འཕགས་མ་སོ་སོར་འབྲང་མ་དཀར་མོའི་མན་ངག་ཉེར་མཁོའི་ཡི་གེ་བདུད་རྩིའི་ཆུ་སྐྱེས།

🚧 This website is under continued development. We appreciate your patience!

Previous Text Back to Volume PageNext Text

Wylie title	'phags ma so sor 'brang ma dkar mo'i man ngag nyer mkho'i yi ge bdud rtsi'i chu skyes
Location	mkhyen brtse'i bka' 'bum Volume 21, sde tshan 2, Text 10, Pages 177-187 (Folios 30a5 to 35a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'phags ma so sor 'brang ma dkar mo'i man ngag nyer mkho'i yi ge bdud rtsi'i chu skyes. In 'jam dbyangs mkhyen brtse'i dbang po'i bka' 'bum, Vol. 21: 177-187. Khams sde dge rdzong sar dgon: Rdzong sar blo gros phun tshogs, 2020.
Genre	Pith Instructions - man ngag
Deity	'phags ma so sor 'brang ma
Colophon	།ཅེས་པའང་རྒྱུད་ཀྱི་རྒྱལ་པོ་རྣམ་པ་གཉིས་རྗེ་བཙུན་གོང་མའི་གསུང་མཆན་འགྲེལ་པ་དང་བཅས་པ་དང་། བུ་སྟོན་རིན་པོ་ཆེའི་སམྦུ་ཊིའི་འགྲེལ་ཆེན། གཞན་ཡང་མན་ངག་གི་ཟིན་བྲིས་ཕྱག་ལེན་སོགས་ཀྱི་ཁུངས་ལ་གཏུགས་ཏེ་གཞན་ཕན་གྱི་བློས་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་མདོ་ཙམ་བྲིས་པ་སརྦ་དཱ་ཧི་ཏ་སུ་ཁཱ་ནཱཾ་སུ་ཤྲེ་ཡཿསྤུ་ཊཾ་བྷཱུ་ཡཱ་ཊ།།
	ces pa'ang rgyud kyi rgyal po rnam pa gnyis rje btsun gong ma'i gsung mchan 'grel pa dang bcas pa dang /__bu ston rin po che'i sam+bu Ti'i 'grel chen/__gzhan yang man ngag gi zin bris phyag len sogs kyi khungs la gtugs te gzhan phan gyi blos bya bral ba 'jam dbyangs mkhyen brtse'i dbang pos mdo tsam bris pa sarba dA hi ta su khA nAM su shre yaHspu TaM b+hU yA Ta/

1 Texts in this Section (sde tshan or chos tshan)

10 177-187	འཕགས་མ་སོ་སོར་འབྲང་མ་དཀར་མོའི་མན་ངག་ཉེར་མཁོའི་ཡི་གེ་བདུད་རྩིའི་ཆུ་སྐྱེས། 'phags ma so sor 'brang ma dkar mo'i man ngag nyer mkho'i yi ge bdud rtsi'i chu skyes Pith Instructions - man ngag	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

འཕགས་མ་སོ་སོར་འབྲང་མ་དཀར་མོའི་མན་ངག་ཉེར་མཁོའི་ཡི་གེ་བདུད་རྩིའི་ཆུ་སྐྱེས་ཞེས་བྱ་བ་བཞུགས་སོ། །ཨོཾ་སྭསྟི་སིདྡྷཾ། རིག་སྔགས་སྤྲིན་ལས་བདུད་རྩིའི་ཆར། །འབེབས་མཛད་སོ་སོར་འབྲང་མ་ལ། །བཏུད་ནས་དེ་ཡི་མན་ངག་གི། །ཡི་གེའི་ཆུ་སྐྱེས་འཛུམ་དཀར་བཞད། །འདི་ལ་གསུམ། བསྙེན་པ། སྒྲུབ་པ། ལས་ལ་སྦྱར་བའོ། །དང་པོ་ནི། གནས་གཙང་ཞིང་དབེན་པར་གུང་དུ་འདིའི་བྲིས་སྐུ་ཡོད་ན་དགྲམ། གང་ལྟར་ཡང་འབུལ་གཏོར་དཀར་ཟླུམ་ཆུ་གཉིས་སྔོན་འགྲོའི་ཉེར་སྤྱོད་བཅས་བཤམ། བླ་མེད་ཡིན་པས་དཀར་སྤྱད་དམིགས་བསལ་མི་དགོས། མཚམས་དམ་པར་བཅད་ལ་ཐུན་གསུམ་མམ་བཞིའི་རིམ་པས་ངོར་ཆེན་རྡོ་རྗེ་འཆང་ངམ་རྗེ་དཀོན་མཆོག་ལྷུན་གྲུབ་ཀྱི་གསུང་རབ་ལྟར་བདག་བསྐྱེད་བསྒོམ། ལྷའི་རྣལ་འབྱོར་ལ་སེམས་གཟུང་། གསལ་སྣང་བརྟན་པ་ན་དམིགས་པའི་འཕྲོ་འདུ་དང་བཅས་སྔགས་ཡི་གེ་བཅུ་དགུ་པ་འབུམ་ཕྲག་བཅུ་དགུའམ། དེ་བཞི་འགྱུར་རམ། བརྒྱད་འགྱུར་དུ་བཟླས་ན་ངེས་པར་འགྲུབ་ཅིང་དངོས་གྲུབ་ཀྱི་མཚན་མ་རྙེད་པར་འགྱུར་ལ། སྔ་ཐུན་ལྟ་བུའི་མཇུག་ཏུ་གཏོར་མ་མ་ཆག་པར་དབུལ། དེའང་གཏོར་མགྲོན་མདུན་གྱི་ནམ་མཁར་ཡན་ལག་བཞི་རྫོགས་སུ་བསྐྱེད་པའམ། སྐད་ཅིག་གིས་སྤྱན་དྲངས་པ་ལ་ཕུལ་ཀྱང་རུང་། གཞན་མཚམས་ཀྱི་སྤང་བླང་དང་སྦྱོར་དངོས་མཇུག་གི་བྱ་བ་རྣམས་བསྙེན་ཡིག་སྤྱི་འགྲོ་ལྟར་ཤེས་པར་བྱའོ། །གཉིས་པ་ནི། བསྙེན་པ་སྔོན་དུ་སོང་བས་དེའི་བོགས་དབྱུང་བའི་སླད། མདུན་དུ་སྟེགས་བུའི་དབུས་སུ་མཉྫིའི་ཁར་མཎྜ་ལར་དྲིའི་ཐིག་ལེ་དང་བཅས་པའི་མེ་ཏོག་གི་ཚོམ་བུ་གཅིག །མདུན་དུ་འབུལ་གཏོར་དཀར་ཟླུམ། བྱང་ཤར་ནས་བརྩམས་ཏེ་ཆུ་གཉིས་སྔོན་འགྲོའི་ཉེར་སྤྱོད་གཡས་སྐོར་དུ་བཤམ། མཆོད་པ་བྱིན་རླབས་ནས་བདག་བསྐྱེད་བཟླས་པའི་བར་བྱ། མཐར་བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། །ཞེས་འདོད་དོན་གསོལ། རང་གི་སྙིང་ག་ནས་འོད་ཟེར་འཕྲོས་པས་གདན་འོད་ཟེར་གྱི་རྣམ་པར་གྱུར་ཏེ་རང་ལ་ཐིིམ་པར་བསམ། མདུན་གྱི་ཚོམ་བུ་བསང་སྦྱངས། སྟོང་པའི་ངང་ལས་པཾ་ལས་སོགས་ནས། རྣམ་པར་སྣང་མཛད་ཀྱིས་དབུར་བརྒྱན་ཞེས་པའི་བར་བདག་བསྐྱེད་ལྟར་ལ། བདག་ཉིད་ཅེས་བའི་ཚིག་དོར། བདག་ལ་ཞེས་པར་འདི་ལ་ཞེས་བསྒྱུར། མཆོད་ཕྲེང་རྒྱས་པར། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་རྣམས། །འཕགས་མ་འཁོར་དང་བཅས་ལ་འབུལ། །འདོད་དགུའི་དངོས་གྲུབ་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་མ་ཧཱ་པྲ་ཏི་ས་རཱ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་བཞིན་དུ་ཞབས་བསིལ་དང་། པཱ་དྱཾ་སོགས་འདོན་པ་བསྒྱུར་བས་ཆུ་གཉིས་སྔོན་འགྲོའི་ཉེར་སྤྱོད་རོལ་མོ་དང་བཅས་པ་དབུལ་ཞིང་དྷརྨཱ་ར་ཎི་ཏ་བརྗོད། རིན་ཆེན་བདུན་མཚན་སྔགས་བསྒྱུར་བས་སྤྱི་ལྟར་དབུལ། འདོད་ཡོན་ལྔ་སྤྱི་ལྟར་ལ། མོས་བློས་འཕགས་མ་མཆོག་ལ་ཞེས་དང་། བཞེས་ཤིག་འདོད་རྒུའི་དངོས་གྲུབ་སྩལ་དུ་གསོལ། །ཞེས་དང་མཚན་སྔགས་བསྒྱུར། མཎྜལ་ཚོམ་བུ་སོ་བདུན་མའམ་བདུན་མ་ཅི་ནུས་དབུལ། དེ་ཙམ་མི་ནུས་ན་མཚན་སྔགས་སྔོན་འགྲོའི་ཆུ་གཉིས་ཉེར་སྤྱོད་རོལ་མོ་དང་བཅས་པས་མཆོད། བསྟོད་པ་ནི་རྡོ་རྗེ་དྲིལ་བུ་འཛིན་པས། སྲས་བཅས་རྒྱལ་བ་ཐམས་ཅད་ཀུན། །སྐྱེད་དང་རོལ་པའི་ཡུམ་གཅིག་པུ། །བཅོམ་ལྡན་སོ་སོར་འབྲང་མ་ལ། །དད་པའི་ཡིད་ཀྱིས་བསྟོད་པར་བགྱི། །པྲྃ་གི་ཡི་གེ་ལས་སྐྱེས་པ། །ཀུནྡ་ལྟར་དཀར་ཡིད་འཕྲོག་སྐུ། །ཞལ་གཅིག་ཕྱག་གཉིས་མཚན་དཔེས་མཛེས། །འཕགས་མ་མཆོག་ལ་ཕྱག་འཚལ་ལོ། །ཕྱག་གཡས་ཡེ་ཤེས་རལ་གྲི་འཕྱར། །འཇིགས་དང་སྡུག་བསྔལ་དྲྭ་བ་གཅོད། །གཡོན་པས་ཡིད་བཞིན་འཁོར་ལོ་ཡིས། །འདོད་པ་འཇོ་ལ་ཕྱག་འཚལ་ལོ། །སྣ་ཚོགས་དར་གྱི་ན་བཟའ་དང་། །རིན་ཆེན་མེ་ཏོག་གསར་པས་བརྒྱན། །གནག་སྣུམ་དབུ་སྐྲའི་ཟུར་ཕུད་ནི། །སྤྱི་བོར་བཅིངས་ལ་ཕྱག་འཚལ་ལོ། །ལང་ཚོ་དར་ཞིང་ནུ་འབུར་མཛེས། །ཞབས་ཟུང་ཙོག་པུའི་འཁྲུལ་འཁོར་གྱིས། །རིགས་བརྒྱུད་ཕུན་སུམ་ཚོགས་པ་ཡི། །སྐལ་བཟང་སྦྱིན་ལ་ཕྱག་འཚལ་ལོ། །སྤྱི་བོར་རྣམ་སྣང་ཅོད་པན་ཅན། །པདྨ་ཟླ་བའི་གདན་ལ་བཞུགས། །འོད་དང་འོད་ཟེར་ཕྲེང་བ་ཡིས། །ཡོངས་སུ་བསྐོར་ལ་ཕྱག་འཚལ་ལོ། །གང་གསུང་རྡོ་རྗེའི་གསང་སྔགས་ཀྱིས། །དུས་མིན་འཆི་བ་ཞི་མཛད་ཅིང་། །སྡེ་བཞིའི་འབྱོར་པ་རབ་རྒྱས་པའི། །དངོས་གྲུབ་སྩོལ་ལ་ཕྱག་འཚལ་ལོ། །ཁྱོད་ཐུགས་ཟབ་མོ་སྟོང་པ་ཉིད། །རིག་དང་བརྩེ་བ་མི་ཕྱེད་པས། །སྐུ་གསུམ་རྣམ་ཐར་རྒྱ་མཚོའི་སྤྲིན། །མཐའ་ཡས་སྤྲོ་ལ་ཕྱག་འཚལ་ལོ། །ཡོན་ཏན་ནོར་བུའི་ཆུ་གཏེར་ལས། །ཕྲིན་ལས་འདོད་རྒུར་འཆར་བ་ཡིས། །ས་གསུམ་འགྲོ་བའི་གདུང་སེལ་ཞིང་། །ཕན་བདེ་སྟེར་ལ་ཕྱག་འཚལ་ལོ། །དེ་ལྟར་རིག་པའི་རྒྱལ་མོ་ཆེ། །འཕགས་མ་སོ་སོར་འབྲང་མ་ལ། །དད་པས་བསྟོད་ཅིང་གསོལ་འདེབས་ན། །བྱིན་རླབས་ཆར་ཆེན་དབབ་པར་མཛོད། །བདག་དང་མཐའ་ཡས་སེམས་ཅན་གྱི། །སྔོན་ལས་འཕྲལ་རྐྱེན་ལས་གྱུར་བའི། །སྣོད་བཅུད་མི་མཐུན་རྒུད་པ་ཀུན། །ཞི་ཞིང་སྲུང་བར་མཛད་དུ་གསོལ། །ཆོས་དང་རིགས་ཀྱི་བརྒྱུད་འཛིན་དང་། །ཚེ་བསོད་དཔལ་འབྱོར་ཡེ་ཤེས་སོགས། །དབང་བཅུའི་དགེ་མཚན་རབ་རྒྱས་པའི། བཀྲ་ཤིས་རྟག་ཏུ་སྣང་བར་མཛོད། །མདོར་ན་ཕྱི་ནང་ཉེར་འཚེ་དང་། །བར་ཆད་ཀུན་ཞི་ལེགས་ཚོགས་འཕེལ། །མཐར་ཐུག་བཅོམ་ལྡན་འདས་མ་ཡི། །གོ་འཕང་ཐོབ་པར་མཛད་དུ་གསོལ། །ཞེས་བསྟོད་ཅིང་འདོད་པའི་དོན་ལ་གསོལ་བ་གདབ། །མདུན་བསྐྱེད་ཀྱི་ཐུགས་ཀར་ཟླ་བའི་སྟེང་དུ་པྲཾ་དཀར་པོ། དེའི་མཐར་སྔགས་ཀྱི་ཕྲེང་བ་གཡས་སྐོར་དུ་འཁོད་པ། རང་གི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ། ཐུགས་ཀའི་ས་བོན་སྔགས་ཕྲེང་དང་བཅས་པ་ལས་འོད་ཟེར་འཕྲོས། སངས་རྒྱས་ཐམས་ཅད་ཀྱི་ཐུགས་ཀ་ནས་ཚེ་དང་དབང་ཕྱུག་ཐམས་ཅད་འོད་དཀར་པོའི་རྣམ་པས་རང་དང་བསྒྲུབ་བྱའི་སྙིང་གར་ཐིམ་པས་འདོད་པའི་དངོས་གྲུབ་ཐོབ་པར་བསམས་ལ་སྔགས་རྩེ་གཅིག་ཏུ་བཟླས་རྗེས། མདུན་བསྐྱེད་ཀྱི་མངལ་ནས་རྗེ་བཙུན་འཇམ་པའི་དབྱངས་ཀྱི་སྐུ་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་རྒུད་ཅིང་ཕོངས་པའི་འཇིགས་པ་ཐམས་ཅད་བསལ། འདོད་པའི་དོན་ཡིད་བཞིན་དུ་མཛད་པར་བསམས་ལ་སེམས་ཡུན་རིང་དུ་གཟུང་ཞིང་སྔགས་བཟླ། ཐུན་མཐར་གཏོར་མ་བསང་སྦྱངས། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ་གྱིས་བྱིན་གྱིས་བརླབ། ནམ་མཁའ་མཛོད་ཀྱི་ཕྱག་རྒྱ་དང་། མཚན་སྔགས་ཀྱི་མཐར་ཨོཾ་ཨ་ཀཱ་རོ་སོགས་བཏགས་པ་ལན་གསུམ་གྱིས་དབུལ། མཆོད་བསྟོད་འདོད་དོན་གསོལ། ནོངས་པ་བཤགས། མདུན་བསྐྱེད་རྟེན་ཡོད་ན་དེ་ལ་བརྟན་བཞུགས་དང་། མེད་ན་ཐུན་སྔ་མ་རྣམས་སུ་ཚོམ་བུ་བརྟན་བཞུགས་དང་། ཐུན་རྗེས་མར་གཤེགས་སུ་གསོལ་བས་ཁྱབ། གནས་གསུམ་བསྲུང་། བསྔོ་སྨོན་བཀྲ་ཤིས་ཅི་རིགས་པར་བྱ། དེ་ལྟ་བུས་ཞག་བདུན་ནམ་ཉེར་གཅིག་སོགས་སུ་བརྩོན་པས་ལས་བསྒྲུབ་པ་ལ་ཐོགས་པ་མེད་པར་འགྱུར་རོ། །གསུམ་པ་ལ་གསུམ། ནད་ཞི་བ། ཚེ་བསྲིང་བ། སྲིད་སྤེལ་བའོ། །དང་པོ་ནི། རང་གི་མདུན་དུ་སྟེགས་བུའི་དབུས་སུ་བུམ་པ་རྫས་ཉེར་ལྔའི་བཅུད་ལྡན་ཁ་རྒྱན་མགུལ་ཆིངས་དང་བཅས་པ་དང་། གཏོར་མ་དང་མཆོད་པ་བཤམ། བདག་བསྐྱེད་སྔོན་དུ་འགྲོ་བས་བུམ་བསྐྱེད་བཟླས་པ། མཇུག་གཏོར་འབུལ། ལྷ་འོད་ཞུ་སོགས་སྤྱི་ལྟར་སྦྱར་ནས་ཟུར་དུ་བཅད་ལ་བསྒྲུབས་པའི་བུམ་ཆུས་རང་གཞན་ལ་སྦྱང་བ་གསུམ་སྔོན་དུ་འགྲོ་བས་བཀྲུ་བྱབ་སྲུང་གསུམ་གྱི་ཆོ་ག་སྤྱི་འགྲོ་ལྟར་བགྱིས་པས་ནད་དང་གནོད་པ་ཐམས་ཅད་ཞི་བར་འགྱུར་རོ། །གཉིས་པ་ནི། སྤྱིར་བསྒོམ་བཟླས་ཙམ་ལ་བརྟེན་ནས་ཀྱང་ཚེ་འཕེལ་བར་འགྱུར་ཞིང་། ཁྱད་པར་ཚེ་རྒྱས་པའི་བསམ་པས་དཱུཪྺའི་མྱུ་གུ་མར་དང་སྦྲང་རྩིས་སྦགས་པའི་བསྲེག་རྫས་གཙོ་བོར་གྱུར་པའི་རྒྱས་པའི་སྦྱིན་སྲེག་སྤྱི་ལྟར་བགྱིས་པས་འཆི་བ་སླུ་བ་དང་ཚེ་རྒྱས་པའི་མཆོག་ཏུ་འགྱུར་རོ། །གསུམ་པ་ནི། སྤྱིར་འཕགས་མ་འདི་ཉིད་ཀྱི་སྒོ་ནས་སྲིད་སྤེལ་བའི་ལས་ཚོགས་དང་། འཁོར་ལོའི་བྱེ་བྲག་མང་དུ་འབྱུང་བ་ལས། འདིར་དཔལ་སམྦུཊའི་བརྟག་པ་བདུན་པའི་རབ་བྱེད་གསུམ་པ་ལས་ཇི་སྐད་གསུངས་པའི་འཁོར་ལོ་འབྲི་བའི་ཚུལ་ནི། རྒྱུ་སྐར་རྒྱལ་དང་བཅས་པའི་གཟའ་སྐར་སྦྱོར་བྱེད་བཟང་པོ་འཛོམས་པའི་ཉི་ཤར་གྱི་དུས་སུ་བདག་གི་རྣལ་འབྱོར་སྔོན་དུ་འགྲོ་བས། རྒྱས་པའི་སེམས་ཀྱིས་ཁ་བྱང་དུ་ཕྱོགས་ལ། བྲི་གཞི་གྲོ་གའམ་ཤོག་བུ་སོགས་བུག་རྡོལ་གྱི་སྐྱོན་མེད་པ། ཁ་དོག་སྤྱིར་རྒྱས་པའི་ལས་ཡིན་པས་སེར་པོ་འོས་ཀྱང་། ཤེར་ཕྱིན་དཀར་མོའི་སྐབས་སུ་ལྷའི་སྐུ་མདོག་དང་མཐུན་པར་དཀར་པོ་བྱ་བར་དམིགས་ཀྱིས་བསལ་བས། འདིར་ཡང་དཀར་པོ་ལ་བྲིས་པས་རུང་། དེ་ལྟ་བུའི་གཞིར་གུར་གུམ་དང་གི་ཝཾ་གིས་ཟླ་བའི་དཀྱིལ་འཁོར་ལ་གནས་པའི་འཁོར་ལོ་རྩིབས་བརྒྱད་པ་ལྟེ་བ་མུ་ཁྱུད་ཕྱི་ནང་དང་བཅས་པ། ལྟེ་བར་ཟླ་བའི་དཀྱིལ་འཁོར་གྱི་དབུས་སུ་པྲཾ། དེའི་མཐར་མདུན་ནས་བརྩམས་ཏེ་གཡས་སྐོར་གྱིས། སྐྱེས་པ་དང་བུད་མེད་མིང་འདི་ཞེས་བྱ་བས་བུ་རྙེད་པར་གྱུར་ཅིག་པུ་ཏྲ་ལ་བྷུ་ཏི། དེའི་ཕྱི་རོལ་ཏུ་མདུན་ནས་གཡས་སྐོར་གྱིས། ཨོཾ་ཨ་མྲྀ་ཏ་བི་ལོ་ཀི་ནི་གརྦྷ་སྃ་རཀྵ་ཎི་ཨཱ་ཀཪྵ་ཎི་ཧཱུྃ་ཧཱུྃ་ཕ྄ཊ་ཕ྄ཊ་སྭཱ་ཧཱ། ལྟེ་བའི་ཕྱི་རོལ་འཁོར་ལོའི་བར་དུ་མུ་ཁྱུད་ཆུང་ངུ་ལ། ཏདྱ་ཐཱ། ཨོཾ་མ་ཎི་དྷཱ་རི་བཛྲི་ཎཱི་མ་ཧཱ་པྲ་ཏི་ས་རེ་ཧཱུྃ་ཧཱུྃ་ཕ྄ཊ་ཕ྄ཊ་སྭཱ་ཧཱ། ཞེས་ཚར་དུ་ཤོང་བྲི། དེའི་ཕྱི་རོལ་འཁོར་ལོ་རྩིབས་བརྒྱད་ལ་ཤར་ནས་གཡས་སྐོར་གྱིས་གྱེན་དུ་ལངས་པའི་རྡོ་རྗེ༡། རྒྱལ་མཚན༢། དགྲ་སྟྭ༣། རྩེ་གསུམ༤། ཞགས་པ༥། སྣ་ཚོགས་རྡོ་རྗེ༦། ཁཊྭཱྃ་ག༧། ལྕགས་ཀྱུ་༨རྣམས་བྲི། སླར་ཡང་དེའི་ཕྱི་རོལ་གྱི་འཁོར་ལོའི་གོང་རས་ཀྱི་མུ་ཁྱུད་ཀྱི་ཟླ་བའི་དཀྱིལ་འཁོར་ལ་ཨོཾ་ཨ་མྲྀ་ཏ་སོགས་ཀྱི་སྔགས་གང་ཤོང་གིས་བསྐོར། གཞུང་ནས་མ་གསུངས་ཀྱང་དེའི་ཕྱི་རོལ་ཏུ་མུ་ཁྱུད་ལ་དབྱངས་གསལ་རྟེན་འབྲེལ་སྙིང་པོ་བཅས་དང་། རྡོ་རཱ། མེ་རི་རྣམས་སྤྱི་ལྟར་བྲིས་སྣང་། དེ་ལྟར་བྲིས་ཟིན་པ་ན་གུར་གུམ་དང་གི་ཝཾ་གིས་ཁྱབ་པར་བྱུག །སྟེགས་བུའི་དབུས་སུ་མེ་ཏོག་སིལ་མ་བཀྲམ་པའི་ཁར་དགྲམ། གཏོར་མ་དང་མཆོད་པ་བཤམ། བདག་བསྐྱེད་སྔོན་དུ་འགྲོ་བས་འཁོར་ལོ་བསང་སྦྱངས། སྟོང་པའི་ངང་ལས་མུ་ཁྱུད་གདན་དང་། སྔགས་ཀྱི་ཡིག་འབྲུ་རྣམས་སོ་སོར་འབྲང་མ་ཡན་ལག་བཞི་རྫོགས་སུ་བསྐྱེད། མཆོད་བསྟོད་དང་སྤྱན་དབྱེ་བྱ། སླར་ཡང་མཆོད་ཅིང་བསྟོད་ལ། མིང་སྤེལ་ཉིད་བསྒྲུབ་བྱར་བསྐྱེད་བསྟིམ་རྗེས། འོད་ཟེར་སྤྲོ་བསྡུ་དང་བཅས་མདུན་བསྐྱེད་ལ་དམིགས་ཏེ་གོང་དུ་འཁོར་ལོར་བཀོད་པའི་སྔགས་རྣམས་མང་དུ་བཟླས་རྗེས་གཏོར་མ་བསང་སྦྱངས་བྱིན་གྱིས་བརླབས་ལ་དབུལ། མཆོད་བསྟོད་འདོད་དོན་གསོལ་བས། ལྷ་མོ་གདན་དང་བཅས་པ་འོད་དུ་ཞུ་བ་ལས་བྲིས་པའི་འཁོར་ལོའི་རྣམ་པ་དང་། བསྒྲུབ་བྱ་མིང་སྤེལ་དུ་གྱུར་པར་བསམ། སླར་ཡང་བརྟན་བཞུགས་ཤིས་བརྗོད་རྒྱ་ཆེར་བྱ། ལྟེ་བ་མ་ཉམས་པར་བལྟབས་ལ་ཚོན་སྐུད་མཐུན་བསྡེབས་ཀྱིས་དཀྲི། དར་སྣའི་གཡོགས་དང་བཅས་ཏེ་བསྒྲུབ་བྱའི་སྤྱི་བོའམ་མགུལ་དུ་གདགས། དེའང་སྤྲོ་ན་སྦྱང་བ་གསུམ་སྔོན་དུ་འགྲོ་བས་ཁྲུས་ཀྱི་ཆོ་ག་དང་འབྲེལ་བར་གདགས་པའི་ཕྱག་ལེན་ཡོད། གཞན་ཡང་སོ་སོར་འབྲང་མའི་སྔགས་མར་ལ་བཏབ་སྟེ་ཁོང་དུ་གཏོང་བ་དང་། ཙན་དན་ལ་བཏབ་སྟེ་བདུག་པ་དང་། སྐུད་པ་ལ་བཏབ་སྟེ་འཆིང་བ་དང་། རྗེས་སུ་གནང་བ་དང་ཁྲུས་ཀྱི་ཆོ་ག་དང་། ཞི་རྒྱས་ཀྱི་སྦྱིན་སྲེག་དང་། རྒྱབ་ཆོས་སུ་མདོ་དང་གཟུངས་བཀླག །སཱཙྪ་གདབ། དགེ་འདུན་ལ་བསྙེན་བཀུར་དང་། དབུལ་ཕོངས་ལ་སྦྱི ན་གཏོང་སོགས་དགེ་བའི་དཔུང་བསྐྱེད་པས་རིགས་བརྒྱུད་ཁྱད་པར་ཅན་འབྱུང་བར་གདོན་མི་ཟ་ཞིང་། ལེགས་པའི་ཡོན་ཏན་གཞན་ཡང་དབྱར་མཚོ་ལྟར་འཕེལ་པར་འགྱུར་རོ། །འཕགས་མ་སོ་སོར་འབྲང་མ་ཡི། །ཡེ་ཤེས་བདུད་རྩིས་འགྲོ་བ་ཀུན། །སྡེ་བཞིའི་དཔལ་ཡོན་ཕུན་ཚོགས་པའི། །ཕན་བདེའི་ཆུ་སྐྱེས་རྒྱས་གྱུར་ཅིག །ཅེས་པའང་རྒྱུད་ཀྱི་རྒྱལ་པོ་རྣམ་པ་གཉིས་རྗེ་བཙུན་གོང་མའི་གསུང་མཆན་འགྲེལ་པ་དང་བཅས་པ་དང་། བུ་སྟོན་རིན་པོ་ཆེའི་སམྦུ་ཊིའི་འགྲེལ་ཆེན། གཞན་ཡང་མན་ངག་གི་ཟིན་བྲིས་ཕྱག་ལེན་སོགས་ཀྱི་ཁུངས་ལ་གཏུགས་ཏེ་གཞན་ཕན་གྱི་བློས་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་མདོ་ཙམ་བྲིས་པ་སརྦ་དཱ་ཧི་ཏ་སུ་ཁཱ་ནཱཾ་སུ་ཤྲེ་ཡཿསྤུ་ཊཾ་བྷཱུ་ཡཱ་ཊ།། །། ༈

[edit]

'phags ma so sor 'brang ma dkar mo'i man ngag nyer mkho'i yi ge bdud rtsi'i chu skyes/ 'phags ma so sor 'brang ma dkar mo'i man ngag nyer mkho'i yi ge bdud rtsi'i chu skyes zhes bya ba bzhugs so/__/oM swasti sid+d+haM/__rig sngags sprin las bdud rtsi'i char/__/'bebs mdzad so sor 'brang ma la/__/btud nas de yi man ngag gi/__/yi ge'i chu skyes 'dzum dkar bzhad/__/'di la gsum/__bsnyen pa/__sgrub pa/__las la sbyar ba'o/__/dang po ni/__gnas gtsang zhing dben par gung du 'di'i bris sku yod na dgram/__gang ltar yang 'bul gtor dkar zlum chu gnyis sngon 'gro'i nyer spyod bcas bsham/__bla med yin pas dkar spyad dmigs bsal mi dgos/__mtshams dam par bcad la thun gsum mam bzhi'i rim pas ngor chen rdo rje 'chang ngam rje dkon mchog lhun grub kyi gsung rab ltar bdag bskyed bsgom/__lha'i rnal 'byor la sems gzung /__gsal snang brtan pa na dmigs pa'i 'phro 'du dang bcas sngags yi ge bcu dgu pa 'bum phrag bcu dgu'am/__de bzhi 'gyur ram/__brgyad 'gyur du bzlas na nges par 'grub cing dngos grub kyi mtshan ma rnyed par 'gyur la/__snga thun lta bu'i mjug tu gtor ma ma chag par dbul/__de'ang gtor mgron mdun gyi nam mkhar yan lag bzhi rdzogs su bskyed pa'am/__skad cig gis spyan drangs pa la phul kyang rung /__gzhan mtshams kyi spang blang dang sbyor dngos mjug gi bya ba rnams bsnyen yig spyi 'gro ltar shes par bya'o/__/gnyis pa ni/__bsnyen pa sngon du song bas de'i bogs dbyung ba'i slad/__mdun du stegs bu'i dbus su many+dzi'i khar maN+Da lar dri'i thig le dang bcas pa'i me tog gi tshom bu gcig__/mdun du 'bul gtor dkar zlum/__byang shar nas brtsams te chu gnyis sngon 'gro'i nyer spyod g.yas skor du bsham/__mchod pa byin rlabs nas bdag bskyed bzlas pa'i bar bya/__mthar bcom ldan 'das mas bdag dang sems can thams cad la mchog dang thun mong gi dngos grub ma lus pa stsal du gsol/__/zhes 'dod don gsol/__rang gi snying ga nas 'od zer 'phros pas gdan 'od zer gyi rnam par gyur te rang la thi+im par bsam/__mdun gyi tshom bu bsang sbyangs/__stong pa'i ngang las paM las sogs nas/__rnam par snang mdzad kyis dbur brgyan zhes pa'i bar bdag bskyed ltar la/__bdag nyid ces ba'i tshig dor/__bdag la zhes par 'di la zhes bsgyur/__mchod phreng rgyas par/__rab 'byams rgya mtsho dpag med na/__/mchod yon ji snyed yod pa rnams/__/'phags ma 'khor dang bcas la 'bul/__/'dod dgu'i dngos grub stsal du gsol/__/oM sarba ta thA ga ta ma hA pra ti sa rA sa pa ri wA ra ar+g+haM pra tIts+tsha pu dza me g+ha sa mu dra s+pha ra Na sa ma ye hU~M/__de bzhin du zhabs bsil dang /__pA d+yaM sogs 'don pa bsgyur bas chu gnyis sngon 'gro'i nyer spyod rol mo dang bcas pa dbul zhing d+harmA ra Ni ta brjod/__rin chen bdun mtshan sngags bsgyur bas spyi ltar dbul/__'dod yon lnga spyi ltar la/__mos blos 'phags ma mchog la zhes dang /__bzhes shig 'dod rgu'i dngos grub stsal du gsol/__/zhes dang mtshan sngags bsgyur/__maN+Dal tshom bu so bdun ma'am bdun ma ci nus dbul/__de tsam mi nus na mtshan sngags sngon 'gro'i chu gnyis nyer spyod rol mo dang bcas pas mchod/__bstod pa ni rdo rje dril bu 'dzin pas/__sras bcas rgyal ba thams cad kun/__/skyed dang rol pa'i yum gcig pu/__/bcom ldan so sor 'brang ma la/__/dad pa'i yid kyis bstod par bgyi/__/pra~M gi yi ge las skyes pa/__/kun+da ltar dkar yid 'phrog sku/__/zhal gcig phyag gnyis mtshan dpes mdzes/__/'phags ma mchog la phyag 'tshal lo/__/phyag g.yas ye shes ral gri 'phyar/__/'jigs dang sdug bsngal drwa ba gcod/__/g.yon pas yid bzhin 'khor lo yis/__/'dod pa 'jo la phyag 'tshal lo/__/sna tshogs dar gyi na bza' dang /__/rin chen me tog gsar pas brgyan/__/gnag snum dbu skra'i zur phud ni/__/spyi bor bcings la phyag 'tshal lo/__/lang tsho dar zhing nu 'bur mdzes/__/zhabs zung tsog pu'i 'khrul 'khor gyis/__/rigs brgyud phun sum tshogs pa yi/__/skal bzang sbyin la phyag 'tshal lo/__/spyi bor rnam snang cod pan can/__/pad+ma zla ba'i gdan la bzhugs/__/'od dang 'od zer phreng ba yis/__/yongs su bskor la phyag 'tshal lo/__/gang gsung rdo rje'i gsang sngags kyis/__/dus min 'chi ba zhi mdzad cing /__/sde bzhi'i 'byor pa rab rgyas pa'i/__/dngos grub stsol la phyag 'tshal lo/__/khyod thugs zab mo stong pa nyid/__/rig dang brtse ba mi phyed pas/__/sku gsum rnam thar rgya mtsho'i sprin/__/mtha' yas spro la phyag 'tshal lo/__/yon tan nor bu'i chu gter las/__/phrin las 'dod rgur 'char ba yis/__/sa gsum 'gro ba'i gdung sel zhing /__/phan bde ster la phyag 'tshal lo/__/de ltar rig pa'i rgyal mo che/__/'phags ma so sor 'brang ma la/__/dad pas bstod cing gsol 'debs na/__/byin rlabs char chen dbab par mdzod/__/bdag dang mtha' yas sems can gyi/__/sngon las 'phral rkyen las gyur ba'i/__/snod bcud mi mthun rgud pa kun/__/zhi zhing srung bar mdzad du gsol/__/chos dang rigs kyi brgyud 'dzin dang /__/tshe bsod dpal 'byor ye shes sogs/__/dbang bcu'i dge mtshan rab rgyas pa'i/__bkra shis rtag tu snang bar mdzod/__/mdor na phyi nang nyer 'tshe dang /__/bar chad kun zhi legs tshogs 'phel/__/mthar thug bcom ldan 'das ma yi/__/go 'phang thob par mdzad du gsol/__/zhes bstod cing 'dod pa'i don la gsol ba gdab/__/mdun bskyed kyi thugs kar zla ba'i steng du praM dkar po/__de'i mthar sngags kyi phreng ba g.yas skor du 'khod pa/__rang gi thugs ka nas 'od zer 'phros/__mdun bskyed kyi thugs kar phog pas thugs rgyud bskul/__thugs ka'i sa bon sngags phreng dang bcas pa las 'od zer 'phros/__sangs rgyas thams cad kyi thugs ka nas tshe dang dbang phyug thams cad 'od dkar po'i rnam pas rang dang bsgrub bya'i snying gar thim pas 'dod pa'i dngos grub thob par bsams la sngags rtse gcig tu bzlas rjes/__mdun bskyed kyi mngal nas rje btsun 'jam pa'i dbyangs kyi sku dpag tu med pa spros/__sems can thams cad kyi rgud cing phongs pa'i 'jigs pa thams cad bsal/__'dod pa'i don yid bzhin du mdzad par bsams la sems yun ring du gzung zhing sngags bzla/__thun mthar gtor ma bsang sbyangs/__stong pa'i ngang las rin po che las grub pa'i snod yangs shing rgya che ba'i nang du gtor ma kha dog dri ro nus pa phun sum tshogs pa ye shes kyi bdud rtsi'i rgya mtsho chen por gyur/__oM AHhU~M lan gsum gyis byin gyis brlab/__nam mkha' mdzod kyi phyag rgya dang /__mtshan sngags kyi mthar oM a kA ro sogs btags pa lan gsum gyis dbul/__mchod bstod 'dod don gsol/__nongs pa bshags/__mdun bskyed rten yod na de la brtan bzhugs dang /__med na thun snga ma rnams su tshom bu brtan bzhugs dang /__thun rjes mar gshegs su gsol bas khyab/__gnas gsum bsrung /__bsngo smon bkra shis ci rigs par bya/__de lta bus zhag bdun nam nyer gcig sogs su brtson pas las bsgrub pa la thogs pa med par 'gyur ro/__/gsum pa la gsum/__nad zhi ba/__tshe bsring ba/__srid spel ba'o/__/dang po ni/__rang gi mdun du stegs bu'i dbus su bum pa rdzas nyer lnga'i bcud ldan kha rgyan mgul chings dang bcas pa dang /__gtor ma dang mchod pa bsham/__bdag bskyed sngon du 'gro bas bum bskyed bzlas pa/__mjug gtor 'bul/__lha 'od zhu sogs spyi ltar sbyar nas zur du bcad la bsgrubs pa'i bum chus rang gzhan la sbyang ba gsum sngon du 'gro bas bkru byab srung gsum gyi cho ga spyi 'gro ltar bgyis pas nad dang gnod pa thams cad zhi bar 'gyur ro/__/gnyis pa ni/__spyir bsgom bzlas tsam la brten nas kyang tshe 'phel bar 'gyur zhing /__khyad par tshe rgyas pa'i bsam pas dUR+Wa'i myu gu mar dang sbrang rtsis sbags pa'i bsreg rdzas gtso bor gyur pa'i rgyas pa'i sbyin sreg spyi ltar bgyis pas 'chi ba slu ba dang tshe rgyas pa'i mchog tu 'gyur ro/__/gsum pa ni/__spyir 'phags ma 'di nyid kyi sgo nas srid spel ba'i las tshogs dang /__'khor lo'i bye brag mang du 'byung ba las/__'dir dpal sam+buTa'i brtag pa bdun pa'i rab byed gsum pa las ji skad gsungs pa'i 'khor lo 'bri ba'i tshul ni/__rgyu skar rgyal dang bcas pa'i gza' skar sbyor byed bzang po 'dzoms pa'i nyi shar gyi dus su bdag gi rnal 'byor sngon du 'gro bas/__rgyas pa'i sems kyis kha byang du phyogs la/__bri gzhi gro ga'am shog bu sogs bug rdol gyi skyon med pa/__kha dog spyir rgyas pa'i las yin pas ser po 'os kyang /__sher phyin dkar mo'i skabs su lha'i sku mdog dang mthun par dkar po bya bar dmigs kyis bsal bas/__'dir yang dkar po la bris pas rung /__de lta bu'i gzhir gur gum dang gi waM gis zla ba'i dkyil 'khor la gnas pa'i 'khor lo rtsibs brgyad pa lte ba mu khyud phyi nang dang bcas pa/__lte bar zla ba'i dkyil 'khor gyi dbus su praM/__de'i mthar mdun nas brtsams te g.yas skor gyis/__skyes pa dang bud med ming 'di zhes bya bas bu rnyed par gyur cig pu tra la b+hu ti/___de'i phyi rol tu mdun nas g.yas skor gyis/__oM a mr-i ta bi lo ki ni gar+b+ha sa~M rak+Sha Ni A kaR+Sha Ni hU~M hU~M pha?T pha?T swA hA/__lte ba'i phyi rol 'khor lo'i bar du mu khyud chung ngu la/__tad+ya thA/__oM ma Ni d+hA ri badz+ri NI ma hA pra ti sa re hU~M hU~M pha?T pha?T swA hA/__zhes tshar du shong bri/__de'i phyi rol 'khor lo rtsibs brgyad la shar nas g.yas skor gyis gyen du langs pa'i rdo rje1/__rgyal mtshan2/__dgra s+t+wa3/__rtse gsum4/__zhags pa5/__sna tshogs rdo rje6/__khaT+wA~M ga7/__lcags kyu 8rnams bri/__slar yang de'i phyi rol gyi 'khor lo'i gong ras kyi mu khyud kyi zla ba'i dkyil 'khor la oM a mr-i ta sogs kyi sngags gang shong gis bskor/__gzhung nas ma gsungs kyang de'i phyi rol tu mu khyud la dbyangs gsal rten 'brel snying po bcas dang /__rdo rA/__me ri rnams spyi ltar bris snang /__de ltar bris zin pa na gur gum dang gi waM gis khyab par byug__/stegs bu'i dbus su me tog sil ma bkram pa'i khar dgram/__gtor ma dang mchod pa bsham/__bdag bskyed sngon du 'gro bas 'khor lo bsang sbyangs/__stong pa'i ngang las mu khyud gdan dang /__sngags kyi yig 'bru rnams so sor 'brang ma yan lag bzhi rdzogs su bskyed/__mchod bstod dang spyan dbye bya/__slar yang mchod cing bstod la/__ming spel nyid bsgrub byar bskyed bstim rjes/__'od zer spro bsdu dang bcas mdun bskyed la dmigs te gong du 'khor lor bkod pa'i sngags rnams mang du bzlas rjes gtor ma bsang sbyangs byin gyis brlabs la dbul/__mchod bstod 'dod don gsol bas/__lha mo gdan dang bcas pa 'od du zhu ba las bris pa'i 'khor lo'i rnam pa dang /__bsgrub bya ming spel du gyur par bsam/__slar yang brtan bzhugs shis brjod rgya cher bya/__lte ba ma nyams par bltabs la tshon skud mthun bsdebs kyis dkri/__dar sna'i g.yogs dang bcas te bsgrub bya'i spyi bo'am mgul du gdags/__de'ang spro na sbyang ba gsum sngon du 'gro bas khrus kyi cho ga dang 'brel bar gdags pa'i phyag len yod/__gzhan yang so sor 'brang ma'i sngags mar la btab ste khong du gtong ba dang /__tsan dan la btab ste bdug pa dang /__skud pa la btab ste 'ching ba dang /__rjes su gnang ba dang khrus kyi cho ga dang /__zhi rgyas kyi sbyin sreg dang /__rgyab chos su mdo dang gzungs bklag__/sAts+tsha gdab/__dge 'dun la bsnyen bkur dang /__dbul phongs la sbyi_na gtong sogs dge ba'i dpung bskyed pas rigs brgyud khyad par can 'byung bar gdon mi za zhing /__legs pa'i yon tan gzhan yang dbyar mtsho ltar 'phel par 'gyur ro/__/'phags ma so sor 'brang ma yi/__/ye shes bdud rtsis 'gro ba kun/__/sde bzhi'i dpal yon phun tshogs pa'i/__/phan bde'i chu skyes rgyas gyur cig__/ces pa'ang rgyud kyi rgyal po rnam pa gnyis rje btsun gong ma'i gsung mchan 'grel pa dang bcas pa dang /__bu ston rin po che'i sam+bu Ti'i 'grel chen/__gzhan yang man ngag gi zin bris phyag len sogs kyi khungs la gtugs te gzhan phan gyi blos bya bral ba 'jam dbyangs mkhyen brtse'i dbang pos mdo tsam bris pa sarba dA hi ta su khA nAM su shre yaHspu TaM b+hU yA Ta//___//___!_