JKW-KABUM-22-ZA-012-094

Previous Text Back to Volume PageNext Text

ཀུན་མཁྱེན་སངས་རྒྱས་གཉིས་པ་ལ་གསོལ་བ་འདེབས་པ་རྡོ་རྗེའི་ཐོལ་གླུ་གྲགས་སྟོང་སྒྱུ་མའི་གར་མཁན།

Wylie title	kun mkhyen sangs rgyas gnyis pa la gsol ba 'debs pa rdo rje'i thol glu grags stong sgyu ma'i gar mkhan
Location	mkhyen brtse'i bka' 'bum Volume 22, sde tshan 12, Text 94, Pages 602-604 (Folios 129b5 to 130b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. kun mkhyen sangs rgyas gnyis pa la gsol ba 'debs pa rdo rje'i thol glu grags stong sgyu ma'i gar mkhan. In 'jam dbyangs mkhyen brtse'i dbang po'i bka' 'bum, Vol. 22: 602-604. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs  ·  Vajra Songs - rdo rje'i glu

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

ཀུན་མཁྱེན་སངས་རྒྱས་གཉིས་པ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་གྲགས་སྟོང་སྒྱུ་མའི་གར་མཁན་ཞེས་བྱ་བ། ན་མོ་གུ་རུ་བྷྱཿ ཀ་དག་ཆོས་ཉིད་མངོན་སུམ་གཉུག་མ་ཡི་ཀློང་ནས། །ཁ་དོག་ཉམས་སྣང་གོང་འཕེལ་འཇའ་ཟེར་གྱི་དཀྱིལ་འཁོར། །ག་ལ་བ་དེར་ཚད་ཕེབས་ཁ་སྦྱོར་གྱི་ཚོམ་བུ། །ང་བདག་འཛིན་བྲལ་ཆོས་ཟད་བླ་མ་དེ་མཁྱེན་ནོ། །ཅ་ཅོའི་སྒྲ་ཚིག་ལས་འདས་དབུ་མ་ཡི་སྦུབས་ནས། །ཆ་མཐུན་ལུང་དང་རྟོགས་པའི་ཡེ་ཤེས་ཀྱི་རླུང་གིས། །ཇ་དར་སྐྱེམས་ཀྱིས་མི་མཚོན་ལོངས་སྤྱོད་ཀྱི་འཁོར་ལོ། །ཉ་རྒྱས་ཟླ་འདྲའི་རྣམ་པར་གྲོལ་བ་ལ་འདུད་དོ། །ཏ་ཐཱ་ག་ཏའི་སྙིང་པོ་ཀུན་ཁྱབ་ཀྱི་གཞི་རྒྱུད། །ཐ་དད་མོས་པའི་རྗེས་འགྲོ་ཐེག་དགུ་ཡི་ལམ་རྒྱུད། །ད་བཟོད་བསྐྱར་གྲོལ་ལས་འདས་སྐུ་གསུམ་གྱི་འབྲས་རྒྱུད། །ན་མར་ཁོར་ཡུག་མཉམ་པར་རོལ་པ་ལ་འདུད་དོ། །པ་ར་མི་ཏའི་སྙིང་པོ་གཞན་ཕན་གྱི་ལོ་འདབ། །ཕ་རོལ་ཕྱིན་པ་དྲུག་གི་མེ་ཏོག་གིས་མཛེས་ཤིང་། །བ་མཆོག་དཔག་བསམ་ཤིང་ལྟར་བསྡུ་དངོས་ཀྱི་འབྲས་བུས། །མ་རིག་འགྲོ་ཀུན་ཚིམ་པར་མཛད་པ་ལ་འདུད་དོ། །ཙཱ་རི་ཏྲ་སོགས་གདན་གསུམ་དཀྱིལ་འཁོར་དུ་རྫོགས་པས། །ཚ་གྲང་རྣམ་རྟོག་སྤངས་པའི་བདེ་སྟོང་གི་བདུད་རྩི། །ཛ་ཧུའི་རྒྱུན་ལྟར་འཁོར་ལྔའི་ཕོ་བྲང་དུ་བཀྲམ་པས། །ཝ་ལྟར་ཉུལ་བའི་རླུང་སེམས་སྡུད་པ་ལ་འདུད་དོ། །ཞྭ་ཐོད་སྤངས་པའི་གླེགས་རལ་ཆུ་སྐྱེས་ཀྱི་སྙིང་པོར། །ཟ་ཧོར་རྒྱལ་པོའི་མཆོད་གནས་མཚོ་སྐྱེས་ཀྱི་རྡོ་རྗེ། །འ་ཅག་འགྲོ་བ་སྒྲོལ་ཕྱིར་རིགས་བདག་ཏུ་བསྙེན་ནས། །ཡ་བྲལ་ལས་འདས་སྙིང་ཏིག་སྟོན་པ་ལ་འདུད་དོ། །རཱ་ཛ་དྲེགས་པས་བཀུར་ཀྱང་ཁེངས་སེམས་དང་བྲལ་ཞིང་། །ལ་ཀླུང་འགྲོ་བས་སྨད་ཀྱང་གཞན་དོན་ལ་སྤྱོད་པའི། །ཤ་ཟ་འབོད་སྒྲོགས་རྒྱལ་པོ་ཕྲིན་ལས་ཀྱི་ཕོ་ཉ། །ས་བཅུའི་བྱང་སེམས་གཞོན་ནུར་བཞེངས་པ་ལ་འདུད་དོ། །ཧ་རིའི་དྲི་བསུང་འཐུལ་བའི་ངུར་སྨྲིག་གི་རྒྱལ་མཚན། །ཨ་དོན་ནང་གསལ་གཞོན་ནུ་བུམ་སྐུ་ལ་བཀླུབས་པས། །དྲི་མེད་འོད་ཟེར་སྟོང་ལྡན་མི་གཟུགས་སུ་བསྟན་པའི། །བསླབ་གསུམ་རྣམ་དག་གདོད་མའི་མགོན་པོ་ལ་འདུད་དོ། །དེ་ལྟར་གུས་པའི་ཆུ་གཏེར་ཆེན་པོ་ལས་སྐྱེས་ཤིང་། །ཡུལ་སྣང་རྟེན་འབྲེལ་རོལ་པའི་འཕྲིན་ཡིག་གིས་བསྐུལ་བས། །གང་ཤར་གསོལ་བ་འདེབས་པའི་གྲགས་སྟོང་གི་རླབས་ཕྲེང་། །རྣལ་འབྱོར་སྒྱུ་མར་སྤྱོད་པའི་ཉམས་དབྱངས་རང་ཡིན་ནོ། །དགེ་བ་དེ་ཡིས་ཐ་མལ་གཉུག་མ་ཡི་གཤིས་ལུགས། །བཏང་བཞག་འགྲོ་སྡོད་བྲལ་བའི་ངང་བཞག་གི་དབྱིངས་སུ། །མངོན་པར་བྱང་ཆུབ་འཁོར་འདས་དབྱེར་མེད་ཀྱི་ངོ་བོ། །གདོད་མའི་བཙན་ས་ཟིན་པའི་སྨོན་ལམ་ཞིག་ཞུའོ།། །། ༈

[edit]

kun mkhyen sangs rgyas gnyis pa la gsol ba 'debs pa rdo rje'i thol glu grags stong sgyu ma'i gar mkhan/__ kun mkhyen sangs rgyas gnyis pa la gsol ba 'debs pa'i rdo rje'i thol glu grags stong sgyu ma'i gar mkhan zhes bya ba/__na mo gu ru b+h+yaH__ka dag chos nyid mngon sum gnyug ma yi klong nas/__/kha dog nyams snang gong 'phel 'ja' zer gyi dkyil 'khor/__/ga la ba der tshad phebs kha sbyor gyi tshom bu/__/nga bdag 'dzin bral chos zad bla ma de mkhyen no/__/ca co'i sgra tshig las 'das dbu ma yi sbubs nas/__/cha mthun lung dang rtogs pa'i ye shes kyi rlung gis/__/ja dar skyems kyis mi mtshon longs spyod kyi 'khor lo/__/nya rgyas zla 'dra'i rnam par grol ba la 'dud do/__/ta thA ga ta'i snying po kun khyab kyi gzhi rgyud/__/tha dad mos pa'i rjes 'gro theg dgu yi lam rgyud/__/da bzod bskyar grol las 'das sku gsum gyi 'bras rgyud/__/na mar khor yug mnyam par rol pa la 'dud do/__/pa ra mi ta'i snying po gzhan phan gyi lo 'dab/__/pha rol phyin pa drug gi me tog gis mdzes shing /__/ba mchog dpag bsam shing ltar bsdu dngos kyi 'bras bus/__/ma rig 'gro kun tshim par mdzad pa la 'dud do/__/tsA ri tra sogs gdan gsum dkyil 'khor du rdzogs pas/__/tsha grang rnam rtog spangs pa'i bde stong gi bdud rtsi/__/dza hu'i rgyun ltar 'khor lnga'i pho brang du bkram pas/__/wa ltar nyul ba'i rlung sems sdud pa la 'dud do/__/zhwa thod spangs pa'i glegs ral chu skyes kyi snying por/__/za hor rgyal po'i mchod gnas mtsho skyes kyi rdo rje/__/'a cag 'gro ba sgrol phyir rigs bdag tu bsnyen nas/__/ya bral las 'das snying tig ston pa la 'dud do/__/rA dza dregs pas bkur kyang khengs sems dang bral zhing /__/la klung 'gro bas smad kyang gzhan don la spyod pa'i/__/sha za 'bod sgrogs rgyal po phrin las kyi pho nya/__/sa bcu'i byang sems gzhon nur bzhengs pa la 'dud do/__/ha ri'i dri bsung 'thul ba'i ngur smrig gi rgyal mtshan/__/a don nang gsal gzhon nu bum sku la bklubs pas/__/dri med 'od zer stong ldan mi gzugs su bstan pa'i/__/bslab gsum rnam dag gdod ma'i mgon po la 'dud do/__/de ltar gus pa'i chu gter chen po las skyes shing /__/yul snang rten 'brel rol pa'i 'phrin yig gis bskul bas/__/gang shar gsol ba 'debs pa'i grags stong gi rlabs phreng /__/rnal 'byor sgyu mar spyod pa'i nyams dbyangs rang yin no/__/dge ba de yis tha mal gnyug ma yi gshis lugs/__/btang bzhag 'gro sdod bral ba'i ngang bzhag gi dbyings su/__/mngon par byang chub 'khor 'das dbyer med kyi ngo bo/__/gdod ma'i btsan sa zin pa'i smon lam zhig zhu'o//__//___!_