ལྷག་པའི་ལྷ་ཀུན་ལ་འཇུག་པའི་བསྲེག་བླུགས་ཀྱི་ཆོ་ག་ཕྲིན་ལས་དཔལ་སྟེར།

From Khyentse Lineage - A Tsadra Foundation Project
JKW-KABUM-21-ZHA-005
Previous Section Back to Volume PageNext Section
Wylie title lhag pa'i lha kun la 'jug pa'i bsreg blugs kyi cho ga phrin las dpal ster JKW-KABUM-21-ZHA-005.pdf
Location mkhyen brtse'i bka' 'bum
Volume 21, sde tshan 5, Pages 353-365 (Folios 1a to 7a3)
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation 'jam dbyangs mkhyen brtse'i dbang po. lhag pa'i lha kun la 'jug pa'i bsreg blugs kyi cho ga phrin las dpal ster. In 'jam dbyangs mkhyen brtse'i dbang po'i bka' 'bum, Vol. 21: 353-365. Khams sde dge rdzong sar dgon: Rdzong sar blo gros phun tshogs, 2020.
Genre Fire Offerings - sbyin sreg
Colophon

།ཅེས་ལྷག་པའི་ལྷ་ཀུན་ལ་ཉེ་བར་འཇུག་པའི་བསྲེག་བླུག་གི་ཆོ་ག་འདི་ནི་ཀུན་མཁྱེན་ཆེན་པོའི་མན་ངག་གཙོ་བོར་བཟུང་སྟེ་ཉུང་ངུར་བཀོད་པ་ཀུན་ཏུ་དགེ་བར་གྱུར་ཅིག །མངྒ་ལཾ། །དགེའོ།

ces lhag pa'i lha kun la nye bar 'jug pa'i bsreg blug gi cho ga 'di ni kun mkhyen chen po'i man ngag gtso bor bzung ste nyung ngur bkod pa kun tu dge bar gyur cig__/mang+ga laM/__/dge'o/

1 Texts in this Section (sde tshan or chos tshan)

353-365
ལྷག་པའི་ལྷ་ཀུན་ལ་འཇུག་པའི་བསྲེག་བླུགས་ཀྱི་ཆོ་ག་ཕྲིན་ལས་དཔལ་སྟེར།
 lhag pa'i lha kun la 'jug pa'i bsreg blugs kyi cho ga phrin las dpal ster
Fire Offerings - sbyin sreg
 Text page
View PDF
འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
[edit]
༄༅། །ལྷག་པའི་ལྷ་ཀུན་ལ་འཇུག་པའི་བསྲེག་བླུགས་ཀྱི་ཆོ་ག་ཕྲིན་ལས་དཔལ་སྟེར་ཞེས་བྱ་བ་བཞུགས་སོ།། །།

གདོད་ནས་འགྱུར་མེད་རྣམ་ཀུན་མཆོག་ལྡན་དབྱིངས། །ཟུང་འཇུག་སྒྱུ་འཕྲུལ་དྲྭ་བའི་ཕྱག་རྒྱ་ཅན། །ལྷག་པའི་ལྷ་དང་དབྱེར་མེད་བླ་མ་ལ། །བཏུད་ནས་ཕྲིན་ལས་དཔལ་སྟེར་ཆོ་ག་བཤད། །དེ་ལ་འདིར་བླ་མེད་ཀྱི་དཀྱིལ་འཁོར་ཟབ་མོའི་བསྙེན་པར་ཞུགས་པའི་ཁ་སྐོང་ངམ། །གཞན་དུ་དམ་ཚིག་ཉམས་ཆག་ཞི་བ་སོགས་ཕྲིན་ལས་མྱུར་དུ་འགྲུབ་པར་འདོད་པས་རྩོམ་པར་བྱ་བའི་ཡན་ལག་སྟེ། དཔལ་གསང་བ་སྙིང་པོར། །དབྱིབ་དང་ཁ་དོག་ཚད་ལྡན་པར། །ཞལ་དུ་གྱུར་པའི་མེ་བུས་ལ། །བཟའ་བཏུང་བྲོ་བའི་ཚོགས་རྣམས་ཀྱིས། །ལས་བཞིའི་མཆོད་པ་རབ་ཏུ་སྦྱིན། །ཞེས་པ་ལྟར་གྱི་དགོངས་དོན་དང་འབྲེལ་བར་བསྲེག་བླུག་གི་ཆོ་གའི་རིམ་པ་ཟབ་ཅིང་རྒྱ་ཆེ་བའི་ཚོགས་རྣམས་གཞན་དུ་ཤེས་ལ། འདིར་སྤྲོས་པ་ཉེ་བར་བསྡུས་པའི་ཚུལ་ལ་སྦྱོར་དངོས་རྗེས་གསུམ་ལས། དང་པོ་ནི། གཞི་མ་དུལ་བ་ཡིན་ན་ཨ་ཀཱ་རོས་བཞི་བདག་ལ་གཏོར་མ་བསྔོ་ཞིང་ཕྲིན་ལས་བཅོལ། ཧེ་རུ་ཀའི་སྔགས་ཀྱིས་ཀུན་རྫོབ་ཙམ་དུ་སྦྱངས་རྗེས་རང་བཞིན་མེད་པའི་ཆོས་ཉིད་དྲན་པར་བྱ་བ་ནི་དོན་དམ་པའི་སྦྱང་བ་ཏེ་ཤུ་ནྱཱ་ཏའི་སྔགས་དང་བཅས་པ་བརྗོད། ཁྱད་པར་རྫས་གསོགས་ནི། དམིགས་བསལ་རྒྱུད་ལུང་མན་ངག་རང་རང་གི་གཞུང་ལས་བྱུང་བའི་རྗེས་སུ་མཐུན་པར་བྱ་ལ། སྤྱི་ཙམ་དུ་ཞི་བ་ལ་བཀྲ་ཤིས་པའི་ས་ལ་ཐབ་ཁུང་ཟླུམ་པོ་རྡོ་རྗེས་མཚན་པ། རྒྱས་པ་ལ་རྒྱལ་པོའི་བང་མཛོད་ཀྱི་ས་ལ་ཐབ་ཁུང་གྲུ་བཞི་རིན་པོ་ཆེས་མཚན་པ། དབང་ལ་ཚོང་དུས་དང་སྨད་འཚོང་མ་གནས་པའི་ས་ལ་ཟླ་གམ་པདྨ་ལྕགས་ཀྱུས་མཚན་པ། དྲག་པོ་ལ་ཕུང་ཤུལ་དང་དུར་ཁྲོད་ཀྱི་ས་ལ་གྲུ་གསུམ་རྡོ་རྗེ་སྔོན་པོ་རྭ་གདེང་པས་མཚན་པ་སྟེ། མཆོག་གི་ལས་ལ་ཞི་བ་ལྟར་རོ། །དེ་ཡང་ཤུལ་ས་དེ་རྣམས་ཀྱིས་སྟེགས་དང་། །དེ་སྟེང་རྡུལ་ཚོན་གྱིས་དབྱིབས་དང་མཚན་མ་བྲི་བ་སྟེ། །ཕྱི་རོལ་གྱི་ཟུང་བཞི་དང་ནང་གི་ལྟེ་བར་ཡང་སོ་སོའི་མཚན་མ་དང་ཐུགས་སྲོག་སོགས་བྲི་བར་བྱ་ཞིང་ཁ་དོག་ཀྱང་སོ་སོར་བསྒྱུར། རྩིག་པའི་ཤིང་ནི། ཞི་བ་ལ་བལ་བུ་དང་ལྕང་མ་སོགས་འོ་མ་ཅན་དང་རུང་མཐུན། རྒྱས་པ་ལ་འབྲས་བུ་ཅན། དབང་ལ་ཙནྡ་དམར་པོ་དང་མཛོ་མོ་ཤིང་སོགས་རོ་སྐྱུར་ལ་མདོག་དམར་བ། །དྲག་པོ་ལ་ཚེར་མ་ཅན་གྱི་དུག་ཤིང་དུག་ཁྲག་གིས་སྦགས་པ་དང་། གཞན་རྣམས་མར་ཁུས་ཉུག་པར་བྱ་ལ་དབྱིབས་ཀྱང་སོ་སོར་བརྩིག །དེ་བཞིན་ཡམ་ཤིང་ཡང་རྒྱུ་བུད་ཤིང་དང་འདྲ་བ་ལ་ཚད་མཐོ་གང་པ་རེ་བྱ་ཞིང་། །ཁྱད་པར་བསྲེག་རྫས་གཡས་དང་། །མཆོད་རྫས་གཡོན་དུ་བཤམ་པའི་དང་པོ་ནི། །ཞི་བ་ལ། །ཏིལ་དཀར། འབྲས་སོགས་ཁ་ཟས་དཀར་པོ་དང་། །ཙནྡ་དཀར་པོ་སོགས་དྲི་དཀར་པོའི་རིགས། ཙམ་པ་ཀ་སོགས་མེ་ཏོག་དཀར་པོ་རྣམས་གཙོ་བོར་གྱུར་པ་དང་། །རྒྱས་པ་ལ་སྟར ་ག་སོགས་འབྲུ། །གུར་གུམ་སོགས་མེ་ཏོག །དུརྦ་དང་རིན་པོ་ཆེ་དར་ཟབ་སོགས་འདུ་བྱ། དབང་ལ་ཙནྡ་དམར་པོ། གླང་སྣ་སོགས་ཁ་དོག་དམར་ཞིང་། རོ་སྐྱུར་བ་དང་སྣུམ་པའི་བཟའ་བཅའ། དྲག་པོ་ལ་ཡུངས་དཀར། གུ་གུལ། ལྕགས་ཕྱེ་ཤ་ཆེན་དུག་སྣའི་རིགས་རྣམས་འདུ་བྱ་ལ་གཙོ་བོར་མན་ངག་གི་རྫས་གཅིག་པུ་བརྟེན་ཀྱང་རུང་ངོ་། །སྤྱིར་ཡང་དཀར་གསུམ་མངར་གསུམ་དྲི་བཟང་གིས་སྦག་པའི་ཞོ་ཟན་དང་། །འབྲུ་དང་རིན་པོ་ཆེ་དར་ཟབ་སྣ་ཚོགས་པ། །མར་ཁུ། གོས་ཟུང་། སོ་རྩི་སོགས་དང་། ལས་མཐུན་གྱི་མེ་དར་རྣམས་འདུ་བྱ་ལ། དེ་ཡང་བསྲེག་རྫས་སྔ་མ་རྣམས་འཇིག་འདས་ཀྱི་ཕྱིར་དུ་ཚར་གཉིས་སུ་བཤམ་མོ། །མཆོད་རྫས་ལ། །འཇིག་རྟེན་འདས་མ་འདས་ཀྱི་གཏོར་མ་དབྱིབས་དང་ཁ་དོག་སོགས་སོ་སོར་བྱ་ལ། དེ་བཞིན་ལས་བུམ། ཉེར་སྤྱོད། སྤྲོ་ན་ཚོགས་ཀྱི་ཡོ་བྱད་ཀྱང་འདུ་བྱ་ལ། འདུག་སྟངས་དང་ཆོས་གོས་དུས་སོགས་ཀྱང་སོ་སོར་ངེས་པའོ། །གཉིས་པ་དངོས་གཞི་ལ་གསུམ། འཇིག་རྟེན་པའི་མེ་ལྷ་མཆོད་པ། དཀྱིལ་འཁོར་གྱི་འཁོར་ལོ་མཆོད་པ། །མེ་ལྷར་གཏོང་རག་གོ། །དང་པོ་སྤྱིར་དཀྱིལ་འཁོར་གྱི་བདག་བསྐྱེད་སྔོན་དུ་འགྲོ་བས་བྱ་བ་རྫོགས་རྗེས་སམ། རབ་གནས་དང་སྒྲུབ་མཆོད་སོགས་ལ་བདག་བསྐྱེད་ལོགས་སུ་འགྲོ་མི་དགོས་ཤིང་། རང་བྱུང་དུ་བདུད་རྩི་འཁྱིལ་བའི་སྔགས་ཀྱིས་ལས་བུམ་སྒྲུབ། ཁྱད་པར་ཉེར་སྤྱད་བྱིན་གྱིས་བརླབ་པ་ནི་རྡོར་དྲིལ་ཨ་མྲྀས་ཏས་བསང་། སྭ་བྷཱ་ཝས་སྦྱངས། ཧཱུཾ། ཐབ་ཤེས་ཟུང་འཇུག་ཆོས་ཉིད་མཚོན། །འདས་དུས་འགྲོ་རྣམས་སད་པ་དང་། །འགྲོ་རྣམས་སྨིན་པར་བྱ་བའི་ཕྱིར། །རྡོ་རྗེ་གསོར་ཞིང་དྲིལ་བུ་དཀྲོལ། །ཨོཾ་བཛྲ་གྷནྜེ་ཧཱུྃ་ཨཱཿ ཞེས་བརྗོད་ཅིང་འཁྱུད་རྒྱ་བྱ། ཡོ་བྱད་ཐམས་ཅད་ལ་དམིགས་ནས་བསང་སྦྱངས། སྟོང་པའི་ངང་ལས་མཆོད་རྫས་དང་བསྲེག་རྫས་ཐམས་ཅད་རང་རང་གི་མིང་ཡིག་དང་པོ་ཐིག་ལེས་བརྒྱན་པ་འོད་དུ་ཞུ་བ་ལས་བྱུང་བའི་རྫས་སོ་སོའི་དངོས་པོ་བདུད་རྩིའི་རང་བཞིན་ཅན་ཟད་མི་ཤེས་པར་གྱུར། ཨོཾ་བཛྲ་ཨརྒྷཾ་སོགས་དང་། ཨོཾ་ཧཱུྃཿཏྲཱཾ་ཧྲཱི་ཨཱཿ མུྃ་ལཱྃ་མྃ་པྃ་ཏྃ༔ སརྦ་ཛྙཱ་ན་པཉྩ་ཨ་མྲྀ་ཏེ་རཀྟ་བྷ་ལིངྟ་ག་ཎ་ཙཀྲ་བྷོ་དྷི་ཙིཏྟ་ཨཱཿཧཱུྃ༔ ཞེས་བརྗོད། དེ་ནས་ཐབ་ཁུང་བསང་སྦྱང་། ཆོས་རྣམས་སྐྱེ་མེད་རྣམ་ཀུན་མཆོག་ལྡན་དབྱིངས། །སྣ་ཚོགས་སྒྱུ་འཕྲུལ་འགགས་མེད་རྡོ་རྗེའི་སྤྲིན། །ལས་བཞི་རྫོགས་བྱེད་ལྷུན་གྲུབ་ཐབ་ཀྱི་དབུས། །གོས་དཀར་ཌཱཀྐིའི་ངོ་བོར་རོ་གཅིག་པའི། །ཆགས་བྲལ་བདེ་བ་ཆེན་པོའི་མེ་དཔུང་འབར། །ཨོཾ་སརྦ་ཛྙཱ་ན་ཛྭ་ལ་རཾ། ཞེས་ལས་མཐུན་གྱི་མེ་སྦར། ལས་བུམ་གྱི་ཆུས་བསང་ལ། ཨོཾ་ཀུ་ཤ་འདི་ནི་གཙང་ཞིང་དགེ། །ས་ལ་སྐྱེས་པའི་སྙིང་པོ་མཆོག །དཀོན་མཆོག་གསུམ་གྱི་དག་བྱེད་ཡིན། །ཚངས་པའི་ཡང་དག་བྱེད་པ་སྟེ། །དེ་ཡིས་བདག་ཅག་ཐམས་ཅད་ལ། །བགེགས་རྣམས་ཐམས་ཅད་ཞི་བར་མཛོད། །ཅེས་བཀྲམ། དེ་དབུས་རྃ་ལས་ཡོངས་གྱུར་མེ་ལྷ་ནི། །ལས་མཐུན་རྒྱན་རྫོགས་འོད་ཟེར་ཕྲེང་བས་དཀྲིགས། །ཞལ་གཅིག་ཕྱག་གཉིས་བགྲང་ཕྲེང་གུནྡྷེ་བསྣམ། །སྐུ་གསུང་ཐུགས་ལས་རྡོ་རྗེ་འབྲུ་གསུམ་མཚན། །དེ་ལས་འོད་འཕྲོས་དམ་ཚིག་སྤྱན་དྲངས་བསྟིམ། །སྤྱན་འདྲེན་པ་ནི། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ཨགྣི་རཱ་ཛ་རྀ་ཥི་བཛྲ་ས་མ་ཡ་ཛཿ ཛཿཧཱུྃ་བྃ་ཧོཿ ཨརྒྷཾ་སོགས་ཀྱིས་ཉེར་སྤྱོད་ཕུལ། བསྟོད་པ་ནི། ཧཱུྃ། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱ་པོ་ཌཱཀྐིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་སྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །མེ་ལྷ་གདངས་པའི་ལྗགས་རྡོ་རྗེའི་སྦུ་གུས་སྲེག་བླུག་གི་རྒྱུན་དྲངས་ཏེ་གསོལ་བར་བསམས་ལ། ཨོཾ་བི་མ་ལེ་ཨགྣེ་ཡེ་སྭཱ་ཧཱ། །ཞེས་མར་ཁུ་བླུག་གཟར་བདུན་གྱིས་བཀང་བའི་དགང་བླུག་ལ་སྦྱར་ལ་ཕུལ། །ཨོཾ་ཨགྣེ་ཡེ་བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་ཉེས་ལྟུང་ཐམས་ཅད་ཤཱནྟཱིཾ་ཀུ་རུ་ཡེ་སྭཱ་ཧཱ༔ དེ་བཞིན། ཚེ་བསོད་དཔལ་འབྱོར་ཐམས་ཅད་པུཥྟིཾ་ཀུ་རུ་ཡེ་སྭཱ་ཧཱ། བདག་སྒྲུབ་པ་པོའི་ཁམས་གསུམ་སྣོད་བཅུད་ཐམས་ཅད་ཝ་ཤཾ་ཀུ་རུ་ཡེ་སྭཱ་ཧཱ། གནོད་བྱེད་དགྲ་བགེགས་ཐམས་ཅད་མཱ་ར་ཡ་ཕཊ༔ ཞེས་འདོད་གསོལ་སྦྱར་བ་ལན་གསུམ་གྱིས་བྱོན་སྐྱེམ་ཕུལ་རྗེས། ལག་གིས་བཟུང་དུ་བཏུབ་པ་རྣམས་མཐེབ་སྲིན་གྱིས་དབུལ། །དེ་ལས་གཞན་རྣམས་བླུགས་གཟར་གྱིས་སོ་སོར་དབུལ་སྔགས་ནི། །ཡམ་ཤིང་ལ། ཨོཾ་སེ་ཤེ་ཧ་སྟ་བཛྲ་སྭཱ་ཧཱ། དེ་བཞིན་མར་ཁུ་ལ། ཨོཾ་བི་མ་ཡེ་ཨགྣེ། ཏིལ། སརྦ་པ་པཾ་ད་ཧ་ན་བཛྲ། ཟས་མཆོག །སརྦ་སཾ་བྷ་དེ། འབྲས་བཛྲ་པུཥྟ་ཡེ། སྲན་མ། མ་ཧཱ་བཱ་ལ་ཡ། གྲོ། བཛྲ་གྷ་སྨ་རི། དུརྦ། བཛྲ་ཨཱ་ཡུ་ཥེ། ཀུ་ཤ །ཨ་པྲ་ཏི་ཧ་ཏ་བཛྲ་ཡེ། །རྫས་གཞན་རྣམས། ཨ་ཧ་ར་ཨ་ཧ་ར་བུ་ལེ་མ་ཧཱ་ད་ར་ཕེ་ཤ་ཤཱནྟི་ཀུ་རུ་ཡེ། ཞེས་སོ་སོའི་ཐོག་མ་ལ་ཨོཾ་དང་མཐར་སྭཱ་ཧཱ་སྦྱར་རོ། །བསྡུ་ན་ཐམས་ཅད་བདུད་རྩིའི་རང་བཞིན་དུ་ཤེས་པས་སྔགས་སྔ་མ་དག་གིས་དབུལ་བས་ཀྱང་འཐུས་ལ། ། ༈ དེ་ལྟར་བདུན་ལ་སོགས་པའི་རྗེས་འདོད་གསོལ་སོ་སོར་སྦྱར་བ་ཉེར་གཅིག་ལ་སོགས་ཅི་རིགས་པར་ཕུལ་ནས་ཨ་ཀཱ་རོའི་སྔགས་ཀྱིས་གཏོར་མ་ཕུལ་ཞིང་བསྟོད་པར་བྱ། །ཡིག་བརྒྱས་ནོངས་པ་བཤགས། ན་མོ་རིག་པའི་རྒྱལ་པོ་ཁྱོད་ཀྱིས་བསྲེག་བླུག་གི་རྫས་རྣམས་ལྷའི་ཞལ་དུ་དབུལ་བ་དང་། ཡེ་ཤེས་ཀྱི་མེར་བྱིན་གྱིས་བརླབས་ནས་ཕྲིན་ལས་ཐམས་ཅད་ཡོངས་སུ་འགྲུབ་པར་མཛད་དུ་གསོལ། བཛྲ་མུ། །ཡེ་ཤེས་པ་ཐབ་ཀྱི་ཤར་ལྷོར་གཤེགས། །དམ་ཚིག་པ་མེ་འབར་བའི་རྣམ་པར་གྱུར་པར་བསྒོམ། །གཉིས་པ་ནི། ཨ་མྲྀ་ཏས་བསང་། སྭཱ་བྷ་ཝས་སྦྱང་། མེ་ལྷའི་ལྟོ་བ་ཡངས་ཤིང་རྒྱ་ཆེ་བ་དག་ཆེན་ཡེ་ཤེས་ཀྱི་རོལ་པ་འོག་མིན་ལྷུན་གྱིས་གྲུབ་པའི་དཀྱིལ་འཁོར་ཆེན་པོའི་དབུས་སུ་ཡེ་ཤེས་པའི་ལྷ་ཚོགས་ཐམས་ཅད་སྐད་ཅིག་གིས་གསལ་ལ་མ་འདྲེས་པར་རྫོགས་པའི་གནས་གསུམ་ལས་འོད་ཟེར་འཕྲོས་པས་རབ་འབྱམས་རྒྱལ་བའི་དཀྱིལ་འཁོར་ཐམས་ཅད་ཡི་དམ་ལྷའི་རྣམ་པར་བཛྲ་ས་མཱ་ཛ། །ཞེས་པའམ། དམིགས་གསལ་སོ་སོའི་སྒྲུབ་དཀྱིལ་མདུན་བསྐྱེད་ལྟར་རམ་བདག་བསྐྱེད་ཉིད་ཁ་བསྒྱུར་བས་འགྲུབ་ལ། སྤྱན་འདྲེན་ནི། ཧཱུྃ། །དམིགས་མེད་མཁའ་ལྟར་ཁྱབ་ཅིང་དག་པ་ལ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེའི་ངང་ཉིད་ཆོས་སྐུར་རོལ་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །བཛྲ་ས་མཱ་ཡ་ཛཿ བཞུགས་སུ་གསོལ་བ་ནི། ཀུན་ཏུ་བཟང་མོ་གསང་བའི་བྷ་ག་ལ། །རྒྱལ་བའི་དཀྱིལ་འཁོར་རབ་འབྱམས་མ་ལུས་ཀུན། །འདུ་འབྲལ་མེད་པའི་ངང་དུ་རོ་གཅིག་པའི། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །ཛཿཧཱུྃ་བྃ་ཧོ༔ མ་ཧཱ་སུ་ཁ་ཧོ༔ མཆོད་པ་ནི། ཧཱུྃ །བླ་མེད་མཆོག་གི་མཆོད་པ་ཆེན་པོ་ནི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ཨོཾ་སརྦ་ཏ་ཐཱ་ག་ཏ་རཱུ་པ་སོགས་ནས་སྥཪྴེའི་བར་དང་། སརྦ་པཉྩ་རཀྟ་བ་ལིཾ་ཏ་བྷོ་དྷི་ཙིཏྟ་ཧོ༔ བསྟོད་པ་ནི། ཧཱུྃ། །རྡོ་རྗེ་གླུ་མ་ལས་ཀྱི་ཕྱག་རྒྱ་ཡིས། །དབྱངས་ཀྱི་ཡན་ལག་ཆོས་ཀྱི་ཕྱག་རྒྱའི་སྤྲིན། །རིགས་ལྔའི་དམ་ཚིག་ཕྱག་རྒྱ་ལ་སྦྱར་ནས། །ལྷར་སྣང་ཕྱག་རྒྱ་ཆེན་པོར་བསྟོད་པར་བགྱི། །དགང་བླུག་ཁ་སྦྱར་ལ། དཀྱིལ་འཁོར་ལྷ་ཚོགས་རྣམས་ཀྱི་ལྗགས་རྡོ་རྗེའི་སྤུ་གུ་ཅན་གྱིས་བསྲེག་བླུགས་ཀྱི་བདུད་རྩིས་རྒྱུན་དྲངས་ནས་གསོལ་བར་བསམས་ལ། སོ་སོའི་རྩ་སྔགས་ལན་བདུན་དང་བཅས་མར་ཁུ་བླུག་གཟར་བདུན་གྱིས་བཀང་བ་ཕུལ་རྗེས། རྣལ་འབྱོར་པ་བདག་དང་ཡོན་གྱི་བདག་པོའི་དམ་ཚིག་ཉམས་ཆག་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་འདོད་གསོལ་སྦྱར་བ་ལན་གསུམ་གྱིས་བྱོན་སྐྱེམས་ཕུལ། བསྙེན་སྒྲུབ་ཀྱི་ཁ་སྐོང་ལ་རྩ་སྔགས་འབའ་ཞིག་གིས་དབུལ་བ་དང་། །གཞན་དུ་སྔ་མ་ལྟར་རྫས་སྔགས་སྦྲེལ་བ་ཅི་ནུས་དང་། །གྲངས་གསོག་ལ། །རྩ་སྔགས་ཀྱི་རྗེས་སུ། ཤིནྟཾ་ཀུ་རུ་ཡེ་སྭཱ་ཧཱ༔ སོགས་སྔགས་ཀྱི་འདོད་གསོལ་སྦྱར་བ་ཁོ་ནས་དབུལ་བ་རྒྱུད་སྡེ་ཆེན་པོའི་དགོངས་པ་ཡིན་ཞིང་། རྫས་ཀྱང་ཞི་བ་ལ་ཏིལ། རྒྱས་པ་ལ་རིན་པོ་ཆེ་དང་དར་ཟབ། དབང་ལ་མེ་ཏོག་གམ་འབྲུ་དམར་པོ་ཆང་གིས་སྦག་པ། དྲག་པོ་ལ་ཡུངས་དཀར་དུག་ཁྲག་གིས་སྦག་པ་བུངས་བསྐྱེད་ནས་དབུལ་ལ། ཁྱད་པར་ཏིང་ངེ་འཛིན་ཁོ་ན་གཙོ་ཆེ་བའི་ཕྱིར་དཀྱིལ་འཁོར་གྱི་ལྷ་ཚོགས་ཐམས་ཅད་ལ་བསྲེག་བླུག་གི་མཆོད་པ་ཕུལ་བས་ཐུགས་དགྱེས་པ་ཆེན་པོའི་རང་བཞིན་ལས་བྱུང་བའི་འོད་ཟེར་དཀར་པོས་འཇིག་རྟེན་གྱི་ཁམས་ཐམས་ཅད་ཁྱབ། སངས་རྒྱས་ཐམས་ཅད་ལ་མཉེས་པའི་མཆོད་པ་ཕུལ། །སེམས་ཅན་མ་ལུས་པ་སྒྲིབ་གཉིས་རྒྱུ་དང་བཅས་པ་ཞི་བར་བྱས་པར་བསམ། དེ་བཞིན་གཞན་བཞི་པོ་ལ་ཡང་དམིགས་པའི་བདེ་ཁ་བསྒྱུར། ཁྱད་པར་མཆོག་གི་ཕྲིན་ལས་ལ་ཞི་རྒྱས་གཉིས་ཀའི་རྫས་འབུལ་ཞིང་། །ཆང་གི་སྙིང་ཁུ་ལྷག་པར་དབུལ་ལ་འདོད་གསོལ་ནི། སརྦ་ཏ་ཐཱ་ག་ཏ་མ་ཧཱ་མུ་ཏྲ་པུ་ཛ་ཧོ༔ ཞེས་བཏགས། དེ་ལྟར་ལས་བཞི་གང་ཡང་རུང་བ་ལ་རྫས་རྫོགས་ནས། ཡེ་ཤེས་མེ་དང་གཉིས་མེད་འབར་བ་ཡི། །ཕྱག་རྒྱ་ཆེན་པོ་བསྲེག་བྱ་ཟ་བའི་ཞལ། །སྲེག་རྫས་བདུད་རྩིའི་མཆོད་པས་མཉེས་གྱུར་ནས། །ཞི་བའི་ཕྲིན་ལས་ལྷུན་གྱིས་གྲུབ་པར་མཛོད། །ཅེས་སོགས་སོ་སོར་ཁ་བསྒྱུར་བཅས་ལན་གསུམ་དབུལ། གོས་ཟུང་། གང་ལ་རེག་ན་འཇམ་པའི་ལྷ་རྫས་ཀྱང་། །དབང་པོའི་ཚོན་གྱིས་བསྒྱུར་བའི་སྨིག་རྒྱུ་ཡི། །བར་སྣང་ཟ་འོག་བཅལ་དུ་བཀྲམ་པ་ལྟར། །འབར་བས་འགྲོ་ཀུན་བཟོད་པའི་གོས་ཐོབ་ཤོག །ཨོཾ་བཛྲ་ཝསྟྲ་ཡེ་སྭཱ་ཧཱ། །ཞེས་དང་། ཨོཾ་བཛྲ་ཏཾ་བུ་ལ་ཡེ་སྭཱ་ཧཱ། ཞེས་པས་རྡོ་ཐལ་མེད་པའི་སོ་རྩི་འཇམ་པོ་དབུལ། རྡོ་རྗེ་ལྷ་མོ་བཅུ་དྲུག་གིས་མཆོད། བསྟོད་པ་གང་འོས་མཐར། སྤྲོས་པ་ལ་དགའ་བས་བཟླས་པ་བྱ་བར་འདོད་ན། ལྷ་ཚོགས་རྣམས་ཐུགས་ཀར་པད་ཉིའི་སྟེང་རང་རང་གི་ས་བོན་སྔགས་ཕྲེང་དང་བཅས་པ་ལས་འོད་ཟེར་དཀར་པོས་སྣོད་བཅུད་ཐམས་ཅད་ཁྱབ་པར་འཕྲོས། །རྒྱལ་བ་ཐམས་ཅད་ལ་མཉེས་པའི་མཆོད་པ་ཕུལ། བདག་གཞན་ཐམས་ཅད་ཀྱི་སྒྲིབ་པ་གཉིས་རྒྱུ་དང་བཅས་བཅོམ་པར་བསམས་ལ། རྩ་སྔགས་མཐར། སརྦ་ཤཱནྟིཾ་ཀུ་རུ་ཡེ་སྭཱ་ཧཱ༔ ཞེས་བཏགས་པ་ཅུང་ཟད་བཟླ། དེ་བཞིན་ལས་བཞི་གཞན་བཞི་པོ་ལའང་འབྱིན་འཇུག་བྱ། ཚོགས་ཀྱི་འཁོར་ལོ་ཚིམ་པ་དྲུག་དང་ལྡན་པས་མཆོད། འཇིགས་པ་བརྒྱད་སྐྱོབས་ཞི་བའི་དངོས་གྲུབ་སྩོལ། །སོགས་ཀྱིས་བསྐུལ་ལ། རྩ་སྔགས་མཐར། ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧོ༔ ཞེས་པས་དངོས་གྲུབ་བླང་རྗེས་བྱོན་སྐྱེམས་དགང་བླུག་གསུམ་ཕུལ། མ་འབྱོར་པ་དང་ཉམས་པ་དང་སོགས་ཀྱི་མཐར་ཡིག་བརྒྱ་དང་བཅས་ནོངས་པ་འཆགས། ཨོཾ་ཁྱེད་ཀྱི་སེམས་ཅན་དོན་ཀུན་མཛད་སོགས་མཐར། བཛྲ་མུས་ཡེ་ཤེས་པ་གཤེགས་སུ་གསོལ། གསུམ་པ་ནི། ཨ་མྲྀ་ཏས་བསང་། སྭ་བྷཱ་ཝས་སྦྱང་། དམ་ཚིག་མེ་ལྷ་རང་བཞིན་ཡོངས་སུ་རྫོགས་པར་གསལ་བའི་གནས་གསུམ་ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས། །བཛྲ་ས་མཱ་ཡ་ཛཿ ཛཿཧཱུྃ་བྃ་ཧོཿ བྱོན་སྐྱེམ་དགང་བླུག་གསུམ་ཕུལ་ཞིང་། ཨོཾ་བི་མ་ལེ་ཨགྣ་ཡེ་སྭཱ་ཧཱ། ལན་གསུམ། གོས་ཟུང་དང་སོ་རྩི་དབུལ། མེ་བསོས་ཏེ་གཏོང་རག་གི་ཚུལ་དུ་རྫས་ལྷག་མ་རྣམས་སོ་སོའི་སྔགས་མཐར། ཨོཾ་ཨགྣ་ཡེ་རི་ཥི་རཱ་ཛཱ་ཡ། །བདག་ཅག་དཔོན་སློབ་ཡོན་མཆོད་ཐམས་ཅད་ཀྱི་ཆོ་ག་ལྷག་ཆད་འགལ་འཁྲུལ་ཉམ་ཆག་ཉེས་ལྟུང་ཐམས་ཅད་ཤཱིནྟཾ་ཀུ་རུ་ཡེ་སྭཱ་ཧཱ། ཞེས་པས་ཕུལ། སྔ་མ་ལྟར་མཆོད་ཅིང་བསྟོད། ཨ་ཀཱ་རོས་གཏོར་མ་བསྔོ་ལ་ཕྲིན་ལས་བཅོལ། ནོངས་པ་བཤགས། །གཤེགས་སུ་གསོལ་བ་ནི། དོན་གཉིས་བསྒྲུབས་པའི་མེ་ཡི་ལྷ། །རང་རང་ཡུལ་དུ་གཤེགས་ནས་ཀྱང་། །སླར་ཡང་ཕྲིན་ལས་སྒྲུབ་པའི་ཕྱིར། །དུས་སུ་འབྱོན་པར་མཛད་དུ་གསོལ། །བཛྲ་མུ། །ཡེ་ཤེས་པ་གཤེགས། དམ་ཚིག་པ་ལྟེ་བའི་ཨ་ཐུང་ལ་བསྡུ། རྗེས་ཀྱི་བྱ་བ་ནི། །དགེ་བ་བསྔོ་ཞིང་སྨོན་ལམ་གདབ། ཤིས་པ་བརྗོད་པས་མཐའ་བརྒྱན་པར་བྱ་ཤིང་། དྲག་པོའི་སྦྱིན་བསྲེག་དུག་ཁྲག་གི་ཆུས་གཞིལ་ལ་གཞན་བཞི་པོ་མེ་རང་ཞིར་འཇོག །ལོང་ཁྱབ་ཀྱིས་མ་ཁོམ་ན། ཞི་བ་ལ་འོ་མ། རྒྱས་པ་ལ་དྲི་སེར་པོ། དབང་ལ་ཙནྡ་དམར་པོའི་ཁུ་བའམ་ཆང་དང་བསྲེས་པའི་ཆུས་བསད། ཞི་བ་དང་མཆོག་དབང་གི་ལས་གསུམ་པོའི་ཐལ་བ་རི་རྩེ་མཐོན་པོའི་རླུང་ལ་བསྐྱལ། རྒྱས་པ་མཛོད་དུ་བུམ་གཏེར་རྩལ། །དྲག་པོའི་ཐལ་བ་གཞི་མདོར་མནན། །ལས་རྗེས་མི་མངོན་པར་བསྡུའོ། །དེ་ལྟར་ཕྱི་དོན་དུ་གཙོ་བོར་སྨོས་པའི་སྦྱིན་བསྲེགས་ཀྱི་ཆོ་ག་སྤྲོས་པ་ཉུང་ངུར་བསྡུས་པ་སྟེ། གཞན་དུ་ན་ཚིམ་པ་དྲུག་ལྡན་པའི་ཚོགས་ཀྱི་འཁོར་ལོའི་མཉེས་པར་བྱ་བ་དང་། རྡོ་རྗེའི་ལུས་ལ་གདོད་ནས་གྲུབ་པའི་ཉེ་བའི་འདུ་བ་ལྷན་སྐྱེས་བདེ་སྟོང་བདུད་རྩིའི་མཆོད་པར་བྱ་བ་དག་ནི་ནང་དང་གསང་བའི་བསྲེག་བླུག་སྟེ་སྐབས་འདིར་སྨོས་པར་བྱ་བའི་ཡུལ་མ་ཡིན་ནོ། །གོས་དཀར་ཌཱཀྐིས་འཁྱུད་པའི་ལྷའི་ཕྱག་རྒྱར། །མཆོད་པའི་སྤྲིན་གྱིས་མཉེས་པའི་བསོད་ནམས་ཚོགས། །བཟོད་ནས་དག་པའི་ཡེ་ཤེས་ཆེན་པོའི་ངང་། །མཉམ་སྦྱོར་མཆོག་ཐུན་ཕྲིན་ལས་སྦྱིན་གྱུར་ཅིག །ཅེས་ལྷག་པའི་ལྷ་ཀུན་ལ་ཉེ་བར་འཇུག་པའི་བསྲེག་བླུག་གི་ཆོ་ག་འདི་ནི་ཀུན་མཁྱེན་ཆེན་པོའི་མན་ངག་གཙོ་བོར་བཟུང་སྟེ་ཉུང་ངུར་བཀོད་པ་ཀུན་ཏུ་དགེ་བར་གྱུར་ཅིག །མངྒ་ལཾ། །དགེའོ། །

Footnotes

Other Information

Retrieved from "https://khyentselineage.tsadra.org/index.php?title=JKW-KABUM-21-ZHA-005&oldid=57040"
Khyentse Lineage
Collected Works of the Masters
A Tsadra Foundation initiative designed to house the writings and revelations of the masters of the Khyentse lineage.
Join the Tsadra Foundation mailing list:

Tsadra Foundation
Translation & Transmission Conference
DharmaCloud Tibetan eBooks
Buddha-Nature
Śāntideva's Life and Works
Rinchen Terdzö Chenmo
Damngak Rinpoche Dzö
Dharma Dictionary

About us
Privacy policy
General disclaimer
Site guide

Project Description

Welcome to the Khyentse Lineage Project, a Tsadra Foundation initiative designed to house the writings and revelations of the masters of the Khyentse lineage in a digital format that allows for open access to these materials in authoritative modern Tibetan editions for the sake of scholars, translators, and practitioners the world over.

About us

© Tsadra Foundation. Please feel free to use this website and its content in accordance with fair use policies for teaching, scholarship, education, and research.
See General disclaimer for more information.