེ་དེ་ཟད་མ་གྱུར་པ། །དེ་སྲིད་སྲོག་དང་འབྲལ་བར་མི་འགྱུར་རོ། །ཞེས་སོ། །ད་ནི་ཉི་ཚེ་བ་བཤད་པའི་ཕྱིར། མགལ་རྡུམ་བཅད་དང་སྒོ་འཕར་མེད་ལ་འཐུམས། །སྒོ་དང་ཀ་བ་ཐབ་དང་ཐག་པ་སོགས། །སྣ་ཚོགས་ལས་ཀྱི་སྤྲུལ་པའི་རང་གཟུགས་ལ། །ཉེ་བར་ལེན་པའི་སྡུག་བསྔལ་ཟད་མི་ཤེས། །ཉི་ཚེ་བ་ནི་རི་བྲག་གམ། ཆུ་དང་། ཤིང་དང་། མེ་དང་། ནམ་མཁའ་ལ་སོགས་ངེས་པ་མེད་པའི་གནས་སུ། ཚེ་ཚད་དང་སྡུག་བསྔལ་ཀྱང་མ་ངེས་པ། མང་པོ་འདུས་པའམ། གཅིག་པུར་གྱུར་པའམ། ཉུང་ཟད་དུ་གནས་བ་སྟེ། ཚ་གྲང་བཀྲེས་སྐོམ་གཤགས་གཏུབས་བརྡེག་འཚོག་འཚེད་པ་ལ་སོགས་པའི་སྡུག་བསྔལ་གང་ཡང་རུང་བས་བཟོད་གླགས་མེད་པར་གདུང་བས་ཉི་ཚེ་བ་ཞེས་བྱ་ལ། དེའང་བྲག་གི་ནང་དུ་གཅར་བ་དང་། ཕ་ཝཾ་དང་། རྡོ་མཁྲེགས་ཀྱི་ལྟོང་ན་འདུག་པ་དང་། གངས་དང་ཆབ་རོམ་གྱི་ནང་དུ་འཁྱགས་ཤིང་རེངས་པ་དང་། ཆུ་ཚན་གྱི་ནང་དུ་འཚེད་པ་དང་། མེ་ནང་དུ་ཚ་ཞིང་བསྲེག་པ་དང་། ཤིང་དང་ལོ་མའི་སྦུབས་སུ་གཏུམས་པ་དང་། ནམ་མཁའ་ལ་གཡོ་བ་དང་། ཉིན་མཚན་ཕྱེད་མ་འམ། ཡུད་ཙམ་མམ། རྟག་པར་ལས་ཀྱིས་ཉེ་བར་ལེན་པ་དང་མཚུངས་པར་སྡུག་བསྔལ་པའི་འདུ་ཤེས་འཁྲུལ་པ་ཅན་ལ་སོགས་པ་སྟེ། དེ་ལ་ཉིན་མཚན་ཕྱེད་མར་མྱོང་བ་ནི། འདུལ་བ་ལུང་ལས། གྲོང་ཁྱེར་རྡོ་འཇོག་ཏུ་འཕགས་པ་ཀཱ་ཏྱཱ་ཡ་ནས་ཤན་པ་གཅིག་ལ་སྲོག་གཅོད་སྤོང་བར་གདམས། དེས་ཀྱང་མཚན་མོ་སྲོག་མི་གཅད་པའི་ཁྲིམས་མནོས་པ་ལས། སྔར་གྱི་མི་དགེ་བའི་རྒྱུས་ཉི་ཚེ་བའི་དམྱལ་བར་སྐྱེས་ནས་ཉིན་མོ་ནི་སྡུག་བསྔལ་ལ། མཚན་མོ་ནི་ལྷའི་ལོངས་སྤྱོད་དང་ལྡན་པ་བཞིན་ནོ། །ཡུད་ཙམ་དུ་མྱོང་བའམ་རྟག་པར་མྱོང་བ་མ་ངེས་པ་ནི། འདུལ་བ་ལུང་ལས། དེ་ནས་མཽངྒལ་གྱི་བུས་རྒྱ་མཚོའི་མཐར་ཕྱིན་པ་ལས་ཉི་ཚེ་བའི་སེམས་ཅན་དམྱལ་བ་པ་གཏུན་ལྟ་བུ་དང་། ཕྱགས་མ་ལྟ་བུ་དང་། ལྗོན་ཤིང་ལྟ་བུ་རབ་ཏུ་མང་པོ་སྡུག་བསྔལ་གྱི་གདུངས་པ་མཐོང་སྟེ། ཞེས་པ་ལྟར། གཏུན་དང་། ཕྱགས་མ་དང་། ཕྲུ་བ་དང་། སྒོ་དང་། སབ་མོ་དང་། ཐག་པ་དང་། སྒྱེད་པོ་དང་། ཀ་བ་ལ་སོགས་རེས་འགའ་བའམ་རྟག་པར་བཀོལ་ཞིང་སྤྱོད་པའི་འདུ་ཤེས་འཁྲུལ་པ་ཅན་དུ་སྐྱེས་ནས་སྡུག་བསྔལ་ཉམས་སུ་མྱོང་བ་དཔེར་ན་རྒྱལ་པོའི་ཁབ་ཀྱི་བ་གླང་གི་ཤན་པ་རུས་གོང་དྲི་ང་བ་ལ་བྱ་རོག་སོགས་ཀྱིས་འཐོག་པའི་སྡུག་བསྔལ་ཅན་དུ་སྐྱེས་པའི་གཏམ་རྒྱུད་བཞིན་ནོ། །དེ་བཞིན་དུ་ཤིང་སྡོང་པོའི་གཟུགས་ལ་བཅད་གཏུབས་བྱས་ན་རང་གི་ཡན་ལག་དང་ཉིང་ལག་ཆད་པའི་སྣང་བ་ཤར་ནས་སྡུག་བསྔལ་གྱི་ཚོར་བ་ཉམས་སུ་མྱོང་བ་དང་། འཕགས་པ་དགེ་འདུན་འཚོའི་རྟོགས་བརྗོད་ལྟར། རྣ་བ་བྱེ་བ་རིས་ཁང་པ་དྲྭ་བ་ཅན་གཅིག་ཏུ་གཎྜཱི་བརྡུངས་པ་ལས། ཉན་ཐོས་ཀྱི་གཟུགས་ལྔ་བརྒྱ་འདུས་མ་ཐག །གཅིག་གིས་གཅིག་མཚོན་གྱིས་ཁ་དག་པར་བྱས་ཤིང་། གདུགས་ཚོད་ཐོན་པའི་ཡུན་ན་ཕྱིར་ཡང་འོང་བ་མཐོང་བ་ལ་སོགས་དཔག་ཏུ་མེད་དེ། མཽངྒལ་གྱི་བུས། སྲིད་པ་ན་ནི་བདེ་བ་མེད། །ཉི་ཚེ་བ་བཞིན་འགྲོ་བ་ཀུན། །སོ་སོའི་སྡུག་བསྔལ་རྣམས་ཀྱིས་གདུང་། །འབར་བའི་ཁྲོད་ན་གནས་པ་འདྲ། །ཞེས་བཤད་པ་ཡིན་ནོ། །སྤྱིར་དམྱལ་བའི་གནས་རིགས་གྲངས་ངེས་ཀྱི་སྒོ་ནས་རྣམ་གྲངས་བཅོ་བརྒྱད་དུ་བསྡུས་པ་ནི་བསྟན་བཅོས་རྣམས་ལ་ཡོངས་སུ་གྲགས་པ་སྟེ། གཞན་དུ་ན་ནམ་མཁའི་སྙིང་པོའི་མདོ་ལས་མནར་མེད་ཀྱི་འཁོར་བཤད་པའི་སྐབས་འདི་སྐད་དུ། ཚུལ་ཁྲིམས་བཤིག་པ་དང་། ཡོན་བདག་དད་པ་ཅན་གྱི་ཡོན་བླངས་པའི་ལས་ཀྱིས་ཡང་དམྱལ་བ་ཆུང་ངུ་རྣམས་ཀྱི་ནང་དུ་འཇུག་སྟེ། དེ་ལ་དམྱལ་བ་གྲང་སྦྲེབས་དང་། དམྱལ་བ་མུན་ནག་པ་དང་། དམྱལ་བ་རབ་ཏུ་ཚ་བ་དང་། སྤུ་གྲི་སོ་འཐམས་པ་དང་། རལ་གྲིའི་འཁོར་ལོ་དང་། མེའི་ཤིང་རྟ་ཅན་དང་། ཕྱི་སའི་འདམ་དང་། ཆུ་ཚན་དང་། མེ་མུར་ཀླུང་དང་། ནགས་ཚལ་རལ་གྲིའི་ལོ་མ་ཅན་དང་། ལྕགས་ཀྱི་འཁྲུལ་འཁོར་དང་། ལྕགས་ཀྱི་ཤལ་མ་རི་ཀ་བ་ཅན་དང་། ལྕགས་ཀྱི་ཁྲི་ཅན་དང་། ལྕགས་ཀྱི་འཁོར་ལོ་ཅན་དང་། ལྕགས་ཀྱི་ཕུག་དང་། ལྕགས་ཀྱི་ཐོ་ལུམ་དང་། བསྡུས་འཇོམས་ཐུག་རིམ་དང་། ཟངས་ཁོལ་དང་། ཞེས་པ་ལ་སོགས་གསུང་རབ་ལས་གསུངས་པ་ནི་མཐའ་དག་གོ །དེ་ལྟར་དམྱལ་བ་དེ་དག་དང་སྡིག་ཅན་རྣམས་ནི་དབུགས་འབྱུང་བ་དང་འགག་པ་ཙམ་གྱིས་བར་དུ་ཆོད་པ་ལས་མེད་ཀྱང་དེའི་སྡུག་བསྔལ་ལ་འཇིགས་མི་ཤེས་པ་རྣམས་ནི་རྡོ་རྗེའི་རང་བཞིན་ནོ། །ཞེས་ཧ་ཅང་ལ་ཐལ་བར་སྟོན་ཅིང་། དེ་བཞིན་དུ་དམྱལ་བ་རི་མོར་བྲིས་པ་མཐོང་བའམ། གཞན་གྱིས་བསྙད་པའམ། སྔོན་ཉམས་སུ་མྱོང་བ་དྲན་པའམ། དམྱལ་བའི་སྡུག་བསྔལ་ནི་འདི་ལྟ་བུའོ། །ཞེས་པའི་གཞུང་བཀླགས་པའམ་འཇིམ་པ་ལ་སོགས་པར་དེའི་གཟུགས་བརྙན་བྱས་པ་ལའང་འཇིགས་པ་ཆེན་པོ་སྐྱེ་བ་ཡིན་ན། རྣམ་སྨིན་མངོན་སུམ་པར་ཉམས་སུ་མྱོང་ན་སྨོས་ཅི་དགོས་ཞེས་སྐྱོ་བ་བསྐུལ་བའི་ཕྱིར། བཤེས་སྤྲིང་ལས། སྡིག་ཅན་དབུགས་འབྱུང་འགག་པ་ཙམ་ཞིག་གིས། །དུས་ཀྱི་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་རྣམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །དམྱལ་བ་བྲིས་པ་མཐོང་དང་ཐོས་པ་དང་། །དྲན་ནམ་བཀླགས་དང་གཟུགས་སུ་བགྱིས་རྣམས་ཀྱང་། །འཇིགས་པ་སྐྱེ་བ་འགྱུར་ན་མི་བཟད་པའི། །རྣམ་སྨིན་ཉམས་སུ་མྱོང་རྣམས་སྨོས་ཅི་དགོས། །ཞེས་སོ། །འདིར་ངན་སོང་གཞན་གཉིས་པོ་ནི་ས་བཅད་ཙམ་ལས་མ་བསྟན་པ་ནི་ཚིག་སྡེབ་པ་ཉམས་སུ་མྱོང་སླད་སྔར་མི་ཁོམ་པའི་གནས་རིགས་སུ་བསྟན་ཟིན་པས་མ་བསྐྱར་ཏེ། ཚིག་མང་ལ་དོན་ཉུང་བ་བསྟན་བཅོས་ཀྱི་མི་མཐུན་ཕྱོགས་ཡིན་པའི་ཕྱིར་རོ། །དེ་ལྟ་ནའང་བཤེས་པའི་ཕྲིན་ཡིག་ལྟར་སོ་སོའི་རང་བཞིན་གང་བབ་བབ་ཏུ་སྟོན་པ་མི་འགལ་བའི་ཕྱིར་ཡི་དྭགས་ཀྱི་རིགས་སུམ་ཅུ་རྩ་དྲུག་པོ་བྱིངས་ན་གནས་པ་དང་། མཁའ་ལ་རྒྱུ་བ་གཉིས་སུ་རིགས་བསྡུ་བའི་བྱིངས་ན་གནས་པའི་ཡི་དྭགས་ཀྱི་སྡུག་བསྔལ་སྤྱིར་བསྟན་པ་ནི། དེ་ཉིད་ལས། ཡི་དྭགས་ནའང་འདོད་པས་ཕོངས་པ་ཡིས། །བསྐྱེད་པའི་སྡུག་བསྔལ་རྒྱུན་ཆགས་མི་འཆོས་པ། །བཀྲེས་སྐོམ་གྲང་དྲོ་ངལ་དང་འཇིགས་པ་ཡིས། །བསྐྱེད་པ་ཤིན་ཏུ་མི་བཟད་བསྟན་འཚལ་ལོ། །ཞེས་བཀྲེས་པ་ལ་སོགས་པས་ཡིད་གདུང་བའི་འདོད་པ་ནམ་ཡང་རྫོགས་པ་མེད་པས་རྒྱུན་ཆགས་ལ། རྟག་ཏུ་ཟས་སྐོམ་འབའ་ཞིག་འཚོལ་བའི་ཕྱིར་རྒྱུག་པས་ངལ་བ་དང་། སྐྱེས་བུ་རལ་གྲི་དང་། གཏུན་ཤིང་དང་ཞགས་པ་ལ་སོགས་པ་ཐོགས་པ་མཐོང་ནས་གཤེད་མ་འབའ་ཞིག་ཏུ་མངོན་པས་འཇིགས་པའོ། །ཁྱད་པར་གྱི་སྡུག་བསྔལ་ནི། ནང་གི་སྒྲིབ་པ་ཅན་ལྟོ་བ་རི་རབ་ཙམ་ལ་ཁ་ཁབ་མིག་ལྟ་བུ་གཟུགས་མི་སྡུག་ཅིང་། ཟས་སྐོམ་མཐོང་ན་གཞན་གྱིས་བསྲུང་བའམ། དྲུང་དུ་སླེབ་མ་ཐག་མེད་པར་འགྱུར་ཞིང་། ངན་སྐྱུགས་དང་མི་གཙང་བ་གྱི་ནར་བོར་བ་ཅུང་ཟད་རྙེད་ཀྱང་ཁའི་བུ་ག་ཕྲ་བ་ཉིད་ཀྱིས་བཟའ་བར་མི་ནུས་པས་ཤིན་ཏུ་སྡུག་བསྔལ་བའི་ཚུལ། སྔ་མ་ལས། ཁ་ཅིག་ཁ་ནི་ཁབ་ཀྱི་མིག་ཙམ་ལ། །ལྟོ་བ་རི་ཡི་ལྟོས་ཙམ་བཀྲེས་པས་ཉེན། །མི་གཙང་གྱི་ནར་བོར་བ་ཅུང་ཟད་ཀྱང་། །འཚལ་བའི་མཐུ་དང་ལྡན་པ་མ་ལགས་སོ། །ཞེས་དང་། ཟས་སྐོམ་གྱི་སྒྲིབ་པ་ཅན་ནི། སྔ་མའི་སྡུག་བསྔལ་གྱི་སྟེང་དུའང་མཚན་མོའི་ཆ་ཐམས་ཅད་ལ་ལྟོ་ནས་མེ་འབར་ཞིང་། ཟས་ཀྱང་བྱེ་མ་འབར་བའི་རང་བཞིན་ཅན་ཁར་འབབ་པས་ཁོང་དུ་མེ་འབར་ནས་ཤིན་ཏུ་སྡུག་བསྔལ་བ་སྟེ། ཁ་ཅིག་མཚན་ཞིང་ཁ་ནས་འབར་བ་སྟེ། །ཟས་སུ་འབར་བའི་ཁར་འབབ་བྱེ་མ་འཚལ། །ཞེས་སོ། །སྤྱི་མཐུན་གྱི་སྒྲིབ་པ་ནི། པགས་རུས་གཉིས་ཀྱི་བར་ན་ཤ་མེད་པས་སྐེམས་ཤིང་རིད་ལ་སྒྲེན་མོར་གྱུར་པས་ཤིང་ཏ་ལའི་མགོ་བསྐམས་པ་འདྲ་བར་ཡོད་དེ། སྔ་མ་ལས། ཁ་ཅིག་པགས་རུས་ལུས་ཤིང་གཅེར་བུ་སྟེ། །ཏ་ལ་ཡང་ཏོག་བསྐམས་པ་ལྟ་བུ་ལགས། །ཞེས་དང་། ཁྱད་པར་དམངས་རིགས་ཞེས་བསོད་ནམས་མ་བྱས་པའི་མཐར་ཐུག་པ་རྣམས་ནི། དམངས་རིགས་འགས་ནི་རྣག་དང་ཕྱི་ས་དང་། །ཁྲག་སོགས་མི་གཙང་བ་ཡང་མི་རྙེད་དོ། །ཕན་ཚུན་གདོང་དུ་འཚོག་ཅིང་མགྲིན་པ་ནས། །ལྦ་བ་འབྱུང་བ་སྨིན་པའི་རྣག་འཚལ་ལོ། །ཞེས་རྣག་ཁྲག་དང་ཕྱི་ས་ལ་སོགས་པའང་མི་རྙེད་ཅིང་། ཕན་ཚུན་མཐོང་ནའང་ཁྲོས་པའི་དབང་གིས་གདོང་དུ་འཚོག་ཅིང་། གཅིག་ལ་གཅིག་བརྡེག་རེས་བྱེད་པ་དང་། མགྲིན་པ་ལ་ལྦ་བ་བྱུང་བ་དེ་རྣག་ཏུ་སྨིན་ནས་ཁོང་དུ་འཛག་པ་དེས་ཟས་ཀྱི་བྱ་བ་བྱེད་པ་ཙམ་དུ་ཉམ་ཐག་གོ །ཕྱིའི་སྒྲིབ་པ་ཅན་ནི། ཚ་གྲང་ཁོད་མི་སྙོམས་པའི་སྡུག་བསྔལ་སོ་ཀའི་དུས་སུ་ནི་ཟླ་བའང་ཚ་ལ། དགུན་གྱི་དུས་སུ་ནི་ཉི་མའང་བསིལ་བར་འགྱུར་ཞིང་། ཤིང་ལྗོན་པ་འབྲས་བུ་སྨིན་ཅིང་ཡལ་ག་དུད་པ་དག་ཀྱང་མེས་བསྲེགས་པ་བཞིན་དུ་མེད་པར་འགྱུར་ལ། དེ་དག་གིས་བལྟས་པ་ཙམ་གྱིས་ཆུ་ཀླུང་ཡང་བསྐམས་པར་འགྱུར་བའི་ཚུལ། ཡི་དྭགས་རྣམས་ལ་སོ་ཀའི་དུས་སུ་ནི། །ཟླ་བ་ཚ་ལ་དགུན་ནི་ཉི་མའང་གྲང་། །ལྗོན་ཤིང་འབྲས་བུ་མེད་འགྱུར་འདི་དག་གིས། །བལྟས་པ་ཙམ་གྱིས་ཀླུང་ཡང་བསྐམས་པར་འགྱུར། །ཞེས་སོ། །དེ་ལྟ་བུའི་སྡུག་བསྔལ་ལ་མེད་པར་སྐབས་བཙལ་བའམ། བར་དུ་ཆད་པ་མེད་པའི་ཚོར་བས་ཉེན་པར་མི་རྣམས་ཀྱི་ཟླ་བ་ལ་ཡི་དྭགས་ཀྱི་ཉིན་ཞག་ཏུ་བརྩིས་པའི་རང་ལོ་ལྔ་བརྒྱའམ། མི་ལོ་ཁྲི་ལྔ་སྟོང་གི་བར་དུ་སྤྱོད་ཀྱང་འཆི་བར་མི་འགྱུར་པ་ནི་འཇུངས་པ་ལ་དགའ་བ་སྟེ་སེར་སྣའི་ལས་ཉེ་བར་སྤྱད་པའི་ཞགས་པ་སྲ་བས་བཅིངས་པ་ལས་འབྱུང་བའི་ཚུལ། བར་ཆད་མེད་པར་སྡུག་བསྔལ་བསྟེན་གྱུར་པ། །ཉེས་པར་སྤྱད་པའི་ལས་ཀྱི་ཞགས་པ་ནི། །སྲ་བས་བཅིངས་པའི་ལུས་ཅན་ཁ་ཅིག་ལོ། །ལྔ་སྟོང་དག་དང་ཁྲིར་ཡང་འཆི་མི་འགྱུར། །དེ་ལྟར་ཡི་དྭགས་རྣམས་ཀྱིས་སྣ་ཚོགས་པའི། །སྡུག་བསྔལ་རོ་གཅིག་ཐོབ་པ་གང་ལགས་པ། །དེ་ཡི་རྒྱུ་ནི་སྐྱེ་བོ་འཇུངས་དགའ་བ། །སེར་སྣ་འཕགས་མིན་ལགས་པར་རྒྱལ་བས་གསུངས། །ཞེས་སོ། །དེ་ལ་འཕགས་པ་མ་ཡིན་པ་ནི་ཉོན་མོངས་པ་ཅན་དུ་ཤེས་པར་བྱའོ། །ཡང་འདིར་སློབ་དཔོན་ཆེན་པོ་ཙནྡྲ་གོ་མི་ནི། ཡི་དྭགས་ཕྱིའི་སྒྲིབ་པ་ཅན་ལ་ཕྱིན་ཅི་ལོག་བཞི་དང་། ནང་དང་ཟས་སྐོམ་གྱི་སྒྲིབ་པ་ཅན་ལ་ཁྱད་པར་གཉིས་ཀྱི་སྒོ་ནས་སྟོན་ཏེ། དེ་ལ་དང་པོའི་ཕྱོགས་ལས་རི་བོ་ཕྱིན་ཅི་ལོག་ཏུ་སྣང་བ་ནི། སློབ་སྤྲིང་ལས། དུས་རླབས་རླུང་ལངས་ཆུ་འཐོར་རི་རྩེ་བསིལ་གྱུར་ཅིང་། །ཙན་དན་ལྗོན་པ་སྔོ་འཁྲུངས་མ་ལ་ཡར་སོང་ན། །དེ་ཡང་འདི་ལ་ནགས་བསྲེགས་མེ་ལྕེ་རྣོས་འཁྲིགས་ཤིང་། །འགལ་དུམ་འགྱེལ་བ་མང་པོས་རད་རོད་ཅན་དུ་འགྱུར། །ཞེས་ཆུ་བོ་ཆེན་པོ་དུས་བབས་ཀྱི་རླུང་གིས་བསྐྱོད་པ་འཐོར་བས་རི་བོ་ཐམས་ཅད་ཡང་བསིལ་ཞིང་བརླན་པ་ཉིད་དུ་གྱུར་ཅིང་། དེ་ལ་ཙན་དན་འབའ་ཞིག་གི་ནགས་ཚལ་སྟུག་པོ་བསིལ་བའི་རང་བཞིན་ཅན་སྐྱེས་ནས་མ་ལ་ཡ་ལྟར་ཚ་བའི་གདུང་བས་ཉེ་མི་ནུས་པར་གྱུར་པ་དེ་ཡང་། ཡི་དྭགས་རྣམས་ལ་ནི་ནགས་ཚལ་སྐམ་པོ་ལ་མེ་མཆེད་ནས་མེ་ལྕེ་རྣོན་པོས་འཁྲིགས་ཤིང་། ཤུལ་ཐམས་ཅད་འགལ་དུམ་འགྱེལ་བས་རད་རོད་དུ་གང་བར་མཐོང་བའི་ཚ་རེག་ཅན་དུ་འགྱུར་རོ་ཞེས་སྟོན་པའོ། །ཆུ་བོ་ཕྱིན་ཅི་ལོག་ཏུ་སྣང་བ་ནི། ཆུ་གཏེར་རླབས་འཇིགས་འཕང་མཐོ་གྱེས་པ་ལས་བྱུང་བའི། །དབུ་བ་བཅེར་པ་ལྷག་གེར་འདུག་པར་སོང་ན་ཡང་། །དེ་ཡང་འདི་ལ་བྱེ་ཚན་ཁུག་རྣ་དམར་རྩུབ་པའི། །རླུང་དམར་འཇེབས་པར་འཚུབ་པའི་མྱ་ངམ་ཉིད་དུ་འགྱུར། །ཞེས་ཆུ་གཏེར་ཏེ་རྒྱ་མཚོ་ཆེན་པོའི་རླབས་གྱེན་དུ་འཕང་མཐོ་བར་འཕགས་པའི་བླ་གབ་ཐམས་ཅད་ལྦུ་བའི་ཕྲེང་བས་ལྷག་གེར་གཡོ་བ་དེ་ཡང་། ཡི་དྭགས་རྣམས་ལ་བྱེ་ཚན་རླུང་དམར་གྱིས་དཀྲུགས་པ་དྲག་པོར་འཚུབ་པའི་མྱ་ངམ་གྱི་ཐང་དུ་མངོན་པའོ། །ཆར་སྤྲིན་ཕྱིན་ཅི་ལོག་ཏུ་སྣང་བ་ནི། འདི་ནི་དེར་གནས་ཆར་སྤྲིན་ལྡང་བར་འདོད་ན་ཡང་། །སྤྲིན་ལས་ལྕགས་མདའི་ཆར་པ་དུད་འཐུལ་མདག་མེར་བཅས། །ཚྭ་ཚྭ་རྡོ་རྗེའི་ཕ་བོང་རྣམ་འཕྲོ་གསེར་མདོག་ལྟའི། །གློག་ཕྲེང་དམར་སེར་འགྱུ་བ་ལུས་ལ་ཆར་དུ་འབབ། །ཅེས་ཞིང་པ་ཐམས་ཅད་ལ་སྤྲོ་དགའི་སྣང་བ་གསར་དུ་བསྐྱེད་པའི་ཆར་སྤྲིན་སྔོན་པོ་ལྗོན་ཤིང་ནྱ་གྲོ་དྷའི་འདབ་མ་གཡོ་བ་ལྟ་བུ་དེ་ཡང་། ཡི་དྭགས་རྣམས་ལ་ནི་སྟང་ཟིལ་བཅག་པ་ལྟ་བུར་ཁྲོས་པའི་སྤྲིན་གྱི་ཕང་པ་ནས་ལྕགས་མདའི་ཆར་པ་དུ་བ་འཐུལ་ཞིང་མེ་མདག་དང་བཅས་པ་དང་། མགར་གྱི་ཐོ་བའི་བར་ནས་ལྕགས་ཞུན་གྱི་ཚ་ཚ་ཡར་བ་རྡོ་རྗེའི་ཕ་བོང་ལྟ་བུར་འཕྲོ་ཞིང་། གློག་གི་ཕྲེང་བ་གཞོན་ནུ་མའི་ལག་པའི་གདུ་བུ་བཞིན་དུ་མཛེས་པ་དེ་ཡང་མཚོན་ཆའི་རང་བཞིན་དུ་བབས་ནས་ལུས་སྣད་པར་འཆར་རོ། །ཚ་གྲང་ཕྱིན་ཅི་ལོག་ཏུ་སྣང་བ་ནི། ཚ་བས་ཉིན་ལ་བུ་ཡུག་ཀྱང་ནི་ཚར་འགྱུར་ལ། །ལྷགས་པས་ཉམ་ཐག་པ་ལ་མེ་ཡང་གྲང་བྱེད་དོ། །ཤིན་ཏུ་མི་བཟད་ལས་ཡོངས་སྨིན་པས་རྣམ་རྨོངས་པ། །འདི་ལ་སྣ་ཚོགས་འདི་ཀུན་ཕྱིན་ཅི་ལོག་ཏུ་སྣང་། །ཞེས་ཚ་བས་གདུངས་པའི་ཚེ་བུ་ཡུག་གྲང་བའི་རེག་པ་ཅན་དེ་ཡང་དེའི་གྲོགས་སུ་འགྱུར་ལ། ལྷགས་པས་ཉམ་ཐག་པའི་ཚེ་ནི་མེ་ཡང་དྲོད་དང་མི་ལྡན་པའི་གྲང་རེག་ཅན་དུ་འགྱུར་བའོ། །ཟས་སྐོམ་ལ་སྒྲིབ་པ་ཅན་གྱི་སྡུག་བསྔལ་ནི། མི་བཟད་སྐོམ་པས་རྒྱང་ནས་ཆུ་ཀླུང་དྲི་མེད་པ། །མཐོང་ནས་བཏུང་བར་འདོད་དེ་སོང་ན་དེ་ཉིད་ཀྱང་། །སྐྲ་ཤད་ཉ་ལྕིབས་ཚོགས་དང་རྣག་སུངས་འདྲེས་པ་དང་། །འདམ་རྫབ་ཁྲག་དང་ཕྱི་སས་གང་བའི་ཆུར་འགྱུར་རོ། །ཞེས་སྐོམ་པ་འབའ་ཞིག་གིས་གདུངས་པ་དེས། རྒྱང་རིང་པོའི་ས་ན་ཆུ་ཀླུང་མཐོང་བ་ལ་བསྙེགས་པས། དེར་སླེབ་པ་དང་ཡང་ན་ནི་སྨིག་རྒྱུའམ་སྐྲ་ཤད། ཡང་ན་ནི་ཉ་ལྕིབས། ཡང་ན་རྣག་རུལ་པ་དང་། འདམ་རྫབ་དང་། ཁྲག་དང་། མི་གཙང་བས་འདྲེས་པའི་ཆུར་གནས་འགྱུར་བའོ། །ནང་གི་སྒྲིབ་པ་ཅན་ནི། ཁབ་མིག་ཙམ་གྱི་ཁ་ལ་དཔག་ཚད་མང་འཇིགས་པའི། །ལྟོ་ཅན་ཉམ་ཐག་རྒྱ་མཚོ་ཆེན་པོའི་ཆུ་འཐུངས་ཀྱང་། །མགུལ་ཕུགས་ཡངས་པ་ཉིད་དུ་ཕྱིན་པར་མ་གྱུར་པར། །ཁའི་དུགས་ཀྱིས་ཆུའི་ཐིགས་པའང་བསྐམས་པར་འགྱུར། །ཞེས་པ་ནི། དེའི་ཁ་ནི་ཁབ་མིག་ཙམ་མོ། །དེའི་ལྟོ་བའི་ཁྱོན་གཞལ་བ་ལ་ནི་དཔག་ཚད་མང་པོ་ཡང་འཇིགས་སོ། །ཅིའི་ཕྱིར་ན་ཉི་མའི་སྙིང་པོའི་མདོ་ལས། ཡི་དྭགས་ཆེ་བའི་ལུས་དཔག་ཚད་སྟོང་དང་། ཆུང་ཤོས་མཐོ་གང་བར་གསུངས་པས་སོ། །དེ་ཟས་སྐོམ་གྱི་ཉམ་ཐག་པས་རྒྱ་མཚོ་ཆེན་པོའི་ཆུ་འཐུངས་ཀྱང་མགུལ་བ་རྟ་རྔ་བཞིན་དུ་ཕྲ་བ་ལ་ཆུད་པར་མ་གྱུར་པའི་བར་ལ། ཁའི་དྲོད་ཀྱིས་ཆུའི་ཐིགས་པ་དེ་ནི་དེ་ཉིད་དུ་བསྐམས་ནས་ནང་དུ་འགྲོ་བའི་གནས་མེད་དོ་ཞེས་སྟོན་པའོ། །དེ་ལྟར་བརྗོད་པ་ཤིན་ཏུ་གཙང་བའི་སློབ་དཔོན་འདི་ལ་ནི་འཛམ་བུའི་གླིང་མཛེས་པའི་རྒྱན་སློབ་དཔོན་ཆོས་ཀྱི་གྲགས་པ་ཡང་བསྔགས་པར་བྱེད་པ་ཡིན་པས་རྒྱ་འགྲེལ་གཉིས་ཀྱིས་ཟུར་ཙམ་ལས་མ་བསྟན་པའི་དོན་ཚིག་འགྲེལ་ཉིད་དུ་གསལ་བར་སྨོས་པའོ། །ཡང་མཁའ་ལ་རྒྱུ་བའི་ཡི་དྭགས་ནི་ལུས་སྲུལ་པོ་དང་། རོ་ལངས་དང་། སྨྱོ་བྱེད་དང་། བརྗེད་བྱེད་དང་། གནོད་སྦྱིན་དང་། ཤ་ཟ་དང་། གྲིབ་གནོན་དང་། སྐེམ་བྱེད་དང་། ནམ་གྲུ་དང་། བྱད་གདོན་དང་། སྲིན་པོ་དང་། བཙན་དང་། རྒྱལ་པོ་ལ་སོགས་འབྱུང་པོའི་རིགས་ཅན་མཐའ་དག་སྟེ། དྲན་པ་ཉེར་གཞག་ཆུང་ངུ་ལས། གང་ཞིག་བྱིས་པ་རྣམས་ལ་འཚེ། །སྲེད་པས་འདྲིད་པར་བྱེད་པ་དེ། །ཁོང་གི་དྲི་མ་ཟ་བྱེད་པའི། །ལུས་སྲུལ་པོར་ནི་སྐྱེ་བར་འགྱུར། །གང་ཞིག་གྲོང་བཅས་འབེབས་ཤིང་སྟེར། །སྦྱིན་ཞིང་གནོད་པར་བྱེད་པ་དེ། །གྲུལ་བུམ་བྱད་ནི་མི་སྡུག་པ། །མཆོད་པར་འོས་པར་སྐྱེ་བར་འགྱུར། །རྟག་ཏུ་དྲི་དང་ཕྲེང་ལ་དགའ། །སྦྱིན་བྱེད་ཁྲོ་བ་ཆུང་བ་ནི། །ལྷ་རྣམས་དགའ་བའི་རྒྱུར་འགྱུར་བ། །དྲི་ཟ་རྣམས་སུ་སྐྱེ་བར་འགྱུར། །གང་ཞིག་ཁ་ཅིག་ཕྲ་མ་ཆེ། །ཁྲོ་ཞིང་དགོས་པའི་ཆེད་བྱིན་ན། །དེ་ནི་ཤ་ཟ་མ་རུངས་ཉིད། །བཞིན་མི་སྡུག་པར་སྐྱེ་བར་འགྱུར། །རྟག་ཏུ་རབ་སྡང་རྟབས་བག་ཅན། །རྟག་ཏུ་སྦྱིན་ལ་དགའ་བ་ནི། །དེ་ནི་ཤི་ནས་འབྱུང་པོར་སྐྱེ། །མ་རུངས་ཁྲོ་ཞིང་སྦྱིན་བྱེད་ལ། །ཆང་ཞིམ་དག་ལ་དགའ་བའི་མི། །ཤི་ནས་གནོད་སྦྱིན་མ་རུངས་པ། །ཆང་ལ་དགའ་བ་རྣམས་སུ་སྐྱེ། །གང་དག་ཕ་མ་བླ་མ་རྣམས། །ཇི་ལྟར་འདོད་པའི་བཞོན་པར་འདེགས། །དེ་དག་གཞལ་མེད་ཁང་རྒྱུ་བའི། །གནོད་སྦྱིན་བདེ་བ་ལྡན་པར་སྐྱེ། །སྲེད་དང་སེར་སྣའི་སྐྱོན་གྱིས་ནི། །ཤི་ནས་ཡི་དྭགས་སྐྱེ་བར་འགྱུར། །ཞེས་བཤད་པ་ལྟར་རོ། །འོན་ཀྱང་གྲུལ་བུམ་དང་། དྲི་ཟ་གཉིས་ནི་འདོད་ལྷ་དང་པོ་གཉིས་ཀྱི་སྡེ་ཚན་བྱེ་བྲག་པ་ཡིན་ཀྱང་། འདིར་གདོན་གྱི་སྡེ་ཚན་དུ་བསྡུས་པར་རིགས་པར་བྱའོ། །འདི་དག་ལས་ཀྱི་རྫུ་འཕྲུལ་དང་ལྡན་ཞིང་། ཁ་ཅིག་སྔོན་གྱི་དགེ་བ་ཕྲ་མོས་ལོངས་སྤྱོད་དང་ལྡན་ཡང་། མི་བརྟན་ཞིང་དུས་ཚིགས་ལོག་པ་དང་། ཡུལ་ཡིད་དུ་མི་འོང་བ་དང་། འཚེ་བ་དང་། ཉམ་ང་བ་དང་། བཀྲེས་སྐོམ་དང་། ཚེ་དང་མདངས་འཕྲོག་པ་ལ་བརྩོན་ཞིང་ཕ་རོལ་འབའ་ཞིག་ལ་གནོད་པ་བསྒྲུབ་པས་སླད་ཀྱི་སྡུག་བསྔལ་འདུ་བྱེད་པ་དང་། རྫུ་འཕྲུལ་གྱིས་སོང་ཡང་ལམ་འཕྲང་དུ་བསྲུང་བར་སྣང་བ་དང་། གང་དུ་སྙིང་ཉེ་ནས་ཕྱིན་པ་དེ་དག་ལ་རང་ཉིད་སྔོན་འཆི་ཀའི་གནད་འཆད་པའི་ཚོར་བ་འཕོ་བས་རིགས་སྔགས་དང་། ཐུན་གྱི་ཆད་པས་འཚེ་བ་ཐེབ་པ་དང་། རང་ཡང་གནད་འཆད་པའི་སྡུག་བསྔལ་གྱི་ཚོར་བ་དེས་རྟག་པར་གདུང་བས་དེ་ནད་པ་གཞན་ལ་སྤོ་བའི་བསམ་སྦྱོར་ངན་པ་དང་། རང་ཚན་གྱི་ལུས་སྒོ་ལྟ་བུ་དང་། ས་ག་ལྟ་བུ་དང་། མགལ་དུམ་ལྟ་བུ་ཉི་ཚེ་བའི་སྡུག་བསྔལ་དང་མཚུངས་པའམ། ཁྱི་དང་བྱ་ལ་སོགས་རྣམ་པ་སྣ་ཚོགས་པར་ཡོད་ལ། གཞན་གྱི་བདེ་བ་དང་ལོངས་སྤྱོད་དེ་ལ་སྡུག་བསྔལ་དུ་འཆར་བ་དང་། སྔར་བཤད་པའི་ཕྱིན་ཅི་ལོག་བཞིའི་སྣང་བ་ཐུན་མོང་དུ་འཆར་བའང་ཡོད་པས་གཤིན་རྗེའི་འཇིག་རྟེན་དུ་སོང་ནས་སྡུག་བསྔལ་བ་ཞེས་བྱའོ། །ད་ནི་དུད་འགྲོའི་སྡུག་བསྔལ་བསྟན་པའི་ཕྱིར། བཤེས་སྤྲིང་ལས། དུད་འགྲོའི་སྐྱེ་གནས་ན་ཡང་གསོད་པ་དང་། །བཅིངས་དང་བརྡེག་སོགས་སྡུག་བསྔལ་སྣ་ཚོགས་པ། །ཞི་གྱུར་དགེ་བ་སྤངས་པ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པ། །ཞེས་པ་ལ་སྤྱིར་བསྟན་པ་དང་། ཁྱད་པར་གྱི་སྡུག་བསྔལ་གཉིས་སུ་དབྱེ་བ་ལས། དང་པོ་ནི་དྲན་པ་ཉེར་བཞག་ལས་དབྱེ་བ་སུམ་ཅུ་རྩ་བཞིར་བསྟན་ཀྱང་ཁ་འཐོར་དང་། བྱིངས་གནས་གཉིས་སུ་བསྡུ་བའི་ཁ་འཐོར་བ་ལའང་མི་དང་མི་ཡིན་པས་བྱས་པའི་དབང་དུ་བྱས་ན། སྤྱིར་གསོད་པ་ཉིད་དུ་གཅིག་ཀྱང་གསོད་ལུགས་ཀྱི་སྡུག་བསྔལ་ཆེ་ཆུང་ཀྱང་བསམ་གྱིས་མི་ཁྱབ་པ་རྔོན་པས་རི་དྭགས་མཐའ་ལ་གཅུར་བ་དང་། ཀླ་ཀློའི་སྡེ་རིགས་ཀྱིས་གསོན་པོར་པགས་པ་བཤུ་བ་དང་། མེས་བསྲེག་པ་དང་། དངུལ་ཆུ་ལ་སོགས་པ་རྫས་དང་དཔྱད་པའི་ཆེད་དུ་ལྕགས་ཀྱི་ཡོལ་གོ་ལ་སོགས་པའི་ནང་དུ་འཚེད་པ་དེ་དག་ནི་བདག་ཉིད་ལ་ཚེར་མ་ཟུག་པའང་མི་བཟོད་བཞིན་དུ་ཁྲོ་ཆགས་རྨོངས་གསུམ་གྱི་དབང་གི་སྲོག་ལྡན་གྱི་ལུས་ཀྱང་བེམ་པོ་ལྟ་བུར་བལྟས་ནས་དམྱལ་བ་པ་བཞིན་དུ་མནར་ཞིང་སྤྱོད་པ་དང་། ཐག་པ་ལ་སོགས་པས་འཆིང་ཞིང་གོ་རར་འཛུད་པ་དང་། ལྕག་དང་དབྱུག་པ་ལ་སོགས་པས་ཁྲིམས་བཞིན་དུ་བརྡེག་པ་དང་། །དེ་བཞིན་དུ་སྣ་དབུག་པ་དང་། བྱ་གཅོད་པ་དང་། ཁལ་འགེལ་བ་དང་། བཞོན་པར་སྤྱོད་པ་དང་། རྨོ་ཞིང་བཀོལ་བ་དང་། གསོན་ཁྲག་འབྱིན་པ་དང་། བལ་འཐོག་པ་དང་། འདོད་པ་བསྲུང་བ་ལ་སོགས་པའི་སྡུག་བསྔལ་བཟོད་པར་དཀའ་བའོ། །རང་གི་རིགས་ལས་བྱུང་བའི་སྡུག་བསྔལ་གྱི་དབང་དུ་བྱས་ན། ལས་བརྒྱ་པར། ཆུ་སྲིན་དཔག་ཚད་ཉིས་སྟོང་བདུན་བརྒྱ་པའི་ལུས་སུ་བཤད་པ་ལ་ཆུང་བ་རྣམས་ཀྱིས་འབིགས་ཤིང་དེས་མཐའ་དག་ཟ་བས་མཚོན་ངེས་པར་འབྱེད་པའི་ཆ་དང་མཐུན་པའི་དགེ་བ་སྤངས་པ་རྣམས་ནི་གཅིག་ལ་གཅིག་ཟ་ཞིང་། ཚ་གྲང་བཀྲེས་སྐོམ་འཚེ་བ་འབའ་ཞིག་གིས་འཇིགས་ཤིང་ཉམ་ཐག་པས་གླིང་བར་མུན་ནག་གི་རྒྱ་མཚོར་གནས་པ་དང་། ཆུ་གཏེར་བཞིའི་ཁྱོན་ལ་གནས་པའི་བྱིངས་གནས་ཀྱི་དུད་འགྲོ་རྣམས་ཀྱི་སྡུག་བསྔལ་ཀྱང་བཟོད་པར་དཀའ་བ་ཉིད་དོ། །གཉིས་པ་ནི་སྔ་མ་ལས། ཁ་ཅིག་མུ་ཏིག་བལ་དང་རུས་པ་དང་། །ཤ་དང་པགས་པའི་ཆེད་དུ་གསོད་པར་འགྱུར། །དབང་མེད་གཞན་དག་རྡོག་པ་ལག་པ་དང་། །ལྕག་དང་ལྕགས་ཀྱུས་བཏབ་པས་བཏབ་སྟེ་བཀོལ། །ཞེས་མུ་ཏིག་གི་ཕྱིར་འཆི་བ་ཉ་ལྕིབས་དང་། རུས་པའི་ཕྱིར་འཆི་བ་གླང་པོ་ཆེ་དང་། ཤའི་ཕྱིར་འཆི་བ་རི་དྭགས་དང་ར་ལུག་ལ་སོགས་པ་དང་། པགས་པའི་ཕྱིར་འཆི་བ་གཅན་གཟན་རྣམས་དང་། དབང་མེད་དུ་རྡོག་པས་བཀོལ་བ་རྟ་ལ་སོགས་པ་དང་ལག་པས་བཏབ་སྟེ་བཀོལ་བ་མ་ཧེ་ལ་སོགས་པ་དང་ལྕག་གིས་བཀོལ་བ་བོང་བུ་ལ་སོགས་དང་། ལྕགས་ཀྱུས་བཀོལ་བ་གླང་པོ་ཆེ་ལ་སོགས་གཞན་དབང་འབའ་ཞིག་གི་ཕྱིར་ལུས་ཆུད་གསོན་པས་བཙོན་པ་ཁྲི་མུན་དུ་བཅུག་པ་ལྟ་བུའོ། །དེ་བཞིན་དུ་ཀླུ་རྣམས་ཀྱང་ཉིན་མཚན་དང་སྔ་དྲོ་ཕྱི་དྲོ་འགྱུར་བའི་སྡུག་བསྔལ་ནི་སྔ་དྲོ་ལྟ་བུ་བདེ་བའི་རང་བཞིན་ལ་གནས་ཀྱང་། ཕྱི་དྲོ་ཚ་གྲང་བཀྲེས་སྐོམ་རྣམ་ཤེས་རྨོངས་པ་ལ་སོགས་སྡུག་བསྔལ་གྱི་ཆ་མང་པོས་གཙེར་བ་དང་། གདེངས་ཀ་མང་བ་དེ་ཙམ་དུ་སྡུག་བསྔལ་དེ་སྙེད་བསྐྱེད་པ་དང་། ཁ་ཅིག་གི་གནས་སུ་བྱེ་ཚན་གྱི་ཆར་འབབ་པ་དང་། ཐམས་ཅད་ཀྱིས་སྤངས་ཏེ་ཁྱུར་མི་ཚུད་པའི་སྡུག་བསྔལ་དང་། ནམ་མཁའ་ལྡིང་གི་འཇིགས་པ་དང་། དེའང་ནམ་མཁའ་ལྡིང་རྫུས་སྐྱེས་ཀྱིས་ནི་ཀླུ་རིགས་བཞི་ཀ་ཟ་ལ། སྒོང་སྐྱེས་ཀྱིས་སྐྱེ་གནས་མཐུན་པ་དང་། མངལ་སྐྱེས་ཀྱིས་དེ་གཉིས་ཅར་ཟ་ལ། དྲོད་གཤེར་སྐྱེས་ཀྱིས་རྫུས་སྐྱེས་ལས་གཞན་པ་གསུམ་ཀ་ཟའོ། །རིགས་སྔགས་ཀྱི་འཇིགས་པ་དང་། སྤྱི་མཐུན་དུ་རྨོངས་པ་དང་། ཚེ་དང་ལུས་ཚད་ཀྱང་མ་ངེས་ཏེ། འཇོག་པོ་ལ་སོགས་བསྐལ་པར་གནས་ཤིང་སྨད་རྒྱ་མཚོ་ལས་མ་འཕགས་པར་ལུས་སྟོད་སུམ་ཅུ་རྩ་གསུམ་དུ་རྨྱང་ནས་སངས་རྒྱས་ལས་ཆོས་ཉན་ནུས་པ་དང་ཉིན་ཞག་གཅིག་པ་དང་། ཡུད་ཙམ་ལ་སོགས་པའོ། །དེ་དག་གི་རྒྱུ་འབྲས་ནི་དྲན་པ་ཉེར་བཞག་གི་ཚིག་ལེའུར་བྱས་པ་ལས། འདོད་ཆགས་ཀྱིས་ནི་རྨོངས་པ་དང་། །ངང་པ་ཕུག་རོན་ལ་སོགས་དང་། །བོང་བུ་འདོད་ཆགས་ཅན་རྣམས་ཀྱི། །སྐྱེ་གནས་སྲིན་སོགས་སྐྱེ་གནས་ཏེ། །ཁོང་ཁྲོ་འཛིན་པས་སྦྲུལ་དུ་སྐྱེ། །ང་རྒྱལ་ཁེངས་སེམས་སེང་གེར་འགྱུར། །ཆེ་བ་ཡི་ནི་ང་རྒྱལ་གྱིས། །ཁྱི་དང་བོང་བུའི་སྐྱེ་གནས་ཏེ། །སེར་སྣ་ཕྲག་དོག་ལ་སོགས་པའི། །སྐྱོན་གྱིས་ལུས་ཅན་ཤི་ནས་སྤྲེའུ། །མུ་ཅོར་སྨྲ་བ་སྤྱི་བརྟོལ་ཆེ། །རང་བཞིན་མི་བརྟན་ཁྲར་སྐྱེའོ། །གསོད་དང་འཆིང་དང་སེར་སྣ་ཡིས། །ལུས་ཅན་བ་ལང་ཁྱི་ལ་སོགས། །འགྱུར་རོ་མི་སྲུན་ལས་ཀྱིས་ནི། །སྡོམ་དང་སྡིག་པ་མི་སྡུག་སྐྱེ། །ཁྲོ་དང་སེར་སྣ་ཅན་གྱི་མི། །ཤི་ནས་ཤ་ནི་ཟ་བྱེད་པ། །སྟག་དང་སྤྲེའུ་ཝ་དང་དོམ། །བྱ་རྒོད་སྤྱང་ཀི་ལ་སོགས་སྐྱེ། །མི་སྲུན་ཁྲོ་གཉེར་སྦྱིན་བྱེད་མི། །རྫུ་འཕྲུལ་ཆེན་པོའི་ཀླུར་སྐྱེའོ། །གཏོང་ཞིང་ཁྲོ་དང་དྲེགས་པ་ཡིས། །ནམ་མཁའ་ལྡིང་གི་དབང་ཕྱུག་ཆེ། །རང་གི་ལུས་དང་ངག་ཡིད་ཀྱི། །སྡིག་པའི་ལས་ནི་གང་བྱས་པ། །དེ་ནི་དུད་འགྲོར་སྐྱེ་བས་ན། །དེ་ནི་ཆུང་ཡང་མ་བྱེད་ཅིག །ཞེས་སོ། །དེ་ལྟར་ངན་སོང་གསུམ་གྱི་སྡུག་བསྔལ་ནི་བཟོད་པར་དཀའ་བ་ཉིད་དེ། བདེ་འགྲོ་མཐོ་རིས་ཀྱི་འཇིག་རྟེན་དུ་སོང་ན་བདེ་བ་འབའ་ཞིག་གོ་སྙམ་པའི་སྲེད་པ་ལ་འཇུག་པའང་རིགས་པ་མ་ཡིན་ཏེ། སྲེད་པ་ནི་སྡུག་བསྔལ་ཐམས་ཅད་ཀྱི་ཉེ་བར་ལེན་པ་པོ་སྟེ། དེ་ལས་སྲེད་པ་དང་སྐྱེ་བར་འབྲེལ་བས། སྐྱེ་བའི་རང་བཞིན་ནི་གནས་རིགས་མཐོ་ཡང་། ཡུལ་ཕྲན་ལ་ཤྭ་འོད་བརྡོལ་བ་ལྟ་བུ། སྡུག་བསྔལ་གྱི་རྦ་རླབས་ཅན། རྣམ་པར་གྲོལ་བའི་ལམ་དང་འགལ་བའི་ཅ་ཅོ་མི་བཟད་པར་སྒྲོག་པས་ན་ད་རེས་ཀྱི་དལ་འབྱོར་ཐམས་ཅད་ཚང་པའི་ལུས་རྟེན་ལྷ་བས་ལྷག་པ་འདི་ཡང་། འབབ་ཆུ་གནོད་པ་ཅན་གྱི་ཆུ་ལོན་བཤིག་པ་བཞིན་དུ་གློ་བུར་དུ་མེད་པར་གྱུར་ནས་ཡང་སྲིད་པར་ཉིང་མཚམས་སྦྱོར་བའི་སྡུག་བསྔལ་ལ་སྤྱོད་པའི་ཕྱིར་སྐྱེ་བ་བཟློག་པའི་ཐབས་འབའ་ཞིག་བསམ་པའི་ཚུལ། དེ་ཕྱིར་སྐྱེ་བའི་ཤྭ་འོད་སྡུག་བསྔལ་གྱི། །རྦ་རླབས་ཅ་ཅོ་སྒྲོག་འདི་མ་བཟློག་ན། །ལྷ་བས་ལྷག་པའི་ལུས་རྟེན་ཆུ་ལོན་ཡང་། །བརྟན་པ་བྲལ་བའི་མྱ་ངམ་ཐང་དུ་འཁྱམས། །ཞེས་སྨོས་ནས་སོ་སོའི་སྡུག་བསྔལ་གྱི་རང་བཞིན་གོང་མའི་ཁམས་ནས་རིམ་བཞིན་བཤད་པ་ནི། གཟུགས་མེད་ཏིང་འཛིན་ལུང་མ་བསྟན་པའི་ལས། །ཟད་ནས་སྲིད་པ་ཕྱི་མར་འདུ་བྱེད་དང་། །གཟུགས་ཁམས་བསམ་གཏན་སྔ་མའི་ལས་ཟད་དེ། །འོག་མར་ལྷུང་བ་འགྱུར་བའི་སྡུག་བསྔལ་མྱོང་། །ཞེས་ཁམས་གོང་མ་གཉིས་ན་སྡུག་བསྔལ་གྱི་སྡུག་བསྔལ་ལ་སོགས་པ་རགས་པ་རྣམས་མེད་ཀྱང་། གཟུགས་མེད་པའི་གནས་སྐབས་ཀྱི་བདེ་བ་ཞི་གནས་ཀྱི་ཏིང་ངེ་འཛིན་དེ་ལས་ཟད་པ་དང་སད་པའི་གནས་སྐབས་ཐོབ་ནས་འཆི་འཕོ་བ་ན་ཡང་སྲིད་པ་ཕྱི་མའི་སྡུག་བསྔལ་འདུ་བྱེད་པས་སྐྱོ་བ་དང་། ཚངས་རིས་ལ་སོགས་གཟུགས་ཁམས་འབྲས་བུ་ཆེ་བའི་བར་གྱི་ལྷ་རྣམས་ཀྱང་འཆི་བའི་ཚེ་བསམ་གཏན་ལས་ཐོབ་པའི་བདེ་བ་དེ་འགྱུར་ནས་སྲིད་པ་ཕྱི་མ་ལ་འཇུག་པའི་སྡུག་བསྔལ་ལ་སྤྱོད་པའི་ཕྱིར་ཀླུའི་དབང་པོས། ཚངས་རིས་ལ་སོགས་བསམ་གཏན་ལྷུན་གྲུབ་ཀུན། །འོད་དང་ཁ་དོག་གཟི་བརྗིད་མཐའ་ཡས་ཀྱང་། །བདག་རྟོག་བག་ལ་ཉལ་བ་མ་གཟིགས་ནས། །ཤི་ནས་དམྱལ་བར་སྐྱེ་བ་ཆ་མེད་དམ། །ཞེས་བསོད་ནམས་དང་གཟི་བརྗིད་ཀྱི་ཆ་ནས་མཉམ་པ་མེད་པ་ཉིད་དེ། རྣམ་པར་རྟོག་པ་བག་ལ་ཉལ་སྐྱེ་བ་མེད་པའི་དབྱིངས་སུ་བྱང་མ་ཆུབ་པས་ད་དུང་ལས་ཀྱི་ཕྱི་བཞིན་འབྲང་ངོ་། །ཡང་། ཚངས་དང་ལྷ་དབང་འཁོར་ལོས་སྒྱུར་བ་ཡང་། །སྤྲིན་བར་ཉི་བཞིན་དཀར་པོའི་རྣམ་སྨིན་གྱིས། །སྐབས་བཙལ་སྤངས་པའི་མོད་ལ་མར་མེའི་ལྕེས། །འཐུངས་པའི་ཞུན་མར་བཞིན་དུ་ཉམས་པར་འགྱུར། །ཞེས་གཟུགས་ཁམས་པ་ཚངས་པ་ཉིད་ཀྱིས་འདོད་པའི་འདོད་ཆགས་རྣམ་པར་གནོན་པའི་ཆགས་བྲལ་གྱི་བདེ་བ་ཐོབ་ཀྱང་། དུས་གཞན་ན་མི་དགེ་བའི་ལས་བསགས་པའི་ཕྱིར་ལན་གྲངས་གཞན་ལ་མྱོང་འགྱུར་གྱི་ལས་ཀྱི་འཕེན་པས་དམྱལ་བ་མནར་མེད་པའི་བུད་ཤིང་དུ་འགྱུར་བའང་ཡོད་པའི་ཕྱིར་བཤེས་སྤྲིང་ལས། ཚངས་ཉིད་ཆགས་བྲལ་བདེ་བ་ཐོབ་ནས་སླར། །མནར་མེད་མེ་ཡི་བུད་ཤིང་འགྱུར་པ་ཡིས། །སྡུག་བསྔལ་རྒྱུན་མི་འཆད་པར་བསྟེན་འཚལ་ལོ། །ཞེས་གསུངས་ལ། དེ་བཞིན་དུ་འདོད་པའི་ཁམས་ནས་གཞི་ལ་བརྟེན་ནོ་ཅོག་ལ་ཆེ་ཞིང་དཔལ་འབྱོར་དང་ལོངས་སྤྱོད་ཕུན་སུམ་ཚོགས་པ་ཀཽ་ཤི་ཀ་དང་། འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་གྱིས་མདུན་བདར་ཞིང་། མགར་གྱིས་མ་བྱས་པའི་འཁོར་ལོ་རིན་པོ་ཆེའི་ཕྱི་ནས་དཔུང་གི་ཚོགས་ཡན་ལག་བཞི་པ་དང་ལྷན་ཅིག་གླིང་བཞིའི་འཇིག་རྟེན་དུ་འགྲོ་བ་དེ་དག་རེ་ཞིག་ཅིག་དཀར་པོའི་རྣམ་སྨིན་གྱི་འབྲས་བུའི་སྐབས་བཙལ་བའི་བདེ་སྐྱིད་ལ་སྤྱོད་ཀྱང་། ཇི་ལྟར་སྤྱད་པ་ཙམ་གྱིས་སྔ་མའི་དགེ་འབྲས་མཐའ་དག་ནི་མར་མེའི་ལྕེ་ལྡེས་འཐུངས་པའི་ཞུན་མར་བཞིན་དུ་ཟད་ནས་སྐྱེ་གནས་ཤིན་ཏུ་ཉམས་ཐག་པར་ལྟུང་བའི་ཚུལ་བཤེས་སྤྲིང་ལས། བརྒྱ་བྱིན་མཆོད་འོས་ཉིད་དུ་གྱུར་ནས་ནི། །ལས་ཀྱི་དབང་གིས་ཕྱིར་ཡང་ས་སྟེང་ལྷུང་། །འཁོར་ལོས་སྒྱུར་རྒྱལ་ཉིད་དུ་གྱུར་ནས་ཀྱང་། །འཁོར་བ་དག་ཏུ་ཡང་བྲན་ཉིད་དུ་འགྱུར། །ཞེས་སོ། །དེ་བཞིན་དུ་ལྷའི་དབང་པོ་ཉིད་ཀྱིས་ས་དང་དབང་ཕྱུག་ལ་ཆགས་པའི་ཉེས་དམིགས་སྟོན་ཕྱིར། མནན་ན་ནེམས་པའི་རེག་པ་འཇམ་པོ་དང་། །ལྷ་ཀླུ་མིའམ་ཅི་ཡི་ལྭ་ཐོད་ཀྱིས། །རྐང་པའི་ཆུ་སྐྱེས་དམར་བྱས་དབང་པོ་ཡང་། །ལྕགས་ཀྱི་གསལ་ཤིང་འབར་བའི་རྩེ་མོར་གདུང་། །གྲོང་ཁྱེར་བལྟ་ན་སྡུག་གིས་གཞི་ལ་རྐང་པ་བཞག་ན་ནེམས་བྱེད་པས་སོར་བཞིའི་དམའ་བར་འགྱུར་ལ། བཏེགས་ན་སྤར་བྱེད་པས་སོར་བཞིས་མཐོ་བར་བྱེད་པའི་ས་གཞི་དང་། དབང་ཕྱུག་ནི་རྒྱལ་ཆེན་རིས་བཞི་པ་དང་། སུམ་ཅུ་རྩ་གསུམ་པའི་ལྷ་དང་། ཀླུ་དང་། མིའམ་ཅིའི་མགོ་བོའི་ཅོད་པན་གྱི་ནོར་བུ་མརྒད་ལ་སོགས་པའི་འོད་ཀྱིས་བརྒྱ་བྱིན་གྱི་རྐང་པ་ལ་གཏུགས་པ་དེའི་འོད་ཀྱིས་རྐང་པའི་ཆུ་སྐྱེས་ཀྱང་དམར་པོར་གྱུར་པའི་ཁེངས་དྲེགས་ཅན་དེ། སླར་དམྱལ་བའི་འཇིག་རྟེན་དུ་ལྕགས་ཀྱི་གསལ་ཤིང་ཚེར་མ་ཅན་ལ་རྒྱུ་བའི་གནས་འཐོབ་པ་ཡོད་དེ། སློབ་སྤྲིང་ལས། རྐང་བཞག་ནེམས་དང་འཕར་བྱེད་རེག་ན་བདེ་བ་ཡི། །རི་རབ་སྤོ་ཡི་དཀྱིལ་དུ་ཡུན་རིང་གནས་ནས་ཀྱང་། །ཕྱིར་ཡང་བྱེ་མ་བསྲེགས་པའི་མེ་མ་མུར་གྱི་ཚོགས། །བརླ་དང་རྐང་ལག་ཀུན་ཏུ་ཞིག་པར་འཁྱམས་པར་འགྱུར། །ཞེས་དང་། གང་དུ་ལྷ་ཀླུ་མིའམ་ཅི་ཡི་མགོ་རྒྱན་གྱིས། །འོད་ཀྱི་ཚོགས་ཀྱི་རྐང་རྟེན་དམར་བའི་བརྒྱ་བྱིན་ཡང་། །ལས་ཀྱི་རླུང་འཁྲུགས་འགྲོ་བ་ངན་པར་འགྲོ་འགྱུར་བ། །དེ་ལ་སྐྱེས་བུ་སུ་ཞིག་འཇིགས་པ་བསྟེན་མི་བྱེད། །ཅེས་སོ། །ཡང་འདོད་པའི་ཉེས་དམིགས་དང་ལྗོན་ཤིང་དང་། གཞལ་ཡས་ཁང་ལ་ཆགས་པའི་ཉེས་པ་སྟོན་པ་ནི། མཐོ་རིས་བུ་མོའི་ནུ་མ་གསར་པ་ལ། །རེག་པའི་འཁྲི་ཤིང་བསྟེན་དེ་དགའ་ཚལ་དང་། །གཞལ་མེད་ཁང་མཛེས་མུ་ཏིག་དྲྭ་ཕྱེད་ཅན། །སྤངས་ནས་མེ་མུར་འོབས་ནང་སྤྱིའུ་ཚུགས་ལྷུང་། །འདི་ལྟར་མཚེའུ་དལ་གྱིས་འབབ་པར་ལྷའི་བུ་མོ་འདོད་པའི་སྒྱུ་རྩལ་དྲུག་ཅུ་རྩ་བཞི་ལ་བྱང་ཆུབ་པ་རྣམས་ཀྱི་ནུ་མ་ལ་རེག་པའི་བདེ་བ་ཉམས་སུ་མྱོང་ཞིང་། དགའ་བའི་ཚལ་དུ་དཔག་བསམ་གྱི་ཤིང་བཟའ་བཏུང་དང་། གོས་དང་། རྒྱན་དང་། རོལ་མོའི་བྱེ་བྲག་འབྱུང་བ་རྣམ་པ་བཞི་དང་། གཞལ་མེད་ཁང་བཟངས་མུ་ཏིག་གི་དྲྭ་བ་དང་། དྲྭ་བ་ཕྱེད་པ་ཅན་སྟེང་གཡོགས་ནས་དྲིལ་བུའི་སྒྲ་སྙན་པར་སྒྲོག་པ་རྣམས་ལ་འཕྲལ་ཐབས་གློངས་པ་སྟེ་ཕུན་སུམ་ཚོགས་པའི་དྲེགས་པ་དེ་ཡང་དབང་མེད་དུ་སྤངས་ནས་མེ་མུར་གྱི་འོབས་དང་། རལ་གྲི་ལྟ་བུའི་ནགས་ཚལ་དང་། ཆུ་བོ་རབས་མེད་དང་། སྐྱབས་མེད་པའི་མུན་ནག་འཐིབས་པོར་ལྷུང་བའི་ཚུལ། སྔ་མ་ལས། ལྷའི་བུ་མོ་དལ་གྱིས་འབབ་པའི་ཆུ་རྒྱུན་གྱིས། །འཕྲལ་ཐབས་གློངས་པ་རྣམས་དང་ལྷན་ཅིག་རྩེ་མྱོང་ནས། །ཕྱིར་ཡང་ཆུ་བོ་རབས་མེད་དབའ་དྲག་འབོགས་པ་ཡིས། །རྨས་པའི་སྡུག་བསྔལ་མི་བཟད་བསྟེན་པར་བྱ་དགོས་སོ། །ལྷ་ཚལ་དཔག་བསམ་ཤིང་ལོའི་གདིང་བ་ཀུན་བཀྲམ་པར། །ལྷ་ཡི་བུ་མོ་དང་བསྟེན་བདེ་བར་གནས་ནས་ཀྱང་། །ཕྱིར་ཡང་མཚོན་རྣོན་མང་པོ་འབབ་པས་ལུས་དབད་པ། །ལོ་མ་རལ་གྲི་ལྟ་བུའི་ནགས་ཚལ་བགྲོད་དགོས་སོ། །དྲིལ་བུ་མཛེས་འཁྲོལ་མུ་ཏིག་ཕྲེང་ཚོགས་ལྷག་གེ་བ། །གཞལ་མེད་ཁང་དུ་ཞུགས་ནས་ལྷ་ཡུལ་བགྲོད་ནས་ཀྱང་། །མི་བཟད་སྐྱབས་མེད་མུན་ནག་ཐིབས་པོ་དཔག་མེད་པ། །ཕ་མཐའ་མེད་པའི་ནང་དུ་སྤྱི་ཚུགས་ལྷུང་བར་འགྱུར། །ཞེས་སོ། །ད་ནི་སྤྱི་མཚན་དུ་སྲོག་ལ་ཆགས་པའི་ཉེས་པ་གཞན་འཕྲུལ་དབང་བྱེད་ཀྱི་བར་ཡོད་པའི་འཆི་འཕོ་ལྟུང་བྱེད་ཀྱི་སྡུག་བསྔལ་བཤད་པ། གོས་སྟན་མེ་ཏོག་རྙིངས་པའི་ལྷ་མོ་དག །རྡུལ་གྱིས་གདོང་པ་བཀྲུ་བའི་ཟོལ་ཞིག་ནས། །ཉེ་དུ་རྣམས་ལ་བལྟ་ཞིང་ངུ་བ་ཡི། །འཆི་འཕོའི་སྡུག་བསྔལ་ལྟ་བུ་མི་ལ་མེད། །འདི་ལྟར་ལྷ་རྣམས་ལ་གནད་འཆད་པའི་ཚོར་བ་མེད་པས་ལུས་ཀྱི་སྡུག་བསྔལ་མེད་མོད་ཀྱིས། འཆི་འཕོ་བའི་སྔ་ལྟས་ལྔ་མཐོང་ནས་སེམས་ཤིན་ཏུ་སྡུག་བསྔལ་བ་སྟེ། ཇི་སྐད་དུ། དེ་ནས་ལྷའི་བུ་ཞིག་སྙིང་རྗེ་རྗེ་སྐད་དུ་ངུ་ཞིང་། ཀྱི་ཧུད་དལ་གྱི་འབབ། ཀྱི་ཧུད་རྫིང་བུ་ཞེས་སྨྲེ་སྔགས་འདོན་ཏོ། །ཞེས་པ་ལྟར་རོ། །དེ་ལ་རྟགས་ལྔ་ནི། སྔོན་གྱི་གཟི་བརྗིད་ཕུན་སུམ་ཚོགས་པ་ལས་ཉམས་ཏེ་ལུས་ཀྱི་མདོག་ངན་པ་དང་། རང་གི་སྟན་ལ་མི་དགའ་བ་དང་། མེ་ཏོག་གི་ཕྲེང་བ་རྙིངས་པ་དང་། གོས་ལ་དྲི་མ་ཆགས་པ་དང་། ལུས་ལ་རྔུལ་འབྱུང་བའོ། །དེའི་ཚེ་ལྷ་ཟླ་བོས་ནི་སྤོང་། ཆུང་མས་ནི་གཞན་དང་ཉལ། འདུ་ཤེས་ནི་འཁྲུག །ཕྱི་མའི་སྐྱེ་གནས་ནི་ལྷའི་མིག་གིས་མཐོང་བས་བསྔངས་ཤིང་བརྒྱལ། མཛའ་བཤེས་རྣམས་ཀྱིས་རྒྱང་རིང་པོ་ནས་བོས་ཏེ་མི་དང་ལྷར་སྐྱེ་བར་སྨོན་ལམ་འདེབས་ཀྱང་འཆི་ལྟས་ཡོད་པ་ལ་ཉེ་ནི་མི་ནུས། དེའི་ཕྱིར་མཐོ་རིས་ཀྱི་བདེ་བའང་སྤྱད་ནས་ཟད་པར་འགྱུར་བའི་སྡུག་བསྔལ་དཔག་ཏུ་མེད་ཕྱིར་བདེ་བ་བས་ཀྱང་སྡུག་བསྔལ་ཆེ་བས་སྲེད་པ་མི་བགྱི་བའི་ཚུལ། བཤེས་སྤྲིང་ལས། དེ་ལྟར་བསམས་ནས་ཡ་རབས་རྣམས་ཀྱིས་ནི། །ཟད་འགྱུར་མཐོ་རིས་སླད་དུ་སྲེད་མི་བགྱི། །ལུས་ཀྱི་ཁ་དོག་མི་སྡུག་གྱུར་པ་དང་། །སྟན་ལ་མི་དགའ་མེ་ཏོག་ཕྲེང་རྙིངས་དང་། །གོས་ལ་དྲི་མ་ཆགས་དང་ལུས་ལ་ནི། །སྔོན་ཆད་མེད་པའི་རྔུལ་འབྱུང་ཞེས་བགྱི་བ། །མཐོ་རིས་འཆི་འཕོ་སྦྲོོན་བགྱིད་སྔ་ལྟས་ལྔ། །ཞེས་སོ། །ཡང་། གཉའ་ཤིང་འཛིན་རིའི་ས་བླ་འགེགས་པ་ཡི། །གདུགས་གྱུར་སྣང་བྱེད་ཆེན་པོ་ཉི་ཟླ་གཉིས། །སླན་ཆད་མུན་པའི་སྨག་གི་བཙོན་ར་རུ། །ལོང་བ་ཆེན་པོའི་གནས་སྐབས་འཐོབ་པར་འགྱུར། །ཞེས་རི་གཉའ་ཤིང་འཛིན་གྱི་ས་བླར་གདུགས་ལྟ་བུར་གྱུར་ནས་གླིང་བཞིའི་འཇིག་རྟེན་ཐམས་ཅད་ཀྱི་མུན་པ་བསལ་བར་ནུས་པའི་སྣང་བྱེད་ཆེན་པོ་ཉི་མ་དང་ཟླ་བ་གཉིས་པོའི་རྟེན་གཞལ་མེད་ཁང་པའི་འོད་ཀྱིས། ཅི་ཞིག་ན་བརྟེན་པ་ལྷའི་བུ་གཉིས་པོ་སྤངས་པའི་ཚེ། འཇིག་རྟེན་སོ་སོའི་བར་དག་ན་ཡོད་པའི་མུན་པའི་སྨག་རུམ་དམ་པོར་བཙོན་བཞིན་དུ་བཅིངས་ནས་རང་གི་ལག་པ་བརྐྱང་བསྐུམ་ཡང་མི་མཐོང་བའི་ལོང་བ་ཆེན་པོའི་གནས་ཐོབ་པ་སྟེ། དེ་སྐད་དུ་བཤེས་སྤྲིང་ལས། ཉི་མ་ཟླ་བ་ཉིད་ཐོབ་རང་ལུས་ཀྱི། །འོད་ཀྱིས་འཇིག་རྟེན་ཐ་དག་སྣང་བྱས་ཏེ། །སླར་ཡང་མུན་ནག་སྨག་ཏུ་ཕྱིན་གྱུར་ནས། །རང་གི་ལག་པ་བརྐྱང་བ་འང་མཐོང་མི་འགྱུར། །ཞེས་སོ། །འདིར་རང་ལུས་ཞེས་བཤད་པ་ནི། འཇིག་རྟེན་པ་རྣམས་ཀྱིས་རྟེན་དང་བརྟེན་པ་གཅིག་པར་འབོད་པའི་སླད་དུ་དགོངས་པའོ། །དེ་ལྟར་ཟག་བཅས་ཀྱི་བདེ་བ་མཐའ་དག་སྡུག་བསྔལ་ཁོ་ནའི་རང་བཞིན་ཅན་ཡིན་ཀྱང་དེ་ལ་ང་རྒྱལ་གྱིས་མངོན་པར་རློམ་པའི་ཉེས་དམིགས་ལས་འཁོར་བའི་སྡུག་བསྔལ་འབའ་ཞིག་ལ་སྤྱོད་པའི་ཚུལ། སློབ་སྤྲིང་ལས། སྡུག་བསྔལ་མེ་ཚོགས་འཕུང་པས་འཇིགས་པའི་འཇིག་རྟེན་འདིར། །སྐྱེ་བོ་བདེ་སྙམ་མངོན་པའི་ང་རྒྱལ་བྱེད་པ་གང་། །དེ་ནི་གཤིན་རྗེའི་ཁ་ཡང་འབྱེད་པར་བྱེད་པ་སྟེ། །དེ་ནི་སྐྱེ་བ་ཕྱི་མའི་ལྗོན་ཤིང་ས་བོན་ཡིན། །ཅེས་དང་། སྡུག་བསྔལ་བདེ་བར་རློམ་པའི་དཔེ་དགོད་པ་ཡང་། དམྱལ་རྣམས་ཟངས་ཆེན་ལྷག་ལྷག་བསྐོལ་བ་ཚ་བའི་ཤུགས་དྲག་ནས། །སྐད་ཅིག་ཙམ་ཞིག་མགོ་བསྟོད་དབུགས་འབྱིན་འགྱུར་པ་རྣམས། །ལྕགས་ཀྱི་ཐོ་བ་རབ་ཏུ་མང་པོ་ཁྲོས་ཏེ་གཟས་པ་ཡིས། །བརྒྱབ་ན་དེ་ཉིད་མཆོག་ཏུ་བདེ་བ་ཡིན་པར་སེམས་པ་ལྟར། །ཞེས་དམྱལ་བའི་ཟངས་ཆེན་དུ་བཙོས་པའི་སྡུག་བསྔལ་ཧ་ཅང་དྲག་ཐལ་ནས་མགོ་གྱེན་དུ་འཐོན་ནས་དབུགས་འབྱིན་པའི་རེས་གཅིག་ལ། ད་ནི་ཤི་ན་ཅི་མ་རུང་སྙམ་པས་མགོ་ལ་ཐོ་བ་བསྣུན་པའང་བདེ་བར་བསྒོམ་པ་བཞིན་དོན་དེ་དང་འདྲ་བར་སྦྱར་བ་མྱ་ངན་ལས་འདས་པ་མ་ཐོབ་ཀྱི་བར་ལ་སྡུག་བསྔལ་འབའ་ཞིག་གིས་གཟིར་བ་ལས། རེ་ཞིག་ཙམ་ཞིག་ལྷ་དང་མིར་སྐྱེས་ནས་ཇི་ཞིག་ལྟར་བསགས་པའི་དབང་གིས་ངན་འགྲོའི་སྐྱེ་ཤིའི་འཁྲུལ་འཁོར་མེད་པའི་སྐད་ཅིག་སྟེ། བདེ་འགྲོར་གནས་པའི་རིང་ངན་འགྲོའི་སྡུག་བསྔལ་མེ་ལྕེ་ལྟ་བུ་གཉུག་མར་བཟོད་དཀའ་བ་ཞི་བར་འགྱུར་ན། ལྷ་དང་མིའི་འདོད་པའི་ཡོན་ཏན་ཁམ་འགའ་ལ་སྲེད་པ་ལྟ་བུ་སྟེ་སྔ་མའི་འཕྲོར། དེ་བཞིན་སྡུག་བསྔལ་མི་བཟད་པ་ཡིས་དབང་མེད་རྟག་གཟིར་ཞིང་། །རེ་ཞིག་ཙམ་ཞིག་ཇི་ཞིག་ལྟར་ཏེ་སྐྱེ་ཤིའི་འཁྲུགས་མེད་ནས། །སྐད་ཅིག་སྡུག་བསྔལ་གཉུག་མར་བཟོད་དཀའ་མེ་ལྕེ་གཞིལ་འགྱུར་ན། །འཇིག་རྟེན་ཐམས་ཅད་བདེ་བ་ཁམ་འགའ་ལ་ཡང་སྲེད་པར་བྱེད། །ཅེས་སོ། །ལྷའི་གནས་རིགས་དེ་དག་གི་རྒྱུ་འབྲས་ཀྱང་། དྲན་པ་ཉེར་བཞག་ལས་བཏུས་པར། གང་ཞིག་བདག་མེད་མི་འདོད་ཅིང་། །ཡོངས་སུ་བཟུང་ལ་མི་དགའ་བར། །དེ་ནི་བཟའ་རྣམས་དག་གི་མཆོག །རྒྱལ་ཆེན་བཞི་པ་དག་ཏུ་འགྱུར། །ཕ་མ་ཕ་ཚན་གཙོ་བོ་ལ། །བཀུར་བྱེད་བསྟོད་ལྡན་བཟོད་པར་བྱེད། །འཐབ་མོ་ལ་ནི་དགའ་བ་དང་། །དེ་ནི་སུམ་ཅུ་རྩ་གསུམ་སྐྱེ། །རྩོད་དང་འཐབ་མོར་མི་དགའ་ཞིང་། །གཅིག་ཏུ་དགེ་ལ་བརྩོན་པ་གང་། །དེ་དག་འཐབ་བྲལ་ཉིད་དུ་འགྲོ། །ཐོས་པ་མང་དང་ཆོས་འཛིན་དང་། །ཤེས་རབ་ལྡན་ཞིང་ཐར་པ་འདོད། །ཡོན་ཏན་དགའ་རྣམས་དགའ་ལྡན་འགྲོ། །རང་ཉིད་དུལ་བ་ལ་ཞུགས་ཤིང་། །ཚུལ་ཁྲིམས་འབོགས་པར་སྤྲོ་བ་གང་། །གདོན་མི་ཟ་བར་འཕྲུལ་དགར་འགྲོ། །སེམས་ཅན་གང་དག་སྨན་མིན་མཆོག །སྦྱིན་དང་དུལ་དང་ཡང་དག་སྡོམ། །ཕུལ་བྱུང་ཡོན་ཏན་ལྷག་གྱུར་དེ། །ངེས་པར་གཞན་འཕྲུལ་དབང་བྱེད་དོ། །ཚུལ་ཁྲིམས་ཀྱིས་ནི་མཐོ་རིས་ཐོབ། །བསམ་གཏན་གྱིས་ནི་ཁྱད་པར་འགྱུར། །ཡང་དག་ཇི་བཞིན་ཡོངས་ཤེས་པས། །མཐར་ནི་ཡང་སྲིད་མེད་པར་འགྱུར། །ཞེས་ཚིག་སྣ་ཅུང་ཟད་བསྟུངས་སོ། །ལྷ་མ་ཡིན་གྱི་སྡུག་བསྔལ་བཤད་པ་ནི། ལྷ་ཡི་དཔལ་ལ་སྡང་བའི་ཕྲག་དོག་གི། །དགྲ་སྟས་རང་སྙིང་ཚལ་པར་བཀས་ནས་སླར། །དཔུང་པ་གཏུམ་པོའི་གཡུལ་ངོར་བདག་ཉིད་ཀྱི། །མགོ་དང་ཡན་ལག་བཏུབས་པས་ལྷ་མིན་མནར། །འདི་ལྟར་ལྷ་མ་ཡིན་རྣམས་ལ་ནི་རང་བཞིན་གྱིས་སྙེམས་པའི་ང་རྒྱལ་ལས་སྐྱེས་པའི་ང་རྒྱལ་ཡོད་པས་ན་ཉོན་མོངས་པས་ཀུན་ནས་ཉོན་མོངས་པའི་སྡུག་བསྔལ་དང་། ཁྱད་པར་ལྷའི་དཔལ་ལ་སྡང་བའི་ཕྲག་དོག་གིས་ཡིད་གདུང་ཞིང་ལྷ་དང་གཡུལ་འགྱེད་པའི་སྡུག་བསྔལ་ཡོད་དོ། །རྒྱུ་གང་གིས་ན་དྲན་པ་ཉེར་གཞག་ནས་ནི་འཛམ་བུའི་གླིང་པ་རྣམས་ཀྱིས་བསོད་ནམས་མ་ཡིན་པའི་ལས་སྟོབས་ཆེན་པོ་བསགས་པ་དང་། ས་སྡེ་ལས་ནི་ལྷ་རྣམས་ལྷ་མིན་གྱི་བུ་མོ་ལ་བལྟ་བའི་ཕྲག་དོག་དང་། ལྷ་མིན་རྣམས་ཀྱིས་ལྷའི་བདུད་རྩི་ལ་ཆགས་པའི་དབང་གིས་དང་། མདོ་གཞན་དག་ལས་ནི་ལྷའི་དཔག་བསམ་གྱི་ཤིང་མེ་ཏོག་དང་འབྲས་བུས་བརྒྱན་པ་མཐོང་ནས་ཁྲོས་ཏེ། ཤིང་འདིའི་དཔལ་ཕུན་སུམ་ཚོགས་པ་ནི་ལྷའི་དབང་དུ་གྱུར་ན། རྩ་བ་བདག་ཅག་གི་གནས་སུ་དོན་མེད་དོ་ཞེས་སྟ་རེས་བཅད་པར་བྱེད་པ་ལས་རྩོད་པ་འབྱུང་བར་སྟོན་ཏོ། །དེ་ལ་དང་པོར་སྲིད་སྡེ་སོ་སོར་བཅད་ནས་འཐབ་པ་ནི། དགའ་བོ་དང་ཉེར་དགའ་ལ་སོགས་དཀར་པོའི་ཕྱོགས་ཀྱི་ཀླུ་བརྒྱད་དང་། ཧུ་ལུ་དང་། ཧུ་ལུ་ཀ་ཆེན་པོ་སོགས་ནག་ཕྱོགས་པ་བརྒྱད་འཐབ་ཅིང་རྩོད་པ་ལས་གང་རུང་གཅིག་ཕམ་པ་དེས་རང་རང་གི་ཕྱོགས་ལ་གནས་པའི་བར་སྣང་གི་ལྷ་དག་སྦྲོན་ནོ། །སྦྲན་ནས་འཐབས་པ་དེའི་ཚེ་ནག་ཕྱོགས་ཀྱི་ཀླུ་ཕམ་ན་ཆུ་མཚམས་ཀྱི་སྒྲ་གཅན་ཡང་སྦྲན་ནས་འཐབ་བོ། །གང་དུ་སྒྲ་གཅན་རྒྱལ་བར་གྱུར་ན་དཀར་ཕྱོགས་ཀྱི་ཀླུ་དང་བར་སྣང་གི་ལྷས་རྒྱལ་ཆེན་རིགས་བཞིའི་དཔུང་རྣམས་སྦྲན་ཏེ། དེ་དག་གི་སྡེ་རིས་ཐམས་ཅད་གོ་ཆ་སྲ་བར་གྱོན་ནས་འཐབ་པ་ལས། ལྷ་མ་ཡིན་གྱི་དཔུང་རྣམས་ཕམ་པར་གྱུར་པ་དེའི་ཚེ། དཀར་ཕྲེང་གི་གནས་ནས་མགུལ་ཕྲེང་ཅན་ཡང་ལྷ་མ་ཡིན་གྱི་དཔུང་དང་ཕྱོགས་གཅིག་འཐབ་པ་ལས་ཀྱང་ཕམ་ནས་ཐགས་བཟངས་རིས་ལ་སྒྲོན་ནོ། །དེའི་ཚེ་ཐགས་བཟངས་རིས་ཁྲོས་ནས་གསེར་གྱི་ས་གཞི་ལ་རྐང་པ་བརྡབས་པས་ས་ཆེན་པོ་འདི་གཡོ་ཞིང་རི་རབ་ཀྱང་འགུལ་ལ། ལྷའི་དབང་པོའི་སྟན་ཡང་གཡོའོ། །དེར་དབང་པོས་བསམས་པ། ཅི་འདི་ལྟར་ས་གཡོ་བའི་རྒྱུ་ནི་བྱང་ཆུབ་སེམས་དཔའ་ས་ནས་སར་འཕགས་སམ། དེ་བཞིན་གཤེགས་པའི་སྤྲུལ་པས་འཇིག་རྟེན་དུ་ཆོ་འཕྲུལ་མཛད་དམ། བསོད་ནམས་མ་ཡིན་པ་རླབས་པོ་ཆེའི་ལས་མཐུན་པའམ། ལྷ་མ་ཡིན་གྱི་དབང་པོ་གཡུལ་གྱི་བྱ་བ་ལ་ཞུགས་སམ་སྙམ་དུ་ལྷའི་མངོན་ཤེས་ཀྱིས་བརྟགས་པ་ན། གཡུལ་འགྱེད་པར་ཤེས་ནས། འདུན་ས་ཆོས་བཟངས་སུ་འདུས་ནས་བསྒོ་བ། ལྷ་གང་དག་ཚེའི་ལྷག་མར་གྱུར་ཅིང་འཆི་བའི་ལས་བདག་གིར་བྱེད་པའི་དུས་ལ་བབ་པ་རྣམས་རང་གནས་སུ་འདུག་ཅིག །དེ་ལས་གཞན་པ་རྣམས་གཡུལ་གྱི་བྱ་བ་ལ་སྤྲོ་བར་གྱིས་ཤིག །ཅེས་སྨྲས་ནས་བྱང་ཕྱོགས་དགའ་བའི་ཚལ་དུ་སོང་སྟེ་ལྗོན་པའི་ནང་ན་ཡོད་པའི་གཟིམས་ཁྲི་ལ་བལྟས་ནས། གཡུལ་རྒྱལ་བའི་མཚན་མ་རྣམས་ཁོང་དུ་ཆུད་པར་བྱེད་དོ། །དེ་ནས་ལྷའི་ཚོགས་དེ་དག་རྩུབ་འགྱུར་གྱི་ཚལ་དུ་སོང་ནས་དེའི་རྫིང་བུར་ཞུགས་པ་ཙམ་གྱིས་ཞེ་སྡང་གི་ཀུན་ཏུ་རྟོག་པ་གསར་དུ་ཐོབ་ནས་གཡུལ་གྱི་བྱ་བ་ལ་སྤྲོ་བར་གྱུར་པ་དང་། དེའི་ཤར་ཕྱོགས་གོ་ཆའི་ཚལ་ནས་ཤིང་ལྗོན་པ་དག་ལས་རིན་པོ་ཆེ་སྣ་ཚོགས་ཀྱི་གོ་ཆ་ཤིན་ཏུ་སྲ་བ་བྱུང་བ་དག་བགོས་ཏེ། གཡུལ་ངོར་སྤྱོད་པའི་གླང་པོ་ཆེ་རབ་བརྟན་ལུས་དཔག་ཚད་བདུན་པ་ལ་བཞོན་པར་བྱས་ནས། མགོ་སུམ་ཅུ་རྩ་གསུམ་གྱི་སྟེང་དུ་དུས་ད་ལྟ་བའི་ལྷའི་དབང་པོ་ནི་མིག་མཛེས་ཞེས་བྱ་བ་སྟེ། བྱང་ཆུབ་དང་། སྟོབས་མཆོག་ལ་སོགས་པའི་ནོར་ལྷ་བརྒྱད། ཚོགས་བདག་དང་། བྷྲིང་གི་རི་ཏི་ལ་སོགས་པའི་གྲོགས་བཅུ་གཉིས། དགའ་བ་དང་། ཉེར་དགའ་ལ་སོགས་ཉི་མའི་བུ་བཅུ་གཉིས་ཏེ་ཉེ་དབང་སོ་གཉིས་པོ་གནས་ཤིང་མགོ་བོ་རེ་རེའང་བདུན་བདུན་དུ་སྤྲུལ་པའི་སྟེང་ན་ལྷའི་དཔུང་དེ་སྙེད་དང་། མགོ་བོ་དེ་དག་ལ་མཆེ་བ་བདུན་བདུན་སྤྲུལ་ནས་མཆེ་བ་རེ་རེ་ལ་སྐྱེད་མོས་ཚལ་དང་རྫིང་བུ་བདུན་བདུན། དེ་ན་ལྷའི་བུ་མོ་ཤིན་ཏུ་མཛེས་པ་གླུ་གར་བྱེད་པ་བདུན་བདུན། དེ་རེ་རེ་ལ་བྲན་མོ་བདུན་བདུན། དེ་རེ་རེ་ལ་སིལ་སྙན་བདུན་བདུན་དུ་སྤྲུལ་ནས་རི་རབ་ཀྱི་ནུབ་ངོས་ཆུ་མཚམས་ལ་ཐུག་པར་བསུས་ནས་གཡུལ་སྤྲོད་པ་ལས། ལྷ་མ་ཡིན་སྟོབས་ཅན་འདོད་ཆགས་ཅན་དག་ནི་དབང་པོའི་མདུན་དུ་དགའ་མའི་སྒྱུ་རྩལ་ཁོ་ནས་སེམས་མྱོས་པའི་མོད་ལ། ལྷའི་རྡོ་རྗེ་དང་འཁོར་ལོ་ལ་སོགས་པས་འཇོམས་པར་འགྱུར་རོ། །དེའི་ཚེ་ལྷ་རྣམས་བསོད་ནམས་ཀྱི་མཐུས་མི་འགྲེང་བདུན་ཚན་དུ་ལྷ་མ་ཡིན་ལས་འཕགས་ཤིང་། ཉི་ཟླའི་ངོས་ནས་རྡོ་རྗེ་དང་། འཁོར་ལོ་དང་། མདའ་དང་། གཏུན་ཤིང་དང་། རི་རབ་ལ་སོགས་པ་འཕེན་པས་ལྷ་མ་ཡིན་རྣམས་འཇོམས་པར་བྱེད་དོ། །ལྷ་མ་ཡིན་རྣམས་ཀྱང་གླང་པོ་ཆེ་དང་། རྟ་དང་། ཤིང་རྟ་དང་། དཔུང་གི་ཚོགས་ཡན་ལག་བཞི་པ་དང་ལྷན་ཅིག་འོང་སྟེ། རྡོ་རྗེ་དང་། མདའ་བོ་ཆེ་དང་། ཤག་ཏི་དང་། རི་རབ་དང་། འཁོར་ལོ་ལ་སོགས་པས་ལྷ་རྣམས་འཇོམས་པ་ལ་བརྩོན་ཀྱང་། ཐགས་བཟངས་རིས་ཀྱི་ཤིང་རྟ་དཔག་ཚད་བདུན་པ་མྱུར་དུ་འགྲོ་བ་དེའང་དབང་པོའི་ལག་པ་གཡོན་པས་འཛིན་པར་ནུས་ཤིང་། དེ་དག་གིས་རི་རབ་འཕངས་པ་དག་ཀྱང་བརྒྱ་བྱིན་གྱི་རྡོ་རྗེས་དུམ་བུར་བྱས་པ་རོལ་མཚོར་ལྷུང་བ་ལས་སྲོག་ཆགས་དུ་མ་ཤི་ནས་རོལ་མཚོའང་དམར་པོར་འགྱུར་རོ། །དེའི་ཚེ་ལྷ་རྣམས་ནི་མགོ་བོ་ཆད་པ་མ་གཏོགས་ཡན་ལག་གཞན་ཆད་པའང་འཕྲལ་དུ་སྐྱེ་ཞིང་རྨ་མེད་ལ། ལྷ་མ་ཡིན་རྣམས་ནི་མི་བཞིན་དུ་གནད་དུ་ཕོག་ཚད་འཆི་བར་འགྱུར་རོ། །དེ་ལྟ་ནའང་སྒྲ་གཅན་གྱི་ལུས་ཆད་པར་རིག་བྱེད་ཀྱི་གཞུང་ལས་བཤད་པར་དཔགས་ནས་ལྷ་མ་ཡིན་གཞན་པ་རྣམས་ལ་དེའི་རིགས་པ་བསྒྲེ་བ་ནི་འཐད་པ་མ་ཡིན་ནོ། །དུས་དེར་ས་རྣམས་གཡོ། མཚོན་ཆའི་རི་རབ་རྣམས་རྡུལ་དུ་སོང་བས་འཛམ་བུའི་གླིང་ལ་སོགས་པའི་ནམ་མཁའ་རྡུལ་གྱིས་འཁྲིགས། གོ་ཆའི་འོད་གདངས་འཚེར་བ་དང་། སྒྲ་ཆེན་པོ་ནི་སྒྲོགས། སྒྲ་གཅན་དུད་འགྲོ་ཡིན་པས་དེའི་མིག་གིས་ཉི་ཟླའི་ཟེར་མི་བཟོད་ནས་ལག་པས་བསྒྲིབ་པས་ཉི་ཟླ་གཟས་ཟིན་པ་ཞེས་དྲན་པ་ཉེར་གཞག་ལས་བཤད་དོ། །དུས་འཁོར་ལ་སོགས་པའི་རྒྱུད་ལས་ནི་གདོང་མཇུག་གིས་བསྒྲིབ་པར་འདོད་པས་དུས་མེ་འཇུག་པ་ཞེས་ཀྱང་བྱ། གཞུང་ལ་ལར་ཁར་ཟོས་པ་ཨོལ་པར་དོན་པའོ། །ཞེས་ཀྱང་ཟེར་རོ། །དུས་ཚོད་དེར་བསོད་ནམས་ཀྱི་ཁྱད་པར། ཟླ་བའི་མདོར། དེ་དག་གཟས་ཟིན་པ་ན་ཟླ་བར་འབུམ་དང་། ཉི་མ་ལ་བྱེ་བའི་འགྱུར་བཤད་དོ། །དེ་ལྟ་མོད་ཀྱི་ས་གཡོ་བ་དང་། སྒྲ་འོད་དང་། ཉི་ཟླ་འཛིན་པ་ལ་སོགས་པའི་རྒྱུ་བྱང་ཆུབ་སེམས་དཔའ་ས་འཕར་བ་དང་། སྐུ་བལྟམས་ཞུགས་གཤེགས་པ་ལ་སོགས་དང་། དགེ་མི་དགེའི་ལས་རླབས་པོ་ཆེ་དང་། སངས་རྒྱས་ཀྱི་སྤྲུལ་པའི་ཆོ་འཕྲུལ་དང་། ལྷ་གནས་རྒྱ་ཆེར་བསྐྱེད་པ་དང་། གཡུལ་འགྱེད་པའི་མཚན་མ་ལས་བྱུང་ཞིང་། ཉི་ཟླ་འཛིན་པའང་དུས་ཀྱི་འཁོར་ལོ་དང་། བྱེད་པའི་ལག་རྩིས་ཀྱི་བརྟག་པ་ཅན་དུའང་གཏན་ལ་ཕེབས་པའི་ཕྱིར་དྲང་ངེས་ཀྱི་རྣམ་གཞག་ཕྱིན་ཅི་མ་ལོག་པར་ཤེས་པར་བྱའོ། །དེ་བཞིན་དུ་ས་གཡོ་བའང་དགེ་མི་དགེ་ལས་འབྱུང་བ་སྔར་བཤད་ཟིན་ལ། ཡང་ཉ་བོ་ཆེ་འདྲེ་ལྡོག་པ་ལས་འདོད་པའང་འཇིག་རྟེན་གྱི་གྲགས་ཚོད་ལྟར་རོ། །དེའང་ལྷ་རྣམས་རྒྱལ་བའི་རྒྱུ་ནི་མི་རྣམས་ཆོས་བཞིན་སྤྱོད་པ་དང་། ཕ་ལ་ཕར་འཛིན་པ་དང་། མ་ལ་མར་འཛིན་པ་དང་། དགེ་སྦྱོང་དང་བྲམ་ཟེ་ལ་དེ་དང་དེར་འཛིན་པ་ལས་འབྱུང་བ་ནི་བདག་ཅག་གི་སྟོན་པའི་ལུགས་ཡིན་ལ། རྒྱལ་བའི་དགེ་མཚན་ཡང་། འཇིག་རྟེན་གྱི་ཁམས་སུ་ཆར་འབབ་པ་དང་། ལོ་ལེགས་པ་དང་། ནད་འཁྲུག་མེད་པ་ལ་སོགས་སུ་མངོན་ནོ། །ལྷ་མ་ཡིན་རྣམས་རྒྱལ་ན་དེ་ལས་ལྡོག་པ་རྣམས་འབྱུང་བས་ན་རྟག་ཏུ་ལས་འབྲས་ལ་ཡིད་ཆེས་པར་བྱའོ། །སྤྱིར་བསོད་ནམས་ཀྱི་སྟོབས་ཀྱིས་ལྷ་རྣམས་ཕལ་ཆེར་རྒྱལ་བ་ཡིན་ཏེ། འཇིག་རྟེན་ན་མི་དགེ་སྤྱོད་པའི་རྒྱུས་རེ་ཞིག་ཕམ་པ་དེའི་ཚེ། རི་རབ་ཀྱི་རྩེ་ལ་ཕྱོགས་ནས་བྲོས་པའི་སླད་བཞིན་དུ་ལྷ་མ་ཡིན་གྱི་དཔུང་རྣམས་སོང་བ་ན། གྲོང་ཁྱེར་བལྟ་ན་སྡུག་གི་སྒོ་འཕར་བཅད། སྐར་ཁུང་ཡང་བཀབ་ནས་ཞག་བདུན་གནས་པའི་ཚེ། ནམ་མཁའ་ལས་ལྷའི་རྔ་བོ་ཆེས། ཀྱེ་ལྷ་རྣམས་ནི་རྒྱལ་བར་འགྱུར་རོ། །ལྷ་མ་ཡིན་རྣམས་ནི་ཕམ་པར་འགྱུར་རོ། །དུད་འགྲོ་དག་བདའ་བར་བྱའོ། །ཅེས་པའི་སྒྲ་བྱུང་མ་ཐག །ལྷ་མ་ཡིན་གྱི་དཔུང་རྣམས་བྱེར་བར་འགྱུར་རོ། །དེའི་ཚེ། ཆུང་མ་རྣམས་ཀྱིས་མཚོ་ཀུན་སྣང་དུ་བལྟས་པས་རང་རང་གི་ཁྱོ་བསད་པའི་གཟུགས་བརྙན་ཤར་བས་ངུ་ཞིང་སྡུག་བསྔལ་ལོ། །ལྷ་མ་ཡིན་རྣམས་ཕམ་པ་དེའི་ཚེ་རི་རབ་ཀྱི་ཁོང་སེང་གསེར་གྱི་ས་བཞི་ལ་ཐུག་པར་བྲོས་པའི་སླད་བཞིན་དུ་ལྷའི་དཔུང་གི་ཚོགས་ཀྱིས་བདས་ནས་གྲོང་ཁྱེར་གསེར་ལྡན་གྱི་སྒོ་ཡང་བསྡམ། སྐར་ཁུང་ཡང་བཅད་དེ་ཞག་བདུན་འདས་པ་ན། ཡང་ལྷ་མ་ཡིན་རྣམས་རྒྱལ་བར་གྱུར་ཅིག །ལྷ་རྣམས་ཕམ་པར་གྱུར་ཅིག་ཅེས་པའི་སྒྲ་ཐོས་ནས་ལྷ་རྣམས་རང་གནས་སུ་ལྡོག་གོ །དེ་ལྟར་གཞན་སྡེ་དང་འཐབ་པའི་ཚེ། ནམ་མཁའི་དཀྱིལ་རལ་བ་ལྟ་བུའི་སྒྲ་དང་། མཚོན་ཆའི་ཆར་མཐོ་དམའ་ཐུག་པར་འབབ་པ་དང་། ལྷའི་གཟི་བྱིན་གྱི་འོད་དང་། སྤྱུགས་པའི་འཐོར་རླུང་ཆེན་པོ་ཐོས་པ་ན། མཐུ་ཆུང་བ་རྣམས་ནི་བརྒྱལ་ནས་འགྱེལ་ཞིང་སྙིང་གས་པ་ལྟ་བུའི་འཇིགས་སྐྲག་དང་། སླར་རང་གི་གནས་ནས་བསྐྲོད་པའི་སྡུག་བསྔལ་དང་། མགོ་དང་ཡན་ལག་ཆད་པ་རྣམས་ནི་གསོན་དུ་རེ་བ་མེད་པའི་སྡུག་བསྔལ་དང་། རང་སྡེའང་འཐབ་ཅིང་རྩོད་པ་དང་། རྟག་པར་སུམ་ཅུ་རྩ་གསུམ་པའི་བདེ་འབྱོར་མཐོང་ནས་དེ་ལ་ཁོང་ཁྲོ་དང་ཕྲག་དོག་གིས་ཡིད་བདེ་བའི་སྐབས་མེད་ཅིང་། ལ་ལར་དགེ་བ་དང་མི་དགེ་བ་ལ་རྣམ་པར་དཔྱོད་པའི་བློ་ཡོད་དུ་ཟིན་ཀྱང་གནས་རིགས་དེའི་འགྲོ་བའི་སྒྲིབ་པས་ཉན་རང་གི་མཐོང་ལམ་ནི་མི་ཐོབ་པའི་ཕྱིར་མགོན་པོ་ཀླུས། ལྷ་མིན་དག་ནའང་རང་བཞིན་གྱིས་ལྷ་ཡི། །དཔལ་ལ་སྡང་བའི་ཡིད་ཀྱིས་སྡུག་བསྔལ་ཆེ། །དེ་དག་བློ་དང་ལྡན་ནའང་འགྲོ་བ་ཡི། །སྒྲིབ་པས་བདེན་པ་མཐོང་བ་མ་མཆིས་སོ། །ཞེས་སོ། །དེ་ལྟ་མོད་ཀྱིས་ཐེག་པ་ཆེན་པོའི་སྡེ་སྣོད་ནི་བསམ་གྱིས་མི་ཁྱབ་པས། དེའི་ཚེ་ཆོས་ཀྱི་རྣམ་གྲངས་འདི་བཤད་པ་ན་ལྷ་དང་། ཀླུ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་བགྲང་བ་ལས་འདས་པ་དག་གིས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་ཐོབ་བོ། །ཞེས་དཀོན་མཆོག་བརྩེགས་པ་ལས་བཤད་པ་ལྟར་རོ། །དེར་སྐྱེ་བའི་རྒྱུ་འབྲས་ཀྱང་ལྷ་མ་ཡིན་གྱི་རབས་ལས། རྟག་ཏུ་གཡོ་དང་སྒྱུ་སྤྱོད་ཅིང་། །སྡིག་པ་དག་ནི་མ་བྱས་ལ། །འཐབ་ལ་དགའ་ཞིང་སྦྱིན་བྱེད་པ། །དེ་ནི་ལྷ་མིན་དབང་ཕྱུག་འགྱུར། །ཞེས་སོ། །ད་ནི་མིའི་སྡུག་བསྔལ་བཤད་པ་ལ། སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་ཏེ་རྩ་བའི་སྡུག་བསྔལ་ཆེན་པོ་གསུམ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། དགྲ་མི་སྡུག་པ་དང་ཕྲད་པ་དང་། གཉེན་སྡུག་པ་དང་བྲལ་བ་དང་། འདོད་པ་ཐོག་ཏུ་མ་ཕྱིན་པ་དང་། ཉེ་བར་ལེན་པའི་ཕུང་པོ་ལྔས་སྡུག་བསྔལ་གྱི་མཚན་ཉིད་འཛིན་པས་རྣམ་པ་བརྒྱད་ཀྱིས་རྟག་ཏུ་མནར་བ་ལས། སྡུག་བསྔལ་གྱི་སྡུག་བསྔལ་བཤད་པའི་ཕྱིར། འཚོ་བ་ཆུ་བུར་ལྟ་བུར་གཡོ་བ་ཡི། །མི་དག་ཡིད་མི་བདེ་དང་འཁྲུགས་པ་སོགས། །སྡུག་བསྔལ་སྔ་མས་ཕྱི་མ་ཉེ་བར་ལེན། །མཛེ་ཅན་ཕོལ་གྱི་ཐོག་ཏུ་རྨས་གཏུགས་བཞིན། །འདི་ལྟར་སྐྱེས་བུ་ཤེས་ལྡན་དག་ནི་སྔོན་བསྐལ་པ་བཟང་པོར་གྱུར་པ་དང་། སྒྲ་མི་སྙན་ལ་སོགས་པའི་མིའི་འགྲོ་བ་གཞན་ལ་ལྟོས་ན་ལྷོ་གླིང་འདི་ཡིད་ལྟ་བའི་གནས་སྐབས་ཀྱི་ཚེའི་སྙིགས་མ་ཆུའི་ལྦུ་བ་ལྟར་མི་རྟག་པ་ཉིད་ལའང་རང་བཞིན་གྱི་སྐྱོ་བའི་སྡུག་བསྔལ་དང་མི་འབྲལ་བའི་སྟེང་། གློ་བུར་དུ་ནད་དང་། གདོན་དང་། དགྲ་དང་། འབྱུང་བའི་གནོད་པ་ལ་སོགས་པའི་སྡུག་བསྔལ་དུ་མས་བརྩེགས་པ་ཆོས་ཅན། དེ་ལྟ་ནའང་ཕལ་ཆེར་མ་བརྟགས་པ་ཉིད་ཀྱི་ཕྱིར་ཕྱི་མའི་གནས་སྐབས་མཐོང་བ་ལ་སྡུག་བསྔལ་བ་མེད་ཀྱང་ནད་ཀྱིས་མནར་བའི་སྟེང་དུ། གཅན་གཟན་གྱིས་ཟ་བར་ངེས་པ་ལྟ་བུ་འམ། མཛེ་ཐོག་ཏུ་ཕོལ་གྱི་ཟུག་རྔུས་བརྩེགས་པ་ལྟ་བུའོ། །འགྱུར་བའི་སྡུག་བསྔལ་ནི། མངོན་མཐོའི་ཡོན་ཏན་རྫོགས་པའི་སྐྱེད་ཚལ་དུ། །འདོད་པའི་རོ་ལ་གདུང་བ་དུག་ཅན་གྱི། །བཟའ་བས་རྣམ་པར་རྨ་བབ་དཀའ་ཐུབ་ལུས། །མིག་འཕྲུལ་ལྟ་བུར་ཐོབ་འདི་འགྱུར་བ་ཅན། །སྐྱེས་བུ་གང་ཞིག་སྐྱེད་མོས་ཚལ་ལམ། ཁང་བཟངས་ལ་སོགས་པའི་ནང་དུ་རྩེད་འཇོ་དང་གླུ་གར་གྱིས་བག་ཕེབས་བདོ་བའི་མོད་ལ་གྱུར་པའམ། སྦྱར་བ་ལས་བྱུང་བའི་དུག་ཅན་གྱི་བཟའ་བཏུང་ཚབས་པོ་ཆེ་ཁོང་དུ་ཆུད་པས། ལུས་ཀྱི་མདངས་ཉམས། མིག་གི་འཕང་སྨད། མལ་དུ་འདྲེ་ལྡོག་པའི་དཀའ་ཐུབ་ཀྱིས་ལུས་རིད་པོ་ཡུད་ཙམ་ལ་ཐོབ་ནས་སྡུག་བསྔལ་བའམ། སྒྱུ་རྩལ་ལ་སྤྲོ་བའི་ལུས་སྒྱུ་རྩལ་ཉིད་ཀྱིས་བདེ་བླག་ཏུ་རྨ་བབ་པ་ལྟ་བུའོ། །འདུ་བྱེད་ཀྱི་སྡུག་བསྔལ་ནི་ཀུན་ལ་ཁྱབ་པ་ཅན་ཏེ། རྐང་པའི་རེག་པ་ཁུར་དུ་མི་བཟོད་པའི། །ངལ་བཅས་སེམས་ཀྱིས་གླང་པོའི་གཉར་འཛེགས་ཀྱང་། །དེ་ཡི་བསམ་པ་རྩེ་དགས་རྒོད་གྱུར་ནས། །གཡང་སར་སྨད་པ་འདུ་བྱེད་སྡུག་བསྔལ་མཚོན། །དོན་འདི་ལ་ནི་སྐྱེས་པ་རབས་ཀྱི་རྒྱུད་དང་དཔེ་སྦྱར་ཏེ། འོད་ལྡན་ཞེས་བྱ་བའི་རྒྱལ་པོའི་ཁབ་ཏུ་རྒྱལ་པོ་རབ་གསལ་གླང་པོའི་གཉའ་བ་ལ་འཛེགས་པར་སྤྲོ་བ་བཏེགས་ནས་གླང་པོ་ཆེ་འདུལ་སྦྱོོང་མཁན་ལ་སྨྲས་པ། ཀ་ཡེ་ཤེས་པར་གྱིས་ཤིག །གླང་པོའི་མཆོག་འདི་ནི་བདག་ཅག་གི་རྐང་པ་ས་ལ་རེག་པར་མི་བཟོད་པའི་བསོད་ནམས་ཀྱི་མཐུས་འཐོབ་ན་ཁྱོད་ཀྱིས་འདི་ཉིད་འདུལ་བ་འཛིན་དུ་ཆུག་ཅིག །དེས་ཀྱང་ལྷ་བཀའ་བཞིན་འཚལ་ལོ་ཞེས་ཁས་བླངས་ནས། ལྕགས་ཀྱི་ཐོ་ལུམ་མེ་འབར་བའང་སྣས་ཚམ་ཚོམ་མེད་པར་ལེན་པའི་བསྒོ་བ་ཉན་པ་དེ་སྲིད་དུ་འདུལ་བ་འཛིན་པར་བྱས་སོ། །དེ་ནས་རྗེ་འབངས་གཉིས་གླང་པོའི་གཉའ་བ་ལ་ཞོན་ནས་ཡུལ་ཉེ་བར་སྤྱོད་པའི་སྐྱོ་སངས་ལ་སྤྲོ་བཞིན་དུ་བཏེག་པ་ན་བདག་ཉིད་ལ་སྡུག་བསྔལ་བསྒྲུབ་པའི་རྒྱུ་ཐམས་ཅད་བལྟར་མི་མངོན་པ་འདུ་བྱས་པ་ཉིད་ཀྱི་ཕྱིར་དང་། གླང་པོ་ཆེ་གང་དག་ནི་ཐུབ་པ་མཆོག་གིས་ཉོན་མོངས་པ་འདུལ་བའི་སྡོམ་པས་སེམས་མ་དུལ་ལ། འདུལ་སྦྱོང་མཁན་གྱི་ལྕགས་ཀྱུས་ལུས་དུལ་བ་ཙམ་གྱུར་པའི་ཕྱིར་གླང་མོའི་དྲི་བསྣོམ་པའི་རྩེ་དགས་ཡིད་རབ་ཏུ་རྒོད་པར་གྱུར་ནས། ས་གཞི་ཐམས་ཅད་ཤིང་རྟའི་འཕང་ལོ་བསྐོར་བ་ཉིད་དང་འཁྲུལ་པ་བསྐྱེད་པ་ཙམ་དུ་རྒྱུགས་པས་རྒྱལ་པོ་རབ་གསལ་ཉིད་སྲོག་དང་བྲལ་བ་ལ་ཉེ་བའི་སྡུག་བསྔལ་ཐོབ་པ་ལྟ་བུ་སྟེ། འདུ་བྱེད་ཀྱི་སྡུག་བསྔལ་འདི་ནི་སེམས་ཅན་ཐམས་ཅད་ལ་བལྟར་མི་མངོན་པ་ཉིད་དུ་ཤས་ཆེ་བར་ཡོད་པར་རིགས་པར་བྱའོ། །དེ་ལྟར་རྩ་བའི་སྡུག་བསྔལ་ཆེན་པོ་གསུམ་ནི་སེམས་ཅན་རྣམས་རང་རང་གི་ལས་དང་མཐུན་པར་འབྱམས་པའི་འབྲོག་དགོན་པ་ཆེན་པོ་ལྟ་བུར་གྱུར་ནས། དེར་སྐྱེ་རྒ་ན་འཆི་ལ་སོགས་པ་རྣམ་པ་བརྒྱད་པོས་མི་རྣམས་སྡུག་བསྔལ་བའི་ཚུལ། དེ་ལྟར་སྡུག་བསྔལ་ཉིད་གསུམ་འབྲོག་དགོན་ན། །སྐྱེ་རྒ་ན་འཆིའི་ཚོར་བ་རྣམ་པར་འཁྱམས། །སྨོན་པ་མེད་པའི་མི་སྡུག་དགྲ་དང་ཕྲད། །སྡུག་པ་ཡིད་ལ་གོམས་བྱས་གནས་མིན་ཕྱོགས། །འདོད་པའི་ཡུལ་ལ་འབྱོར་བས་ངོ་ཚར་བྱས། །ཉེར་ལེན་ཕུང་པོའི་སྟེང་དུ་དཀའ་ཐུབ་འདུས། །རྣམ་པ་བརྒྱད་ཀྱི་སྡུག་བསྔལ་རྟུལ་ཕོད་པས། །མི་ཡི་སྐྱེ་བའི་འཁྲི་ཤིང་རྟག་ཏུ་གཙེར། །ཞེས་མདོར་བསྟན་ནས་སོ་སོའི་རང་བཞིན་རྒྱས་པར་དབྱེ་བའི་ཕྱིར། ཐོག་མར་སྐྱེ་བའི་དུཿཁ་བཤད་པ་ནི། ཤིན་ཏུ་དྲི་ང་མི་གཙང་རྙོག་མ་ཅན། །ཀུན་ནས་དོག་པ་མུན་ནག་འཐིབས་པོའི་ཁྲོད། །མངལ་གནས་ལྕགས་ཁྱིམ་སྒོ་འཕར་སྤངས་ལྟའི་ནང་། །མ་རིག་རྣམ་ཤེས་ཁུ་ཁྲག་དབུས་ན་བརྟེན། །ཞེས་མངལ་གྱི་རང་བཞིན་ནི་འདམ་རྫབ་ལྟ་བུ་ཀུན་ནས་དྲི་ང་བ། ཡངས་པར་མི་མངོན་ལ། སྒོ་གླེགས་མེད་པའི་ལྕགས་ཀྱི་ཁྱིམ་ལྟ་བུའི་ནང་དུ། སྔོན་རོལ་པ་ཤས་ཆེ་བའི་བར་མ་དོའི་དྲི་ཟ་ཉེ་བར་འཇུག་པའི་རྣམ་ཤེས་རིག་པ་མ་ཡིན་པ་དེ་རླུང་སེམས་ཀྱི་ཆས་ཁུར་ནས་ཕ་མའི་ཁུ་ཁྲག་གི་དབུས་ན་གནས་པའི་ཚུལ། མེར་མེར་ནུར་ནུར་ལྟར་ལྟར་མཁྲང་གོར་ཉ། །རུས་སྦལ་བཞིན་ཏེ་བདུན་ཕྲག་བདུན་རྩ་དྲུག །གནས་འགྱུར་ཡིད་མི་འོང་བའི་རྣམ་པ་ལ། །དབང་པོ་ཡན་ལག་བ་སྤུ་ལ་སོགས་འགྲུབ། །བདུན་ཕྲག་སུམ་ཅུ་རྩ་བདུན་གྲངས་རྙེད་ཚེ། །བརྟས་དང་ཆེར་བསྐྱེད་གཡོ་ཞིང་ཚོར་བས་གདུངས། །མ་ཡི་སྤྱོད་ལམ་བཀྲེས་སྐོམ་ཚ་གྲང་གིས། །རྣམ་འགྱུར་ལས་བྱུང་སྡུག་བསྔལ་དཔག་ཏུ་མེད། །བཙའ་བའི་དུས་ཀྱི་རྗེས་འགྲོ་དེ་ཡི་ལུས། །བཟོད་དཀའི་བསྡུས་འཇོམས་ཁུར་དུ་འཕོས་པ་ལྟའི། །སྡུག་བསྔལ་ཉེ་བར་ལེན་པས་མཐོ་བཙམས་ནས། །མ་བུ་གཉིས་ཀ་མོད་ལ་སྲོག་འདོར་རམ། །ཅིག་ཤོས་གནོད་པ་བདོ་བའི་ཁུར་གྱིས་བཙའ། །མངལ་གནས་རློན་པས་དཀྲིས་ཤིང་དྲི་ང་བ། །སྲན་མི་བཟོད་པ་ཤ་རྨེན་ཞིག་པ་ལྟས། །སྔོན་གྱི་དྲན་པའི་སྟོབས་རྣམས་ཉམས་བྱས་ཤིང་། །རེག་པའི་གནོད་པས་གཟིར་བའི་སྡུག་བསྔལ་མྱོང་། །ཞུགས་པའི་བདུན་ཕྲག་དང་པོ་ནི་མེར་མེར་གྱུ་གྱུ་བ་དངུལ་ཆུའི་རྣམ་པ་ལྟ་བུའོ། །གཉིས་པ་ནུར་ནུར་པོ་བལ་སྣབས་ཀྱི་རྣམ་པ་ལྟ་བུའོ། །གསུམ་པར་ལྟར་ལྟར་པོ་མཛུབ་མོའི་རྣམ་པ་ལྟ་བུའོ། །བཞི་པར་མཁྲང་གྱུར་སྒོ་ངའི་རྣམ་པ་ལྟ་བུའོ། །ལྔ་པ་གོར་གོར་པོ་ཁུར་བའི་རྣམ་པ་ལྟ་བུའོ། །དྲུག་པར་ཁྱབ་འཇུག་ཉའི་རྣམ་པ་ལྟ་བུའོ། །བདུན་པར་རུས་སྦལ་ལྟར་མགོ་དང་རྐང་ལག་ཅུང་ཟད་མངོན་པའོ། །དེ་ནས་བདུན་ཕྲག་ཉི་ཤུ་རྩ་དྲུག་གི་བར་དུ་ལུས་ཀྱི་ཡན་ལག་དང་། སོར་མོ་དང་། ནང་གི་དོན་ལྔ་སྣོད་དྲུག་དང་། མིག་ལ་སོགས་དབང་པོའི་རྟེན་དང་། རྩ་དང་རླུང་དང་། ཁམས་དྭངས་མ་དང་། ཁྲག་དང་། ཆུ་སེར་དང་། བ་སྤུ་དང་། སྐྲ་དང་། ཕོ་མོའི་དབང་པོ་ལ་སོགས་པའི་བར་གྱིས་སྐྱེ་མཆེད་རྫོགས་པར་བྱེད་ཅིང་། ཁམས་ཀྱི་ཟས་ནི་འདོད་པ་ན་སྤྱོད་པའི་ལྷ་ལྟར་ཕྲ་བ་དྭངས་མའི་རང་བཞིན་དུ་སྤྱོད་པས་གཤང་གཅིའང་མེད་དོ། །དེ་ནས་བདུན་ཕྲག་སུམ་ཅུ་རྩ་དྲུག་གི་བར་དུ་ལུས་ཟུངས་ཉམས་བརྟས་པར་བྱེད་དེ་མའི་ཟས་སྐོམ་གྱི་དྭངས་མས་བུའི་བཟའ་བཏུང་གི་བྱ་བ་བྱེད་ཅིང་། སྐབས་སུ་མ་ཡང་ལུས་མི་བདེ་བ་ཙམ་གྱི་འཕར་གཡོ་བྱེད་དོ། །སུམ་ཅུ་རྩ་བདུན་པ་ལ་མངལ་དུ་གནས་པའི་ཚོར་བ་ཉམས་སུ་མྱོང་བས་མུན་ནག་གི་སྣང་བ་དང་། དོག་ཅིང་སྐྱུག་བྲོ་བ་དང་། འཁུམས་པས་སྡུག་བསྔལ་བ་དང་། མ་ཉིད་འགྲངས་ཐལ་ན་རིས་མནན་པ་ལྟ་བུ་དང་། ངོམས་ཐལ་ན་རྒྱ་མཚོས་མནན་པ་སྙམ་པ་དང་། ངལ་དུབ་དང་བསྒུལ་བསྐྱོད་སོགས་སྤྱོད་ལམ་མི་གཟོ་བས་གཡང་ལ་བསྐྱུར་བ་ལྟ་བུའི་སྡུག་བསྔལ་ཡོད་དེ། དགའ་བོ་ལ་མངལ་འཇུག་བསྟན་པ་ལས་ཞག་བདུན་ཕྲག་སུམ་ཅུ་རྩ་བདུན་པ་ལ་ཕྱིན་ཅི་མ་ལོག་པའི་འདུ་ཤེས་ལྔ་འབྱུང་སྟེ། ལྔ་གང་ཞེ་ན། མི་གཙང་བའི་འདུ་ཤེས་དང་། དྲི་མི་ཞིམ་པ་དང་། བཙོན་ར་དང་། མུན་ནག་དང་། ཕྱིར་འབྱུང་བའི་འདུ་ཤེས་ཏེ། ཞག་བདུན་ཕྲག་སུམ་ཅུ་རྩ་བརྒྱད་འདས་ནས་འབྱུང་འདོད་པའི་ཚེ་སྡུག་བསྔལ་སྣ་ཚོགས་མྱོང་ནས་འབྱུང་བར་འགྱུར་ཏེ། དེའི་ཕྱིར་སྡུག་བསྔལ་ཆེན་པོའོ། །ཞེས་དང་། སློབ་མ་ལ་སྤྲིང་བར། ཤིན་ཏུ་མི་བཟད་དྲི་ང་མི་གཙང་བཅེར་བས་འགགས། །རབ་ཏུ་དོག་པའི་མུན་ནག་འཐིབས་པོར་འདུག་པ་ཡི། །མངལ་གནས་དམྱལ་བ་ལྟ་བུའི་ནང་དུ་དེ་ཞུགས་ནས། །ལུས་ཡོངས་བསྐུམས་ལ་སྡུག་བསྔལ་ཆེན་པོ་མནག་དགོས་སོ། །ཅེས་སོ། །དེའང་ཁྱེའུ་རྣམས་ནི་མའི་གློ་གཡས་ནས་ཁ་ནང་དུ་བལྟས་ཏེ་ཐལ་མོ་གཉིས་ཀྱིས་གདོང་བཀབ་ནས་གནས་ལ། བུ་མོ་ནི་གཡོན་ནས་ཕྱིར་བལྟ་བས་གནས་ཤིང་། ནུ་ཞོས་བརྟག་པའང་ལྐོག་གྱུར་མི་བསླུ་བ་ཡན་ལག་བརྒྱད་པའི་རྒྱུད་ལས། དེ་ཡང་རྩིབ་ལོགས་ལ་བསྟེན་དཀུ་གཡས་མཐོ། །ནུ་ཞོ་གཡས་པ་སྔར་འབྱུང་ཁྱེའུ་སྐྱེ། །ཞེས་དང་། ཅིག་ཤོས་གོ་ལྡོག་པར་བཤད་དོ། །དེ་ནས་བཙའ་བའི་དུས་ལ་བབ་སྟེ་ལས་ཀྱི་རླུང་གིས་མགོ་མཇུག་ལྡོག་པ་དེ་རུས་པའི་འཁྲུལ་འཁོར་གྱི་བར་དུ་བཙིར་ནས་བཙའ་བས། བུ་ལ་བསྡུས་འཇོམས་ཀྱི་དམྱལ་བའི་སྡུག་བསྔལ་ཙམ་དང་། མ་ཡང་སྲོག་འདོར་རམ་བརྟན་ཆ་མི་ཕྱེད་པ་ཙམ་དུ་སྡུག་བསྔལ་བའི་ལོངས་སྤྱོད་དང་ལྡན་པ་ཉིད་དེ། ཤིཀྵ་ལེ་ཁར། དེ་ནི་རིམ་གྱིས་ཏིལ་མར་བཙིར་དཔྱད་སྲ་བ་ཡིས། །བཙིར་བ་ལྟར་བྱས་དེ་ནས་ཇེ་ཞིག་ལྟ་སྟེ་བཙས། །འོན་ཀྱང་དེ་སྲོག་མོད་ལ་མི་འདོར་གང་ཡིན་པ། །སྡུག་བསྔལ་ཉེ་བར་སྤྱད་པའི་རྣམ་པར་མཐོ་བཙམ་མོད། །ཅེས་སོ། །དེ་ནས་མངལ་གནས་རློན་པ་དཀྲིས་པའི་སྲན་མི་བཟོད་པ་དེ་ལ་རེག་མ་ཐག་པགས་པ་བཤུས་པ་ལྟ་བུའི་སྡུག་བསྔལ་དང་། ཁྲུས་བྱས་དུས་ཤ་རྨེན་ཟུག་རྔུའི་ཚོར་བ་ཤིན་ཏུ་གཅོད་པ་ལ་མཐོ་བཙམས་པ་ལྟ་བུས་སྡུག་བསྔལ་གསར་པའི་གནས་སྐབས་མཐོང་ནས་མངལ་ན་གནས་པའི་སྡུག་བསྔལ་རྣམས་བརྗེད་པར་འགྱུར་བས་དྲན་པས་སྤོང་ཞེས་གསུངས་པ་སྟེ། སྔ་མ་ལས། མངལ་གནས་རློན་པ་དཀྲིས་ཤིང་དྲི་ང་མི་བཟད་ལྡན། །གཟིར་བས་གནོད་པ་བདོ་སྟེ་རྨ་རྨེན་ཞིག་པ་ལྟར། །སྐྱུག་ལ་ཐུག་པ་བཞིན་དུ་སྔོན་གྱི་དྲན་པ་སྤོང་། །ཞེས་སོ། །ཚུལ་ཞིབ་པ་ནི་དགའ་བོ་ལ་མངལ་གནས་བསྟན་པ་དང་། མངལ་འཇུག་གི་མདོ་གཉིས་ལ་བལྟའོ། །དེ་ནས་རྒ་བའི་སྡུག་བསྔལ་བཤད་པ། རྒ་བའི་ཆད་པས་ནོན་པའི་ལང་ཚོ་ལ། །ཉམས་དང་ཡིད་མི་བདེ་བའི་ཁུར་བབ་པས། །སྤྱོད་པའི་མཐུ་ཉམས་འཁར་བའི་གཞན་དབང་ཅན། །འགྲོ་ལྡོག་གཡོ་བའི་ལྷུ་ཚིགས་རྣམ་པར་འགྱུར། །དབང་པོ་རྒུད་པས་འདོད་པའི་ཡོན་ཏན་དང་། །ཡུལ་གྱི་ལོངས་སྤྱོད་སྤྲིན་གྱིས་བཀབ་པ་ཡི། །ཚ་ཟེར་བཞིན་དུ་རྨོངས་དང་མཐུ་ཉམས་པའི། །འདུ་ཤེས་འཁྲུགས་པའི་མལ་དུ་ཤིན་ཏུ་འཁྱམས། །གཞོན་ནུའི་ལང་ཚོ་དེ་ནི་རིམ་བཞིན་རྒས་ཤིང་འཁོགས་པའི་མཐུས་བཅོམ། ལུས་ཀྱི་སྟོབས་ཉམས་པས་ཚོར་བའི་སྡུག་བསྔལ་རྣམ་པ་སྣ་ཚོགས་ཀྱི་ཁུར་བབ། ལྷུ་ཚིགས་ཉམས་པས་འགྲོ་བར་མི་ནུས། ཟས་ཀྱང་མི་འཇུ། དབང་པོ་རྒུད་པས་མིག་འགྲིབས། རྣ་བ་འོན། ལྕེ་ལྡིབས། དྲན་པ་རྨོངས། སོ་ཕྲེང་ཟག་པས་ཟས་ཀྱི་རོ་ལྕེ་ལ་མི་འཕོ། འདོད་པའི་ཡོན་ཏན་དང་། ཡུལ་གྱི་ལོངས་སྤྱོད་ལ་ཉམས་མི་དགའ་ཞིང་། དགའ་ནའང་མངོན་དུ་སྤྱོད་པའི་མཐུ་མེད་པས་ཡིད་གདུང་། གཞན་གྱིས་བརྙས་ཤིང་སུན་འབྱིན་པའི་སྐྱེ་བ་ཉམས་སུ་མྱོང་། ཚ་གྲང་གང་ཡང་མི་བཟོད་ཅིང་བློ་སྲབས་པས་ཚོར་བ་ཡིད་དུ་མི་འོང་བའི་སྡུག་བསྔལ་སྣ་ཚོགས་ལ་སྤྱོད་པས་ན། རྒན་ལ་བཀུར་སྟི་བྱས་པ་ལའང་ཕན་ཡོན་ཆེ་བར་ཡང་བསྔགས་པ་སྟེ། སློབ་དཔོན་ཆེན་པོ་མ་ཏི་ཙི་ཏྲས། སྐྱེ་བ་ཅན་ལ་ངེས་པར་ནི། །རྒས་དང་འཆི་དང་ན་མཆིས་ན། །མ་བགྲེས་མ་བསྙུང་མ་འགྲོངས་ཞེས། །ལེགས་སྨོན་གསོལ་ཡང་ཅི་ལ་ཕན། །ཞེས་དང་། འདི་ལྟར་གང་ཞིག་མི་འཚལ་བ། །དེ་ཉིད་ཀྱིས་ནི་སྡུག་བསྔལ་ཏེ། །མཁས་པ་སུ་ཞིག་མགར་བ་ལྟར། །ཚིག་པ་ལ་ནི་ཡང་བསྲེག་བཞིན། །ཞེས་སྡུག་བསྔལ་གྱི་མནར་བ་གང་དག་ལ་སྡུག་བསྔལ་གྱི་བསྣོན་པ་མི་སྟེར་བར་གསུངས་པས་མཚོན་ནོ། །དེ་ནས་ན་བའི་སྡུག་བསྔལ་བསྟན་པའི་ཕྱིར། རང་བཞིན་སྙོམས་ལྡན་འདུ་བའི་རྫིང་བུ་ནི། །རྙོག་པ་ཅན་བགྱིད་ན་བའི་ཚོར་བ་ཡིས། །ཕུང་པོ་ལྔ་ཡི་ཉེར་ལེན་དུབ་བྱས་ཏེ། །འཚོ་བའི་བརྟན་པ་བྲལ་བའི་དོགས་པས་སྐྲག །འདི་ལྟར་འབྱུང་བ་བཞིས་བསྡུས་པའི་ལུས་ཅན་ལ་རླུང་དང་། མཁྲིས་པ་དང་། བད་ཀན་ཏེ། དེ་དག་ཆ་མ་མཉམ་པའམ་འདུས་པའམ་གཅིག་ལ་གཅིག་ལྡན་ཏེ་འདྲེས་པ་ལས་བྱུང་བའི་ནད་ནི་འདུ་བ་སྙོམས་པའི་ལུས་ཀྱི་རྫིང་བུ་རྙོག་མར་བྱེད་པ་པོའོ། །དེ་ལ་ན་བ་ཞེས་བྱ་བ་ནི། གཟུགས་ལ་ན་ཚའི་སྡུག་བསྔལ། ཚོར་བས་དེ་ཉིད་སྡུག་བསྔལ་དུ་ཤེས་པ། འདུ་ཤེས་ཀྱི་འབྲེལ་ཆགས། འདུ་བྱེད་ནི་ནད་གཅིག་བཅོས་པས་གཅིག་ཤོས་འདུ་བྱེད། རྣམ་པར་ཤེས་པས་ཟུག་གི་ངོ་བོ་ཉིད་ཉམས་སུ་མྱངས་ནས་ཉེར་ལེན་གྱི་ཕུང་པོ་ལྔ་པོ་སྡུག་བསྔལ། དེས་སེམས་འཁྲུགས་པས་དགའ་བའི་ཡུལ་ཐམས་ཅད་ཕྱིན་ཅི་ལོག་ཏུ་གནས་འགྱུར། ན་བ་ནི་ངེས་པར་འཆི་བའི་སྔོན་དུ་འགྲོ་བའོ་སྙམ་པའི་འཇིགས་པ་ཆེ་བ་སྟེ། ལས་བརྒྱ་པའི་སྟོད་འགྲེལ་ལས། ན་བས་གདུངས་བའི་ལུས་ཅན་ནི། །དམྱལ་བའི་ཚོར་བ་དེ་འདྲ་སྟེ། །ཞེས་སོ། །འཆི་བའི་སྡུག་བསྔལ་ནི། སྲིད་པ་འདི་ན་སྲོག་གི་རིན་ཐང་ལ། །ཐུག་པ་མེད་པས་འཆི་བའི་སྡུག་བསྔལ་གྱིས། །རྣམ་པར་གཏུགས་པའི་སྐྱེས་བུ་གཉེན་འདུན་དང་། །ལོངས་སྤྱོད་ལས་ཐལ་ས་ཚུགས་མེད་པར་འགྲོ། །འཇིག་རྟེན་གྱི་དཔལ་འབྱོར་ཡོད་དགུ་སྤུངས་ཀྱང་སྲོག་གི་རིན་ཐང་ལ་ཐུག་པ་མེད་པ་ཉིད་དེ། དེའང་འཆི་བའི་སྡུག་བསྔལ་ལས་ནི་ནམ་ཡང་ཐར་པ་མེད་པས། མལ་གྱི་མཐའ་མར་ནི་ཉལ། སྐྱས་ཆེན་པོ་འདེགས་པའི་དུས་ལ་ནི་བབ། མངའ་རིས་དང་། ལོངས་སྤྱོད། གནས་ཁང་དང་། གཉེན་གྲོགས། བུ་ཚ་དང་། འཁོར་འདབ་དང་། ཟས་གོས་ལ་སོགས་པ་ཇི་ཙམ་ཡོད་ཀྱང་ཆ་ཤས་ཙམ་ཡང་ཁྱེར་དབང་ནི་མེད། རྗེས་སུ་ནི་མི་འབྲང་། བློས་ཐོངས་པ་ནི་མེད། ཕྱི་མ་ལ་ནི་མི་དབང་། ཉེ་དུའི་ཚོགས་ཀྱི་བསྐོར་ཡང་གནད་གཅོད་ཀྱི་སྡུག་བསྔལ་དྲག་པོ་དེ་ནི་རང་གཅིག་པུས་མྱོང་། སྙིང་མི་དགའ་བཞིན་པའི་ངང་ལ་དྲན་པ་ནི་ཉམས། འདུ་ཤེས་ནི་འཁྲུལ། དབུགས་ནི་ཆད། འགྲོ་བ་རིགས་དྲུག་གང་དུའང་མི་ཐེ་བའི་བར་མ་དོ། མགོན་དང་སྐྱབས་མེད་པ། གཟུགས་ཀྱི་ཕུང་པོས་སྤངས་པ། མིང་བཞི་འདུས་པའི་ཕུང་པོ། ཡིད་ལུས་བག་ཆགས་ཀྱི་བྱད་གཟུགས། ཚོར་བ་ཐམས་ཅད་སྡུག་བསྔལ། སྣང་བ་མཐའ་དག་འཇིགས་སྐྲག་ཏུ་འཆར་བའི་ཚེ། གཅེས་པར་བསྐྱངས་པའི་ལུས་ནི་ཐ་གུས་འཆིང་། རྡོག་པས་བརྫི། དུར་ཁྲོད་ཉམས་མི་དགའ་བར་འགྲོ་ཞིང་འཚོག །འཁོར་ལོས་བསྒྱུར་བའི་ལོངས་སྤྱོད་དང་ལྡན་ཀྱང་དྲི་ཟ་བའི་དུས་ལ་ནི་བབ། ཉེ་དུའི་ཚོགས་ནི་སྡུག་བསྔལ་བར་བྱེད་ཀྱང་མི་བས་ནོར་ལ་འཕངས། དུས་དེའི་ཚེ་རྗེས་སུ་འབྲེལ་བ་ནི་ལས་དང་བག་ཆགས་གཉིས་པོ་ལས་མ་མཆིས་ན་ཅིའི་ཕྱིར་སྐྱོ་བར་མི་བྱེད། དེ་སྐད་དུ་ཀ་ནིས་ཀའི་འཕྲིན་ཡིག་ལས། འཆི་བདག་གིས་ནི་དྲངས་པ་ན། །དགེ་དང་སྡིག་པ་མ་གཏོགས་པ། །འགྲོ་བ་ཐམས་ཅད་ཕྱིར་ལོག་ནས། །འགའ་ཡང་ཁྱོད་རྗེས་མི་འབྲང་བར། །མཁྱེན་པར་མཛོད་ལ་ལེགས་པར་སྤྱོད། །ཅེས་དང་། ཀུན་ལ་སྲོག་ནི་འཕངས་པ་སྟེ། །ཀུན་ལ་གསོན་པ་སྡུག་པ་ལགས། །ཐམས་ཅད་འཆི་བའི་ཆོས་ཅན་ཏེ། །ཐམས་ཅད་སྡུག་བསྔལ་རྣམས་ཀྱིས་གདུངས། །ཞེས་སོ། །དེ་ནས་དགྲ་མི་སྡུག་པ་དང་འཕྲད་པའི་སྡུག་བསྔལ་ནི། མི་སྡུག་ཡུལ་དང་ཕྲད་པའི་སྡུག་བསྔལ་གྱིས། །ཕོ་ཉས་རྣམ་པར་གཟིར་ཞིང་སྨད་པ་རྣམས། །བདེ་བའི་འབབ་སྟེགས་ཞིག་པའི་ངལ་གསོ་ལྟར། །དབུགས་འབྱིན་ཐོབ་པ་མེད་པས་ལྷག་པར་ཉེན། །འདི་ལྟར་སེམས་ཅན་རྣམས་ཀྱི་རང་བཞིན་ནི་བྱ་བ་མ་ཡིན་པ་ལ་གོམས་ཤིང་། ངོ་ཚ་ཁྲེལ་ཡོད་ཀྱི་བླང་དོར་དང་དམ་པའི་མགོན་གྱིས་ཟིན་པ་ཤིན་ཏུ་ཉུང་བས་གནོད་པ་ལ་གོམས་པ་ཆོས་ཉིད་ཡིན་ཏེ། སྔ་མ་ལས། འཇིག་རྟེན་འདི་ན་བློ་གྲོས་ཀྱི། །ཉམ་ཆུང་གྱུར་ཀྱང་མགོན་མེད་པ། །བྱ་བ་མ་ཡིན་བྱེད་པ་ལ། །གདོན་མི་ཟ་བར་འཇུག་པར་འགྱུར། །ཞེས་རང་གཞན་གྱི་བདེ་འབྲས་འཇོམས་པ་འབའ་ཞིག་ལ་བརྩོན་ན། བྱིས་པའི་གྲོགས་དང་ཡུལ་གྱི་ཉེས་དམིགས་ལ་བརྟེན་པ་བདག་ཅག་ལ་བཟོད་པའི་དཀའ་ཐུབ་ནི་མེད། མཁས་པའི་ཤེས་རབ་ཀྱི་བསྲུང་པའི་ཆོ་ག་ལ་ནི་མི་མཁས་པས། སྐྱེ་བོ་གཞན་དང་གཞན་དག་གིས་བལྟར་མངོན་པའམ་མི་མངོན་པར་དགྲ་བཞིན་དུ་བལྟས་ནས་ལུས་དང་། ལོངས་སྤྱོད་དང་། སྲོག་ལ་མ་རུངས་པར་བྱེད་པས་ལུས་སེམས་ལ་གདུང་བ་ཆེན་པོ་བསྐྱེད་པ་ནི་དཔེར་ན་ཁུར་གྱིས་ནོན་པའི་སྐྱེས་བུའི་ངལ་སྟེགས་ཞིག་པ་བཞིན་ནོ། །ཡང་གཉེན་དང་བྲལ་བའི་སྡུག་བསྔལ། བྱམས་སྡུག་འདུ་འབྲལ་གསར་པར་བཀོད་པ་ཡི། །གདུང་བས་ཉམས་པའི་དཀའ་ཐུབ་གཟུགས་གྱུར་ན། །ནོར་བཟང་དྲི་ཟ་མོ་ཡི་དབང་གྱུར་པའི། །ལམ་འཕྲང་འཚེ་བས་བཀབ་ལས་ལས་མཐའ་རིང་། །བདག་ཉིད་ལ་བྱམས་ཤིང་ཕན་པའི་ཕ་མའམ། ཡིད་ལ་སྡུག་པའི་མཛའ་བཤེས་དང་བྲལ་བར་གྱུར་ན་དེའི་ཡོན་ཏན་དང་། སྤྱོད་ལམ་དང་། རྣམ་འགྱུར་དྲན་ནས་སེམས་ཤིན་ཏུ་གདུང་བས་སྡུག་བསྔལ་བའི་དཀའ་ཐུབ་ནི་གཞོན་ནུ་ནོར་བཟང་དྲི་ཟའི་བུ་མོ་ལ་ཆགས་པའི་ཞགས་པས་བཅིངས་པའི་དབང་གིས་ལམ་འཕྲང་འཚེ་བ་ཅན་བགྲོད་པ་ལས་ཀྱང་ལས་ཀྱི་མཐའ་རིང་བ་ཉིད་དེ། དཔག་བསམ་འཁྲི་ཤིང་ལས། ཡུལ་གྱི་རོ་ལ་གཅགས་པ་ཡི། །ཀུན་རྨོངས་གྱིས་གཟིར་སེམས་ཅན་རྣམས། །ཀྱེ་མ་ཁྱིམ་གྱི་བདེ་ཉིད་ལས། །ཡིད་འབྱུང་ལས་ནི་ཕྱིར་ཕྱོགས་དཀོན། །ཞེས་དང་། མཛའ་ལ་ཆགས་པའི་རྡུལ་གྱི་ཆ། །གནོད་ཅིང་དགའ་མེད་བཟོད་དཀའ་བ། །ངེས་པར་བཟློག་པར་དཀའ་བ་ཉིད། །ཀུན་ཏུ་རྣམ་འགྱུར་ཉིད་ཀྱིས་བསླད། །ཅེས་དང་། བདག་བྲལ་རི་དྭགས་མིག་ཅན་དེ། །འཇུག་ངོགས་ངུར་བ་མོ་བཞིན་དུ། །བ་གམ་ཅན་ན་མྱ་ངན་དག །སྒྲོག་ཅིང་མི་ཉལ་ཡོད་དམ་སྙམ། །གང་ཕྱིར་ཆགས་པའི་མེས་གདུངས་བའི། །དཀའ་ཐུབ་སྡུག་བསྔལ་བཟོད་པར་དཀའ། །ཞེས་བཤད་པ་ཡིན་ནོ། །འདོད་པས་ཕོངས་པའི་སྡུག་བསྔལ་གྱིས་ཉེན་པ་ནི། འདོད་པས་ཕོངས་དང་དབུལ་བའི་སྐྱེས་བུ་རྣམས། །བཀྲེས་སྐོམ་དོན་མ་གྲུབ་པའི་རེ་དོགས་ཀྱིས། །གཞན་དབང་ཁོ་ནར་ལུས་ངག་ཆུད་གསོན་པའི། །སྡུག་བསྔལ་ས་ལ་རྒྱུ་བའི་ཡི་དྭགས་དངོས། །ཇི་སྲིད་དུ་ཆོག་ཤེས་པ་དང་། འདོད་པའི་ཉེས་དམིགས་ལ་ཡིད་འབྱུང་མ་སྐྱེས་པ་དེ་སྲིད་དུ་སྨོན་པའི་དོན་མ་གྲུབ་པའི་རེ་དོགས་ཀྱིས་འཇིག་རྟེན་འཆིང་བ་ཆོས་ཉིད་ཡིན་ན། བཀྲེན་ཞིང་དམན་པ་རྣམས་ནི་ཟས་གོས་གནས་མལ་ལ་སོགས་པས་ཤིན་ཏུ་ཉམ་ཐག་ཅིང་། ཕ་མ་དང་། བུ་ཚ་དང་། གཉེན་བཤེས་ཀྱང་བསྲུང་མི་ནུས་པའི་སྟེང་། དཔྱ་དང་། ཁྲལ་དང་། ཞོ་ཤས་འཚོ་བས་ལུས་དང་ངག་ཆུད་གསོན་པའི་སྡུག་བསྔལ་ལ་སྤྱོད་ཅིང་ད་དུང་དེ་ལས་ལྡོག་པའི་བྱ་བ་ནི་མི་བྱེད་པའི་ཚུལ་སྔ་མ་ལས། རྡོ་ཡིས་མྱུར་དུ་བཅོམ་པ་བཞིན། །སྐྱེ་བོ་སྡུག་ལ་མྱ་ངན་བྱེད། །ཕོངས་པ་དྲག་པོ་དེ་བཟློག་པའི། །བྱ་བ་སླར་ཡང་མི་བྱེད་དོ། །ཞེས་སོ། །ད་ནི་སྡུག་བསྔལ་དེ་དག་ཐམས་ཅད་ཀྱི་རྟེན་ཉེ་བར་ལེན་པའི་ཕུང་པོ་ལྔ་ཡིན་པར་སྟོན་པའི་ཕྱིར། གཟུགས་ལ་རྟེན་བཅས་ཚོར་བས་རང་བཞིན་ཤེས། འདུ་ཤེས་ལས་དེ་རྒྱུན་ཆགས་འདུ་བྱེད་ཀྱིས། །ཕྱིན་ཆད་ས་བོན་བསྐྲུན་དང་རྣམ་ཤེས་ཀྱིས། །སྡུག་བསྔལ་ཉམས་སུ་ལེན་པའི་ཉེ་བར་ལེན། །ཕུང་པོ་ལྔ་པོ་འདི་དག་སྡུག་བསྔལ་རྣམས། །ཀུན་གྱི་འབྱུང་གནས་ཀུན་གྱི་རྟེན་དང་སྣོད། །ཀུན་གྱི་རྒྱུ་འབྲས་བདག་པོར་མཁྱེན་འཚལ་ནས། །ཀུན་འབྱུང་ལས་དང་ཉོན་མོངས་སྤང་འཚལ་ལོ། །འདི་ལྟར་གཟུགས་སམ་གཟུགས་སུ་འདུ་ཤེས་པ་ནི་སྡུག་བསྔལ་ཐམས་ཅད་ཀྱི་རྟེན་ནོ། །ཚོར་བས་ནི་དེའི་རང་བཞིན་ལ་རྣམ་པར་རྟོག་གོ །འདུ་ཤེས་ཀྱིས་ནི་ལུ་གུ་རྒྱུད་དུ་འབྲེལ་ནས་རྒྱུན་ཆགས་སོ། །འདུ་བྱེད་ཀྱིས་ནི་སླད་ཀྱི་སྡུག་བསྔལ་མཐའ་དག་པའི་ས་བོན་བསྐྲུན་ནོ། །རྣམ་ཤེས་ཀྱིས་ནི་ཐམས་ཅད་ཀྱི་ཉེ་བར་ལེན་ནོ། །དེ་སྐད་དུ་ཡུམ་བར་མ་ལས། རབ་འབྱོར་ཉེ་བར་ལེན་པའི་ཕུང་པོ་ལྔ་ནི་ཟག་པ་དང་བཅས་པའི་ཕྱིར་སྡུག་བསྔལ་ཐམས་ཅད་ཀྱི་གནས་སོ། །སྡུག་བསྔལ་ཐམས་ཅད་ཀྱི་རྟེན་ནོ། །སྡུག་བསྔལ་ཐམས་ཅད་ཀྱི་འབྱུང་ཁུངས་སོ། །ཞེས་སོ། །དེའི་ཕྱིར་ཉེ་བར་ལེན་པའི་ཕུང་པོ་ལྔའི་མཚན་ཉིད་ཀྱི་སྐྱེ་བའི་སྡུག་བསྔལ་གྱི་བདེན་པ་འཁོར་བའི་རང་བཞིན་ལ་ཡིད་འབྱུང་ནས་ཀུན་འབྱུང་གི་བདེན་པ་ཡང་སྲིད་པ་ལ་འབྱུང་ཞིང་སྲེད་པ། དེ་ལ་ཡིད་བདེ་ཞིང་དགའ་བའི་འདོད་ཆགས་དང་ལྷན་ཅིག་པ། སྲིད་པ་ལ་དམིགས་ཤིང་མངོན་པར་དགའ་བ་ལས་དང་ཉོན་མོངས་པ་ལས་སྐྱེས་པའི་མི་དགེ་བའི་ཚོགས་ཇི་སྙེད་ཡོད་པ་སྤོང་བར་བྱའོ། །དེ་ལྟར་སྤངས་ནས་སྐྱེས་བུ་འབྲིང་གི་ལམ། །བདེན་པ་བཞི་ཡི་ཤིང་རྟ་ལ་ཞོན་རྣམས། །འགོག་པ་མངོན་གྱུར་མྱ་ངན་འདས་པའི་ཁམས། །ཐར་པ་མཆོག་གི་གོ་འཕང་ཉིད་དུ་འགྲོ། །ཞེས་སྨོས་ནས། ཀུན་འབྱུང་བ་འགོག་པ་གང་ཡིན་པ་དེ་ནི་ཐར་པ་སྟེ། ཐར་པ་ནི་ལམ་གྱི་བདེན་པ་ཉིད་ལ་ལྟོས་དགོས་པས་ན། བཤེས་སྤྲིང་ལས། སྐྱེ་འདི་སྡུག་བསྔལ་སྲེད་པ་ཞེས་བགྱི་བ། །འདི་ནི་དེ་ཡི་ཀུན་འབྱུང་རྒྱ་ཆེན་ཏེ། །འདི་འགོག་པ་ནི་ཐར་པ་ལགས་ཏེ་དེ། །འཐོབ་བགྱིད་འཕགས་ལམ་ཡན་ལག་དེ་བརྒྱད་ལགས། །ཞེས་ཡང་དག་པའི་ལྟ་བ་ཟག་པ་མེད་པའི་ཤེས་རབ་དང་། ཡང་དག་པའི་འཚོ་བ་ཁ་གསག་དང་ལོག་འཚོ་སྤང་བ་དང་། ཡང་དག་པའི་རྩོལ་བ་ནི་བརྩོན་འགྲུས་ཏེ་དེའང་ཡང་དག་སྤོང་བ་བཞིའོ། །ཡང་དག་པའི་དྲན་པ་དམིགས་པ་མ་བརྗེད་པ། དེའང་ལུས་དང་། ཚོར་བ་དང་། སེམས་དང་། ཆོས་ལ་དམིགས་ནས་དྲན་པ་ཉེ་བར་གཞག་པ་བཞི་ཡིན་ནོ། །ཡང་དག་པའི་ཏིང་ངེ་འཛིན་ནི་བསམ་གཏན་བཞི་པའོ། །ཡང་དག་པའི་ངག་ནི་དགེ་བའི་ལས་ཀྱི་ལམ་བཞིའོ། །ཡང་དག་པའི་ལས་ཀྱི་མཐའ་ནི་ལུས་ཀྱི་མི་དགེ་བའི་ལས་ཀྱི་ལམ་སྤོང་བའི་རང་བཞིན་གསུམ་མོ། །ཡང་དག་པའི་རྟོག་པ་ནི། གནོད་སེམས་མེད་ཅིང་དགེ་བའི་རྟོག་པ་དུ་མའོ། །དེ་ལྟར་འཕགས་པའི་བདེན་པ་བཞི་པོ་དེ་དག་མཐོང་བས་མྱ་ངན་ལས་འདས་པ་ཐོབ་པ་ལ་སྦྱོར་བར་བྱེད་པ་ནི་ཁྱིམ་པའི་རྟེན་ལའང་མ་ངེས་ཏེ། སྔ་མ་ལས། དེ་ལྟར་ལགས་པས་འཕགས་པའི་བདེན་པ་བཞི། །འཐོབ་པར་བགྱིད་སླད་རྟག་ཏུ་བརྩོན་པར་བགྱི། །བང་ན་དཔལ་གནས་ཁྱིམ་པ་རྣམས་ཀྱིས་ཀྱང་། །ཤེས་པས་ཉོན་མོངས་ཆུ་བོ་ལས་བརྒལ་བགྱིས། །ཞེས་ཁྱིམ་པ་རྒྱལ་སྲིད་ལ་གནས་པ་གཟུགས་ཅན་སྙིང་པོ་ལ་སོགས་པས་ཀྱང་འཕགས་པའི་བདེན་པ་བཞི་ཤེས་པས་ཉོན་མོངས་པའི་ཆུ་བོ་ལས་བརྒལ་བས་ན། འཕགས་པའི་ལམ་དེ་ནི་སྐྱེས་བུའི་རྩལ་གྱིས་བསྒྲུབ་པར་བྱེད་པ་ཡིན་གྱིས། དང་པོ་ནས་ཤེས་པ་ཡོངས་སུ་གྲུབ་ཟིན་པ་ཞིག་གནམ་ནས་བབས་པ་ཡང་མ་ལགས། ལོ་ཏོག་བཞིན་དུ་ས་རུམ་ནས་འཐོན་པ་ཡང་མ་ལགས་པས་ན་སོ་སོའི་སྐྱེ་བོ་ཡིན་ཡང་དགེ་བའི་བཤེས་གཉེན་ལ་བསྟེན་ནས་འབད་དེ་ཉོན་མོངས་པའི་ཆུ་བོ་ལས་བརྒལ་བ་ལ་སྐྲག་པར་མ་བྱེད་ཅིག་ཅེས་འཕགས་པ་ཀླུའི་དབང་པོས་བསྟན་པ་ཡིན་ཏེ། དེ་སྐད་དུ། གང་དག་ཆོས་མངོན་བགྱིས་པ་དེ་དག་ཀྱང་། །གནམ་ལས་བབས་པ་མ་ལགས་ལོ་ཐོག་བཞིན། །ས་རུམ་ནས་འཐོན་མ་ལགས་དེ་དག་སྔོན། །ཉོན་མོངས་རག་ལས་སོ་སོའི་སྐྱེ་བོ་པས། །ཞེས་གསུངས་པ་ཡིན་ནོ། །དེ་ལྟ་མོད་ཀྱི་དྲན་པ་ཉེ་བར་མ་བཞག་པ་རྣམས་ནི་སྡུག་བསྔལ་ལ་བདེ་བར་འཛིན། མི་རྟག་པ་ལ་རྟག་པར་འཛིན། བདག་མེད་པ་ལ་བདག་གོ་སྙམ་པ་དང་། མི་གཙང་བ་ལ་གཙང་ངོ་སྙམ་དུ་འདུ་ཤེས་ཕྱིན་ཅི་ལོག་བཞིར་བལྟ་བས་ངན་སོང་དང་འཁོར་བའི་རྒྱུ་བསྒྲུབ་པའི་ཕྱིར། སྔ་མ་ལས། དྲན་པ་ཉེ་བར་མ་བཞག་རྣམས་ཀྱིས་ནི། །ཕྱིན་ཅི་ལོག་བཞིར་ལྟ་བ་ཕུང་ཁྲོལ་བ། །ཞེས་གསུངས་སོ། །དེ་ལྟར་དུ་བལྟ་བའི་བདག་གཅིག་ཀྱང་མེད་ན། ལས་དགེ་བ་དང་མི་དགེ་བའི་འབྲས་བུ་སུ་ཞིག་གི་སྤྱོད་སྙམ་ན། དེའི་རང་བཞིན་བདག་གཟུགས་ལ་སོགས་པའི་ངོ་བོ་ཉིད་ཡིན་པས་བཀག་པར་བྱ་བ་ནི། བཤེས་སྤྲིང་ལས། གཟུགས་ནི་བདག་མ་ཡིན་ཞེས་གསུངས་ཏེ་བདག །གཟུགས་དང་མི་ལྡན་གཟུགས་ལ་བདག་གནས་མིན། །བདག་ལ་གཟུགས་མི་གནས་ཏེ་དེ་བཞིན་དུ། །ཕུང་པོ་ལྷག་མ་བཞི་ཡང་སྟོང་རྟོགས་བགྱིས། །ཞེས་པས། བདག་ནི་གཟུགས་ལ་སོགས་པའི་ངོ་བོ་ཉིད་མ་ཡིན་ཏེ། གཟུགས་ལ་སོགས་པ་དང་འདྲ་བ་ཁོ་ནར་མི་རྟག་པ་ཉིད་དུ་འགྱུར་བའི་ཕྱིར་རོ། །འོན་ཏེ་གཟུགས་ལ་སོགས་པ་ལས་གཞན་པ་ཞིག་ཡིན་ནོ་ཞེ་ན། དེ་ལ་དཔྱད་པར་བྱ་བ་རྣམ་པ་གསུམ་སྟེ། སྐྱོང་བྱེད་མ་ཧེ་དང་ལྡན་པ་བཞིན་དུ་གཟུགས་ལ་སོགས་པ་དང་ལྡན་པ་ཞིག་ཡིན་ནམ། སྐྱོང་བྱེད་ནེའུ་གསིང་ལ་འདུག་པ་བཞིན་དུ་གཟུགས་ལ་སོགས་པའི་སྟེང་ན་གནས་པ་ཞིག་ཡིན་ནམ། ཡང་འཁྲི་ཤིང་དང་གེལ་པ་ལ་སོགས་པ་ལ་བརྟེན་པ་ལྟར་དེ་ལ་གཟུགས་ལ་སོགས་པ་བརྟེན་པ་ཞིག་ཡིན་གྲང་དེ་ལ་རིགས་པ་བརྗོད་དེ། བདག་གཟུགས་ལ་སོགས་པ་དབང་བ་ཅི་ཞིག་མཆིས་ཏེ། སྐྱོང་བྱེད་མ་ཧེའི་ཁྱུ་རྣམས་བཀོལ་བ་དང་། བཞོ་བ་ལ་སོགས་པར་དབང་བ་བཞིན་དེའི་འདོད་པས་གཟུགས་ལ་སོགས་པ་འདོར་བ་དང་ལེན་པ་ནི་མེད་དོ། །མི་འདོད་བཞིན་དུའང་གཟུགས་ལ་སོགས་པ་འཇིགས་པ་མཐོང་བའི་ཕྱིར་བདག་གཟུགས་དང་ལྡན་པ་མ་ཡིན་ནོ། །ཕྱོགས་གཉིས་པའི་དོན། ཇི་ལྟར་འདི་གཟུགས་ལ་སོགས་པ་ལ་གནས་པ་ཞེས་བརྗོད་པར་བྱ་སྟེ། གཟུགས་ཅན་མ་ཡིན་པའི་ཆོས་ལ་ནི་སྐྱོང་བྱེད་ནེའུ་གསིང་ལ་འདུག་པ་ལྟར་བླ་འོག་ཏུ་གནས་པ་རུང་བ་མ་ཡིན་ནོ། །གང་གིས་ན། དེ་དག་ན་གནས་པ་མངོན་པར་གྱུར་པ་དེ་ལ་གནས་པའི་བདག་གིས་ཀྱང་གཟུགས་ལ་སོགས་པ་ལ་ཕན་ཅུང་ཟད་ཀྱང་མི་འདོགས་ལ། གཟུགས་ལ་སོགས་པས་ཀྱང་དེ་ལ་དེ་བཞིན་ནོ། །ཡང་འདི་དེ་ལ་ཞོན་ནས་དེ་དག་ལ་འཇུག་པར་བྱེད་དེ། དཔེར་ན་གླང་པོ་ལ་ཞོན་ནས་གླང་པོ་བཞིན་ནོ་ཞེ་ན། དེ་ཡང་རུང་བ་མ་ཡིན་ཏེ། མི་འདོད་བཞིན་དུའང་འཇུག་པ་དང་ལྡོག་པ་མཐོང་བའི་ཕྱིར། བདག་གིས་འདོད་པས་གཟུགས་ལ་སོགས་པ་ལ་འཇུག་པ་དང་ལྡོག་པར་འགྱུར་བ་ནི་མེད་དོ། །ཕྱོགས་གསུམ་པ་ལ་རིགས་པ་ནི། འཁྲི་ཤིང་ལ་སོགས་པ་ནི་ས་ལ་བརྟེན་ཅིང་། དེ་ལ་བརྟེན་ནས་གཟུགས་ལ་སོགས་པ་སྐྱེ་བ་དང་། གནས་པ་དང་འཕེལ་བ་མཐོང་བའི་ཕྱིར་རོ། །གཟུགས་ལ་སོགས་པ་མི་སྐྱེ་བ་ལ་སོགས་པ་ནི་དེ་ལྟར་བདག་ལ་རག་ལས་པ་མ་ཡིན་ཏེ། བདག་མེད་པའི་དུས་སུ་ཡང་ཕྱིའི་གཟུགས་ལ་སོགས་པ་རང་སར་ཡོད་པའི་ཕྱིར་རོ། །གང་དག་གི་ལྟར་ན་རྩྭ་ལ་སོགས་པ་སྲོག་ཡོད་པ་དེ་དག་ལྟར་ན་ལན་ཚྭ་ལ་སོགས་པར་མ་ངེས་པ་ཡིན་ནོ། །ཞེས་འཇིག་ཚོགས་ལ་ལྟ་བ་ཉི་ཤུ་མངོན་པར་གཞོམ་པ་འདི་མན་ངག་གི་དོན་པོ་ཡིན་པས་འདིར་རྒྱ་གཞུང་ལྟར་རྣམ་པར་བཞག་པ་ཡིན་ནོ། །དེའི་ཕྱིར་གཟུགས་བདག་མ་ཡིན་པ་དང་། བདག་གཟུགས་དང་མི་ལྡན་པ་དང་། གཟུགས་ལ་བདག་གནས་པ་ཡང་མ་ཡིན་པ་དང་། བདག་ལ་གཟུགས་མི་གནས་པ་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་བཞི་པོ་ཡང་སྟོང་པར་ཤེས་ནས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ནི་ཡེ་ཤེས་ཀྱི་རྡོ་རྗེས་བཅོམ་པ་ལ་རྒྱུན་དུ་ཞུགས་པའི་འབྲས་བུ་ཐོབ་པ་ཅེས་བྱའོ། །ཅིའི་ཕྱིར་དེ་དག་ལ་འཕགས་པའི་བདེན་པ་བྱ་ཞེ་ན། འཕགས་པ་རྒྱུན་དུ་ཞུགས་པ་ལ་སོགས་པས་བདེན་པ་ཉིད་དུ་གཟིགས་པའི་ཕྱིར་རོ། །འཕགས་པའི་མཚན་ཉིད་གང་དུ་བཞག་ན་མ་སྐྱེས་དགྲའི་འགྱོད་པ་བསལ་བ་ལས། རྡུལ་དང་ལྟ་བ་ཐམས་ཅད་དང་བྲལ་བའི་ཕྱིར་འཕགས་པ་ཞེས་བྱའོ། །ཞེས་བཤད་དོ། །རྡུལ་ཅེས་བྱ་བ་གང་ཡིན་ན། མཽངྒལ་གྱི་བུ་ལ་སེམས་ཅན་མེད་པ་དེ་སེམས་ཅན་གྱི་རྡུལ་བྲལ། བདག་མེད་པ་སྟེ་འདོད་ཆགས་ཀྱི་རྡུལ་བྲལ། སྲོག་མེད་པ་སྟེ་སྐྱེ་འཆི་འཕོ་བ་དང་བྲལ་བ། གང་ཟག་མེད་པ་སྟེ་སྔོན་གྱི་མཐའ་དང་ཕྱི་མའི་མཐའ་ཡོངས་སུ་མ་ཆད་པ། ཞི་བ་དང་ཉེར་ཞིའི་མཚན་ཉིད་འདོད་ཆགས་དང་བྲལ་བ་ལ་སོགས་པས་བསྟན་ལ། དེ་བཞིན་དུ་འཕགས་པ་མ་ཡིན་པ་ནི་ཉོན་མོངས་ཅན་དུ་ཀླུའི་དབང་པོས་བཤད་པ་ཡིན་ནོ། །ཡང་ཐར་བ་བདག་ལ་རག་ལས་འདི་ལ་ནི། །གཞན་གྱི་གྲོགས་བགྱིར་ཅི་ཡང་མ་མཆིས་ཀྱིས། །ཐོས་དང་ཚུལ་ཁྲིམས་བསམ་གཏན་ལྡན་པ་ཡིས། །བདེན་པ་རྣམ་པ་བཞི་ལ་འབད་པར་མཛོད། །ལྷག་པའི་ཚུལ་ཁྲིམས་ལྷག་པའི་ཤེས་རབ་དང་། །ལྷག་པའི་སེམས་ལ་རྟག་ཏུ་བསླབ་པར་བགྱི། །བསླབ་པ་བརྒྱ་རྩ་ལྔ་བཅུ་ལྷག་གཅིག་ཀྱང་། །གསུམ་པོ་འདི་ནང་ཡང་དག་འདུ་བར་འགྱུར། །ཞེས་གསུངས་པ་ལྟར་ཐར་པ་ནི་གྲོགས་ཀྱིས་བསྟང་བའི་ཁོ་ན་རག་ལས་པ་མ་ཡིན་པར། བདག་འབའ་ཞིག་གི་བརྩོན་པ་ལ་ལྟོས་པ་ཡིན་ཏེ། འདུལ་བ་ལུང་ལས། ངས་ནི་ཁྱེད་ལ་ཐར་པའི་ཐབས་བསྟན་གྱིས། །ཐར་པ་རང་ལ་རག་ལས་བརྩོན་པར་གྱིས། །ཞེས་གསུངས་པ་ལྟར།

དེ་བཞིན་གཤེགས་པའི་བརྟེན་པ་འབའ་ཞིག་ལ་བརྟེན་ནས་ལུང་དང་། རིགས་པ་དང་། གཏན་ཚིག་དང་། དཔྱད་བཟོད་པ་དང་། ལྡན་པ་དང་མཐུན་པའི་མང་དུ་ཐོས་པ། ཉམས་པ། བཅོམ་པ། ལྟུང་བ། ཕམ་པར་གྱུར་པ་མེད་ཅིང་། དེའང་མྱ་ངན་ལས་འདའ་བར་ཡོངས་སུ་བསྔོ་བས་ལྷག་པའི་ཚུལ་ཁྲིམས་སོ། །ལྷག་པའི་སེམས་ཀྱི་བསླབ་པ་ནི་འཕགས་པའི་ལམ་གྱི་རྟེན་བསམ་གཏན་བཞི་པའོ། །ལྷག་པའི་ཤེས་རབ་ཀྱི་བསླབ་པ་ནི་ངེས་པར་འབྱེད་པའི་ཆ་དང་མཐུན་པའོ། །དེ་ལྟར་བསླབ་པ་གསུམ་ཀ་ཡོངས་སུ་རྫོགས་པར་བྱེད་པ་ནི་སྡེ་སྣོད་གསུམ་ཀ་ལ་ལྟོས་པ་ཡིན་ཡང་། འདིར་རེ་ཞིག་སྐྱེས་བུ་འབྲིང་གི་རང་ལམ་ཅུང་ཟད་རྣམ་པར་བཞག་ན་དབྱིག་གཉེན་གྱིས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་སོ་སོར་ཐར་པའི་ཚུལ་ཁྲིམས་གཞི་རྟེན་དུ་བྱས་ནས་དམ་པའི་ཆོས་འདུལ་བ་ལ་ངེས་པར་འབྱུང་བ། ཉན་ཐོས་ཐེག་པའི་ངོ་བོ་ནི་འཁོར་བ་ལས་རང་ཉིད་གཅིག་པུ་ཐར་པར་འདོད་པའི་བློ་གང་ཟག་གི་བདག་མེད་རྟོགས་པའི་ཐབས་སུ་འགྱུར་བའོ། །གང་ཟག་གི་བདག་མེད་ནི། ང་མེད་བདག་མེད་ཀྱི་གཞི་རྩ་གཅོད་པའོ། །ངེས་ཚིག་ནི་སློབ་དཔོན་ལ་ལྟོས་ནས་ཆོས་ཉན་ཅིང་ཐོས་ནས་གཞན་ལ་སྒྲོག་པའི་ཕྱིར་ཐོས་སྒྲོག་གམ་ཉན་ཐོས་སོ། །དགོས་པ་ནི་སྲིད་པ་ཐ་མའི་བྱང་ཆུབ་འགྲུབ་ནས་འཁོར་བ་ལས་ངེས་པར་འབྱིན་པའོ། །འབྲས་བུ་ནི་ལྷག་བཅས་དང་ལྷག་མེད་ཀྱི་མྱང་འདས་ཐོབ་པའོ། །དེ་ལ་དང་པོ། ཕུང་པོའི་ལྷག་མ་དང་བཅས་པ་ནི་དབང་པོ་དུལ་བས་རབ་ཏུ་ཕྱེ་བའི་ཕྱིར། དུལ་བ་ཞེས་བྱ་བའི་སྒྲས་སྟོན་ཏོ། །གཉིས་པ་ནི། སྡུག་བསྔལ་ཉེ་བར་ཞི་བས་རབ་ཏུ་ཕྱེ་བའི་ཕྱིར་ཞི་བ་ཞེས་བྱ་བའི་སྒྲས་སྟོན་ཏོ། །དབྱེ་ན་མདོ་སྡེ་པ་དང་། བྱེ་བྲག་ཏུ་སྨྲ་བ་གཉིས་ལས། དང་པོ་ནི། བསྟན་བཅོས་ལ་ཡིད་མི་རྟོན་ཞིང་། མདོ་སྡེའི་ཕྱོགས་ལས་ལམ་བསྒྲུབ་པར་མ་ཟད། ཤེས་རབ་ཟབ་པས་ཡང་དག་པའི་སྟོང་ཉིད་དང་ཉེ་བ་ཡིན་ལ། དེའང་དམིགས་པར་བྱ་བའི་ཡུལ་བདེན་པ་བཞི་ལ་དམིགས་པར་བྱེད་པའི་ཤེས་པ་བཅུ་གཉིས་སུ་བྱེད་པས། ཉོན་མོངས་པ་ཕྲ་རྒྱས་བརྒྱད་ཅུ་རྩ་བརྒྱད་སྤངས་ཏེ། ཡེ་ཤེས་དམ་པའི་དོན་ཁོང་དུ་ཆུད་པར་འདོད་དོ། །དེ་ལ་གང་ཟག་གི་བདག་མེད་འདྲ་ཡང་། ཆོས་ཀྱི་ཁམས་བྱེ་བྲག་ཏུ་སྨྲ་བ་ལས་ཕྱོགས་གཅིག་གིས་འཕགས་ཏེ། དེའང་ཆ་དང་བཅས་པའི་རྡུལ་ཕྲན། གཙོ་བོ་སེམས་ཀྱི་གཞི། འཁོར་སེམས་ལས་བྱུང་བའི་གཞི། ལྡན་པ་མ་ཡིན་པའི་འདུ་བྱེད་ཕུང་པོའི་གཞི། འདུས་མ་བྱས་རྟག་པའི་གཞི། སྣང་བ་གཟུགས་ཀྱི་གཞི་དང་ལྔ་པོ་གཙོ་བོས་ཁེགས་ལ། ཆ་མེད་ཀྱི་རྡུལ་ཕྲན་ཙམ་མ་ཁེགས་ཏེ། ཆོས་ཀྱི་ཁམས་ཕྱོགས་ཕྱེད་གཟུང་ཡུལ་རགས་པའི་སྣང་བ་རྡུལ་ཕྲན་འདབ་ཆགས་རེག་ལ་མ་འབྱར་བས་བརྩམས་པ་དེའང་ཆ་མེད་དུ་རྟོགས་པས་བྱེ་བྲག་པ་ལས་འཕགས་ཏེ། དོན་གྱི་ལྟར་མེད་པས་རྡུལ་ཕྲན་ཁས་མ་བླངས་པ་དང་མཚུངས་སོ། །བྱེ་བྲག་ཏུ་སྨྲ་བ་ནི། བཤད་མཛོད་ཆེན་མོའི་རྗེས་སུ་འབྲང་ལ། ཡོད་པར་ཞེན་པ་ལ་གོམས་པ་ཤས་ཆེ་ཞིང་མཚན་མར་འཛིན་པའི་ཕྱིར་ལམ་དམན་པ་སྟེ། དེའང་རགས་པ་ཀུན་རྫོབ་ཀྱི་བདེན་པ་འདི་གཡག་རྔ་དང་ནེའུ་གསེང་ལྟར་འདོད་པས། སྣང་དུས་ན་ཚོགས་པ་གཅིག་པ་ལྟར་ཏེ། དོན་དམ་པར་རྡུལ་ཕྲན་ཆ་ལྡན་སིལ་བུར་འདོད་ལ། ཤེས་པའི་རྒྱུན་ཀུན་རྫོབ་སྐད་ཅིག་དོན་དམ་ཆ་མེད་པ་བུམ་ཆུ་ལྟ་བུ་སྟེ། ཕུང་པོ་དང་། ཁམས་དང་སྐྱེ་མཆེད་ལས། རགས་སྣང་རྡུལ་ཕྲན་བསྐོར་བ་དང་བཅས་པར་འདོད་ལ། གང་ཟག་གི་བདག་མེད་པར་ཁས་བླངས་ཀྱང་ཆོས་ཀྱི་བདག་རྡུལ་ཕྲན་དང་། སྐད་ཅིག་ཡོད་པར་ཁས་བླངས་པས་སྔ་མ་ལས་ཕྱོགས་གཅིག་གིས་དམན་ནོ། །དེ་ཡང་བདེན་པ་བཞིས་བསྡུས་པའི་ཆོས་ལ་རྒྱུ་འབྲས་སྤང་བླང་དུ་ཤེས་ནས། རྒྱུ་ཀུན་འབྱུང་བ། འགོག་པ། རྐྱེན་གྱི་རྣམ་པ་བཞི་ལ་དམིགས་ནས། ཤེས་པའི་རྣམ་པ་སྡུག་བསྔལ་ཤེས་བྱ། ཀུན་འབྱུང་སྤང་བྱ། ལམ་བསྟེན་བྱ། འགོག་པ་ཐོབ་བྱའི་ཚུལ་གྱིས་ཤེས་པར་བྱ་བ་དང་། སྡུག་བསྔལ་བས་སྤང་བྱ་དང་། སྟོང་པ་དང་། བདག་མེད་པར་རྟོགས་པའི་རྣམ་པས། ལམ། རིག་པ། བསྒྲུབ་པ། ངེས་པར་འབྱིན་པས། འགོག་པ། ཞི་བ། གྱ་ནོམ་པ། བདག་མེད་པའི་ངང་ཚུལ་བསྒོམ་པས། ཁམས་གསུམ་གྱི་མཐོང་བ་དང་། བསྒོམ་པས་སྤང་བར་བྱ་བ་བཞི་བརྒྱ་དང་བཅུ་བཞི་སྤངས། ཟད་པ་དང་། མི་སྐྱེ་བ་ཤེས་པའི་ཡེ་ཤེས་དམ་པ་མངོན་དུ་རྟོགས་ནས་གྲོལ་བར་འདོད་པའོ། །གྲུབ་མཐའ་གཉིས་ཀའང་ལམ་བསྒོམ་དུས་ལམ་ལྔ་སྐྱེ་བའི་རིམ་པས་ནན་ཏན་དུ་བྱེད་པ་ན། དུག་གསུམ་སྤྱིའི་གཉེན་པོར་བདག་མེད་པ་དང་སྒྱུ་མ་བསྒོམས་ལ། སོ་སོའི་གཉེན་པོར། འདོད་ཆགས་ལ་མི་གཙང་བའི་རྫས་བརྒྱད་དང་། ཀེང་རུས་བསྒོམས་ལ། ཞེ་སྡང་ལ་བྱམས་པ་དང་། གཏི་མུག་ལ་རྟེན་འབྲེལ་འབྱུང་ལྡོག་བསྒོམ་ཞིང་། རྣམ་རྟོག་གི་གཉེན་པོར་དབུགས་འབྱུང་རྔུབ་བགྲང་གཞི་གཞལ་དུ་བསྒོམ་མོ། །དེའི་བདག་མེད་བསྒོམ་པའང་ཡུལ་དང་ཡུལ་ཅན་འགགས་པའི་འགོག་པ་ཅི་ཡང་མི་དམིགས་པའི་དོན་བསྒོམ་ཞིང་། བྱིང་རྨུགས་གཏི་མུག་གི་གཉེན་པོར་སྤྱི་གཙུག་ཏུ་མར་མེ་ལ་སེམས་གཏོད་པའོ། །དེ་ལྟར་བྱས་པས། དབང་པོ་རྟུལ་འབྲིང་ཡིན་ཡང་བརྩོན་འགྲུས་ཆེན་པོ་དང་ལྡན་ན་ཚེ་དེ་ཉིད་ཀྱི་འབྲས་བུ་ཐོབ་ལ། རྣོན་པོ་དང་། བྱང་ཆུབ་སེམས་དཔའ་ཁ་ཅིག་ལམ་ལྔ་སྔོན་སོང་གི་ཚོགས་མང་དུ་བསགས་པའི་རྟེན་ལ་སྟན་ཐོག་གཅིག་ཏུ་ལམ་ལྔ་རྫོགས་པར་འདོད་པའོ། །དེའང་ཉན་ཐོས་ཀྱི་ཐེག་པ་ནས། རང་ལམ་དེ་བློ་ཆུང་བ་དང་། འབྲིང་དང་། ཆེ་བས་ཉན་ཐོས་དང་། རང་སངས་རྒྱས་དང་། སངས་རྒྱས་ཀྱི་བྱང་ཆུབ་གསུམ་འགྲུབ་པར་འདོད་ཀྱིས། སྔགས་ཀྱི་ལམ་ལྟ་ཅི་ཐེག་པ་ཆེན་པོ་ཞེས་བྱ་བ་ཡང་མི་འདོད་ཅིང་བློར་མི་ཆུད་པས་ན། བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེས་རིགས་ཅན་གསུམ་གྱི་ཐེག་པ་རྣམ་པར་བཞག་པའོ། །རང་སངས་རྒྱས་ཀྱི་ཐེག་པའི་ངོ་བོ་ནི། བསེ་རུ་དང་ཚོགས་སྤྱོད་ཆེ་ཆུང་གི་དབྱེ་བས་ཚོགས་བསྐལ་ཆེན་བརྒྱ་ནས་མི་ཚེ་བཅོ་ལྔ་ཡན་ཆད་ཀྱི་བསྡུས་པ་བསགས་པའི་རྟེན་དེ་ཉིད་ལ་བྱང་ཆུབ་ཐོབ་པའི་སྐལ་བ་མེད་པར་རིགས་ནས། ཉན་ཐོས་ཀྱི་སྡེ་སྣོད་ལ་ཐོས་བསམ་མཁས་པར་བྱས་ཏེ། སྨོན་ལམ་རྣམ་པ་གསུམ་བཏབ་པ་ལ་བརྟེན། སྐྱེ་བ་དེའི་འོག་ཏུ་སངས་རྒྱས་དང་ཉན་ཐོས་མེད་པའི་འཇིག་རྟེན་དུ་སྐྱེས་ནས་སློབ་དཔོན་ལ་མ་བརྟེན་པར་སྲིད་པ་ཐ་མའི་ཚེ་མངོན་དུ་བྱེད་པའི་ཐབས་བདག་མེད་ཕྱེད་དང་གཉིས་རྟོགས་པའི་རང་བཞིན་ཅན་ནོ། །ངེས་ཚིག་ནི་སེམས་ཅན་མང་པོའི་དོན་དུ་སེམས་མི་བསྐྱེད་པར་རང་ཉིད་གཅིག་པུ་སངས་རྒྱས་སུ་འདོད་པའོ། །དགོས་པ་ནི་འཁོར་བ་ལས་ཐར་བའི་བྱང་ཆུབ་འབྲིང་ཐོབ་པའོ། །འབྲས་བུ་ནི་དགྲ་བཅོམ་གཉིས་སོ། །དབྱེ་ན་ནེ་ཙོ་ལྟར་ཁྱུས་འཚོ་བ་དང་། བསེ་རུ་ལྟར་གཅིག་པུར་གནས་པ་གཉིས་ལས། ནེ་ཙོ་ལྟ་བུ་ནི་རྟེན་འབྲེལ་ལུགས་ལྡོག་ཏུ་བསྒོམ་སྟེ་དུར་ཁྲོད་དུ་སོང་ནས་རུས་པ་མཐོང་མ་ཐག་ཡིད་བྱུང་ནས། ཀྱེ་མ་རུས་པ་འདི་དག་ཅི་ལས་བྱུང་། རྒ་ཤི་ལས་བྱུང་། རྒ་ཤི་ཅི་ལས་བྱུང་སོགས་རྟེན་འབྲེལ་ལུགས་འབྱུང་དུ་བརྟགས་པའི་མཐར། འདི་ལས་ཇི་ལྟར་ཐར་བར་བྱ་སྙམ་པ་ལས། ཡང་མ་རིག་པ་འགགས་པས་རྒ་ཤིའི་བར་དུ་འགག་པའི་རྟེན་འབྲེལ་ལུགས་ལྡོག་རྩ་བ་ཆོད། བདག་མེད་ཕྱེད་དང་གཉིས་རྟོགས་པ་གཞིར་བྱས་ཏེ། སྦྱོར་ལམ་ལ་སོགས་པའི་ལམ་གྱི་རྟོགས་པ་རང་བྱུང་དུ་རྒྱུད་ལ་སྐྱེས་ནས་བསྒོམ་ལམ་གྱི་མཐར་ཟད་པ་དང་། མི་སྐྱེ་བ་ཤེས་པའི་ཡེ་ཤེས་གཉིས་མངོན་དུ་བྱས་ནས་དགྲ་བཅོམ་ཐོབ་པའོ། །བསེ་རུ་ལྟ་བུ་ནི། དམིགས་ཡུལ་བདེན་པ་བཞིས་བསྡུས་པའི་ཆོས་རྣམས་ལ་རྟེན་འབྲེལ་བཅུ་གཉིས་ལུགས་འབྱུང་དུ་བསྒོམས་པས། ཁམས་གསུམ་པའི་ཕྲ་རྒྱས་ཐམས་ཅད་སྤང་བར་འདོད་དོ། །དེ་ཡང་མ་རིག་པའི་རྒྱུ་ལས་འདུ་བྱེད། དེ་ལས་རྣམ་པར་ཤེས་པ་ནས་རྒ་ཤིའི་བར་ལ་སྔ་ཕྱི་རྒྱུ་འབྲས་སུ་ཤེས་ནས། ལྟ་བ་གང་ཟག་གི་བདག་དང་། ཆོས་བདག་གི་ཕྱེད་ཕྱི་བཟུང་བ་རྡུལ་ཕྲན་ཆ་བཅས་དང་ཆ་མེད་གཉིས་ཀ་མེད་པར། གཟུགས་བརྙན་ལྟར་རང་བཞིན་གྱིས་ངོ་བོ་མེད་ཅིང་མ་སྐྱེས་པར་རྟོགས་པའོ། །དེའང་ཆོས་བདག་ལ་ཕྱི་གཟུང་བ་དང་། ནང་གཉེན་པོར་འཛིན་པའི་ཤེས་པ་གཉིས་བདེན་པར་སྒྲོ་བཏགས་པ་ཡིན་ལ། གང་ཟག་གི་བདག་ནི་ཕུང་པོ་ལྔས་བསྡུས་པའི་ཆོས་ལ་སྤང་བྱའི་ཤེས་པ་ང་དང་ང་ཡིར་འཛིན་པ་སྟེ། གང་ཟག་དང་ཆོས་ཀྱི་བདག་ཅེས་བྱའོ། །འཕགས་པ་ཉན་ཐོས་ཀྱིས་གང་ཟག་གི་བདག་མེད་རྟོགས་ཀྱང་ཆོས་ཀྱི་མ་རྟོགས། རང་སངས་རྒྱས་ཀྱི་དེའི་སྟེང་དུ་ཆོས་ཀྱི་ཕྱེད་ཕྱི་གཟུང་བ་མེད་པར་རྟོགས་ཀྱང་། ནང་འཛིན་པ་མེད་པར་མ་རྟོགས་སོ། །དེའི་རང་བཞིན་གོ་བདེ་བར་བརྗོད་ན། གཟུང་བ་ཆོས་ཀྱི་བདག་མེད་ནི། ཕྱི་རོལ་གྱི་ཡུལ་ཐམས་ཅད་རང་བཞིན་མེད་པར་བསྒོམ་པའོ། །འཛིན་པ་ཆོས་ཀྱི་བདག་མེད་ནི། འཛིན་བྱེད་ཀྱི་ཤེས་པ་སྐྱེ་འགག་གནས་གསུམ་དང་བྲལ་བའི་སྐྱེ་མེད་སྟོང་པ་ཉིད་དེ། ཕྱི་མ་འདི་ཐེག་པ་ཆེན་པོས་རྟོགས་པ་ཡིན་པས་ཉན་རང་གིས་མ་རྟོགས་པའི་ཕྱིར་ཆོས་ཀྱི་བདག་མེད་ལ་ཕྱེད་སྒྲ་ཞུགས་པའོ། །རང་སངས་རྒྱས་རིགས་གཉིས་ཀའང་ལུས་ཀྱི་བརྡའི་སྒོ་ནས་ཆོས་སྟོན་གྱིས། ངག་གི་སྒོ་ནས་མི་སྟོན་པའོ། །དེ་ཡང་ཉན་རང་གཉིས་ཀ་ལ་དཀར་པོ་རྣམ་པར་མཐོང་བའི་ས་ལ་སོགས་པ་དམན་པའི་ས་བརྒྱད་བཤད་དེ། དེ་ལ་བརྟེན་ནས་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་སྟེ། རེ་རེ་ལ་ཞུགས་པ་དང་། གནས་པ་གཉིས་གཉིས་སུ་ཕྱེ་བས་སྐྱེས་བུ་ཆེན་པོའི་རིམ་པ་བརྒྱད་དམ་ཟུང་བཞི་ཡ་བརྒྱད་ཅེས་ཀྱང་གྲགས་པའོ། །བྱང་ཆུབ་སེམས་དཔའ་ལ་ནི་རབ་ཏུ་དགའ་བ་ལ་སོགས་པའི་ས་བཅུ་ལའང་དགེ་སྦྱོང་གི་འབྲས་བུ་བཞི་ཡོད་པར་བཤད་པ་ལ་སོགས་པ་ནི་རྒྱལ་བ་གཉིས་པའི་ལུགས་རྣམ་པར་བཞག་པ་ཡིན་ནོ། །དེ་ཡང་དགྲ་བཅོམ་པ་ཞེས་པ་ནི་ཡེ་ཤེས་གཉིས་ལྡན་གྱི་འབྲས་བུ་ཡིན་ཏེ། གང་ཞེ་ན་ཟད་པ་དང་། མི་སྐྱེ་བ་ཤེས་པའོ། །དེ་ལྟར་ཉན་རང་གི་དགྲ་བཅོམ་དེ་དག་ལྷག་མེད་དུ་འདས་ནས་འགོག་པའི་དབྱིངས་ལ་བཞུགས་པ་ཉིད། རང་གི་ལུགས་ལ་རྟག་པར་མི་གཡོ་བར་འདོད་ཀྱང་། ཐེག་ཆེན་པས་ཡས་གཞལ་ན། སྔར་ཚོགས་ཇི་ཙམ་བསགས་པའི་ཡུན་དུ་བློའི་འཇུག་པ་ཞི་བར་ཐིམ་ཡང་། དེ་ནས་བདེ་བ་ཅན་ལ་སོགས་པའི་དག་ཞིང་དུ་པདྨོའི་སྦུབས་སུ་སྐྱེ་བ་བཟུང་ནས་མ་རིག་པའི་བག་ཆགས་དང་། ཤེས་བྱའི་སྒྲིབ་པ་ཕྲ་མོའི་མཐུས་ལོ་བདུན་དུ་པདྨོ་ཁ་ཟུམ་ནས་གནས་པ་ལ། ཞིང་དེའི་སངས་རྒྱས་ཀྱི་ཐུགས་རྗེའི་མཐུས་པདྨོ་ཁ་འབྱེད་ཅིང་། ཏིང་ངེ་འཛིན་དེ་ལས་བསླང་བས། ཐེག་པ་ཆེན་པོ་ལ་འཇུག་པའི་སྤྲོ་བ་སྐྱེས་ནས་ལམ་བསྒོམ་པས་སྐུ་ཚེ་དེ་ཉིད་ལ་སངས་རྒྱ་བ་ནི། པདྨ་དཀར་པོ་ལས། ཉན་ཐོས་དེ་དག་ཇི་སྲིད་དུ། །སངས་རྒྱས་རྣམས་ཀྱིས་མ་བསྐུལ་བ། །དེ་སྲིད་ཡེ་ཤེས་ལུས་གཅིག་གིས། །ཏིང་འཛིན་མྱོས་པས་བརྒྱལ་ཏེ་གནས། །བསྐུལ་ནས་སྣ་ཚོགས་གཟུགས་ཀྱིས་ནི། །སེམས་ཅན་དོན་ལ་ཆགས་འབྱུང་ཞིང་། །བསོད་ནམས་ཡེ་ཤེས་ཚོགས་བསགས་ཏེ། །སངས་རྒྱས་བྱང་ཆུབ་ཐོབ་པར་འགྱུར། །ཞེས་པ་དང་མཐུན་པ་ལང་ཀར་གཤེགས་པ་ལས་ཀྱང་བཤད་དོ། །དེ་ལྟ་བུའི་མྱ་ངན་ལས་འདས་པ་ཐོབ་པའི་བར་ཆད་དུ་གྱུར་པ་ནི་འཇིག་རྟེན་ན་ལུང་མ་བསྟན་པ་བཅུ་བཞིར་གསུངས་པ་སྟེ། འདི་ལྟར་འཇིག་རྟེན་རྟག་པ་དང་། མི་རྟག་པ་དང་། རྟག་པ་ཡང་ཡིན། མི་རྟག་པ་ཡང་ཡིན་པ་དང་། རྟག་པ་ཡང་མ་ཡིན། མི་རྟག་པ་ཡང་མ་ཡིན་པ་དང་། འཇིག་རྟེན་མཐའ་དང་ལྡན་པ་དང་། འཇིག་རྟེན་མཐའ་དང་མི་ལྡན་པ་དང་། མཐའ་དང་ལྡན་པ་ཡང་ཡིན། མཐའ་དང་མི་ལྡན་པ་ཡང་ཡིན་པ་དང་། མཐའ་དང་ལྡན་པ་ཡང་མ་ཡིན་མཐའ་དང་མི་ལྡན་པ་ཡང་མ་ཡིན་པ་དང་། དེ་བཞིན་གཤེགས་པ་ཤི་ཕན་ཆོད་ཡོད་པ་དང་། དེ་བཞིན་གཤེགས་པ་ཤི་ཕན་ཆད་མེད་པ་དང་། དེ་བཞིན་གཤེགས་པ་ཤི་ཕན་ཆད་ཡོད་ཀྱང་ཡོད་ལ་མེད་ཀྱང་མེད་པ་དང་། དེ་བཞིན་གཤེགས་པ་ཤི་ཕན་ཆད་ཡོད་པ་ཡང་མ་ཡིན་མེད་པ་ཡང་མ་ཡིན་པ་དང་། སྲོག་གང་ཡིན་པ་དེ་ལུས་ཡིན་པ་དང་། སྲོག་ཀྱང་གཞན་ལ་ལུས་ཀྱང་གཞན་ཞེས་བྱ་བ་སྟེ། དངོས་པོ་བཅུ་བཞི་པོ་འདི་དག་དྲིས་ན་ལུང་མ་བསྟན་པར་བྱ་བ་ཡིན་པས་དེ་དག་གི་བློ་ཞི་བར་མི་ནུས་པས་བསམ་པར་མི་བྱེད་པའི་ཚུལ། བཤེས་སྤྲིང་ལས། ལུང་མ་བསྟན་པ་བཅུ་བཞི་འཇིག་རྟེན་ན། །ཉི་མའི་གཉེན་གྱིས་རབ་གསུངས་གང་དག་ལགས། །དེ་དག་རྣམས་ལ་བསམ་པར་མི་བགྱི་སྟེ། །དེ་ཡིས་བློ་འདི་ཞི་བར་བགྱིད་མ་ལགས། །ཞེས་སོ། །འོ་ན་གང་ཞིག་བསམ་པས་བྱང་ཆུབ་ཀྱི་ཕྱོགས་དང་མཐུན་པ་མཐའ་དག་སྐྱེ་བར་འགྱུར་ན། རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་པོ་འདིས་རྒྱལ་བ་བདེན་པར་སྨྲ་བའི་ཆོས་ཀྱི་དེ་ཉིད་རྣམ་པར་རིག་ཅིང་གྲུབ་པའི་མཐའ་ཐམས་ཅད་གཏན་ལ་འབེབས་པའི་མཛོད་ཡིན་པར་སྟོན་པའི་ཕྱིར། རྟེན་ཆོས་ཀུན་གྱི་རྩ་བ་མ་རིག་པ། །དེ་ལས་འདུ་བྱེད་རྣམ་ཤེས་མིང་དང་གཟུགས། །དེ་ལས་སྐྱེ་ཤིང་མཆེད་པ་རྣམ་པ་དྲུག །དེ་ལས་རེག་པ་དེ་ལས་ཚོར་བ་སྟེ། །དེ་ལས་སྲེད་པ་སྲེད་ལས་ལེན་པ་དང་། །དེ་ལས་སྲིད་པ་སྲིད་ལས་སྐྱེ་བ་སྟེ། །སྐྱེ་བ་ཡོད་ན་འདོད་པས་ཕོངས་པ་དང་། །མྱ་ངན་ན་རྒ་འཆི་སོགས་སྡུག་བསྔལ་གྱི། །ཕུང་པོ་ཤིན་ཏུ་ཆེ་བ་གྲུབ་པའི་ཕྱིར། །སྐྱེ་བ་འགགས་པས་ཐམས་ཅད་འགག་འགྱུར་བའི། །རྟེན་ཅིང་འབྲེལ་འབྱུང་རྒྱུ་འབྲས་ཟབ་མོ་ནི། །རྒྱལ་བ་བདེན་པར་སྨྲ་བའི་གསུང་གི་མཛོད། །ཅེས་སྨོས་ནས། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། དེ་བཞིན་དུ་སྦྱར་ནས་སྐྱེ་བའི་རྐྱེན་གྱི་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། ཡིད་མི་བདེ་བ་ལ་སོགས་སྡུག་བསྔལ་གྱི་ཕུང་པོ་ཆེན་པོ་ཐམས་ཅད་འབྱུང་བས་ན། བཤེས་སྤྲིང་ལས། སྐྱེ་བ་བཟང་པོ་མ་ལགས་སྐྱེ་བ་ནི། །གནོད་པ་དུ་མའི་སྣོད་གྱུར་ལགས་མཁྱེན་མཛོད། །ཅེས་སོགས་གསུངས་པ་བཞིན་ནོ། །དེ་ལྟར་ལུགས་ལས་འབྱུང་བའི་རྟེན་འབྲེལ་དེ་ཉིད་ལྡོག་པར་བྱས་པས་སྐྱེ་བ་འགག་པར་འགྱུར་ཏེ། སྐྱེ་བ་འགགས་པས་རྒ་བ་དང་འཆི་བ་ལ་སོགས་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་འདི་འགག་པར་འགྱུར་ལ། དེ་བཞིན་དུ་སྐྱེ་བ་འགགས་པས་སྲིད་པ་འགག་པར་འགྱུར་ལ། མ་རིག་པ་འགགས་པས་འདུ་བྱེད་འགགས་པའི་བར་དུ་འགྱུར་རོ། །མ་རིག་པ་ནི། མདོ་སྡེ་ནས་གང་སྔོན་གྱི་མཐའ་མི་ཤེས་པ་ཞེས་བྱ་བ་ལ་སོགས་བསྟན་ཀྱང་། དོན་ལ་སོ་སོ་རང་རིག་གི་ཡེ་ཤེས་ཀྱི་བདེན་པ་རྣམས་མི་ཤེས་པ་དེ་ནི་དོན་དམ་པར་མ་རིག་པ་ཡིན་ནོ། །བྱིས་པ་མ་རིག་པ་དེ་དང་ལྡན་པའི་ལས་དགེ་བ་དང་། མི་དགེ་བ་དང་། མི་གཡོ་བ་ནི་མ་རིག་པའི་རྐྱེན་གྱིས་འདུ་བྱེད་རྣམས་ཡིན་ནོ། །དེ་སྐད་དུ་རྩ་ཤེ་ལས། མ་རིག་པས་སྒྲིབ་ཡང་སྲིད་ཕྱིར། །འདུ་བྱེད་རྣམ་པ་གསུམ་པོ་དག །མངོན་པར་འདུ་བྱེད་གང་ཡིན་པའི། །ལས་དེ་དག་གི་འགྲོ་བར་འགྲོ། །ཞེས་སོ། །དེ་ཡང་འདུ་བྱེད་ཀྱིས་གང་བྱས་པ་དང་མཐུན་པའི་རྣམ་པར་འགྲོ་བ་གང་རུང་དུ་འགྲོ་ཞིང་དེའི་ཤེས་པ་བསྐྱེད་པ་ནི་རྣམ་པར་ཤེས་པའོ། །མདོ་ལས་ནི་འབྲས་བུ་རྒྱུས་བསྟན་པའི་དབང་དུ་མཛད་ནས། རྣམ་པར་ཤེས་པ་ཚོགས་དྲུག་གོ །ཞེས་གསུངས་སོ། །རྣམ་པར་སྨིན་པའི་རྣམ་པར་ཤེས་པ་ནི་ཕྲ་བ་ཉིད་ཀྱིས་རང་གི་ངོ་བོ་བསྟན་པར་བྱ་བ་མ་ཡིན་ཏེ། འབྲས་བུ་བསྟན་པའོ། །རྣམ་པར་ཤེས་པ་དེ་ཡང་རང་གི་འགྲོ་བ་དེར་འཇུག་དུས་ཁུ་རྡུལ་རླུང་སེམས་འདུས་པའི་ཆ་དེར་ཞུགས་པ་ལས་འདུ་བྱེད་རྣམས་ཀྱིས་རིམ་པ་གང་གིས་མིང་གཟུགས་ལ་སོགས་པ་མངོན་པར་འགྲུབ་པར་བྱེད་པ་འཕངས་པའི་རིམ་པ་དེ་ཁོ་ནས་རྐྱེན་དུ་གྱུར་པའི་ཕྱིར་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་ནས་རེག་པའི་རྐྱེན་གྱིས་ཚོར་བ་ཞེས་བྱ་བའི་བར་གྱིས་བཤད་དོ། །མིང་དང་གཟུགས་ནི། མའི་མངལ་དུ་ཉིང་མཚམས་སྦྱོར་བའི་གནས་སྐབས་ནས་ཚོར་བ་དང་། འདུ་ཤེས་དང་། འདུ་བྱེད། རྣམ་པར་ཤེས་པ་སྟེ་གཟུགས་ཅན་མ་ཡིན་པའི་ཕུང་པོ་བཞི་ནི་མིང་ཡིན་ལ། དེ་དག་འབྱུང་བ་དང་རྒྱུར་བྱས་པའི་གཟུགས་ཅི་རིགས་པར་སྦྱོར་རོ། །དེ་ལ་ཕུང་པོ་བཞི་ནི་ཡུལ་ལ་འགྲོ་བ་ཉིད་དང་ཡང་སྲིད་པར་འཁྲིད་པའི་ཕྱིར་མིང་ཉིད་ཡིན་ནོ། །འབྱུང་བ་དང་རྒྱུར་བྱས་པའི་གཟུགས་ནི་ཚ་གྲང་ལ་སོགས་པས་འགྱུར་བ་བསྐྱེད་པའི་ཕྱིར་གཟུགས་ཉིད་ཡིན་ནོ། །མིང་དང་གཟུགས་དེ་ཉིད་རྣམ་པར་འཕེལ་བས་རིམ་གྱིས་མིག་དང་རྣ་བ་ལ་སོགས་སྐྱེ་བའི་གནས་སྐབས་ནི་སྐྱེ་མཆེད་དྲུག་གི་རྐྱེན་དུ་འགྱུར་ཏེ། གནས་སྐབས་དེ་ནི་སྐྱེ་མཆེད་དྲུག་རྫོགས་པར་འགྱུར་བས་སོ། །སྐྱེ་མཆེད་དྲུག་ཉིད་ནི་སེམས་དང་སེམས་ལས་བྱུང་བ་རྣམས་སྐྱེ་བའི་སྒོའི་དོན་གྱིས་སོ། །སྐྱེ་མཆེད་དྲུག་པོ་དེ་དག་ཡོངས་སུ་སྨིན་པ་དང་། དབང་པོ་དང་། ཡིད་ལ་བྱེད་པ་དང་། ཡུལ་གསུམ་འདུས་ཤིང་མངོན་དུ་གྱུར་པ་ལས་རེག་པ་སྐྱེ་སྟེ། དཔེར་ན་གཟུགས་དང་། མིག་དབང་དང་། མིག་ཤེས་གསུམ་འདུས་པ་ལས་མིག་གི་འདུས་ཏེ་རེག་པ་སྐྱེ་བ་ལྟར། མིང་གཟུགས་རྣམ་ཤེས་གསུམ་ལས་མངལ་དུ་རེག་པ་སྐྱེ་བའི་རྟེན་གྱི་བྱེ་བྲག་གི་སྐྱེ་མཆེད་རྣམ་པ་དྲུག་ཁོ་ནའོ། །གཞན་ཡང་བདེ་བ་མྱོང་བར་འགྱུར་བ་ལ་སོགས་པའི་རེག་པ་ཅི་འདྲ་བ་དེ་དང་དེ་འདྲ་བར་བདེ་བ་དང་། སྡུག་བསྔལ་དང་། གཉིས་ཀ་མ་ཡིན་པའི་ཚོར་བ་སྐྱེའོ། །དེ་ལྟར་ནང་དུ་འདུ་བྱེད་རྣམས་ཀྱིས་འཕངས་པའི་ཡན་ལག་སྲེད་པ་དང་ལེན་པས་མངོན་པར་བརླན་པ་ནི་འཆི་བའི་དུས་ནི་སྲིད་པར་འགྱུར་རོ། །དེ་ནས་ཇི་ལྟར་འཕངས་པའི་རིམ་པས་སྐྱེ་བར་ཡང་འགྱུར། རྒ་བ་དང་འཆི་བར་ཡང་འགྱུར་རོ། །དེ་ལ་སྲིད་པའི་མཚན་ཉིད་ནི་ཚོར་བ་ལས་སྲེད་པ་འཕེལ་ཏེ་བུར་ཤིང་གི་མངར་བ་ཚོར་བས་དེའི་རོ་ལ་སྲེད་པའམ། དེ་ལས་ལྡོག་པ་སྟེ། ཚོར་བ་བདེ་བ་ནི་མི་འབྲལ་བར་འདོད། སྡུག་བསྔལ་ནི་འབྲལ་བར་འདོད། གཉིས་ཀ་མ་ཡིན་པ་ལ་གཉིས་ཀར་མི་འདོད་པའོ། །དེ་ཡང་མདོ་ལས་འདོད་པ་དང་། གཟུགས་དང་གཟུགས་མེད་ན་སྤྱད་པའི་བྱེ་བྲག་གིས་རྣམ་པ་གསུམ་དུ་བསྟན་ཏོ། །ལེན་པ་ནི་ཉེ་བར་ལེན་པ་སྟེ་འདོད་པ་ལ་སོགས་པ་ལ་འདུན་པའི་འདོད་ཆགས་གང་ཡིན་པའོ། །མདོ་ལས་ནི་དམིགས་པའི་བྱེ་བྲག་གི་འདོད་པ་དང་། ལྟ་བ་དང་། ཚུལ་ཁྲིམས་དང་། བརྟུལ་ཞུགས་དང་། བདག་ཏུ་བལྟ་བའི་ཉེ་བར་ལེན་པ་ཞེས་བྱ་བ་རྣམ་པ་བཞིར་བསྟན་ཏེ། འདུན་པའི་འདོད་ཆགས་དེས་འདོད་པ་ལ་སོགས་པ་ཉེ་བར་བླངས་པར་འགྱུར་བས་སོ། །སྲེད་པ་དང་ལེན་པ་གཉིས་ལ་ཁྱད་པར་འདི་ཡོད་དེ། ཁྱད་པར་མེད་པ་ཡང་སྲིད་པ་མངོན་པར་འདོད་པ་ནི་སྲེད་པའོ། ཁྱད་པར་དུ་མངོན་པར་འདོད་པ་ནི་ལེན་པའོ། །ཡང་ན་རིང་བའི་རྒྱུ་སྲེད་པ་དང་། ཉེ་བའི་རྒྱུ་ལེན་པ་ཡིན་པར་རིགས་པར་བྱའོ། །འདུ་བྱེད་ཀྱི་ས་བོན་སྲེད་པ་དང་ལེན་པས་མངོན་པར་བརླན་པ་དེ་ཉིད་འབྲས་བུ་བསྐྱེད་པར་མངོན་དུ་ཕྱོགས་པ་ནི་སྲིད་པ་ཞེས་བྱ་སྟེ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོ་ལྔ་ནི་སྲིད་པ་ཡིན་ནོ། །མདོ་ལས་ནི་སྔ་མ་བཞིན་དུ་ཁམས་གསུམ་པའི་སྲིད་པ་ཞེས་གསུངས་སོ། །འོན་ཀྱང་འདིར་ནི་འདས་པའི་སྲིད་པ་ཁོ་ན་ཡིན་པར་བཟུང་ངོ་། །སྲིད་པའི་མཇུག་ཐོགས་སུ་སྐྱེ་བ་ཡིན་ཏེ། མིང་དང་གཟུགས་ཀྱི་རིམ་གྱིས་ཚོར་བའི་བར་ཉིད་དོ། །སྐྱེས་ནས་ནི་རྒ་བ་དང་། འཆི་བ་ལ་སོགས་པར་འགྱུར་རོ། །ཡང་ཡན་ལག་བཅུ་གཉིས་མདོར་བསྡུས་ན། ཡན་ལག་བཞིར་ནི་བགྲངས་པ་སྟེ། །གསུམ་དང་བཞི་དང་གསུམ་དང་ནི། །གཉིས་པོ་དག་སྟེ་གོ་རིམ་བཞིན། །ཞེས་པ་ལྟར་འཕེན་པར་བྱེད་པའི་ཡན་ལག་དང་། འཕངས་པའི་ཡན་ལག་དང་། མངོན་པར་འགྲུབ་པར་བྱེད་པའི་ཡན་ལག་དང་། མངོན་དུ་འགྲུབ་པར་བྱེད་པའི་ཡན་ལག་གོ །ཞེས་རེ་ཞིག་སྐྱེ་བ་གཉིས་རྣམ་པར་བཞག་པའི་དབང་དུ་མཛད་ནས་བཤད་དོ། །མདོ་ལས་ནི་མ་རིག་པ་དང་འདུ་བྱེད་འདི་ནི་སྔོན་གྱི་མཐའ་པའི་འཕེན་པར་བྱེད་པ་ཡིན་ནོ་ཞེས་འབྱུང་བའི་ཕྱིར། ཡན་ལག་བཅུ་གཉིས་སྐྱེ་བ་གསུམ་དུ་རྣམ་པར་བཞག་པའི་ཚུལ། མ་རིག་པ་དང་འདུ་བྱེད་ནི་འདས་པའི་སྐྱེ་བའོ། །རྣམ་པར་ཤེས་པ་ནས་སྲིད་པའི་བར་དུ་ནི་ད་ལྟར་འབྱུང་བའི་སྐྱེ་བའོ། །སྐྱེ་བ་དང་རྒ་བ་ནི་མ་འོངས་པའི་སྐྱེ་བའོ། །དེ་ལས་འདས་པའི་སྐྱེ་བ་ནི་མ་རིག་པའི་རྐྱེན་གྱིས་འདུ་བྱེད་བྱས་པ་རྣམས་ཀྱིས་སྐྱེ་བ་འདི་ལ་ཉིང་མཚམས་སྦྱོར་བའི་རྣམ་པར་ཤེས་པ་ནས་བཟུང་སྟེ། ཚོར་བའི་བར་གྱིས་རྣམ་པར་སྨིན་པ་འགྲུབ་ལ། ད་ལྟར་བྱུང་བའི་སྲེད་པ་དང་། ལེན་པ་དང་། སྲིད་པ་རྣམས་ཀྱིས་མ་འོངས་པའི་སྐྱེ་བ་ལ་སོགས་པ་བསྐྱེད་དོ། །སྐྱེ་བ་གསུམ་རྣམ་པར་བཞག་པའི་དགོས་པ་ནི། སྔོན་དང་ཕྱི་མའི་མཐའ་དང་། བར་དག་ལ་ཀུན་ཏུ་རྨོངས་པ་རྣམ་པར་བཟློག་པ་ཡིན་ནོ། །ཞེས་གསུངས་སོ། །ཡང་རྟེན་ཅིང་འབྲེལ་བར་འབྱུང་བ་དེ་ལམ་གསུམ་དུ་བཞག་པ་ནི། མ་རིག་པ་དང་སྲེད་པ་དང་ལེན་པ་རྣམས་ཉོན་མོངས་པའི་ལམ་མོ། །འདུ་བྱེད་དང་སྲིད་པ་ནི་ལས་ཀྱི་ལམ་མོ། །ཡན་ལག་ལྷག་མ་རྣམས་ནི་རྣམ་པར་སྨིན་པའི་ལམ་མོ། །ཞེས་སློབ་དཔོན་བློ་གྲོས་ཆེན་པོས་ལུང་དང་ཡང་བསྟུན་ནས་བཤད་པ་ཡིན་ནོ། །དེ་ལྟ་བུའི་རྟེན་འབྲེལ་རྒྱུན་ཆགས་ཀྱི་ངོས་ནས་རྫོགས་ཚུལ་ནི། སེམས་ཙམ་པས་རྒྱུ་འབྲས་ཚར་གཅིག་ཚེ་གཉིས་ལ་རྫོགས་པར་འདོད་དེ། ཚེ་སྔ་མ་ལ་མ་རིག་པ། འདུ་བྱེད། རྣམ་ཤེས། སྲེད་པ། ལེན་པ། སྲིད་པ་སྟེ་རྒྱུ་དྲུག་རྫོགས་ནས། འདིར་ལྷག་མ་དྲུག་འབྲས་བུའི་ཚུལ་དུ་རྫོགས་པའོ། །དེ་དག་ནི་ནང་གི་རྟེན་འབྲེལ་ཏེ། ཕྱིའི་རྟེན་འབྲེལ་ས་བོན་ལ་བརྟེན་ནས་མྱུ་གུ་འབྱུང་བ་ལ་སོགས་པས་མཚོན་འཁོར་འདས་ཐམས་ཅད་རྟེན་ཅིང་འབྲེལ་འབྱུང་གི་ཆོས་ཉིད་དུ་གཏན་ལ་ཕེབས་པ་ཡིན་པས་ན། དེ་བཞིན་གཤེགས་པའི་གསུང་གི་གཅེས་པར་གྱུར་བ་དང་། གང་གིས་འདི་ཤེས་པ་དེས་སྟོན་པའི་བསྟན་པ་ཡང་དག་པར་རྟོགས་སླ་བ་ཡིན་ནོ། །ཞེས་ཐུན་མོང་གི་གཞུང་དང་མཐུན་པར་བསྟན་པ་དེ། ཇི་སྐད་དུ་དགེ་སློང་དག། གང་གིས་སཱ་ལུ་ལྗངས་པ་འདི་ཤེས་པ་དེས་རྟེན་ཅིང་འབྲེལ་བར་འབྱུང་བ་ཤེས་སོ། །གང་གིས་རྟེན་ཅིང་འབྲེལ་བར་འབྱུང་བ་ཤེས་པ་དེས་ཆོས་ཤེས་སོ། །གང་གིས་ཆོས་ཤེས་པ་དེས་སངས་རྒྱས་ཤེས་སོ། །གསུངས་པ་ལྟ་བུ་ཡིན་ནོ། །དེ་ལྟ་ནའང་། དམན་པའི་ལམ་དེ་དག་ནི་རེ་ཞིག་ཐེག་པ་ཆེན་པོའི་འབབ་སྟེགས་ཙམ་ཡིན་ཏེ། འོད་སྲུང་གིས་ཞུས་པའི་མདོ་ལས། དེ་དག་གི་རྟོག་པའི་སྟོང་པ་ཉིད་ནི་ཡུངས་འབྲུ་སྲིན་གྱིས་ཟོས་པའི་ནང་གི་ནམ་མཁའ་ལྟ་བུའོ། །ཞེས་དང་། ཡུམ་ལས། ཉན་ཐོས་ཀྱི་ས་ལ་མྱ་ངན་ལས་འདའ་བར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ཞེས་པས་དོན་དམ་པར་ཆོས་ཉིད་སྐྱེ་བ་མེད་པ་ཡོངས་གྲུབ་ཆེན་པོའི་ལམ་ནས་མྱ་ངན་ལས་འདའ་བའི་གནས་གང་ཡིན་པ་ཐོབ་པར་འགྱུར་རོ་ཞེས་སྟོན་པའི་ཕྱིར། དེ་ལྟ་མོད་ཀྱི་སྲིད་པར་འདུ་བྱེད་པའི། །མཐོ་དམན་ལས་དང་དཀར་ནག་རྒྱུ་འབྲས་ཆོས། །ཀུན་ལས་འདས་པ་ཞི་བ་དམ་པའི་དངོས། །སྐྱེ་བ་མེད་པའི་ཆོས་ཉིད་རྟོགས་ལས་འབྱུང་། །འདི་ལྟར་འཁོར་བར་འདུ་བྱེད་པའི་རྒྱུའི་གཙོ་བོ་ནི་མ་རིག་པ་ལས་བྱུང་བའི་ལས་ཀྱི་མཐས་སྲིད་པའི་རྩེ་མོ་ནས་མནར་མེད་པའི་བར་གྱི་གནས་རིགས་མཐོ་དམན་དུ་འཁྲིད་པར་བྱེད་པ་དེ་ཡང་འོག་མའི་བློས་བཏགས་པ་ཙམ་ལས་དོན་ལ་མ་གྲུབ་པའི་ཆོས་ཉིད་ཞི་བ་ཆེན་པོ་སྐྱེ་བ་མེད་པ་ཉིད་དུ་མ་རྟོགས་པ་ལས་བྱུང་སྟེ། རྣམ་ངེས་ལས། ཐམས་ཅད་མཁྱེན་པའི་གཟིགས་པ་མ་ལོག་པ་ནི་དུས་ཐམས་ཅད་དུ་མེད་པར་གོ་བར་བྱེད་པ་ཁོ་ན་ཡིན་ནོ། །ཞེས་པས་འདིར་དེའི་རང་བཞིན་ལྡོག་པར་བྱ་བའི་ཚུལ། བདེན་པ་བཞི་པོ་དེ་དག་ལས་སྡུག་བསྔལ་གྱི་བདེན་པ་དེ་ཡང་མེད་པ་ལ་ཡོད་པར་བཏགས་པའི་སྣང་བ་རྟེན་ཅིང་འབྲེལ་འབྱུང་གི་འཁྲུལ་པའི་སྣང་བ་སྟེ། ཀླུ་སྒྲུབ་ཀྱིས། རྟེན་ཅིང་འབྲེལ་འབྱུང་མ་ཡིན་པའི། །སྡུག་བསྔལ་ཡོད་པར་ག་ལ་འགྱུར། །མི་རྟག་སྡུག་བསྔལ་གསུངས་པ་དེ། །རང་བཞིན་ཉིད་ལ་ཡོད་མ་ཡིན། །ཞེས་དོན་དམ་པའི་བདེན་པ་གཟིགས་པ་རྣམས་ལས་རྒྱུར་སྨྲ་བ་འདོད་པ་མ་ཡིན་ནོ། །དེ་བཞིན་དུ་ཀུན་འབྱུང་ཀྱང་དཔེར་ན་མ་བྱིན་ལེན་ལ་མཚོན་ན། བླང་བྱའི་དངོས་པོ་དེ་དུས་གསུམ་དུ་ཕྱེ་ཞིང་། ཕྲད་པ་བརྟགས་པ་དང་། སྐད་ཅིག་སྔ་ཕྱིར་དབྱེ་བས། བརྐུ་བའི་དུས་འགགས་པས་དངོས་པོར་མ་གྲུབ་པ་ཉིད་དེ། འདི་ལྟར་བརྐུ་བའི་ཡུལ་དང་། རྐུ་བྱེད་ཀྱི་ཤེས་པ་ལ་སོགས་པའི་སྐད་ཅིག་དུ་མ་འཐུད་ནས་རྒྱུན་བརྩམ་པ་ཡིན་ཏེ། སྐད་ཅིག་སྔ་ཕྱི་མ་ཕྲད་ན་རྐུན་པོའི་བྱ་བ་བྱེད་པར་མི་འགྱུར་ཏེ། དཔེར་ན་ཀེ་ལ་ཤ་ཞེས་བརྗོད་དུས་ཡི་གེའི་སྐད་ཅིག་མ་གསུམ་པོ་སྔ་ཕྱི་བྲེང་ཆགས་སུ་འབྲེལ་བས་གངས་རིའི་མིང་འགྲུབ་ལ། མ་འབྲེལ་ན་མི་འགྲུབ་པ་བཞིན་ནོ། །དེ་ཕྱིར་རྩ་ཤེ་ལས། རང་བཞིན་ལས་ནི་ཡོད་མིན་ན། །ཅི་ཞིག་ཀུན་ཏུ་འབྱུང་བར་འགྱུར། །དེ་ཕྱིར་སྟོང་ཉིད་གནོད་བྱེད་ལ། །ཀུན་འབྱུང་ཡོད་པ་མ་ཡིན་ནོ། །ཞེས་བཤད་དོ། །འགོག་པ་ཡང་སྡུག་བསྔལ་དང་ཀུན་འབྱུང་གཉིས་རང་བཞིན་མེད་པར་ཁེགས་པས། དེ་གཉིས་འགག་པས་འགོག་པ་ཁེགས་ཏེ། དགག་གཞི་མེད་ན་འགོག་པ་མེད་པས་ནད་མེད་པ་ལ་སྨན་མི་དགོས་པ་བཞིན་ནོ། །དེ་སྐད་དུ་སྔ་མ་ལས། སྡུག་བསྔལ་རང་བཞིན་གྱིས་ཡོང་ལ། འགོག་པ་འཐད་པ་མ་ཡིན་ནོ། །ཞེས་སོ། །ལམ་དགག་པ་ནི། ལམ་དེ་ཉོན་མོངས་པའི་གཉེན་པོར་བསྒོམ་ན། ཉོན་མོངས་པ་དེ་དང་དུས་མཉམ་དུ་བསྒོམ་མམ་ཐ་དད་དུ་བསྒོམ། དུས་མཉམ་དུ་བསྒོམ་ན་རྒྱུད་གཅིག་ལ་སྤང་བྱ་དང་གཉེན་པོ་རྫས་འགལ་ལ། ཐ་དད་དུ་བསྒོམ་ན་མར་མེ་སྐྱེ་བཞིན་པས་མུན་པ་སེལ་བར་མི་བྱེད་པ་བཞིན། ཉོན་མོངས་པ་སྐྱེ་བཞིན་པའི་གཉེན་པོ་དེས་ཉོན་མོངས་པ་ཟིལ་གྱིས་མི་ནོན་པ་སྟེ། སྔ་མ་ལས། གང་ཚེ་མར་མེ་སྐྱེ་བཞིན་པ། །མུན་པ་དང་ནི་ཕྲད་པ་མེད། །ཇི་ལྟར་མར་མེ་སྐྱེ་བཞིན་པས། །མུན་པ་སེལ་བར་བྱེད་མ་ཡིན། །མར་མེ་ཕྲད་པ་མེད་པར་སྤང་། །གལ་ཏེ་མུན་པ་སེལ་བྱེད་ན། །འདི་ན་གནས་པ་དེས་གསལ་འགྱུར། །ཞེས་སོ། །ལམ་དེའི་སྤང་བྱ་དང་རྡུལ་ཕྲན་ཆ་མེད་ཀྱང་སྐད་ཅིག་སྔ་ཕྱི་ཕྲད་པ་མེད་པས་མ་གྲུབ་སྟེ། དཔེར་ན་ས་ར་ཧ་བརྗོད་དུས། ར་དེ་ཡི་གེ་སྔ་ཕྱི་གཉིས་དང་དུས་གཅིག་ཕྲད་དམ་རེ་མོས་སུ་ཕྲད། དུས་གཅིག་ཏུ་ཕྲད་ན་དུས་གསུམ་གྱི་དངོས་པོ་ཐམས་ཅད་དུས་མཉམ་པས་ན་སྐད་ཅིག་མ་ཁོ་ན་ལས་མི་སྲིད་པར་ཐལ། རེ་མོས་སུ་ཕྲད་ན་ར་ཞེས་པའི་སྐད་ཅིག་དེ་ཉིད་ཆ་གཉིས་སུ་ཐལ་ཏེ་དང་པོ་ས་དང་ཕྲད་ཅིང་། ཕྱི་ནས་ཧ་དང་ཕྲད་པའི་ཕྱིར་རོ། །འདོད་ན་སྐད་ཅིག་ཆ་མེད་ཉམས་སོ། །དེ་སྐད་དུ། སྔ་ཕྱི་གཉིས་ཀྱིས་ཕྲད་པ་ན། །སྐད་ཅིག་དུས་ཆ་གཉིས་སུ་འགྱུར། །གཉིས་པོ་དག་ནི་དུས་མཉམ་ན། །བསྐལ་པ་སྐད་ཅིག་གཅིག་པར་འགྱུར། །ཞེས་སོ། །འགོག་པ་མངོན་དུ་བྱེད་པའང་མི་རུང་སྟེ། འགོག་པ་ཉིད་བཀག་པས་མངོན་དུ་བྱེད་པ་ཁེགས་པ་ཉིད་དེ། དགག་བྱ་འདས་ན་འགོག་པའི་རྒྱུ་མེད་ལ། མ་འགགས་ན་མི་ཁེགས་པ་དང་། དེ་གཉིས་དུས་མཉམ་ན་ངོ་བོ་ཐ་དད་དུ་མི་རུང་། མི་མཉམ་ན་དགག་བྱ་དང་འགོག་བྱེད་དུ་མི་རུང་བའི་ཕྱིར། བདེན་པ་བཞི་ཆར་མ་གྲུབ་པ་ཉིད་དེ། ཡུམ་ལས་འཕགས་པའི་བདེན་པ་རྣམས་ཀྱང་ངོ་བོ་ཉིད་མེད་དོ། །ཞེས་དང་། བྱིན་གྱིས་བརླབས་པའི་བཀར། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་མེད། ཡེ་ཤེས་མེད། ཐོབ་པ་མེད། མ་ཐོབ་པ་ཡང་མེད་དོ། །ཞེས་དང་། ལང་ཀར་གཤེགས་པ་ལས། སྐྱེ་བ་མེད་པ་བདེན་པ་གཅིག་ཡིན་ཏེ། །བྱིས་པ་རྣམས་ནི་བདེན་པ་བཞི་ཞེས་སྨྲ། །བྱང་ཆུབ་སྙིང་པོར་ཞུགས་ནས་བདེན་གཅིག་ཀྱང་། །གྲུབ་པ་མེད་ན་བཞི་ལྟ་ག་ལ་ཡོད། །ཅེས་སོ། །དེ་བཞིན་དུ་རྟེན་འབྲེལ་ཀྱང་རྟེན་ཆོས་ཕན་ཚུན་ཕྲད་པར་མ་གྲུབ་སྟེ། མ་རིག་པ་ཚར་བཅད་པས་འདུ་བྱེད་དང་མཚམས་སྦྱོར་བ་ཁེགས་ལ། རྣམ་ཤེས་མངལ་དང་ཕྲད་པ་བཀག་པས་མིང་དང་གཟུགས་མེད་དོ། །སྐྱེ་མཆེད་དྲུག་མེད་དེ་རྣམ་ཤེས་བསྐྱེད་པའི་ནུས་པ་བཀག་པས་སོ། །རེག་ཚོར་དང་སྲེད་ལེན་སོགས་ཀྱང་དོན་སྤྱི་རྫུན་པ་ལ་ལྟོས་ནས་བཀག་གོ །དེའི་ཕྱིར་ཡུམ་ལས། རྟེན་ཅིང་འབྲེལ་བར་འབྱུང་བ་རྣམས་ཀྱང་རང་བཞིན་གྱིས་རྣམ་པར་དག །ཅེས་སོ། །དེ་ལྟ་མོད་ཀྱི་རྒྱུ་འབྲས་ལ་རྨོངས་པའི་གཉེན་པོར་ལས་དགེ་མི་དགེ་ལ་བརྟེན་ནས་འབྲས་བུ་འདོད་མི་འདོད་འབྱུང་བ་ཤེས་ནས་འདོར་ལེན་ལ་བརྩོན་ཞིང་། རྟེན་འབྲེལ་སྣང་ལ་རང་བཞིན་མ་གྲུབ་པ་ཙམ་དུ་བལྟ་བ་ཡིན་ནོ། །དེའི་ཕྱིར་ཉན་ཐོས་ཀྱི་ལམ་ལས་དགྲ་བཅོམ་ཞིང་འགོག་པར་བཞུགས་པ་དེ་དག་ཀྱང་། མཐར་ཐུག་བྱང་ཆུབ་ཏུ་ཐུགས་བསྐྱེད་ནས་ཐེག་པ་ཆེན་པོའི་ཚོགས་ལམ་ཆུང་ངུ་ནས་འཇུག་ཅིང་དེ་དང་མཐུན་པའི་ལམ་ལྔ་མངོན་དུ་བྱས་ནས་མྱ་ངན་ལས་འདའ་ཞིང་དེ་བཞིན་གཤེགས་པའི་རང་བཞིན་དུ་འགྱུར་བ་ཤ་སྟག་ཡིན་ཏེ། མྱང་འདས་ལས། དགྲ་བཅོམ་པ་ཡང་ཡོངས་སུ་མྱ་ངན་ལས་འདས་ནས་འགོག་པར་ཞུགས་ཏེ། བསྐལ་པ་སྟོང་ཕྲག་བཅུ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཡིན་ནོ། །ཞེས་སོ། །དེ་ལྟར་སེམས་བསྐྱེད་ནས་ལམ་བསྒྲུབ་དུས་ཀྱང་སྔར་གྱི་ཞི་བ་གཅིག་པུ་འཚོལ་བའི་བློ་ངན་དེ་གོམས་པས་སངས་རྒྱས་ཀྱི་ཞིང་སྦྱོང་ཞིང་སེམས་ཅན་སྨིན་པའི་ཚོགས་རྫོགས་པ་ལ་བར་དུ་གཅོད་པས། བྱང་ཆུབ་སེམས་དཔའ་ལས་དང་པོ་པ་ཞིག་དང་སེམས་དང་པོར་བསྐྱེད་པ་དུས་མཉམ་ཡང་ཉན་རང་སེམས་བསྐྱེད་པ་དེ་ཕྱིར་བསྐལ་པ་བཞི་བཅུས་བུལ་བར་འགྱུར་ཏེ། མདོ་སྡེ་རྒྱན་ལས། དེ་གཉིས་ཡང་དང་ཡང་དུ་ནི། །རང་སེམས་ཀུན་ཏུ་འབྱུང་ལྡན་པས། །མྱ་ངན་འདས་པ་མངོན་དགའི་ཕྱིར། །རྟོག་པ་བུལ་བ་ཡིན་པར་འདོད། །ཅེས་ཡང་དང་ཡང་དུ་འཁོར་བ་ལ་ཡིད་འབྱུང་ཞིང་། མྱུར་བ་མྱུར་བར་མྱ་ངན་ལས་འདའ་བར་འདོད་པའི་བློ་དེས་བྱང་ཆུབ་སེམས་དཔའ་སེམས་བསྐྱེད་པ་ཐོག་མཉམ་དང་ཁྱད་པར་བྱེད་པ་ཡིན་ནོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། འཁོར་བ་སྡུག་བསྔལ་གྱི་ཚོམས་དང་འབྲེལ་པར་ཐར་པའི་ཕན་ཡོན་སྐྱེས་བུ་འབྲིང་གི་ལམ་རྣམ་པར་བཞག་པའི་སྐབས་ཏེ་རབ་བྱེད་བཞི་པའི་འགྲེལ་པའོ།། །།ད་ནི་ཐེག་པ་ཆེན་པོ་སྐྱེས་བུ་མཆོག་གི་ལམ་ཐམས་ཅད་མཁྱེན་པའི་འཇུག་ངོགས་ཀྱི་ཐོག་མར་འཁོར་ལོ་ཆེན་པོ་བཞི་སྟོན་པའི་ཕྱིར། ཡུལ་ནི་མཐུན་པར་གྱུར་པ་དག་ལ་བསྟེན། །སྐྱེས་བུ་དམ་པ་བསྟེན་ལས་ཡོན་ཏན་འཐོབ། །ལེགས་པར་སྨོན་དང་བསོད་ནམས་སྐྱབས་འདུན་ལ། །འཁོར་ལོ་ཆེན་པོ་བཞི་ཞེས་ཀླུ་དབང་བཞེད། །ཅེས་སྨོས་པ་ནི་མདོར་བསྟན་པ་སྟེ། འདི་ལྟར་ཕྱུགས་དང་གླང་པོ་ཆེས་ཉིན་ཞག་དུ་མར་བགྲོད་པའི་བཤོལ་ལམ་འཁོར་ལོ་བཞིའི་འཁྲུལ་འཁོར་གྱིས་འདེགས་པའི་ཤིང་རྟའི་བགྲོད་པས་ཡུད་ཙམ་ལ་གཅོད་པ་བཞིན། འཕགས་པའི་ལམ་གྱི་ཤིང་རྟས་བགྲོད་པའི་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པའི་གོ་འཕང་བགྲོད་པ་ལ་འཁོར་ལོ་ཆེན་པོ་བཞི་དང་ལྡན་དགོས་ཏེ། བཞི་གང་ཞེ་ན། ཡུལ་མཐུན་པར་གྱུར་པ་ནི་གང་ཞིག་སེམས་མཉམ་པར་བཞག་པ་དང་མི་མཐུན་པ་མེད་ཅིང་འཚེ་དོགས་དང་བྲལ་བའོ། །དམ་པ་ལ་བསྟེན་པ་ནི་ལུང་ཕུན་སུམ་ཚོགས་པའམ། རྟོགས་པ་ཕུན་སུམ་ཚོགས་པའི་ཡོན་ཏན་གྱི་ཁྱད་པར་དུ་བྱས་པའོ། །དེ་བཞིན་དུ་བླ་མའི་གནས་སུ་གྱུར་པའམ་མཛའ་བོའང་རུང་སྟེ། ཡིད་བརྟན་དུ་རུང་བ། སྨྲ་མཁས་པ། ཚིག་བཟོད་པ། དོན་ཟབ་མོ་སྟོན་པ་སྟེ་འདི་ལྟར་ཚིག་ནི་སྐྱོན་ཡོན་ཐམས་ཅད་ཀྱི་འབྱུང་གནས་ཡིན་ཕྱིར། བཤེས་སྤྲིང་ལས་ཀྱང་། རྒྱལ་བས་སྙིང་ལ་འབབ་དང་བདེན་པ་དང་། །ལོག་པར་སྨྲ་ལྡན་སྐྱེས་བུ་རྣམས་ལ་ནི། །སྦྲང་རྩི་མེ་ཏོག་མི་གཙང་ལྟ་བུའི་ཚིག །རྣམ་གསུམ་བཀའ་སྩལ་དེ་ལས་ཐ་མ་སྤང་། །ཞེས་ཚིག་སྙན་པ་ནི་སྙིང་ལ་འབབ་པ་སྦྲང་རྩི་ལྟ་བུ་དང་། ཚིག་བདེན་པ་ནི་བསྔགས་པར་འོས་པའི་ཕྱིར་ན་མེ་ཏོག་ལྟ་བུ་སྟེ་གཉིས་པོ་དང་ལྡན་ལ། ཚིག་ལོག་པ་ནི་སྨད་པའི་གནས་ཏེ་མི་གཙང་བ་ལྟ་བུ་སྤངས་པའི་ཐ་ཚིག་ལ་གནས་པ། དེའི་རྗེས་སུ་བསླབས་ན་ཚུལ་ཁྲིམས་དང་། ཐོས་པ་དང་། གཏོང་བ་དང་། ཤེས་རབ་འཕེལ་བར་འགྱུར་ཞིང་། གནས་མ་ཡིན་པ་ལས་ལྡོག་པར་བྱེད་པ་དེ་འདྲ་བ་ནི་སྐྱེས་བུ་དམ་པ་ཞེས་བྱའོ། །ལེགས་པར་སྨོན་པ་ནི་བདག་ཉིད་ཀྱིས་ཇི་སྐད་བཤད་པ་བཞིན་བྱེད་པའི་སྒོ་ནས་ལེགས་པར་བསྒྲུབ་པའོ། །བསོད་ནམས་ཀྱི་སྐྱབས་ལ་འདུན་པ་ནི་ཚེ་སྔོན་མ་ནས་ད་ལྟའི་བར་ཚོགས་བསགས་པ་དང་ལྡན་པའོ། །དེ་སྐད་དུ་ཀླུའི་དབང་པོས། མཐུན་པར་གྱུར་པའི་ཡུལ་ན་གནས་པ་དང་། །སྐྱེས་བུ་དམ་པ་ལ་ནི་བསྟེན་པ་དང་། །བདག་ཉིད་ལེགས་སྨོན་སྔོན་ཡང་བསོད་ནམས་བགྱིས། །འཁོར་ལོ་ཆེན་པོ་བཞི་ནི་ཁྱོད་ལ་མངའ། །ཞེས་རྐང་པ་ཐ་མས་རྒྱལ་པོ་བདེ་སྤྱོད་ཀྱང་འཕགས་པའི་ལམ་གྱི་སྣོད་ཡིན་པར་བསྟན་པ་བཞིན་ནོ། །ད་ནི་དེའི་རང་བཞིན་རྒྱས་པར་དབྱེ་བའི་ཕྱིར། ཚོགས་ཀྱི་དབུས་ན་དུག་ཅན་ཟས་ལྟ་བུའི། །ཡུལ་དང་རྐྱེན་གྱི་རྣམ་འགྱུར་ཤིན་ཏུ་རྒོད། །དེ་ལས་བསྲིངས་ནས་གཅིག་པུར་ཞི་ལ་མོས། །རྙེད་ལ་མ་ཆགས་རླུང་དང་མཁའ་ལྡིང་བཞིན། །འདི་ལྟར་རྒྱལ་པོའི་ཁབ་དང་། གྲོང་ཁྱེར་དང་། གྲོང་རྡལ་དང་། གྲོང་གཅིག་པ་ལ་སོགས་པའམ། སྙིགས་མར་སྤྱོད་པའི་དགོན་གནས་དག་ཀྱང་རུང་སྟེ། མང་པོ་ཚོགས་པའི་དབུས་ན་དགྲ་གཉེན་དང་། ཆགས་སྡང་དང་། ཕྱོགས་རིས་དང་། འཐབ་རྩོད་དང་། ཚོང་དང་། སོ་ནམ་དང་། འདུ་འཛི་དང་། རྙེད་བཀུར་དང་། རྣམ་གཡེང་དང་། ཕྲག་དོག་དང་། འགྲན་ཟླ་དང་། གཟི་བརྗིད་ཀྱིས་རྒྱགས་པ་དང་། གསོག་པ་དང་། བསྲུང་བ་དང་། སྤེལ་བ་ལ་སོགས་ཡུལ་ཉེ་བར་སྤྱད་པའི་རྐྱེན་དང་ཕྲད་པའི་རྣམ་འགྱུར་ལས་ཆགས་སྡང་བར་མ་གསུམ་གྱིས་བསླུ་ཞིང་ཉོན་མོངས་པའི་རྒྱུ་ཚང་བ་ནི། དབྱིག་གཉེན་གྱིས། ཕྲ་རྒྱས་སྤངས་པ་མ་ཡིན་དང་། །ཡུལ་ནི་ཉེ་བར་གྱུར་པ་ན། །ཚུལ་བཞིན་མ་ཡིན་ཡིད་བྱེད་ལས། །ཉོན་མོངས་རྒྱུ་ནི་ཚང་བ་ཡིན། །ཞེས་པ་ལྟར་དགེ་སློང་བཟང་སྦྱིན་སྡོམ་པའི་ཚུལ་ཁྲིམས་ལ་བསྲུང་སེམས་ཤིན་ཏུ་བརྟན་པའི་མདུན་དུ་ཁྱིམ་ཐབ་མོས་ཉལ་བ་ལ་ང་ཚུལ་ཁྲིམས་བསྲུང་གིས་ཁྱོད་འདིར་མ་འདུག་ཅིག་ཅེས་ནན་གྱིས་ལྡོག་ཀྱང་མ་ཉན་པས། དམ་བཅའ་བརྟན་པོའང་འདུས་བྱས་ཉིད་དང་། ཡུལ་གྱི་དུག་ནི་ནུས་པ་ཆེ་བས་ཅི་ཞིག་ན་ཆགས་སེམས་སྐྱེས་ནས་ཁྱིམ་ཐབ་མོ་ལ་ལོག་པར་ཞུགས་པ་བཞིན་ནོ། །དེའི་ཕྱིར་བསྟན་པའི་སྒོར་ཞུགས་ནས་ངེས་འབྱུང་དང་བསྲུང་སྡོམ་གྱི་འདུན་པ་བརྟན་པོ་ཡོད་ཀྱང་། ཡུལ་གྱི་རྐྱེན་རྣམ་པ་སྣ་ཚོགས་པ་དང་ཕྲད་པའི་ཚེ་ཚུལ་ཁྲིམས་དང་། ཏིང་འཛིན་དང་། ཤེས་རབ་སྐྱེ་བའི་རྒྱུ་དང་ཡོན་ཏན་ཐམས་ཅད་ཉམས་པར་འགྱུར་ཏེ། འདི་ལྟར་ཡུལ་ལ་གཏན་ཡུལ་དུ་འཛིན་པས་ས་བཅད་དང་མངའ་རིས་ལ་བདག་ཏུ་འཛིན། གནས་ལ་མངོན་པར་ཞེན་པས་ཁྱིམ་ཆུང་སྤངས་པའི་ཁྱིམ་ཆེན་གྱི་མཁར་ལས་དང་། ཟང་ཟིང་ལ་སྙིང་པོར་མཐོང་ནས་རྟའི་གློ་ཆ་ཡན་ཆད་ཀྱང་ཁྱིམ་བདག་སྟོབས་པོ་ཆེ་དང་འགྲན་ཟླར་ཞུགས་ནས་རྙེད་པ་འབའ་ཞིག་གི་ཡོན་ལ་དད་རྫས་དང་གཤིན་དཀོར་ཆུད་འཛའ་བའང་བཟང་པོ་མ་ཡིན་ཏེ། མདོ་ལས། བྱམས་པ་འདི་ལ་བྱང་ཆུབ་སེམས་དཔའ་ཆེན་པོས་རྙེད་པ་དང་བཀུར་སྟི་ནི་འདོད་ཆགས་བསྐྱེད་པར་ཡིན་པ་རིགས་པར་བྱའོ། །རྙེད་པ་དང་བཀུར་སྟི་ནི་ངན་པ། འཇོམས་པར་བྱེད་པར་བརྟག་པར་བྱའོ། །རྙེད་པ་དང་བཀུར་སྟི་ནི་བསམ་གཏན་དང་ཚད་མེད་པ་ཡོངས་སུ་སྤོང་བ་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་ལྟུང་བར་བྱེད་པ་དང་། ཞེས་དང་། འདོད་པ་ཆུང་བར་བྱའོ། །ཡོངས་སུ་གདུང་བར་མི་བྱའོ། །ཞེས་གསུངས་པ་ལྟར་རྙེད་པ་ལ་མ་ཆགས་པ་ནམ་མཁའི་རླུང་བཞིན་དང་། གནས་དང་འཚོ་བ་ལ་བདག་ཏུ་བཟུང་བ་མེད་པ་མཁའ་ལ་ལྡིང་བའི་བྱ་ལྟ་བུས་ཞི་བའི་ལམ་བསྒྲུབ་པར་བྱ་སྟེ། ཚོགས་ལས་བསྲིང་ཞིང་ཞི་ལ་རབ་ཏུ་མོས། །ནམ་མཁའི་རླུང་བཞིན་རྙེད་ལ་མ་ཆགས་ཤིང་། །རི་དྭགས་བཞིན་དུ་འཇིགས་མེད་གཅིག་པུར་རྒྱུ། །དེ་ལྟ་བུ་ནི་དམ་པའི་ཆོས་འཛིན་ཡིན། །ཞེས་སོ། །ཡང་། རི་དྭགས་བཞིན་དུ་དབེན་པར་གནས་པ་དེ། །བབ་ཅོལ་སྤྱོད་པས་འཁྲུགས་པར་མི་འགྱུར་ལ། །གཞི་ལ་བསྟེན་ན་གཞན་ངོ་བསྲུང་བ་དང་། །ཕྲག་དོག་བཟོད་པའི་སྙིང་སྟོབས་བྲི་བར་འགྱུར། །དེ་ལ་དབེན་པའི་ས་ཕྱོགས་སམ། ནགས་ཁྲོད་དམ་པ་ནི་རང་བཞིན་གྱི་ཆོ་ག་ཤིན་ཏུ་འཇམ་པ། ཞི་བ། འདུ་འཛིའི་ཉེས་དམིགས་བརྒྱ་ཕྲག་དང་། བབ་ཅོལ་གྱི་སྤྱོད་པ་གཟུ་ལུམ་ཅན་གང་གིས་ཀྱང་འཁྲུགས་པར་མི་ནུས་པ་ཉིད་དེ། གཞི་གཅིག་ཏུ་གནས་ན་དེ་ལ་བསྟེན་པའི་དཔྱ་དང་ཁྲལ་གྱི་གདུང་བའམ། ཡང་ན་བདག་ཉིད་བསྲུང་བ་དང་ཕུན་སུམ་ཚོགས་པའི་སླད་དུ་གཞན་གྱི་ངོ་ཟིན་མི་ཚར། གལ་ཏེ་ཆོས་ཀྱི་ལུགས་སུ་སྤྱད་པས་སྙན་པར་གྲགས་པའམ། རང་བཞིན་དུ་མཐུན་པའི་རྐྱེན་གྱིས་འབྱོར་པར་གྱུར་ནའང་། སྙིགས་མའི་སེམས་ཅན་གྱི་རྣམ་པར་རྟོག་པ་ནི་ཤིན་ཏུ་མི་བསྲུན་པས་དེ་ལ་ཕྲག་པ་ཡངས་པར་མི་བྱེད་པའི་ཀུན་སྤྱོད་སྣ་ཚོགས་ཀྱིས་ཡང་ནས་ཡང་དུ་གཙེ་བ་མཐོང་ཙ་ན་བདག་ཅག་གིས་བཟོད་པའི་དཀའ་ཐུབ་ཀྱང་བྲི་བར་འགྱུར་བ་ཡོད་པའི་ཕྱིར་རྒྱལ་དང་རྒྱལ་སྲས་རྣམས་ཀྱིས་ནགས་ཁྲོད་དང་། དགོན་པའི་ཡོན་ཏན་ཁོ་ན་བསྔགས་པ་ཡིན་ཏེ། ཟླ་བ་སྒྲོན་མའི་མདོ་ལས། རབ་ཏུ་བྱུང་ནས་ཆོས་སྤྱོད་ཅི་འདྲ་བར། །ཟས་དང་སྐོམ་དང་དེ་བཞིན་གོས་རྣམས་དང་། །མེ་ཏོག་སྤོས་དང་ཕྲེང་བ་རྣམས་ཀྱིས་ནི། །ཁྱུ་མཆོག་རྒྱལ་བ་བསྙེན་བཀུར་བྱས་མི་འགྱུར། །གང་ཞིག་བྱང་ཆུབ་རབ་ཏུ་འདོད་བྱེད་ཅིང་། །འདུས་བྱས་ངན་པས་ཡིད་འབྱུང་སེམས་ཅན་གྱི། །དོན་དུ་དགོན་པར་ཕྱོགས་ཏེ་གོམ་བདུན་བོར། །འདི་ནི་དེ་བས་བསོད་ནམས་ཁྱད་པར་འཕགས། །ཞེས་དང་། དེ་བས་ཤིན་ཏུ་མདངས་དགའ་བའི། །ནགས་ཚལ་ཚེགས་ཆུང་བདེ་སྐྱིད་ཅིང་། །གཡེང་བ་ཐམས་ཅད་ཞི་བྱེད་པར། །བདག་ཉིད་གཅིག་པུར་གནས་པར་བྱ། །ཞེས་གསུངས་ཤིང་རྒྱས་པར་འོག་ཏུ་སྟོན་ཏོ། །ཡིད་ནི་ཤིན་ཏུ་རེངས་པའི་བྱི་ལ་ཡང་། །འགྲོ་འདུག་ཞི་ཞིང་སྤྱོད་ལམ་དེས་པ་ལྟར། །སྡིག་པའི་གྲོགས་ཀྱིས་བག་ཕེབས་བསྟེན་པའི་ཡུལ། །ཕུན་སུམ་ཚོགས་ཀྱང་ཆོས་ལས་འཕྲལ་དུ་ཉམས། །འདི་ལྟར་བྱི་ལ་ནི་སེམས་ཤིན་ཏུ་མ་རུངས་པ། ཐུབ་ཆོད་ཆེ་བ། གནོད་པ་འབའ་ཞིག་གིས་བདག་ཉིད་ཅན་ཡིན་ཡང་འགྲོ་ཞིང་འདུག་པ་ལ་མཁས་པ། སྤྱོད་ལམ་འཇམ་ཞིང་དེས་པ་ལྟར་གང་དང་གང་དུ་སྐྱེ་བོ་བསམ་པ་མ་རུངས་པ། རྒྱུ་འབྲས་ལ་ལོག་པར་ལྟ་བ། དཀོན་མཆོག་ལ་ཡིད་མི་ཆེས་པ། སྡིག་པ་འབའ་ཞིག་ལ་བློ་གཏོད་པ་དག་གིས་འཕྲལ་གྱིས་རྐྱེན་སེལ་བ་ཙམ་ལ་དམིགས་ནས་ཆོས་དང་གང་ཟག་དག་ལ་གུས་གུས་སུ་བལྟ་བ་དག་གིས་བདག་གིར་བྱས་པའི་ཡུལ་དང་། བསྙེན་བཀུར་ལ་ཐབས་དང་སྙིང་རྗེས་ཟིན་པ་མ་ཡིན་པའི་གང་ཟག་ལས་དང་པོ་པ་དག་གིས་སྤྱད་ཅིང་བཤེས་པར་བྱས་ནའང་། དེ་དག་ནི་ཚེ་ལོ་ལ་སོགས་རྒྱན་པོ་འགྱེད་པ་ལ་དགའ་བ། བག་མེད་པའི་དགའ་སྟོན་ལ་འདུས་པ། ལེ་ལོ་འབའ་ཞིག་གིས་དགེ་བ་ལ་མི་སྤྲོ་བ། ཉེས་པ་མང་པོའི་སྣོད་ཆང་གི་ལོངས་སྤྱོད་དང་ལྡན་པ། མཚན་མོ་ཁྱིམ་གཅིག་ནས་གཅིག་ཏུ་རྒྱུ་བ། མི་དགེ་བ་ཉག་ཅིག་ལ་དགའ་བས་སྡིག་པའི་གྲོགས་པོ་སྟེ་དེའི་ཕྱོགས་འཛིན་པའི་ཤལ་གོས་ནས་ཆོས་ལས་ཉམས་པར་འགྱུར་བའི་ཕྱིར་ཏེ། བཤེས་སྤྲིང་ལས། རྒྱན་པོ་འགྱེད་དང་འདུས་ལ་བལྟ་བ་དང་། །ལེ་ལོ་སྡིག་པའི་གྲོགས་ལ་བསྟེན་པ་དང་། །ཆང་དང་མཚན་མོ་རྒྱུ་བ་ངན་སོང་བ། །གྲགས་པ་ཉམས་པར་འགྱུར་བས་དེ་དྲུག་སྤང་། །ཞེས་དྲུག་པོ་དེ་དག་ནི་ངན་སོང་གི་རྒྱུ་ཡིན་པས་ན་ངན་སོང་ཞེས་འབྲས་བུའི་མིང་དུ་ཆགས་ལ། མདོ་ལས། ཁྱིམ་བདག་གི་བུ་དྲུག་པོ་འདི་དག་ནི་ངན་སོང་གི་སྒོ་ཡིན་ནོ། །ཞེས་གསུངས་པ་ནི་འདིར་དེ་དག་སྡིག་པའི་གྲོགས་པོ་གཅིག་ཉིད་ལ་ལྡན་པར་བཀྲལ་བ་ཡིན་ནོ། །བསྐྱོད་པ་ཡང་པའི་ཉི་ཟླ་ཀུན་དང་མཛའ། །འདྲིས་ཤིང་གཉུག་མར་གནས་པ་ཁྲོ་བས་གདུང་། །གསར་བ་གསར་པར་གྱུར་པའི་ཡུལ་འཇམ་ཞིང་། །སྐྱེ་བོ་ཀུན་ཀྱང་བཤེས་པར་འགྱུར་བ་མཐོང་། །ཉི་ཟླ་ནི་གླིང་གཅིག་ཏུ་མི་ཟུག་པར་ཉིན་ཞག་རེ་རེ་ཞིང་རི་རབ་ལ་བསྐོར་བས་གླིང་བཞི་གའི་སྐྱེ་དགུས་དགའ་བ་ལྟར་ཆོས་ལྟར་སྤྱོད་པ་རྣམས་ཀྱང་ཡུལ་གང་དུ་སྐྱེ་བོ་རྣམས་དང་འདྲིས་ཤིང་བཤེས་པའི་མོད་ལ་ཕྱོགས་གཞན་དུ་བྱོལ་བས་ཆགས་སྡང་གི་ལ་འདའ་བར་མི་འགྱུར་ལ་ཀུན་གྱི་ཡིད་དུ་འོང་བ་ཡིན་ཏེ། སྐྱེས་རབས་ལས། ཕལ་ཆེར་ཡོངས་སུ་འདྲིས་ལ་སྡང་། །རྟག་ཏུ་གསར་པ་གསར་པ་འཚོལ། །རིང་ན་གནས་པ་ཐམས་ཅད་ནི། །ཀུན་གྱི་ཡིད་དུ་འོང་བ་ཡིན། །ཞེས་བཤད་ལ་གལ་ཏེ་དགོས་པ་དང་ལྡན་པའམ་དབང་མེད་དུ་བསྡད་དགོས་ན། ཉེ་བར་གནས་པ་དང་། ཡུལ་གྱི་མི་དང་ཁྱིམ་མཛེས་ཀྱི་བཤེས་པ་ལ་སུན་མི་འབྱིན་ཞིང་གཅོམ་སྐྱུངས། དམན་ཆ་བཟུང་། མཁས་པའི་ཤེས་རབ་ཀྱིས་བསྲུངས་པས་རང་གཞན་གཉིས་ཀའི་བསམ་པ་མི་ཚིག་པ་ཡིན་ནོ། །ཡང་། སེམས་ལྡན་ལྟ་བུར་ཅ་ཅོ་སྒྲོག་འགྱུར་ཡང་། །བརྗོད་པ་བཟང་ངན་རྗེས་སུ་དེ་ཡི་སེམས། །འགྲོ་བ་མ་ཡིན་བྲག་ཅ་ལྟ་བུ་ཡི། །ཀུན་སྤྱོད་ཅན་ལ་ཡུལ་གྱི་དམ་བཅའ་བྲལ། །འདི་ལྟར་བྲག་ཅ་ནི་སྐྱེས་བུ་རྣམ་རིག་དང་ལྡན་པ་ལྟར་བརྗོད་པ་གང་སྨྲས་པའི་རྗེས་སུ་བཟློ་ཡང་། དེ་ལ་བཟང་ངན་དང་ཆགས་སྡང་གིས་རྗེས་སུ་རྟོག་པའི་རྣམ་པར་རིག་པ་ཅུང་ཟད་ཀྱང་མེད་པ་ལྟར། སྒོ་ལྔའི་ཡུལ་ལས་དགག་སྒྲུབ་ཏུ་འཆར་བའི་དབང་པོ་ཐུལ་བ་རྣམས་ནི་རྐྱེན་ལ་རོ་སྙོམས་པའི་གང་ཟག་ཞེས་བྱ་སྟེ། འདུ་འཛིའི་དབུས་ནའང་ཚུལ་ཁྲིམས་དང་། དྲན་པ་དང་རྟོག་པ་རྣམས་དུས་ལས་ཡོལ་བ་མེད་པའི་ཕྱིར་སྐྱེས་པ་རབས་ཀྱི་རྒྱུད་ལས་བསྟེན་པའི་དགེ་སློང་བསྙེན་པའི་འོད་ཀྱིས་རྒྱལ་པོའི་ཁྱིམ་ཡང་དབེན་པ་ལྟ་བུར་གཟིགས་པ་བཞིན་ཡུལ་དུས་ངེས་པ་མེད་པར་བསྟན་པ་དང་སེམས་ཅན་གྱི་དོན་ལ་བརྩོན་པར་བྱའོ། །དེ་ལས་གཞན་པ་རྣམས་ནི་ཡུལ་དང་གྲོགས་ཁོ་ན་ལ་བསྟེན་ནས་མཐོ་དམན་བྱེད་པའི་ཚུལ། སྐྱེས་བུ་ཚངས་པར་མཚུངས་པར་སྤྱོད་པ་དང་། །བསམ་གཏན་དོན་ལ་གཅིག་ཏུ་སེམས་པ་ཡི། །བརྟུལ་ཞུགས་བརྟན་པར་མ་སོན་གང་དང་གང་། །ཡུལ་དང་གྲོགས་ལ་བརྟེན་ནས་མཐོ་དམན་བྱེད། །འདི་ལྟར་ཚངས་པར་སྤྱོད་པ་དང་། འཕགས་པའི་ལམ་བསྐྱེད་པ་ནི་བཤད་མ་ཐག་པའི་ཡུལ་ངན་པ་ལས་བསྲིང་ཞིང་ཁྱད་པར་མཐུན་པའི་གྲོགས་དགེ་བའི་བཤེས་གཉེན་འབའ་ཞིག་གི་བདག་རྐྱེན་ལ་རག་ལས་པའི་ཚུལ། འཕགས་པ་ཀུན་དགའ་བོས་བཅོམ་ལྡན་འདས་འདི་ལྟ་སྟེ། དགེ་བའི་བཤེས་གཉེན་དང་དགེ་བའི་གྲོགས་པོ་འདི་ནི་ཚངས་པར་སྤྱོད་པའི་ཕྱེད་ལགས་སོ་ཞེས་གསོལ་པ་དང་། བཅོམ་ལྡན་འདས་ཀྱིས་ཀུན་དགའ་བོ་ཁྱོད་དེ་སྐད་དུ་དགེ་བའི་གྲོགས་པོ་འདི་ནི་ཚངས་པར་སྤྱོད་པའི་ཕྱེད་ལགས་སོ་ཞེས་བྱ་བའི་བར་མ་སྨྲ་ཞིག །ཀུན་དགའ་བོ་འདི་ལྟ་སྟེ། དགེ་བའི་བཤེས་གཉེན་དང་དགེ་བའི་གྲོགས་པོ་འདི་ནི་ཚངས་པར་སྤྱོད་པ་ཡོངས་སུ་རྫོགས་པར་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་སྐྱེ་བའི་ཆོས་ཅན་རྣམས་དགེ་བའི་བཤེས་གཉེན་ལ་བསྟེན་ནས་སྐྱེ་བ་ལས་ཡོངས་སུ་གྲོལ་ལོ། །ཞེས་བཀའ་སྩལ་ཏོ། །དེ་ལ་ཚངས་པ་ཞེས་བྱ་བ་ནི་མྱ་ངན་ལས་འདས་པའོ། །དེའི་དོན་དུ་སྤྱོད་པས་ན་ཚངས་པར་སྤྱོད་པ་སྟེ་ལམ་ཡིན་ནོ། །ལམ་དེ་ལས་འབྲས་བུ་ཞི་བའི་གོ་འཕང་འཐོབ་པའི་ཕྱིར། སློབ་དཔོན་འཕགས་པས་ཀྱང་། དགེ་བའི་བཤེས་གཉེན་བསྟེན་པ་ཚངས་པར་སྤྱོད། །ཡོངས་སུ་རྫོགས་པར་ཐུབ་པས་གསུངས་དེའི་ཕྱིར། །སྐྱེས་བུ་དམ་པ་བསྟེན་བགྱི་དམ་པ་ལ། །བསྟེན་ནས་རབ་ཏུ་མང་པོས་ཞི་བ་འཐོབ། །ཅེས་བསྟན་ནོ། །སྟོན་པས་གནང་བས་གཞན་ལ་བསོད་ནམས་བསྐྱེད། །བདག་ཀྱང་དཀའ་ཐུབ་ཉམས་པར་མི་འགྱུར་ལ། །སློང་བ་རྣམས་ཀྱིས་ཡིད་བཞིན་ནོར་བུ་སྟེ། །མཐུན་པར་གྱུར་པའི་བསོད་སྙོམས་ཁོ་ན་ཡིན། །དེ་ལ་རང་དང་གཞན་གྱི་དོན་བསྒྲུབ་པར་འདོད་པ་རྣམས་ནི་བདོག་པའི་དངོས་པོ་མཐའ་དག་ལ་ཡོངས་སུ་འཛིན་པ་སྤངས་ནས། འཚོ་བ་བསོད་སྙོམས་ལ་བརྟེན་པར་བྱ་སྟེ། དེ་ལ་བརྟེན་པས་མང་པོའི་ཚོགས་རྫོགས་པ་དང་། རང་ཉིད་བྱ་བ་ཉུང་བ་དང་། གཞན་གྱི་ངོ་བསྲུང་མི་དགོས་པ་དང་། ཚོང་དང་སོ་ནམ་ལ་སོགས་པའི་བྱ་བས་མི་བྲེལ་བ་དང་། རློམ་སེམས་དང་དྲེགས་པ་ཆུང་བ་དང་། འཚོ་བ་རྣམ་པར་དག་པ་ལ་སོགས་པའི་ཡོན་ཏན་མང་པོ་ཡོད་དེ། བདག་ཅག་གི་སྟོན་པས་ཕྱིན་ཆད་བསྟན་པ་ལ་ཞུགས་པ་རྣམས་འཚོ་བས་མི་བྲེལ་ཞིང་ཉོན་མོངས་པ་མེད་པར་བགྱི་བའི་སླད་དུ་རིགས་དང་། གཟུགས་དང་། དབང་ཕྱུག་དང་། ལོངས་སྤྱོད་མཐའ་དག་ལ་གཅོམ་བསྐྱུངས་ཏེ། འཁོར་ལོས་སྒྱུར་བའི་རྒྱལ་སྲིད་ཀྱང་བོར་ནས་རབ་ཏུ་བྱུང་སྟེ་འཚོ་བ་བསོད་སྙོམས་འབའ་ཞིག་ལ་བརྟེན་ན། གངས་རིའི་ཁྲོད་པ་རིགས་ལས་ཉམས་པ། མཐོ་རིས་ཀྱི་ཡོན་ཏན་བདུན་དང་མི་མཛའ་བ། འབྱོར་རྒུད་ཀྱི་ཁྱད་པར་ཙམ་ལ་མཆོག་དམན་དུ་མིག་འཕྲུལ་ལྟར་འགྱུར་བ་དག་གིས་བསོད་སྙོམས་ལ་དམན་པར་མི་བལྟ་སྟེ། མདོ་ལས། དེ་བཞིན་གཤེགས་པ་བསོད་སྙོམས་ལ་རྒྱུ་བ་མཐོང་ན། སེམས་ཅན་དཔག་ཏུ་མེད་པ་ལོངས་སྤྱོད་དང་དབང་ཕྱུག་གིས་རྒྱགས་ཤིང་མྱོས་པ་དང་། གཟུགས་དང་། རིགས་དང་། འཚོ་བ་དང་། ནད་མེད་པས་རྒྱགས་ཤིང་མྱོས་པས་འདི་སྙམ་དུ་སེམས་ཏེ། འཁོར་ལོས་བསྒྱུར་བའི་རྒྱལ་པོ་རྒྱལ་སྲིད་བོར་ནས་རབ་ཏུ་བྱུང་ནས་བསོད་སྙོམས་ལ་རྒྱུ་ཞེས་གྲག་སྟེ། དེས་ཀྱང་འདི་ལྟར་ང་རྒྱལ་བཅོམ་ན། ཀྱེ་མ་བདག་ཅག་ནི་ང་རྒྱལ་གཞོམ་པར་བྱའོ་སྙམ་སྟེ། ཞེས་དང་། ཡང་རྒྱལ་རིགས་ལ་སོགས་བདག་ཅག་ནི་འདི་ལྟར་རིགས་ཆེན་པོར་སྐྱེས་པ་ཡིན་ན་ཟས་ཀྱི་ཕྱིར་ཁྱིམ་ནས་ཁྱིམ་དུ་བསོད་སྙོམས་ལ་ཅིའི་ཕྱིར་རྒྱུ་བར་བྱ་སྙམ་སྟེ། ངོ་ཚ་ནས་བསོད་སྙོམས་ལ་རྒྱུ་བ་མི་བྱེད་པ་དེ་དག་ནི་དེ་བཞིན་གཤེགས་པའི་བསོད་ནམས་དང་། གཟི་བྱིན་དང་ལྡན་པའི་སྐུའི་རྗེས་སུ་སློབ་ཅིང་བསོད་སྙོམས་ལ་རྒྱུ་བར་འགྱུར་རོ། །ཞེས་སོ། །དེ་བཞིན་དུ་སེམས་ཅན་གཞན་གྱིས་དགེ་བའི་རྩ་བ་བསྐྱེད་པའི་བསམ་པས་བསོད་སྙོམས་བླང་ཞིང་། སྤྱོད་ལམ་བག་ཡོད་པ་ལ་བསླབ་པའི་ཚུལ་ཡང་། འོད་སྲུང་ལ་སེམས་ཅན་ཐམས་ཅད་ལ་བསམས་ཏེ་བསོད་སྙོམས་བཙལ་བར་བྱའོ། །ཟས་མེད་པར་ཟས་བཙལ་བར་བྱའོ། །གཞན་གྱི་རིལ་པོར་འཛིན་པ་བསལ་བའི་ཕྱིར་ཁྱོད་བསོད་སྙོམས་ལ་འགྲོ་བར་བྱའོ། །གྲོང་སྟོང་པར་བྱིན་གྱིས་བརླབས་ཏེ་ཁྱོད་གྲོང་དུ་འགྲོ་བར་བྱའོ། །ཞེས་དང་། འཕགས་པ་དཀོན་མཆོག་སྤྲིན་ལས། རིགས་ཀྱི་བུ་བྱང་ཆུབ་སེམས་དཔའ་དགེ་བའི་རྩ་བ་ཆུང་བ་དང་། དགེ་བའི་རྩ་བ་ཆུང་ངུ་དང་ལྡན་པ་སྡུག་བསྔལ་བ་དག་མཐོང་ན། སེམས་ཅན་དེ་དག་ལ་ཕན་པའི་ཕྱིར་བསོད་སྙོམས་བླང་བའི་ཡི་དམ་འཛིན་ཏེ། དེ་ནི་གྲོང་ངམ། གྲོང་ཁྱེར་རམ། གྲོང་འདབ་ཏུ་བསོད་སྙོམས་ཀྱི་ཕྱིར་འགྲོ་བ་དེའི་ཚེ་དྲན་པ་ཤིན་ཏུ་ཉེ་བར་གཞག་པ་དང་། སྤྱོད་ལམ་མཛེས་པས་དབང་པོ་མི་གཡོ་བ་དང་། དབང་པོ་མི་རྒོད་པ་དང་། དབང་པོ་དུལ་བ་དང་། གཉའ་ཤིང་གང་ཙམ་དུ་བལྟ་བ་དང་། དགེ་བའི་ཆོས་རྣམས་ལ་དྲན་པ་ཉེ་བར་གཞག་ཅིང་བསོད་སྙོམས་ཀྱི་ཕྱིར་འགྲོའོ། །དེ་བསོད་སྙོམས་ཀྱི་ཕྱིར་འགྲོ་ན་དེ་བསོད་སྙོམས་མཐར་གྱིས་ལེན་པ་ཡིན་ཏེ། མགོ་བསྟོད་ཅིང་བྲམ་ཟེའི་རིགས་ཤིང་སཱ་ལ་པ་ལྟར་ཆེ་ཞིང་མཐོ་བའི་གྲོང་ངམ། རྒྱལ་རིགས་ཤིང་སཱ་ལ་པ་ལྟར་ཆེ་ཞིང་མཐོ་བའི་གྲོང་ངམ། ཁྱིམ་བདག་ཤིང་སཱ་ལ་པ་ལྟར་ཆེ་ཞིང་མཐོ་བའི་གྲོང་ངམ། གྲོང་འབྱོར་པ་འབྱོར་པ་དག་ཏུ་མི་འཇུག་ཅིང་མཐའ་གཅིག་ནས་བཟུང་སྟེ། ནམ་དེའི་དོན་གྲུབ་པར་མ་གྱུར་གྱི་བར་དུ་བསོད་སྙོམས་ལ་སྤྱོད་དོ། །ཞེས་པ་ལ་སོགས་པ་དང་། ཁྱིམ་པ་སུན་འབྱིན་པ་སྤང་བའི་ཕྱིར། ཁྱི་ཟ་བ་ལ་སོགས་པའི་གནས་སུའང་མི་འགྲོ་བར་གསུངས་ཤིང་། བསོད་སྙོམས་ཀྱང་བཞི་ཆ་ལས་མི་བཟའ་བའི་ཚུལ་འདི་སྐད་དུ། བསོད་སྙོམས་དེ་ལས་ཆ་གཅིག་ནི་ཚངས་པར་མཚུངས་པ་སྤྱོད་པ་རྣམས་ཀྱི་ཕྱིར་བཞག་གོ །གཉིས་པ་ནི་སྡུག་བསྔལ་བ་རྣམས་ཀྱི་ཕྱིར་བཞག་གོ །གསུམ་པ་ནི་སེམས་ཅན་ལོག་པར་ལྟུང་བ་རྣམས་ཀྱི་ཕྱིར་བཞག་གོ །ཆ་བཞི་པ་ནི་བདག་ཟ་སྟེ། ཞེས་པ་ནས། རན་པར་ཟ་བའི་བར་རྒྱས་པར་གསུངས་སོ། །དེ་བཞིན་དུ་མཆོག་ཟུང་གིས་ངན་སོང་གསུམ་གྱི་སེམས་ཅན་ཅི་རིགས་པའི་དོན་མ་བྱས་པར་ཟས་མི་ཟ་བར་དམ་བཅས་པ་བཞིན་བདག་ཅག་ཀྱང་ཟས་ཀྱི་སྔོན་དུ་སུ་རཱུ་པའམ། ཆུ་གཏོར་གྱི་བྱ་བ་བྱས་ནས། ཇི་ལྟར་ཟ་བའང་ཨོཾ་ཨཱ༔ཧཱུྃ་གིས་བདུད་རྩིར་བྱིན་གྱིས་བརླབས། ཆ་བཞིར་བགོས་པའི་ཕུད་དང་པོ་ནས། གུ་རུ་བཛྲ་ནཻ་ཝིདྱ་ཨཱཿཧཱུྃ་གིས་བླ་མ་ལ་འབུལ། རཏྣ་བཛྲ་ནཻ་ཝི་དྱ་ཨཱཿཧཱུྃ་གིས་དཀོན་མཆོག་ལ། དེ་ཝ་ཌཱཀྐི་ནཱི་ནཻ་ཝི་དྱས་ཡི་དམ་ལ། ཆ་གཉིས་པ་ཆོས་སྐྱོང་སྤྱི་ལ། དྷརྨ་པཱ་ལ་སརྦ་བཛྲ་ནཻ་ཝི་དྱ་ཨཱཿཧཱུྃ། དེ་ནས་འཕྲོག་མ་ལ་ཆངས་བུ་གཅིག་བྱིན་ནས། ཨོཾ་ཧ་རི་ཏི་པིཎྜ་ཨ་ཁཾ་སྭཱ་ཧཱ། དེའི་བུ་ལྔ་བརྒྱ་ལ་ཆངས་བུ་གཅིག་བྱིན་ནས། ཨོཾ་ཧ་རི་ཏི་པིཎྜ་ནི་ཁཾ་སྭཱ་ཧཱ། འབྱུང་པོ་ཕུད་ལ་དབང་བ་ལ་ཆངས་བུ་གཅིག་བྱིན། ཨོཾ་ཨ་གྲ་པིཎྜ་ཨ་སི་བྷྱཿསྭཱ་ཧཱ། དེ་ནས་ཆ་གསུམ་པ་ཟས་ཀྱི་རྣལ་འབྱོར་ལ་གོམས་པ་ཡོད་ན་དེ་ཉིད་ལྟར་ལོངས་སྤྱད་ཅིང་། མེད་ན་ཆོས་བསྒྲུབ་ཅིང་གཞན་ལ་ཕན་པའི་ལུས་རྟེན་འཚོ་བའི་ཕྱིར་དང་། ལུས་ཀྱི་སྲིན་བུ་རྣམས་ད་ལྟ་ཟས་ཀྱིས་བསྐྱང་ཞིང་། མཐར་ཆོས་ཀྱིས་བསྐྱང་བར་བྱའོ་སྙམ་པའི་སེམས་ཀྱིས་ལོངས་སྤྱད། ལྷག་མ་ཆ་བཞི་པ་ནས། ཨོཾ་ཨུཙྪིཥྚ་པིཎྜ་ཨ་ཤི་བྷྱཿསྭཱ་ཧཱ། ཞེས་འབྱུང་པོ་ལྷག་མ་ལ་དབང་བ་ལ་ཆངས་བུ་གཅིག་བྱིན་ཞིང་འཕྲོ་རྣམས་སེམས་ཅན་ཉམ་ཐག་པ་རྣམས་ལ་བྱིན་པར་བྱའོ། །དེ་ནས་ཁ་བཤལ་ཏེ་ཡོན་ཡོངས་སུ་དག་པའི་གཟུངས། ན་མཿས་མནྟ་པྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷ་ཡ། ན་མོ་མཉྫུ་ཤྲཱི་ཡ། ཀུ་མཱ་ར་བྷུ་ཏཱ་ཡ། བོ་དྷི་ས་ཏྭ་ཡ། མ་ཧཱ་ས་ཏྭ་ཡ། མ་ཧཱ་ཀཱ་རུ་ཎི་ཀ་ཡ། ཏདྱ་ཐཱ། ཨོཾ་ནི་ར་ལམྦྷེ། ནི་ར་བྷ་སེ། ཛ་ཡ་ཛ་ཡ། ལབ་དྷེ་ལབ་དྷེ། མ་ཧཱ་མ་ཧེ་དཀྵི་དཀྵི་ཎི། པ་རི་ཤོ་དྷ་ཡ་སྭཱ་ཧཱ། ཞེས་བཏོན། ཡབ་སྲས་མཇལ་བའི་མདོ་ལས་གསུངས་པའི་སྨོན་ལམ་འདི་གདབ་བོ། །གང་གིས་བདག་ལ་ཁ་ཟས་བྱིན་པ་དེ་དག་ཉེ་བར་ཞི་བའི་བདེ་བ་ཐོབ་པར་གྱུར་ཅིག །གང་གིས་བདག་ལ་སྐོམ་བླུད་པ་དེ་དག་དང་། གང་གིས་བདག་ལ་རིམ་གྲོ་བྱས་པ་དང་། བཀུར་སྟི་བྱས་པ་དང་། བསྟི་སྟངས་བྱས་པ་དང་། མཆོད་པ་བྱས་པ་དེ་དག་ཐམས་ཅད་ཀྱང་ཉེ་བར་ཞི་བའི་བདེ་བ་ཐོབ་པར་གྱུར་ཅིག །གང་དག་བདག་ལ་གཤེ་བར་བྱེད་པ་དང་། མི་བདེ་བར་བྱེད་པ་དང་། བརྡེག་པ་དང་། མཚོན་གྱིས་འདེབས་པ་དང་། རྣམ་པ་ཐམས་ཅད་དུ་སྲོག་གཅོད་པའི་བར་དུ་བྱེད་པ་དེ་དག་ཐམས་ཅད་ཀྱང་བྱང་ཆུབ་ཀྱི་བདེ་བ་ཐོབ་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་གྱུར་ཅིག །ཅེས་སྙིང་ཐག་པ་ནས་བརྗོད། འདི་ལྟར་ལྷོ་འཛམ་བུའི་གླིང་པ་རྣམས་ནི་འཚོ་བ་གཉིས་ལྡན་གྱི་ཕྱིར་ན་རགས་པའི་ཟས་ལ་མི་བརྟེན་པ་མེད་པས་བསྟན་པའི་ལམ་སྲོལ་ལ་ཞུགས་པ་རྣམས་འཚོ་བ་དག་པའི་ཟས་ཀྱི་བྱ་བ་ལ་སྦྱོར་དངོས་རྗེས་གསུམ་འདི་ཙམ་དང་ལྡན་ཡང་དལ་བ་དོན་ལྡན་དུ་འགྱུར་རོ། །འཚོ་བ་ཤིན་ཏུ་མ་དག་ཐབས་ཀྱིས་བརྐུ། །རྙེད་པས་རྙེད་འཚོལ་ཁ་གསག་ཚུལ་འཆོས་དང་། །ཐོབ་ཀྱིས་འཇལ་བའི་ལོག་འཚོ་རྣམ་པ་ལྔས། །དྲང་སྲོང་རྣམས་ཀྱི་བརྟུལ་ཞུགས་སྨ་བབ་འགྱུར། །དེ་ཕྱིར་གནས་མལ་བཟང་དང་འཚོ་བ་བཟང་། །གྲོགས་དང་སྦྱོར་བ་བཟང་པོས་སྙིང་སྟོབས་སློང་། །དེ་ལ་སྤྱིར་ལོག་པར་འཚོ་བ་ནི་ལང་ཀར་གཤེགས་པ་ལས། བཟོ་ཡི་རིགས་པ་མི་སློབ་བོ། །ཉོ་དང་བཙོང་བར་མི་བྱའོ། །རྒྱལ་པོ་དང་ནི་རྒྱལ་པོའི་བུ། །དེ་བཞིན་བློན་པོ་ཚོང་དཔོན་ལ། །ཟས་ཀྱི་ཕྱིར་ནི་བརྟེན་མི་བྱ། །ཤི་དང་བཙས་པའི་ཁྱིམ་ཟས་དང་། །དགའ་དང་མཛའ་དང་ལྡན་པ་དང་། །དགེ་སློང་དགེ་སློང་མ་དང་འདྲེས། །རྣལ་འབྱོར་ཅན་ལ་དེ་མི་རུང་། །ཞེས་གསུངས་པ་ལྟར། གང་འཚོ་བའི་དོན་དུ་ཉོན་མོངས་པ་དང་བཅས་པའི་སེམས་ཀྱིས་སྦྱོར་བར་བྱེད་ཅིང་དེས་འཚོ་བར་རྟོགས་པ་གང་ཡིན་པ་འདི་ནི་ལོག་པར་འཚོ་བ་ཞེས་བྱའོ། །དེ་བཞིན་རྙེད་པའི་དོན་དུ་ཉོ་ཚོང་བྱས་ནས་འཚོ་བར་བྱེད་པ་དང་། ཆོས་འཆད་པས་འཚོ་བ་དང་། གསོ་བ་བྱེད་པ་དང་། ལྟས་ལ་སོགས་པ་ཤེས་པ་དང་། སྔགས་ཀྱི་སྦྱོར་བ་དང་། མཚན་མ་བལྟ་བ་དང་། སྐར་རྩིས་དང་། ལྟས་མཁན་དང་། ཚུལ་འཆོས་དང་། གང་མི་དགེ་བའི་ལས་ཀྱི་འཚོ་བ་དང་། བཟོ་དང་། མངག་གཞུག་དང་། མེ་ཏོག་དང་། འབྲས་བུ་དང་། རྩ་བ་དང་། འདབ་མ་དང་། སོ་ཤིང་ལ་སོགས་པ་སྟེར་བའི་རྒྱུས་འཚོ་བ་འདི་ནི་ལོག་པར་འཚོ་བ་ཡིན་ནོ་ཞེས་ལོག་པར་འཚོ་བའི་འགྲེལ་པ་ལས་རྒྱ་ཆེར་བསྟན་མོད་དེ། འདིར་དམིགས་བསལ་གྱི་ལོག་པའི་འཚོ་བ་ལྔ་སྟེ། སྟེར་དུ་རེ་བའི་གཞོགས་སློང་གིས་ཁ་སྐད་ངན་པ་གཞན་སྔུན་དུ་འདོན་པའམ། ཟས་གོས་ཡོད་པ་ཕག་ཏུ་སྦས་ནས་གྱི་ནར་སྤྱོད་ཅིང་ཉམ་ཐག་པའི་ཚུལ་གཞན་གྱིས་གོ་བར་བྱས་ནས་རྙེད་ཚད་ཐམས་ཅད་འཚོ་བ་མ་དག་པ་ཡིན་ཏེ། དེ་ལ་ཐབས་ཀྱིས་བརྐུ་བ་ཞེས་བྱའོ། །རྙེད་པས་རྙེད་པ་འཚོལ་བ་ནི། བཟའ་བཏུང་ཕྲ་མོ་ཙམ་རེ་ཕར་བཏང་ནས་དེས་ཕ་རོལ་པོ་ངོ་མི་ལྡོག་པ་བཅོས་ཏེ། ཕྱི་ནས་ཚུར་རྙེད་པ་མང་པོ་སྡུད་པའོ། །ཁ་གསག་གིས་རྙེད་པ་འཚོལ་བ་ནི། གཞན་དང་གཞན་དག་གི་དྲུང་དུ། བདག་ཉིད་ཀྱིས་ཐོས་བསམ་སྒོམ་གསུམ་ལ་དཀའ་ཐུབ་བྱས་ཚུལ་དང་། བསོད་ནམས་དང་འདུ་འཛི་ལ་བྲོས་པའི་ལོ་རྒྱུས་དང་། དངོས་པོའམ། བདོག་པའི་ཚོགས་སྤོང་དག་བྱས་པ་སྐད་དང་། ཉ་དང་རི་དྭགས་ལ་སོགས་པ་སེམས་ཅན་གཞན་གྱི་སྲོག་བསྐྱབ་པའམ། མཆོད་སྦྱིན་དང་རྣམ་དཀར་རྒྱ་ཆེན་པོ་བྱེད་པ་ལ་བསྙད་པའི་རྫུན་གྱིས་གཞན་གྱི་མགོ་བསྐོར་ནས་རྙེད་པ་ཐོབ་པའོ། །ཚུལ་འཚོས་ཀྱིས་རྙེད་པ་འཚོལ་བ་ནི། རང་གི་ཆོས་ཉིད་མ་བསྡམས་པ། མ་དུལ་བ། ལྷོད་པ། མང་དུ་ཟ་བ། སྤོང་བ་ལས་ཉམས་པ། གཟུ་བོར་མི་གནས་པ་ཡིན་བཞིན་དུ་གཞན་གྱི་མདུན་སར་སྤྱོད་ལམ་ཞི་བ། ངག་འཇམ་པ། རྣམ་འགྱུར་དེས་པ། སྦྱོར་བ། ལྷོད་པ། དྲང་པོར་སྲོང་པ་བཞིན་དུ་འཆོས་པའམ། ཡང་ན་ཆོས་བརྒྱད་མགོ་སྙོམས་པར་བརྫུས་ནས་སྤྱོད་པ་ཧྲལ་པོ། གཏམ་དྲང་མདོག་ཕྱི་ནང་མེད་པ། ངོ་ལྐོག་ཆུང་བར་ཀུན་སློང་སྐྱོན་ཅན་གྱིས་བཅོས་ནས་གཞན་དག་མགོ་བོ་རྨོངས་པར་བྱས་རྗེས་རྙེད་པ་སྡུད་པའོ། །ཐོབ་ཀྱིས་འཇལ་བ་ནི། བདག་ལ་ཡོན་བདག་ཆེ་གེ་མོས་ནོར་རམ་རྫས་འདི་ཙམ་ཞིག་བྱིན་ཏེ། བྱིན་པ་དེ་ཡང་བདག་ཉིད་ཚུལ་ཁྲིམས་དང་ལྡན་པ། མང་དུ་ཐོས་པ། རྣལ་འབྱོར་ལ་གོམས་པ། རིགས་དང་། རུས་དང་། ཆོ་འབྲང་གིས་འཕགས་པ། སྤྲུལ་གཞིས་ཁྱད་དུ་ཆེ་བ། གནས་བརྟན་གྱི་ཡོན་ཏན་དང་ལྡན་པར་མཐོང་ནས་བྱིན་ནོ། །དེ་ལ་བདག་གིས་ཀྱང་། ཁོང་ལ་སེམས་ཉེ་བར་བརྩེ་བས་བླངས་སོ། །ཞེས་དངོས་སུ་བརྗོད་ཅིང་། ཡི་གེའི་ལམ་དུ་འདྲེན་པའམ། ཡང་མི་སྟེར་བཞིན་དུ་ནན་གྱིས་བླང་བ་དང་། བདག་ཡུལ་གཉན་པོ་ལ་འབུལ་ནོད་ཉུངས་སོ་ཞེས་འཁང་བ་དང་། ངས་ཁ་བཏོན་དང་བཟླས་བརྗོད་འདི་ཙམ་བྱས་པས་སོ་ཞེས་ཐོབ་བརྩི་བ་དང་། བཅོམ་ལྡན་འདས་ཀྱིས། སྦྱིན་པ་པོས་ལེགས་པར་བྱིན། ལེན་པ་པོས་ལེགས་པར་བླང་། ཞེས་པ་ལ་ཅང་མི་སེམས་པས་གཞན་གྱིས་བྱིན་པ་ལ་རྗེས་སུ་ཡི་རང་མེད་ཀྱི་སྟེང་དུ། ཅུང་ཟད་ཐོབ་པ་དག་ལའང་ཁྲོ་ཡིན། རྒོལ་གྱིན་རང་གཞན་གྱི་སེམས་བསྲེག་ཅིང་ལེན་པ་ནི་ཐོབ་ཀྱིས་འཇལ་བ་སྟེ། དེ་དག་ནི་ལོག་པའི་འཚོ་བ་དུག་དང་འདྲ་བ། དྲི་མ་དང་བཅས་པ། ངན་སོང་གི་རྒྱུ་རྔམ་པོ་ཆེ་ཡིན་པས་ཁྲེལ་ཏེ་ཟོས་པ་ལས་ལྟོགས་ཏེ་ཤི་བའང་རུང་བ་འཇིག་རྟེན་གྱི་གཏམ་རྒྱུད་ལའང་གྲགས་པས་ན་ཡོངས་སུ་སྤངས་ཏེ། ལེགས་པའི་ལམ་བསྟན་པའི་གཏམ་ལས། སྡུག་བསྔལ་བསལ་བའི་དོན་དུ་བསྟེན་བྱེད་ཅིང་། །རིགས་པས་རྙེད་ལ་སེམས་ནི་ཆོག་ཤེས་པ། །འཚོ་བ་མིན་པའི་ཉེས་པས་གནོད་མི་འགྱུར། །ཞེས་བསྟན་པ་ལྟར། རྙེད་པའི་བསམ་པས་སེམས་མ་བཅོམ་པ་དང་། ངོ་ཚ་ཤེས་པ་དང་། ཁྲེལ་ཡོད་པ་དང་། གཞན་དག་ལ་འདུད་ཅིང་གཅམ་གསག་གིས་བསྒྲུབས་པ་མ་ཡིན་པའི་སློང་མོའི་སྤྱོད་པས་འཚོ་བ་བསྒྲུབ་པ་འདི་ནི་རིགས་པ་ཞེས་བྱ་སྟེ་འཚོ་བ་རྣམ་པར་དག་པའི་མདོ་ལས་རྒྱ་ཆེར་བསྟན་ཅིང་། དེ་སྐད་དུ་བཅོམ་ལྡན་འདས་ཀྱིས། རྙེད་པའི་ཉེས་དམིགས་མཐོང་བས་ཀྱང་ཀྱེ་མའོ། །རྙེད་པའི་སེམས་ལས་བདག་རིང་དུ་གྱུར་པ་ནི་ལེགས་སོ་སྙམ་སྟེ། དེ་ལ་ཡིད་གདུང་བར་མི་བྱེད་དོ། །ཅེས་བསྟན་པ་བཞིན་ནོ། །དེ་བཞིན་དུ་མདོ་ལས། ཤ་དང་ཆང་གི་སྦྱིན་པ་དང་། །དུག་དང་མཚོན་ཆའི་སྦྱིན་པ་དང་། །ཞེས་གནས་མ་ཡིན་པའི་སྦྱིན་པའི་ཉེས་དམིགས་རྒྱ་ཆེར་བསྟན་ན། ལོངས་སྤྱོད་པ་པོ་སྨོས་ཅི་དགོས་ཏེ། ལང་གཤེགས་ལས། བློ་གྲོས་ཆེན་པོ། ངའི་འཕགས་པ་ཉན་ཐོས་རྣམས་ནི་ཁ་ཟས་ཐ་མལ་པའང་མི་ཟ་ན། ཤ་དང་ཁྲག་གི་ཟས་མི་རུང་བ་ལྟ་ཅི་སྨོས། བློ་གྲོས་ཆེན་པོ། ང་ནི་སེམས་ཅན་ཐམས་ཅད་ལ་བུ་གཅིག་བཞིན་གྱི་འདུ་ཤེས་དང་ལྡན་པ་ཡིན་ན། ཇི་ལྟར་བདག་གིས་བུའི་ཤ་བཟའ་བར་ཉན་ཐོས་རྣམས་ལ་གནང་བར་བྱ། རང་གིས་ཟ་བ་ལྟ་ཅི་སྨོས། ངས་ཉན་ཐོས་རྣམས་ལ་གནང་བ་དང་། བདག་ཉིད་ཀྱིས་ཟོས་སོ་ཞེས་བྱ་བ་འདི་ནི་བློ་གྲོས་ཆེན་པོ་གནས་མེད་དོ། །ཞེས་དང་། ཁེ་ཡི་ཕྱིར་ན་སེམས་ཅན་གསོད། །ཤ་ཡི་ཕྱིར་ན་ནོར་སྦྱིན་བྱེད། །དེ་དག་གཉིས་ཀ་སྡིག་ཅན་ལས། །འོ་དོད་འབོད་ལ་སོགས་པར་བཙོ། །ཞེས་དང་། མྱ་ངན་འདས་དང་སོར་ཕྲེང་དང་། །ལང་ཀར་གཤེགས་པའི་མདོ་ལས་ཀྱང་། །ངས་ནི་ཤ་ཡང་རྣམ་པར་སྨད། །ཅེས་དང་། མ་འོངས་པ་ཡི་དུས་ན་ནི། །ཤ་ཟ་གཏི་མུག་སྨྲ་བ་དག །ཤ་ནི་སྡིག་མེད་རུང་བའོ། །སངས་རྒྱས་རྣམས་ཀྱིས་བཤད་ཅེས་ཟེར། །ཞེས་པ་ནི་ཐེག་པ་ཆེན་པོའི་སྡེ་སྣོད་ནས་ལྷག་པར་བཀག་པའི་དོན་གསལ་བར་སྟོན་པ་སྟེ། སྤྱད་དུ་རུང་བར་ཁུངས་འབྱིན་པའི་རྣམ་གསུམ་དག་པའི་ཤ་ཡང་ཐེ་ཚོམ་དང་བཅས་པའི་ཕྱིར་སྤང་བར་བྱ་བ་འབའ་ཞིག་དོན་དུ་གཉེར་བའི་ཚུལ། དེ་ཉིད་ལས། རྣམ་གསུམ་དག་པའི་ཤ་རྣམས་ནི། །མ་བརྟགས་པ་དང་མ་བསླངས་དང་། །མ་བསྐུལ་པ་ཡང་ཡོངས་མེད་པས། །དེ་བས་ཤ་ནི་མི་བཟའ་འོ། །ཞེས་གསུངས་སོ། །ཐེག་པ་ཆེན་པོའི་གང་ཟག་ཏུ་ཁས་འཆེས་ནས་ཤ་ཆང་གི་བཟའ་བཏུང་འབའ་ཞིག་དོན་དུ་གཉེར་བ་ནི་ལུགས་གཞན་པ་ཞིག་ལས་བདག་ཅག་གི་སྟོན་པ་ཐུགས་རྗེ་ཆེན་པོ་དང་ལྡན་པ་དེའི་རྗེས་སུ་ཞུགས་པ་རྣམས་ཀྱིས་ནི་སེམས་ཅན་གྱི་སྲོག་སྐྱོབ་པ་འབའ་ཞིག་དང་དུ་བླང་ཞིང་། མྱོས་པར་བྱེད་པའི་བཏུང་བའི་ཉེས་དམིགས་ཀྱང་བརྒྱ་བྱིན་བུམ་པའི་སྐྱེས་རབས་ལས་བསྟན་པ་བཞིན་དྲན་པར་བྱའོ། །ད་ནི་སྐྱེས་བུ་དམ་པ་བསྟེན་པའི་ཚུལ་རྒྱས་པར་བཤད་པའི་ཕྱིར། བསླབ་པ་ཀུན་གྱི་ཡོན་ཏན་རྫོགས་པའི་ཕྱིར། །སྐྱེས་བུ་དམ་པ་དག་ལ་བསྟེན་པར་བགྱི། །ཇི་ལྟར་མ་ལ་ཡ་ཡི་ནགས་ཀླུང་དུ། །རྣམ་པར་འཁྱམས་པའི་སྡོང་དུམ་ཕལ་པའང་། །ཡལ་འདབ་བརླན་པའི་ཙན་དན་དྲིས་བསུང་ལྟར། །གང་ལ་བསྟེན་པ་དེ་ཡི་རྗེས་སུ་འགྲོ། །འདི་ལྟར་བརྟག་པར་བྱ་སྟེ། དགེ་བ་དང་། སྡིག་པ་དང་། ཆོས་དང་། ཆོས་ལྟར་བཅོས་པའི་མཚན་ཉིད་མ་འདྲེས་པར་བྱེད་ཅིང་སྐྱབས་སུ་འགྲོ་བ་ནས་རྣམ་པར་གྲོལ་བའི་བར་གྱི་བསླབ་པའི་གནས་མ་ནོར་བར་ཤེས་པ་ནི་དགེ་བའི་བཤེས་གཉེན་བསྟེན་པ་ལས་འབྱུང་སྟེ། སྨན་གྱི་ནགས་ཚལ་ཆེན་པོ་རི་མ་ལ་ཡར་སྡོང་དུམ་ཕལ་པ་ཞིག་འཁྱམས་པར་གྱུར་ཀྱང་། རེ་ཞིག་ན་ཙན་དན་གྱི་དྲི་ངད་བསུང་པོས་དེ་ལ་བགོས་པ་ལྟར་གྱུར་ནས་ཙན་དན་དང་འཁྲུལ་པ་བསྐྱེད་པ་ཡོད་དེ། དེ་བཞིན་དུ་བྱིས་པ་སོ་སོའི་སྐྱེ་བོ་ཀུན་ནས་ཉོན་མོངས་པ་ཚེར་མ་ཅན་གྱི་ཤིང་ལྟ་བུ། མ་དུལ་ཞིང་མ་རུངས་པའི་ཡལ་ག་བལྟ་ན་མི་སྡུག་པ་ཤིང་གེལ་པ་ལྟ་བུ། བླང་དོར་ནོར་བ། གཏོང་བ་ལ་འཇུངས་པ། སྐྱེ་བ་ལ་སྲེད་པ། བཟོད་པའི་དཀའ་ཐུབ་ལས་ཉམས་པ། ལམ་མ་ཡིན་པ་ལ་ལམ། འབྲས་བུ་མ་ཡིན་པ་ལ་འབྲས་བུར་དམ་འཆའ་བ། ཚུལ་ཁྲིམས་ཀྱི་དྲི་བསུང་དང་། ཏིང་ངེ་འཛིན་གྱི་ཡོན་ཏན་གང་དང་ཡང་མི་ལྡན་པའི་སྐྱེ་བོ་བ་ལང་ལྟ་བུ་དག་ཀྱང་སྐྱེས་བུ་དམ་པ་ལ་བསྟེན་པས་དེའི་ལམ་སྲོལ་ལ་འཇུག་པར་འགྱུར་ཏེ། བྲམ་ཟེའི་ཁྱེའུ་མི་གདུང་བ་སོར་མོའི་ཕྲེང་བ་ཅན་གྱིས་མི་དགུ་བརྒྱ་དང་དགུ་བཅུ་གོ་དགུ་བསད་པའི་མཐར་རང་གི་མ་གསོད་ཅིང་། དེ་བཞིན་གཤེགས་པ་ལའང་མཐོ་བཙམས་པར་འགྱུར་བ། སྟོན་པའི་དམ་ཆོས་ཐོས་ཤིང་དེའི་རྗེས་སུ་ཞུགས་པས་བདེན་པ་མཐོང་བ་ལྟ་བུ་སྟེ། འདུལ་བ་ལུང་ལས། སཱ་ལའི་ཤིང་ལ་འཁྲི་ཤིང་བཞིན། །དམ་པ་རྣམས་ལ་བསྟེན་གྱུར་པ། །བཟང་པོའི་དཔལ་གྱིས་འཁྱུད་པར་བྱེད། །ཅེས་སོ། །བསྟེན་བྱའི་མཚན་ཉིད་ནི། དམ་པའི་ཆོས་ཚུལ་མཐའ་དག་རྫོགས་པ་ནི། །སྙིགས་མའི་མཐུས་བྱས་རྙེད་པར་དཀའ་ནའང་། །སྡོམ་གསུམ་གནང་བཀག་གཙང་མའི་ས་གཞི་ལ། །ཐོས་དང་སྙིང་རྗེ་ཆེན་པོས་ཐུགས་རྒྱུད་བརླན། །སྡེ་སྣོད་སྔགས་རྒྱུད་རྒྱ་མཚོའི་ཆོ་ག་མཁས། །སྤངས་རྟོགས་ཡེ་ཤེས་དྲི་མེད་འབྲས་བུས་ཕྱུག །བསྡུ་དངོས་བཞི་ཡི་མེ་ཏོག་རྣམ་བཀྲ་བས། །སྐལ་བཟང་སློབ་མའི་བུང་བ་སྡུད་ལ་བསྟེན། །སྔོན་བསྐལ་དུས་ཡར་ལྡན་གྱི་ཚེ་འབྲས་བུའི་བསྟན་པ་ལ་སོགས་པས་བསྐལ་པ་ལྷག་པར་དགེ་ཞིང་། གདུལ་བྱའི་རྒྱུད་ཀྱང་རང་བཞིན་བཟང་ལ་བསོད་ནམས་དང་ལྡན་པས་འཕགས་པའི་བླ་མ་དང་། སྔགས་ཀྱི་ལམ་ནས་དངོས་གྲུབ་བརྙེས་པའི་གྲུབ་ཆེན་མང་པོ་བྱོན་པས་དགེ་བའི་བཤེས་གཉེན་ཀྱང་ཟབ་མོའི་མདོ་སྡེ་དང་། རྒྱུད་སྡེ་དག་ནས་ཇི་ལྟར་གསུངས་པའི་མཚན་ཉིད་ཐམས་ཅད་མཐོང་ཆོས་སུ་ཚང་བ་ཡིན་ལ། ད་ནི་བསྟན་པ་སྙིགས་པས་དམ་པའི་ཡོན་ཏན་རྫོགས་པའི་སྐྱེས་བུའང་ཉུང་ཞིང་། གལ་ཏེ་ཡོད་ཀྱང་དེ་དག་གི་རྒྱུད་སྦས་ཚུལ་དུ་བཞུགས་པ་ཤས་ཆེ་ལ། འགྲོ་བ་རྣམས་ནི་རྨོངས་པའི་གཞན་དབང་དང་འབྲེལ་ཞིང་གྲགས་པའི་ཕྱི་ནས་འབྲེང་བ་ཤ་སྟག་པས། རང་རྒྱུད་ཀྱི་སྙིགས་མ་ལྔས་དགེ་བའི་བཤེས་གཉེན་དམ་པ་དང་ཕྲད་པའི་གེགས་བྱེད་པ་ཉིད་དོ། །དེ་ལྟར་གེགས་ཀྱི་དབང་དུ་སོང་ན་སློབ་པ་སོ་སོ་སྐྱེ་བོ་ནས་སངས་རྒྱས་ཀྱི་སའི་བར་དུ་འཁྲིད་པའི་ལམ་མཁན་བླ་མ་ལ་རེ་དགོས་པས། དང་པོ་ཆོས་འབྲེལ་མ་བྱས་ཀྱི་གོང་ནས་མཚན་ཉིད་ལེགས་པར་མ་བརྟགས་ན། སློབ་མ་རང་ཉིད་སྐལ་བ་དང་ལྡན་པ་ཡིན་དུ་ཟིན་ཀྱང་། ལྟར་སྣང་འཁྲུལ་པས་བསླུས་པའི་བླ་མ་ངན་པ་དང་ཕྲད་ཚར་ན། གཞན་སྐྱེས་བུ་དམ་པའི་དྲུང་དུ་འགྲོར་ཡང་མི་སྟེར། ཁོང་གི་དྲུང་དུ་ཇི་ཙམ་བསྡད་ཀྱང་ཡོན་ཏན་སྣ་གཅིག་མི་སྐྱེ། དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ལ་མཆོད་པ་ཕུལ་ནས་གསོལ་བ་བཏབ་ན་དགོས་འདོད་འབྱུང་སྟེ། མཆིང་བུ་ལ་གསོལ་བ་བཏབ་ན་དེ་ལྟ་མ་ཡིན་པས་སོ། །འདི་ལྟར་འཇིག་རྟེན་ན་གཉེན་བསྒྲིག་པ་དང་། བཟོ་གནས་སྣ་གཅིག་སློབ་པའི་སློབ་དཔོན་ལའང་རྟོག་དཔྱོད་ཞིབ་ཏུ་གཏོང་ན། དལ་བ་བརྒྱད་དང་རང་འབྱོར་ལྔ་ནི་རང་ཉིད་ཀྱི་བདག་རྐྱེན་ལས་བྱུང་ལ། གཞན་འབྱོར་གྱི་ཡན་ལག་ཉམས་སུ་འཇུག་ཅིང་མི་ལུས་རིན་པོ་ཆེའི་རྟེན་ཡང་ཕལ་པར་བྱེད་པ་དམ་པ་མ་ཡིན་པའི་བཤེས་གཉེན་གྱིས་ཐམས་ཅད་མཁྱེན་པའི་ལམ་མཁན་མི་བཏུབ་པའི་ཕྱིར་རོ། །འདིར་མཚན་ཉིད་ཇི་ལྟར་བརྟག་ན། སོ་སོ་ཐར་པ་དང་། བྱང་ཆུབ་སེམས་དཔའ་དང་། རིག་པ་འཛིན་པ་སྟེ་སྡོམ་པ་གསུམ་སོ་སོའི་གཞུང་ལམ་གང་ཡིན་པའི་གནང་བཀག་ཤེས་ཤིང་མ་འཁྲུལ་པར་སྤྱོད་ལ། འདུལ་བ་དང་། མདོ་སྡེ་དང་། མངོན་པ་དང་། རིག་པ་འཛིན་པ་སྡེ་སྣོད་བཞི་ཀའི་ཆོ་ག་ལ་མཁས་ཤིང་ཐོས་པས་རྒྱུད་གྲོལ་བ། ཁྱད་པར་དུ་སྙིང་རྗེ་ཆེན་པོ་དང་། སྟོང་པ་ཉིད་ཟུང་དུ་འབྲེལ་བའི་ཡོན་ཏན་ཁྱད་པར་ཅན་ཐུགས་རྒྱུད་ལ་མངའ་ཞིང་སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་མཐུན་པ་སྟེ་བསྡུ་བའི་དངོས་པོ་བཞིས་སེམས་ཅན་གྱི་དོན་མཛད་པ་དེ་ནི་སངས་རྒྱས་དང་བྱེད་པ་མཚུངས་པས་སྤྲུལ་པའི་སྐུ་ཁོ་ན་ཡིན་ཏེ། རྔ་བོ་ཆེའི་མདོ་ལས། མྱ་ངན་མ་བྱེད་ཀུན་དགའ་བོ། །སྨྲེ་སྔགས་མ་འདོན་ཀུན་དགའ་བོ། །ང་ནི་ཕྱི་མའི་དུས་ཀྱི་ཚེ། །དགེ་བའི་བཤེས་གཉེན་ཉིད་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་སོ། །དེའང་འདི་ལྟར་སངས་རྒྱས་ཀྱིས་གདུལ་བའི་ཚེ་གཙུག་ཏོར་དང་བཅས་པའི་སངས་རྒྱས་དངོས་སུ་སྣང་བས་དོན་མཛད་ལ། དགྲ་བཅོམ་པ་དང་། ཕྱིར་མི་འོང་བ་དང་། ལན་ཅིག་ཕྱིར་འོང་བ་དང་། རྒྱུན་དུ་ཞུགས་པའི་འབྲས་བུ་ལ་གནས་པའི་ཚུལ་གྱི་པཎྜི་ཏར་སྣང་བས་དོན་མཛད་དུས། དེ་དང་དེ་དག་ཏུ་སྤྲུལ་ནས་བཀའ་བསྡུ་བ་དང་། བསྟན་བཅོས་མཛད་པར་ཤེས་པར་བྱ་ཞིང་། དེང་སང་བསྟན་པའི་སྙིགས་མ་ལ་ཐར་པ་དང་ཐམས་ཅད་མཁྱེན་པའི་ལམ་སྟོན་ཕྱིར་དགེ་བའི་བཤེས་གཉེན་དུ་སྤྲུལ་ནས་དོན་མཛད་པའི་ཕྱིར་ངོ་བོའི་ཆ་ནས་སངས་རྒྱས་དང་མཉམ་ལ། རྣམ་པའི་ཆ་ནས་སངས་རྒྱས་དངོས་ཀྱིས་འདུལ་བར་སྤངས་པའི་སེམས་ཅན་ཤིན་ཏུ་ཉོན་མོངས་པ་ཅན་ལ་ཕན་པ་ལྷུར་མཛད་པས་བདག་ཉིད་ཀྱི་ངོ་ན་སངས་རྒྱས་ཉིད་ལས་ཐུགས་རྗེའི་ཆ་ནས་འཕགས་པར་བལྟ་སྟེ། གསང་བ་འདུས་པ་ལས། ཁམས་རྣམས་དང་ནི་ཕྲིན་ལས་དག །རང་གཞན་མཉམ་པ་ཉིད་ཀྱི་ཕྱིར། །སངས་རྒྱས་ཀུན་དང་བླ་མ་མཉམ། །འགྲོ་བ་གང་ལ་ལམ་སྟོན་ཕྱིར། །སངས་རྒྱས་ཉིད་ལས་མཆོག་ཏུ་འཕགས། །ཞེས་སོ། །བྱེ་བྲག་ཏུ་གསང་སྔགས་ཀྱི་བླ་མ་ནི། ཁྱད་པར་མན་ངག་སྟོན་པའི་བླ་མ་ནི། །དབང་ཐོབ་དམ་ཚིག་ལ་གནས་ཤིན་ཏུ་ཞི། །གཞི་ལམ་འབྲས་བུའི་རྒྱུད་དོན་ཁོང་དུ་ཆུད། །བསྙེན་སྒྲུབ་རྟགས་རྫོགས་རྟོགས་པས་རང་རྒྱུད་གྲོལ། །སྙིང་རྗེ་ཚད་མེད་གཞན་དོན་འབའ་ཞིག་གཉེར། །བྱ་བ་ཉུང་ཞིང་ནན་ཏན་ཆོས་ལ་སེམས། །སྐྱོ་ཤས་ཆེར་ལྡན་གཞན་ཡང་དེ་ལ་བསྐུལ། །ཐབས་ལ་མཁས་ཤིང་བརྒྱུད་པའི་བྱིན་རླབས་ལྡན། །དེ་ལྟ་བུ་ལ་བསྟེན་ན་དངོས་གྲུབ་མྱུར། །འདིའི་དོན་ནི་སློབ་དཔོན་ཆེན་པོ་བི་མ་ལའི་དགོངས་པ་སྟེ། སྒྱུ་འཕྲུལ་མེ་ལོང་གི་འགྲེལ་བར། བླ་མ་དེ་ཡང་དཀྱིལ་འཁོར་ཕྱི་ནང་གི་དབང་རྫོགས་པར་ཐོབ་པ། སྡོམ་པ་དམ་ཚིག་དག་པ། རྒྱུད་སྡེ་སོ་སོའི་དོན་ལ་མཁས་པ། བསྙེན་སྒྲུབ་ལས་སྦྱོར་དང་བཅས་པའི་དོན་ལ་སྦྱངས་པ། རྟོགས་པ་ལྟ་བས་མ་རྨོངས་པ། ཉམས་མྱོང་བསྒོམ་པ་ལ་འདྲིས་པ། སྣ་ཚོགས་སྤྱོད་པ་དང་འབྲེལ་བ། སྙིང་རྗེས་གདུལ་བྱ་འདྲེན་པ་སྟེ་བརྒྱད་དང་ལྡན་པའོ། །ཞེས་གསུངས་ལ། དེའི་སྟེང་དུ་བརྒྱུད་པ་ལ་སེལ་མེད་ཅིང་བྱིན་རླབས་ཆེ་བ་དང་། སྐྱོ་ཤས་ཆེ་ཞིང་བྱ་བ་ཉུང་བ་ནི་བདག་གི་བླ་མ་ཀུན་མཁྱེན་ཆེན་པོའི་རིང་ལུགས་ཐུན་མོང་མ་ཡིན་པ་ཡིན་ཏེ། བརྒྱུད་པ་ལ་སེལ་ཡོད་ན་སྔགས་ཀྱི་དངོས་གྲུབ་དམ་ཚིག་གཅིག་པོ་ལ་བརྟེན་ནས་འབྱུང་བ་ཡིན་པས་བྱིན་རླབས་མི་འབྱུང་། ནན་ཏན་ཆོས་ལ་མི་བྱེད་ན་ཆོས་ནས་འདི་སྐད་བཤད་དོ་བྱས་ཀྱང་ལག་ལེན་རང་དང་མཐུན་པར་བྱེད་ཅིང་། ཁྱད་པར་འཇིག་རྟེན་ཆོས་བརྒྱད་ལ་ནི་སློབ་མི་དགོས་པར་འཇུག །དེའི་ཕྱིར་བླ་མ་རང་ཡང་ཆོས་བཞིན་དུ་བྱེད་ལ། གཞན་ཡང་དེ་ལ་སྦྱོར་བ་ལ་ནི་དགེ་བའི་བཤེས་གཉེན་ཞེས་བྱ་སྟེ། མདོ་སྡེ་མྱང་འདས་ལས། བདག་བྱང་ཆུབ་ལ་ནན་ཏན་དུ་བྱེད་ལ། གཞན་ཡང་བྱང་ཆུབ་ལ་ནན་ཏན་དུ་བྱེད་དུ་འཇུག་པ་སྟེ། དེ་བས་ན་དགེ་བའི་བཤེས་གཉེན་ཞེས་བྱའོ། །ཞེས་གསུངས་པས་ན། རྟོགས་པས་བདག་རྒྱུད་གྲོལ་བའི་རྟགས་སུ་བྱ་བ་ཉུང་ཞིང་། སྙིང་རྗེ་ཆེན་པོ་དང་ལྡན་པས་གཞན་དོན་ལ་སྐྱོ་ངལ་མེད་པ་ནི་སྐྱེས་བུ་ཆེན་པོའི་རྟགས་སུ་རིགས་པར་བྱ་སྟེ། མགོན་པོ་བྱམས་པས། བྱང་ཆུབ་སེམས་དཔའ་ཐོས་མང་དང་། །བདེན་མཐོང་སྨྲ་མཁས་བརྩེ་བ་ཅན། །སྐྱོ་མེད་སྐྱེས་བུ་དམ་པ་ནི། །ཆེན་པོ་ཡིན་པར་ཤེས་པར་བྱ། །ཞེས་སོ། །བསྟེན་བྱ་མ་ཡིན་པའི་མཚན་ཉིད་བཤད་པའི་ཕྱིར། བྲམ་ཟེ་བཞིན་དུ་ཆོ་རིགས་བསྲུང་བའམ། །བསྟི་གནས་ཉམས་པར་དོགས་པའི་རྫིང་བུ་རུ། །ཐོས་བསམ་འབྲས་བུ་གནས་མིན་ཁྲུས་ལ་ཞུགས། །ཤིང་གི་རང་འཐག་ལྟ་བུའི་ལམ་སྟོན་དང་། །འདི་ལྟར་བྲམ་ཟེ་ནི་བདག་ཉིད་ཀྱི་ཆོ་རིགས་འབའ་ཞིག་ལ་མཆོག་ཏུ་འཛིན་ཞིང་། རིག་བྱེད་དང་། ངན་སྔགས་ལ་སོགས་པ་སངས་རྒྱ་བའི་དགོས་པ་མེད་ཅིང་། རྒྱལ་བའི་བཀའ་དང་འབྲེལ་བ་མེད་པའི་ཕ་མེས་ཀྱི་རིང་ལུགས་ལ་དམ་པར་འཛིན་པ་བཞིན་དུ། རིགས་དང་། རུས་དང་། ཆོ་འབྲང་འབའ་ཞིག་གིས་ཁེངས་ཤིང་གཟེང་བསྟོད་ལ་བཅོམ་པ་དང་། སྲིད་སྡེའི་མངོན་རྟོགས་ལ་དམ་པའི་ཆོས་ཀྱི་མཚན་ཉིད་གནས་པ་ལྟར་རྣམ་གཡེང་དང་འདུ་འཛིའི་རློམ་པས་རབ་ཏུ་རྒྱགས་ཤིང་ཐོས་པ་དང་། བསམ་པ་དང་། སྒོམ་པའི་ཤེས་རབ་གང་ལའང་ཡིད་མི་རྟོན་པའམ། བསྟི་གནས་ཀྱི་དཀོར་དང་མངའ་རིས་ཉམས་སུ་དོགས་པས་ཐོས་བསམ་ཅུང་ཟད་བྱས་ཀྱང་དེའི་འབྲས་བུ་འཇིག་རྟེན་གྱི་ཁེངས་གྲགས་གཙོ་བོར་གཉེར་ཞིང་། ཟབ་པ་དང་རྒྱ་ཆེ་བའི་དོན་གཞན་ལ་བཤད་ཀྱིན་རང་ཉིད་ཀྱི་བསམ་སྦྱོར་ཚོང་དང་། སོ་ནམ་དང་། སེམས་ཅན་གྱི་སྲོག་ལ་འཚེ་བ་དང་། སྲིད་པའི་ཕུན་ཚོགས་འབའ་ཞིག་ལ་སྲེད་པས་རྒྱལ་སྲིད་དང་། ཁྱིམ་ན་གནས་པའི་ལམ་སྲོལ་ལ་ཡང་དག་པར་ཞུགས་པ་ནི། སྒྲ་དང་དོན་དུ་འཛོལ་བ་ཤིང་གི་རང་འཐག་ལྟ་བུའོ། །སོ་སོ་སྐྱེ་བོའི་རང་བཞིན་མ་འགལ་ཡང་། །བླུན་པོའི་དད་པས་བབ་ཅོལ་གནས་ལ་སྦྱར། །རྙེད་དང་བཀུར་བསྟིའི་མཆོད་པས་ཁེངས་གྱུར་པ། །ཁྲོན་པའི་ལག་འགྲོ་ལྟ་བུའི་བཤེས་གཉེན་དང་། །འཕགས་པ་རྣམས་ནི་སོ་སོ་སྐྱེ་བོའི་ཆོས་ཉིད་དང་ཤིན་ཏུ་འགལ་བ་ཡིན་ཏེ། ཇི་ལྟར་འགལ་ན་དད་པ་དང་། ཚུལ་ཁྲིམས་དང་། གཏོང་བ་ལ་གོམས་པ་དང་། ཐོས་པ་མང་པོ་དང་། ཁྲེལ་ཡོད་པ་དང་། ངོ་ཚ་ཤེས་པ་དང་། ཤེས་རབ་དང་ལྡན་པ་སྟེ་རང་གི་རིགས་དེའི་ནོར་གྱིས་ཕྱུག་ལ་སེར་སྣ་ལ་སོགས་པ་ཉོན་མོངས་པ་དང་། རྡུལ་དང་ལྟ་བ་ཐམས་ཅད་དང་བྲལ་བས་ན་འཕགས་པ་ཞེས་བྱ་སྟེ། བྱིས་པ་སོ་སོ་སྐྱེ་བོའི་མཚན་ཉིད་ནི། སློབ་དཔོན་མ་ཏི་ཙི་ཏྲས། ཁྱོད་ཀྱིས་བླུན་དང་ཕོངས་ཆོས་ཅན། །བརྐམ་ཞིང་བྱས་པ་མི་གཟོ་དང་། །ཁ་གསག་གཏུམ་པོ་མི་བཟད་པ། །ཡུལ་ན་གནས་སུ་མ་སྩལ་ཅིག །རྟག་ཏུ་སོ་སོ་སྐྱེ་བོ་ཡི། །ཁྱད་པར་མཁྱེན་པར་མཛོད་ཅིག་དང་། །རང་དོན་ཙམ་ཕྱིར་འབྲང་བའི་མི། །གཞན་དག་སྐྱེ་བོ་ཕལ་པ་བས། །ཞེས་དང་། བཤེས་སྤྲིང་ལས། དེ་ཡི་རྒྱུ་ནི་སྐྱེ་བོ་འཇུངས་དགའ་བ། །སེར་སྣ་འཕགས་མིན་ལགས་པར་རྒྱལ་བས་གསུངས། །ཞེས་འཕགས་པ་མ་ཡིན་པ་ནི་རང་རྒྱུད་ཉོན་མོངས་ཅན་དུ་རྣམ་པར་བཞག་པའི་མཚན་ཉིད་མ་རིག་བཞིན་དུ། སྔོན་གྱི་སྦྱིན་འབྲས་ཅུང་ཟད་ལ་བསྟེན་ནས་ད་ལྟར་བླ་མའི་གནས་སྐབས་ཐོབ་པ་དག་ལ། བླུན་པོ་རྣམས་ཀྱི་ཕྱོགས་རིས་ཀྱི་དད་པས་འཕགས་པའམ། ཐུགས་རྗེ་ཡས་སྤྲུལ་གྱི་གང་ཟག་ཏུ་སྒྲོ་བཏགས་པའི་རྙེད་པ་དང་བཀུར་བསྟིས་དེའི་རྒྱུད་མ་རུངས་པར་བྱས་པས་རང་རྒྱུད་ལ་རྟོག་དཔྱོད་མི་འཇུག་པར་དེ་དེ་བཞིན་ནོ་སྙམ་པའི་མངོན་པའི་ང་རྒྱལ་ཅན་ཏེ། དེའི་ངང་ཚུལ་ནི་སྐྱེ་བོ་གསོ་ཐིགས་ལས་བཤད་པའི་ཁྲོན་པའི་སྦལ་པ་བཞིན་ནོ། །ཐོས་པ་ཉུང་ཞིང་སྡོམ་དང་དམ་ཚིག་འཆལ། །རྒྱུད་ཚོད་དམའ་ལ་ཀུན་སྤྱོད་ས་བླར་གཤེགས། །བྱམས་དང་སྙིང་རྗེའི་དཔྱང་ཐག་ཆད་པ་ཡི། །སྨྱོན་པའི་ལམ་མཁན་རྣམས་ལས་སྡིག་པ་འཕེལ། །ཕྱོགས་རེ་ལས་མ་ཐོས་པས་ལུང་གི་ཡོན་ཏན་དང་མི་ལྡན་པ། གནང་བཀག་མི་ཤེས་པས་སྡོམ་པ་དང་དམ་ཚིག་འཆལ་པར་སྤྱོད་པ། དེ་ཁོ་ན་ཉིད་རྟོགས་པའི་ཤེས་རབ་དང་མི་ལྡན་པར་སྤངས་རྟོགས་ཕུན་སུམ་ཚོགས་པ་སྤྱོད་པ་ལ་ཞུགས་པའི་ལད་མོ་བྱེད་པ། བྱམས་པ་དང་སྙིང་རྗེའི་ཆུ་རྒྱུན་བསྐམས་པས་གཞན་དོན་རྙེད་བཀུར་གྱི་རྗེས་སུ་འགྲོ་བ་རྣམས་ཏེ། སྨྱོན་པ་ལ་ལམ་མཁན་བཅོལ་ན་ལམ་མིན་རྒྱུན་ལྡན་དུ་འཁྲིད་པ་བཞིན་ཆོས་ལྟར་བཅོས་པའི་གཡང་ས་ནས་སྡིག་ལྟའི་གཅོང་རོང་དུ་འཁྲིད་པ་ཡིན་ནོ། ཁྱད་པར་རང་ལས་ཡོན་ཏན་ལྷག་བཅས་མིན། །བྱང་ཆུབ་སེམས་བྲལ་གྲགས་པའི་མཐུས་བསྟེན་ན། །ལོང་བའི་དེད་དཔོན་ནོར་བ་ཆེན་པོ་སྟེ། །ཟོལ་འགྲོགས་མུན་པའི་སྨག་ཏུ་འཁྱམ་པར་འགྱུར། །དེ་ཕྱིར་དམ་པ་ཤིན་ཏུ་མ་བརྟགས་ན། །དད་པ་ཅན་གྱི་དགེ་ཚོགས་ཆུད་གསོན་ཅིང་། །དལ་བ་སྐབས་གཅིག་རྙེད་པ་སྦྲུལ་གདུག་དང་། །ཤིང་གི་གྲིབ་མ་ནོར་བཞིན་བསླུ་བར་འགྱུར། །འདི་ལྟར་ལོང་བས་ལོང་བའི་ལམ་སྣ་འདྲེན་པ་ནི་འཇིག་རྟེན་ནའང་སྲིད་པ་མ་ཡིན་པའི་ཆོས་ཏེ། དེའི་ཕྱིར་སློབ་མ་གང་ཡིན་པ་ལས་ཆེས་ལྷག་པའི་ཁྱད་པར་གྱི་ཡོན་ཏན་ནི་ཅིས་ཀྱང་དགོས་ཏེ། མཛའ་བཤེས་ཀྱི་ཚོམས་ལས། དམན་པ་བསྟེན་པས་མི་དག་ཉམས་འགྱུར་ཤིང་། །ཐད་ཀར་བབ་པ་བསྟེན་པས་སོ་ན་གནས། །གཙོ་བོ་བསྟེན་པས་དམ་པ་ཐོབ་འགྱུར་བ། །དེ་ཕྱིར་བདག་བས་གཙོ་གྱུར་བསྟེན་པར་བྱ། །ཞེས་བཤད་པ་ལྟར། སློབ་མ་དེ་ཚོགས་ལམ་པ་ཡིན་ན། བླ་མ་སྦྱོར་ལམ་ལ་གནས་པ་ཞིག་དགོས། དེ་བཞིན་དུ་སློབ་མ་སྦྱོར་ལམ་པ་ལ་བླ་མ་མཐོང་ལམ་པ། སློབ་མ་མཐོང་ལམ་ལ་འཁྲིད་པ་ལ་བླ་མ་བསྒོམ་ལམ་ལ་གནས་པ། སློབ་མ་བསྒོམ་ལམ་པ་ལ་བླ་མ་ཐམས་ཅད་མཁྱེན་པའི་གོ་འཕང་ཐོབ་པ་ཞིག་དགོས་པ་ཡིན་ནོ། །དེ་ལྟ་ན་མདོ་སྡེ་དང་རྒྱུད་སྡེ་དག་ལས་བླ་མ་སངས་རྒྱས་སུ་བལྟ་དགོས་པ་དང་མ་འབྲེལ་ལོ་སྙམ་ན། འདིར་ཐོག་མར་བླ་སློབ་འབྲེལ་པ་བསྒྲིགས་པའི་ཆ་ལ་ཡོན་ཏན་གྱི་སྒོ་ནས་ཆེ་ཁྱད་མ་ཞུགས་ན། ཉམས་ཚོད་ལོངས་ནས་མོས་གུས་ཀྱི་རྟེན་དུ་མི་རུང་ཞིང་ཟོལ་འགྲོགས་དང་བཅས་པས་བྱིན་རླབས་མི་འཇུག་པས་འདི་ལྟར་བརྟགས་ཏེ། མོས་གུས་འབུལ་བ་དང་། གསོལ་བ་འདེབས་པའི་ཆ་ནས་ལམ་ལ་གནས་པའི་གང་ཟག་ཏུ་བལྟ་བ་ནི་མ་ཡིན་ནོ། །ཁྱད་པར་བྱང་ཆུབ་ཀྱི་སེམས་རིན་པོ་ཆེ་ནི་ཡོན་ཏན་ཐམས་ཅད་ཀྱི་གཏེར་མཛོད། དད་པའི་ཞིང་ས་བླ་ན་མེད་པ་ཉིད་དེ། དེ་དང་བྲལ་བ་གང་ཞིག་ལྟར་སྣང་གི་གྲགས་པ་ཙམ་ལ་འཁྲུལ་ནས་བསྟེན་ན། སློབ་མ་དེ་ཆོས་བཞིན་བྱེད་མི་བྱེད་ལ་མི་བལྟ་བར་རང་ལ་ཞབས་ཏོག་དང་བསྙེན་བཀུར་བག་རེ་ཙམ་ལ་གཟིགས་པ་མཐོ་དམན་དུ་ཡོང་ཞིང་། དགོངས་གཞི་དང་དགོས་དབང་གང་ཡང་མེད་པའི་འཇིག་རྟེན་འཁྲུལ་པའི་བྱ་བས་བཀའ་མ་ཆོགས་པའི་རིང་ལ་སློབ་མས་དལ་བ་སྐབས་ཤིག་རྙེད་པ་དང་། དགེ་བའི་ཚོགས་ཆུད་གསོན་པར་འགྱུར་ཏེ། སྔོན་སྐྱེ་བོ་མ་བརྟགས་པ་ཞིག་གིས་མཚན་མོ་དུག་སྦྲུལ་དང་ཤིང་གི་གྲིབ་མ་ནོར་ནས་ཁོའི་སྟེང་དུ་ངལ་གསོས་པས། ཇི་ཞིག་ན་སྦྲུལ་གྱིས་ཁྱུར་མིད་བྱས་པ་ལྟ་བུའོ། །དེའི་ཕྱིར་དམ་པ་མ་ཡིན་པ་བསྟེན་པའི་ཉེས་པ་ནི་ཀུ་ཤ་ཉ་རུལ་གྱི་བགོས་པ་ལྟ་བུ་སྟེ་འདུལ་བ་ལུང་ལས། མི་ཡི་མདུན་ན་ཀུ་ཤ་ལ། །ཉ་རུལ་གྱིས་ནི་དཀྲིས་གྱུར་ན། །དེ་ནི་རིང་པོར་མི་ཐོགས་པར། །ཀུ་ཤ་ཉིད་ཀྱང་དེ་འདྲར་འགྱུར། །དེ་ཕྱིར་དམ་པ་མ་ཡིན་པ། །བསྟེན་པར་གྱུར་པའང་དེ་བཞིན་ནོ། །ཞེས་དང་། རིག་པ་འཛིན་པའི་སྡེ་སྣོད་ལས། རང་གི་མི་ཤེས་གཞན་ལ་སློབ། །རང་རྒྱུད་མ་སྨིན་གཞན་སྨིན་འདོད། །རྒྱུད་ལུང་མན་ངག་དོན་མ་རིག །བླུན་པོའི་ངག་ཚིག་ཁེངས་དང་བཅས། །གསང་སྔགས་བོན་གྱེར་ཟབ་ཆོས་འཚོང་། །རྒྱབ་བརྟེན་ཆོས་བྱས་ལས་སྡིག་གསོག །ཐོས་ཆུང་དྲིས་ལ་ལན་མི་ཐེབས། །སློབ་དཔོན་མ་བརྟགས་སློབ་མའི་བདུད། །ཅེས་སོ། །དེ་ལྟ་བུ་ལ་ནི་སེམས་ཅན་བསླུ་བའི་ཉེས་དམིགས་ཀྱང་ཚད་མེད་པ་འཐོབ་སྟེ། རྔམ་ཀློག་ལས། སྨྲ་བའི་སེང་གེ་བླ་མའི་དོན་ལ་མཁས་པའི་རྗེས་སུ་བྱུང་བས་མི་ཤེས་བཞིན་དུ་ཚུལ་འཆོས་ཤིང་། བླ་མའི་ས་བཟུང་ནས་ཚོགས་སྐྱོང་བ་ནི་དྲེགས་པའི་རུ་ཏྲ་ཆེན་པོར་ལྷུང་བར་ངེས་སོ། །སྔོན་འདས་པའི་དུས་དགེ་སློང་དྲི་མེད་སྤྱོད་པ་ཞེས་བྱ་བ་ཞིག་རྣལ་འབྱོར་གྱི་ཚུལ་འདྲ་བ་ཙམ་དུ་སྤྱོད་དེ། དེ་དོན་ལ་མཁས་པའི་བླ་མ་རྣམས་མི་བཞུགས་ནས་བླ་མ་དེ་དག་གི་ཚོམ་བུ་འབུམ་གྱི་འཁོར་རྣམས་ཀྱིས་བདག་ཅག་རྣམས་ཀྱི་བླ་མའི་གདུང་འཚོབ་པར་གསོལ་ཞེས་དཔོན་བསྟབས་པས། དགེ་སློང་དྲི་མེད་སྤྱོད་པ་ཞེས་བྱ་བ་དེ་ཆེ་བའི་དྲེགས་པ་སྐྱེས་ཏེ་མི་ཤེས་བཞིན་དུ་ཚུལ་འདྲ་བ་ལོག་པར་སྤྱོད་པས་དེའི་ཚེ་དེའི་དུས་ཉིད་དགེ་སློང་ཚོམ་བུ་འབུམ་གྱི་འཁོར་དང་བཅས་པ་རུ་ཏྲར་བསྐལ་པ་ཆེན་པོ་གྲངས་མེད་པར་སྐྱེས་སོ། །ཞེས་པ་ལ་སོགས་རྒྱ་ཆེར་གསུངས་སོ། །དེ་ལྟར་ནོར་བ་སྤངས་ནས་ཡང་དག་པའི་སྐྱེས་བུ་དམ་པ་ལ་བསྟེན་པ་ནི་རྙེད་པ་ཆེན་པོ་རྙེད་པ་ཡིན་ཏེ། མཐའ་དག་ཡོན་ཏན་འབྱོར་པའི་བླ་མ་ནི། །སངས་རྒྱས་ཀུན་གྱི་ཡེ་ཤེས་ཐུགས་རྗེའི་ཁམས། །གདུལ་བྱའི་ཡུལ་ལ་སྐྱེས་བུའི་གཟུགས་ཀྱིས་བྱོན། །དངོས་གྲུབ་ཀུན་གྱི་རྩ་བ་བླ་ན་མེད། །མང་དུ་ཐོས་པ་ལུང་གི་ཡོན་ཏན་དམ་པས་ཕྱུག་ཅིང་། རྟོགས་པའི་ཤེས་རབ་བླ་ན་མེད་པས་སློབ་མའི་རྒྱུད་དགྲོལ་བ་ལ་མཁས་པ་དེ་ནི་སངས་རྒྱས་ཐམས་ཅད་འདུས་པའི་སྤྱི་གཟུགས་ཡིན་ཏེ། ནམ་མཁའ་དྲི་མ་མེད་པའི་མདོ་ལས། ཀུན་དགའ་བོ་དེ་བཞིན་གཤེགས་པ་རྣམས་ནི་སེམས་ཅན་ཐམས་ཅད་ལ་སྣང་བ་མ་ཡིན་གྱི། དགེ་བའི་བཤེས་གཉེན་ནི་ཡོངས་སུ་སྣང་བས་ཆོས་སྟོན་ཅིང་ཐར་པའི་ས་བོན་འདེབས་པའི་ཕྱིར། དེ་བཞིན་གཤེགས་པ་རྣམས་ལས་དགེ་བའི་བཤེས་གཉེན་ལྷག་པར་ཡང་ཟུང་ཞིག །ཅེས་དང་། རྒྱུད་ལས། སངས་རྒྱས་རྣམས་དང་དེ་ཡི་སྲས། །གང་གི་གདུལ་བྱ་དེ་ཉིད་ལ། །དེ་དང་མཐུན་པའི་གཟུགས་སྟོན་ཏོ། །ཞེས་དང་། དངོས་གྲུབ་ཐམས་ཅད་བླ་མ་ཁོ་ན་ལ་རག་ལས་པའི་ཚུལ་སྤྱི་མདོ་ལས། སློབ་དཔོན་དག་ལ་མ་བསྟེན་པར། །སངས་རྒྱས་ནམ་ཡང་མི་འབྱུང་སྟེ། །འབྱུང་བར་ཡང་དག་ངས་མ་མཐོང་། །བྱུང་ན་དམ་པའི་ལུང་དང་འགལ། །ཞེས་སོ། །མཛད་པའི་ཀུན་ཏུ་སྤྱོད་པ་ཡང་མ་ངེས་ཏེ། དྲང་བའི་དོན་དུ་ཀུན་དང་ཕྱོགས་མཐུན་ལ། །ངེས་པའི་དོན་དུ་ཀུན་དང་རྣམ་གཞག་འགལ། །དགོངས་པ་ཅན་ཕྱིར་ཀུན་ལས་ཁྱད་པར་འཕགས། །ཐེ་ཚོམ་གཅོད་མཁས་ལོག་བསྒྲུབ་སྐྱོ་ངལ་བཟོད། །དེ་སྐད་དུ་སྡོང་པོ་བཀོད་པ་ལས། དགེ་བའི་བཤེས་གཉེན་དེ་ཡང་གང་ཞེ་ན། སྐྱེ་དགུ་རྣམས་ཡོངས་སུ་འདྲེན་པའི་ཕྱིར་མཐོང་ན་མི་མཐུན་པ་མེད་པའོ། །འཇིག་རྟེན་ལས་འདས་པའི་ཕྱིར་ཀུན་དང་ཐུན་མོང་དུ་མ་གྱུར་པའོ། །དེ་རྣམ་པ་ཐམས་ཅད་དུ་བརྩམ་པ་དོན་ཡོད་པས་ཕན་པ་དཔག་ཏུ་མེད་པར་བསྒྲུབ་པའོ། །ཞེས་སོ། །དཔེ་དོན་མཐུན་པར་བསྔགས་པ་ནི། སྲིད་པའི་མཚོ་ལས་སྒྲོལ་བའི་གྲུ་བོ་ཆེ། །ལམ་མཆོག་འཁྲུལ་པར་མི་འགྱུར་དེད་དཔོན་དངོས། །ལས་ཉོན་མེ་ཚོགས་འཇོམས་པས་བདུད་རྩིའི་ཆར། །མ་རིག་མུན་པ་སེལ་བས་ཉི་ཟླར་མཚུངས། །ཐེག་པ་ཤིན་ཏུ་ཆེ་བས་ས་གཞི་འདྲ། །ཕན་དང་བདེ་བའི་འབྱུང་གནས་དཔག་བསམ་ཤིང་། །ཆོས་ཀྱི་མཛོད་ལྡན་བུམ་པ་བཟང་པོ་སྟེ། །ཀུན་འབྱུང་ཡིད་བཞིན་ནོར་བུ་ལས་ཀྱང་ལྷག །ཀུན་ལ་སྙོམས་པར་བྱམས་པས་ཕ་མ་ཡིན། །ཆེ་ཞིང་མྱུར་བའི་སྙིང་རྗེ་ཆུ་ཀླུང་མཚུངས། །འཕོ་འགྱུར་མེད་པའི་དགའ་བ་རི་དབང་འདྲ། །འཁྲུགས་པ་མེད་པའི་བཏང་སྙོམས་ཆར་སྤྲིན་བཞིན། །དེ་འདྲའི་བླ་མ་སངས་རྒྱས་ཀུན་དང་མཉམ། །གནོད་པ་བྱས་ཀྱང་བདེ་བའི་ལམ་འབྲེལ་ན། །ཟོལ་མེད་དད་པས་བསྟེན་པའི་སྐྱེས་བུ་ལ། །མངོན་མཐོ་ངེས་ལེགས་ཡོན་ཏན་ཆར་བཞིན་འབབ། །དེའི་དོན་ཡང་སྔ་མར། ཀྱེ་རིགས་ཀྱི་བུ། གཞན་ཡང་འཁོར་བའི་རྒྱ་མཚོ་ལས་སྒྲོལ་བའི་ཕྱིར་གྲུ་བོ་ཆེ་ལྟ་བུའོ། །ཐར་པའི་ལམ་དུ་ཞུགས་པ་རྣམས་ཀྱི་དེད་དཔོན་ལྟ་བུའོ། །སྲིད་པའི་རྒུད་པ་རྣམས་སེལ་བས་ཡིད་བཞིན་གྱི་ནོར་བུའི་རྒྱལ་པོ་ལྟ་བུའོ། །ལས་དང་ཉོན་མོངས་པའི་མེ་འཇིལ་བས་ཆུ་བོ་ལྟ་བུའོ། །ཆོས་ཀྱི་ཆར་ཆེན་པོ་འབེབས་པས་སྤྲིན་བཟང་པོ་ལྟ་བུའོ། །འགྲོ་བ་རབ་ཏུ་དགའ་བས་ལྷའི་རྔ་བོ་ཆེ་ལྟ་བུའོ། །ཉོན་མོངས་པའི་ནད་སེལ་བས་སྨན་པའི་རྒྱལ་པོ་ལྟ་བུའོ། །མ་རིག་པའི་མུན་ནག་ཐམས་ཅད་སེལ་བས་སྒྲོན་མེ་ལྟ་བུའོ། །འདོད་དགུའི་རེ་བ་རྫོགས་པས་དཔག་བསམ་གྱི་ཤིང་ལྟ་བུའོ། །ཅི་བསམ་པ་ཐམས་ཅད་འགྲུབ་པས་བུམ་པ་བཟང་པོ་ལྟ་བུའོ། །བྱམས་པ་ཚད་མེད་པས་ཉི་མའི་དཀྱིལ་འཁོར་ལྟ་བུའོ། །ཉོན་མོངས་པའི་གདུང་བ་སེལ་བས་ཟླ་བའི་དཀྱིལ་འཁོར་ལྟ་བུའོ། །ཡོན་ཏན་གྱི་འབྱོར་པ་སྟེར་བས་རྣམ་ཐོས་ཀྱི་བུ་ལྟ་བུའོ། །ཞེས་སོ། །མདོར་ན་བྱང་ཆུབ་སེམས་དཔའི་སྤྱོད་པ་རླབས་པོ་ཆེའི་བསྐྱེད་གཞི་ཚད་མེད་བཞིས་ཐུགས་རྒྱུད་ཡོངས་སུ་དག་པའི་སྐྱེས་བུ་དམ་པ་ལ་གནོད་པ་བྱས་ཀྱང་སེམས་ཅན་རྣམས་ཀྱི་མཚན་ཉིད་གཟིགས་ནས་ཁྲོ་བ་སྤངས་བའི་བྱམས་པའི་རྗེས་སུ་གཞོལ་བས་བདེ་བའི་ལམ་དུ་འབྲེལ་ན་དད་པའི་ཉེ་བར་ལེན་པས་སྙིང་ཐག་པ་ནས་བསྟེན་པའི་སློབ་མ་ལ་གནས་སྐབས་སུ་མངོན་པར་མཐོ་བ་དང་། མཐར་ཐུག་ངེས་པར་ལེགས་པའི་ཡོན་ཏན་ཆར་བཞིན་དུ་འབབ་པ་སྨོས་ཅི་འཚལ་ཏེ་སྤྱོད་འཇུག་ལས་ཀྱང་། གང་ལ་གནོད་པ་བྱས་ཀྱང་བདེར་འབྲེལ་བ། །བདེ་བའི་འབྱུང་གནས་དེ་ལ་ཕྱག་འཚལ་ལོ། །ཞེས་བསྔགས་པ་ཡིན་ནོ། །ཕན་ཚུན་རྟེན་དང་བརྟེན་པ་ལྟ་བུར་འདུ་ཤེས་བསྐྱེད་ནས་བསྟེན་པའི་ཚུལ་ནི། ནད་པས་སྨན་པ་འགྲོན་པོས་སྐྱེལ་མ་དང་། །འཇིགས་པས་རམ་ཟླ་ཚོང་པས་དེད་དཔོན་དང་། །གྲུ་པས་མཉན་པ་བཞིན་དུ་སྐྱེ་ཤི་དང་། །ཉོན་མོངས་དགྲ་ཡིས་འཇིགས་པས་བསྟེན་པར་བྱ། །དེ་སྐད་དུ་སྡོང་པོ་བཀོད་པ་ལས། རིགས་ཀྱི་བུ། ཁྱོད་ཀྱིས་བདག་ཉིད་ལ་ནད་པའི་འདུ་ཤེས་བསྐྱེད་པར་བྱའོ། །ཆོས་ལ་སྨན་གྱིས་འདུ་ཤེས་བསྐྱེད་པར་བྱའོ། །ནན་ཏན་ཉམས་སུ་ལེན་པ་ལ་ནད་ཉེ་བར་འཚོ་བའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས་བསྐྱེད་པར་བྱའོ། །ཞེས་དང་། ཡང་རིགས་ཀྱི་བུ། ཁྱོད་ཀྱིས་བདག་ཉིད་ལ་འགྲོན་པོའི་འདུ་ཤེས་བསྐྱེད་པར་བྱའོ། །ཆོས་ལ་མི་འཇིགས་པ་སྦྱིན་པའི་འདུ་ཤེས་བསྐྱེད་པར་བྱའོ། །ནན་ཏན་ཉམས་སུ་ལེན་པ་ལ་འཇིགས་པ་ཐམས་ཅད་ལས་སྒྲོལ་བའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་སྐྱེལ་མ་དཔའ་བོའི་འདུ་ཤེས་བསྐྱེད་པར་བྱའོ། །ཡང་རིགས་ཀྱི་བུ། ཁྱོད་ཀྱིས་བདག་ཉིད་ལ་ཚོང་པའི་འདུ་ཤེས་བསྐྱེད་པར་བྱའོ། །ཆོས་ལ་ཚོང་ཟོང་ཉེ་བར་འདུ་བའི་འདུ་ཤེས་བསྐྱེད་པར་བྱའོ། །ནན་ཏན་ཉམས་སུ་ལེན་པ་ལ་ཁེ་སྤོགས་འགྲུབ་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་དེད་དཔོན་གྱི་འདུ་ཤེས་བསྐྱེད་པར་བྱའོ། །ཡང་རིགས་ཀྱི་བུ། ཁྱོད་ཀྱིས་བདག་ཉིད་ལ་གྲུ་པའི་འདུ་ཤེས་བསྐྱེད་པར་བྱའོ། །ཆོས་ལ་གྲུའི་འདུ་ཤེས་བསྐྱེད་པར་བྱའོ། །ནན་ཏན་ཉམས་སུ་ལེན་པ་ལ་ཆུ་བོའི་ཕ་རོལ་ཏུ་ཕྱིན་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་མཉན་པ་མཁས་པའི་འདུ་ཤེས་བསྐྱེད་པར་བྱའོ། །ཞེས་གསུངས་པ་བཞིན་སྐྱེ་ཤིའི་འཕྲང་ཐར་ས་མེད་པ་དང་། འདོད་ཆགས་ལ་སོགས་ཉོན་མོངས་པ་བརྒྱ་ཕྲག་གིས་གཟིར་བ་བདག་ཅག་ཐམས་ཅད་མཁྱེན་པའི་སྨན་པ་མཆོག་ལ་བསྟེན་པར་མི་བྱེད་ན་གཏི་མུག་གིས་ཤིན་ཏུ་ལྡོངས་པ་ཉིད་དེ་ཤཱནྟ་དེ་ཝས། ཐ་མལ་ནད་ཀྱིས་འཇིགས་ན་ཡང་། །སྨན་པའི་ངག་བཞིན་བྱ་དགོས་ན། །འདོད་ཆགས་ལ་སོགས་ཉེས་བརྒྱ་ཡི། །ནད་ཀྱི་རྟག་བཏབ་སྨོས་ཅི་དགོས། །དེ་གཅིག་གིས་ཀྱང་འཛམ་གླིང་ན། །གནས་པའི་མི་ཀུན་བརླག་བྱེད་ལ། །དེ་དག་གསོ་བའི་སྨན་གཞན་ནི། །ཕྱོགས་རྣམས་ཀུན་ནས་མི་རྙེད་ན། །དེ་ལ་སྨན་པ་ཐམས་ཅད་མཁྱེན། །ཟུག་རྔུ་ཐམས་ཅད་འབྱིན་པ་ཡི། །བཀའ་ལྟར་མི་བྱེད་སེམས་པ་ནི། །ཤིན་ཏུ་གཏི་མུག་སྨད་པའི་གནས། །ཞེས་སོ། །སློབ་མ་སྣོད་ངན་གྱི་མཚན་ཉིད་ནི། དེ་ལ་ཉེ་བར་ལེན་པ་སློབ་མ་སྟེ། །སྣོད་དང་བྲལ་ལ་བཅུད་ཀྱིས་ཕན་མི་ཐོགས། །ཟང་ཟིང་ཙམ་གྱིས་ཚིམ་པ་ཐོབ་གྱུར་ནས། །བཅོས་པའི་དད་པས་དུས་བཞིའི་འགྱུར་ལྡོག་དངོམ། །དང་པོ་ཆོས་ལམ་མི་ཚུད་གཡག་རྒོད་བཞིན། །བར་དུ་ཐོས་བསམ་ལ་སྡང་ཚེ་འདི་གཉེར། །ཐ་མར་སྡིག་པའི་གྲོགས་ཀྱི་ཕྱོགས་བཟུང་ནས། །ལས་མཐའ་ལོག་པ་ནགས་མཐའི་མི་རྒོད་འདྲ། །འདི་ལྟར་བླ་མ་དམ་པའི་ཐུགས་རྗེ་དང་བྱིན་རླབས་ལ་བྱམས་སྡང་དང་ཉེ་རིང་མེད་ཀྱང་། སྐལ་བ་ངན་པའི་སློབ་མ་རིགས་དང་རང་བཞིན་ངན་པ། ཐེ་ཚོམ་དང་གསར་ངས་ཆེ་བ། ངོ་ཚ་དང་ཁྲེལ་ཡོད་སྤངས་པ། ཁོང་ཁྲོ་དང་ཉོན་མོངས་རྣོ་བ། ཀོ་ལོང་དང་ཆོས་མིན་འཕེལ་བ། དམ་ཚིག་དང་སྡོམ་པ་ལ་མི་སེམས་པ། དད་པ་དང་། ཤེས་རབ་དང་། བརྩོན་འགྲུས་དང་། ངེས་འབྱུང་ལ་སོགས་པའི་ཆོས་ཀྱི་བཅུད་ཟབ་མོ་འཛིན་པའི་སྣོད་ཅུང་ཟད་ཀྱང་མེད་པ་དེ་དག་གིས་བླ་མའི་ཡོན་ཏན་ནི་མི་མཐོང་། རང་ཉིད་རྣམ་པར་མ་ཞི་ཞིང་ཀུན་ནས་ཉོན་མོངས་པའི་ཆས་བསྐྱེད་པའི་རྣམ་པར་རྟོག་པ་ངན་པ་ཐམས་ཅད་བླ་མའི་སྐྱོན་དུ་མཐོང་ཞིང་། བླ་མའི་རྫས་དང་། དཀོར་དང་། ལོངས་སྤྱོད་ཀྱི་ཆ་ནས་གནང་སྦྱིན་དང་། རྙེད་པ་ཐོབ་ན་དད་གུས་གསར་པ་ཅུང་ཟད་རེ་འཕེལ་བར་འགྱུར་ལ། དེ་ཡང་འདུས་བྱས་ཡིན་པས་ནམ་ཟླ་དུས་བཞིའི་འགྱུར་ལྡོག་བཞིན་ཉི་མའི་སྔ་དྲོ་ཕྱི་དྲོ་རེའང་བརྟག་མི་ཐུབ། དེ་ལྟ་བུའི་གང་ཟག་ལ་དང་པོར་ཁྱོད་ཚེ་འདི་ཕྱི་གཉིས་ཀར་བདེ་བ་ལ་རེག་པར་འགྱུར་གྱིས། བསྟན་པའི་ལམ་སྲོལ་ལ་ཚུད་པར་གྱིས་ཤིག་ཅེས་ནན་ཏན་དུ་བསྐུལ་ཀྱང་། རི་ཕྱུགས་མི་བསྲུན་པ་ལ་བསྙེན་པ་བཞིན་དུ་འབྲོག་ཅིང་འབྲོས། བར་དུ་ཆོས་ལམ་ཚུད་ཀྱང་ཐོས་བསམ་བསྒོམ་གསུམ་བྱ་བའི་མིང་རང་གིས་སྣ་སུན་ནས། ཚེ་འདིའི་གཡོས་སྦྱོར་རླབས་ཆེ་བའི་ཆེད་དུ་བསྟན་པའི་སྒོར་ཞུགས་པ་ལྟར་སེམས། ཐ་མར་ཐོས་བསམ་བསྒོམ་པའི་ཕྱོགས་སུ་བློ་བག་རེ་ཕྱོགས་པའི་ཚེ། ཁམས་གསུམ་འདི་ན་བསོད་ནམས་དང་རྙེད་པ་ཆེན་པོ་རྙེད་པ་ནི་དམ་པའི་ཆོས་ཉིད་དེ། གཞན་ཚངས་དབང་དང་འཁོར་ལོས་སྒྱུར་བའི་གོ་འཕང་ཐོབ་པས་ཀྱང་དེའི་དོ་མ་ཡིན་པས་ན། བདུད་སྡིག་ཅན་ནི་འདོད་པའི་ཁམས་ནས་སེམས་ཅན་གཅིག་སངས་རྒྱས་ནའང་རང་གི་མངའ་རིས་ལ་བྲི་བར་དོགས་ནས་ཤིན་ཏུ་སྡུག་བསྔལ། ནམ་བློ་ལས་སུ་མ་རུང་བ་ན་བདུད་དེའི་མདའ་སྙིང་ལ་ཟུག་པ་ཡིན་ཏེ། རྡོ་རྗེ་རྩེ་མོ་ལས། གེགས་ཞེས་བྱ་བ་ལོགས་ན་མེད། །རང་གི་སེམས་ཉིད་བདུད་ཅེས་བྱ། །ཞེས་པ་ལྟར་ལས་མཐའ་ལོག་པའི་སྒོ་དང་པོར་བླ་མའི་དྲུང་དུ་བློ་སྣ་ཚོགས་ཤར་ཞིང་བག་ཚ་ནས། འདི་བས་ཀྱང་དགེ་སྦྱོར་འཕེལ་བ། འདི་བས་ཀྱང་དབེན་པའི་གནས་སུ་འདེང་ངོ་ཞེས་ཚིག་དང་སེམས་སུ་འཛོལ་བས་བླ་མ་དང་མཆེད་གྲོགས་ཀུན་བསླུས། དགོན་པ་ནས་འཐོན་པ་ཙམ་གྱིས་བློའི་བག་ནི་བརྐྱང་། དེའི་ཚེ་ཕྱོགས་ཐམས་ཅད་ནི་བྱིས་པ་དང་སྡིག་པའི་གྲོགས་པོས་གང་བ་ཁོ་ན་ཡིན་པས་དེ་དག་དང་འདྲིས་ཤིང་བཤེས་པར་བྱས་པས་ཆོས་ཚུགས་ཙམ་ཞིག་པའམ། མ་ཞིག་ཀྱང་རུང་སྟེ། དེའི་བསམ་པ་ནི་ནགས་མཐའི་མི་རྒོད་ལྟ་བུར་འདོད་སྲེད་རྨོངས་གསུམ་གྱིས་དབང་དུ་བྱེད་ལ། དེའི་སྤྱོད་པ་ནི་ཀུ་ཤའི་རྩེ་མོ་རླུང་ཕྱོགས་ཀྱི་རྗེས་སུ་གུག་ཅིང་གཡོ་བ་ལྟར་དེ་དག་དང་རྗེས་སུ་འདྲེ་བར་འགྱུར་བས་ན། དམ་པའི་དྲུང་ན་གནས་ཚེ་འབྲོས་ལ་རིངས། །ཡུལ་གང་བགྲོད་པར་ཕྱོགས་ན་སྡིག་པས་འཛིན། །དབེན་པར་ཆེད་དུ་བསྐུལ་ན་ཆོས་ཚུགས་འཇིག །རླུང་གི་རྗེས་འགྲོ་ཀུ་ཤའི་རྩེ་མོ་བཞིན། །ཞེས་སྦྲེལ་ལོ། །འདི་ལྟར་སློབ་མའི་ཁམས་དང་བསམ་པ་དང་། རྒྱུད་ཚོད་ནི་བླ་མ་ཉིད་ཁོ་ནས་མཁྱེན་པ་ཡིན་པས། གནས་དབེན་པར་བསྐུལ་བའམ། འགྲོ་དོན་ལ་བསྐུལ་བའམ། རང་ས་ན་ཟུག་པ་གསུམ་གང་ལུང་དུ་བསྟན་པ་དེ་བསྒྲུབས་ན་བར་ཆད་མེད་པ་ལས། སློབ་མ་རང་ཉིད་ཀྱི་ཆ་ནས་བཀས་གནང་ན་མ་གཏོགས་དགེ་བའི་བཤེས་གཉེན་དང་རྟག་པར་མི་འབྲལ་བ་ཉིད་དེ་སྤྱི་མདོ་ལས། དེས་ན་དེད་དཔོན་དམ་པ་དང་། །ནམ་ཡང་འདུ་འབྲལ་མ་ཡིན་ཏེ། །ཇི་ལྟར་ལུས་དང་གྲིབ་མ་བཞིན། །བློ་གྲོས་འདྲིས་ན་དམ་པར་འགྱུར། །ཞེས་དང་། ཚོང་དཔོན་གྱི་བུ་ནོར་བཟང་གིས་འཕགས་པ་འཇམ་དཔལ་གྱི་ཕྱི་བཞིན་འབྲངས་ཏེ་བསྟོད་པ་བྱས་པ། འཕགས་པས་བླ་མ་དང་འགྲོགས་ཤིང་རིམ་གྲོ་བྱེད་པ་ནི་བྱང་ཆུབ་ཆེན་པོ་འགྲུབ་པའི་གཞི་ཡིན་གྱིས། དེ་བསྟེན་ཅིང་འགྲོགས་པས་སྐྱོ་བར་མི་བྱའོ་ཞེས་གསུངས། བདག་ཅག་གི་སྟོན་པ་ཤིང་སཱ་ལ་ཟུང་གཅིག་གི་བར་དུ་མྱ་ངན་ལས་འདའ་འདའ་འཁོར་རྣམ་པ་བཞི་དང་མི་འབྲལ་ཞིང་ཕུང་པོ་ལྔ་ལས་ཡང་དག་པར་ལྡོག་པའི་ཆོས་ཀྱི་སྒོའང་མི་གཅོད་པས་སོ། །དེ་སྐད་དུ་ཕལ་པོ་ཆེ་ལས། གང་ཡང་མ་བྱོན་འཇིག་རྟེན་སྒྲོན་མ་རྣམས། །དེ་དག་རིམ་པར་འཚང་རྒྱ་འཁོར་ལོ་བསྐོར། །མྱ་ངན་འདས་པ་རབ་ཏུ་ཞི་མཐའ་སྟོན། །མགོན་པོ་ཀུན་གྱི་དྲུང་དུ་བདག་མཆིའོ། །ཞེས་ཕྱི་མའི་གནས་སྐབས་སུའང་སྨོན་པའི་དོན་གཞོན་ནུ་ནོར་བཟང་གིས་དགེ་བའི་བཤེས་གཉེན་འབའ་ཞིག་བསྟེན་པའི། ཕྱི་མ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་སྨོན་ལམ་དུ་མཛད་པའི་ཊཱིཀྐ་ཕྱོགས་ཀྱི་གླང་པོའི་གཞུང་སོགས་ལའང་དཔྱད་པར་བྱའོ། །ཡང་། མི་གཞི་ངན་པའི་ཟོལ་སྦྱོར་ཐ་གུའི་ལྕེས། བླ་མ་སྤོས་ཀྱི་གླང་པོ་ལྟར་བསྙེན་ནས། །དམ་ཆོས་གླ་རྩིའི་རྙེད་པ་ཐོབ་ནས་སླར། །རྔོན་ལ་ཡང་དག་སྤྲོ་བས་དམ་ཚིག་འཕེན། །དེ་ལ་དང་པོར་སློབ་མ་ཡང་ཆེ་ཆེ་མོ་དང་། གཉན་གཉན་མོས་གང་ཡང་མི་བཏུབ་སྟེ། མི་གཞི་བཟང་བ་འདི་ཤིན་ཏུ་གལ་ཆེ་བ་ཡིན་ཏེ། མི་གཞི་བཟང་ན་དད་པ་དང་། ཤེས་རབ་ལ་སོགས་བསོད་ནམས་ཀྱི་ཚོགས་ལ་བརྟེན་ནས་གོང་ནས་གོང་དུ་བསྐྱེད་དུ་ཡོད་ལ། མི་གཞི་ངན་པའི་གང་ཟག་གི་རིགས་ནི་བློ་བཅོས་པར་དཀའ་ལ་ཁ་དང་ཞེ་རུ་འཛོལ་བ། བསམ་པ་དང་སྤྱོད་པ་མི་མཐུན་པ། མགུ་བར་དཀའ་ལ་ཕྲག་དོག་པ། ཉོན་མོངས་པ་རགས་ལ་གཉེན་པོ་སྟོབས་ཞན་པ། ལྟར་སྣང་གི་ཟོལ་སྦྱོར་ལ་མཁས་པས་ཐོག་མ་ཉིད་ནས་ཆོས་དང་བླ་མ་བསླུ་བའི་བསམ་པ་དང་། ལྟ་བ་ཡིད་ལ་བཞག་ནས་རང་ལ་ངེས་འབྱུང་དང་མོས་གུས་གང་ཡང་མེད་བཞིན་དུ་གུས་གུས་ལྟར་བཅོས་ནས། སློབ་དཔོན་འདི་ལས་མན་ངག་དང་ལུང་འདི་ལྟ་བུ་ནི་ཐབས་དུ་མས་བླང་གི་གཞན་དུ་ན་ཁོང་ལས་བདག་ཅག་རིགས་གཟུགས་སམ། དཔལ་འབྱོར་གྱིས་ཆེས་ལྷག་པས་བསོད་ནམས་དང་གཟི་བྱིན་ལ་གནོད་པར་འགྱུར་རོ་སྙམ་ནས་ཆོས་ཀྱི་འབྱུང་གནས་བླ་མའི་དྲིན་ལ་མི་སེམས་པས་རྔོན་པ་དང་འདྲ་ལ། ཆོས་དེ་གླ་རྩི་ལྟ་བུར་བལྟས་ནས་ཐབས་དུ་མས་ཐོས་ཐོས་ལོ་ཙམ་ཞིག་བྱས་པའི་མཐར། དམ་ཚིག་གི་གནས་ལ་རྔོན་པའི་ལས་ཐབས་ངོ་ཚ་དང་ཁྲེལ་ཡོད་སྤངས་པ་ལ་འཇུག་པ་དག་ནི་དེ་ཉིད་ཀྱང་ཚེ་ཐུང་ཞིང་བཀྲ་མི་ཤིས་ལ་ཕྱི་མ་ངན་འགྲོར་འཁྱམ་པ་དང་། བླ་མ་ཉིད་ཀྱིའང་སྐུ་ཚེ་དང་། མཛད་པ་ཕྲིན་ལས་ལ་གནོད་ཅིང་ཆོས་ཀྱི་རྒྱུན་སྐྱོན་ཅན་དུ་བྱེད་པས་མི་གཞི་བརྟག་པ་ཉིད་ཤིན་ཏུ་གལ་ཆེ་བ་ཡིན་ནོ། །དེ་སྐད་དུ་དམ་ཚིག་གསུམ་བཀོད་པའི་ཊཱི་ཀར། གསང་སྔགས་རྡོ་རྗེའི་སློབ་དཔོན་སྨོད། །ཆོས་ལ་དབང་ཟ་ནོར་དང་བརྗེ། །རིགས་པས་དམ་ཚིག་མི་བསྲུང་བ། །དེ་དག་ཚེ་འདིར་ཚེ་ཐུང་ཞིང་། །དཔལ་དང་སྐལ་བ་བཟང་པོ་ཉམས། །མཁའ་འགྲོའི་ཆད་པས་སྡུག་བསྔལ་ཞིང་། །ཕྱི་མར་ངན་སོང་ཉིད་དུ་ལྷུང་། །ཞེས་སོ། །ཡང་། བློ་སྣ་ཉམས་འོག་མ་ཆུད་མཐའ་དག་ནི། །གདམས་པའི་གནད་འགག་ཐོབ་པ་སླར་བཏང་ནས། །སྣ་ཚོགས་ཡིག་སྣ་འཚོལ་བས་དུས་པའི་མཐར། །གསར་པ་མ་མཐོང་སྔོན་མ་མཐའ་དག་ཉམས། །གང་ཟག་གི་རིགས་གཅིག་ནི་བློ་སྣ་ཤིན་ཏུ་མང་བས་ཆོས་ཡོད་ཚད་ཐོས་དགོས་པ། ཐོས་ཚད་ཉམས་སུ་མི་ལེན་པར་ཡིག་སྣ་འབའ་ཞིག་གསོག་པ། ཆོས་དང་ཆོས་མིན་གྱི་དབྱེ་བ་ཤེས་པའི་ངེས་བཟུང་གང་ཡང་མེད་བཞིན་དུ་གསར་ངས་དང་། སྐྱོ་བསུན་གྱི་བསྒྲུབ་གཤགས་འདེབས་པ་དེ་ལ་ནི་བླ་མ་བརྒྱུད་པའི་བྱིན་རླབས་སྣ་གཅིག་ཀྱང་མི་འཇུག་ཅིང་སྔར་ཞུགས་པ་དེ་ཡང་ན་བུན་བཞིན་དུ་ཡལ་ནས་འགྲོ། ཉམས་སུ་མ་བླངས་ཤིང་ཡིད་གཉིས་དང་བཅས་པའི་གདམས་པ་དེས་རང་གཞན་གཉིས་ཀ་ལ་ཕན་མི་ཐོགས། དེ་ནི་བྲམ་ཟེ་མོའི་གཏམ་རྒྱུད་ལས་འབྱུང་བའི་རྔོན་པས་ཕག་རྒོད་བདས་པ་དང་མཚུངས་པ་ཡིན་ནོ། །ཡང་དག་དོན་ལ་སྦྱོར་བའི་དད་པ་དང་། །ལྟར་སྣང་ཚེ་འདི་བསྒྲུབ་པའི་འདོད་པ་དང་། །གཉིས་ཀར་ལུང་དུ་མ་བསྟན་གཟུ་ལུམ་ཅན། །གསུམ་དུ་གནས་པའི་མཚན་ཉིད་བརྟག་པ་གཅེས། །སྤྱིར་ཆོས་ཀྱི་རྗེས་སུ་ཞུགས་པ་ཙམ་ལ་ངེས་པ་མེད་དེ། དད་པས་འཇུག་པ་དང་། འདོད་པས་འཇུག་པ་དང་། ལུང་མ་བསྟན་གྱིས་འཇུག་པ་གསུམ་ལས། དད་པས་འཇུག་པ་ནི། བླ་མ་དང་དམ་པའི་ཆོས་གཉིས་ཕན་ཚུན་རྟེན་དང་བརྟེན་པའི་རང་བཞིན་དུ་ཤེས་ཤིང་། ངེས་འབྱུང་དང་བཅས་པ། རྟེན་དང་མཆོད་ཆ་ལ་དགའ་ཞིང་། དཀོན་མཆོག་མཆོད་པ་དང་། སྦྱིན་ལག་ཡངས་པ། དད་པའི་ཀུན་སློང་གིས་ཐོས་བསམ་བསྒོམ་གསུམ་གཤའ་མ་བྱེད་པའི་རིགས་ཅན་དེས་འཕྲལ་ཕུགས་སུ་རང་གཞན་གཉིས་ཀ་ལ་ཕན་ཐོགས་པའོ། །འདོད་པས་འཇུག་པ་ནི། ཚེ་འདིའི་བདེ་སྐྱིད་སྙན་གསུམ་དང་ཆགས་སྡང་གི་ཀུན་སློང་ངན་པས་རེ་ཞིག་བླ་མ་དང་ཆོས་ལ་བརྟེན་ཀྱང་། ངེས་པར་འཁོར་བ་ལས་གྲོལ་བའི་བསམ་པ་སྒོམ་ལ་ཡིད་མི་གཏོད་པར་དབང་ངམ་ལུང་ལ་བརྟེན་ནས་རྙེད་པ་འཚོལ་ཞིང་། གཞན་ཕན་གྱི་བསམ་པས་མ་ཟིན་པའི་ལས་མཐའ་དང་། ཕྲིན་ལས་སྣ་ཚོགས་སམ་ང་རྒྱལ་དང་ཕྲག་དོག་གིས་ཀུན་ནས་བླང་བའི་ཐོས་བསམ་དུག་ཅན་ལ་གཉེར། དཀོན་མཆོག་མཆོད་པ་དང་། བསྐྱེད་རྫོགས་ལ་དང་བ་མེད་པའི་རྟེན་དང་མཆོད་ཆ་ལ་འཕྱོར་ཆས་བྱེད་པ་དེ་དག་ནི་རང་གཞན་གཉིས་ཀ་བསླུ་བའི་འདོད་ཅན་པ་ཞེས་བྱའོ། །ལུང་མ་བསྟན་གྱིས་འཇུག་པ་ནི། དེ་གཉིས་ཀའི་ཕྱོགས་ལ་མ་བརྟེན་པའི་བླུན་པོ་གཟུ་ལུམ་ཅན་དག་ཆོས་ལ་དད་པ་དང་འདོད་པ་གཉིས་ཀ་མེད་བཞིན་དུ་སྤྲེའུའི་མཉམ་གཞག་དང་། ནེ་ཙོའི་རིག་སྔགས་བཞིན་དུ་གཞན་དང་གཞན་དག་ཇི་ལྟར་བྱེད་པའི་ལད་མོ་དང་སྟེས་དབང་དུ་འཇུག་ཅིང་། ཕྱི་ནས་དམ་ཚིག་དང་སྡོམ་པ་གང་གིས་ཀྱང་ཉེར་ལེན་དང་བྲལ་བ་ཁྱི་ལྡོམ་བྱེས་ལམ་དུ་འཁྱམས་པ་ལྟ་བུ་སྟེ། དེའི་ཕྱིར་ཕྱོགས་དང་པོ་ནི་དཔེ་མཁྱུད་མེད་པས་རྗེས་སུ་བཟུང་བར་བྱ་ལ། ཕྱི་མ་གཉིས་ནི་ཐབས་དང་རྟེན་འབྲེལ་དུ་མས་ཡང་དག་པའི་ལམ་དུ་བསྒྱུར་ཞིང་། སྨོན་ལམ་གྱི་འབྲེལ་བ་ཁྱད་པར་ཅན་གྱིས་སླད་ཀྱི་གདུལ་བྱའི་ཡུལ་དུ་བརྩེ་བར་བྱའོ། །དེ་དག་གིས་སློབ་མའི་མི་མཐུན་ཕྱོགས་བཤད་ནས་སྣོད་ལྡན་བརྟག་པའི་ཐོག་མར་ཁྱད་པར་གྱི་མཚན་ཉིད་བཤད་པ་ནི། གོ་ཆ་ཆེ་ལ་བློ་གྲོས་ཤིན་ཏུ་བརྟན། །ལུས་དང་སྲོག་ལ་མི་བལྟ་རིམ་གྲོ་བགྱིད། །ཅི་གསུང་བཀར་དཀྲི་བདག་ཉིད་མི་བསྲུང་བའི། །སྐྱེས་བུ་དེ་ནི་མོས་གུས་ཁོ་ནས་གྲོལ། །འདི་ལྟར་ཟབ་མོའི་མདོ་སྡེ་དང་། རྒྱུད་སྡེ་རྣམས་ནས་བླ་མ་དང་སློབ་མའི་མཚན་ཉིད་དང་། ཉམས་ལེན་གྱི་གནད་གསང་བ་ཆེན་པོ་མང་དུ་བསྟན་ཀྱང་། འགག་གཅིག་ཏུ་དྲིལ་ན་མཐོང་ཆོས་སུ་གྱུར་པའི་གཏན་ཚིགས་འདི་ཡིན་ཏེ། ངེས་པར་འཁོར་བ་ལས་འཕགས་པའི་བླ་མ་རྟོགས་པས་བདག་རྒྱུད་གྲོལ་ཞིང་སྙིང་རྗེ་ཆེན་པོ་དང་ལྡན་པ་ཞིག་ལ། སློབ་མ་དད་པའི་གོ་ཆ་ཆེ་བ་ཀླུའི་བྱང་ཆུབ་ལྟ་བུ། རྐྱེན་གྱིས་བསྒྱུར་བར་དཀའ་བས་བློ་བརྟན་ཅིང་ལུས་དང་སྲོག་ལ་མི་བལྟ་བར་ཞབས་ཏོག་བྱེད་པ་དཔལ་གྱི་ཡེ་ཤེས་ལྟ་བུ། རང་དོན་ཡལ་བར་དོར་ནས་ཅི་གསུང་གི་བཀའ་བསྒྲུབ་པའི་མོས་གུས་ཅན་གཅིག་གིས་གསོལ་བ་སྙིང་ནས་བཏབ་ཅིང་ཐུགས་དགོངས་གཅིག་ཏུ་འདྲེས་ན་མི་གྲོལ་མི་སྲིད་པ་ཡིན་ཏེ། ཅིའི་ཕྱིར་ན་བྱིན་རླབས་དང་དངོས་གྲུབ་ཀྱི་ཉེ་བར་ལེན་པ་ནི་བསྒོམ་སྲན་ན་མི་འདུག་གི། མོས་གུས་རྣམ་པར་དག་པའོ། །མན་ངག་ཏུ་མི་འདུག་གིས། དད་པ་ལ་འདུག་གོ །འདི་ལྟར་སློབ་དཔོན་འཕགས་པས། ངར་སྣབས་དོར་བ་ཀླུའི་བྱང་ཆུབ་ཀྱིས་ཙེན་གྱིས་བླངས་ནས་ཁར་བཅུག་པས་དེ་ཉིད་དུས་དང་པོའི་བདེན་པ་མཐོང་། དཔལ་གྱི་ཡེ་ཤེས་ཀྱིས་བཙོན་སྲུང་བ་གཉིས་བཀུམས་ནས་སློབ་དཔོན་གཉག་བཙོན་དོང་ནས་སྤྱན་དྲངས་པས་དེ་མ་ཐག་དངོས་གྲུབ་ཐོབ། ཁོ་བོས་རྒྱལ་བ་གཉིས་པའི་གསུང་རབ་མཐོང་བ་ལ་བརྟེན་ནས་སྔོན་ཆད་ཟབ་པ་དང་རྒྱ་ཆེ་བའི་ལམ་གང་དང་ཡང་མ་ཕྲད་པར་རིག་ཅིང་མོས་གུས་བསམ་གྱིས་མི་ཁྱབ་པ་སྐྱེས་པ་ལ་བརྟེན་ནས་ཡེ་ཤེས་ཀྱི་སྐུ་དངོས་སུ་བསྟན་ནས་རྗེས་སུ་བཟུང་། སླར་ཡང་སྲོག་འདོར་ཕོད་པ་ཙམ་གྱི་མོས་གུས་ཆེན་པོ་སྐྱེས་པ་ལ་བརྟེན་ནས་སེམས་ཟག་པ་ལས་བཙན་ཐབས་སུ་གྲོལ། དུས་ད་ཕན་ཆད་ཉན་པ་པོ་བརྒྱ་ཕྲག་ཐལ་ལ་འཁྲིད་ལུང་བསྟན་པ་ཡིན་ཏེ། བསྒོམ་སྲན་ཅན་འཇིག་རྟེན་པའི་བསམ་གཏན་ལས་ན་མི་འཕར། ཤེས་རབ་ཅན་གྱིས་དང་པོར་ངོ་བོ་ཉིད་མེད་པའི་དོན་མཐོང་ཀྱང་མོས་གུས་ཡལ་འཕྲལ་ལ་རྟོགས་པ་ཟབ་མོ་དང་འབྲེལ་ཆད། གནས་ལུགས་ཀྱི་སྐྱེ་ཚུལ་མོས་གུས་ཀྱི་སྲང་ལ་ཐེབས་པ་ཤ་སྟག་ཏུ་སྣང་ངོ་། །དེ་སྐད་དུ་སྤྱི་མདོ་ལས། ལངྐའི་བདག་པོ་དེ་བས་ན་གསང་སྔགས་ནི་རང་བཞིན་གྱིས་སྣང་བར་ཟད་ལ། སྐྱེས་བུ་དམ་པ་རྣམས་ཀྱི་བྱིན་རླབས་ཀྱིས་སྟོན་པར་ཟད་དེ། ཞེས་དང་། ཡང་། གྲོགས་པོ་དམ་པ་དག་རྒྱུད་ཡོངས་སུ་གྲོལ་བ་ནི་དམ་པ་ལ་རག་ལས་པ་སྟེ། དེ་གང་ཞེ་ན། འདི་ལྟ་སྟེ། བླ་མེད་སྙིང་པོ་སྨིན་པའི་རྐྱེན། །བློ་གྲོས་ཆེན་པོ་དྲི་བའི་ཡུལ། །ལམ་སྟོར་ས་མཁན་བཤེས་གཉེན་མགོན། །མུན་སེལ་སྒྲོལ་བའི་རིན་པོ་ཆེ། །ཞེས་དང་། མདོ་ལས། རིགས་ཀྱི་བུ་བྱང་ཆུབ་སེམས་དཔའི་སྤྱོད་པ་ནི། དགེ་བའི་བཤེས་གཉེན་ལ་རག་ལས་པའོ། །ཡོན་ཏན་ཐམས་ཅད་ཡོངས་སུ་རྫོགས་པ་ནི་དགེ་བའི་བཤེས་གཉེན་གྱིས་བསྐྱེད་པའོ། །སངས་རྒྱས་ཀྱི་ཡོན་ཏན་ཐམས་ཅད་ནི་དགེ་བའི་བཤེས་གཉེན་ལ་རིམ་གྲོ་བྱས་པས་ཐོབ་པ་ཡིན་ནོ། །ཞེས་དང་། ཤཱ་རིའི་བུ་དོན་དམ་པ་ནི་དད་པས་རྟོགས་པར་བྱ་བ་ཡིན་ནོ། །ཞེས་དང་། རིག་པ་མཆོག་གི་རྒྱལ་པོར། ཚུལ་ཁྲིམས་དང་ལྡན་ཡང་རུང་། མི་ལྡན་ཡང་རུང་། དམན་པའམ། དམན་པ་མ་ཡིན་པ་ཡང་རུང་། མཁས་པའམ། མཁས་པ་མ་ཡིན་པ་ཡང་རུང་། ཐབས་དང་ལྡན་པའམ། མི་ལྡན་པ་ཡང་རུང་། ངེས་པར་འགྲུབ་པར་འགྱུར་རོ། །དད་པ་མེད་པ་དང་། བྱང་ཆུབ་ཏུ་སེམས་མ་བསྐྱེད་པ་ནི་མ་གཏོགས་སོ། །ཞེས་གསུངས་པས་སོ། །སྤྱིའི་མཚན་ཉིད་ལ་གཅེས་པ་ནི། དད་དང་ཤེས་རབ་ཐོས་དང་སྙིང་རྗེ་ཆེ། །སྡོམ་དང་དམ་ཚིག་ལ་གུས་སྒོ་གསུམ་དུལ། ཁོང་ཡངས་གཏོང་ཕོད་དག་སྣང་ཁྲེལ་ཡོད་ལྡན། །སྔོན་བསྐལ་པ་ཡར་ལྡན་ལ་འཕགས་པའི་བླ་མ་དང་གྲུབ་ཆེན་མང་དུ་བྱོན་ཞིང་། སློབ་མ་ཡང་སྣོད་ཀྱི་ཁྱད་པར་གཞན་ལས་ངོ་མཚར་བ་ཤ་སྟག་བྱུང་བས། བླ་མའི་ཐུགས་རྗེ་དང་རྟོགས་པ་སློབ་མའི་མོས་གུས་ཚད་མེད་པའི་ཉེ་བར་ལེན་པ་པོ་མ་ཧེ་མོས་བེའུ་འཁྲིད་པ་བཞིན་དུ་མཚུལ་པ་དང་འོ་མར་འབྲེལ་བས་དད་པ་གཅིག་པོས་ཡོན་ཏན་བུམ་པ་གང་འབྱོས་ཐོབ་པ་མང་དུ་བྱུང་མོད་ཀྱི། ད་ནི་དུས་སྙིགས་པས་དེ་ལྟ་བུའི་རྒྱུ་རྐྱེན་རྟེན་འབྲེལ་ཕྱོགས་ཕྱོགས་ནས་ཚོགས་པའང་དཀའ་བས། སློབ་མའི་ཁྱད་པར་ཡང་དད་པ་ཡོད་པའི་སྟེང་། ཤེས་རབ་མེད་ན་ཆོས་ཀྱི་གནད་མི་རྟོགས། ཐོས་པ་མེད་ན་ཆོས་དང་ཆོས་མ་ཡིན་པ་ངོ་མི་ཤེས། སྙིང་རྗེ་མེད་ན་ཐེག་པ་ཆེན་པོ་ཉམས་སུ་བླངས་ཀྱང་ཉན་རང་དུ་གོལ། སྡོམ་པ་དང་དམ་ཚིག་ལ་མི་སེམས་ན་སྨན་ཟོས་པ་དུག་དང་ནོར་བ་དང་འདྲ། སྒོ་གསུམ་ཉེ་བར་མ་ཞི་ན་ཉེས་ལྟུང་གི་ཆར་འབབ། ཁོང་ཡངས་པ་མེད་ན་མཆེད་གྲོགས་ཉེ་འཁོར་དང་བཤེས་མི་ནུས། གཏོང་ཕོད་དང་མི་ལྡན་ན་བསོད་ནམས་ཀྱི་ཚོགས་འགག །དག་སྣང་མེད་ན་སྣང་བ་དགྲ་རུ་ལྡང་། ཁྲེལ་དང་ངོ་ཚ་མེད་ན་འཕགས་པའི་ལམ་སྲོལ་ལ་བསླབ་མི་ནུས་པས་རྟག་པར་རང་ཉིད་འབའ་ཞིག་གི་སྐྱོན་ལ་བརྟག་ཅིང་། གཞན་སྐྱོན་ལ་ཇི་མི་སྙམ་པར་བཞག་ནས། བདག་ཉིད་དགེ་བའི་བཤེས་གཉེན་ལ་བསྟེན་ཅིང་ཆོས་ཀྱི་རྗེས་སུ་འཇུག་པ་ནི་རྙེད་པ་ཆེན་པོ་དང་ལྡན་ཏེ། བདག་ལ་སློབ་མའི་ཡོན་ཏན་གྱི་ཁྱད་པར་འདི་དང་འདིས་ནོངས་སོ་སྙམ་པས་རང་མཚང་ལ་བརྒོལ། སྔོན་གྱི་དུས་ན་བྱོན་པའི་སྐྱེས་བུ་དམ་པ་དེ་དག་གིས་དགེ་བའི་བཤེས་གཉེན་བསྟེན་པའི་རྣམ་ཐར་དང་ཡོན་ཏན་དྲན་པར་བྱ་སྟེ། སྲེད་མེད་ཀྱི་བུས་ཞུས་པ་ལས། བྱང་ཆུབ་སེམས་དཔའ་མཁན་པོ་དང་། སློབ་དཔོན་ལ་བཀའ་བློ་བདེ་བས་བླ་མར་བྱེད་པའི་སྲི་ཞུ་དང་། གུས་པ་དང་། ཕངས་པ་དང་། གཅེས་པར་འཛིན་པའི་སེམས་བསྐྱེད་པར་བྱའོ། །ཞེས་སོ། །དེ་ལྟར་བསྐྱེད་པའི་བློ་འདུས་བྱས་ཡིན་པའི་ཕྱིར་རང་ཉིད་ཀྱི་སེམས་ལས་སུ་རུང་བའི་ཉེར་ལེན་གྱིས་ཡང་དང་ཡང་དུ་བཅོས་ན་སློབ་མའི་ཡོན་ཏན་དང་པོ་ཕྱོགས་གཅིག་ལས་མི་ལྡན་ཀྱང་ཕྱིས་ནས་ངང་གིས་ཚང་བར་འགྱུར་ཏེ། ཇི་ལྟར་འཆོས་ན། བླ་མ་ཤིན་ཏུ་བསྲུང་བས་མཛངས་པ་དང་། །བཀའ་བཀྱོན་དག་ལ་མི་ཁྲོ་རྟ་མཆོག་བཞིན། །གྲུ་ལྟར་འགྲོ་འོང་གནས་ལ་སྐྱོ་བ་སྤང་། །ཟམ་པ་ལྟ་བུར་བཟང་ངན་ཐམས་ཅད་ཐེག །བཟོ་སྟེགས་བཞིན་དུ་ཚ་གྲང་གང་ཡང་བཟོད། །བཀའ་བཞིན་ཉན་པ་བྲན་ཁོལ་ལྟ་བུ་དང་། །ང་རྒྱལ་སྤངས་པ་ཕྱག་དར་ལྟ་བུ་དང་། །དྲེགས་པ་སྤངས་པ་ཁྱུ་མཆོག་རྭ་ཆད་ལྟས། །བླ་མ་བསྟེན་ཞེས་སྡེ་སྣོད་དག་ལས་གསུངས། །དེའང་ཚོང་དཔོན་གྱི་བུ་ནོར་བཟང་གིས་དགེ་བའི་བཤེས་གཉེན་བརྒྱ་རྩ་བཅུ་གཉིས་བསྟེན་པ་དཔལ་འབྱུང་བའི་རྣམ་ཐར་ལས། རིགས་ཀྱི་བུ་དགེ་བའི་བཤེས་གཉེན་གྱིས་ཟིན་པའི་བྱང་ཆུབ་སེམས་དཔའ་རྣམས་ནི་རྟག་ཏུ་ངན་འགྲོར་མི་ལྟུང་ངོ་། །དུས་རྟག་ཏུ་དགེ་བའི་བཤེས་གཉེན་གྱི་ངོར་བལྟ་བ་བུ་མཛངས་པ་ལྟ་བུ་དང་། བླ་མའི་བཀའ་བཀྱོན་ལ་མི་ཁྲོ་བ་ཁྱི་ལྟ་བུ་དང་། འགྲོ་ཞིང་འོང་བས་མི་སྐྱོ་བས་གྲུ་ལྟ་བུ་དང་། བཟང་ངན་ཐམས་ཅད་ཐེག་པ་ཟམ་པ་ལྟ་བུ་དང་། ཚ་གྲང་གི་སྡུག་བསྔལ་ཐམས་ཅད་བཟོད་པ་མགར་བའི་འོག་རྡོ་ལྟ་བུ་དང་། ཞེས་སོ། །དེ་བཞིན་དུ་མདོ་ལས། བླ་མའི་བཀའ་ཉན་པ་བྲན་ལྟ་བུའི་སེམས་ཀྱིས་དགེ་བའི་བཤེས་གཉེན་བསྟེན་པར་བྱའོ། །འོ་ཅག་ལ་མཐུན་པར་བྱ་བ་གཡོག་ལྟ་བུའི་སེམས་ཀྱིས་དགེ་བའི་བཤེས་གཉེན་བསྟེན་པར་བྱའོ། །ང་རྒྱལ་སྤངས་པ་ཕྱག་དར་བ་ལྟ་བུའི་སེམས་ཀྱིས་དགེ་བའི་བཤེས་གཉེན་བསྟེན་པར་བྱའོ། །དྲེགས་པ་སྤངས་པ་ཁྱུ་མཆོག་རྭ་བཅད་པ་ལྟ་བུའི་སེམས་ཀྱིས་དགེ་བའི་བཤེས་གཉེན་བསྟེན་པར་བྱའོ། །ཞེས་དང་། སྡོང་པོ་བཀོད་པ་ལས་ཀྱང་། རིགས་ཀྱི་བུ་ཁྱོད་ཀྱིས་དགེ་བའི་བཤེས་གཉེན་ལ་ཁུར་ཐམས་ཅད་ཀྱིས་མི་སྐྱོ་བ་ས་ལྟ་བུའི་སེམས་དང་། གནོད་པ་ཐམས་ཅད་ཀྱིས་མི་ཕྱེད་པ་རྡོ་རྗེ་ལྟ་བུའི་སེམས་དང་། ངག་ཐམས་ཅད་མི་གཅོག་པ་སློབ་མ་ལྟ་བུའི་སེམས་དང་། ཅི་བསྒོ་བ་ཉན་པ་བྲན་གྱི་སེམས་དང་། དྲེགས་པ་མེད་པ་ཁྱུ་མཆོག་རྭ་བཅད་པ་ལྟ་བུའི་སེམས་བསྐྱེད་པར་བགྱིའོ། །ཞེས་གསུངས་སོ། །འབྱོར་པ་ཡོད་ན་དཀོན་མཆོག་བཞི་པ་མཆོད། །ཞབས་ཏོག་སྲི་ཞུ་ལུས་ངག་བཀོལ་བའི་ལས། །མཐའ་དག་ནམ་ཡང་ཆུད་ཟོས་གྱུར་པ་མེད། །མཉེས་པ་གསུམ་གྱི་ནང་ནས་བསྒྲུབ་པ་མཆོག །གཏོང་བ་ལ་སྙིང་པོ་རྒྱ་ཆེན་པོ་ལེན་པའི་ཞིང་དམ་པ་ཚོགས་གསོག་པ་དང་། ཡོན་གྱི་གནས་རབ་དང་ཕུལ་དུ་གྱུར་པའང་དཀོན་མཆོག་གསུམ་ཀ་འདུས་པས་ན་བཞི་པའི་མངོན་བརྗོད་ཀྱིས་བསྔགས་པ་བླ་མ་དམ་པ་ཉིད་ཡིན་ཏེ། སངས་རྒྱས་མཉམ་སྦྱོར་ལས། སངས་རྒྱས་ཆོས་དང་དགེ་འདུན་དང་། །བླ་མ་ཡང་ནི་བཞི་པ་ཡིན། །ཅེས་དང་། དཀྱིལ་འཁོར་ཐམས་ཅད་ཀྱི་ངོ་བོ་ཉིད་ཡིན་པའང་སློབ་དཔོན་ཆེན་པོས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་ན་མེད། །བླ་མ་དཔལ་ཆེན་ཧེ་རུ་ཀཿ །ཞེས་གསུངས་ལ། དེ་ལྟར་ཡིན་པའི་གོ་དོན་ཡང་སངས་རྒྱས་ཀྱི་རང་བཞིན་འགྱུར་བ་མེད་པ་ནི་རྣམ་པ་ཀུན་གྱི་མཆོག་དང་ལྡན་པའི་ཆོས་སྐུ་ཡིན་ལ། དེ་བླ་མ་ལ་མ་བསྟེན་པར་གཞན་ཐབས་གང་གིས་ཀྱང་མི་འབྱུང་བའི་ཕྱིར་ན་མདོ་དགོངས་འདུས་ལས་ཀྱང་། བསྐལ་པ་འབུམ་གྱི་སངས་རྒྱས་བས། །སློབ་དཔོན་གཉན་པར་ཤེས་པར་བྱ། །ཅི་ཕྱིར་བསྐལ་པའི་སངས་རྒྱས་རྣམས། །སློབ་དཔོན་དག་ལ་བསྟེན་ནས་བྱུང་། །ཞེས་པ་དང་མཐུན་པ་དུས་ཀྱི་འཁོར་ལོ་ལས་ཀྱང་བཤད་དོ། །དེ་ལྟར་ཡིན་པས་མཚན་ཉིད་དང་ལྡན་པའི་སྐྱེས་བུ་དམ་པ་ལ་ཕྱོགས་བཅུའི་སངས་རྒྱས་ཀུན་ཀྱང་ཕྱག་མཛད་ཅིང་བསྔགས་པ་བརྗོད་པའི་ཚུལ་སྔ་མ་ལས། དོན་དང་ལྡན་པའི་མཁས་པ་ལ། །དུས་གསུམ་དུས་ནི་ཐམས་ཅད་དུ། །ཕྱོགས་བཅུའི་ཞིང་ན་བཞུགས་པ་ཡི། །བདེ་གཤེགས་རྒྱལ་བ་ཀུན་བྱོན་ནས། །བསྔགས་དང་འདུན་པས་ཕྱག་མཛད་དོ། །ཞེས་དང་། དེ་བཞིན་དུ་སྐྱེས་བུ་དམ་པ་རྣམས་སྐུ་བལྟམས་པ་དང་། མྱ་ངན་ལས་འདས་པ་དང་། ས་ནས་སར་འཕར་བ་དང་། མཛད་པ་ཁྱད་པར་ཅན་སྟོན་པ་ལ་སོགས་པའི་ཚེ། ས་གཡོ་བ་དང་། འཇའ་དང་། འོད་དང་། སྒྲ་ལ་སོགས་འཇིག་རྟེན་གཡོ་ཞིང་བལྟར་མངོན་པ་དུ་མ་འབྱུང་བ་ཡང་བསྟན་པ་ལ་དགའ་བའི་ལྷ་དང་། ཀླུ་དང་། གནོད་སྦྱིན་ལ་སོགས་པས་བྱས་ཤིང་འདུས་པའི་རྟགས་ཡིན་ཏེ། སྔ་མ་ལས། སེམས་དཔའ་ལྷ་དང་མི་དག་དང་། །དེ་བཞིན་ཀླུ་དང་གནོད་སྦྱིན་དང་། །སྲིན་པོ་ལོག་ལྟ་ཅན་དག་གི །རིག་པ་འཛིན་པ་ཀུན་འདུས་ནས། །སྤྲུལ་པའི་མེ་ཏོག་ཀུན་འཐོར་ཞིང་། །བླ་མ་བཤེས་གཉེན་དམ་པ་ཁྱེད། །བདག་ཅག་རྣམས་ཀྱི་ཕ་ལགས་སོ། །ཞེས་པ་ལ་སོགས་རྒྱ་ཆེར་གསུངས་སོ། །ངེས་བརྗོད་དེས་ནི་ཞིང་གི་མཆོག་ཏུའང་བླ་མ་ཁོ་ན་བཤད་པའི་ཚུལ་སྔ་མ་ལས། དེས་ན་སངས་རྒྱས་སྟོང་ཕྲག་ལ། །བསྐལ་པ་སྟོང་དུ་མཆོད་བྱས་པས། །བླ་མའི་བ་སྤུའི་ཁུང་རེ་ལ། །ཙན་དན་ཐིགས་པ་གཅིག་བྱུགས་པ། །སྟོང་ཕྲག་ཆར་ཡང་ཕོད་པ་མིན། །ཞེས་དང་། ཁ་སྦྱོར་ལས། གང་ཕྱིར་ཕྱོགས་བཅུའི་སངས་རྒྱས་དང་། །བྱང་ཆུབ་སེམས་མཆོད་བསོད་ནམས་ལས། །སློབ་དཔོན་བ་སྤུའི་ཁུང་གཅིག་མཆོག །དེ་ཕྱིར་སློབ་དཔོན་མཆོད་བྱེད་པ། །སངས་རྒྱས་བྱང་ཆུབ་སེམས་དཔས་གཟིགས། །ཞེས་སོ། །འདི་ལྟར་དེ་བཞིན་གཤེགས་པའི་གཅུང་དགའ་བོ་རྒྱལ་པོ་ཀྲྀ་ཀའི་བུར་གྱུར་པའི་ཚེ་སངས་རྒྱས་འོད་སྲུངས་ལ་བྱུག་པས་བསྙེན་བཀུར་བས་པགས་པ་གསེར་གྱི་ཁ་དོག་ཏུ་གྱུར་པ་དང་། དེའི་སྐུ་གདུང་གི་མཆོད་རྟེན་ལ་གདུགས་འདོགས་པའི་རྩོལ་བ་དང་དུ་བླངས་པས་འཁོར་ལོས་བསྒྱུར་བར་འགྲོ་བའི་མཚན་རྫོགས་པར་གྱུར་ན། སློབ་མ་བསགས་པ་ཅན་གྱི་ངོར་དགེ་བའི་བཤེས་གཉེན་དུ་བརྫུས་པའི་སངས་རྒྱས་ལ་བསྙེན་བཀུར་བའི་བསོད་ནམས་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་ཁོ་ནའི་རྒྱུར་འགྲོ་བ་ལས་བར་མ་དོར་ནམ་ཡང་ཆུད་འཛའ་བ་མེད་པའི་ཕྱིར་མཉེས་པར་བྱ་བའི་ཡོ་བྱད་བརྒྱད་འབུལ་བར་བྱ་སྟེ། སྤྱི་མདོ་ལས། སྐྱོ་དུབ་མེད་པའི་དད་པ་དང་། །གྱོང་ཁེངས་མེད་པའི་མཉེན་ལྕུག་དང་། །སེར་སྣ་མེད་པའི་ཟང་ཟིང་དང་། །སོམ་ཉི་མེད་པའི་སྲི་ཞུ་དང་། །གཡོ་སྒྱུ་མེད་པའི་དྲང་སྐད་དང་། །ཁ་གསག་མེད་པའི་རང་རྒྱུད་དང་། །རྨོངས་པ་མེད་པའི་ཤེས་རབ་དང་། །དྲི་མ་མེད་པའི་ལྷག་སེམས་བརྒྱད། །དམ་པ་དེ་ལ་རྫོགས་པར་དབུལ། །དམ་པས་བསྒོ་བ་བསླབ་པའི་མཐའ། །ཆུབ་པར་རྫོགས་པས་རྒྱུད་གྲོལ་ཏེ། །ཤེས་བྱ་ཀུན་ལ་ཐོགས་མེད་འགྲོ། །རང་རྒྱུད་མདུད་པ་གྲོལ་བ་ཡིས། །ཤེས་རབ་མཁའ་ལ་བྱ་བཞིན་རྒྱུ། །ཞེས་སོ། །དེ་ཡང་ཐོག་མར་ཟང་ཟིང་གིས་མཉེས་པར་བྱ་བ་ནི། དེ་ཉིད་ལས། རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་པའི། །ནོར་མཆོག་དམ་པ་དེ་ལ་འབུལ། །ཞེས་པ་ལྟར་བླ་མ་ལ་དེ་དག་གི་དགོས་པའམ། འདོད་པ་མེད་ཀྱང་རང་གི་གཏོང་ཕོད་ཀྱི་ཆ་ནས་ཐུགས་ལ་འཐད་པའི་སྐབས་དབྱེ་ན་ནི་ངེས་པར་དབུལ་བར་བྱའོ་སྙམ་པ་ཞེ་ཐག་པ་ནས་སྐྱེས་ན་ཕུལ་བ་དང་མཉམ་པའི་བསོད་ནམས་འཐོབ་པ་ཡིན་ནོ། །བར་དུ་ལུས་ངག་གི་ཞབས་ཏོག་གི་མཉེས་པ་བསྒྲུབ་པ་ནི་བྱང་ཆུབ་སེམས་དཔའི་སྡེ་སྣོད་ལས། སྙིང་པོ་མེད་པའི་ལུས་ལ་སྙིང་པོ་བླང་བའི་ཕྱིར་བླ་མ་མཉེས་པར་བྱ་སྟེ། ཐ་ན་ཅི་ཡང་མེད་ཀྱང་ཆུ་རྫ་གང་ཙམ་ཡང་འབུལ་ལོ། །ཞེས་དང་། རྒྱུད་སྔ་མ་ལས། རང་གི་ལུས་ཀྱང་ཅི་རིགས་པར། །རིན་ཐང་གང་ཡིན་ནོར་གྱིས་བསླུ། །ཞེས་སྙིང་པོ་མེད་པའི་ལུས་ལ་སྙིང་པོ་བླང་བའི་ཕྱིར་ཞབས་འབྲིང་དང་། སྟན་སྟོབས་པ་དང་། ཕྱག་དར་དང་། ཕོ་ཉར་འགྲོ་བ་དང་། བཟོ་དང་། གནས་ཁང་གི་བྱ་བ་དང་། ཐ་ན་འདེགས་འཇོག་དང་། བསུ་བསྐྱེལ་གྱི་བྱ་བ་ལ་སོགས་པའང་རང་གི་ལུས་ཀྱིས་ནུས་ན་དེ་ཉིད་མཆོག་ཡིན་ལ། མ་ནུས་ན་བདག་གི་ལུས་ཀྱང་ཕུལ་ཟིན་པས་ན། བདག་ཉིད་ལ་མི་དབང་བའི་འདུ་ཤེས་བཞག་ནས་རིན་གྱིས་བསླུ་བའི་ཚུལ་བསྒྲུབ་པ་ནི་གཞན་ལ་གླ་རྔན་སྤྲད་ནས་རིག་པའི་གནས་རྣམས་བསྒྲུབ་ཏུ་བསྩལ་བའམ། ཅིས་ཀྱང་མི་རིགས་པ་དག་ནི་བདག་ཉིད་ཁོ་ནས་བསྒྲུབ་པའམ། ཡང་ན་བླ་མ་ལྔ་བཅུ་པ་ལས། མ་ནུས་པ་ལ་ཚིག་གིས་སྦྱོང་། །ཞེས་པ་ལྟར་རྒྱུ་དང་རྐྱེན་གྱི་གནས་ཚུལ་གང་ཡིན་པ་ཐུགས་ལ་ལེགས་པར་བཀོན་ནས་གནང་བ་ཐོབ་པར་བྱའོ། །དེ་ལྟ་བུའི་བསོད་ནམས་ནི་དཔག་ཏུ་མེད་དེ། ཡེ་ཤེས་རྒྱ་མཚོ་ལས། གང་གིས་བླ་མའི་བྱ་བ་ལ། །མཁས་པའི་སྐལ་ལྡན་གང་ཡིན་དེ། །དུས་གསུམ་སངས་རྒྱས་ཐམས་ཅད་ལ། །བསྐལ་པ་བྱེ་བ་དྲུག་འབུམ་དུ། །ཕྱག་བྱས་པས་ནི་འདི་དོན་ཆེ། །བླ་མས་བསྒོ་བ་བཞིན་བསྒྲུབས་ན། །འདོད་པ་ཐམས་ཅད་འགྲུབ་པ་དང་། །བསོད་ནམས་དཔག་ཏུ་མེད་པ་འཐོབ། །རང་གི་རྫས་དང་ཡོ་བྱད་ཀྱིས། །བླ་མ་མཉེས་པར་སུས་བྱས་པ། །འདིས་ནི་ཁམས་གསུམ་འཁོར་བ་ལས། །སྤྲུལ་སྐུའི་ཞིང་དུ་དབུགས་དབྱུང་སྟེ། །མྱ་ངན་འདས་པའི་སར་གཤེགས་སོ། །ཞེས་སོ། །དེ་ལྟར་ཞབས་ཏོག་གམ་རིམ་གྲོ་རྣམ་པ་གཉིས་ལ་བརྟེན་ནས་བླ་མའི་ཐུགས་བཟུང་སྟེ་ཟབ་པ་དང་རྒྱ་ཆེ་བའི་ཆོས་ཀྱི་ཚུལ་ལེགས་པར་ཁོང་དུ་ཆུད་ནས་མཐར་བསྒྲུབ་པའི་མཆོད་པ་འབའ་ཞིག་གིས་མཉེས་པར་བྱ་སྟེ། སྤྱི་མདོ་ལས། སྔོན་གྱི་དམ་པ་བདེ་གཤེགས་རྣམས། །དེད་དཔོན་དམ་པ་མཉེས་བྱས་ནས། །ཀུན་སྤངས་དགོན་པའི་མཐར་གཤེགས་པ། །ཉིད་ལས་དམ་པ་མཉེས་པར་འགྱུར། །ཞེས་སོ། །དེ་ལ་དམ་པ་ཕྱི་མ་ནི་རྣམ་པར་གྲོལ་བའི་ཡེ་ཤེས་བརྙེས་པའི་དོན་ཏེ། སྔ་མ་ལས། ཇི་ལྟར་ཅང་ཤེས་གྱི་ལིང་དག །སྡོམ་བྱེད་སྒྲོག་གིས་བཅིངས་གྱུར་པ། །བཀྲོལ་བྱས་བདེ་བླག་བྱུང་གྱུར་ན། །ཅི་ལའང་ཐོགས་མེད་འགྲོ་བ་ལྟར། །སེམས་ཀྱི་ཅང་ཤེས་དབང་པོ་འདི། །མི་ཤེས་འཆིང་བས་བཅིངས་གྱུར་པ། །དམ་པས་རྣམ་གྲོལ་སྒོ་ཕྱེ་ནས། །ཤེས་རྒྱུད་ཀུན་གྲོལ་ཐོགས་མེད་འགྲོ། །ཞེས་ལེའུ་དྲུག་ཅུ་རྩ་བདུན་པ་ལས་བཤད་དོ། །རང་གི་སྣང་བའི་སྐྱོན་ལོག་པ་འགོག་པར་སྟོན་པ་ནི། མཛད་སྤྱོད་གང་ཡང་ལོག་པར་མི་བལྟ་སྟེ། །འཕགས་པའི་ཡུལ་གྱི་དབང་ཕྱུག་ཕལ་མོ་ཆེ། །གདོལ་པ་གཡུང་པོ་སྡིག་སྤྱོད་ཕལ་པའི་ཚུལ། །ཉམས་པ་ལས་ཀྱང་ཤིན་ཏུ་ཉམས་པར་ཡོད། །རང་གི་ཉེར་ལེན་དབང་དུ་མ་གྱུར་བར། །འཁྲུལ་པ་བརྟག་པའི་ཉེས་པ་ཚད་མེད་དེ། །སྡེ་སྣོད་བཅུ་གཉིས་བློ་ལ་ཆུབ་པ་ཡི། །དགེ་སློང་སྐར་བཟང་སྡིག་པའི་མཐུས་བཏབ་ནས། །སྟོན་པའི་མཛད་པ་གཡོ་སྒྱུར་མཐོང་བའི་ཚུལ། །ལེགས་པར་བསམ་ནས་རང་གིས་རང་ཉིད་འཆོས། །འདི་ལྟར་འཕགས་པའི་ས་ལ་བཞུགས་པའི་སྐྱེས་བུ་དམ་པ་རྣམས་ནི་ཐུགས་ལ་འཁྲུལ་པ་མི་མངའ་ན་ཀུན་ཏུ་སྤྱོད་པ་ལ་ཉེས་པར་གྱུར་པ་ག་ལ་སྲིད་དེ། རང་དོན་གྲུབ་ཟིན་པས་གཞན་དོན་འབྱུང་བའི་སྐབས་ཡིན་པས་ན། མཛད་པའང་ཞི་བ་དང་། དྲག་པོ་དང་། ཤིན་ཏུ་རྒྱས་པ་དང་། ཆགས་པ་ལ་སོགས་པ་རྣམ་པ་སྣ་ཚོགས་པ་འགྲོ་བ་འདུལ་བའི་དོན་དུ་སྟོན་ཏེ། དེ་ལ་མ་དད་པ་ཅུང་ཟད་སྐྱེས་ཀྱང་ཐར་པའི་ལམ་མཁན་ནི་བླ་མ་ཉིད་ལས་གཞན་སུ་ཡང་མེད་པས་ལམ་གྱི་རྟེན་འབྲེལ་ཐམས་ཅད་འཕྱུགས་ནས་འགྲོ་སྟེ། འདི་ལྟར་བསྐལ་པ་འབུམ་ཕྲག་དུ་མར་རྙེད་པ་དཀའ་བ་དམ་པའི་བླ་མ་དང་ཐེག་པ་ཆེན་པོའི་ཆོས་ཟབ་མོ་ཟུང་དུ་འབྲེལ་བའི་དུས་བདུད་སྡིག་ཅན་ནི་ཐབས་དུ་མས་བར་དུ་གཅོད་པ་ལ་བསྒྲིམ་པ་ཡིན་ཏེ། ཅི་ནས་ཀྱང་དཔོན་སློབ་གྱི་བར་དུ་བལྟར་མི་མངོན་པའི་དབྱེན་འཆོས་པའི་ཚུལ་གྲངས་དང་བློས་མི་གཏུགས་པ་ཉིད་དེ། བཟའ་བཏུང་དང་། གནས་མལ་དང་། ནད་མེད་པ་ལ་སོགས་པའི་མཐུན་པའི་རྐྱེན་ཐམས་ཅད་ལ་དཀའ་བར་བྱེད་ཅིང་། འགྲོ་ན་འཚེ་དོགས། བློ་ལ་ཡིད་གཉིས། ཕ་མ་དང་། བུ་ཚ་དང་། བཟའ་ཟླའི་བཤོལ་འདེབས། ཆོས་དང་བསྒྲུབ་པའི་ལམ་སྲོལ་ལ་ཚུད་ཀྱང་། བླ་མ་དང་ཆོས་ལ་ཐེ་ཚོམ་དང་ལོག་ལྟ། འདོད་ཡོན་གྱི་སྲེད་ཞེན། ཡོན་ཏན་གྱི་ཁྱད་པར་གང་ཡང་མ་ཐོབ་པར་རང་རྩིས་དང་མངོན་རློམ། དུས་ལ་མ་བབས་པའི་འགྲོ་དོན་དང་སྙིང་རྗེ་དགྲར་ལངས་སོགས་བློ་ཕྱིར་ཕྱོགས་པའི་རྣམ་གྲངས་མང་པོ་ཤེས་རྒྱུད་ལ་འཆར་དུ་འཇུག་པ་ཡོད་དེ། དེའི་ཚེ་དེ་དག་བདུད་དུ་ཤེས་ནས་བློ་རང་མལ་དུ་འཇུག །བླ་མ་དང་ཆོས་ལ་གུས་པ་ལྷག་པར་བསྐྱེད་ཅིང་། དཀའ་བ་བཟོད་པའི་སྙིང་སྟོབས་ཀྱི་གོ་ཆ་བགོ་བར་བྱ་སྟེ། ཡུམ་བར་མ་ལས། ནོར་བུ་རིན་པོ་ཆེ་ནི་བདུད་མང་པོའི་ཕྱིར་བརྩོན་པ་དང་སྤྲོ་བ་ཆེན་པོས་གཅེས་སྤྲས་སུ་བྱ་བ་དེ་བཞིན་དུ། ཤེས་རབ་ཀྱི་ཕ་རོལ་ཏུ་ཕྱིན་པའི་རིན་པོ་ཆེ་ཡོངས་སུ་འཚོལ་བ་ན། བདུད་སྡིག་ཏོ་ཅན་བར་ཆད་བྱ་བ་ལ་བརྩོན་པར་འགྱུར་ཏེ། ཅི་ནས་ཀྱང་དེ་ཐོས་པར་མི་འགྱུར་བ་དེ་ལྟར་བརྩོན་ཞིང་། གང་དུ་དགེ་བའི་བཤེས་གཉེན་དང་བྲལ་བར་འགྱུར་བའི་དེ་ལྟར་གནོད་པ་སྣ་ཚོགས་སུ་གྲུབ་པས་ཡིད་ཕྱིར་ཕྱོགས་པར་བྱེད་དོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་སྙམ་དུ། བདུད་སྡིག་ཏོ་ཅན་དག་གིས་དགེ་བའི་ཆོས་ལ་བར་དུ་གཅོད་པ་སྟེ། ཅི་ནས་ཀྱང་དེའི་དབང་དུ་མི་འགྱུར་བ་དེ་ལྟར་བྱ་བ་ལ་གོར་མ་ཆག་གོ་སྙམ་ནས་གོ་ཆ་ཆེན་པོ་ཡོངས་སུ་བགོ་བར་བྱའོ། །ཞེས་གསུངས་པ་ལྟར་རོ། །ཁྱད་པར་ཐེག་པ་ཆེན་པོའི་ཤེས་རབ་དང་། ཡེ་ཤེས་དང་སྤོབས་པ་བསམ་གྱིས་མི་ཁྱབ་པ་ཐོབ་པའི་བྱང་ཆུབ་སེམས་དཔའ་རང་སའི་སྡེ་སྣོད་ཀྱི་ལམ་ནས་གནང་བཀག་ལ་སྒྲ་ཇི་བཞིན་པར་འཇུག་པ་རྣམས་ཀྱི་ཚད་ནི་སོ་སོ་སྐྱེ་བོས་བཟུང་བར་ཡང་མི་ནུས་ལ། དེའི་རྗེས་སུ་སྤྱོད་པ་ཡང་ནོངས་པ་ཆེན་པོའོ། །འདི་ལྟར་འཕགས་པ་དྲི་མེད་གྲགས་པར་གྲགས་པ་ཐེག་པ་ཆེན་པོའི་མདོ་ལས། ཀུན་དགའ་བོ། རྒྱ་མཚོ་ཐམས་ཅད་ཀྱི་གཏིང་ནི་ཚད་བཟུང་བར་ནུས་ཀྱིས། བྱང་ཆུབ་སེམས་དཔའ་རྣམས་ཀྱི་ཤེས་རབ་དང་། ཡེ་ཤེས་དང་། དྲན་པ་དང་། གཟུངས་དང་། སྤོབས་པའི་གཏིང་ནི་ཚད་བཟུང་བར་མི་ནུས་སོ། །ཞེས་དང་། དགེ་སློང་ཁྱེད་ཀྱིས་འདི་ལ་ཁྱིམ་བདག་གོ་སྙམ་པའི་འདུ་ཤེས་མ་བསྐྱེད་ཅིག །ཅེས་གསུངས་པ་ལྟར་དེ་ལྟ་བུའི་བྱང་ཆུབ་སེམས་དཔའ་ནི་འདོད་པའི་ཡོན་ཏན་ལ་སྒྱུ་མ་ལྟ་བུར་སྤྱོད་པའང་མ་ངེས་ཏེ། འཕགས་པ་སྟོང་ཕྲག་བརྒྱ་པར། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ལ་ལ་ལ་ནི་ཕ་དང་མ་གདོན་མི་ཟ་བར་དགོས་ཀྱིས། བུ་དང་། བུ་མོ་དང་། ཆུང་མ་མི་དགོས་སོ། །ལ་ལ་ལ་ནི། ཕ་དང་མ་དང་བུ་དང་། བུ་མོ་དག་ཀྱང་གདོན་མི་ཟ་བར་དགོས་སོ། །ཞེས་དང་། རྒྱུ་གང་གི་ཕྱིར་ན་འདི་སྐད་དུ། བྱང་ཆུབ་སེམས་དཔའ་སེམས་དཔའ་ཆེན་པོ་ལ་ལ་ནི་ཐབས་ལ་མཁས་པས་སེམས་ཅན་ཡོངས་སུ་སྨིན་པར་བྱ་བའི་ཕྱིར། འདོད་པའི་ཡོན་ཏན་ལྔ་ལ་ཡོངས་སུ་སྤྱད་དེ་ཆུང་མའི་འཁོར་གྱི་ནང་ནས་མངོན་པར་བྱུང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །ཞེས་དང་། ཐབས་ལ་མཁས་པའི་མདོར། བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། གང་བུད་མེད་གཞོན་ནུ་དག་ཡོངས་སུ་སྨིན་པར་བྱས་ནས་དེ་དག་ཀྱང་མཛའ་བ་གཅུགས་པ་སྲིད་པ་ཐ་མའི་བར་དུ་བདག་ཅག་ནི་ཁྱེད་ཀྱི་ཆུང་མར་གྱུར་ཅིག་ཅེས་སྨོན་ལམ་བཏབ་ལ། དེ་དག་གི་ཆོས་དཀར་པོ་དེ་རྣམས་ཀྱང་ཡོངས་སུ་སྨིན་པར་བྱ་བའི་ཕྱིར་བྱང་ཆུབ་སེམས་དཔའ་གཡོག་ལེན་ཏེ། དེ་ལ་བྱང་ཆུབ་སེམས་དཔའ་སླས་ཀྱི་ནང་ན་གནས་ནས་བུད་མེད་བཞི་ཁྲི་ཉིས་སྟོང་སྨིན་པར་བྱེད་དོ། །ཅེས་དང་། འཕགས་པ་དཀོན་མཆོག་སྤྲིན་ལས། བླ་མ་ལ་བརྟེན་ན་དགེ་བའི་ཆོས་འཕེལ་བ་དང་། སྡིག་པ་འགྲིབ་བོ་སྙམ་སྟེ་མཁན་པོ་ཐོས་པ་མང་ཡང་རུང་། ཉུང་ཡང་རུང་། ཤེས་སམ་མི་ཤེས་ཀྱང་རུང་། ཚུལ་ཁྲིམས་ལྡན་ནམ་མི་ལྡན་ཡང་རུང་སྟེ། དེ་ལ་སྟོན་པའི་འདུ་ཤེས་བསྐྱེད་དོ། །ཇི་ལྟར་སྟོན་པ་ལ་དགའ་ཞིང་དད་པ་ལྟར། མཁན་པོ་ལ་ཡང་བྱེད་དོ་ཞེས་དང་། ཡུམ་ལས། དགེ་བའི་བཤེས་གཉེན་གང་ཆོས་ཐམས་ཅད་སྟོང་པ་ཉིད་དང་། མཚན་མ་མེད་པར་སྟོན་པ་ལ་བསྙེན་བཀུར་བྱ། གུས་པར་བྱ། ཞེས་སོ། །ཁྱད་པར་སྔགས་ཀྱི་ལམ་ནས་ངོ་བོ་ཉིད་ལས་རྣམ་པར་གྲོལ་བས་རིག་པ་བརྟུལ་ཞུགས་དང་ཟུང་འཇུག་གི་སྤྱོད་པ་ལ་ཞུགས་པ་རྣམས་ཀྱི་རང་བཞིན་ནི་བསམ་པར་མི་ནུས་ཏེ། འདི་ལྟར་འཕགས་པའི་ཡུལ་དུ་བྲམ་ཟེ་ཆེན་པོ་སྒྲ་གཅན་འཛིན་བྲམ་ཟེ་རྣམས་ཀྱི་སྣང་ངོར་ཡང་རང་གི་རིགས་ལས་ཉམས་པ་དང་། གནས་བརྟན་གྱི་སྤྱོད་པ་སྤངས་ནས་སྨྱིག་མཁན་མོ་དང་ལྷན་ཅིག་དེའི་སྤྱོད་པ་ལ་ཞུགས་པས་རྒྱལ་པོ་ལ་སོགས་པ་སྐྱེ་བོ་མང་པོས་དཔྱས་གདགས་པ་དང་། ཤ་བ་རི་པ་བུད་མེད་དང་ལྷན་ཅིག་རྔོན་པའི་བྱ་བ་བྱེད་པ་དང་། དཱ་རི་ཀ་པ་སྨད་འཚོང་མའི་གཡོག་བྱེད་པའི་ཚུལ་དང་། བྱ་ད་ལི་པ་གྲོང་ཁྱེར་རྣམས་སུ་བྱ་སྣ་ཚོགས་གསོད་པའི་ཚུལ་དང་། རིགས་ངན་ཡན་ལག་མེད་པའི་རྡོ་རྗེ་ཕག་རྫི་མོ་དང་ལྷན་ཅིག་སྤྱོད་ལ་ཁྲོ་ཞིང་བརྡེག་པ་དང་། བི་ན་ས་པི་ཝཾ་ལ་ཆགས་པར་སྟོན་པ་དང་། སྒེག་མོ་རྡོ་རྗེ་ཆང་འཚོང་མ་འདོད་ཆགས་ཅན་དུ་བསྟན་པ་དང་། སློབ་དཔོན་ལྭ་བ་པ་གཏི་མུག་ཆོས་སུ་སྨྲ་བར་མཐོང་བ་དང་། ཨིནྡྲ་བྷུ་ཏི་བར་པ་འདོད་ཆགས་ཅན་དུ་མཐོང་བ་དང་། ཛ་ལནྡྷ་རི་པ་བྱིས་པའི་སྤྱོད་པས་དུས་འདའ་བ་དང་། ཏིལླི་པ་ཉ་གསོན་བསྲེགས་བྱེད་ཅིང་། རེས་འགའ་ཏིལ་བརྡུང་། རེས་འགའ་སྨྱོན་པར་བརྫུ་བ་དང་། ཀུ་ཀུ་རཱ་ཛ་ཁྱིའི་ཚོགས་དཔོན་མཛད་པ་དང་། གྲུབ་ཐོབ་ཏནྟི་པ་ཐགས་མཁན་དུ་སྤྱོད་པ་དང་། ག་ཡ་པ་ཏི་གྲོང་ཁྱེར་དུ་གླུ་པའི་ལས་བྱེད་པ་དང་། བྱིའུ་གྷུཎྜི་རི་འབའ་ཞིག་བསད་ནས་འཚོ་བས་མཚན་དེར་གྲགས་པ་དང་། ནག་པོ་རྡོ་རྗེས་བཅོམ་ལྡན་འདས་མ་ཉ་པ་མོ་དོལ་ཕྲག་པར་གཟད་པར་མཐོང་བ་དང་། ཤྲཱི་སིངྷས་འཇམ་དཔལ་བཤེས་གཉེན་ཁྱིམ་བཙུན་ཆུང་མ་ཅན་ཞིང་རྨོ་བར་མཐོང་བ་ལ་སོགས་བཤད་ཀྱི་མི་ལྡང་བ་ཡོད་ལ། བོད་ཡུལ་དུའང་ཐུགས་རྗེ་ཆེན་པོའི་སྤྲུལ་པའི་རྒྱལ་པོ་ཡོད་ཟེར་བ་ཐོས་ནས་ལི་ཡུལ་གྱི་བཙུན་ཆུང་གཉིས་ཀྱིས་བལྟར་འོངས་པ་ལ། རྒྱལ་པོས་བོད་འབངས་ལ་སྲོག་ལ་འབབ་པའི་ཆད་པ་གཅོད་པའི་སྡིག་སྤྱོད་དུ་མཐོང་ནས་བྲོས་པ་སོགས་དཔག་ཏུ་མེད་པ་ཡོད་དེ། དེ་ཀུན་ཀྱང་ནང་དུ་རང་གི་སེམས་རྣམ་པར་ཐར་པའི་སྒོ་གསུམ་དུ་མ་གྲོལ་ཞིང་། སྣང་བ་དག་པ་རབ་འབྱམས་སུ་ཤར་བའི་ཉེ་བར་ལེན་པ་དབང་དུ་མ་གྱུར་པས་འཁྲུལ་སྣང་རང་རྒྱུད་པར་ཤར་བ་སྟེ། ཅིའི་ཕྱིར་ན་སྐུ་གསུང་ཐུགས་ཀྱི་གསང་བ་ནི་ཤིན་ཏུ་སྦས་པ་ཡིན་པས་རང་གི་སྒྲིབ་པས་བལྟར་མི་མངོན་ལ། ཡོན་ཏན་ཐམས་ཅད་དངོས་སུ་སྣང་བ་ལ་ལས་དག་པའམ། རང་དང་སྤྱོད་ཡུལ་མཐུན་པར་དགོས་ཏེ། ཁྱད་པར་སེམས་ཅན་གྱི་ལས་སྣང་ནི་ཚད་མེད་པས་དགེ་སློང་ལེགས་པའི་སྐར་མ་བྱ་བ་མདོ་སྡེ་བཅུ་གཉིས་བློ་ལ་ཆུབ་ཅིང་། བསམ་གཏན་དང་པོའི་ཏིང་ངེ་འཛིན་ཐོབ་པ་དེ་ཡང་། བསོད་ནམས་མ་ཡིན་པའི་ལས་ཀྱི་མཐུས་སེམས་ཟིལ་གྱིས་ནོན་ནས། བདག་ཅག་གི་སྟོན་པ་སེམས་ཅན་ཐམས་ཅད་ལ་བུ་གཅིག་ལྟར་བརྩེ་བ། གདུལ་བྱ་གདུལ་བའི་ཐབས་ལ་མཁས་པ། རིག་པ་དང་ཞབས་སུ་ལྡན་པ། ཉོན་མོངས་པ་དང་། ཉེས་པའི་ཚོགས་གང་གིས་ཀྱང་བརྫི་བ་མེད་པ་དེའི་མཛད་པ་ཐམས་ཅད་གཡོ་དང་སྒྱུ་འབའ་ཞིག་ཏུ་མཐོང་བས། བསོད་ནམས་ལྷག་མ་ལུས་པར་ཟད་དེ་དངོས་སུ་སའི་མཐོངས་བྱེ་ནས་སེམས་ཅན་དམྱལ་བ་པའི་གྲོང་ཁྱེར་དུ་སོང་བའི་ཚུལ་ལེགས་པར་བསམས་ནས། བླ་མའི་མཛད་པ་ལ་འཁྲུལ་པར་མི་བརྟག་ཅིང་། གལ་ཏེ་སེམས་ཅན་གྱི་རང་བཞིན་ཉོན་མོངས་པ་ཡིན་པས་མ་དད་པ་ཅུང་ཟད་སྐྱེས་ཀྱང་རང་གིས་རང་ལ་ཞེ་ཁྲེལ་བལྟས་ནས། སྐྱོན་འདི་ཁོང་ལ་ཡོད་པ་མིན། གང་ཟག་རླུང་ཁམས་ཅན་གྱི་དྲུང་ན་གནས་པ་ཐམས་ཅད་གནོད་པ་ཅན་དུ་མཐོང་བ་ཡིན། རླུང་དེ་སངས་པ་དང་རང་གི་རྣམ་རྟོག་ལ་ཞེ་ཁྲེལ་སྐྱེ་བ་མངོན་སུམ་པའི་ཆོས་ཅན། དྷ་དུ་ར་ཟོས་པའི་གང་ཟག་གི་མིག་ངོ་ན་སྐྲ་ཤད་འཛག་པ་ལྟར། རང་གི་རྣམ་རྟོག་ངན་པའི་ཉེར་ལེན་གཞན་སྐྱོན་དུ་ཤར་བ་ཡིན་སྙམ་ནས་བློ་བཅོས་ཤིང་སྐད་ཅིག་གམ། ཐང་ཅིག་ལས་མ་འདས་པར་བཤགས་པ་བྱ། རྨི་ལམ་དུ་བླ་མའི་མཛད་པ་ལ་མ་དད་པ་མཐོང་ནའང་གཉིད་སད་མ་ཐག་ཏུ་བཤགས་དགོས་སྟེ། འཁོར་ལོ་ཆུབ་པ་རོལ་པ་ལས། །གལ་ཏེ་རྨི་ལམ་ནང་དག་ཏུ། །བླ་མའི་སྐྱོན་དག་མཐོང་གྱུར་ན། །སད་མ་ཐག་ཏུ་བཤགས་པ་བྱ། །གལ་ཏེ་བཤགས་པ་མ་བྱས་ན། །འདི་ཡང་མནར་མེད་རྒྱུ་འཕེལ་འགྱུར། །ཞེས་སོ། །གལ་ཏེ་བླ་མས་སྡང་བར་མངོན་གྱུར་ན། །བདག་སྐྱོན་གཟིགས་ནས་སྤྱོ་བས་འདུལ་བ་ཡི། །དུས་ལ་བབ་པར་རིགས་ནས་བཤགས་བསྡམ་བྱ། །ཅང་ཤེས་སྐྱེས་བུ་བདུད་ཀྱི་དབང་མི་འགྲོ། །འདི་ལྟར་དགེ་བའི་བཤེས་གཉེན་ནི་འཇིག་རྟེན་གྱི་རྣམ་པར་བཞག་པ་དང་འགལ་ཞིང་། ཐུགས་གཟོ་བས་གཡོ་དང་སྒྱུ་མེད་ཅིང་། ཡིད་ལ་བསམ་པ་དེ་ཆོ་འཕྲུལ་སྣ་ཚོགས་ཀྱིས་སྦུབས་སུ་མི་བསྐྱིལ་བར་ངག་ཏུ་བརྗོད་པར་མངོན་པའི་ཕྱིར་ན་བདག་གིས་སྤྱོད་པ་ངན་པའམ། སྡིག་པའི་ལས་ཐབས་ཞིག་བྱས་པར་གདོན་མི་ཟ་བས་ཇི་ལྟར་མི་རིགས་པའི་ཆ་བྱས་སྙམ་དུ་རང་ལ་བརྟག་ཅིང་། ཉེས་པ་སུན་འབྱིན་པའི་བཤགས་བསྡམ་དྲག་པོ་བྱ། རང་བཞིན་དུ་ཅུང་ཟད་འགྲོགས་དཀའ་བར་མཐོང་ཡང་། སྤྱིར་ནི་སློབ་མའི་སྣོད་བརྟགས་པའི་སླད་དུ་ངག་གི་མི་དགེ་བའང་གནང་བའི་སྐབས་ཡོད་ལ། གཞན་ལ་ཕན་པ་རྒྱ་ཆེན་པོ་བསྒྲུབ་པའི་ཕྱིར་ལུས་ཀྱི་ལས་གསུམ་ཡང་མངོན་དུ་བསྒྲུབ་པར་སྲིད་པས། དེ་ལ་རྣམ་རྟོག་རང་རྒྱུད་པའི་དཔྱད་པ་མི་གཏོང་སྟེ། རང་ལ་མངོན་ཤེས་མེད་པས་ཐུགས་དགོངས་གང་ཡིན་མི་ཤེས་པའི་ཕྱིར་གཟབ་པར་བྱའོ། །དེའང་སེར་སྣ་ཅན་རྣམས་དང་གཏོང་ཕོད་ཆུང་བ་དག་གི་ཚོགས་ཆེན་རྫོགས་པའི་ཡན་ལག་ཏུ་ཡོ་བྱད་འདོད་པ་དང་། བཟོད་པ་ཆུང་བ་དང་། གཤིས་ངན་པ་དག་ལ་ཚིག་ཟུར་མི་སྙན་པར་བརྗོད་ནས་བག་བརྐྱང་བའི་ཐབས་དང་། ཡོ་བྱད་བསྙུངས་ཤིང་མཐུན་རྐྱེན་དང་བྲལ་བ་དག་ལ་བློ་སྣ་རིང་བར་སྟོན་པ་སོགས་ཡོད་པས། སྐྱེས་བུ་དམ་པ་བློ་གྲོས་ཆེན་པོ་ཟབ་མོའི་བློ་ཅན་རྣམས་ནི་གཞན་གྱིས་གཏིང་དཔོགས་པར་མི་ནུས་པས། སྐུ་དང་གསུང་གི་མཛད་པ་མ་བརྟགས་ལ་འབྲེལ་པ་མེད་པ་ལྟར་བསྟན་པ་དག་ཀྱང་། ཐུགས་ལ་འཁྲུལ་པ་མེད་པའི་ཕྱིར་འགྲོ་བ་འདུལ་བའི་རོལ་པ་རླབས་ཆེ་བ་ཉིད་དུ་བལྟ་བ་ལས་མ་དད་པ་ཅུང་ཟད་ཀྱང་བསམ་དུ་མི་རུང་སྟེ། ཁྱད་པར་ཆོས་ནས་ཇི་ལྟར་བཤད་པའི་ཡོན་ཏན་ཚང་ན། འཇིག་རྟེན་གྱི་རིགས་དང་། མངའ་ཐང་དང་། མི་གཞི་དང་། སྤྱོད་པ་འཇམ་རྩུབ་ལ་སོགས་པས་བསྟེན་དཀའ་བར་མངོན་པའི་སྐྱོན་དམ་དུམ་ཙམ་ཡོད་ཀྱང་། འཇིག་རྟེན་པའི་ཐ་སྙད་ཐམས་ཅད་ནི་འཁྲུལ་པའི་རང་བཞིན། སྒྱུ་མ་ལྟ་བུ་ཕྱི་ནང་མི་མཚུངས་པ། བཅོས་མ་དང་གྱི་ན་བ་ཁོ་ན་ཡིན་པས་ཅིའི་ཕྱིར་བཟོད་པར་མི་ནུས་སྙམ་དུ་བསམ་སྟེ་སྤྱི་མདོ་ལས། དམ་པ་འདི་ནི་ས་མཁན་དེ། །འདི་ནི་བདག་གི་མགོན་ཡིན་པས། །འཇིག་རྟེན་པ་ཡི་ཐ་སྙད་ཀུན། །ངེས་པར་ཐམས་ཅད་སྒྱུ་མ་ཡིན། །གང་འདིར་གྱི་ན་ཙམ་འདི་དག །དམ་པར་གང་ལ་འགོག་མ་ཡིན། །སྐད་ཅིག་ཙམ་གྱིས་མཐོང་འདི་ལ། །དེ་ལྟ་ཞིག་ན་འདི་ལྟ་ལ། །དེ་སྲིད་ཙམ་དུ་བཟོད་པར་ཟད། །ཅེས་དང་། གལ་ཏེ་གཞན་གྱི་དབྱེན་བཅོས་པ་ལས་ཐུགས་འཁྲུགས་པ་ལྟར་བསྟན་ཡང་། མ་ཉེས་ན་སྡིག་པ་ཟད་པའི་རྒྱུར་བསམ་ཞིང་། སྤྱི་ནས་བླ་མའི་ཡུལ་ལ་ཉེས་པ་མེད་ཀྱང་། ཉེ་བར་གནས་པའི་ཆ་ལ་མངོན་སྦྱོར་མི་གཟོ་བ་ལས་བྱུང་བས་ན་རང་གིས་ནོངས་པར་དཔྱད་དེ་བཤགས་པ་ལ་འབད་པས་རྟེན་འབྲེལ་མི་འཕྱུགས་པར་རིག་པར་བྱའོ། །སྤྱོད་ལམ་གྱི་ཆ་ནས་བསྟེན་ཚུལ་ནི། བླ་མ་བཞེངས་ཚེ་སྟན་ལ་འདུག་པ་མིན། །བཞུགས་པའི་དུས་ན་བསྙུན་འདྲི་ཉེར་སྤྱད་དབུལ། །གཤེགས་ན་ཞབས་འབྲིང་སྔོན་རྗེས་གཡས་ནས་མིན། །སྟན་དང་བཞོན་པ་སྨད་སོགས་བསོད་ནམས་ཉམས། །སྒོ་འཕར་བརྡེག་དང་སྒེག་ཆོས་ངོ་འཛུམ་གནག །རྫུན་དང་བབ་ཅོལ་བཞད་གད་འབྲེལ་མེད་གཏམ། །གུས་དང་འཇིགས་བཅས་མ་ཡིན་ཇི་མི་སྙམ། །སྤངས་ལ་སྒོ་གསུམ་ཉེ་བར་ཞི་བས་བསྟེན། །འཇིག་རྟེན་ན་ཚེ་འདིའི་བདེ་སྐྱིད་སྙན་གསུམ་དང་། ཟས་གོས་གྱི་ན་བ་ཙམ་སྟེར་བའི་རྒྱལ་པོ་དང་། དཔོན་རིགས་དག་ལའང་ལུས་ངག་སྲོག་དང་བཅས་པ་བྲན་དུ་བཀོལ་ནས་སྲི་ཞུ་བྱ་དགོས་ཤིང་། ཕྱི་རོལ་པ་མེ་ལྔའི་དཀའ་ཐུབ་སོགས་ཀྱང་བཟོད་པར་བྱེད་ན། ཐར་པ་དང་ཐམས་ཅད་མཁྱེན་པ་ལ་དམིགས་ཏེ་བླ་མའི་ཕྱོགས་སུ་ལུས་ངག་གི་བསྙེན་བཀུར་བ་ནི། སྙིང་པོ་མེད་པའི་ལུས་ལས་ཀྱང་སྙིང་པོ་རྒྱ་ཆེན་པོ་བླང་པ་ཡིན་ཏེ། སྔ་མ་ལས། ཆོས་ཀུན་མི་ཤེས་མ་རྟོགས་ཀྱང་། །དམ་པར་གྱུར་པའི་བླ་མ་ལ། །བཀུར་གནས་རིམ་གྲོ་ཆེར་བྱས་པས། །འཁོར་བའི་རྒྱ་མཚོ་ལས་བརྒལ་འགྱུར། །ཞེས་གསུངས་པས་ན། བླ་མ་བཞེངས་པའི་ཚེ་སྟན་ལས་ཏབ་ཏབ་དུ་སྡང་བ་དང་། བཞུགས་ན་རང་གི་གོས་ལ་སོགས་སྟན་དུ་དབུལ་བ་དང་། སྙུན་འདྲི་བྱེད་པ་དང་། ཉེར་སྤྱད་དབུལ་བ་དང་། གཤེགས་ན་ལམ་ལ་ཕྱག་དར་དང་། དྲིས་ཆག་ཆག་གདབ་པ་དང་། བསིལ་ཡབ་སྦྲེང་བ་དང་། དར་ལམ་ལ་སོགས་བྱ་བ་དང་། ནག་ནོག་གམ་དྲི་མ་ཅན་ལ་ཐུམས་བྱ་བ་དང་། བཞོན་པ་དང་། འདོ་ལི་ལ་སོགས་པ་སྡོག་པ་དང་། རང་ཡང་ཞབས་འབྲིང་དུ་འགྲོ་ཞིང་། དེ་ཡང་གཡས་ཟུར་ནི་གྲལ་མགོ་ཡིན་པས་བཀག་ལ། མདུན་ནས་འགྲོ་བ་ནི་ཐོག་མ་ཡིན་པས་མི་རུང་། རྒྱབ་ནས་འགྲོ་བ་ནི་ཞབས་རྗེས་བརྫི་བའི་ཉེས་པར་འགྱུར་བས་བཀག་ལ། གཡོན་ནས་ནི་རུང་སྟེ། བསྐོར་ལམ་ལྟ་བུའི་ནང་དུ་རང་ཉིད་ཚུད་པ་དང་དམ་པ་ལ་བརྡེག་པའི་སྟབས་ལ་སོགས་པའི་ཉེས་པ་གང་ཡང་མེད་པའི་ཕྱིར་རོ། །དེ་བཞིན་དུ་མཆིལ་ལྷམ་དང་། ན་བཟའ་དང་། བཞུགས་སྟན་དང་། བཞོན་པ་དང་། སྐུའི་གྲིབ་མ་རྣམས་མི་འགོམ་པ་དང་། དམིགས་བསལ་གྱི་ཚེ་མ་གཏོགས་གནས་ཁང་དང་འཆག་ཁང་གཅིག་ཏུ་བྱ་བ་དང་། སྐུ་ལ་ཚད་གཞལ་བ་དང་། རང་དང་ཆེ་ཁྱད་བསྡུར་བ་དང་། སྐུ་དྲུང་དུ་མཆིལ་སྣབས་ལ་སོགས་པ་འདོར་བ་དང་། སྐྱིལ་ཀྲུང་དང་སྒེག་ཆོས་ཀྱིས་འདུག་པ་དང་། སྤྱོད་པ་གྱོང་རེངས་སྟོན་པ་དང་། འགྲོ་འདུག་རྣམ་པར་མ་ཞི་བ་དང་། སྒོ་འཕར་འབྱེད་གཅོད་དྲག་པ་དང་། ངོ་གནག་འབུར་ཚུགས་སུ་བལྟ་བ་དང་། བཞིན་གཉེར་ཐལ་མོ་བརྡེབ་པ་དང་། ཟུར་སྟོན་རྐང་ལག་བརྐྱང་པ་དང་། འཕྱེ་ཕོ་དང་བཤོལ་སྒུག་ལྟར་འདུག་པ་ལ་སོགས་སྤང་བར་བྱ་སྟེ། སྤྱི་མདོར། དམ་པ་དག་དང་གནས་གཅིག་ཏུ། །ཞབས་འབྲིང་མ་གཏོགས་ནམ་ཀྱང་མིན། །སྐུ་ཡི་གྲིབ་མ་མི་འགོང་ཞིང་། །ཞབས་རྗེས་རླམ་པར་མི་བྱའོ། །ན་བཟའ་ཕྱག་གདན་སྟན་ལ་སོགས། །ནམ་ཡང་འགོམ་པར་བྱ་བ་མིན། །མི་གུས་ལ་སོགས་མི་ཚུལ་རྣམས། །དམ་པའི་ཐད་དུ་ཡང་མི་མཛེས། །ཞེས་སོ། །དེ་བཞིན་དུ་ཡིད་དང་ངག་གི་ཉེས་པ་ནི། སྤོབས་པའི་བློ་གྲོས་ཀྱིས་ཞུས་པར། འཇིག་རྟེན་ནག་པོ་འབྱུང་བའི་རྒྱུ། །ཡིད་ནི་དུག་གི་རྩ་བ་ཡིན། །ཉེས་པར་སྨྲ་རྣམས་འབྱུང་བའི་ཕྱིར། །ཁ་ནི་སྡིག་པའི་སྒོ་ཡིན་ནོ། །ཞེས་གསུངས་ལ་ཁྱད་པར་དགེ་བའི་བཤེས་གཉེན་གྱི་མཛད་སྤྱོད་ལ་འགལ་བར་འཛིན་ཅིང་། བླ་མའི་ནོར་རྫས་དང་། ཕྲིན་ལས་ལ་བརྣབ་སེམས་དང་། འགྲན་སེམས་དང་། ཕྲག་དོག་དང་། ང་རྒྱལ་དང་། སུན་འབྱིན་དང་། གནོད་སེམས་དང་། འཚོ་བ་དང་། རིགས་གཟུགས་དང་། ལོངས་སྤྱོད་ལ་བརྙས་པ་སོགས་བལྟར་མི་མངོན་པ་སེམས་ཀྱི་ཉེས་པ་དང་། རྫུན་དང་དབྱེན་གཅུག་དང་། ཚིག་རྩུབ་དང་། བྲེ་མོའི་གཏམ་དང་། བཀའ་གཅོག་པའམ། གདོང་བཟློག་པའི་ཚིག་དང་། ཞེ་གཅོད་པ་དང་། ཅོ་འདྲི་བ་དང་། ལྐོག་ནས་ངན་དུ་སྨྲ་བ་ལ་སོགས་པ་ནི་དུས་གཞན་དུ་བརྒྱ་སྟོང་བརྗོད་པ་བས་བླ་མའི་དྲུང་དུ་ལན་གཅིག་བརྗོད་པ་ལ་སོགས་བདུད་ཀྱི་ལས་སུ་གྱུར་པས་ཉེས་པ་ལྕི་བ་སྟེ། འཕགས་པ་ཡོན་ཏན་བཀོད་པའི་མདོ་ལས། བདུད་ཀྱི་ལས་བཞི་སྟེ། བླ་མ་ལ་མི་གུས་པ་དང་། ཆོས་ཡིད་ལ་མི་བྱེད་པ་དང་། ཁེངས་པའི་ཚིག་སྨྲ་བ་དང་། ཚེ་འདི་ལ་སེམས་པའོ། །ཞེས་དང་། སྤྱི་མདོ་ལས། ཅིའི་ཕྱིར་དམ་པར་གྱུར་པ་ལ། །མ་ངེས་གྱ་གྱུའི་ལས་བྱས་པས། །དམ་པར་གྱུར་པ་ཀུན་བསླུས་ཏེ། །རྡོ་རྗེའི་དམྱལ་བར་དེ་ལྟུང་འགྱུར། །ཞེས་བླ་མའི་དྲུང་དུ་གྱ་གྱུའི་བསམ་སྦྱོར་གང་དག་བྱས་པ་དེ་ནི་བསླུ་བའི་བསམ་པ་ཅན་འབའ་ཞིག་པས་དམ་པ་ཐམས་ཅད་ངོ་བོ་གཅིག་པས་ན་ཐམས་ཅད་བསླུས་པར་འགྱུར་བས་ན་འབྲས་བུའང་དེ་ཐོབ་པར་འགྱུར་ལ། དེ་བཞིན་དུ། ཁོང་ཁྲོ་ཚིག་རྩུབ་འཆལ་མི་བྱ། །བག་ཡངས་ཚུལ་གྱི་བྱ་བ་མིན། །ཚུལ་མེད་ཚུལ་དང་མི་ལྡན་པའི། །ཉམ་ང་མེད་པར་སྨྲ་མི་བྱ། །ཞེས་དང་། རྒྱན་དམ་པ་ལས། ངག་ཚིག་བརླང་པོས་ཞེ་འགེངས་པ། །བསྐལ་པ་སྟོང་ཕྲག་དམྱལ་བར་ལྷུང་། །རྡོ་རྗེ་སློབ་དཔོན་དམ་པ་ཡི། །ཟབ་མོའི་ཚིག་ལ་སྒྲོ་སྐུར་བས། །མནར་མེད་གནས་སུ་ལྟུང་བར་འགྱུར། །ཞེས་དང་། གསང་བ་ཀུན་སྙོམས་ཀྱི་རྒྱུད་ལས། བླ་མ་མཆོག་ལས་རང་ཉིད་ནི། །ཆེས་མཆོག་རློམ་སེམས་སྨྲ་བ་ནི། །བསྐལ་པ་སྟོང་ཕྲག་དུ་མ་རུ། །ཐུར་དུ་བལྟས་ཏེ་དམྱལ་བར་འགྲོ། །ཞེས་དང་། ལྐོག་སྨྲས་ལ་སོགས་པ་སྨོས་ཅི་དགོས། ཐ་ན་ཀུ་རེ་ཙམ་བྱས་ཀྱང་རྟེན་འབྲེལ་འཕྱུགས་པའི་གཏན་ཚིག་མང་སྟེ་རེ་ཞིག་གསང་བ་རོལ་པ་ལས། ལྐོག་སྨྲས་འཕྱ་བར་གད་བྱེད་པ། །རྡོ་རྗེའི་དམྱལ་བ་ཉིད་དུ་འཚེད། །ཀུ་རེ་ཙམ་དུའང་སྨོད་མི་བྱ། །ངག་གི་ཉེས་བྱས་ཡང་དག་བསྡམ། །ཞེས་སོ། །འདི་ལྟར་དམ་པ་རྣམས་ལ་གསར་ངས་ལྟ་བུས་རེ་ཞིག་བསྙེན་བཀུར་དང་རིམ་གྲོ་ཆེ་ཆེ་ལྟར་སྟོན་ལ། རིང་པོ་མི་ཐོགས་པར་འགྲོགས་སུན་ཁྱེར་ནས་མཉམ་འགྲོགས་སུ་བལྟ་བའམ། འདྲིས་དྲགས་པས་མ་གུས་པར་བྱེད་པ་ནི། བླ་མ་དམ་པའི་སྤངས་རྟོགས་ཀྱི་ཡོན་ཏན་ཆ་ཤས་ཙམ་ཡང་རང་རྒྱུད་ལ་མ་ཐོབ་ཅིང་མ་མཐོང་ལ། བྱིན་རླབས་སྣ་གཅིག་ཀྱང་མ་ཞུགས་པའི་རྟགས་ཏེ་རྨོངས་པའི་གཞན་དབང་ལས་རང་དང་སྤྱོད་ཡུལ་མཉམ་པ་ཙམ་དུ་མཐོང་བ་ཡིད་བཞིན་གྱི་ནོར་བུ་འུར་རྡོར་འཕེན་པའི་གང་ཟག་ཞེས་བྱ་སྟེ། དེའི་ཐར་པའི་ལས་འཕྲོ་དགེ་བའི་བཤེས་གཉེན་གྱི་མདུན་ནས་ནུབ་པར་འགྱུར་བ་ནི་ད་ལྟར་གྱི་སངས་རྒྱས་མངོན་སུམ་པའི་ཏིང་འཛིན་ལས། གལ་ཏེ་དེས་ཆོས་སྨྲ་བ་དེ་ལ་མནར་སེམས་པའམ། ཐ་བའམ། སྡང་བའི་སེམས་ཀྱིས་གནས་སམ། སྟོན་པ་སངས་རྒྱས་ཀྱི་འདུ་ཤེས་མི་བསྐྱེད་ན། དེ་དག་གི་ཡོན་ཏན་ཐོབ་པ་ནི་གནས་མེད་དོ། །མ་ཐོབ་པའི་ཆོས་ཐོབ་པའམ། ཐོབ་པ་ཆུད་མི་ཟ་བའི་གནས་མེད་དོ། །མ་གུས་པས་ཆོས་ནུབ་པར་འགྱུར་རོ། །ཞེས་སོ། །དེའི་ཕྱིར་བློ་དང་ལྡན་པ་རྣམས་ཀྱིས་ནི་བསྒྲིམ་པར་བྱ་བའི་གནས་འདི་ཁོ་ན་ཏེ། འདི་ལྟར་འཇིག་རྟེན་ན་སྡིག་སྤྱོད་ཀྱི་རྗེ་བོས་བཀབ་པའི་འབངས་རྣམས་ལྟོ་འགྲོས་ནམ་མཁའ་ལྡིང་མཐོང་བ་བཞིན་དུ། ཚོར་བ་ནི་གྲིམས། བག་ནི་བཀུམ། དབུགས་ནི་ལྷོད་པ་མེད་པར་འདུག་ན། བླ་མའི་དྲུང་དུ་བག་ཡོད་བསྟེན་པ་ལ་གུས་པ་དང་བཅས་པ། འཇིགས་པ་དང་བཅས་པ། ཇི་མི་སྙམ་པ་ལས་ལྡོག་སྟེ་གནས་པ་ནི་བསོད་ནམས་དཔག་ཏུ་མེད་པ་འཐོབ་ནས་མྱ་ངན་ལས་འདའ་བའི་རྒྱུ་ཡིན་ཏེ་བླ་མ་ལ་སྤྲིང་བ་དགོན་པའི་གཏམ་ལས། བག་ཡོད་འཆི་མེད་གནས་ཡིན་ཏེ། །བག་མེད་པ་ནི་འཆི་བའི་གནས། །བག་ཡོད་འཆི་བར་མི་འགྱུར་ཏེ། །བག་མེད་པ་ནི་རྟག་ཏུ་འཆི། །དེ་ཡི་ཁྱད་པར་དེ་རིགས་པས། །མཁས་པ་རྣམས་ནི་བག་དང་ལྡན། །བག་ཡོད་པ་ལ་རབ་དགའ་བ། །འཕགས་པའི་སྤྱོད་ཡུལ་དགའ་བ་ཡིན། །བརྟན་པ་གྲུབ་བདེ་བླ་མེད་པ། །མྱ་ངན་འདས་ལ་རེག་པ་ཡིན། །ཞེས་བཤད་པས་དགེ་སློང་གསར་པ་ཕམ་ལྟུང་ལ་འཇིགས་པ་བཞིན་དུ། སྒེག་ཆོས་དང་། རྒྱན་དང་། མཚོན་ཆ་ཐོགས་པ་ལ་སོགས་གཞན་གྱིས་དཔྱས་འབབ་པའི་རྒྱུ་ཐམས་ཅད་སྤངས་ཏེ། རང་གིས་རང་ལ་དཔྱས་གདགས་པ་བཞིན་དུ་གནས་པར་བྱ་དགོས་ཏེ་དགོངས་འདུས་ལས། དགེ་སློང་གསར་པའི་སྤྱོད་པ་ཡི། །སྒེག་པ་ལ་སོགས་བྱ་བྱེད་དང་། །རྒྱན་དང་མཚོན་ཐོགས་སྤངས་བར་བྱ། །བློ་གྲོས་གུས་པ་དེ་ཉིད་ཀྱང་། །ཉིད་ཀྱིས་ཉིད་ལ་དཔྱས་བཅུག་སྟེ། །གཞན་གྱི་དཔྱ་བའི་གཞི་རྣམས་སྤང་། །ཞེས་དང་། འཕགས་པ་དཀོན་མཆོག་སྤྲིན་ལས། ས་ཕྱོགས་གང་ན་ཆོས་སྨྲ་བ་གནས་པ་དེ་ལ་མཆོད་རྟེན་གྱི་འདུ་ཤེས་དང་། ཆོས་སྨྲ་བ་ལ་བླ་མ་དང་། དགེ་བའི་བཤེས་གཉེན་དང་། སྟོན་པའི་འདུ་ཤེས་བསྐྱེད་དེ་མཐོང་ན་དགའ་བ་དང་། རངས་པ་བསྐྱེད་དེ། ཞེས་གསུངས་སོ། །དད་མེད་དང་མི་འགྲོགས་པ་ནི། བླ་མ་དམོད་ཅིང་སྡང་བའི་གང་ཟག་དང་། །བཤེས་པར་མི་བྱ་ནུས་པས་དེ་བཟློག་ཅིང་། བག་ཕེབས་སྨྲ་ན་སྡིག་པའི་གཞན་དབང་ནི། །ལྷག་པར་མཐུ་ཆེ་དམ་ཚིག་སྐྱོན་ཅན་བྱེད། །རང་གི་ཆ་ནས་ཉེས་པ་མེད་ཀྱང་བླ་མ་བསྐུར་ཞིང་ལོག་པར་བལྟ་བའི་གང་ཟག་དང་འདྲིས་ཤིང་བློ་ཉེ་བར་བྱས་ཀྱང་དེ་ནི་ལོག་པའི་བློ་ཅན། གཡང་སའི་སྔ་འགྲོས། ངན་འགྲོའི་ས་མཁན་པ་ཡིན་པས་སྤང་བའི་ཚུལ་སྤྱི་མདོ་ལས། ལོག་པར་བསྒྲུབ་པའི་བློ་གྲོས་མཁན། །གཡང་སར་མཆོང་བའི་སྔ་འགྲོས་མཁན། །བྱམས་བློའི་ཡུལ་དུ་རུང་པ་མིན། །ཞེས་སོ།

།དེའང་བདག་ཉིད་ལ་ཐབས་དང་ནུས་པ་ཡོད་ན་དེའི་མ་དད་པ་ལྡོག་པར་བྱས་པས་ཕ་རོལ་པོ་དེའི་བསོད་ནམས་མ་ཡིན་པའི་རྒྱུན་ཡང་ཆད་པ་སྲིད་དེ་མ་སྐྱེས་དགྲ་ལ་རྒྱལ་ཕྲན་རྣམས་ཀྱིས་གཡུལ་གྱིས་ཕྲུ་མ་བཏབ་པའི་ཚེ། མ་བཙུན་མོ་ལུས་འཕགས་མོས་ཁྱོད་ཀྱིས་དེ་བཞིན་གཤེགས་པ་ལ་བསོད་ནམས་མ་ཡིན་པ་བྱས་པས་འདི་ལྟར་བྱུང་ངོ་ཞེས་མཚང་ལ་རྒོལ་བ་བཞིན་ནོ། །གལ་ཏེ་སྐྱེ་བོ་གང་ཞིག་དགེ་བའི་བཤེས་གཉེན་ལ་དགྲ་ཟླ་དང་ཡ་བོར་འཛིན་བཞིན་པ་དེ་དང་བཤེས་པར་བྱས་ནས། བག་ཕེབས་པར་སྨྲ་ན་སྡིག་པའི་གཞན་དབང་ནི་ནུས་པ་ཚད་མེད་པས་ཇི་ལྟར་བསྟེན་ཞིང་བཤེས་པ་དེ་ཙམ་དུ་དགེ་བ་འགྲིབ་ཅིང་དམ་ཚིག་ཉམས་པ་དང་ཉོན་མོངས་པའི་ཆར་འབབ་པ་ཡིན་ཏེ། བདུད་རྩི་འབྱུང་བའི་རྒྱུད་ལས། རྡོ་རྗེ་སློབ་དཔོན་སྨོད་པ་ན། །ཞི་བའམ་མངོན་སྤྱོད་ལས་ཀྱིས་བཟློག །ནུས་པ་ཡོད་པར་མ་གྱུར་ན། །རྣ་ཆ་དྲན་པས་དགབ་པར་བྱ། །བསྟན་པར་མི་བྱ་གཏམ་མི་བྱ། །གལ་ཏེ་དེ་དང་འདྲིས་གྱུར་ན། །ངན་སོང་དག་ཏུ་འཚེད་པར་འགྱུར། །ཞེས་གསུངས་པས་སྔགས་ཀྱི་ལམ་ནས་ནི་བསྒྲལ་བའི་ཞིང་དུའང་བསྟན་ལ། དེ་ལྟ་བུའི་ནུས་པ་དང་མི་ལྡན་པའམ་བཟོད་པའི་དཀའ་ཐུབ་ལ་མོས་པའི་བྱང་ཆུབ་སེམས་དཔའ་རྣམས་ནི་བླ་མ་ལ་དམོད་པའི་ཉེས་དམིགས་ཀྱི་དྲན་ཤེས་ལག་པ་ལྟ་བུས་རྣ་བའི་རྣམ་པར་ཤེས་པ་ལ་དགབ་པར་བྱ་ཞིང་འདྲིས་པ་དང་གཏམ་བསྲེ་བ་ལས་རིང་དུ་བསྲིང་བར་བྱའོ། །ཉེ་བར་གནས་པས་མཚོན་སྐྱེ་དགུ་ཐམས་ཅད་ལ། འགྲོགས་པར་བདེ་བ་སྐ་རགས་ལྟ་བུ་དང་། །འཇུག་པ་བདེ་བ་ལན་ཚྭ་ལྟ་བུ་དང་། །བཟོད་སྲན་ཆེ་བ་ཀ་བ་ལྟ་བུ་ཡིས། །བླ་མའི་འཁོར་དང་རྡོ་རྗེའི་སྤུན་ལ་གཉེན། །འདི་ལྟར་བླ་མའི་གདུང་འཛིན་པ་དང་། དམ་ཚིག་གི་ཀུན་ཏུ་སྤྱོད་པར་བཟུང་བའམ་དབང་གི་རྟེན་ཉེ་བར་གནས་པ་དང་། སློབ་མ་དང་། སྦྱིན་བདག་ལ་སོགས་པའི་སྡེའམ། མདོར་ན་ཐུགས་ཀྱིས་བཟུང་བ་མཐའ་དག་དང་འགལ་བར་མི་སྤྱོད་དེ། སྤྱི་མདོར། དེ་ཡི་ཉེ་གནས་དམ་པ་བཞིན། །དེ་ཡི་འཁོར་གཡོག་ཉེ་དུ་བཞིན། །རྟག་ཏུ་མཉམ་པའི་སེམས་ཀྱིས་བལྟ། །ཞེས་སྐུ་ལ་ཉེ་བར་བཅར་བ་གང་དག་ལ་བླ་མ་བཞིན་དང་། འཁོར་དང་སློབ་མ་ལ་སོགས་པར་ཉེ་དུ་བཞིན་དུ་བལྟ་བ་ལ་དྲན་པ་ཉེ་བར་འཇོག་ཅིང་། ཀུན་གྱི་ཁུར་དུ་མི་འགྲོ་བས་འགྲོགས་ན་བདེ་བ་སྐ་རགས་ལྟ་བུ་དང་། ཆེ་ཆུང་མཆོག་དམན་ཐམས་ཅད་དང་འགྲེ་བས་འཇུག་པ་བདེ་བ་ལན་ཚྭ་ལྟ་བུ་དང་། སྐྱོ་བསུན་དང་ལོག་བསྒྲུབ་ཐམས་ཅད་བཟོད་པ་ཀ་བ་ལྟ་བུས་འཁོར་གྱི་ནང་དུའང་བསྙེན་དགོས་ཏེ། དེ་དག་ལའང་བླ་མའི་ཞབས་ཏོག་དང་། བཟའ་བཏུང་གི་གཡོས་དང་། མགྲོན་པོའི་གཉེར་ལ་སོགས་པའི་ཁུར་འབབ་པས་བདག་ཅག་བདེ་བར་གནས་པའི་དྲིན་བཟོ་བ་ཡིན་ལ། གཅིག་ཏུ་ན་ཉེ་འཁོར་སུན་ཕྱུང་ན་རེ་ཞིག་ཕྱི་ནང་དུ་མཚམས་སྦྱོར་བའི་རྟེན་འབྲེལ་དེ་དག་ལ་རག་ལས་པའང་ཡོད་པའི་ཕྱིར་རོ། །དེ་སྐད་དུ་ཡེ་ཤེས་གྲུབ་པའི་རྒྱུད་ལས་ཀྱང་། བླ་མའི་རྫས་དང་འཁོར་རྣམས་དང་། །ཉེ་འཁོར་སུན་འབྱིན་བརྣབ་སེམས་སྤང་། །ཞེས་སོ། །སྤྱོད་པ་འཇམ་ཞིང་དེས་པས་དམ་པའི་ཡོན་ཏན་གྱི་རོ་མྱོང་བ་ནི། རྫིང་བུ་མཆོག་ལ་བསྟེན་པའི་ངང་པ་དང་། །བུང་བས་མེ་ཏོག་བཅུད་ལ་རོ་མྱོང་བཞིན། །རྟག་ཏུ་འགྲོགས་པའི་སྤྱོད་པ་ངོ་མཚར་ཅན། །སྐྱོ་ངལ་མེད་པས་བླ་མའི་ཐུགས་བཟུང་ནས། །དད་པའི་ཉེ་བར་ལེན་པས་ཡོན་ཏན་མྱོང་། །འདི་ལྟར་དད་པ་ནི་ཆོས་སྣང་བའི་སྒོ་ཡིན་ཏེ། བླ་མ་ལ་མཐོང་ཕྱག་འཚལ་ཞིང་བྱིན་རླབས་ཞུ་བ་དང་། ལྡང་བ་དང་ཐལ་མོ་སྦྱོར་བ་ལ་སོགས་པ་བྱ་སྟེ། དམ་པའི་ཆོས་འདུལ་བ་ལས་ཀྱང་། མཁན་པོ་མཐོང་མ་ཐག་ཏུ་སྟན་ལས་ལྡང་བར་བྱའོ། །ཞེས་བཤད་ཅིང་། གལ་ཏེ་ཇི་མི་སྙམ་པར་བསྡད་ན་ཚེ་རབས་ལྔ་བརྒྱར་འཕྱེ་བོར་སྐྱེ་བ་ལས་བརྒྱ་པ་ལས་གསུངས་པས་སོ། །འདི་ལྟར་འཇིག་རྟེན་ན་དྲག་ཞན་གྱི་སྒོ་ནས་དང་བ་སྟོན་པའི་བསྟི་སྟངས་ལྟ་བུར་མི་བལྟ་སྟེ། རྒྱན་གྱི་འགྲེལ་པ་ལས། བླ་མ་བསྐྱེལ་བ་དང་། བསུ་བ་ལ་སོགས་པ་ཉིད་ཀྱིས་ཕྱག་དང་། ཞབས་འཁོར་ལོའི་མཚན་དང་ལྡན་པ་ཉིད་དང་། ཞེས་པའི་ཕན་ཡོན་འཐོབ་པས་བདག་ཉིད་ཀྱི་དོན་ཁོ་ན་ལས་བླ་མ་ལ་ལྟོས་པ་ཅུང་ཟད་ཀྱང་མེད་པའི་ཕྱིར་རོ། །དེའི་ཕྱིར་དད་གུས་ལ་ལྟེམ་བརྐྱང་མེད་པས་ཐར་པ་དང་། ཐམས་ཅད་མཁྱེན་པའི་གོ་འཕང་ཁོ་ན་ལ་དམིགས་ཏེ་བླ་མར་བྱ་བ་དང་། རིམ་གྲོ་དང་། སྲི་ཞུ་དང་། བསྟི་སྟང་དང་། མཆོད་པ་དང་། བརྗེད་པ་དང་། སྙུན་འདྲི་བ་དང་། ན་བའི་གསོས་སྨན་དང་། རི་མོར་བྱ་བ་ཞེས་གསུང་རབ་རྣམས་ནས་བྱིངས་བསྡུ་བ་ལས། བླ་མའི་ཕྱོགས་སུ་ལུས་བཀོལ་ནས་ཕྱག་འཚལ་བ་དང་། བསྐོར་བ་བྱ་བ་དང་། སྤོས་དང་། མེ་ཏོག་དང་། མར་མེ་ལ་སོགས་པ་ཕྱིའི་མཆོད་པ་དང་། ཚོགས་ཀྱི་འཁོར་ལོ་ལ་སོགས་པ་ནང་གི་མཆོད་པ་དང་། རྟོགས་པ་དང་། ཏིང་ངེ་འཛིན་དང་། ཤེས་རབ་དང་། བསྟན་བཅོས་བརྩམ་པ་ལ་སོགས་པ་དོན་གྱི་མཆོད་པ་དང་། མེ་དང་། ཆུ་དང་། མཚོན་དུག་གཅན་གཟན་ལ་སོགས་པའི་བར་ཆད་བསྲུང་བ་དང་། ཡུལ་དང་ཡུལ་ཕྲན་ལ་བང་ཕྱིན་ནམ། མངག་གཞུག་གི་བྱ་བ་དང་། འཕྲལ་ཉེ་བར་མཁོ་བའི་གཡོག་ལ་འཇུག་པ་བདེ་བ་དང་། སྤོས་ཀྱི་བསུ་བསྐྱེལ་བྱེད་པ་དང་། གཟིམས་ཆུང་དང་། གཟིམས་མལ་དང་། ཉེར་སྤྱད་དང་། ཉེ་འཁོར་ལ་བྱི་དོར་བྱེད་པ་དང་། ཆོས་རར་བླ་བྲེ་དང་། ཡོལ་བ་ལ་སོགས་པའི་བསྟི་སྟངས་བྱ་བ་དང་། ཉལ་བའི་སྔས་ཀྱང་བླ་མའི་ཕྱོགས་སུ་སྟོན་པ་དང་། བཟའ་བཏུང་བྱེད་པ་ན་དྲིན་དྲན་པས་ཕུད་འབུལ་བ་དང་། གོས་གསར་པ་གྱོན་པ་ནའང་བླ་མའི་ཕྱོགས་སུ་དམིགས་ནས་དེང་བྱེད་པ་དང་། གླལ་པ་དང་། སྦྲིད་པ་སོགས་བྱུང་བའི་ཚེ་ཁ་དགབ་པ་དང་། གསུང་བྱོན་པ་ལ་ཐལ་མོ་སྦྱར་ནས་བཀའ་བཞིན་བསྒྲུབ་བོ་ཞེས་ལན་སྙན་མོ་འབུལ་བའང་དེ་ཉིད་ལས། ལུང་བྱུང་བཀའ་བཞིན་ཞུ་ཞེས་བརྗོད། །ཐལ་སྦྱར་གསུང་བ་གཟུང་བར་བྱ། །ཞེས་དང་། དེ་བཞིན་དུ་བླ་མའི་དཀོར་སྲོག་བཞིན་དུ་བསྲུང་བ་དང་། རང་གི་བྱ་བ་གང་བྱེད་ཀྱང་སྙན་དུ་གསོལ་ནས་གནང་བ་ཞུ་བ་དང་། ཉེ་བར་མི་བཞུགས་ན་བྱ་བ་གང་བྱེད་ཀྱང་བླ་མའི་བཀས་གནང་བ་ཡིན་སྙམ་པ་དང་། མཚན་བརྗོད་པར་དཀའ་བ་ཞེས་པའི་དོན་ཤེས་པར་བྱས་ནས་བླ་མའི་མཚན་རང་མཚན་པ་ནས་མི་བརྗོད་ཅིང་། གལ་ཏེ་བརྗོད་དགོས་ན་དོན་གྱི་སླད་དུ་མཚན་སྨྲོས་པ་ཞེས་པའི་འབྲེལ་བསྔགས་པ་ཅན་སྦྱར་བའང་དགོངས་འདུས་ལས། མཚན་ནས་ནམ་ཡང་མི་བརྗོད་ཅིང་། །དམ་པ་བླ་མ་བཤེས་གཉེན་ཞེས། །བརྗོད་པའི་ཐ་མར་ཞུས་སྒྲ་གཞུག །ཅེས་སོ། །ཁྱད་པར་ཐེག་པ་འོག་མའི་རྩ་བ་སྡོམ་པ་འབོགས་པ་དང་། ཆོས་བཤད་པ། ཐེག་པ་གོང་མའི་རྩ་བ་དབང་བསྐུར་བ་དང་། རབ་ཏུ་གནས་པ་ལ་སོགས་པ་ནི་མཁན་པོ་དང་། རྡོ་རྗེ་སློབ་དཔོན་གྱི་བྱ་བ་ཡིན་པས་རྗེས་སུ་གནང་བ་མ་ཐོབ་པར་མི་རུང་སྟེ། འཁོར་ལོ་ཆུབ་པ་རོལ་པ་ལས། འཁོར་རྣམས་སློབ་མར་མི་བསྡུ་ལ། །ཆོས་དང་དབང་བསྐུར་རབ་གནས་དང་། །སྦྱིན་སྲེག་ལ་སོགས་ཞུས་ཏེ་བྱ། །ཞེས་གསུངས་པ་སྟེ་གཞན་དོན་བྱ་མ་རན་པའི་བབ་ཅོལ་བདུད་ལས་ཡིན་པའི་ཕྱིར་རོ། །དེ་སྐད་དུ་དགོངས་འདུས་ལས། དཀྱིལ་འཁོར་ལ་སོགས་སྦྱིན་སྲེག་དང་། །སློབ་མ་བཟུང་དང་ཆོས་སྨྲ་བ། །ལུང་མ་བྱུང་བར་མི་བརྩམ་སྟེ། །དམ་པའི་ཡུལ་ན་དེ་མི་རིགས། །ཞེས་དང་། དམ་པའི་སློབ་མ་སློབ་མར་ཡང་། །དམ་པའི་མདུན་དུ་མི་རིགས་སོ། །ཞེས་སོ། །གལ་ཏེ་ཡུལ་དུས་ཀྱིས་མ་གྲུབ་ན་དེ་ཉིད་ལས། གལ་ཏེ་གཞན་གྱི་དོན་བྱས་ན། །དེ་ཡི་ཡོ་བྱད་མི་བྱ་སྟེ། །དེ་ཀུན་དམ་པ་དེ་ལ་དབུལ། །ཞེས་པ་ལྟར་རོ། །སྐུ་འདས་པའི་གནས་སྐབས་ན་གདུང་ལ་རིམ་གྲོ་ཆེར་བསྐྱེད་པ་དང་། འཁོར་གསུམ་ཡོངས་སུ་དག་པའི་སྤང་དག་དང་། མཆོད་པའི་སྤྲིན་ཀུན་ཏུ་སྤྲོ་བ་དང་། དམ་ཚིག་ཉམས་ཆགས་ལ་བཤགས་པ་དྲག་པོ་དང་། སྨོན་ལམ་རྒྱ་ཆེན་པོ་གདབ་པ་དང་། ཐུགས་དགོངས་རྫོགས་པའི་གཙོ་བོར་བསྒྲུབ་པའི་མཆོད་པ་རྒྱ་ཆེན་པོ་དང་། ཚེས་གྲངས་གང་ལ་ཐུགས་འཕོས་པ་དེའི་དུས་མཆོད་མི་བཅག་པ་དང་། སེམས་ཅན་གྱི་སྲོག་སྐྱོབ་པ་དང་། དམན་པ་ལ་སྦྱིན་པ་བྱ་བ་ལ་སོགས་པ་དང་། རྣམ་པ་ཀུན་ཏུ་བླ་མའི་ཡོན་ཏན་བརྗོད་ཅིང་བློ་གྲོས་ཆེན་པོའི་ཕྱོགས་ནས་ཆོས་ཀྱི་བགྲོས་སམ། འཇིག་རྟེན་གྱི་བྱ་བའི་ཕྱོགས་ལ་མི་རིགས་པར་མངོན་པ་དག་ལའང་དང་པོ་གསུང་སྣ་ཁྲིད་ལ། ཕྱི་ནས་དོན་འདི་དང་འདིའི་དགོངས་པ་ཇི་བཞིན་མ་ལོན་ཏེ། རང་གི་བློའི་འགལ་བ་ལ་འདི་ལྟར་ཤར་བ་ལགས་ཞེས་ཁེ་ཉེན་དང་ལེགས་ཉེས་བརྗོད་པས་ཐུགས་དགོངས་པ་སྟོན་པར་འགྱུར་ལ། བཙན་ཐབས་སུ་བླ་མའི་དེ་མ་ཡིན་ནོ་ཞེས་གདོང་བཟློག་པ་ལས་ཉེས་པ་ཆེན་པོ་ཐོབ་སྟེ་སྔ་མ་ལས། སློབ་མ་འགྱུར་ནས་སེམས་ལྡན་པས། །དམ་པ་དེ་ལ་ཉེས་བྱེད་གང་། །སངས་རྒྱས་ཀུན་ལ་ཉེས་བྱས་པས། །དེ་དག་རྟག་ཏུ་སྤྱིའུ་ཚུགས་འགྲོ། །ཞེས་སྤྱིའུ་ཚུགས་སུ་འགྲོ་བ་ནི་དམྱལ་བ་པའོ། །མདོར་ན་དད་པའི་ངོས་ནས་ཞལ་མཐོང་བས་སྣང་བ་འགྱུར་བ་དང་། སྤྱི་བོར་ཕྱག་གི་རེག་པ་ལ་བ་སྤུ་ཟིང་བྱེད་པ་སྨོས་ཅི་དགོས། མཚན་ཐོས་པ་དང་། ཡིད་ལ་དྲན་པ་དང་། རྨི་ལམ་གྱིས་མཇལ་བ་ཙམ་ལ་བློ་འབོལ་ཤིག་གེ་སོང་ནས་ཁམས་གསོ་ནུས་པ་ཙམ་དུ་གྱུར་པའི་སྐབས་དབང་དང་བྱིན་རླབས་མ་ལུས་པ་རྒྱུད་ལ་འཇུག་པའི་དུས་ཡིན་ཏེ། ཚེའི་དུས་བྱས་ཀྱང་བར་དོར་བླ་མ་དང་མཇལ་ནས་ལམ་སྣ་འཁྲིད་པར་གདོན་མི་ཟའོ། །དེ་སྐད་དུ་སྡོང་པོ་བཀོད་པ་ལས། དགེ་བའི་བཤེས་གཉེན་ཡིད་ལ་བྱེད་པ་དང་མ་བྲལ་བ་ལས་དོན་ཐམས་ཅད་གྲུབ་པར་འགྱུར་རོ། །ཞེས་དང་། སློབ་དཔོན་ཀླུས། རི་དབང་རྩེ་ནས་འགའ་ཞིག་ལྷུང་གྱུར་ན། །ལྷུང་བར་མི་འགྱུར་སྙམ་ཡང་ལྷུང་བར་འགྱུར། །བླ་མའི་དྲིན་གྱིས་ཕན་པའི་ལུང་ཐོབ་ན། །གྲོལ་བར་མི་འགྱུར་སྙམ་ཡང་གྲོལ་བར་འགྱུར། །ཞེས་པ་སྟེ། མདོར་ན་དད་པའི་ཉེ་བར་ལེན་པ་གང་ལ་ཡོད་པ་དེ་ལ་རྫོགས་པའི་བྱང་ཆུབ་ཀྱི་ས་བོན་ཡོད་པ་ནི་དབུ་མ་ལ་འཇུག་པ་ལས་ཀྱང་། སོ་སོ་སྐྱེ་བོའི་དུས་ནའང་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་ནས་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་བརླན་ཞིང་། །ལུས་ཀྱི་བ་སྤུ་ལྡང་བར་གྱུར་པ་གང་ཡིན་པ། །དེ་ལ་རྫོགས་པའི་སངས་རྒྱས་བློ་ཡི་ས་བོན་ཡོད། །དེ་ཉིད་ཉེ་བར་བསྟན་པའི་སྣོད་ནི་དེ་ཡིན་ཏེ། །དེ་ལ་དམ་པའི་དོན་གྱི་བདེན་པ་བསྟན་པར་བྱ། །ཞེས་སོ། །དེའི་དོན་ད་དུང་གོ་སླ་བར་བརྗོད་ན་མཆོག་གཟིགས་ཀྱི་རྣལ་འབྱོར་སྡོམ་པའི་ཀ་མ་ཤཱི་ལ་ལ་དམ་པ་བྱིན་རླབས་གཅིག་ཞུ་བྱས་པས། བུ་ལྷོད་པོ་མོས་གུས་གཅིག་ཞུ་དང་གསུངས། དེ་བཞིན་དུ་ཇོ་བོས། ཐེག་ཆེན་གྱི་ཡོན་ཏན་ཆེ་སྐྱེས་ཆུང་སྐྱེས་ཐམས་ཅད་བླ་མ་ལ་བསྟེན་ནས་སྐྱེ་བ་ལ་ཁྱེད་བོད་བླ་མ་ལ་ཐ་མལ་པའི་འདུ་ཤེས་ལས་མེད་པས་ག་ན་སྐྱེ། ཞེས་གསུངས། རེས་གཅིག་མཚན་ནས་སྐད་ཆེན་པོས་བོས་ཏེ་གདམས་ངག་ཐུགས་ལ་གདགས་པར་ཞུ་བྱས་པས། ཧེ་ཧེ་ཁོ་བོ་ལ་རྣ་བལྟ་བཟང་པོ་བཟང་པོ་བདོག་སྟེ་མན་ངག་བྱ་བ་དད་པ་ཡིན། དད་པ་དད་པ་ཞེས་གསུངས་སྐད་མདོར་བསྡུ་ན་བྱང་ཆུབ་སེམས་དཔའི་སྡེ་སྣོད་ལས། མདོར་ན་བྱང་ཆུབ་སེམས་དཔའི་སྤྱོད་པ་ཐམས་ཅད་ཐོབ་ཅིང་ཡོངས་སུ་རྫོགས་པ་དང་། དེ་བཞིན་དུ་ཕ་རོལ་ཏུ་ཕྱིན་པ་དང་། ས་དང་། བཟོད་པ་དང་། ཏིང་ངེ་འཛིན་དང་། མངོན་པར་ཤེས་པ་དང་། གཟུངས་དང་། སྤོབས་པ་དང་། བསྔོ་བ་དང་། སྨོན་ལམ་དང་། སངས་རྒྱས་ཀྱི་ཆོས་ཐམས་ཅད་འཐོབ་ཅིང་ཡོངས་སུ་རྫོགས་པ་ནི་བླ་མ་ལ་རག་ལས་པས། བླ་མ་རྩ་བར་གྱུར། བླ་མ་ལས་བྱུང་། བླ་མ་སྐྱེ་གནས་དང་སྐྱེ་མཆེད་དུ་གྱུར། བླ་མས་བསྐྱེད། བླ་མས་སྤེལ། བླ་མ་ལ་བསྟེན། བླ་མ་རྒྱུར་གྱུར་པ་དག་གོ་ཞེས་གསུངས་པའི་ཕྱིར་རོ། །འཇུག་པའི་སྤྱོད་ལ་ངེས་པར་ཞུགས་པ་ཡི། །དམ་པ་མཆོག་གི་བསོད་ནམས་ཡེ་ཤེས་ཚོགས། །གང་གི་ཁྲོད་དུའང་དོན་མཐུན་སྤྱོད་པ་དང་། །མངག་གཞུག་བང་ཕྱིན་ཕྱག་དར་ཚུན་ཆོད་ཀྱང་། །ངལ་བ་འབྲས་བཅས་ཚོགས་ཀྱི་ལམ་མཆོག་ཡིན། །འདི་ལྟར་དགེ་བའི་ཚོགས་མཐའ་དག་པ་སྦྱོར་དངོས་རྗེས་གསུམ་ཚང་བ་དེ་ཐར་པའི་རྒྱུར་འགྱུར་བ་ལས་གཞན་དུ་མ་ཡིན་ན། རང་གིས་བགྱིས་པ་ནི་ཐབས་དང་ཤེས་རབ་མཐའ་དག་གི་ཟིན་པ་རེ་ཞིག་དཀའ་ལ། དེའི་ཕྱིར་དམ་པའི་བླ་མ་ཕ་རོལ་ཏུ་ཕྱིན་པ་དྲུག་གི་སྤྱོད་པ་ལ་ཞུགས་པ་ཞིག་གིས་དགེ་ལ་སྦྱོར་བའི་ལས་དང་། ཚོགས་གསོག་མཛད་པའི་ཁྲོད་དུ་རང་གི་བདོག་པའི་དངོས་པོ་དང་། ལུས་ངག་གི་ལས་དང་། ཐོས་བསམ་བསྒོམ་པའི་བྱ་བ་མཐའ་དག་དེ་དང་ཕྲུགས་གཅིག་ཏུ་སྤུངས་ཤིང་། ཐ་ན་བང་ཕྱིན་དང་། མངག་གཞུག་པའི་ལས་དང་། ཕྱག་དར་ཚུན་ཆོད་ལ་འབུངས་པས་བླ་མ་དམ་པའི་ཚོགས་རྣམ་པ་གཉིས་ཅི་ཙམ་རྫོགས་པ་དེ་སྲིད་དུ་རང་གི་ཚོགས་ཀྱང་འདུམ་པའི་ཚུལ་སྔགས་ལམ་མྱུར་བའི་དབང་དུ་བྱས་ནས་བླ་མ་བསྟེན་ཞིང་། བསྙེན་བཀུར་དང་། བསག་སྦྱངས་ལ་བརྩོན་པ་ཚོགས་ལམ་གྱི་དོད་ཐུབ་པར་བསྟན་ནས། དམ་པའི་བྱིན་རླབས་ལས་རྣམ་པར་མི་རྟོག་པའི་ཡེ་ཤེས་ལ་སྦྱོར་བ་དང་། ཆོས་ཉིད་དངོས་སུ་མཐོང་བ་དང་། མཐོང་ཟིན་བསྒོམ་པར་བྱ་བ་དང་། བསླབ་བྱ་མཐར་ཐུག་པས་མི་སློབ་པའི་ལམ་དུ་འགྲོ་བའང་རྒྱུད་ལས། བླ་མ་བསྙེན་བཀུར་ཡོངས་རྫོགས་ནས། །དམ་པའི་དྲུང་ན་གནས་པ་ནི། །ཚོགས་ཀྱི་ལམ་ཞེས་དེ་ལ་བྱ། །བླ་མ་དམ་པས་དོན་བཤད་ཅིང་། །གདམས་ངག་གཉིས་ཀྱང་དེ་ལ་སྦྱོར། །སྦྱོར་བའི་ལམ་དུ་ང་ཡིས་བསྟེན། །ཚེ་འདིར་ངེས་པའི་བདེན་པ་མཐོང་། །མཐོང་བའི་ལམ་དུ་ང་ཡིས་བཤད། །བསྒོམ་དུ་མེད་པའི་སྒོམ་པ་དང་། །བསྒོམ་དུ་ཡོད་པའི་མེད་པ་གཉིས། །འདུ་འབྲལ་མེད་པར་གནས་པ་ནི། །བསྒོམ་པའི་ལམ་དུ་ང་ཡིས་བསྟན། །མི་གནས་ཚུལ་གྱིས་མཐར་ཕྱིན་པས། །མཐར་ཕྱིན་ལམ་དུ་ང་ཡིས་བཤད། །ཅེས་བསྟན་པ་བཞིན་ནོ། །རྒྱུ་མཚན་གང་གིས་ན། ཅི་ཕྱིར་སྐྱབས་སུ་འགྲོ་དང་ཚོགས་ཀྱི་ཞིང་། །བླ་མ་བསྒྲུབ་པའི་རྣལ་འབྱོར་ཕྱི་ནང་གཉིས། །བསྐྱེད་རྫོགས་བསྒྲུབ་བྱའི་ངོ་བོ་འདིར་འདུས་པས། །མདོ་རྒྱུད་ཀུན་ནས་སངས་རྒྱས་ཉིད་དུ་བསྟན། །གང་དུ་བསྟན་ན་ཐེག་པ་ཆེན་པོའི་མདོ་སྡེ་ཐམས་ཅད་ནས་སྟོན་པའི་འདུ་ཤེས་བསྐྱེད་དགོས་པར་ཡང་ནས་ཡང་དུ་བསྟན་ཅིང་། དེ་སྐད་དུ་ལག་ན་རྡོ་རྗེ་མངོན་པར་དབང་བསྐུར་བའི་རྒྱུད་ལས། གསང་བའི་བདག་པོ་སློབ་དཔོན་ལ་སློབ་མས་ཇི་ལྟར་བལྟ་བར་བྱ་ཞེ་ན། སངས་རྒྱས་བཅོམ་ལྡན་འདས་ལ་ཇི་ལྟར་བལྟ་བ་དེ་བཞིན་དུའོ། །ཞེས་དང་། ནམ་མཁའ་ཀློང་ཡངས་ཀྱི་རྒྱུད་ལས། བླ་མ་བསྒོམས་ན་ཆོས་སྐུ་བསྒོམ། །ལྷ་སྐུ་འབུམ་ཕྲག་སྟོང་བསྒོམས་པས། །བསོད་ནམས་དེ་ཡི་ཆར་མི་ཕོད། །དེ་ཕྱིར་དཀར་པོའི་ཆོས་སྤྱོད་རྣམས། །ཉན་བཤད་བསྒོམ་དང་འཛིན་པ་དང་། །མཆོད་གཏོར་ལ་སོགས་གང་བྱེད་ཀྱང་། །སྔོན་དུ་འགྲོ་བའི་ལས་ཡིན་པས། །བླ་མ་དུས་གསུམ་སངས་རྒྱས་དཔལ། །ཞེས་གསུངས་པ་ཡིན་ལ། མཚན་ཉིད་དེས་གཞལ་བས་ལམ་གྱི་ཐོག་མ་སྐྱབས་སུ་འགྲོ་བའི་ཚེ་ཚོགས་ཀྱི་ཞིང་དུ་གསལ་བ་ནི་ཕྱི་ལྟར་དུ་བསྒྲུབ་པ་དང་། རྒྱུད་དག་པར་བྱེད་པའི་སླད་དུ་ནི་སྤྱི་བོར་སངས་རྒྱས་ཐམས་ཅད་པའི་བདག་ཉིད་དུ་བསྒོམ་པ་ནི་ནང་ལྟར་བསྒྲུབ་པ་དང་། བྱིན་རླབས་གཅིག་ཆར་དུ་འཇུག་པས་སྙིང་གར་བསྒོམ་པ་ནི་གསང་བ་ལྟར་བསྒྲུབ་པ་དང་། རང་ལུས་སུ་བསྒྲུབ་པའམ། དེ་བཞིན་དུ་བསྐྱེད་རིམ་བསྒོམ་པའི་ཚེའང་བླ་མ་ཡི་དམ་གྱི་རྣམ་པར་བཞེངས་པ་ཡང་གསང་ལྟར་བསྒྲུབ་པ་རྣམས་ལ་གོ་བ་འོལ་སྤྱི་ཙམ་མ་ཡིན་པ་ཆགས་ན་དངོས་གྲུབ་མྱུར་བ་ཡིན་ཏེ། ཅིའི་ཕྱིར་ན། ཐོག་མར་དབང་གི་བྱ་བ་མཛད་པའི་ཚེ་དཀྱིལ་འཁོར་གྱི་བདག་ཉིད་རྡོ་རྗེ་སློབ་དཔོན་ཡིན་ལ། གདན་གསུམ་ཚང་བའི་དཀྱིལ་འཁོར་ཡང་དེའི་ཏིང་ངེ་འཛིན་གྱི་སྤྲུལ་པ་ཡིན་པའི་ཕྱིར་རོ། །ཁྱད་པར་རྫོགས་པའི་རིམ་པ་མཐར་ཐུག་པ་ནི་ཆོས་ཉིད་རྣམ་པར་མི་རྟོག་པའི་ཡེ་ཤེས་ལ་རྣལ་དུ་འབྱོར་པ་སྟེ། དེ་ནི་རྟོགས་པ་དང་ལྡན་པའི་བླ་མའི་ཐུགས་ཀྱི་ངོ་བོ་ཉིད་ཡིན་པས་བླ་མ་དང་ཐུགས་ཡིད་འདྲེས་པ་ལས་རྟོགས་པའི་ཡོན་ཏན་རྒྱུད་ལ་སྐྱེ་བས་ན་མཉམ་པར་བཞག་པའི་སྔོན་འགྲོ་དང་། བླ་མའི་རྣལ་འབྱོར་གྱི་རྗེས་ཐོགས་སུའང་བླ་མ་དང་ཐུགས་ཡིད་བསྲེ་བ་ལ་བསླབ་པ་འདི་བྱུང་བ་ཡིན་ནོ། །དེ་སྐད་དུ་སྐྱེས་རབས་ལས་ཀྱང་། དམ་པ་རྣམས་ནི་སུས་ཀྱང་མི་བསྲིངས་ཏེ། །དུལ་བའི་ཚུལ་གྱིས་དགེ་བ་བསྟན་པར་བྱ། །དེ་དང་ཉེ་ན་དེ་ཡི་ཡོན་ཏན་རྡུལ། །ཆེད་དུ་མ་བསྒོས་པར་ཡང་གོས་པར་འགྱུར། །ཞེས་སོ། །འདི་ལྟར་མ་རྟོགས་པའི། རྨོངས་པ་ཕལ་ཆེར་གཟུགས་བརྙན་འདྲི་ཞིང་བསྒོམ། །དངོས་སུ་བཞུགས་ལ་རིམ་གྲོ་བགྱི་བ་མེད། །གནས་ལུགས་བསྒོམ་ཟེར་བླ་མའི་ཐུགས་མི་ཤེས། །བསྒྲུབ་དང་བསྒྲུབ་བྱ་འགལ་བ་ཉོན་རེ་མོངས། །མོས་གུས་མེད་བཞིན་བར་དོར་མཇལ་བ་མཚར། །བོད་འདིར་བླ་མ་ལ་སངས་རྒྱས་སུ་མཐོང་བ་ལྟ་ཅི་སྨོས། དགེ་བཤེས་བཟང་པོ་ཙམ་དུའང་བལྟ་བ་མ་ཡིན་ཞིང་། ཁ་ཅིག་དེ་ལྟར་བལྟ་བའི་རྒྱུ་མཚན་གང་ཡང་མེད་བཞིན་དུ་འཇིག་རྟེན་གྱི་གྲགས་ཚོད་དང་། རྨོངས་པའི་སྟེས་དབང་ལས་གཟུགས་བརྙན་འབྲི་བ་དང་། འདྲ་འབག་འཆོས་པ་དང་། བསྒོམ་པའི་ཚུལ་ལུགས་ངག་ཏུ་གདོན་པ་དང་། །ར་གན་དང་། གསེར་དང་། དངུལ་ལ་སོགས་པའི་ཕྱི་རྟེན་བྱེད་པ་ཕལ་མོ་ཆེ་ཀུན་སློང་ངན་པས་གྲགས་པ་བསྲུང་བ་དོན་དུ་གཉེར་བ་ཁོ་ན་མང་སྟེ། ཅིའི་ཕྱིར་ན་དངོས་སུ་བཞུགས་པའི་བསྟི་སྟང་དང་ཕྱོགས་ཤིན་ཏུ་འཛོལ་བའི་ཕྱིར་རོ། །དཀོན་མཆོག་བརྩེགས་པ་ལས། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །ཞེས་གསུངས་པས་མོས་གུས་དང་དག་སྣང་མེད་པར་ཟང་ཟིང་དང་དངོས་པོའི་འདུ་ཤེས་བསྐྱེད་ནས་འདྲ་འབག་ལ་སོགས་བྱེད་པ་བས། སེམས་ཅན་ཐམས་ཅད་ལ་རང་བཞིན་གྱིས་མཐོང་ན་མི་མཐུན་པ་མེད་པའི་སངས་རྒྱས་བྱང་སེམས་ཀྱི་སྣང་བརྙན་བྱེད་པ་ཉིད་ཁེབས་ཆེ་བའོ། །དེ་བཞིན་དུ་དབང་དང་། མན་ངག་དང་། བདེན་པའི་ངོ་སྤྲོད་ནི་བླ་མ་ལས་བྱུང་གིས། གཞན་དུ་ན་བྱིན་རླབས་དང་དངོས་གྲུབ་ནི་ཕྱོགས་ག་གེ་མོ་ཞིག་ནས་འབྱུང་ངོ་སྙམ་པ་ནི་ནོར་བ་ཆེན་པོ་ཡིན་ཏེ། བར་དོར་བླ་མ་དང་ཡི་དམ་མཐོང་བའང་མོས་གུས་དང་གསལ་སྣང་གི་རང་གཟུགས་ཡིན་ཏེ་བླ་མས་བར་དོར་བྱོན་པ་ནི་མེད་པའི་ཕྱིར་རོ། །རྒྱུ་མཚན་དེ་དག་གི་ཕྱིར། དང་པོར་བླ་མ་བརྟག་ལ་མཁས་པ་དང་། །བར་དུ་བླ་མ་བསྟེན་ལ་མཁས་པ་དང་། །ཐ་མར་དགོངས་སྤྱོད་བསླབ་ལ་མཁས་པ་ཡི། །སྐྱེས་བུ་དེ་ནི་ཡང་དག་ལམ་ལ་འགྲོ། །ཞེས་སྨོས་ནས། དེང་སང་དུས་ཤིན་ཏུའང་རྙིངས་པས། ཚེ་དང་། འབྱོར་པ་དང་། ཆོས་དང་། འདྲེན་པ་ཀུན་ནས་རྙིངས་པའི་གནས་སྐབས་ན་ཐོག་མར་བླ་མའང་ཤིན་ཏུ་བརྟག་པ་གལ་ཆེ་བ་ཡིན་ལ། དེའང་དུས་ཀྱི་དབང་ལས་ཡོན་ཏན་ཐམས་ཅད་ཚང་བར་མ་རྙེད་ན། དཔུང་བཟང་གིས་ཞུས་པར། དེ་ལྟའི་ཡོན་ཏན་མ་ལུས་ལྡན་པ་དག །རྩོད་པའི་དུས་ན་ཤིན་ཏུ་དཀོན་པས་ན། །ཡོན་ཏན་ཕྱེད་དམ་བཞི་ཆ་བརྒྱད་ཆ་ཅན། །ཞེས་གྲོགས་ཀྱི་མཚན་ཉིད་ལ་བཤད་པ་འདིར་བླ་མ་ལ་བསྒྲེ་བར་རུང་བས་མདོ་རྒྱུད་ནས་གསུངས་པའི་མཚན་ཉིད་ལས་ཕྱེད་དམ། བཞི་ཆའམ། ཐ་ནའང་བརྒྱད་ཆ་དང་ལྡན་པ་ནི་མེད་ཐབས་མ་མཆིས་ལ། དེ་ལྟ་བུ་ལས་མ་རྙེད་པས་སློབ་མ་བློ་གྲོས་ཆེན་པོ་སྡོམ་པ་གསུམ་དང་འགལ་བའི་བྱ་བའམ། ལམ་མ་ཡིན་པའི་གནས་ལ་འཁྲིད་ཅིང་སྦྱོར་བར་བྱེད་ན་ནི་རེ་ཞིག་ཐབས་ལ་མཁས་པས་ལམ་དེ་ལས་ནི་བཟློག་པར་རུང་སྟེ། དཀོན་མཆོག་སྤྲིན་ལས། དགེ་བའི་ཆོས་ལ་དེ་དང་མཐུན་པར་སྤྱད་ལ། མི་དགེ་བ་ལ་མི་མཐུན་པར་སྤྱོད་དོ། །ཞེས་དང་། འདུལ་བའི་མདོ་ལས། ཆོས་མ་ཡིན་པ་སྨྲ་ན་བཟློག་པར་བྱའོ། །ཞེས་དང་། བྲམ་ཟེར་སྐྱེས་པའི་རབས་ལས། དེའི་མཁན་པོས་སློབ་མ་རྣམས་ཀྱི་ངང་ཚུལ་བརྟག་པའི་ཕྱིར། བྲམ་ཟེ་རྒུད་ཚེ་བརྐུ་བ་ཆོས་སུ་བཤད། །འཇིག་རྟེན་ནའང་ནོར་མེད་རྒུད་པའི་མཆོག །དེ་བས་གཞན་ནོར་མ་མཐོང་བླང་བར་བགྱིས། །ཞེས་དངོས་སུ་བརྐུས་ན་ནི་གྲགས་པ་ཉམས་པར་འགྱུར་གྱིས། ལྐོག་ཏུ་བརྐུ་བ་ནི་བྲམ་ཟེའི་ཆོས་ལུགས་ཏེ་ཉེས་པ་མེད་དོ་ཞེས་སྨྲས་པས། བྲམ་ཟེའི་སློབ་མ་ཕལ་པ་རྣམས་ནི་མི་རིགས་པར་ཤེས་ཀྱང་སློབ་དཔོན་གྱི་ངག་བཟློག་པར་མི་བྱེད་ལ། བྱང་ཆུབ་སེམས་དཔའ་ནི་དེ་ལ་རྗེས་སུ་ཡི་རང་བ་མེད་པས། འདི་སྐད་དུ། ཁྱོད་ནི་དེ་ལྟར་ནོར་གྱི་ཕྱིར་ཞུགས་པར། །བདག་ནི་ཡིད་ལ་ངེས་པར་མི་འཛིན་ཏེ། །སྐྱོན་དང་ཡོན་ཏན་བྱེ་བྲག་ཤེས་གྱུར་པ། །སུ་ཞིག་ནོར་ཕྱིར་ཡོན་ཏན་ཆུད་གསོན་བྱེད། །ལྷ་དབང་ཕྱིར་ཡང་ངོ་ཚ་བོར་ནས་ནི། །ཡིད་ལ་ཆོས་དང་འགལ་བར་བྱེད་པ་བས། །གྱོ་མོའི་སྣོད་ཐོགས་གོས་ངན་གྱོན་ནས་ནི། །དགྲ་ཡི་ཁྱིམ་དུ་འབྱོར་པ་མཐོང་ཡང་སླ། །ཞེས་སྨྲས་པས་མཁན་པོས་རྗེས་སུ་ཡི་རང་བ་བྱིན་པ་བཞིན་ནོ། །དེ་སྐད་དུ། བརྒྱ་བྱིན་དུ་སྐྱེས་པའི་རབས་ལས་ཀྱང་། དེ་ལྟ་བས་ན། ཆོས་སྤྱོད་པ་རྣམས་ནི་ཆོས་ཉིད་བསྲུང་བར་བྱེད་དོ། །ཞེས་པ་ལ་སོགས་རྒྱ་ཆེར་གླིང་དུ་ཡོད་དོ། །འོན་ཀྱང་དེ་དག་རྒྱུ་མཚན་དུ་བྱས་ནས་ཕལ་པ་བླ་མར་བཟུང་བ་དག་ལའང་བརྙས་ཤིང་བསྐུར་བ་ནི་ནམ་ཡང་རིགས་པ་མ་ཡིན་ཏེ། ཆོས་དང་དམ་ཚིག་གི་འབྲེལ་ཕན་ཆད་བཟང་ངན་གང་ཡིན་ཡང་བདག་ཉིད་ལ་ཉམས་པ་ཆེན་པོ་འཐོབ་པས་བསྟེན་པ་ལ་མཁས་དགོས་ཏེ། དགོངས་འདུས་ལས། དམ་པར་བཟུང་བར་གྱུར་ཕན་ཆད། །དམ་པར་ངེས་དང་མ་ངེས་ཀྱང་། །བཀའ་བཅག་ལུགས་བོར་ག་ལ་སྲིད། །གལ་ཏེ་དེ་ཡི་རྒྱ་ཉམས་ན། །རྡོ་རྗེའི་དམྱལ་བར་རབ་ཏུ་འཚོད། །ཅེས་དང་། མཛོད་ལས། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པར་གསུངས། །ཞེས་པ་ལྟར་སྐྱེས་རབས་ལས། རྒྱལ་པོ་ཚངས་བྱིན་ལ་གནོད་སྦྱིན་མི་གདུག་པའི་གཟུགས་ཅན་གྱིས་སྡིག་པ་ལས་ལྡོག་པའི་ཚིགས་སུ་བཅད་པ་གཅིག་བཤད་པའི་ཡོན་དུ་བདག་གི་ལུས་གངྒཱའི་ཀླུང་གི་བྱེ་མ་སྙེད་གཏོང་བར་དམ་བཅས་ཤིང་། བུ་དང་ཆུང་མ་ཡང་ཐེ་ཚོམ་མེད་པར་བཏང་བ་བཞིན་ནོ། །དེའི་ཕྱིར་སྐྱོན་གྱི་ངོས་ནས་མ་བརྟགས་པར་ཆོས་ཀྱི་དྲིན་བསམ་ཞིང་ཚུལ་ཁྲིམས་སམ། མང་དུ་ཐོས་པའམ། སྙིང་རྗེ་ཆེ་བའམ། དད་པ་དང་། གཏོང་ཕོད་སོགས་ཆ་རེ་ལས་མི་ལྡན་ཀྱང་དེའི་ཡོན་ཏན་གྱི་ཕྱོགས་ནས་རྟོག་པ་འབའ་ཞིག་ལ་བློ་སྦྱང་དགོས་ཏེ་ལག་ན་རྡོ་རྗེ་མངོན་པར་དབང་བསྐུར་བའི་རྒྱུད་ལས། སློབ་དཔོན་གྱི་ནི་ཡོན་ཏན་བཟུང་། །སྐྱོན་ནི་ནམ་ཡང་བཟུང་མི་བྱ། །ཡོན་ཏན་བཟུང་ན་དངོས་གྲུབ་ཐོབ། །སྐྱོན་རྣམས་བཟུང་ན་དངོས་མི་འགྲུབ། །ཅེས་པ་སྟེ། འདི་ལྟར་བླ་མ་ཡོན་ཏན་དང་ལྡན་པ་ཡིན་ཡང་དེའི་སྐྱོན་གྱི་རྣམ་པ་ཅུང་ཟད་ཀྱི་ངོས་ནས་བརྟགས་ན་རང་ལ་དངོས་གྲུབ་ཀྱི་གེགས་ཆེན་པོར་འགྱུར་ཏེ། སློབ་དཔོན་སངས་རྒྱས་ཡེ་ཤེས་ཞབས་ཀྱིས་འཇམ་དཔལ་བཤེས་གཉེན་ལ་གདམས་ངག་ཞུས་ཏེ། སླར་རང་གི་ཡུལ་དུ་འཁོར་མང་པོ་ལ་ཆོས་སྟོན་པ་ན། སློབ་དཔོན་རྣལ་འབྱོར་པའི་ཆ་བྱད་ཀྱིས་བྱོན་པ་ལ་ཕྱག་བྱེད་པ་ངོ་ཚ་་ནས་མ་མཐོང་བ་ལྟར་བྱས་སོ། །སླར་འཁོར་རྣམས་གྱེས་པ་དང་ཕྱག་བྱེད་དུ་ཕྱིན་པས། ད་ཅི་ཕྱག་མི་བྱེད་པ་ཅི་ཡིན་གསུངས། མ་མཐོང་ལགས་ཞེས་བརྫུན་སྨྲས་པས་མིག་གཉིས་ཀ་ས་ལ་བྲུལ་ལོ། །སླར་བཟོད་པར་གསོལ་བས་ཡེ་ཤེས་ཀྱི་སྤྱན་ཐོབ་བོ། །དེ་བཞིན་བླ་མའི་སྐྱོན་རྟོག་སྣ་རེ་ལ་མ་དད་པའམ། ཐེ་ཚོམ་ཟོས་པས་མཆོག་དང་ཐུན་མོང་གི་དངོས་གྲུབ་གཉིས་ཀ་ལ་སྒྲིབ་པའི་གཏན་ཚིགས་ནི་ཤིན་ཏུ་མང་ངོ་། །གལ་ཏེ་སྐྱོན་ཤས་ཆེ་བ་དག་ལའང་སྐྱོན་གྱི་ངོས་ནས་རྟོག་པའི་རྒྱུན་བཅད་ལ་ཡོན་ཏན་གྱི་ཕྱོགས་ཉག་གཅིག་ལ་བརྟག་ཅིང་། གལ་ཏེ་དེས་བློ་འཕྲོག་པར་མི་བྱེད་ན་གང་ཟག་དམ་པ་འདིས་ཀྱང་སྔོན་སྐྱེ་བ་གོང་མ་ནས་གོང་མར་དམ་པའི་སྤྱོད་པ་སྤྱད་ཅིང་ཡོན་ཏན་དང་ལྡན་པས་ད་ལྟར་བདག་ཅག་ལ་སོགས་པའི་དགེ་བའི་བཤེས་གཉེན་དུ་འབྲེལ་པ་སྟེ། བདག་ཅག་གི་སྟོན་པས་ཀྱང་སྐུ་ཚེ་སྔ་མར་ལྷས་བྱིན་ལ་བསྟེན་ནས་ཕ་རོལ་ཏུ་ཕྱིན་པ་དྲུག་རྫོགས་པར་མཛད་པ་བཞིན་ནོ་སྙམ་དུ་བརྟག་སྟེ། དམ་པའི་ཆོས་པདྨ་དཀར་པོ་ལས། བཅོམ་ལྡན་འདས་རྒྱལ་པོར་གྱུར་ནས་རྫོགས་པའི་བྱང་ཆུབ་ཏུ་སྨོན་ལམ་བཏབ་པ་ལས་སེམས་ལྡོག་པར་མ་གྱུར་ཏེ། ཕ་རོལ་ཏུ་ཕྱིན་པ་དྲུག་རྫོགས་པའི་སླད་དུ་རྒྱལ་སྲིད་ལོངས་སྤྱོད་མགོ་དང་ཡན་ལག་ཀྱང་བཏང་། ཆོས་འཚོལ་བ་ལ་ཞུགས་པ་ན། དྲིལ་བུ་བརྡུངས་ཏེ། ང་ལ་སུས་ཆོས་སྟོན་པ་དེའི་བྲན་བྱེད་པར་ཁས་བླངས་པས། ལྷས་བྱིན་དྲང་སྲོང་དུ་གྱུར་པས་དམ་པའི་ཆོས་པདྨ་དཀར་པོ་བསྟན་ཏེ། དེ་ལ་དགའ་མགུ་ཡི་རང་བ་སྐྱེས་ནས་དྲང་སྲོང་གི་བྲན་རྩ་དང་། ཤིང་ཆུ་རྩ་བ་རྡོག་གུ་འབྲས་བུ་ལ་སོགས་ལེན་པ་ནས། སྒོ་བསྲུང་བའི་བར་ཡན་ཆད་བྱས་སོ། །མཚན་མོ་མལ་ཁྲིའི་རྐང་པའང་བཟུང་ངོ་། །དེ་ལྟར་བྱས་ཀྱང་ལུས་དང་སེམས་ངལ་བ་མེད་པར་ལོ་སྟོང་ཚང་བར་འདས་སོ། །བཅོམ་ལྡན་འདས་ཀྱིས་དགེ་སློང་ལྷས་བྱིན་ཡང་ངའི་དགེ་བའི་བཤེས་གཉེན་ཡིན་ནོ། །ལྷས་བྱིན་ལ་བསྟེན་ནས་ངས་ཕ་རོལ་ཏུ་ཕྱིན་པ་དྲུག་རྫོགས་པར་བྱས་སོ། །ཞེས་པ་ནས་བྱང་ཆུབ་ཕྱོགས་ཀྱི་ཆོས་མཐའ་དག་ལྷས་བྱིན་ལ་བསྟེན་ནས་རྫོགས་པའི་ཚུལ་རྒྱས་པར་གསུངས་ནས། དགེ་སློང་དག་ཁྱོད་མོས་པར་བྱའོ། །ཁོང་དུ་ཆུད་པར་བྱའོ། །ཞེས་དང་། འཇིག་རྟེན་གྱི་ཁམས་ལྷའི་ཐེམ་སྐས་བྱ་བར་དེ་བཞིན་གཤེགས་པ་ལྷའི་རྒྱལ་པོ་ཞེས་བྱ་བར་སངས་རྒྱ་བར་ལུང་བསྟན་པ་བཞིན་ནོ། །དེ་བས་ན་ཐོག་མ་ནས་བརྟགས་པའི་དབང་རང་ལ་ཡོད་ལ། ཚིགས་སུ་བཅད་པ་གཅིག་ཡན་ཆད་ཀྱི་འགྲེལ་པ་ནས་དེའི་སྐྱོན་རྟོག་པའི་གནས་མེད་དེ། དཀོན་མཆོག་སྤྲིན་ལས། བླ་མ་བསྟེན་ན་དགེ་བ་འཕེལ་ཞིང་མི་དགེ་བ་འགྲིབ་པར་རྟོགས་པས་མཁན་པོ་ཐོས་པ་ཆེ་བའམ། ཆུང་བའམ། ཤེས་པའམ། མི་ཤེས་པའམ། ཚུལ་ཁྲིམས་དང་ལྡན་པའམ། ཚུལ་ཁྲིམས་འཆལ་པ་ལའང་སྟོན་པའི་འདུ་ཤེས་བསྐྱེད་དོ། །ཇི་ལྟར་སྟོན་པ་ལ་དགའ་བ་དང་། དད་པ་ལྟར་མཁན་པོ་ལ་ཡང་དད་པ་དང་དགའ་བར་བྱེད་དོ། །སློབ་དཔོན་རྣམས་ལ་ཞེ་ས་དང་རིམ་གྲོ་བསྐྱེད་དེ། དེ་ལ་བརྟེན་ནས་བྱང་ཆུབ་ཀྱི་ཚོགས་མ་རྫོགས་པ་ནི་རྫོགས་པར་འགྱུར། ཉོན་མོངས་པ་མ་སྤངས་པ་ནི་སྤང་བར་འགྱུར་སྙམ་སྟེ་དགའ་བ་དང་རངས་པ་འཐོབ་ཅིང་། དགེ་བའི་ཆོས་ལ་དེ་དང་མཐུན་པར་སྤྱོད་ལ། མི་དགེ་བ་ལ་མི་མཐུན་པར་སྤྱོད་དོ། །ཞེས་པའི་དོན་ཕྱི་མ་ནི་སྔར་བཤད་ཟིན་ལ། གཞན་ཡང་དྲག་ཤུལ་ཅན་གྱིས་ཞུས་པའི་མདོར། ཁྱིམ་བདག་གལ་ཏེ་བྱང་ཆུབ་སེམས་དཔའ་ལུང་ནོད་པ་དང་། ཁ་ཏོན་དུ་བྱ་བ་དོན་དུ་གཉེར་བས་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་ལྡན་པའམ། བྱང་ཆུབ་སེམས་དཔའི་ལམ་གྱི་ཚོགས་གསོག་པ་དང་ལྡན་པའི་ཚིག་བཞི་བའི་ཚིགས་སུ་བཅད་པ་སུ་ལས་མཉན་ཏམ། ལུང་མ་ནོས་སམ། བླངས་པའི་སློབ་དཔོན་དེ་ལ་ཆོས་ཀྱི་གུས་པར་བྱའོ། །མིང་དང་ཚིག་དང་ཡི་གེ་ཇི་སྙེད་ཀྱི་ཚིགས་སུ་བཅད་པ་དེ་བསྟན་པ་དེ་སྙེད་ཀྱི་བསྐལ་པར་གལ་ཏེ་སློབ་དཔོན་དེ་གཡོ་མེད་པར་རྙེད་པ་དང་། བཀུར་སྟི་དང་། མཆོད་པ་ཐམས་ཅད་ཀྱིས་རིམ་གྲོ་དང་བསྙེན་བཀུར་བྱས་ཀྱང་། ཁྱིམ་བདག་ད་དུང་དུ་སློབ་དཔོན་ལ་སློབ་དཔོན་དུ་གུས་པར་བྱ་བ་ཡོངས་སུ་རྫོགས་པ་མ་ཡིན་ན་ཆོས་མ་ཡིན་པའི་གུས་པས་ལྟ་ཅི་སྨོས། ཞེས་སོ། །མདོར་ན་སློབ་མའི་སྐྱོན་སྣ་གཅིག་འགྲིབ་པ་དང་། ཡོན་ཏན་སྣ་གཅིག་སྐྱེ་བ་ཡན་ཆད་བླ་མ་བསྟེན་པ་ལ་རག་ལས་པས། དང་པོར་བླ་མ་འཚོལ་ཞིང་བརྟག་པ་ལ་མཁས་པ་དང་། བར་དུ་རྙེད་པ་ཙམ་གྱིས་མི་ཆོག་པར་བསྟེན་པའི་ཚུལ་ལུགས་ལ་མཁས་པ་དང་། ཐ་མར་རང་བཞིན་དུ་ཅི་མི་སྙམ་པར་འགྲོགས་པས་མི་ཆོག་པར་སྐྱེས་བུ་དམ་པའི་མཛད་སྤྱོད་དང་། རྣམ་པར་ཐར་པའི་རྗེས་སུ་སློབ་པ་ནི། ཟ་མ་ཏོག་བཀོད་པ་ལས། བཅོམ་ལྡན་འདས་ཀྱིས་ཚོགས་གྲངས་མེད་གསུམ་གྱི་སྐབས་ན་དགེ་བའི་བཤེས་གཉེན་བཙལ་བའི་ཆེད་དུ། འཇིག་རྟེན་གྱི་ཁམས་ཐམས་ཅད་ཉུལ་བས་རྐང་པ་དཔྱི་ལ་ཐུག་པར་ཟད་པར་གསུངས་པ་དང་། མཛངས་བླུན་ལས། ཆོས་ཀྱི་ཕྱིར་དུ་རྒྱལ་པོས་རང་གི་ལུས་ལ་མར་མེའི་སྡོང་བུ་སྟོང་བཙུགས་པ་དང་། སྡོང་པོ་བཀོད་པ་ལས་ནོར་བཟང་གི་རྣམ་པར་ཐར་པ་དང་། འཕགས་པ་བརྒྱད་སྟོང་པ་ལས་རྟག་ཏུ་ངུའི་རྣམ་པར་ཐར་པ་དང་། བཙན་པོ་ཁྲི་སྲོང་ལྡེ་བཙན་གྱིས་དགེ་བའི་བཤེས་གཉེན་དང་། བསྟན་པའི་སླད་དུ་འབངས་ལ་སྟངས་བསྐུར་བ་ལྟར་དཀའ་བ་མཐའ་དག་བཟོད་པར་བྱ་སྟེ། ཆོས་བཞི་པའི་མདོ་ལས། དགེ་སློང་དག་བྱང་ཆུབ་སེམས་དཔའ་དགེ་བའི་བཤེས་གཉེན་སྲོག་གི་ཕྱིར་ཡང་ཡོངས་སུ་མི་བཏང་ངོ་། །ཞེས་གསུངས་སོ། །དེ་ལྟར་དགེ་བའི་བཤེས་གཉེན་སྲོག་ལས་གཅེས་པར་བཟུང་ནས་དགོངས་སྤྱོད་ལ་བསླབ་པ་ནི། འདི་ལྟར་བླ་མ་ནི་ཟབ་མོའི་མདོ་སྡེ་དང་། རྒྱུད་སྡེ་ཐམས་ཅད་ནས་སངས་རྒྱས་ཀྱི་སྤྲུལ་པར་གསུངས་ན། དེའི་སྐུ་གསུང་ཐུགས་ཀྱི་རྣམ་པར་ཐར་པ་ལ་བསླབས་པས་སངས་རྒྱས་ཀྱི་རྣམ་པར་ཐར་པ་ལ་བསླབས་པར་འགྱུར་བའི་ཕྱིར། བདག་གིས་ཀྱང་དེ་ཁོ་ན་ཉིད་འདྲ་བ་ཞིག་བྱའོ་སྙམ་པས་ཐོས་པ་དང་། བསམ་པ་དང་། བསྒོམ་པའི་བྱ་བས་དུས་འདའ་བར་བྱེད་དེ། བྱང་ཆུབ་སེམས་དཔའི་སྡེ་སྣོད་ལས། བླ་མས་གདམས་པ་ཉམས་སུ་ལེན་པ་ལ་ཞུགས་པ་དེའི་ལྷག་པའི་བསམ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྗོད་དུ་མེད་པ་བཅུ་ཡོངས་སུ་སྦྱོང་། དབང་པོ་དེ་སྙེད་ཅིག་འཕེལ། བྱིན་རླབས་དེ་སྙེད་ཅིག་འབྱུང་། སྒྲིབ་པ་དེ་སྙེད་ཅིག་དག །བདུད་དེ་སྙེད་ཅིག་ལས་འདའ། ཆོས་ཀྱི་སྒོ་དེ་སྙེད་ཅིག་ལ་འཇུག །ཚོགས་དེ་སྙེད་ཅིག་རྫོགས། སྤྱོད་པ་དེ་སྙེད་ཅིག་རྣམ་པར་དག །སྨོན་ལམ་དེ་སྙེད་ཅིག་འགྲུབ། ཡོན་ཏན་དེ་སྙེད་ཅིག་ཐོབ། མདོར་ན་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པ་ནི། བླ་མ་ལ་རག་ལས་ཤིང་བླ་མ་ལས་འབྱུང་བའོ། །ཞེས་སོ། །ཞར་ལ་སྡིག་པའི་གྲོགས་པོ་སྤང་བ་གལ་ཆེ་བའང་། གང་ཚེ་ཞི་ལ་སྡང་བའི་འབྱུང་པོ་ཡི། །བསམ་པ་སྐྱེས་བུའི་གཟུགས་སུ་འོང་བ་དང་། །གཡོ་དང་སྒྱུས་སྤྱོད་ནག་པོའི་ཆོས་ལ་བསྟེན། །དམ་པ་དམོད་སོགས་དཀར་པོའི་ཆོས་ལ་སྡང་། །ཇི་ཙམ་འགྲོགས་བཞིན་སྡིག་སྤྱོད་འཐོར་རླུང་འཚུབ། །དགེ་བའི་ལོ་ཏོག་འཇམ་པའི་སྡིག་གྲོགས་ལ། །བསྟན་པའི་བློ་གྲོས་བླུན་པོ་བདུད་སྡེས་བཅོམ། །འདི་ལྟར་སྡིག་པའི་གྲོགས་པོ་ནི་སྐྱེས་བུའི་གཟུགས་སུ་འདུག་ཀྱང་དེའི་བསམ་པ་ནི་ལྷ་མ་ཡིན་གྱི་འཇུག་པ་ཅན་ཉིད་ཀྱི་ཕྱིར་དངོས་སམ་བརྒྱུད་ནས་སྦྱོར་བ་ཉེ་བར་མ་ཞི་བ་ཁོ་ན་ལ་བརྟེན་པ་དག་དང་། གཡོ་སྒྱུའི་ཕྱོགས་འཛིན་པའི་ཁ་ན་མ་ཐོ་བས་སེམས་ཟིལ་གྱིས་ནོན་པ་རྣམས་ནི་དཀར་ནག་གི་བླང་དོར་ཤིན་ཏུ་འགལ་བར་སྤྱོད་པས་དེ་དང་འགྲོགས་པ་ཙམ་གྱིས་སྡིག་པ་འཕེལ་ཞིང་དགེ་བ་འགྲིབ་པས་སྤང་བར་བྱ་བའི་ཚུལ་དྲན་པ་ཉེར་བཞག་ལས། འདོད་ཆགས་དང་། ཞེ་སྡང་དང་། གཏི་མུག་ཐམས་ཅད་ཀྱི་རྒྱུར་གྱུར་པ་ནི་སྡིག་པའི་གྲོགས་པོ་སྟེ། དེ་ནི་དུག་གི་སྡོང་པོ་ལྟ་བུའོ། །ཞེས་དང་། དཀོན་མཆོག་བརྩེགས་པ་ལས། སྡིག་པའི་གྲོགས་པོ་གང་ཞེ་ན། དགེ་བ་འགྲིབ་ཅིང་མི་དགེ་བ་ལ་སྦྱོར་བ་གང་ཡིན་པ་སྟེ། དེ་བསྟེན་པར་མི་བྱ། བསྙེན་པར་མི་བྱ། མཐོང་བར་ཡང་མི་བྱའོ། །ཞེས་དང་། དེའི་ཉེས་པ་ནི་མྱང་འདས་ལས། བྱང་ཆུབ་སེམས་དཔའ་ནི་གྲོགས་ངན་པ་ལ་འཇིགས་པ་ལྟར་གླང་པོ་ཆེ་མྱོས་པ་ལ་སོགས་པ་ལ་ནི་མ་ཡིན་ཏེ། འདིས་ནི་ལུས་ཙམ་འཇིག་པར་བྱེད་ཀྱིས་སྔ་མ་ནི་དགེ་བ་དང་སེམས་རྣམ་པར་དག་པ་གཉིས་ཀ་འཇིག་པར་བྱེད་དོ། །ཅེས་དང་། བདེན་པ་པོའི་ལེའུར་ཡང་དེ་བཞིན་དུ་བཤད་ཅིང་། མཛའ་བཤེས་ཀྱི་ཚོམས་ལས་གསལ་བར་བསྙད་པ་ནི། དད་པ་མེད་ཅིང་འཇུངས་པ་དང་། །བརྫུན་དུ་སྨྲ་དང་ཕྲ་མ་ཅན། །མཁས་པས་བཤེས་པར་མི་བྱ་ཞིང་། །སྡིག་ཅན་མི་དང་འགྲོགས་མི་བྱ། །གལ་ཏེ་སྡིག་པ་བྱེད་པ་དག །སྡིག་མི་བྱེད་པས་བསྟན་ན་ཡང་། །སྡིག་པ་བྱེད་པར་དོགས་སྐྱེ་ཞིང་། །མི་སྙན་པའང་འཕེལ་བར་འགྱུར། །བསྟན་བྱ་མ་ཡིན་བསྟེན་པའི་མི། །དེ་ཡིས་སྐྱོན་གྱིས་སྐྱོན་ཅན་འགྱུར། །དོང་པར་དུག་ཡོད་མདའ་བཅུག་པས། །དུག་མ་བསྐུས་པའང་གོས་པ་བཞིན། །ཞེས་སོ། །དེ་བས་སྡིག་གྲོགས་སྤངས་པའི་ཡོན་ཏན་ནི་ཚད་མེད་དེ། ཁྲི་བརྒྱད་སྟོང་པ་ལས། རབ་འབྱོར་དེ་ལ་སྡིག་པའི་གྲོགས་པོ་སྤངས་པའི་ཡོན་ཏན་ནི་བསམ་གྱིས་མི་ཁྱབ་བོ། །རྟག་ཏུ་དགེ་བ་བྱེད་པ་ཡིན། དེ་བཞིན་གཤེགས་པ་རྣམས་མཐོང་བ་ཡིན། བདེ་བར་ཚེའི་དུས་བྱེད་པ་ཡིན། བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བ་ཡིན། སྐྱེ་བ་ཐམས་ཅད་དུ་བྱང་ཆུབ་ཀྱི་སེམས་ཡིད་ལ་བྱེད་པ་དང་མི་འབྲལ་བ་ཡིན། ཞེས་སོགས་རྒྱ་ཆེར་གསུངས་སོ། །དེ་ཕྱིར་དགེ་བའི་བཤེས་དང་གྲོགས་བསྟེན་པས། །དགེ་ལེགས་ཡོན་ཏན་མཐོང་བའི་ཆོས་ལ་ཟིན། །རྒྱལ་དང་རྒྱལ་སྲས་རྣམས་ཀྱི་རྟག་ཏུ་དགོངས། །མངོན་མཐོ་ངེས་ལེགས་ཡོན་ཏན་ཀུན་གྱིས་འབྱོར། །ཚོགས་རྫོགས་སྒྲིབ་དག་དངོས་གྲུབ་རྣམ་གཉིས་ཐོབ། །ས་ལམ་ཡོན་ཏན་བླ་ནས་བླར་འགྲོ་བས། །རྣལ་འབྱོར་བསྒོམ་ཞིང་བསྒྲུབ་པ་བསོད་ནམས་ཚོགས། །ཐུགས་རྒྱུད་གཅིག་ཏུ་བསྲེ་བ་ཡེ་ཤེས་ཏེ། །ཚོགས་གཉིས་འབྲས་བུའི་ཐུས་ཀ་ཡིན་པའི་ཕྱིར། །བསྐལ་པར་རྒྱལ་དང་རྒྱལ་སྲས་བསྙེན་བཀུར་ཞིང་། །བསྐྱེད་རིམ་བརྒྱ་ཕྲག་བསྒོམ་ལས་བླ་མ་ནི། །སྐད་ཅིག་དྲན་པ་མཆོག་ཅེས་རྒྱལ་བས་གསུངས། །དེ་ལྟར་དགེ་བའི་བཤེས་གཉེན་དང་། དེའི་ཡན་ལག་ལྟ་བུར་གྱུར་པའི་དགེ་བའི་གྲོགས་པོ་དང་འགྲོགས་པའང་དོན་ཆེན་པོ་དང་བཅས་པ་ཡིན་ཏེ། དཔུང་བཟང་གིས་ཞུས་པ་ལས། ཇི་ལྟར་འཁོར་ལོ་གཅིག་པའི་ཤིང་རྟ་ནི། །རྟ་དང་ལྡན་ཡང་ལམ་དུ་མི་འགྲོ་ལྟར། །དེ་བཞིན་སྒྲུབ་པ་པོ་ཡི་གྲོགས་མེད་ན། །ལུས་ཅན་དངོས་གྲུབ་ཐོབ་པར་མི་འགྱུར་རོ། །ཞེས་དང་། དེའི་མཚན་ཉིད་ཀྱང་། དེ་ནི་བློ་ལྡན་གཟུགས་བཟང་གཙང་སྒྲ་ཆེ། །རིགས་ནི་བཙུན་ཞིང་ཆོས་ལ་གཞོལ་བ་དང་། །སྤོབས་པ་ཆེ་ཞིང་དཔའ་ལ་དབང་པོ་དུལ། །སྙན་པར་སྨྲ་ཞིང་སྦྱིན་ཕོད་སྙིང་རྗེ་ཅན། །བཀྲེས་དང་སྐོམ་དང་ཉོན་མོངས་བཟོད་པ་དང་། །བྲམ་ཟེ་དང་ནི་ལྷ་གཞན་མཆོད་མི་བྱེད། །སྒྲིན་ཅིང་གཟོ་ལ་བྱས་པ་གཟོ་བ་དང་། །དཀོན་མཆོག་གསུམ་ལ་དད་པ་གྲོགས་པོ་ཡིན། །ཞེས་གསུངས་པ་ལས། གཟུགས་བཟང་བ་ནི་ནད་གཅོང་མེད་པ་ཉིད་དེ། ཡོན་ཏན་དེ་དག་རྫོགས་པར་མ་ཚང་ན་ཕྱེད་ཆའམ། བཞི་ཆའམ། ཐ་ན་བརྒྱད་ཆ་དང་ལྡན་པ་ནི་ངེས་པར་དགོས་ལ། དེ་ལྟ་བུ་དང་འགྲོགས་པའི་ཡོན་ཏན་ནི་ཚད་མེད་དེ་ཁོང་གི་སྤྱོད་པ་ལ་བརྟེན་ནས་བདག་ལའང་དགེ་བའི་ཆོས་མཐའ་དག་པ་འཕེལ། ལོག་པའི་ལམ་ལས་ལྡོག །བླང་དོར་གྱི་གནས་བཤད་པས་བླ་མ་བསྟེན་པའི་གྲོགས་སུ་འགྲོ། གསུང་བགྲོས་མ་ཟིན་པ་རྣམས་ཀྱང་དེ་ལས་འབྱུང་། ཁྱད་པར་དུ་ཚངས་པར་མཚུངས་པ་སྤྱོད་པ་ནི་གྲོགས་ལ་རག་ལས་པ་སྔར་ཡང་བཤད་ལ། དེ་སྐད་དུ། འདུལ་བ་ལུང་ལས། ཚངས་པ་མཚུངས་པར་སྤྱོད་པ་ནི་གྲོགས་དམ་པ་སྟེ། ཚངས་པར་སྤྱོད་པ་མཐར་ཕྱིན་ཞིང་དགེ་བའི་རྩ་བ་སྤེལ་བས། རྣམ་པར་གྲོལ་བའི་རྒྱུར་མཐུན་པའི་ཕྱིར་ཚེ་དང་ལྡན་པ་དག་གིས་གུས་པ་དང་བཅས། ཞེ་ས་དང་བཅས། འཇིགས་པ་དང་བཅས་བསྟེན་དགོས་སོ། །ཞེས་དང་། དེ་བཞིན་དུ་དྲན་པ་དང་ཤེས་བཞིན་ནི་མདོ་སྔགས་གཉིས་ཀའི་ལམ་གྱི་དོན་པོར་གནས་པའང་དགེ་བའི་གྲོགས་པོ་ལ་འཚེར་བག་དང་བཅས་པས་ཡོངས་སུ་རྫོགས་པའི་ཚུལ། མདོ་ལས། དགེ་བའི་གྲོགས་ལ་བསྟེན་པས་ནི་དྲན་པ་དང་ཤེས་བཞིན་རྣམ་པར་དག་ཅིང་། དགེ་བའི་རྩ་བ་ཡོངས་སུ་རྫོགས་པར་བྱེད་དོ། །ཞེས་སོ། །དེའང་སྤྱིར་ཡུལ་མཆོག་བླ་མ་དང་། མཁན་པོ་དང་། སློབ་དཔོན་དང་། དེ་བཞིན་དུ་ཆོས་སྨྲ་བ་དང་། སྲིད་པ་ཐ་མའི་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་འཕགས་པ་དང་། ཕ་མ་དང་། ནད་པ་ལ་སོགས་པ་འདི་དག་ནི་བསོད་ནམས་དང་། བསོད་ནམས་མ་ཡིན་པ་གཉིས་ཀ་སྟོབས་ཆེ་བས་འབྲས་བུའང་སྐྱེ་བ་མི་བརྒྱུད་པར་མཐོང་ཆོས་སུ་སྨིན་པར་མདོ་སྡེ་དག་ལས་གསུངས་ལ། ཁྱད་པར་དེང་སང་དུས་སྙིགས་ཤིང་རྟོག་པ་རགས་པས་སྔོན་བསྐལ་པ་ཡར་ལྡན་གྱི་དུས་རྣམ་རྟོག་ཤས་ཆུང་བས་དགེ་སྡིག་གི་འབྲས་བུ་ཚེ་རབས་གཞན་ལ་དལ་གྱི་སྨིན་པ་དང་མི་འདྲ་བར་ཚེ་འདི་ཀར་སྨིན་པ་ཤས་ཆེ་བས་བླ་མ་བསྟེན་ཞིང་། བསྙེན་བཀུར་བྱས་པའི་ཕན་ཡོན་གྱི་སྒོ་ནས་བྲོད་པ་བསྐྱེད་པའང་འདི་ལྟར་འཇིག་རྟེན་ན་རྨོངས་པ་བ་གླང་རྫི་ལྟ་བུ་ཅི་ཡང་མི་ཤེས་པ། ཟང་ཟིང་གིས་ཕོངས་པ། ཀུན་གྱིས་བརྙས་པའི་གནས་སུ་གྱུར་པས་ཀྱང་། དགེ་བའི་བཤེས་གཉེན་ལ་བསྟེན་ཅིང་ཆོས་ཀྱི་ལམ་སྲོལ་ལ་ཞུགས་པ་ཙམ་ནས། འཇིག་རྟེན་གྱིས་བཀུར་བའི་གནས་ཞེ་སར་བཅས་པ། ཐ་ན་ཟས་སྐོམ་གྱི་རྙེད་པ་ཙམ་ཡང་ཐོབ་སླ་བར་འགྱུར་བ་ལ་ལྟོས། ཁྱད་པར་དུ་བྱང་ཆུབ་སེམས་དཔའི་སྡེ་སྣོད་ལས། བླ་མས་བསྒོ་བ་བཞིན་བསྒྲུབས་ན་མཐོན་པོར་བྱེད་པའི་ཆོས་བཞི་ཡང་ཐོབ་བོ། །མང་པོ་བཞི་ཡང་ཐོབ་བོ། །གཞན་གྱིས་མི་ཚུགས་པའི་ཆོས་བཞི་ཡང་ཐོབ་བོ། །བལྟར་མི་སྣང་བའི་ཆོས་བཞི་ཡང་ཐོབ་བོ། །ཚད་མེད་པའི་ཆོས་ལྔ་དག་ཀྱང་ཐོབ་པར་འགྱུར་རོ། །གཞན་ཡང་གངས་ཀྱི་རིས་བརྟེན་པའི་རྩི་སྨན་ལྟར་དགེ་བའི་རྩ་བ་ཐམས་ཅད་ཀྱང་རྣམ་པར་འཕེལ་ལོ། །མཚོ་ཆེན་པོ་ཆུའི་སྣོད་དུ་གྱུར་པ་ལྟར་ཡོན་ཏན་གྱི་ཆོས་ཐམས་ཅད་ཀྱི་སྣོད་དུ་འགྱུར་རོ། །རྒྱ་མཚོ་ཆེན་པོ་རིན་པོ་ཆེའི་འབྱུང་གནས་སུ་གྱུར་པ་ལྟར་ཡོན་ཏན་ཐམས་ཅད་ཀྱི་འབྱུང་གནས་སུ་འགྱུར་རོ། །མེའི་དྲོད་ཀྱིས་གསེར་ཡོངས་སུ་སྦྱངས་པ་ལྟར་བྱང་ཆུབ་ཀྱི་སེམས་ཡོངས་སུ་སྤྱོད་པར་འགྱུར་རོ། །རྒྱ་མཚོ་ལས་རི་རབ་མངོན་པར་འཕགས་པ་ལྟར། འཇིག་རྟེན་ཐམས་ཅད་ལས་འཕགས་པར་འགྱུར་རོ། །ཞེས་སོགས་རྒྱ་ཆེར་གསུངས་ཤིང་། དེ་སྐད་དུ། སྡོང་པོ་བཀོད་པ་ལས་ཀྱང་། རིགས་ཀྱི་བུ་དགེ་བའི་བཤེས་གཉེན་གྱིས་ཡང་དག་པར་ཟིན་པའི་བྱང་ཆུབ་སེམས་དཔའ་རྣམས་ནི་ངན་འགྲོར་མི་ལྟུང་ངོ་། །དགེ་བའི་བཤེས་གཉེན་གྱིས་བསམ་པའི་བྱང་ཆུབ་སེམས་དཔའ་རྣམས་ནི་བྱང་ཆུབ་སེམས་དཔའི་བསླབ་པ་དང་འགལ་བར་མི་བྱེད་དོ། །ཞེས་པ་ལ་སོགས་པ་དང་། ཡང་རིགས་ཀྱི་བུ། དགེ་བའི་བཤེས་གཉེན་གྱི་རྗེས་སུ་བསྟན་པ་བཞུགས་པའི་བྱང་ཆུབ་སེམས་དཔའ་ལ་སངས་རྒྱས་བཅོམ་ལྡན་འདས་རྣམས་ཐུགས་མཉེས་པར་འགྱུར་རོ། །དགེ་བའི་བཤེས་གཉེན་གྱི་ཚིག་དང་མི་འགལ་བར་གནས་པའི་བྱང་ཆུབ་སེམས་དཔའ་ལ་ཐམས་ཅད་མཁྱེན་པ་ཉེ་བར་འགྱུར་རོ། །དགེ་བའི་བཤེས་གཉེན་གྱི་ཚིག་ལ་ཐེ་ཚོམ་མེད་པ་ལ་དགེ་བའི་བཤེས་གཉེན་རྣམས་ཉེ་བར་འགྱུར་རོ། །དགེ་བའི་བཤེས་གཉེན་ཡིད་ལ་བྱེད་པ་དང་མ་བྲལ་བ་ལ་དོན་ཐམས་ཅད་མངོན་དུ་འགྱུར་རོ། །ཞེས་སོ། །འདི་ལྟར་དམ་པའི་སྐྱེས་བུ་ལ་བསྟེན་པས་ཚེ་ཕྱི་མ་ངན་འགྲོ་མྱོང་བའི་ལས་ཡོད་ཀྱང་། ད་རེས་ལུས་སེམས་ལ་གནོད་པ་ཕྲ་མོ་ཙམ་བྱུང་བ་འམ། ཐ་ན་རྨི་ལམ་ཙམ་དུ་མྱོང་བས་ཀྱང་ལས་དེ་ཟད་པར་འགྱུར་བ་དང་། བླ་མ་ལ་བསྙེན་བཀུར་སྔ་དྲོ་གཅིག་བྱས་པའི་ཕན་ཡོན་གྱིས་སངས་རྒྱས་བྱེ་བ་སྙེད་ལ་དགེ་བའི་རྩ་བ་བསྐྱེད་པའི་ཕན་ཡོན་ཟིལ་གྱིས་ནོན་པའང་། སའི་སྙིང་པོའི་མདོ་ལས། དེས་ཟིན་པ་ནི་བསྐལ་པ་བྱེ་བ་དཔག་ཏུ་མེད་པར་ངན་འགྲོར་འཁྱམ་པར་འགྱུར་བའི་ལས་རྣམས་ཚེ་འདིར་རིམས་ལ་སོགས་པའམ། མུ་གེ་ལ་སོགས་པ་ལུས་དང་སེམས་ལ་གནོད་པ་བྱུང་བས་བྱང་བར་འགྱུར་ཏེ། ཐ་ན་བརྒྱད་བཀག་གམ། རྨི་ལམ་ཙམ་གྱིས་ཀྱང་བྱང་བར་འགྱུར་རོ། །དེས་སངས་རྒྱས་བྱེ་བ་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པ་སྦྱིན་པའམ། མཆོད་པའམ། བསླབ་པ་བཟུང་བ་ལས་བྱུང་བ་རྣམས་སྔ་དྲོ་གཅིག་གིས་ཟིལ་གྱིས་གནོན་ནོ། །བླ་མ་ལ་བསྙེན་བཀུར་བྱས་པ་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །ཞེས་དང་། ཚེ་འདིར་མངོན་པར་མཐོ་བ་དང་། ཕྱི་མ་ངེས་པར་ལེགས་པའི་ཡོན་ཏན་ཐམས་ཅད་ཀྱིས་འབྱོར་པར་འགྱུར་བའང་། ཡེ་ཤེས་རྒྱ་མཚོའི་རྒྱུད་ལས། གང་གིས་བླ་མའི་བྱ་བ་ལ། །མཁས་པའི་སྐལ་ལྡན་གང་ཡིན་དེ། །དུས་གསུམ་སངས་རྒྱས་ཐམས་ཅད་ལ། །བསྐལ་པ་བྱེ་བ་དྲུག་འབུམ་དུ། །ཕྱག་བྱས་པས་ནི་འདི་དོན་ཆེ། །བླ་མས་བསྒོ་བ་བཞིན་བསྒྲུབས་ན། །འདོད་པ་ཐམས་ཅད་འགྲུབ་པ་དང་། །བསོད་ནམས་དཔག་ཏུ་མེད་པ་འཐོབ། །རང་གི་རྫས་དང་ཡོ་བྱད་ཀྱིས། །བླ་མ་མཉེས་པར་སུས་བྱས་པ། །འདིས་ནི་ཁམས་གསུམ་འཁོར་བ་ལས། །སྤྲུལ་སྐུའི་ཞིང་དུ་དབུགས་དབྱུང་སྟེ། །མྱ་ངན་འདས་པའི་སར་གཤེགས་སོ། །ཞེས་སོ། །དེའི་ཕྱིར་ཞབས་ཏོག་དང་སྲི་ཞུའི་གནས་ཅི་མཆིས་པ་ལུས་ངག་གི་ལས་སུ་བསྡུ་ཞིང་། ཡིད་ཀྱི་སྒོ་ནས་བླ་མའི་རྣལ་འབྱོར་བསྒོམ་ཞིང་བསྒྲུབ་པ་ནི་བསོད་ནམས་དམ་པའི་ཚོགས་མཐར་ཐུག་པ་དང་། ཐུགས་ཡིད་འདྲེས་པའི་ཆོས་ཉིད་ལ་མཉམ་པར་འཇོག་པ་ནི་ཡེ་ཤེས་ཀྱི་ཚོགས་ཏེ། ཚོགས་གཉིས་ཀྱི་འབྲས་བུའི་ཐུས་ཀའམ་ངོ་བོ་ཉིད་ཡིན་པའི་ཕྱིར། རྣམ་པ་ཐམས་ཅད་པའི་བསྐྱེད་རིམ་རྒྱ་མཚོ་ལ་གོམས་པར་བྱས་པ་ལས་ཀྱང་ལམ་མྱུར་བ་ཡིན་ཏེ། འཁོར་ལོ་ཆུབ་པར། གང་གིས་བསྐལ་པ་བྱེ་བ་རུ། །ལྷ་ཡི་སྐུ་ནི་བསྒོམ་བྱས་པས། །མགོན་པོ་ཀུན་གྱི་དབང་ཕྱུག་ཆེ། །བླ་མ་དྲན་པ་མཆོག་ཏུ་བཤད། །ཅེས་དང་། ཡིད་བཞིན་མཆོག་གི་རྒྱུད་ལས། གང་གིས་བླ་མ་འདུན་པའི་ལྷ། །སྤྱི་བོའི་གཙུག་ཏུ་བསྒོམས་པ་ཡིས། །སངས་རྒྱས་དཀྱིལ་འཁོར་སྟོང་ཕྲག་ཉིད། །ལག་མཐིལ་བཞག་ནས་སྟོང་གསུམ་བསྐོར། །སྙིང་གར་ལན་སྟོང་བསྟིམ་བྱས་ན། །བརྒྱ་སྟོང་རྒྱུ་དང་ཆར་མི་ཕོད། །དེ་བས་རྟག་ཏུ་དྲན་པ་ཡིས། །སྤྱི་གཙུག་འཁོར་ལོའི་རྒྱན་ཉིད་དུ། །དཔལ་ལྡན་བླ་མ་བསམ་པར་བྱ། །ཞེས་དང་། འཁོར་ལོ་བཅུ་པ་ལས། བླ་མ་ལ་བསྙེན་བཀུར་བྱ་བ་ལས་ནི་ཡོན་ཏན་གྱི་ཆོས་བསམ་གྱིས་མི་ཁྱབ་པ་རྣམས་ཡོངས་སུ་འཛིན་ཏོ། །སངས་རྒྱས་ཀྱི་ཡོན་ཏན་དང་རྣམ་པར་འཕྲུལ་པ་ཐམས་ཅད་ཀྱང་འདི་ལས་འབྱུང་བར་བལྟའོ། །ཞེས་པ་སྟེ། མདོར་བསྡུ་ན་སྡོང་པོ་བཀོད་པ་ལས། དགེ་བའི་བཤེས་གཉེན་གྱི་ཡོན་ཏན་དང་བསྔགས་པ་བརྗོད་པ་ནི། རྒྱས་པར་བསྐལ་པར་བརྗོད་ཀྱང་ཟད་མི་ཤེས་པ་དང་ལྡན་པས་དེའི་ཕྱིར་རྟག་ཏུ་དགེ་བའི་བཤེས་གཉེན་ལ་བསྟེན་པར་བྱའོ། །ཞེས་གསུངས་སོ། །ཞར་ལ་མ་བསྟེན་པའི་ཉེས་དམིགས་བཤད་པ་ནི། འཁོར་བ་ལ་བདེ་བར་འཛིན་པས་སྡུག་བསྔལ་གྱི་འཕྲང་ནས་མི་ཐར། ལས་དང་ལས་ཀྱི་འབྲས་བུ་ལ་རྨོངས་པས་མི་དགེ་བའི་ཕྱོགས་འཛིན། མང་དུ་ཐོས་པ་དང་བྲལ་བས་ཡོན་ཏན་གྱི་ཚོགས་དང་མི་ཕྲད། བསྟན་པ་ཞུགས་ཀྱང་ཐར་པའི་ལམ་སྣ་མི་ཟིན། ལེགས་པའི་ཆོས་ལས་ཉམས་ཤིང་ལྟར་སྣང་འཁྲུལ་པས་བསླུ་བའི་ཉེས་པ་ཀུན་ནས་ལྡང་སྟེ། ད་ལྟར་གྱི་སངས་རྒྱས་མངོན་སུམ་པ་ལས། བླ་མ་ལ་མ་བསྟེན་ཞིང་མ་གུས་པ་རྣམས་ཀྱིས་ནི་ཡོན་ཏན་གྱི་ཆོས་ཐོབ་པའང་ཉམས་པར་འགྱུར་ན། མ་ཐོབ་པ་ཐོབ་པར་འགྱུར་བ་ལྟ་ཅི་སྨོས། དེ་ཅིའི་ཕྱིར་ཞེ་ན། ཆོས་འཛིན་པ་ནི་ཆོས་ལ་ཐ་མི་དད་པས་ན། དེས་དགེ་བའི་བཤེས་གཉེན་དང་། ཆོས་སྤང་བའི་སྡིག་པའི་ལས་ཤིན་ཏུ་ལྕི་བ་བསགས་པའི་ཕྱིར། ངན་སོང་གསུམ་དུ་ཡུན་རིང་མོར་ལན་མང་དུ་འཁོར་བས་སྡུག་བསྔལ་བར་འགྱུར་ཞིང་གལ་ཏེ་དེ་དག་ལས་ཐར་ནས་བརྒྱ་ལ་མིར་སྐྱེས་ནའང་། དཀོན་མཆོག་གསུམ་གྱི་སྒྲ་མི་གྲགས་པའི་ཞིང་དུ། དམུས་ལོང་དང་། འོན་པ་དང་། ལྐུགས་པ་དང་། དབང་པོ་མ་ཚང་བ་སྐྱེ་བར་འགྱུར་རོ། །ཞེས་སོ། །ཁྱད་པར་དགེ་བའི་བཤེས་གཉེན་ལ་བརྙས་པའི་ཉེས་དམིགས་ནི། ལག་ན་རྡོ་རྗེ་མངོན་པར་དབང་བསྐུར་བའི་རྒྱུད་ལས། བཅོམ་ལྡན་འདས་གང་དག་སློབ་དཔོན་ལ་བརྙས་པར་བགྱིད་པ་དེ་དག་གི་རྣམ་པར་སྨིན་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ། ལྷ་དང་བཅས་པའི་འཇིག་རྟེན་སྦག་པར་འགྱུར་གྱིས་དེ་སྐད་མ་སྨྲ་ཞིག །འོན་ཀྱང་ཅུང་ཞིག་བརྗོད་པར་བྱ་ཡིས། དཔའ་བོ་བསྒྲིམས་ཏེ་ཉོན་ཅིག །མཚམས་མེད་ལ་སོགས་མི་བཟད་པ། །དམྱལ་བ་གང་དག་ངས་བཤད་པ། །དེ་རྣམས་ཀྱི་ནི་གནས་སུ་བརྗོད། །དེར་ནི་བསྐལ་པ་མཐའ་ཡས་སོ། །དེ་ལྟ་བས་ནི་རྣམ་ཀུན་ཏུ། །དེ་ལ་ནམ་ཡང་བརྙས་མི་བྱ། །ཞེས་དང་། བླ་མ་ལྔ་བཅུ་པར། སློབ་དཔོན་ལ་ནི་སྨོད་པ་དེ། །ཡམས་དང་མཛེ་དང་ནད་རྣམས་དང་། །གདོན་དང་རིམས་དང་དུག་རྣམས་ཀྱིས། །རྨོངས་ཆེན་དེ་ནི་འཆི་བར་འགྱུར། །རྒྱལ་པོ་མེ་དང་སྦྲུལ་གདུག་དང་། །ཆུ་དང་མཁའ་འགྲོ་རྐུན་པོ་དང་། །གདོན་དང་ལོག་འདྲེན་རྣམས་ཀྱིས་ཀྱང་། །བསད་ནས་སེམས་ཅན་དམྱལ་བར་འགྲོ། །ཞེས་བཤད་དོ། །ད་ནི་ལེགས་སྨོན་གྱི་དོན་བཤད་པའི་ཕྱིར། དམ་ཆོས་བདུད་རྩིའི་ཆུ་ཀླུང་དཔག་མེད་མཛོད། །རྒྱུད་ལ་འདྲོངས་པའི་དམིགས་པ་བཟང་པོ་རྣམས། །སྟོན་པའི་བླ་མ་བཟང་པོ་རྟེན་ཅིང་འབྲེལ། །ཐབས་བཟང་བ་ལས་མན་ངག་འཁྱམས་མི་འགྱུར། །ངེས་འབྱུང་བཟང་པོའི་རིག་སྔགས་ནུས་པ་ཅན། །འཁོར་བར་སྐྱོ་བ་མེད་པའི་གདོན་ལ་ཐེབས། །བཟང་པོ་བཞི་དང་ལྡན་པའི་ལེགས་སྨོན་ཡིན། །འདི་ནི་མདོ་སྡེ་རྒྱན་གྱི་དགོངས་པ་ཡིན་ཏེ། དེ་སྐད་དུ། དམིགས་པ་བཟང་དང་སྟོན་པ་བཟང་། །ཐབས་བཟང་བ་དང་ངེས་འབྱུང་བཟང་། །ངེས་ལེགས་སྨོན་གྱི་མཚན་ཉིད་ཡིན། །ཞེས་སྟོན་པ་ལས། དམིགས་པ་བཟང་པོ་ནི་ཆོས་གང་དང་གང་དག་དམིགས་པའི་བྱེད་ལས་ལ་བརྟེན་ནས་རྒྱུད་ལ་སྦྱོར་བར་བྱེད་ཅིང་དེའི་ངོ་བོ་ནི་འདུན་པའང་ཡིན་ལ། དམིགས་པའམ་འདུན་པ་སྣ་ཚོགས་པའི་ཐབས་ལ་བརྟེན་ནས་སེམས་འདུལ་བས་ན་བཅོམ་ལྡན་འདས་ཀྱིས་སེམས་དུལ་བས་ནི་བདེ་བ་འཐོབ། ཅེས་གསུངས་པ་ལྟར་རོ། །དེ་སྟོན་པ་ནི་བླ་མ་བཟང་པོ་དང་རྟེན་ཅིང་འབྲེལ་བ་ལ་རག་ལས་པའི་ཕྱིར་སློབ་དཔོན་དཔའ་བོས། ཁྱོད་ཀྱིས་དམ་པ་བསྟེན་པ་དང་། །དྲན་པའི་གྲོགས་ཀྱིས་བསྐོར་བ་ན། །བག་ཡོད་པར་ནི་གནས་འགྱུར་ཏེ། །སཱ་ལའི་ཤིང་ལ་འཁྲི་ཤིང་བཞིན། །བཟང་པོ་དཔལ་གྱིས་འཁྱུད་པར་འགྱུར། །ཞེས་གསུངས་པ་ལྟར་རོ། །མངོན་པར་འདོད་པའི་དོན་གང་ཡིན་པ་ཚེགས་ཆེན་པོ་ལ་མི་ལྟོས་པར་བདེ་བླག་ཉིད་དུ་འགྲུབ་པར་བྱེད་པ་ནི་མན་ངག་གི་ལམ་ཡིན་ཀྱང་། དེའི་གྲོགས་སུ་ཐབས་ཀྱི་ཆོ་གའི་རིམ་པ་མཐའ་ཡས་པ་མེད་ན་མན་ངག་ཀྱང་རྣམ་པར་འཁྱམ་པར་འགྱུར་ཏེ། དཔེར་ན་སྦྱིན་པ་ལ་སོགས་པའི་སྤྱོད་ཕྱོགས་ལྔའི་ཐབས་ལ་མ་བསྟེན་ན་མན་ངག་གི་ངོ་བོ་ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པར་མི་ནུས་པའི་ཕྱིར་རོ། །དེ་སྐད་དུ་སྤྱོད་འཇུག་ལས་ཀྱང་། ཡན་ལག་འདི་དག་ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །ཞེས་གསུངས་པ་བཞིན་ནོ། །དེ་ཐམས་ཅད་ཀྱི་གྲོགས་སུ་གྱུར་པ་ནི་ངེས་འབྱུང་གི་བློ་བཟང་པོ་ཡིན་ཏེ། ངེས་འབྱུང་མེད་ན་དང་པོ་འཁོར་བ་ལ་བློ་མི་ལྡོག །དེས་དད་པའི་གསོས་ཉམས་པས་བར་དུ་དགེ་བའི་བཤེས་གཉེན་ལ་སྟངས་མི་བསྐུར། ཐ་མར་དད་པ་དང་། བརྩོན་འགྲུས་ལ་སོགས་པའི་ལམ་སྲོལ་མཐའ་དག་ལས་ཉམས་པར་གྱུར་པས་སྲིད་པའི་ཕྲ་རྒྱས་ཀྱི་རྩ་བ་མི་འབྱིན་པ་ཤིང་གི་ཡལ་ག་བཅད་པ་ལྟ་བུའི་ལམ་ནི་ཐར་པའི་རྒྱུར་མི་རུང་སྟེ་བླ་མ་ལ་སྤྲིང་བར། དཔེར་ན་ལྗོན་ཤིང་རྩ་ནས་མ་བཏོན་ན། །བཅད་ཀྱང་ཕྱིར་ཞིང་སྐྱེ་བ་ཁོ་ནར་ཟད། །དེ་བཞིན་སྲིད་པའི་ཕྲ་རྒྱས་མ་བཏོན་ན། །ཡང་དང་ཡང་དུ་སྡུག་བསྔལ་འདི་མི་ལྡོག །ཅེས་དང་། ཁྱད་པར་རབ་བྱུང་གི་བསླབ་པ་བླངས་པ་རྣམས་ནི་རང་རྒྱུད་ལ་ངེས་འབྱུང་ནམ་སྐྱེས་པ་ན་སོ་ཐར་མཚན་ཉིད་པར་འགྱུར་ཞིང་། དེ་ཕན་ཆད་ནི་སྡོམ་པའི་གཟུགས་བརྙན་ཙམ་དུ་སྔོན་གྱི་མཁན་པོ་དག་གིས་ཀྱང་བཤད་པ་བཞིན་ནོ། །ལེགས་སྨོན་དེའི་ལྡོག་ཕྱོགས་ནི། ཆོས་སྒོར་ཞུགས་ཀྱང་མོད་ལ་སུན་པ་དང་། །ཀུན་སློང་དུག་ཅན་འདྲེས་པའི་ཐོས་བསམ་བསྒོམ། །ཆོས་ལས་བློ་ཉམས་བསྲུང་སྡོམ་ཁུར་དུ་སོང་། །ཆོས་བརྒྱད་དམོད་པས་ཐེག་ཆེན་བརྟུལ་ཞུགས་འཁྱམ། །ལེགས་སྨོན་དཀའ་ཐུབ་བཤིག་པའི་རྙོག་པ་ཡིན། །འདི་ལྟར་གང་ཟག་ལ་ལ་དག་ནི་གཉེན་བཤེས་ཀྱི་ཕྱོགས་ནས་ཆོས་སྒོར་བཅུག་ཀྱང་། བདག་ཉིད་ཀྱི་སྔོན་བསོད་ནམས་མ་བསགས་ཤིང་ལེགས་སྨོན་མ་བཏབ་པས། ཆོས་སྒོར་ཞུགས་མ་ཐག་ནས་ཆོས་ཀྱིས་སུན་ཏེ། རྒྱལ་པོའི་མངག་གཞུག་པའམ། བློན་པོ་དང་ཁྱིམ་བདག་ལ་སོགས་པའི་བྲན་དུ་འཁོལ་ཞིང་། དེ་དག་དང་བསམ་སྦྱོར་མཐུན་པར་འཇུག་པ་དང་། གལ་ཏེ་ཐོས་བསམ་ཅུང་ཟད་བྱས་ཀྱང་ཚེ་འདི་འབའ་ཞིག་ཡིད་ལ་བཞག་པའི་ཀུན་སློང་ངན་པས་དང་པོ་ང་ཆོས་མ་ལོབས་ཀྱི་དོགས་པ། བར་དུ་དེས་རྙེད་པ་མ་གྲུབ་ཀྱི་དོགས་པ། ཐ་མར་གཞན་དང་ཕྲག་དོག་གི་གལ་འཛིན་པས་སླར་འཁོར་བའི་རྒྱུ་འབའ་ཞིག་ཏུ་འགྲོ་བ་ལས་ཐར་པའི་ལམ་དང་། ཕྱོགས་འགལ་བ་དང་། བློ་ཆོས་སུ་མ་ཚུད་པས་ཆོས་ལ་དང་བ་དང་། དད་པ་མེད་ཅིང་ཐོས་བསམ་བསྒོམ་གསུམ་དང་། ཉན་བཤད་དང་། བསྲུང་སྡོམ་ཐམས་ཅད་ལས་སུ་ཆེ་ཞིང་ཁུར་དུ་སོང་བ་དང་། ཁྱད་པར་དུ་ཐེག་པ་ཆེན་པོའི་ཆོས་ཟབ་ལ་རྒྱ་ཆེ་བ་རྣམས་བློ་ལ་མི་ཤོང་ཞིང་འགལ་བར་འཛིན་པའམ། སྤྱོད་པ་དུས་ཚོད་དང་འབྲེལ་བ་མི་ཤེས་ཤིང་། ལྟར་སྣང་ཆོས་ལྟར་བཅོས་པའི་ཆོས་བརྒྱད་ཀྱིས་ལ་བཟླ་བ་རྣམས་ནི་ལེགས་སྨོན་གྱི་དཀའ་ཐུབ་སྟོན་ཀའི་ཟླ་བ་ལ་རྙོག་མར་བྱེད་པའི་སྒྲ་གཅན་ལྟ་བུའོ། །དེའི་ཕྱིར་དེ་དག་སྤངས་ནས། ཐད་ཀ་ཐད་ཀའི་ཉོན་མོངས་དུག་ཆེན་ལྔའི། །གཉེན་པོར་ཆེ་བ་སྐྱེས་བུ་རྣམ་གསུམ་གྱི། །ཤིང་རྟར་འཛེག་ལ་དུས་བཞིར་སྐྱོ་བ་མེད། །སྣང་བ་མཐའ་དག་ཆོས་དང་བླ་མར་ཤར། །རྣམ་མཁྱེན་རྒྱུར་སོང་ལེགས་སྨོན་གྲུབ་པ་ཡིན། །བདག་ཅག་གི་སྟོན་པས་གང་ཟག་གི་བློ་རིགས་གསུམ་ལ་དགོངས་ནས་སྐྱེས་བུ་གསུམ་གྱི་ཆོས་བསྟན་པ་གང་དག་ཉམས་སུ་བླངས་ཀྱང་རང་རང་གི་ཐད་ཀ་ཐད་ཀའི་ཉོན་མོངས་པའི་གཉེན་པོར་འགྲོ་བ་དང་། ཕྱོགས་ཆར་འཛིན་པ་མེད་ཅིང་། དེ་དག་གི་དོན་ཉམས་སུ་ལེན་པ་ལ་དཀའ་བ་བཟོད་པའི་སྙིང་སྟོབས་བསྐྱེད་ནས་དུས་བཞིར་སྐྱོ་ངལ་མེད་པར་བྱ་བའོ། །དེ་ལ་དུས་བཞི་ནི་མདོ་སྡེ་ཉིད་ནས་གསལ་པོར་བསྟན་པས་གཟུ་ལུམ་དང་། མཐོང་བ་ཆུང་བའི་མངོན་རྟོགས་མི་ངོམ་སྟེ། ཁྱེའུ་སྣང་བ་བསམ་གྱིས་མི་ཁྱབ་པས་བསྟན་པ་ལས། སྔོན་གྱི་མཐའ་དབེན་པ་དང་། ཕྱི་མའི་མཐའ་མི་འཕོ་བ་དང་། ད་ལྟར་འབྱུང་བ་འཇིགས་པར་ཤེས་པ་དང་། དུས་གསུམ་མཉམ་པ་ཉིད་དེ་བཞི་པོ་དེ་དག་གོ །ཞེས་སོ། །དེའི་ཕྱིར་དུས་གསུམ་མཉམ་པ་ཉིད་ཀྱི་དོན་རྟོགས་པའི་ཚེ། ཟབ་མོ་སྟོང་པ་ཉིད་ལ་ནང་བྱན་ཚུད། སྣང་བ་མཐའ་དག་ཆོས་དང་བླ་མར་ཤར་བས་རྣམ་པ་ཐམས་ཅད་མཁྱེན་པའི་རྒྱུར་སོང་བ་ལ་ལེགས་སྨོན་གྲུབ་པ་ཞེས་བྱའོ། །ད་ནི་འཁོར་ལོ་བཞི་པ་བསོད་ནམས་ཀྱི་སྐྱབས་ལ་འདུན་པ་ཉིད་སྟོན་པའི་ཕྱིར། མཐོ་རིས་ཡོན་ཏན་བདུན་པའི་དགའ་བ་དང་། །དལ་བས་ཡང་དག་མཐོ་ལ་ནད་མེད་ཅིང་། །ཏིང་ངེ་འཛིན་དང་རྣམ་འབྱེད་ཤེས་རབ་ལྔ། །སྔོན་ཆད་བསོད་ནམས་ལ་གུས་མངོན་རྟགས་ཡིན། །འདི་ལྟར་གནས་སྐབས་སུ་མངོན་པར་མཐོ་བ་དང་། མཐར་ཐུག་ངེས་པར་ལེགས་པ་འགྲུབ་པའི་རྒྱུ་ཐམས་ཅད་ནི་བསོད་ནམས་གཅིག་པོ་ལ་རག་ལས་པ་སྟེ། སྔོན་བསོད་ནམས་རྒྱ་ཆེན་པོ་བར་མ་ཆད་པ་འདུ་བྱས་པ་དག་ནི་ད་རེས་ཀྱི་སྲིད་པ་འདི་ལ་རིགས་གཟུགས་དང་། འབྱོར་པ་དང་། དབང་ཕྱུག་དང་། ཤེས་རབ་དང་། ཚེ་རིང་བ་དང་། ནད་མེད་པ་དང་། བདེ་སྐྱིད་དང་ལྡན་པ་སྟེ་མཐོ་རིས་ཀྱི་ཡོན་ཏན་བདུན་དང་ལྡན་པའི་དལ་བའི་རྟེན་ཁྱད་པར་ཅན་ཐོབ་པར་འགྱུར་བའི་ཚུལ་དབྱིག་གཉེན་གྱིས། སྣ་ཚོགས་ཡོན་ཏན་འདོད་པ་ཡིས། །འབད་བྱ་ས་བོན་མེད་པར་ནི། །མྱུ་གུ་སྐྱེ་བ་ཡོད་མ་ཡིན། །ཉེས་པ་དག་ནི་གཅིག་པུ་ཡི། །ཡོན་ཏན་མང་པོ་འཇོམས་པར་བྱེད། །ཚེ་རིང་དེ་བཞིན་ནད་མེད་དང་། །གཟུགས་དང་སྐལ་བ་བཟང་དང་རིགས། །ནོར་དང་ཤེས་རབ་དག་དང་བདུན། །ཞེས་སོ། །དེ་ལས་སྐྱེས་པའི་དགའ་བ་དང་། ཏིང་ངེ་འཛིན་དང་། རྣམ་པར་འབྱེད་པའི་ཤེས་རབ་དང་། གོང་མའི་ཁོངས་སུ་གྱུར་པ་གཉིས་ཏེ་ལྔ་པོ་དང་ལྡན་པ་ནི་སྔོན་ཆད་བསོད་ནམས་བསགས་པའི་རྟགས་སུ་བཤད་དེ། མདོ་སྡེའི་རྒྱན་ལས། དགའ་དང་དལ་བར་སྐྱེ་བ་དང་། །ནད་མེད་པ་དང་ཏིང་འཛིན་དང་། །རྣམ་པར་འབྱེད་པའི་འབྱེད་རྒྱུད་ནི། །སྔོན་ཚེ་བསོད་ནམས་བསགས་པ་ཡིན། །ཅེས་སོ། །དཔེ་དོན་གྱི་སྒོ་ནས་རྒྱས་པར་བཤད་ན་འཁོར་འདས་ཀྱི་ལེགས་ཚོགས་མཐའ་དག་འཕེལ་བ་དང་འགྲིབ་པར་བྱེད་པ་གཉིས་ཀ་བསོད་ནམས་དང་། བསོད་ནམས་མ་ཡིན་པའི་བྱེད་པོ་ལས་གཞན་སུ་ཡང་མ་ཡིན་པས་ན། རྒྱལ་པོ་སྤྱི་བོ་སྐྱེས་ཀྱིས་སངས་རྒྱས་རྣམ་པར་གཟིགས་ལ་སྲན་རྡོག་བདུན་ཕུལ་བའི་བསོད་ནམས་ལས་འཁོར་ལོས་སྒྱུར་བའི་རྒྱལ་པོར་གྱུར་ཅིང་། རྒྱལ་ཆེན་རིགས་བཞི་པའི་དཔུང་ལས་ཀྱང་རྣམ་པར་རྒྱལ་ནས་སུམ་ཅུ་རྩ་གསུམ་དུ་ལྷའི་དབང་པོ་དང་སྟན་ཕྱེད་པར་བྱ་བའི་དབང་ཕྱུག་ཐོབ་ཀྱང་། འཇིག་རྟེན་ན་སྡིག་པས་དཀྲུགས་པའི་བློ་གྲོས་ཀྱིས་རྣམ་པར་དཀར་བའི་འབྲས་བུ་ཉམ་ཆུང་ངུར་བྱེད་པ་ནི་ཆོས་ཉིད་ཡིན་པའི་ཕྱིར། ལྷའི་དབང་པོ་ལ་འཁུ་བའི་སེམས་སྐྱེས་མ་ཐག་ཏུ་གནས་རིགས་དེ་ནས་སྐར་མདའ་ལྷུང་བ་བཞིན་དུ་གྱུར་པ་ལས་ཀྱང་སླར་ལྡོག་པས་ན། དཔག་བསམ་འཁྲི་ཤིང་ལས། མ་གོམས་པ་ཡིས་རིག་པ་འཇོམས། །རྒྱགས་པ་རྒྱས་པས་དཔལ་འབྱོར་འཇོམས། །རྣམ་སྡང་གིས་ནི་ལེགས་ཉིད་འཇོམས། །ཆགས་པས་ཡང་དག་མཐོ་བ་འཇོམས། །ཞེས་སྨྲེང་ངོ་། །དེ་ལ་སྔོན་བསོད་ནམས་མ་བསགས་པ་རྣམས་ནི་མི་ཁོམ་པའི་གནས་སུ་འགྲོ། གལ་ཏེ་མི་ལུས་ཐོབ་ཀྱང་དེའི་རྣམ་པར་ཤེས་པ་ཆོས་ཀྱི་ཕྱོགས་སུ་ནི་མུན་སྲོས་པ་ལྟ་བུ་ལ། ཆོས་མ་ཡིན་པའི་ཕྱོགས་ལ་ཕྲ་རྒྱས་མཐའ་དག་ཚོགས་པས་ནི་རིག་པ་འཇོམས་ཤིང་འོང་ངོ་། །ལ་ལ་དད་པ་ཅུང་ཟད་ཡོད་ཀྱང་ནད་དང་། གནོད་པ་ལ་སོགས་པའི་འགལ་རྐྱེན་ལྡང་ཞིང་། ཉེ་དུ་དང་། འབྲེལ་པ་ཅན་དང་། སྡིག་གྲོགས་དང་། སྡིག་པའི་བཤེས་གཉེན་གྱིས་བསླད་ནས་ཚེ་འདིའི་འདོད་པའི་ཕྱོགས་སུ་སྦྱོར། མདོར་ན་ནོར་དང་ལོངས་སྤྱོད་ལ་ཤིན་ཏུ་ཆགས་པ་དང་། ཆོས་དང་འགལ་བའི་ལས་གཙོ་བོར་བྱེད་ཅིང་། དེ་ལ་འགྱོད་པ་མེད་པས་ནི་ཡང་དག་མཐོ་བ་འཇོམས་ཤིང་འོང་ངོ་། །ཕྲག་དོག་དང་། འགྲན་སེམས་ཆེ་བ་དང་། ང་རྒྱལ་གྱི་རྒྱུད་རེངས་པ་དང་། རིགས་གཟུགས་དང་། དབང་ཕྱུག་གིས་རྒྱགས་པས་ནི་དཔལ་འབྱོར་འཇོམས་ཤིང་འོང་ངོ་། །བསམ་པ་བཟང་པོ་རྣལ་དུ་མི་གནས་པས་ཀུན་ལ་མནར་སེམས་པ་དང་ལྡན་ཞིང་བྱ་དང་རི་དྭགས་ཡན་ཆད་ལ་གནོད་པ་བྱེད་པ་ནི་བསོད་ནམས་ཉམས་པའི་རྒྱུ་མ་ནོར་བ་ཡིན་པས་ལེགས་ཚོགས་ཐམས་ཅད་འཇོམས་ཤིང་འོང་ངོ་། །མདོར་ན་ཐོས་བསམ་བསྒོམ་གསུམ་བྱས་ཀྱང་ཉོན་མོངས་པའི་གྲོགས་སུ་སོང་བ་དང་། ཚོགས་གསོག་བག་རེ་ཙམ་བྱེད་ཀྱང་གྲགས་པ་ལ་གཙོ་བོར་བརྟེན་པའམ་རྐྱེན་བཟློག་འབའ་ཞིག་ལ་དམིགས་པ་དང་། ཞི་བདེ་དང་། ལྷ་མིའི་བདེ་འབྲས་ལ་དམིགས་པ་དང་། སྡིག་པའི་གཡོས་དང་འདྲེས་པ་དང་། ཡང་ན་ཞིང་མ་དག་པ་སྡིག་སྤྱོད་ཀྱི་རྒྱལ་པོ་དང་། ལོག་ལྟ་ཅན་དང་། སེམས་ཅན་མནར་ཞིང་སྡེ་འཁྲུག་བྱེད་པའི་གནས་བརྟན་གྱི་ཕྱོགས་སུ་གཏོང་བ་ལ་དགའ་བ་རྣམས་ནི་སྔོན་བསོད་ནམས་མ་བསགས་པའི་རྟགས་ཏེ། དེ་ལས་ལོག་ནས་ལས་དང་། ཉོན་མོངས་པ་དང་། སྡིག་པའི་སེམས་ཀྱིས་རྣམ་པར་མ་དཀྲུགས་ཤིང་། །ཕྱི་ནང་གི་བར་ཆད་ཉུང་བ། དགེ་བ་བྱེད་ཀྱང་རྣམ་པར་དཔྱོད་པའི་ཤེས་རབ་དང་ལྡན་པས་བློ་བཀོལ་དུ་བཏུབ་པ་རྣམས་བསོད་ནམས་བསགས་པའི་རྟགས་ཡིན་ནོ། །ཞེས་སྟོན་པའི་ཕྱིར། མ་བསྒོམས་པས་ནི་རིགས་པ་འཇོམས་ཤིང་འོང་། །རྒྱགས་པ་རྒྱས་པས་དཔལ་འབྱོར་འཇོམས་ཤིང་འོང་། །རྣམ་པར་སྡང་བས་ལེགས་ཚོགས་འཇོམས་ཤིང་འོང་། །ཆགས་པས་ཡང་དག་མཐོ་བ་འཇོམས་ཤིང་འོང་། །གང་ཕྱིར་ལས་དང་ཉོན་མོངས་སྡིག་པ་ཡིས། །རྣམ་པར་དཀྲུགས་པ་མ་ཡིན་བློ་གྲོས་ནི། །ཤེས་རབ་མཐུ་དང་སྐལ་པས་བཀོལ་བཏུབ་པ། །བསོད་ནམས་བསགས་པའི་རྟགས་སུ་རྒྱན་ལས་བཤད། །ཅེས་ལུང་གི་ཁུངས་དང་བཅས་མུ་སྦྲེལ་བའོ། །དེ་ལ་བསོད་ནམས་དག་གིས་རྒྱུ་མཐུན་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡང་ཁྱད་ཆོས་ཡིན་ན་སེམས་ཅན་གང་དག་གོ་འཕང་ཁྱད་པར་ཅན་དོན་དུ་གཉེར་བ་རྣམས་ལ་སྨོས་ཅི་འཚལ། དེའང་འདི་ལྟར་སྐྱེས་རབས་ལས། རྒྱལ་པོ་གསལ་བའི་སྟོབས་ཞེས་བྱ་བ་ལ་བུ་གཟུགས་སྟོབས་དང་། བརྩོན་འགྲུས་ལྡན་དང་། བཟོ་ལྡན་དང་། ཤེས་རབ་ལྡན་དང་། བསོད་ནམས་སྟོབས་ཞེས་རང་རང་གི་ཡོན་ཏན་གྱི་ཆ་ལས་མིང་བཏགས་པ་ལྔ་ཡོད་པ་ལས། ལྡག་སོ་སོའི་ཡོན་ཏན་གྱི་ཕྱོགས་འཛིན་ཅིང་བསྔགས་པ་བརྗོད་དོ། །དེའི་ཚེ་ཐ་ཆུང་བསོད་ནམས་སྟོབས་ཀྱིས་སྨྲས་པ། ཤེས་རབ་དང་བྲལ་བའི་གཟུགས་དང་། བཟོ་དང་བརྩོན་འགྲུས་ཐམས་ཅད་ནི་ཉམས་སུ་ཕན་པ་མ་ཡིན་ལ། ཤེས་རབ་ཀྱིས་ཟིན་པ་ནི་ཡོངས་སུ་ཕན་པས་བདེན་མོད་ཀྱིས། འོན་ཀྱང་ཤེས་རབ་དེ་ཡང་བསོད་ནམས་མེད་པར་ཐོབ་པ་མ་ཡིན་ཏེ། །དེ་བས་ན་བསོད་ནམས་ཕན་པ་ཡིན་ནོ། །ཞེས་དང་། བསོད་ནམས་ཀྱིས་ནི་བྱད་གཟུགས་ཐོབ། །བསོད་ནམས་ཀྱིས་ནི་ཚུལ་ཁྲིམས་ལྡན། །བསོད་ནམས་དག་གིས་དཔལ་ཐོབ་ཅིང་། །དེ་བཞིན་ལོངས་སྤྱོད་ཅན་དུ་འགྱུར། །བསོད་ནམས་དག་གིས་ཤེས་རབ་ཐོབ། །བསོད་ནམས་དག་གིས་ཡིད་གཞུངས་ཐོབ། །བསོད་ནམས་དག་གིས་བཟང་འགྲོ་ཐོབ། །ཞེས་པ་ལ་སོགས་འཁོར་འདས་ཀྱི་ལེགས་ཚོགས་ཐམས་ཅད་བསོད་ནམས་ཀྱི་མཐུར་བརྗོད་ཀྱང་མཆེད་ཟླ་རྣམས་རང་རང་གི་ཕྱོགས་འཛིན་པ་ལས་དེ་དེ་ལྟར་ཁས་མི་ལེན་ཏོ། །དེ་ནས་དེ་དག་རང་རང་གི་ཡོན་ཏན་གྱི་སྟངས་ཕྱེད་པའི་ཕྱིར་རྒྱལ་བུའི་ཆ་ལུགས་མི་མངོན་པར་བྱས་ནས་ཡུལ་ཁམས་གཞན་དུ་དོང་བ་ལས། གཞོན་ནུ་གཟུགས་དང་ལྡན་པ་ནི་མཐོང་ན་ཡིད་དུ་འོང་བས་བསྡུས་པའི་སྐྱེ་བོ་དག་གིས་ལོངས་སྤྱོད་ཙམ་གྱིས་འཚོའོ། །བརྩོན་འགྲུས་ལྡན་ནི་ཆུ་ཀླུང་ཤུགས་དྲག་པོས་ཙན་དན་གྱི་ཤིང་ཁྱེར་བ་གཞན་དག་གིས་བླང་བར་མི་ནུས་པ་བརྩོན་འགྲུས་ཀྱི་སྟོབས་ཆེན་པོས་དྲངས་པ་ལས་བྱུང་བའི་ལོངས་སྤྱོད་ཙམ་གྱིས་འཚོའོ། །བཟོ་དང་ལྡན་པ་ནི་དེ་ལས་གླ་རྔན་ཐོབ་པའི་ལོངས་སྤྱོད་ཙམ་གྱིས་འཚོའོ། །ཤེས་རབ་ལྡན་གྱིས་ནི་ཚོང་དཔོན་གཉིས་འཁོན་པ་ཐབས་ལ་མཁས་པས་འདུམས་པར་བྱས་པའི་རྙེད་པ་ཙམ་གྱིས་སོ། །བསོད་ནམས་སྟོབས་ནི་དབུལ་པོ་ཞིག་གི་ཁྱིམ་དུ་ཞུགས་པ་ན། དེའི་བསོད་ནམས་ཀྱི་མཐུ་ལས་ཁྱིམ་དེར་ནོར་དང་། འབྲུ་དང་། གསེར་དང་། དངུལ་མང་པོ་བྱུང་བས། དབུལ་པོའི་བསམ་པ་ལ་འདི་ནི་སྔོན་མ་འདྲིས་པའི་སྐྱེས་བུ་འདི་བདག་གི་ཁྱིམ་དུ་འོངས་པའི་མཐུར་གདོན་མི་ཟའོ་སྙམ་ནས་གཞོན་ནུ་ལ་གུས་པར་བལྟས་ཤིང་བཀུར་སྟི་རྒྱ་ཆེན་པོ་ཡང་བྱས་སོ། །དེ་དག་ལ་སོགས་པའི་གྲགས་པས་ཀུན་ཏུ་ཁྱབ་པའི་དུས་རེ་ཞིག་ན་ཡུལ་དེའི་རྒྱལ་པོ་ལ་བུ་མེད་ནས་རབས་ཆད་དུ་ཉེ་བ་ན། བཙུན་མོ་དང་། བློན་པོ་དང་། གྲོང་ཁྱེར་གྱི་གཙོ་བོ་རྣམས་འདུས་ནས་གང་བསོད་ནམས་ཀྱིས་ཆེ་བ་ཞིག་རྒྱལ་པོར་དབང་བསྐུར་རོ་ཞེས་བགྲོས་པ་ན། དེ་ནི་དེ་ཉིད་དུ་རིག་ནས་རྒྱལ་པོར་དབང་བསྐུར་རོ། །དེའི་བསོད་ནམས་དང་བྱེད་པ་སྟན་ཅིག་པས་མངའ་རིས་དེ་བདེ་བའི་གནས་ལ་ཡང་རེག་གོ །དེ་རང་གི་ཕ་རྒྱལ་པོས་ཀྱང་ཐོས་ནས་དེའི་ཡང་རྒྱལ་སྲིད་ཀྱི་དབང་ཕྱུག་ལ་གཞོན་ནུ་བསོད་ནམས་སྟོབས་བཞག་གོ །རྒྱུ་དེས་ན་འཇིག་རྟེན་ན་བསོད་ནམས་ལས་ཉམས་སུ་ཕན་པ་གང་ཡང་མེད་པས་ཡུལ་ཁྱད་པར་ཅན་ལ་བསྟེན་ནས་བསོད་ནམས་བསག་པ་ལ་བརྩོན་པར་བྱ་སྟེ། མཐོང་བའི་ཆོས་ལ་འབྲས་བུ་སྨིན་པའི་ཕྱིར་རོ། །དེ་གང་ཞེ་ན། སྟོན་པ་མྱ་ངན་ལས་འདས་ནས་ལོ་བརྒྱ་ལོན་པ་ན། གྲོང་ཁྱེར་པ་ཏ་ལི་པུ་ཏྲར། རྒྱལ་པོ་མྱ་ངན་མེད་ཅེས་བྱ་བ་འཁོར་ལོས་བསྒྱུར་བའི་རྒྱལ་པོའི་བཞི་ཆ་ལ་དབང་བྱེད་པ། དང་པོར་བསོད་ནམས་མ་ཡིན་པའི་ལས་ལ་དགའ་ཞིང་། ཕྱི་ནས་བསོད་ནམས་ལ་གུས་པ་ལྷུར་བྱེད་པ་ཞིག་བྱུང་ངོ་། །དེས་ནོར་གྱི་དོན་དུ་ཚོང་པ་ལྔ་བརྒྱ་རྒྱ་མཚོར་ནོར་བུ་ལེན་པ་ལ་མངགས་སོ། །དེ་དག་གིས་ཀྱང་རྒྱ་མཚོར་ཕྱིན་ནས་རིན་པོ་ཆེ་དང་། གསེར་དང་། དངུལ་དང་། རྡོ་རྗེ་དང་། བཻ་ཌཱུརྱ་དང་། ཤང་ཀ་ཤི་ལ་དང་། བྱེ་རུ་ལ་སོགས་པས་གྲུ་བོ་ཆེ་བཀང་ཏེ་འཛམ་བུའི་གླིང་གི་ཕྱོགས་སུ་ཆས་པ་དང་། རྒྱ་མཚོའི་དཀྱིལ་དུ་ཀླུས་གྲུ་བོ་ཆེ་བཅོམ་སྟེ་ཚོང་པ་དེ་དག་ནི་སྲོག་གི་ལྷག་མ་ཙམ་དང་བཅས་ཏེ་འོང་ངོ་། །རྒྱལ་པོ་ནི་འདོད་པའི་རྒྱུས་སྐྱེད་མོས་ཚལ་བྱི་དོར་བྱས་ཤིང་རྒྱན་གྱིས་བརྒྱན། ནོར་བུའི་རིགས་རྣམས་དགྲམ་པའི་གནས་རྒྱ་ཆེན་པོ་སྟ་གོན་བྱེད་ཅིང་གྲོང་ཁྱེར་གྱི་སྐྱེ་བོའི་ཚོགས་ཐམས་ཅད་ཀྱང་ནོར་བུ་བལྟ་བ་ལ་འདུས་སོ། །དེའི་ཚེ་ཚོང་པ་རྣམས་ནི་སྟོད་གཡོགས་གཅིག་པུ་ལས་མི་ལྡན་པས་ཉམ་ཐག་པའི་རང་བཞིན་དུ་འོངས་ནས་རྒྱལ་པོ་ལ་དེའི་རྒྱུ་སྨྲའོ། །དེར་དགེ་སློང་དབང་པོ་ཞེས་བྱ་བས། རྒྱལ་པོ་ལ་བསླབ་པ་བཞིན་ཟངས་མའི་བྱང་བུ་ལ། ས་འདི་རྒྱ་མཚོས་གཏུགས་པར་སྐྱོང་། །རྒྱལ་པོ་སྟོབས་ལྡན་མྱ་ངན་མེད། །རབ་ཏུ་དྲག་ཅིང་བཙན་པ་ཡི། །ནོར་ཁྱེར་མཚོར་གནས་གང་ཡིན་པ། །དེ་དག་འདིར་ནི་མྱུར་བ་རུ། །ང་ཡི་དྲུང་དུ་བསྐྱལ་བར་གྱིས། །ཞེས་ཡི་གེ་བྲིས་ཏེ་རྒྱ་མཚོ་ལ་བསྐྱུར་བས་ཀླུ་ནི་རྒྱལ་པོའི་ཚིག་ལ་མ་རངས་ནས་བྱང་བུ་དེ་སླར་འཛམ་བུའི་གླིང་དུ་བསྒྱུར་རོ། །དེར་ཕོ་ཉས་རྒྱལ་པོ་ལ་སྐབས་དེ་བསྙད་པ་དང་། རྒྱལ་པོ་མྱ་ངན་མེད་སེམས་ཁོང་དུ་ཆུད་ནས་ཐབས་བསམ་པར་བྱེད་དོ། །དེའི་ཚེ་ནམ་མཁའི་ལྷས། ལྷ་མིའི་མཆོད་སྡོང་དེ་བཞིན་གཤེགས་པའི་སྐུ་གདུང་ལ་མཆོད་པ་བྱས་ན་དེས་བསོད་ནམས་འཕེལ་ནས་ཁྱོད་ཀྱི་དགོས་པ་འགྲུབ་པར་འགྱུར་གྱིས། གཞན་རིག་སྔགས་དང་སྨན་སྦྱོར་གང་གིས་ཀྱང་ནུས་པས་མ་ཡིན་ནོ། །ཞེས་པའི་དོན་ཚིགས་སུ་བཅད་དེ་སྨྲས་པས་རྒྱལ་པོ་སྐྲ་བཀྲུས། གོས་དཀར་པོ་བགོས། དྲི་དང་། མེ་ཏོག་གི་ཕྲེང་བ་ལ་སོགས་པ་ཐོགས་ནས་ཕྱོགས་བཅུའི་རྫུ་འཕྲུལ་ཐོབ་པ་རྣམས་ལ་གསོལ་བ་འདེབས་པ་དང་སྤྱན་འདྲེན་པའི་གདུང་དབྱངས་ཆེན་པོ་བྱེད་པ་ན། དེ་མ་ཐག་ཏུ་ཕྱོགས་ཕྱོགས་ནས་དགྲ་བཅོམ་པ་སྟོང་ཕྲག་དྲུག་ཅུ་འདུས་པར་གྱུར་ཏོ། །དེར་རྒྱལ་པོས་དེ་བཞིན་གཤེགས་པའི་སྐུ་གདུང་ལ་སྤོས་དང་། མེ་ཏོག་དང་། དྲི་དང་། བྱུག་པ་ལ་སོགས་པས་མཆོད་པ་རྒྱ་ཆེན་པོ་དང་། བསྟོད་པ་ཚིགས་སུ་བཅད་པ་བྱས་ཤིང་། དགེ་སློང་གི་དགེ་འདུན་རྣམས་ལའང་གདུགས་ཚོད་དྲངས་ནས་མཆོད་དོ། །དེའི་ཚེ་རྒྱལ་པོ་ལ་ཚེ་དང་ལྡན་པ་དབང་པོས་སྨྲས་པ། རྒྱལ་པོ་ཆེན་པོ་དང་པོ་ནི་ཁྱོད་ཀྱི་གཟུགས། གཉིས་པ་ནི་ཀླུའི་གཟུགས་ཏེ། གཟུགས་ལེགས་པ་གཉིས་མཛོད་ལ་གསེར་གྱི་སྣོད་ཆེན་པོའི་ནང་དུ་དེ་གཉིས་ཞོག་ཅིག་དང་། བསོད་ནམས་གྱི་ཁྱད་པར་མངོན་སུམ་དུ་གཟིགས་པར་འགྱུར་རོ། །རྒྱལ་པོས་ཀྱང་དེ་བཞིན་དུ་བྱས་ཏེ་རེ་ཞིག་ནས་བལྟས་པ་དང་། ཀླུའི་གཟུགས་ནི་འདུག །རྒྱལ་པོའི་གཟུགས་ནི་ཀླུ་ལ་ཕྱག་བྱེད་པར་མཐོང་ངོ་། །དེར་ཚེ་དང་ལྡན་པ་དབང་པོས་སྨྲས་པ། རྒྱལ་པོ་ཆེན་པོ་ད་དུང་བསོད་ནམས་ཀྱི་རྒྱུ་ལ་འབད་པར་མཛོད་ཅིག་དང་། ཉི་མ་རེ་རེ་བཞིན་ཁྱད་པར་གཟིགས་པར་འགྱུར་རོ། །ཞེས་སྨྲས་པས། རྒྱལ་པོས་ཀྱང་དེ་བཞིན་གཤེགས་པའི་སྐུ་གདུང་དང་། དགེ་སློང་གི་དགེ་འདུན་རྣམས་ལ་སྔར་བཞིན་དུ་མཆོད་པ་རྒྱ་ཆེན་པོ་བསྟབས། ཆོས་ཀྱང་གུས་པར་ཉན་པ་དེ་ལྟ་དེ་ལྟར་རྒྱལ་པོའི་གཟུགས་ལངས་པ་ལ་ཀླུའི་གཟུགས་ཕྱག་བྱེད་པར་གྱུར་ཏོ། །མཐར་ཀླུའི་གཟུགས་དེ་ཡན་ལག་ཐམས་ཅད་ཀྱིས་རྒྱལ་པོའི་གཟུགས་ལ་ཕྱག་བྱེད་པར་གྱུར་པས་རྒྱལ་པོ་ཡིད་རབ་ཏུ་དགའ་ནས་སྨྲས་པ། ཀྱེ་མ་དཀོན་མཆོག་གསུམ་མཆོད་པའི། །འབྲས་བུ་ཅི་འདྲ་འདི་ལ་གཟིགས། །རྒྱ་མཚོའི་ནང་ན་གནས་པའི་ཀླུ། །བདག་གིས་བཏུལ་ཞིང་འདི་དབང་བགྱིས། །བློ་གྲོས་ཆུང་བའི་མི་རྣམས་ཀྱང་། །སུ་ཞིག་སངས་རྒྱས་མཆོད་མི་བགྱིད། །གང་ཞིག་འབྲས་བུ་འཕྲལ་བསྐྱེད་ལ། །སུ་ཞིག་ཡིད་ཀྱིས་སེམས་མི་བགྱིད། །བདག་ཉིད་ཆེ་བ་ཐོབ་འདོད་པའི། །ལྷ་རྣམས་དང་ནི་མི་རྣམས་ཀྱིས། །རྫོགས་པའི་སངས་རྒྱས་ཡང་དག་མཆོད། །སྐྱེ་བ་ཟད་ཅིང་ཡང་སྲིད་མེད། །ཅེས་སྨྲའོ། །དེར་ཚེ་དང་ལྡན་པ་དབང་པོས་རྒྱལ་པོའི་བསོད་ནམས་སྟོབས་སུ་གྱུར་པས་སྐབས་ལ་བབ་པར་ཤེས་ནས་རྒྱལ་པོ་ཆེན་པོ། ད་ནི་ཟངས་མའི་ཡི་གེ་ཀླུ་ལ་སྤྲིང་པའི་དུས་ལ་བབ་བོ་ཞེས་བསྐུལ་བས། རྒྱལ་པོས་སྔར་བཞིན་དུ་སྤྲིང་ཡིག་རྒྱ་མཚོ་ལ་བསྒྱུར་བའི་ཕོ་ཉ་མངགས་པ་དང་། ཀླུའི་རྒྱལ་པོས་ཡི་གེ་དེ་སྤྱི་བོས་བླངས་ཤིང་། སྔར་གྱི་རིན་པོ་ཆེ་རྣམས་བསྐུར་བར་ཁས་བླངས་སོ། །དེར་རྒྱལ་པོས་ཚོང་པ་རྣམས་གཏོང་བར་བསྡོགས་པ་ན། གནས་བརྟན་དབང་པོས་བསྒོས་པ་བཞིན། ཟངས་མའི་བྱང་བུ་ལ། འཛམ་བུའི་གླིང་གི་དབང་ཕྱུག་དམ་པའི་བཀའ་བཅག་པའི་ཆད་པར་རང་རང་གི་ཕྲག་པ་ལ་ཁུར་ལ་འདིར་སྐྱོལ་ཅིག་བྱ་བ་བྲིས་ནས་སྤྲིངས་པས། ཡི་གེ་མཐོང་མ་ཐག་ཀླུའི་རྒྱལ་པོ་སྐྲག་པར་གྱུར་ནས། ལྷ་དེ་ལྟ་ན་གདུགས་བདུན་ན་འཚལ་ལ་མཆིའོ། །ཞེས་ཁས་བླངས་ཏེ་གྲོང་ཁྱེར་གྱི་སྐྱེ་བོའི་ཚོགས་མཐའ་དག་འདུས་པའི་དབུས་སུ་རྒྱལ་པོ་སེང་གེའི་ཁྲི་ལ་འདུག་པ་ལ། ཀླུའི་རྒྱལ་པོ་འཁོར་དང་བཅས་པ་མིའི་ཆ་བྱད་དུ་སྤྲུལ་ཏེ། ནོར་བུ་རྣམས་ཕྲག་པ་ལ་བཀལ་བའི་ཁུར་ཕོག་རྒྱལ་པོའི་རྐང་པ་གཉིས་ལ་ཕྱག་བྱས་སོ། །དེ་ལ་བཅོམ་ལྡན་འདས་ཀྱི་བཀའི་ཡོན་ཏན་རྗེས་སུ་བརྗོད་པ། བསོད་ནམས་མེ་ཡིས་མི་འཚིག་སྟེ། །རླུང་གིས་འཇིགས་པར་མི་འགྱུར་རོ། །བསོད་ནམས་ཆུ་ཡིས་འཇུ་མི་འགྱུར། །ས་བཞིན་དུ་ནི་ཁྱེར་མི་འགྱུར། །རྒྱལ་པོ་དང་ནི་ཆོམ་རྐུན་གྱིས། །འཕྲོག་ཏུ་མེད་པར་བསོད་ནམས་གནས། །སྐྱེས་པ་དང་ནི་བུད་མེད་ཀྱིས། །དབྲོག་པར་ནུས་པ་མ་ཡིན་ནོ། །བསོད་ནམས་བདེ་བ་བསྐྱེད་པའི་གཏེར། །འདིར་ནི་ལུས་པར་མི་འགྱུར་ཏེ། །གང་དང་གང་དུ་སྐྱེས་པ་རུ། །དེ་དང་དེར་ནི་རྗེས་སུ་འབྲང་། །ཞེས་སོ། །དེ་ལྟར་བསོད་ནམས་འབའ་ཞིག་ལ་གུས་པར་བལྟ་བའང་གནས་སྐབས་ཀྱི་བདེ་སྐྱིད་ལ་དམིགས་པ་ཅན་མ་ཡིན་པར་ཆོས་ལ་སེམས་པའི་སྙིང་སྟོབས་རྒྱ་ཆེན་པོ་བསྐྱེད་དགོས་པའི་ཚུལ། ཆོས་ལ་སེམས་པའི་གོ་ཆ་རྣམ་པར་སྲ། །ཟབ་རྒྱས་ཆོས་ཁམས་རྒྱ་མཚོ་དབང་པོའི་མཚོན། །བདུང་བར་བློ་ཡི་སྤོབས་སམ་མི་སྤོབས་ཀུན། །སྙིང་སྟོབས་གཉེན་པོའི་དབང་དུ་གཏོང་བ་རྣམས། །ལམ་མི་འཆག་པར་ཕྱིན་དྲུག་སྟེང་དུ་འགྲོ། །བདག་ཅག་གི་སྟོན་པས་ཀྱང་བྱང་ཆུབ་ཆེན་པོའི་ལམ་ལ་ཐུགས་བསྐྱེད་བསྐལ་པ་གྲངས་མེད་གསུམ་དུ་ཚོགས་བསག་པའི་སླད་དུ་དཀའ་བ་སྤྱད་དེ་ཡེ་ཤེས་དམ་པའི་ཚོགས་ཀྱི་ཕ་རོལ་ཏུ་ཕྱིན་ནས་མངོན་པར་སངས་རྒྱས་ཏེ་སེམས་ཅན་ཐམས་ཅད་ཀྱི་མགོན་པོར་གྱུར་པ་ཡིན་ན། བདག་ཅག་ཀྱང་གོ་འཕང་དེ་བསྒྲུབ་པ་ལ་དོན་མཐུན་པའི་ཕྱིར། བདེ་སྡུག་དང་། རྐྱེན་བཟང་ངན་ཅི་བྱུང་ཡང་། འཆི་བ་སྲོག་ལ་བབ་ཀྱང་། མི་རྒོད་དང་གཅན་གཟན་གྱིས་གཏུགས་ཀྱང་། ཚོང་པ་ཡུལ་ངན་ལ་མི་འཛེམ་པའམ། དེད་དཔོན་རྒྱ་མཚོ་ལ་ཞུགས་པ་བཞིན་རྐྱེན་ཐོག་ཏུ་མི་འཆོར་བའི་སྙིང་སྟོབས་ཀྱི་གོ་ཆ་གྱོན་ནས། ཟབ་པའི་ཆོས་རྒྱ་མཚོ་ལྟ་བུའམ་རྒྱ་ཆེ་བའི་ཆོས་ནམ་མཁའ་ལྟ་བུ་གང་ཡང་རུང་སྟེ། གཉིས་ཀའི་ཕྱོགས་ལ་སེམས་ཞུམ་པ་དང་། བརྟུལ་ཞུགས་དམན་པའི་ཉེས་དམིགས་མཐའ་དག་བཀག་ནས། འདི་ལྟར་ལྷའི་དབང་པོའི་གཞུ་ནི་གླིང་བཞི་པའི་གྱད་སྟོབས་པོ་ཆེས་ཀྱང་བདུང་པར་སྤོབས་པ་མ་ཡིན་ཀྱང་མི་ནུས་སོ་སྙམ་པས་སེམས་ཟིལ་གྱིས་ནོན་པ་ཚར་བཅད་དེ་སྙིང་སྟོབས་ཀྱི་གཉེན་པོ་བསྟེན་པ་དཔེར་ན་དེད་དཔོན་སློང་ལྡན་གྱིས་ནོར་བུའི་སླད་དུ་རྒྱ་མཚོ་སྐེམས་པར་འདོད་ནས་སྙིམ་པའི་ཆུ་ཕྱགས་འདེབས་པ་ལ་བརྟུན་པ་མི་ལྷོད་པའི་སྙིང་སྟོབས་ལ་རྒྱ་མཚོའི་ཀླུ་ཡང་སྐྲག་ནས་ནོར་བུ་བྱིན་པ་ལྟ་བུའི་གང་ཟག་ནི་ཕ་རོལ་ཏུ་ཕྱིན་པ་དྲུག་གི་སྟེང་དུ་ལམ་མི་འཆག་ཏུ་འགྲོ་བ་ཡིན་ནོ། །དེ་ཡི་མཐུན་ཕྱོགས་ཡན་ལག་བདུན་པ་དང་། །ཆུ་གཏོར་ལ་སོགས་བསག་སྦྱང་མཐའ་དག་ཡིན། །མི་མཐུན་ཕྱོགས་ཀྱིས་དེ་ལ་མི་བརྫི་ཞིང་། །ལམ་དུ་འགྲོ་བ་བསོད་ནམས་དག་ལ་བསྟེན། །འདི་ནི་སྐྱེས་བུ་ཆེན་པོའི་ལམ་སྟེགས་ཡིན། །དེ་ལ་ཕ་རོལ་ཕྱིན་པ་དྲུག་ནི་ཐེག་པ་ཆེན་པོའི་གཞུང་ལམ་ཡིན་ལ། ཕྱོགས་བསྒྲོད་པར་བྱེད་པ་ལའང་བཟའ་བཏུང་དང་། ཁམས་གསོ་བའི་ཐབས་དང་། དགྲ་རྐུན་གྱི་འཚེ་བ་སྐྱོབ་པའི་ཆོ་ག་དུ་མ་འདུ་བྱེད་པ་བཞིན། འདིར་བསོད་ནམས་ཀྱི་བྱ་བའི་ཡན་ལག་སྐྱབས་སུ་འགྲོ་བ་དང་། ཡན་ལག་བདུན་པ་དང་། མཎྜལ་དང་། ཆུ་གཏོར་ལ་སོགས་པ་བསག་སྦྱང་རྒྱ་ཆེན་པོ་མངོན་པར་འདུ་བྱེད་དགོས། དེ་ལ་བསོད་ནམས་བསོག་པའི་བློ་རེ་སྐྱེས་ཤིང་། བསོད་ནམས་ཀྱི་འབྲས་བུ་བསླུ་བ་མེད་པ་ལ་ཡིད་ཆེས་ན། འབྱོར་པ་དང་ལོངས་སྤྱོད་ཀྱི་ཉོན་མོངས་སོ་ཟེར་བ་དག་ལའང་མིར་གྱུར་པའི་ལུས་རྟེན་ཡོད་ཅིང་། དེའི་འདུ་འགོད་ལས་བོད་འདིར་ཆུ་གཙང་མ་གཅིག་པུ་ལ་བརྟེན་ནས་ཞིང་དག་པ་ལ་བསམ་པ་རྒྱ་ཆེན་པོས་མཆོད་སྦྱིན་བགྱིས་པའི་བསོད་ནམས་གཅིག་པུས་ཀྱང་ཆོག་སྟེ། རྒྱ་གར་སོགས་སུ་ས་དྲོད་བདོ་བས་ཆུ་རྙོག་པ་ཅན་འབའ་ཞིག་ལས་གཙང་མར་གྱུར་པ་གང་རུང་རུང་རྙེད་པ་མ་ཡིན་ནོ། །དེས་ན་རྫས་དང་ཡོ་བྱད་ལ་མ་ཐོགས་རང་གི་དད་པ་དང་བརྩོན་འགྲུས་ལ་ཐོགས་པ་འདི་སྐྱོན་ཅན་དུ་བལྟས་ནས། གཞན་གྱི་དགེ་བ་ལ་རྗེས་སུ་ཡི་རང་པ་བསྐྱེད་པ་དང་། བདག་པོས་མ་བཟུང་བའི་མེ་ཏོག་དང་། འབྲས་བུ་ལ་སོགས་པས་མཆོད་པ་དང་། ལུས་བཀོལ་ནས་མཆོད་ཡོན་འབུལ་བ་དང་། མེ་ཏོག་དང་། གཙུག་ལག་ཁང་གི་སྐྱེད་ཚལ་གསོས་གདབ་པ་དང་། སྐམ་སར་ཉམས་ཉེས་པའི་ཉ་ལ་ཆུ་སྦྲེང་བ་དང་། རྫིང་བུ་དང་། ལྡེང་ཀ་ལ་སོགས་པ་གནོད་པའི་ཡུལ་དུ་གྱུར་ནས་སྲོག་ཆགས་ཕྲ་མོ་སྲོག་གི་འཇིགས་པས་བརྟབས་ཤིང་སྐྲག་པ་ལ་མི་འཇིགས་པའི་སྦྱིན་པ་བསྩལ་བ་དང་། རྒྱུད་ལས། ཨོཾ་ཛྙཱ་ན་ཨ་བ་ལོ་ཀི་ཏེ་ན་མཿས་མནྟ། སྥ་ར་ཎ་རསྨི་བྷ་བ་ས་མ་ཡ། མ་ཧཱ་མ་ཎི། དུ་རུ་དུ་རུ། ཧྲྀ་ད་ཡ་ཛྭ་ལ་ནི་ཧཱུྃ། འབབ་ཆུའམ་རྒྱ་མཚོའི་འགྲམ་དུ་འདུག་སྟེ་ལག་པ་གཡས་པའི་ཁྱོར་བར་ཆུ་བླུགས་ལ། ཡེ་ཤེས་སྐར་མདའི་སྙིང་པོ་འདི་ལན་བདུན་བཟླས་ཏེ། ཆུ་ཁྱོར་བ་བདུན་འབབ་ཆུར་གཏོར་ན་སངས་རྒྱས་ཀྱི་སྤྱན་གྱིས་གཟིགས་པའི་ཡི་དྭགས་ཇི་སྙེད་ཡོད་པ་དེ་དག་ཐམས་ཅད་ལྷའི་ཞལ་ཟས་ཀྱི་རོ་དང་། བཏུང་བའི་རོ་མཆོག་དང་ལྡན་པ་ཐོབ་ཅིང་། ཡི་དྭགས་རེ་རེའང་ཁ་ཟས་དང་བཏུང་བ་ཡུལ་མ་ག་དྷའི་བྲེ་བདུན་བདུན་གྱི་འཚོ་བར་བྱས་པར་འགྱུར་ཞིང་། ཆུ་དེ་འཐུངས་པ་ཙམ་གྱིས་དེ་དག་ཐམས་ཅད་ཡི་དྭགས་ཀྱི་སྐྱེ་གནས་ལས་ཐར་ཞིང་བདེ་འགྲོ་མཐོ་རིས་ཀྱི་གནས་སུ་སྐྱེ་བར་འགྱུར་རོ། །སྐྱེས་པའམ། བུད་མེད་དམ། ཁྱེའུ་འམ། བུ་མོའམ། གཞན་ཡང་བྱོལ་སོང་གི་སྐྱེ་གནས་སུ་གཏོགས་པ། ཡི་དྭགས་སམ། བྱའམ། ཆུ་ལ་གནས་པ་ལ་སོགས་པ་གང་གིས་ཆུ་དེ་འཐུངས་པ་དེ་དག་ཐམས་ཅད་སྡིག་པ་དང་། སྒྲིབ་པ་ཐམས་ཅད་བྱང་ནས་བདེ་འགྲོའི་ལམ་དུ་འགྲོ་བར་འགྱུར་རོ། །ཞེས་དང་། དེ་བཞིན་དུ་ཟན་འདྲུལ་ལ་བརྟེན་ཅིང་ཡོངས་སུ་གྲགས་པ། གཟུགས་ལེགས་ཞེས་བྱ་བའི་གཟུངས་སུ་རཱུ་པ་དང་། གྲོང་ཁྱེར་སེར་སྐྱར་ཀུན་དགའ་བོ་ལ་གསུངས་པ་རྒྱ་ཆེན་ཤུགས་ལྡན་དང་གཅུང་དགའ་བོ་ལ་གསུངས་པ་ཁ་ལ་མེ་འབར་མའི་གཟུངས་མཚན་བཞིའི་ཕན་ཡོན་དང་འབྲེལ་བ་དང་། མཆོག་ཟུང་ལ་གསུངས་པ་འདུར་གེགས་ཀྱི་གཟུངས་ལ་སོགས་མདོར་ན་འབད་པ་དང་རྒྱུ་ཚེགས་ཆུང་ངུ་ལ་བརྟེན་པ་བགྲང་གིས་མི་ལྡང་བ་དང་། དེ་བཞིན་དུ་ཟག་པ་ལུས་སྦྱིན་དང་། གཙུག་ལག་ཁང་དང་། ལམ་སྲང་ལ་བྱི་དོར་བྱེད་པ་སོགས། དེ་བཞིན་གཤེགས་པས་ཀྱང་མགོན་མེད་ཟས་སྦྱིན་གྱི་ཀུན་དགའ་ར་བར་ཕྱག་དར་མཛད་ན། བདག་ཅག་གི་བློ་བཀོལ་དུ་མ་བཏུབ་པས་བསོད་ནམས་ཀྱི་འཕེལ་ཀ་བྲི་བ་སྟེ། བློ་ལས་སུ་རུང་བའི་ཚེ་བསམ་པ་རྒྱ་ཆེན་པོ་རེས་བསོད་ནམས་དཔག་ཏུ་མེད་པ་འཕེལ་བ་ཡིན་ཏེ། མདོ་ལས། སྦྱིན་པའི་དངོས་པོ་ཆུང་ཡང་བསམ་པ་རྒྱ་ཆེན་པོ་ནི་མཆོག་ཡིན་ནོ། །ཞེས་གསུངས་སོ། །དེའི་ཕྱིར་ལག་པ་དེང་བྱེད་པ་དང་། རྟོག་པ་གཅིག་འགྱུ་བ་ཡན་ཆད་ངོས་ཟིན་པའི་ཐབས་ལ་འབད་ནས་བསོད་ནམས་ཀྱི་མི་མཐུན་ཕྱོགས་ཟིལ་གྱིས་མནན་ཅིང་། དགེ་བའི་ཆོས་སྡུད་པ་ལ་འབད་པ་ནི་ཐེག་པ་ཆེན་པོའི་ལམ་སྟེགས་ཉིད་དུ་གཟུང་བར་བྱའོ། །ཡོན་ཏན་རིན་པོ་ཆེའི་མཛོད་ལས། འཁོར་ལོ་ཆེན་པོ་བཞིའི་ཚོམས་ཏེ་རབ་བྱེད་ལྔ་པའི་འགྲེལ་པའོ།། །།དེ་ལྟར་འཁོར་ལོ་བཞི་དང་ལྡན་པའི་གང་ཟག་དེས་ཐེག་པ་ཆེན་པོའི་ལམ་ལ་འཇུག་པའི་ཐོག་མར་སྡོམ་པ་ཐམས་ཅད་ཀྱི་རྟེན་གཞི་བསྟན་པ་ལ་འཇུག་པའི་སྒོ་དམ་པ་སྐྱབས་སུ་འགྲོ་བའི་ཚུལ་ལ་སློབ་དགོས་པས་ན། འཇིགས་པ་གསུམ་གྱི་ཆུ་གཏེར་འཁྲུགས་པ་ལ། །སྐྱབས་སུ་འོས་པར་ཡིད་ཆེས་སྲོག་བརྟེན་པའི། །དཀོན་མཆོག་གསུམ་གྱི་གྲགས་པའི་གདུགས་དཀར་ནི། །བསྟན་ལ་ཞུགས་པའི་ཐོག་མ་ཉིད་དུ་འཛིན། །དེ་ལ་འཇིགས་པ་ནི་གསུམ་སྟེ། སྤྱིར་འཁོར་བའི་སྡུག་བསྔལ་ལ་འཇིགས་པ། སྒོས་རང་དོན་ཡིད་བྱེད་ཀྱི་འཇིགས་པ། ཉིང་སྒོས་ཐ་མལ་འཁྲུལ་འཛིན་གྱི་འཇིགས་པའོ། །འདི་ལྟར་འཁོར་བ་ཆུ་སྲིན་གདུག་པའི་གནས་རྒྱ་མཚོ་རླབས་ཀྱིས་དཀྲུགས་པ་ལྟ་བུའི་ནང་དུ་ལྷུང་བར་ངེས་པ་རྣམས་ནི་སྐྱབས་འབའ་ཞིག་འཚོལ་བའི་བློ་སྐྱེ་བ་ཡིན་ཏེ། ཚད་མ་སྨྲ་བ་ཕྱོགས་ཀྱི་གླང་པོས། གཏིང་མཐའ་མེད་པའི་འཁོར་བ་ནི། །རྒྱ་མཚོའི་ནང་ན་རྣམ་པར་གནས། །འདོད་ཆགས་ལ་སོགས་མི་བཟད་པའི། །ཆུ་སྲིན་གྱིས་ནི་ལུས་ཟོས་པ། །དེ་རིང་གང་ལ་སྐྱབས་སུ་མཆི། །ཞེས་སོ། །དེ་ལ་སྐྱབས་སུ་འོས་པར་ཡིད་ཆེས་པ་ནི་དཀོན་མཆོག་གསུམ་ཁོ་ན་ལས་གཞན་དབང་ཕྱུག་དང་དྲག་པོ་ལ་སོགས་པ་མ་ཡིན་ཏེ། ཅིའི་ཕྱིར་ན་དེ་དག་ནི་རང་ཉིད་འཁོར་བ་དང་ངན་སོང་གི་འཇིགས་པ་ལས་མ་གྲོལ་བས་གཞན་སྐྱོབ་པར་ཡང་མི་ནུས་ཤིང་། གདུལ་བྱ་འདུལ་བའི་ཐབས་ལ་མཁས་པ་དང་། རང་འདོད་མེད་པའི་ཐུགས་རྗེ་ཆེན་པོ་དང་ལྡན་པ་ཡང་མ་ཡིན་པའི་ཕྱིར་སློབ་དཔོན་མཐོ་བཙུན་གྲུབ་རྗེས་སངས་རྒྱས་ཀྱི་ཡོན་ཏན་མཐོང་ནས་བསྟོད་པ། བདག་ནི་སྟོན་པ་གཞན་སྤངས་ནས། །ཁྱོད་ལ་སྐྱབས་སུ་མཆི་ལགས་ཀྱིས། །ཅི་ཡི་སླད་དུ་ཞེ་ན་ཁྱེད། །སྐྱོན་མི་མངའ་ལ་ཡོན་ཏན་རྫོགས། །ཞེས་པ་ལ་སོགས་པས་བསྟོད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་སྤང་བྱ་མ་ལུས་པ་སྤངས་པས་རང་ཉིད་འཇིགས་པ་མེད་པའི་གནས་ཐོབ་པ་དང་། རྟོགས་པར་བྱ་བ་མཐའ་དག་རྟོགས་ཤིང་ཡོན་ཏན་ཐམས་ཅད་རྫོགས་པས་གཞན་འཇིགས་པ་ལས་སྐྱོབ་པའི་ནུས་པ་དང་ཐབས་ལ་མཁས་པ་གཉིས་ཀ་དང་ལྡན། ཀུན་ལ་ཉེ་རིང་མེད་པའི་ཐུགས་རྗེ་ཆེན་པོ་དང་ལྡན་པས་སྐྱབས་སུ་འོས་པའོ། །དེ་སྐད་དུ་བསྟོད་པ་བརྒྱ་ལྔ་བཅུ་པ་ལས། གང་ཞིག་གང་ལ་ཉེས་པ་ཀུན། །གཏན་ནས་ཡོང་ཡེ་མི་མངའ་ཞིང་། །གང་ལ་རྣམ་པ་ཐམས་ཅད་དུ། །ཡོན་ཏན་ཐམས་ཅད་གནས་གྱུར་པ། །གལ་ཏེ་སེམས་ཤིག་ཡོད་ན་ནི། །དེ་ཉིད་ལ་ནི་སྐྱབས་འགྲོ་ཞིང་། །དེ་བསྟོད་དེ་ནི་བཀུར་བ་དང་། །དེ་ཡི་བསྟན་ལ་གནས་པའི་རིགས། །ཞེས་སོ། །དེའི་ཕྱིར་སྟོན་པ་སངས་རྒྱས་དང་། དེའི་བསྟན་པ་དམ་པའི་ཆོས་དང་། དེ་ཉམས་སུ་ལེན་པ་ཉན་ཐོས་དང་། བྱང་ཆུབ་སེམས་དཔའི་དགེ་འདུན་རྣམས་ལ་སྐྱབས་སུ་སོང་ན་བསླུ་བ་མེད་པས་ན་སྐྱབས་འགྲོ་བདུན་ཅུ་པ་ལས་ཀྱང་། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་སོ། །འདི་ལམ་གྱི་ཐོག་མར་ངེས་པའང་། བསྟན་པ་ལ་ཐོད་རྒལ་དུ་ཞུགས་ན་ལམ་འོག་མའི་ཡོན་ཏན་མ་སྐྱེས་བར་གོང་མ་འཐོབ་པར་མི་ནུས་པའི་ཕྱིར་མྱང་འདས་ལས། ཇི་ལྟར་སྐས་ཀྱི་རིམ་པ་བཞིན། །ང་ཡི་བསྟན་པ་ཟབ་མོ་ཡང་། །རིམ་གྱིས་བསླབ་ཅིང་ནན་ཏན་བྱ། །ཐོད་རྒལ་མ་ཡིན་མཐར་ཆགས་སོ། །ཞེས་གསུངས་པ་ལྟར་རོ། །དེ་ཡང་བདག་ཉིད་སྐྱོབ་པ་ལ་ཕྱིའི་ཡན་ལག་གམ། རྒྱུ་ནི་མ་ཚང་བ་མེད་པ་སངས་རྒྱས་ཉིད་ཀྱིས་བསྒྲུབས་ཟིན་ཀྱང་། ནང་གི་ཡན་ལག་དེ་ལ་བློ་རྩེ་གཅིག་ཏུ་བཀལ་ནས་སྐྱབས་སུ་འཛིན་པའི་སྟོབས་མ་ཚང་བས་བྱིས་པ་རྣམས་སྡུག་བསྔལ་བ་ཡིན་ཏེ། བསྔགས་འོས་བསྟོད་པ་ལས། ཕྱི་ཡི་ཡན་ལག་སྟོབས་ཀུན་ནི། །ཁྱོད་ཀྱིས་ཡང་དག་བསྒྲུབ་ལགས་ཀྱང་། །ནང་གི་སྟོབས་དག་མ་ཚང་བས། །བྱིས་པ་རྣམས་ནི་སྡུག་བསྔལ་བསྟེན། །ཞེས་སོ། །དོན་དེ་སྟོན་ཕྱིར། ཐར་པར་འགྲོ་བའི་ལམ་དང་ཡོན་ཏན་གྱི། །རྟེན་དང་སྣོད་དུ་དམ་བཅའ་མི་བསླུ་བ། །སྐྱབས་སུ་འགྲོ་བ་ཉིད་དེ་དེའི་སྔོན་དུ། །སྟོན་དང་བསྟན་པའི་ཡོན་ཏན་ཤེས་པ་གཅེས། །ཞེས་འདོམས་ནས། འདི་ལྟར་སྟོན་པ་ཐུགས་རྗེ་ཆེན་པོ་དང་ལྡན་པས་ཐར་པར་འགྲོ་བའི་ལམ་བསླབ་པ་གསུམ་དང་། སྤངས་རྟོགས་ཀྱི་ཡོན་ཏན་མ་ལུས་པའི་རྟེན་དང་སྣོད་ལྟ་བུ་མ་ཚང་བ་མེད་པ་སྔོན་དུ་བསྒྲུབ་པར་མཛད་ནས་སྐྱབས་ཀྱི་ཡུལ་དུ་འོས་པའི་དམ་བཅའ་བསླུ་བ་མེད་པ་ལ། རང་ཉིད་ཀྱི་ཆ་ནས་ནང་གི་ཡན་ལག་དེ་ལ་སྙིང་ཐག་པ་ནས་སྐྱབས་སུ་འཛིན་པའི་རྒྱུའི་གཙོ་བོར་སྟོན་པ་དང་། བསྟན་པའི་ཡོན་ཏན་ཤེས་པ་ཉིད་ཐོག་མར་གལ་ཆེ་བ་ཡིན་ནོ། །དེ་ལྟར་ཤེས་པ་ལ་ཐོག་མར་དང་བའི་དད་པ་ནས་བློ་འཁྲིད་པའི་ཚུལ། ཆོས་རྣམས་ཀུན་གྱི་རྩ་བ་དད་པ་ནི། །སྐྱེས་བུའི་སེམས་ལ་ལུང་དུ་མ་བསྟན་པ། །སྟོན་པ་མཐོང་དང་སྡེ་སྣོད་བཀླགས་པ་ཡི། །མོད་ལ་བ་སྤུའི་འཁྲི་ཤིང་སློང་བཞིན་ལྡང་། །དེ་ལ་དང་བའི་དད་པ་དང་པོ་སྟེ། །དེ་བཞིན་འདོད་དང་ཡིད་ཆེས་ཕྱིར་མི་ལྡོག །རྣམ་པ་བཞི་ལས་སྐྱབས་འགྲོའི་གནས་སྐབས་འདིར། །སྲོག་ལ་བབ་ཀྱང་ཕྱིར་མི་ལྡོག་པ་དགོས། །དེ་ལ་བདེ་ལེགས་ཐམས་ཅད་ཀྱི་རྩ་བ་ནི་དད་པ་ཡིན་ཏེ། དཀོན་མཆོག་ཏ་ལའི་མདོ་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་བསྲུང་ཞིང་འཕེལ་བར་བྱེད། །དོགས་པ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་ལེགས་གྲོང་ཁྱེར་མཚོན་པ་ཡིན། །དད་པ་རྙོག་པ་མེད་ཅིང་སེམས་དྭངས་བྱེད། །ང་རྒྱལ་སྤངས་ཞིང་གུས་པའི་རྩ་བ་ཡིན། །དད་པ་ནོར་དང་གཏེར་དང་རྐང་པའི་མཆོག །ལག་པ་བཞིན་དུ་དགེ་སྡུད་རྩ་བ་ཡིན། །ཞེས་གསུངས་པ་ལྟར་ཡོན་ཏན་མཐའ་དག་དད་པ་ལ་བརྟེན་ནས་བསྐྱེད་དགོས་པས། དད་པ་སྐྱེ་བ་དང་ལྷན་ཅིག་དཀར་པོའི་ཆོས་མཐའ་དག་སྔོན་དུ་འདུ་བྱེད་པས་འཕགས་པའི་ནོར་བདུན་གྱིའང་དང་པོར་བྱུང་ལ། དད་པ་ཇི་ཙམ་འཕེལ་བ་དེ་སྲིད་དུ་དགེ་ལེགས་དང་ཡོན་ཏན་གྱི་ཚོགས་འཕེལ། དེ་འགྲིབ་པ་དང་རྣམ་པར་དཀར་བའི་ཕྱོགས་ཐམས་ཅད་ཀྱང་ཟླ་བ་སྒྲ་གཅན་དང་ཕྲད་པ་ལྟ་བུར་འགྲིབ་པ་ཡིན་ནོ། །དེ་ལ་སྤྱིར་འཕགས་པའི་རིགས་དང་། སྐལ་པ་དགེ་བ་ཅན་ལ་གདོད་ནས་གྲུབ་པའི་དད་པ་ཡོད་པ་ཤས་ཆེ་བ་ཉིད་དེ། རིན་ཆེན་ཕྲེང་བ་ལས། དད་ཅན་ཉིད་ཕྱིར་ཆོས་ལ་བསྟེན། །ཤེས་རབ་ལྡན་ཕྱིར་ཡང་དག་རིག །འདི་གཉིས་གཙོ་བོ་ཤེས་རབ་སྟེ། །དེ་ཡི་སྔོན་འགྲོ་དད་པ་ཡིན། །ཞེས་སོ། །དེ་ལྟ་མོད་ཀྱི་རྒྱ་མཚོས་ཞུས་པ་ལས། དད་པ་ཡོད་པའི་མི་དེ་ནི་གཞན་ལས་ཆེས་འཕགས་པས་དཀོན་ཏེ། ཞེས་གསུངས་པ་ལྟར་རྟེན་འབྲེལ་གྱི་རྒྱུ་རྐྱེན་ལས་རེ་ཞིག་ལས་མ་སད་པའི་རིགས་དང་། ཁྱད་པར་སོ་སོ་སྐྱེ་བོ་ཕལ་པ་ནི་གཉིད་ཀྱི་སྤུབས་སུ་སྣང་ཆ་ནུབ་པ་བཞིན་དད་པའི་ཉེ་བར་ལེན་པ་ཡང་ལུང་མ་བསྟན་དུ་གནས་པ་ཤས་ཆེ་བས་དེ་སད་པ་ལ་རྐྱེན་དང་ཐབས་ཉིད་གཙོ་ཆེ་བ་ཡིན་ཏེ། འདི་ལྟར་མཐོང་ན་མི་མཐུན་པ་མེད་པ་བདག་ཅག་གི་སྟོན་པའམ། དེའི་ཞལ་སྐྱིན་དང་། དེ་བཞིན་དུ་སངས་རྒྱས་དང་བྱང་ཆུབ་སེམས་དཔའི་སྣང་བརྙན་མཐོང་བ་དང་། ཡོན་ཏན་ཐོས་པ་དང་། སྡེ་སྣོད་བཀླག་པ་ལ་སོགས་པས་དད་པའི་གསོས་བྱེད་པ་ཡིན་ཏེ། མ་སྐྱེས་དགྲའི་གླང་པོ་ཆེ་ནོར་སྐྱོང་གིས་བཅོམ་ལྡན་འདས་མཐོང་བའི་མོད་ལ། ཁྲོ་གཏུམ་གྱི་སེམས་ཞི་བ་དང་། ཡུལ་གན་དྷ་རའི་ཚོང་པས་གྲོང་ཁྱེར་བཅོམ་བརླག་ཏུ་ཕྱིན་པ་ན། བྲམ་ཟེ་རྣམས་ཀྱིས་འདི་དག་ནི་ནང་པའི་དགེ་བསྙེན་ཡིན་ནོ་སྙམ་ནས་བཞད་གད་བྱས་ཤིང་། ལྷ་ཆེན་པོའི་ཡོན་ཏན་མི་ཤེས་པ་ཁྱོད་ཅག་ནི་གླེན་པ་གཏི་མུག་ཅན་ནོ། །ཞེས་སུན་ཕྱུང་ཞིང་འཚེ་བ་ཆོས་སུ་སྨྲ་བའི་གྲུབ་མཐའ་ལ་བསྔགས་པ་བརྗོད་པ་ན། དེ་དག་གིས། ལས་གང་ལས་ནི་དམ་པ་རྣམས། །ངོ་ཚར་གྱུར་པ་དེ་ཉིད་ལ། །དམ་པ་མིན་པ་དྲེགས་གྱུར་པ། །ཀྱེ་མ་འཇིག་རྟེན་ངོ་མཚར་ཆེ། །ཞེས་སྨོད་ནས་བྲམ་ཟེ་ཆེན་པོ་ལྟོས་ཤིག །གང་ཞིག་སྟོབས་ལྡན་འཚེ་བ་རྣམས། །གལ་ཏེ་མཆོད་བྱར་དེ་གྱུར་ན། །དྲེད་དང་གཟིག་དང་སྟག་ལ་ཡང་། །འགྲོ་བ་རྟག་ཏུ་མཆོད་པར་འགྱུར། །ཞེས་པ་ལ་སོགས་པས་བྲམ་ཟེའི་གྲུབ་མཐའ་སུན་ཕྱུང་ནས་དེ་བཞིན་གཤེགས་པའི་ཡོན་ཏན་བསྒྲགས་པའི་རྒྱུས། དེ་དག་སངས་རྒྱས་ལ་མངོན་པར་དད་པ་དང་། བྲམ་ཟེ་ཐུབ་དཀའ་ནག་པོས་སྡེ་སྣོད་ཀྱི་གླེགས་བམ་མཐོང་བ་ལ་བརྟེན་ནས་ལས་སད་དེ་བདག་ཉིད་ཀྱི་བསོད་ནམས་མ་ཡིན་པ་ལ་འགྱོད་ཅིང་། རང་གི་ལྟ་བ་དང་གྲུབ་མཐའ་ནོར་བར་ཤེས་ནས་ནང་པའི་ལམ་སྲོལ་ལ་ཞུགས་པས་རིགས་པར་སྨྲ་བ་ཐམས་ཅད་ཀྱི་གཙུག་རྒྱན་སློབ་དཔོན་དཔའ་བོར་གྱུར་པ་ལྟ་བུའོ། །དེའི་ཕྱིར་ད་ལྟའི་དུས་ན་མདོ་སྡེ་བལྟ་བ་ལས་དད་པའི་གསོས་ཆེ་བ་མེད་དེ། སྟོན་པའི་སྐྱེས་རབས་རྣམས་དང་། ཐེག་པ་ཆེན་པོའི་སྡེ་སྣོད་རྒྱན་སྟུག་པོ་བཀོད་པ་ཙམ་གྱིས་ཀྱང་བ་སྤུ་ཟིང་བྱེད་པའི་དད་པ་བསྐྱེད་པར་གདོན་མི་ཟའོ། །དེ་ལ་དང་བའི་དད་པ་ནི། ཆོས་ཀྱི་མཚན་ཉིད་དང་། གང་ཟག་དམ་པ་རྣམས་ཀྱི་ཚུལ་ཁྲིམས་སམ། ཤེས་རབ་དང་དགེ་བའི་རྩ་བ་ཆུད་མི་ཟ་བར་མཐོང་ནས། དེ་ལ་དང་བ་དང་། རྗེས་སུ་ཡི་རང་བ་དང་། དགའ་བའི་འདོད་ཆགས་དང་ལྷན་ཅིག་པའོ། །འདོད་པའི་དད་པ་ནི། སྡུག་བསྔལ་བདེན་པའི་མཚན་ཉིད་ཤེས་ནས་སྐྱེ་ཤིའི་འཁོར་ལོས་སྐྲག་ཅིང་། དེ་ལས་སྐྱོབ་པ་དམ་པའི་ཆོས་འགོག་ལམ་གྱི་བདེན་པ་དང་། དེ་སྟོན་བྱེད་བླ་མ་ལ་རག་ལས་པར་ཤེས་ནས་བུང་བ་མེ་ཏོག་ལ་གདུང་ཞིང་འདོད་པ་ལྟ་བུའོ། །ཡིད་ཆེས་ཀྱི་དད་པ་ནི། དཀོན་མཆོག་གསུམ་གྱི་ཡོན་ཏན་ལ་སྙིང་ཐག་པ་ནས་ངེས་ཤེས་འདྲོངས་ཤིང་དེས་བསླུ་བ་མེད་པར་ཡིད་ཆེས་ནས་སོ་སོ་སྐྱེ་བོ་དང་འཕགས་པ་གང་ཡིན་ཀྱང་ཐ་ན་ཚོར་བ་སིམ་པའི་རྣམ་པ་ཅན་གྱི་བདེ་བའང་དཀོན་མཆོག་གི་ཐུགས་རྗེར་ཤེས་ཤིང་ཚོར་བ་གདུང་བའི་རྣམ་པ་ཕྲ་མོ་དགྲ་བཅོམ་པའི་རྒྱུད་ལ་སྐྱེས་པ་ཡན་ཆད་རང་གི་ལས་སུ་ཤེས་པ་ལས་ཡིད་གཉིས་པ་གང་ཡང་མེད་པའོ། །ཕྱིར་མི་ལྡོག་པའི་དད་པ་ནི། སྤྱིར་ཐོས་བསམ་བསྒོམ་པའི་བྱ་བ་དང་། སྒོས་སྐྱབས་སུ་འགྲོ་བའི་གནས་སྐབས་འདིར་ནད་དང་། གནོད་པ་དང་། སྡུག་བསྔལ་དང་། དགྲ་གདོན་ཀྱིས་འཚེ་བ་ལ་སོགས་པའི་རྐྱེན་མི་མཐུན་པ་དང་། རླབས་ཆེ་བ་ཅི་བྱུང་ཡང་གྱུར་པ་སླར་མི་ལྡོག་པ་ལན་ཚྭ་ཆུ་རུ་འཇུ་བ་བཞིན་ཏེ། རྒྱ་གར་དུ་ནང་པའི་དགེ་བསྙེན་གཅིག་མུ་སྟེགས་པས་བཟུང་ནས། ཁྱོད་རང་གི་ལྷ་དང་ལྟ་བ་ཐོང་། ངའི་གྲུབ་མཐའ་ལ་ཞུགས། དེ་ལྟར་མི་བྱེད་ན་ཁྱོད་གསད་དོ་ཞེས་བསྡིགས་པས། དགེ་བསྙེན་ན་རེ། ཚིག་ཙམ་དུ་ནི་ཁྱོད་ཀྱི་འདོད་པ་བསྒྲུབ། སྙིང་ཐག་པ་ནས་ནི་མི་གཏོང་བྱས་པས། དེ་སྲོག་དང་བྲལ་བར་བྱས་སོ། །དེའི་ཕྱིར་དང་པོ་གཉིས་ནི་ལས་དང་པོ་པའི་དད་པ་སྟེ་རྐྱེན་གྱིས་འཕྲོག་པར་གདོན་མི་ཟ་ལ། ཕྱི་མ་གཉིས་ནི་སྨོན་པར་བྱ་བའི་གནས་མ་ནོར་བ་ཡིན་ནོ། །ཡང་། དད་པ་སྐྱེ་བའི་རྒྱུ་ནི་བཞི་ཡིན་ཏེ། །དམ་པ་བསྟེན་དང་དམ་པའི་གྲོགས་དང་འགྲོགས། །དཀོན་མཆོག་རྗེས་སུ་དྲན་དང་འཁོར་བ་ལ། །སྙིང་པོ་མེད་པའི་ཉེས་དམིགས་བསམ་ལས་སྐྱེ། །དམ་པ་མཚན་ཉིད་དང་ལྡན་པ་ཞིག་ལ་བརྟེན་ཕྱིན་ཆད་དེའི་རང་བཞིན་ནི་གཞན་ལ་བསྟེན་པའི་ལམ་དེ་ལ་རང་ཉིད་ཀྱང་གནས་པས་དོན་མཐུན་པ་དང་། གཞན་ཡང་ཐབས་ཇི་ལྟ་བུས་ལམ་ལ་འཛུད་པའི་དོན་སྤྱོད་པས་མཛད་སྤྱོད་དང་ཕྱག་བཞེས་ཐམས་ཅད་མང་དུ་ཐོས་པ་དང་། དད་པ་འཕེལ་བའི་རྒྱུར་འགྲོ་བས་ན་བྱང་ཆུབ་སེམས་དཔའི་སྡེ་སྣོད་ལས། དད་པ་དང་ལྡན་པ་ཞེས་བྱ་བ་ནི་ཡུལ་གོང་མ་ལ་དད་པ་མང་སྟེ། དགེ་བའི་བཤེས་གཉེན་བསྟེན་པ་དང་། འཕགས་པ་ལ་བལྟ་བར་འདོད་པ་དང་། དམ་པའི་ཆོས་ཉན་པར་འདོད་པ་དང་། ལས་དང་རྣམ་པར་སྨིན་པ་ལ་ཡིད་ཆེས་པ་དང་། སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་ལ་སོགས་པ་དགེ་བའི་བཤེས་གཉེན་དུ་ཤེས་ནས་ཡིད་ཆེས་པས་བསྟེན་པ་དང་མཉེས་པར་བྱེད་པའོ། །ཞེས་སོ། །དེ་བཞིན་དུ་དད་པ་ཅན་གྱི་གང་ཟག་དང་གྲོགས་སུ་འགྲོགས་ནའང་དེའི་སྤྱོད་པ་ཤུགས་ཀྱིས་འགོ་བ་ཆོས་ཉིད་ཡིན་ཏེ། འཚོ་བྱེད་གཞོན་ནུའི་གསོས་ཀྱིས་རྒྱལ་པོ་གསལ་རྒྱལ་ལ་སྟོན་པའི་ཡོན་ཏན་བསྒྲགས་ནས་དད་པར་བྱས་པ་ལྟར་གཟུ་བོར་གནས་པའི་ཡིད་ནི་ཕན་པ་དང་། ངག་ནི་བདེན་པའི་རང་བཞིན་ཅན་ཡིན་པས་སོ། །དེ་སྐད་དུ་ཆོས་བཅུ་པའི་མདོ་ལས། གང་གིས་འདྲེན་པ་ངེས་འབྱུང་བ། །དད་པ་ཐེག་པའི་མཆོག་ཡིན་ཏེ། །དེ་ཕྱིར་བློ་དང་ལྡན་པའི་མིས། །དད་པའི་རྗེས་སུ་འབྲང་བ་བསྟན། །ཞེས་གསུངས་སོ། །དཀོན་མཆོག་རྗེས་སུ་དྲན་པས་དད་པ་འཕེལ་བ་ནི་དེ་ལ་ཡོན་ཏན་ཚད་མེད་པས་ཡིན་ཏེ་འཆད་པར་འགྱུར་ལ། ཟླ་བའི་སྙིང་པོའི་མདོ་ལས་ཀྱང་། དཀོན་མཆོག་གསུམ་ལ་ངེས་པར་སེམས་པའི་དད་པ་ནི་ཡིད་བཞིན་གྱི་ནོར་བུ་ལྟ་བུའོ། །ཞེས་སོ། །དེ་ལྟ་མོད་ཀྱི་སོ་སོ་སྐྱེ་བོ་རྣམས་ལ་ནི་དད་པའི་མི་མཐུན་ཕྱོགས་ཆེན་པོ་གཅིག་ཡོད་དེ། གང་ཞེ་ན། རིང་པོར་མི་ཐོགས་པར་ཚེའི་མཐས་གཏུགས་ནས་ཕུང་པོ་དུར་ཁྲོད་དུ་ཉམ་ཉེས་པར་འགྱུར་བ་མི་དྲན་པ་དག་ནི་ལས་ཀྱི་ཞགས་པས་བསྡམས་པ་ཡིན་ཏེ། དེ་སྐད་དུ། ལས་ཀྱི་ཞགས་པས་བཅིངས་པ་ཡི། །ལུས་ཅན་རྣམས་ལ་བྱ་བཞིན་དུ། །འཆི་བ་བསྒོམ་པའི་ནུས་པ་དག །གཤོག་པ་ལྡན་ཡང་ཡོད་མ་ཡིན། །ཅེས་སོ། །དེ་ལས་ལོག་ན་འཁོར་བ་སྤྱི་དང་བྱེ་བྲག་གི་ཉེས་དམིགས་དང་། ཁྱད་པར་ངན་སོང་གི་སྡུག་བསྔལ་བཟོད་མི་ཕོད་པའི་རང་བཞིན་ལ་འཇིགས་པ་དང་། ངེས་འབྱུང་གི་སྣ་ཁྲིད་ནས་དཀོན་མཆོག་གི་ཡོན་ཏན་དྲན་ཞིང་དད་པ་སྐྱེ་བའི་སྒོ་འབྱེད་པ་ཡིན་ཏེ་རྒྱ་མཚོས་ཞུས་པ་ལས། དད་པ་ཚོགས་པའི་སྒོ་ལ་ཆགས་པ་མེད། །མི་ཁོམ་སྤོང་ཞིང་དད་པའི་མཆོག་གཅིག་ཡིན། །དད་པ་རྒྱལ་བའི་གོ་འཕང་ཐོབ་བྱེད་ཡིན། །གང་དག་འདི་འདྲའི་ཆོས་ལ་དད་བྱེད་པ། །དེ་དག་སོ་སོ་སྐྱེ་བོའི་ཚོགས་ན་དཀོན། །ཞེས་དང་། བྱང་ས་ལས། དད་པ་ནི་དམ་པའི་ཆོས་ཉན་པར་འདོད་པ་དང་། ལས་དང་རྣམ་པར་སྨིན་པ་ལ་ཡིད་ཆེས་པ་དང་། དེ་ལ་བརྟེན་པར་བྱེད། མཉེས་པར་བྱེད་པའོ། །ཞེས་སོ། །དེའི་ཕྱིར་དད་པ་སྐྱེ་བའི་རྒྱུ་བཞི་པོ་ནི། རྣམ་པ་ཀུན་ཏུ་རྒྱུད་ལ་བརྟེན་དགོས་པ་ཡིན་ཏེ། དད་པ་མེད་ན་སྐྱབས་འགྲོ་དང་གསོལ་འདེབས་འབུམ་ཐེར་ལ་འབད་ཀྱང་གཏི་མུག་གིས་འགྲོ་བ་ངག་འཁྱལ་ཁེགས་པའི་རྒྱུ་ཙམ་དང་། ཤེས་རབ་ཆེ་བས་སྐྱབས་འགྲོའི་རྣམ་པར་གཞག་པ་ལ་མཁས་ཀྱང་འདུན་པས་འགྲོ་བ་དང་། ཞེ་སྡང་གིས་འགྲོ་བ་ཙམ་མོ། །རྒྱུ་དེས་ན་ཆོས་བཅུ་པ་དང་དཀོན་མཆོག་བརྩེགས་པ་ཕྱོགས་མཐུན་པར། དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་འབྱུང་སྟེ། །ས་བོན་མེ་ཡིས་འཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་སོ། །ཕན་ཡོན་ནི། དཀོན་མཆོག་སྒྲོན་མའི་མདོ་ལས། སངས་རྒྱས་རྣམས་དང་ཆོས་ལ་དད་གྱུར་ཅིང་། །སངས་རྒྱས་སྲས་ཀྱི་སྤྱོད་ལ་དད་བྱེད་པ། །བྱང་ཆུབ་བླ་ན་མེད་པ་དད་གྱུར་ན། །སྐྱེས་བུ་ཆེན་པོ་རྣམས་ཀྱི་སེམས་སྐྱེའོ། །ཞེས་གསུངས་སོ། །དེ་ལ་དཀོན་མཆོག་གི་ཡོན་ཏན་བཤད་པའི་ཕྱིར། ཐུབ་པ་རྣམས་ཀྱི་ཡོན་ཏན་མཐའ་ཡས་ཏེ། །སྤངས་པ་གཉིས་ཀྱིས་ཉོན་ཤེས་སྒྲིབ་པ་བཅོམ། །སྤྱན་དང་མངོན་ཤེས་དབང་བཅུ་གཟུངས་ཀྱི་སྒོ། །སྟོབས་བཅུ་མི་འཇིགས་བཞི་དང་སོ་སོ་རིག །མ་འདྲེས་བཅོ་བརྒྱད་རྫོགས་པ་སངས་རྒྱས་ཏེ། །རྣམ་པ་ཀུན་གྱི་མཆོག་ལྡན་ཆོས་ཀྱི་སྐུ། །ས་བཅུའི་འཁོར་ལ་ལོངས་སྤྱོད་རྫོགས་པར་སྟོན། །དེ་ལ་མཚན་དོན་གྱི་སྒོ་ནས་སངས་རྒྱས་རྗེས་སུ་དྲན་པའི་ཡོན་ཏན་གྱི་ཁྱད་པར་ཕྱི་ལྟར་དུ་བཤད་ན། འདི་ལྟར་བཅོམ་ལྡན་འདས་ཞེས་འཇིག་རྟེན་ན་སྙན་པར་གྲགས་པ་གང་ཡིན་པ་དེ་ནི་འདོད་ཆགས་ལ་སོགས་པ་བཅོམ་པ་ཉིད་ཀྱིས་སམ། བྱང་ཆུབ་སྙིང་པོ་ལ་བཞུགས་པ་ལ་བར་དུ་གཅོད་པར་བརྩོན་པའི་བདུད་ཀྱི་སྡེ་བཅོམ་པས་ན་བཅོམ། བསྐལ་པ་ཁྱད་པར་ཅན་དང་དབང་ཕྱུག་ལ་སོགས་པ་དང་ལྡན་པའི་ཕྱིར་ན་ལྡན། དེ་ལྟར་ལྡན་ཡང་སྲེད་ལེན་ལ་སོགས་པའི་སྲིད་ཆོས་ཀྱི་སྐྱོན་ཐམས་ཅད་ལས་ནི་འདས། དངོས་པོའི་ཆོས་ཉིད་ཇི་ལྟ་བར་གནས་པ་དེ་དག་དེ་བཞིན་དུ་རྟོགས་ཤིང་ཐུགས་སུ་ཆུད་པས་ན་དེ་བཞིན་གཤེགས་པའམ། ཇི་ལྟར་གསུངས་པ་དེ་ཁོ་ན་ལྟར་ཡིན་གྱི། གཞན་དུ་མི་འགྱུར་བའི་ཕྱིར་ཡང་དེ་བཞིན་གཤེགས་པའོ། །དགྲ་བཅོམ་པ་ནི་ཉོན་མོངས་པའི་དགྲ་སྡེ་བཅོམ་པའི་ཕྱིར་ཏེ། ཇི་ལྟར་བཅོམ་ན་དགེ་སྦྱོང་གི་འབྲས་བུ་བཞིའི་མཐར་ཐུག་པ་ཡིན་ཏེ་འོག་ཏུ་འཆད་པར་འགྱུར་རོ། །ཡང་དག་པར་རྫོགས་པའི་སངས་རྒྱས་ནི་འཕགས་པ་སྟོང་ཕྲག་བརྒྱ་པར་བག་ཆགས་ཀྱིས་མཚམས་སྦྱོར་བའི་ཉོན་མོངས་པ་ཐམས་ཅད་སྤངས་པས་ཡང་དག་པར་རྫོགས་པའི་བྱང་ཆུབ་བོ། །ཞེས་པ་ལྟར་དེ་བཞིན་གཤེགས་པ་ནི་ཆོས་ཐམས་ཅད་ཡང་དག་པར་ཕྱིན་ཅི་མ་ལོག་པར་ཀུན་ནས་སངས་རྒྱས་པས་ན་ཡང་དག་པར་རྫོགས་པའི་སངས་རྒྱས་སོ། །དེ་སྐད་དུ་སྐྱབས་འགྲོ་བདུན་ཅུ་པ་ལས། མ་རིག་གཉིད་ལས་སངས་ཕྱིར་དང་། །ཡེ་ཤེས་ལ་ཡང་བློ་རྒྱས་པས། །སངས་རྒྱས་པདྨའི་འདབ་ལྟར་རྒྱས། །ཞེས་སོ། །མཁྱེན་པ་དང་ཞབས་ལྟ་བུ་ཚུལ་ཁྲིམས་དང་། ཏིང་ངེ་འཛིན་དག་དང་ལྡན་པའི་ཕྱིར་རིག་པ་དང་ཞབས་སུ་ལྡན་པའོ། །མྱ་ངན་མ་ཡིན་པ་དང་། མཛེས་པ་དང་། ཕྱིར་མི་ལྡོག་པའི་གནས་སུ་གཤེགས་པས་ན་བདེ་བར་གཤེགས་པའོ། །འཇིག་རྟེན་མཁྱེན་པ་ནི། སེམས་ཅན་གྱི་འཇིག་རྟེན་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་ཀྱི་རྣམ་པར་བཞག་པ་ཡོངས་སུ་མཁྱེན་ལ། དེ་བཞིན་དུ་སྣོད་ཀྱི་འཇིག་རྟེན་གྱི་ཡང་ཆགས་འཇིག་གནས་སྟོངས་ཚད་དང་རང་བཞིན་ཐམས་ཅད་མ་ནོར་བར་མཁྱེན་པའོ། །རྣམ་པ་གཅིག་ཏུ་འཇིག་རྟེན་གྱི་ཐ་སྙད་བཟང་པོ་ཡོངས་སུ་མཁྱེན་པ་ལ་གྲགས་ཀྱིས། སོ་སོ་སྐྱེ་བོའི་རང་བཞིན་དང་གཡོ་སྒྱུ་ལ་སོགས་པའི་འཇིག་རྟེན་མཁྱེན་པ་དང་ཕྱོགས་འགལ་བར་ཤེས་པར་བྱའོ། །གདུལ་བར་རུང་བ་ནི་སྐྱེས་བུ་ཡིན་ལ། དེ་དག་གདུལ་ཞིང་ཁ་ལོ་བསྒྱུར་བས་ན། སྐྱེས་བུ་གདུལ་བ་ཁ་ལོ་བསྒྱུར་བའོ། །ཉན་ཐོས་དང་རང་སངས་རྒྱས་དག་ལས་ཁྱད་པར་འཕགས་པའི་ཕྱིར་ན་བླ་ན་མེད་པ་སྟེ་འཕགས་པའི་ལམ་ཐོབ་པར་རིག་པར་བྱའོ། །ལྷ་དང་མི་རྣམས་ནི་མཐོ་རིས་ཀྱི་འགྲོ་བ་ཁྱད་པར་ཅན་འཕགས་པའི་ལམ་གྱི་སྣོད་ཀྱང་ཡིན་པས་དེ་དག་ལ་ཕྱིན་ཅི་མ་ལོག་པར་སྟོན་པས་ན་ལྷ་དང་མི་རྣམས་ཀྱི་སྟོན་པ། དེ་ཁོ་ན་ཉིད་ཐུགས་སུ་ཆུད་པས་ན་སངས་རྒྱས་བཅོམ་ལྡན་འདས་ཞེས་ངོ་བོ་ཉིད་མེད་པའི་ཆོས་ཉིད་ལ་ཚིག་བླ་དགས་སུ་བྱས་ནས་ཚིག་མཇུག་མི་མངོན་པར་བྱས་པའི་ཕྱིར་རོ། །ངོ་བོའི་བཞུགས་ཚུལ་གྱི་སྒོ་ནས་ཡོན་ཏན་གྱི་ཁྱད་པར་ནང་ལྟར་དུ་བཤད་ན། འདི་ལྟར་སངས་རྒྱས་བཅོམ་ལྡན་འདས་རྣམས་ནི་སྐྱོན་ཐམས་ཅད་སྤངས་པ་སྟེ། མཐོང་སྤངས་དང་བསྒོམ་སྤངས་ཀྱིས་ཉོན་མོངས་པ་དང་། ཤེས་བྱའི་སྒྲིབ་པ་མཐའ་དག་སྤངས་པའོ། །ཡང་རྣམ་པ་གཅིག་ཏུ་ན། ལེགས་པར་སྤངས་པ། སླར་མི་ལྡོག་པར་སྤངས་པ། མ་ལུས་པར་སྤངས་པས་ན་སྤངས་པ་གསུམ་གྱི་ཡོན་ཏན་ཅན་ཏེ། རིག་པའི་དབང་ཕྱུག་གིས། རྒྱུ་སྤངས་ཡོན་ཏན་གསུམ་བདེ་གཤེགས། །སོགས་རྒྱས་པར་བཤད་པ་བཞིན་ནོ། །ཡོན་ཏན་རྫོགས་པའི་ཆ་ནས་སྤྱན་ལྔ་དང་། མངོན་པར་ཤེས་པ་དྲུག་དང་། དབང་བཅུ་དང་། གཟུངས་ཀྱི་སྒོ་དང་། སྟོབས་བཅུ་དང་། མི་འཇིགས་པ་བཞི་དང་། སོ་སོར་ཡང་དག་པར་རིག་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་པའོ། །དེ་ལ་སྤྱན་ལྔ་ལས་སངས་རྒྱས་ཀྱི་སས་བསྡུས་པ་ནི་རྣམ་པ་ཐམས་ཅད་མཁྱེན་པའི་སྤྱན་ནོ། །རྗེས་མཐུན་པ་ནི་ས་བརྒྱད་པ་ནས་ཡོད་དོ། །ཆོས་ཀྱི་སྤྱན་གྱིས་འཕགས་པའི་གང་ཟག་དབང་པོ་རྣོ་རྟུལ་ཐམས་ཅད་མངོན་སུམ་དུ་རྟོགས་པའོ། །ཤེས་རབ་ཀྱི་སྤྱན་གྱིས་ཆོས་ཐམས་ཅད་རང་གི་ངོ་བོ་ཉིད་ཀྱིས་སྟོང་པའི་དོན་མངོན་སུམ་དུ་མཐོང་བའོ། །ལྷའི་སྤྱན་གྱིས་འགྲོ་བ་རྣམས་འཆི་འཕོ་བ་དང་། སྐྱེ་བ་ཇི་ལྟ་བ་བཞིན་དུ་ཤེས་པའོ། །ཤའི་སྤྱན་གྱི་དཔག་ཚད་བརྒྱ་ནས་སྟོང་གསུམ་ཚུན་ཆོད་ཀྱི་གཟུགས་ཕྲ་རགས་ཐམས་ཅད་མངོན་སུམ་དུ་མཐོང་བའོ། །མངོན་པར་ཤེས་པ་དྲུག་ལས་རྫུ་འཕྲུལ་གྱི་མངོན་པར་ཤེས་པ་ནི་ས་གཡོ་བ་དང་གཅིག་ཏུ་བསྒྱུར་ཞིང་དུ་མར་སྤྲུལ་པ་ལ་སོགས་པའོ། །ལྷའི་རྣ་བའི་མངོན་པར་ཤེས་པ་ནི། འཇིག་རྟེན་གྱི་ཁམས་ཐམས་ཅད་ཀྱི་སྒྲ་ཆེ་ཆུང་མཐའ་དག་ཇི་ལྟ་བ་བཞིན་དུ་རྟོགས་པའོ། །གཞན་སེམས་ཤེས་པའི་མངོན་པར་ཤེས་པ་ནི། གཞན་རྒྱུད་ཉོན་མོངས་པ་དང་བྲལ་མ་བྲལ་སོགས་མངོན་སུམ་དུ་གཏན་ལ་ཕེབས་པའོ། །སྔོན་གནས་རྗེས་དྲན་གྱི་མངོན་པར་ཤེས་པ་ནི། རང་གཞན་གྱི་ཚེ་རབས་སྔ་མ་བརྒྱ་སྟོང་ལ་སོགས་པའི་བར་ཤེས་པའོ། །ལྷའི་མིག་གི་མངོན་པར་ཤེས་པ་ནི། བསྐལ་པ་དང་མ་བསྐལ་པའི་གཟུགས་ཕྲ་རགས་ཐམས་ཅད་མངོན་སུམ་གྱིས་རྟོགས་པའོ། །ཟག་པ་ཟད་པའི་མངོན་པར་ཤེས་པ་ནི། སྒྲིབ་པ་གཉིས་སྤོང་བའི་ཐབས་དང་། སྤངས་པའི་བྲལ་བ་མངོན་དུ་ཤེས་པའོ། །དེ་དག་བསམ་གཏན་བཞི་ལ་བརྟེན་ནས་ཕན་ཚུན་རྒྱུ་འབྲས་གྲུབ་པའི་ཚུལ་གྱིས་ཐོབ་པའང་མངོན་པ་ཀུན་ལས་བཏུས་ལས། ཕྱི་རོལ་པའམ། ཉན་ཐོས་སམ། བྱང་ཆུབ་སེམས་དཔའ་ཡང་རུང་སྟེ། བསམ་གཏན་བཞི་ལ་བརྟེན་ནས་ཚད་མེད་པ་རྣམས་མངོན་པར་འགྲུབ་བོ། །ཚད་མེད་པ་རྣམས་ཇི་ལྟ་བ་བཞིན་དུ་མངོན་པར་ཤེས་པ་ལྔ་ཡང་དེ་བཞིན་ནོ། །ཞེས་བཤད་དོ། །དབང་བཅུ་ནི། བསྐལ་པའི་བར་དུ་འཚོ་བར་འདོད་ཀྱང་གནས་པར་ནུས་པས་ཚེ་ལ་དབང་བ་དང་། ཏིང་ངེ་འཛིན་གྱི་སྒོ་གྲངས་མེད་པ་ལ་དབང་ཐོབ་པས་སེམས་ལ་དབང་བ་དང་། །ནམ་མཁའ་མཛོད་ཀྱི་རང་བཞིན་ཟད་མི་ཤེས་པ་ལ་མངའ་བརྙེས་པས་ཡོ་བྱད་ལ་དབང་བ་དང་། བཟོ་དང་སྒྱུ་རྩལ་གྱི་གནས་ལ་སོགས་ལས་ཀྱི་འབྲས་བུ་སྟོན་པ་ལ་མངའ་བརྙེས་པས་ལས་ལ་དབང་བ་དང་། གང་དང་གང་དུ་འདོད་པའི་གནས་སུ་སྐྱེ་བར་ནུས་པས་སྐྱེ་བ་ལ་དབང་བ་དང་། འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་སྐུས་གང་བར་སྟོན་ནུས་པ་ལ་སོགས་མོས་པ་ལ་དབང་བ་དང་། བྱང་ཆུབ་ཆེན་པོའི་སྤྲུལ་པ་འགྱེད་ནུས་པས་སྨོན་ལམ་ལ་དབང་བ་དང་། གདུལ་བྱ་རྣམ་པ་སྣ་ཚོགས་ལ་དུས་གཅིག་ཏུ་རྫུ་འཕྲུལ་མི་འདྲ་བ་དུ་མ་སྟོན་ནུས་པས་རྫུ་འཕྲུལ་ལ་དབང་བ་དང་། ཤེས་བྱ་ཐམས་ཅད་ཐོགས་མེད་དུ་མཁྱེན་པས་ཡེ་ཤེས་ལ་དབང་བ་དང་། ཆོས་ཀྱི་ཚིག་དོན་ཐམས་ཅད་ལ་མཁས་པས་ཆོས་ལ་དབང་བ་སྟེ། དབང་བཅུ་འདི་དག་ནི་དག་པའི་ས་གསུམ་གྱི་བྱང་ཆུབ་སེམས་དཔའི་ཁྱད་ཆོས་སུ་མདོ་སྡེ་ཆོས་ཀྱི་སྤྲིན་ལ་སོགས་པ་ནས་བཤད་པ་ཡིན་ནོ། །གཟུངས་ཀྱི་སྒོ་ནི་རྣམ་པ་ཐ་དད་པ་ཡོད་དེ། དེའི་རང་བཞིན་ནི་འཕགས་པ་འཇམ་དཔལ་གྱིས། གཟུངས་ཞེས་བྱ་བ་ནི་དྲན་པ་མ་ཉམས་པ། རྟོག་པ་མ་གཡེངས་པ། བློ་གྲོས་མ་རྨོངས་པ། ཤེས་རབ་མངོན་དུ་བྱེད་པ། ཆོས་ཐམས་ཅད་ཀྱི་ཚིག་རབ་ཏུ་ཐ་དད་པ་ཤེས་པ་ལ་སོགས་རྒྱ་ཆེར་བསྟན་པའོ། །སྟོབས་བཅུ་ནི། ཟླ་བ་གྲགས་པས། གནས་དང་གནས་མིན་མཁྱེན་སྟོབས་དང་། །དེ་བཞིན་ལས་རྣམས་སྨིན་བློ་དང་། །མོས་པ་སྣ་ཚོགས་ཐུགས་ཆུད་དང་། །སྣ་ཚོགས་ཁམས་ཀྱི་མཁྱེན་སྟོབས་དང་། །དེ་བཞིན་དབང་མཆོག་མཆོག་མ་ཡིན། །མཁྱེན་དང་ཐམས་ཅད་དུ་འགྲོ་དང་། །བསམ་གཏན་རྣམ་ཐར་ཏིང་འཛིན་དང་། །སྙོམས་པར་འཇུག་སོགས་མཁྱེན་སྟོབས་དང་། །སྔོན་གནས་དྲན་པ་མཁྱེན་པ་དང་། །དེ་བཞིན་འཆི་འཕོ་སྐྱེ་བློ་དང་། །ཟག་རྣམས་ཟད་པ་མཁྱེན་སྟོབས་དང་། །སྟོབས་བཅུ་པོ་ནི་འདི་དག་གོ །ཞེས་མདོར་བསྟན་ནས། དེའི་རང་བཞིན་དབྱེ་བ་ནི། རྒྱུ་གང་ཞིག་ལས་གང་ཞིག་ངེས་པར་སྐྱེ་འགྱུར་བ། །དེ་ནི་དེ་ཡི་གནས་སུ་དེ་མཁྱེན་རྣམས་ཀྱིས་གསུངས། །བཤད་པ་ལས་ལྡོག་གནས་མིན་ཤེས་བྱ་མཐའ་ཡས་པ། །མཁྱེན་པ་ཐོགས་པ་སྤངས་པ་དེ་ནི་སྟོབས་སུ་བཤད། །ཞེས་པ་ལ་སོགས་པས་བཀྲལ་བའི་དོན་འདི་ལྟར་དགེ་བ་དང་། མི་དགེ་བ་དང་། འདྲེས་མར་སྤྱོད་པའི་རྒྱུ་གང་ལས་བདེ་སྡུག་བར་མའི་འབྲས་བུའང་དེ་དེ་བཞིན་དུ་བསླུ་བ་མེད་པ་ནི་གནས་དང་། དེ་ལས་ལྡོག་པ་གང་ཡིན་པ་ནི་གནས་མ་ཡིན་པ་ཉིད་དུ་ཆགས་ཐོགས་མེད་པར་མཁྱེན་པའི་སྟོབས་དང་། དེ་བཞིན་དུ་འདོད་པ་དང་། མི་འདོད་པ་དང་། གཉིས་ཀ་ལས་ལྡོག་པ་དང་། ཟད་པའི་དངོས་པོ་སྟེ་ཟག་བཅས་མ་ཡིན་པའི་ལས་དང་། དེའི་རྣམ་པར་སྨིན་པ་དུས་གསུམ་གྱི་དངོས་པོས་བསྡུས་པ་མཐའ་དག་མཁྱེན་པའི་སྟོབས་དང་། འདོད་ཆགས་ལ་སོགས་པའི་ཉོན་མོངས་པ་སྣ་ཚོགས་དང་། དེ་ལས་གཞན་པ་མོས་པ་འབྲིང་དང་། ཁྱད་པར་དུ་འཕགས་པའི་འདོད་པ་ལ་སོགས་པ་དུས་གསུམ་གྱི་སོ་སོ་སྐྱེ་བོ་དང་འཕགས་པའི་ཚོགས་ཀྱི་མོས་པ་ཇི་ལྟ་བ་བཞིན་དུ་གཟིགས་པ་མོས་པ་སྣ་ཚོགས་མཁྱེན་པའི་སྟོབས་དང་མིག་ལ་སོགས་པ་གཟུགས་ཅན་གྱི་དབང་པོ་ལྔ་དང་། དེ་དག་གི་རྣམ་པར་ཤེས་པ་སྟེ་གཟུགས་ཅན་མ་ཡིན་པ་ལྔ། དེ་དག་ཕན་ཚུན་ཡུལ་དང་ཡུལ་ཅན་དུ་འབྲེལ་བ་འདོད་པའི་ལྔ། རང་བཞིན་སྟོང་ཉིད་བཅུ་དྲུག་ལ་སོགས་ཏེ་ཁམས་རྣམས་ཀྱི་དབྱེ་བའི་བྱེ་བྲག །དུས་གསུམ་གྱི་ཤེས་བྱར་སྲིད་པ་ཇི་སྙེད་པ་ཐམས་ཅད་དུས་གཅིག་ཏུ་མཁྱེན་པ་སྟེ་ཁམས་སྣ་ཚོགས་མཁྱེན་པའི་སྟོབས་དང་། མིག་ལ་སོགས་པའི་དབང་པོ་ཉེར་གཉིས་འབྲས་བུ་དང་བཅས་པ་དང་། དེ་རྣོན་པོ་དང་། འབྲིང་དང་། རྟུལ་པོའི་བྱེ་བྲག་གིས་ཕྱེ་བའི་དབང་པོའི་རིམ་པ་མཐའ་དག་མ་ལུས་པར་གཟིགས་པ་དབང་པོ་མཆོག་དང་མཆོག་མ་ཡིན་པ་མཁྱེན་པའི་སྟོབས་དང་། འགྲོ་བ་དྲུག་དང་ཉན་རང་། སངས་རྒྱས་ཀྱི་ལམ་ལ་སོགས་ཏེ་ཡང་དག་པ་དང་། ཕྱིན་ཅི་ལོག་གི་འགྲོ་བའི་རྣམ་པ་ཇི་སྙེད་པ་ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང་། དུས་གསུམ་གྱི་འཇིག་རྟེན་གྱི་ཁམས་མཐའ་ཡས་པ་དག་ན་བསམ་གཏན་བཞི་དང་། རྣམ་པར་ཐར་པ་བརྒྱད་དང་། མཐར་གྱིས་གནས་པའི་སྙོམས་པར་འཇུག་པ་དགུ་ལ་སོགས་ཏེ་ཀུན་ནས་ཉོན་མོངས་པ་དང་། རྣམ་པར་བྱང་བའི་ཁྱད་པར་མ་འདྲེས་པར་མཁྱེན་པས་ཉོན་མོངས་དང་རྣམ་བྱང་མཁྱེན་པའི་སྟོབས་དང་། བདག་དང་གཞན་གྱི་སྔོན་གྱི་གནས་གང་ཡིན་པ་བཀོད་པ་དང་། རྣམ་པ་མ་འདྲེས་པར་རྗེས་སུ་དྲན་ཞིང་མངོན་དུ་གཟིགས་པས་ན་སྔོན་གནས་རྗེས་སུ་དྲན་པ་མཁྱེན་པའི་སྟོབས་དང་། ཇི་ལྟར་སྔོན་གྱི་གནས་གཟིགས་པ་བཞིན་དུ་རང་དང་གཞན་གྱི་འཆི་འཕོ་དང་། སྐྱེ་བ་འཛིན་པའི་གནས་སྐབས་ཐམས་ཅད་མ་འདྲེས་པར་གཟིགས་པས་འཆི་འཕོ་དང་། སྐྱེ་བ་མཁྱེན་པའི་སྟོབས་དང་། ཉན་ཐོས་དང་། རང་སངས་རྒྱས་དང་། བླ་ན་མེད་པའི་བྱང་ཆུབ་རྣམ་པ་གསུམ་གྱི་སྤང་བྱ་དང་། ཟག་པ་ཟད་པའི་སྐབས་ཐམས་ཅད་མ་འདྲེས་པར་གཟིགས་པས་ཟག་པ་ཟད་པ་མཁྱེན་པའི་སྟོབས་ཏེ་རྣམ་པ་བཅུའོ། །མི་འཇིགས་པ་བཞི་ནི། བདག་ཉིད་མངོན་པར་རྫོགས་པར་སངས་རྒྱས་སོ་ཞེས་ཆོས་ཐམས་ཅད་ཀྱི་རང་བཞིན་མ་འདྲེས་པར་མཁྱེན་པར་ཞལ་གྱིས་འཆེས་པ་ལ། ཆོས་མཐུན་གྱི་རྒོལ་བ་མེད་པས་རྟོགས་པ་ཕུན་སུམ་ཚོགས་པ་ལ་མི་འཇིགས་པ་དང་། ཉོན་མོངས་པ་དང་ཤེས་བྱའི་སྒྲིབ་པས་བསྡུས་པ་མཐའ་དག་ཐར་པ་དང་རྣམ་མཁྱེན་གྱི་བར་ཆད་དུ་གྱུར་པའི་སྤང་བྱ་འདི་མ་སྤངས་པས་སོ་ཞེས་པའི་ཆོས་མཐུན་གྱི་རྒོལ་བ་མེད་པས་བར་དུ་གཅོད་པའི་ཆོས་བསྟན་པ་ལ་མི་འཇིགས་པ་དང་། གཞི་ཤེས་དང་། ལམ་ཤེས་ལ་སོགས་པ་ཐར་པ་དང་། རྣམ་མཁྱེན་གྱི་ངེས་པར་འབྱུང་བའི་ལམ་དུ་བསྟན་པ་ལ། ལམ་འདི་བསྟན་ཀྱང་ངེས་པར་འབྱུང་བར་བྱེད་མི་ནུས་སོ་ཞེས་ཆོས་མཐུན་གྱི་རྒོལ་བ་མེད་པས་ངེས་པར་འབྱུང་བའི་ལམ་བསྟན་པ་ལ་མི་འཇིགས་པ་དང་། ཟག་པ་མ་ལུས་པར་ཟད་པར་ཞལ་གྱིས་བཞེས་པ་ལ་ཟག་པ་འདི་མ་ཟད་དོ་ཞེས་ཆོས་མཐུན་གྱི་རྒོལ་བ་མེད་པས་སྤངས་པ་ཕུན་སུམ་ཚོགས་པ་ལ་མི་འཇིགས་པའོ། །སོ་སོ་ཡང་དག་པར་རིག་པ་བཞི་ནི། ཀུན་ནས་ཉོན་མོངས་པ་དང་། རྣམ་པར་བྱང་བའི་ཆོས་རྣམས་ཀྱི་ཁམས་དང་། མིང་གི་རྣམ་གྲངས་བདེ་བླག་ཏུ་མཁྱེན་པས་ཆོས་སོ་སོ་ཡང་དག་པར་རིག་པ་དང་། དེ་དག་གི་རང་དང་སྤྱིའི་མཚན་ཉིད་ལ་མ་འཁྲུལ་ཞིང་མ་རྨོངས་པའི་མཁྱེན་པ་ཆགས་ཐོགས་མེད་པར་འཇུག་པས་དོན་སོ་སོ་ཡང་དག་པར་རིག་པ་དང་། གདུལ་བྱའི་ཡུལ་དེ་དང་མཐུན་པའི་གསུང་རྣམ་པ་ཐམས་ཅད་པ་ཡིན་པས་ཚིག་སོ་སོ་ཡང་དག་པར་རིག་པ་དང་། རང་གི་ངོ་བོ་ཉིད་དང་རྣམ་དབྱེའི་བྱེ་བྲག་ཐམས་ཅད་མཁྱེན་པ་ཆགས་ཐོགས་མེད་པར་འཇུག་པས་སྤོབས་པ་སོ་སོ་ཡང་དག་པར་རིག་པའོ། །སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ནི། མི་ཕམ་མགོན་པོས། འཁྲུལ་དང་ཅ་ཅོ་མི་མངའ་སྟེ། །སྟོན་ལ་དྲན་པ་ཉམས་མི་མངའ། །མཉམ་པར་མ་བཞག་ཐུགས་མི་མངའ། །འདུ་ཤེས་སྣ་ཚོགས་ཀྱང་མི་མངའ། །མ་བརྟགས་བཏང་སྙོམས་མི་མངའ་སྟེ། །འདུན་དང་བརྩོན་འགྲུས་དྲན་པ་དང་། །ཤེས་རབ་རྣམ་གྲོལ་རྣམ་གྲོལ་གྱི། །ཡེ་ཤེས་གཟིགས་པ་ཉམས་མི་མངའ། །ལས་རྣམས་ཡེ་ཤེས་སྔོན་འགྲོ་དང་། །དུས་ལ་ཡེ་ཤེས་སྒྲིབ་པ་མེད། །དེ་ལྟར་བཅོ་བརྒྱད་འདི་རང་བཞིན། །སྟོན་པའི་མ་འདྲེས་ཡོན་ཏན་ཡིན། །ཅེས་རྒྱུན་ཆགས་དང་སྦྲེལ་བས་རྣམ་གྲོལ་ཕྱི་མའི་དོན་ནི། ཤེས་བྱའི་དོན་ཀུན་གཟིགས་པ་གྲོལ་བའི་ཡེ་ཤེས་ལས་ནི་ཉམས་མི་མངའ། །ཞེས་བཤད་པ་ལྟར་རོ། །དེ་དག་ནི་རྣམ་པ་ཀུན་ཏུ་གསལ་འགྲིབ་སྤངས་པ་ཐུགས་ཀྱི་ཡོན་ཏན་ཏེ། འབྲས་བུའི་སངས་རྒྱས་བསླུ་བ་མེད་པའི་ཡེ་ཤེས་དམ་པའི་ངོ་བོ་ཉིད་ཡིན་ལ། དེའི་བརྟེན་པའམ། སྣོད་དུ་གྱུར་པ་ནི་གཟུགས་ཀྱི་སྐུ་གཉིས་ཡིན་པས་ན་ཞར་ལ་སྐུའི་མཚན་དཔེ་དང་། གསུང་གི་ཡོན་ཏན་ཡང་བསྙད་པར་འོས་ཏེ། དྲིན་ལན་བསབ་པའི་མདོ་ལས། འདི་ལྟ་སྟེ། ཞབས་ཀྱི་མཐིལ་མཉམ་ཞིང་གང་བ་ཡིན། ཞབས་ཀྱི་མཐིལ་ན་འཁོར་ལོ་རྩིབས་སྟོང་དང་ལྡན་པ་ཡོད་པ་ཡིན། ཕྱག་སོར་ཕྲ་ལ་རིང་བ་ཡིན། ཞབས་ཀྱི་རྟིང་པ་ཟླུམ་ལ་གང་བ་ཡིན། ཕྱག་སོར་གྱི་བར་དྲ་བར་འབྲེལ་བ་ཡིན། ཕྱག་དང་ཞབས་འཇམ་ཞིང་མཉེན་པ་ཡིན། ཞབས་བྱིན་པ་རི་དྭགས་ཀྱི་རྒྱལ་པོ་ཨེ་ན་ཡ་ལྟར་ཟླུམ་ལ་ཤུགས་ཀྱིས་གཞོལ་བ་ཡིན། ཞབས་ཀྱི་ལོང་བུ་ཕྱིར་མི་སྣང་བ་ཡིན། ཕྱག་པུས་མོར་སླེབ་པ་ཡིན། རྟའི་རྒྱལ་པོ་ལྟར་མཚན་སྦུབས་ཀྱི་ནང་དུ་མི་སྣང་བ་ཡིན། ཤིང་ནྱ་གྲོ་དྷ་ལྟར་སྐུའི་ཡན་ལག་ཡོངས་སུ་རྫོགས་པ་ཡིན། སྐུའི་བ་སྤུ་གྱེན་དུ་ཉལ་བ་ཡིན། བ་སྤུ་རེ་རེ་ནས་གཡས་སུ་འཁྱིལ་བ་ཡིན། སྐུ་མདོག་གསེར་བཙོ་མ་ལྟར་འདུག་པ་ཡིན། རྟག་པའི་འོད་འདོམ་གང་དང་ལྡན་པ་ཡིན། ལྤགས་པ་མཉེན་ཞིང་འཇམ་ལ་རྡུལ་དང་དྲི་མས་མི་གོས་པ་ཡིན། གནས་བདུན་ཡོངས་སུ་གང་བ་ཡིན། སྐུའི་སྟོད་སེང་གེ་ལྟར་འདུག་པ་ཡིན། ཕྱག་གི་ལག་ངར་ཟླུམ་ལ་ཤུགས་ཀྱིས་གཞོལ་བ་ཡིན། སྒྲོག་རུས་མཉམ་པར་གང་བ་ཡིན། སྐུའི་སྟོད་སྨད་འགྱེས་པའི་མཚན་དང་ལྡན་པ་ཡིན། ཞལ་གྱི་ཚེམས་བཞི་བཅུ་དང་ལྡན་པ་ཡིན། ཚེམས་ཀྱི་ཐགས་བཟང་ཞིང་མཉམ་པ་ཡིན། ཚེམས་ཀྱི་མདོག་དཀར་བ་ཡིན། འགྲམ་པ་རི་དྭགས་ཀྱི་རྒྱལ་པོ་སེང་གེ་ལྟར་གང་བ་ཡིན། རོ་བྲོ་བའི་མཆོག་དང་ལྡན་པ་ཡིན། ཤའི་དོ་ཀེར་གྱི་མཚན་དང་ལྡན་པ་ཡིན། ལྗགས་རིང་ལ་ཡངས་པ་ཡིན། ཚངས་པའི་སྒྲ་དབྱངས་དང་ལྡན་པ་ཡིན། སྤྱན་གྱི་མདོག་མཐོན་མཐིང་ལྟར་འདུག་པ་ཡིན། སྤྱན་ཁྱུ་མཆོག་གི་རྒྱལ་པོ་ལྟར་འདུག་པ་ཡིན། སྨིན་མཚམས་མཛོད་སྤུ་དཀར་པོ་དང་ལྡན་པ་ཡིན། ཅེས་སོ། །དེ་ལ་གནས་བདུན་ནི། ཕལ་ཆེན་ལས། བདུན་ཤིན་ཏུ་མཐོ་བ་དང་ཡང་ལྡན་པར་གྱུར་ཏེ། དེའི་རྐང་པ་གཉིས་ཤིན་ཏུ་མཐོ་བ་དང་། ཟླུམ་ལ་ཤིན་ཏུ་ལེགས་པ་དང་། ཤིན་ཏུ་རྒྱས་པ་དང་། ཚིགས་པ་མི་སྣང་བ་དང་། ཤིན་ཏུ་ཡིད་དུ་འོང་བ་དང་། བལྟ་ན་སྡུག་པ་གཉིས་པར་གྱུར་ཏོ། །ལག་པ་གཉིས། ཐལ་གོང་གི་ལྷུན་གཉིས། ལྟག་པ་གཅིག་སྟེ་དེ་ལྟར་བདུན་ནོ། །ཞེས་པ་ལྟར་ཕྱག་ཞབས་ཀྱི་རྒྱབ་བཞི། ཕྲག་པའི་བར་གཉིས། ལྟག་པའི་ཕྱོགས་ཏེ་གནས་བདུན་སྐུ་ཤས་གང་བས་ན་ཤིན་ཏུ་མཐོ་བ་ལ་སོགས་པའི་ཁྱད་ཆོས་དྲུག་དང་ལྡན་པའོ། །ཤའི་དོ་ཀེར་ནི་གཙུག་ཏོར་ལྟར་མི་མངོན་པའོ། །དེ་དག་ཀྱང་མདོ་དེ་ཉིད་ལས། བྱང་ཆུབ་སེམས་དཔའ་སེམས་དཔའ་ཆེན་པོ་མཚན་ཉིད་ལ་སྤྱོད་ཅིང་གནས་པའི་ཚེ་མཚན་སུམ་ཅུ་རྩ་གཉིས་ཀྱི་ལས་བྱེད་དོ། །རྣམ་པར་དག་པའི་སྤྱོད་པ་ལ་གནས་པའི་ཚེ་མཚན་སུམ་ཅུ་རྩ་གཉིས་ཡོད་མོད་ཀྱི། ཡོངས་སུ་རྫོགས་པའམ་གསལ་བ་མ་ཡིན་ནོ། །སྤྱད་པ་བཅུ་གསུམ་ལ་གནས་པའི་ཚེ་མཚན་རྣམས་ཀྱང་མངོན་པར་གསལ་བར་ཡོངས་སུ་རྫོགས་སོ། །ཞེས་གསུངས་སོ། །དེ་ལྟར་མཚན་སོ་གཉིས་འདི་དག་འབྱུང་བའི་རྒྱུ་རྐྱེན་ཡང་སོ་སོར་བཤད་མོད་ཀྱི། མདོར་བསྡུ་ན་མདོ་དེ་ཉིད་ལས། དེའི་རྒྱུ་དེའི་རྐྱེན་ཡང་དག་པ་ནི་ཚུལ་ཁྲིམས་དང་བརྩོན་འགྲུས་སོ། །དེ་ཅིའི་ཕྱིར་ཞེ་ན། གལ་ཏེ་ཚུལ་ཁྲིམས་མ་བསྲུངས་བརྩོན་འགྲུས་མ་སྤྱད་ན་མིའི་ལུས་ཀྱང་ཐོབ་པར་མི་ནུས་ན། མཚན་སུམ་ཅུ་རྩ་གཉིས་ཐོབ་པ་ལྟ་སྨོས་ཀྱང་ཅི་དགོས། ཞེས་བཤད་དོ། །དེ་བཞིན་དུ་དེ་བཞིན་གཤེགས་པའི་ཕྱག་ཞབས་ལ་རི་མོའི་རྣམ་པར་གསལ་བའི་མཚན་གྱི་རྣམ་གྲངས་བརྒྱད་ཅུར་བཤད་པ་ཡང་ཡོད་དེ། འཕགས་པ་འཇམ་དཔལ་གྱིས་ཞུས་པའི་ཐེག་པ་ཆེན་པོའི་མདོར། དེ་ལྟར་རི་མོའི་རྗེས་ཀྱི་མཚན་བརྒྱད་ཅུ་ལ་འདི་ལྟ་སྟེ། གདུགས་དང་། རྒྱལ་མཚན་དང་། དཔལ་བེའུ་དང་། ཕྲེང་བ་དང་། ཀྱོ་བ་དང་། ཅོད་པན་དང་། དབྱིག་ཏོ་དང་། བུམ་པ་དང་། གླང་པོ་དང་། རྟ་དང་། སྟག་དང་། ཆུ་སྲིན་དང་། ཉ་དང་། རུས་སྦལ་དང་། རྨ་བྱ་དང་། ཀ་ལ་པིངྐ་དང་། ཤང་ཤང་ཏེའུ་དང་། ཙ་ཤ་དང་། ངུར་པ་དང་། ནེ་ཙོ་དང་། ངང་པ་དང་། ཐི་བ་དང་། ནས་དང་། སྨན་ཆེན་པོ་དང་། འོད་མ་དང་། བ་མེན་དང་། ཀླུ་དང་། ར་དང་། ཁྱུ་མཆོག་དང་། རི་དང་། བིལ་བ་དང་། ཤིང་དང་། རི་དྭགས་ནག་པོ་དང་། ནོར་བུ་རིན་པོ་ཆེ་དང་། རལ་གྲི་མཆོག་དང་། རྡོ་རྗེ་དང་། གཞུ་དང་། མདའ་དང་། ཤག་ཏི་དང་། མདུང་རྩེ་གསུམ་པ་དང་། གཤོལ་དང་། གཏུན་དང་། སྟ་རེ་དང་། ཞགས་པ་དང་། གྲུ་དང་། མུ་ཏིག་གི་རྒྱན་དང་། སྤྲིན་དང་། ཚངས་པ་དང་། དབང་པོ་དང་། འཁོར་སྲུང་པོ་དང་། ཆུའི་ལྷ་དང་། འཕགས་སྐྱེས་པོ་དང་། མིག་མི་བཟང་དང་། ནོར་སྦྱིན་དང་། དྲང་སྲོང་ཆེན་པོ་དང་། དཔལ་དང་། ཉི་མ་དང་། ཟླ་བ་དང་། མེ་དང་། རླུང་དང་། པདྨོ་དང་། གཡུང་དྲུང་དང་། གྲུ་གསུམ་དང་། དགེ་བའི་བསྟན་དང་། མེ་ལོང་དང་། རྔ་ཡབ་དང་། རྩྭ་དུར་བ་དང་། པུ་ཏོ་ད་ཤ་དང་། ཁྱེའུ་དང་། བུ་མོ་དང་། རྔ་དང་། དུང་དང་། སྨྲིག་དང་། གདུ་བུ་དང་། དཔུང་རྒྱན་དང་། རྣ་ཆ་དང་། སོར་གདུབ་དང་། རྣ་ཆ་ཕྱང་ཕྲུལ་ཅན་དང་། མེ་ཏོག་བཟང་པོ་དང་། དཔག་བསམ་གྱི་ཤིང་དང་། འཁོར་ལོ་དང་། དཔུང་གི་སེངྒེ་དང་། འདི་རྣམས་ནི་རི་མོའི་རྗེས་ཀྱི་མཚན་བརྒྱད་ཅུ་ཡིན་ཏེ། འདི་དག་ནི་དེ་བཞིན་གཤེགས་པའི་ཕྱག་དང་། ཞབས་ཀྱི་མཐིལ་ལ་འབྱུང་ངོ་། །འཇམ་དཔལ་མཚན་བརྒྱད་ཅུའི་རི་མོར་གཏོགས་པའི་བསོད་ནམས་ཀྱི་ཕུང་པོར་གྱུར་པའི་བསོད་ནམས་ཀྱི་ཕུང་པོ་དེ་བྱེ་བ་ཁྲག་ཁྲིག་བརྒྱ་སྟོང་དུ་མར་བསྒྱུར་བས། དེ་བཞིན་གཤེགས་པའི་སྐུ་ལ་སྐྱེས་བུ་ཆེན་པོའི་མཚན་གཅིག་ཏུ་འགྱུར་ཏེ། དེ་བཞིན་དུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་རེ་རེར་འགྱུར་རོ། །ཞེས་སོ། །དཔེ་བྱད་བརྒྱད་ཅུ་ནི། མདོ་སྡེའི་དོན། སེན་མོ་ཟངས་ཀྱི་མདོག་ལྟ་བུར་དམར་སྐྱ་དང་། སེན་མོའི་མདོག་སྣུམ་པ་དང་། ཤང་ཤོང་མེད་ཅིང་མཐོ་བ་དང་། ཟླུམ་པ་དང་། རྒྱས་པ་དང་། བྱིན་གྱིས་ཕྲ་བ་དང་། སྐུ་ལུས་ཀྱི་རྩ་མི་མངོན་པ་དང་། མདུད་པ་མེད་པ་དང་། ཞབས་ཀྱི་ལོང་བུ་མི་མངོན་པ་དང་། རིང་ཐུང་མེད་པའི་མཉམ་པ་དང་། མི་ཟིལ་གྱིས་གནོན་པ་ལ་མཁས་པ་སེང་གེའི་སྟབས་སུ་གཤེགས་པ་དང་། ཀླུ་ཟིལ་གྱིས་གནོན་པ་ལ་མཁས་པ་གླང་པོ་ཆེ་ལྟ་བུར་གཤེགས་པ་དང་། ནམ་མཁའ་ལ་འབྱོན་པ་བྱ་ངང་པའི་སྟབས་སུ་གཤེགས་པ་དང་། སེམས་ཅན་གྱི་སྣ་འདྲེན་པ་ལ་མཁས་པ་ཁྱུ་མཆོག་གི་སྟབས་སུ་གཤེགས་པ་དང་། སྐོར་ཕྱོགས་ཀྱི་མན་ངག་དང་མཐུན་པར་གཡས་སུ་ལྡོག་ཅིང་གཤེགས་པ་དང་། བལྟ་ན་སྡུག་ཅིང་མཛེས་པར་གཤེགས་པ་དང་། མི་གཡོ་བ་དྲང་པོར་གཤེགས་པ་དང་། ཤ་རྒྱས་ཤིང་འགྱིང་ལེགས་པས་འཁྲིལ་བག་ཆགས་པར་གཤེགས་པ་དང་། གཙང་ཞིང་དག་པས་སྐུ་བྱི་དོར་བྱས་པ་ལྟ་བུ་དང་། སྐུ་རིང་ཐུང་དང་སྦོམ་ཕྲ་སོགས་ཐད་ཀར་མ་འཚོལ་བས་རིམ་པར་འཚམ་པ་དང་། སྐུ་རྙོག་པ་ཞི་བས་གཙང་བ་དང་། འཇམ་པ་དང་། རྣམ་པར་དག་པ་དང་། མཚན་ཡོངས་སུ་རྫོགས་པ་དང་། སྐུའི་ཁྱོན་ཆེ་བས་ཁོ་ལག་ཡངས་ཤིང་བཟང་བ་དང་། གོམ་པ་དལ་མྱུར་སྙོམས་པ་དང་། དྲི་མ་ར་རི་བ་མེད་པས་སྤྱན་གཉིས་དོག་པ་དང་། སྐུ་གཞོན་ཤ་ཆགས་པ་དང་། སྐུ་ཞུམ་པ་མེད་པ་དང་། ཤ་ཚུལ་རྒྱས་པ་དང་། སྐུ་ཤ་གྲིམས་པ་དང་། ཡན་ལག་དང་ཉིང་ལག་རྣམ་པར་འབྱེས་པ་དང་། གློ་བུར་གྱི་དྲི་མ་དང་བྲལ་བས་གཟིགས་པ་རྣམ་པར་དག་པ་དང་། སྐུའི་ཕྱལ་ཟླུམ་པ་དང་། རྐེད་སྐབས་འཚམ་པས་སྐབས་ཕྱིན་པ་དང་། རྐེད་པ་ཧ་ཅང་རིང་བ་མ་ཡིན་པས་སྐུ་མ་རྙོངས་པ་དང་། སྐུའི་ཕྱལ་ཕྱད་དེ་བས་མཐོ་དམན་མེད་པ་དང་། ལྟེ་བ་ཟབ་ཅིང་གཡས་ཕྱོགས་སུ་འཁྱིལ་བ་དང་། སྤྱོད་ལམ་ཀུན་ནས་བལྟ་ན་སྡུག་པ་དང་། སྐུ་གསུང་ཐུགས་ཀུན་སྤྱོད་གཙང་བ་དང་། སྐུ་ལ་སྨེ་བ་དང་གནག་བག་མེད་པ་དང་། ཕྱག་ཤིང་བལ་ལྟར་འཇམ་པ་དང་། ཕྱག་གི་རི་མོ་མདངས་གསལ་བ་དང་། རྒྱང་རིང་མོ་ནས་གསལ་བའི་ཟབ་པ་དང་། ཕྱག་གི་རི་མོ་རིང་བ་དང་། ཞལ་ཧ་ཅང་མི་རིང་བ་དང་། ཞལ་ལ་གཟུགས་ཀྱི་གཟུགས་བརྙན་སྣང་ཞིང་མཆུ་སྒྲོས་བིམྤ་ལྟར་དམར་བ་དང་། ལྗགས་རིང་ཞིང་མཉེན་པ་དང་། སྲབ་པ་དང་། དམར་བ་དང་། གསུང་འབྲུག་སྒྲ་ལྟར་སྒྲོག་པ་དང་། སྙན་ཞིང་འཇམ་པ་དང་། མཆེ་བ་ཟླུམ་པ་དང་། རྣོ་བ་དང་། དཀར་བ་དང་། མཉམ་པ་དང་། བྱིན་གྱིས་ཕྲ་བ་དང་། ཤངས་ཀྱི་གཟེངས་མཐོ་བ་དང་། ཟག་པ་མེད་པས་དག་ཅིང་གཙང་བ་དང་། སྤྱན་ཡངས་པ་དང་། རྫི་མ་སྟུག་པ་དང་། དཀར་ནག་མ་འདྲེས་པ་པདྨའི་འདབ་མ་རངས་པ་ལྟ་བུར་རྫོགས་པ་དང་། སྨིག་ཚུགས་རིང་བ་དང་། འཇམ་པ་དང་། སྣུམ་པ་དང་། སྤུ་མཉམ་པ་དང་། ཕྱག་རིང་ཞིང་རྒྱས་པ་དང་། སྙན་མཉམ་པ་དང་། དེའི་དབང་པོ་མ་ཉམས་པ་དང་། སྐྲ་མཚམས་དོད་པས་དཔྲལ་བ་ལེགས་པར་འབྱེས་པ་དང་། དབྱེས་ཆེ་བ་དང་། དབུ་གདུགས་ལྟར་བྱས་པ་དང་། དབུ་སྐྲ་བུང་བ་ལྟར་གནག་པ་དང་། གོ་མཚམས་མེད་པར་སྟུག་པ་དང་། འཇམ་པ་དང་། མ་འཛིངས་པ་དང་། མི་གཤོར་བ་དང་། དྲི་ཞིམ་པ་དང་། ཐུགས་ཀར་དཔལ་གྱི་བེའུ་དང་། ཕྱག་ཞབས་ཀྱི་མཐིལ་ལ་རི་མོ་གྲུ་བཞི་པའི་བཀྲ་ཤིས་དང་། དེའི་མཐར་སྲིན་ལག་ལ་སོགས་པའི་གཤམ་དུ་རི་མོ་བདུན་གཡས་སུ་འཁྱིལ་བའི་གཡུང་དྲུང་འཁྱིལ་བས་ཀྱང་བརྒྱན་པའོ། །དེ་དག་ནི། མདོ་དང་བསྟན་བཅོས་རྣམས་ལས་རྒྱ་ཆེར་གྲགས་པའི་དབང་དུ་བྱས་པ་སྟེ། གཞན་དུ་ན་དཔེ་བྱད་ཁོ་ནའི་རྣམ་གྲངས་ཀྱང་བརྗོད་པར་མི་ནུས་ཏེ། དྲིན་ལན་གསབ་པ་ལས། དཔེ་བྱད་བཟང་པོ་རེ་རེ་ལའང་དཔེ་བྱད་བཟང་པོའི་མཆོག་དམ་པ་བརྒྱ་སྟོང་ཇི་སྙེད་ཡོད་དེ། ཞེས་དང་། གཞན་ཡང་སེམས་ཅན་ཐམས་ཅད་ཀྱི་བསོད་ནམས་དང་། དེ་བཞིན་གཤེགས་པའི་མཚན་དང་དཔེ་བྱད་སོ་སོའི་ཆེ་ཁྱད་ཀྱི་རྣམ་པར་བཞག་པའང་མདོ་དེ་ཉིད་ལས། སེམས་ཅན་ཐམས་ཅད་ཀྱི་བསོད་ནམས་ཇི་སྙེད་ཅིག་ཡོད་པ་ཕྱོགས་གཅིག་ཏུ་བསྡུས་ཏེ་སྤུངས་ན། དེ་བཞིན་གཤེགས་པའི་བ་སྤུ་གཅིག་གི་མཚན་དང་མཉམ་མོ། །བ་སྤུའི་ཁུང་བུ་ཐམས་ཅད་ཀྱི་བསོད་ནམས་ཇི་སྙེད་ཅིག་ཡོད་པ་གཅིག་ཏུ་བསྡུས་ཏེ་སྤུངས་ན། དཔེ་བྱད་བཟང་པོ་གཅིག་དང་མཉམ་མོ། །དཔེ་བྱད་བཟང་པོ་ཇི་ཙམ་ཡོད་པའི་བསོད་ནམས་ཇི་སྙེད་ཡོད་པ་དེ་ལས་བརྒྱ་འགྱུར་དུ་བྱས་ན་མཚན་གཅིག་དང་མཉམ་སྟེ། སྨིན་མཚམས་ཀྱི་མཛོད་སྤུ་དཀར་པོའི་མཚན་དང་། སྤྱི་གཙུག་བལྟར་མི་སྣང་བའི་མཚན་ནི་མ་གཏོགས་སོ། །དེ་མ་ཡིན་པ་མཚན་གཞན་ཐམས་ཅད་སྟོང་འགྱུར་དུ་བྱས་ན། མཚན་གོང་མ་གཉིས་སུ་འགྱུར་རོ། །མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་པོའི་བསོད་ནམས་ཇི་སྙེད་ཡོད་པ་གཅིག་ཏུ་བསྡུས་སྤུངས་ཏེ། ཁྲི་ཕྲག་སྟོང་འགྱུར་དུ་བྱས་པ་དང་། དེ་བཞིན་གཤེགས་པའི་འབྲུག་སྒྲ་ལྟ་བུའི་དབྱངས་ཟབ་ཅིང་རྒྱང་རིང་པོར་གྲགས་པའི་མཚན་དང་མཉམ་སྟེ། གསུང་སྒྲ་དེ་ནས་སངས་རྒྱས་ཀྱི་ཞིང་ཚད་མེད་པ་མཐའ་ཡས་བསམ་གྱིས་མི་ཁྱབ་པའི་རྡུལ་ཕྲ་རབ་སྙེད་དུ་གྲགས་ཤིང་སེམས་ཅན་གྱི་དོན་དུ་བྱམས་པ་དང་སྙིང་རྗེ་ཆེན་པོ་སྤྱོད་པས་དྲིན་ཤེས་པ་དང་། དྲིན་གསབ་པ་དང་། འདི་ནི་བསམ་གྱིས་མི་ཁྱབ་བོ། །ཞེས་པ་ལ་སོགས་པའི་རྣམ་གཞག་གིས་མཐར་ཐུག་གསུང་གི་དཔེ་བྱད་ལ་མངོན་པར་བསྔགས་པའི་དོན་ཡང་རིགས་པར་བྱ་སྟེ། གསུང་ནི་འགོག་ལམ་གྱི་བདེན་པའི་ངོ་བོ་ཉིད་བསྟན་པ་ཐམས་ཅད་ཀྱི་རང་བཞིན་དུ་གནས་པས་འཆིང་བ་མཐའ་དག་གིས་བཅིངས་པའི་སོ་སོ་སྐྱེ་བོ་རྣམས་ཀྱང་ཚེ་རབས་གཞན་དུ་རང་གི་ཕ་མར་ཤེས་པའི་བྱམས་པ་དང་སྙིང་རྗེ་དྲིན་གསབ་པ་ལ་བརྩོན་ཞིང་གསབ་པ་དེ་ཡང་རང་གི་བརྙེས་པའི་གནས་མ་ནོར་བའི་ལམ་དམ་པའི་ཆོས་ཀྱི་འཁོར་ལོས་སངས་རྒྱས་ཀྱི་གོ་འཕང་ལ་འགོད་པའི་རྒྱུ་མ་ནོར་བ་ཡིན་པས་སོ། །དེ་ལ་གསུང་གི་རང་བཞིན་ནི་རྣམ་པ་ཐམས་ཅད་པ་ཡིན་པས་འཇིག་རྟེན་གྱི་ཁམས་ན་གནས་པའི་སེམས་ཅན་ཇི་སྙེད་པའམ། སློབ་པ་སོ་སོ་སྐྱེ་བོ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་བློ་གྲོས་ཆེན་པོ་དང་ལྡན་པའི་བར་གྱིས་དུས་གཅིག་ཏུ་དྲི་བ་མི་འདྲ་བ་རེ་རེ་ནས་ཞུས་ཀྱང་། རང་རང་གི་ཁམས་དང་། དབང་པོ་དང་། སྐལ་བའི་རིམ་པ་དང་འཚམ་པའི་ལན་དབྱངས་གཅིག་གིས་འདེབས་པའི་ཁྱད་ཆོས་ཅན་ཏེ། བདེན་པ་པོའི་ལེའུར། འདིར་ནི་སེམས་ཅན་ཀུན་གྱི་ངེས་པའི་ཚིག །མང་པོ་དག་གིས་དུས་གཅིག་ཞུ་ཞུས་ན། །སེམས་ཀྱི་སྐད་ཅིག་གཅིག་ལ་ཐུགས་ཆུད་ནས། །གསུང་དབྱངས་གཅིག་གིས་སོ་སོར་ལན་ཡང་འདེབས། །ཞེས་དང་། ཏིང་ངེ་འཛིན་རྒྱལ་པོ་ལས། འཇིག་རྟེན་ཕན་པ་ཁྱེད་ཀྱི་གསུང་གཅིག་ལས། །མོས་པ་ཐ་དད་བཞིན་དུ་སྒྲ་འབྱུང་སྟེ། །རྒྱལ་བས་བདག་ལ་བསྟན་སྙམ་སོ་སོར་སེམས། །ཞེས་སོ། །དེ་ལྟར་ངེས་པའི་དོན་གྱི་རྒྱུ་མཚན་ནི་འདི་ཡིན་ཏེ། གསུང་སྒྲ་ཚིག་རང་མཚན་པར་མེད་ལ། གདུལ་བྱའི་མོས་པ་དང་། སངས་རྒྱས་ཀྱི་བྱིན་རླབས་དང་། དུས་སུ་ཚོགས་པའི་རྐྱེན་གསུམ་འཛོམ་པ་ལས་སྐྱེས་བུའི་རྣམ་རིག་ལ་གསལ་བ་སྟེ། གསང་བ་བསམ་གྱིས་མི་ཁྱབ་པའི་མདོ་ལས། ཞི་བའི་བློ་གྲོས། གང་གི་ཚེ་བཅོམ་ལྡན་འདས་ཀྱིས་འདི་སྐད་དུ། ཀཽ་ཌི་ནྱ་ལ་མིག་མི་རྟག་གོ་ཞེས་བཀའ་སྩལ་པའི་ཚེ། སྡུག་བསྔལ་གྱིས་འདུལ་བ་རྣམས་ཀྱིས་ནི་མིག་སྡུག་བསྔལ་ལོ་ཞེས་ཐོས་སོ། །བདག་མེད་པས་འདུལ་བ་རྣམས་ཀྱིས་ནི། མིག་བདག་མེད་དོ་ཞེས་ཐོས་སོ། །སྟོང་པ་ཉིད་ཀྱི་འདུལ་བ་རྣམས་ཀྱིས་ནི། མིག་སྟོང་པ་ཉིད་དོ་ཞེས་ཐོས་སོ། །ཞི་བས་འདུལ་བ་རྣམས་ཀྱིས་ནི་མིག་ཞི་བའོ་ཞེས་ཐོས་སོ། །དབེན་པས་འདུལ་བ་རྣམས་ཀྱིས་ནི། མིག་དབེན་པའོ་ཞེས་ཐོས་སོ། །མི་རྟག་པས་འདུལ་བ་རྣམས་ཀྱིས་ནི། མིག་མི་རྟག་གོ་ཞེས་ཐོས་སོ། །ཞེས་པ་ལྟར་རོ། །དེའི་ཕྱིར་ངེས་པའི་དོན་མཐར་ཐུག་པར་སངས་རྒྱས་ཀྱི་རང་བཞིན་ནི་ཆོས་ཀྱི་སྐུ་ཡིན་ན། གསུང་ཚིག་དང་ཡི་གེར་གནས་པའི་སྒྲ་ཚིག་རང་མཚན་པར་མི་བལྟ་སྟེ། དཀོན་མཆོག་བརྩེགས་པ་ལས། ཞི་བའི་བློ་གྲོས་གང་གིས་མཚན་མོ་ལ་མངོན་པར་རྫོགས་པར་སངས་རྒྱས་ནས། གང་གིས་མཚན་མོ་མྱ་ངན་ལས་འདས་པའི་བར་དུ། ངས་ཆོས་ཚིག་འབྲུ་གཅིག་ཙམ་ཡང་བསྟན་པ་མེད་དོ། །ཞེས་གསུངས་པའི་དོན་གྱི་དབྱིངས་འཇལ་ཤེས་ན་བཀའ་དང་བསྟན་བཅོས་རྒྱ་མཚོ་ལྟ་བུའི་ཆོས་ཀྱི་འབྱུང་གནས་དང་རང་བཞིན་ལ་བློ་མིག་ཡངས་པར་འགྱུར་ཏེ་རྒྱུད་བླ་མ་ལས། ཇི་ལྟར་སྒྲ་སྙན་གྱིས་ནི་སྒྲ། །གཞན་གྱི་རྣམ་རིག་ལས་བྱུང་བ། །རྣམ་རྟོག་མེད་ཅིང་བཟོ་མེད་པ། །དེ་ལྟར་དེ་བཞིན་གཤེགས་པའི་གསུང་། །གཞན་གྱི་རྣམ་རིག་ལས་བྱུང་བ། །ཕྱི་དང་ནང་ན་གནས་མ་ཡིན། །ཞེས་པའི་དོན་ཁོང་དུ་ཆུད་པར་རིག་པར་བྱའོ། །དེ་ལྟ་ན་ཡུམ་བར་མ་ལས། ཨེ་མ། འཛམ་བུའི་གླིང་དུ་ཆོས་ཀྱི་འཁོར་ལོ་གཉིས་པ་བསྐོར་བ་འབྱུང་ངོ་། །ཞེས་པ་དང་། ཤེར་ཕྱིན་བདུན་བརྒྱ་པ་ལས། ལན་གསུམ་བཟླས་ཏེ་ཆོས་ཀྱི་འཁོར་ལོ་རྣམ་པ་བཅུ་གཉིས་སུ་བསྐོར་རོ། །ཞེས་པ་ལ་སོགས་པས་གནོད་དོ་ཞེ་ན། རིམ་གྱིས་འཇུག་པའི་བློ་ཅན་རྣམས་ལ་འཁོར་ལོ་གསུམ་རིམ་པས་གསུངས་པར་སྣང་བ་ཡང་འགལ་བ་མེད་ལ། ཅིག་ཅར་དུ་འཇུག་པའི་བློ་ཅན་རྣམས་ལ་བྱ་བ་རྫོགས་པའི་སྐད་ཅིག་ལ་བསྟན་པ་ལྟར་སྣང་སྟེ། མདོ་སྡེ་ཡོན་ཏན་བཀོད་པ་ལས། ང་ཡིས་ཅི་ཡང་མ་གསུངས་པར། །སེམས་ཅན་རྣམས་ལ་ཁྱབ་བདག་སྣང་། །གང་ཚེ་རིམ་གྱིས་མངོན་འདོད་པ། །དེ་དག་ཀུན་ལ་དེ་བཞིན་ཏེ། །དུས་གཅིག་ཉིད་དུ་འཇུག་པ་ལ། །ཆོས་ཀྱི་རྣམ་གྲངས་རྫོགས་པར་སྣང་། །ཡིད་བཞིན་རེ་བ་རྣམ་སྐོང་བའི། །གསུང་གི་ཆེ་བ་དེ་ཉིད་དོ། །ཞེས་སོ། །དེ་དེ་ལྟར་ཡིན་དུ་ཆུག་ཀྱང་དགོངས་པ་ངེས་འགྲེལ་ལས། ཆོས་ཐ་དད་པ་གསུངས་ཀྱིས་གནས་ཐ་དད་པ་དང་། དུས་ཐ་དད་པ་མ་བཤད་པའི་ཕྱིར་རོ། །ཞེས་པས་རིམ་པར་གསུངས་པ་ལ་གནོད་པར་དོགས་ན། དེ་ནི་ཆོས་ཀྱི་རྣམ་གྲངས་གཅིག་ཉིད་ལའང་རྣམ་པར་དབྱེ་བ་ཐ་དད་པར་སྨོས་པ་རྣམས། དུས་དང་གནས་སྐབས་གཞན་གྱིས་བར་མ་ཆོད་པར་གསུངས་པ་ལ་དགོངས་ཀྱིས། ཆོས་ཀྱི་རྣམ་གྲངས་གཞན་དུས་དང་གནས་སྐབས་གཞན་དུ་མ་གསུངས་ཞེས་བསྟན་པ་མ་ཡིན་པས་དོན་དམ་དུ་མ་བསྟན། ཀུན་རྫོབ་ཏུ་བསྟན་ནོ་ཟེར་བའི་ལྕེ་གཉིས་པའང་བརྐྱང་མི་དགོས་ཏེ། དགོངས་པ་ལུང་སྟོན་ལས་ཀྱང་། རྟོག་པ་མེད་ཅིང་འཁྲུག་པ་མེད། །ཡིད་འོང་རྡོ་རྗེའི་གསུང་གཅིག་ལ། །གདུལ་བྱའི་བསམ་པའི་དབང་གིས་ན། །བྱེ་བྲག་མང་པོར་འགྱུར་བ་ཡིན། །ཞེས་སོ། །དེ་ལྟ་མོད་ཀྱི་ཐུན་མོང་བའི་སྣང་ངོར་སངས་རྒྱས་སྤྲུལ་པའི་སྐུའི་གསུང་གི་ཡོན་ཏན་གྱི་ཡན་ལག་དྲུག་ཅུར་རྫོགས་པ་ཡིན་ཏེ། ཉི་ཁྲི་སྣང་བར་གསང་བ་བསམ་གྱིས་མི་ཁྱབ་པའི་དོན་བསྟན་པའི་རྗེས་སུ་འབྲང་ན། སེམས་ཅན་གྱི་ཁམས་ཀྱི་དགེ་བའི་རྩ་བ་ཉེ་བར་སྟོན་པའི་ཕྱིར་གསུང་མཉེན་པ་དང་། མཐོང་ཆོས་སུ་བདེ་བ་ལ་རེག་པའི་ཕྱིར་འཇམ་པ་དང་། དོན་བཟང་བའི་ཕྱིར་ཡིད་དུ་འོང་བ་དང་། ཡི་གེ་བཟང་བའི་ཕྱིར་ཡིད་དུ་འཐད་པ་དང་། འཇིག་རྟེན་ལས་འདས་པ་བླ་ན་མེད་པའི་རྗེས་ལས་འཐོན་པའི་ཕྱིར་དག་པ་དང་། ཉོན་མོངས་པའི་བག་ལ་ཉལ་གྱི་བག་ཆགས་ཐམས་ཅད་དང་བྲལ་བའི་ཕྱིར་དྲི་མ་མེད་པ་དང་། ཚིག་དང་ཡི་གེ་རབ་ཏུ་གྲགས་པའི་ཕྱིར་རབ་ཏུ་གསལ་བ་དང་། མུ་སྟེགས་ཅན་བློ་གྲོས་ངན་པ་ཐམས་ཅད་ཀྱི་ལྟ་བ་རྣམ་པར་འཇོམས་པའི་སྟོབས་ཀྱི་ཡོན་ཏན་དང་ལྡན་པའི་ཕྱིར་སྙན་ཅིང་འཇེབས་པ་དང་། སྒྲུབ་པས་ངེས་པར་འབྱང་བ་དང་ལྡན་པའི་ཕྱིར་མཉན་པར་འོས་པ་དང་། ཕ་རོལ་གྱི་རྒོལ་བ་ཐམས་ཅད་ཀྱིས་མི་བརྫི་བའི་ཕྱིར་མི་ཚུགས་པ་དང་། ཐམས་ཅད་དགའ་བར་བྱེད་པའི་ཕྱིར་སྙན་པ་དང་། འདོད་ཆགས་ལ་སོགས་པའི་གཉེན་པོ་ཡིན་པའི་ཕྱིར་དུལ་བ་དང་། བསླབ་པ་བཅའ་བའི་ཐབས་བདེ་བའི་ཕྱིར་མི་རྩུབ་པ་དང་། ངེས་པར་འབྱུང་བའི་ཐབས་ཡང་དག་པར་སྟོན་པར་མཛད་པའི་ཕྱིར་མི་བརླང་བ་དང་། ཐེག་པ་གསུམ་ཆར་གྱི་འདུལ་བ་སྟོན་པའི་ཕྱིར་རབ་ཏུ་འདུལ་བ་དང་། རྣམ་གཡེང་གི་གཉེན་པོར་གྱུར་པའི་ཕྱིར་རྣ་བར་སྙན་པ་དང་། ཏིང་འཛིན་བསྐྱེད་པའི་ཕྱིར་ལུས་སིམ་པར་བྱེད་པ་དང་། ལྷག་མཐོང་གི་རབ་ཏུ་དགའ་བ་བསྐྱེད་པར་མཛད་པའི་ཕྱིར་སེམས་སིམ་པར་བྱེད་པ་དང་། ཐེ་ཚོམ་གཅོད་པར་མཛད་པའི་ཕྱིར་སྙིང་དགའ་བར་བྱེད་པ་དང་། ལོག་པ་དང་མ་ངེས་པ་སེལ་བར་བྱེད་པའི་ཕྱིར་དགའ་བ་དང་བདེ་བ་བསྐྱེད་པ་དང་། བསྒྲུབ་པ་ལ་འགྱོད་པ་མེད་པའི་ཕྱིར་ཡོངས་སུ་གདུང་བ་མེད་པ་དང་། ཐོས་པ་ལས་བྱུང་བ་ཕུན་སུམ་ཚོགས་པའི་རྟེན་ཡིན་པའི་ཕྱིར་ཀུན་ཤེས་པར་བྱ་བ་དང་། བསམ་པ་ལས་བྱུང་བའི་ཤེས་རབ་ཕུན་སུམ་ཚོགས་པའི་རྟེན་ཡིན་པའི་ཕྱིར་རྣམ་པར་རིག་པར་བྱ་བ་དང་། སློབ་དཔོན་གྱི་དཔེ་མཁྱུད་མི་མངའ་བར་ཆོས་སྟོན་པར་མཛད་པའི་ཕྱིར་རྣམ་པར་གསལ་བ་དང་། རང་གི་དོན་རྗེས་སུ་ཐོབ་པ་རྣམ་པར་དགའ་བར་བྱེད་པའི་ཕྱིར་དགའ་བར་བྱེད་པ་དང་། རང་གི་དོན་མ་ཐོབ་པ་རྣམས་ཀྱིས་དགའ་བར་བྱ་བ་ཡིན་པའི་ཕྱིར་མངོན་པར་དགའ་བར་བྱ་བ་དང་། བསམ་གྱིས་མི་ཁྱབ་པའི་ཆོས་རྣམས་ཡང་དག་པར་སྟོན་པར་མཛད་པའི་ཕྱིར་ཀུན་ཤེས་པ་དང་། བསམ་གྱིས་མི་ཁྱབ་པའི་ཆོས་རྣམས་ཡང་དག་པར་སྟོན་པར་མཛད་པའི་ཕྱིར་རྣམ་པར་རིག་པར་བྱ་བ་དང་། ཚད་མ་དང་མི་འགལ་བའི་ཕྱིར་རིགས་པ་དང་། གདུལ་བྱ་རྣམས་ཇི་ལྟར་རིགས་པར་སྟོན་པར་མཛད་པའི་ཕྱིར་འབྲེལ་བ་དང་། དོན་མེད་མི་གསུང་བའི་ཕྱིར་ཟློས་པའི་སྐྱོན་མེད་པ་དང་། མུ་སྟེགས་ཅན་གྱི་ཚོགས་ཐམས་ཅད་སྐྲག་པར་མཛད་པའི་ཕྱིར་སེང་གེའི་སྒྲའི་ཤུགས་དང་། གསུང་རྒྱ་ཆེ་བ་ཉིད་ཀྱི་ཕྱིར་གླང་པོ་ཆེའི་སྒྲ་སྐད་དང་། ཟབ་པ་ཉིད་ཀྱི་ཕྱིར་འབྲུག་གི་སྒྲ་དབྱངས་དང་། བཟུང་བར་འོས་པའི་ཕྱིར་ལག་འགྲོའི་དབང་པོའི་སྒྲ་དབྱངས་དང་། ཤིན་ཏུ་སྙན་པའི་ཕྱིར་དྲི་ཟའི་གླུ་དབྱངས་དང་། རྣོ་བ་དང་གཉིས་སུ་མི་གསུང་བའི་ཕྱིར་ཀ་ལ་པིང་ཀའི་སྒྲ་དབྱངས་དང་། ཐག་རིང་དུ་གྲགས་པའི་ཕྱིར་ཚངས་པའི་སྒྲ་དབྱངས་དང་། གྲུབ་པ་ཐམས་ཅད་ཀྱི་སྔོན་དུ་འགྲོ་བ་ཡིན་པའི་ཕྱིར་ཤང་ཤང་ཏེའུའི་སྒྲ་དབྱངས་དང་། འདའ་བར་བྱ་བ་མ་ཡིན་པའི་ཕྱིར་ལྷའི་དབང་པོའི་དབྱངས་ལྟར་སྙན་པ་དང་། བདུད་དང་ཕྱིར་རྒོལ་བ་ཐམས་ཅད་ལས་རྣམ་པར་རྒྱལ་བའི་སྔོན་དུ་འགྲོ་བའི་ཕྱིར་རྔའི་སྒྲ་དང་། བསྟོད་པས་ཀུན་ནས་ཉོན་མོངས་པ་མི་མངའ་བའི་ཕྱིར་མི་ཁེངས་པ་དང་། སྨད་པས་ཞུམ་པ་མི་མངའ་བའི་ཕྱིར་མི་དམའ་བ་དང་། ལེགས་པར་སྦྱར་བའི་སྐད་ལ་སོགས་པ་སྒྲའི་མཚན་ཉིད་རྣམ་པ་ཐམས་ཅད་པའི་རྗེས་སུ་ཞུགས་པ་དང་། བསྙེལ་ཏེ་གསུང་བ་མི་མངའ་བའི་ཕྱིར་ཟུར་ཆག་པ་མེད་པ་དང་། གདུལ་བྱ་རྣམས་ཀྱི་བྱ་བ་དུས་ཐམས་ཅད་དུ་ཉེ་བར་གནས་པར་མཛད་པའི་ཕྱིར་མ་ཚང་བ་མེད་པ་དང་། རྙེད་པ་དང་བཀུར་སྟི་ལ་མི་བརྟེན་པའི་ཕྱིར་མ་ཞུམ་པ་དང་། བསྙེངས་པ་དང་བྲལ་བའི་ཕྱིར་མི་ཞན་པ་དང་། སྐྱེ་བ་མེད་པའི་ཕྱིར་རབ་ཏུ་དགའ་བ་དང་། རིག་པའི་གནས་ཐམས་ཅད་པ་མཁས་པ་དང་ལྡན་པའི་ཕྱིར་ཁྱབ་པ་དང་། སེམས་ཅན་རྣམས་ཀྱི་དོན་ཐམས་ཅད་རྫོགས་པར་མཛད་པའི་ཕྱིར་ཐབ་མེད་པ་དང་། རྒྱུན་ཆད་པ་མེད་པའི་ཕྱིར་རྒྱུན་ཆགས་པ་དང་། རྣམ་པ་སྣ་ཚོགས་སུ་ཉེ་བར་གནས་པའི་ཕྱིར་བརྗིད་པ་དང་། གསུང་སྒྲའི་རྣམ་པ་དུ་མར་གནས་པའི་ཕྱིར་སྒྲ་ཐམས་ཅད་རྫོགས་པར་བྱེད་པ་དང་། གཅིག་ལས་དོན་དུ་མའི་རྣམ་པར་རིག་པ་ཉེ་བར་གནས་པའི་ཕྱིར་དབང་པོ་ཐམས་ཅད་ཚིམ་པར་བྱེད་པ་དང་། ཇི་ལྟར་དམ་བཅས་པ་བཞིན་དུ་མཛད་པའི་ཕྱིར་མ་སྨད་པ་དང་། ཐོབ་པའི་དུས་སུ་རབ་ཏུ་སྦྱོར་བའི་ཕྱིར་མི་འགྱུར་བ་དང་། བརྗོད་པ་དལ་ཞིང་འབྲེལ་ཆགས་པའི་ཕྱིར་མ་བརྟབས་པ་དང་། དེའི་གསུང་ཐག་རིང་པོ་དང་ཉེ་བ་མཚུངས་པར་ཐོས་པའི་ཕྱིར་ཀུན་ཏུ་གྲགས་པ་དང་། འཇིག་རྟེན་པའི་དོན་ཐམས་ཅད་དཔེའི་ཆོས་སུ་བསྒྱུར་བའི་ཕྱིར་རྣམ་པ་ཐམས་ཅད་ཀྱི་མཆོག་དང་ལྡན་པ་སྟེ་གསུང་དབྱངས་ཡན་ལག་དྲུག་ཅུ་རྩ་བཞིའོ། །དེ་ལྟར་གཟུགས་སྐུའི་རང་བཞིན་མཚན་དཔེ་རྒྱ་མཚོ་ལྟ་བུའི་རྟེན་ལ། བརྟེན་པ་ཡེ་ཤེས་ཀྱི་ཆོས་ཉིད་ཇི་ལྟར་གནས་པ་མཐའ་དག་ནི་རྣམ་པ་ཀུན་གྱི་མཆོག་དང་ལྡན་པའི་སངས་རྒྱས་ཆོས་ཀྱི་སྐུའི་ངོ་བོ་སྟེ། མདོ་ལས། རྣམ་པ་ཐམས་ཅད་མཁྱེན་པ་ཉིད་ཀྱི་དམིགས་པ་ནི་དངོས་པོ་མེད་པའོ། །ཞེས་སོ། །དེ་ལ་ཆོས་ཀྱི་སྐུ་ནི། དབྱིངས་དང་ཡེ་ཤེས་དབྱེར་མི་ཕྱེད་པའི་རང་བཞིན་དྲི་མ་མཐའ་དག་དང་བྲལ་བའི་ཡེ་ཤེས་ནམ་མཁའ་ལྟ་བུའི་ངོ་བོ་ཉིད་དེ་སངས་རྒྱས་གཙོ་ལས། ཆོས་སྐུ་མཁའ་འདྲ་གཟུགས་སྐུ་འཇའ་སྐུར་ལྡན། །ཞེས་གསུངས་པ་བཞིན་ནོ། །དབྱེ་ན་དབྱིངས་དག་མཉམ་ཆེན་པོ་སྟོང་པ་སྐུ་ཐམས་ཅད་ཀྱི་ཆོས་ཉིད་བྱེད་པའི་ཆ་ནས་ངོ་བོ་ཉིད་ཀྱི་སྐུ་དང་ཡེ་ཤེས་སྤངས་རྟོགས་མཐར་ཕྱིན་པ་རིག་པའི་ངོ་བོ་ཆོས་སུམ་ཅུ་རྩ་བདུན་གྱི་བདག་ཉིད་ལ་ནི་རྟོགས་པ་ཡེ་ཤེས་ཀྱི་ཆོས་སྐུ་ཞེས་འདོད་དེ་དང་པོ་ངོ་བོ་ཉིད་སྐུ་ནི་མངོན་རྟོགས་རྒྱན་ལས། ཐུབ་པའི་ངོ་བོ་ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་གྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཞེས་སོ། །རྟོགས་པ་ཡེ་ཤེས་ཀྱི་ཆོས་སྐུ་ནི་དེ་ཉིད་ལས། བྱང་ཆུབ་ཕྱོགས་མཐུན་ཚད་མེད་དང་། །རྣམ་པར་ཐར་དང་མཐར་གྱིས་ནི། །སྙོམས་འཇུག་དགུ་ཡི་བདག་ཉིད་དང་། །ཟད་པར་བཅུ་ཡི་བདག་ཉིད་དང་། །ཟིལ་གྱིས་གནོན་པའི་སྐྱེ་མཆེད་ནི། །རབ་ཏུ་དབྱེ་བས་རྣམ་བརྒྱད་དང་། །ཉོན་མོངས་མེད་དང་སྨོན་མཁྱེན་དང་། །མངོན་ཤེས་སོ་སོར་ཡང་དག་རིག །རྣམ་པ་ཐ་དད་བཞི་དག་དང་། །དབང་བཅུ་དང་ནི་སྟོབས་བཅུ་དང་། །མི་འཇིགས་པ་ནི་བཞི་དག་དང་། །བསྲུང་བ་མེད་པ་རྣམ་གསུམ་དང་། །དྲན་པ་ཉེར་བཞག་རྣམ་གསུམ་དང་། །བསྙེལ་བ་མི་མངའི་ཆོས་ཉིད་དང་། །བག་ཆགས་ཡང་དག་བཅོམ་པ་དང་། །སྐྱེ་ལ་ཐུགས་རྗེ་ཆེན་པོ་དང་། །ཐུབ་པ་ཁོ་ནའི་མ་འདྲེས་ཆོས། །བཅོ་བརྒྱད་བཤད་པ་གང་ཡིན་དང་། །རྣམ་པ་ཐམས་ཅད་མཁྱེན་ཉིད་དང་། །ཆོས་ཀྱི་སྐུ་ཞེས་བརྗོད་པ་ཡིན། །ཞེས་ཁམས་ཀྱི་ཡེ་ཤེས་མངོན་དུ་གྱུར་པའི་རིག་ཆ་ལྡོག་པའི་ཆོས་སུམ་ཅུ་རྩ་བདུན་འཆད་པར་འགྱུར་བ་དང་། གཟུགས་ཅན་གཟུགས་ལ་བལྟ་བའི་རྣམ་པར་ཐར་པ་ནི་ནང་གཟུགས་ཀྱི་སྣང་བ་མ་འགགས་པས་ཕྱི་རོལ་གྱི་གཟུགས་སྣང་སྟོང་སྒྱུ་མར་བལྟ་བས་སྣང་བའི་བདེན་ཞེན་ལོག་པའོ། །གཟུགས་ཅན་མ་ཡིན་པ་གཟུགས་ལ་བལྟ་བའི་རྣམ་པར་ཐར་པ་ནི་ནང་གཟུགས་སུ་མི་དམིགས་པས་ཕྱི་རོལ་གཟུགས་ལ་བལྟ་བའི་ཕྱི་ནང་གི་བདེན་ཞེན་ལས་ཐར་པའོ། །གེགས་སེལ་སྡུག་པའི་རྣམ་པར་ཐར་པ་ནི་ཆོས་ཐམས་ཅད་སྟོང་ཉིད་དུ་རོ་གཅིག་པར་བལྟ་བས་འཛིན་པ་ཀུན་ལས་ཐར་པའོ། །ནམ་མཁའ་མཐའ་ཡས་སྐྱེ་མཆེད་ཀྱི་རྣམ་པར་ཐར་པ་ནི་སེམས་ཉིད་ནམ་མཁའ་ལྟ་བུའི་དོན་མཐོང་བའོ། །རྣམ་ཤེས་མཐའ་ཡས་སྐྱེ་མཆེད་ཀྱི་རྣམ་པར་ཐར་པ་ནི་ཐམས་ཅད་སེམས་དང་ཡེ་ཤེས་ཀྱི་རོལ་པར་རྟོགས་པའོ། །ཅི་ཡང་མེད་པའི་སྐྱེ་མཆེད་ཀྱི་རྣམ་པར་ཐར་པ་ནི་ཕྱི་ནང་གང་དུའང་གཟུངས་འཛིན་མེད་པའོ། །འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་རྣམ་པར་ཐར་པ་ནི་སྤྲོས་པ་དང་མཚན་མའི་སྤྱོད་ཡུལ་ཞི་བའོ། །འགོག་པའི་རྣམ་པར་ཐར་པ་ནི་འཁོར་འདས་ལ་སོགས་པའི་ཆོས་ཐམས་ཅད་ལ་དམིགས་ཞེན་འཛིན་པ་གཏན་དུ་མི་མངའ་བ་སྟེ་རྣམ་པར་ཐར་པ་བརྒྱད། བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་སྟེ་རང་རང་གི་དངོས་གཞི་བཞི། ནམ་མཁའ་མཐའ་ཡས་དང་། རྣམ་ཤེས་མཐའ་ཡས་དང་། ཅི་ཡང་མེད་པ་དང་། སྲིད་རྩེའི་དངོས་གཞི་སྟེ་གཟུགས་མེད་པའི་དངོས་གཞི་བཞི། འགོག་པའི་སྙོམ་འཇུག་སྟེ་མཐར་གྱིས་གནས་པའི་སྙོམས་པར་འཇུག་པ་དགུ། ཟད་པར་ས་དང་། དེ་བཞིན་དུ་ཆུ་དང་། མེ་དང་། རླུང་དང་། ནམ་མཁའ་དང་། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཟད་པར་རྣམ་ཤེས་ཀྱི་སྐྱེ་མཆེད་དེ་ཟད་པར་གྱི་རྣམ་པ་བཅུ། དབྱིབས་ཟིལ་གྱིས་གནོན་པ་བཞི་དང་། ཁ་དོག་ཟིལ་གྱིས་གནོན་པ་བཞི་སྟེ་ཟིལ་གྱིས་གནོན་པའི་སྐྱེ་མཆེད་བརྒྱད། ཉོན་མོངས་པ་མེད་དང་། སྨོན་ལམ་མཁྱེན་པ་ལ་སོགས་མདོར་ན་དེའི་རང་བཞིན་ངོ་བོ་ཉིད་དབྱིངས་ནམ་མཁའ་ལྟ་བུའི་ངང་ན་རྟོགས་པ་ཡེ་ཤེས་ཀྱི་ཉི་མ་ལྟ་བུ་གློ་བུར་གྱི་སྒྲིབ་པ་ཆ་དང་བཅས་པ་སྤངས་ཤིང་། རྟོགས་པའི་ཡོན་ཏན་མཐའ་དག་རྫོགས་པའི་ཆོས་ཉིད་ངེས་པ་ཉིད་དུ་བློས་བསམ་གྱིས་མི་ཁྱབ་པའི་རང་བཞིན་ཏེ། རྒྱུད་བླ་མ་ལས། སངས་རྒྱས་ཉིད་ནི་དབྱེར་མེད་པ། །དག་པའི་ཆོས་ཀྱི་རབ་དབྱེ་བར། །ཉི་མཁའ་བཞིན་ཏེ་ཡེ་ཤེས་དང་། །སྤངས་རྟོགས་གཉིས་ཀྱི་མཚན་ཉིད་དེ། །འོད་གསལ་བྱ་མིན་དབྱེར་མེད་པར། འཇུག་ཅན་གངྒཱའི་ཀླུང་གིས་ནི། །རྡུལ་ལས་འདས་པའི་སངས་རྒྱས་ཀྱི། །ཆོས་རྣམས་ཀུན་དང་ལྡན་པ་ཉིད། །ཅེས་སོ། །ལོངས་སྤྱོད་རྫོགས་སྐུ་ནི། འཁོར་བའི་ཆ་ཀུན་གཞི་ཚོགས་བརྒྱད་དང་བཅས་པ་དབྱིངས་དག་མཉམ་ཆེན་པོའི་སྦུབས་སུ་ནུབ་པའི་སྟོབས་ཀྱི་ཆ་ནས་བཞག་པའི་གཞིའི་གནས་ལུགས་ཀྱི་སྣང་ཆའི་ཡོན་ཏན་སྟོང་གཟུགས་ཀྱི་སྐུར་ཡོངས་སུ་རྫོགས་པ་ངེས་པ་ལྔ་དང་ལྡན་པའི་རང་བཞིན་ཅན་ནོ། །དེ་ལ་ངེས་པ་ལྔ་ནི། གནས་ངེས་པ་འོག་མིན་སྟུག་པོ་བཀོད་པར། སྟོན་པ་ངེས་པ་རིགས་ལྔའི་སངས་རྒྱས་ཀྱི་ས། འཁོར་ངེས་པ་ས་བཅུའི་བྱང་ཆུབ་སེམས་དཔའ་ལ། ཆོས་ངེས་པ་ཐེག་པ་ཆེན་པོ་འབའ་ཞིག །དུས་ངེས་པ་རྟག་པ་རྒྱུན་གྱི་འཁོར་ལོར་འབྱུང་བ་སྟེ། དེ་ལ་སངས་རྒྱས་རྣམས་གདོད་ནས་མངོན་པར་བྱང་ཆུབ་པའི་འོག་མིན་ནི་ཁམས་གསུམ་ལས་འདས་པའི་དབང་ཕྱུག་ཆེན་པོའི་གནས་སྟུག་པོ་བཀོད་པ་སྟེ་ཆོས་དབྱིངས་བསྟོད་པ་ལས། དབང་ཕྱུག་ཆེན་པོའི་གནས་མཆོག་དང་། །འོག་མིན་དེ་ཉིད་རྣམ་མཛེས་པ། །ཤེས་པ་གསུམ་པ་གཅིག་ཉིད་དུ། །འདྲེས་པར་གྱུར་ལ་བདག་སྨྲའོ། །ཞེས་པ་ལྟར་ཁམས་གསུམ་དུ་རྟོག་པའི་ཤེས་པ་དུ་མ་རོ་གཅིག་ཏུ་འདྲེས་ཤིང་གང་དུ་སྒྲིབ་པ་མཐའ་དག་དང་བྲལ་ནས་དབྱིངས་དང་ཡེ་ཤེས་ཐ་དད་དུ་བལྟ་བའི་འགལ་བ་འདུ་བ་མ་ཡིན་པ་དེ་ན་ཡོད་དེ། དཔེར་ན་རྨི་ལམ་གྱི་སྐྱེད་མོས་ཚལ་གང་དུ་གཉིད་ཀྱིས་ལོག་པའི་འཁྲུལ་པ་དང་ལྷན་ཅིག་སྣང་བ་ཉིད་ལས། དེ་དག་ད་ལྟ་འདི་ན་ཡོད་དོ་ཞེས་རིས་སུ་མ་ཆད་པ་བཞིན་ནོ། །དེ་སྐད་དུ་རྒྱན་སྟུག་པོ་བཀོད་པ་ལས། གཟུགས་མེད་འདོད་དང་གཟུགས་རྣམས་དང་། །འདུ་ཤེས་མེད་པ་དེ་བཞིན་ཏེ། །ཁམས་ལས་འདས་སོ་སངས་རྒྱས་དང་། །བཞུགས་སོ་སྟུག་པོའི་དཀྱིལ་འཁོར་ན། །ཞེས་སོ། །དེ་ལྟ་ན་ཟླ་གསང་ཐིག་ལེ་ལས། འདོད་པའི་ཁམས་དང་གཟུགས་མེད་དུ། །སངས་རྒྱས་མངོན་པར་སངས་མི་རྒྱ། །གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་དེར་སངས་རྒྱ། །ཞེས་པ་དང་འགལ་ལོ་སྙམ་ན་དེ་ནི་བདག་ཅག་གི་སྟོན་པའི་དབང་དུ་བྱས་ན། ཐོག་མ་མེད་པའི་དུས་ནས་དབྱིངས་དང་ཡེ་ཤེས་རོ་གཅིག་པའི་རྩལ་སྣང་གི་འོག་མིན་དུ་སངས་རྒྱས་ནས་སེམས་ཅན་གྱི་དོན་མཛད་བཞིན་པ་ལས། མི་མཇེད་འདི་ཆགས་ནས་སེམས་ཅན་སོ་སོའི་སྣང་བ་དང་། མོས་པ་ཐ་དད་པའི་ངོར་གཟུགས་ཁམས་ཀྱི་འོག་མིན་དུའང་སངས་རྒྱས་ནས་ལྷ་རྣམས་བདེན་པ་ལ་བཀོད་པའི་རྗེས་ལ། སླར་ཡང་འཛམ་བུའི་གླིང་གི་རྡོ་རྗེའི་གདན་དུ་སངས་རྒྱ་བའི་ཚུལ་བསྟན་པ་ཉིད་དེ་ལངས་ཀར་གཤེགས་པ་ལས། གཙང་མའི་གནས་ནི་སྤངས་ནས་སུ། །འོག་མིན་ཞེས་བྱ་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་གཅིག་འདིར་སངས་རྒྱས། །ཞེས་བསྟན་པ་ཡིན་ནོ། །སྟོན་པ་རྣམས་ཀྱི་མཚན་དཔེ་ནི་སྤྲུལ་པའི་སྐུ་དང་ཐུན་མོང་བ་ཉིད་དེ། མངོན་རྟོགས་རྒྱན་ལས། མཚན་ནི་སུམ་ཅུ་རྩ་གཉིས་དང་། །དཔེ་བྱད་བརྒྱད་ཅུའི་བདག་ཉིད་ནི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་དང་། འཁོར་ནི་ས་བཅུ་པའི་བྱང་ཆུབ་སེམས་དཔའ་འབའ་ཞིག་ལས་གཞན་མེད་དེ། རང་གི་སྣང་བས་བསྡུས་པའི་ཞིང་ཁམས་ཡིན་པའི་ཕྱིར་རོ། །ཆོས་ནི་ཐེག་པ་ཆེན་པོའི་ཆོས་ཀྱི་ལོངས་སྤྱོད་དམ་པས་ཁ་ན་མ་ཐོ་བ་མེད་པ་ཉེ་བར་ལོངས་སྤྱོད་པས་ན་ལོངས་སྤྱོད་རྫོགས་པའི་སྐུ་ཞེས་བརྗོད་དེ། དེའི་འགྲེལ་པ་ལས། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུའི་ངོ་བོ་ཉིད་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་པ་ལ་བཞུགས་པ་རྣམས་དང་། ཐབས་གཅིག་ཏུ་ཐེག་པ་ཆེན་པོའི་ཆོས་ཀྱི་ལོངས་སྤྱོད་ཀྱིས་དགའ་བ་དང་བདེ་བ་ཤིན་ཏུ་ཁ་ན་མ་ཐོ་བ་མེད་པ་ཉེ་བར་སྤྱོད་པའི་ཕྱིར། སངས་རྒྱས་བཅོམ་ལྡན་འདས་རྣམས་ཀྱི་ལོངས་སྤྱོད་རྫོགས་པའི་སྐུ་ཡིན་ནོ། །ཞེས་བཤད་དོ། །དུས་ངེས་པ་ནི་འཕེལ་འགྲིབ་དང་འཕོ་འགྱུར་གྱི་ཆོས་ལས་འདས་ཤིང་འདུས་མ་བྱས་པའི་རང་བཞིན་ཉིད་ཡིན་པས་ཆོས་སྐུ་དང་ངོ་བོ་གཅིག་པའི་རྣམ་འགྱུར་ཅན་གདུལ་བྱའི་བསོད་ནམས་ཚད་མེད་པ་འཁོར་བ་ཇི་སྲིད་པར་རྟག་པས་ན་འཇུག་པ་ལས། ཞི་སྐུ་དཔག་བསམ་ཤིང་ལྟར་གསལ་གྱུར་ལ། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་སྒྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བ་ཡིན། །ཞེས་དང་། བླ་མར། ཆོས་ཀྱི་དབང་ཕྱུག་འཆི་བའི་བདུད་བཅོམ་དང་། །ངོ་བོ་མེད་ཕྱིར་འཇིག་རྟེན་མགོན་པོ་རྟག །ཅེས་གསུངས་སོ། །ད་ནི་ཆོས་དཀོན་མཆོག་གི་ཡོན་ཏན་བཤད་པའི་ཕྱིར། ཆོས་ནི་བསོད་ནམས་ལམ་དང་མྱ་ངན་འདའ། །བརྗོད་བྱའི་དོན་ཏེ་དེ་ལའང་འབྲས་བུ་དང་། །བྱ་བའི་རང་བཞིན་གཉིས་སུ་གནས་པ་ལས། །བདེན་གཉིས་ཞེས་བྱ་འགོག་ལམ་རྣམ་གཉིས་ཡིན། །སྤྱིར་རྣམ་བཤད་རིག་པ་ལས་ཆོས་ཀྱི་སྒྲ་འཇུག་པའི་ཡུལ་རྣམ་པ་བཅུར་བསྟན་པ་ལས། འདིར་དམ་པའི་ཆོས་ཀྱི་རང་བཞིན་ནི་བསོད་ནམས་དང་། ལམ་དང་། མྱ་ངན་ལས་འདས་པ་གསུམ་བརྗོད་བྱའི་དོན་ཡིན་ལ། གསུང་རབ་ནི་བརྗོད་བྱེད་ཀྱི་ཚིག་ཏུ་ཤར་བས་སོ། །དེའང་འགོག་པའི་བདེན་པའི་ཆོས་དང་། ལམ་གྱི་བདེན་པའི་ཆོས་རྣམ་པ་གཉིས་ཕན་ཚུན་འབྲས་བུ་དང་། བྱ་བའི་རང་བཞིན་དུ་གནས་པས་ན་མགོན་པོ་བྱམས་པས། གང་ཞིག་གང་གིས་ཆགས་བྲལ་བ། །བདེན་གཉིས་མཚན་ཉིད་ཅན་དེ་ཆོས། །ཆགས་བྲལ་ཉིད་ནི་འགོག་པ་དང་། །ལམ་གྱི་བདེན་པ་དག་གིས་བསྡུས། །ཞེས་སོ། །དེ་ཡང་བཅོམ་ལྡན་འདས་ཀྱིས་ལེགས་པར་གསུངས་པ་ཞེས་བྱ་བ་འདི་ས་ནི་ཐོག་མ་དང་། བར་དང་། ཐ་མར་དགེ་བའི་ལུང་གི་ཆོས་མ་ལུས་པ་བསྡུས་ཏེ་བསྟན་ལ། ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་བསྟོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་ཀྱི་སོ་སོ་རང་གི་རིག་པར་བྱའོ། །ཞེས་པ་འདིས་ནི་རྟོགས་པའི་ཆོས་མ་ལུས་པའི་འགག་བསྡུས་པ་ཡིན་ཏེ། ཇི་ལྟར་གསུངས་པའི་དོན་ཇི་བཞིན་པར་མཐོང་བས་ཡང་དག་པར་མཐོང་བ། ཉོན་མོངས་པ་བག་ལ་ཉལ་གྱི་གཉེན་པོར་གྱུར་པས་ནད་མེད་པ་དུས་ཐམས་ཅད་དུ་བྱ་སླ་བ་དང་། ཡོངས་སུ་ཉམས་པ་མེད་པའི་ཕྱིར་དུས་ཆད་པ་མེད་པ། སྡུག་བསྔལ་གྱི་རྒྱ་མཚོ་ལས་ངེས་པར་འབྱུང་བ་ཉེ་བར་གཏོད་པའི་ཕྱིར་ཉེ་བར་གཏོད་པ་ཇི་ལྟར་གསུངས་པའི་གཞུང་ཐམས་ཅད་དོན་བཟང་པོ། ཚིག་འབྲུ་བཟང་པོ། སྔ་ཕྱི་མ་འགལ་བ། ཉེས་པར་སྤྱད་པའི་གདུལ་བ་དང་མ་འདྲེས་པ། གྲོལ་བ་དང་། རིགས་པའི་ཐབས་དང་ལྡན་པ། སྟོན་པ་དང་། བསྟན་པ་སྐྱོན་ཅན་གཞན་གྱི་བསྟན་བཅོས་དང་མི་མཚུངས་ཤིང་། ལེགས་པར་གསུངས་པའི་ཆོས་ཐམས་ཅད་ཀྱི་མཐར་ཐུག་ངེས་པའི་དོན་འབའ་ཞིག་ཏུ་འབབ་ཅིང་། རྫོགས་པའི་བྱང་ཆུབ་ཏུ་འགྲོ་བར་འགྱུར་བས་ན་འདི་མཐོང་བ་ལ་དོན་ཡོད་པ་ཡིན་ཏེ། མྱ་ངན་ལས་འདས་པའི་མདོ་ལས། ཆུ་བོ་ཆེན་པོ་རྒྱ་མཚོར་བབས། འབབ། གཞོལ་བ་དེ་བཞིན་དུ། ཆོས་ཐམས་ཅད་མྱ་ངན་ལས་འདས་པར་བབས། འབབ། གཞོལ་ཞེས་གསུངས་པ་ལྟར་རོ། །དེའི་མཚན་ཉིད་མཐར་ཐུག་པའང་རྟོག་གེས་བརྟག་པར་མི་ནུས་པའི་ཕྱིར་སོ་སོ་རང་གིས་རིག་པར་བྱའོ། །ཞེས་སོ། །དེ་ལ་སོ་སོ་རང་གི་རིག་པ་ནི་ཡེ་ཤེས་ཀྱི་སྤྱོད་ཡུལ་ཡིན་གྱིས། རྟོག་དཔྱོད་ཀྱི་སྤྱོད་ཡུལ་མ་ཡིན་ལ། རྟོག་དཔྱོད་ནི་རྣམ་པར་རྟོག་པ་དང་། རྣམ་པར་གཡེང་བའི་རང་བཞིན། ཕུང་པོ་ལྔ་དང་ལྷན་ཅིག་པའོ། །ཡུམ་ལ་བསྟོད་པ་ལས་ཀྱང་། སོ་སོ་རང་རིག་ཡེ་ཤེས་སྤྱོད་ཡུལ་བ། །ཞེས་པས་བསམ་གྱིས་མི་ཁྱབ་པའི་ཆོས་ཉིད་སངས་རྒྱས་ཀྱི་དགོངས་པ་རྣལ་མ་ཡིན་པར་མཉམ་གཞག་དང་རྫས་མ་འགལ་བའི་ལྷག་མཐོང་གི་ཡེ་ཤེས་སོ་སོར་རྟོག་པའི་ཤེས་རབ་ཁྱད་པར་ཅན་གྱིས་རིག་པའི་ཕྱིར། རྟོག་གེའི་གཞན་དབང་ཅན་གྱི་དགག་བསྒྲུབ་ལ་སྙིང་པོ་མ་མཐོང་ངོ་། །དེའང་། བརྗོད་བྱ་རྗོད་བྱེད་ལ་ལྟོས་ལུང་རྟོགས་ཆོས། །ལུང་ནི་གསུང་རབ་ཡན་ལག་བཅུ་གཉིས་དང་། །གཉེན་པོའི་སྒོ་ནས་སྡེ་སྣོད་གསུམ་དུ་ཤར། །ཐབས་ཀྱིས་ཆེ་བ་རིག་འཛིན་སྡེ་སྣོད་ཡིན། །གླེགས་བམ་ཡི་གེར་གནས་པ་དམ་ཚིག་རྟེན། །དེ་ཡང་བརྗོད་བྱའི་དོན་དང་རྗོད་བྱེད་ལ་ལྟོས་ནས་ལུང་དང་རྟོགས་པའི་བསྟན་པ་གཉིས་སུ་བཞག་པ་ནི་དབྱིག་གཉེན་གྱིས། སྟོན་པའི་དམ་ཆོས་རྣམ་གཉིས་ནི། །ལུང་དང་རྟོགས་པའི་བདག་ཉིད་ཅན། །ཞེས་བཤད་པ་ལྟར་རོ། །བརྗོད་བྱའི་སྒོ་ནས་ནི་བདེན་པ་གཉིས་སུ་གནས་ཏེ། རྩ་ཤེ་ལས། སངས་རྒྱས་རྣམས་ཀྱིས་ཆོས་སྟོན་པ། །བདེན་པ་གཉིས་ལ་ཡང་དག་བརྟེན། །ཞེས་དང་། དེ་གཉིས་ཀྱང་མདོར་བསྡུ་ན་དྲང་ངེས་ཀྱི་ངོ་བོར་གནས་པའི་ཚུལ། འཕགས་པ་བློ་གྲོས་མི་ཟད་པས་བསྟན་པར། ཀུན་རྫོབ་སྒྲུབ་པ་སྟོན་པ་ནི་དྲང་བའི་དོན་ནོ། །དོན་དམ་བསྒྲུབ་པ་སྟོན་པ་ནི་ངེས་པའི་དོན་ནོ། །ཞེས་སོ། །རྗོད་བྱེད་ཀྱི་སྒོ་ནས་ལུང་གི་ཆོས་གསུང་རབ་ཡན་ལག་བཅུ་གཉིས་ཏེ། བརྒྱད་སྟོང་འགྲེལ་ཆེན་ལས། མདོ་སྡེ་དབྱངས་བསྙད་ལུང་བསྟན་དང་། །ཚིགས་བཅད་ཆེད་བརྗོད་གླེང་གཞི་དང་། །རྟོགས་བརྗོད་དེ་ལྟ་བུ་བྱུང་དང་། །སྐྱེས་རབས་ཤིན་ཏུ་རྒྱས་པ་དང་། །རྨད་བྱུང་གཏན་ལ་དབབ་པའི་སྡེ། །གསུང་རབ་ཡན་ལག་བཅུ་གཉིས་སོ། །ཞེས་པ་ལྟར་རོ། །གཉེན་པོའི་སྒོ་ནས་སྡེ་སྣོད་གསུམ་སྟེ། བཤད་མ་ཐག་པའི་དང་པོ་ལྔ་ཉན་ཐོས་ཀྱི་མདོ་སྡེའི་སྡེ་སྣོད་དང་། བར་པ་གསུམ་ཉན་ཐོས་ཀྱི་འདུལ་བ། ཐ་མ་བཞི་ལས། སྐྱེས་པ་རབས་ཀྱི་སྡེས་བྱང་ཆུབ་སེམས་དཔའི་འདུལ་བའི་སྡེ་སྣོད་ཀྱི་འཁོར་དང་། ཤིན་ཏུ་རྒྱས་པ་དང་རྨད་དུ་བྱུང་བ་གཉིས་ཀྱི་བྱང་ཆུབ་སེམས་དཔའི་མདོ་སྡེའི་སྡེ་སྣོད་དང་། གཏན་ལ་དབབ་པའི་སྡེ་ནི། ཉན་ཐོས་དང་བྱང་ཆུབ་སེམས་དཔའ་གཉིས་ཀའི་ཐུན་མོང་དུ་གྱུར་བའི་ཆོས་མངོན་པའི་སྡེ་སྣོད་དུ་བཞག་པ་ཡིན་ལ། རང་སངས་རྒྱས་ལ་ནི་སྡེ་སྣོད་ལོགས་པ་མེད་དེ་ཉན་ཐོས་ཀྱི་སྡེ་སྣོད་ལ་དམིགས་པའོ། །མདོར་བསྡུ་ན་དབྱིག་གཉེན་གྱིས། མདོ་སྡེས་ནི་བསླབ་པ་གསུམ་བཤད་དོ། །འདུལ་བས་ནི་ལྷག་པའི་ཚུལ་ཁྲིམས་དང་། ལྷག་པའི་སེམས་བསྒྲུབ་པ་ཡིན་ཏེ། ཚུལ་ཁྲིམས་དང་ལྡན་པ་ནི་འགྱོད་པ་མེད་པ་ལ་སོགས་པའི་རིམ་གྱིས་ཏིང་ངེ་འཛིན་ཐོབ་པའི་ཕྱིར་རོ། །ཆོས་མངོན་པས་ལྷག་པའི་ཤེས་རབ་བསྒྲུབ་པ་ཡིན་ཏེ། དོན་ཕྱིན་ཅི་མ་ལོག་པ་སྟོན་པའི་ཕྱིར་རོ། །ཞེས་བཤད་དོ། །དེ་དག་ཀྱང་གདུལ་བྱའི་སྒོ་ནས་དབྱེ་བས་ཐབས་ཀྱིས་ཆེ་བ་ནི་རིག་པ་འཛིན་པའི་སྡེ་སྣོད་ཡིན་ཏེ། སློབ་དཔོན་ཨཱརྱ་དེ་ཝས་ཀྱང་། རིག་པ་འཛིན་པའི་སྡེ་སྣོད་དོ། །ཞེས་ལོགས་སུ་ཕྱེ་ནས་སྡེ་སྣོད་བཞི་པར་བཞག་པ་ནི་མདོ་སྡེ་གདམས་ངག་འབོགས་པ་ལས། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་གྲུབ་དུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མ་གསུངས། །ཞེས་པ་ལ་སོགས་གསུངས་པས་སོ། །དེ་ལྟར་ལུང་གི་བསྟན་པ་སྡེ་སྣོད་བཞི་པོའང་བདག་པོའི་རྐྱེན་གྱི་འདུ་བྱེད་ལས་ཡི་གེ། ཡི་གེ་འདུས་པ་ལས་མིང་། མིང་འདུས་པ་ལས་ཚིག །ཚིག་འདུས་པ་ལས་གླེགས་བམ་དུ་གནས་པ་ནི་སྐྱབས་སུ་འགྲོ་བའི་དམ་ཚིག་གི་རྟེན་ཡིན་ནོ། །རྟོགས་པའི་ཆོས་ནི་དྲན་པ་ཉེར་གཞག་ནས། །རིམ་བཞིན་ལམ་ལྔའི་ཡོན་ཏན་མཐའ་དག་དང་། །འཕགས་པའི་སྤངས་རྟོགས་ཡེ་ཤེས་སྙིང་པོ་ཅན། །བསྐྱེད་དང་རྫོགས་པ་གཟུངས་དང་ཟད་པར་དང་། །སློབ་ལམ་བཞི་དང་མི་སློབ་ལམ་གྱི་དངོས། །རྒྱུ་ཡི་ས་བཅུ་འབྲས་བུའི་བཅུ་གསུམ་སོགས། །རྡོ་རྗེ་ཐེག་པའི་རིགས་དབྱེ་དཔག་ཏུ་མེད། །གང་གི་ཡེ་ཤེས་རྒྱུད་ལ་བརྟེན་པའོ། །དེ་ལ་རྟོགས་པའི་ཡོན་ཏན་གྱི་རྟེན་དུ་གྱུར་པ་ནི་ས་ཡིན་ཏེ་བརྒྱད་སྟོང་འགྲེལ་ཆེན་ལས། ཡོན་ཏན་གྱི་རྟེན་དུ་གྱུར་པས་ན་སའོ། །ཞེས་བཤད་པ། དེའང་ཉན་རང་གི་ས་བརྒྱད་དང་། བྱང་ཆུབ་སེམས་དཔའི་ས་བཅུར་ངེས་པ་ལས། སྔ་མ་ནི། ཡུམ་བར་མ་ལས། རིགས་ཀྱི་ས་དང་། བརྒྱད་པའི་ས་དང་། མཐོང་བའི་ས་དང་། བསྲབས་པའི་ས་དང་། འདོད་ཆགས་དང་བྲལ་བའི་ས་དང་། བྱས་པ་རྟོགས་པའི་ས་དང་། ཉན་ཐོས་ཀྱི་ས་དང་། རང་སངས་རྒྱས་ཀྱི་ས་སྟེ། འདི་དག་ནི་ཉན་ཐོས་དང་རང་སངས་རྒྱས་ཀྱི་སའོ། །ཞེས་དང་། རིན་ཆེན་ཕྲེང་བ་ལས། ཇི་ལྟར་ཉན་ཐོས་ཐེག་པ་ལས། །ཉན་ཐོས་ས་ནི་བརྒྱད་བཤད་པ། །དེ་བཞིན་ཐེག་པ་ཆེན་པོ་ལ། །བྱང་ཆུབ་སེམས་དཔའི་ས་བཅུའོ། །ཞེས་བཤད་ཅིང་། སའི་ཡང་རྟེན་དུ་གྱུར་པ་ནི་ལམ་ལྔ་པོ་ཉིད་དུ་ངེས་པས་ན་འདིར་ཚོགས་ལམ་ནས་རིམ་པར་བསྙད་པའོ། །དེ་ལ་དང་པོ་ཐོས་བསམ་དང་བསོད་ནམས་ཀྱི་ཚོགས་ལ་གཙོ་བོར་སྤྱོད་པ་ནི་ཚོགས་ལམ་གྱི་མཚན་ཉིད་ཡིན་ལ། དེའང་ཚོགས་ལམ་ཆུང་ངུར་དྲན་པ་ཉེ་བར་གཞག་པ་བཞི་ཡོད་པའི་ལུས་དྲན་པ་ཉེར་བཞག་ནི། མཉམ་གཞག་ནམ་མཁའ་ལྟ་བུ་ལ། རྗེས་ཐོབ་ཏུ་མི་གཙང་བ་དང་། སྒྱུ་མ་ལྟ་བུར་བསྒོམ་མོ། ཚོར་བ་དྲན་པ་ཉེར་གཞག་ནི། མཉམ་གཞག་ཏུ་མ་སྐྱེས་པ་དང་། རྗེས་ཐོབ་ཏུ་གང་ཅི་ཚོར་ཡང་སྡུག་བསྔལ་དང་། ཆུ་ཤིང་ལྟར་སྙིང་པོ་མེད་པར་བསྒོམ་མོ། །སེམས་དྲན་པ་ཉེ་བར་གཞག་པ་ནི་མཉམ་གཞག་ཏུ་རང་བཞིན་གྱིས་སྟོང་པ་དང་། རྗེས་ཐོབ་ཏུ་མི་འགག་ལ་མི་གནས་པ་བསྒོམ་མོ། །ཆོས་དྲན་པ་ཉེ་བར་གཞག་པ་ནི། མཉམ་གཞག་ཏུ་མཉམ་པ་ཉིད་དང་། རྗེས་ཐོབ་ཏུ་སྒྱུ་མའི་དཔེ་བརྒྱད་དུ་བསྒོམ་མོ། །དེ་ལྟར་ཚོགས་ལམ་ཆུང་ངུར་དྲན་པ་ཉེར་གཞག་བཞི་བསྒོམས་པས་མཐོང་ལམ་གྱི་བདེན་པ་བཞི་ལ་འཇུག་ཚུལ་ཀྱང་། དང་པོས་ལུས་སྡུག་བསྔལ་དུ་ཤེས་པས་སྡུག་བསྔལ་ཤེས་པ་ལ་འཇུག་གོ །གཉིས་པས་ཚོར་བ་སྡུག་བསྔལ་དུ་ཤེས་པས་ཀུན་འབྱུང་སྤོང་བ་ལ་འཇུག་གོ །གསུམ་པས་སེམས་མི་རྟག་པར་བསྒོམས་པས་རྟག་འཛིན་འགོག་པའི་འགོག་པ་མངོན་དུ་བྱེད་དོ། །བཞི་པས་ཆོས་བདག་མེད་པར་བསྒོམས་པས་བདག་ཏུ་ཞེན་པ་ལོག་ནས་ལམ་བསྒོམ་པ་ལ་འཇུག་གོ །ཚོགས་ལམ་འབྲིང་དུ་མི་དགེ་བའི་ཆོས་མ་སྐྱེས་པ་རྣམས་མི་བསྐྱེད། སྐྱེས་པ་རྒྱུན་གཅོད། དགེ་བའི་ཆོས་རྣམས་མ་སྐྱེས་པ་བསྐྱེད། སྐྱེས་པ་གོང་དུ་སྤེལ་བའི་ཕྱིར་བརྩོན་པར་བྱེད་ཅིང་གཉེན་པོ་བདག་མེད་པ་དང་། སྒྱུ་མའམ་རྨི་ལམ་ལ་སོགས་པ་བསྒོམ་པར་བྱེད་དོ། །ཚོགས་ལམ་ཆེན་པོར་རྫུ་འཕྲུལ་གྱི་རྐང་པ་བཞི་ནི། ནང་དུ་ཞི་ལྷག་ཟུང་འབྲེལ་གྱི་ཏིང་ངེ་འཛིན་སེམས་རྩེ་གཅིག་པར་བསྒོམས་པས་སྤྱན་དང་། མངོན་ཤེས་དང་། རྫུ་འཕྲུལ་ལ་སོགས་པའི་དོན་འགྲུབ་པ་སྟེ། དེ་ཡང་བསམ་གཏན་གྱིས་སེམས་ལས་སུ་རུང་སྟོབས་ཀྱིས་གྲུབ་པས་ན་རྫུ་འཕྲུལ་གྱི་རྐང་པ་བཞི་ཞེས་བྱའོ། །དེ་ནི་འདུན་པ། བརྩོན་འགྲུས། སེམས། སྤྱོད་པའི་ཏིང་ངེ་འཛིན་བཞིའོ། །དེའི་དོན་ཀྱང་མདོ་སྡེ་རྒྱན་ལས། དམིགས་པ་ཉིད་ལ་སེམས་གཏད་ནས། །དེ་རྒྱུན་རྣམ་པར་གཡེང་མི་བྱ། །རྣམ་གཡེང་མྱུར་དུ་རྟོགས་བྱས་ནས། །སླར་ཡང་དེ་ལ་བསླབ་པར་བྱ། །ཞེས་སོ། །གཉིས་པ་རྣམ་པར་མི་རྟོག་པའི་ཡེ་ཤེས་མཐོང་ལམ་ལ་སྦྱོར་བ་ནི་སྦྱོར་ལམ་གྱི་མཚན་ཉིད་དེ་ལུས་ཀྱི་རྟེན་འགྲོ་བ་རིགས་ལྔ་གང་རུང་དང་། བསམ་པའི་རྟེན་བསམ་གཏན་ས་དྲུག་གང་རུང་ངོ་། །ལམ་གྱི་ངོ་བོ་དྲོད་དང་། རྩེ་མོ་དང་། བཟོད་པ་དང་། ཆོས་མཆོག་བཞིར་གནས་པ་ལས། དེའང་དྲོད་རྩེ་གཉིས་སུ་དབང་པོ་ལྔ་བསྒོམ་སྟེ། དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོ་དང་། ཤེས་རབ་ཀྱི་དབང་པོ་སྟེ་རྣམ་བྱང་བསྐྱེད་པས་ན་གཟུགས་ཅན་མ་ཡིན་པའི་དབང་པོ་ལྔའོ། །བསྒོམ་ཚུལ་ནི་སེམས་བསྐྱེད་ནས། བདེན་པ་བཞིའི་མི་རྟག་པ་ལ་སོགས་པའམ། ཆོས་ཐམས་ཅད་བདེན་པ་གཉིས་སུ་ཤེས་པའི་དོན་ལ། དད་པས་ཡིད་ཆེས་པའི་ཚུལ་གྱིས་བསྒོམ། བརྩོན་འགྲུས་ཀྱི་སྤྲོ་བ་བསྐྱེད། དྲན་པས་རྟོགས་པའི་རྒྱུན་ལ་འཇུག །ཏིང་ངེ་འཛིན་གྱིས་སེམས་རྩེ་གཅིག་པར་སྦྱོར། ཤེས་རབ་ཀྱིས་རང་བཞིན་ཤེས་པའི་ཚུལ་གྱིས་བསྒོམ་མོ། །བཟོད་ཆོས་གཉིས་སུ་ནི་སྟོབས་ལྔ་བསྒོམ་སྟེ། དད་པའི་སྟོབས་ལ་སོགས་པ་སྔ་མ་བཞིན་དུ་སྦྱར་ལ་བསྒོམ་ཚུལ་ཡང་མཐུན་ནོ། །ངེས་ཚིག་ནི་མི་མཐུན་ཕྱོགས་འཇོམས་པས་ན་སྟོབས་ཞེས་བྱའོ། །དེ་ལྟར་སྦྱོར་བའི་ལམ་ཆ་བཞི་པོའི་ཡེ་ཤེས་ཀྱི་རིམ་པ་ལ་ཆུང་འབྲིང་ཆེན་པོ་གསུམ་གྱི་དབྱེ་བས་ངེས་འབྱེད་ཆ་མཐུན་བཅུ་གཉིས་ཞེས་བྱ་སྟེ་དེའི་རིམ་པ་བཞིན་ལས། དྲོད་སྣང་བ་ཐོབ་པ་ནི་ཆོས་ཐམས་ཅད་ཡིད་ཀྱི་སྣང་བ་ཙམ་དུ་མཐོང་བ་འཇིག་རྟེན་པའི་བསྒོམས་བྱུང་གི་ཡེ་ཤེས་དང་། སྣང་བ་ཅུང་ཟད་ཐོབ་པ་དེས་དོན་དུ་འཛིན་པའི་གཉེན་པོ་བྱེད་པའོ། །རྩེ་མོ་སྣང་བ་མཆེད་པ་ནི། ཆོས་ཀྱི་སྣང་བ་དེ་ཉིད་སྤེལ་བའི་ཕྱིར་བདག་མེད་བསྒོམ་པ་ལ་བརྩོན་པས་འཇིག་རྟེན་པའི་བསྒོམས་བྱུང་གི་སྣང་བ་འབྲིང་དུ་ཐོབ་པའོ། །བཟོད་པ་དེ་ཁོ་ན་ཉིད་ཀྱི་ཕྱོགས་གཅིག་ལ་ཞུགས་པ་ནི་སེམས་ཙམ་དུ་ཡོད་པའི་འཇིག་རྟེན་པའི་བསྒོམ་བྱུང་གི་སྣང་བ་རབ་ཏུ་ཐོབ་པས་སྤྱི་དོན་དུ་ཞེན་པའི་གཉེན་པོ་བྱེད་པའོ། །ཆོས་མཆོག་དེ་མ་ཐག་པ་ནི། དོན་དུ་འཛིན་པའི་རྣམ་གཡེང་མེད་པའི་འཇིག་རྟེན་པའི་བསྒོམས་བྱུང་གི་ཡོངས་སུ་རྫོགས་པ་ཉིད། ཐེག་ཆེན་མཐོང་ལམ་དང་གཞན་གྱི་བར་མ་ཆོད་པའོ། །དེའང་དྲོད་རྩེ་གཉིས་ལ་ནི་ཆུང་ངུ་ཞེས་བྱ་སྟེ། མཐོང་ལམ་སྐྱེ་བའི་དུས་མ་ངེས་པའི་སྦྱོར་ལམ་མོ། །བཟོད་པ་ནི་འབྲིང་སྟེ་ཚེ་ཕྱི་མ་ལ་མཐོང་ལམ་སྐྱེ་བར་ངེས་པའི་སྦྱོར་ལམ་མོ། །ཆོས་མཆོག་ནི་ཆེན་པོ་སྟེ་ཚེ་དེ་ཉིད་ལ་མཐོང་ལམ་སྐྱེ་བའི་སྦྱོར་ལམ་མོ། །ལམ་དེ་ལ་འོག་མ་ལས་འཕགས་པའི་ཁྱད་ཆོས་ལྔ་ཡོད་དེ། གཉེན་པོའི་ཁྱད་པར་ལ། སུན་འབྱིན་པའི་གཉེན་པོ། སྤོང་བའི་གཉེན་པོ། རྟེན་གྱི་གཉེན་པོ། ཐག་བསྲིང་གི་གཉེན་པོ་ལས་འདིར་སྤོང་བའི་གཉེན་པོས་མགོ་གནོན་པའོ། །སྤངས་པའི་ཁྱད་པར་ནི་སྒྲིབ་པའི་ས་བོན་དང་། མངོན་གྱུར་ཉམས་སྨད་པ་དང་། སོ་སོ་སྐྱེ་བོའི་ཕོངས་པ་དང་རྒུད་པ་ལས་གྲོལ་བའོ། །རྟོགས་པའི་ཁྱད་པར་ནི་བསྒོམ་བྱུང་གི་ཡེ་ཤེས་བདག་མེད་གཉིས་རྟོགས་པའོ། །ཡོན་ཏན་གྱི་ཁྱད་པར་ནི་ཏིང་ངེ་འཛིན་དང་། སྤྱན་དང་། མངོན་ཤེས་དང་། རྫུ་འཕྲུལ་ལ་སོགས་པ་དུ་མ་དང་ལྡན་པའོ། །ཚོགས་ལམ་ལས་འཕགས་པའི་ཁྱད་པར་ནི། ཚོགས་ལམ་ཆེན་པོ་དང་བསྒོམ་བྱུང་དུ་འདྲ་ཡང་། མཐོང་ལམ་ལ་ཉེ་རིང་དང་ཡེ་ཤེས་ཀྱི་དྲོད་བརྟན་མི་བརྟན་གྱི་ཁྱད་ཡོད་པར་བརྒྱད་སྟོང་འགྲེལ་ཆེན་ལས། བར་ཆད་མེད་ན་མཐོང་བའི་ལམ་ཆེས་ཉེ་བར་འབྱུང་བ་ཞེས་བྱ་བ་ནི་ཐར་པའི་ཆ་དང་མཐུན་པ་ལས་འདིའི་ཁྱད་པར་ཡིན་པར་རིག་པར་བྱའོ། །གསུམ་པ་ཆོས་ཉིད་དངོས་སུ་མཐོང་བས་ན་མཐོང་ལམ་ཞེས་བྱ་སྟེ། དེའི་མཚན་ཉིད་ནི་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་ཅེས་བློ་གྲོས་རབ་གསལ་གྱིས་ཞུས་པའི་མདོ་ལས་བཤད་པས་མཐོང་ལམ་ཡིན་ལ། ཤིན་ཏུ་རྣམ་པར་དག་གོ་ཞེས་པ་ནི་ས་བརྒྱད་པའི་ཡེ་ཤེས་སོ། །ལུས་ཀྱི་རྟེན་ནི་འགྲོ་བ་ལྔ་གང་རུང་ལ། བསམ་པའི་རྟེན་ནི་བསམ་གཏན་བཞི་པའོ། །དེ་ལ་ཆོས་གང་མངོན་དུ་གྱུར་པས་མྱ་ངན་ལས་འདས་པ་ཐོབ་བར་འགྱུར་བའི་ཆོས་ནི་མཐོང་ལམ་གྱི་རྟེན་བྱང་ཆུབ་ཀྱི་ཡན་ལག་བདུན་ཡིན་ཏེ། བཤེས་སྤྲིང་ལས། དྲན་དང་ཆོས་རབ་རྣམ་འབྱེད་བརྩོན་འགྲུས་དང་། །དགའ་དང་ཤིན་ཏུ་སྦྱངས་དང་ཏིང་འཛིན་དང་། །བཏང་སྙོམས་འདི་བདུན་བྱང་ཆུབ་ཡན་ལག་སྟེ། །མྱ་ངན་འདས་ཐོབ་བགྱིད་པའི་དགེ་ཚོགས་ལགས། །ཞེས་པ་ལས། དྲན་པ་ནི་དམིགས་པ་མ་བརྗེད་པའོ། །ཆོས་རབ་ཏུ་འབྱེད་པ་ནི། ཐེག་པ་ཆེན་པོའི་ཆོས་བཟོད་ཆོས་ཤེས་རྗེས་བཟོད་རྗེས་ཤེས་འཁོར་དང་བཅས་པའི་མཚན་ཉིད་འབྱེད་པའི་ཤེས་རབ་གང་ཡིན་པའོ། །བརྩོན་འགྲུས་ནི་དེའི་རང་བཞིན་ལ་མངོན་པར་སྤྲོ་བའོ། །དགའ་བ་ནི་དམིགས་པ་དེ་ཉིད་ལ་ཡིད་སྤྲོ་བ་གང་ཡིན་པའོ། །ཤིན་ཏུ་སྦྱངས་པ་ནི་ལུས་དང་སེམས་ལས་སུ་རུང་བ་གང་ཡིན་པའོ། །ཏིང་ངེ་འཛིན་ནི་སེམས་རྩེ་གཅིག་པ་ལས་གཞན་དུ་མ་གྱུར་པའོ། །བཏང་སྙོམས་ནི་སེམས་དང་སེམས་ལས་བྱུང་བ་རྣམས་རྣལ་དུ་འདུག་པ་དང་ལྷུན་གྱིས་གྲུབ་པ་གང་ཡིན་པའོ། །ཆོས་བདུན་པོ་འདི་དག་ནི་མཐོང་བའི་ལམ་བྱང་ཆུབ་ཟག་པ་མེད་པའི་ཡན་ལག་ཏུ་གྱུར་པའི་ཕྱིར་བྱང་ཆུབ་ཀྱི་ཡན་ལག་ཅེས་འཁོར་དུ་གྱུར་པར་བསྟན་ཏོ། །ངོ་བོ་ནི་རང་གི་ངོ་སྐལ་དུ་གྱུར་ཚད་ཀྱི་མཐོང་སྤངས་ཉོན་སྒྲིབ་དང་ཤེས་སྒྲིབ་གཉིས་ཀྱི་ཆ་ལས་གྲོལ་བ་སྟེ། དབུས་མཐའ་ལས། ཉོན་མོངས་པ་ཡི་སྒྲིབ་པ་དང་། །ཤེས་བྱའི་སྒྲིབ་པ་གཉིས་སུ་བསྟན། །དེ་ཡི་སྒྲིབ་པ་ཐམས་ཅད་དེ། །དེ་ཟད་ནས་ནི་གྲོལ་བར་འདོད། །ཅེས་སོ། །དེ་ཡང་ཉོན་ཤེས་གཉིས་ཀྱི་སྒྲིབ་པའི་ཁྱད་པར་ནི། རྒྱུད་བླ་མར། སེར་སྣ་ལ་སོགས་རྣམ་རྟོག་གང་། །ཉོན་མོངས་པ་ཡི་སྒྲིབ་པར་འདོད། །འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་པས། སེམས་རབ་ཏུ་མ་ཞི་བར་བྱེད་པ་གང་མི་དགེ་བའམ། ལུང་དུ་མ་བསྟན་པའི་སྒྲིབ་པ་སེར་སྣ་ལ་སོགས་པ་ནི་ཉོན་སྒྲིབ་ཡིན་ལ། འཁོར་གསུམ་ལ་བདེན་ཞེན་དང་བཅས་པའི་དགེ་བ་ཟག་བཅས་སམ། མ་བསྒྲིབས་ལུང་མ་བསྟན་གྱི་ངོ་བོ་གཟུང་འཛིན་གྱི་རྟོག་པ་ཡུལ་ཡུལ་ཅན་དུ་འབྲེལ་བ་ནི་ཤེས་སྒྲིབ་ཡིན་ནོ། །དེའང་ཉོན་སྒྲིབ་ཀུན་བརྟགས་རྣམས་ནི་མཐོང་སྤངས་ཡིན་ལ། ལྷན་སྐྱེས་ནི་བསྒོམ་སྤང་ཡིན་ནོ། །དེ་བཞིན་དུ་ཤེས་སྒྲིབ་གཟུང་འཛིན་གྱི་རྟོག་པ་རགས་པ་རྣམས་ནི་མཐོང་སྤང་ཡིན་ལ། ཕྲ་བ་རྣམས་ནི་སྒོམ་སྤང་ཡིན་ནོ། །རྣམ་གྲངས་ནི། ཀུན་བརྟགས་གང་ཞིག་མཐོང་ལམ་གྱི་གནོད་བྱར་གྱུར་པ་ནི་མཐོང་སྤང་གྱི་མཚན་ཉིད་དོ། །དབྱེ་ན། ངོ་བོའི་སྒོ་ནས་འདོད་ཆགས། ཁོང་ཁྲོ། ང་རྒྱལ། མ་རིག་པ། ཐེ་ཚོམ་མོ། །ལོག་པར་འཇུག་ཚུལ་གྱི་སྒོ་ནས་འཇིག་ཚོགས་ལ་བལྟ་བ། མཐར་འཛིན་པའི་བལྟ་བ། ལོག་པར་བལྟ་བ། ལྟ་བ་ལ་མཆོག་ཏུ་འཛིན་པའི་བལྟ་བ། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་བལྟ་བ་སྟེ་ལྔ་དང་། འདོད་ཆགས། ཁོང་ཁྲོ། ང་རྒྱལ། མ་རིག་པ། ཐེ་ཚོམ་སྟེ་ལྟ་མིན་ལྔ་བསྡོམས་པས་བཅུའོ། །དེའང་དམིགས་པ་དང་། ཁམས་དང་། ལོག་པར་འདུག་ཚུལ་གྱི་སྒོ་ནས་དབྱེ་ན་མཐོང་སྤང་བརྒྱད་ཅུ་རྩ་གཉིས་སོ། །དེའང་ལྟ་བ་ལྔས་བདེན་པ་བཞི་ལ་ཞུགས་པ་དང་། ལྟ་མིན་ལྔས་རྗེས་སུ་མཐུན་པར་ཞུགས་པ་ལ་སོགས་པའི་རྣམ་གཞག་ཤེས་པར་འདོད་ན་གྲུབ་མཐའ་རིན་པོ་ཆེར་བལྟའོ། །འདིར་ནི་དེ་དག་གི་ཕྲ་རྒྱས་སྤངས་པའི་འབྲས་བུ་ཡེ་ཤེས་སྐྱེ་བ་ལ་ལྟོས་ནས་ས་དང་པོའི་ངེས་པ་ཅུང་ཟད་བཞག་ན། མདོ་སྡེ་རྒྱན་ལས། བྱང་ཆུབ་ལ་ནི་ཉེ་བ་དང་། །སེམས་ཅན་དོན་འགྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བྱར་བརྗོད། །ཅེས་པ་ལྟར། འཇིག་རྟེན་ལས་འདས་པའི་ཡེ་ཤེས་ཐོག་མར་ཐོབ་པ་དེའི་ཚེ་སྤང་བྱ་ས་བོན་དང་བཅས་པ་འགག་པ་དུས་མཉམ། སོ་སོར་རྟོག་པའི་ཤེས་རབ་ཀྱིས་བདག་མེད་གཉིས་མངོན་སུམ་དུ་རྟོགས། ཆོས་ཀྱི་དབྱིངས་དེ་རང་གཞན་ཐམས་ཅད་ལ་ཀུན་ཏུ་འགྲོ་བ་དང་། ཁྱད་པར་རྟོགས་པས་བདག་གཞན་མཉམ་པ་ཉིད་ཀྱི་བྱང་ཆུབ་ཀྱི་སེམས་རྟོགས། སྔོན་མེད་པའི་དགའ་བ་རྒྱ་ཆེན་པོ་ཐོབ་པས་ན་ས་དང་པོ་རབ་ཏུ་དགའ་བ་ཞེས་བྱ་སྟེ། དུས་སྐད་ཅིག་མ་གཅིག་ལ་སངས་རྒྱས་བརྒྱའི་ཞལ་བལྟ་བ་དང་། སངས་རྒྱས་བརྒྱས་བྱིན་གྱིས་བརླབས་པར་ཤེས་པ་དང་། སྤྲུལ་པ་བརྒྱ་འབྱེད་པ་དང་། དུས་བསྐལ་པ་བརྒྱར་སྟོན་པ་དང་། སྔོན་དང་ཕྱི་མའི་གནས་བརྒྱ་ལ་ཡེ་ཤེས་ཀྱི་གཟིགས་པ་འཇུག་པ་དང་། ཏིང་ངེ་འཛིན་བརྒྱ་ལ་སྙོམས་པར་འཇུག་ཅིང་ལྡང་བ་དང་། སེམས་ཅན་བརྒྱ་སྨིན་པར་བྱེད་པ་དང་། ཞིང་ཁམས་བརྒྱ་གཡོ་བར་བྱེད་པ་དང་། ཞིང་ཁམས་བརྒྱ་འོད་ཀྱིས་གསལ་བར་བྱེད་པ་དང་། ཆོས་ཀྱི་སྒོ་བརྒྱ་འབྱེད་པ་དང་། རང་གི་ལུས་བརྒྱར་སྟོན་པ་དང་། ལུས་རེ་རེ་ལ་འཁོར་ཕུན་སུམ་ཚོགས་པ་བརྒྱ་བརྒྱས་བསྐོར་བར་སྟོན་པ་དང་། འཛམ་བུའི་གླིང་བརྒྱ་ལ་དབང་བའི་སྐྱེ་བ་འཛིན་ནུས་སོ། །བཞི་པ་ནི། དེ་ལྟར་ཡེ་ཤེས་ཀྱི་རང་བཞིན་མཐོང་ཟིན་བསྒོམ་པར་བྱེད་པས་ན་བསྒོམ་པའི་ལམ་སྟེ། དེའི་མཚན་ཉིད་ནི་ཐེག་ཆེན་གྱི་མཐོང་ལམ་རྫོགས་པའི་ཕྱི་ནས་འབྱུང་ཞིང་ཐེག་ཆེན་གྱི་དགེ་བས་བསྡུས་པ་གང་ཞིག་ཐེག་ཆེན་མི་སློབ་པའི་ལམ་གྱི་སྐད་ཅིག་མ་དང་པོ་ཤེས་རྒྱུད་ལ་སྐྱེ་བའི་རྒྱུར་གྱུར་པའོ། །ལུས་ཀྱི་རྟེན་ནི་གླིང་གསུམ་གྱི་སྐྱེས་པ་དང་བུད་མེད་འདོད་གཟུགས་ཀྱི་ལྷ་དང་བཅས་པ་ལ་སྐྱེ་བ་ཤས་ཆེ་ཞིང་། མདོ་སྡེ་རྒྱན་ལས། བསམས་བཞིན་སྲིད་པ་ལེན་པ་དང་། །ཞེས་པས་གཞན་ལའང་སྐྱེ་མི་རུང་བའི་མཐའ་མ་བཀག་གོ །བསམ་པའི་རྟེན་ནི་བསམ་གཏན་བཞི་པའོ། །དེའང་མཚན་གཞི་ས་བཅུའི་རང་བཞིན་གྱི་འཁོར་དུ་གཏོགས་པའི་དགེ་བ་ནི་འཕགས་པའི་ལམ་ཡན་ལག་བརྒྱད་ཡིན་ཏེ། བཤེས་སྤྲིང་ལས། ཡང་དག་ལྟ་དང་འཚོ་དང་རྩོལ་བ་དང་། །དྲན་དང་ཏིང་འཛིན་དག་དང་ལས་མཐའ་དང་། །ཡང་དག་རྟོག་ཉིད་ལམ་གྱི་ཡན་ལག་བརྒྱད། །ཅེས་པ་ལས། ཡང་དག་པའི་ལྟ་བ་ནི་ཟག་པ་མེད་པའི་ཤེས་རབ་བོ། །ཡང་དག་པའི་འཚོ་བ་ནི་ཁ་གསགས་དང་ལོག་པའི་འཚོ་བ་སྤངས་བའོ། །ཡང་དག་པའི་རྩོལ་བ་ནི་བརྩོན་འགྲུས་ཏེ། དེ་ཡང་ཡང་དག་སྤོང་བ་བཞི་ཉིད་དོ། །ཡང་དག་པའི་དྲན་པ་ནི་དམིགས་པ་མ་བརྗེད་པའོ། །འདི་ཡང་དྲན་པ་ཉེ་བར་གཞག་པ་བཞི་དང་མཐུན་ཏེ། དྲན་པ་ཉིད་དྲན་པ་ཉེ་བར་འཇོག་པ་ནི་དྲན་པ་ཉེ་བར་འཇོག་པ་ཡིན་པའི་ཕྱིར་རོ། །དེ་ཡང་ཡང་དག་གི་དྲན་པའི་མཚན་ཉིད་མཐར་ཐུག་པ་ནི་ཤེས་རབ་ཉིད་ཡིན་ཏེ། བཤེས་སྤྲིང་གི་འགྲེལ་པར། གང་དག་འདིས་དྲན་པ་ཉེ་བར་འཇོག་པ་ཞེས་འཆད་པ་དེ་དག་གི་གཞུང་ལུགས་ཀྱིས་ནི་དྲན་པ་ཉེ་བར་གཞག་པ་ཤེས་རབ་ཡིན་ནོ། །ཞེས་བཤད་དོ། །ཡང་དག་པའི་ཏིང་ངེ་འཛིན་ནི་བསམ་གཏན་བཞི་པའོ། །ཡང་དག་པའི་ངག་ནི་ངག་ལ་བརྟེན་པའི་དགེ་བའི་ལས་ལམ་བཞིའོ། །ཡང་དག་པའི་ལས་ཀྱི་མཐའ་ནི་ལུས་ཀྱི་མི་དགེ་བའི་ལས་ཀྱི་ལམ་སྤོང་བའི་རང་བཞིན་གསུམ་མོ། །ཡང་དག་པའི་རྟོག་པ་ནི་གནོད་སེམས་མེད་པ་དང་། ངེས་པར་འབྱུང་བ་དང་། དགེ་བའི་རྟོག་པ་རྣམ་པ་དུ་མ་སྙེད་ཡིན་ནོ། །དེ་ལྟར་འཕགས་པའི་ལམ་ཡན་ལག་བརྒྱད་པོ་འདི་ནི་ཞི་བའི་གནས་ཏེ། མྱ་ངན་ལས་འདས་པ་ཐོབ་པར་བྱ་བའི་ཕྱིར་བསྒོམ་པས་ན། འདི་ནི་ཞི་བར་བགྱི་སླད་བསྒོམ་པར་བགྱི། །ཞེས་པ་ལ་སོགས་པ་བསྟན་ཏོ། །དེའང་སེར་སྣ་ལ་སོགས་པའི་མི་མཐུན་ཕྱོགས་བཅུ་སེལ་བ་ལ་ལྟོས་ནས་ས་བཅུར་ངེས་པ་ནི། ཕལ་པོ་ཆེ་ལས། ཀྱེ་རྒྱལ་བའི་སྲས་དག་ས་བཅུ་པོ་འདི་དག་ལ་མི་མཐུན་པའི་ཕྱོགས་བཅུ་དག་པར་བྱ་བའི་ཕྱིར་ཕ་རོལ་ཏུ་ཕྱིན་པ་བཅུས་ལྷག་པར་ཕྱེ་བ་ཡིན་ནོ། །ས་དང་པོར་ནི་སྦྱིན་པའི་ཕ་རོལ་ཏུ་ཕྱིན་པ་གཙོ་ཆེར་སྤྱོད་ལ། ལྷག་མ་རྣམས་ཀྱང་ཅི་ནུས་ནུས་སུ་མི་བསྒྲུབ་པ་ནི་མ་ཡིན་ནོ། །ཞེས་པ་ནས་ཡེ་ཤེས་ཀྱི་ཕ་རོལ་ཏུ་ཕྱིན་པའི་བར་དེས་འགྲེ་བར་གསུངས་སོ། །དེའི་སྤང་བྱ་བཅུ་ནི། སེར་སྣ་དང་། འཆལ་པའི་ཚུལ་ཁྲིམས་དང་། ཁོང་ཁྲོ་དང་། ལེ་ལོ་དང་། རྣམ་གཡེང་དང་། ཤེས་རབ་འཆལ་བ་དང་། ཐབས་ལ་མི་མཁས་པ་དང་། སྟོབས་ལ་སྒྲིབ་པ་དང་། སྨོན་པའི་དོན་མི་འགྲུབ་པ་དང་། ཤེས་བྱའི་སྒྲིབ་པ་སྟེ་སྤང་བྱ་བཅུ་སྤངས་པ་གང་ཞིག་དེའི་ངོ་བོ་ཉིད་ཡིན་པར་རིག་པར་བྱའོ། །དབྱེ་ན་བསྒོམ་ལམ་ཆུང་འབྲིང་ཆེ་གསུམ་པོ་གསུམ་ཚན་གྱི་དབྱེ་བས་དགུ་སྟེ། དེའང་ཆུང་ངུའི་ཆུང་ངུས་གཉིས་པ་དྲི་མ་མེད་པ་སྟེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་མཆོག་ཏུ་གྱུར་པ་ནི། མདོ་སྡེ་རྒྱན་ལས། འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཞེས་དང་། རིན་ཆེན་ཕྲེང་བ་ལས། དེ་ཡི་རྣམ་པར་སྨིན་པས་ནི། །ཚུལ་ཁྲིམས་ཕ་རོལ་ཕྱིན་མཆོག་འགྱུར། །དཔལ་ལྡན་རིན་ཆེན་བདུན་གྱི་བདག །འགྲོ་ཕན་འཁོར་ལོས་བསྒྱུར་བར་འགྱུར། །ཞེས་པས་འཆལ་བའི་ཚུལ་ཁྲིམས་དང་། རྩོལ་བའི་དྲི་མ་རྣམ་པར་དག་ལ། སྔར་བཤད་པའི་ཡོན་ཏན་སྟོང་ཕྲག་བཅུ་གཉིས་སྐད་ཅིག་ལ་འཐོབ་ཅིང་། གླིང་བཞི་ལ་དབང་བའི་འཁོར་ལོས་བསྒྱུར་བའི་སྐྱེ་བ་འཛིན་ནུས་པའོ། །ཆུང་ངུའི་འབྲིང་ས་གསུམ་པ་འོད་བྱེད་པ་ནི། བཟོད་པའི་ཕ་རོལ་ཏུ་ཕྱིན་པ་ལས་ཏེ། རྒྱན་ལས། ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པ། །ཞེས་དང་། རིན་ཆེན་ཕྲེང་བ་ལས། དེ་ཡི་རྣམ་པར་སྨིན་པས་ནི། །བཟོད་དང་བརྩོན་འགྲུས་ལྷག་པར་སྤྱོད། །ལྷ་ཡི་དབང་ཆེན་མཁས་པ་སྟེ། །འདོད་པའི་འདོད་ཆགས་བཟློག་པ་ཡིན། །ཞེས་ཆོས་ཀྱི་སྣང་བ་ཆེན་པོ་འམ། ཡེ་ཤེས་ཞི་བའི་འོད་འབྱུང་བས་བསམ་གཏན་དང་མངོན་ཤེས་བསྐྱེད་ཅིང་། ཡོན་ཏན་འབུམ་ཕྲག་བཅུ་གཉིས་ཡོད་ལ། ལྷ་ཡི་དབང་པོ་བརྒྱ་བྱིན་གྱི་སྐྱེ་བ་འཛིན་པའི་ནུས་པ་ཅན་ནོ། །ཆུང་ངུའི་ཆེན་པོ་ས་བཞི་པ་འོད་འཕྲོ་བ་ནི། བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྟེ། རྒྱན་ལས། འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པོ་བསྲེགས་པས་འོད་འཕྲོ་ཅན། །ཞེས་དང་། རིན་ཆེན་ཕྲེང་བ་ལས། དེ་ཡི་རྣམ་པར་སྨིན་པས་ནི། །རབ་མཐའ་དྲལ་ནས་ལྷ་རྒྱལ་འགྱུར། །འཇིག་ཚོགས་ལྟ་བ་རབ་འབྱུང་བ། །ཀུན་ནས་འཇོམས་བྱེད་མཁས་པ་ཡིན། །ཞེས་ཡང་དག་པའི་ཡེ་ཤེས་ཀྱི་འོད་སྲེག་བྱེད་ལྟ་བུར་རྣོ་བས་འོད་འཕྲོ་བ་ཞེས་བྱ་སྟེ། ཡོན་ཏན་སྔར་གྱི་དེ་ལྟ་བུ་བྱེ་བ་ཕྲག་བཅུ་གཉིས་འཐོབ་ཅིང་། མཚེ་མའི་རྒྱལ་པོར་སྐྱེ་བ་འཛིན་ཏོ། །འབྲིང་གི་ཆུང་ངུ་ས་ལྔ་པ་སྦྱང་དཀའ་བ་ནི། བསམ་གཏན་གྱི་ཕ་རོལ་ཏུ་ཕྱིན་པ་སྟེ། རྒྱན་ལས། སེམས་ཅན་རྣམས་ཡོངས་སྨིན་བྱེད་ཅིང་། །རང་གི་སེམས་ཀྱང་བསྲུང་བའི་ཕྱིར། །བློ་ལྡན་རྣམས་ཀྱིས་སྦྱང་དཀའ་བ། །དེ་ཕྱིར་སྦྱང་དཀའ་ཞེས་བརྗོད་དོ། །ཞེས་དང་། ཕྲེང་བར། དེ་ཡི་རྣམ་པར་སྨིན་པས་ནི། །དགའ་ལྡན་གནས་ཀྱི་ལྷ་རྒྱལ་འགྱུར། །ཞེས་ཏིང་ངེ་འཛིན་ལ་སེམས་བསྲུང་བ་འདི་ནི་གཞན་གྱིས་ཐུབ་པར་དཀའ་བས། འཕགས་པ་རྣམས་ཀྱི་བདེན་པ་ཉིད་དུ་གཟིགས་པས་ཟབ་ཅིང་ཕྲ་བའི་དོན་ཤེས་པ་ལས་མཁས་པ་འབྱུང་བ་སྟེ། ཡོན་ཏན་བྱེ་བ་སྟོང་ཕྲག་བཅུ་གཉིས་དང་། དགའ་ལྡན་གྱི་རྒྱལ་པོ་བྱེད་པའོ། །འབྲིང་གི་འབྲིང་ས་དྲུག་པ་མངོན་དུ་གྱུར་པ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། རྒྱན་ལས། ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་འདིར་མངོན་དུ་གྱུར་པའི་ཕྱིར། །མངོན་དུ་གྱུར་པའི་ས་ཞེས་བཤད། །ཅེས་དང་། ཕྲེང་བ་ལས། དེ་ཡི་རྣམ་པར་སྨིན་པས་ནི། །ལྷ་ཡི་རྒྱལ་པོ་རབ་འཕྲུལ་འགྱུར། །ཞེས་སངས་རྒྱས་པའི་ཆོས་ལ་མངོན་པར་ཕྱོགས་ཕྱིར། ཞི་ལྷག་ཟུང་འབྲེལ་ཉིད་གོམས་པ་ལས་འགོག་པ་ཐོབ་པའི་ཡོན་ཏན་རྒྱས་པའི་ཕྱིར་ཏེ། སྔར་གྱི་ཡོན་ཏན་བྱེ་བ་འབུམ་ཕྲག་བཅུ་གཉིས་དང་། འཕྲུལ་དགའི་རྒྱལ་པོར་འགྱུར་རོ། །འབྲིང་གི་ཆེན་པོ་ས་བདུན་པ་རིང་དུ་སོང་བ་ཐབས་ཀྱི་ཕ་རོལ་ཏུ་ཕྱིན་པ་ནི། རྒྱན་ལས། བགྲོད་གཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དོ། །ཞེས་པ་སྟེ། གང་དང་རིང་ན་འཁོར་བའི་འདམ་བརྒལ་བར་དཀའ་བ་ལས་ཏེ། ཆོས་ཀྱི་དབྱིངས་སུ་བསྟོད་པ་ལས། འཁོར་བ་མཚོ་ཡི་འདམ་བརྒལ་བས། །དེ་ལ་རིང་དུ་སོང་ཞེས་བྱ། །ཞེས་སོ། །རྣམ་པ་གཅིག་ཏུ་ན། སའི་གྲངས་ཉིད་རིང་པོར་སོང་བས། སྐད་ཅིག་སྐད་ཅིག་ལ་འགོག་པ་ལ་སྙོམས་པར་འཇུག་པའི་ཐ་སྙད་ལ་བཏགས་ཏེ། རིན་ཆེན་ཕྲེང་བ་ལས། བདུན་པ་རིང་དུ་སོང་བ་སྟེ། །གྲངས་ནི་རིང་དུ་སོང་ལྡན་ཕྱིར། །གང་ཕྱིར་སྐད་ཅིག་སྐད་ཅིག་ལ། །དེ་ནི་འགོག་ལ་སྙོམས་པར་འཇུག །དེ་ཡི་རྣམ་པར་སྨིན་པ་ནི། །དབང་བསྒྱུར་ལྷ་ཡི་བདག་པོར་འགྱུར། །ཞེས་པ་སྟེ། ཡོན་ཏན་གྱི་ཁྱད་པར་བྱེ་བ་ཕྲག་ཁྲིག་འབུམ་ཕྲག་བཅུ་གཉིས་དང་། གཞན་འཕྲུལ་དབང་བྱེད་ཀྱི་རྒྱལ་པོར་འགྱུར་རོ། །ཆེན་པོའི་ཆུང་ངུ་ས་བརྒྱད་པ་མི་གཡོ་བ་སྟོབས་ཀྱི་ཕ་རོལ་ཏུ་ཕྱིན་པ་ནི། རྒྱན་ལས། འདུ་ཤེས་གཉིས་ཀྱི་མི་གཡོའི་ཕྱིར། །མི་གཡོ་བ་ཡི་སར་འདོད་དོ། །ཞེས་དང་། ཕྲེང་བ་ལས། དེ་ཡི་རྣམ་པར་སྨིན་པ་ནི། །སྟོང་གི་བདག་པོ་ཚངས་པར་འགྱུར། །ཞེས་མི་གཡོ་བའི་རྣམ་པར་མི་རྟོག་པ་སྟེ། དེ་བཞིན་དུ་སྒོ་གསུམ་གྱི་སྤྱོད་ཡུལ་ཐམས་ཅད་བསམ་གྱིས་མི་ཁྱབ་པ་ཉིད་དོ། །དེའང་ཉོན་མོངས་པ་ཅན་གྱི་ཡིད་གནས་འགྱུར་བས་རྣམ་པར་མི་རྟོག་པ་ལ་དབང་ཐོབ་པ་དང་། འཛིན་པ་སྒོ་ལྔའི་རྣམ་ཤེས་གནས་འགྱུར་བས་ཞིང་ཁམས་དག་པ་ལ་དབང་ཐོབ་ཅིང་མཉམ་པ་ཉིད་དང་སོ་སོར་རྟོག་པའི་ཡེ་ཤེས་ལ་དབང་འབྱོར། སྟོང་ཆེན་འབུམ་ཕྲག་གཅིག་གི་རྡུལ་དང་མཉམ་པའི་སངས་རྒྱས་ཀྱི་ཞལ་བལྟ་བ་ལ་སོགས་བྱེད་ཅིང་། ཚངས་པའི་གོ་འཕང་འཛིན་ནུས། ཆེན་པོའི་འབྲིང་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་ཅན་ས་དགུ་པ་ལེགས་པའི་བློ་གྲོས་ནི། རྒྱན་ལས། སོ་སོ་ཡང་དག་རིག་བློ་བཟང་། །ས་དེ་ལེགས་པའི་བློ་གྲོས་ཡིན། །ཅེས་དང་། ཕྲེང་བ་ལས། དེ་ཡི་རྣམ་པར་སྨིན་པས་ནི། །སྟོང་གཉིས་བདག་པོ་ཚངས་ཆེན་འགྱུར། །སེམས་ཅན་བསམ་པ་དྲིས་པ་ལ། །དགྲ་བཅོམ་སོགས་ཀྱིས་འཕྲོག་པ་མེད། །ཅེས་ཡིད་ཀྱི་རྣམ་པར་ཤེས་པ་གནས་གྱུར་པས་སོ་སོ་ཡང་དག་རིག་པ་བཞི་ལ་མངའ་བརྙེས་ཤིང་། ཕྲིན་ལས་ཕུན་སུམ་ཚོགས་པ་ལ་དབང་ཐོབ་པས་སེམས་ཅན་སྨིན་པར་བྱེད་པའི་ཐབས་དང་བློ་གྲོས་བསམ་གྱིས་མི་ཁྱབ་པས་ཆོས་ཐམས་ཅད་ཀྱི་དེ་ཉིད་ཐོགས་པ་མེད་པར་རིག་པར་འགྱུར་བ་རྒྱལ་ཚབ་མ་ཕམ་པ་བཞིན་ཏེ། དེ་ཉིད་ལས། ས་དགུ་པ་ནི་ལེགས་པ་ཡི། །བློ་གྲོས་ཞེས་བྱ་རྒྱལ་ཚབ་བཞིན། །ཞེས་སོ། །གཞན་ཡང་སྟོང་ཆེན་གྲངས་མེད་པ་འབུམ་ཕྲག་བཅུའི་རྡུལ་གྱི་གྲངས་དང་མཉམ་པའི་སངས་རྒྱས་བལྟ་བ་ལ་སོགས་སོ། །རྣམ་སྨིན་གྱི་འབྲས་བུ་ནི་དེས་ཤེས་སོ། །ཆེན་པོའི་ཆེན་པོ་ས་བཅུ་པ་ཆོས་ཀྱི་སྤྲིན་ཡེ་ཤེས་ཀྱི་ཕ་རོལ་ཏུ་ཕྱིན་པ་ནི། རྒྱན་ལས། སྤྲིན་བཞིན་གཉིས་ཀྱི་ནམ་མཁའི་ཁམས། །ཁྱབ་པའི་ཕྱིར་ན་ཆོས་ཀྱི་སྤྲིན། །ཞེས་དང་། རིན་ཆེན་ཕྲེང་བར། བཅུ་པ་ཆོས་ཀྱི་སྤྲིན་ཡིན་ཏེ། །དམ་པ་ཆོས་ཀྱི་ཆར་འབེབས་ཕྱིར། །བྱང་ཆུབ་སེམས་དཔར་སངས་རྒྱས་ཀྱིས། །འོད་ཟེར་དག་གིས་དབང་བསྐུར་ཕྱིར། །དེ་ཡི་རྣམ་པར་སྨིན་པས་ནི། །གནས་གཙང་ལྷ་ཡི་བདག་པོར་འགྱུར། །བསམ་ཡས་ཤེས་བྱའི་ཡུལ་གྱི་བདག །དབང་ཕྱུག་ཆེན་པོའི་མཆོག་ཡིན་ནོ། །ཞེས་སོ། །དེའང་ཏིང་ངེ་འཛིན་དང་། གཟུངས་ཀྱི་སྤྲིན་གཉིས་གདུལ་བྱའི་ནམ་མཁར་ཁྱབ་པས་ཆོས་ཀྱི་ཆར་འབབ་པས་སེམས་ཅན་གྱི་དོན་བྱེད་པ་དེ་བཞིན་གཤེགས་པ་ལྟ་བུ་སྟེ། བྱང་ཆུབ་སེམས་དཔའ་ས་བཅུ་པ་དེས་ཕྱོགས་བཅུའི་སངས་རྒྱས་ལ་མཆོད་པ་ཆེན་པོ་བྱས་མ་ཐག་ཏུ། དེ་དག་གི་མཛོད་སྤུ་ནས་འོད་ཟེར་གྱི་ཚོགས་དཔག་ཏུ་མེད་པ་བྱུང་སྟེ། སེམས་དཔའ་ཆེན་པོ་དེའི་སྤྱི་བོར་ནུབ་པས་སངས་རྒྱས་ཐམས་ཅད་ཀྱི་འོད་ཟེར་ཆེན་པོའི་དབང་བསྐུར་བ་ཐོབ། རྡོ་རྗེ་ལྟ་བུ་ལ་སོགས་པ་སྔོན་མ་ཐོབ་པའི་ཏིང་ངེ་འཛིན་འབུམ་ཕྲག་གྲངས་མེད་པ་དང་། མེ་ལོང་ལྟ་བུའི་ཡེ་ཤེས་མངོན་དུ་གྱུར། ས་བཅུ་རྒྱུན་མཐར་བག་ཆགས་སྣ་ཚོགས་པའི་ཀུན་གཞི་གནས་འགྱུར་མ་ཐག་ཆོས་ཀྱི་དབྱིངས་ཀྱི་ཡེ་ཤེས་ལ་དབང་ཐོབ་སྟེ་འཚང་རྒྱ་བ་ཡིན་ནོ། །ཡོན་ཏན་གྱི་ཆ་ནས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་གྱི་གྲངས་དང་མཉམ་པའི་རྡུལ་ཕྲ་རབ་སྙེད་ཀྱི་སངས་རྒྱས་བལྟ་བ་ལ་སོགས་ས་བཅུ་གཉིས་སྐད་ཅིག་སྐད་ཅིག་ལ་བྱེད་དོ། །དེའང་ས་དང་པོར་སེམས་ཉིད་ཀྱི་རང་བཞིན་གྱི་འོད་གསལ་བའི་སྙིང་པོ་དེ་ཉིད་སེམས་ཅན་ཀུན་ལ་ཁྱབ་པར་རྟོགས་པས་བདག་གཞན་མཉམ་པ་ཉིད་ཀྱི་བྱང་ཆུབ་ཀྱི་སེམས་རྟོགས་སོ། །ས་གཉིས་པར་ཇི་ལྟར་རྟོགས་པ་དེ་ཉིད་རྟོགས་བྱ་རྣམས་ཀྱི་མཆོག་ཏུ་རྟོགས་པས་ཁམས་ཀྱི་དྲི་མ་སྦྱོང་བའི་བརྩོན་འགྲུས་དང་ལྡན་ནོ། །ས་གསུམ་པར་ཐོས་པ་དེ་ཆོས་ཀྱི་དབྱིངས་དེའི་རྒྱུ་མཐུན་པར་རྟོགས་པས་སྟོང་གསུམ་མེ་ལྕེ་གཅིག་ཏུ་གྱུར་པ་ལས་ཀྱང་བརྒལ་ནས་ཆོས་མཉན་ཏོ། །ས་བཞི་པར་དེ་ལ་བདག་དང་བདག་གིར་འཛིན་པ་མེད་པར་རྟོགས་པས་ཆོས་ཀྱི་དབྱིངས་ཀྱི་རང་བཞིན་ལ་ཆགས་པ་སྤང་ངོ་། །ས་ལྔ་པར་རང་དང་གཞན་གྱི་རྒྱུད་ལྡན་གྱི་ཁམས་དེ་གཉིས་སུ་མེད་པར་རྟོགས་པས་སངས་རྒྱས་ཐམས་ཅད་བསམ་པ་དག་པ་བཅུས་མཉམ་པར་རྟོགས་སོ། །དེ་ལ་དག་པ་བཅུ་ནི། ཡོན་ཏན་དང་། བསླབ་པ་དང་། ལམ་དང་། ལམ་མ་ཡིན་པ་ཤེས་པ་དང་། ཆོས་སོ་བདུན་དང་། སེམས་ཅན་སྨིན་པར་བྱེད་པའོ། །དེའང་ཡོན་ཏན་དང་བསླབ་པ་གཉིས་ལ་སྐུ་གསུང་ཐུགས་ཀྱི་གསུམ་གསུམ་བགྲངས་པའི་བསམ་པ་དག་པ་བཅུའོ། །དྲུག་པར་ཁམས་དེ་རང་བཞིན་གྱིས་རྣམ་པར་དག་པའི་རྟོགས་པས་འཁོར་འདས་ལ་བླང་དོར་དུ་འཛིན་པ་ཐམས་ཅད་བཟློག་གོ །ས་བདུན་པར་ཁམས་དེར་ཐ་དད་མེད་པར་རྟོགས་པས་མཚན་མར་འཛིན་པ་ཐམས་ཅད་བཟློག་གོ །བརྒྱད་པར་ཇི་ལྟ་བར་གཟིགས་པའི་ཡེ་ཤེས་དེ་ཉིད་ལ་སྐྱོན་ཡོན་བྲི་གང་མེད་པར་རྟོགས་པས་མི་སྐྱེ་བའི་ཆོས་ལ་བཟོད་པ་ཐོབ་པའི་མཆོག་ཤིན་ཏུ་རྣམ་པར་དག་གོ །དེའི་རང་བཞིན་ནི་ཉི་ཁྲི་ལས། རབ་འབྱོར་ཆོས་གང་ལ་རྡུལ་ཙམ་ཡང་སྐྱེ་བ་མེད་པ་དེ་ནི་མི་སྐྱེ་བའོ། །དེ་གང་གིས་ཤེས་པ་དེ་ནི་བཟོད་པ་ཞེས་བྱ་སྟེ། ཤེས་པ་དེས་མི་སྐྱེ་བའི་ཆོས་ལ་བཟོད་པ་ཐོབ་བོ། །ཞེས་སོ། །ས་དགུ་པར་ཁམས་ཀྱི་རང་བཞིན་ལ་སོ་སོར་རིག་བཞི་རང་ཆས་སུ་ཡོད་པར་རྟོགས་པས་ཡེ་ཤེས་ཀྱི་རང་བཞིན་ཇི་སྙེད་པའི་ཤེས་རབ་ལ་དབང་བར་བྱེད་དོ། །ས་བཅུ་པར་ཁམས་དེ་ཉིད་ཕྲིན་ལས་ཕུན་སུམ་ཚོགས་པའི་འབྱུང་གནས་སུ་རྟོགས་པས་དབང་བཞི་ལ་རང་དབང་ཐོབ་པའོ། །དབང་བཞི་ནི་མདོ་སྡེ་རྒྱན་ལས། ཡིད་དང་འཛིན་དང་རྣམ་པར་རྟོག །གྱུར་ཕྱིར་རྣམ་པར་མི་རྟོག་དང་། །ཞིང་དང་ཡེ་ཤེས་ལས་དག་ལ། །དབང་ནི་རྣམ་པ་བཞི་ཡིན་ཏེ། །དབང་དེ་མི་གཡོ་ལ་སོགས་པའི། །ས་གསུམ་ལ་ནི་རྣམ་བཞི་སྟེ། །གཅིག་ལ་རྣམ་གཉིས་དེ་ལས་གཞན། །དབང་ནི་རེ་རེར་འདོད་པ་ཡིན། །ཞེས་ཉོན་མོངས་པ་ཅན་གྱི་ཡིད་གནས་གྱུར་པས་རྣམ་པར་མི་རྟོག་པ་ལ་དབང་ཐོབ་པ་དང་། འཛིན་པ་སྒོ་ལྔའི་རྣམ་ཤེས་གནས་གྱུར་པས་ཞིང་ཁམས་རྣམ་པར་དག་པ་ལ་དབང་ཐོབ་པ་གཉིས་ནི་ས་བརྒྱད་པ་ན་ཡོད་པས་གཅིག་ལ་རྣམ་གཉིས་དང་། ཡིད་ཀྱི་རྣམ་ཤེས་གནས་གྱུར་པས་སོ་སོར་ཡང་དག་པར་རིག་པ་བཞི་ལ་མངའ་བརྙེས་ཤིང་ཕྲིན་ལས་ཕུན་སུམ་ཚོགས་པ་ལ་དབང་ཐོབ་པ་ནི་ས་དགུ་པ་དང་། བཅུ་པ་ལ་རྟོགས་པའི་འབྱུང་གནས་ཡིད་ཤེས་ཀྱི་འཆར་གཞི་ཀུན་གཞིའི་རྣམ་ཤེས་གནས་གྱུར་པས་མེ་ལོང་ལྟ་བུའི་ཡེ་ཤེས་ལ་དབང་ཐོབ་པ་ནི་དེ་ལས་གཞན་དབང་རེ་རེའི་དོན་ཏེ་སྔར་སོ་སོའི་གནས་སྐབས་སུའང་བཤད་ཟིན་ལ། ཕྲིན་ལས་ཀྱི་ཆ་ནས་སངས་རྒྱས་དང་བྱེད་པ་འདྲ་རུང་བར་བྱེད་པས་ན་རྒྱུད་བླ་མ་ལས། བྱང་ཆུབ་སེམས་དཔའི་ཚུལ་འདི་ནི། །རྗེས་ཐོབ་དེ་བཞིན་གཤེགས་རྣམས་དང་། །སེམས་ཅན་ཡང་དག་སྒྲོལ་བ་ལ། །འཇིག་རྟེན་ན་ནི་མཉམ་པ་ཉིད། །ཅེས་སོ། །དེ་ལྟ་ནའང་དོན་གྱི་ཆ་ནས་བྱ་བ་དང་བྱེད་པ་གཉིས་ཀའི་ཚུལ་ལ་སངས་རྒྱས་དང་ཆེ་ཁྱད་ཞུགས་པ་ནི། སྔ་མའི་འཕྲོར། དེ་ལྟ་མོད་ཀྱིས་ས་རྡུལ་དང་། །རྒྱ་མཚོ་བ་གླང་རྨིག་རྗེས་ཆུ། ཁྱད་པར་གང་ཡིན་སངས་རྒྱས་དང་། །བྱང་ཆུབ་སེམས་དཔའི་ཁྱད་དེ་ཉིད། །ཅེས་གསུངས་པ་ལྟར་རོ། །དེའང་བསྒོམ་པའི་ལམ་འདིར་ས་དགུའི་དྲི་མ་སྤོང་བའི་གཉེན་པོའི་ཁྱད་པར་ལ་ལྟོས་ནས་སྦྱོར་བའི་ལམ་དང་། བར་ཆད་མེད་ལམ་དང་། རྣམ་གྲོལ་གྱི་ལམ་དང་། ཁྱད་པར་གྱི་ལམ་ཞེས་གྲངས་ངེས་བཞིར་གནས་པ་ལས། སྔ་མ་གཉིས་ནི་སྤོང་བའི་གཉེན་པོའོ། །བར་པ་ནི་རྟེན་གྱི་གཉེན་པོའོ། །ཐ་མ་ནི་ཐག་བསྲིང་གི་གཉེན་པོའོ། །ལམ་གྱི་གདགས་གཞིའང་སའི་སྔོན་རོལ་རང་རྒྱུད་པ་དེ་ཉིད། ས་དེ་སའི་སྤང་བྱ་གེགས་སུ་གྱུར་པ་རགས་པ་སྤོང་བ་ལ་ནི་སྦྱོར་བའི་ལམ་ཞེས་བྱའོ། །ས་དེ་དངོས་དང་པོར་སྐྱེ་བཞིན་པས་དྲི་མ་ངོ་སྐལ་དེའི་ས་བོན་དངོས་སུ་སྤངས་པ་ནི་བར་ཆད་མེད་ལམ་མོ། །ས་དེའི་སྐད་ཅིག་གཉིས་པ་ནས་དངོས་གཞིར་གྱུར་པ་རྣམས་ནི་རྣམ་གྲོལ་གྱི་ལམ་མོ། །སའི་མཇུག་ཐོགས་སུ་ཡོན་ཏན་ཁྱད་པར་ཅན་ཐོབ་ནས་ས་གོང་མར་འགྲོ་བཞིན་པ་ནི་ཁྱད་པར་གྱི་ལམ་མོ། །སྤངས་པའི་ཁྱད་པར་ནི་མཐོང་སྤང་མ་ལུས་པ་སྤངས། སྒོམ་སྤང་ངོ་སྐལ་གྱི་རགས་པ་རྣམས་སྤངས། ཕྲ་བ་སྤོང་བཞིན་པ་ལ་འཇུག་པའོ། །དེ་ལྟར་སྤངས་པ་ལས་ས་བཅུའི་ཁྱད་པར་ལ་གོང་ནས་གོང་དུ་འགྲོ་ཞིང་། ལུས་འཛིན་པའི་ཁྱད་པར་ནི་དེ་དག་གི་སྐྱེ་བ་འཛིན་པའི་ནུས་པ་ཡོད་པའི་ཆ་ནས་ཡིན་གྱིས། གནས་རིགས་དེ་དག་གི་རྒྱལ་པོ་ཡིན་ཚད་བྱང་ཆུབ་སེམས་དཔའི་ས་དེ་དག་ལ་གནས་པས་མ་ཁྱབ་སྟེ། སོ་སོ་སྐྱེ་བོ་བསོད་ནམས་རླབས་ཆེན་བསགས་པ་དང་། ཁ་ཅིག་ཏུ་དེ་བཞིན་གཤེགས་པའི་སྤྲུལ་པ་དེ་དང་དེར་སྣང་བས་སེམས་ཅན་གྱི་དོན་མཛད་པའང་ཡོད་དོ། །དེའང་ས་དང་པོ་ཡན་ཆད་ནས་ཚེ་ལ་དབང་ཐོབ་པས། སྐྱེ་འཆི་རང་མཚན་པ་མེད་ཀྱང་གཞན་དོན་དུ་འགྱུར་ན་དེ་ལྟར་སྟོན་པ་ནི་རྒྱུད་བླ་མ་ལས། འཕགས་པས་འཆི་དང་ན་བ་དང་། །རྒ་བའི་སྡུག་བསྔལ་རྩད་ནས་སྤངས། །ལས་དང་ཉོན་མོངས་དབང་གི་སྐྱེ། །དེ་ལ་དེ་མེད་ཕྱིར་དེ་མེད། །ཇི་བཞིན་ཡང་དག་མཐོང་བའི་ཕྱིར། །སྐྱེ་སོགས་རྣམས་ལས་འདས་གྱུར་ཀྱང་། །སྙིང་རྗེའི་བདག་ཉིད་སྐྱེ་བ་དང་། །འཆི་དང་ན་དང་རྒ་བར་སྟོན། །ཞེས་སོ། །ལྔ་པ་མི་སློབ་པའི་ལམ་ནི་བསླབ་བྱ་མཐར་ཐུག་ནས་སློབ་ཏུ་མེད་པའི་དོན་ཏེ། ལུས་ཀྱི་རྟེན་ཐུན་མོང་བ་ཉན་ཐོས་སྡེ་པ་ལྟར་ན་འཛམ་བུའི་གླིང་པའི་རྒྱལ་རིགས་སམ་བྲམ་ཟེའི་རིགས་ལས་སངས་རྒྱ་བར་འདོད་ཅིང་། སྲིད་པ་ཐ་མའི་དུས་དང་པོའི་ཚེའང་སོ་སོ་སྐྱེ་བོར་འདོད་པའི་ཚུལ་མཛོད་ལས། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། །ཞེས་པས་བསྟན་ཀྱང་སྒྲ་ཇི་བཞིན་པ་མ་ཡིན་ལ། མདོ་སྡེ་དག་ལས། རྫོགས་སངས་རྒྱས་རྣམས་འོག་མིན་གྱི། །ཕོ་བྲང་དགྱེས་པ་སྡིག་པ་ཀུན། །རྣམ་སྤངས་དེར་ནི་འཚང་རྒྱ་ཞིང་། །སྤྲུལ་པ་དག་གིས་འདིར་འཚང་རྒྱ། །ཞེས་གསུངས་པ་ལྟར་ཐེག་པ་ཆེན་པོའི་ལུགས་སུ་འོག་མིན་དུ་སངས་རྒྱ་བའི་རྟེན་གང་ཡིན་པ་སྟེ། འཇུག་པའི་འགྲེལ་པར་ཡང་། གང་གི་དོན་དུ་འབད་པ་འདི་བརྩམས་པ་བླ་ན་མེད་པའི་ཡེ་ཤེས་དེ་ཡང་བཅོམ་ལྡན་འདས་ཀྱིས་འོག་མིན་གྱི་གནས་ཁོ་ནར་བརྙེས་སོ། །ཞེས་བཤད་པ་ལྟར་རོ། །བསམ་པའི་རྟེན་ནི་བསམ་གཏན་བཞི་པ་སྟེ། དེའང་སའི་དངོས་གཞི་ལས། གཙང་མའི་གནས་རྣམས་ལས་འདས་པ་ན་དབང་ཕྱུག་ཆེན་པོའི་གནས་ཡོད་པར་བཤད་པ་དེ་ཡང་ཉན་ཐོས་འཕགས་པ་རྣམས་སྐྱེ་བར་ནུས་པའི་འོག་མིན་ལས་འདས་པའི་འོག་མིན་གཉིས་པ་ལ་འདོད་དོ། །དེ་ལ་མི་སློབ་པའི་ལམ་དེའི་ངོ་བོ་ནི་སྐུ་གསུམ་ཡེ་ཤེས་ལྔ་དང་བཅས་པའི་བདག་ཉིད་དེ་འབྲས་བུའི་གནས་སྐབས་སུའང་འཆད་པར་འགྱུར་ལ། སའི་ངོས་ནས་བརྗོད་ན་སློབ་པའི་ས་བཅུ་ལས་བརྒལ་བས་བཅུ་གཅིག་ཀུན་ཏུ་འོད་ཀྱི་ས་སྟེ་རྒྱུའི་ཐེག་པའི་རྩེ་མོ་སྤྲུལ་པའི་སྐུའི་ས་མཐར་ཐུག་པའོ། །དེའང་ཕ་རོལ་ཏུ་ཕྱིན་པའི་ཐེག་པ་ལ་དེའི་ཚེ་སྔར་གྱི་ཁམས་བྱང་ཆུབ་ཏུ་གྱུར་ཏེ། ཆོས་ཐམས་ཅད་དྲི་མ་མེད་པའི་དེ་བཞིན་ཉིད་དང་། རྣམ་པར་མི་རྟོག་པའི་ཡེ་ཤེས་ཉག་གཅིག་གིས་བསྡུས་པའི་ཚུལ། སྐུ་གསུམ་གྲུབ་པ་ལས། དྲི་མེད་དེ་བཞིན་ཉིད་དང་ནི། །མི་རྟོག་ཡེ་ཤེས་མ་གཏོགས་པ། །སངས་རྒྱས་རྣམས་ལ་ཆོས་གཞན་ནི། །འགའ་ཡང་ཡོད་པ་མ་ཡིན་ནོ། །ཞེས་སོ། །དེ་ལྟར་ཕ་རོལ་ཏུ་ཕྱིན་པས་བསྐལ་པ་གྲངས་མེད་པས་ཐོབ་པར་བྱ་བ་ནི་སངས་རྒྱས་དེ་ལའང་ཉེ་བ་ལ་དགོངས་ནས་བཏགས་པ་བར་བཤད་པའི་སངས་རྒྱས་ས་བཅུ་པ་དང་། བཅུ་གཅིག་ཀུན་ཏུ་འོད་དངོས་བསྟན་གྱིས་གཉིས་སུ་འདོད་པའི་དང་པོ་ནི་མངོན་རྟོགས་རྒྱན་ལས། ས་དགུ་འདས་ནས་ཡེ་ཤེས་ནི། །གང་གི་སངས་རྒྱས་སར་གནས་པ། །དེ་ནི་བྱང་ཆུབ་སེམས་དཔའི་ས། །བཅུ་པ་ཡིན་པར་ཤེས་པར་བྱ། །ཞེས་སོ། །ཕྱི་མ་ནི། སྟོབས་བཅུ་ལ་སོགས་པ་ཟག་མེད་ཀྱི་ཡོན་ཏན་བརྒྱ་ཞེ་བཞི་ལ་མངའ་དབང་འབྱོར་བ་བཅུ་གཅིག་ཀུན་ཏུ་འོད་ཀྱི་སའོ། །དེའང་རང་ལམ་གྱི་སྤངས་རྟོགས་མཐར་ཕྱིན་པའི་ཆ་ནས་གཞལ་ཏེ་རྡོ་རྗེ་ཐེག་པའི་ཐབས་དང་ལྡན་པ་རྣམས་ཀྱིས་གསང་སྔགས་ཀྱི་ལམ་ནས་ཚེ་གཅིག་ལ་དཀའ་བ་མེད་པར་འཐོབ་བྱ་དེ་འཐོབ་པའི་མྱུར་ཁྱད་ལས་འབྲས་བུའི་ངོ་བོ་ལ་མཆོག་དམན་དུ་མི་འཛིན་ཅིང་། རྡོ་རྗེ་འཆང་གི་ས་དང་དབྱེ་བསྡུའི་ཁྱད་པར་དུ་འདོད་པ་དང་། ཡང་སློབ་དཔོན་ཞི་བ་འཚོའི་གཞུང་དེ་ཉིད་གྲུབ་པ་ཁུངས་སུ་བྱས་ནས་ཕར་ཕྱིན་རང་ལམ་གྱིས་ཀྱང་སྔགས་ཀྱི་རྡོ་རྗེ་འཛིན་པ་ཐོབ་པར་འདོད་པ་ནི་སྤྱི་དོན་ཡིན་ནོ། །དེ་ལ་དཔྱད་པར་བྱ་བའི་གནས་མང་དུ་གྲགས་པ་ནི་མདོ་སྔགས་ཀྱི་སངས་རྒྱས་དེ་གཉིས་རྣམ་པའི་ཆ་ནས་མི་མཚུངས་པ་དང་། གདུལ་བྱ་འདུལ་བའི་ཐབས་དང་། ཕྲིན་ལས་དང་། ཞིང་དང་། སྤྱོད་ཡུལ་དང་། ས་ལམ་གྱི་རྣམ་པར་གཞག་པས་ཁྱད་པར་བྱས་ཟིན་པ་ཉིད་ལ་དཔགས་ནའང་ཆོས་ཀྱི་དབྱིངས་ནི་ཐམས་ཅད་ཀྱི་ཁྱབ་བྱེད་ལས་མི་འཕོའོ། །དེ་ལ་རེ་ཞིག་རྡོ་རྗེ་ཐེག་པའི་སའི་ཁྱད་པར་ནི། རྡོ་རྗེའི་སྙིང་པོ་རྒྱན་ལས། ཀུན་ཏུ་འོད་དང་། བདུད་རྩི་འོད་དང་། ནམ་མཁའ་འོད་དང་། རྡོ་རྗེ་འོད་དང་། རིན་འོད་དང་། པདྨོ་འཆང་དང་། ལས་ཀྱི་འོད་དང་། དཔེ་མེད་པ་དང་། དཔེ་དང་བྲལ་བ་དང་། ཤེས་རབ་འོད་དང་། ཐམས་ཅད་མཁྱེན་པ་དང་། སོ་སོའི་བདག་ཉིད་དག་པའི་ས་སྟེ་བཅུ་གཉིས་སུ་བཤད་པའི་དོན་ནི་རིགས་ལྔ་དང་། ཡེ་ཤེས་ལྔ་དང་། ཐབས་ཤེས་གཉིས་ལ་གྲགས་པའོ། །ཁྱད་པར་དུ་འབྲས་བུའི་ཐེག་པ་ལ་གྲགས་པ་ཤིན་ཏུ་བརྟན་པ་ནི་བཅུ་གསུམ་རྡོ་རྗེ་འཛིན་པ་དང་། རིག་པ་འཛིན་པའི་གནས་ཀྱང་གྲགས་ཏེ་གྲངས་ངེས་ཀྱི་སྒོ་ནས་བརྗོད་ན་མངོན་བརྗོད་བླ་མར། དཔེ་མེད་པ་དང་ཡེ་ཤེས་ལྡན། །རྡོ་རྗེའི་ས་ཏེ་བཅུ་གསུམ་པ། །ཞེས་རབ་དགའ་ལ་སོགས་པ་བཅུའི་སྟེང་དུ་ཁྱད་པར་གྱི་ལམ་དང་། རྒྱུན་མཐའི་ལམ་གཉིས་པོ་རྣམ་པ་གསུམ་དུ་ཕྱེ་བའི་ཚུལ། ཁྱད་པར་གྱི་ལམ་ལ་དཔེ་མེད་པའི་ས་དང་། སངས་རྒྱས་ཀྱི་སའི་བར་ཆད་མེད་ལམ་ལ་ཡེ་ཤེས་ལྡན་དང་ལྷན་ཅིག་བཅུ་གསུམ་པ་ནི་རྡོ་རྗེའི་སའོ། །དེ་བཞིན་དུ་དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བར། ཐབས་དང་ཤེས་རབ་ཐབས་ཀྱི་མཆོག །ཤེས་རབ་མཆོག་གི་མཆོག་གྱུར་པ། །ས་ཡི་ཁྱད་པར་བཅུ་དང་གསུམ། །ཞེས་པའི་རྐང་པ་དང་པོའི་དོན། བཅུ་གཅིག་ཀུན་ཏུ་འོད་ཀྱི་ས་ནི་ཕ་རོལ་ཏུ་ཕྱིན་པ་བཅུ་དང་ས་བཅུ་ཐབས་དང་ཤེས་རབ་ཀྱི་བསྡུས་པ་ཡིན་པས་ས་དེ་དག་གི་ཐབས་ཀྱི་འབྲས་བུ་ལ་བཅུ་གཅིག་ཀུན་ཏུ་འོད་ཀྱི་ས་ཞེས་ཐུན་མོང་དུ་གྲགས་པ་སྟེ། དེ་ལས་གཡོས་པ་མེད་བཞིན་དུ་མ་ཆགས་པའི་ཤེས་རབ་དང་། མི་དམིགས་པའི་ཐུགས་རྗེ་དང་ལྡན་པ་ནི་ཤེས་རབ་མཆོག་ཅེས་བྱ་བ་མ་ཆགས་པདྨ་ཅན་གྱི་ས་དང་། མཆོག་གྱུར་པ་ཞེས་པ་ནི་ཐབས་དང་ཤེས་རབ་མཆོག་གི་ས་སྟེ། དེའི་བྱིན་རླབས་ལས་རྒྱལ་བའི་དཀྱིལ་འཁོར་མཐའ་ཡས་པ་རྩོལ་བ་མེད་པར་ལྷུན་གྲུབ་ཏུ་འབྱུང་བས་ཡི་གེ་འཁོར་ལོ་ཚོགས་ཆེན་གྱི་ས་གཉིས་བསྣན་པས་བཅུ་གསུམ་མོ། །དེ་བཞིན་དུ་སངས་རྒྱས་ཐམས་ཅད་ཀྱི་དགོངས་པ་འདུས་པར། འདུན་པ་སེམས་པ་དང་། རིགས་ཆེན་འབྱེད་པ་དང་། དབུགས་ཆེན་འབྱིན་པ་དང་། ལུང་ཆེན་ཐོབ་པ་དང་། རྩལ་ཆེན་རྫོགས་པ་ལ་སོགས་པའི་ཐ་སྙད་ཀྱི་རྣམ་པར་དབྱེ་བ་དང་། རིག་པ་ཆེན་པོའི་རྒྱུད་སྡེ་ལས། ཐེག་པའི་དང་པོ་བཅུ་དྲུག་མགོན། །ཞེས་སྣང་བ་དང་། མཆེད་པ་དང་། ཐོབ་པ་དང་། ཉེར་ཐོབ་རེ་རེར་བཞི་བཞིར་དབྱེ་བས་ས་བཅུ་དྲུག་ཏུ་བཞག་པ་དང་། དེ་བཞིན་དུ་ཉི་ཤུ་རྩ་གཅིག་ཏུ་དབྱེ་བ་ལ་སོགས་པའི་རྣམ་པར་གཞག་པ་དཔག་ཏུ་མེད་པ་ཡོད་དེ། དེ་དག་གི་རང་བཞིན་སྐུ་དང་ཡེ་ཤེས་ཀྱི་ཡོན་ཏན་གྱི་བདག་ཉིད་ལ་གསུངས་པ་ལས། ཐེག་པ་འོག་མ་ལྟར་བགྲོད་ཅིང་བསགས་པ་ས་ཐོབ་པའི་རིམ་པ་མཐོ་དམན་གྱི་བྱེ་བྲག་ལ་མ་གསུངས་ཏེ། ཆོས་ཀྱི་སྐུ་མཚན་མ་མེད་པའི་དབྱིངས་ཡེ་ནས་དག་མཉམ་ཆེན་པོའི་རང་བཞིན་ཡེ་ཤེས་ཀྱི་དཀྱིལ་འཁོར་རྩོལ་བ་མེད་པའི་བདག་ཉིད་ལ་བཤད་དོ། །དེ་སྐད་དུ་པཎྜི་ཏ་རོང་པས། འབྲས་བུ་ལ་བྱེ་བྲག་ཡོད་ན་ནི། ཐེག་པ་གསུམ་དུ་བསྡུ་མི་རུང་ངོ་། །ཞེས་བཤད་དོ། །དེ་ལྟ་ནའང་བྷཾ་ག་ལའི་པཎྜི་ཏས། ལམ་ལ་ཉེ་རིང་བྱུང་ན་འབྲས་བུ་ལ་བཟང་ངན་ཅི་ནས་ཀྱང་ཡོད་དགོས་པ་ཡིན། ནང་པ་སངས་རྒྱས་པའི་ཆོས་ཐམས་ཅད་རྒྱུ་འབྲས་གོ་མ་ལོག་པ་དགོས་ཞེས་བཤད་པའི་ཕྱིར། རེ་ཞིག་སྔ་རབས་ཀྱི་སློབ་དཔོན་རྣམས་ཀྱི་འདོད་པའང་འགོད་པར་བྱ་ན་མཻ་ཏྲི་པས་ཕ་རོལ་ཏུ་ཕྱིན་པའི་རང་ལམ་ནས་སངས་རྒྱས་མི་ཐོབ་པར་ཁ་ཚོན་བཅད་ནས་ཕར་ཕྱིན་བསྟན་པའི་དགོས་པ་སྔགས་ཀྱི་ལམ་སྟེགས་སུ་བཤད་པ་དང་། ནཱ་རོ་པས་ཕ་རོལ་ཏུ་ཕྱིན་པའི་ཐེག་པའི་སྒོར་ཞུགས་པས་ཀྱང་སངས་རྒྱས་ཐོབ་ནི་ཐོབ་སྟེ། གསང་སྔགས་དང་གཉིས་ཀྱི་ཁྱད་པར་ནི་བདེ་བར་སྐྱོབ་པ་དང་། མྱུར་སྐྱོབ་ཀྱི་བྱེད་པ་ཡིན་ནོ། །ཞེས་པ་འདི་དྲངས་ནས་ཀུན་ཏུ་འོད་ཀྱི་ས་པས་ད་དུང་སྔགས་ལམ་ལ་ཞུགས་ནས་མྱུར་ལམ་གྱིས་བསྒྲུབས་པའི་སངས་རྒྱས་གདོད་བསྒྲུབ་དགོས་པར་འཆད་དེ། ལུང་དེའི་དོན་ནི་དེ་ཙམ་དུ་འགྲེལ་པར་མི་མངོན་ནོ། །དེ་ལ་མདོ་སྔགས་གཉིས་རིམ་གཉིས་ལ་སོགས་པའི་རྒྱུ་ལ་ཁྱད་པར་ཡོད་ན། འབྲས་བུ་ལ་ཁྱད་པར་ཞུགས་པ་ཆོས་ཉིད་དེ། ཆུ་དང་འོ་མས་བཅུས་པའི་སྐྱུ་རུ་ར་བཞིན་ནོ། །ཞེས་བརྟགས་ནས་མདོ་ནས་ས་བཅུ་པ་སངས་རྒྱས་སུ་བཤད་པ་ཉེ་བ་ཉིད་ལ་དགོངས་ནས་བཏགས་པ་བར་བཤད་པ་དང་མཚུངས་པར། སྔགས་ཀྱི་འབྲས་བུ་རྡོ་རྗེ་འཛིན་པ་ལ་ལྟོས་ནས་བཅུ་གཅིག་པ་ཡང་ཉེ་བ་ཉིད་ལ་དགོངས་ནས་བཏགས་པ་པོར་འདོད་པ་བཞིན་དུ། བཅུ་གཅིག་ཀུན་ཏུ་འོད་ཀྱི་ས་དེ་ནི་བླ་ན་ཡོད་པའི་སངས་རྒྱས་ཉི་ཚེ་བ་དང་། བཅུ་གསུམ་རྡོ་རྗེ་འཛིན་པའི་གོ་འཕང་ནི་བླ་ན་མེད་པའི་སངས་རྒྱས་བསམ་གྱིས་མི་ཁྱབ་པར་འདོད་པའང་སྣང་ངོ་། །དེ་ལ་འདི་ལྟར་བཤད་པར་བྱ་སྟེ། ངེས་པའི་དོན་དུ་རྒྱུ་ལ་ཁྱད་པར་ཡོད་པའང་འདོད་དཀའ་སྟེ། རྒྱུ་དེ་བདེ་གཤེགས་སྙིང་པོ་ལ་ཟེར་ན་སེམས་ཅན་གྱི་ཁམས་ཐམས་ཅད་ལ་ཁྱབ་བྱེད་དེས་ཁྱབ་པ་དང་། རིམ་པ་གཉིས་ལ་ཟེར་ན་དེ་གཉིས་ཀྱང་གཅིག་ཤོས་ནི་ཐབས་གཅིག་ཤོས་ནི་ཤེས་རབ་ཡིན་པས་ཕ་རོལ་ཏུ་ཕྱིན་པ་དྲུག་པོའང་ཐབས་དང་ཤེས་རབ་གཉིས་ཀྱི་རང་བཞིན་དུ་གནས་པའི་ཕྱིར་སྔགས་ཐབས་མྱུར་ཞིང་། ཤེས་རབ་ཟབ་པའི་ཁྱད་པར་ལས། བསམ་གཏན་དང་ཤེས་རབ་ཀྱི་ངང་དུ་བསྐྱེད་རྫོགས་ཀྱི་ངོ་བོ་རྫས་འགལ་བ་མ་ཡིན་པའི་ཕྱིར་རོ། །དེའི་ཕྱིར་དེ་བཞིན་གཤེགས་པ་ཐམས་ཅད་ཆོས་ཀྱི་དབྱིངས་སུ་རོ་གཅིག་པས་ངོ་བོ་གཅིག་པའི་དོན་ལ་ཡེ་ཤེས་ཀྱི་ངང་དུ་འགལ་བ་མི་འདུའོ། །རང་སའི་ལམ་ནས་མཚན་དང་དཔེ་བྱད་ཀྱི་སྐུར་བྱང་ཆུབ་པའི་རང་བཞིན་རྣམ་པ་ཐ་དད་པ་དང་། གདུལ་བྱ་འདུལ་བའི་ཐབས་དང་ཕྲིན་ལས་ཀྱི་སྣང་ཆ་མདོ་དང་སྔགས་ཀྱི་གདུལ་བྱ་སོ་སོའི་ཁམས་དང་། དབང་པོ་དང་། རྣམ་པར་རིག་པ་ཉིད་དང་མཚུངས་པར་ཤར་བའི་ཡེ་ཤེས་ཀུན་ཏུ་སྣང་བའི་བདག་ཉིད་ཆེན་པོ། །ཀུན་ཏུ་འགྲོ་བ་ཅན་ཡིན་པས་རྣམ་རིག་གི་དོན་ཐ་དད་པའང་མི་འགལ་བའི་ཚུལ་སངས་རྒྱས་ཞེས་བྱ་བའི་སྒྲས་རྟོགས་པར་བྱ་སྟེ་འདི་ལྟར་བྷ་ག་ཝན་ཞེས་བྱ་བ་ནི་བཅོམ་ལྡན་འདས་ཞེས་པའི་དོན་ཏེ། ཉོན་མོངས་པ་ལ་སོགས་པ་བཅོམ་པའི་ཡོན་ཏན་དང་ལྡན་པས་ན་དེ་སྐད་དུ་གྲགས་པ་དང་། རྣམ་པ་གཅིག་ཏུ་ན་བྷ་ག་ནི་སྐལ་པ་སྟེ་ཝན་ནི་ལྡན་པ་ལའང་འཇུག་པས་སངས་རྒྱས་རྣམས་དབང་ཕྱུག་ཕུན་སུམ་ཚོགས་པ་ལ་སོགས་པ་དང་ལྡན་པས་ན་ལེགས་ལྡན་ནམ། སྐལ་ལྡན་ཞེས་བཤད་དོ། །དེ་བཞིན་དུ་སྒྲ་འཇུག་པའི་ཡུལ་ཐ་དད་ཀྱང་། མདོར་བསྡུ་ན། འདུ་འབྲལ་མེད་པའི་གཟུངས་དང་ལྡན་པའི་ཕྱིར་བྷ་ག་ཝན་ནོ། །དེའི་ཕྱིར་དང་པོའི་ཆ་ནས་ཆགས་བྲལ་གྱི་སངས་རྒྱས་དང་། གཉིས་པའི་ཆ་ནས་དབང་ཕྱུག་ཕུན་སུམ་ཚོགས་པ་སྔགས་ཀྱི་སངས་རྒྱས་དང་། གསུམ་པའི་ཆ་ནས་དུ་མ་རོ་གཅིག་འདུ་འབྲལ་མེད་པ་ཆོས་ཉིད་གང་དུའང་མ་ཕྱེ་བའི་དོན་ལ་སངས་རྒྱས་སུ་ཚིག་བླ་དགས་སུ་བྱས་པའི་དོན་ཏེ། སཾ་ཀྲྀ་ཏའི་སྐད་ལ་རྐྱེན་བྱིན་པས་དོན་རྣམ་པ་གསུམ་བསྒྲུབ་ནུས་པའི་ཕྱིར་རོ། །འདི་ལྟར་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེའི་རང་བཞིན་གང་ཡིན་པ་ནི་བྱང་ཆུབ་ཀྱི་སེམས་ཡིན་ལ། དེ་ནི་རིགས་ཀྱི་སེམས་དང་། རྒྱུའི་གནས་སྐབས་ཀྱི་སེམས་དང་། འབྲས་བུའི་སེམས་ཀྱི་བར་དུ་དབྱེར་མེད་པར་བྱང་ཆུབ་ཀྱི་རང་བཞིན་སོ་སོ་མ་ཡིན་ཐ་མི་དད་པ་ཉིད་ཡིན་པས་ཆོས་ཉིད་ཀུན་ཏུ་འགྲོ་བ་རིགས་པར་བྱའོ། །དེ་ལྟ་ནའང་རྣམ་སྣང་མངོན་བྱང་ལས། རྫོགས་པའི་སངས་རྒྱས་གང་འདས་དང་། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་གང་། །དེ་དག་ཀུན་གྱི་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །ཞེས་བསྟན་པ་འདི་བརྗོད་བྱ་འདི་དག་གི་དོན་གྱི་ཆིངས་ཆེན་པོ་ཉིད་པས། ཐུན་མོང་བའི་ལམ་སྔོན་དུ་སོང་བའམ། མ་སོང་ཡང་རུང་སྟེ། སྔགས་ལམ་ལས་དང་པོ་པའི་ཚེ་ཀུན་ཏུ་བཟང་པོའི་སྤྱོད་པ་ཁྲེལ་བག་ཡོད་པ་ཉིད་ལ་བརྟེན་ནས་སྔགས་ལ་མོས་པས་སྤྱོད་པའི་ལམ་བརྟུལ་ཞུགས་བརྟན་པར་གནས་འགྱུར་ནས་རང་ལམ་གྱི་ཆོ་ག་སྒྲ་ཇི་བཞིན་པར་ཉམས་སུ་ལེན་ནུས་པའི་ཚེ། ཁམས་གསུམ་པའི་མཐོང་བ་དང་བསྒོམ་པས་བསྡུས་པའི་འདོད་ཆགས་རང་མཚན་པ་མ་ཡིན་ཀྱང་། སྙོམས་འཇུག་གི་སྒྲིབ་པར་གྱུར་པའི་ཉོན་མོངས་པ་ཆ་ཕྲ་མོ་ཞིག་མདོ་ལམ་ལ་ཡོད་པ་དེ། སྔགས་སུ་ཕོ་ཉའི་ལམ་དཔའ་བོ་བྱང་ཆུབ་སེམས་ཀྱི་ལྗོན་པའི་ཤིང་། ཨ་ཝ་དྷཱུ་ཏིའི་རྩ་ནང་དུ་ཐབས་ཀྱི་ཆོ་ག་ཟབ་མོས་སྦྱངས་ནས། སྔགས་ཀྱི་ས་ལམ་ཉེ་རྒྱུའི་སྦྱོར་བས་བགྲོད་པའི་ཞར་ལ་མདོ་ལུགས་ཀྱི་ས་ལམ་ཡང་གུད་དུ་བཅད་པ་མེད་ཕྱིར། ཕན་ཚུན་རིང་ཐུང་བསྡུར་བ་ལྟ་བུའི་ངོས་ནས་བགྲོད་པའོ་ཞེས་བརྗོད་པར་མི་ནུས་ཀྱང་། ངོ་བོ་ལ་བཟང་ངན་མེད་པར་བགྲོད་ནས་དག་པ་གཉིས་ལྡན་གྱི་ངང་དུ་ཕྱིན་པ་ནི། དཔེར་ན་རྟ་དང་བོང་བུ་བགྲོད་པ་ལ་མྱུར་བུལ་ཡོད་ཀྱང་ངལ་སྟེགས་སུ་གཅིག་པ་བཞིན་མདོ་སྔགས་གཉིས་ཀའི་མཐར་ཐུག་གི་ཐོབ་བྱ་གང་ཡིན་པ་དེ་སྔགས་ཀྱི་ཆོ་ག་དང་ལམ་ཟབ་མོས་གྲུབ་ཀྱིས། གཞན་གྱིས་མ་ཡིན་ནོ་ཞེས་པ་འདི་དོན་ལ་གནས་པའོ། །དེ་ལས་གཞན་དུ་འབྲས་བུ་ལ་མཆོག་དམན་ཡོད་མེད་འདི་དག་ནི་སོ་སོར་རྟོག་པའི་ཤེས་རབ་ལས་བྱུང་བའི་ཚིག་བླ་དྭགས་སུ་གྱུར་པ་གང་ཞིག་རང་རང་གི་རྣམ་པར་ཤེས་པའི་ཡུལ་དུ་འཇུག་ཏུ་རུང་བར་བྱས་པ་ལས་སངས་རྒྱས་ཀྱི་རང་བཞིན་བསམ་གྱིས་མི་ཁྱབ་པའི་གནས་སུ་མི་རུང་བའི་ཚུལ་མགོན་པོ་བྱམས་པས། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཆོས་དང་སངས་རྒྱས་ཕྲིན་ལས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། །འདི་ནི་འདྲེན་པ་རྣམས་ཀྱི་སྤྱོད་ཡུལ་ལོ། །ཞེས་གསུངས་པའི་ཕྱིར་རོ། །དེ་ལྟར་ཆོས་དཀོན་མཆོག་གི་ཡོན་ཏན་གང་གིས་ཤེས་པ་དེས་སངས་རྒྱས་ཀྱི་བསྟན་པ་ཤེས་ཤིང་། བསྟན་པ་ཤེས་པ་དེས་གྲུབ་པའི་མཐའ་ཡང་ཤེས་ལ། འཁོར་བ་ལས་གང་གིས་སྐྱོབ་པའི་མཚན་ཉིད་ཀྱང་ཤེས་པ་ཡིན་ནོ། །དེ་ནས་དགེ་འདུན་དཀོན་མཆོག་བཤད་པའི་ཕྱིར། དགེ་འདུན་ངོ་བོ་རིག་གྲོལ་གཉིས་ལྡན་ཏེ། །ཉན་རང་ཞུགས་གནས་སྐྱེས་བུ་ཟུང་བཞིའམ། །ཡ་བརྒྱད་རྒྱལ་སྲས་སར་གནས་མཐའ་དག་པའི། །རང་སའི་ཡོན་ཏན་བརྗོད་ཀྱིས་མི་ལང་ཡང་། །ལམ་དང་སྐྱོབ་པའི་ངོ་བོ་དམ་པའི་ཆོས། །ཆོས་ནི་སྟོན་པ་ལས་བྱུང་དེ་བསྒྲུབ་པའི། །གྲོགས་སམ་བསླབ་པའི་རྟེན་གནས་དགེ་འདུན་ཕྱིར། །དཀོན་མཆོག་གསུམ་ཞེས་སྐྱབས་ཀྱི་ཡུལ་དུ་གྲུབ། །ཅེས་འདོམས་ཏེ། དེ་ལ་རང་གི་ངོ་བོ་རིག་པ་དང་གྲོལ་བའི་ཡོན་ཏན་བརྒྱད་དང་ལྡན་པ་ནི་དོན་དམ་པར་སྐྱབས་སུ་འགྲོ་བའི་ཡུལ་ཐེག་པ་ཆེན་པོའི་དགེ་འདུན་ཡིན་ཏེ། བྱམས་མགོན་གྱིས། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །ཅེས་ཇི་ལྟ་བ་རིག་པའི་ཡོན་ཏན། ཇི་སྙེད་པ་རིག་པའི་ཡོན་ཏན། ནང་ཡེ་ཤེས་གཟིགས་པའི་རིག་པའི་ཡོན་ཏན་དང་གསུམ། དེ་ཉིད་ཐོབ་བྱེད་ཀྱི་ཐབས་སུ་གྱུར་པའི་བར་ཆད་མེད་ལམ་གྱི་ངོ་སྐལ་སྤང་བྱ་ཆགས་སྒྲིབ་ལས་གྲོལ་བའི་ཡོན་ཏན། དེར་གྱུར་བའི་ཐོགས་སྒྲིབ་ལས་གྲོལ་བའི་ཡོན་ཏན། དེར་གྱུར་པའི་དམན་སྒྲིབ་ལས་གྲོལ་བའི་ཡོན་ཏན་ཏེ་དྲུག །དེ་ལ་དབྱེ་གཞི་རིག་པའི་ཡོན་ཏན་དང་། གྲོལ་བའི་ཡོན་ཏན་བསྣན་པས་བརྒྱད་དོ། །དེ་ལྟ་བུ་ནི་བྱང་ཆུབ་སེམས་དཔའ་འཕགས་པ་ཕྱིར་མི་ལྡོག་པའི་དགེ་འདུན་ཡིན་པས་ན་དགེ་འདུན་གྱི་ངོ་བོ་ཉིད་དུ་སྨོས་པའོ། །ཉན་རང་གི་དགེ་འདུན་ནི་རིག་གྲོལ་གྱི་ཕྱོགས་ལས་དམན་པ་ས་དེའི་ཡན་ལག་ལྟ་བུ་སྟེ། དེ་ལ་ཕྱོགས་དང་པོ་ཉན་ཐོས་ནི། འཕགས་པ་སྟོང་ཕྲག་བརྒྱ་པར་བཅོམ་ལྡན་འདས་ཀྱི་འདི་ན་ཀུན་ཏུ་སྦྱོར་བ་གསུམ་སྤངས་པས་རྒྱུན་དུ་ཞུགས་པའི་འབྲས་བུའོ། །འདོད་པའི་འདོད་ཆགས་དང་གནོད་སེམས་སྲབ་པས་ལན་གཅིག་ཕྱིར་འོང་བའི་འབྲས་བུའོ། །འོག་མའི་ཆ་ཅན་གྱི་ཀུན་ཏུ་སྦྱོར་བ་ལྔ་སྤངས་པས་ཕྱིར་མི་འོང་བའི་འབྲས་བུའོ། །བླ་མའི་ཆ་ཅན་གྱི་ཀུན་ཏུ་སྦྱོར་བ་ལྔ་སྤངས་པས་དགྲ་བཅོམ་པ་ཉིད་དོ། །ཞེས་ཐོབ་ཆ་བཞི་པོ་རེ་རེ་ལའང་གཉིས་གཉིས་སུ་ཕྱེ་བས་སྐྱེས་བུ་ཟུང་བཞི་དང་གང་ཟག་ཡ་བརྒྱད་དེ། འདི་ལྟར་རྒྱུན་ཞུགས་ཞུགས་པ་དང་། རྒྱུན་ཞུགས་འབྲས་བུ་ལ་གནས་པ། དེ་བཞིན་དུ་ཕྱིར་འོང་ཞུགས་གནས་གཉིས། ཕྱིར་མི་འོང་ཞུགས་གནས་གཉིས། དགྲ་བཅོམ་ཞུགས་གནས་གཉིས་སོ། དེ་དག་རང་རང་ལ་དབང་པོ་རྟུལ་རྣོན་གྱིས་མཐོང་སྤང་ཀུན་སྦྱོར་གསུམ་སྤངས་པའི་ཁྱད་པར་གྱི་དབྱེ་བ་ཉིད་ཡོད་དེ་ཀུན་རྫོབ་ཀྱི་དགེ་འདུན་ཡིན་པས་འདིར་མ་སྨོས་སོ། །དེ་ལྟ་ནའང་བསྡུ་བའི་དོན་ནི་དཀོན་མཆོག་རྗེས་དྲན་ལས། ལེགས་པར་ཞུགས་པ་ལ་སོགས་པ་བཞིས་ནི་བསྒྲུབ་པའི་ཡོན་ཏན་བཤད་དོ། །ཀུན་ཏུ་སྦྱིན་པའི་འོས་སུ་གྱུར་པ་ལ་སོགས་པས་མཆོད་པར་འོས་པའི་ཡོན་ཏན་བཤད་དོ། །དེ་བཞིན་དུ་གཏོང་བ་དང་ཚུལ་ཁྲིམས་ཀྱི་ཡོན་ཏན་ཀྱང་བགྲང་ངོ་། །རང་སངས་རྒྱས་ལའང་ཞུགས་གནས་བརྒྱད་ཡོད་དེ། དོན་གྱི་ཉན་ཐོས་ལས་འཕགས་པའི་ཁྱད་པར་ནི་སྔ་མའི་འཕྲོར། གང་ཅི་ཡང་རུང་སྟེ་ཀུན་འབྱུང་བའི་ཆོས་དེ་དག་ཐམས་ཅད་འགོགས་པའི་ཆོས་ཅན་དུ་ཤེས་པས་རང་བྱང་ཆུབ་བོ། །ཞེས་གསུངས་པ་སྟེ། དེ་ཡན་ཆད་ནི་ཕྱིའི་དགེ་འདུན་ཡིན་ནོ། །ནང་གི་དགེ་འདུན་ནི་གཞུང་འདིར་རྒྱལ་སྲས་སར་གནས་མཐའ་དག་པའི་སྒྲས་བསྡུས་ཏེ་བསྟན་པ་ཉིད་དེ། མཁའ་ལ་འགྲོ་བ་དང་། ཤུགས་ཀྱིས་འགྲོ་བ་དང་། སྔགས་ལས་སྐྱེས་པ་དང་། ལས་ལས་སྐྱེས་པ་སྟེ་དཔའ་བོ་མཁའ་འགྲོ་ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་དང་། དེ་བཞིན་གཤེགས་པའི་རིགས་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་ཀྱིས་བསྡུས་པ་འཇིག་རྟེན་ལས་འདས་པའི་ཚོགས་དང་། རྣམ་པར་སྨིན་པ་དང་། ཚེ་ལ་དབང་བ་དང་། ཕྱག་རྒྱ་ཆེན་པོ་དང་། ལྷུན་གྱིས་གྲུབ་པ་སྟེ་ས་དང་འབྲས་བུ་ལ་གནས་པའི་རིགས་འཛིན་གྱི་ཚོགས་རྣམས་སོ། །འདི་དག་གི་རིགས་དབྱེ་ནི་འོག་མིན་བགྲོད་པའི་ཐེམ་སྐས་སུ་བསྟན་ཟིན་ཏོ། །དེ་ལ་གང་གི་ཕྱིར་དཀོན་མཆོག་ཅེས་བྱ་ན། མཁྱེན་པའི་ཡེ་ཤེས་ཀྱིས་ཤེས་བྱ་ཐམས་ཅད་ལ་ཆགས་ཐོགས་མེད་པར་ཁྱབ་པ་གཞན་དུ་མི་སྲིད་པས་ཡིད་བཞིན་གྱི་ནོར་བུ་རིན་པོ་ཆེ་ལྟར་དཀོན་པོ་དང་། སེམས་ཅན་ཐམས་ཅད་ལ་བུ་གཅིག་པ་ལྟར་བརྩེ་བའི་ཐུགས་རྗེས་རང་ཉིད་ཀྱང་རང་དབང་མེད་པར་བཅིངས་པས་བསྟོད་སྨད་དང་ཉེ་རིང་གི་ཕྱོགས་སུ་ལྷུང་བའི་འགྱུར་བ་སྣ་ཚོགས་མེད་པས་མི་མཐུན་པའི་ཕྱོགས་ཀྱི་དྲི་མ་མེད་པ་དང་། འདོད་པས་ཟིལ་གྱིས་ནོན་པའི་ཡིད་ལྡན་མཐའ་དག་འདུལ་བའི་ནུས་པ་ཆེ་བ་དང་། འཇིག་རྟེན་ཐམས་ཅད་ཀྱི་རྒྱན་གཅིག་ཏུ་གྱུར་པའི་ཡོན་ཏན་ཟད་མི་ཤེས་པ་དང་། ཟབ་ཅིང་རྒྱ་ཆེ་བའི་ཆོས་ཉིད་སེམས་ཅན་ཐམས་ཅད་ལ་སྨིན་པའི་ཕྲིན་ལས་འབའ་ཞིག་ཏུ་ཤར་བ་ནམ་ཡང་བསླུ་བ་མེད་པའི་ཕྱིར་ཏེ། རྒྱུད་བླ་མ་ལས། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་དང་འཇིག་རྟེན་གྱི། །རྒྱན་གྱུར་ཉིད་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་མཆོག་ཉིད། །ཅེས་སོ། །དེའང་མྱ་ངན་ལས་འདའ་བའི་ལམ་དང་། འཁོར་བའི་སྡུག་བསྔལ་ལས་སྐྱོབ་པའི་བདག་ཉིད་མཐར་ཐུག་པ་ནི་ཆོས་དཀོན་མཆོག་ཁོ་ན་ཡིན་ཏེ་དྲིན་ལན་གསབ་པ་ལས། སངས་རྒྱས་ཀྱི་སྟོན་པ་ནི་ཆོས་ཡིན་ཏེ་ཆོས་ལས་སངས་རྒྱས་སྐྱེས་པས་ན། ཆོས་སངས་རྒྱས་ཀྱི་ཡུམ་ཡིན་ཏེ་སངས་རྒྱས་ནི་ཆོས་ལ་གནས་སོ། །ཞེས་དང་། ཆོས་ཡང་དག་པར་སྡུད་པ་ལས། སངས་རྒྱས་བཅོམ་ལྡན་འདས་དེ་དག་ནི་ཡོན་ཏན་མཐའ་ཡས་མུ་མེད་པ་སྟེ། དེ་དག་ནི་ཆོས་ལས་སྐྱེས་པ། ཆོས་ཀྱི་བགོ་སྐལ་ལ་སྤྱོད་པ། ཆོས་ཀྱིས་སྤྲུལ་པ། ཆོས་བདག་པོར་གྱུར་པ། ཆོས་ལས་བྱུང་བ། ཆོས་ཀྱི་སྤྱོད་ཡུལ། ཆོས་ལ་རྟོན་པ། ཆོས་ཀྱིས་གྲུབ་པ་སྟེ་ཞེས་འགོག་ལམ་གྱི་བདེན་པ་སྐྱོན་སྤང་བ་དང་ཡོན་ཏན་བསྒྲུབ་པའི་བདག་ཉིད་ཅན་དེ་སྐྱབས་སུ་འགྲོ་བ་པོའི་རྒྱུད་ལ་མངོན་དུ་བྱས་པ་ལས་སངས་རྒྱས་ཀྱི་ཡོན་ཏན་ཐམས་ཅད་འབྱུང་བའི་ཕྱིར་དང་། ཆོས་དེའང་སྟོན་པ་སངས་རྒྱས་ཀྱི་བདག་པོའི་རྐྱེན་ལས་གཞན་དུ་མི་འབྱུང་བའི་ཕྱིར་དེ་གཉིས་ཕན་ཚུན་རྟེན་དང་བརྟེན་པ་ལྟ་བུར་གྱུར་པའང་དྲིན་ལན་གསབ་པའི་མདོར། གསོལ་པ་སངས་རྒྱས་ཀྱི་སྟོན་པ་ཆོས་ལགས་ན་ཅིའི་སླད་དུ་དཀོན་མཆོག་གསུམ་ལས་ཆོས་སྔར་མི་སྨོས། བཀའ་སྩལ་པ། སངས་རྒྱས་ཀྱི་སྟོན་པ་ཆོས་ཡིན་མོད་ཀྱི། ཆོས་ཀྱང་སངས་རྒྱས་མ་ཡིན་པ་གཞན་གྱིས་མི་སྟོན་ཏེ་ལམ་ཞེས་བྱ་བ་ཡང་མིས་བསྒྲུབ་དགོས་པས་དེ་བས་ན་སངས་རྒྱས་སྔར་སྨོས་སོ། །ཞེས་སོ། །དེའི་ཕྱིར་དེ་ལས་དེ་བྱུང་གི་འབྲེལ་བ་བསྒྲུབ་པའི་ཕྱིར་མཚན་གྱི་གོ་རིམ་ཡང་ཤེས་བཞིན་དུ་ནོར་བར་སྨྲས་ན་ཉེས་པ་ཡོད་ལ། མ་ཤེས་པ་རྣམས་ནི་མ་གཏོགས་སོ། །གཉིས་ཀའི་ཡོན་ཏན་རྗེས་སུ་བསྒྲུབ་པ་ནི་དགེ་འདུན་ཡིན་པས་དེ་ལ་ལམ་བསྒྲུབ་པའི་གྲོགས་སུ་ཐ་སྙད་བཏགས་ཀྱང་དོན་ལ་བསླབ་པ་གསུམ་པོའི་བརྟེན་གནས་སུ་ཤེས་པས་སྐྱབས་སུ་འགྲོ་དགོས་པ་ཡིན་ནོ། །དེ་སྐད་དུ་སྐྱབས་འགྲོ་བདུན་ཅུ་པ་ལས། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་སོ། །དེ་ལ་འདིར་ཐེག་པ་ཆེ་ཆུང་གི་གཞུང་བཟློས་པ་དང་། རྣམ་པར་མ་ཕྱེད་པའི་ལམ་ལ་ཀྱོགས་པ་མ་ཡིན་ཀྱང་གང་ཟག་རྣམས་ནི་ལོག་པར་བལྟ་བ་དང་། ཐེ་ཚོམ་ལ་སོགས་ཏེ་སྒྲིབ་པ་ལྔའི་རང་བཞིན་ལ་གོམས་པ་མང་བས་སྐྱབས་སུ་འགྲོ་བའི་ངེས་ཚིག་དང་། ཡུལ་དང་། བསམ་པའི་ཁྱད་པར་དང་། དེའི་རྒྱུ་འབྲས་ལ་རྨོངས་པར་མི་འགྱུར་བའི་དཔེ་དོན་འབྲེལ་པ་དང་ལྡན་པས་བློ་བཅོས་པའི་ཐབས་མ་བཀྲལ་ཡང་ལུང་གིས་རྟོགས་པ་ཐེག་དམན་ལྟར་བཤད་པར་བྱ་སྟེ། དྲིན་ལན་གསབ་པའི་མདོ་ལས། སྐྱབས་སུ་འགྲོ་བ་ཞེས་བྱ་བ་ནི་མགོན་སྐྱབས་སམ་དཔུང་གཉེན་གྱི་དོན་ཏེ། དཔེར་ན་མི་ཞིག་ལ་ཉེས་པ་ཆེན་པོ་བྱུང་བ་ལས་ཡུལ་གཞན་དུ་འཕོས་པ་ལས། རྒྱལ་པོ་ཕ་རོལ་པོ་ལ་ཕར་སྐྱབས་བཙལ་ན། ཡུལ་ཕ་རོལ་གྱི་རྒྱལ་པོས་དེ་ལ་ཁྱོད་མི་འཇིགས་པར་འདོད་ན་ངའི་ཡུལ་འདི་ནས་མི་འགྲོ་ཞིང་ངས་བསྟན་པ་ཉན་ན་མགོན་སྐྱབས་བྱའོ་ཞེས་བསྒོ་བ་དང་འདྲ་བར་སོ་སོ་སྐྱེ་བོ་ཡང་དེ་དང་འདྲ་སྟེ། བདུད་ཀྱི་དབང་དུ་གྱུར་ལ་སྐྱེ་ཤིར་འཁོར་བའི་ཉེས་པ་ཡོད་པས། དཀོན་མཆོག་གསུམ་ལ་ཕྱོགས་ཏེ་སྐྱབས་སུ་འགྲོ་བར་བྱའོ། །གལ་ཏེ་དཀོན་མཆོག་གསུམ་ལ་རྩེ་གཅིག་ཏུ་ཕྱོགས་ཤིང་སྐྱབས་སུ་སོང་ལ། སངས་རྒྱས་ཀྱི་བསྟན་པ་ལས་འགལ་བར་མ་བྱས་ན། བདུད་ཀྱི་རྒྱལ་པོ་སྡིག་པ་ཅན་གྱིས་ཅི་བྱར་ཡང་མེད་དོ། །སྔོན་ཕུག་རོན་གཅིག་ཁྲས་ཉེན་ནས་ཤཱ་རིའི་བུའི་ཕག་གྲིབ་མར་སོང་བ་ལས། འོན་ཀྱང་སྐྲག་ཅིང་སྔངས་པ་བཞིན་ནོ། །དེ་ནས་སངས་རྒྱས་ཀྱི་གྲིབ་མའི་ཕག་ཏུ་སོང་བ་དང་། འཇིགས་པ་མེད་དེ་འདར་བ་ཡང་མེད་དོ། །དེ་བས་ན་སངས་རྒྱས་ནི་བྱམས་པ་ཆེན་པོ་དང་། ཐུགས་རྗེ་ཆེན་པོར་ལྡན་གྱིས། ཤཱ་རིའི་བུ་ལ་ནི་བྱམས་པ་དང་སྙིང་རྗེ་ཆེན་པོ་མེད་་་འདི་སངས་རྒྱས་ལ་ལྟོས་ན་ཤཱ་རིའི་བུའི་བྱམས་པ་དང་སྙིང་རྗེ་ནི་ཆུང་བ་ཙམ་གྱིས་དམན་པ་ལ་མེད་པའི་དགག་སྒྲ་སྦྱར་བ་ཡིན་གྱི་ཤཱ་རིའི་བུ་ལ་བྱམས་པ་དང་སྙིང་རྗེ་མེད་པ་མ་ཡིན་པ་ཡང་གོ་དགོས་སོ། །མཆན།་་་དོ། སངས་རྒྱས་ལ་ནི་བག་ཆགས་མེད་ཀྱིས། ཤཱ་རིའི་བུ་ལ་ནི་བག་ཆགས་མ་ཟད་དོ། །སངས་རྒྱས་ནི་བསྐལ་པ་གྲངས་མེད་པ་གསུམ་གྱི་བར་དུ་བྱང་ཆུབ་སེམས་དཔའི་སྤྱོད་པ་སྤྱད་ཀྱི། ཤཱ་རིའི་བུ་ནི་བསྐལ་པ་དྲུག་ཅུའི་བར་དུ་དཀའ་ཐུབ་སྤྱད་དེ། དེ་བས་ན་ཕུག་རོན་ཡང་ཤཱ་རིའི་བུའི་གྲིབ་མར་སོང་བ་ན། འོན་ཀྱང་སྐྲག་ཅིང་འཇིགས་ཀྱི་སངས་རྒྱས་ཀྱི་གྲིབ་མར་སོང་བ་ན་འཇིགས་པ་མེད་པར་འགྱུར་རོ། །གསོལ་པ། གལ་ཏེ་དཀོན་མཆོག་གསུམ་ལ་སྐྱབས་སུ་སོང་བས་སྡིག་པ་མི་དགེ་བ་བྱང་ཞིང་འཇིགས་པར་མི་འགྱུར་ན། ཅིའི་སླད་དུ་ལྷས་བྱིན་ལྟ་བུ་དཀོན་མཆོག་གསུམ་ལ་སྐྱབས་སུ་གསོལ། དད་པས་ཁྱིམ་ནས་རབ་ཏུ་བྱུང་སྟེ་ཚུལ་ཁྲིམས་ཀྱང་རྫོགས་པ་ལས། མཚམས་མེད་གསུམ་བགྱིས་ནས། མཚམས་མེད་པའི་སེམས་ཅན་དམྱལ་བར་ལྟུང་བར་གྱུར། བཀའ་སྩལ་བ། མགོན་སྐྱབས་བྱ་བ་ཡང་། སྐྱབས་བྱ་བར་འོས་པ་ལ་སྐྱབས་བྱ་བ་ཡིན་ཏེ། ལྷས་བྱིན་ལྟ་བུ་ནི་མི་དགེ་བའི་སྡིག་པ་ཆེན་པོ་བྱས་ལ། གདོན་མི་ཟ་བར་མྱོང་བའི་ལས་དང་བཅས་པས། དེའི་ཕྱིར་ཡང་མགོན་སྐྱབས་བྱར་ཡང་དཀའོ། །གསོལ་པ། གལ་ཏེ་སྡིག་པ་ཆེན་པོ་བགྱིས་པ་ལ། སངས་རྒྱས་ཀྱིས་མགོན་སྐྱབས་མ་མཛད་ན། སྡིག་པའི་ལས་མ་མཆིས་པ་ལ་སངས་རྒྱས་ཀྱིས་མགོན་སྐྱབས་བགྱི་ཡང་ཅི་འཚལ། དཀོན་མཆོག་གསུམ་ལ་མགོན་སྐྱབས་མངའོ་ཞེས་ཀྱང་ཇི་སྐད་བགྱི། བཀའ་སྩལ་པ། ལྷས་བྱིན་གྱིས་དཀོན་མཆོག་གསུམ་ལ་སྐྱབས་སུ་སོང་བ་ཡང་དག་པའི་སེམས་ཀྱིས་མ་ཡིན་ཏེ། སྐྱབས་སུ་འགྲོ་བ་གསུམ་མ་རྫོགས་སོ། །དེ་ནི་རྒྱུན་དུ་རྙེད་པ་དང་། བཀུར་སྟི་དང་། གྲགས་པ་འདོད་པའི་ཕྱིར་བདག་ནི་ཐམས་ཅད་མཁྱེན་པའི་ཡེ་ཤེས་ཅན་ནོ། །ཞེས་སངས་རྒྱས་ལའང་བདོ་བས་ན། དེའི་ཕྱིར་དཀོན་མཆོག་གསུམ་ལ་མཐུ་སྟོབས་ཆེན་པོ་ཡོད་མོད་ཀྱི་མགོན་སྐྱབས་སུ་མི་འགྱུར་རོ། །དཔེར་ན་རྒྱལ་པོ་མ་སྐྱེས་དགྲ་ལྟ་བུ་ལ། མཚམས་མེད་པའི་སྡིག་པ་ཡོད་དེ། མཚམས་མེད་པའི་སེམས་ཅན་དམྱལ་བར་ལྟུང་བར་རིགས་པ་ལ། ཡང་དག་པའི་སེམས་རྩེ་གཅིག་པས་སངས་རྒྱས་ལ་སྐྱབས་སུ་གསོལ་བས་མཚམས་མེད་པའི་སྡིག་པ་བྱང་ནས། ཐིག་ནག་པོའི་སེམས་ཅན་དམྱལ་བར་ལྟུང་ནས། མིའི་ནང་ནས་སྡིག་པ་ལྕི་བ་དང་འདྲ་བར། ཞག་བདུན་མྱོང་ཙམ་གྱིས་སྡིག་པ་ཀུན་བྱང་བས་ན། དེ་ནི་དཀོན་མཆོག་གསུམ་གྱི་མགོན་སྐྱབས་ཀྱི་མཐུ་ཞེས་བྱའོ། །གསོལ་པ། ལྷས་བྱིན་གྱི་སྡིག་པ་བགྱིས་པའི་མགོན་སྐྱབས་བྱར་མི་རུང་ངོ་ཞེས་བགྱིས་པ། མདོ་སྡེའི་ནང་ནས་གང་སུ་ཡང་རུང་། སངས་རྒྱས་ལ་སྐྱབས་སུ་སོང་ན་ངན་སོང་གསུམ་དུ་མི་ལྟུང་ངོ་ཞེས་བགྱི་བའི་དོན་ཇི་ལྟ་བུ་ལགས། བཀའ་སྩལ་པ། ལྷས་བྱིན་གྱིས་དཀོན་མཆོག་གསུམ་ལ་སྐྱབས་སུ་སོང་བས་མཚམས་མེད་པའི་སེམས་ཅན་དམྱལ་བར་སོང་མོད་ཀྱིས། སྡུག་བསྔལ་མྱོང་བ་ཡང་ཞིང་ཆུང་ལ་བསྟི་བའི་དུས་སྐབས་ཡོད་དོ། །དཔེར་ན་མི་ཞིག་རིའམ། ནགས་ཚལ་ལམ། འབྲོག་དགོན་པ་འཇིགས་པའི་གནས་སུ་ཕྱིན་པ་ལས། གལ་ཏེ་སངས་རྒྱས་ཡིད་ལ་བྱས་ཤིང་བསམས་ན་དེའི་ཡོན་ཏན་གྱིས་འཇིགས་ཤིང་སྐྲག་པ་ཞི་བར་འགྱུར་ཏེ། དེ་བས་ན་དཀོན་མཆོག་གསུམ་ལ་སྐྱབས་སུ་སོང་བ་ཡང་མི་རྫུན་ནོ་ཞེས་སོ། །ཚུལ་དེ་ལྟ་བུས་བློ་སྦྱངས་ནས་རྒྱུ་འབྲས་ཀྱི་སྐྱབས་འགྲོའི་མཚན་ཉིད་རྣམ་པ་གཉིས་བསྟན་པའི་ཕྱིར། དེ་ལ་རྒྱུ་དང་འབྲས་བུའི་སྐྱབས་འགྲོ་ཡི། །དམ་བཅའ་གཉིས་ལས་དུས་གཞན་འགྲུབ་འདོད་རྒྱུ། །དེ་ལྟར་འགྲུབ་པ་རང་སེམས་འབྲས་བུའི་སྐྱབས། །རྡོ་རྗེ་ཐེག་པ་དག་གི་ཁྱད་ཆོས་ཡིན། །རྒྱུ་ཡི་ཡུལ་ནི་དཀོན་མཆོག་རྣམ་པ་གསུམ། །སྔགས་སུ་དེ་ཡི་ངོ་བོ་བླ་མར་འདུས། །དེ་ལ་ཕ་རོལ་ཏུ་ཕྱིན་པའི་ཐེག་པས་དུས་གཞན་བསྐལ་པ་གྲངས་མེད་པ་གསུམ་ལ་སོགས་པའི་མཐར་སངས་རྒྱས་ཐོབ་པར་དམིགས་ནས་གཞན་རྒྱུད་ལ་བྱོན་ཟིན་པའི་དཀོན་མཆོག་གསུམ་ལ་སྐྱབས་སུ་སོང་བས་སངས་རྒྱས་འཐོབ་པའི་རྒྱུ་བྱེད་པས་ན་རྒྱུའི་སྐྱབས་འགྲོ་ཞེས་བྱ་སྟེ། དཀོན་མཆོག་བརྩེགས་པ་ལས། དགེ་སློང་དག་ཁྱེད་ཀྱིས་རང་ངམ་གཞན་གྱི་ཕྱིར་ཡང་རུང་སྟེ་འཇིགས་པ་དང་། འཚེར་བ་ལས་ཐར་བའི་ཕྱིར་སྐྱབས་སུ་སོང་ཞིག་དང་། ཁྱེད་ཀྱི་འདོད་པའི་རེ་བ་དེ་དང་དེ་དག་ཡོངས་སུ་རྫོགས་པར་འགྱུར་རོ། །ཞེས་སོ། །སྐྱབས་ཡུལ་དེ་དག་གི་སྤངས་རྟོགས་ཀྱི་ཡེ་ཤེས་མ་འོངས་པ་ན་རང་རྒྱུད་ལ་འཁྲུངས་པར་འདོད་པ་ནི་འབྲས་བུའི་སྐྱབས་འགྲོ་ཡིན་པར། ཁྱིམ་བདག་དྲག་ཤུལ་ཅན་གྱིས་ཞུས་པ་ལས། སངས་རྒྱས་ལ་སྐྱབས་སུ་འགྲོ་བ་ནི་སངས་རྒྱས་ཐོབ་པར་འདོད་པའོ། །ཞེས་པ་དང་མཐུན་པར་ཆོས་དང་དགེ་འདུན་ལའང་གསུངས་སོ། །ཁྱད་པར་རྡོ་རྗེ་ཐེག་པའི་ལུགས་སུ་ནི་རང་ལ་ཡོད་པའི་སེམས་ཀྱི་དེ་ཁོ་ན་ཉིད་རང་ཆས་སུ་གནས་པ་མངོན་དུ་མཐོང་བར་འདོད་ནས། དཀོན་མཆོག་གསུམ་གཞན་ནས་མི་འཚོལ་བར་རིག་པ་སྐུ་གསུམ་གྱི་བདག་ཉིད་གསལ་གདབ་པའི་ཚུལ་དུ་སྐྱབས་སུ་འགྲོ་ཞིང་། དུས་ཡུན་རིང་པོ་ལ་ལྟོས་མི་འཆའ་བར་རང་བྱུང་གི་ཡེ་ཤེས་གདོད་མ་ནས་སྐྱེ་བ་མེད་པར་རྟོགས་པའི་ངང་དུ་མཉམ་པར་འཇོག་པ་ནི་འབྲས་བུའི་སྐྱབས་འགྲོ་མཐར་ཐུག་པའོ། །ཡུལ་གྱི་དབང་དུ་བྱས་ན། རྒྱུའི་གནས་སྐབས་སུ་ཕ་རོལ་ཏུ་ཕྱིན་པའི་ཐེག་པར་སངས་རྒྱས་གཙོ་བོ་ཡིན་ལ། སྔགས་བླ་ན་མེད་པའི་ཐེག་པ་ལྟར་ན་བླ་མ་ཉིད་གཙོ་བོར་གྱུར་ཅིང་། བསྟན་པ་སྤྱིའི་དཀོན་མཆོག་གསུམ་དང་། དཀྱིལ་འཁོར་སོ་སོའི་དཀོན་མཆོག་གསུམ་ཡང་རྟེན་དུ་འདོད་ཀྱང་། མཐར་ཐུག་གི་དབང་དུ་བྱས་པའི་ཡུལ་ནི་དེ་དག་ཀྱང་གཟུགས་སྐུ་ཀུན་རྫོབ་པ་འཕོ་འགྱུར་ཅན་ཡིན་པ་དང་། ཆོས་ཀྱང་ལམ་བདེན་རྣམས་གོང་ནས་གོང་མར་སོང་དུས་འོག་མའི་རང་བཞིན་དྲི་བཅས་སུ་འདོར་བས་ཀུན་རྫོབ་ཀྱི་བདེན་པ་དང་། ཉན་རང་གི་རྒྱུད་ཀྱི་འགོག་པ་གཉིས་ནི་བག་ལ་ཉལ་གྱི་སྒྲིབ་པ་དང་བཅས་པས་འཇིགས་པ་དང་། བྱང་ཆུབ་སེམས་དཔའི་དགེ་འདུན་རྣམས་ཀྱང་རང་སའི་སྒྲིབ་པ་དང་བཅས་ཤིང་། སྤངས་རྟོགས་མཐར་མ་ཐུག་པས་ད་དུང་སངས་རྒྱས་ཀྱི་ལམ་ལ་བརྟེན་ཞིང་སྐྱབས་སུ་འགྲོ་དགོས་པའི་ཕྱིར་ན་རྒྱུའི་སྐྱབས་གསུམ་དེ་དག་ཀྱང་འབྲས་བུ་ལ་རེག་པའི་ལམ་གྱི་སྐྱེལ་མ་ལྟ་བུར་སྐྱབས་སུ་འཛིན་པ་ལས་མཐར་ཐུག་གི་སྐྱབས་གནས་སུ་མི་རུང་བའི་ཚུལ། དྲིན་ལན་གསབ་པའི་མདོ་ལས། གསོལ་པ། ཅི་ལ་སྐྱབས་སུ་མཆི་ན་སངས་རྒྱས་ལ་སྐྱབས་སུ་སོང་བ་ཞེས་བགྱི། བཀའ་སྩལ་པ། སྐྱབས་སུ་འགྲོ་བ་ཞེས་བྱ་བ་ནི་ངག་གི་འཁོར་ལོ་སྟེ། ཐམས་ཅད་མཁྱེན་པ་སློབ་པ་མེད་པའི་ཡོན་ཏན་ལ་སྐྱབས་སུ་སོང་བའོ། །གསོལ་པ། གཟུགས་ཀྱི་སྐུ་ལ་སྐྱབས་སུ་མཆིའམ། ཆོས་ཀྱི་སྐུ་ལ་སྐྱབས་སུ་མཆི། བཀའ་སྩལ་པ། ཆོས་ཀྱི་སྐུ་ལ་སྐྱབས་སུ་འགྲོ་ཡི། གཟུགས་ཀྱི་སྐུ་ལ་སྐྱབས་སུ་འགྲོ་བ་མ་ཡིན་ཏེ། གཟུགས་ཀྱི་སྐུ་སངས་རྒྱས་མ་ཡིན་པའི་ཕྱིར་རོ། །གསོལ་པ་གཟུགས་ཀྱི་སྐུ་སངས་རྒྱས་མ་ཡིན་ལགས་ན། ཅིའི་སླད་དུ་སངས་རྒྱས་ཀྱི་སྐུ་ལ་ཁྲག་ཕྱུང་བས་མཚམས་མ་མཆིས་པའི་ལས་བགྱིས་པར་འགྱུར། བཀའ་བསྩལ་པ་གཟུགས་ཀྱི་སྐུ་ནི་ཆོས་ཀྱི་སྐུའི་སྣོད་ཡིན་ཏེ། ཆོས་ཀྱི་སྐུའི་གནས་སོ། །དེ་བས་ན་གཟུགས་ཀྱི་སྐུ་ལ་གནོད་པས་མཚམས་མེད་པའི་ལས་སུ་གྱུར་གྱི། གཟུགས་ཀྱི་སྐུ་སངས་རྒྱས་ཡིན་པས་མཚམས་མེད་པའི་ལས་སུ་གྱུར་པ་ནི་མ་ཡིན་ནོ། །ཞེས་དང་། དེ་བཞིན་དུ་ཆོས་དང་དགེ་འདུན་ལའང་གསུངས་ནས་མཐར་དོགས་པའི་གནས་བསལ་ཕྱིར། གསོལ་པ། གལ་ཏེ་དོན་དམ་པའི་དགེ་འདུན་ལ་སྐྱབས་སུ་མཆི་ན་ནི། སྔོན་སངས་རྒྱས་བི་རི་དང་། ས་རི་ལ་སྐྱབས་སུ་འགྲོ་བ་གསུམ་ལོག་པའི་ཚེ། ཕྱིས་དགེ་འདུན་ཞེས་བྱ་བ་ཡོད་པར་འགྱུར་གྱིས་དེ་ལ་སྐྱབས་སུ་སོང་ཞིག་ཅེས་གསུངས་པ་མི་རིགས་པའི་ཕྱིར་ཏེ། དོན་དམ་པའི་དགེ་འདུན་ནི་རྟག་ཏུ་འཇིག་རྟེན་ན་མཆིས་པ་ལགས། བཀའ་སྩལ་པ། ཀུན་རྫོབ་ཀྱི་དགེ་འདུན་ནི་དོན་དམ་པའི་དགེ་འདུན་གྱི་བརྟེན་པའི་གནས་ཡིན་པས། ཕྱིས་དགེ་འདུན་ཡོད་པར་འགྱུར་གྱིས། དེ་ལ་སྐྱབས་སུ་སོང་ཤིག་ཅེས་གསུངས་པ་ཡིན་ནོ། །ཞེས་སོ། །སྤྱིར་ཐེག་པ་གསུམ་སོ་སོ་ལ་འབྲས་བུའི་སྐྱབས་གནས་རེ་རེ་ཡོད་དེ། ཐེག་ཆེན་པས་སྐུ་གསུམ་དཀོན་མཆོག་གི་རང་བཞིན་དུ་ངོ་བོ་གཅིག་པར་འདོད་པ་དང་། ཉན་རང་གཉིས་རང་ལུགས་ཀྱི་འགོག་པ་རང་ལུགས་ཀྱི་བྱང་ཆུབ་ཏུ་འདོད་པ་ཉིད་དེ་ཆོས་དང་དགེ་འདུན་སོ་སོར་རིས་ཆད་པའི་ལུགས་མི་བཞེད་དོ། །འདིར་ཀུན་རྫོབ་པའི་དཀོན་མཆོག་གསུམ་དང་དོན་དམ་པའི་དཀོན་མཆོག་གཉིས་ཕན་ཚུན་རྟེན་དང་བརྟེན་པ་ལྟ་བུར་ཤེས་ནས་སྐྱབས་སུ་འགྲོ་བར་ཐེག་དམན་གྱི་སྡེ་སྣོད་ལས་གསུངས་པ་ནི་རྟོག་པས་བཟང་ངན་དུ་བལྟས་ནས་འདོར་ལེན་གྱི་གཉེན་པོར་དགོངས་པའོ། །དེ་ལྟར་ཡང་མཐར་ཐུག་ཆོས་ཀྱི་སྐུ་ཉག་གཅིག་ལ་མ་བརྟེན་ན་དེ་དག་གིས་སྤང་ཞིང་བསླུ་བར་འགྱུར་བའི་ཚུལ། རྒྱུད་བླ་མ་ལས། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་པའི་ཕྱིར། །ཆོས་རྣམ་གཉིས་དང་འཕགས་པའི་ཚོགས། །གཏན་གྱི་སྐྱབས་གནས་མ་ཡིན་ནོ། །སྐྱབས་ནི་སངས་རྒྱས་ཉག་གཅིག་ཉིད། །སྐྱོབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཡིན། །ཅེས་པས་རྐང་པ་ཕྱི་མ་གསུམ་གྱི་དོན། རང་སྣང་དོན་གྱི་འོག་མིན་ན་ཆོས་ཉིད་དང་ཐ་དད་མེད་པར་བཞུགས་པའི་སངས་རྒྱས་དེའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཆོས་ཀྱི་སྐུར་གནས་པས་སྐུ་གསུམ་དཀོན་མཆོག་གི་རང་བཞིན་དུ་ངོ་བོ་གཅིག་པར་འདོད་པ་སྟེ། དེ་སྐད་དུ་ཡེ་ཤེས་གྲུབ་པ་ལས་ཀྱང་། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་སོ། །དེ་ལ་སྐྱབས་སུ་འགྲོ་བ་པོ་རྟེན་གྱི་གང་ཟག་རིགས་ཅན་གསུམ་སྟོན་པའི་ཕྱིར། ཉི་ཚེ་མཆོག་དང་བླ་ན་མེད་པ་ཡི། །ཀུན་སློང་གསུམ་ལས་སྐྱེས་བུ་ཆུང་ངུ་ནི། །ངན་འགྲོ་ལ་འཇིགས་མངོན་མཐོའི་བར་དུ་འགྲོ། །འབྲིང་གཉིས་སྲིད་པས་འཇིགས་ནས་ཐར་པ་གཉེར། །གནས་སྐབས་ཇི་སྲིད་འཚོ་དང་མཐར་ཐུག་ནི། །ཉན་རང་འབྲས་བུ་ཐོབ་པའི་བར་དུ་འགྲོ། །ཆེན་པོ་གཞན་དོན་སྤང་བའི་ཞི་བདེས་འཇིགས། །འཁོར་བ་དབུགས་འབྱིན་ཆེན་པོ་ལ་བསྒྲལ་ཕྱིར། །བྱང་ཆུབ་བར་འགྲོ་དེ་ཡང་རང་གི་སེམས། །བྲལ་ཐོབ་བསླུ་བ་སྤངས་པ་འབྲས་བུའི་སྐྱབས། །དེ་ལ་སྐྱེས་བུའི་བློ་རིགས་གསུམ་སྟེ་ཐ་མའི་ཐ་ཤལ་ཉི་ཚེ་བའི་སྐྱབས་གནས་ལ་རེ་བ་དག་ནི་གནས་སྐབས་ལས་ཀྱང་གནས་སྐབས་སུ་གྱུར་པའི་འཇིགས་པ་ཕྲ་མོས་སྐྲག་ནས་རང་རང་གི་ལྷའམ། རི་དང་ནགས་ཚལ་སོགས་པར་སྐྱབས་སུ་རེ་བ་ཡོད་དེ། མདོ་སྡེ་རྒྱལ་མཚན་དམ་པ་ལས། འཇིགས་པས་སྐྲག་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང་། །ཀུན་དགའ་ར་བ་མཆོད་རྟེན་དང་། །ལྗོན་ཤིང་དག་ལ་སྐྱབས་སུ་འགྲོ། །སྐྱབས་དེ་གཙོ་བོ་མ་ཡིན་ཞིང་། །སྐྱབས་དེ་མཆོག་གྱུར་མ་ཡིན་ཏེ། །སྐྱབས་དེ་དག་ལ་བརྟེན་ནས་ནི། །སྡུག་བསྔལ་ཀུན་ལས་རབ་མི་ཐར། །ཞེས་གསུངས་པ་ལྟར་རོ། །འདི་ལྟར་སྐྱེ་བོ་གྲུབ་མཐའ་ལ་མ་ཞུགས་པའམ། ཞུགས་ཀྱང་སྐྱབས་མ་ཡིན་པ་ལ་སྐྱབས་སུ་སྒྲོ་འདོགས་པ་ཕྱི་རོལ་པར་གྱུར་པ་དང་། ནང་པའི་ཁོངས་སུ་ཆུད་པས་དཀོན་མཆོག་ལ་དད་པ་ཉི་ཚེ་བ་ཡོད་ཀྱང་ལམ་ལ་འཇུག་པའི་ནུས་པ་མེད་པ་དང་། སྟོན་པས་གནས་སྐབས་ཀྱི་མངོན་མཐོ་བསྒྲུབ་པ་ལས་བརྩམས་ཏེ་ཇི་སྙེད་ཅིག་གསུངས་པའི་ལམ་ལ་གུས་པས། ཚེ་འདི་པའི་གནས་ལ་ཆེ་ཐང་དུ་མི་བྱེད་ཀྱང་ཕྱི་མའི་འཇིག་རྟེན་གྱི་མངོན་མཐོའི་བདེ་འབྲས་ལ་དོན་གཉེར་གྱི་ཀུན་སློང་འབའ་ཞིག་དང་དུ་ལེན་པ་ནི་སྐྱེས་བུ་ཆུང་ངུ་ཡིན་ཏེ། ལམ་སྒྲོན་ལས། གང་ཞིག་ཐབས་ནི་དེ་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །སྐྱེས་བུ་དེ་ནི་ཐ་མར་འོས། །ཞེས་བཤད་པ་ལྟར་རོ། །དོན་དེའི་ཕྱིར་དུ་དཀོན་མཆོག་ལ་སྐྱབས་སུ་འགྲོ་བ་དག་ནི་སྐྱེས་བུ་ཆུང་ངུའི་ནང་ཚན་ནས་ཅུང་ཟད་ཁྱད་པར་དུ་བྱས་པ་སྟེ། དོན་ལ་ངན་སོང་གི་འཇིགས་པ་ཙམ་གྱིས་སྐྲག་པ་ལས་གནས་སྐབས་ཀྱི་འབྲས་བུ་མཐོ་རིས་ལ་དམིགས་ཤིང་། དུས་ཀྱང་མངོན་མཐོའི་བདེ་འབྲས་ཐོབ་པའི་བར་དུ་སྐྱབས་སུ་འགྲོ་བ་ནི་བཟང་པོ་མ་ལགས་པར། འདུལ་བ་ལུང་ལས། ཀུན་དགའ་བོས་བྲམ་ཟེའི་བུ་མོ་ལ་མཐོ་རིས་ཀྱི་ཡོན་ཏན་སྐྱབས་སུ་འགྲོ་བ་ལས་བྱུང་བའི་ཚུལ་བཤད་པས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་ནི་མ་ལགས་ཏེ། སྲིད་པའི་བདེ་བ་གཉེར་བ་དེ་ནི་སྐྱེས་བུ་མ་རབས་ཞེས་བྱའོ། །དེ་བས་ན་ཐར་པའི་ཡོན་ཏན་ཡང་དག་པར་སྒྲོགས་ཤིག །ཅེས་གསུངས་པ་ལྟར་རོ། །དེ་ཡང་ཐར་པ་ནི་འཁོར་བ་ལས་གྲོལ་ཙམ་པའི་ངེས་ལེགས་གྱི་ན་བ་ཡིན་ནོ། །སྐྱེས་བུ་འབྲིང་གི་ལམ་ནི་སྟོན་པས་ཉན་ཐོས་དང་རང་སངས་རྒྱས་ཀྱི་ཐེག་པ་ལས་བརྩམས་ཏེ་གསུངས་པའི་ཆོས་མཐའ་དག་སྟེ། འདི་ལྟར་བློའི་ཁྱད་པར་སྲིད་པ་མཐའ་དག་སྡུག་བསྔལ་གྱི་རང་བཞིན་དུ་ཤེས་ནས་སྐྱོ་བ་བསྐྱེད་ཅིང་། རང་དོན་དུ་དེ་ལས་གྲོལ་བའི་ཐར་པ་འཐོབ་བྱར་དམིགས་པའི་སྔོན་དུ་སྐྱབས་སུ་འགྲོ་ཞིང་། དེའང་གནས་སྐབས་ཇི་སྲིད་འཚོའི་བར་དང་། མཐར་ཐུག་ཉན་རང་གི་འབྲས་བུ་ཐོབ་པའི་བར་དུ་འགྲོ་བའོ། །དེ་སྐད་དུ་མདོ་རྒྱལ་མཚན་ལས། གང་ཞིག་གང་ཚེ་སངས་རྒྱས་དང་། །ཆོས་དང་དགེ་འདུན་སྐྱབས་སོང་སྟེ། །འཕགས་པ་ཡི་ནི་བདེན་པ་བཞི། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འདས་པ་དང་། །མྱ་ངན་འདས་དེར་འགྲོ་བ་ཡི། །འཕགས་ལམ་ཡན་ལག་བརྒྱད་པོ་དག །ཤེས་རབ་མིག་གིས་བལྟ་བྱེད་ན། །སྐྱབས་དེ་དག་ནི་གཙོ་ཡིན་ཞིང་། །སྐྱབས་དེ་དག་ནི་མཆོག་ཡིན་ཏེ། །སྐྱབས་དེ་དག་ལ་བརྟེན་ནས་ནི། །སྡུག་བསྔལ་ཀུན་ལས་རབ་ཏུ་ཐར། །ཞེས་སོ། །སྐྱེས་བུ་ཆེན་པོའི་ལམ་ནི། རྣམ་མཁྱེན་བསྒྲུབ་པའི་ཐབས་རྒྱུ་འབྲས་ཀྱི་ཐེག་པ་ཆེན་པོ་རྣམ་གཉིས་ཏེ་སྔགས་དང་ཕ་རོལ་ཏུ་ཕྱིན་པའོ། །དོན་གཉེར་དེ་བསྒྲུབ་པའི་གང་ཟག་ལ་སྐྱེས་བུ་ཆེན་པོ་ཞེས་བྱ་སྟེ། དེའི་རང་བཞིན་ནི་སྙིང་རྗེ་ཆེན་པོའི་གཞན་དབང་དུ་གྱུར་པ་ཡིན་པས། གཞན་དོན་སྤང་བའི་ཞི་བདེ་ལ་འཇིགས་ཤིང་། སེམས་ཅན་གཞན་གྱི་སྡུག་བསྔལ་མཐའ་དག་ཟད་པར་བྱ་བའི་ཕྱིར་དུ་སངས་རྒྱས་ཀྱི་གོ་འཕང་ཐོབ་པར་དམིགས་པའི་སྔོན་དུ་དཀོན་མཆོག་གསུམ་ལ་སྐྱབས་སུ་འགྲོ་བ་སྟེ། ཐར་པ་ཆེན་པོ་ལས། གང་རྣམས་སྲིད་པའི་ཆུ་བོར་ལྷུང་བ་དེ་དག་གི་ཕྱིར་རང་ཉིད་ཤི་བའི་འཇིགས་པ་ཡོངས་སུ་སྤངས་ཏེ་སྐྱབས་སུ་འགྲོ་བ་ནི་སྐྱེས་བུ་མཆོག་རབ་ཅེས་བྱའོ། །དེད་དཔོན་དམ་པ་ཞེས་བྱའོ། །ཞེས་སོ། །དུས་ཀྱང་བྱང་ཆུབ་སྙིང་པོ་ལ་མཆིས་ཀྱི་བར་རམ། སངས་རྒྱས་ཀྱི་ཡེ་ཤེས་གཞལ་དུ་མེད་པ་རང་རྒྱུད་ལ་གྲུབ་ནས་བྲལ་ཐོབ་དང་བསླུ་བ་སྤངས་པ་འབྲས་བུའི་སྐྱབས་གནས་ལ་རེག་པའི་བར་དུའོ། །དེ་ལྟར་རྟེན་གྱི་གང་ཟག་གསུམ་དུ་བཞག་པ་ཡང་འབྲས་བུ་བསྒྲུབ་པའི་བསམ་པ་ཐ་དད་པ་གསུམ་གྱི་འབྲས་མིང་རྒྱུ་ལ་བཏགས་པ་སྟེ། དེའང་སྐྱེས་བུ་ཆུང་ངུའི་བློ་ཅན་དག་ནི་ཕྱི་རོལ་པའི་གཙང་སྦྲ་དང་། འཚེ་བ་སྤང་པ་དང་། ཆོས་སྤྱོད་པས་མཐོ་རིས་སུ་འགྲོ་བ་ནི་ཡོད་དེ། གཅེར་བུ་པའི་བུ་བདེན་སྨས་རྒྱལ་པོ་གཏུམ་པོ་རབ་སྣང་ལ་མི་དགེ་བ་བཅུ་ལས་ལྡོག་པའི་གཏམ་བྱས་པས་ཤེས་ལ། ནང་པའི་དཀོན་མཆོག་ལ་སྐྱབས་སུ་སོང་ནས་དགེ་བ་ཅུང་ཟད་ཀྱིས་མཐོ་རིས་སུ་འགྲོ་བ་ནི་ཕག་ཏུ་སྐྱེ་བར་འགྱུར་བའི་ལྷ་ཡི་བུས་སྐྱབས་འགྲོ་བྱས་པས་ངན་འགྲོའི་རྒྱུ་དག་པར་གྱུར་པ་བཞིན་ཏེ། དེ་སྐད་དུ། གང་དག་སངས་རྒྱས་སྐྱབས་སོང་བ། །དེ་དག་ངན་འགྲོར་འགྲོ་མི་འགྱུར། །མི་ཡི་ལུས་ནི་སྤངས་ནས་སུ། །དེ་དག་ལྷ་ཡི་ལུས་ཐོབ་བོ། །ཞེས་གསུངས་པས་མཚོན་ནོ། །གཉིས་ཀའང་བསོད་ནམས་ཆ་མཐུན་གྱི་དགེ་བ་བཅུ་དང་བསམ་གཏན་གཟུགས་མེད་ལ་བརྟེན་དགོས་ཏེ། དེ་མེད་ན་མཐོ་རིས་སུ་མི་བགྲོད་པའི་ཕྱིར་རོ། །སྤྱིར་གྲངས་ཅན་པའི་ལུགས་ནི་ཐར་པའང་དངོས་དང་ཕྱོགས་འདྲ་རུང་བ་ཙམ་ཡོད་པས་པཎྜི་ཏ་སའི་སྙིང་པོ་ཙམ་ཡང་ཕྱི་ནང་གཉིས་ཀ་ལ་ཞུགས་པས་མགོ་རྨོངས་པར་གྱུར་ན། སྐྱེ་བོ་གྲུབ་མཐའ་ལ་མ་ཞུགས་པ་རྣམས་ནི་ཕྱུགས་དང་མཚུངས་ལ། གལ་ཏེ་ཞུགས་ཀྱང་རྨོངས་པས་ཟིལ་གྱིས་ནོན་པ་དང་། ལས་དང་ལས་ཀྱི་འབྲས་བུ་ལ་ཅང་མི་སེམས་པའི་ལས་མཐའ་ལོག་པ་དག་ནི་ཚེ་ཕྱི་མ་ཕན་ཆད་ཀྱི་བདེ་འབྲས་ཀྱང་ཉམས་པར་བྱེད་པས་གྲངས་ཅན་པ་ལས་ཐ་ཤལ་པའོ། །སྐྱེས་བུ་འབྲིང་ནི་ཉན་རང་དང་། ཐེག་པ་ཆེན་པོའི་ལམ་ནས་ངེས་པར་འབྱུང་བ་ཉིད་དོ། །དེ་ལྟར་ཀུན་སློང་གསུམ་གྱི་དབྱེ་བ་བཞིན་ལམ་གྱི་རིམ་པ་ལའང་དེ་བཞིན་དུ་འཇུག་དགོས་པ་ནི་མ་ཡིན་མོད། གཞན་དུ་ཆུང་འབྲིང་གཉིས་ཀྱི་གནས་སྐབས་ཀྱི་མངོན་མཐོ་དང་། ངེས་ལེགས་ཙམ་པོ་བའི་ཕན་ཡོན་ལ་དམིགས་པས་ཆེན་པོའི་ལམ་སྟེགས་སུ་འདོད་པའང་ཡོད་མོད་ཀྱི། འདིར་ནི་དམན་ལམ་གྱི་ཉེས་དམིགས་དང་ཐེག་པ་ཆེན་པོའི་ཁྱད་པར་གྱི་ཡོན་ཏན་ཤེས་ནས་དེ་ལ་འཇུག་པའི་དགོས་དབང་གིས་བསྟན་པ་ཉིད་དུ་རིགས་པར་བྱའོ། །ལམ་དུས་སངས་རྒྱས་རྣམས་ནི་སེམས་ཅན་གྱི། །ཁམས་ལ་ཐུགས་རྗེ་དུས་ལས་ཡོལ་བ་མེད། །བ་སྤུའི་ཁུང་བུ་གཅིག་གི་ཡོན་ཏན་ཀྱང་། །མཐའ་དག་བརྗོད་པས་མ་ཐུག་ནམ་མཁའ་ལྡིང་། །བྱ་ལམ་གྲུབ་མཐའ་མ་སྙོགས་སླར་འབབ་འདྲ། །ཞེས་སྨོས་ནས་དེ་ལ་རྨི་ལམ་གྱི་ལམ། བག་ཆགས་ཀྱི་ལམ། ལས་ཀྱི་མཐའི་ལམ། འཁྲུལ་འཁོར་མ་ངེས་པའི་ལམ། རྒྱུ་དང་འབྲས་བུ་སོ་སོར་མ་ངེས་པའི་ལམ་སྟེ་རྒྱུད་ལྔས་བསྡུས་པའི་འགྲོ་བ་མཐའ་དག་ལ་མ་བཅོལ་ཡང་སྙིང་རྗེ་ཆེན་པོ་འབའ་ཞིག་གིས་ཐུགས་དྲངས་པའི་གྲོགས་མཛད་པ་ལ་ལེ་ལོ་དང་བསྙེལ་བ་མི་མངའ་ཞིང་། རྒྱུན་ཆད་པ་མེད་པ་ནི་དེ་བཞིན་གཤེགས་པའི་ཕྲིན་ལས་ཀྱི་ཡོན་ཏན་ཡིན་ཏེ། སློབ་དཔོན་དཔའ་བོས། ང་ནི་མགོན་མེད་ཁྱེད་རྣམས་ཀྱི། །གྲོགས་སུ་གྱུར་བ་ཞེས་སྦྲོགས་ཤིང་། །ཐུགས་རྗེ་ཆེན་པོས་འགྲོ་བ་ནི། །མཐའ་དག་འཁྱུད་པ་བཞིན་དུ་བཞུགས། །སྟོན་པ་ཐུགས་རྗེ་ཆེ་མངའ་བ། །བརྩེ་བར་ལྡན་ཞིང་ཐུགས་བརྩེར་མཛད། །དེར་བརྩོན་ལེ་ལོ་མི་མངའ་བ། ཁྱོད་དང་འདྲ་བ་གཞན་སུ་མཆིས། །ཁྱོད་ནི་སེམས་ཅན་ཀུན་གྱི་མགོན། །སྤྱི་ཡི་རྩ་ལག་བཟང་པོ་ལགས། །མགོན་དུ་ཁྱོད་བཞུགས་མ་འཚལ་བས། །དེ་སླད་སྐྱེ་བོ་བྱིང་བར་གྱུར། །ཞེས་གསུངས་པ་སྟེ། མདོར་བསྡུ་ན། ཤེས་བྱ་ཇི་ལྟ་བ་དང་ཇི་སྙེད་པ་ཐམས་ཅད་ལ་མཁྱེན་པའི་ཡེ་ཤེས་ཆགས་ཐོགས་མེད་པར་འཇུག་པས་ཤེས་བྱ་རྒྱ་ཆེ་ལ་ཤེས་པ་རྒྱ་ཆུང་བའི་སྐྱོན་གྱིས་མ་གོས་པས་སྔ་མ་ལས། ཁྱོད་འབའ་ཞིག་གི་ཡེ་ཤེས་ཀྱིས། །ཤེས་བྱ་མཐའ་དག་ཁྱབ་ལགས་ཀྱི། །ཁྱོད་ལས་གཞན་པ་ཐམས་ཅད་ཀྱི། །ཤེས་བྱ་ཁོ་ན་ལྷག་པ་ལགས། །ཞེས་དང་། བརྩེ་བའི་ཡོན་ཏན་གྱི་ཆ་ནས། སེམས་ཅན་རྣམས་ཉོན་མོངས་པའི་ཞགས་པས་རང་དབང་དང་བྲལ་བར་བཅིངས་པ་བཞིན་དུ། ཐུབ་པའི་སྙིང་རྗེ་ཆེན་པོས་འགྲོ་བ་རྣམས་སྡུག་བསྔལ་བར་གཟིགས་པའི་ཐུགས་རྗེ་ཆེན་པོ་རྒྱུན་ཆད་མེད་པས་བཅིངས་པའི་ཚུལ། བསྟོད་པ་བརྒྱ་ལྔ་བཅུ་པ་ལས། འགྲོ་བ་འདི་དག་ཐམས་ཅད་ནི། །ཁྱད་མེད་ཉོན་མོངས་རྣམས་ཀྱིས་བཅིངས། །ཁྱོད་ནི་འགྲོ་བའི་ཉོན་མོངས་དག །དགྲོལ་སླད་ཡུན་རིང་ཐུགས་རྗེས་བསྡམས། །ཞེས་སོ། །དེ་ལྟར་མཁྱེན་པའི་ཡེ་ཤེས་དང་། བརྩེ་བའི་ཐུགས་རྗེ་དང་། མཛད་པའི་ཕྲིན་ལས་གསུམ་ནི་སེམས་ཅན་གྱི་ཁམས་ལ་ཕན་པ་རྒྱུན་ཆགས་སུ་འབྲེལ་བས་ནམ་ཡང་བསླུ་བ་མེད་པ་ཡིན་ལ། ཡོན་ཏན་རྒྱ་ཆེ་བའི་ཆ་ནས་གཞལ་ན་ངག་གི་རང་བཞིན་ལ་སྤོབས་པའི་གཏེར་ཆེན་པོ་གྲོལ་བ་འཕགས་པ་འཇམ་དཔལ་དང་། ཤེས་རབ་དང་། ཡེ་ཤེས་དང་། དྲན་པ་དང་། གཟུངས་ལ་དབང་ཐོབ་པས་དེ་བཞིན་གཤེགས་པ་མ་གཏོགས་གཞན་སུས་ཀྱང་སྤོབས་པའི་རྒྱུན་གཅོད་མི་ནུས་པ་དགེ་བསྙེན་བྱང་ཆུབ་སེམས་དཔའ་ལི་ཙ་བྱི་དྲི་མེད་གྲགས་པ་ལྟ་བུས་ཀྱང་དེ་བཞིན་གཤེགས་པའི་བ་སྤུའི་ཁུང་བུ་གཅིག་གི་ཡོན་ཏན་མཐའ་དག་བརྗོད་པ་ལ་ཞུགས་ན། ནམ་མཁའ་ལྡིང་དར་ལ་བབས་པའི་ལང་ཚོས་དྲེགས་པ་ཞིག་ནམ་མཁའི་ཕ་མཐའ་གཞལ་བ་ལ་ཞུགས་པ་བཞིན། རང་ཉིད་ལ་ངལ་ཞིང་དུབ་པའི་མཐའ་རྣམ་པ་གཉིས་ཐོབ་ནས་སླར་འབབ་པ་དང་འདྲ་བ་ཡིན་པས་ན་ཡབ་སྲས་མཇལ་བའི་མདོ་ལས། བྱ་ལམ་ནམ་མཁའ་དཔག་པར་ནུས་ཀྱང་སྲིད། །རྒྱ་མཚོ་བུམ་པས་གཞལ་དུ་རུང་ཡང་སྲིད། །སངས་རྒྱས་ཡོན་ཏན་ཕ་མཐའ་རྟོགས་མི་ནུས། །ཞེས་སོ། །ཡང་། འདི་ན་འཁོར་བའི་འཁོར་ལོར་ཡང་ནས་ཡང་། །བརྒྱུད་དེ་ལས་ངན་བསགས་པའི་མཚང་ཅན་རྣམས། །འཁོར་ལོས་བསྒྱུར་དང་དབང་ཕྱུག་ལ་སོགས་པ། །སྐྱབས་གཞན་གང་གིས་བསླུ་བར་མཐོང་ནས་ནི། །འཇིགས་དང་དད་དང་སྙིང་རྗེ་རྣམ་གསུམ་གྱིས། །གཞན་དོན་སེམས་པ་སྐྱེས་བུ་ཆེན་པོའི་བློས། །དཀོན་མཆོག་རྗེས་སུ་དྲན་པས་སྐྱབས་སུ་འགྲོ། །དེ་ལ་བདག་ཅག་ནི་ཉེས་ཅན་ཁྲི་མུན་ལས་ཡར་བའི་ཕྱི་མཐའ་ཐམས་ཅད་གནོད་པ་ཅན་གྱིས་བསྐོར་ནས་ཡོད་པ་ལྟར་འཁོར་བའི་རང་བཞིན་ཉོན་མོངས་པ་དང་། ཉེས་པ་བརྒྱ་ཕྲག་དུ་མའི་འདམ་རྫབ་ཆེན་པོར་ཡང་ནས་ཡང་དུ་ཁ་བརྒྱུད་ཅིང་། དམྱལ་བར་འགྲོ་བ་དང་། ཡི་དྭགས་སུ་འགྲོ་བ་དང་། དུད་འགྲོར་འགྲོ་བ་དང་། ལྷ་མ་ཡིན་དུ་འགྲོ་བ་དང་། མི་དབུལ་པོ་དང་། ཉམ་ཐག་པ་དང་། སྲོག་གི་འཇིགས་པས་སྐྲག་པ་ལ་སོགས་སྡུག་བསྔལ་དང་གནོད་པ་དུ་མའི་ནང་དུ་ངེས་པར་འགྲོ་དགོས་པའི་ལས་ངན་རྒྱ་ཆེ་ལ་གཏིང་ཟབ་པ་ཤ་སྟག་བྱས་ཤིང་བསགས་པའི་མཚང་ཆེན་པོ་དང་ལྡན་པ་ཡིན་པས། འཁོར་ལོས་བསྒྱུར་བའི་རྒྱལ་པོ་དང་། འཇིག་རྟེན་གྱི་མེས་པོ་ཚངས་པ་དང་། ལྷ་དབང་ཕྱུག་ཆེན་པོ་དང་། གནོད་སྦྱིན་མ་རུངས་པའི་སྡེ་ཚོགས་རང་ཉིད་ཀྱང་འཁོར་བ་ན་འཁོར་བ། དོན་དམ་པའི་བདེན་པ་མ་མཐོང་བ། འཇིགས་པའི་གཡང་ས་ལ་རྒྱུ་བ། གནས་སྐབས་ཙམ་དུའང་ཕན་པ་དང་གནོད་པ་འདྲེས་མར་སྦྱིན་པའི་རང་བཞིན་དག་གིས་ནི་སྐྱོབ་པར་མི་ནུས་ཤིང་བསླུ་བའི་རང་བཞིན་ཅན་ཡིན་པས་ན་སྐྱབས་སུ་འོས་པ་ནི་གཅིག་ལས་གཉིས་པ་མེད་དེ་མདོ་ལས། རྐང་གཉིས་དམ་པ་མ་གཏོགས་པ། །འཇིག་རྟེན་དག་ན་སྐྱབས་གཞན་མེད། །ཅེས་སོ། །རྒྱུ་གང་གིས་ན། སངས་རྒྱས་ནི་རང་ཉིད་འཇིགས་པ་མེད་པའི་གོ་འཕང་ཐོབ་པས་གང་གིས་སྐྱབས་སུ་སོང་བ་དེ་འཁྲི་ཤིང་ལྗོན་པ་ལ་བརྟེན་པ་ལྟ་བུ་དང་། གདུལ་བྱ་འདུལ་བའི་ཐབས་ལ་མཁས་པས་སྐྱབས་སུ་སོང་ཚད་ཀྱི་དགོས་དོན་འགྲུབ་པ་དང་། ཐུགས་རྗེ་ལ་ཉེ་རིང་མི་མངའ་ཞིང་། དད་པ་དང་བསྒྲུབ་པའི་མཆོད་པས་མཉེས་པ་ཁོ་ན་ལས་ཟང་ཟིང་གི་རྗེས་སུ་མི་འཇུག་པའི་ཕྱིར་རོ། །དེ་ལྟར་ཡིན་པས་དེས་བསྟན་པའི་ཆོས་དང་། དེའི་བསྟན་པ་ལ་ཞུགས་ཤིང་འཕགས་པ་སློབ་པའི་དགེ་འདུན་རྣམས་ཀྱང་སྐྱབས་སུ་འོས་པའོ། །ཇི་ལྟར་སྐྱབས་སུ་འགྲོ་ན། ཐ་མལ་པ་རྣམས་ནི་ངན་སོང་གི་སྡུག་བསྔལ་ལ་འཇིགས་ཤིང་། མཐོ་རིས་ལ་སོགས་པའི་ཡོན་ཏན་ལ་འདོད་པ་དང་བཅས་པའོ། །ཉན་རང་གཉིས་ནི་དེའི་སྟེང་དུ་སྲིད་པའི་རང་བཞིན་སྐྱེ་རྒ་ན་འཆིའི་འཁྲུལ་འཁོར་ལ་འཇིགས་ནས་དད་པ་གསུམ་བསྐྱེད་པའོ། །ཐེག་པ་ཆེན་པོ་པ་ནི། བདག་ཉིད་ཀྱི་བློ་སྙིང་རྗེ་ཆེན་པོའི་གཞན་དབང་དུ་གྱུར་པས་རང་དོན་ཡལ་བར་དོར་ནས་སེམས་ཅན་གྱི་ཁམས་སུ་གྱུར་ཏོ་ཅོག་འཁོར་བ་ལས་སྐྱོབ་པའི་ཕྱིར་དུ་སྟེ། དེའི་ཕྱིར་དང་པོ་གཉིས་ཀྱི་ཆ་ལས་ལོག་སྟེ་གཞན་དོན་འབའ་ཞིག་ལ་དམིགས་པ་སྐྱེས་བུ་ཆེན་པོའི་བློས་དཀོན་མཆོག་གསུམ་གྱི་ཡོན་ཏན་ལ་ངེས་པ་སྟོབས་སུ་གྱུར་བའི་བློ་ལྟོས་རྩེ་གཅིག་པ་སྙིང་ཐག་པ་ནས་འཆའ་བས་སྐྱབས་སུ་འགྲོ་བ་སྟེ། དེ་ལ་རེ་ཞིག་དམིགས་པའི་རྟེན་ཐུན་མོང་གི་དབང་དུ་བྱས་ནས་སངས་རྒྱས་སམ། ཁྱད་པར་གྱི་དབང་དུ་བྱས་ན་རྡོ་རྗེ་ཕྲེང་བ་ལས། དྲི་མེད་སེམས་ནི་སངས་རྒྱས་འགྱུར། །ཆོས་ནི་ངག་ཏུ་ཡང་དག་གསུང་། །སྐུ་ནི་དགེ་འདུན་ཞེས་བྱ་སྟེ། །བྱང་ཆུབ་སེམས་དཔའི་ཚོགས་ཀྱི་གནས། །ཞེས་དཀོན་མཆོག་གསུམ་འདུས་ཀྱི་ངོ་བོ་བླ་མ་ཉིད་གཙོ་བོར་བཞུགས་པ་ལ་སངས་རྒྱས་དང་བྱང་ཆུབ་སེམས་དཔའ་སྤྲིན་ཕུང་གཏིབས་པ་ལྟ་བུས་བསྐོར་བ་གང་ནས་ཀྱང་བྱོན་པ་མེད། གང་དུའང་གཤེགས་པ་མེད། རྟག་ཆགས་ཀྱི་དངོས་པོར་མེད། མོས་པ་དང་འདུན་པའི་རང་གཟུགས་ལ་ཆུ་ལས་ཆུ་བུར་སྐྱེས་པ་ལྟར་མདུན་མཁར་གསལ་བཏབ་ལ། དངོས་དང་ཡིད་ཀྱི་མཆོད་པའི་ཚོགས་རྒྱ་ཆེན་པོས་མཆོད་ཅིང་། ཕྱག་འཚལ་བ་དང་། སྡིག་པ་བཤགས་པ་དང་། གུས་པ་འབུལ་བ་རྣམས་ཀྱིས་སྣ་དྲངས། བདག་དང་སེམས་ཅན་ཐམས་ཅད་འདུན་པ་གཅིག་གིས་ཐལ་མོ་སྦྱར་ནས་སྐྱབས་སུ་འགྲོ་བར་དམིགས་ནས་ངེས་པར་འབྱུང་བའི་དབྱངས་དང་ལྡན་པས། བདག་ལས་ཕུང་པོར་གྲུབ་གྱུར་ཅིང་། །གཟུགས་ལས་མིང་དུ་ཆགས་པ་ཡི། །གཏིང་མཐའ་མེད་པའི་འཁོར་བ་ན། །སྡུག་བསྔལ་ཞགས་པས་བཅིངས་པ་བདག །དེང་ནས་སྙིང་པོ་བྱང་ཆུབ་བར། །སེམས་ཅན་ཀུན་གྱི་དོན་སླད་དུ། །བླ་མ་མཆོག་དང་རྫོགས་སངས་རྒྱས། །ཐེག་པ་ཕྱི་ནང་ཆོས་དགེ་འདུན། །སྐྱབས་སུ་འོས་པ་མཐའ་དག་ལ། །འདུན་པ་ཙམ་དང་རྨོངས་པས་མིན། །དེ་བཞིན་མངོན་པའི་ང་རྒྱལ་དང་། །ཉི་ཚེའི་སླད་དུ་མ་ཡིན་པར། །མཁྱེན་བརྩེ་ནུས་པའི་ཞགས་པ་ཡིས། །འགྲོ་འདི་འཁྱུད་པ་ལྟར་གྱུར་པའི། །དཀོན་མཆོག་གསུམ་གྱི་ཡོན་ཏན་ནི། །ཡང་དག་དྲན་པས་སྐྱབས་སུ་མཆི། །ཞེས་པ་ལ་སོགས་པས་སྙིང་ཐག་པ་ནས་སྐྱབས་སུ་འགྲོ་བ་ལན་གསུམ་གྱིས་མཐའ་བརྟེན་པར་བྱའོ། །དེ་ནི་ཆོ་གའམ། བརྡ་ལས་ཐོབ་པ་ཞེས་བྱ་སྟེ། དྲིན་ལན་གསབ་པ་ལས། སྐྱབས་སུ་འགྲོ་བ་གསུམ་ནོད་པའི་ཚེ། པུས་མོ་བཙུགས་ལ་ཐལ་མོ་སྦྱར་ཏེ་སྐྱབས་སུ་འགྲོ་བ་གསུམ་ཁ་ནས་ཚིག་ཏུ་བརྗོད་པ་ནི། ལུས་དང་ངག་གི་ཆོ་ག་བསྟན་པའོ། །ཞེས་དང་། ཆོ་གར་མ་ལྟོས་པ་ནི་སེམས་རྩེ་གཅིག་པས་གསུམ་ལ་སྐྱབས་སུ་འགྲོ་བ་སྟེ། དེ་ཉིད་ལས། གལ་ཏེ་སེམས་རྩེ་གཅིག་ཏུ་བྱས་ན། ལུས་དང་ངག་ཡོད་ཀྱང་ཆོ་གས་བསྟན་པ་མེད་དེ། དེ་ནི་ཆོ་ག་བསྟན་པ་མེད་པ་ཞེས་བྱའོ། །ཞེས་གསུངས་སོ། །ཇི་ལྟ་ནའང་རྗེས་ལ་དམིགས་པ་མེད་པའི་ཤེས་རབ་ཁོང་དུ་ཆུད་པའི་ངང་དུ་མཉམ་པར་གཞག་པ་ནི་དོན་དམ་པའི་སྐྱབས་འགྲོ་སྟེ། ཆོས་ཉིད་ཀྱིས་ཐོབ་པ་འཇིག་རྟེན་ལས་འདས་པའི་སྐྱབས་འགྲོའི་རྒྱུ་མ་ནོར་བ་ཡིན་ནོ། །རྒྱུའི་སྐྱབས་འགྲོའི་ཕན་ཡོན་བཤད་པའི་ཕྱིར། ཇི་ལྟར་ནམ་མཁའ་ཚད་གཟུང་མེད་པ་ལྟར། །དཀོན་མཆོག་ལ་བརྟེན་དཀར་ནག་ལས་འབྲས་ཀྱི། །ཕ་མཐའ་མི་དཔོགས་སྐྱབས་སོང་གཟུགས་གྱུར་ན། །ནམ་མཁའི་སྣོད་ཀྱིས་བརྟེན་པར་ནུས་མ་ཡིན། །ནང་པའི་ཁྱུར་འགྲོ་སྡོམ་པ་མཐའ་དག་རྟེན། །སྡིག་སྒྲིབ་འཛད་ཅིང་གནོད་པའི་ཚོགས་ཀྱིས་སྤོང་། །ངན་འགྲོའི་གཡང་བསྲུང་དཀོན་མཆོག་གསུམ་མི་འབྲལ། །ཕུན་སུམ་ཚོགས་པ་མཐོང་བའི་ཆོས་ལ་འོང་། །བསོད་ནམས་ཚོགས་རྫོགས་གཟུགས་ཀྱི་སྐུ་གཉིས་འགྲུབ། །འདི་ལྟར་ནམ་མཁའི་རང་བཞིན་ནི་བླ་འོག་དང་ཕྱོགས་ཆས་མཚོན་པར་མི་ནུས་པ་ལྟར། སྤྱིར་དཀོན་མཆོག་ལ་བརྟེན་པའི་དཀར་ནག་གི་ལས་འབྲས་ནི་བློས་ཐུག་པ་མེད་པ་དངོས་ཤུགས་གཉིས་ཀས་ཡང་ཡང་སྨོན་ཟིན་ལ་དེ་སྐད་དུ་སྡེ་སྣོད་ལས་ཀྱང་། ཇི་ལྟར་ནམ་མཁའ་མཐར་ཐུག་མེད་པ་ལ། །འདོམ་གྱིས་གཞལ་བས་ཚད་བཟུང་མེད་པ་ལྟར། །དེ་བཞིན་དཀོན་མཆོག་གསུམ་ལ་བརྟེན་པ་ཡི། །ཡོན་ཏན་དང་ནི་སྡིག་པའི་མཐའ་མི་དཔོགས། །ཞེས་བཤད་ལ་བྱེ་བྲག་ཏུ་སྐྱབས་སུ་སོང་བའི་ཕན་ཡོན་ནི། དྲི་མ་མེད་པའི་མདོ་ལས། སྐྱབས་སུ་སོང་བའི་བསོད་ནམས་གང་། །གལ་ཏེ་དེ་ལ་གཟུགས་མཆི་ན། །ནམ་མཁའི་ཁམས་ནི་ཀུན་བཀང་ན། །དེ་ནི་དེ་བས་ལྷག་པར་འགྱུར། །ཞེས་དང་། ཕར་ཕྱིན་བསྡུས་པ་ལས། སྐྱབས་སོང་བསོད་ནམས་གཟུགས་ཡོད་ན། །ཁམས་གསུམ་འདི་ཡང་སྣོད་དུ་ཆུང་། །རྒྱ་མཚོ་ཆེན་པོ་ཆུ་ཡི་གཏེར། །ཕུལ་གྱིས་བཅལ་བར་གཞལ་མི་ནུས། །ཞེས་དང་། ཁྱེའུ་རིན་པོ་ཆེས་བྱིན་པས་ཞུས་པའི་མདོ་ལས་ཀྱང་། གང་དག་སངས་རྒྱས་ལ་སྐྱབས་སུ་སོང་བ་དེ་དག་གི་དགེ་བའི་ཆོས་ཐམས་ཅད་མངོན་པར་འཕེལ་བ་ཡིན་ནོ། །ངོ་ཚ་ཤེས་པ་ཡིན་ནོ། །ཁྲེལ་ཡོད་པ་ཡིན་ནོ། །ཆོས་ལ་སྐྱབས་སུ་སོང་བ་དེ་དག་ནི་བག་ཡོད་པ་ཡིན་ནོ། །ཡོན་ཏན་གྱི་ཚོགས་མང་བ་ཡིན་ནོ། །རྟག་ཏུ་ཚེ་རབས་དྲན་པ་ཡིན་ནོ། །ཆོས་ཀྱི་བགོ་སྐལ་གྱི་ཚོགས་དང་ལྡན་པ་ཡིན་ནོ། །དགེ་འདུན་ལ་སྐྱབས་སུ་སོང་བ་དེ་དག་གི་སེམས་ལས་སུ་རུང་བ་ཡིན་ནོ། །ཏིང་ངེ་འཛིན་དང་། གཟུངས་ཀྱི་སྒོ་མང་བ་ཡིན་ནོ། །རྟག་ཏུ་རིགས་བཙུན་པ་ཡིན་ནོ། །རྨི་ལམ་དུའང་སངས་རྒྱས་དང་། ཆོས་དང་། དགེ་འདུན་དང་མི་འབྲལ་བ་ཡིན་ནོ། །གཞན་ཡང་དཀར་པོ་ལ་མངོན་པར་དགའ་བའི་ལྷ་རྣམས་ཀྱིས་བསྲུང་བ་ཡིན་ནོ། །དགེ་བའི་རྩ་བ་དག་ཀྱང་སྤེལ་བ་ཡིན་ནོ། །ཞེས་སོ། །དེ་ལ་ནང་པའི་ཁྱུར་ཚུད་པ་ནི། སྤྱིར་ཕྱི་ནང་གི་འཇོག་ཚུལ་མཐའ་གཅིག་ཏུ་མི་གནས་ཀྱང་། ཤཱནྟི་པ་ལ་སོགས་པ་འཕགས་ཡུལ་པ་འགའ་ཞིག་སྐྱབས་འགྲོས་འབྱེད་པར་གྲགས་པའང་། ཐོག་མར་སངས་རྒྱས་པའི་སྡེ་ཚན་དུ་ཆུད་ཅིང་སྐྱབས་འགྲོ་ཐོབ་པ་ནས་བཟུང་སྟེ་དཀོན་མཆོག་གསུམ་ལ་སྙིང་ཐག་པ་ནས་སྟོན་པ་ལ་སོགས་པའི་སྐྱབས་གསུམ་དུ་འཛིན་ཅིང་། ཐོབ་པ་དེ་མ་བཏང་བ་ཞིག་དགོས་ཀྱི། དེ་མེད་ན་བསོད་ནམས་ཆ་མཐུན་གྱི་དགེ་བ་བྱས་ཀྱང་སངས་རྒྱས་པར་མི་ཚུད་དོ། །སྡོམ་པ་མཐའ་དག་གི་རྟེན་གཞིར་འགྱུར་བ་ནི། སྐྱབས་འགྲོ་བདུན་ཅུ་པ་ལས། སྡོམ་པ་ཀུན་ལ་ཡོད་མོད་ཀྱིས། །སྐྱབས་སུ་མ་སོང་བ་ལ་མེད། །ཅེས་ཡོན་ཏན་གྱི་རྟེན་གཞིར་བཞག་པའི་ཕྱིར་ན་གྲུབ་མཐའ་ལ་ཞུགས་པ་རྣམས་ཀྱིས་སྐྱབས་འགྲོ་ནི་སྡོམ་པའི་རྟེན་དུ་རུང་བ་ཞིག་དགོས་ཏེ། སྔ་མ་ལས། དགེ་བསྙེན་གསུམ་ལ་སྐྱབས་འགྲོ་བ། །དེ་ནི་སྡོམ་བརྒྱད་རྩ་བ་ཡིན། །ཞེས་སྐྱབས་འགྲོས་མྱང་འདས་ཀྱི་བསམ་པ་བརྟན་པར་བྱས་ནས་དེ་ལས་སྡོམ་པ་སྐྱེ་བ་ལ་དགོངས་པས་སོ། །མཛོད་འགྲེལ་ལས་ཀྱང་། སྐྱབས་སུ་འགྲོ་བ་རྣམས་ནི་སྡོམ་པ་ཡང་དག་པར་བླང་བ་ཐམས་ཅད་ལ་སྒོར་གྱུར་པ་ཡིན་ནོ། །ཞེས་བཤད་དོ། །གཞན་ཡང་དཀོན་མཆོག་ལ་སྐྱབས་སུ་སོང་བས་སྔོན་བསགས་པའི་ལས་ཀྱི་སྒྲིབ་པ་དང་སྡིག་པ་རྣམས་ཀྱང་ལ་ལ་ནི་བསྲབ་པར་འགྱུར། ལ་ལ་ནི་འཛད་པར་འགྱུར་བའི་ཚུལ་ཡང་ཉི་མའི་སྙིང་པོའི་མདོར། སངས་རྒྱས་སྐྱབས་སུ་སེམས་ཅན་སུ་འགྲོ་བ། །བདུད་རྣམས་བྱེ་བས་བསད་པར་མི་ནུས་ཏེ། །ཚུལ་ཁྲིམས་ཉམས་ཤིང་བློ་ནི་འཁྲུགས་ཟིན་ཀྱང་། །དེ་ནི་ངེས་པར་སྐྱེ་བའི་ཕ་རོལ་འགྲོ། །ཞེས་སོ། །གནོད་པ་དང་ཉེ་བར་འཚེ་བ་ལས་ཐར་བའང་། མདོ་སྡེ་རྒྱལ་མཚན་དམ་པ་ལས། དགེ་སློང་དག། ཁྱོད་དགོན་པ་དང་། དུར་ཁྲོད་དང་། འབྲོག་སྟོང་པ་ལ་སོགས་པ་ན་འདུག་ཀྱང་རུང་། གསུམ་ལ་སྐྱབས་སུ་སོང་ཞིག་དང་། འཇིགས་པ་དང་། སྡུག་བསྔལ་བ་དང་། སྤུ་ཟིང་ཞེས་བྱེད་པ་དེ་དག་མེད་པར་འགྱུར་རོ། །ཞེས་དང་། དོན་འདི་དག་ལ་ནི་སྐྱེ་བོ་རྨོངས་པ་དག་ཡིད་ཆེས་པའི་གཏམ་རྒྱུད་ཀྱང་མཆི་སྟེ། སྔོན་རྐུན་པོ་ཞིག་ལ་དབྱིག་པས་ལན་གསུམ་བརྡེག་པ་དང་བསྟུན་ནས་རྡེག་པ་པོས། སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཞེས་བརྡ་སྤྲད་ཅིང་བསྣུན་པས། དེ་ནི་ཟུག་གིས་ཧ་ཅང་ཟིལ་གྱིས་ནོན་དྲགས་པས་ཟམ་པའི་འོག་ཏུ་བསྐུངས་ཏེ་ཡོད་པ་ན། སྐྱབས་འགྲོའི་ཚིག་དེ་ཟུག་རྔུ་དང་དུ་མ་རོ་གཅིག་པར་བློ་ཡུལ་དུ་ཉམས་བརྟས་པའི་མུར་ཟམ་པའི་ཕ་རོལ་ནས་མི་མ་ཡིན་མང་པོ་འུར་དིར་གྱིས་འོང་པས་མཐོང་སྟེ། འདི་ན་དཀོན་མཆོག་ལ་སྐྱབས་འགྲོ་བྱེད་པ་ཞིག་སྣང་ངོ་ཞེས་བྲོས་པར་གྱུར་སྐད། དེ་ལྟར་ཀུན་ནས་ཉོན་མོངས་པའི་རྣམ་པར་རྟོག་པ་ཅན་ལའང་དཀོན་མཆོག་གི་རང་བཞིན་བསམ་གྱིས་མི་ཁྱབ་པའི་གྲུབ་འབྲས་མི་བསླུ་ན། ཉོན་མོངས་པ་དང་། འཆིང་བས་ཀུན་ནས་དཀྲིས་པ་དང་། སྲིད་པར་འཁོར་བ་འཇིག་ཚོགས་ལ་བལྟ་བ་དང་། ཞི་བ་ཕྱོགས་གཅིག་པ་ཐེག་པ་དམན་པའི་ལམ་དུ་གོལ་བ་དང་། འཁོར་བ་དང་ངན་སོང་ལ་སོགས་པ་མི་མཐུན་པའི་ཕྱོགས་ཀྱིས་གཟིར་བ་མཐའ་དག་ལས་མཐོང་ཆོས་སུ་བསྐྱབ་ཅིང་། མངོན་པར་མཐོ་བ་དང་། ངེས་པར་ལེགས་པའི་དོན་ཐམས་ཅད་བདེ་བླག་ཏུ་གྲུབ་པར་བྱེད་པའི་མཐུ་ཆེན་པོ་དང་ལྡན་པ་འདི་ལ་སུ་ཞིག་བརྟེན་པར་མི་བྱེད། དེ་སྐད་དུ་མདོ་སྡེ་རྒྱན་ལས། རྟག་ཏུ་ཉོན་མོངས་ཚོགས་ཀུན་དང་། །ཉེས་པར་སྤྱོད་པ་ཐམས་ཅད་དང་། །རྒ་དང་འཆི་བ་དག་ལས་ཀྱང་། །སངས་རྒྱས་ཉིད་ཀྱིས་ཡོངས་སུ་སྐྱོབ། །འཚེ་བ་དག་ནི་ཐམས་ཅད་དང་། །ངན་སོང་དང་ནི་གནས་མིན་དང་། །འཇིག་ཚོགས་ཐེག་པ་དམན་དག་ལས། །སྐྱོབ་ཕྱིར་སྐྱབས་ཀྱི་དམ་པ་ཡིན། །ཞེས་སོ། །ངན་སོང་དུ་སྐྱེ་བའི་རྒྱུ་དག་པའང་བསླབ་བཏུས་སུ། འདིར་ཕག་གི་རྟོགས་པ་བརྗོད་པ་དཔེར་བྱའོ། །ཞེས་བཤད་པའི་དོན་ནི་ཕག་ཏུ་སྐྱེ་བར་འགྱུར་བའི་ལྷའི་བུས་སྐྱབས་འགྲོ་བྱས་པས་ཕག་ཏུ་མ་སྐྱེས་པ་སྔར་སྨོས་ཟིན་ལ། དཀོན་མཆོག་གསུམ་དང་མི་འབྲལ་བ་ནི་དེ་དག་རྗེས་སུ་དྲན་པ་ལས་འཐོབ་སྟེ། དྲན་པའི་ཚོམས་ལས། གང་ཞིག་ཉིན་དང་མཚན་རྣམས་སུ། །སངས་རྒྱས་རྗེས་སུ་དྲན་བྱེད་ཅིང་། །གང་དག་སངས་རྒྱས་སྐྱབས་སོང་བ། །དེ་དག་མི་ཡི་རྙེད་པ་ཡིན། །ཞེས་གཞན་གཉིས་ལའང་སྦྱར་ནས་གསུངས་པ་ལྟར་ཟླ་བ་སྒྲོན་མ་དང་། འཕགས་པ་དཀོན་མཆོག་བརྩེགས་པ་ལས་གསུངས་པ་བཞིན་གསུམ་པོ་རྗེས་སུ་དྲན་པ་ཚིག་གིས་ལེགས་པར་གསལ་བཏབ་ཅིང་། འདི་འདྲ་བའི་སྐྱབས་གསུམ་ལ་བརྟེན་དུ་ཡོད་པ་བདག་གིས་རྙེད་པ་ལེགས་པར་རྙེད་དོ་སྙམ་པའི་དགའ་བ་བསྒོམས་པའི་རྗེས་སུ་བསྔོ་བ་དང་འབྲེལ་ན་སྡིག་པ་ཟད་ཅིང་དགེ་བ་འཕེལ་བས་ཚེ་རབས་ཐམས་ཅད་དུ་དཀོན་མཆོག་གསུམ་དང་མི་འབྲལ་བ་ཐོབ་པ་ཡིན་ནོ། །ཕུན་སུམ་ཚོགས་པ་མཐོང་ཆོས་སུ་འོང་བ་ནི། གང་དུ་དཀོན་མཆོག་གསུམ་གྱི་ཡོན་ཏན་མ་གྲགས་པའི་འཇིག་རྟེན་དེ་ནི་འདྲེན་པས་སྤངས་པའི་ལོང་བ་ཆེན་པོ་ཡིན་ལ། འདིར་ཡོན་ཏན་གཞལ་དུ་མེད་པའི་སྐྱབས་ལ་བརྟེན་ནས་ཡོན་ཏན་དམ་པའི་རྗེས་སུ་འགྲོ་བ་དག་ལ་ནི་སྲིད་དང་ཞི་བའི་ཕུན་སུམ་ཚོགས་པ་མཐའ་དག་མཐོང་བའི་ཆོས་ལ་འབྱུང་སྟེ། དཀོན་མཆོག་བརྩེགས་པ་ལས། མཁས་པ་དག་ནི་ཡོན་ཏན་རྗེས་སུ་འགྲོ། །དེ་ཡི་དབང་གིས་དོན་ཡང་ཕུན་ཚོགས་འགྲུབ། །ཅེས་པས་སོ། །དེ་བས་ན་ཆོས་ལྡན་གྱི་བྱ་བ་ཅི་ལྟ་བུ་བསྒྲུབ་པའི་ཐོག་མ་ལ་དཀོན་མཆོག་འབའ་ཞིག་ལ་བསྙེན་བཀུར་ཞིང་སྐྱབས་སུ་སོང་ནས་བསམ་པ་ཡིད་བཞིན་དུ་འགྲུབ་པར་གསོལ་བ་བཏབ་ན་བདེ་བླག་ཏུ་འགྲུབ་པ་ཉིད་དོ། །དེ་ལྟར་གནས་སྐབས་རྒྱུའི་སྐྱབས་འགྲོས་བསོད་ནམས་ཀྱི་ཚོགས་རྫོགས་ཤིང་མཐར་ཐུག་གཟུགས་ཀྱི་སྐུ་རྣམ་པ་གཉིས་འགྲུབ་པ་ནི། དཀོན་བརྩེགས་ལས། མི་གང་གསུམ་ལ་སྐྱབས་སུ་འགྲོ། །དེ་ཡིས་ཚོགས་ཀྱང་རབ་རྫོགས་ཤིང་། །སངས་རྒྱས་ཉིད་ཀྱང་འགྲུབ་པ་དང་། །ཆོས་དང་དགེ་འདུན་ཐོབ་པར་འགྱུར། །ཞེས་སོ། །དོན་དམ་པའི་སྐྱབས་འགྲོ་ངོས་བཟུང་བའི་ཕྱིར། འབྲས་བུའི་སྐྱབས་འགྲོ་བསླུ་བ་མེད་པ་ནི། །རྣམ་ཐར་སྒོ་གསུམ་སྨོན་པ་མེད་པའི་དབྱིངས། །གནས་ལུགས་རྡོ་རྗེ་འདུས་མ་བྱས་པ་ཡིན། །ཡེ་ཤེས་ཚོགས་རྫོགས་དག་པ་གཉིས་ལྡན་འཐོབ། །དེ་ལ་ཕ་རོལ་ཕྱིན་པའི་ཐེག་པས་མ་འོངས་པའི་ཆ་ལ་རང་རྒྱུད་ལ་མངོན་དུ་འགྱུར་རུང་གི་སངས་རྒྱས་ལ་དམིགས་ཏེ་སྨོན་པའི་ཆ་གང་ཞིག་འབྲས་བུའི་སྐྱབས་འགྲོར་འདོད་དེ། དེའང་སྨོན་པའི་སེམས་བསྐྱེད་པ་ལྟ་བུ་གཞན་དོན་ལ་དམིགས་པ་ཅན་ནི་མ་ཡིན་ཏེ། འདི་ནི་རང་དོན་ལ་དམིགས་པའི་ཁྱད་པར་བྱས་པའོ། །དེའི་ངོ་བོ་ནི་ཡུམ་བར་པ་ལས། རབ་འབྱོར་གང་ལ་སངས་རྒྱས་ཀྱང་མི་དམིགས་ལ་ཆོས་དང་དགེ་འདུན་ཡང་མི་སེམས་ན། འདི་ནི་ཡང་དག་པའི་སྐྱབས་འགྲོའོ། །ཞེས་སོ། །འདིར་ནི་ཆོས་སྐུའི་རང་བཞིན་དེ་ཡང་གཞན་རྒྱུད་ལ་བྱོན་ཟིན་པ་དེ་རྒྱུའི་སྐྱབས་སུ་བཞག་ནས། འབྲས་བུའི་སྐྱབས་འགྲོའི་བསླུ་བ་མེད་པ་ནི་རང་གི་སེམས་ཉིད་འོད་གསལ་ཆོས་སྐུའི་རང་བཞིན་དག་ཐོབ་སྤྲོས་པ་དང་བྲལ་བ་ནི་སངས་རྒྱས། འགྱུར་བ་མེད་ཅིང་དྲི་མས་མ་གོས་པ་ནི་དམ་ཆོས། ཡོན་ཏན་གྱི་ཆ་ཐམས་ཅད་རང་བཞིན་ལྷུན་གྲུབ་ཏུ་རྫོགས་པ་དགེ་འདུན་ཞེས་ཐ་སྙད་ཙམ་དུ་སྦྱར་ཏེ། ངོ་བོའི་ཆ་ནས་རྣམ་ཐར་སྒོ་གསུམ་གྱི་བཞུགས་ཚུལ་ཆེན་པོ་ལ། ཡུལ་དཀོན་མཆོག་དང་། ཡུལ་ཅན་བདག་དང་སེམས་ཅན་ཞེས་སྐྱབས་སུ་འགྲོ་བྱ་འགྲོ་བྱེད་ཀྱི་ཐ་སྙད་ཐམས་ཅད་སྨོན་པ་མེད་པའི་དབྱིངས་སུ་རྣམ་པར་བྱང་བ་ནི་འབྲས་བུའི་སྐྱབས་འགྲོ་ཉིད་དེ། ཡེ་ཤེས་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་གསུངས་པ་ལྟར་རོ། །འདི་ལྟར་སངས་རྒྱས་པའི་ཆོས་ཐམས་ཅད་ནི་ཀུན་རྫོབ་བདེན་པས་ཚིག་གི་མཐའ་འབྱམས་ཀླས་པར་གཞལ་ཡང་། མཐར་ཐུག་དོན་དམ་པའི་བདེན་པ་ཉག་གཅིག་ཏུ་འབབ་པའི་ཕྱིར་ན། ལམ་གྱི་སྒོ་དང་པོ་སྐྱབས་འགྲོའི་གནད་མཐར་ཐུག་པ་རིག་པ་དང་རྟོགས་པའི་ཡོན་ཏན་ཁོང་དུ་ཆུད་པ་དུས་མཉམ་པ་འདི་ཕལ་གྱིས་མི་རིག་གོ །འོ་ན་ལམ་གྱི་གནས་སྐབས་སུ་འབྲས་བུའི་སྐྱབས་འགྲོ་སྨོས་པ་ལ་དགོས་པ་ཅི་ཡོད་ཅེ་ན། རྒྱུའི་སྐྱབས་འགྲོའི་རྗེས་ཐོབ་ཐམས་ཅད་དུ་འབྲས་བུའི་སྐྱབས་འགྲོ་རྗེས་མཐུན་པའི་སྟོང་པ་ཉིད་ཀྱིས་རྒྱས་གདབ་དགོས་པ་ཡིན་ཏེ། དེ་ལས་ཡེ་ཤེས་ཀྱི་ཚོགས་རྫོགས་པའི་ཚུལ་བདེན་པ་གཉིས་བསྟན་པའི་མདོ་ལས། འཇམ་དཔལ་བསོད་ནམས་ཀྱི་ཚོགས་ཀྱིས་ནི་གཟུགས་ཀྱི་སྐུ་ཐོབ་ལ། ཡེ་ཤེས་ཀྱི་ཚོགས་ཀྱིས་ནི་ཆོས་ཀྱི་སྐུ་དམ་པ་མངོན་དུ་བྱེད་པ་ཡིན་ནོ། །ཞེས་སོ། །དེ་ནས། བསླབ་བྱ་རྒྱུ་འབྲས་གཉིས་ལས་དང་པོ་ནི། མངའ་རིས་བྱ་དགའི་སླད་དུ་སྨོས་ཅི་དགོས། །སྲོག་གི་ཕྱིར་ཡང་དཀོན་མཆོག་གཏོང་བ་མིན། །དེ་ཡི་ངོ་བོ་བླ་མར་སྐྱབས་སོང་ནས། །དམ་པ་བསླུ་དང་མི་སྙན་སྒྲོག་པ་སྤང་། །དེ་ལ་ཕྱོགས་དང་པོ་རྒྱུའི་བསླབ་བྱ་ལ། འདི་ལྟར་མངའ་རིས་དང་། ལོངས་སྤྱོད་ནི་ཚེ་གཅིག་གི་སྟོད་སྨད་ལ་སོགས་པར་ཡང་གཡོ་ཞིང་མི་བརྟན་པ་སྨོས་ཅི་དགོས། དེ་དག་ལ་བདག་དང་བདག་གི་བར་འཛིན་པའི་རྟེན་ལུས་དང་སྲོག་གི་རང་བཞིན་ཡང་གདོན་མི་ཟ་བར་འབྲལ་བར་འགྱུར་པས་སྙིང་པོ་མེད་ལ། དཀོན་མཆོག་ལ་སྐྱབས་སུ་འགྲོ་བས་ནི་མངོན་པར་མཐོ་བ་དང་ངེས་པར་ལེགས་པའི་བདེ་བ་ཐམས་ཅད་འཕྲལ་ཡུན་ཀུན་ཏུ་འགྲུབ་པ་ཉིད་དེ། གལ་ཏེ་རྨོངས་པའི་དབང་གིས་དམན་པ་དང་མཆོག་གི་ཁྱད་པར་ནོར་ནས་དཀོན་མཆོག་བཏང་བར་གྱུར་ན་ནི་ཚེ་རབས་ཀུན་ཏུ་སྡུག་བསྔལ་རྒྱུད་མར་འབྱུང་བས་ན། ཐ་ན་བཞད་གད་ཀྱི་ཕྱིར་རམ། སྲོག་ལ་བབས་ཀྱང་དཀོན་མཆོག་མི་བཏང་བའི་དམ་བཅའ་བརྟན་པ་ལ་ཡང་ཡང་བསླབ་པར་བྱ་སྟེ། འདུལ་བ་ལུང་ལས། ཁྱོད་ཀྱིས་སྲོག་དང་རྒྱལ་སྲིད་དང་། ཐ་ན་བཞད་གད་ཀྱི་ཕྱིར་ཡང་དཀོན་མཆོག་གསུམ་སྤང་བར་མི་བྱའོ། །ཞེས་སོ། །ཁྱད་པར་སྔགས་ཀྱི་ལམ་ལ་ནི་དཀོན་མཆོག་གསུམ་ཀའི་ངོ་བོ་མཚན་ལྡན་གྱི་བླ་མ་ལ་སྐྱབས་སུ་སོང་ནས་དམ་པར་གྱུར་པའི་སྐྱེས་བུ་རྣམས་བསླུ་བ་དང་། མི་སྙན་པ་བརྗོད་པ་ཡོངས་སུ་སྤང་བར་བྱ་བ་ནི། སྡོང་པོ་བཀོད་པ་ལས། དགེ་བའི་བཤེས་གཉེན་ལ་བརྟེན་པས་ནི་མཆོད་པར་འོས་པ་མི་བསླུ་བ་དང་། སྐྱེས་བུ་དམ་པ་རྣམས་ལ་མི་སྙན་པར་སྨྲ་བ་ཡོངས་སུ་སྤང་བར་བྱ་ཞིང་དམ་པའི་ཆོས་ཀྱི་རྗེས་སུ་འགྲོ་བར་བྱའོ། །ཞེས་སོ། །དེའང་སྐྱབས་གསུམ་སོ་སོའི་བསྲུང་མཚམས་ཀྱི་སྒོ་ནས་བཤད་པའི་ཕྱིར། དེ་བཞིན་སངས་རྒྱས་ཆོས་དང་དགེ་འདུན་ལ། །སྐྱབས་སུ་སོང་ནས་རིམ་བཞིན་བདག་ཉིད་ནི། །འཁོར་བར་འཁོར་བའི་ལྷ་ལ་ཕྱག་མི་འཚལ། །གཞན་ལ་མི་འཚེ་མུ་སྟེགས་ཅན་མི་འགྲོགས། །འདི་ནི་མན་ངག་ལས་བྱུང་བའི་བསླབ་བྱ་ཞེས་བྱ་སྟེ། དེ་ལ་གཉིས་ལས། དང་པོ་དགག་པའི་བསླབ་བྱ་གསུམ་ནི་མདོ་སྡེ་མྱང་འདས་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་སོང་བ་མ་ཡིན་ནོ། །དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གནོད་པའི་སེམས་དང་བྲལ། །དགེ་འདུན་ལ་ཡང་སྐྱབས་འགྲོ་བ། །མུ་སྟེགས་ཅན་དང་འགྲོགས་པ་མིན། །ཞེས་གསུངས་པས། སངས་རྒྱས་ལ་སྐྱབས་སུ་སོང་ནས་རང་ཉིད་འཁོར་བ་ན་འཁོར་བ་འཇིག་རྟེན་པའི་ལྷ་ཆེན་པོ་དྲག་པོ་དང་། ཁྱབ་འཇུག་ལ་སོགས་པར་ཡང་སྐྱབས་སུ་མི་འཛིན་ན། མཁའ་ལ་རྒྱུ་བའི་ཡི་དྭགས་རྫུ་འཕྲུལ་དང་མངོན་ཤེས་ཅུང་ཟད་ཡོད་པ་ལ་ལྟ་ཅི་སྨོས། དེ་ལྟ་ན་མགོན་པོ་བདུན་ཅུ་རྩ་ལྔ་ལ་སོགས་པ་ཆོས་སྐྱོང་དུ་མི་རུང་ངམ་སྙམ་ན། སྐྱབས་གསུམ་ལ་ཡིད་མ་ཆེས་པའམ། དེ་ལས་ལྷག་པར་བལྟས་ནས་བློ་གཏོད་ན་མི་རུང་བ་ཡིན་གྱི། གནས་སྐབས་ཆོས་ལྡན་གྱི་བྱ་བ་བསྒྲུབ་པའི་གྲོགས་སུ་བསྟེན་ཅིང་མཆོད་པ་ལ་དགག་བྱ་མེད་དེ། དཔེར་ན་སྨན་པ་ལ་སྐྱབས་སུ་འཛིན་པ་མ་ཡིན་ཀྱང་ནད་ལས་གསོ་བའི་ལྟོས་འཆའ་བ་བཞིན་ནོ། །ཆོས་ལ་སྐྱབས་སུ་སོང་ནས། སེམས་ཅན་གང་དག་འཆིང་ཞིང་བརྡེག་པ་དང་། གོ་རར་འཛུད་པ་དང་། སྣ་དབུག་ཅིང་བྱ་འབྲལ་བ་དང་། མི་ཐེག་པའི་ཁལ་གྱིས་མནར་བ་དང་། ལམ་ཚད་ལས་དཔགས་ཏེ་བཞོན་པ་ལ་སོགས་འདི་དག་རྨོངས་པའི་དབང་གིས་ཉེས་བྱས་སུ་མི་རིག་པ་མང་སྟེ་སེམས་ཅན་ལ་འཚེ་བ་ཆེན་པོ་ཡིན་པས་སྤང་བར་བྱ་སྟེ། དཔེར་ན་བྱ་དང་རི་དྭགས་ལ་སོགས་པ་རྩེད་འཇོ་དང་། ངོ་མཚར་གྱི་སླད་དུ། ཆེད་དུ་གཉེར་གདམས་ཀྱི་བདག་གིར་བྱེད་པ་ནི་གོ་རར་འཆིང་བའི་སྡེ་ཚན་ཏེ། དེ་དག་བག་ཡངས་སུ་རྒྱུ་བ་བཀག་པའི་སྡུག་བསྔལ་དང་འཚེ་བ་ཇི་ལྟར་ཐོབ། རང་ཉིད་ལ་རྗེས་སུ་དཔགས་པས་ཤེས་པར་འགྱུར་རོ། །དགེ་འདུན་ལ་སྐྱབས་སུ་སོང་ནས། དཀོན་མཆོག་ལ་ཡིད་མི་ཆེས་ཤིང་བསྐུར་བའི་གང་ཟག་དང་ཉེ་བར་མི་བྱེད་ཅིང་། ཐ་ན་དཀོན་མཆོག་ལ་ཆེ་ཐང་དུ་མི་འཛིན་པ་དེ་ལའང་བློ་ཕྱོགས་པར་མི་བྱེད་དོ། །དེའི་མཐུན་ཕྱོགས་བསྒྲུབ་པའི་བསླབ་བྱ་གསུམ་ནི། རྒྱལ་བའི་སྐུ་གཟུགས་བྲིས་འབུར་གྱི་རྣམ་པ་བཟོ་སྒྲོས་ཅི་འདྲ་ཡང་། དཔྱས་མི་གདགས། སྲི་ཞུ་ལྷོད་པའི་གནས་སུ་མི་བཞག་གཏའ་མར་མི་འཇུག་པ་ལ་སོགས་བརྙས་ཐབས་ཐམས་ཅད་སྤང་དགོས་ཏེ། དམ་པའི་ཆོས་པདྨ་དཀར་པོ་ལས། སྐུ་གཟུགས་རྣམ་པ་མང་པོ་དེར་སྤྲུལ་ནས། །འགྲོ་བ་དགེ་བ་སྤྱོད་པའི་དོན་བྱེད་དོ། །ཞེས་བཟོ་སྤྲུལ་པའི་སྐུའི་རང་བཞིན་ཡིན་པའི་ཕྱིར་རོ། །རྒྱུ་དེས་དཀོན་མཆོག་ལ་དད་པ་དང་བརྙས་པའི་རྒྱུ་འབྲས་སྨིན་ཚུལ་བློས་མི་འཁྱུད་པར་གསུངས་པའི་ལུང་མང་ངོ་། །ཆོས་ཚིགས་སུ་བཅད་པ་བཞི་པ་ནས་གཅིག་པའི་བར་ཡན་ཆད་ལ་མ་གུས་པ་མི་བྱ་སྟེ། འདུལ་བ་ལུང་ལས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཞེས་པ་ལའང་སྟོན་པའི་ལུང་རྟོགས་ཀྱི་བསྟན་པའི་རྣམ་གཞག་ཚང་བའི་ཕྱིར་ན། གླེགས་བམ་ཟོང་དུ་བྱེད་པ་དང་། ས་རྗེན་པར་ཅི་མི་གལ་དུ་འདོར་བ་དང་། སྲི་ཞུས་ཉམ་ཆུང་བར་བྱེད་པ་དང་། འགོམ་ཡུགས་དང་། གཏའ་མར་འཇུག་པ་སོགས་སྤང་བར་བྱ་སྟེ། དཀོན་མཆོག་ལ་དད་པའི་གང་ཟག་དམ་པ་རྣམས་གསུངས་རབ་གདན་དྲངས་བ་མཐོང་ཡང་ལྡང་ཞིང་། ཐལ་མོ་སྦྱོར་བ་དང་། བཞོན་པ་ལས་གཞོལ་བ་དང་། འབྲུ་བསྣོན་དུ་སོ་དྲེག་སྐུད་པ་ལའང་ཡ་ང་བའི་གནས་སུ་མཛད་པ་དེ་ངོ་མཚར་ཆེའོ། །ད་ལྟ་ཆོས་ཀྱི་ཚིག་དོན་ལ་བརྒལ་བརྟག་བྱེད་ཅིང་། སྤྲུལ་པའི་གཟུགས་བརྙན་ལ་རྩེད་མོ་དང་། བརྙས་ཐབས་འབའ་ཞིག་བྱེད་པ་ནི་ཤེས་རབ་འཆལ་བ་རྨོངས་པའི་རྒྱུ་གསོག་པ་ཉིད་ཡིན་ནོ། །ཅིའི་ཕྱིར་ན་སྙན་གོང་ལས། ལྔ་བརྒྱའི་ཐ་མར་གྱུར་པ་ན། །ང་ནི་ཡི་གེའི་གཟུགས་སུ་གནས། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པར་གྱིས། །ཞེས་གསུངས་པས་སོ། །དེ་བཞིན་དུ་དགེ་སློང་གི་དགེ་འདུན་ནམ། རབ་ཏུ་བྱུང་བ་དགེ་སྦྱོང་གི་རྟགས་ཙམ་འཛིན་པ་ཡན་ཆད་ལ་བརྙས་པར་མི་བྱ་སྟེ། སྐྱབས་འགྲོའི་བསླབ་བྱ་གཏོང་བར་མ་ཟད་ཚུལ་ཁྲིམས་དང་ལྡན་པའི་དགེ་འདུན་ལ་བརྙས་པའི་ཁ་ན་མ་ཐོ་བ་ནི་མཐུ་ཆེ་སྟེ། ཤེད་བུ་སེར་སྐྱས་སློབ་པ་དང་མི་སློབ་པའི་དགེ་འདུན་རྣམས་ལ་གླང་པོའི་མགོ་ཅན་ཁྱེད་ཅག་གིས་ཆོས་སམ་ཆོས་མ་ཡིན་པ་ཅི་ཤེས། ཞེས་པ་ལ་སོགས་པའི་ངན་དུ་སྨྲ་བ་བཅོ་བརྒྱད་བྱས་པས། དེ་ཆུ་སྲིན་ཉའི་རིགས་ཅན་མགོ་བརྙན་མི་འདྲ་བ་བཅོ་བརྒྱད་ཡོད་པར་སྐྱེས་ནས། སྟོན་པ་འོད་སྲུང་ནས་ཤཱཀྱ་ཐུབ་པའི་བར་དུ་དུད་འགྲོའི་འགྲོ་བར་བསྡད་པའི་ཚུལ་ལུང་རྣམ་འབྱེད་ལས་གསལ་བར་གསུངས་པའི་ཕྱིར་འདི་ནི་འདི་འདྲའོ་ཞེས་དཔྱས་གདགས་པ་དང་། བླ་དྭགས་དཔྱང་པ་ནི་ཉེས་པ་མི་བཟད་པ་ཡིན་ལ། ཐ་ན་ཚུལ་ཁྲིམས་འཆལ་བ་རྟགས་དང་མ་བྲལ་བ་ཡིན་ཡང་། ཁྱུ་མཆོག་ཤི་བའི་རོ་ལ་གི་ཝཾ་དང་། གླ་བའི་རོ་ལ་རྩི་མ་གི་ཏ་ཡོད་པ་ལྟར་སྔོན་ལེགས་པར་སྤྱད་པའི་འབྲས་བུ་ཅུང་ཟད་དང་ལྡན་པ་ཡིན་པས་བརྙས་ཤིང་ཁྲིམས་ལ་སྦྱར་བར་མི་རུང་བའི་ཚུལ་སའི་སྙིང་པོ་འཁོར་ལོ་བཅུ་པའི་མདོ་ལས་རྒྱས་པར་བསྟན་ཅིང་། བདག་ཅག་གི་སྟོན་པ་དཀོན་མཆོག་ལ་གུས་པ་བརྟས་པའི་བློ་དུད་འགྲོའི་གཟུགས་བརྙན་དུ་གྱུར་པའི་དུས་ཀྱང་མ་ཉམས་པ་སེང་གེའི་རྒྱལ་པོ་ཡི་དམ་བརྟན་པས་རང་ཉིད་ཀྱི་སྲོག་འཕྲོག་པའི་རྔོན་པ་རབ་ཏུ་བྱུང་བའི་རྟགས་སུ་ཚུལ་འཆོས་པ་ལའང་བློ་གཏད་ཅིང་གུས་པ་མ་ལྷོད་པ་དཔེར་བྱས་ནས་ཕ་རོལ་གྱི་སྐྱོན་ལ་མི་རྟོག་པ་ཡིན་ནོ། །སྤྱིར་ན་སློབ་དཔོན་དཔའ་བོས། ལོག་པས་འཐབ་གཅུགས་བྱེད་པ་དང་། །བཀྲེན་ལ་དམན་པར་བལྟ་བ་དང་། །ཚུལ་ཁྲིམས་ལྡན་རྣམས་མི་དགའ་དང་། །དཀའ་ཐུབ་སྡོམ་པ་འཁྲུལ་བྱེད་པ། །བཞི་པོ་འདི་དག་འདོད་མིན་ཏེ། །རྩ་བ་འཇོམས་པར་བགྱིད་པ་ལགས། །ཞེས་བཤད་པ་ཡིན་ནོ། །དོན་བསྡུ་ན་རང་ཉིད་དཀོན་མཆོག་ལ་ཇི་ཙམ་དུ་གུས་པ་དེ་ཙམ་དུ་འགྲོ་བ་གཞན་དང་གཞན་དག་གིས་ཀྱང་བདག་ཉིད་ལ་དེ་ལྟར་བལྟ་བ་ལས་འབྲས་མི་བསླུ་བའི་འབྲས་བུ་ཡིན་ཏེ། ཏིང་ངེ་འཛིན་རྒྱལ་པོ་ལས། ཅི་འདྲ་བ་ཡི་ལས་བྱས་པས། །འབྲས་བུ་དེ་འདྲ་ཐོབ་པར་འགྱུར། །ཞེས་གསུངས་པས་ན་གུས་པ་ཡོད་པའི་མངོན་རྟོགས་འདིས་གསལ་གདབ་བོ་ཞེས་སྟོན་པའི་ཕྱིར། དཀོན་མཆོག་རྟེན་ལ་དད་པས་བསྙེན་བཀུར་ཞིང་། །ཉིན་མཚན་བརྗེད་པ་སྤངས་ནས་སྐྱབས་སུ་འགྲོ། །ཞེས་སྨོས་པ་སྟེ། དད་པའི་རྒྱུ་ནི་སྔོན་སྟོན་པ་འཇིག་རྟེན་དུ་མ་བྱོན་པའི་དུས་ན་སྐྱབས་མ་ཡིན་པ་ལ་སྐྱབས་དང་། ལམ་མ་ཡིན་པ་ལམ་དུ་འཁྲུལ་ནས་ཀུན་ནས་ཉོན་མོངས་པའི་སྟོན་པ་དང་། བསྟན་པའི་ལམ་སྲོལ་ལ་ཞུགས་ནས་དཀའ་ཐུབ་སྡོམ་པ་མི་བཟད་པ་བསྟན་པ་བྱུང་ན། ད་ནི་བདག་གཞན་གྱི་སྟོན་པ་དང་བསྟན་པའི་ཁྱད་པར་ཤེས་ནས་དད་པ་ལ་འཇུག་པའི་སྒོ་ཅིའི་ཕྱིར་མི་དབྱེ། དེ་སྐད་དུ་ཁྱད་པར་འཕགས་བསྟོད་ལས། མུ་སྟེགས་གཞན་གྱི་གཞུང་ལུགས་ལ། །ཇི་ལྟ་ཇི་ལྟར་རྣམ་བསམས་པ། །དེ་ལྟ་དེ་ལྟར་མགོན་ཁྱོད་ལ། །བདག་གི་སེམས་འདི་དད་པར་གྱུར། དེ་ལྟར་ཐམས་ཅད་མཁྱེན་མིན་པའི། །གྲུབ་མཐའི་སྐྱོན་གྱིས་བརླག་སེམས་ལྡན། །བསམ་བརླག་རྣམས་ཀྱིས་སྐྱོན་མེད་པའི། །སྟོན་པ་ཁྱོད་ཀྱང་མི་མཐོང་ངོ་། །ཞེས་རྒྱལ་པའི་བསྟན་པ་ནི་ལམ་བདེ་བས་འབྲས་བུ་ཡང་བདེ་བ་འཐོབ་པ་དང་། འཁོར་བའི་རྒྱུན་གཅོད་པ་དང་། ཉོན་མོངས་པ་རྣམ་པར་བྱང་བར་བྱེད་པ་དང་། ཉེས་པའི་ཚོགས་འདག་པ་དང་། མཐའ་གཅིག་ཏུ་དགེ་བ་ལ་སོགས་པའི་ཡོན་ཏན་ཟད་མི་ཤེས་པ་ཡིན་ལ། ཕྱི་རོལ་པའི་བསྟན་པ་ནི་དེ་ལས་གཞན་དུ་གྱུར་པའི་ཕྱིར། དཔའ་བོའི་ཞབས་ཀྱིས། གང་སླད་ཁྱོད་ཀྱི་བསྟན་པ་ནི། །བདེ་བས་བདེ་བ་འཐོབ་བགྱིད་པ། །དེ་སླད་སྨྲ་བའི་སེང་ཁྱོད་ཀྱི། །གཞུང་ལུགས་ལ་ནི་འགྲོ་འདི་དད། །ཅེས་པ་ལ་སོགས་པས་བསྟོད་ཚོགས་གཉིས་སུ་རྒྱ་ཆེར་བསྔགས་པ་ཡིན་ནོ། །དེའི་ཕྱིར་བཀའ་དྲིན་རྗེས་སུ་དྲན་པའི་དད་པ་ཆེན་པོ་བསྐྱེད་ནས། དེ་བཞིན་གཤེགས་པའི་སྐུ་གཟུགས་དང་། མཆོད་རྟེན་དང་། གསུང་རབ་ལ་སོགས་པ་མངོན་སུམ་དུ་མཆིས་པའམ། མ་མཆིས་ཀྱང་རུང་སྟེ་དེ་དག་འབའ་ཞིག་གི་སླད་དུ་མཆོད་པའི་དྲན་པ་ཉེ་བར་གཞག་ནས་བསྙེན་བཀུར་ཞིང་དམིགས་པའི་རྟེན་གཅིག་ལས་མེད་ཀྱང་ཐམས་ཅད་ཆོས་ཉིད་དབྱེར་མེད་པའི་རང་བཞིན་ཤེས་ན་ཐམས་ཅད་ལ་མཆོད་པར་འགྱུར་ཞིང་། དེ་ཡང་ལེ་ལོ་དང་སྙོམ་ལས་དང་བག་ལ་ཉལ་གྱི་དབང་གིས་གཞན་བྱེད་དུ་མི་འཇུག་པར་བདག་ཉིད་འབའ་ཞིག་གིས་ལག་བདར་ནས་བྱེད་པ་ནི་འདུ་བྱེད་དང་ལྡན་པའི་ལུས་ལ་སྙིང་པོ་ལེན་ཞིང་བསོད་ནམས་རྒྱ་ཆེ་ལ། ཡང་སེམས་ཅན་བསོད་ནམས་ཀྱི་བསགས་པ་དམན་ཞིང་སྡུག་བསྔལ་ལ། ནུས་པའི་མཐུ་ཆུང་བ་མཐོང་ནས་འདི་དག་གིས་མཆོད་པ་བྱས་ན་ནི་ཁོང་ཉིད་བདེ་བའི་འབྲས་བུ་ལ་རེག་པར་འགྱུར་རོ་སྙམ་ནས་གཞན་ལ་བགྱིད་དུ་བསྩལ་ན། སྙིང་རྗེ་དང་སེམས་བསྐྱེད་ཀྱི་འཕེན་པས་བསོད་ནམས་སྔ་མ་ལས་རྒྱ་ཆེ་བ་ཐོབ་ལ། ཁྱད་པར་བསམ་པ་དེ་ལྡན་གྱིས་གཞན་ལ་རེ་བསྐུལ་ནས་རང་གཞན་གཉིས་ཀས་བྱེད་པ་ནི་དེ་བས་ཀྱང་རྒྱ་ཆེ་བའི་བསོད་ནམས་འཐོབ་པ་ཡིན་ཏེ། དབུ་མ་སྙིང་པོ་ལས། སུ་ཞིག་ཆུ་ཤིང་ལྦུ་བ་ལྟར། །སྙིང་པོ་མེད་པའི་ལུས་འདི་དག །གཞན་ཕན་རྐྱེན་དུ་བསྒྲུབ་བྱེད་པས། །ལྷུན་པོ་སྙིང་པོར་བསྒྲུབ་མི་བྱེད། །ཡ་རབས་སྙིང་རྗེར་ལྡན་པས་ནི། །སྐད་ཅིག་རེ་རེར་རྒ་ཤི་དང་། །ནད་ཀྱི་གཞིར་གྱུར་ལུས་དག་ནི། །གཞན་ལ་བདེ་བསྐྱེད་གཞིར་བྱེད་དེ། །དམ་ཆོས་སྒྲོན་དང་བཅས་པ་ལ། །མི་ཁོམ་བརྒྱད་སྤངས་ཁོམ་པ་འདི། །སྐྱེས་བུ་ཆེན་པོའི་སྤྱོད་པ་ཡིས། །འབྲས་བུ་ཡོད་པར་བྱ་བའི་རིགས། །ཞེས་སོ། །དེའི་ཕྱིར་ལུས་ངག་གི་སྒོ་ནས་བཀུར་སྟིའི་མཆོད་པ། ཕྱག་འཚལ་བ་དང་། ཐལ་མོ་སྦྱར་བ་དང་། མངོན་དུ་ལྡང་བ་དང་། བསྐོར་བ་བྱེད་པ་དང་། སྤྱི་བོས་བཏུད་པ་དང་། གུས་པར་སྨྲ་བ་དང་། བསྟོད་དབྱངས་སྒྲོག་པ་དང་། ས་གཞི་དང་གནས་ཁང་དང་སྐྱེད་མོས་ཚལ་ལ་སོགས་པ་ཟད་མི་ཤེས་པའི་སྦྱིན་པ་དང་། ནོར་བུ་དང་། སྙན་ཆ་དང་། དཔུང་རྒྱན་དང་།དོ་ཤལ་དང་། སེ་མོ་དོ་དང་། ཟི་ལྡིར་དང་། ཚངས་སྐུད་ལ་སོགས་པའི་རྒྱན་དང་། དྲིལ་བུ་དང་། གཡེར་ཁ་དང་། དྲ་ཕྱེད་དང་། ལྡ་ལྡི་དང་། ཀརྵ་པ་ཎ་གཏོར་བ་དང་། མཎྜལ་དབུལ་བ་ལ་སོགས་པ་དང་། རྙེད་པའི་མཆོད་པ་ན་བཟའ་དང་། གཟིམས་ཆ་དང་། གདན་དང་། ཉེར་སྤྱད་དང་། བསྙུན་གྱི་གསོས་སྨན་དང་། རྟ་དང་གླང་པོ་ལ་སོགས་པ་དང་། བདུག་པ་དང་། སྐུ་ལ་བྱི་དོར་དང་། གནས་ཁང་སྐྱང་ནུལ་དང་། ཉེ་རེག་དང་། དྲིའི་བསྐུ་མཉེ་དང་། གསེར་གྱི་བྱུག་པ་དང་། སྦྱར་དང་རང་བྱུང་གི་སྤོས་དང་། མེ་ཏོག་གི་ཕྲེང་བ་དང་། རོལ་མོའི་བྱེ་བྲག་དང་། མར་མེ་ལ་སོགས་པ་དང་། དེ་བཞིན་དུ་མདོ་སྡེ་དཀོན་མཆོག་སྤྲིན་དང་། དམ་ཚིག་གསུམ་ལ་སོགས་པ་ནས་གསུངས་པའི་བདག་པོས་མ་བཟུང་བའི་མཆོད་པ། མེ་ཏོག་དང་། བཟའ་ཤིང་དང་། ཡུལ་ལྗོངས་དང་། ཆུ་ཀླུང་དང་། རིན་པོ་ཆེའི་གཏེར་ལ་སོགས་པ་དག་གིས་ཀྱང་མཆོད་ཅིང་། དེ་དག་ཀྱང་གཞན་ལ་ཁྱད་གསོད་དང་། སངས་རྒྱས་ལ་དད་པའི་རྒྱལ་པོ་ལ་སོགས་མགུ་ནས་རང་ལ་རྙེད་བཀུར་དང་གྲགས་པ་འཕེལ་དུ་རེ་ནས་བྱེད་པའི་བསམ་པ་ཉོན་མོངས་པ་ཅན་དང་མ་འདྲེས་ཤིང་། མཐུན་པ་མ་ཡིན་པའི་དངོས་པོ་གཞན་ལས་ཕྲོགས་པ་ལ་སོགས་པའམ། སྡིག་པའི་གཡོས་ཆེན་པོས་བསྒྲུབས་པ་མ་ཡིན་པ་དང་། ཁྱད་པར་དུ་རྒྱལ་བ་མཉེས་པའི་མཆོད་པ་ཚད་མེད་བཞི་དང་། སྡོམ་པ་གསུམ་དང་། དཀོན་མཆོག་གསུམ་དང་། ཕ་རོལ་ཏུ་ཕྱིན་པ་དྲུག་དང་། ཟབ་མོ་སྟོང་པ་ཉིད་ཀྱི་དོན་རྗེས་སུ་དྲན་པ་དང་། ཤེས་རབ་གསུམ་དང་། བསྡུ་བའི་དངོས་པོ་བཞི་ལ་སོགས་པས་དགེ་བའི་ཆོས་ཡོངས་སུ་སྡུད་པ་ནི། སྒྲུབ་པའི་མཆོད་པ་ཚད་མེད་པ་ཞེས་བྱ་སྟེ་ཡོངས་སུ་རྫོགས་པའི་མཆོད་པ་ཆེན་པོ་ཡིན་ནོ། །དེ་ལྟར་མཆོད་པའི་ཚེ་བྱང་ས་ལས་བཤད་པའི་འབྲས་བུ་དཔག་ཏུ་མེད་པ་འབྱུང་བའི་བསམ་པ་དྲུག་བསྐྱེད་པར་བྱ་སྟེ། དཀོན་མཆོག་ནི་ཡོན་ཏན་གྱི་ཞིང་གོང་ན་མེད་པའོ་སྙམ་པ་དང་། ཨུ་དུམ་ཝཱ་རའི་མེ་ཏོག་ལྟར་ཤིན་ཏུ་དཀོན་པའོ་སྙམ་པ་དང་། སེམས་ཅན་ཐམས་ཅད་ཀྱི་མཆོག་གོ་སྙམ་པ་དང་། ཕན་འདོགས་པ་གོང་ན་མེད་དོ་སྙམ་པ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་ན་གཅིག་ཁོ་ན་འབྱུང་བས་འབའ་ཞིག་པའོ་སྙམ་པ་དང་། འཇིག་རྟེན་འཇིག་རྟེན་ལས་འདས་པའི་ཕུན་ཚོགས་ཐམས་ཅད་ཀྱི་གཞི་ཡིན་ནོ་སྙམ་ནས་མཆོད་པའོ། །དེ་སྐད་དུ་མདོ་ལས། དད་པའི་ཞིང་ས་ལ་བསོད་ནམས་ཀྱི་ཞིང་རྨོད་པར་གྱུར་ཅིག །ཅེས་གསུངས་པ་ལྟར་འདི་ཕྱིའི་བདེ་ལེགས་ཐམས་ཅད་ཀྱི་ཞིང་ས་བླ་ན་མེད་པ་དང་ཕྲད་དུས་དགེ་ཚོགས་རིན་པོ་ཆེའི་ས་བོན་མི་འདེབས་ཤིང་བདེ་སྐྱིད་ཐམས་ཅད་དཀོན་མཆོག་གི་བཀའ་དྲིན་ལས་བྱུང་བའི་བྱས་པ་གཟོ་མི་ཤེས་པ་དེ་ནི་བྱིས་པ་ཐ་ཤལ་གྱི་སྤྱོད་པ་ཡིན་ཏེ། ཏིང་ངེ་འཛིན་རྒྱལ་པོ་ལས། སངས་རྒྱས་བསོད་ནམས་མཐུ་ཡིས་ཟས་རྙེད་ཀྱང་། །དེ་ལ་བྱིས་པ་བྱས་པ་གཟོ་མི་འགྱུར། །ཞེས་སོ། །དེའི་ཕྱིར་རྣམ་པ་ཐམས་ཅད་དུ་བཟའ་བཏུང་གི་ཕུད་ནས་ཀྱང་དཀོན་མཆོག་མཆོད་ཅིང་། ཆུ་ཀླུང་ངམ། ལྟེང་ཀ་དང་ཕྲད་ཀྱང་མཆོད་ཡོན་དབུལ་བ་ལ་སྙིང་ཐག་པ་ནས་བརྩོན་པར་བྱ་སྟེ། མུ་གེའི་མཐུས་རྒྱལ་པོའི་བང་མཛོད་སྟོངས་པར་གྱུར་པ་ན་བྲེ་གང་ལུས་པ་དེ་ཡང་རང་སངས་རྒྱས་ལ་བྱིན་པས་ལོངས་སྤྱོད་ཀྱི་ཆར་བབས་པ་རྒྱལ་པོ་གསེར་མདོག་ཅན་དུ་སྐྱེས་པའི་རབས་བཞིན་ནོ། །དེ་ལྟར་མཆོད་ཅིང་རྗེས་སུ་དྲན་པར་བྱས་ནས་ཉིན་མཚན་འཁོར་མོའམ། དུས་དྲུག་གམ། དུས་གསུམ་མམ། ཐ་ནའང་ཉིན་མཚན་གྱི་ཆ་རེར་ལན་གཅིག་རེ་དྲན་པས་སྐྱབས་སུ་འགྲོ་བར་བྱ་སྟེ། བློ་ནི་གང་གོམས་པ་དེའི་རྗེས་སུ་འཇུག་པ་ཆོས་ཉིད་ཡིན་ཕྱིར་ཉམས་ལེན་གཞན་མེད་ཀྱང་འཆི་བའི་ཚེ་སངས་རྒྱས་རྗེས་སུ་དྲན་པར་འགྱུར་ལ། དེ་ལྟར་དྲན་ནས་སྐྱབས་སུ་སོང་ན་དོན་ཆེན་པོ་དང་ལྡན་པ་ཡིན་ཏེ། ཏིང་ངེ་འཛིན་རྒྱལ་པོ་ལས། ལུས་དང་ངག་དང་ཡིད་རབ་དང་བ་ཡིས། །རྟག་ཏུ་སངས་རྒྱས་དག་གི་བསྔགས་པ་བརྗོད། །དེ་ལྟར་དེས་ནི་སེམས་ཀྱི་རྒྱུད་བསྒོམས་པས། །ཉིན་མཚན་དུ་ཡང་འཇིག་རྟེན་མགོན་པོ་མཐོང་། །ནམ་ཞིག་དེ་ནི་ན་ཞིང་མི་བདེ་ནས། །ཤི་ལ་ཐུག་པའི་སྡུག་བསྔལ་ཚོར་བྱུང་ན། །སངས་རྒྱས་ལ་ནི་དྲན་པ་མི་ཉམས་ཏེ། །སྡུག་བསྔལ་ཚོར་བས་འཕྲོག་པར་ཡོངས་མི་འགྱུར། །ཞེས་གསུངས་ཏེ། དཔེར་ན་ལྷས་བྱིན་དམྱལ་མེའི་ཚོར་བས་ཡོངས་སུ་གདུངས་པའི་ཚེ་སངས་རྒྱས་ལ་སྙིང་ཁོང་རུས་པའི་གཏིང་ནས་སྐྱབས་སུ་མཆིའོ་ཞེས་སྨྲས་པས། དེའི་མཐུས་རང་སངས་རྒྱས་རུས་པ་ཅན་ཞེས་བྱ་བར་འཚང་རྒྱ་བར་ལུང་བསྟན་པ་བཞིན་ནོ། །དེ་ལྟ་བུའི་སྐྱབས་སུ་འགྲོ་ཚུལ་ལ་ནི་བསྡུ་བ་ནས་གསུངས་པའི་ཡོན་ཏན་ཤེས་པ་དང་། ཁྱད་པར་ཤེས་པ་དང་། ཁས་བླངས་པ་དང་། གཞན་དུ་མི་སྨྲ་བས་སྐྱབས་སུ་སོང་བའི་མཚན་ཉིད་བཞི་ག་ཚང་ཞིང་གཞན་ཡང་དེ་ཉིད་ལས། སྐྱེས་བུ་དམ་པ་ལ་བསྟེན་པ་དང་། དམ་པའི་ཆོས་ཉན་པ་དང་། དགེ་འདུན་དང་རྗེས་སུ་མཐུན་པར་བསྒྲུབ་པའི་སྐྱབས་སུ་འགྲོ་བའོ། །ཞེས་བཤད་པ་ལྟར་དཀོན་མཆོག་གི་རང་བཞིན་སྐྱེས་བུ་དམ་པ་ལ་བསྟེན་ནས་དེའི་མཛད་སྤྱོད་ལ་བསླབ་ཅིང་ཡོན་ཏན་བརྗོད། ཟབ་ཅིང་རྒྱ་ཆེ་བའི་ཆོས་མཐའ་དག་ཉེན་ནས་རྒྱུ་དང་འབྲས་བུའི་དཀོན་མཆོག་གི་ཡོན་ཏན་རྗེས་སུ་བསྒྲུབ། སྤྱོད་པ་བག་ཡོད་པ་འདུལ་བ། བསྒོམ་པ་བསམ་གཏན་པ་མདོ་སྡེ། ལྟ་བ་ལྐོག་ཏུ་མ་གྱུར་པ་མངོན་པ་དང་མཐུན་པར་ཉམས་སུ་ལེན་པ་ནི་ལམ་རྗེས་སུ་བསྒྲུབ་པའི་སྐྱབས་འགྲོ་ཡང་དག་པའོ། །འབྲས་བུའི་བསླབ་བྱ་ཐུབ་པ་ཆོས་ཀྱི་སྐུ། །བྲལ་ཐོབ་སྤངས་པའི་དབྱིངས་ལ་བྱང་ཆུབ་པས། །སྐྱོབ་དང་བསྐྱབ་བྱར་མི་འཛིན་ཐ་སྙད་ལས། །འདས་ཕྱིར་གཏོང་རྒྱུའང་བཏགས་པ་བླ་དྭགས་ཡིན། །དེ་ལ་སེམས་དོན་གྱི་ངོ་བོ་མེ་ལོང་ལྟ་བུ་རང་སྟོབས་ཀྱིས་རིག་ནས་དཀོན་མཆོག་གི་རང་བཞིན་རྒྱུད་གཞན་གྱིས་བསྡུས་པ་མ་ཡིན་པའི་དོན་རྟོགས་པ་ནི་འབྲས་བུའི་སྐྱབས་འགྲོ་དང་། སེམས་བྱུང་དོན་གྱི་ཁྱད་པར་དེ་ལ་གཟུགས་བརྙན་སྣ་ཚོགས་སུ་འཆར་བའི་རང་བཞིན་ཤེས་པ་ལྟ་བུ་ནི་རྒྱུའི་སྐྱབས་འགྲོ་སྟེ། དབུས་མཐའ་ལས། དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང་། །ཞེས་པ་ལྟར་སེམས་དང་སེམས་བྱུང་ཉི་མ་དང་འོད་ཟེར་བཞིན་དུ་མཚུངས་པར་འཇུག་པའི་རྩལ་སྣང་དབྱིངས་ལ་ཐིམ་སྟེ་སྤྲོས་པ་ཉེ་བར་ཞི་བའི་ཚེ་སྐྱོབ་བྱེད་དཀོན་མཆོག་དང་། བསྐྱབ་བྱ་བདག་ཏུ་ལྟ་བ་གཉིས་ཀ་མེད་པས་ཆོ་གས་བླངས་པའི་བསླབ་བྱ་གཏོང་མཚམས་ཀྱང་ཐ་སྙད་ཀྱིས་གདགས་པའི་ཚིགས་བླ་དྭགས་ཙམ་དུ་ཟད་པར་འགྱུར་རོ། །གནད་འདི་མ་གོ་ན་དོན་དམ་པའི་སྐྱབས་འགྲོའི་ཕྱོགས་ཙམ་ཡང་རིག་པར་མི་ནུས་པས་ཐ་ཆད་པའི་སྐྱབས་འགྲོ་ལ་གནས་ལུགས་རྡོ་རྗེའི་སྐྱབས་འགྲོར་འདོད་པ་ཤིན་ཏུའང་གཏི་མུག་ཅན་ནོ། །དེ་ལས་ལམ་གྱི་གནས་སྐབས། རྒྱུ་ཡི་གཏོང་མཚམས་སྐྱབས་འགྲོ་མཚན་ཉིད་པ། །འགྲོ་བའི་ཡུལ་ལ་ལོག་ལྟ་སྐྱེས་པས་གཏོང་། །བསླབ་པ་ཉམས་ན་དམན་པར་ལྟུང་བའི་ཕྱིར། །རྨ་ཡི་བག་བཞིན་བསྒྲིམས་ཏེ་བསྲུང་བར་བྱ། །དེ་ལ་ཁ་ཅིག་མདོ་ནས་བཤད་པའི་བསླབ་བྱ་དང་པོ་གསུམ་གྱི་སྟེང་། རྒྱུན་ཆགས་པའི་སྐྱབས་འགྲོ་དང་། སྲོག་གི་ཕྱིར་ཡང་མི་གཏོང་བ་དང་། དཀོན་མཆོག་མཆོད་པ་སྟེ་དྲུག་པོ་དང་འགལ་ན་གཏོང་བར་འདོད་པ་དང་། ལ་ལ་དེའི་སྟེང་དུ་སྐུ་གཟུགས་ལ་སོགས་པའི་གཟུགས་བརྙན་གྱི་སྤྲུལ་པ་གསུམ་ལ་བརྙས་པ་ལ་སོགས་བསྣན་ཏེ་དགུ་པོ་ཚང་ན་གཏོང་བར་འདོད་ཀྱང་། སྐྱབས་སུ་འགྲོ་བའི་ཡུལ་ལ་ལོག་ལྟ་སྐྱེས་ཏེ་དཀོན་མཆོག་གསུམ་སྤངས་པ་དང་། བསྒྲུབ་པར་མ་ནུས་ནས་སྐྱབས་འགྲོའི་བསླབ་པ་ཕུལ་བ་ནི་གཏོང་བའི་རྒྱུ་མཚན་ཉིད་པ་ཡིན་ལ། གལ་ཏེ་དཀོན་མཆོག་མ་བཏང་ཡང་དེའི་ལྡོག་ཕྱོགས་ཀྱི་སྟོན་པ་ལ་སོགས་པ་གཞན་ལའང་གཉིས་འཛིན་བྱེད་ན་ཕྱི་ནང་གི་སྟོན་པ་དང་བསྟན་པའི་མཆོག་དམན་ད་དུང་ཚུལ་བཞིན་མ་ཤེས་ནས་དཀོན་མཆོག་ལ་བློ་མ་ཁེལ་བའི་རྟགས་ཡིན་པས་གཞི་བསྡུ་བ་ནས་གཞན་དུ་མི་སྨྲ་བས་སྐྱབས་སུ་སོང་བ་ཞེས་པའི་རྣམ་བཞག་དང་འགལ་བས་གཏོང་བ་ལ་ཕྱོགས་ཉེ་བའོ། །སློབ་དཔོན་མཐོ་བཙུན་གྱིས། བདག་ནི་སྟོན་པ་གཞན་སྤངས་ནས། །ཞེས་སྔར་དྲངས་པའི་སྟོན་པའི་ཁྱད་པར་དང་། བསྔགས་འོས་བསྟོད་པ་ལས། འཇུག་དང་ལྡོག་པ་གང་ལགས་དང་། །ཀུན་ནས་ཉོན་མོངས་རྣམ་བྱང་གང་། །དེ་ཉིད་དཔའ་བོ་ཁྱེད་བཀའ་དང་། །གཞན་གྱི་ཚིག་གི་ཁྱད་པར་ལགས། །འདི་ནི་གཅིག་པུ་དེ་བཞིན་ཉིད། །དེ་ནི་བསླུ་ཆོས་འབའ་ཞིག་ན། །ཁྱེད་ཀྱི་བཀའ་དང་གཞན་གྱི་ཚིག །དེ་ལས་ཁྱད་ཞུགས་གཞན་ཅི་འཚལ། །ཞེས་བསྟན་པའི་ཁྱད་པར་བླ་འོག་འཛོལ་བ་ལྟ་བུར་དབྱེ་བ་ལེགས་པར་བརྟག་གོ །དེ་ལས་གཞན་པ་འཇིག་རྟེན་པའི་ལྷ་ཆེན་པོ་དང་། ཡི་དྭགས་མཐུ་བོ་ཆེ་ལ་སྐྱབས་སུ་འཛིན་པ་ལ་སོགས་ཏེ། བསླབ་བྱ་གཞན་ལས་ཉམས་པ་དག་ནི་དམན་པར་ཕྱོགས་པ་ཞེས་བྱ་བ་ཉིད་དོ་ཞེས་སྟོན་པའི་ཕྱིར། ལས་ཀྱི་ཅེ་སྤྱང་གདུག་པས་སྐབས་བཙལ་རྣམས། །ཚིག་དོན་འཛོལ་བའི་ཡིད་གཉིས་སྣོད་ངན་དུ། །བསླུ་བ་མེད་པའི་ངེས་ཤེས་བྲི་བའི་རྟགས། །ཡི་དྭགས་ལ་བརྟེན་ཚེ་འདི་ཉིད་ལ་ཉམས། །ཞེས་སྨོས་ཏེ། བོད་འདིར་ཁ་སྐད་ཙམ་དུ་དཀོན་མཆོག་གི་མཚན་འདོད་རྒྱལ་དུ་སྒྲོག་པ་ལས། དོན་ལ་དཀོན་མཆོག་གི་ཡོན་ཏན་བློར་མི་ཆུད། སྙིང་ཐག་པ་ནས་བློ་ཁེལ་བའི་གཏན་ཚིགས་གཅིག་ཀྱང་མེད་པས་ཚོགས་གསོག་གྲགས་པའི་རྗེས་སུ་འབྲང་། གཞན་ཡང་མདོ་སྡེ་དྲན་པ་ཉེར་གཞག་ནས་ཇི་ལྟར་བསྟན་པའི་ལས་དང་ལས་ཀྱི་འབྲས་བུས་འཕངས་པའི་ཡི་དྭགས་མཐུ་བོ་ཆེ་དག་གིས་བདག་ཉིད་དཀོན་མཆོག་ཡིན་པར་ཁས་འཆེས་པས་རྨོངས་པ་ཐོས་པ་ཉུང་ཞིང་ཞེན་པའི་འཆིང་བ་ཅན་དག་དང་། ཤེས་རབ་འཆལ་བར་གྱུར་པ་དག་གིས་འགྲོ་བ་དྲུག་ཏུ་མི་གཏོགས་པའི་འཇིག་རྟེན་བདུན་པའམ། གཤིན་རྗེའི་འཇིག་རྟེན་དུ་ཉིང་མཚམས་སྦྱོར་པའང་དག་པའི་ཞིང་ཁམས་སུ་ཁུངས་ཕྱུང་བས་དེར་སྲིད་པ་ཕྱི་མའི་འཕེན་པ་གཏོང་བ་དང་། ཁྱིམ་པ་དང་ཁྱིམ་པའི་བསམ་པ་ཅན་ཀུན་དཀོན་མཆོག་ལས་ཡི་དྭགས་ལ་ཆེ་ཐང་དུ་འཛིན་པ་ནི་མ་རིག་པའི་ཉེར་ལེན་ལྡོག་པར་དཀའ་བས་བསོད་ནམས་ལ་བསྒྲིབས་པ་སྟེ། དཀོན་མཆོག་ཏ་ལའི་མདོ་ལས། ཇི་ལྟར་དམུས་ལོང་ཉི་མ་མི་མཐོང་ཡང་། །དེ་མེད་མ་ཡིན་འཇིག་རྟེན་ཀུན་ལ་འཆར། །མིག་དང་ལྡན་པས་སྣང་བར་ཤེས་གྱུར་ནས། །ཀུན་ཀྱང་སོ་སོ་རང་གི་ལས་ལ་འཇུག །ཅེས་སོ། །རྒྱུ་དེ་དག་ལས་བསླབ་བྱ་ཉམས་ཤིང་དམན་པར་ལྟུང་བའི་ཉེས་པ་ནི། བཙུན་པོ་ཆོ་རིགས་ལད་པ་ལྟར་དཀོན་མཆོག་གི་སྐྱབས་འོག་ནས་ཡར་བ་དང་། རི་དྭགས་ལ་རྨ་སྲོལ་བཏོད་པ་ལྟར་འཚོ་བས་མྱུར་དུ་བརྫི་བ་དང་། གྲུ་པ་མཉན་པས་བསླུས་པ་ལྟར་ཕ་རོལ་དུ་འགྲོ་བའི་ངེས་པ་མེད་པ་དང་། མཚོ་ལ་ཁ་བ་བབས་པ་ལྟར་སྡོམ་པའི་རྟེན་གཞི་མི་གནས་པ་དང་། དགེ་བའི་རྟེན་གཞི་ཉམས་པས་ཕྱི་མ་ངན་སོང་དུ་འགྲོ་བ་ལ་སོགས་ཉེས་པ་དུ་མ་ཡོད་དོ། །དེའི་ཕྱིར་གལ་ཏེ་ཉམས་ན་དེའི་ཉེས་དམིགས་ལ་འཇིགས་པར་བལྟས་ཏེ་འགྱོད་པ་ཆེན་པོས་བཤགས་ཤིང་ཕྱིན་ཆད་སྡོམ་སེམས་ཀྱིས་བླངས་ན་སོར་ཆུད་པར་འགྱུར་ཏེ། སྤོང་སེམས་ཀྱི་དགེ་བ་སྐྱེས་པ་དེ་དེའི་གཉེན་པོ་ཡིན་པས་སོ། །འདི་ན་ས་དང་ནམ་མཁའ་རི་རབ་རྣམས། །ཡན་མན་གནས་འགྱུར་ཉི་ཟླ་ཐང་ལྷུང་སྲིད། །དཀོན་མཆོག་གསུམ་གྱིས་བསླུ་བར་མི་སྲིད་པའི། །ངེས་ཤེས་བརྟན་པ་ཀུན་དུ་དོན་ཡོད་ཡིན། །འདི་ལྟར་སྣོད་ཀྱི་འཇིག་རྟེན་འདི་ཞིག་པའི་ཚེ་ཐམས་ཅད་སྟོང་པར་འགྱུར་བས་ས་གཞི་དང་རི་རབ་ལ་སོགས་པའི་གནས་སུ་ནི་ནམ་མཁའ་འོང་ལ། ཡང་ཆགས་པའི་མགོ་བརྩམ་པ་ནས་རླུང་གི་དཀྱིལ་འཁོར་གྱིས་ནམ་མཁའི་གནས་སུ་ས་གཞི་བརྟེན་པས་གནས་ཤིན་ཏུ་འཆོལ་ཞིང་། གཟའ་སྐར་གྱི་རྟེན་གཞི་གོ་ལའི་རླུང་གི་འཁྲུལ་འཁོར་ཞིག་པས་ཉི་ཟླ་ཡང་སོ་ན་མི་གནས་པས་ཐང་ལ་ལྷུང་བའི་ཐ་སྙད་གྲུབ་ལ། དེ་བཞིན་གཤེགས་པའི་ཐུགས་རྗེ་དང་བདེན་པའི་གསུང་ལ་ནི་ནམ་ཡང་བསླུ་བ་དང་འགྱུར་བའི་གོ་སྐབས་སྲིད་པ་མ་ཡིན་པས་ཡིད་རྟོན་དུ་རུང་བ་གཅིག་ལས་གཉིས་པ་མེད་པ་ནི་དཀོན་མཆོག་ཁོ་ན་ཡིན་ཏེ་མདོ་ལས། ནམ་མཁའ་ས་གཞིར་འགྱུར་བའམ། །ས་གཞི་ནམ་མཁར་འགྱུར་ཡང་སྲིད། །དེ་བཞིན་གཤེགས་པས་གསུངས་པ་ལ། །ནམ་ཡང་འགྱུར་བ་མ་མཆིས་སོ། །རི་རབ་གནས་ནས་འཕོ་བའམ། །ཉི་ཟླ་ཐང་ལ་ལྷུང་ཡང་སྲིད། །དེ་བཞིན་གཤེགས་པས་གསུངས་བ་ལ། །གཞན་དུ་འགྱུར་བ་མ་མཆིས་སོ། །ཞེས་སོ། །དེ་ལྟར་སྦྱོར་དངོས་རྗེས་གསུམ་ཚང་བའི་སྐྱབས་འགྲོའི་ཕན་ཡོན་རྗེས་འབྲེལ་དང་བཅས་པའི་མཇུག་བསྡུ་བའི་ཕྱིར། རྨི་ལམ་ནའང་དཀོན་མཆོག་མཐོང་བ་དང་། །བག་ཡོད་དྲན་ཞིང་ཡོན་ཏན་ཀུན་གྱིས་འབྱོར། །ཚེ་རབས་དྲན་ཅིང་བར་དོ་བསྒྲོད་པ་སླ། །ལུས་ཅན་ཀུན་གྱི་དཔུང་དང་གཉེན་དུ་འགྱུར། །དེ་ལྟར་འདི་ཕྱི་བར་དོའི་གནས་སྐབས་ཐམས་ཅད་དུ་བདེ་ཞིང་ཕུན་སུམ་ཚོགས་པའི་ཡོན་ཏན་དེ་དག་ཀྱང་རང་སྒོ་ནས་བྱུང་བར་མི་བསམ་པར་དཀོན་མཆོག་འབའ་ཞིག་གི་ཐུགས་རྗེ་ལས་བྱུང་བར་ཤེས་དགོས་ཏེ། །ཅིའི་ཕྱིར་ན་རྣམ་པ་ཐམས་ཅད་དུ་སེམས་ཅན་ཁོ་ནའི་དོན་ལ་དགོངས་པའི་ཐུགས་རྗེའི་མཐུ་ཡིན་པའི་ཕྱིར་ཏེ་བདེན་པ་པོའི་ལེའུར། གཏི་མུག་མུན་པ་མུན་ནག་གིས་རྟག་ཏུ། །སེམས་ནི་བསྒྲིབས་པར་གྱུར་པའི་སྐྱེ་དགུ་དང་། །འཁོར་བའི་བཙོན་རར་ཆུད་པ་རྣམས་གཟིགས་ན། །དྲང་སྲོང་དམ་པ་དེ་ནི་ཐུགས་རྗེ་སྐྱེ། །ཞེས་དང་། ཐུབ་པའི་ཐུགས་རྗེ་ཆེན་པོ་རྟག་འབྱུང་སྟེ། །དེ་མི་འབྱུང་བ་ནམ་ཡང་སྲིད་མི་འགྱུར། །འགྲོ་བ་ཀུན་གྱི་བསམ་པར་གནས་པ་སྟེ། །དེ་བས་སངས་རྒྱས་དེ་ལ་སྐྱོན་མི་མངའ། །ཞེས་སོ། །དེ་ལྟ་མོད་ཀྱི་ཐོས་པ་ཉུང་བ་དག་དཀོན་མཆོག་གི་ཐུགས་རྗེས་རང་གི་ལས་ངན་སློངས་བ་མི་ཤེས་པར། སྐྱབས་འགྲོའི་རྒྱུ་འབྲས་ལ་ཐེ་ཚོམ་འཆའ་བ་སྲིད་དེ། སྤྱོད་འཇུག་ལས། གསོད་པའི་མི་གཅིག་ལག་བཅད་དེ། །གལ་ཏེ་ཐར་ན་ཅིས་མ་ལེགས། །མི་ཡི་སྡུག་བསྔལ་ཆུང་ངུ་ཡིས། །དམྱལ་བ་བྲལ་ན་ཅིས་མ་ལེགས། །ཞེས་པ་ལྟར། དཀོན་མཆོག་ལ་དད་པའི་མི་ལ་ནད་དང་སྡུག་བསྔལ་བྱུང་ན་ཚེ་ཕྱི་མ་ཕན་ཆོད་ཀྱི་ངན་སོང་གི་སྡུག་བསྔལ་མྱོང་རྒྱུ་ཟད་པའི་རྟགས་ཡིན་ཏེ། ཤེར་ཕྱིན་གཅོད་པ་ལས། རབ་འབྱོར་རིགས་ཀྱི་བུའམ་རིགས་ཀྱི་བུ་མོ་གང་དག་འདི་ལྟ་བུའི་མདོ་སྡེའི་ཚིག་འདི་དག་ལེན་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དེ་དག་མནར་བར་འགྱུར་ཏེ། དེ་ཅིའི་ཕྱིར་ཞེ་ན། རབ་འབྱོར་འདི་ལྟར་སེམས་ཅན་དེ་དག་གི་ཚེ་རབས་སྔ་མའི་མི་དགེ་བའི་ལས་ངན་སོང་དུ་སྐྱེ་བར་འགྱུར་བ་གང་དག་བྱས་པ་དག་ཚེ་འདི་ཉིད་ལ་མནར་བས་ཚེ་རབས་སྔ་མའི་མི་དགེ་བའི་ལས་དེ་དག་བྱང་བར་འགྱུར་ཏེ། སངས་རྒྱས་ཀྱི་བྱང་ཆུབ་ཀྱང་ཐོབ་པར་འགྱུར་རོ། །ཞེས་གསུངས་པ་ལྟར་རོ། །ཡང་འདི་ལྟར་དཀོན་མཆོག་ཡིད་ལ་མི་དྲན་ཞིང་། མཚམས་མེད་དང་། སྡེ་འཁྲུག་གི་ལས་དང་། སེམས་ཅན་ལ་གནོད་པ་སྣ་ཚོགས་བྱེད་པས་མཚོན་སྡིག་པ་འབའ་ཞིག་བྱེད་པ་དག་ཚེ་འདི་ལ་ལོངས་སྤྱོད་སོགས་ཇེ་ཆེར་འཕེལ་བ་ཡོད་དེ། སྐྱེ་བ་སྔ་མར་ཐབས་ཀྱིས་མ་ཟིན་པའི་དགེ་བ་བག་རེ་བྱས་པའི་འབྲས་བུ་ལྷག་མ་མེད་པར་ཟད་ནས་ཤི་མ་ཐག་ངན་སོང་ཆེན་པོར་འགྲོ་བའི་ལྟས་ཡིན་ཏེ། སྔོན་ཉི་འོག་གི་ཡུལ་སྡིག་ཅན་ཚན་གཅིག་གི་འཇིག་རྟེན་དུ། དང་པོ་ཞག་བདུན་དུ་ནས་ཀྱི་ཆར་བབ། དེ་ནས་འབྲས་ཀྱི་ཆར་བབ། དེ་ནས་རིན་པོ་ཆེའི་ཆར་བབ། དེ་ནས་བྱེ་ཚན་གྱི་ཆར་བབ་ནས་ཐམས་ཅད་ཚིག །དེ་ནས་རི་ཐམས་ཅད་ཐུག་ཆོམ་དུ་འུར་ནས་དུས་གཅིག་ཏུ་བརླག་པར་བྱས་པ་བཞིན་ནོ། །སྤྱིར་སྡིག་ཅན་ལ་རྒྱུ་མེད་པར་ཚེ་མཇུག་ཏུ་མི་འདོད་པ་བྱུང་བ་ནི། སྔོན་གྱི་དགེ་བའི་འབྲས་བུས་བདེ་འགྲོའི་ལུས་རྟེན་དེའི་ཚེ་མཐའ་ཡང་མ་འཁྱོངས་པས་ཕྱི་མ་ངན་སོང་དུ་འགྲོ་བའི་སྔོན་བསུ་ཡིན་ཏེ་ཁྱི་ར་བ་དང་རྔོན་པའི་ལས་ཐབས་བྱེད་པ་རྣམས་ལ་འཆི་ཁར་བསྡུས་འཇོམས་ཀྱི་སྣང་བ་ཤར་བ་མཐོང་ཆོས་སུ་གྱུར་པ་ཡོད་དོ། །དགེ་བ་ཅན་ལ་དེ་ལྟར་བྱུང་ན་ལས་ཟད་པའི་རྟགས་ཡིན་ཏེ་གནད་འཆད་པའི་ཚུལ་གྱིས་ཀྱང་གསལ་བར་ཤེས་སོ། །དེའི་ཕྱིར་རྒྱུ་འབྲས་ལ་ཡིད་ཆེས་ཤིང་དཀོན་མཆོག་ལ་སྙིང་ཐག་པ་ནས་དད་པའི་གང་ཟག་དེ་ནི་མིའི་ལུས་རྟེན་རྙེད་པ་ཆེན་པོ་དང་ལྡན་པ་ཡིན་ནོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། སྐྱབས་སུ་འགྲོ་བའི་ཚོམས་ཏེ་རབ་བྱེད་དྲུག་པའི་འགྲེལ་པའོ།། །།