JKW-KABUM-21-ZHA-002-001

First text in section. Back to Volume PageNext Text

དྲི་མེད་རྣམ་གཉིས་ཀྱི་མཆོད་རྟེན་བཞེངས་སྐབས་ཉེར་མཁོའི་ཟིན་བྲིས་གཞན་ཕན་ཟླ་སྣང་།

Wylie title	dri med rnam gnyis kyi mchod rten bzhengs skabs nyer mkho'i zin bris gzhan phan zla snang
Location	mkhyen brtse'i bka' 'bum Volume 21, sde tshan 2, Text 1, Pages 119-136 (Folios 1a to 9b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dri med rnam gnyis kyi mchod rten bzhengs skabs nyer mkho'i zin bris gzhan phan zla snang. In 'jam dbyangs mkhyen brtse'i dbang po'i bka' 'bum, Vol. 21: 119-136. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །དྲི་མེད་རྣམ་གཉིས་ཀྱི་མཆོད་རྟེན་བཞེངས་སྐབས་ཉེར་མཁོའི་ཟིན་བྲིས་གཞན་ཕན་ཟླ་སྣང་ཞེས་བྱ་བ་བཞུགས་སོ།། །། ཨོཾ་སྭསྟི། ཐུགས་རྗེའི་ཟླ་ཟེར་གང་དུ་སྣང་ཙམ་གྱིས། །སྙིགས་དུས་རྒུད་པའི་མུན་པ་རབ་བསལ་ནས། །ཕན་བདེའི་དབུགས་འབྱིན་སྩོལ་མཛད་བཅོམ་ལྡན་འདས། །བླ་མ་ཐུབ་པའི་དབང་པོས་དགེ་ལེགས་སྩོལ། །སྟོན་པ་ཐུགས་རྗེ་ཅན་གྱིས་གྲོལ་བ་བཞི་ལྡན་གྱི་ཕྲིན་ལས་མངོན་སུམ་གཟུགས་སུ་སྣང་བ་དྲི་མེད་རྣམ་གཉིས་ཀྱི་མཆོད་རྟེན་བཞེངས་པར་འདོད་པའི་ལྷག་བསམ་ཅན་དག་གིས་འདི་ལྟར་ངེས་པར་བྱ་སྟེ། ལོ་ཆེན་རིན་པོ་ཆེའི་ཆོག་བསྒྲིགས་བཀླག་པས་གྲུབ་པ་ལྟར། ། ༈ ཐོག་མར་སློབ་དཔོན་གྱིས་བསྙེན་པ་བྱ་དགོས་པས་བསྙེན་ཚད་རབ་གཟུངས་རིང་ཁྲི་བཞི་སྙིང་པོ་འབུམ་ཕྲག་བཞི། དེ་ལྟར་མ་གྲུབ་ན་གཟུངས་རིང་ཁྲི་དང་སྙིང་པོ་འབུམ་ཕྲག་བཟླ། བཟླས་པའི་སྐབས་སུ་ཁྲུས་དང་གཙང་སྦྲ་དཀར་སྤྱད་སོགས་ཀུན་སྤྱོད་ཤིན་ཏུ་ཞིབ་པ་དང་། ཐུན་མཚམས་སུ་མདོ་སྡུད་དང་ཤེར་སྙིང་སོགས་ཤེར་མདོ་གང་རུང་བཀླག ། ༈ བསྙེན་པ་གྲུབ་ནས་སཱཙྪ་སྒྲུབ། ། ༈ དེ་ནས་ས་ཆོག་ལ་མཆོད་རྟེན་དངོས་སམ་ཁང་བུ་བརྩེགས་པ་གང་རུང་བཞེངས་པའི་ས་གཞིར་ཕྱིན་ལ་ཆོ་ག་གཞུང་གསལ་ལྟར་དང་། སེང་ལྡེང་ཕུར་བུ་བརྒྱད་དངོས་སུ་འབྱོར་དགོས། རིན་པོ་ཆེའི་གཏེར་བཅུག་པའི་སྐབས་དབུས་དང་ཕྱོགས་མཚམས་གང་འཛོམས་སུ་ཀླུ་བུམ་དགུའམ་ལྔ། ཐ་ནའང་དབུས་སུ་གཅིག །དབུས་མའི་མདུན་དུ་ས་བདག་བུམ་པ་རྡོ་སྒྲོམ་སོགས་ལག་ཚག་དམ་པར་བྱ། འདི་རྣམས་མ་སའི་ནང་དུ་སྦ། དེའི་སྟེང་དུ་སྔར་གྱི་ཕུར་པ་བཏབ་སྐབས་ཕྱོགས་མཚམས་རྡོ་སྒྲོམ་ལྟ་བུའི་མི་རུལ་པའི་ཐབས་དང་བཅས་ཏེ་གཞུག །འདི་སྐབས་གྲུབ་ནའང་རང་ངམ་གྲོགས་ཀྱིས་བསང་དང་གསེར་སྐྱེམས་ས་བདག་འཁྲུག་བཅོས་སོགས་ཀྱང་བགྱིས་ན་ལེགས། ། ༈ དེ་ནས་ཁང་བརྩེགས་ཡིན་ན་རྨང་གི་བང་རིམ་གཉིས་བརྩིགས་ནས་དབུས་དཀྱིལ་འཁོར་གྱི་འགོ་ཐད་དུ་ནོར་བུམ་དང་གནོད་སྦྱིན་འཁོར་ལོ་སོགས་ཡོད་ན་རང་རང་གི་ཆོ་ག་ལྟར་སྦ། ཁང་པའི་སྟེང་ཐོག་བར་ལེགས་པར་བརྩིགས་ཏེ་བཏབ། མཆོད་རྟེན་ཡིན་ན་བུམ་རྟེན་བར་བརྩེགས་ལ་གནོད་སྦྱིན་བང་མཛོད་ཀྱི་བཅའ་གསོགས་སྤྱི་ལྟར་བྱ། གང་ལྟར་ཡང་འོག་གཞི་ཞལ་བ་ལེགས་པར་བྱས་པའི་དབུས་སུ་ཁྲུ་དོ་ལས་མི་ཆུང་བའི་སྟེགས་བུ་གྲུ་བཞི་བྱ། དེ་ནས་གཙུག་ཏོར་དྲི་མེད་ཀྱི་དཀྱིལ་འཁོར་རྡུལ་ཚོན་གྱིས་བྲིས་ན་ལེགས་ཀྱང་ཟུབ་པ་སོགས་ཀྱི་ཉེས་པ་མི་འབྱུང་བ་དང་། སྟབས་བདེར་རྡོ་ལེབ་ལ་བརྐོས་ནས་ཚོན་ལེགས་པར་བྱུགས་པ་པྲ་རྩི་བཏང་བ་བཤམས། དཀྱིལ་འཁོར་གྱི་རྒྱན་སྟེང་དུ་བླ་བྲེ་སྔོན་པོ་ཕུབ། མཐར་བྱང་ཤར་ནས་བརྩམས་མཚམས་འཛིན་གྱི་མེ་ཏོག་དང་ཆུ་གཉིས་སྔོན་འགྲོའི་ཉེར་སྤྱོད་དེ་སྤྱི་མཆོད་དང་། དེའི་ཕྱི་རོལ་དུ་སྒོས་མཆོད་རྣམ་ལྔ་ཤར་དུ་ལྷག་གཅིག་དང་བཅས་པའི་ཕྱོགས་རེ་རེ་དྲུག་རེ་བཤམས། ཅིས་ཀྱང་མ་འབྱོར་ན་ཤར་དུ་ལྷག་གཅིག་དང་བཅས་པའི་རེ་རེ་མེད་ཐབས་མེད། དེ་རྣམས་ཀྱང་གཏན་དུ་བཞག་དགོས་པས། སྣོད་ཀྱི་རིགས་འབྱོར་ན་ལི་སོགས་དང་། མ་འབྱོར་ན་རྫ་ལ་བྱ། མཆོད་ཡོན་གྱི་སྣོད་དུ་ན་ཚྭ་བཟང་པོ་བླུགས། དེ་སྟེང་རྫས་བདུན་གྱིས་བཀང་། རྫས་བདུན་ནི། ཙམ་པ་ཀ་དང་། བ་ལུའི་མེ་ཏོག་ལྟ་བུའི་མེ་ཏོག་དཀར་པོ་གང་༡འབྱོར། ཏིལ་དཀར༢། ནས་དཀར༣། འབྲས་ཡོས༤། ཀུ་ཤ༥། དྲི་བཟང་༦། འོ་མ་སྐབས་༧འདིར་རུལ་ཉེན་གྱིས་འཕྱུར་བ་བླུགས། ཞབས་བསིལ་ལ་ལན་ཚྭའི་སྟེང་། ཤུན་པ་ལྔ་དང་འདག་རྫས་རིགས་ཀྱི་ཕྱེ་མས་བཀང་། ཤུན་པ་ལྔ་དངོས་བོད་དུ་མི་འབྱོར་ཡང་། སྔོན་གྱི་བླ་མ་རྣམས་ཀྱི་ཕྱག་བཞེས་སུ། བལ་བུ། ལྕང་དཀར། ཁམ་བུ། འོམ་བུ་རྣམས་ཀྱི་བར་ཤུན་དང་། ཙནྡན་དཀར་པོ་བཅས་ཀྱིས་ཚབ་རུང་མཛད་ཚུལ་ཡོད། འདག་རྫས་ནི། སྲན་དཀར། ཉེ་ཤིང་། འབྲས་སྤུ་བཅས་པའི་ཤུན་པའི་ཕྱེ་མ་སོགས་སྦྱར། མེ་ཏོག་ནི་འབྱོར་ན་གོས་ཆེན་སོགས་ཀྱི་བཅོས་པ་དང་མ་འབྱོར་ན་འབྲུ་དཀར། བདུག་སྤོས་སྤོས་རིང་སྤོས་གཏའ་ལ་བཙུག །མར་མེ་རྫ་ཀོང་ལྟ་བུ་གཏན་དུ་བཞག་ལོ་བ་དགོས། དྲི་ཆབ་ལན་ཚྭའི་སྟེང་། གུར་གུམ། ག་བུར། ལི་ཤི། ཛཱ་ཏི། ཙནྡན་དཀར་པོ་སྟེ་དྲི་ལྔའི་ཕྱེ་མས་བཀང་། ཞལ་ཟས་མར་ཟན་ལྟ་བུ་ལས་བཞེངས། དེའི་ཕྱི་རོལ་དུ་ཅོད་པན་ནམ་དར་དཔྱང་། བ་དན། རྒྱལ་མཚན། གདུགས་རྣམས་གོས་དར་སོགས་ལས་བཅོས་པ་ཕྱོགས་རེར་བརྒྱད་རེའམ་མ་མཐའ་རེ་རེ་རྫ་ཡི་སྤོས་འཛིན་ལྟ་བུ་ལ་འཛུག །དེའི་ཕྱི་རོལ་དུ་ཡོལ་བ་དམར་པོས་ཟླུམ་སྐོར་བྱ། དེའི་ཕྱི་རོལ་དུ། བང་སྒྲོམ་དང་རྡོ་རྩིགས་སྟབས་གང་བདེ་ཁྲུ་གང་ལས་མི་དམའ་བས་བསྐོར། སློབ་དཔོན་གྱི་མདུན་དུ་བདག་བསྐྱེད་མཆོད་པ་དང་། གཞན་ཡང་རོལ་མོའི་བྱེ་བྲག་སོགས་འོག་ཏུ་དགོས་པའི་ཡོ་བྱད་རྣམས་འདུ་བྱ། དངོས་གཞི་བདག་མདུན་གྱི་ཆོ་ག་གཞུང་གསལ་ལྟར། ཆ་གསུམ་སློབ་དཔོན་གྱི་མདུན་དུ་བཤམས་ནས་རེ་རེ་བཞིན་འབུལ་བ་ལས་རྒྱུན་བཞག་རྒྱུ་མི་དགོས། བཀྲ་ཤིས་སྐབས་ཆོ་ག་རྒྱས་པ་གཞན་ནས་འབྱུང་བའི་ཚིགས་བཅད་ཚང་མ་བརྗོད་ན་ལེགས། ། ༈ འོད་ཟེར་དྲི་མེད་སྐབས་གོང་གི་བང་སྒྲོམ་ལ་ཁ་ཆོད་སྲ་བརླིང་ཅན་རྒྱབ། མཆོད་རྟེན་ཡིན་ན་བུམ་པ་ཅུང་ཟད་བརྩིགས་གང་ལྟར་ཡང་། ལྷ་སྟ་གོན་གཞུང་བཞིན་ལེགས་པར་བྱ། དེ་ཡི་ཕྱི་ཉིན། རྡོ་ལེབ་ལ་བརྐོས་པའི་དཀྱིལ་འཁོར་བཤམས། དེ་ནས་སྲོག་ཤིང་ཚད་ལྡན་སྦྱངས་ཁྲུས་བྱས་པ་རྡོ་རྗེའི་རྭ་རྩེ་དབུས་ཀྱི་གདན་གྲུ་བཞི་ལ་ཁེལ་ངེས་ཀྱིས་བཙུག །སྲོག་ཤིང་ལྗི་ན་རྡོ་ལེབ་ཀྱིས་ཐེག་དཀའ་བས་ཕྱི་རོལ་གྱི་ཁང་སྒྲོམ་དང་བསྟུན་རྡོ་རྗེའི་རྭ་ནས་གདུང་མས་འདེགས་པ་སོགས་དཀྱིལ་འཁོར་ལ་ཆག་གྲུམ་མི་འབྱུང་བའི་ཐབས་བྱ། དཀྱིལ་འཁོར་གྱི་སྣམ་བུའི་གྲྭ་བཞིར་དུང་ཆོས་དངོས་འབྱོར་ན་རབ། མ་འབྱོར་ན་རྡོའམ་རྫ་ལས་བཅོས་པ་དཀར་དང་པྲ་རྩི་བཏང་བའི་ནང་དུ་ལན་ཚྭ་དང་དྲི་ལྔའི་ཕྱེ་མས་བཀང་བ། ཤར་གྱི་སྣམ་བུའི་ཁར་རྫ་ཕོར་ལྟ་བུའི་ནང་དུ་ཙནྡན་ཨ་གར་ཤུག་པ་སོགས་ཀྱིས་བཀང་བའི་སྤོས་སྣོད་གསུམ། ལྷོ་ཡི་སྣམ་བུར་དྲི་ཡི་དུང་ཞལ་གོང་སྨོས་ལྟ་བུ་དང་། རྫ་ཕོར་ལྟ་བུར་མེ་ཏོག་དཀར་པོ་དང་། འབྲས་ཀྱིས་བཀང་བ་རེ། ནུབ་ཀྱི་སྣམ་བུར་ཚོན་རྩི་ཅན་གྱི་ནང་དུ་ཏིལ་ནག །སྲན་མ་མ་ཤ །འབྲས་རྣམས་བསྲེས་ནས་བཙོས་པའི་ཐུག་པ་ཀྲི་སཱ་ར་ཞེས་པས་བཀང་བ་དང་། ཟས་དཀར་གསུམ་གྱིས་གང་བའི་བུམ་པ། རྫ་ལྡེར་ལྟ་བུར་ཁམ་བུ་སྟར་ག་རྒུན་འབྲུམ་སོགས་ཤིང་ཏོག་སྣ་ཚོགས་ཀྱི་འབྲས་བུ་དགུ་བཅུ་རྩ་དགུས་བཀང་བ་རྣམས་བཀོད། གོང་གི་སྲན་མ་མ་ཤ་མ་རྙེད་ན་སྲན་དཀར་གྱིས་ཆོག །བྱང་གི་སྣམ་བུར་རྫ་ལྡེར་ལྟ་བུར་སྣུམ་ཟན་གྱི་གཏོར་མ་དཀར་ཟླུམ་མཐར། མར་ཐུད། ཁུར་བ་སོགས་ཁ་ཟས་སྣ་ཚོགས་ཀྱིས་བསྐོར་བ་དང་། དྲི་ལྔས་བཀང་བའི་རྫ་བུམ་ཁ་རྒྱན་མགུལ་ཆིངས་ཅན། རྫ་ལྡེར་ལྟ་བུར་སྤོས་དང་མེ་ཏོག་རྣམས་བཞག །ནུབ་བྱང་གི་གྲར། དྲི་ཡི་དུང་ཆོས་ཀྱི་རྒྱབ་ཏུ་རྡོའམ་ཤིང་ཟླ་གམ་ལ་ཚོགས་བདག་ཀྱི་སྐུ་གླང་གདོང་སྔོན་པོ་དགྲ་སྟྭ་དང་ལ་ཕུག་འཛིན་པ་ཚོན་རྩི་ཅན་གྱི་སྤྱི་བོའི་སྟེང་དུ་དངུལ་ལམ། མ་འབྱོར་ན་ཟངས་ལྟ་བུའི་རིན་པོ་ཆེ་མར་མེ་བཞག་ཅིང་གཟེར་བཏབ་ནས་མི་འགུལ་བར་བྱ། དེའི་ཕྱི་རོལ་དུ་ཕྱོགས་རེར་མཆོད་པ་ཚར་རེ་དང་ནུབ་ཏུ་ལྷག་གསུམ་མམ་གཅིག །མ་འབྱོར་ན་ལྷོ་ནུབ་ནས་བརྩམས་ཏེ་རྫ་ཕོར་ལྟ་བུར་མཆོད་ཡོན། དྲི་ཆབ། མེ་ཏོག །སྤོས་ཞལ་ཟས་རྣམས་སྔར་སྨོས་པ་ལྟ་བུ་དང་། རྫ་ལྡེར་སོགས་སུ་ཁུར་བ་སྣ་ཚོགས། ཤིང་ཏོག་སྣ་ཚོགས་སྲན་དཀར་གྱི་ཆན། འོ་ཐུག་བསྐོལ་བའམ་འཕྱུར་བས་བཀང་བ་དང་། མར་མེ་བཅས་ཟླུམ་སྐོར་དུ་བཤམས། དེའི་ཕྱི་རོལ་དུ་ཕྱོགས་བཞིར་སྟེགས་བུའི་ཁར་མཆོད་ཡོན་གྱི་དུང་ཆོས་བཟེད་ཞལ་བཅས། དེ་རྣམས་ཀྱི་བར་མཚམས་སུ་སྤོས་མར་མེ་ཞལ་ཟས་རྣམས་ཚར་རེ། དེ་ཡི་ཕྱི་རོལ་ཕྱོགས་མཚམས་བརྒྱད་དུ། ཏོག་ལེབ་མོའི་ངོས་སུ་རྨ་བྱའི་མདོངས་སྦྱར་བའམ། མ་འབྱོར་ན་བྲིས་པས་ཀྱང་རུང་བས་རྒྱལ་མཚན་ཤར་དཀར། ཤར་ལྷོར་ལེ་བརྒན། ལྷོར་ནག །ལྷོ་ནུབ་དུད་ཁ། ནུབ་དམར། ནུབ་བྱང་ཁྲ་བོ། བྱང་སེར། བྱང་ཤར་ལྗང་སེར་རྣམས་དང་། བཀྲ་ཤིས་རྫས་བརྒྱད་དངོས་རྫས་འབྱོར་ན་ལེགས། མ་འབྱོར་ན་རྡོ་ལེབ་ཟླུམ་པོ་ཆུང་ངུའམ། གྲོ་ག་ལྟ་བུ་ལ་བྲིས་ནས་རྒྱལ་མཚན་སོ་སོའི་མགུལ་དུ་བཏགས། དེའི་ཕྱི་རོལ་ནས་རས་དམར་པོས་ཟླུམ་པོར་བསྐོར། སྟེང་དུ་སྲོག་ཤིང་ལས་བང་སྒྲོམ་གྱི་ཕྱོགས་བཞིར་རས་སྐུད་བསྒྲིལ་མ་ལྟ་བུ་བརྐྱང་བ་ལ་དར་གྱི་ལྡ་ལྡི་སྟེ་དར་དཔྱང་དང་། བ་དན། རྒྱལ་མཚན། མེ་ཏོག་གི་ཆུན་པོ་རྣམས་གོས་དར་ལས་བྱས་པ་དཔྱངས། དེ་ནས་ཆོ་ག་གཞུང་གསལ་ལྟར་བཏང་། སྐབས་འདིར་གླེགས་བམ་བཀླགས་ཞེས་པ་འོད་ཟེར་དྲི་མེད་ཀྱི་གཟུངས་དཔོན་སློབ་ཐམས་ཅད་ཀྱིས་གྲུབ་ན་ཚར་གསུམ་སོགས་དང་། མ་མཐའ་ཡང་ཚར་རེ་བཀླགས་དགོས། སྤྱིར་གཟུངས་མདོ་བཀླགས་མཁན་ཟུར་དུ་བཞག་རྒྱུ་བྱུང་ན་ཡང་ལེགས། དེ་ནས་སྲོག་ཤིང་གི་ཆོ་གའི་སྐབས་ཕྱོགས་རེ་རེ་བཞིན་མགོར་མཆོད་པ་བྱིན་རླབས་ངེས་པར་དགོས། སྤྲོ་ན་མཆོད་པའི་སྐབས་རབ་འབྱམས་རྒྱ་མཚོ་སོགས་ཚིགས་བཅད་སྤེལ། གང་ལྟར་ཡང་མཆོད་པའི་སྔགས། ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། དེ་བཞིན་ཏུ་པཱ་དྱཾ་སོགས་སྦྱར་བའི་མཐར། རོལ་མོ་དང་བཅས་མཆོད་པའི་སྤྲིན་གྱི་སྔགས་བརྗོད། གཏོར་མ་བྱིན་རླབས་ཆ་གསུམ་ལྟར་བྱ། སོ་སོའི་མཇུག་ཏུ་ཕུན་སུམ་ཚོགས་པ་དང་། ཆེ་བའི་ཆེ་མཆོག་སོགས་མདོ་རྒྱུད་ནས་བྱུང་བའི་བཀྲ་ཤིས་ཤ་ལོ་ཀ་གསུམ་ལྔ་སོགས་གང་འོས་བརྗོད། མཇུག་ཏུ་ཤར་སྒོ་ནས་བཀྲ་ཤིས་སྐབས་གཙུག་ཏོར་དྲི་མེད་ཀྱི་ཆོ་ག་ལས་འབྱུང་བའི་བྱ་རྒྱུད་ཀྱི་བཀྲ་ཤིས་རིང་མོ་དང་། བཟང་སྤྱོད་ལྟ་བུའི་སྨོན་ལམ་རྒྱས་པར་བྱའོ། ། ༈ དེ་ནས་བང་བའི་ཁར་ཤིང་ལེབ་སོགས་ཀྱི་ཁ་ཆོད་དམ་པར་བརྒྱབ། སྲོག་ཤིང་དང་ཁ་ཆོད་ཀྱི་མཚམས་སོགས་བྱེ་སྤྱིན་ལྟ་བུས་ཞལ་བ་བྱས་ནས་ནང་དུ་རྡུལ་སོགས་མི་འགྲོ་བར་བྱ། སཱཙྪ་རང་རང་གི་དཀྱིལ་འཁོར་སྟེང་དུ་བཞག་དགོས་ཀྱང་ཤོང་དཀའ་བ་དང་། བར་མཚམས་བྱེ་མ་སོགས་ཀྱིས་སག་དགོས་སྟབས་དཀྱིལ་འཁོར་དང་ཡོ་བྱད་ཆུད་ཟོས་སུ་འགྲོ་དོག་ན་སྟེང་དུ་བཞག་ཀྱང་མི་རུང་བ་མེད་པས་གོང་གི་ཁ་ཆོད་སྟེང་དུ་བང་སྒྲོམ་ལྟ་བུ་རིམ་གྱིས་བསྒྲིགས་པ་དང་བསྟུན་ཐོག་མར་གཙུག་ཏོར་དྲི་མེད་སཱཙྪ་ཁྲི་ཕྲག་སོགས་གང་འགྲུབ་དང་། མ་མཐའང་བརྒྱ་རྩ་བརྒྱད། དེ་སྟེང་འོད་ཟེར་དྲི་མེད་ཀྱི་སཱ་ཙྪ་གང་འགྲུབ་དང་། མ་མཐའང་དགུ་བཅུ་རྩ་དགུ་ལས་མི་ཉུང་བ་བཞག །བར་མཚམས་བྱེ་མ་སྐམ་པོས་སག་པ་སོགས་ལག་ཚག་ཤིན་ཏུ་དམ་པར་བྱ་དགོས། གཞན་སཱཙྪ་འབུམ་ཐེར་སོགས་མང་པོ་ཡོད་ན་ཁང་བརྩེགས་སྐབས་དབུས་ཀྱི་བང་སྒྲོམ་དང་ཁང་པའི་བར་དུ་གྲུ་ཆོད་བྱས་ནས་ལེགས་པར་བཞག །ཁང་བརྩེགས་སྟེང་མ་ཡང་སཱཙྪས་ཁེངས་པར་བྱ། རིང་བསྲེལ་རྣམ་བཞིས་མཚོན་གཟུངས་གཞུག་རིགས་ཕལ་ཆེར་ཀྱང་རྡོ་སྒྲོམ་མམ་རྫ་སྣོད་ལྟ་བུའི་ནང་དུ་གཞུག་ལ་བར་མཚམས་ལ་ཚྭ་སོགས་ཀྱིས་སྦྱར་ནས་ཆུ་མི་འགྲོ་བར་བྱས་ཏེ་ཁང་བརྩེགས་སྟེང་མའི་དབུས་སུ་བཞག །མཆོད་རྟེན་ཡིན་ན་སཱཙྪ་ལྷག་མ་རྣམས་བུམ་པའི་ནང་དུ་གང་ཤོང་བྱ། གཞན་གཟུངས་འཇུག་བཞག་ཚུལ་སོགས་ལག་ལེན་སྤྱི་ཁྱབ་ལྟར་ཤེས་དགོས། ཁང་བརྩེགས་ལ་ཁང་བུ་བརྩེགས་པ་སྟེང་མ་བཀབ་ནས་དེ་སྟེང་ཏོག་མཚོན་བྱེད་ཙམ་མམ་རྒྱལ་མཚན་ལྟ་བུ་བཙུགས་ཀྱང་ཆོག །གྲུབ་ན་ཆོས་འཁོར་རིམ་པ་བཅུ་གསུམ་གདུགས་ཏོག་དང་བཅས་པ་བྱས་ཀྱང་ལེགས། ། ༈ གོང་གི་ཡོ་བྱད་ཉེར་མཁོ་སྔ་ཚགས་དགོས་པ་ལ། སེང་ལྡེང་གི་ཕུར་བུ་བརྒྱད་དམ། མ་འབྱོར་ན་ཤུག་པ་ཚེར་མ་ཅན་གྱིས་ཀྱང་རུང་། ཀླུ་བུམ་དགུ་ལྔ་གཅིག་སོགས་གང་འབྱོར། ས་བདག་བུམ་པ། ནོར་བུམ། གནོད་སྦྱིན་འཁོར་ལོ། ཤུག་པ་རྩ་རྩེ་དང་ཤར་རྟགས་མ་ནོར་བའི་སྲོག་ཤིང་། དེ་ལ་བྱུགས་རྒྱུའི་དྲི་བཟང་དང་། དཀྲི་དཔྱད་རས་སེར་སོགས་དགོས་འདངས། སྲོག་ཤིང་གི་གཟུངས་ཀྱིས་མཚོན་གཟུངས་གཞུག་རིང་བསྲེལ་བཞིའམ་ལྔའི་རིགས་གང་འབྱོར། འོད་ཟེར་དྲི་མེད་ཀྱི་གཟུངས་ཚང་མ། དྲི་མེད་གཉིས་ཀྱི་དཀྱིལ་འཁོར། ། ༈ གཙུག་ཏོར་དྲི་མེད་ལ་བླ་བྲེ་སྔོན་པོ། མཆོད་པའི་སྣོད་རྫས་སོགས་ཀྱི་ཏིང་ཕོར་རྒྱས་པར་ང་ལྔ་བསྡུ་ན་བཅོ་ལྔ། སྤོས་འཛིན་རྒྱས་པར་ཉེར་དྲུག །བསྡུ་ན་དྲུག །མར་མེ་དེ་མཚུངས། ལན་ཚྭ། མཆོད་ཡོན། ཞབས་བསིལ། དྲི་ཆབ་རྣམས་ཀྱི་རྫས། ཅོད་པན། བ་དན། རྒྱལ་མཚན། གདུགས་རྣམས་རྒྱས་པར་རེ་རེ་ནས་སོ་གཉིས་རེ། བསྡུ་ན་བཞི་རེ། དེ་རྣམས་འཛུག་པ་རྫ་ཡི་སྤོས་འཛིན་ལྟ་བུ་གྲངས་མཉམ་དང་། སྒབ་དཀྲིས་དམར་པོ། ། ༈ འོད་ཟེར་དྲི་མེད་ལ། དུང་ཆོས་དགུ། སྤོས་ཕོར་གསུམ། བུམ་པ་གཉིས། ཏིང་ཕོར་རྒྱས་པར་ཉེར་གསུམ། བསྡུ་ན་ལྔ། རྫ་ལྡེར་རྒྱས་པར་སོ་གཅིག །བསྡུ་ན་བདུན། སྤོས་འཛིན་རྒྱས་པར་བཅུ་གཅིག །བསྡུ་ན་ལྔ། མར་མེ་དེ་མཚུངས། ཚོགས་བདག་གི་སྐུ། རིན་པོ་ཆེའི་ཀོང་བུ། བཟེད་ཞལ་བཞི། རྒྱལ་མཚན་བརྒྱད། འཛུག་གདན་བརྒྱད། བཀྲ་ཤིས་རྫས་བརྒྱད། སྒབ་དཀྲིས་དམར་པོ། ། ༈ སྲོག་ཤིང་གི་ཕྱོགས་བཞིར་བརྐྱང་རྒྱུའི་རས་སྐུད། དར་དཔྱང་བ་དན། རྒྱལ་མཚན། མེ་ཏོག་ཆུན་པོ་རྣམས་བཞི་རེ། ། ༈ རྫས་ཆ་ཙནྡན་དཀར་པོ། ཨ་གར། མེ་ཏོག་དཀར་པོ། དྲི་བཟང་། འབྲས། ཏིལ་ནག །སྲན་མ་མ་ཤའམ་སྲན་དཀར། ཁམ་བུ་སྟར་ག་དང་། རྒུན་འབྲུམ་སོགས་ཤིང་ཏོག་སྣ་ཚོགས། མར་ཐུད། ཁུར་བ། འོ་སྐོམ་མམ་འཕྱུར་བ། རྨ་བྱའི་མདོངས་བརྒྱད་བཅས་དགོས། ། ༈ དེའང་ཐོག་མར་སཱཙྪ་རབ་འབུམ། འབྲིང་ཁྲི། ཐ་མ་སྟོང་ཕྲག་སོགས་ཆོ་གའི་སྒོ་ནས་ལེགས་པར་བསྒྲུབས། དེ་ནས་སློབ་དཔོན་བསྙེན་པ་སོང་བས་སྒྲུབ་གྲོགས་དང་བཅས་༼༡༽ས་ཆོག་བྱ། དེ་རྗེས་ཁང་བརྩེགས་ཐོག་བཀབ་པའི་བར་ཚར་ནས་སྔ་དྲོ་གཙུག་ཏོར་༼༢༽དྲི་མེད་ཀྱི་ཆོ་ག་བཏང་། དེའི་ཕྱི་དྲོ་འོད་ཟེར་དྲི་མེད་ཀྱི་སྟ་གོན། དེའི་ཕྱི་ཉིན་སྲོག་ཤིང་བཙུགས་ལ་འོད་ཟེར་དྲི་མེད་ཀྱི་དངོས་གཞི་སྲོག་ཤིང་༼༣༽འཛུག་ཆོག་བྱ། ཆོ་གའི་སྐབས་ཁྲུས་དང་། གཙང་སྦྲ་དཀར་སྤྱད། གུང་ཚིགས། དགོང་བཅད་སོགས་གལ་ཆེ། གཞན་ཡང་བསྟན་པའི་སྤྱི་རིམ་ལྟ་བུ་གལ་ཆེན་ཡིན་ན་ས་ཆོག་ཚར་མ་ཐག་མཆོད་རྟེན་གྱི་འོག་ཏུ་དམ་སྲི་མནན་པ་སོགས་ཚད་ལྡན་བྱ། ཆོས་འཁོར་རམ། ཏོག་གི་ནང་དུ་གདུགས་དཀར་འཁོར་ལོ་བཅའ་སྒྲུབ་ཚད་ལྡན་བྱས་པ་ཡོད་ན་རྫ་ཡི་གའུ་ལྟ་བུར་བཞག་ཅིང་གདུགས་དཀར་གྱི་རྒྱལ་མཚན་འཛུག་ཆོག་དང་། དེས་མཚོན་རྒྱལ་མཚན་རྩེ་མོའི་གཟུངས་གླེགས་བམ་གྱི་ཚུལ་དུ་བྲིས་པ་བཞག་ཅིང་དེའི་ཆོ་གའང་གྲུབ་ན་ལེགས། སྲོག་ཤིང་གི་ནང་དུ་ཤོང་ན་འོད་ཟེར་དྲི་མེད་ཀྱི་གཟུངས་ཚང་མ་གསེར་རམ་མཚལ་གྱིས་བྲི། དྲི་བཟང་དང་། བྱིན་རྟེན་བྱུགས། དྲིལ་ཚས་དང་བཅས་གཞུག་པ་ཤིན་ཏུ་གལ་ཆེ། མ་ཤོང་ན་རྫ་ཡི་གའུ་ལྟ་བུར་བཅུག་ནས་སྲོག་ཤིང་ལ་བཅིངས་ཀྱང་རུང་། དེ་ལྟ་བུའི་རྟེན་གྱི་བྱ་བ་མཐར་ཕྱིན་ནས་རབ་གནས་རྒྱས་བསྡུས་གང་རུང་གིས་མངའ་གསོལ། རྒྱུན་དང་དུས་སུ་ཕྱག་བསྐོར་མཆོད་པ་སོགས་བགྱིས་པས་དྲི་མེད་རྣམ་གཉིས་ཀྱི་གཟུངས་ནས་གསུངས་པས་མཚོན། ཕན་ཡོན་བསམ་མི་ཁྱབ་པ་འཐོབ་ཅིང་འཕྲལ་དང་ཡུན་གྱི་ཕན་བདེའི་དགེ་མཚན་འགྲུབ་པ་ནི་ངེས་པའོ། །གཟུངས་སྔགས་ཡིད་བཞིན་ནོར་བུའི་ཆོ་གའི་ཚུལ། །ཉེར་མཁོའི་གསལ་བྱེད་ཆུ་གོས་རྩེར་བཀོད་པའི། །ལེགས་བྱས་འདིས་ཀྱང་མཐའ་ཡས་ཡིད་ཅན་ཀུན། །ཐར་བདེའི་དགའ་སྟོན་རྟག་ཏུ་རྒྱས་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། ། ༈ དྲི་མེད་རྣམ་གཉིས་མཆོད་རྟེན་གྱི་ཐོ་ཆུང་བཞུགས། ཨོཾ་སྭསྟི་སིདྡྷཾ། དེ་ལ་མཆོད་རྟེན་ཆེན་པོ་ཡིན་ན་འོག་ཏུ་དམ་སྲི་མནན་པ། ས་བདག་དང་། ཀླུ་བུམ་སྦ་བ་སོགས་ཞིབ་ཆ་མང་པོ་ཡོད་ཀྱང་། ཆུང་ངུ་ལ་དེ་རིགས་ཅི་བྱར་མེད་པས། ཐོག་མར། འོག་ཏུ་མཚོན་འཁྲུགས་མནན་པའི་རྟེན་འབྲེལ་ལྟ་བུར། གྲི་ཆུང་། ཁྲབ་བྱང་སོགས་མཚོན་ཆའི་རིགས་དང་། ཁྲབ་རྨོག་མདའ་མདུང་སོགས་རི་མོ་བྲིས་པའང་མནན་སྲོལ་མཆིས། གང་ལྟར་ཡང་དེ་སྟེང་ས་སྣ་དང་ཆུ་སྣ། རིན་ཆེན་ཕྱེ་མ། འབྲུ་སྣ་བཅས་བཀྲམ་པ་དབང་ཆེན་གསེར་གྱི་ས་གཞིའི་མཚོན་བྱེད་དང་། དེ་སྟེང་གནོད་སྦྱིན་ནོར་ལྷའི་ཕོ་བྲང་མཚོན་བྱེད། བྱུང་ན་ཕྱོགས་བཞི་དབུས་དང་ལྔར་ནོར་བུམ་རེ་རེ། དེ་མིན་གང་འཛོམ། མི་ཕལ་པའི་ཐོད་པ་མཚན་ལྡན་ཡོད་ནའང་གང་ལྟར་བཀྲུ་བཤལ་ལེགས་པར་བྱ། ཕྱི་ནང་ཐམས་ཅད་ལ་ག་བུར་སོགས་སྨན་སྣ་དྲི་བཟང་བྱུགས། ནང་དུ་ཐོད་སྒྲུབ་ཀྱི་འཁོར་ལོ་བྲི་བའམ། ཡང་ན་རྒྱ་ཤོག་ལ་བྲིས་པའི་འཁོར་ལོ་བཅུག །རིན་ཆེན་འབྲུ་སྨན་སོགས་ཀྱིས་གཏམ་སྟེ་དར་གོས་དམར་སེར་གྱི་གཡོག་དང་བཅས་ཐོད་སྒྲུབ་ཚད་ལྡན་བྱ་ལ་བཅུག །ཁྱད་པར་དབུས་སུ་གནོད་སྦྱིན་འཁོར་ལོ་རྣམས་དཀར་ཡོལ་ལམ། ཕོར་བ་ལྟ་བུ་གང་ཡོད་ཚོན་གྱིས་མདོག་དམར་སེར་དུ་བསྒྱུར་བའི་ནང་དུ་ཞུན་མར་དང་། སྦྲང་རྩི་བསྲེས་པའི་དང་མ་སུམ་ཆ་གཅིག་ཙམ་མ་གང་བར་བླུགས། དེ་སྟེང་འཁོར་ལོ་དབུ་ཞབས་མ་འཁྲུལ་བར་ལེབ་མོར་བཞག །དེ་སྟེང་མར་དང་སྦྲང་རྩིས་ཁ་བཀང་ནས་དར་དམར་སེར་གྱིས་དྲིལ། སྐུད་པ་སེར་པོས་དཀྲིས་ལ་བཞག་ན་རྒྱུད་སྡེའི་དགོངས་པ་འཁྲུལ་མེད་ཡིན། དེའི་ཐོགས་མཚམས་སུ། ཆོས་སྲུང་ནོར་ལྷ་བཀྲ་ཤིས་འདོད་གསོལ་སོགས་ཀྱི་ཤོག་དྲིལ་རྣམས་བཞག །ཕྱོགས་མཚམས་ཐམས་ཅད་དུ་འབྲུ་ནག་མ་ཡིན་པའི་འབྲུ་སྣ་ཚོགས། ཤ་མ་གཏོགས་པའི། ཇ་མར་ཚྭ་སོགས་དང་། རིན་པོ་ཆེའི་རིགས། དུག་རིགས་མ་ཡིན་པའི་སྨན་དང་། མེ་ཏོག་སྣ་ཚོགས། མགོ་སྣམས་དང་ཕྲུགས་ལྟ་བུ་འབུ་ཆགས་འོང་བའི་རིགས་མ་ཡིན་པའི། དར་རས་གོས་ཆེན་སོགས་གང་ཡོད་བཞག །འབྲུ་སྣ་སོགས་རས་སེར་པོའི་ཁུག་མར་བླུགས་ནས་བཞག་སྲོལ་དང་། རས་སེར་པོ་མེད་ན་དཀར་པོ་གུར་གུམ་དང་། སིནྡྷཱུ་ར་ལྟ་བུས་ཁ་དོག་སེར་པོ་བྱེད་པ་མ་གཏོགས། རྒྱས་པའི་ལས་ཡིན་པས་སྣོད་དཀར་པོ་འདྲ་ལ་བླུགས་སྲོལ་མེད། འབྲུ་སྣ་སོགས་བཞག་རྒྱུ་རིགས་དམ་སེལ་ཅན་དང་། ཆོས་རྒྱུད་མི་གཅིག་པའི་མཐུ་ཁ་ཡོད་པ་སོགས་ཀྱི་ལག་ནས་བྱུང་བ་བཞག་སྲོལ་མེད། འབྲུ་རྣམས་ཀྱང་རྡོ་རྡུལ་སོགས་ལྷད་མེད་པ་དང་། ཆུ་གཙང་མས་བཀྲུ་ནས་སྐམ་བཅོལ་བ་བཞག་པ་སོགས་གཙང་སྦྲ་གལ་ཆེ། གཞན་ཤོག་དྲིལ་བཞག་ཚུལ་སོགས་རྒྱུད་སྡེའི་གོ་རིམ་ལྟར་ལ། བུམ་པའི་ནང་དུ་དྲི་མེད་རྣམ་གཉིས་དཀྱིལ་འཁོར་བཞག་ན། ཐོག་མར་གཙུག་ཏོར་དྲི་མེད་དཀྱིལ་ཐང་ཤིང་ལ་སྦྱར་བ་བཅུག་ནས་ཞལ་ཁེབས་རྒྱེབ། དེའི་སྟེང་དུ་འོད་ཟེར་དྲི་མེད་དཀྱིལ་ཐང་ཞལ་ཁེབས་བཅས་བཞག །དེའི་སྟེང་དུ་རྡོ་ལེབ་བམ་སྲ་ཤིང་གི་ཤིང་ལེབ་སྲབ་མོ་ཞིག་གིས་མ་བཀབ་ན་སྲོག་ཤིང་གི་རྩེས་དཀྱིལ་ཐང་རལ་བའི་ཉེན་ཡོད། དེ་སྟེང་དབུས་སུ་སྲོག་ཤིང་བརྟན་པོར་བཙུག །ཕྱི་རོལ་དུ་མཆོད་རྫས་དངོས་བཤམ་ན་མི་ཤོང་གང་བས་རས་བྲིས་ཀྱི་ཕྱི་ལ་གཙུག་ཏོར་དྲི་མེད་དང་། ནང་དུ་འོད་ཟེར་དྲི་མེད་སྒབ་དཀྲིས་བསྐོར། དེའི་ནང་དུ་ཤོང་ན་ཏིང་ཕོར་ཆུང་ངུའམ། རྫ་ས་ལས་ཏིང་ཕོར་ཆུང་ངུ་བཟོས་པར་ཚོན་བྱུགས་ཏེ། མཆོད་ཡོན། ཞབས་བསིལ་དྲི་ཆབ་གསུམ་སོ་སོའི་རྫས་དང་ཚྭ་བསྲེས་པས་བཀང་། མཚམས་འཛིན་མེ་ཏོག་དང་། མེ་ཏོག་གི་སྣོད་དུ་འབྲུ་དཀར་བླུགས། བདུག་སྤོས་རེང་བུ་དང་། མར་མེ་ཀོང་ཆུང་དངོས་དང་། ཞལ་ཟས་མར་ཟན་གྱིས་བཟོས་པ་བཅས། གཡས་བསྐོར་སྤྱི་ལྟར་བཤམ། སྲོག་ཤིང་གི་ཕྱོགས་བཞིར་ཅོད་པན་བཏགས་ནས་བུམ་པའི་ངོས་སུ་འཐེན། སྲོག་ཤིང་ལ་དཀྲི་རྒྱུའི་གཟུངས་སོགས་ངག་བཀོད་ལྟར་བྱ། སཱཙྪ་མང་ནས་མ་ཤོང་ན་བྲེ་མན། ཚད་མེད་བཞི་ཡན་གང་ཤོང་དུ་བཞག །འཕེལ་གདུང་རིགས་ཏོག །ཆོས་འཁོར། བྲེ་ཡན་ཆད་དུ་བཞག །དབུ་སྐྲ་ན་བཟའ་ཁྱད་འཕགས་རིགས་ཀྱང་བྲེ་ཡན་ཆད་དུ་བཞག །བདུད་རྩི་རིལ་བུ་དང་། སྨན་སྒྲུབ་སོགས་བྱིན་རྟེན་རིགས་ཕལ་ཆེར་བྲེ་ནང་བཞག །གནམ་ལྕགས་རྡོ་རྗེ་ཕུར་པ་ལྟ་བུ་གཏེར་བྱོན་སོགས་བྱིན་ལྡན་དབུ་ཐོད་དང་སྒྲུབ་ཐོད་ལྟ་བུ་བྱིན་ཅན་རིགས་ཡོད་ན་བུམ་པའི་ནང་དུ་བཞག །རྡོ་རྗེ་དྲིལ་བུ། ཌཱ་མ་རུ་སོགས་བྱིན་ཅན་རིགས་ཀྱང་ཚད་མེད་བཞི་ཡན་གང་ཤོང་དུ་བཞག །ཡིག་བརྒྱ་ནི་བུམ་པའི་ནང་ཡན་ཆོད་དང་ཚེ་གཟུངས་ཚད་མེད་བཞི་ཡན་ཆོད་གར་ལོ་སར་བཞག་ཆོག །དབྱངས་གསལ་དང་རྟེན་སྙིང་སོགས་གནོད་སྦྱིན་བང་མཛོད་ཡན་གར་ལོ་སར་བཞག་ཆོག་རྒྱུ་རེད། བར་མཚམས་ཐམས་ཅད་ཤུག་ཕྱེ་སོགས་ཀྱིས་བསྡམས་ནས་ལག་ཚག་ཤིན་ཏུ་དམ་པ་དང་། ཐོག་མཐའ་བར་གསུམ་ཐམས་ཅད་དུ་ལས་བྱེད་རྣམས་ཀྱང་ཟས་དཀར་གསུམ་ལ་བརྟེན་པའི་གཙང་སྦྲ་བཅས་གལ་ཆེ་བ་ལགས། མངྒ་ལཾ། ། ༈

[edit]

dri med rnam gnyis kyi mchod rten bzhengs skabs nyer mkho'i zin bris gzhan phan zla snang /__ @#/__/dri med rnam gnyis kyi mchod rten bzhengs skabs nyer mkho'i zin bris gzhan phan zla snang zhes bya ba bzhugs so//__// oM swasti/__thugs rje'i zla zer gang du snang tsam gyis/__/snyigs dus rgud pa'i mun pa rab bsal nas/__/phan bde'i dbugs 'byin stsol mdzad bcom ldan 'das/__/bla ma thub pa'i dbang pos dge legs stsol/__/ston pa thugs rje can gyis grol ba bzhi ldan gyi phrin las mngon sum gzugs su snang ba dri med rnam gnyis kyi mchod rten bzhengs par 'dod pa'i lhag bsam can dag gis 'di ltar nges par bya ste/__lo chen rin po che'i chog bsgrigs bklag pas grub pa ltar/___/___!_thog mar slob dpon gyis bsnyen pa bya dgos pas bsnyen tshad rab gzungs ring khri bzhi snying po 'bum phrag bzhi/__de ltar ma grub na gzungs ring khri dang snying po 'bum phrag bzla/__bzlas pa'i skabs su khrus dang gtsang sbra dkar spyad sogs kun spyod shin tu zhib pa dang /__thun mtshams su mdo sdud dang sher snying sogs sher mdo gang rung bklag__/__!_bsnyen pa grub nas sAts+tsha sgrub/___/___!_de nas sa chog la mchod rten dngos sam khang bu brtsegs pa gang rung bzhengs pa'i sa gzhir phyin la cho ga gzhung gsal ltar dang /__seng ldeng phur bu brgyad dngos su 'byor dgos/__rin po che'i gter bcug pa'i skabs dbus dang phyogs mtshams gang 'dzoms su klu bum dgu'am lnga/__tha na'ang dbus su gcig__/dbus ma'i mdun du sa bdag bum pa rdo sgrom sogs lag tshag dam par bya/__'di rnams ma sa'i nang du sba/__de'i steng du sngar gyi phur pa btab skabs phyogs mtshams rdo sgrom lta bu'i mi rul pa'i thabs dang bcas te gzhug__/'di skabs grub na'ang rang ngam grogs kyis bsang dang gser skyems sa bdag 'khrug bcos sogs kyang bgyis na legs/___/___!_de nas khang brtsegs yin na rmang gi bang rim gnyis brtsigs nas dbus dkyil 'khor gyi 'go thad du nor bum dang gnod sbyin 'khor lo sogs yod na rang rang gi cho ga ltar sba/__khang pa'i steng thog bar legs par brtsigs te btab/__mchod rten yin na bum rten bar brtsegs la gnod sbyin bang mdzod kyi bca' gsogs spyi ltar bya/__gang ltar yang 'og gzhi zhal ba legs par byas pa'i dbus su khru do las mi chung ba'i stegs bu gru bzhi bya/__de nas gtsug tor dri med kyi dkyil 'khor rdul tshon gyis bris na legs kyang zub pa sogs kyi nyes pa mi 'byung ba dang /__stabs bder rdo leb la brkos nas tshon legs par byugs pa pra rtsi btang ba bshams/__dkyil 'khor gyi rgyan steng du bla bre sngon po phub/__mthar byang shar nas brtsams mtshams 'dzin gyi me tog dang chu gnyis sngon 'gro'i nyer spyod de spyi mchod dang /__de'i phyi rol du sgos mchod rnam lnga shar du lhag gcig dang bcas pa'i phyogs re re drug re bshams/__cis kyang ma 'byor na shar du lhag gcig dang bcas pa'i re re med thabs med/__de rnams kyang gtan du bzhag dgos pas/__snod kyi rigs 'byor na li sogs dang /__ma 'byor na rdza la bya/__mchod yon gyi snod du na tshwa bzang po blugs/__de steng rdzas bdun gyis bkang /__rdzas bdun ni/__tsam pa ka dang /__ba lu'i me tog lta bu'i me tog dkar po gang 1'byor/__til dkar2/__nas dkar3/__'bras yos4/__ku sha5/__dri bzang 6/__'o ma skabs 7'dir rul nyen gyis 'phyur ba blugs/__zhabs bsil la lan tshwa'i steng /__shun pa lnga dang 'dag rdzas rigs kyi phye mas bkang /__shun pa lnga dngos bod du mi 'byor yang /__sngon gyi bla ma rnams kyi phyag bzhes su/__bal bu/__lcang dkar/__kham bu/__'om bu rnams kyi bar shun dang /__tsan+dan dkar po bcas kyis tshab rung mdzad tshul yod/__'dag rdzas ni/__sran dkar/__nye shing /__'bras spu bcas pa'i shun pa'i phye ma sogs sbyar/__me tog ni 'byor na gos chen sogs kyi bcos pa dang ma 'byor na 'bru dkar/__bdug spos spos ring spos gta' la btsug__/mar me rdza kong lta bu gtan du bzhag lo ba dgos/__dri chab lan tshwa'i steng /__gur gum/__ga bur/__li shi/__dzA ti/__tsan+dan dkar po ste dri lnga'i phye mas bkang /__zhal zas mar zan lta bu las bzhengs/__de'i phyi rol du cod pan nam dar dpyang /__ba dan/__rgyal mtshan/__gdugs rnams gos dar sogs las bcos pa phyogs rer brgyad re'am ma mtha' re re rdza yi spos 'dzin lta bu la 'dzug__/de'i phyi rol du yol ba dmar pos zlum skor bya/__de'i phyi rol du/__bang sgrom dang rdo rtsigs stabs gang bde khru gang las mi dma' bas bskor/__slob dpon gyi mdun du bdag bskyed mchod pa dang /__gzhan yang rol mo'i bye brag sogs 'og tu dgos pa'i yo byad rnams 'du bya/__dngos gzhi bdag mdun gyi cho ga gzhung gsal ltar/__cha gsum slob dpon gyi mdun du bshams nas re re bzhin 'bul ba las rgyun bzhag rgyu mi dgos/__bkra shis skabs cho ga rgyas pa gzhan nas 'byung ba'i tshigs bcad tshang ma brjod na legs/___/___!_'od zer dri med skabs gong gi bang sgrom la kha chod sra brling can rgyab/__mchod rten yin na bum pa cung zad brtsigs gang ltar yang /__lha sta gon gzhung bzhin legs par bya/__de yi phyi nyin/__rdo leb la brkos pa'i dkyil 'khor bshams/__de nas srog shing tshad ldan sbyangs khrus byas pa rdo rje'i rwa rtse dbus kyi gdan gru bzhi la khel nges kyis btsug__/srog shing lji na rdo leb kyis theg dka' bas phyi rol gyi khang sgrom dang bstun rdo rje'i rwa nas gdung mas 'degs pa sogs dkyil 'khor la chag grum mi 'byung ba'i thabs bya/__dkyil 'khor gyi snam bu'i grwa bzhir dung chos dngos 'byor na rab/__ma 'byor na rdo'am rdza las bcos pa dkar dang pra rtsi btang ba'i nang du lan tshwa dang dri lnga'i phye mas bkang ba/__shar gyi snam bu'i khar rdza phor lta bu'i nang du tsan+dan a gar shug pa sogs kyis bkang ba'i spos snod gsum/__lho yi snam bur dri yi dung zhal gong smos lta bu dang /__rdza phor lta bur me tog dkar po dang /__'bras kyis bkang ba re/__nub kyi snam bur tshon rtsi can gyi nang du til nag__/sran ma ma sha__/'bras rnams bsres nas btsos pa'i thug pa kri sA ra zhes pas bkang ba dang /__zas dkar gsum gyis gang ba'i bum pa/__rdza lder lta bur kham bu star ga rgun 'brum sogs shing tog sna tshogs kyi 'bras bu dgu bcu rtsa dgus bkang ba rnams bkod/__gong gi sran ma ma sha ma rnyed na sran dkar gyis chog__/byang gi snam bur rdza lder lta bur snum zan gyi gtor ma dkar zlum mthar/__mar thud/__khur ba sogs kha zas sna tshogs kyis bskor ba dang /__dri lngas bkang ba'i rdza bum kha rgyan mgul chings can/__rdza lder lta bur spos dang me tog rnams bzhag__/nub byang gi grar/__dri yi dung chos kyi rgyab tu rdo'am shing zla gam la tshogs bdag kyi sku glang gdong sngon po dgra s+t+wa dang la phug 'dzin pa tshon rtsi can gyi spyi bo'i steng du dngul lam/__ma 'byor na zangs lta bu'i rin po che mar me bzhag cing gzer btab nas mi 'gul bar bya/__de'i phyi rol du phyogs rer mchod pa tshar re dang nub tu lhag gsum mam gcig__/ma 'byor na lho nub nas brtsams te rdza phor lta bur mchod yon/__dri chab/__me tog__/spos zhal zas rnams sngar smos pa lta bu dang /__rdza lder sogs su khur ba sna tshogs/__shing tog sna tshogs sran dkar gyi chan/__'o thug bskol ba'am 'phyur bas bkang ba dang /__mar me bcas zlum skor du bshams/__de'i phyi rol du phyogs bzhir stegs bu'i khar mchod yon gyi dung chos bzed zhal bcas/__de rnams kyi bar mtshams su spos mar me zhal zas rnams tshar re/__de yi phyi rol phyogs mtshams brgyad du/__tog leb mo'i ngos su rma bya'i mdongs sbyar ba'am/__ma 'byor na bris pas kyang rung bas rgyal mtshan shar dkar/__shar lhor le brgan/__lhor nag__/lho nub dud kha/__nub dmar/__nub byang khra bo/__byang ser/__byang shar ljang ser rnams dang /__bkra shis rdzas brgyad dngos rdzas 'byor na legs/__ma 'byor na rdo leb zlum po chung ngu'am/__gro ga lta bu la bris nas rgyal mtshan so so'i mgul du btags/__de'i phyi rol nas ras dmar pos zlum por bskor/__steng du srog shing las bang sgrom gyi phyogs bzhir ras skud bsgril ma lta bu brkyang ba la dar gyi lda ldi ste dar dpyang dang /__ba dan/__rgyal mtshan/__me tog gi chun po rnams gos dar las byas pa dpyangs/__de nas cho ga gzhung gsal ltar btang /__skabs 'dir glegs bam bklags zhes pa 'od zer dri med kyi gzungs dpon slob thams cad kyis grub na tshar gsum sogs dang /__ma mtha' yang tshar re bklags dgos/__spyir gzungs mdo bklags mkhan zur du bzhag rgyu byung na yang legs/__de nas srog shing gi cho ga'i skabs phyogs re re bzhin mgor mchod pa byin rlabs nges par dgos/__spro na mchod pa'i skabs rab 'byams rgya mtsho sogs tshigs bcad spel/__gang ltar yang mchod pa'i sngags/__oM sarba ta thA ga ta sa pa ri wA ra ar+g+haM pra tIts+tsha pU dza me g+ha sa mu dra s+pha ra Na sa ma ye AHhU~M/__de bzhin tu pA d+yaM sogs sbyar ba'i mthar/__rol mo dang bcas mchod pa'i sprin gyi sngags brjod/__gtor ma byin rlabs cha gsum ltar bya/__so so'i mjug tu phun sum tshogs pa dang /__che ba'i che mchog sogs mdo rgyud nas byung ba'i bkra shis sha lo ka gsum lnga sogs gang 'os brjod/__mjug tu shar sgo nas bkra shis skabs gtsug tor dri med kyi cho ga las 'byung ba'i bya rgyud kyi bkra shis ring mo dang /__bzang spyod lta bu'i smon lam rgyas par bya'o/___/___!_de nas bang ba'i khar shing leb sogs kyi kha chod dam par brgyab/__srog shing dang kha chod kyi mtshams sogs bye spyin lta bus zhal ba byas nas nang du rdul sogs mi 'gro bar bya/__sAts+tsha rang rang gi dkyil 'khor steng du bzhag dgos kyang shong dka' ba dang /__bar mtshams bye ma sogs kyis sag dgos stabs dkyil 'khor dang yo byad chud zos su 'gro dog na steng du bzhag kyang mi rung ba med pas gong gi kha chod steng du bang sgrom lta bu rim gyis bsgrigs pa dang bstun thog mar gtsug tor dri med sAts+tsha khri phrag sogs gang 'grub dang /__ma mtha'ang brgya rtsa brgyad/__de steng 'od zer dri med kyi sA ts+tsha gang 'grub dang /__ma mtha'ang dgu bcu rtsa dgu las mi nyung ba bzhag__/bar mtshams bye ma skam pos sag pa sogs lag tshag shin tu dam par bya dgos/__gzhan sAts+tsha 'bum ther sogs mang po yod na khang brtsegs skabs dbus kyi bang sgrom dang khang pa'i bar du gru chod byas nas legs par bzhag__/khang brtsegs steng ma yang sAts+tshas khengs par bya/__ring bsrel rnam bzhis mtshon gzungs gzhug rigs phal cher kyang rdo sgrom mam rdza snod lta bu'i nang du gzhug la bar mtshams la tshwa sogs kyis sbyar nas chu mi 'gro bar byas te khang brtsegs steng ma'i dbus su bzhag__/mchod rten yin na sAts+tsha lhag ma rnams bum pa'i nang du gang shong bya/__gzhan gzungs 'jug bzhag tshul sogs lag len spyi khyab ltar shes dgos/__khang brtsegs la khang bu brtsegs pa steng ma bkab nas de steng tog mtshon byed tsam mam rgyal mtshan lta bu btsugs kyang chog__/grub na chos 'khor rim pa bcu gsum gdugs tog dang bcas pa byas kyang legs/___/___!_gong gi yo byad nyer mkho snga tshags dgos pa la/__seng ldeng gi phur bu brgyad dam/__ma 'byor na shug pa tsher ma can gyis kyang rung /__klu bum dgu lnga gcig sogs gang 'byor/__sa bdag bum pa/__nor bum/__gnod sbyin 'khor lo/__shug pa rtsa rtse dang shar rtags ma nor ba'i srog shing /__de la byugs rgyu'i dri bzang dang /__dkri dpyad ras ser sogs dgos 'dangs/__srog shing gi gzungs kyis mtshon gzungs gzhug ring bsrel bzhi'am lnga'i rigs gang 'byor/__'od zer dri med kyi gzungs tshang ma/__dri med gnyis kyi dkyil 'khor/___/___!_gtsug tor dri med la bla bre sngon po/__mchod pa'i snod rdzas sogs kyi ting phor rgyas par nga lnga bsdu na bco lnga/__spos 'dzin rgyas par nyer drug__/bsdu na drug__/mar me de mtshungs/__lan tshwa/__mchod yon/__zhabs bsil/__dri chab rnams kyi rdzas/__cod pan/__ba dan/__rgyal mtshan/__gdugs rnams rgyas par re re nas so gnyis re/__bsdu na bzhi re/__de rnams 'dzug pa rdza yi spos 'dzin lta bu grangs mnyam dang /__sgab dkris dmar po/___/___!_'od zer dri med la/__dung chos dgu/__spos phor gsum/__bum pa gnyis/__ting phor rgyas par nyer gsum/__bsdu na lnga/__rdza lder rgyas par so gcig__/bsdu na bdun/__spos 'dzin rgyas par bcu gcig__/bsdu na lnga/__mar me de mtshungs/__tshogs bdag gi sku/__rin po che'i kong bu/__bzed zhal bzhi/__rgyal mtshan brgyad/__'dzug gdan brgyad/__bkra shis rdzas brgyad/__sgab dkris dmar po/___/___!_srog shing gi phyogs bzhir brkyang rgyu'i ras skud/__dar dpyang ba dan/__rgyal mtshan/__me tog chun po rnams bzhi re/___/___!_rdzas cha tsan+dan dkar po/__a gar/__me tog dkar po/__dri bzang /__'bras/__til nag__/sran ma ma sha'am sran dkar/__kham bu star ga dang /__rgun 'brum sogs shing tog sna tshogs/__mar thud/__khur ba/__'o skom mam 'phyur ba/__rma bya'i mdongs brgyad bcas dgos/___/___!__de'ang thog mar sAts+tsha rab 'bum/__'bring khri/__tha ma stong phrag sogs cho ga'i sgo nas legs par bsgrubs/__de nas slob dpon bsnyen pa song bas sgrub grogs dang bcas (1)sa chog bya/__de rjes khang brtsegs thog bkab pa'i bar tshar nas snga dro gtsug tor (2)dri med kyi cho ga btang /__de'i phyi dro 'od zer dri med kyi sta gon/__de'i phyi nyin srog shing btsugs la 'od zer dri med kyi dngos gzhi srog shing (3)'dzug chog bya/__cho ga'i skabs khrus dang /__gtsang sbra dkar spyad/__gung tshigs/__dgong bcad sogs gal che/__gzhan yang bstan pa'i spyi rim lta bu gal chen yin na sa chog tshar ma thag mchod rten gyi 'og tu dam sri mnan pa sogs tshad ldan bya/__chos 'khor ram/__tog gi nang du gdugs dkar 'khor lo bca' sgrub tshad ldan byas pa yod na rdza yi ga'u lta bur bzhag cing gdugs dkar gyi rgyal mtshan 'dzug chog dang /__des mtshon rgyal mtshan rtse mo'i gzungs glegs bam gyi tshul du bris pa bzhag cing de'i cho ga'ang grub na legs/__srog shing gi nang du shong na 'od zer dri med kyi gzungs tshang ma gser ram mtshal gyis bri/__dri bzang dang /__byin rten byugs/__dril tshas dang bcas gzhug pa shin tu gal che/__ma shong na rdza yi ga'u lta bur bcug nas srog shing la bcings kyang rung /__de lta bu'i rten gyi bya ba mthar phyin nas rab gnas rgyas bsdus gang rung gis mnga' gsol/__rgyun dang dus su phyag bskor mchod pa sogs bgyis pas dri med rnam gnyis kyi gzungs nas gsungs pas mtshon/__phan yon bsam mi khyab pa 'thob cing 'phral dang yun gyi phan bde'i dge mtshan 'grub pa ni nges pa'o/__/gzungs sngags yid bzhin nor bu'i cho ga'i tshul/__/nyer mkho'i gsal byed chu gos rtser bkod pa'i/__/legs byas 'dis kyang mtha' yas yid can kun/__/thar bde'i dga' ston rtag tu rgyas gyur cig__/sarba dA ka l+yA NaM b+ha ba tu/___/___!__dri med rnam gnyis mchod rten gyi tho chung bzhugs/__oM swasti sid+d+haM/__de la mchod rten chen po yin na 'og tu dam sri mnan pa/__sa bdag dang /__klu bum sba ba sogs zhib cha mang po yod kyang /__chung ngu la de rigs ci byar med pas/__thog mar/__'og tu mtshon 'khrugs mnan pa'i rten 'brel lta bur/__gri chung /__khrab byang sogs mtshon cha'i rigs dang /__khrab rmog mda' mdung sogs ri mo bris pa'ang mnan srol mchis/__gang ltar yang de steng sa sna dang chu sna/__rin chen phye ma/__'bru sna bcas bkram pa dbang chen gser gyi sa gzhi'i mtshon byed dang /__de steng gnod sbyin nor lha'i pho brang mtshon byed/__byung na phyogs bzhi dbus dang lngar nor bum re re/__de min gang 'dzom/__mi phal pa'i thod pa mtshan ldan yod na'ang gang ltar bkru bshal legs par bya/__phyi nang thams cad la ga bur sogs sman sna dri bzang byugs/__nang du thod sgrub kyi 'khor lo bri ba'am/__yang na rgya shog la bris pa'i 'khor lo bcug__/rin chen 'bru sman sogs kyis gtam ste dar gos dmar ser gyi g.yog dang bcas thod sgrub tshad ldan bya la bcug__/khyad par dbus su gnod sbyin 'khor lo rnams dkar yol lam/__phor ba lta bu gang yod tshon gyis mdog dmar ser du bsgyur ba'i nang du zhun mar dang /__sbrang rtsi bsres pa'i dang ma sum cha gcig tsam ma gang bar blugs/__de steng 'khor lo dbu zhabs ma 'khrul bar leb mor bzhag__/de steng mar dang sbrang rtsis kha bkang nas dar dmar ser gyis dril/__skud pa ser pos dkris la bzhag na rgyud sde'i dgongs pa 'khrul med yin/__de'i thogs mtshams su/__chos srung nor lha bkra shis 'dod gsol sogs kyi shog dril rnams bzhag__/phyogs mtshams thams cad du 'bru nag ma yin pa'i 'bru sna tshogs/__sha ma gtogs pa'i/__ja mar tshwa sogs dang /__rin po che'i rigs/__dug rigs ma yin pa'i sman dang /__me tog sna tshogs/__mgo snams dang phrugs lta bu 'bu chags 'ong ba'i rigs ma yin pa'i/__dar ras gos chen sogs gang yod bzhag__/'bru sna sogs ras ser po'i khug mar blugs nas bzhag srol dang /__ras ser po med na dkar po gur gum dang /__sin+d+hU ra lta bus kha dog ser po byed pa ma gtogs/__rgyas pa'i las yin pas snod dkar po 'dra la blugs srol med/__'bru sna sogs bzhag rgyu rigs dam sel can dang /__chos rgyud mi gcig pa'i mthu kha yod pa sogs kyi lag nas byung ba bzhag srol med/__'bru rnams kyang rdo rdul sogs lhad med pa dang /__chu gtsang mas bkru nas skam bcol ba bzhag pa sogs gtsang sbra gal che/__gzhan shog dril bzhag tshul sogs rgyud sde'i go rim ltar la/__bum pa'i nang du dri med rnam gnyis dkyil 'khor bzhag na/__thog mar gtsug tor dri med dkyil thang shing la sbyar ba bcug nas zhal khebs rgyeb/__de'i steng du 'od zer dri med dkyil thang zhal khebs bcas bzhag__/de'i steng du rdo leb bam sra shing gi shing leb srab mo zhig gis ma bkab na srog shing gi rtses dkyil thang ral ba'i nyen yod/__de steng dbus su srog shing brtan por btsug__/phyi rol du mchod rdzas dngos bsham na mi shong gang bas ras bris kyi phyi la gtsug tor dri med dang /__nang du 'od zer dri med sgab dkris bskor/__de'i nang du shong na ting phor chung ngu'am/__rdza sa las ting phor chung ngu bzos par tshon byugs te/__mchod yon/__zhabs bsil dri chab gsum so so'i rdzas dang tshwa bsres pas bkang /__mtshams 'dzin me tog dang /__me tog gi snod du 'bru dkar blugs/__bdug spos reng bu dang /__mar me kong chung dngos dang /__zhal zas mar zan gyis bzos pa bcas/__g.yas bskor spyi ltar bsham/__srog shing gi phyogs bzhir cod pan btags nas bum pa'i ngos su 'then/__srog shing la dkri rgyu'i gzungs sogs ngag bkod ltar bya/__sAts+tsha mang nas ma shong na bre man/__tshad med bzhi yan gang shong du bzhag__/'phel gdung rigs tog__/chos 'khor/__bre yan chad du bzhag__/dbu skra na bza' khyad 'phags rigs kyang bre yan chad du bzhag__/bdud rtsi ril bu dang /__sman sgrub sogs byin rten rigs phal cher bre nang bzhag__/gnam lcags rdo rje phur pa lta bu gter byon sogs byin ldan dbu thod dang sgrub thod lta bu byin can rigs yod na bum pa'i nang du bzhag__/rdo rje dril bu/__DA ma ru sogs byin can rigs kyang tshad med bzhi yan gang shong du bzhag__/yig brgya ni bum pa'i nang yan chod dang tshe gzungs tshad med bzhi yan chod gar lo sar bzhag chog__/dbyangs gsal dang rten snying sogs gnod sbyin bang mdzod yan gar lo sar bzhag chog rgyu red/__bar mtshams thams cad shug phye sogs kyis bsdams nas lag tshag shin tu dam pa dang /__thog mtha' bar gsum thams cad du las byed rnams kyang zas dkar gsum la brten pa'i gtsang sbra bcas gal che ba lags/__mang+ga laM/___/___!_