བླ་མའི་རྣལ་འབྱོར་ཡེ་ཤེས་མཆོག་སྩོལ།

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i rnal 'byor ye shes mchog stsol
Location	mkhyen brtse'i bka' 'bum Volume 22, sde tshan 7, Text 13, Pages 225-228 (Folios 21a4 to 22b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bla ma'i rnal 'byor ye shes mchog stsol. In 'jam dbyangs mkhyen brtse'i dbang po'i bka' 'bum, Vol. 22: 225-228. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Colophon	།ཞེས་པའང་གཙུག་ལག་དུ་མར་ལྟ་བའི་རྣམ་དཔྱོད་ཀྱི་མཐུ་གྲུབ་པ་ཡུལ་ལྷོ་ཕྱོགས་ཀྱི་པཎྜི་ཏ་ཀརྨ་བི་ཛ་ཡས་ཚུལ་འདི་ལྟ་བུ་ཞིག་བྲིས་ཞེས་རྒྱང་རིང་མོ་ནས་དོན་གཉེར་ཆེན་པོས་བསྐུལ་བ་ལྟར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པས་སརྦ་དཱ་སུ་ཤྲེ་ཡསྶིདྡྷི་རསྟུ།
	zhes pa'ang gtsug lag du mar lta ba'i rnam dpyod kyi mthu grub pa yul lho phyogs kyi paN+Di ta karma bi dza yas tshul 'di lta bu zhig bris zhes rgyang ring mo nas don gnyer chen pos bskul ba ltar/__'jam dbyangs bla ma dgyes pa'i 'bangs mkhyen brtse'i dbang pos bris pas sarba dA su shre yas+sid+d+hi rastu

1 Texts in this Section (sde tshan or chos tshan)

13 225-228	བླ་མའི་རྣལ་འབྱོར་ཡེ་ཤེས་མཆོག་སྩོལ། bla ma'i rnal 'byor ye shes mchog stsol Guru Yoga Texts - bla ma'i rnal 'byor	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །བླ་མའི་རྣལ་འབྱོར་ཡེ་ཤེས་མཆོག་སྩོལ་ཞེས་བྱ་བ། ན་མོ་གུ་ར་བེ། ངེས་འབྱུང་དང་བྱང་ཆུབ་ཀྱི་སེམས་རིན་པོ་ཆེས་རྒྱུད་འབྱོངས་པས་བླ་མའི་མོས་གུས་ལམ་གྱི་སྲོག་ཏུ་བཟུང་སྟེ་རྣལ་འབྱོར་ཟབ་མོ་རྩེ་གཅིག་ཏུ་བསྒོམ་པ་ནི་གསང་ཆེན་རྡོ་རྗེ་ཐེག་པའི་མྱུར་ལམ་མཐར་ཐུག་པ་ཡིན་ཏེ། དེའི་ཚུལ་ཤིན་ཏུ་མདོར་བསྡུས་ཏེ་བྱ་བ་ལ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ནི། བདག་གཞན་མཁའ་ཁྱབ་འགྲོ་བ་མ་ལུས་ཀུན། །སྡུག་བསྔལ་སྲིད་པའི་མཚོ་ལས་བསྒྲལ་བྱའི་ཕྱིར། །བླ་མ་དཀོན་མཆོག་གསུམ་ལ་སྐྱབས་མཆི་ཞིང་། །ཟབ་མོའི་རྣལ་འབྱོར་བསྒོམ་པར་སེམས་བསྐྱེད་དོ། །ཞེས་ལན་གསུམ་སོགས་ཅི་ནུས་སུ་བརྗོད་ཅིང་བློ་སྦྱང་། གཉིས་པ་ལ་བཞི་ལས། ཐོག་མར་ཚོགས་རྟེན་གསལ་གདབ་པ་ནི། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྣོད་བཅུད་གཟུང་འཛིན་མི་དམིགས་སྟོང་པའི་ངང་། །ཟབ་གསལ་གཉིས་མེད་ཡེ་ཤེས་གཅིག་པུའི་འཕྲུལ། །སྲིད་ཞིའི་ཉམས་འགྱུར་དུ་མར་འཆར་བ་ལས། །གནས་ཡུལ་ཅིར་སྣང་དག་པ་རབ་འབྱམས་ཞིང་། །འོག་མིན་གསང་ཆེན་རྡོ་རྗེའི་ཕོ་བྲང་དབུས། །མདུན་གྱི་ནམ་མཁར་ཡིད་འཕྲོག་མཆོད་སྤྲིན་གྱིས། །མངོན་པར་དཀྲིགས་པའི་རིན་ཆེན་སེང་གེའི་ཁྲི། །དར་ཟབ་འབོལ་བརྩེགས་ངུར་སྨྲིག་གདན་གྱི་སྟེང་། །རིགས་ཀུན་ཁྱབ་བདག་སུམ་ལྡན་རྡོ་རྗེ་འཛིན། །འཇམ་དབྱངས་བླ་མ་མཁྱེན་བརྩེའི་དབང་པོ་ནི། །དཀར་དམར་མདངས་ལྡན་གཟི་བརྗིད་དཔལ་དུ་འབར། །ཞལ་རས་རྒྱས་ཤིང་སྤྱན་ཟུང་ཟླུམ་ལ་འཁྱིལ། །ཕྱག་གཡས་མཆོག་སྦྱིན་ཕྱག་རྒྱས་སྐལ་བཟང་ལ། །དངོས་གྲུབ་མཆོག་སྩོལ་རྡོ་རྗེ་ཚེ་བུམ་འཛིན། །གཡོན་པས་མཉམ་གཞག་ཤེས་རབ་དྲིལ་བུ་དང་། །གླེགས་བམ་བསྣམས་པས་མཐའ་ཡས་ཆོས་ཚུལ་སྟོན། །སྐུ་ལ་ཆོས་གོས་རྣམ་གསུམ་མཛེས་པར་བཀླུབས། །སྡེ་སྣོད་རབ་འབྱམས་འཛིན་པའི་པཎ་ཞུ་གསོལ། །ཞབས་ཟུང་རྡོ་རྗེའི་སྐྱིལ་ཀྲུང་དྲང་པོར་བཞུགས། །མཆོག་གསུམ་ངོ་བོ་རྩ་གསུམ་རྒྱ་མཚོའི་བདག །སྐུ་གསུམ་དབྱེར་མེད་རིགས་བརྒྱའི་འཁོར་ལོས་སྒྱུར། །དྲན་པས་སྲིད་ཞིའི་འཇིགས་པ་འཕྲོག་མཛད་པ། །སྐྱབས་ཀུན་འདུས་པའི་ངོ་བོར་ལྷམ་མེར་གསལ། །གཉིས་པ་བསགས་སྦྱོང་སྤེལ་གསུམ་གྱི་གནད་བསྡུས་པ་ཡན་ལག་བདུན་པ་བྱ་བ་ནི། སྐྱབས་གནས་ཀུན་འདུས་དཔལ་ལྡན་བླ་མ་ལ། །བདག་དང་མཁའ་མཉམ་འགྲོ་བ་མ་ལུས་ཀུན། །སྒོ་གསུམ་གུས་པ་ཆེན་པོས་ཕྱག་འཚལ་ཞིང་། །ལུས་དང་ལོངས་སྤྱོད་ཀུན་བཟང་མཆོད་སྤྲིན་འབུལ། །ཚེ་རབས་བསགས་པའི་སྡིག་ལྟུང་སྙིང་ནས་བཤགས། །བྱང་ཆུབ་སྤྱོད་མཆོག་རྒྱ་མཚོར་རྗེས་ཡི་རངས། །ཆོས་འཁོར་བསྐོར་བཞིན་རྟག་ཏུ་བཞུགས་གསོལ་འདེབས། །དགེ་ཚོགས་འགྲོ་ཀུན་རྣམ་མཁྱེན་ཐོབ་ཕྱིར་བསྔོ། །ཞེས་ཕྱག་དང་བཅས་ཏེ་ཅི་རིགས་སུ་བྱ་ཞིང་། སྤྲོ་ན་མཎྜལ་འབུལ། གསུམ་པ་ཕུར་ཚུགས་སུ་གསོལ་བ་གདབ་པ་ནི། འཇ༷མ་པའི་དབྱང༷ས་སོགས་སྲས་བཅས་རྒྱལ་ཀུན་གྱི། །མཁྱེ༷ན་བརྩེ༷་ནུས་པའི་ཡེ་ཤེས་གཅིག་བསྡུས་པ། །མཁས་གྲུབ་དབ༷ང་པོ༷་དཔལ་ལྡན་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །ཞེས་ཅི་ནུས་དང་། གཞན་ཡང་གསོལ་འདེབས་གང་ཤེས་བྱ། སྤྲོ་ན། ཨོཾ་ཨཱཿགུ་རུ་མཉྫུ་གྷོ་ཥ་སརྦ་སིདྡྷི་ཧཱུྃ། ཞེས་པའི་མཚན་སྔགས་ཀྱང་བཟླ། བཞི་པ་དབང་བླང་ཞིང་ཐུགས་ཡིད་བསྲེས་ཏེ་མཉམ་པར་གཞག་པ་ནི། བླ་མའི་གནས་གསུམ་རྡོ་རྗེའི་འབྲུ་གསུམ་ལས། །འོད་ཟེར་བདུད་རྩི་རིམ་དང་ཅིག་ཅར་བྱུང་། །རང་གི་གནས་གསུམ་ཞུགས་ཤིང་ཐིམ་པ་ཡིས། །དབང་བསྐུར་སྒྲིབ་སྦྱངས་སྨིན་གྲོལ་དངོས་གྲུབ་ཐོབ། །མཐར་ནི་བླ་མ་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །དུས་གསུམ་རྟོག་པས་མ་བསླད་གཉུག་མའི་ངང་། །བློ་འདས་འོད་གསལ་ཆོས་སྐུའི་རང་ཞལ་བལྟ། །ཞེས་བརྗོད་ཅིང་བསམ་ལ་མཉམ་པར་གཞག །གསུམ་པ་རྗེས་ནི། ཐུན་ལས་ལྡང་བ་ན། དགེ་བ་འདི་ཡིས་བདག་སོགས་ཡིད་ཅན་ཀུན། །འཁོར་ལོའི་མགོན་པོས་འབྲལ་མེད་རྗེས་བཟུང་ནས། །དད་དང་མོས་གུས་དམ་ཚིག་རྣམ་དག་པས། །རྗེ་བཙུན་བླ་མའི་གོ་འཕང་མྱུར་ཐོབ་ཤོག །ཅེས་སོགས་བསྔོ་སྨོན་གྱིས་མཚམས་སྦྱར་ལ་སྣང་གྲགས་རྟོག་གསུམ་བླ་མའི་གསང་བ་གསུམ་དུ་ཤེས་ཤིང་མོས་གུས་ཕྱག་རྒྱ་ཆེན་པོའི་ལམ་ཁྱེར་དང་མ་བྲལ་བའི་སྒོ་ནས་སྤྱོད་ལམ་ཐམས་ཅད་ཆོས་སྤྱོད་རྣམ་པ་བཅུ་སོགས་དགེ་བའི་བྱ་བས་དུས་འདའ་བར་བྱའོ། །ཞེས་པའང་གཙུག་ལག་དུ་མར་ལྟ་བའི་རྣམ་དཔྱོད་ཀྱི་མཐུ་གྲུབ་པ་ཡུལ་ལྷོ་ཕྱོགས་ཀྱི་པཎྜི་ཏ་ཀརྨ་བི་ཛ་ཡས་ཚུལ་འདི་ལྟ་བུ་ཞིག་བྲིས་ཞེས་རྒྱང་རིང་མོ་ནས་དོན་གཉེར་ཆེན་པོས་བསྐུལ་བ་ལྟར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པས་སརྦ་དཱ་སུ་ཤྲེ་ཡསྶིདྡྷི་རསྟུ། ། ༈

[edit]

bla ma'i rnal 'byor ye shes mchog stsol/__ @#/_/bla ma'i rnal 'byor ye shes mchog stsol zhes bya ba/__na mo gu ra be/__nges 'byung dang byang chub kyi sems rin po ches rgyud 'byongs pas bla ma'i mos gus lam gyi srog tu bzung ste rnal 'byor zab mo rtse gcig tu bsgom pa ni gsang chen rdo rje theg pa'i myur lam mthar thug pa yin te/__de'i tshul shin tu mdor bsdus te bya ba la gsum/__sngon 'gro/__dngos gzhi/__rjes so/__/dang po ni/__bdag gzhan mkha' khyab 'gro ba ma lus kun/__/sdug bsngal srid pa'i mtsho las bsgral bya'i phyir/__/bla ma dkon mchog gsum la skyabs mchi zhing /__/zab mo'i rnal 'byor bsgom par sems bskyed do/__/zhes lan gsum sogs ci nus su brjod cing blo sbyang /__gnyis pa la bzhi las/__thog mar tshogs rten gsal gdab pa ni/__oM shU n+ya tA dz+nyA na badz+ra swa b+hA wa At+ma ko\u0f85haM/__snod bcud gzung 'dzin mi dmigs stong pa'i ngang /__/zab gsal gnyis med ye shes gcig pu'i 'phrul/_/srid zhi'i nyams 'gyur du mar 'char ba las/__/gnas yul cir snang dag pa rab 'byams zhing /__/'og min gsang chen rdo rje'i pho brang dbus/__/mdun gyi nam mkhar yid 'phrog mchod sprin gyis/__/mngon par dkrigs pa'i rin chen seng ge'i khri/__/dar zab 'bol brtsegs ngur smrig gdan gyi steng /__/rigs kun khyab bdag sum ldan rdo rje 'dzin/__/'jam dbyangs bla ma mkhyen brtse'i dbang po ni/__/dkar dmar mdangs ldan gzi brjid dpal du 'bar/__/zhal ras rgyas shing spyan zung zlum la 'khyil/__/phyag g.yas mchog sbyin phyag rgyas skal bzang la/__/dngos grub mchog stsol rdo rje tshe bum 'dzin/__/g.yon pas mnyam gzhag shes rab dril bu dang /__/glegs bam bsnams pas mtha' yas chos tshul ston/__/sku la chos gos rnam gsum mdzes par bklubs/__/sde snod rab 'byams 'dzin pa'i paN zhu gsol/__/zhabs zung rdo rje'i skyil krung drang por bzhugs/__/mchog gsum ngo bo rtsa gsum rgya mtsho'i bdag__/sku gsum dbyer med rigs brgya'i 'khor los sgyur/__/dran pas srid zhi'i 'jigs pa 'phrog mdzad pa/__/skyabs kun 'dus pa'i ngo bor lham mer gsal/__/gnyis pa bsags sbyong spel gsum gyi gnad bsdus pa yan lag bdun pa bya ba ni/__skyabs gnas kun 'dus dpal ldan bla ma la/__/bdag dang mkha' mnyam 'gro ba ma lus kun/__/sgo gsum gus pa chen pos phyag 'tshal zhing /__/lus dang longs spyod kun bzang mchod sprin 'bul/__/tshe rabs bsags pa'i sdig ltung snying nas bshags/__/byang chub spyod mchog rgya mtshor rjes yi rangs/__/chos 'khor bskor bzhin rtag tu bzhugs gsol 'debs/__/dge tshogs 'gro kun rnam mkhyen thob phyir bsngo/__/zhes phyag dang bcas te ci rigs su bya zhing /__spro na maN+Dal 'bul/__gsum pa phur tshugs su gsol ba gdab pa ni/__'jaXm pa'i dbyangaXs sogs sras bcas rgyal kun gyi/__/mkhyeXn brtseX nus pa'i ye shes gcig bsdus pa/__/mkhas grub dbaXng poX dpal ldan la/__/snying nas gsol ba 'debs so byin gyis rlobs/__/zhes ci nus dang /__gzhan yang gsol 'debs gang shes bya/__spro na/__oM AHgu ru many+dzu g+ho Sha sarba sid+d+hi hU~M/__zhes pa'i mtshan sngags kyang bzla/__bzhi pa dbang blang zhing thugs yid bsres te mnyam par gzhag pa ni/__bla ma'i gnas gsum rdo rje'i 'bru gsum las/__/'od zer bdud rtsi rim dang cig car byung /__/rang gi gnas gsum zhugs shing thim pa yis/__/dbang bskur sgrib sbyangs smin grol dngos grub thob/__/mthar ni bla ma 'od zhu rang la thim/__/thugs yid gcig 'dres dgongs pa'i rtsal chen rdzogs/__/dus gsum rtog pas ma bslad gnyug ma'i ngang /__/blo 'das 'od gsal chos sku'i rang zhal blta/__/zhes brjod cing bsam la mnyam par gzhag__/gsum pa rjes ni/__thun las ldang ba na/__dge ba 'di yis bdag sogs yid can kun/__/'khor lo'i mgon pos 'bral med rjes bzung nas/__/dad dang mos gus dam tshig rnam dag pas/__/rje btsun bla ma'i go 'phang myur thob shog__/ces sogs bsngo smon gyis mtshams sbyar la snang grags rtog gsum bla ma'i gsang ba gsum du shes shing mos gus phyag rgya chen po'i lam khyer dang ma bral ba'i sgo nas spyod lam thams cad chos spyod rnam pa bcu sogs dge ba'i bya bas dus 'da' bar bya'o/__/zhes pa'ang gtsug lag du mar lta ba'i rnam dpyod kyi mthu grub pa yul lho phyogs kyi paN+Di ta karma bi dza yas tshul 'di lta bu zhig bris zhes rgyang ring mo nas don gnyer chen pos bskul ba ltar/__'jam dbyangs bla ma dgyes pa'i 'bangs mkhyen brtse'i dbang pos bris pas sarba dA su shre yas+sid+d+hi rastu/__/__!_