JKW-KABUM-20-WA-001-054

Previous Text Back to Volume PageNext Text

ངོར་ཐར་རྩེ་བླ་བྲང་དུ་ལེགས་འབུལ་གྱི་ཡི་གེ་སྙན་པའི་ཏམྦུ་ར།

Wylie title	ngor thar rtse bla brang du legs 'bul gyi yi ge snyan pa'i tam+bu ra
Location	mkhyen brtse'i bka' 'bum Volume 20, sde tshan 1, Text 54, Pages 97-101 (Folios 49a4 to 51a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. ngor thar rtse bla brang du legs 'bul gyi yi ge snyan pa'i tam+bu ra. In 'jam dbyangs mkhyen brtse'i dbang po'i bka' 'bum, Vol. 20: 97-101. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog
Colophon	།ཞེས་པའི་ལེགས་འབུལ་གྱི་ཡི་གེ་ལེ་ཚན་འདི་རྣམས་ཀྱང་ཕུར་བུ་ཞེས་པ་ས་སྤྲེལ་ལོར་མཁན་ཆེན་རྡོ་རྗེ་འཆང་མཉྫུ་ཤྲཱི་བྷ་དྲ་ཡུལ་དབུས་འགྱུར་འཆང་དུ་ཆིབས་བསྐྱོད་གནང་སྐབས་བཀའ་ཡི་ཅོད་པན་སྤྱི་བོར་བཅིངས་པ་ལ་བརྟེན་ནས་རིག་པར་སྨྲ་བ་མཉྫུ་གྷོ་ཥའི་བློ་མཚོ་ལས་ཕྱུང་བའོ།།
	zhes pa'i legs 'bul gyi yi ge le tshan 'di rnams kyang phur bu zhes pa sa sprel lor mkhan chen rdo rje 'chang many+dzu shrI b+ha dra yul dbus 'gyur 'chang du chibs bskyod gnang skabs bka' yi cod pan spyi bor bcings pa la brten nas rig par smra ba many+dzu g+ho Sha'i blo mtsho las phyung ba'o

Tibetan Text

Wylie

[edit]

ངོར་ཐར་རྩེ་བླ་བྲང་དུ་ལེགས་འབུལ་གྱི་ཡི་གེ་སྙན་པའི་ཏམྦུ་ར་ཞེས་བྱ་བ། སྶཱཀཱལདཱིགརཎྱབྷྱུཏྱགཻཿ། ཤཱནྟཾབྷཱབཀགརྦྷབོདྷནཱ། མཱརཾསཱདབྷབེཏྟྲིགུཧྱཀཾ །ཤིན་ཏུ་དག་པ་གཟོད་མའི་ཡེ་ཤེས་ནི། །སྒྲིབ་གཉིས་ཆ་དང་བཅས་པ་སྤང་གྱུར་བས། །སྲིད་དང་ཞི་བའི་སྙིང་པོར་བྱང་ཆུབ་པའི། །གསང་གསུམ་འཆི་མེད་རྟག་པ་ཉིད་གྱུར་ཅིག༡། གང་དུ་སྣང་བས་ཀུན་དགའི་དཔལ་སྟེར་བ། །བདུད་རྩིའི་འབྱུང་གནས་ཟླ་བ་གཞན་ཡིན་ཏེ། །རྣམ་པ་ཀུན་ཏུ་ཕན་བདེའི་ཟིལ་དངར་གྱིས། །ཉེར་འཚོ་བྱང་ཆུབ་སེམས་འདྲ་གཉིས་པ་མེད། ༢ །དེ་སླད་དཔྱིད་ཀྱིས་བཟུང་བའི་དགའ་ཚལ་ནི། །ཉིན་རེ་བཞིན་ཡང་འཕེལ་བའི་སྐབས་མཐོང་ལྟར། །དེ་བཞིན་ཐབས་དང་དེ་ལས་བྱུང་བ་ཡི། །ཚོགས་ཟུང་བྱེ་བའི་འདུ་འགོད་འཆར་བ་ན། ༣ །སྒྲིབ་པའི་ཚང་ཚིང་མ་ལུས་བསྲེགས་བྱས་ཏེ། །རིག་དང་བརྩེ་བ་རྒྱ་མཚོའི་མཐར་སོན་པས། །སྲས་བཅས་རྒྱལ་བའི་རྣམ་པར་ཐར་པ་དང་། །མི་ཕྱེད་གྲུབ་པའི་དགེ་མཚན་བརྙེས་བཞིན་དུ། ༤ །མཁའ་ཁྱབ་སྐུ་དང་ཡེ་ཤེས་སྒྱུ་མའི་འཕྲུལ། །དམ་པའི་རིགས་ཀྱི་ས་བོན་དང་འགྲོགས་ནས། །འཕགས་དང་མཁས་མང་བྱེ་བས་ཕྱག་བྱས་པའི། །མཚན་དཔེའི་སྣང་བརྙན་སྲིད་ཞིའི་བླ་ན་གསལ། ༥ །དེ་ཚེ་ཐུབ་བསྟན་བཤད་དང་སྒྲུབ་པ་ཡི། །སྣང་བ་དམ་པས་འཇིག་རྟེན་མཛེས་པའི་ཕུལ། །ཡིད་ཅན་དོན་གཉིས་ངལ་འཚོའི་སླད་རྒྱུ་བའི། །ཡོན་ཏན་གཟུགས་ཅན་བཞིན་དུ་འདི་ན་སྣང་། ༦ །མདོར་ན་བསྔགས་འོས་ཕ་མཐའ་ཡས་པའི་གཏམ། །ལན་གཅིག་དད་པའི་ཡི་གར་སིམ་པ་ལས། །རྡུལ་སྙེད་ལུས་ཀྱི་འཁྲི་ཤིང་དུད་དང་བཅས། །ཐལ་མོའི་ཨུཏྤལ་ཟུམ་པའི་དད་ཕྱག་སྟོབ། ༧ །དངོས་འབྱོར་བདོག་པ་ཕྲ་མོས་ཐོག་དྲངས་ཏེ། །བདག་པོས་བཟུང་དང་ཡོངས་སུ་མ་བཟུང་བའི། །རྣམ་མང་མཆོད་པའི་སྤྲིན་གྱི་ཆར་ཆེན་པོས། །ཡེ་ཤེས་གཟིགས་པའི་མདུན་སར་མཛེས་པ་དབྱེ། ༨ །མུན་པར་འཕྱན་ལ་སྣང་བ་དམ་པ་བཞིན། །སྒྲིབ་གཉིས་གཞན་དབང་གྱུར་པའི་སྡིག་ལྟུང་ཀུན། །སྟོབས་བཞིའི་ནོར་བུའི་རྔ་ཡབ་འཛུམ་པ་ལས། །ཚངས་པའི་འབྲས་བུས་འབྱོར་པའི་ངལ་འཚོ་བཟུང་། ༩ །མཐོང་དང་མ་མཐོང་ལེགས་སྤྱད་ཇི་སྙེད་པ། །ཟླ་ཤེལ་བདུད་རྩིའི་ཕུང་པོར་འབབས་པའི་དཔྱིད། །དྭང་བའི་ཡིད་མཁར་འཆར་ལ་ཡི་རང་བའི། །ཀུ་མུད྄་གསར་པའི་དགའ་ཚལ་ཉིན་བཞིན་གྲོལ། ༡༠ །ཤིན་ཏུ་ཟབ་གསང་རྡོ་རྗེ་ནཱ་དའི་དབྱངས། །ལམ་བདེན་བཻཌཱུར་རྒྱུད་མང་ལ་སྦྱར་བས། །རིགས་ཅན་གསུམ་གྱི་མཐའ་གཉིས་དབུ་མའི་དབྱིངས། །སྤྲོས་པ་བརྟུལ་བའི་གོ་སྐབས་རྟག་ཏུ་སྟོན། ༡༡ །གང་དུ་གཟོད་ནས་ཞི་བའི་མཆོག་བརྙེས་ན། །འཇུག་དང་ལྡང་སོགས་སྣང་ཚུལ་ལས་འདས་ཀྱང་། །བྱིས་བློའི་ངོར་ཡང་སྐྱེ་འགགས་མ་དམིགས་པའི། །འཚོ་གཞེས་དགེ་མཚན་ནུབ་པ་མེད་པར་མཛོད། ༡༢ །དེ་ལྟར་བསགས་དང་དུས་གསུམ་ལེགས་སྤྱད་ཀུན། །འཇམ་དཔལ་གཞོན་ནུའི་མཁྱེན་པའི་ཡོངས་བསྔོ་དང་། །འཇུག་པ་གཅིག་པའི་འདུན་པས་མཚམས་སྦྱར་བས། །བྱང་ཆུབ་སྙིང་པོའི་ཕ་མཐར་སོན་གྱུར་ཅིག ༡༣ །སླད་མའི་ཆར་ཡང་མངོན་པར་འདོད་པའི་དངོས་པོ་ཚིགས་སུ་བཅད་དེ་གསོལ་པ། ཨོཾ་སྭསྟི་ཀུརྦནྟུ། རྣམ་པ་ཀུན་ལྡན་ཡེ་ཤེས་གཅིག་པུ་ཡིས། །གཞན་དབང་མཚན་མའི་ཆོས་ཁམས་དབང་བྱས་པས། །སྣ་ཚོགས་གཟུགས་ཅན་འཆང་བའི་རྫུ་འཕྲུལ་ཅན། །འཆི་མེད་རྡོ་རྗེའི་སྐུ་རུ་འཚོ་གཞེས་གསོལ། །སྲིད་པའི་འཕོ་བ་མཐའ་དག་དྷཱུ་ཏིའི་དབྱིངས། །བདག་བྱིན་བརླབས་པའི་ཆོ་གས་ཐིམ་གྱུར་པ། །རྡོ་རྗེ་མི་ཤིགས་ནཱ་དའི་དབྱངས་སྙན་པོས། །སྡེ་སྣོད་རྒྱ་མཚོའི་ཆར་ཆེན་འབེབས་པར་མཛོད། ༢ །གཟུང་དང་འཛིན་པའི་སྣང་ཚུལ་ཇི་སྙེད་པ། །འཁོར་འདས་དབྱེར་མི་ཕྱེད་པའི་ཡེ་ཤེས་དང་། །མི་ཕྱེད་མཁའ་ཁྱབ་མཁའ་ཡི་རྡོ་རྗེའི་དབྱིངས། །རྟག་པ་དམ་པའི་དགེ་མཚན་རྫོགས་གྱུར་ཅིག ༣ །མདོར་ན་ཡོན་ཏན་དཔག་བསམ་ལྗོན་བཟང་ནི། །ཕྲིན་ལས་འདོད་དགུར་འཇོ་བའི་གྲགས་དཀར་བཅས། །སྲིད་ན་ནུབ་པ་མེད་པའི་ངོ་མཚར་གཏམ། །ཁོར་ཡུག་རི་བོའི་ཁོངས་སུ་སྙན་པ་དང་། ༤ །མཐའ་ཀླས་བསྟན་དང་འགྲོ་ལ་ཕན་བདེའི་རྒྱུན། །རྫོགས་ལྡན་སྤྲིན་གྱི་འཛུམ་དཀར་ལས་འོངས་པའི། །དགེ་ལེགས་ནོར་བུའི་གྲུ་ཆར་རབ་གཡོ་བས། །ས་གསུམ་བཀྲ་ཤིས་སྣང་བ་འབར་གྱུར་ཅིག ༥ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།ཞེས་པའི་ལེགས་འབུལ་གྱི་ཡི་གེ་ལེ་ཚན་འདི་རྣམས་ཀྱང་ཕུར་བུ་ཞེས་པ་ས་སྤྲེལ་ལོར་མཁན་ཆེན་རྡོ་རྗེ་འཆང་མཉྫུ་ཤྲཱི་བྷ་དྲ་ཡུལ་དབུས་འགྱུར་འཆང་དུ་ཆིབས་བསྐྱོད་གནང་སྐབས་བཀའ་ཡི་ཅོད་པན་སྤྱི་བོར་བཅིངས་པ་ལ་བརྟེན་ནས་རིག་པར་སྨྲ་བ་མཉྫུ་གྷོ་ཥའི་བློ་མཚོ་ལས་ཕྱུང་བའོ།། །། ༈

[edit]

ngor thar rtse bla brang du legs 'bul gyi yi ge snyan pa'i tam+bu ra/ ngor thar rtse bla brang du legs 'bul gyi yi ge snyan pa'i tam+bu ra zhes bya ba/_s+sAkAladIgaraN+yab+h+yut+yagaiH/_shAn+taMb+hAbakagar+b+habod+hanA/_mAraMsAdab+habet+t+riguh+yakaM_/shin tu dag pa gzod ma'i ye shes ni/_/sgrib gnyis cha dang bcas pa spang gyur bas/_/srid dang zhi ba'i snying por byang chub pa'i/_/gsang gsum 'chi med rtag pa nyid gyur cig1/_gang du snang bas kun dga'i dpal ster ba/_/bdud rtsi'i 'byung gnas zla ba gzhan yin te/_/rnam pa kun tu phan bde'i zil dngar gyis/_/nyer 'tsho byang chub sems 'dra gnyis pa med/_2_/de slad dpyid kyis bzung ba'i dga' tshal ni/_/nyin re bzhin yang 'phel ba'i skabs mthong ltar/_/de bzhin thabs dang de las byung ba yi/_/tshogs zung bye ba'i 'du 'god 'char ba na/_3_/sgrib pa'i tshang tshing ma lus bsregs byas te/_/rig dang brtse ba rgya mtsho'i mthar son pas/_/sras bcas rgyal ba'i rnam par thar pa dang /_/mi phyed grub pa'i dge mtshan brnyes bzhin du/_4_/mkha' khyab sku dang ye shes sgyu ma'i 'phrul/_/dam pa'i rigs kyi sa bon dang 'grogs nas/_/'phags dang mkhas mang bye bas phyag byas pa'i/_/mtshan dpe'i snang brnyan srid zhi'i bla na gsal/_5_/de tshe thub bstan bshad dang sgrub pa yi/_/snang ba dam pas 'jig rten mdzes pa'i phul/_/yid can don gnyis ngal 'tsho'i slad rgyu ba'i/_/yon tan gzugs can bzhin du 'di na snang /_6_/mdor na bsngags 'os pha mtha' yas pa'i gtam/_/lan gcig dad pa'i yi gar sim pa las/_/rdul snyed lus kyi 'khri shing dud dang bcas/_/thal mo'i ut+pal zum pa'i dad phyag stob/_7_/dngos 'byor bdog pa phra mos thog drangs te/_/bdag pos bzung dang yongs su ma bzung ba'i/_/rnam mang mchod pa'i sprin gyi char chen pos/_/ye shes gzigs pa'i mdun sar mdzes pa dbye/_8_/mun par 'phyan la snang ba dam pa bzhin/_/sgrib gnyis gzhan dbang gyur pa'i sdig ltung kun/_/stobs bzhi'i nor bu'i rnga yab 'dzum pa las/_/tshangs pa'i 'bras bus 'byor pa'i ngal 'tsho bzung /_9_/mthong dang ma mthong legs spyad ji snyed pa/_/zla shel bdud rtsi'i phung por 'babs pa'i dpyid/_/dwang ba'i yid mkhar 'char la yi rang ba'i/_/ku muda? gsar pa'i dga' tshal nyin bzhin grol/_10_/shin tu zab gsang rdo rje nA da'i dbyangs/_/lam bden baiDUr rgyud mang la sbyar bas/_/rigs can gsum gyi mtha' gnyis dbu ma'i dbyings/_/spros pa brtul ba'i go skabs rtag tu ston/_11_/gang du gzod nas zhi ba'i mchog brnyes na/_/'jug dang ldang sogs snang tshul las 'das kyang /_/byis blo'i ngor yang skye 'gags ma dmigs pa'i/_/'tsho gzhes dge mtshan nub pa med par mdzod/_12_/de ltar bsags dang dus gsum legs spyad kun/_/'jam dpal gzhon nu'i mkhyen pa'i yongs bsngo dang /_/'jug pa gcig pa'i 'dun pas mtshams sbyar bas/_/byang chub snying po'i pha mthar son gyur cig_13_/slad ma'i char yang mngon par 'dod pa'i dngos po tshigs su bcad de gsol pa/__oM swasti kurban+tu/_rnam pa kun ldan ye shes gcig pu yis/_/gzhan dbang mtshan ma'i chos khams dbang byas pas/_/sna tshogs gzugs can 'chang ba'i rdzu 'phrul can/_/'chi med rdo rje'i sku ru 'tsho gzhes gsol/_/srid pa'i 'pho ba mtha' dag d+hU ti'i dbyings/_/bdag byin brlabs pa'i cho gas thim gyur pa/_/rdo rje mi shigs nA da'i dbyangs snyan pos/_/sde snod rgya mtsho'i char chen 'bebs par mdzod/_2_/gzung dang 'dzin pa'i snang tshul ji snyed pa/_/'khor 'das dbyer mi phyed pa'i ye shes dang /_/mi phyed mkha' khyab mkha' yi rdo rje'i dbyings/_/rtag pa dam pa'i dge mtshan rdzogs gyur cig_3_/mdor na yon tan dpag bsam ljon bzang ni/_/phrin las 'dod dgur 'jo ba'i grags dkar bcas/_/srid na nub pa med pa'i ngo mtshar gtam/_/khor yug ri bo'i khongs su snyan pa dang /_4_/mtha' klas bstan dang 'gro la phan bde'i rgyun/_/rdzogs ldan sprin gyi 'dzum dkar las 'ongs pa'i/_/dge legs nor bu'i gru char rab g.yo bas/_/sa gsum bkra shis snang ba 'bar gyur cig_5_/sarba dA ka l+yA NaM b+ha ba tu//__//zhes pa'i legs 'bul gyi yi ge le tshan 'di rnams kyang phur bu zhes pa sa sprel lor mkhan chen rdo rje 'chang many+dzu shrI b+ha dra yul dbus 'gyur 'chang du chibs bskyod gnang skabs bka' yi cod pan spyi bor bcings pa la brten nas rig par smra ba many+dzu g+ho Sha'i blo mtsho las phyung ba'o//___//__!