དགེ་བའི་རྩ་བ་བྱང་ཆུབ་ཏུ་བསྔོ་བའི་གཏམ་བསོད་ནམས་སྤྲིན་གྱི་རྒྱུད་མང་།

🚧 This website is under continued development. We appreciate your patience!

First text in section. Back to Volume PageNext Text

Wylie title	dge ba'i rtsa ba byang chub tu bsngo ba'i gtam bsod nams sprin gyi rgyud mang
Location	mkhyen brtse'i bka' 'bum Volume 24, sde tshan 3, Text 1, Pages 201-212 (Folios 1a to 6b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dge ba'i rtsa ba byang chub tu bsngo ba'i gtam bsod nams sprin gyi rgyud mang. In 'jam dbyangs mkhyen brtse'i dbang po'i bka' 'bum, Vol. 24: 201-212. Khams sde dge rdzong sar dgon: Rdzong sar blo gros phun tshogs, 2020.
Genre	Dedications - bsngo ba
Colophon	།ཅེས་པའང་མཁན་ཆེན་ཐམས་ཅད་མཁྱེན་པའི་བཀའ་ཡི་ཅོད་པན་སྤྱི་བོར་སྩལ་བ་ལས་རྟེན་ནས། ཤཱཀྱའི་དགེ་སློང་མཁྱེན་བརྩེའི་དབང་པོས་རང་ལོ་ཉེར་གསུམ་པར་དམ་པ་སྔ་མ་རྣམས་ཀྱི་གསུང་རབ་ལས་ཤིན་ཏུ་བསྡུས་ཤིང་བརྗོད་བདེ་བའི་ཚུལ་གྱིས་དཔལ་ཨེ་ཝྃ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བའོ། །སརྦ་དཱ་ཀ་ལྱཱ་ཎཾ་བྷ་བ་ཏུ།།
	ces pa'ang mkhan chen thams cad mkhyen pa'i bka' yi cod pan spyi bor stsal ba las rten nas/__shAkya'i dge slong mkhyen brtse'i dbang pos rang lo nyer gsum par dam pa snga ma rnams kyi gsung rab las shin tu bsdus shing brjod bde ba'i tshul gyis dpal e wa~M chos ldan gyi bla brang thar pa rtser sbyar ba'o/__/sarba dA ka l+yA NaM b+ha ba tu//

1 Texts in this Section (sde tshan or chos tshan)

1 201-212	དགེ་བའི་རྩ་བ་བྱང་ཆུབ་ཏུ་བསྔོ་བའི་གཏམ་བསོད་ནམས་སྤྲིན་གྱི་རྒྱུད་མང་། dge ba'i rtsa ba byang chub tu bsngo ba'i gtam bsod nams sprin gyi rgyud mang Dedications - bsngo ba	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །དགེ་བའི་རྩ་བ་བྱང་ཆུབ་ཏུ་བསྔོ་བའི་གཏམ། བསོད་ནམས་སྤྲིན་གྱི་རྒྱུད་མང་ཞེས་བྱ་བ་བཞུགས་སོ། ། སྲིད་དང་ཞི་བའི་ལེགས་བྱས་ཇི་སྙེད་ཀུན། །སེམས་ཅན་རྣམས་ལ་ཡོངས་སུ་བསྔོ་བའི་གཏམ། །གཞན་ལས་ཁྱད་པར་འཕགས་པའི་སེང་གེའི་སྒྲས། །སྟོན་མཛད་ཟས་གཙང་སྲས་ཀྱིས་དགེ་ལེགས་སྩོལ། །གང་དེའི་རྣམ་པར་བཞག་པ་ལས་བརྩམས་པའི། །གླེང་བ་བསོད་ནམས་སྤྲིན་གྱི་ཏམྦུ་རས། །དཔྱོད་ལྡན་མདོངས་མཐའི་སྙིང་དང་རྣ་བ་ལ། །བདུད་རྩིའི་དགའ་སྟོན་གསར་པ་བསྒྲུབ་པར་བྱ། །དེ་ལ་འདིར་རང་གཞན་གྱི་དགེ་ཚོགས་ཡོངས་སུ་བསྔོ་བས་རྒྱས་འདེབས་པའི་ཐོག་མར་འདི་སྐད་ཅེས་གླེང་བར་བྱ་སྟེ། དེ་ལ་འདིར་རང་རེ་རྣམས་ཀྱི་སྟོན་པ་བླ་ན་མ་མཆིས་པ་ཡང་དག་པར་རྫོགས་པའི་སངས་རྒྱས་ཉི་མའི་གཉེན་གྱིས་ལེགས་པར་གསུངས་པའི་བསྟན་པ་རིན་པོ་ཆེའི་བཤད་སྒྲུབ་དྲི་མ་མེད་པར་གནས་ཤིང་། བསྟན་འཛིན་གྱི་སྐྱེས་བུ་དམ་པ་རྣམས་འཚོ་ཞིང་གཞེས་ལ་ཆོས་ཀྱང་སྟོན་པའི་དུས་ཕུན་སུམ་ཚོགས་པའི་སྐབས་འདིར། མཚུངས་མེད་འདིར་སྦྱིན་བདག་གི་ཆེ་བ་བརྗོད་དགོས་ན་སྐབས་སུ་གང་འོས་སྦྲེལ། མཆན། བསྟན་པའི་སྦྱིན་བདག་ཆེན་པོ་གང་ནས། བསམ་པ་དང་སྦྱོར་བ་གཉིས་ཀ་རྣམ་པར་དག་པས་ཁོ་བོ་ཅག་ལ་ཡུལ་དམ་པར་བཟུང་ནས་བསྙེན་བཀུར་བླ་ན་མེད་པ་བསྐྲུན་པ་ལ། རྒྱུ་སྦྱོར་བ། བྱ་བ་བྱེད་པ། ལག་ཏུ་ལེན་པ། སྒོ་གསུམ་གྱི་འབྲེལ་ཐོགས་དང་བཅས་པའི་རྒྱུད་ལ་དགེ་ཚོགས་ཇི་སྙེད་ཅིག་འཕེལ་བ་རྣམས་བར་མ་དོར་ཆུད་མི་ཟ་བ་དང་། གོང་ནས་གོང་དུ་འཕེལ་བའི་ཕྱིར་ཡོངས་སུ་བསྔོ་བས་རྒྱས་གདབ་པ་ནི་ནང་པ་སངས་རྒྱས་པའི་ཁྱད་པར་འཕགས་པའི་ཆོས་གཅིག་ཡིན་ཏེ། སློབ་དཔོན་མཐོ་བཙུན་གྲུབ་རྗེས། བསོད་ནམས་བྱས་པའི་དངོས་པོ་ནི། །སེམས་ཅན་རྣམས་ལ་ཡོངས་བསྔོ་བ། །བཅོམ་ལྡན་འདས་ཀྱིས་གང་གསུངས་པ། །དེ་གཞན་བསྟན་བཅོས་ལས་མ་བཤད། །ཅེས་གསུངས་པའི་ཕྱིར་རོ། །དེས་ན་དེ་ལྟ་བུའི་རྣམ་པར་བཞག་པ་མདོ་དང་བསྟན་བཅོས་རྣམས་ལས་རྒྱ་ཆེར་འབྱུང་བའི་དོན་སྙིང་པོར་དྲིལ་ཏེ་ཅུང་ཟད་ཅིག་སྙན་དུ་གསོལ་ན་གསུམ། མཚན་ཉིད། སྒྲ་དོན། དབྱེ་བའོ། །དང་པོ་མཚན་ཉིད་ནི། མངོན་པར་འདུ་བྱས་པའི་དགེ་བའི་རྩ་བ་གང་ཞིག་བླ་ན་མེད་པའི་བྱང་ཆུབ་ཀྱི་རྒྱུར་ཡོངས་སུ་བསྒྱུར་བའི་ཐབས་ཁྱད་པར་ཅན་གང་ཡིན་པ་སྟེ། མགོན་པོ་བྱམས་པས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ཏེ། །ཞེས་གསུངས་པའི་ཕྱིར། གཉིས་པ་སྒྲ་དོན་ནི། ལེགས་སྦྱར་གྱི་སྐད་དུ་པ་རི་ཎཱ་མ་ཞེས་པའི་སྒྲ་ལས་དྲངས་ན། ཡོངས་སུ་བསྒྱུར་བའམ། སྤེལ་བ་ལ་འཇུག་སྟེ། དགེ་བའི་རྩ་བ་བྱང་ཆུབ་ཀྱི་རྒྱུར་ཡོངས་སུ་བསྒྱུར་བ་དང་། དེ་མ་ཐོབ་ཀྱི་བར་དུ་གོང་ནས་གོང་དུ་སྤེལ་བའི་ཕྱིར་དེ་སྐད་དོ། །གསུམ་པ་དབྱེ་བ་ལྔ་ལ། གང་ཞིག་བསྔོ་བའི་དགེ་བ། གང་དུ་བསྔོ་བའི་ཡུལ། ཇི་ལྟར་བསྔོ་བའི་ཚུལ། དེ་ལྟར་བསྔོས་པའི་ཕན་ཡོན། སྐབས་སུ་བབས་པའི་བསྔོ་བ་དངོས་སོ། །དང་པོ་གང་ཞིག་བསྔོ་བའི་དགེ་བ་ནི། སྤྱིར་དགེ་བའི་མིང་གིས་སྨོས་པ་ཐམས་ཅད་བསྔོ་བས་བསྒྱུར་དུ་རུང་ངམ་སྙམ་ན་མ་ཡིན་ཏེ། མངོན་པའི་གཞུང་རྣམས་ལས། དེ་བཞིན་ཉིད་ལའང་དགེ་བའི་མིང་གིས་སྨོས་པ་ཡོད་མོད། དེ་ནི་དགོས་དབང་གིས་བཏགས་པ་ཙམ་མ་གཏོགས་དགེ་བའི་མཚན་ཉིད་པ་མ་ཡིན་པས་བསྔོ་བྱར་མི་རུང་སྟེ། བསྔོས་ཀྱང་འགྱུར་བ་མེད་པའི་ཕྱིར་རོ། །དེས་ན་བསྔོ་རྒྱུའི་དགེ་རྩ་ནི། འཕགས་པ་ཀླུ་སྒྲུབ་ཀྱིས། མ་ཆགས་ཞེ་སྡང་གཏི་མུག་མེད། །དེས་བསྐྱེད་ལས་ནི་དགེ་བའོ། །ཞེས་གསུངས་པ་ལྟར། རྒྱུ་མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པའི་སེམས་ཀྱིས་ཀུན་ནས་བསླངས་ཤིང་བསྐྱེད་པའི་ལས་གང་ཞིག །འབྲས་བུ་བདེ་བ་བསྐྱེད་པ་སྟེ། དེ་ལའང་བསོད་ནམས་བྱ་བའི་སྒོ་ནས་དབྱེ་ན། སྦྱིན་པ་དང་། ཚུལ་ཁྲིམས་དང་། བསྒོམ་པ་ལས་བྱུང་བའི་བསོད་ནམས་བྱ་བའི་དངོས་པོ་སྟེ་གསུམ་དུ་འགྱུར་བ་ལས། འདིར་སྐབས་སུ་བབ་པའི་དགེ་བའི་རྩ་བ་འདི་ནི་གཙོ་བོར་འཇིག་རྟེན་དང་འཇིག་རྟེན་ལས་འདས་པའི་དབུལ་བ་འདོར་བར་བྱེད་པ། ཟང་ཟིང་དང་། མི་འཇིགས་པ་དང་། ཆོས་དང་། བྱམས་པའི་སྦྱིན་པ་བཞིས་བསྡུས་ཤིང་། ཁྱད་པར་དུ་བསམ་པ་རྣམ་པར་དག་པ་དང་ལྡན་པའི་གཏོང་བ་པོ་དམ་པས། ཚུལ་ཁྲིམས་སོགས་ཉམས་པ་མེད་པའི་ལེན་པ་པོ་དམ་པ་ལ། གཞན་ལས་བརྐུས་པ་དང་འཕྲོག་པ་ལ་སོགས་པ་མ་ཡིན་པའི་ལོངས་སྤྱོད་དམ་པས་བསྙེན་བཀུར་བགྱིས་པ་ལས་བྱུང་བའི་བསོད་ནམས་ཀྱི་དངོས་པོ་གང་ཡིན་པ་དང་། དེ་ཙམ་དུའང་མ་ཟད་དུས་གསུམ་དུ་རང་ཉིད་ཀྱིས་བསགས་པ་དང་། གཞན་ལ་བསག་ཏུ་བཅུག་པ་དང་། ཕྱོགས་བཅུའི་འཇིག་རྟེན་གྱི་ཁམས་ན་སེམས་ཅན་གང་སུ་ཡང་རུང་བས་མ་མངོན་པར་འདུ་བྱས་པའི་དགེ་བའི་རྩ་བ་ཇི་སྙེད་ཅིག་ཡོད་པ་རྣམས་ཏེ། ཕལ་པོ་ཆེ་ལས། འགྲོ་ཀུན་དགེ་བ་ཇི་སྙེད་ཡོད་པ་དང་། །བྱས་དང་བྱེད་འགྱུར་དེ་བཞིན་བྱེད་པ་དག །བཟང་པོ་ཇི་བཞིན་དེ་འདྲའི་ས་དག་ལ། །ཀུན་ནས་ཀུན་ཀྱང་བཟང་པོར་རེག་གྱུར་ཅིག །ཅེས་གསུངས་པའི་ཕྱིར། གཉིས་པ་གང་དུ་བསྔོ་བའི་ཡུལ་ནི། མགོན་པོ་བྱམས་པས། ཁམས་གསུམ་གཏོགས་པ་མ་ཡིན་དང་། །ཞེས་གསུངས་པ་ལྟར། ཚངས་པ་དང་། བརྒྱ་བྱིན་དང་། འཁོར་ལོས་སྒྱུར་བ་ལ་སོགས་པས་མཚོན། མདོར་ན་ཁམས་གསུམ་ན་ཆེན་པོར་གྲགས་པའི་འཁོར་བའི་བདེ་འབྲས་ཀྱི་སར་མི་བསྔོ་སྟེ། དེ་རྣམས་ནི་དངོས་དང་བརྒྱུད་པའི་སྒོ་ནས་སྡུག་བསྔལ་གྱི་རང་བཞིན་ཁོ་ན་ལས་མ་འདས་པའི་ཕྱིར་དེ་ཙམ་དུའང་མ་ཟད། ཤེར་ཕྱིན་ལས། དགེ་བའི་རྩ་བ་ཐམས་ཅད་རྣམ་པ་ཐམས་ཅད་མཁྱེན་པ་མ་གཏོགས་པ་ཉན་ཐོས་ཀྱི་སའམ། རང་སངས་རྒྱས་ཀྱི་སར་བསྔོར་མི་འཇུག་གོ །ཞེས་རང་ཉིད་གཅིག་པུ་ཞི་བ་ཙམ་གྱི་ཉན་ཐོས་དང་། རང་སངས་རྒྱས་ཀྱི་སར་ཡོངས་སུ་བསྔོ་བའང་མ་ཡིན་ཏེ། དེ་དག་ནི་གཞན་དོན་དུ་རྫོགས་པའི་སངས་རྒྱས་ཐོབ་པ་ལ་གེགས་བྱེད་པའི་ཕྱིར་རོ། །དེ་བས་ན་བདག་ལེགས་སུ་འདོད་པ་རྣམས་ཀྱིས་སྲིད་ཞི་གཉིས་ཀའི་མཐའ་ལ་མི་གནས་པའི་མྱ་ངན་ལས་འདས་པ་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་ས་འབའ་ཞིག་ཏུ་བསྔོ་བ་ནི་རྒྱལ་བ་དགྱེས་པའི་ལམ་སྲོལ་རྨད་དུ་བྱུང་བ་ཡིན་ཏེ། མཁས་མཆོག་དཔའ་བོས། དགེ་བའི་རྩ་བ་བསྒྲུབས་པ་དེ་དག་ཀྱང་། །གྲགས་དང་སྙན་དང་ལྷ་མིའི་བདེ་འབྲས་དང་། །རེ་བཅས་འཁོར་བའི་བསམ་པ་རྣམས་བྲལ་ཏེ། །འཇིག་རྟེན་འདས་པ་ཁོ་ནའི་རྒྱུར་བསྔོའོ། །ཞེས་གསུངས་པའི་ཕྱིར། འོ་ན་འཇིག་རྟེན་འདིར་ཚེ་རིང་བ་དང་། ལོངས་སྤྱོད་རྒྱས་པ་ལ་སོགས་པའི་རྒྱུར་གཏན་ནས་བསྔོ་མི་རུང་བ་ཡིན་ནམ་སྙམ་ན། དེ་ནི་མ་ཡིན་ཏེ། མཐར་ཐུག་གི་འབྲས་བུ་རྣམ་མཁྱེན་ཁོ་ན་ལ་དམིགས་ཏེ། དེ་ཉིད་མངོན་དུ་མ་གྱུར་པའི་གནས་སྐབས་ཐམས་ཅད་དུ་མཐོ་རིས་ཀྱི་ཡོན་ཏན་བདུན་ལ་སོགས་པའི་བདེ་འབྲས་ཕུན་སུམ་ཚོགས་པ་འབྱོར་པའི་སླད་དུ་བསྔོ་བ་ནི་མི་འགལ་བའི་ཕྱིར་རོ། །གསུམ་པ་ཇི་ལྟར་བསྔོ་བའི་ཚུལ་ནི། མ་ཧཱ་པཎྜིཏ་བུདྡྷ་ཤྲཱིས། དམ་པ་གསུམ་གྱིས་བསོད་ནམས་བསགས། །རྒྱ་ཆེན་ཐབས་ཀྱིས་ཡང་དག་སྤེལ། །ཤེས་རབ་ཟབ་མོས་རྣམ་པར་དཔྱད། །ཟུང་འཇུག་བསྔོ་བས་རྒྱས་གདབ་པོ། །ཞེས་གསུངས་པ་ལྟར་སྦྱོར་བ་སེམས་བསྐྱེད། དངོས་གཞི་དམིགས་མེད། རྗེས་གཞན་དོན་དུ་བསྔོ་བ་སྟེ་དམ་པ་གསུམ་ལྡན་གྱི་སྒོ་ནས་བསགས་པའི་སྐབས་དོན་གྱི་དགེ་བའི་རྩ་བ་འདི་ཉིད་ཀྱིས་མཚོན་རང་གཞན་གྱིས་དུས་གསུམ་དུ་བསགས་པའི་དགེ་རྩ་ཐམས་ཅད་ཕྱོགས་གཅིག་ཏུ་བསྡོམས་ཏེ། དེ་དག་ལ་རྗེས་སུ་ཡི་རང་བརྒྱ་ཆེན་པོས་ཐབས་ཀྱིས་ཡང་དག་པར་སྤེལ་བ་སྔོན་དུ་འགྲོ་བ་དང་བཅས་འགལ་རྐྱེན་དམིགས་པའི་དུག་སྤོང་བ་དང་། མཐུན་རྐྱེན་ཐབས་ཤེས་ཀྱི་རྩིས་ཟིན་པའི་སྒོ་ནས་ཡོངས་སུ་བསྔོ་བར་བྱ་སྟེ། དེ་ལ་དང་པོ་ནི། བསོད་ནམས་བྱས་པའི་དངོས་པོ་དེ་ཐམས་ཅད་ལ་འཁོར་གསུམ་མཚན་མར་འཛིན་པའི་འདུ་ཤེས་ཅན་གྱིས་བསྔོ་བ་དེ་ནི་དུག་དང་བཅས་པ་སྟེ། བརྒྱད་སྟོང་པ་ལས། དམིགས་པའི་འདུ་ཤེས་ཅན་ལ་ཡོངས་སུ་བསྔོ་བ་མེད་དོ། །དེ་ཅིའི་ཕྱིར་ཞེ་ན། དམིགས་པའི་དུག་དང་བཅས་པས་སོ། །ཞེས་གསུངས་པའི་ཕྱིར་རྣམ་པ་ཀུན་ཏུ་སྤང་བར་བྱའོ། །གཉིས་པ་ནི། ཐབས་ཤེས་ཀྱིས་ཟིན་པའི་བསྔོ་བས་ཡོངས་སུ་བསྔོས་ན་བཟང་པོ་བཞི་ལྡན་གྱི་བསྔོ་བར་འགྱུར་ཏེ། དམིགས་པ་བཟང་དང་སྟོན་པ་བཟང་། །ཐབས་བཟང་བ་དང་ངེས་འབྱུང་དང་། །སྤྱོད་པ་བཟང་པོའི་བདག་ཉིད་ཀྱིས། །ཡང་དག་སྨོན་ལམ་ཡིན་པར་བཤད། །ཅེས་པ་ལྟར་ཤེས་རབ་བདག་མེད་པའི་ལྟ་བ་དང་། ཐབས་བྱང་ཆུབ་སེམས་ཀྱིས་ཟིན་པ་སྟེ། དང་པོ་ནི། དོན་དམ་པར་ཆོས་ཐམས་ཅད་ཀྱི་རང་བཞིན་གྱིས་སྤྲོས་པ་དང་བྲལ་བའི་ཕྱིར་གང་དུ་བསྔོ་བའི་བྱང་ཆུབ་དང་། གང་བསྔོ་རྒྱུའི་དགེ་རྩ་དང་། གང་གི་སྔོ་བ་བྱེད་པ་པོ་གསུམ་ཀ་ལ་མཚན་མར་འཛིན་པ་དང་། དགེ་བའི་རྩ་བ་འདི་ནི་བཟང་པོའོ་སྙམ་པའི་རློམས་སེམས་ལ་སོགས་པ་སྤངས་ཏེ། ཐམས་ཅད་མཁྱེན་པའི་ཡེ་ཤེས་ཀྱི་གཟིགས་ངོ་ན་འཁོར་གསུམ་གྱི་རྣམ་རྟོག་གང་ཡང་མི་དམིགས་པ་དེ་བཞིན་དུ་ཤེས་པའི་ངང་ནས་བསྔོ་སྟེ། མགོན་པོ་བྱམས་པས། དེ་ནི་དམིགས་མེད་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་གསུངས་པའི་ཕྱིར། གཉིས་པ་ནི། དེའི་ངང་ལས་ཐ་སྙད་ཀུན་རྫོབ་ཏུ་སྒྱུ་མ་མཁན་གྱིས་སྤྲུལ་པའི་རྟ་གླང་ལྟར་སྣང་ལ་རང་བཞིན་མེད་པར་ཤེས་པའི་བློས་ཆེད་དུ་བྱ་བ་མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དང་ཐུན་མོང་དུ་བྱས་ཏེ་རྣམ་པ་ཐམས་ཅད་མཁྱེན་པའི་གོ་འཕང་ཐོབ་པའི་ཕྱིར་ཡོངས་སུ་བསྔོ་བ་སྟེ། མགོན་པོ་ཞི་བ་ལྷས། དངོས་སམ་ཡང་ན་བརྒྱུད་ཀྱང་རུང་། །སེམས་ཅན་དོན་ལས་གཞན་མི་སྤྱད། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་ཕྱིར་བསྔོའོ། །ཞེས་གསུངས་པའི་ཕྱིར་རོ། །དེ་ལྟ་བུའི་ཚུལ་གྱིས་བསྔོ་བའི་ཚེ་ན། མདོ་ལས། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །ཞེས་གསུངས་པ་ལྟར། མདུན་གྱི་ནམ་མཁར་ཕྱོགས་བཅུའི་རྒྱལ་བ་སྲས་དང་བཅས་པ་དཔང་པོར་བཞུགས་ནས་ཇི་ལྟར་བཏབ་པའི་བསྔོ་བ་དང་སྨོན་ལམ་དེ་ལྟར་དུ་འགྲུབ་པར་བྱིན་གྱིས་རློབ་པའི་མོས་པའང་བྱའོ། །བཞི་པ་དེ་ལྟར་བསྔོས་པའི་ཕན་ཡོན་ནི། སྤྱིར་བསགས་སྦྱངས་སྤེལ་བའི་གནད་ཐམས་ཅད་ཡན་ལག་བདུན་གྱི་ཁོངས་སུ་བསྡུ་བའི་ཚེ་ན། ཕལ་པོ་ཆེ་ལས་དམན་པའི་མཆོག་གོ་རིམ་གྱིས་གསུངས་པ་ཡིན་ཏེ། དེ་ཡང་ཕྱག་འཚལ་བ་ལས་མཆོད་པ་ཕན་ཡོན་ཆེ་བ་ནས་བཟུང་། བསྔོ་བའི་བར་དུ་སྔ་མ་སྔ་མ་ལས་ཕྱི་མ་ཕྱི་མ་ཕན་ཡོན་ཆེ་བས་ན་ཕན་ཡོན་གྱི་སྒོ་ནས་མཆོག་ཏུ་འགྱུར་བ་དང་། ཁྱད་པར་དགེ་བའི་རྩ་བ་ཆུང་ངུ་ཞིག་ཡིན་ཀྱང་འཇིག་རྟེན་གྱི་བདེ་འབྲས་དང་། ཉན་རང་ལ་སོགས་པ་དམན་པའི་བྱང་ཆུབ་ཀྱི་རྒྱུར་མི་ལྷུང་བར་སངས་རྒྱས་ཁོ་ནའི་ཉེར་ལེན་དུ་འགྱུར་བ་དང་། བྱེ་བྲག་ཏུ། ཤེས་རབ་འཁོར་གསུམ་མི་དམིགས་པའི་རྩིས་ཟིན་པས་ཡོངས་སུ་བསྔོས་པའི་དགེ་བའི་རྩ་བ་ནི། ཁོང་ཁྲོ་ལ་སོགས་པ་འཛད་པའི་རྐྱེན་རྣམས་ཀྱིས་ནམ་དུ་ཡང་ཟད་པར་མི་ནུས་ཏེ། བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོའི་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་གསུངས། དེ་ལྟར་མི་ཟད་པ་ཙམ་དུ་མ་ཟད། ཐབས་བྱང་ཆུབ་སེམས་ཀྱིས་ཟིན་པས་ཡོངས་སུ་བསྔོས་པའི་དགེ་བའི་རྩ་བ་ནི་འབྲས་བུ་ཅན་གྱི་ལྗོན་ཤིང་བཞིན་གོང་ནས་གོང་དུ་འཕེལ་བ་ཡིན་ཏེ། མགོན་པོ་ཞི་བ་ལྷས། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་སྤྱད་པས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་བྱེད། །ཅེས་གསུངས། གཞན་ཡང་སེམས་ཅན་གྱི་ཁམས་མཐའ་ཀླས་པའི་ཆེད་དུ་བསྔོས་པས་ཀྱང་དེ་སྙེད་ཀྱི་བསོད་ནམས་ཚད་མེད་པ་ཐོབ་པ་ཡིན་ཏེ། འཕགས་པ་ཀླུ་སྒྲུབ་ཀྱིས། སེམས་ཅན་ཁམས་ནི་ཚད་མེད་པར། །ཕན་འདོད་དེ་ནི་དེ་འདྲའོ། །ཞེས་གསུངས་པའི་ཕྱིར་རོ། །ལྔ་པ་སྐབས་སུ་བབ་པའི་བསྔོ་བ་དངོས་ནི། དེ་ལྟ་བུའི་ཡོངས་སུ་བསྔོ་བའི་རྣམ་པར་བཞག་པ་ཇི་སྐད་བཤད་པ་དེ་དག་ཐུགས་ལ་བཞག་ནས། ཕུན་སུམ་ཚོགས་པའི་དགེ་འདུན་རྣམས་ཀྱིས་བསྔོ་བ་དང་སྨོན་ལམ་ལ་སོགས་པའི་མཐུན་འགྱུར་ཐུགས་ལ་འདོགས་པར་ཞུ། ཞེས་མཚམས་སྦྱར་ནས་བསྔོ་བ་དངོས་ལ་འཇུག་པར་བྱའོ། །ཚོགས་གཉིས་འཛམ་བུའི་ལྗོན་པའི་སྙེ་མ་ནི། །ཡོངས་སུ་བསྔོ་བའི་མ་དྲོས་མཚོར་ལྷུང་བས། །བྱང་ཆུབ་མཆོག་གི་གསེར་དུ་བསྒྱུར་བའི་གཏམ། །སྔོན་བྱོན་མཁས་པའི་དགོངས་པ་ཇི་བཞིན་བཤད། །དེ་ལས་བྱུང་བའི་རྣམ་དཀར་ཁ་བ་ཡིས། །རེག་པ་གངྒཱའི་དཔལ་མོའི་འཛུམ་རླབས་ཀྱིས། །ལུས་ཅན་སྒྲིབ་གཉིས་དྲི་མ་ཀུན་སྦྱངས་ཏེ། །ཕན་བདེའི་ངལ་འཚོ་མཆོག་ཏུ་རྒྱས་གྱུར་ཅིག །ཅེས་པའང་མཁན་ཆེན་ཐམས་ཅད་མཁྱེན་པའི་བཀའ་ཡི་ཅོད་པན་སྤྱི་བོར་སྩལ་བ་ལས་རྟེན་ནས། ཤཱཀྱའི་དགེ་སློང་མཁྱེན་བརྩེའི་དབང་པོས་རང་ལོ་ཉེར་གསུམ་པར་དམ་པ་སྔ་མ་རྣམས་ཀྱི་གསུང་རབ་ལས་ཤིན་ཏུ་བསྡུས་ཤིང་བརྗོད་བདེ་བའི་ཚུལ་གྱིས་དཔལ་ཨེ་ཝྃ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བའོ། །སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

bsngo smon dang shis brjod kyi skor la/_dge ba'i rtsa ba byang chub tu bsngo ba'i gtam bsod nams sprin gyi rgyud mang / @#/__/dge ba'i rtsa ba byang chub tu bsngo ba'i gtam/__bsod nams sprin gyi rgyud mang zhes bya ba bzhugs so/__/ srid dang zhi ba'i legs byas ji snyed kun/__/sems can rnams la yongs su bsngo ba'i gtam/__/gzhan las khyad par 'phags pa'i seng ge'i sgras/__/ston mdzad zas gtsang sras kyis dge legs stsol/__/gang de'i rnam par bzhag pa las brtsams pa'i/__/gleng ba bsod nams sprin gyi tam+bu ras/__/dpyod ldan mdongs mtha'i snying dang rna ba la/__/bdud rtsi'i dga' ston gsar pa bsgrub par bya/__/de la 'dir rang gzhan gyi dge tshogs yongs su bsngo bas rgyas 'debs pa'i thog mar 'di skad ces gleng bar bya ste/__de la 'dir rang re rnams kyi ston pa bla na ma mchis pa yang dag par rdzogs pa'i sangs rgyas nyi ma'i gnyen gyis legs par gsungs pa'i bstan pa rin po che'i bshad sgrub dri ma med par gnas shing /__bstan 'dzin gyi skyes bu dam pa rnams 'tsho zhing gzhes la chos kyang ston pa'i dus phun sum tshogs pa'i skabs 'dir/__mtshungs med 'dir sbyin bdag gi che ba brjod dgos na skabs su gang 'os sbrel/__mchan/__bstan pa'i sbyin bdag chen po gang nas/__bsam pa dang sbyor ba gnyis ka rnam par dag pas kho bo cag la yul dam par bzung nas bsnyen bkur bla na med pa bskrun pa la/__rgyu sbyor ba/__bya ba byed pa/__lag tu len pa/__sgo gsum gyi 'brel thogs dang bcas pa'i rgyud la dge tshogs ji snyed cig 'phel ba rnams bar ma dor chud mi za ba dang /__gong nas gong du 'phel ba'i phyir yongs su bsngo bas rgyas gdab pa ni nang pa sangs rgyas pa'i khyad par 'phags pa'i chos gcig yin te/__slob dpon mtho btsun grub rjes/__bsod nams byas pa'i dngos po ni/__/sems can rnams la yongs bsngo ba/__/bcom ldan 'das kyis gang gsungs pa/__/de gzhan bstan bcos las ma bshad/__/ces gsungs pa'i phyir ro/__/des na de lta bu'i rnam par bzhag pa mdo dang bstan bcos rnams las rgya cher 'byung ba'i don snying por dril te cung zad cig snyan du gsol na gsum/__mtshan nyid/__sgra don/__dbye ba'o/__/dang po mtshan nyid ni/__mngon par 'du byas pa'i dge ba'i rtsa ba gang zhig bla na med pa'i byang chub kyi rgyur yongs su bsgyur ba'i thabs khyad par can gang yin pa ste/__mgon po byams pas/__yongs su bsngo ba khyad par can/__/de yi byed pa mchog yin te/__/zhes gsungs pa'i phyir/__gnyis pa sgra don ni/__legs sbyar gyi skad du pa ri NA ma zhes pa'i sgra las drangs na/__yongs su bsgyur ba'am/__spel ba la 'jug ste/__dge ba'i rtsa ba byang chub kyi rgyur yongs su bsgyur ba dang /__de ma thob kyi bar du gong nas gong du spel ba'i phyir de skad do/__/gsum pa dbye ba lnga la/__gang zhig bsngo ba'i dge ba/__gang du bsngo ba'i yul/__ji ltar bsngo ba'i tshul/__de ltar bsngos pa'i phan yon/__skabs su babs pa'i bsngo ba dngos so/__/dang po gang zhig bsngo ba'i dge ba ni/__spyir dge ba'i ming gis smos pa thams cad bsngo bas bsgyur du rung ngam snyam na ma yin te/__mngon pa'i gzhung rnams las/__de bzhin nyid la'ang dge ba'i ming gis smos pa yod mod/__de ni dgos dbang gis btags pa tsam ma gtogs dge ba'i mtshan nyid pa ma yin pas bsngo byar mi rung ste/__bsngos kyang 'gyur ba med pa'i phyir ro/__/des na bsngo rgyu'i dge rtsa ni/__'phags pa klu sgrub kyis/__ma chags zhe sdang gti mug med/__/des bskyed las ni dge ba'o/__/zhes gsungs pa ltar/__rgyu ma chags pa dang /__zhe sdang med pa dang /__gti mug med pa'i sems kyis kun nas bslangs shing bskyed pa'i las gang zhig__/'bras bu bde ba bskyed pa ste/__de la'ang bsod nams bya ba'i sgo nas dbye na/__sbyin pa dang /__tshul khrims dang /__bsgom pa las byung ba'i bsod nams bya ba'i dngos po ste gsum du 'gyur ba las/__'dir skabs su bab pa'i dge ba'i rtsa ba 'di ni gtso bor 'jig rten dang 'jig rten las 'das pa'i dbul ba 'dor bar byed pa/__zang zing dang /__mi 'jigs pa dang /__chos dang /__byams pa'i sbyin pa bzhis bsdus shing /__khyad par du bsam pa rnam par dag pa dang ldan pa'i gtong ba po dam pas/__tshul khrims sogs nyams pa med pa'i len pa po dam pa la/__gzhan las brkus pa dang 'phrog pa la sogs pa ma yin pa'i longs spyod dam pas bsnyen bkur bgyis pa las byung ba'i bsod nams kyi dngos po gang yin pa dang /__de tsam du'ang ma zad dus gsum du rang nyid kyis bsags pa dang /__gzhan la bsag tu bcug pa dang /__phyogs bcu'i 'jig rten gyi khams na sems can gang su yang rung bas ma mngon par 'du byas pa'i dge ba'i rtsa ba ji snyed cig yod pa rnams te/__phal po che las/__'gro kun dge ba ji snyed yod pa dang /__/byas dang byed 'gyur de bzhin byed pa dag__/bzang po ji bzhin de 'dra'i sa dag la/__/kun nas kun kyang bzang por reg gyur cig__/ces gsungs pa'i phyir/__gnyis pa gang du bsngo ba'i yul ni/__mgon po byams pas/__khams gsum gtogs pa ma yin dang /__/zhes gsungs pa ltar/__tshangs pa dang /__brgya byin dang /__'khor los sgyur ba la sogs pas mtshon/__mdor na khams gsum na chen por grags pa'i 'khor ba'i bde 'bras kyi sar mi bsngo ste/__de rnams ni dngos dang brgyud pa'i sgo nas sdug bsngal gyi rang bzhin kho na las ma 'das pa'i phyir de tsam du'ang ma zad/__sher phyin las/__dge ba'i rtsa ba thams cad rnam pa thams cad mkhyen pa ma gtogs pa nyan thos kyi sa'am/__rang sangs rgyas kyi sar bsngor mi 'jug go__/zhes rang nyid gcig pu zhi ba tsam gyi nyan thos dang /__rang sangs rgyas kyi sar yongs su bsngo ba'ang ma yin te/__de dag ni gzhan don du rdzogs pa'i sangs rgyas thob pa la gegs byed pa'i phyir ro/__/de bas na bdag legs su 'dod pa rnams kyis srid zhi gnyis ka'i mtha' la mi gnas pa'i mya ngan las 'das pa rnam pa thams cad mkhyen pa sangs rgyas kyi sa 'ba' zhig tu bsngo ba ni rgyal ba dgyes pa'i lam srol rmad du byung ba yin te/__mkhas mchog dpa' bos/__dge ba'i rtsa ba bsgrubs pa de dag kyang /__/grags dang snyan dang lha mi'i bde 'bras dang /__/re bcas 'khor ba'i bsam pa rnams bral te/__/'jig rten 'das pa kho na'i rgyur bsngo'o/__/zhes gsungs pa'i phyir/__'o na 'jig rten 'dir tshe ring ba dang /__longs spyod rgyas pa la sogs pa'i rgyur gtan nas bsngo mi rung ba yin nam snyam na/__de ni ma yin te/__mthar thug gi 'bras bu rnam mkhyen kho na la dmigs te/__de nyid mngon du ma gyur pa'i gnas skabs thams cad du mtho ris kyi yon tan bdun la sogs pa'i bde 'bras phun sum tshogs pa 'byor pa'i slad du bsngo ba ni mi 'gal ba'i phyir ro/__/gsum pa ji ltar bsngo ba'i tshul ni/__ma hA paN+Dita bud+d+ha shrIs/__dam pa gsum gyis bsod nams bsags/__/rgya chen thabs kyis yang dag spel/__/shes rab zab mos rnam par dpyad/__/zung 'jug bsngo bas rgyas gdab po/__/zhes gsungs pa ltar sbyor ba sems bskyed/__dngos gzhi dmigs med/__rjes gzhan don du bsngo ba ste dam pa gsum ldan gyi sgo nas bsags pa'i skabs don gyi dge ba'i rtsa ba 'di nyid kyis mtshon rang gzhan gyis dus gsum du bsags pa'i dge rtsa thams cad phyogs gcig tu bsdoms te/__de dag la rjes su yi rang brgya chen pos thabs kyis yang dag par spel ba sngon du 'gro ba dang bcas 'gal rkyen dmigs pa'i dug spong ba dang /__mthun rkyen thabs shes kyi rtsis zin pa'i sgo nas yongs su bsngo bar bya ste/__de la dang po ni/__bsod nams byas pa'i dngos po de thams cad la 'khor gsum mtshan mar 'dzin pa'i 'du shes can gyis bsngo ba de ni dug dang bcas pa ste/__brgyad stong pa las/__dmigs pa'i 'du shes can la yongs su bsngo ba med do/__/de ci'i phyir zhe na/__dmigs pa'i dug dang bcas pas so/__/zhes gsungs pa'i phyir rnam pa kun tu spang bar bya'o/__/gnyis pa ni/__thabs shes kyis zin pa'i bsngo bas yongs su bsngos na bzang po bzhi ldan gyi bsngo bar 'gyur te/__dmigs pa bzang dang ston pa bzang /__/thabs bzang ba dang nges 'byung dang /__/spyod pa bzang po'i bdag nyid kyis/__/yang dag smon lam yin par bshad/__/ces pa ltar shes rab bdag med pa'i lta ba dang /__thabs byang chub sems kyis zin pa ste/__dang po ni/__don dam par chos thams cad kyi rang bzhin gyis spros pa dang bral ba'i phyir gang du bsngo ba'i byang chub dang /__gang bsngo rgyu'i dge rtsa dang /__gang gi sngo ba byed pa po gsum ka la mtshan mar 'dzin pa dang /__dge ba'i rtsa ba 'di ni bzang po'o snyam pa'i rloms sems la sogs pa spangs te/__thams cad mkhyen pa'i ye shes kyi gzigs ngo na 'khor gsum gyi rnam rtog gang yang mi dmigs pa de bzhin du shes pa'i ngang nas bsngo ste/__mgon po byams pas/__de ni dmigs med rnam pa can/__/phyin ci ma log mtshan nyid do/__/zhes gsungs pa'i phyir/__gnyis pa ni/__de'i ngang las tha snyad kun rdzob tu sgyu ma mkhan gyis sprul pa'i rta glang ltar snang la rang bzhin med par shes pa'i blos ched du bya ba ma gyur nam mkha'i mtha' dang mnyam pa'i sems can thams cad dang thun mong du byas te rnam pa thams cad mkhyen pa'i go 'phang thob pa'i phyir yongs su bsngo ba ste/__mgon po zhi ba lhas/__dngos sam yang na brgyud kyang rung /__/sems can don las gzhan mi spyad/_/sems can kho na'i don gyi phyir/__/thams cad byang chub phyir bsngo'o/__/zhes gsungs pa'i phyir ro/__/de lta bu'i tshul gyis bsngo ba'i tshe na/__mdo las/__gang zhig sangs rgyas yid byed pa/__/de yi mdun na thub pa bzhugs/__/zhes gsungs pa ltar/__mdun gyi nam mkhar phyogs bcu'i rgyal ba sras dang bcas pa dpang por bzhugs nas ji ltar btab pa'i bsngo ba dang smon lam de ltar du 'grub par byin gyis rlob pa'i mos pa'ang bya'o/__/bzhi pa de ltar bsngos pa'i phan yon ni/__spyir bsags sbyangs spel ba'i gnad thams cad yan lag bdun gyi khongs su bsdu ba'i tshe na/__phal po che las dman pa'i mchog go rim gyis gsungs pa yin te/__de yang phyag 'tshal ba las mchod pa phan yon che ba nas bzung /__bsngo ba'i bar du snga ma snga ma las phyi ma phyi ma phan yon che bas na phan yon gyi sgo nas mchog tu 'gyur ba dang /__khyad par dge ba'i rtsa ba chung ngu zhig yin kyang 'jig rten gyi bde 'bras dang /__nyan rang la sogs pa dman pa'i byang chub kyi rgyur mi lhung bar sangs rgyas kho na'i nyer len du 'gyur ba dang /__bye brag tu/__shes rab 'khor gsum mi dmigs pa'i rtsis zin pas yongs su bsngos pa'i dge ba'i rtsa ba ni/__khong khro la sogs pa 'dzad pa'i rkyen rnams kyis nam du yang zad par mi nus te/__blo gros rgya mtshos zhus pa'i mdo las/__ji ltar chu thigs rgya mtsho che nang lhung /__/rgya mtsho ma zad bar du de mi 'dzad/__/de bzhin byang chub yongs bsngo'i dge ba yang /__/byang chub ma thob bar du de mi 'dzad/__/ces gsungs/__de ltar mi zad pa tsam du ma zad/__thabs byang chub sems kyis zin pas yongs su bsngos pa'i dge ba'i rtsa ba ni 'bras bu can gyi ljon shing bzhin gong nas gong du 'phel ba yin te/__mgon po zhi ba lhas/__dge ba gzhan kun chu shing bzhin du ni/__/'bras bu spyad pas zad par 'gyur ba nyid/__/byang chub sems kyi ljon shing rtag par yang /__/'bras bu 'byin pas mi zad 'phel bar byed/__/ces gsungs/__gzhan yang sems can gyi khams mtha' klas pa'i ched du bsngos pas kyang de snyed kyi bsod nams tshad med pa thob pa yin te/__'phags pa klu sgrub kyis/__sems can khams ni tshad med par/__/phan 'dod de ni de 'dra'o/__/zhes gsungs pa'i phyir ro/__/lnga pa skabs su bab pa'i bsngo ba dngos ni/__de lta bu'i yongs su bsngo ba'i rnam par bzhag pa ji skad bshad pa de dag thugs la bzhag nas/__phun sum tshogs pa'i dge 'dun rnams kyis bsngo ba dang smon lam la sogs pa'i mthun 'gyur thugs la 'dogs par zhu/__zhes mtshams sbyar nas bsngo ba dngos la 'jug par bya'o/__/tshogs gnyis 'dzam bu'i ljon pa'i snye ma ni/__/yongs su bsngo ba'i ma dros mtshor lhung bas/__/byang chub mchog gi gser du bsgyur ba'i gtam/__/sngon byon mkhas pa'i dgongs pa ji bzhin bshad/__/de las byung ba'i rnam dkar kha ba yis/__/reg pa gang+gA'i dpal mo'i 'dzum rlabs kyis/__/lus can sgrib gnyis dri ma kun sbyangs te/__/phan bde'i ngal 'tsho mchog tu rgyas gyur cig__/ces pa'ang mkhan chen thams cad mkhyen pa'i bka' yi cod pan spyi bor stsal ba las rten nas/__shAkya'i dge slong mkhyen brtse'i dbang pos rang lo nyer gsum par dam pa snga ma rnams kyi gsung rab las shin tu bsdus shing brjod bde ba'i tshul gyis dpal e wa~M chos ldan gyi bla brang thar pa rtser sbyar ba'o/__/sarba dA ka l+yA NaM b+ha ba tu//___//__!_