JKW-KABUM-23-'A-001-049

Previous Text Back to Volume PageNext Text

ཀ་དག་བསམ་བརྗོད་ཀྱི་དབུ་ཅན་གྱི་གླུ།

Wylie title	ka dag bsam brjod kyi dbu can gyi glu
Location	mkhyen brtse'i bka' 'bum Volume 23, sde tshan 1, Text 49, Pages 95-97 (Folios 48a4 to 49a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. ka dag bsam brjod kyi dbu can gyi glu. In 'jam dbyangs mkhyen brtse'i dbang po'i bka' 'bum, Vol. 23: 95-97. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

ཨ་ཧོ། ཀ་དག་བསམ་བརྗོད་བྲལ་བའི་བློ་འདས་ཀྱི་གཤིས་ལུགས། །ལྷུན་གྲུབ་འོད་གསལ་རོལ་མོའི་འཇོ་སྒེག་དང་སྦྲགས་པས། །ཟུང་འཇུག་སྐུ་གསུམ་དབྱེར་མེད་རང་ངོ་རུ་གྲོལ་བའི། །ཁྱབ་བདག་དོན་གྱི་བླ་མ་སྙིང་དབུས་ནས་དྲན་བྱུང་། །མངོན་སུམ་ཡེ་ཤེས་རྟོགས་པར་བྱིན་གྱིས་རང་རློབས་ཤིག །མཉམ་གཞག་འཕོ་མེད་ཁྱབ་གདལ་ལྷུན་རྫོགས་ཀྱི་གཤིས་ལུགས། །རྗེས་ཐོབ་ཚོར་དྲུག་རང་གྲོལ་གཉུག་མ་ཡི་ངང་དུ། །ལྟ་སྒོམ་སྤྱོད་པའི་མིང་འདོགས་ཐ་སྙད་ཀུན་བྲལ་བའི། །ད་ལྟའི་ཤེས་པ་རྗེན་པ་ལམ་ཁྱེར་དུ་མཛོད་ཅིག །སྒོམ་ཞེས་དམིགས་གཏད་འཇུར་བུའི་དྲྭ་བ་ལས་འདས་ཤིང་། །མི་བསྒོམ་ཉོན་མོངས་འཁྲུལ་པའི་གཞན་དབང་དང་བྲལ་བའི། །གཟོད་ནས་བློ་བྲལ་འགྱུར་མེད་ཡོངས་གྲུབ་ཀྱི་ངང་དུ། །རྟོག་ཚོགས་གང་ཤར་རང་གྲོལ་དུས་མཉམ་དུ་མཛོད་ཅིག །བྱུང་ཚོར་རྟོག་པས་མ་བསླད་རང་གསལ་གྱི་ཡེ་ཤེས། །དཔེ་དང་ཚིག་གིས་མི་མཚོན་རང་ངོ་རུ་རིག་པས། །བསམ་གྱིས་མི་ཁྱབ་དགོངས་པའི་ཐིག་ལེ་རུ་རོལ་པ། །འདི་ཀ་ཉམས་ལེན་ཀུན་གྱི་དེ་ཉིད་དུ་མཐོང་ངོ་། །ཨ་ཧོ། སྤྱིར་རྒྱ་གར་འཕགས་པའི་ཡུལ་གྲུ་ན། །གྲུབ་མཐའ་སྨྲ་བ་རྣམ་བཞི་ཞེས། །རླུང་ལྟར་དུ་གྲགས་པ་བརྟན་པ་ཡི། །མཐར་ཐུག་འོད་གསལ་དབུ་མ་ཆེ། །ཡང་མཆོག་གཟིགས་རྣམས་ཀྱིས་བཀྲལ་བའི་གཞུང་། །ཡིད་ལ་མི་བྱེད་ཕྱག་རྒྱ་ཆེ། །ཟབ་གསང་གི་སྦས་དོན་མཐར་ཐུག་པ། །རང་བཞིན་རྫོགས་པ་ཆེན་པོ་རྣམས། །དོན་ངོ་བོ་བློ་ལས་འདས་པའི་གཤིས། །ད་ལྟའི་ཤེས་པ་རྗེན་པར་འདུས། །འདི་ཀ་ལ་མ་ཡེངས་སྐྱོང་མཁས་ན། །ངེས་དོན་འབབ་སྟེགས་གཅིག་བུ་ཡིན། །ང་སྨྱོན་པའི་ཚིག་ལ་གཏད་སོ་མེད། །ཇི་ལྟར་བརྗོད་ཀྱང་ཟད་པ་མེད། །སྙིང་གི་ཐིག་ལེ་འདི་ལས་མེད། །དེ་སྐལ་བཟང་གི་སྙིང་ལ་དམ་དུ་སྦོས། །ཞེས་པ་ཡང་དད་དམ་བློ་གྲོས་ལས། །འགྱུར་མེད་ཀྱི་ངང་ཚུལ་རབ་བརྟན་པ། །ཉེ་གནས་ཨཽ་ཌི་ཡཱ་ནའི་ངོར། །མདོ་མེད་ཀྱི་ཆོས་དྲེད་དེ་ཡིས་སྨྲས། །ས་མ་ཡ། ། ༈

[edit]

ka dag bsam brjod kyi dbu can gyi glu/__ a ho/__ka dag bsam brjod bral ba'i blo 'das kyi gshis lugs/__/lhun grub 'od gsal rol mo'i 'jo sgeg dang sbrags pas/__/zung 'jug sku gsum dbyer med rang ngo ru grol ba'i/__/khyab bdag don gyi bla ma snying dbus nas dran byung /__/mngon sum ye shes rtogs par byin gyis rang rlobs shig__/mnyam gzhag 'pho med khyab gdal lhun rdzogs kyi gshis lugs/__/rjes thob tshor drug rang grol gnyug ma yi ngang du/__/lta sgom spyod pa'i ming 'dogs tha snyad kun bral ba'i/__/da lta'i shes pa rjen pa lam khyer du mdzod cig__/sgom zhes dmigs gtad 'jur bu'i drwa ba las 'das shing /__/mi bsgom nyon mongs 'khrul pa'i gzhan dbang dang bral ba'i/__/gzod nas blo bral 'gyur med yongs grub kyi ngang du/__/rtog tshogs gang shar rang grol dus mnyam du mdzod cig__/byung tshor rtog pas ma bslad rang gsal gyi ye shes/__/dpe dang tshig gis mi mtshon rang ngo ru rig pas/__/bsam gyis mi khyab dgongs pa'i thig le ru rol pa/__/'di ka nyams len kun gyi de nyid du mthong ngo /__/a ho/__spyir rgya gar 'phags pa'i yul gru na/__/grub mtha' smra ba rnam bzhi zhes/__/rlung ltar du grags pa brtan pa yi/__/mthar thug 'od gsal dbu ma che/__/yang mchog gzigs rnams kyis bkral ba'i gzhung /__/yid la mi byed phyag rgya che/__/zab gsang gi sbas don mthar thug pa/__/rang bzhin rdzogs pa chen po rnams/__/don ngo bo blo las 'das pa'i gshis/__/da lta'i shes pa rjen par 'dus/__/'di ka la ma yengs skyong mkhas na/__/nges don 'bab stegs gcig bu yin/__/nga smyon pa'i tshig la gtad so med/__/ji ltar brjod kyang zad pa med/__/snying gi thig le 'di las med/__/de skal bzang gi snying la dam du sbos/__/zhes pa yang dad dam blo gros las/__/'gyur med kyi ngang tshul rab brtan pa/__/nye gnas au Di yA na'i ngor/__/mdo med kyi chos dred de yis smras/__/sa ma ya/___/__!