སྤངས་རྟོགས་ཡོན་ཏན་ལྡན་པའི་ཡེ་ཤེས་ཐུགས་ཞེས་པའི་གླུ།

🚧 This website is under continued development. We appreciate your patience!

Previous Text Back to Volume PageNext Text

Wylie title	spangs rtogs yon tan ldan pa'i ye shes thugs zhes pa'i glu
Location	mkhyen brtse'i bka' 'bum Volume 23, sde tshan 1, Text 58, Pages 109-111 (Folios 55a6 to 56a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. spangs rtogs yon tan ldan pa'i ye shes thugs zhes pa'i glu. In 'jam dbyangs mkhyen brtse'i dbang po'i bka' 'bum, Vol. 23: 109-111. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

ཨོཾ་སྭ་སྟི་སིདྡྷཾ། སྤངས་རྟོགས་ཡོན་ཏན་ལྡན་པའི་ཡེ་ཤེས་ཐུགས། །མཚན་བཟང་ལྟ་ན་ལྷུན་སྡུག་ཕུང་པོ་ཅན། །སྟོན་པ་རྫོགས་པའི་སངས་རྒྱས་ལ་བཏུད་ནས། །དམ་པའི་ཆོས་ཀྱི་གཏམ་འདི་སྤྲོ་བར་བྱ། །གང་ཞིག་སྲིད་པའི་གནས་ལས་ཡོངས་ཐར་ཞིང་། །མྱ་ངན་འདས་པའི་མཐའ་རུ་ལྷུང་མིན་པར། །མི་གནས་ཐར་པའི་གོ་འཕང་མངོན་བརྙེས་ཕྱིར། །ཐོས་བསམ་སྒོམ་པའི་ཤེས་རབ་བསྐྱེད་པར་མཛོད། །དེ་ཡང་རྒྱལ་བའི་ཆོས་སྒོ་ཇི་སྙེད་པ། །མདོར་བསྡུས་རྒྱུ་དང་འབྲས་བུའི་ཐེག་པ་གཉིས། །ཕྱི་མ་ལ་ཡང་སྔགས་དང་མཚན་ཉིད་ཀྱིས། །རྣམ་པར་དབྱེ་བ་ཇི་སྙེད་ཐོས་པར་བྱ། །དེ་དོན་རྟག་དང་གུས་སྦྱོར་བརྩོན་འགྲུས་བཅས། །མངོན་སུམ་དང་ནི་རྗེས་དཔག་ཤེས་རབ་ཀྱིས། །ཡང་ཡང་གོམས་པའི་བསམ་པ་བསྐྱེད་པ་ཡིས། །གྲུབ་མཐའ་མ་འདྲེས་ཡོངས་རྫོགས་མཁྱེན་པར་མཛོད། །དེ་ལྟར་ཐོས་དང་བསམ་པས་གཏན་ཕབ་དོན། །རང་གི་སེམས་རྒྱུད་འདུལ་ལས་གཞན་མིན་ཕྱིར། །རྩེ་གཅིག་སྒོམ་པའི་ཉམས་མྱོང་རྟོགས་གོམས་ཀྱིས། །ཡེ་གྲོལ་གདོད་མའི་རྒྱལ་སྲིད་ཟིན་པར་གྱིས། །སྐྱེ་བ་མེད་པས་རྟག་པའི་མཐའ་གྲོལ་ཞིང་། །འགག་པ་མེད་པས་ཆད་པའི་ཡུལ་མ་དམིགས། །ཀུན་ལ་རབ་ཏུ་མི་གནས་དབུ་མའི་དོན། །ཚིག་ཙམ་མ་ཡིན་རྒྱུད་ལ་འདྲིས་པར་མཛོད། །ཞི་གནས་ཀྱིས་ནི་ཉོན་མོངས་མགོ་གནོན་ཞིང་། །ལྷག་མཐོང་གིས་ནི་སྒྲིབ་ཀུན་དྲུང་ནས་འབྱིན། །དེ་གཉིས་ཟུང་འཇུག་རང་ངོར་འདྲེས་པའི་ཚེ། །བསམ་གྱིས་མི་ཁྱབ་ཡེ་ཤེས་མངོན་དུ་འགྱུར། །དེ་ལྟར་རྟོགས་ཀྱང་སྡོམ་པ་རྣམ་གསུམ་དང་། །ཕྱིན་དྲུག་ལམ་སོགས་ཁྱད་དུ་མི་བསད་པར། །གང་ཤར་སྒྱུ་མའི་རོལ་པས་སྤྱོད་ཤེས་ན། །ཀུན་ཀྱང་རྟོགས་པའི་བོགས་འདོན་མཆོག་ཏུ་འགྱུར། །ཚུལ་འདི་ཆོས་དང་འཇིག་རྟེན་གཉིས་ཀ་ཡི། །སྤྱོད་པ་གང་ཡང་མ་ནུས་ཆལ་ཆོལ་མཁན། །སྨྱོན་པ་རྡོ་རྗེ་ཐུགས་མཆོག་རྩལ་གྱིས་སྨྲས། །རང་གཞན་འགྲོ་ཀུན་བདེ་ཆེན་གནས་ཐོབ་ཤོག ། སརྦ་མངྒ་ལཾ་བྷཱུ་ཡཱ་ཏ།། །།

[edit]

spangs rtogs yon tan ldan pa'i ye shes thugs zhes pa'i glu/__ oM swa sti sid+d+haM/__spangs rtogs yon tan ldan pa'i ye shes thugs/__/mtshan bzang lta na lhun sdug phung po can/__/ston pa rdzogs pa'i sangs rgyas la btud nas/__/dam pa'i chos kyi gtam 'di spro bar bya/__/gang zhig srid pa'i gnas las yongs thar zhing /__/mya ngan 'das pa'i mtha' ru lhung min par/__/mi gnas thar pa'i go 'phang mngon brnyes phyir/__/thos bsam sgom pa'i shes rab bskyed par mdzod/__/de yang rgyal ba'i chos sgo ji snyed pa/__/mdor bsdus rgyu dang 'bras bu'i theg pa gnyis/__/phyi ma la yang sngags dang mtshan nyid kyis/__/rnam par dbye ba ji snyed thos par bya/__/de don rtag dang gus sbyor brtson 'grus bcas/__/mngon sum dang ni rjes dpag shes rab kyis/__/yang yang goms pa'i bsam pa bskyed pa yis/__/grub mtha' ma 'dres yongs rdzogs mkhyen par mdzod/__/de ltar thos dang bsam pas gtan phab don/__/rang gi sems rgyud 'dul las gzhan min phyir/__/rtse gcig sgom pa'i nyams myong rtogs goms kyis/__/ye grol gdod ma'i rgyal srid zin par gyis/__/skye ba med pas rtag pa'i mtha' grol zhing /__/'gag pa med pas chad pa'i yul ma dmigs/__/kun la rab tu mi gnas dbu ma'i don/__/tshig tsam ma yin rgyud la 'dris par mdzod/__/zhi gnas kyis ni nyon mongs mgo gnon zhing /__/lhag mthong gis ni sgrib kun drung nas 'byin/__/de gnyis zung 'jug rang ngor 'dres pa'i tshe/__/bsam gyis mi khyab ye shes mngon du 'gyur/__/de ltar rtogs kyang sdom pa rnam gsum dang /__/phyin drug lam sogs khyad du mi bsad par/__/gang shar sgyu ma'i rol pas spyod shes na/__/kun kyang rtogs pa'i bogs 'don mchog tu 'gyur/__/tshul 'di chos dang 'jig rten gnyis ka yi/__/spyod pa gang yang ma nus chal chol mkhan/__/smyon pa rdo rje thugs mchog rtsal gyis smras/__/rang gzhan 'gro kun bde chen gnas thob shog__/_sarba mang+ga laM b+hU yA ta//__//